PAHMEI NUN

PAHMEI NUN

Kawmthlang nuthlawi, a nulat laia a en pawh kan en ngamloh Sangpuii ngei maiin a ka kut khal niap niap paha “Kei ang Nuthlawi hi min nei duh tak tak ang maw, min iai pawh nila ka dem hauh lo ang che, mahse Ka hmangaih che tih hi chu ilo hre reng dawn nia” a han ti ngaih mai ka hmuh chuan ka phuloh nia ka hriat ina chutia biahthu min hlan chu ka lawmin, lawm avang in ka biangah mittui a luanglo chauh ani ber e. Chutah, Sangpui kei zawk hian ka phulo che asin tih paha a khabe a vawn pahin a hmui sen ham mai chu zawi muangin ka han fawp a, ka kut awmna chu tlang pawng lampang ah ka sawn ang tih rilru ka put lai tak chuan Beng bulah

“A Pa, ka zun a chhuak”

tih pah a ka fa te berin ka bianga a rawn beng chuan mi ti harh zawkin ka mumang nuam leh thlakhlelhawm tak pawh chu ngaihtuah zui hman loin Patling hi zan laiah kan han tho tuih tuih a. Tawnmang lamah Nula leh Nuthlawi mal mum tak tak in biahthu min hlan fo mahse a tak ramah hi chuan Nula mai nilo mahni pawh kan inngaihtuah hmanlo achha chu ani e.

Zanlaia a naupangber khuma alo zun avanga mutbu kan han thlak a, mu tha manglo a kan awm chang a tamin, han mu tui dawn chauh ila, a Upa ber zing tlan tur a thianten an rawn auh avangin kan harh leh a, mitthip urhin khum lam kan han pan leh a, kan mu leh dawn chauh a, Zing lamah lah, dar 6.30 a rik tawh chuan a U lam 2 school kal tur, Mary mount a lut avang leh kan veng atanga a hlat em avanga kal hma thin ten ring leng lawng a “ A Pa, tiffin tur min siam rawh” an rawn tih tawh hi chuan a thawhloh theih tawh lohin mut lehna hun hi a awm ngai tawh silo..

Nia, mi mahin fa 3 chin chu a changchhiat thlak tia Nupa an tanrualna thin ang kha keimahin kan hmachhawn ani a, 3 ah pawh mipa hlir, chhang zing tak, chu a chhapah an pian hma a, mi an anglo ang tih hlauh avanga a nu lam Zawng sa kan ei tir vang aniange tih tur khawpa harh uchuak leh thaza tak tak hlir, Patling ina Nu tel hauh lo a han enkawl chu a hahthlakin mahni inkhawngaih chang leh patling mahni a room chhunga kan inngaihtuah lungpuam teuh chang hi a tam thin si..

Zing khawvar tirh atangin kan han buai tan a, ei rawngbawl, fate school kal tur siam paha thubuai rem, leh thil bo zawng reng reng a zingkar hman hi chuan zingkar hi a reilo in, karlo ah tukthuan kan han ei a. Faten school an kal liam hnu leh thenawm pa ina chaw eikham a, kuhva thial nuau nuau chunga Vanglaini chhiar chung leh Ciggarete zu chunga an thut muan der der thin lai hian kei erawh thut chu sawiloh, Vawih pawh vawih hmanlo khawpa buaiin, thleng seng, thleng sill leh a hnawk zual tifai reng reng in hun ka han hmang leh a. Office kal alo hun dawn a, hmanhmawh reng reng hian hun hi kan hmang in, a chang hi chuan hun ui avanga Chawei paha inthiar, hanawt chunga thleng sil, inthiar chunga inbual leh thil dang miin tih ngailoha an ngaih ang chi te hi kan tih chang a tam thin.

Chhunah Pisa lamah buai reng rengin hun kan hman zawh hnuah tlaiah kan han haw a, thawhpuite chuan in an thleng a, Nuber rawngbawl eiin in lam hi chu hahchawl nan an hmang. Kei atan erawh ani silo. Kan han haw a, a Upa ber chaw chhum urh rim nam rum rum kan han hre phawt a. Ka demlo, pawl 6 zirlai lek chaw chhum chu a Urh loh leh a nem duai fo reng ani, TV en pah emaw inkhelh paha an vil ani thin miau a. Chutah a naute 2 in ring tawkin cartoon anlo en a, an len loh leh sitting room tak maiah lehkhachhaih te siamin mau te anlo thel hnawk nuai mai thin, hah chu damlo tak ani..

