VAWIIN ZOTHANSANGA THLAVANG HAUHNA KAWNGZAWHAH MIPUI AN TAM

September ni 7 zana Zarkawt tlangval Zothansanga chunga thil thleng avangin vawiin khan Zofate Insuihkhawm Pawl huaihawtin Aizawl khawpuiah kawngzawh a ni a, nizan khan Zarklawt Thalaiten kawng kawng an lo zawh tawh bawk a ni.

Kawng zawh tan a nih hmain Zofate Insuihkhawm Pawl te hian Khatla YMA Run-ah Federal Emergency Meeting an nei a. September ni 7 zana Zarkawt tlangval Zothansanga chunga thil thleng chungchang an ngaihtuah a, meeting neih zawh hian Khatla atangin kawng an zawh a, placard te kengin Zothansanga dikna humhim tur leh thil tisualtua puhte hremna pe turin an au rual. Aizawl PS kawtah kawng zawhtute hi an aurual hnuah Zar Zarkawtah Zothansanga te in bul thleng mipui pungkhawmte hian kawng an zawh. Vawiina Zothansanga thlavang hauhna kawngzawhah hian mi an tam hle a ni.

Zarkawt thalaite chuan nizan khan Zothansanga dikna leh chanvo humhalh a nih theih nan hnatlang an lo nei tawh bawk a. Dikna an duh tih lantirnan Posters te kengin Stickers te an sem a, Zarkawt thalai te hian an veng tlangval tawrhna hi an tuarpuiin, rapthlak an ti a. An veng mi mai pawh ni lo, Mizo mipuite he ramah hian kan him a, kan lo zalen a, Dikna a lal zel theih nan he hnatlang hi an huaihawt tih an sawi.

Nizana kawngzawhtute hian kan ramah dikna tundin a nih theih nan theihtawp an chhuah zel tur thu an sawi a, an thil duh leh phutte ziakin an tarlang.Zarkawt veng mipuite hian an veng tlangval tawrhna avanga FIR thehluh bawhzui a nih danah thil felhlel a awm niin an hria a. Vawin thlengin thil tisualtu nia puh hi charsheet a la ni lo chu hriatthiam har an tih thu an sawi a, he thil thleng hian Zarkawt veng mai ni loin Mizoram hmun hrang hrang leh Mizoram pawn thlengin Social Media lamah nghawng a nei lian hle a. Zarkawt Veng Thalaite thiltih thlawptu hi an tam hle niin an sawi.

Zarkawt Thalaite hian an mahni sum sengin hma an la a, Mizoramah dikna a lalber theih nan hetiang hnatlang hi an huaihawt tih an sawi. An veng tlangval tawrhna avanga an thiltih hi tlawmsan mai an tum loh thu sawiin a tawp thlenga kal an tum tih an sawi.