Serampore Principal min chhanna niawm kha

Pu Lalthanhawla’n Serampore College of Theology aţanga Doctorate Degree a dawnna tur chungchang thu ka thailana an Principal min rawn chhanna niawm pu darhtuin thuhma a han neih dan kher hian khawvel hi a tingaihnawm zual ţhin.

Nuthlawi thinrim sosang âncheh ang maia insumkârna nei lovin heti hian mi chhuahchhal a. ‘Thil hre ziktluak lo va Issue hrang hrang article ziak ve duah ţhin………’ tiin. Hei bakah hian ka chungchang thu an sawihonaa mi min chhuuahchhal dan hrang hrangte pawh ka lo hmu ve zel a.

Kum 2005 aţang khan tun thleng hian chhum lo chat lovin thu ka lo ziak ve tawh ţhin bawk a ni. Ziaktu Zalen inti kha kan ni bawk a, khal tak tak, thling baw hawk zela thu ka ziak chhan chu Bible thu nia ka hriat vang a ni ber, thu dik hmang hian mi huat thu hi kan lo sawi leh ţhin.

Chuvangin kan thu ziak a khal ang bawkin min rawn chhanletna thute pawh a khalin a mimal thil raih zel ang tih hi kum sawm bi chuang (more than a decade) thu ziak tawh chuan kan hriain kan phutawk lawman kan hmuh tur a ni tih hriain thinrima lakah kan ti ngai lo thiam tawh a nih hi.

Thil pakhat chiah sawi fiah ta ila. Kohhrante hi a chhûnga luhchilh zet a, chamchilh vang vang piahah a huang chhûng thiltihna hrang hranga inhnamhnawih ve zet loh a; thil fel lo awmte zuk hmuh hmasak zet loh chuan Pathian thu kaltlangin a vei mai mai theih a ni ngai lo.

Nu-in a fa a hmangaih loh lakah talhfiak a lek ngai lo va, pa-in a duat loh fa lakah chil per a seng thlawn duh mai mai ngai bawk hek lo. A nih loh vek chuan chhan eng emaw avangin miin kohhran hi a do chiam theiin a lakah a inluling hle thei bawk.

Chutiang bawkin khawtlang leh sawrkar kalphung fel lo lai veina thinlung li pianna chhante pawh lo ni. Hmangaihnain a ni kohhran hi kei zawng ka vei a, ram hian hma sawn se ka tih ni. Kan ram hian thupêk ropui ber, ‘Nangmah i inhmangaih angin i vengte hmangaih rawh’ tih hi a taka kan nunpui hun ka nghakhlel em em a, ka mangphan hial ţhin a ni zawk.

Serampore hi sawi tak ang khan Liberal College tia hriat kumkhua a lo ni tawh a. Hei chauh hi tunah chuan khel ta reng ila. Ani chuan Liberal hi, ‘Thlirzau’ tiin a rawn dah a. Kha leh chen kha Liberal Theologian-te Thiangzau tia sawi an nih tawh hnua Thlirzau tih rawn sawitu ka hriat hmasak ber niin ka chhiar tlem ta deuh nen ka tisual pawh a ni mahna le.

Liberal hi ‘Thlirzau’ ti zawnga fak mawi tum Theologian kan awm ta mai hi a mak lem lo. Liberal Theology chuan Kristianna kan tih hi tun lai finna leh thiamna kaltlanga rintlak leh belhchian dawl a nihzia tarlan a tum a, sual zawng a ni hauh lo. Kawng khat ngaihtuah chuan dik awm tak a ni.

Mahse, Pathian nihna leh Lal Isua thilmak tih zozaite hi pathian dangte aia a ropui zawkna leh a chungnunna, khawvel thiamna leh finnain a chhui chhuah phak ngai loh tur a nihna leh mihringin Pathian a chhui phak lohzia sawi nep tuma inzirtirna erawh a Pathian thu mawlh lo.

Liberal College, Thlirzau an tih hnuaia zir chhuakte hian thil chu an thlirzau hle a, an thlir kual mah mah fo! An zinga pakhat chuan Pathian thiltih mak leh ropui tak tak kha anep thei ang berin a sawi a, tuipui sen kan te, vahmima chawm te, manna te, choakin Eliza a chawmthu te leh adang reng reng te pawh kha holam em emin a chhuah a nih kha.