Bedroom kan han lut a, khuma awm tur lukham te hi chhuatah a lo tla nuaiin, chhuata awm tur school form pheikhawk te hi alo khumah alo awm ang lawi a. School form hrang hrang hi a let nuaiin, han ren fel ila, nakin lawka an zawn leh ngei tur an mawza khing te hi thosi len chungah kan hmu in, school necktie te hi khum hnuai a kan hmuh nawlh nawlh chang tam fo thin..

Eirawngbawl turin choka lamah kan han phei a, bar ruk tih hriat takin bawnghnute phut hi alo tla var nuai a, a bartu an awm leh dawn chuan loh avangin tu tih nge tih pawh ka zawt peih lo.. Zing lam ka hmanloh thin avanga thleng sil loha ka kalsan te chu a siltu an an awm miau loh avangin a ngai ngaiin a lo let ang nuai a. Chhun lama hah thin nen lung hi a zing in mite anga In lam enkawltu Nu ber neih a chakawm thin hle..

Mipa rual awm chu chaw lam erawh a hek deuh in, chawhmeh tha hmeh thinlo mah ila chaw eitui loh a awm ngai meuh lo. Alu kanna taltu nih duh avanga chaw ei laia an han inhnek tawlh tawlh hi chuan Pa tan sawi tur avangin fate hriat loh hian rilru hi thui tak avak si thin. Inchhung ah hian invelh lohna chhan tur hi a awm lo emaw tih tur khawp hian engkim hi Indo na tichhuaktu ani si thin. Sa han hmeh ila, a sa tha inchuhin an invel a, TV en lahin chuti bawk, a hma in en miahlo mahse pakhatin a en tawh chuan thil dang en chakna pakhat rilru ah alo chhuak a, an invel leh nge nge thin. Pakhatin chawtlang leh chi pawh ei mahse a dang tana a tui hmel bik tlat hi mihring rilru herh zia min hriatchhuah tirtu ani si thin.

Kan chhungkaw chanchin hi thenawm khawveng titi leh fiamthu ani fo thin. Kan chhangchhiat zia leh chahchin maksak tak tak te hi mite tan nuihza leh fiamthu tha tak aniin, a taka tawngtu tan erawh chuan nuih lai tur avang si thin. A ka kaw nazawng lah hian Nupui nei leh rawh emaw awmpui la ru te hi an han tithla zen a. Heng ho hian Ka hlawh tlemte atang hian naupang 3 nitin school paitur leh thlatin fee, lehkhabu, pencil etc man bak ah nitin ei leh in tur lei a ngai tih an hrelo emaw ka ti thin. A tul ah chauh kan hman a, kei leh ka fate hi kan hrisel reng dawnlo ani tih ka hriat avanga damloh nikhuah atana ka khawl tlemte te han paih vek hnu chuan awmpui lakna tur hi ka hlawh atang hian a chuang tawhlo hrim hrim.

Nupui nei rawh tih te hi a sawi chu a awlsam, mahse kei baka ka fate hmangaih tu tur zawn hi thil huphurhawm tak anih baka, a duhtu hmu mah ila a an chhungten an phal alo ngai a, fanu te lawina atan kan In ang hi chu tu tan mah a itawm siloh. Bakah, hmeichhe fel tak pawh tawng mah ila ka fate hmalam hun ka ngaihtuah chang hian ka ngam thin silo. Mite tan chuan Pathlawi ka niin, kan chhungkhua hi fiamthu kan ni a, ka ngaihtuah chang hian heng zawng zawng hi ka thu awihloh vang ani tih ka hriain, nunhlui ka dawn kir hian inchhir in ka thlunglu ka dawm leh si thin.

