KUMHLUI NOVEMBER NI 3 ZAN ATANGA CHIN HRIAT LOHA BO MAWITE RUANG CHHE TAWH TAK HMUH A NI

Tlangval Lalvulmawia (Mawitea) kum 32 C/o Awikima N.Vanlaiphai Forest Veng, (Damdawi veng Branch huamchhunga cheng) hi nikum November ni 3, 2017 zana a leng chhuak chu chin hriat lohin a bo zui ta a. A bo tuk atangin khawtlangin bo zawn hna ngawrh takin an thawk nghal a ni. Hmasawnna an neih mai loh avangin Khaw thenawm Branch YMA te bakah Tuichangral South Group anga hma lain bo zawn hna ngawrh takin an thawk a, Mahse hmasawnna emaw a sulhnu emaw engmah hmuhtur leh hriattur a awm loh avangin Nov. ni 14 tlai khan mipui nawlpuiina a zawn hna chu tihtawp a ni.

Nimin Jan. Ni 8 Thawhțanni chhun dar 12 vel khan Hrangturzo liam, Sailulak ep, Maurang rama chawhmeh zawnga kal ten a ruang hi an hmu a. Khawchhung lam hriattirnghal niin a ruang latur hian mi tamtak an kal nghal a. Jt.YMA bultumin kuang nen mi tlawmngaite thawk chhuak nghalin nizan dar 8 vel khan an chenna In thlenpui a ni a, nizan dar 9 vel khan Damdawi veng Thlanmualah vui liam nghal a ni.

A ruang hi a chhiat nasat tawh avangin a kawr hak ațangin Mawitea a ni tih hriat theih a ni a, a ruang awmna ațanga hnaiteah hian pûk a awm a, mahse pûk chhungah hian a sulhnu engmah hmuhtur a awm lem lo niin thudawnna chuan a sawi. A ruang awmdan enin a țhu niin a lang a, a bulah hian a wallet pawh a lo la awm a ni. A malpui vel bawrah tisa tlem a la awm tih bak chu a ruhro bak hmuh tur a awm tawh lo nain a luruh erawh a lo tla hrang tawh a, ramsaten an put darh loh avangin a ruhro te hi kim taka hlawmin nizan khan vui liam a ni ta a ni.

Author : Vanneihthanga Vanchhawng

Advertisements
Aside | Posted on by | Tagged , , | Leave a comment

KUMHLUI NOVEMBER NI 3 ZAN ATANGA CHIN HRIAT LOHA BO MAWITE RUANG CHHE TAWH TAK HMUH A NI

Tlangval Lalvulmawia (Mawitea) kum 32 C/o Awikima N.Vanlaiphai Forest Veng, (Damdawi veng Branch huamchhunga cheng) hi nikum November ni 3, 2017 zana a leng chhuak chu chin hriat lohin a bo zui ta a. A bo tuk atangin khawtlangin bo zawn hna ngawrh takin an thawk nghal a ni. Hmasawnna an neih mai loh avangin Khaw thenawm Branch YMA te bakah Tuichangral South Group anga hma lain bo zawn hna ngawrh takin an thawk a, Mahse hmasawnna emaw a sulhnu emaw engmah hmuhtur leh hriattur a awm loh avangin Nov. ni 14 tlai khan mipui nawlpuiina a zawn hna chu tihtawp a ni.

Nimin Jan. Ni 8 Thawhțanni chhun dar 12 vel khan Hrangturzo liam, Sailulak ep, Maurang rama chawhmeh zawnga kal ten a ruang hi an hmu a. Khawchhung lam hriattirnghal niin a ruang latur hian mi tamtak an kal nghal a. Jt.YMA bultumin kuang nen mi tlawmngaite thawk chhuak nghalin nizan dar 8 vel khan an chenna In thlenpui a ni a, nizan dar 9 vel khan Damdawi veng Thlanmualah vui liam nghal a ni.

A ruang hi a chhiat nasat tawh avangin a kawr hak ațangin Mawitea a ni tih hriat theih a ni a, a ruang awmna ațanga hnaiteah hian pûk a awm a, mahse pûk chhungah hian a sulhnu engmah hmuhtur a awm lem lo niin thudawnna chuan a sawi. A ruang awmdan enin a țhu niin a lang a, a bulah hian a wallet pawh a lo la awm a ni. A malpui vel bawrah tisa tlem a la awm tih bak chu a ruhro bak hmuh tur a awm tawh lo nain a luruh erawh a lo tla hrang tawh a, ramsaten an put darh loh avangin a ruhro te hi kim taka hlawmin nizan khan vui liam a ni ta a ni.

