ZORAM POLITICS THLIRNA

Dαvid Sαilo on 20th July

ZPM VS MPC

ZPM TUTE NGE?
ZPM hi kan hriat danah chuan pawl 6 intel khawm, chung zingah chuan Political Party 2, ZNP leh MPC telna a ni a, a neitu ber awmin a lang lova, Movement angin heng pawlte hian hma an la ho mai niin a lang.

PARTY NIHNA THUTLUKNA KHA –
ZPM chuan tunhnaiah Party anga pawm an nih tak thu an puang a, Movement zinga pawl 6 te pawh mahni pawl bansana ZPM anga inchhunglut turin an in ngen ta a ni. Helaiah hian zawhna a awm thei. Party khata awm tura an rel hona, thutlukna an siamna ah hian MPC hi an tel ve lo em ni? Tih hi. Neitu bik, tatu bik awmlo, pawl 6 inzawmkhawm nisi, pawl pakhat vawiin thlenga in chhunglut ve thei lo an awm hian Party awm chhunzawm an rel lai hian pawl 6 hi an huap kim lo em ni aw a tih theih a ni. Nge MPC hian hre vek siin ngawhngawl an chhuah lui zawk?

MPC ANG HIAN AN THO CHHUAK ANGEM?
MPC President hi Politician ah chuan a chhia/tha zawng pawha huhang ngah lo tak, Social Media ah pawh a thlalak vàng tak mai a ni a, a thusawi chhinchhiah reng tur hi a vang hle. MPC hrim hrim hi anmahni Party lawng chuan an tho chhuak tawhin a rinawm loh a, ZPM a inchhunluh chungchangah pawh hian ngaihdan phir lian tak a awm ve ngeiin a rinawm.

ZPM anga an Candidate ten thutiam la a an chhamrual dual dual hnu khan MLA 7 an nei ta a, chung zinga 3 chu MPC lam mi an nih avangin ZPM a pawl 5 dangte tih ve hauh lo an Party MLA tlingtharte lawmna Programme an siam mauh mai bawk. MPC ang khan ding se MLA pakhat pawh an la lo maithei tih hi mipui ngaihdan a nih a rinawm.

MPC ZPM AH –
Party an nih hma lawk khan MPC chuan an thuchhuahah ZPM anga an inremna ah mahni Party thiah a tel loh thu leh MPC thiat tur zawnga an la ngaihtuah loh thu an sawi a, ZPM lamin Party an nih tawh thu leh MPC an ngaihchan mek thu an puan tak ulh ulh ah chuan, hruaitu tharte hmalakna tur a nih thuin an chhang ta a ni.

MPC hi Party pum ngaihtuah chuan he remchanna bak hi Chance an nei tawhin a lang lova, an Party tana tha ber tur niin a lang. An MLA leh hruaitu lawk zingah pawh ZPM anga tui viau tawh zawk pawh an awm a, a zawm ve duh lo zawnga an kal a nih chuan tlem tawh nak laiin phel phawk thei niin an lang bawk. MPC MLA te hi ZPM MLA tura thutiam la an ni a, MPC hian ZPM Party a zawm lo a nih chuan an MLA te hi an chàn phiar thei bawk ang.

Party lo zawngin, Family zawnga chhut sak erawh chuan President tan hian thutlukna tlawm thlak tak leh harsa tak, a pa a dintu ngei hriatchhuah vawng vawngna a ni ngei bawk ang a, Zoram hmun hrang hranga Party dang anglo taka Pu Thena ngaisangtu ruhkawl, mahni chauh pawha PC ni peihte rilru erawh a na ve ngei ang.

ZPM KAL ZELNA –
Inthlan hma khan tlang takin ka sawi hreh thin a, ZPM inhrual mum tha tawk lo lutuk kha lo Sorkar ta se kan buai dan tur hi a takin kan chhut thiam ve tan chauh niin a lang. Party khata awm ho pawh inthlan atanga kum chanve zet liamah an la hlawhtling theilo a ni a, han Sorkar ta se kan buai nuai nuai ngawt ang. A tawk tein an kal zelah ngai ila.

Mipuiah chuan zawhna hlir a ni leh ta. Party kalphung danglam tak an neih dawn thu leh Headquarter hruaitu an insiam rem thuai dawn thu an sawi a, Pu Duha hi enge a nih ang? Pu Hmangaiha, Pu Sapa, Dr.Vanlalthlana etc eng nihna tak invuah leh ang maw. Ka lo sawi tawh angin ram hruaina ah chuan kalphung thar an ti a nih pawhin a tha, Party inkaihhruainaa kalphunh thar an ti vak mai kha a fu tawk lo hle a ni. CAUCAS, Val Upa Council, Steering Committee etc. Inrawn chhawnna tur a tam hle a, khati chung khan Congress thawhpui chungchangah erawh Dictator tak a ri faih faih lawi si. Chairman ber pawh a thil sawi a lar hle a nih kha.

TLIPNA –
Party ah danglam vak tum lo se, ram hruainaah erawh kalphung thar chawilar se, nihna chanvo maksak tak tak, thingtlang lam pawhin lam thiam mangloh invuah vak vak lo hian Party pangngai nih phungin nihna in bel ve mai se, MPC hian thunawi an nei reng a nih chuan nghak buai lo se, an chhiatin an that phah viau a rinawm loh. Zawi zawiin an la pakai vek tho ang. Solid taka an kal zel a nih chuan kum 5 hnu lamah chuan MLA 7 neihsa nen, Mau leh rua sawi tluk tluk mai hi kan nin pa tawp a la thleng leh dawn si… SEDP nge Rua hi Flagship zawk, a ni ve ve ta mai em tih pawh kan hriat hran tawh loh karah hian an la rawn dawk ve zawk mahna…

About Mizo Archive

I'm the one who collect the best writings of Mizos
Aside | This entry was posted in Fifth Column, Zoram Politics and tagged , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s