KEILAMI’S GRAVE (THLAN RÒ) by PC.Ramtharmawia

  • Sialhau thlanro chanchin
  • Thlanro siam a nih chhan

SIALHAU LAL SANGVIALA
ᅠ Sialhau khua hi Mizoram laili Serchhip District chhunga awm niin Sechhip ațanga hmarchhak lam km. 20 vela awm a ni. A ramri te chu khawthlang lamah chhiahtlang, Chhak lamah Thinglian/Lungpho. Hmar lamah Thentlang, Chhim lamah Hriangtlang te an ni. Tunah tak hian In ding 105 a awm.

Khaw upa tawh tak niin 1770-1780 (Zofate chanchin : Hualngô Literature& Cultural Association) vela luah țan niin, Huliana te uanau hoin Țhangur ho an pan khawmna khua niin a lang. Tun thleng hian Hualngô ho hnuhma leh sulhnu tam tak hmuh tur ala awm.

Heng hunlai hian sailo ho nena an indo reng țhin a vangin helai hmun hi an luah rei vaklo niin a lang.

Kum 1815 velah khawchhak lama ațanga thlangtla Zahau-ho ten an luah ve leha, an Lal pawh Zahuata a ni. Chhim leh hmar indo lo chhuahna hmun BUÀNHMUN hi helai hmuna awm a nih avang hian Buanhmun inchuh; Chhim leh hmar indo lai 1849-1856 lai vel hi chuan helai hmun hi an luahlo ni ngeiin a lang.

Tun hma chuan Sialhau khua hi In 1000 khuaa sawi ţhin a ni.

Sialhau Lal SANGVIALA
hi Lalpuithanga fa Sangvunga fapa te zinga naupang ber a ni. Kum 1879 ah piangin a nu chu Lalbiaki, Lal Sangvunga hmei a ni. A nu hi a fingin a fel hle bawka, lal hmei mai mah nise a fapa Sangviala pawh hi Lal sum ringin Shillong-ah lehkha a zirtir thei a ni. Hei vang hian Sangviala pawh hian Sapțawng leh Vaițawng pawh.a thiam hle nghe nghe a ni. Tlâng chang tura ngaih nilo mahse a nuin Bawrhsap Tarmita (J.Shakespeare) a biak thiam avangin Sialhau tlang hi pêk a ni ta a ni.

Sangviala hian nupui Thanchhungi neiin fa 14 lai an nei a. Chungte chu : Lalnghinglova, Sailothanga (Hriangtlang Lal), Rocheuva, Hrangngairuaia, Keilami, Huapliani, Hranglawmi, Lalnguri, Lalhulha, Ngurliana, Lalthanhulha, Sangliani, Laltuali leh Ralvanliana te anni.

KEILAMI’S GRAVE
ᅠSangviala fate zinga 5-na Keilami chu a hmelțhain a fel hle maia, sa inphut mawi táwk ft 5.6 a sang a ni. A pa hian a chhuangin duat pawh a duat hle nghe nghe. An chhungkua kristiana an inpek hma ațang rengin Pathian thlarauin a mana inkhawm leh zaikhawm pawh a peih viau niin an sawi. A vanglai hun a hmang dawn chauha Khawsikpui (Typhoid) avangin rei pawh damlo hmanloin a boral ta a ni.

A thih dawn țép chuan, ‘Sual sipai ral nen nitin kan indo țhin’ tih hla hi zawitein a saa, koh eih zawh ni tawh lovin 1931 Nov. ni 28 chuan kum 19 mi chauh nii khawvel a chhuahsan ta a ni.

A pa hian a uiin a tuar thiamlo hle maia, a tan chuan a neih zawng zawng pawh a uilo mai ni lovin sén a huam ém em zawk a ni tih lan tirna turin leh a hriat reng nan THLAN RO (KEILAMI’S GRAVE) hi a siam ta a ni.

THLAN RO satu hi Aizawl lam mi Biaka Mistiri a ni a. A siam chhung zawng hian zu leh sa in tlai takin a hrai țhin a ni. A khuate pawh an rim hle maia, khawpér Hriangtlang tlengin a pun fô țhin. Ruai pawh vawi duâilo a țheh a ni.

Kum 1 leh thla 4 sain 27 Feb. 1933 ah a sa zo thei ta a ni. Mistiri hlawh atan hian Bawng nufa leh tangka 60 a pe a ni. (Heng hunlai hian Bawng nufa hi cheng nga man a ni.)

THLAN RO (KEILAMI’S GRAVE) hi lung, uluk taka chher remkhawm a ni a, a charna hmanrua pakhatmah hman a nilo bawka. Mahse a phui țha ém em si a ni. A chhungah hian mitthi ruang an zalh a, an ruhro te chu la chhuakin a bula lei laihkhuar, chhin țhatak neiah an dah zela. Thlanro ah hian hriattheih chinah mi 10 vel an dah nia hriat a ni a, an ruhro pawh tun thlengin hmuh theihin a la awm.

Thlanro hi lei chhuat ațanga 2ft. leh 4inch. a sang lungrem zawl a ni a. A dung 12ft. a vang 10ft. 1inch. a ni. He mi zawl chungah hian a aia te a dung 11ft. leh 1inch. a vang 9ft. leh 4inch.-in lung zên khat rem zawl leh a ni a, hemi zawl chungah hian thlan in tak chu adung 10ft. 2inch. avang 8ft. 7inch. in thlan in chu rem a ni. A sang lai ber hi 6ft. 5inch. a ni a, a chung kûl lai hi teh kualin 12ft. a ni.

A chung hmalam leh hnung lamah hian lung mum inchherchhuan dah a nia, hei hi a chung lam erawh chu a tla țhen tawh nghe nghe. A hma lamah hian kawngka 2ft. 4inch. a sang, 2ft 6inch. a zau hawn a ni bawk.