Author : Vanneihthanga Vanchhawng

Aside | Posted on by | Tagged , , | Leave a comment

JOURNALIST NILO IN AADHAAR THUNEITUTE MAN RAWH U: EDWARD SNOWDEN

Tunlaia India ram news headline lian luahtu leh mite ngaihven tak, Aadhaar data putru chungchangah sorkar lam thuneitute chuan data puhruk thu puangzartu journalist lam chhuia action lak tuma hma a lak laiin American whistleblower lar, Edward Snowden chuan nimin khan India sorkar chu a khua leh tui te privacy tihbawrhban sak ni a sawiin Aadhaar data puhruk chungchang puangchhuaktu reporter te thlavang hauhin a tawng chhuak.

Hemi chungchanga sorkar thuchhuah chu Snowden hian sawiselin journalist te chungchang ngaihtuah lovin Unique Identification Authority of India (UIDAI) zawk chu data leak thu-ah hian hrem tur an ni a ti.
“Aadhaar data putru chungchang pholangtu journalist te hian chhui zui nilo in lawmman pek an phu zawk a ni. Sorkar hian dik tak a rorelna neih a duh a nih ngat chuan India ram mipui maktaduai tel te privacy tichhetu policy hi an siamtha ngei tur a ni. He thila mawhphurtute hi man a duh maw? UIDAI an tih hi a ni e,” tiin Snowden chuan Tweeter ah a thailang.

Tunhnai khan Aadhaar data hi a putru niin India ram thuthar lakhawma thehdarhtu te chuan an sawi a, The Tribune chuan WhatsApp agent pakhat chuan mi tute emaw Aadhar number chu sum tlemte, Rs 500/- emaw lekin awlsam takin an access thei niin a tarlang a, hemi chungchangah hian khawvela biometric identity card scheme lianber, UIDAI chu a hmai a chhe hle a ni.

UIDAI lam chuan hei hi dawt a ni an ti a, The Tribune report chu report dik lo (misreporting) a ni tiin chanchinbu lakah hian FIR an thehlut.

Author: Kiddy Vanchhawng

Aside | Posted on by | Tagged , , , | Leave a comment

KUM 2015-A SRS DIN THAR LEH ATANGA KUMHLUI 2017 DECEMBER THLENG KHAN Rs 12,41,21,220/- MAN HU RUIHHLO MAN TAWH

• SRS in ruihhlo an man zat
• Ruihhlo vanga thi zat
• SRS te mi man tawh zat
• Ruihhlo phurtu tam ber te.
Central YMA-in kum 2015-a Supply Reduction Service (SRS) a din thar leh a, April 11, 2015-a atanga SRS-in hma a lak tan atanga kum kalta December 2017 thleng khan ruihhlo Rs 12,41,21,220/- hu an man tawh a. Hetihlai hian kum 1986 atanga nikum thleng khan ruihhlo hmansual vanga thi Mizoramah mi 1,462 an awm tawh.

SRS-in thla 30 chuang chhunga ruihhlo an mante chu heroin hawng 670, can 4,722 leh a chhin sen 414, opium kg. 15 leh gram 478, Alpazolam strip 1,886, ganja kg. 60 leh gram 758 bakah ruihhlo dang tam tham tak an man a ni.

Ruihhlo an man kaihhnawihah SRS te hian mi 3,082 an man tawh a; an mi mante zinga 526 chu home-ah an dah a, mi 1,809 chu nun dan dik zawk kawhhmuhin councelling an neihpui. Excise & Narcotics department hnenah mi 121 an hlan a, Police hnenah mi 367 an hlan bawk.

Nikum March 20 atanga December 31 thleng khan SRS 5th Batch leh CYMA Kumpuan Commitee hian ruihhlo chi hrang hrang Rs 1,68,89,560/- (Cheng vbc 1, nuai 68, sing 8 sang 9 leh 560) hu an man a. Heng ruihhlo man te hi No 4 Hawng 120. No 4 Chhinsen 85, Alpazelum Strip 414, Ganja kg 24 leh Pack 16. No 4 Can 1127, Pseudoefedrine Kg 55, Proxivon Strip 49 leh mum 7, Khuhdamdawi bur 3193 leh Halpuah tlep34 an ni.

Ruihhlo an man kaihhnawihah mi 592 man an ni a, Home-ah mi 19 dah niin, Excise kuta hlan mi 8, Police kutah mi 2 an hlan tawh bawk a. An man zinga mi 271 hi councelling neihpui an ni a. Ruihhlo ti leh a kaihhnawih avanga man zingah hian mipa 104 leh hmeichhia 24 an awm a ni.Ruihhlo kaihhnawih a SRS-in an mante zingah hian kum 20 leh kum 40 inkar an tam ber a; SRS hotute chuan, ruihhlo ti thin zingah proxyvon leh parvon spas a awm tawh loh avangin heroin ti an pung hle niin an sawi.