Nia, nun ulukloh leh thuawih loh hi chu a pawi ani e. Ka han tlangval chhuak kha nula lamah ka nghal reuh in Khawtlang leh kohhran a inhman ai chuan len lam leh nula rim ka thlahlel zawk thin a. Kawppui lamah lah ka duhtui, ka duhtui han tih hian hmel lam ka sawi ani e, nula lian leh ngo leh tunlai an tih ang hian min hipin ka ngaihzawng te pawh an hmel a chhe ngai lemlo. Nula fel leh Kristian chhungkaw din pui theih tur ai chuan zan rei hnu pawh a ka koh chhuah a, Reiek kawng leh world bank road lama ka phurh liam theih tur ang ho hian min hipin, chutiang ho chu ka kawp hnem narawh.

Mihring tute pawh hian hmangaih hi chu kan tawng theuhin kan kawppui duh zawng ang chi ah hian a kan hmangaih zawng te pawh kan tawng thin. Kei pawh ka bang biklo, khatia nula hrang hrang ka lem kual hnu ah khan ka nula duhzawng ka tawng ta a, a hmel lah a tha in Mizo nula ah chuan a tluk an tam biklo ang an tih ang chi hi ani a ve a. Ka chhai tantirh dawn pawh in Kei tlangval ah pawh a chhe vaklo leh zei ve thawkhat an tih ang chi hi ka zam titih reng ani. Hmeichhia chu a chul nel peih peih an tih angin kei pawh chuan ka chul thlu thei ta a, a zeiin ngaihzawn pawh a nuam e. Mahse, ka duh a ka hmangaih nen ka chhungte leh thiantha te erawh chuan min duhpui silo.

Mahse, kei mipa luhlul tak chuanin tuma thurawn ngaipawimawh lo in ka Nu leh Pate thu anglo chuan ka han nei ta a, anlo hre dik zawk ania nge, kan buai ta fo mai, reilo te ah a hlimna zawk anih ringin, kan indang a, fa ngah a changkanglo a tih avangin nupa nun pawh fa 2 kan neih hnu chuan Anti-Virus tello chuan hman a phallo, kei naupang ngaina chuan fanu ka awh avang in ka thianpa trick hmanga tan la a Anti-Virus pawh a ruka ka cheh pawh lawk sa diam thin hnu chuan nau a han pai leh a, Nau a han pai leh khan insawifel a har tehreng nen tumloh takin mipa kan la han nei zui a, mama te 2 an pian hnu phei chuan kan chhangchiat, sum indaihlo chungchangah mi puh vekin, kan inchhung ah hlimna ni hmuh tur a tlem thin hle. Ka sawi thui peihlo, tichuan kan buai na tlansan a duh vang aniange Mipa dang lakah min uire sanin mipa dang min um san ta a.

Rilru ana in han inkhawngaih thin mah ila, a bul berah chuan ka tlangval lai nun ka hman ulukloh vang ani tih ka hre si. Tumkhat, Ka fate TV ka enpui kan pafa za a chhuata kanlo mu tlar riai ka Nu in min hmuh a, a mittui a tlak tum te kha ka ngaihtuahin Patling nih hnu pawh a chhungte rilru tina tu ka ni hi ka inthiam lo thin. Tunah te pawh kan chhangchhiat vanglai thleng mahse, ka nawmna ai chuan ka fate hmalam hun hi ka ngaih pawimawh angai tih ka hria in Nupui neih leh hi ka tum tawh lo. Hmeichhe tamtak in an fate an tulpui thei a, kei mipa pawh hian ka theihlohna tur ka hre biklo. Kum lamah te pawh kalo upa ve vat anga ka fate puitlinna hi ka thil tum lian ber ani tawhin, ka nawmna hi ngaihtuah ka tum tawhlo mahse khami tuma Ka Nu ina “Mama, Kawppui chungchangah hian fimkhur a ngai ka tih thin leh, I kawppui tur chu I mit nilo I bengin zawng rawh ka tih thin I ngai pawimawhlo kha chu a pawi ani e” ti a, a sawi khan ka ngaihtuahna ati kal thuiin ka nunhlui ka hman dan ah lungchhirin sawt tawhlo mahse hun liamhnu hman that leh mi ti chak si thin.

Author: NA

About Mizo Archive

I'm the one who collect the best writings of Mizos
Aside | This entry was posted in Fiction, Literature, mizo archive, Thu Ngaihnawm and tagged , , , , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s