A sir tawn tawnah hian lungphun lian tak tak pahnih a awma, hei hi Sangviala leh a tu leh fate thlan a ni.

Thlanro hi lungrem 4ft. vela sanga hung chhuah vek a ni naa rambuai lai khan Sipai hoin bahrik siam nana an lak țhen țeuh avangin tuanah chuan a hniam tawh hle a ni.

Thlanro hi Lal thlah la dam ten hun engemaw chen an enkawl a, kum 1996 ațang khan Sialhau Br. YMA ten an enkawl ta a ni.

Hetiang ang thlan in ropui leh dangdai tak mai, mizopain Mizo thluak hmanga Mizo taka thlan in a siam hi thil vâng tak leh awm zen zenlo a ni awm e. Țhangthar te hian hlutna châng kan hria a nge maw…?

Source : K.Thanțhuama & PC.Relliana @ Sialhau Br. YMA Platinum Jubilee Suvenir, 2016

Advertisements
Aside | Posted on by | Tagged , | Leave a comment

US-IN RUSSIA AN HREM BELH LEH TA : PRESIDENT PUTIN-A TE AN HAWI HAI !

US Treasury Dept chuan Russia chu kum 2016 US Presidential election a lo tihbuai (meddling) tih thu kal zelah Russia rama Company (entities) leh mimal (individual) 24 hremna tur a tichhuak leh ta. Treasury Secy Steve Mnuchin chuan an hrem tum te chu “cyber-attacks”leh“US financial infrastructure”rawn tibuaitute an ni, a ti.

Hetianga Trump Admin in hremna a tihchhuah thar leh tur hi Democrat Senate leader Sen. Chuck Schumer of New York chuan “ a la tawk zo lo” tiin, nasa zawka hrem an phut tih a sawi.

Hremna thar (new sanctions) turah chuan President Putin-a Chef an tih, Yevgeniy Viktorovich Arigozhin pawh a tel. Ariozhin hian Internet Research Agency (IRA) neitu niin, Military Intelligence Agency-GRU chuan “Fancy Bear” tih hmangin Democratic National Committee (DNC) website te hack sakin, Russia Intelligence Agency-FSB chuan “Cozy Bear” tih hmangin kum 2014 atangin US-ah kua an lo hreuh tawh a ni.

Yevgeniy Viktorovich Arigozhin chuan company pahnih “Concord Management of Consulting” leh “Concord Catering” tih a nei a, chu company sum che vel khuahkhirhna pawh a tel a ni.

<

p style=”text-align:right;color:#a00;”>CT Lalrinawmaᅠᅠ

Aside | Posted on by | Leave a comment

MI TUMRUH ER JOHN ROEBLING LEH A FAPA WASHINGTON A. ROEBLING

Kum 1870 khan Engineer pakhat John Roebling-a chuan NewYork leh Long Island inkara East River, lui lian takah chuan lei dawh kai tulin a hria a, a rilru chuan a vei em em a. Chu a thil vei chu khawvel puma lei dawh thiam Engineer hmingthang tak tak te chuan atthlak leh thil tih theih loh tawp niin an ngai a, chutiang thil chu bansan turin Roebling chu an ngen a.

Mahse a rilru-a tih a chak em em chu Roebling chuan a vei hle a. Lei dawh ngei tur chuan hma a la ta a. Thurual pui zawngin mithiam hrang hrang a be kual a, mahse a biak kual zawng zawng te chuan a thil tum chu atthlak tiin an pui duh lova. Ti lo turin an ngen zawk hial a. A fapa Washington chauh chu amah pui tur awmchhun a ni ta.

An pafa chuan lei dawh dan tur chu an ruahman a, hna an thawk tan ta. Phur takin hnathawk tur hlawhfa hrang hrang an sawm khawm a, tichuan lei dawh hna chu an thawk tan ta a.

Tluang takin hna an tan a, mahse thla tlemte chauh hna an thawk hman tih chuan chhiatna rapthlak tak an tawk ta. An lei dawh laia a inhliam avang chuan John Roebling chu a thih phah a, a fapa Washington pawhin hliam na tak tuarin a damchhuah leh hnu pawh chuan tawng thei lo leh kal thei lovin a awm phah ta a. Mi te chuan an pafa chu nuihzatin ‘Kan sawi reng kha, khatiang thil atthlak leh tih theih loh buaipui te chu,” tiin an nuihzat a. John Roebling ber a thih tak avang chuan chu hna chu tih tawp mai an duh vek a.

Mahse Roebling-a fapa Washington A. Roebling-a chuan bansan a hnekin a pa nen an rilru a an vei em em tih hlawhtlinchu a tum ruh hle. Tichuan a thian tha te chu amah pui turin asawm ta a. Mahse a thiante pawh chuan Washington-a puih chu an duh lova.

A kal theih loh leh a tawng theih loh avanga khuma mu chungchuan a thiltum tih hlawhtlin tum chuan hma a la ta. A kut zung tang a tih chet theih hmang chuan a nupui banah a beng keuh keuh a, chumi hmang chuan inbiak dan tur a chherchhuak a.

Chu an inbiakna hmang chuan a nupui hnenah lei dawh leh a duh thu a hrilh a, hma an la tan leh ta. Hlawhfa tam tak ruaiin a tihdan tur chu chu an inbiakna hmang chuan a nupui chu hrilhin a nupui chuan hnathawkte hnenah a hrilh chhawng leh thin a. Chu tiang reng renga kum 13 zet hna an thawh hnu chuan lei nalh leh ropui tak feet 1,595 a sei Brooklyn Bridge chu kum 1883 khan an dawh zo thei ta a ni.John Roebling-a leh a fapa Washington te hian an tum ruh em avangin chhiatna nasa tak karah a hunlaia mite’n theihlohtawp nia an ngaih chu harsa takin an bei a. An tumruh leh tawrhchhel em avangin an hlawhtling thei chauh a ni.

