Sikserh vanga thi zat a tlahniam nasa 2018-ah sikserh vanga thi an la awm lo

National Health Mission (NHM)-in a enkawl National Vector Borne Disease Control Programme (NVBDCP) hnuaia sikserh dona lama hmalakna vangin kum nga chhungin Mizoramah sikserh (malaria) vanga thihna a tlahniam hle a; kum 2014-ah sikserh vangin mi 30 chuang an thih laiin, kum 2018 chhungin thi an la awm lo.

NVBDCP hian sikserh do danah district hrang hranga mipui zat, khawsik awm zat, malaria vei (PV leh PF) zat leh malaria vanga thi zat leh thil chi hrang hrang an chhinchhiah ṭhin.

Kum 2014 khan Mizoramah sikserh vanga thi mi 31 an awm a, kum 2018 (January-August)-ah erawh chuan malaria thihpui an la awm lo. Sikserh vei zat hrim hrim pawh a tlahniam nasa a; kum 2014-ah mi 23,105-in an vei laiin, kum 2018-ah chuan mi 2,905 chiahin an vei a ni.

NVBDCP hnuaia malaria leh dengue enkawltu Dr HC Thangkima, Health joint director chuan, Mizoramah malaria vanga thi titlem turin nasa taka ṭan an lak thu a sawi a; malaria vanga thite an finfiah dan sawiin, “Investigation kan ti vek a, damdawi treatment an pek dante kan endik a, uluk taka ka zir chian hnuah review meeting-in a pawmpui hnuah malaria vanga thi an nih thu Central-ah kan hriattir chauh zel,” a ti.

Malaria zingah malaria PF chu a hlauhawm zawk thu leh an thihpui ṭhin thu sawiin Dr HC Thangkima chuan, “Thingtlangah thi an awmin malaria vanga thi anga sawi tawp a awm ṭhin a, thisen exam loh chuan malaria vanga thi tih a hriat loh avangin finfiah leh phawt ṭhin a ni,” a ti a; malaria ûmbo turin ṭan an la nasa a, DDT kah, thosilên sem, in bul vela tui tling awm lo tura ṭan lak leh awareness campaign-te an ti nasa niin a sawi.

Dr HC Thangkima chuan, khawpui leh thingtlang khaw changkang deuhah chuan malaria a tlem hle tawh tih sawiin, “Hnam hnuai hnung deuhte awm tamna district-in min la pawt hniam ve thung,” a ti.

NVBDCP enkawltute chuan, malaria dona atan Central aṭanga sum an dawnte chu a tlem sâwt hle a, tun hmaa an dawn chanve aia tlem tunah chuan an dawng thei chauh niin an sawi. Kum dangah chuan cheng nuai 800 vel an dawn laiin, tuna sorkar kum kal laiah erawh chuan nuai 337 chiah an dawng dawn tih an sawi a ni.

An sawi danin, kum dangah chuan NHM hnuaia awmte’n Programme Implementation Plan an siam ṭhin a, chu chu NHM hotute’n sorkar laipuiah a thlen a, an ruahman ang chu Central-in a lo pe mai ṭhin. Kuminah erawh chuan Ministry-in ruahmanna a lo siam sa a, Mizoram NHM hotute’n ruahmanna an thehluh ang an lo pe thei lo.

About Mizo Archive

I'm the one who collect the best writings of Mizos
Aside | This entry was posted in mizo archive. Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s