A PUMPUI TLANGCHHAH LEH A RILPHIAR KHA KA LO SAWISEL E

A PUMPUI TLANGCHHAH LEH A RILPHIAR KHA KA LO SAWISEL E
Lalnunmawia Pachuau

Tlém lai deuh khan Hnamrûnah kan Chief Minister ni mék Pu Zoramthanga’n a pumpui tlangchhah leh a rîlphiar fatu hovin an chan thin chu mipuiin an sawisèl ngai loh thu a sawi chuan sawi zui a hlawh hle mai. Social media lamah pawh chai a hlawh nangiang a, mi tamtakin ve tur rêngah an ngai a, thenkhat erawh chuan nasa takin an sawisel thung. A chhan bulpui ber chu kan politics kalphungah party workers leh chhungkhat laina induhsakna uchuakna te, opposition bial development kawnga inhrêkna te hi dan pangngaiah kan lo ngaih laklawh tawh, kan politicians ten an lo kalpui rei tawh lutuk vanga kan thanhnan a nih vang a ni.

Mi ropui ten enge an sawi ve? Kan kalphung hi ngaihtuah chian chuan thil tenawm tak, ram hmasawnna kawng daltu lian tak leh ram sawpchhiatna hmanraw hlauhawm ber a ni zawk tih hi kan hriatthiam a tha ang. America hruaitu ropui Abraham Lincoln-an, ‘sorkar hi mipui te ta, mipui ten an mahni tana an siam a ni’ tiin chiang takin a lo hrilhfiah tawh a. Mizo ten A AW B kan neih hma kum 1863 daih tawh khan America rama saltang rual te zalenna dar a lo vaw tawh a, mihring te hian an damchhung tawitè ah hian zalenna leh hamthatna rualkhai taka an neih kha a thupui ber a ni.

John F.Kenedy kamchhuak te kha Zoram thalai te hian hre lo kan awm lo ang. ‘‘Ka ramin enge min tihsak theih’ tih aiin ‘ka ram tan enge ka tih ve theih’ tih hi kan inzawt zawk tur a ni’’ tih te chu kan thinlung phêkah hian a inziak chiang viau a, tuna kan hruaitu pa ber thusawi nen chuan chhim leh hmar anga inpersan a ni. An rorèl danah an mimal hamthatna te, an chhungkhat hnâivai leh party-a thawkhah te invulh lam a lang ve lo a, an mahni dodaltu te ngèi pawh ram tan mi tangkai tur an nih chuan mawhphurhna sáng tak an pe mai a ni. Hei hi khawvel arsi lian ten ram an lo hruai thin dan chu a ni.

Tuna kan kalphungah hi chuan mahni tanghma hâi duh vang leh sahmîm hrâipuar duh vànga hamthatna hmuh tum kan ni furin a lang. Hei hi kan ram politics kalphung dik lo tak, India ram politics chhe lutuk kan lakluh vang a ni. Ram tan ni lova mahni mimal hlawkna atana politics kan luhchilh thin vàngin kan ram hian hmasawn lam a pan thei lo chu a nih hi.

Fatu ho chan a pumpui tlangchhah leh a rilphiar chu enge ni ta?

Kan pu ber hian a lo sawifiah thiam ber e. Contract therhlo beiseia politics luhchilh hi he kan ramah hian tiau vaivut zat zet an awm ta ve ang. Khawtlang hnathawhna sum a lo awmin SDO, BDO, etc., te aiin Unit level-a President te chuan thuneih kan tum ta thin a, development fund lo kal chu unit, group, block leh ruling VC atangin a tam thei ang ber lo sâwk kan tum ta thin a ni. Arpa chan láia inhaivûr tum thah kan nih vang hian hlawkna kan inchuh ta thin a, keimahni party chhungah ngêi pawh innghirnghona a chhuah phah chawk thin.

Work tender a lo chhuak a, chanchinbu-ah pawh advertisement chhuah pumpelh hram tumin construction work lama experience nei ngâi rêng rêng lo party workers te kan han pe ta thin a. Tichuan work order an han pawtthla a, a tam zawkin midang hnenah hralhin vawi ruk/sarih vel an hralh chhawn kual hnuah a tawpah rûn dâlah an han thawk ve ta thin a, hman tlak loh, luah tlak lohah kan chhuah ta thin a ni. Hetiang hian fatu ho te chuan mipui sum, a pumpui tlangchhah leh a rilphiar te chu an lo in sem sawm ta thin a, he ram hi engtianga dingchhuak tur fakauvin nge kan la beisei ngam le?