Chhiartu duhtak, nangpawh i nunah leh i zirlaiah beidawn rumrum khawp hiala hun harsa i tawng mai thei. Chung hunah chuan John Roebling leh Washington-a te pafa ang hian i tumti ruh la, tuarchhel la, tawngtai chungin theih tawp chhuahin han bei la, theihloh ni a i ngaih kha i thei mai dawn a ni. “Engah mah mangang suh u; engkimah tawngtai leh dilin, lawmthu hril tel zelin, in duhnate chu Pathian hnenah hriattirin awm zawk rawh se. Tichuan, Pathian thlamuanna, rilru reng renga hriat sen loh khan, in thinlung leh in ngaihtuahnate chu Krista Isuaah chuan a vensak ang che u.” (Philipi 4:6-7).” tih ziak kan hmuh kha.

Napoleon Bonaparte pawhin, “Impossible is a word to be found only in the dictionary of fools,” (‘Theihloh’ tih hi mi a te dictionary-ah chauh a awm) a lo tih kha. Pathian kan neih a, kan tum a ruh phawt chuan theih loh hi kan nei ngai lo ang.

Author : Vlr Pautu

Aside | Posted on by | Leave a comment

Mizoram Sorkarin Vantawng-Khawhthla san zawng a teh an remti lo

  • Thenzawl VC ten Vantawngkhawhthla teh an remti lo.
  • Vantawngkhawhthla sanzawng hi phuahchawp a ni em.

Mizoram Sorkara Tuikhawhthla San zawng te teh a, an san zawng puang chiang thei tu Department Science and Technology Department te chu Nimin April ni 3 khan Vantawng Khawhthla Sanzawng teh tumin an kal a.
Thenzawl Joint Village Council te chuan an lo rem tih loh avangin, beidawngin an haw leh.

Vantawng Khawhthla San zawng hi 750/751 ft tia lo hriat thin a ni a. Nikum khan Zotrek Youth Adventure Club te chuan Record siamin, tumkhata uaithla tam ber Record an va siam a. Hemi tuma an uaina hrui 200 m (660 ft vel) a chuang hnem lutuk avangin an ringhlel a, va teh that an tumin Joint YMA Thenzawl ten an lo khapsak tawh a.

Zotrek te hian Mizoram Sorkara Department hrang hrangah zawt kualin he khawhthla san zawng hi tute teh nge? Engtik laia teh nge a nih an zawt kual a. Tuman an chhang thei lo a. Science & Technology Department Minister hnenah he khawhthla san zawng tichiang tur hian an ngen a, Minister hian ngaipawimawhin Department chu lo
bawhzui nghal turin a ti a.

Zotrek te hian Department lamah te pawh bawhzui nghalin Dept lam hian a tehna Khawl, Khawvelin an hman tlanlawn tak an chah avangin tih nghal rum rum theih a nih loh thu an lo hrilh a.

Khawl te an leifel hnuah Zotrek te nen April ni 2 a va teh tur hian thu an ti tlu a. A hmaa Zotrek te pawh lo khapsak tu Joint YMA te pawh Depart lam hian an dawr fel vek a. Harsatna awm lo a va teh an tuma an kal chu Joint VC ten an lo khap ve leh ta daih
thung a. An hrilhhaiin an beidawng hle.

Joint VC lam chuan an ram chhung thil a nia, an hnenah hriattirna emaw dilna emaw tel lo a an lo kal chu an lo duh lo a. Record awmsa hi pawm ve mai turin an lo ti bawk a. Department hotuten Joint YMA an biak thu an sawi leh anni lam an lo hrilh loh chu an thiam loh a nih thu leh ngaihdam an dil ngial pawhin anni chu NGO mai an ni a, a thuneitu zawk an nih thuin an chhang a. Ministerin tichiang tura a hriattir thu an sawi pawh Ministerin anni a hriattir ve loh thuin an tang tlat bawk si a.

Hun leh tha, sum leh pai tam tak senga an kal thlawn chu an rilru a na in, mak an ti hle a. Zotrek te hian Mizoram Tuikhawhthla te hi an sanzawng tichiang turin hma an lo la nual tawh a, la chhunzawm zel pawh an tum a.

Tuikhawhthla an teh dawn hian tu hnenah mah an dil ngai lo a, an dil lo mai ni loin teh chiang ve tura sawmna an dawng nasa hle a. An kal vek thei lo zawk a ni. Kan khawhthla sangber Record hi tihchian hmasak phawt an duh a, hmun dang ami pawh teh zel an la tum a. Hetianga harsatna an tawk ta hi pawi an ti hle a.

Vantawng khawhthla san zawng Record hi thubelhchian dawl lo tak a lo ni zo ta a. A teh tute leh engtik kuma teh nge tih tuman an sawi thei lo a. Tin, teh a nih hi a rinawm lo zo ta vek zawk a. Hmanlaiin a tehna khawl Mizo ten kan nei lo phawt a. Uaithla turin a hmasa ber atan Kum 1986 (a kum ka hre sual mai thei) khan Sport and Youth Services te an uaithla a. Uaithla chu an tam tawh a, tumahin an la teh ngai lo a. Chuti a nih chuan he Record hi khawi atanga lo piang nge ni ta ang? Rindan chuan a thlirna atangin pa pakhatin a en vang vang a 750 ft a ti ta mai a nih a rinawm ta hle.