Tin, kan mi chhuanvawr Rev Zirema-te meuh pawh khan Josua Ni auh din kha heti hian an lo ziakin a lo thlirzau vak tawh a! Pathianin Ni a tiding em tiin Jasher 88:63-64 kha la chhuakin Ni kha lo ding ta tak tak se, Leilung awm dan tur nia a thlirzau dan chu heiti hian a ni;

“Darkar 24 chhungin lei hi vawi khat a lir chhuak a, chu chu ni khat kan tih chu a ni. Darkar khata mel sang zeta lei vir hi ding thut se a chhunga awm zawng zawng hi kan thlawk chhuak vek ang, tui phei chu a phirsi vek ang. Tlang lian fe fe pawh a bung rum ang, thingte pawh a sawm nelh nulh ang a, a zung chawpin a invawrh chhuak vek ang. Nunna nei dam khaw chhuak tu mah kan awm lo ang.” tiin ‘Kan Bible Hi’ tihah khan a lo ziak tawh a nih kha.

Chhim lam kohhranah pawh kan Sande Sikul zirlai ziaktu Prof RL Hnuni thu leh hla, Isaia 1-39 chungchang kha sawi hat awmin tu emaw zirlaibu ziak angin hale m chu a tawk ta lo hlauh zawk a. PC Biaksiama Parallel Bible chungchang thua Revd thu ziak hi han thlir leh ta ila;

Pakhatnaah Mizorama kohhranten kan hman ber Mizo Bible lehlinna RV a sawi sâwp chiam hi kohhran sawisêlna a ni. Pahnihnaah chuan Mizo Bible hman lai a sawisèl avàngin Bible Society of India sawisèlna leh zah lohna lian tak a ni. Pathumnaah chuan Mizoten Pathian thu kan zirna ber Senate of Serampore College hnuaia Pathian thu zir dàn dik lo taka a puh chhiat avàngin mipui laka Pastor-te rintlâk loh ang hiala pholan tumna a ni (cf. Bible rintlâk lo a awm em? 2015:8,9).

Heti chinah ngawt pawh hian Liberal College hnuaia zir chhuakte Pathian thu zir dan chu kan hrethiam tawh mai awm e.

Tichuan, Principal hian Libertine tih leh Liberal tih awmzia hi hre hrang lovah mi ngai pek a. Libertine hi kohhran huanga kailuh zahthlak khawpa nawmsipbawl sawina mai a nia. JF-a phei chuan hûrna kawnga inthlahdah a ti hial a! Nawmsipbawl kawnga insumkarna nei lo tih hi a hrilh fiahna a ni. Chuvangin ngaih pawlh chi an ni lul lo ve.

Heng aite chuan Serampore chhuak lo chu Pastawr atâna lak loh tur tih thuthang (?) kan hriat fote hi a dik leh dik loh chhanna min rawn pe zawk se a lawmawm tur. Tin, mi hmingţha tak tak, khawtlang tâna thawkrim leh thil ţha titute hnena Institution hrang hrangin, infiamna lama hlawhtlingte thlenga duhsakna leh chawimawi nâna Doctorate Degree an hlan dante hi chu kan lo hre ve tawh ţhin bawk tih hre ta mai mai ila.

A tawp berah chuan mi tam takin kan thu chai laimu hre hawt si lo, ngaihtuahna pakhat pawh sen belh huam si lo hian kohhran beih hi chu nuam i ti, min ti fahran a. Kan ram ka en a, a chhûnga chengte kohhran mi leh sa hlir kan ni si. Chutih laiin eirûkna a hluarin mi hausate vulhna ramah kan cheng mek lawi si a. Cancer vei tam ber niin HIV kai tam lamah pawh chuti tho!

Biak ina thuchah kan ngaihthlak tam zawkin kan nun a chawm tawh lo va, Misawnari rawih nâna kan thawhlawm kan hman hnemzia ngaihtuaha ringthar kan neih tlemzia te, mipui nawlpui rilrua sual tih timna pakhatmah awm ta lo te, duhamnaa kan khah takzia leh ringlo mi, Mizote ngei pawhina biak ina kal ţhinte nuna itna an neih si lohzia, kan rawngbawlnain thlarau bo a man lohzia leh thil tam tak ngaihtuahin thil tih dik loh kan neiin insiam ţhat ngaihna lai kan nei ta a ni lo maw, tiin kohhran kalphung kan khel a ni zawk a.

In duh leh kohhran bei chiamah a duh chuan min lo chhuah mai teh u. Lal Isua meuh pawhin Juda puithiamte a demzia, lehkhaziaktute a lungtenzia leh a sawisel nasatzia chhiartu vek kan ni lo’m ni? Sawiselna dawngsawng thiama mahni lam inbih ţhina Pathian hmaa ţhingţhia zawhna zawta Amah pawlna neitu tak takte chuan kohhran ka beih lohzia an hriatna hi ka tân chuan a tawk mai e.

Lalremliana Pachuau

About Mizo Archive

I'm the one who collect the best writings of Mizos
Aside | This entry was posted in mizo archive. Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s