Central YMA hruaitute’n BJP hotute an kâwm Bru-te ADC pek tiam leh tiam loh zawtfiah

Central YMA hruaitute khan BJP YMA hruaitute hian an duh dan an thlen bakah, inthlan turah RSS an inrawlh ṭan nia sawi te, Bru-te tan autonomous district council (ADC) an pek tiam nia sawi te, Chalfilh bialah Hmar hnam tan ADC pek an tiam nia sawi te, scooty leh laptop pek an tiam nia sawite an zawtfiah.

CYMA hruaitute hian kumina Mizoram Assembly inthlan awm turah political party-te ṭheuh kawm an tum a, nimin khan ṭanin, BJP pisaah an kal hmasa ber a ni. BJP pisaah hian an president Prof. JV Hluna’n a lo dawngsawng tura an ngaih laiin, a lo awm lo a, BJP general secretary leh Election chairman H Ramthansanga’n a lo dawngsawng. Hemi chungchangah hian CYMA President chuan, BJP President a lo awm lo chu inngaih pawimawh lohna a nih thu a sawi.

CYMA president Vanlalruata chuan, Mizoram inthlanpuiah mipuiin thinthíin vote an thlâk loh an hlau tih sawiin, inthlanna thianghlim awm se an duh a, chutiang tur chuan hma an la tih a sawi a, “CYMA chuan chibing anga kal hi kan duh ngai lo. Therhlo leh sum leh pai hmanga voter-te lei tumna ang chi tih tum loh ni se,” tiin BJP hotute a chah.

Vanlalruata chuan, October 28, Pathianni zana Aizawl Doordarshan chanchin tharah, Aizawl North-I biala BJP election information office hawngtuin scooty leh laptop pek a tiam thu puan a ni tih sawiin, BJP hotute chu a zawtfiah a; H Ramthansanga chuan, lo tiamtu chu BJP candidate zawk a nih mai theih thu a sawi.

Scooty leh laptop pek intiam ang chi chu Mizoram inthlanah a la awm ngai loh thu leh MPF pawhin an duh loh a nih thu sawiin Vanlalruata chuan, “Mizo mipuiah chuan khatiang kha kan tih ngai loh a la ni a, MPF pawhin nakinah kan la sawi mai thei. Policy-te hi chu sawi theih ka nei lo a, policy piah lama a therhlo lai rawn tawktarh ang chi hi kan duh lo a ni,” a ti a; party nihna angin dik taka campaign tur leh, tling tura an duhsak vek thu a hrilh.

Hnam chungchanga YMA leh NGO-ten duh dan an neihte chu BJP pawhin an hriat chian thu sawiin CYMA President chuan, “Chakma candidate neih chungchangah pawh thuchhuah leh ngennate kan nei a, chuti chung chuan in kal zel nite pawhin kan hria,” a ti. “Tun ṭum Mizoram inthlanah hian RSS (Rashtriya Swayamsevak Sangh) inrawlh tumna ang chite pawh a awm niin kan hria,” tiin, chu chu an finfiah thu leh a dik ngei tih an hriat thu a sawi.

RSS thil tih dan sawifiahtu CYMA vice president R Lalngheta chuan, October 21, 2018 khan Silchar-ah RSS-te’n Bru hruaitute an ko khawm tih sawiin, “BJP candidate 100%-a lo vote tura ṭan la turin an inchah a, a pawi kan ti a ni,” a ti.

R Lalngheta chuan, BJP candidate vote hrim hrim pawi an ti a ni lo tih sawiin, “Pawi kan tih zawka chu, hemi in tihlawhtling a nih chuan, Rs. 7,00,000 ṭheuh ṭanpuina kan pe ang che u ang a, chumi piah lamah chuan ADC pawh pek in ni ang, in neih theihna turin hma kan la nghal ang, tih an sawi lai kha a ni a, a ná kan ti a ni,” a ti a; RSS thil tiam chungchang chu YMA CEC-ah pawh an sawiho tawh tih a sawi.

CYMA Vice President chuan, sumdawnna atana politics hman a, Mizoram a chhiat ai chuan a tàwp thlenga an ṭan tur thu sawiin, “A ṭul a nih chuan tawrh pawh huamin hma kan la dawn. Kan President-in kawngzawh nía a sawi ang khan, kan thlan chauh a la far a, thisen chhuah ngai lo tur hian hawh u, i ṭang tlang ang u,” a ti.

RSS-te’n Bru-te hnenah Rs. 7,00,000 ṭheuh leh ADC pek an tiam nia sawi chungchangah BJP GS H Ramthansanga chuan, “Lo ti tâwk an awm mai thei a, dan theihna a awm chuan dan kan tum ang,” a ti a; Mizo hnam a him zawk nan 6th. Schedule hnuaiah Mizorama hnam zawng zawngte dah an tum thu leh ramri chinfel an tum thu a sawi.

Mizorama BJP hruaitu lawkte zingah hnam dang an awm chu CYMA-in a ngaimawh thu CYMA hruaitute’n an sawi chungchangah H Ramthansanga chuan, vice president-ah Chakma awm ve mah se, engmah a tih ve ngai loh thu a sawi a; treasurer-a hnam dang awm chu thlak a, Mizo dah turin Delhi-ah an thlen tawh thu a sawi bawk.

CYMA general secretary Lalhmachhuana chuan, BJP aṭanga Chalfilh bial viltu-in Hmar hnamte tan autonomous district council pek a tiam tih sawi a awm thu a sawi a, “Hei hi kohhran lamte pawhin an vei khawp mai. YMA chuan chibing politics hi kan duh lo. Tih palh emaw, tih luih palh a awm a nih chuan kan ṭawng chhuakin ka ring,” a ti. Hei hi Chalfilh bial viltu nia insawi Makimi Hnauhnar chuan chhangin, “ADC hi keini tiam theih a ni lo a, kan pek theih a ni lo. Chutianga intiamna a awm lo,” a ti.

CYMA finance secretary Fabiana Lalfakawma chuan, BJP-te chu an rál en lo tih sawiin, “Kan ep lo che u. Mahse, sum leh pai nasa taka chelek a awm palh kan hlau a, lo fimkhur ang che u,” a ti. R Lalngheta pawhin, inthlanah vote thlak tura tripura-a awm Bru-te phurh an remti lo tih sawiin, “Anmahni thua an awmna polling station-a vote an thlak duh a nih chuan a ṭha,” a ti bawk. BJP hruaitute chuan, Bru-te chu phurh khawm an tum loh thuin an chháng a ni.

Bru/Chakma ho hi hnawhchhuah vat an ngai a ni. Mizote tan hling lianpui an ni tawh tlat. Awmngaihna an hriat loh leh zel chuan dahṭhat mai a la ṭul awm e.

About Mizo Archive

I'm the one who collect the best writings of Mizos
Aside | This entry was posted in mizo archive. Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s