Sudden Law of the Lariat (Mizo Version) 9

SUDDEN LAW O’THE LARIAT
CHAPTER-9
Severna chuan mahni maia vah vel a phal tlat loh avangin Phili chu a lungawi teh chiam lova. Mahse Larrya nen ni thum vel an inzui chhuah hnuah chuan pawi a ti tawh lo hle a. An pahnih chuan an la tleirawl dun bawk a, an titi sawi duh zawngte pawh chu a inang hle zel a, sakawr chung chuanga an vah velna ah te pawh chuan an hlim dun hle thrin a.

Sakawr atanga an chhuk apiangin Larrya chuan a rifle chu a keng ve ziah mai a, chu chu Phili chuan tul lo ti niawm tak hian, hlauh tur engmah a awm ka ring lo, mahni pawhin ka him tawk thovin ka ring, i tan a hun khawhral thlak mai mai niin ka hria,” Larrya hnenah chuan a han ti a, Larrya chuan awmze nei deuh fe hian, “Chu, lo kal lo zawk se min tihna em ni?” a lo ti deuh ha a. Chutih lai tak chuan an mit leh mit chu a intawng hlauh a, Phili chuan engtin emaw tak a ti deuh huih hian a inhria a, a biang te chu a lo sen tawn tawn mai a, chutah engmah pawh sawi lovin a sakawr Lakam chu Larrya chuan a rawn man leh ta nghal a.

Phili chu a han hawi vel a, an piah ruam mel khat vela la hlaah chuan sakawr chung chuang paruk te chu a va hmu ve ta a. Chung mite chuan an hmai chu puan varin an tuam theuh a, Phili te chu an rawn hmuh veleh an sakawr chu an lam pan chuan an rawn tlan chak tir sauh a, Phili chuan zam tih hriat tak hian White Masks ho an ni maw? a han ti ha a. Larrya chuan an nih dawn saw, min um tum chiah pawh an lo ni lo maithei a, mahse tlanchhiat thuai chu a tha berin ka ring” a lo ti a. Tichuan an sakawrte chu Ranch in lam panin theihtawpa chak chuan an tlan tir ta nghal a.

An hnung lamah chuan au thawm a hriat avangin Larrya chu a va lehhawi a, hmaituam ho chuan theihtawpa chakin an rawn um zel a ni tih chu a hre ta a. Rei teh chiam pawh an la rawn um hmain hmaituam ho chuan an rawn umpha ngei dawn tih Larrya chuan a hre ta bawk a. A rilru chuan Sakawr an nei tha zawk si a, in chu kan thleng hman dawn lo a nih hi a ti a, mahse Phili hnenah chuan engmah a sawi duh hlek lova. Phili nen chuan a rualin an tlan dun zel a, an sakawr te pawh chu an hah hle tawh a, Larrya chu vawikhat a lehhawi leh a, a hma ai mah khan a umtute chuan an rawn hnaih tawh a, chutih lai chuan silai a han ri ta a. Amah ni lovin Phili chu an duh vanga rawn um anni ang tih larrya chuan a hre reng a.

Silai vawikhat a han ri leh a, chu veleh Larrya sakawr chu mamal lo tak hian a tek kual a, a tlu ngei dawn tih larrya chuan a hriat veleh sakawr atang chuan rang deuh maiin a zuang thla ta nghal a, a sakawr pawh chu a awp rawp a, reilote a han tal kual a, a thi ta nghal mai a. Phili chuan a sakawr chu a han pawt ding a, mangang beidawng tih hriat tak hian, “Larry an rawn kap ang che” a han ti a. Larrya chuan “Ranch lam panin tlan nghal thuai thuai rawh, reilo deuh chhung chu ka lo ti muang thei ang” a han ti a. Mahse Phili chuan “an rawn kap hlum mai ang che’nga sin ka hnung lamah hian lo zuang kai ve mai rawh” a han ti a. Larrya erawh chuan “kan chuan dun zawngin ranch kan thleng zo lovang kei chu engatan mah min ti lo, nangmah a ni an duh che ni. Ranch chu va thlen thuai tum la, tin, Severna hnenah khan theih tawk chuan ka bei ve e – tih han hrilh ang che” a han ti leh a.

