LOK SABHA INTHLAN THLIRLETNA 2

  • Matana Pachuau

Thlirletna 1-naah khan Vanglaini tih dikloh leh Editor leh Jt Editor ten an tihdikloh kan sawi a, an dawnsawn leh respond dan diklo pawh kan sawi a. Ti dik tura hma an lak zel chuan tihsual atanga inzirna tur tha tak a ni anga, Mizorama journalism hrim hrim pawhin hma kan sawn ngei ang.

Vanglaini hian MNF chhinchhiahna chauh kha a chhu diklo lova, independent candidate dang pakhat chhinchhiahna pawh a ti diklova. April 11, zing dar 8:30-a ngaihdam dilna tihchhuahah khan a tel lova, a tukah erawh a tel. PRISM party candidate in CAB do letnana a auchhuahpui Right to Secession Bill chungchanga mi pakhatin “thu dik ziktluak lo hmang a mipui nawlpui thluak suk a mi rilru hruai pen vak theih”-naa puha article a ziah kha Vanglaini khan inthlan tukah a chhuah bawk a. Ngaihdan huang ami a ni nain party chhinchhiahna diklovin mipui rilru a tibuai thei ang thovin khatiang thuziak chhuah khan mipui rilru leh a vote tum dan a tibuai thei a. Thuphachawina emaw acknowledgement tal a awm lo khan Vanglaini lamin professionalism lama tan an lak a tulzia a tilang bawk awm e. Right to Secession Bill chungchang hian sawi a hlawh a, sawizui tur reng pawh a ni a. Amaherawhchu, PRISM tan chuan Vanglaini in inthlan tuka khatiang article an chhuah kha thil lawmawm loh tak a ni ang. April 11 tuka chhuak turah khan tu emawin Congress leh ZPM party boruak, miin an candidate an vote chakloh phah theihnan bihchianna ziak ta vak se, lo chhuah ta bawk se a bias tiin ZPM leh Congress lam chuan an lungawilohna an lantir ngei a rinawm.

Sawi tawh ang khan Vanglai chuan a ti diklova, thupha an chawi a. An insawifiahna hi kan pawm emaw pawm lo emaw an official-a an insawifiahna a ni a. Ngaihtuahna ti thui deuh zawk erawh chu hetiang “political sin” ni-a langah MNF lamin dan hmanga an bei chiam hi a ni. Vanglaini editor leh joint editor te hian dan bawhchhiat an nei a nih pawhin hetiang politics boruak chhe thlenna thil hi politics veka chinfel atana tha zawk a ni a. ZPM candidate chungchanga thudiklo leh intihhmingchhiatna thuziah zawng zawngte hi dan hmanga chinfel tum ni dawn se MNF lam hian an zo lo zawk mai thei a ni.

In lo chik chuan inthlan tuka MNF President an kawm khan a thinrim (hmel) hle a. Thinrimlohna chi pawh a ni lova. Mahse, khami darkar-a a sawi thenkhat kha amah ngei pawhin a dik nge diklo tih a hriatloh, a ngaihdan thudik anga a sawi te a ni a. A pawlte thinrim tizual tur ang maia Vanglaini lamin an sual vanga tiluia a puhna khan FIR thlengin a nghawng ta a ni ber awm e. A ti diklo tu lam an demawm a, a tuartute lamin an lo dawnsawn dan leh an react dan pawhin buaina a ti punlun a tihloh theih loh. Ram hmasawnna lam a la kawklo zel tihna a nih chu.

MNF MP candidate election agent in FIR a thehluh khan an party hruaitute hriatpuiin a ti nge tilo kan hre mai lova, party hruaitute hriatpui leh pawmpuinaa hmalak lo ni tase an thuah a dah theih anga. Returning Officer in FIR a thehlut erawh kha chu thil mak ve tak chu a ni. Mizorama inthlan kan lo neih tawhah hian tihdikloh tam tak a awm anga, mahse RO in police hnena FIR a thehluh hi a la awm kher lovang. (A lo awm a nih mial chuan khawngaihin min han hrilh hria ula)

Vanglaini in an tan lam tana hlawkna tura ngaih theihin inthlannia an thil chhut diklo leh article an chhuah te kha ZPM leh Congress lam bias-na a ni kan tih chuan MNF sorkar-na hnuaia Aizawl DC (RO ni bawk) in sorkar lai party candidate khingpui tana thalo thei tur zawnga hma a la kha mi tam tak chuan an dem ang. RO-in FIR a thehlut phei kha chu RO kha political activist a ni ta emaw tih mai turin MNF lam tana thil ti ang maia ngaih theih tura sorkar official hmalakna a ni a. MNF thlantlin an nih, sorkar an la siam hmaa Mizoram sorkar official ten Congress sorkar hmalakna NLUP an “suspend” te ngaihtuah phei chuan RO Pu Vanlal Ngaihsaka hian MNF party hruaitute atangin “thupek” a dawng emni tia zawhna pawh a awm thei awm e. Mizoramah sorkar hnathawkten an political boss te an hlauh thinzia kan hria a, Pu Michael Lalmanzuala te anga Chief Minister meuh pawh hnial fithlathak ngam an nih vek loh chuan kan sorkar hnathawkte hi an “vulnerable” thin viau a ni.

Mak lehzel chu kan police officer in charge in politically motivated FIR a lo ngaipawimawh em em kha a ni. Kan police te hi chhuan tur an ni a. An inpekna te pawh a zahawm. Kan khawtlang min venghimtute an ni. Amaherawhchu, sorkar hmasa ah te pawh kan lo hriat tawh angin dan bawhchhiatna lian tak tak thila FIR thehluh a zuzi thin te kan ngaihtuahlet chuan ruling party in dan hmanga hrem an duh candidate leh Vanglaini editor te hremna tur dan bung leh chang phawrh tur an hre hma lutuk te kha a mak a tih loh teih loh. He thuziakthu hian FIR hi a lo thehlut ve tawh a, police hotu lian ber ber te pawh be pawpin dan bu meuh keuvin FIR register tur an nihna te hrilhnawnin a lo bei ve tawh thin a. An man NGAMLOH chu danin a phut anga man an TUM LOHZIA hi chiang takin a lang tawh thin a ni. Chu’ngte avang chuan kan police te hi rin duh viau pawhin rin an har thin hle a ni. An inenlet a ngai a nih chu.

Vanglaini thil tih dikloh hi a kual thui ta khawp a, a lantir chu Mizote hian politics kan hmelhriat tirh atanga politics hman dan dik leh tha kan la zirlohzia a ni awm e. Pu Zoramthanga berin a hote thinrimna “exploit”-a a political opponent te dawt nge thudik tih pawh a hriatloh hmanga a puh atanga khan a punlun tawh a, “Hetiang hian lo ti rawh u” pawh ti miahlo mah se kan Aizawl RO leh Aizawl PS OC te tan chuan Pu Hawla laka FIR thehluh tih zuzi ang mai mai anga lo tih zuzi chi a nilo a ni.

Vanglani hi an bias bakah an professional lova, bias lo leh professional taka an in din chhoh leh a pawimawh. An thil tih dikloh leh an article chhuah te pawh a thalo. Mahse, hetiang hi politic bawhchhiatna a ni a, politic vek hmanga chinfel chi a ni. Sorkar lam atanga bias taka thil tih kan hmuh mek erawh hi chu thil thalo leh hlauhawm tak a ni. Ruling party pawisawi laka sorkar official leh police lamin action an lak zat zat bik chuan equal justice a awmlo tihna a ni.

About Mizo Archive

I'm the one who collect the best writings of Mizos
Aside | This entry was posted in mizo archive. Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s