ENVELOPE THURUK

He thawnthu tawi, lungkuai tak hi lo chhiar ve teh aw. Thilṭha titute chu Lalpa’n a hrereng ṭhin asin.

Tuna ka awmnaah hian ka hnathawhna khua a nih avanga awm ka ni a. Khawlian lo tak mai a ni a. In leh mihring kan tamlo em em mai a. Kan inhre hneh hle nghe nghe a ni.

Kan khuaah chuan sawrkar hnathawk tlem kan awma. A bak chu lo nei a eizawng vek an ni a. Dawrkai pu Țhianga a awm bawk a. A ni hi retailer nih nen a fawm a. Kan khuaah chuan a hausaber a ni a. Supply a thiar vel nan jeep a nei bawk a. Chu chu kan khaw hoin zin veivah nan ber a kan hman a ni.

Kan khua hi a tet ang bawkin mihring kan inhrechiang a. Misual an awmlo hle a. Kan sum lakluh thlenga kan inhriatpui avang hian mirethei leh hausa te hi kan in hre ru them a. Mahse in enhranna kan nei ngailo. Chu chu a nawmna tak pawh a ni.

Kan khuaah hian kan khaw ti nuam tu thil mak a thleng thin a. Chu chu engdang niloin mirethei deuh te leh mamawhtu te hian tu hnen atang nge tih hriatloh hian an mamawh lei na tur pawisa an dawng leh nawlh thin a. A pe tu hriat theih miahloh tur hian zan an mut laiin an kawngka bulah envelope in an lo dah thin a. Zing an thawh in anhmu chauh thin a ni. Chutiang chu a khat mawi tawkin a thleng thin a. Pawisa awmzat erawh a in ang ngailo. Lehkha ziak engmah hnutchhiah a ni ngailo a. A dah tu chuan a dawngtu tur dik takin an dawn theih nan a kawm a an hming a ziah chu a ring tawk a. Midangin lo hmu hmasa mahse a bo dawnlo tih a hre chiang hle a ni.

Hetiang thil a thlenna hi a rei tawh a. Tumahin rinhlelh tur an hre bawk silo a. Mak tiin kan sawi ru sep sep a. Hetianga thiltha ti tu hi hriat kan chak hlawm hle thin. A chang chuan mipakhat thil tih a nih te kan ringlo rum rum a. A chang leh mipakhat bak a nilo ang tiin kan rilru kan han sawh sawn leh thul. Tunge ni ang tih chu kan bang bo hle a. Kan khua a mihausa ho chu kan han ringhlel ringawt hlawm a. A chang leh kan kohhran upa te kan ringhlel bawk a. Tlem a che thei deuh tawh phawt chu rinhlelh an kai em em mai zel a. Keipawh zirtirtu lai ka nih avang leh kamding tlemte zing a mi ka nih avangin rinhlelh kai zingah ka tel ve a. Mahni nihlohna pui a min ringhlel chu a nuam miahlo a. Mahse chutiang khawp a mifel ni tura min ngaihna thinlung erawhin min ti lawm si.

Vawi khat chu kan khaw sumdawnglian pu Țhianga chu damlohna avangin Aizawl lamah a kal a, nupa rek chauh a awm an nih avangin an buai hle a. A nupuiin a zui a. A natna chu a serious deuh a ni ngei ang an cham rei ta riau mai a. Thla khat dawn hnuah an lo let a. Mahse rei pawh kan khuaah an awm hmanlo in entir tur bawk chuan an kal leh ta a. Chutiang chuan a kum a kum zet mai an in enkawl ta a. Sumdawng an ni a. Thla tin a hlawh la an nih loh avang leh an damloh avanga an dawr an enkawl theih takloh avangin an dawr chu a kawt a ni ta mai a. Kum tawp lamah phei chuan an jeep pawh chu kan headmaster hnenah a hralh ta hial a. An chhungkaw chet chu a buai ngei mai. An jeep man pawh chu an tlan zo leh vat dawn tih a hriat reng mai a.