Phili chuan hreh tak chungin Larrya chu a tlan san ta a, a tlansan hma chuan “Larry i thil tih hi ka hre reng ang engtikah mah ka theihnghilh ngai lovang” a ti te te a, a tlan ta nghal a. Phili sakawr chua tlan liam veleh larrya chuan a rifle chu a phawi chhuak a, sakawr ruang sirah chuan a han bawk a, a mah rawn umtute sakawr pakhat chu a kapthlu ve pang mai a, chung ho te chu Larrya awmna atanga yds 600 vela hlaah chuan an ding khawm a, Larrya chu vawi hnih zet an rawn kap let ve a. Phili pawh chu um tum awm pawhin an lang tawh lova. Pahnihte chuan Larrya chu an rawn kal hual tum niawm tak hian an sakawr chu Larrya sir tuakah chuan hla fe atangin an rawn hel phei ta a.

Larrya chuan chu chu a hmuhin hnung lam atang mi rawn leh beih an tum a ni maw? a han ti a. Mahse a tan chet sawn leh ngaihna a awm tawh silo, a chhak hnunglam deuhah chuan tlangpawng te tak te hi a awm a, chumi phen atang chuan an rawn bei dawn a ni tih larrya chuan a ring nghal mai a, Mahse engmah tih theih a neih tawh loh avangin mei a han tan kai a, a chunga thil lo thleng tur chu a nghak ta ngawt mai a. Darkar chanve zet a ral hnuin a chhak tlang atang chuan “I Rifle kha paih la, i ban phar thuai rawh,” tih ri Larrya chuan a hre ta a. Larrya chu a ding a, a rifle chu a dah nghal a, a kawnghren pawh chu a phelh a, leiah chuan a han thlauh thla nghal a, mahse ban phar mai lovin mei pakhat a han zial leh rih a, thupetu hnenah chuan “Lo chhuak ta che” a han rin tih ngawt a.

Tlangpang atang chuan hmai tuam pahnih hi an lo chhuak a rifle-a tin reng chungin Larrya chu an rawn pan thla ta a. A hmaa thu rawn petu bawk chuan “Ban phar turin ka hrilh tawh che a ni lawm ni?” a rawn ti leh a. Larrya chuan nui chung hian, “ka lo theihnghilh tawh a ni”, tunah pawh ka la hre chhuak chuang lo, engtinnge i tih tak ang?” a han ti a. Hmaituam pakhat zawk chuan, phun nang nang chungin Larrya rifle leh puakruk paina kawnghren te chu a chhar a, a thianpa chu an sakawr rawn kai turin a han ti a. Chutih lai chuan an thiante pali pawh chu an lo thleng ve a, pahnihte chu sakawr pakhatah an rawn chuang dun a, an zinga hotu ber niawm chu sakawr atang chuan a han chhuk a, tiang hmawrah hian lehkha them a tar a, chu chu leiah chuan a han vit phun a.

A thiltih dan chu mak ti takin Larrya chuan alo en reng a, chu pa hnenah chuan “Ka sakawr thlan lunga thu ziah tur i ngaihtuah te a nih chuan a hming chu ‘Bouncer’ a nia” alo ti fiam a. Chupa chuan Larrya thusawi chu chhan pawh chhang lovin, ‘Sakawr pakhatah khan phuar bet ula, pahkhatin chuanpui nghal rawh u’ a han ti a. Tichuan Larrya chu a sakawr zinah an phuar bet a, pakhat chuan a chuanpui a, Pinnacles ram lam pan chuan an kalpui ta a. Larrya chuan chuti teh chiam chuan hrehawm a ti lo, Phil thusawi hnuhnung ber kha a bengah a la cham reng a, chubakah amah phili chu him takin a tlan chhuak thei tih a hriat avang chuan lawmna tak a nei tlat ani.