Khawtin leh vengtinah hian Unit, Group, Block thlengin kan inchherchhuan a, membership fee kan pe bawk thin. Hei hi ram development chungchanga inthliarna siamtu, system chhe tak kan ti thei ang. Ruling party member ni lo tan chuan mimal tana hamthatna lo kal te pawh beisei ngam chi a ni ve lo a, inthiar hranna a awm thin a ni. He system hi tun election kalta ah khan ZPM khan nuaibo tumin ‘steering committee’ kha indin chawpin an policy an zuar tawp a, member fee pawh ngai lovin thalai te kha an hîp viau a, lo indin rei deuh nise an hlawhtlin a rinawm.

Sorkar hna te hi thalai te hian kan tinzawn lo thei si lova, post ruak tlémte hnawhkhahna turah pawh thalai sâng chuangin dilna kan thehlut thin a nih hi. Mahse, political fitness hian hmun pawimawh tak a la chang mék a, Hnamrûn leh Bhavan zuankhum ngái sorkar hna lak hi a la awm nual tih hai rual a ni lo. Theihna zâwn theuhah duhsak záwng te a rilphiar leh pumpui tlangchhah barh kan la tum mék zel a nih hi.

Thalai te hian engkim hi kan hrethiam tawh a, ram changkang angin partnership firm te, co-operative lamah te hlawhtlinna hmuh a la harsat mai bakah kan ram lo hruai tawhtu leh hruai mék tute hian policy pui berah an nei ngai lo bawk. Market system tha leh mumal kan la nei ngai lo bawk. Kuthnathwktu te hlawhchhamna hrethiamtu thalai te hnena kuthnathawh uar tura inzirtir te hi arpui hnena lunghlu pêk aiin awmzia a nei thui lo zawk ang. Chuvangin tuna kan kalphungah hi chuan thalai lehkha thiam tak tak te tan hian kawng ping takzet a, mahni sum lakluh leh hlawh mil lova khawsa te dingchhuak an hmuh te hian an moral hi a eichhe mék bawk.

Fatu te hi an demawm em?

Kan kalphung thalo lái te han sêl barh barh thin mah ila, Zokhaw lamah hian eizawnna tha duhthlan tur a awm lo tlat a ni. Patling, nupui fanau enkawltu te hian lo neih leh kut hnawthawha eizawn tawp mai hian dinchhuahna kawng a awm lo tih an hrechiang. An thlàithar hralhna awm loh vanga tawihral zozai thin mittui nena thlir liam thin tute an ni. Chuvangin an tana kawng awm chhun chu politics khelha, vanneih thlak taka tlin hlauh chuan contract tènau atanga hlêp lo neiha fate school thaa kal tir te, in leh lo thawmthat te, eizawnna tenau bul tanna atan hman ve hi an duháisam ve a ni. An dinhmun hi ngun taka ngaihtuah chuan an tan duhthlan tur kawng awmchhun a ni thei tlat a ni.

Enge dik lo lai chu ni ta? Lui tui rèng rèng hi a hnár a fîm chuan a mawng lam hi a nu phût ngai lo. Chutiang chiah chuan ram kalphung hi a lêr atanga a kal dik chuan a hnuaihnung lamah pawh a kal dik mai thin. Hruaitu ten a chhîp atanga her dik an tum tlat loh chuan a mawng lam chu kan buai nak nak a, kan nu bulh bulh chu a nih mék hi. Tuna kan dinhmunah chuan party workers, fatu ho te hian a pumpui tlangchhah leh a rilphiar hi kan inchuh rap rap thin a, kan party policy, manifesto point khat pawh sawi thei lo hian election dawn hnaihah hamthatna beiseiin a tling tura kan rin lamah luangthli chhemnghîn angin kan thlekawi mai mai thin a ni e. Kan MLA leh Minister te hausakna pun chak dan han hriat te hian kan ramah hian politics hi eizawnna hlawk ber ti ila kan sawi sual lovang.

Ni e, kan pu ber thusawi hi kei chuan ngawihbo pui mai mai chi ah ka ruat lova, rorelna dik leh kalphung thar duhtu tan chuan ngaihzam mai mai chi a ni lo. Amaherawhchu, a sawitu te atang hian beisei lo neih sàn viau chi a ni em tih erawh ngaihtuah peih te tan dah ta ila. Pathian leh kan ram tan titu te hnena mipuiin rorelna kum 10 chhung zet kan lo hlan tawh lai khan, an dinna theihnghilh thak khawpin an rorelna a chîrî a, mipui hnenah ngaihdam an dil hial a! Tunah thuneihna an kuta kan hlan hlimchhawnah fatu hovin a pumpui tlángchhah leh a rîlphiar an chan tur thu a puang leh ta mai hian an lakah hian beiseina sáng tak neih a har takzet a, a thusawi hi a tak rama a chan chhoh zel phei chuan kum sângkhat ral hnuah pawh khawizû leh hnute tui luanna ram hi kan la thleng pha lovang tih a hlauhawm hlel lo ve.

About Mizo Archive

I'm the one who collect the best writings of Mizos
Aside | This entry was posted in mizo archive. Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s