Chutih lai chuan kan khuaah titi mak deuh a lo leng a. Pu Țhianga damloh atang khan tute mahin tanpuina pawisa an dawng tawhlo a. Tute mahin an inkawtah envelope a pawisa awm an ta tur an dawng tawh ngailo tih chu tupa in emaw alo sawi chhuak a. Mi awmkhawm naah tawh phawt chuan an titi ber a ni chho ta a. Tunge miharsa te tan pawisa lo dah thin a. Tunge mifel inthup chu kan rin hriat ta ruak mai a. Kan han titi na reng rengah chuan a ni kha a ni ngei e ti a sawi dawt chu awmlo mahse amah ani tih kan hre chiang viau hlawm niin a lang. Tute mahin i tanpui ve ang u tiin kan sawi lemlo a. Nguaina mak tak hian kan khua chu a uap churh a. Mitin hmelah chuan enge maw tih ve duhna hmel a lang vek ni hian ka hria.

Pu Țhianga te pawh beidawng takin Aizawl atang an lo haw leh tawh a. An rawn haw tuk atang an nu chu an serthlum huan hralhna zawngin kan khua a a nei nung deuh inah chuan a lut kual zut a. Mahse tuman leisak kan tumlo. An pa in entirnan pawisa an hmang zo tawh tih kan hrethiam vek a. An thil neih an hralh loh chuan kal leh ngaihna an tan a awmlo a ni tih pawh sawilo mahse kan hrethiam vek a ni. Chumi zan chuan an nu chu biakin ah rei tak a han tawngtai tih pawh kan hre ru vek a. Zing khawvar hma thleng a meng a ni tih pawh kan hre ve vek a ni.

A tuk zing pu Țhianga nupui zing tho chuan an inkawt a envelope tam tak lo let phung mai a hmuh chuan a hamhaih lutuk chu a thidang lek lek hial e an ti. Envelope ah chuan pawisa kan neih ang tawk kan dah vek a ni ngei ang. An thenawm a pawisa chhiarpui tuten chutiang reng a tam chu kan khua angah kan la hmu ngailo e an ti.

Khami zan khan keipawhin an nu tawngtai kal ka hmu a. Ka zan leng haw tur nen a haw lam kan intawk leh a. In ka thlenin ka pawisa khawl zawng zawng a bo a bang awmloin envelope ah ka dah a. Tukin a an nu serthlum huan rawn zawrhna man let thum zet a tam a ni tih ka hria. Mahse ka ui tlatlo a. A ruka pe ve thei dinhmun a ka ding kha ka lawm em em a. Ka rilruah pawh pe tura min turtu nasa tak ka nei ve bawk a. Ka neih zawng zawng kha pe lo thei ka nilo. Serthlum huan te kha min rawn zawrh ngei a. Mahse leisak la tumlo. An damlohna avangin engmah chan leh tawhlo se ka ti a. Midangin anlo leisak palh a nih pawhin khul sak leh ngei ka tum tlat a ni. Ka rilru ang chiah hi midang rilru put dan pawh alo ni a. Kan sawi khawm leh hnuah kan hre chhuak chauh a ni. An mut hnuah an kawngkhar bula envelope va dah tum ka ni a. A nupui meng rei em avangin ka tlaivar phah hial a. Envelope ka va dah chuan envelope panga vel pu Țhianga hming inziahna hi alo awm tawh a. Ka haw lamah kan head ka tawk a. Khawnge ka kal min zawt a, zing exer ka lak thuin ka chhang a, mahse a rin ka ringlo, thlasik laiah zing dar 4 vel khawvawt hnuaiah leh khua la thim laiin kei exercise la ngailo hian tukin a taka ka lak a rin chu ka ringlo. A ni pawh chu khawnge a kal dawn ka zawt a, a muhil theilo a teiharh anih thuin min chhang a. Thlasik khawvawtah zing khawthim lai lehnghalin a teiharh peih ka ring biklo. A tih tur awm ka ring thiam nghal vek.

Kum khat a liam meuh chuan pu Țhianga pawh a dam tha leh tawh a. An sumdawnna pawhin ngai a awh leh tawhin retailer hna pawh a chelh leh tawh a. Kan khuaah pawh envelope dawng an awm leh ta zauh zauh a.

Kan khaw ho chuan pu Țhianga damlo kha Pathianin aruka a thil tih, tuma hriatloh tura a tih thin kha, midang hriattir a, pu Țhianga chu chawimawi a tumna niah kan ngai ta hlawm a.

ZIONA ZAHAU Fr Fb

About Mizo Archive

I'm the one who collect the best writings of Mizos
Aside | This entry was posted in mizo archive. Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s