Sakawr chau tawh tak mai chunga chuangin Phili chu Ranch in a lo thleng a, Severna leh chutih hun laia Ranch a awmte chu rang deuh maiin an lo tlan khawm thuai a, Phili chuan thil awmdan chu a han hrilh hlawm a, Severna chuan engdang mah sawi lovin, “Sakawr buatsaih thuai ula, in silaite pawh endik nghal rawh u,” Cowboy ho hnenah chuan a han ti a, Phili chuan “Darby Sakawr pakhat min buatsaih sak ve nghal ang che” a lo ti thuai a. Severna chuan Phili chu en reng chungin “I va kal ve chu a tha….” a han ti tan chauh a, mahse Phili chuan “Ka kal ve dawn, ka tan….” a han ti zet a, a sawi zawm theih tak loh avangin a ngawi leh ta mai a, Severna pawh chuan a hnial zawm duh ta bik lova, an vai chuan hmanhmawh takin Larrya te an lo beihna hmun lam pan chuan sakawrin an tlan chhuak nghal a.

Larrya sakawr tlukna bul chu an lo thleng dawn ta a, tah chuan , “Tah hian min lo nghak rih rawh u, min lo chang reng pawh a ni mai thei a, kan vaia a ruala kal vek chu a tha lovang” tiin severna chuan a hote chu a han hrilh a, amah chuan a kal ta mai a. Darby an “Black Barta chu ni na se kan zinga tu emaw ber hi kal hmasa turin min tir ngei ang chu” a tih ri Phili chuan a han hria a. chutih lai chuan Darbya thusawi vang chuan cowboy ho chu an lo nui a, an thusawi chu dik thawkhat hlein a hre ve a. Severna chuan duh se chuan a hote zinga tu emaw ber hi kal hmasa turin a tir thei reng tih pawh a hre ve vek a, mahse tumah tir lovin amah ngeiin hlauhawm chu ava tawn dawn avangin severna a ngaihsan phah ve hle a. Mahse chutih lai chuan a rilruah thil dang a lo lut leh a, Bartholomewa’n a lo hrilh tawh thin avangin Severna tan chuan hlauhawm engmah a awm lo tur leh ama thiante zinga va kal tur ang leka ngaihna Phili chuan a han nei leh a, chutiang lam hlir a ngaihtuah lai chuan Severna chu a lo kir leh ta mai a.

Severna chuan Larrya sakawr ruang chu ka va hmu a, mahse a zin leh a lakam te chu a awm tawh lo, Larrya pawh ka va hmu bawk hek lo, he lehkha chiah hi ka thil va hmuh chu a ni mai a rawn ti a. Lehkha chu a han chhiar nghal a, heti hian a lo inziak a.
“Severn i thian chu kan kutah a aw, nungdama hmuh leh i duh chuan naktuk chhun lai velah Skull Canyon ah lokal la, Dollar 2000 rawn keng bawk ang che, I lokal lohin emaw min tihder tumna rilru i put vaih chuan Larry hi khaihlum a ni nghal ang”

The Mask.

Chu thu inziakna chu pawisa lam chhinchhiahna bu atanga pawhthlak niawm tak hian a phek zat leh number te a inziak tel nual a, lehkha a han chhiar zawh chuan Phili leh Cowboy ho chu an lo thinrim em em mai a, an lo phun nang nang hlawm a. Severna chuan lehkha chu ngun fe hian a han en a, Ignacio ipte atanga a lehkha phawrh nen khan inang hlein a hria a. Tichuan, hreh tak chungin Cowboy te chu Ranch in lam a kir leh turin thu a han pe a. Chu veleh Phili chuan “Engmah tih i tum nange? thi mai tura kalsan ngawt chu em ni i tum,” a lo ti ta a. Severna chuan “tunah rih chuan tih theih engmah kan nei lo, an hnuhma va chhui thei tehreng pawh ni ila, min lo leh chan ang a, a pawi thui mai mai zawk ang, kan um zui mai thei tihte chu an ngaihtuah hlawm ve ngei awm si a,” a han ti a.