Heroin No4 hi Zokhawthar kaltlanga rawn lut a tam ber nia an hriat thu leh Sumo driver te chu a phurtu ber nia an hriat bakah Heroin chu kum 2015 November thla tir atangin a pung lehzual nia an hriat thu SRS hruaitute chuan an a ni.

Hetihlai hian kum 1986 atanga nikum December 14 thleng khan Mizoramah ruihhlo hmansual avanga thi mi 1,462 an awm tawh a, heng zinga mi 1,300 te chu mipa an ni a, midang 162 te chu hmeichhia an ni. Ruihhlo hmansual avanga thi zingah hian proxyvon vanga thi mi 1,167 an awm a, Heroin vanga thi mi 173 awmin, damdawi dang hmansual vanga thi mi 122 an awm tawh bawk.

Author : Vanneihthanga Vanchhawng

Aside | Posted on by | Tagged , , | Leave a comment

US ASTRONAUT, THLA LEILUNG RAP TAWH JOHN YOUNG A BORAL

Khawvel ngaihsan leh mi chungchuang zing chhiar thin, Thla leilung rap a, Thla leilunga lo pen thauh thauh tawh, van thengrenga tum 6 zet lo inkapchhuak tawh, US legendary astronaut John Young chu tun Inrinni khan kum 87 mi niin a boral tih puan a ni.

John Young hi tunkar Zirtawpni khan pneumonia natna avangin a boral niin space agency chuan a sawi a, amah hi Houston, NASA Centre atanga hnaite a cheng a ni. Agency administrator Robert Lightfoot chuan, NASA leh khawvelin sulsutu pawimawh tak a chan a ni,” ti a thuchhuah siamin, “Hringfate hmalam hun lo la awm zel tur hi a kokia chuangin kan thlir a ni,” a ti.

Young hian ‘Hmasaber’ nihna a nei tam hle a: amah chiah hi khawvel astronaut zinga Gemini, Apollo leh space shuttle programs (and the first to command a shuttle flight) a thlawklut awmchhun a ni a; space a vawi 6 zet thlawkchhuak hmasaber a ni a, vanthengreng (space) a hun hmang reiber (total record) record pawh a lo siam tawh bawk niin NASA chuan a sawi.

Young hian Gus Grissom on the Gemini 3 mission-ah Gus Grissom a zawm a, chutah space shuttle hmasaber a command a, thenkhat chuan hei hi, “the boldest test flight in history.” an ti hial a ni.

Hemi hnu hian vawikhat thlawhchhuah (single flight)-a spacecraft hran ve ve pahniha innghat hmasaber, Gemini 10 alo command tawh bawk.Young hian Apollo 10 in Thla a hel kual a, Apollo 16 hmangin Thla-ah a tum a ni.

Lightfoot chuan, “Amah hi kawng engkimah astronaut te astronaut a ni,” a ti a, chu mai bakah Young hi savvy engineer, test pilot te test pilot a ni e,” a ti bawk.Navy-a a awm laiin Young hian Lawng atanga F-4 Phantom II jet a lawn chak ber world record alo siam tawh bawk.

A astronaut thian, Charles Bolden chuan Young leh an thianpa, Robert “Hoot” Gibson te chu a pilot hriat tawh zawng zawng a ‘thaber’ an ni a ti.

Author : Kiddy Vanchhawng

Aside | Posted on by | Tagged , , , | Leave a comment

LAWMMAN ATANA BAWNG DAWNGTU BOXER PATHUMIN PE LET. MI TIHNAT CHIAH A THIAM- JYOTI

Senior national boxing championship, Guwahati a November 19 – 26 a neih a Haryana aiawh a tel medal la hmeichhe parukte chu Haryana sawrkarin a lawmpuina bawng a pe vek a, mahse mipathum te chuan an pe let leh tawh. Boxer zingah Jyoti, Neetu leh Sakshi te chuan bawng hi an pe let.Jyoti chuan bawng an dawn chu hnutetui a neih tlem bakah mi kick/khen a hrat thu a sawi a, a nu pawh a kick hliam thu a sawi.

Haryana sawrkar hian Hindu pathian kaihhnawih bawng chawilar tumna lama hma an lakna kal zela an pek a ni.

Author : Mafela Ralte

Aside | Posted on by | Tagged , , | Leave a comment

2018-A PUITLING S.S. ZIRTUR: 1 CHRONICLES BOOK OVERVIEW:

A HMING: Chronicles tih hi Jeromea’n “Chronikon” / “Words of days” tih a ziak atanga phuah zui a ni a.