Thil awm thei ni ta chu, Sawrkar pawhin a teh theih tak si lohah chuan Vantawng Khawhthla hi Mizorama Tui khawhthla zingah a tel lo mai ang tih a hlauhawm a. Hmun dang danga mi an teh Record chauh hi an puan chuan thuneitu te hian Vantawng Khawhthla tel lo hian Mizoram Record an siam mai ang tih a hlauhawm a,
Thenzawl mipui hian DIKNA an ngaipawimawh teh vak lo nite pawhin a ngaih theih rum rum a ni.

Aside | Posted on by | Tagged , | Leave a comment

ZU ATANGA CHHIAH HMUH TAWH CHENG 1,90,35,04,229/-

MLPC Act, 2014 hman a nih hnu ah Zu lei phalna, Liquor card nei mi 1,51,963 an awm tawh a, Liquor card leh renewall fee atangin Rs 5,78,49,320/- hmuh a ni tawh. Hetihlai hian 2014-2015 atanga 2017-2018 chhungin Zu cases 27,18,297 lakluh a ni tawh.

Assembly Budget Session neih zawh taka ziaka zawhna chhan chi, Unstarred question-a Aizawl West II bialtu MLA Pu Lalruatkima zawhna, Excise Minister R. Lalzirliana chhanna atanga alan danin, MLPC Act, 2014 hnuaiah Bonded Warehouse license 3 pek chhuah a ni tawh a, Liquor shop license pek tawh zawng zawng chu 76 niin, chung zinga Liquor Shop license 20 chu renew loh a ni a, Liquor shop license 56 atangin Liquor shop 49 hawn a ni a, chhan hrang hrang vanga hawng lo Liquor shop 7 a awm.

MLPC Act, 2014 hnuaia Zu chhiah chi hrang hrang atanga hmuh tawh zawng zawng chu Rs 1,90,35,04,229/- a tling tawh a, Hemi hun 2014-2015 atanga 2017-2018 chhunga Zu lak luh zawng zawng zat chu cases 27,18,297 a tling.

Ziaka zawhna chhan chi hrang hranga member te zawhna Excise Minister chhanna atanga a lan danin, tun thlengin MLPC Act 2014 hnuaiah sorkar phalna neia Zu in na hmun (Consumption on permises at hotel) pahnih a awm a, chungte chu Aijal Club leh Hotel Ritz te an ni.

Hetihlai hian tun 2018 chhung hian MLPC Act tihtawp tumna a awm em? tih member te zawhna chu, Study Group din a nih thu te, an zirchianna atanga ngaihdan la siam tur a nih thu in Excise Minister chuan a chhang a, Study Group te thil hmuhchhuah te chu State Prohibition Council (SPC) in a thlir phawt loh chuan puanzar theih a la nih loh thu Excise Minister chhannaah chuan tarlan a ni bawk.

Author: Vanneihthanga Vanchhawng

Aside | Posted on by | Leave a comment

Buhchangphai leh Phaisen inkar Lei (bailey bridge) siamtha dawn

Buhchangphai leh Phaisen inkar Lei (bailey bridge) chu a hlui tawh avangin PWD Kolasib chuan a siamtha dawna, chuvangin he kawng hi April ni 9-30 chhung chu Lirthei eng chi mah kal theih a ni dawn lo a ni.

Er. Sanghrima EE PWD Kolasib sawi danin Phaisen kawng hi Mizoram leh Assam in kalpawhna kawng pawimawhtak niin, tun dinhmunah motor lian pawh engemaw zatin he kawng hi nitin an zawh a, chuvangin he kawng hi siam mek a ni.

Hetiang hi a nih avangin, NH 154 Buhchangphai atanga Phaisen panna Lei (bailey bridge) awm chu a hlui deuh tawh avangin siamthat a ngai a, he Lei siamthat hi mipui te tana tha zawk tura hmalakna a nih avangin, Lei siamthat hunchhung reilote hi chu lo hrethiam hram turin he kawng zawhtu mipui te a ngen a ni.

<

p style=”text-align:right;”>Author: Vanneihthang Vanchhawng

Aside | Posted on by | Leave a comment

NIT MIZORAM ZIRLAI THIHNA CHUNGCHANGAH NIMIN KHAN NIT CAMPUS CHALTLANGAH ZIRLAI PUNGKHAWM

NIT Mizoram zirlai thenkhatte chuan an zirlai pui thih danah lungawi lohna lantir chunzawmin chawngheiin nimin april 2, khan NIT Campus Chaltlangah an pungkhawm.

National Institute of Technology Mizoram-a zirlai te chuan an zirlai pui Dev Sharan kum 20, Mid Semester zirlai Bihar lam mi March ni 31 khan Guwahati damdawiina thi ta chu a thih chhanah NIT Mizoram enkawltute vang niin an sawi a. Zirlai te hian thla hnih kal ta khan an Hostel ei leh in thianghlim tawk lo leh an ei chhiat chu thuneitute hnena an thlen thu sawiin, engmah hmalakna an nei lo tih an sawi a. Zirlai boral ta hian tunhnai mai khan a awm nawm loh avangin tum 4 doctor a pan thu an sawi a, that lam a pan theih loh avang leh ngaihsak a nih loh avangin an khaw lama haw phalsak tura a ngenna chu Mid Semester Exam ti phawt tura tih a ni a. That lam a pan tak loh avangin March Ni 29 khan Guwahati lamah phurh thlak a ni a, inrinni khan a boral ta a ni, an ti.

NIT zirlaite hian Pathianni khan Governor hnenah hemi chungchang hi thlena MHRD hnena thlen sak turin hmuh an tum a, Governor hi a lo awm loh avangin, Raj Bhavan kawtah lungawilohna lantirin engemawchen an thu a ni.