Phili chuan thinrim tih hriat tak hian severna chu a en reng a, a hnenah chuan “Dawihzep vang ni berin ka hria, kan mite hi i hruai ngam lo a nih chuan keiman ka hruai mai ang,” a han ti tau deuh hmak a. Severna chuan chhan pawh chhang lovin cowboy ho chu a han en kual a, anni pawh chuan Phili chu zui an tum lo tih an chet dan atang chuan an hriat theih nghal mai a. chutia ngawih reng lai chuan, “Miss Phil, kan foreman thusawi chu a dik a ni, sawt lovah kan inngaihtuah hah mai mai dawn niin a a lang, kan va hmuh theih chiah chu ka ring lo tawp a, mahse lo va hmu palh ta hlauh pawh ni ila. Larrya chu rang lutukin an khaihlum nghal mai thei asin, kan tan chet ngaihna a awm rihlo a ni berin ka hria,” Darby a chuan a lo ti ve ta a.

Phili chuan cowboy ho chu hmusit awm tak mai hian a han enkual leh te te a, tah chuan a sakawr chu a pawt her salh a, Ranch in lam pan chuan a tlan tir leh ta nghal a. An hawng kawngah te chuan Larrya hlir chu Phili chuan a ngaihtuah a, a tan nun a han pek ngam dante chu mak ti tak leh lawm rilru tak chung si chuan a ngaihtuah zawm zel a. Ranch an thlen hnuah pawh chumi zan chuan a rilru a chawl tak tak thei chuang lova, a mutna ah te pawh Larrya hlir chu a ngaihtuah zui zel a.

A tuk khua a lo var a, Phili chu pawnah a va chhuak a, Severna chuan amah chu hmuh tumin a lo nghak reng tawh a. Phili chu pawisa pek pahin a hnenah chuan “Hei hi bawng ka hralhna pawisa la awm chu a ni a, cowboy ho hlawh leh thildang mamawhte chu ka pe chhuak vek tawh a, a bang hi chu him takin lo kawl la a tha ang,” a han ti a.
Phili chuan “Engatinge pawisa hi min pek?” a han ti a. Severna chuan kalna tur ka neih kha i theihnghilh ta mai em ni? a han ti ve thung a, Phili chuan makti awm takin, “Skull Canyon ah chuan va kal i tum a ni maw? Chu tite a nih phei chuan pawisa i va mamawh awm ve? a han ti leh a. Severna chuan “va kal ngei chu ka tum a, mahse pawisa chu ken ka tum lo. Naupang chhia ka ni tawh hleinem” a tihsan mai a. Phili chuan “chuti te a nih si chuan enge va tih i tum reng reng? a han ti leh hram a. Severna chuan “Ka hre bik lo, thil awmdan in a zir zel ang chu” a ti mai a.

Chutia a han sawi zawngte pawh chuan hlim awm tak hmel hi a pu tlat reng a, a va kalna tur hlauhawm zia te chu a hai bik pawh a ni bawk si lova, chutiang thil te a han ngaihtuah lai chuan severna a lo rinhlehna chu Phili rilruah chuan a lo lang thar leh a. “Tih leh, i tan chuan hlauh tur teh chiam a awm ve lo pawh a ni ang chu, an zingah chuan thiante pawh i lo nei ve reng mai thei asin,” deusawh tak hian severna hnenah chuan a han ti leh kher a.

Chutah zet zawng hun reilote chhung severna chuan a insum theihna a hloh ve a, rum lutuk a meng chungin Phili hnenah chuan, “Hmeichhia, ngun takin lo ngaithla te, Pathianin i koki ah khan lu duhawm tak a rawn dah sak che a, a chhungah pawh chuan thluak a dah ngeiin a rinawm – chu chu hmang ve tawh rawh,” a ti ta khawl mai a. Thudang engmah pawh sawi leh tawh lovin pawnah a chhuak a, a sakawrah a zuangkai a, Ranch atang chuan a tlan chhuak ta nghal a.

Phili chuan makti rilru tak chungin severna liam tur chu a enzui reng a, tah chuan chau lutuk niawm takin thutthlengah a thu hnawk a, bang lam chu a en ta reng mai a, tun hmaa a la hriat ngai loh, tawn pawh a la tawn ngai chiah loh chu a lo tawng ta a. Chumi ni chuan a hma lam kawtchhuah chu a khat tawkin a thlir reng a, a thlir chhan a han ngaihtuah chiah pawh chuan Larrya vang a ni tih chu a hre reng a.

About Mizo Archive

I'm the one who collect the best writings of Mizos
Aside | This entry was posted in Fiction, Thu Ngaihnawm and tagged , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s