STEROIDS

Antibiotics ṭangkaizia chu sawi tam ngai lovin kan hre deuh vek ang a.
Nimahsela, a ṭangkai em em rualin, a hman dan dik lova hman chuan nghawng ṭha lo, side effects a nei a.

Chuti ang chiah chuan Steroids ṭangkaizia hi sawi tam a ngai lo va, steroids pawh hi a ṭangkai rualin a hman dan dik lova hman chuan nghawng ṭha lo (side effects) a nei a.
Steroids hman dan dik lova hmana a nghawng ṭha lo, side effects awm theite han tarlang teh ang.

Eng nge steroids chu?

Steroid tih hian awmze pahnih a nei a.
Pakhatnaah chuan kan taksaa awm sa, taksain a siam chhuah (hormones) a ni a.
A pahnihnaah chuan siam chawp (chemicals), damdawi atana kan hman hi a ni a.
Steroids chu chemicals leh hormones a ni kawp a ni ber mai âwm e.

Steroids nih phung hi Monosodium Glutamate (ajinomoto) nen a inang riau mai a. A danglamna chu steroids chu hormones a ni a, monosodium glutamate (ajinomoto) erawh non-essential amino acid, glutamic acid aṭanga lo chhuak a ni a. Steroids chu damdawi a ni a, monosodium glutamate (ajinomoto) erawh hmeh hân a ni a, a side effects a hlauhawm ve ve a ni.

Steroids ( hormones), mihring taksaa awm, taksain a siam chhuah hi siam chawp steroids nen a hna thawh a danglam hran lo va.

Steroids hi Anabolic- androgenic Steroids leh Corticosteroids a ṭhen hran a ni a.
Steroids hian kan taksa pêng hrang hrang, tihrâwl, timûr te’n ṭha taka a hna a thawh ṭheuh theih nan a pui a, kan taksa mamawh tâwk steroids kan neih a pawimawh hle a ni.

Steroids siam chawp hi natna hrang hrang enkawl nan damdawi ṭangkai tak mai a ni a, kan ei nasat erawh chuan taksa tan a hlauhawm hle mai a, chu chu kan tarlang dawn a ni.

ANABOLIC- ANDROGENIC STEROIDS :
Anabolic- androgenic steroids-ah hian anabolic steroids leh androgenic steroids a awm hran leh a.

Anabolic steroids- Anabolic steroids hian tihrâwl a siam a, body builder leh infiammi te’n tihrâwl siam nan te, taksa tih nalh nan te leh taksa tih chak nan te an hmang ṭhin.

Androgenic steroids- Androgenic steroids hi mipa sex hormone, testosterone tih tam nan leh tih chak nan an hmang ṭhin a ni.

Anabolic- androgenic steroids an hmang tih hriat chhuah a nih avangin sprinter Ben Johnson, footballer Maradona leh infiam mi tam tak an lo thunun tawh a ni.
Testosterone hi thluak bulṭhuta awm Pituitary gland-in a siam chhuak a, a thunun, a control bawk a.
Follicle Stimulating Hormone (FSH) pawh hi Pituitary gland siam chhuah a ni a.
A side effect te hi taksaa testosterone level a sân lutuk vâng a ni a.

SIDE EFFECTS AND COMPLICATIONS:
Anabolic – androgenic Steroids ei nasatin harsatna a thlen theihte –

Short term effects:

Hun rei vak lo chhunga a nghawng ṭha lote chu…

Thluak leh ngaihtuahna buai

Hriat thiamna tlachham, ho têa thîkthu chhiat êm êm te.

Thinchhiat êm êmna.

Thil hmuh ṭhelh, dik lova thil hriatna.

Ngaih dan dik lo, thil hriat thiam theih lohna.

Arngêng pung hluai.

Taksa leh kutke vûng, etc.

Long term effects:
A rei deuh hnua a nghawng ţha lote chu…
Kal hnathawh ṭha lo (kidney failure),
Thin ṭha lo,
Lung vûng,
Thisen sâng,
Thisena cholesterol level mumal lo.

He’ngte hian stroke leh heart attack awmna theihna remchang a ti sâng vek a ni.

Mipaah tilmu sâwng tê, sperm count tlêm, sam tlakawlh a thlen thei a, prostrate cancer awmna theihna remchang a ti sâng a.
Hmeichhiaah hmai leh taksaa hmul ṭo nasa, mâwn (clitoris) ṭhang lian leh mipa ang maia aw thum dùt a awmtir thei a ni.

CORTICOSTEROIDS:

Corticosteroids hi kal (kidney) chung adrenal gland-in a siam chhuak a, aldosterone hian taksaa sodium tam dan a control a, cortisol hian taksaa nâ leh vûng, inflammation a ti hniam bawk a ni.

Corticosteroids hi hming hrang hrangin a awm a.
Corticosteroids hi a chiu chi, a ei chi leh a hnawih chi a awm a.
Prednisone, prednisolone leh dexamethasone (dexona, betnesol) te hi corticosteroids vek a ni.

Dexona leh betnesol te hi tam takin chaw ei tui nan te an hmang mai mai a, a hlauhawmzia hi an hre lo a ni.

Corticosteroids hi allergic disorder, taksaa nâ leh vûng hrang hrang inflammation, ruhchuktuah natna, SLE, vun natna hrang hrang, rilpui lâwng, asthma leh natna hrang hrang tan damdawi ṭha tak a ni a…
ei nasat erawh chuan a hlauhawm hle a ni.

A side effect (A nghawng let thil ṭha lo a thlen theihte)…

Khawhmuh fiah lo, mit nâ,

Taksa leh kutke vûng,
taksa rihna sâng leh thaw hah,

Depression- Hlim thut a, ngûi leh thutna, rilru mumal lohna,

Phungzawl anga kaih vak,

Êk thî, êk dum,

Pancreatitis – pumna êm êm hnungzânga na chhuak, luakchhûak leh luak, lungphu rang,

Ruh mawih (osteoporosis),

Muthilh theih lohna, mood inthlâk,

Chaw ei tui êm êm leh taksa rihna nasa zêl,
Arngêng, vun ro, vun duk, vun pan (thinning of skin),

Nghâwng leh hmai sa hut hut,

Taksaa hlîam dam har,

Pumnâ, luakchhûak leh kawpuar,

Mumal lo taka taksa bung hrang hrang- kut, ke, hmai, nghâwng, hnute leh kawngbâwr vela thâu (fats) insem darh,

Taksain natna a do lêt theihna (immunity) tlahniam leh chak lo, etc.

Steroids hian chaw ei a ti tui a, hei hi a side effect pakhat a ni a.
Ṭhenkhatin chaw ei tui nan dexona, betnesol te an ei ṭhin a, hei hi a ṭha lovin a hlauhawm hle mai.

Ei nasa tawh tan thlah thutin withdrawal symptoms a awm thei a, zawi zawia thlah tur a ni.
Steroids kan ei a nih pawhin hun rei tak ei loh tur a ni a, mi thiam zawkte râwn a him ber ang.
Steroids hian taksain natna a do lêt theihna a tih hniam avangin, steroids-a inenkawl mêk te chuan natna inkaichhâwn theih natna neite lakah fimkhur a, an bul hnaia awm tam loh a him ber ang.

Source:
Dr Lalkhawngaihsanga
Gilead Thinghnai (Hriselna lamtluang) Lehkhabu

About Mizo Archive

I'm the one who collect the best writings of Mizos
Aside | This entry was posted in Health and Lifestyle, Hriselna Huang and tagged , , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s