Nimin chhun khan NIT zirlai te hi an Campus Chaltlangah an pungkhawm leh a, an lungawihlona an lantir chhunzawm a. MZP leh North East Student Organisation (NESO) ten hma lain remna kawng zawngin NIT Director Prof. Rajat Gupta roomah hun engemaw chen inbiakna an neihhnuah NIT zirlai te leh MZP leh NESO hotute chuan inbiakna an nei zui leh a ni.

Inbiakna an neih hnu hian NIT zirlai lungawilote duh danin Hostela ei leh in lam buaipuitute chu ban nghal an ni dawn a. HRD pawh hemi buaipui tura tih an nih anga an lo kal theih dawn avangin NIT zirlai te chuan lungawi lohna lantira an nawrhan chu nimin tlai khan tihtawp an rem ti a, mahse, ruahmanna an lo neih sa tawh angin tlai dar 6 thleng khan Campus tualah zirlai te hi an pung khawm a ni.

Thil thleng chhuichiang turin MZP President chuan Zonuam Out Post-ah FIR a thehlut.

MZP President L.Ramdinliana Renthlei chuan zirlai tana ding MZP chuan zalen taka zirlai ten lehkha an zir theih hi a duh ber a, chutiang tur chuan zirlai harsatna tawk te chu hnam dang pawh nise MIzoram chhungah chuan theihtawpa an tanpui zel tur thu a sawi.

ᅠᅠᅠᅠᅠAuthor: Vanneihthanga Vanchhawng

Aside | Posted on by | Leave a comment

Nuamtawl sawrkar hnungzuitu kohhran hi by Lalremliana Pachuau

Pastor bial ţhen a tê tial tial a, tun hma anga thlarau lam pûr châwk nâna Pastor pan pawh an tlem tial tial ta bawk a. Bial fan tur a tlem tial tial a, kohhran serh leh sang tih bak tihtur an nei ta mang lo.

 Nimahsela, Administrative Wing (i ti mai ang) lama awmte chu Minister pisa ang maiin an buai êm êm lawi a! Minister-te ang bawkin kawmiti an nei zûr zùt a, an zin chhuak chamchi bawk a. Chung an zinnaa an kal man chu MLA/Minister-te ang bawkin an lirthei khalhtute nen lam an bill mawlh mawlh bawk a.

Sawrkar ang maiin kohhran ofis nuam leh changkang tak sain MLA/Minister-te ang maiin TA/DA Bill dik loh mai mai engah ngai lovin sawrkar ang bawkin kohhran sum hmangin nuam an tawl ni berin a lang. An thatchhiat luat vang nge Pastor-te lahin Bial pakhatah veng pahnih khat chauh dahin sawrkarin thawktu a la leh ţhin ang maiin Pastor erawh an la mawlh mawlh reng a.

 A hranpain khawpui Pastor-te phei chuan tumah an chenna inah tlawh bar tawh lovin an quarter kawtah motor tunlai tak tak an hung fir fer a. An hlawh lah a pung chakin sawrkar pawhin a tih theih hauh tawh loh Pension hamţhatna piah lamah sawrkarin a tih theih tawh loh, an chhûngte damlo MR thlengin an pension hnu pawhin an bill thei bawk a.

 Baptisma, nau hlan, sakramen buatsaih baka tih tur an neih zawng chu kawmiti a ni deuh tlawng tawh a. Thlarau pûr châwk nân leh tisa dam nân anni aia kohhran mipuiin an pan nasat an tam tial tial bawk a. Hun bîkah Pulpit aţangin an nunin a tawn fiah ni lem lo an zir thiamna hmanga an hriat sermon-in mi zawng zawng biak ţhat an hlawh bawk a.

 Kawmiti lianah ţhu se, MLA te ang maiin ţhut hahdam man pawisa an dawng bawk a. A khât mawi tawkin nawmsak loh an hlauh luat vangin Financial Campaign thiam tak maiin an nei zût zùt reng a. Sawrkar ang maia nuamsa ta chu a dawih pawh an dawihzep ngang mai a!

Sual tinreng bul sum chu an nawmsakna hnar a nih tlat avangin kan rama eirukna nasa êm êm chu vulh lianin an ensan ngam hlawl lova. An duh leh Foreign lamah kohhran thawhlawm hmangin Doctorate Degree an zir thul! An thil zir vanga kohhranin Isua a zui ngheh zual phei chu sawi tur a awm lem hlei lova!

Heti taka nuamsa, nu leh pate makpa it, kum 5-6 vel Bial hreawm deuha awm zawka khawpui chuankai a, nuamtawl an nih hrim chuan ka fapa hi Pastor ka zirtir daih teh ang, tiin ka bula ţhu chuan mi hrilh ta mawlh mawlh a. Ka thinlung lah chuan ka inrin hman hma hauhin a thil mi hrilh chu a lo Amen ang thuai thuai a!

