Nomawi leh number 1 nih inchuh.
Australian Open hmeichhe singles final chu vawiin chawhnu dar 2:00 hian Rod Laver Arena, Melbourne Park-ah khelh a ni dawn a, Petra Kvitova leh Naomi Osaka te tan nomawi inchuhna a ni satliah lo, a chak zawk hi kar leha WTA ranking chhuak tharah chuan number 1 an ni dawn.
Player pahnih tan Australian Open final hi an vawi khat khelhna ve ve a ni a, Wimbledon vawi hnih champion tawh Kvitova tan hliam na tak a tawrh hnua final lian a khelh lehna hmasa ber tur a nih laiin, a khingpui tur Osaka erawh hard court inelna lian hnuhnung US Open champion lai a ni thung.
A harsa
Kum 2016 December thla khan Czech Republic-a an chenna inah Kvitova hi chemte hmanga beih a ni a, tennis a vuak thiamna ban vei lam chu zai a ngai hial – thla nga hnuah tennis court a rap leh chauh a, atan thil a awlsam dawn lo tih a chiang.
Seeded pariatna Kvitova chuan, “Taksa chauh a ni lo, rilru thlengin a harsa a ni. A nihna takah chuan ka bul hnaia awm mite hi engtia rin ngam tur nge tih hriat a har, a bik takin mipa hi rin ngawt an harsa,” tiin beih a tawh avangin a thlamuan nghal mai theih loh thu a sawi.
hliam neih chungchang sawi zawmin Kvitova chuan, “Khang hliam neih hun lai kha ka tan chuan a harsa hle, tunah chuan khang thil thleng te kha min ti chaktu zawk an ni tawh. Zin kawng harsa tak zawh tawh thlah nan nomawi chawi ka tum dawn a ni,” a ti.
A pawimawh
Japanese player zinga Grand Slam champion thei hmasa ber Naomi Osaka chuan a naupan lai aṭangin inelna lian chu a ngaihnat thu a sawi a, tun ṭumah pawh hian tawnhriat ngah zawk Kvitova hmachhawn tur pawh ni mah se dah hniam theih a ni bik lo.
Kum 21 mi Osaka chuan, “Grand Slam ka ngainat zia chu in hria a, kan naupan lai aṭangin ka en nasa a, he hmunah ngei hian inkhel ropui leh hmuhnawm a chhuak ṭhin. Ka tan chuan final hi tun tournament chhunga thil pawimawh ber a ni dawn, ka tih theih sang ber thlentir ka tum ang,” tiin a sawi.
World number 4 chuan sawi zawmin, “Kvitova nen kan vawi khat intawnna tur a ni a, ani hian Grand Slam final a khelh tawhah chak loh a nei lo tih pawh ka hria, mahse kei pawh champion tumin ka inlan a ni,” a ti a, ranking ai chuan nomawi chawi hmasak a ngaih pawimawh thu a sawi bawk.
La bawitlung.
Mizo Archive 