Aside | Posted on by | Tagged , , | Leave a comment

Donald Trump leh Tunlai Boruak by Ricky L Colney

Hun engemaw chen kan rehsan hnu ah heti lam boruak ah bawk hian beng i han chhi leh dawn teh ang.Kan chawlh vung vung laiin khawvel thil thleng a chawl ve chuang silo, a bik takin America chanchin phei chu keini thlenga nghawng nei anih thin avang te hian ngaihven ve deuh tehi a sual lo khop mai a, chutiang zelin khawvel hmun danga thil thleng pawimawh thenkhat te pawh in update ve zel hi a tunlai zia a ni.
Post hi a thui viau dawn a, chhiar chhuak peih talo kan awm pawhin a dem awm loh tur ah ngai ila,Khawvel mi thiltithei ber Donald Trump ah bawk hian bul tan ang aw..
Donald Trump : Kan sawi fo tawh, Donald Trump a chanchin ngah zia chu ziah sen loh ani, Tun hma chuan Christian tha tak ni a hriat hlawh ngailo, American pa hausa, a duh dan dan a nung thei ani a, han ngaihtuah mai chuan PATHIAN in a rawngbawl tu atan emaw a remruatna ti hlawhtling tu atan hmanrua ah a hmang duh ang tih ngaihna reng reng a awm lo ani..mahse kan Pathian hian mitha te chauh a hmang ngailo a, Bible kan en pawhin Tualthah hmang te, eiru te, amah leh a hnung zuitu ngei ngei tepawh dodal tu te a hmang thin tih kan hmu ani..Chutiang bawkin Khawvel hmun hrang hrang a Ringtute thlavang hauhsak tur leh SAP ram nun pawlawh tawh lutuk kawng dik an zawh leh theih nan a hma hruaitu ber atan chuan Donald Trump a chu beisei loh takin a hmang chu a nih tak ber hi.

Khawvel zawng zawngin an thlir an entawn America ah chuan Ringtute tih duhdah in an awm titih tawh a, Pathian thu leh Pathian lam chhinchhiah na apiang dah bo tir ani bawk a, America rama Ringtu / Kohhran mi te mang a ang ta takzet a, rah beh in kum 8 chhung an awm a, engemaw hlek ah thiamloh chantir zel an ni bawk nen, chhungkaw pawimawh na leh nunze mawi lantir na chu an hnuchhawn zo tawh a, chutiang anih vang chuan America rama ringtute chu an mang a ang ani, thawm pawh ring tak takin an chhuah ve ta hial a, an tan a ding tur, mi chak, Pathian zahpui lo leh Tun hma America Christian thurin ngaih pawimawh na a hruaikir leh thei tur RAM HRUAITU au in an tawngtai ta vak vak mai ani..

Tichuan beisei loh lam atangin Donald Trump a chu a rawn lang ta a, chumi veleh America Evangelists rual leh Kohhran zawng zawng deuh thaw chuan Trump a chu an support nghal bur mai a, an tawngtaina chhan na ah an ngai ani. Hetih lai hian Donald Trump a khing pui te chuan Politics ah chhuan tur tamtak an nei a, milian leh thil tithei, experience ngah tak tak,Dan rorel na chung lama leng thah tih theih anni a,chuta chhapah Ram roreltu siamtu an tih mai MEDIA te bakah Mi hausa tawntaw te chu an lam tang anni vek bawk a, Donald Trump erawh chuan amah tawngtai sak tu Kohhran mi te bak lam tang mumal a neilo. Tichuan Khawvel pumpui chuan Donald Trump a chu an nuih rawn titih ta a, fiamthu thawh nan an hmang a, mahse Ringtute chuan tun INTHLANNA hi SATAN a leh SUAL in do na ang hrimah ngaiin chawl lovin an tawngtai a, tan an khawh ani.An inthlang ta reng a, Khawvel chu sawiloh Mizoram thintlang khua veng kilkhawr taka mi pawhin tling lo tur a a dah DONALD TRUMP a chuan hnehna a chang ta kha.

Kum 1 leh a chanve dawn alo liam ta,Donald Trump a bei tute chuan an huat na a zual tulh tulh a, an beihna pawh a bawlhhlawh tual tual a,mawi leh mawilo an dawn tawh lo, a beitute hi thil tithei vek annih avangin zoram thlengin Trump a chanchin thalo lam chu nitin deuh thawh Update kan dawng zar zar mai anih hi..keini chuan a tha lam, midang sawi ngailoh bawk sawi leh ang aw..

1) NORTH KOREA : Kum 60 chhung an intih buaipui, America ram President lo awm tawh te lu ti hai tu leh angaihna pawh an hriat loh chu Donald Trump a hian Silai pakhat pawh hmet puak lovin a chingfel mai dawn ni in a lang ta tlat mai.Mi dang tih dan nilo, ama style in Trump a chuan Kim Jong un a chu a vau in a rum thaih vak vak a,a ralthuam techu North Korea do mai thei turin a chhawp hnai reng bawk a, North Korea hum him tu ber leh an chaw eina hnar ber CHINA lah chu Donald Trump a hian a lam tang titihin a siam hmak mai bawk si, Tun hma an tih ngai reng reng lovin China chuan Trump a nawr na avang chuan NKorea chu a vau ve chhur chhur a, an hmanrua leh thil pawimawh lak luhna etc..te a khar sak ve thul..hetiang anih vang hian North Korea pawh a vawi khat nan a zam hmel khawvel in a hmu ve ta a,America chu inbiak pui ah a sawm ta hial ani, Donald Trump a hian Kim Jong un a Lalna paihthlak a tum dawn lo anih a, an ram an run loh bawk dawn chuan an Nuclear programe te tih tawp vek a duh tih a sawi ta a, chumi hma zawng pawh chuan Nuclear emaw, Missile lam thil engmah a Test tawh lovang tiin a puang ta mai a,Khawvel a barakhaih hle mai , Ram hruaitu leh chhut mi tamtakin Donald Trump a vang liau liau ani an tih laiin CNN leh US Liberal Media etc..te chuan he thil hi nasa taka sawi hnawm an lo tum ve char char bawk ani.Tichuan MAY thla ram hma a inhmuh ngei tumin hma an la mek ani.

2) WALL : Donald Trump a au hla ber chu a ruk rala lut thin te danna tur leh Drugs tawlh ruk thin tih tawp na tura MEXICO nen an in kar a Daidanna WALL siam chu ani a, hemi avang hian do tu angah phah hle a, mahse ani erawh chuan an do na te,an sel na techu ngaihsak lovin a thil tum tih hlawhtlin nan chuan chawl lovin a bei zel a, US Democrats lam chuan theihtawp a dodal an tum a, chumi vang chuan WALL sakna tur a hmantur pawisa Congress a a dil pawh an remtih pui lova,Harsa tak a an beih hnu ah $1.6 billion chu hemi a hman atan hian an pawmpui ta phawt a, a tahtawl in a hnu zel ah a dang pawh pass belh zel anih tur thu Trump a chuan a sawi ani. tin Kum dang zawng aia tam Military a hman tur pawisa an PASSbawk a,chuchu Trump a remruat na ani a, Senate chuan $700 billion defense policy bill a pass a, chuchu Military lam tih changtlunna tur te, Ram venhim na lam a hman tur ani a,He pawisa hi Trump a hian WALL siam nan hman a tum deuh ni a hriat ani leh zel a, a chhan chu Trump a hian tweet hmangin WALL chu National Security thil anih thu te a sawi vak mai a,chutiang anih chuan Defense Policy bill hian a huam dawn a,chu pawisa chu a WALL atan a hmang peng thei dawn tihna ani a, Democrats ho chuan chuchu an hlau hle mai a, chutiang a TRUMP an thil tih a tum chuan COURT a khin ah an lo vau lawk ve bawk ani..Tunah hian WALL siam chu an tan thei tawh a, Democrats hovin an dodal apiang a ti thei zel mai chu ani si a, a fin hi an chelh zo angem tih chu kan thlir zel dawn anih hi.Trump a chuan vawiin mai khan MEXICO vau na alo chhak chhuak veleh bawk a,Mexico chuan US a dan lo a lut ru te tumah dan a tumlo a ti a, Drugs leh hetiang US a lut ru tehi MEXICO in a dang tur ani, chuti lo chu an an sum hnar NAFTA ka ti tawp ang, BORDER WALL kan mamawh tiin.

3) FBI Deputy Director McCabe ban anih leh a nghawng.

kan sawi fo tawh angin TRUMP a kha a tlin loh nan nasa takin an beih rawn a, a tling leh ta si a,chutah a tlak theih nan FBI leh CIA bakah British sorkar meuh an in rawlh ani awm a, evidence te pawh hai lan ani chho zel a, FBI Director James Comey pawh ban ani a, chumi hnu ah a Deputy Director Andrew McCabe chu Hillary Clinton i a duhsak luat vang leh,a thil tihsual a thup sak a, Thutiam chunga dawt a sawi fo avangin an BAN leh ta a, hei hi Democrats ho chuan an haw hle mai a, Trump a duhlo tute apiang Trump an a then fai na thil tih ah an ngai a,nasa takin CNN leh Khawvel MEDIA ah Donald Trump a dem na aw a ring hle mai a,mahse McCabe hi Donald Trump a nilovin FBI a, a thawhpui ngei ten Dawt a sawi thin tih an finfiah hnu in, Ban turin Attorney General hnen ah recommendation an pek hnu ah an ban chauh ani.McCabe a ban tur a rawt chhuak tu chu FBI Ethnic Director ani a,chupa chu Donald Trump leh Russia in kungkaihna chhui tu, Trump a do em em tu lam bawk Robert Mueller a ruat hi ani nghe nghe..Democrats leh CNN ten TRUMP an puh na tehi chhui chian dawl tak ala awmlo reng reng a tih theih ang.

4) In Puh Hmingchhiat na :

Tun hma atang tawhin Trump a chu hmeichhia hrang hrangin an hnen a awm khawlo emaw an mutpui hnu anih thu te puangin tih hmingchhiat an tum bang lova,Evidence hmuhchhuah zel atang chuan hetiang mi tam tak tehi Hillary i pawl ten Pawisa pe in Trump a anlo puh mualpho tir thin tih te hriat belh zel ani a,ti chuang chuan an thil tih chu an sim chuang reng reng lova, Donald Trump a PUH mualho tu chu Blue Film star ani emaw mi nun pawlawh leh dawt sawi hrat tih khawtlang in an hriat pawh nise CNN techuan thutak khuk in an khuk pui hluai zel a,TRUMP a puhtu tawh phot chu HNAM PASALTHA angah an chhuah zel ani..Tun a an buaipui leh ber tawh chu Stromy Daniels (Blu Film star) ani a, henu hian kum tamtak kalta khan a duhthu ngeiin Donald Trump nen an lo mudun tawh tih a sawi a,chumi chu DEMOCRATS/Liberals ho chuan Donald Trump a paihthlak na tur hmanrua berah hman an tum leh ta a, Donald Trump a supporter Kohhran mi te mit hmuh ah chuan Trump a chu mi tlinglo a chantir an tum a, mahse an tum ang reng rengin thil a kal leh thei ta chuanglo a, tun hnai mai khan CNN ngei pawhin TRUMP a vote tu techu a kawm kual a, Blue Film star nen an lo mudun tih te chuan Trump an duhna a reh phah em tiin an zawt kual a, America ram pum ah TRUMP a duhtu an tlakhniam phah reng reng lo tih an hmuchhuak ani..Kohhran/Evangelist te pawh chuan Trump a chu an support ngaiin an la support tlat a, a tun hma nun ah an buai loh thu an sawi a, tin Voters tam tak chuan duh leh duh mudun an ni a, pawngsual emaw tih luihna pawh awm lo, chuta chhapah kum tam fe liam ta a thil alo tih ah kan buai lo an ti tlat ani..Mi Thenkhat lahin Donald Trump ka Vote a, PASTOR ka vote hlei nem, a private life ah ka buai lo ti bawng bawng pawl lah an bang lo.

5) OBAMA ve thung sawi lok teh ang..

Donald Trump a puh tu apiang Aizawl kilkhawr ber thlengin kan lo hria a, CNN leh MEDIA zawng2 in nileng zankhua in an COVER thin bawk a,hetih lai hian OBAMA pawh puh tu an awmlo ani biklo,mahse chutiang lam chu MEDIA hian a hmet mit zel zawk ani..Larry Sinclair a chuan Senator Obama nen CHICAGO ah inhmelhriat tir annih hnu ah Drugs te khawih dun in Mipat mipat na in an khawsa ho tih a sawi tawh bawk..Hei lo pawh hi GAY activities lama in hnamhnawih ah OBAMA hi puh ani nual a,mahse chutiang techu MEDIA hian a hmet mit zel ani, tin SOCIAL MEDIA kan tih GOOGLE te, FB leh Instagram bakah Tweeter thleng hian Conservative do tlat, LIBERAL ruh em em vek, Donald Trump thih ngam khawp a hua vek anni a,tun hma deuh a Google a awlsam taka kan hmuh mai thin Bible in GAY a duh lohna lam a ziah te, Obama thil tih dik loh , a mualpho pui tun hma a awlsam taka kan hmehchhuah fo thin te, leh thil hrang hrang chu Source hmuh tur an dah bo vek tawh a,Conservative tan lam article leh source chu zawnhmuh tur a awm tawhlo tluk ani a,chutih laiin LIBERAL thlir na lam leh Obama te an puh na a dikloh zia Article leh thuziak te, an tehna lam chu hmuh sen loh in a khat dul mai ani..a tawi zawng a kan hriat thiam theih tur chuan Google, FB, Instagram, Tweeter leh MEDIA lar zawng zawng hian Conservative lam thlir na leh dik na te, tin Liberal ho an diklohna source emaw article reng reng hmuh theih turin a dah lang ve tawh lo a ani.,Instagram leh FB bakah Tweeter pawhin Conservative thurin kalpui zawng a thu post chu an delete sak vek loh pawhin a post siamtu emaw page emaw an remove tlang pui tawh bawk a,Warning an pe zung zung mai ani..ISUA sawi chhiat na chu an thlir liam mai thei, Mohammed a sawi chhiat na erawh Warning i hmuh nghal loh pawhin Block i nih phah nghal fo ang.

Sawi tur hlir maiin a la khat a,Hollywood leh Media in Christian/Conservative an do dan leh chumi in a hrin chhuah thil te,RUSSIAN collusion a awm loh zia te, Vice President hlui Joe Biden an Insual pui ah Donald Trump a cho na leh Trump a chhan let na Rorum tak te, Joe Biden a leh China in kungkaihna thuruk hailanna te, California ram an buai mek dan te, Liberal hovin Zirna in ah Christian te an nek chep chhoh zel dan te nen lam kan sawi seng lo ani..tin Boko Haram hovin Kristian naupang khawngaihthlak tak an man an chhuah ve loh chhan te,President Trump a, naupang kum 8 mi lekin lehkha a thawn a,apa damlo tan tanpui a dilna te,Muslim Mayor kaihhruaina hnuaia LONDON dinhmun te..POST a thui tawh si Duh tawk leh phot mai ang aw.
(Spelling leh Sentence rem dik tawk loh ah hriathiamna ka dil e)

Aside | Posted on by | Tagged , | Leave a comment

IRAN NUCLEAR A THISAWN DAWN EM? TRUMP-AN A HMING ZIAK NAN PEN A HUM MEK

Kum 2015 a President Barack Obama hmalaknaa Britain, France, Germany, China leh Russia hruat pui a “Iran Nuclear Deal” an lo siam chu President Trump chuan May 12 thleng ngun taka ennawn tura thupek tawpkhawp (ultimatum) a pek vangin leh US chu he Iran nuclear deal tihbo turin a inpeih a tih vangin, he Iran nuclear deal uluk taka lo thlir zuitu Joint Comprehensive Plan of Action (JCPOA) member ramte chu an virbuai ta hle.

Germany ah EU ramte chuan meeting neiin, Iran nuclear deal an thlirkir (review) tawh a, niminah JCPOA member ramte pawhin Vienna khawpuiah meeting pawimawh an nei a ni. President Trump chuan Iran nuclear deal hi tihtawp duhin, a thupek siam nan a ipteah a pen chu a pai reng tawh tih sawiin, May 12 thleng hun a pe a ni.

Iran nclear deal hi tihtawp tumin, US hian lo chhuahsan ta se, Gulf War hmingthang zet a lo chhuak leh mai ang em? Israel, Saudi Arabia leh UAE ramte chuan Iran nuckear deal hi Donald Trump angin an duhlova, Trump a dinnaah nghet takin din an tum. President Trump hian tun hnaiah Iran nuckear deal dodal thintu John Bolton chu National Security Adviser ah ruat tharin, April 9 hna a zawm ang. North Korea bei duhtu Secy of State atan Mike Pompeo (CIA Director hlui)a ruat chho bawk a, Defense Secy Matines Corps General James Mattis a nei bawk a, James Mattis hi Iraq War ah lo che tla hrep leh, hmingṭha tak mai, “Mad Dog” ti hiala hminglem nei tha a ni! Iraq a helte chu Iranin sum leh pai leh ralthuamin a pui ti thintu a ni, a ti thin.

President Donald Trump chuan Iran hi a vau zauh zauh tawh a, Gulf tuipui Tamuz vela US indo lawng zin veivak chu Iran Naval-Coast Guard hoten an lo chhaih buai fo chuan, “Tuipuiah ka phumbo tir ang “ (blow them up) tiin a vau a ni. Iran Navy ten US Navy Patrol boats lo chhaih leh tihbuai an ching hle thin a ni.

<

p style=”text-align:right;”>Author: CT Lalrinawma

Aside | Posted on by | Tagged , , , | Leave a comment