Septuagint chuan, “Things omitted” “Thil hmaih then” tiin a dah ve leh a. A bu hnih hi tun hma chuan Bu khat a ni thin a. Samuela Bu leh Lalte Bua an hmaih then chu Chronicles hian a kim thei ang ber leh indawt dan dik thei ang berin a ziak a ni.

A ZIAKTU: Chronicles ziaktu hian Judate Babulon sala an tanna atanga an rawn kir leh hnua Judai rama lalte leh an thlahte chanchin a ziak tel nual avangin, Judate leh Kristiante chuan, Zawlnei Ezra ziak niin an ngai a. Jewish Babylonian Talmud paw’n Ezra ziak ngei angin a tar lang a. A ziak dan, tawng kau chheh leh thlah kal zel chhuina (style, vocabulary, and genealogies) atang hian (450 – 400 BC) vela Ezra ziak ngei nia ngaih a ni. Chumi hmaa ziak chu a nih pawhin, 538 B.C vela Persia in Babulon an hneh hnua lal Kuran Judate Jerusalema kirtir vek a, Jerusalem temple sa tha tura a tih lai vel ni tura ngaih a ni. (2 Chronicles 36:20-23)

Talmudists chuan, Haggaia, Zakaria leh Malakia te pawh Chronicles ziaknaah hian an tel ngei a ring a. Kimchi leh mi dang dang paw’n ngaih dan hrang an nei thluah a ni.

A CHHUNG THU: Chronicles hi Adama atanga tanin, Israelte thawnthu ziakna bu a ni a. Judate Babulon sal tanna atanga an rawn kir leh thleng chanchin kan hmu a ni.

LEHKHA BU DANG NENA AN INLAICHINNA: Genesis-a Mihring thlahtu bul chhuina atanga Judate Babulon sal tanna atanga Jerusalema an kir leh thleng chanchin chu Samuela leh Lalte bua kan hmuh ai maha kimchang leh indawt dan fel zawka ziak a ni.
SAKHAW THILA A PAWIMAWHNA:
(1) Pathianin a mite a ngaih pawimawh zia leh anmahni kal tlanga a chatuan remruat tih hlawhtlin a tum dante kan hmu a.
(2) Pathian an biakna atana Jerusalem Temple a saktir pawimawhna kan hmu a.
(3) Israel lalte zinga Pathian nung be tha duh tute leh milem biakna hmun ti chhe thin tute chunga Pathianin a duhsakna a lantir dan kan hmu a. Chumi rual chuan, Pathian nung be duh lo a, milem leh pathian lem biak ching ho a hrem dan kan hmu bawk a ni.
(4) Isua Krista chu Pathian chatuan remruat anga rawn piang a nih dan pawh Chronicles atang hian kan hre thei a. Juda thlah kal zel atanga Davida a rawn pian dan leh Isua Krista chu Judate Messia ngei a nih dan kan hre thei a ni.
(5) Chronicles hian, Israel lalte hun laia Zawlneite ai maha Puithiamte an pawimawh dan min kawhhmuh a. Mimal leh chhungkua te, ram pum hmasawnna tur chuan engkima Pa Pathian thupek kan zawm a tul zia min zirtir a ni.
A bu chhunga zir ngawrh atana tha te:
(1) Davida mi ropuite chanchin te,
(2) Davidan Pathian tanpuinaa hnehna ropui a chan dan te,
(3) Solomonan Temple a hlan leh a tawngtaina ropui zia te,
(4) Solomona hausakna leh a thil tih sual te,
(5) Pathian hminga inpawl khawm hovin a THU an zawm a tpawimawhna te,
(a) Lal Asa’n Lalpa maicham leh Bungbel thianghlim a din thar dan te,
(b) Jehoshaphatan Israel mipuite hnena Lalpa Dan zirtir tura Puithiamte a tirh dan te,
(c) Joasa’n Lalpa chenna In a siam that dan te,
(d) Josia’n Pathian ropuina tura thil a siam that dan te,
(6) Manassea rorel dan te,
(7) Judai rama Pathian an biak dan te,
(8) Israel fate ram dang Sala an tan chanchin te,
(9) Ram pum huapa sakhaw dik zui a pawimawhna te,
(10) Milem betute chunga thil tha lo a thlen dan te kan zir thei a ni.

INTRODUCTION TO 1 CHRONICLES

Chronicles: Chronicles hi Adama atanga thlahtu chhuina a nih rualin, Israel fate Kanaan rama lal neia an awm laia thil thleng pawimawh chanchin kimchang leh indawt thei ang bera ziakna (a factual written account of important or historical events in the order of their occurrence) a ni a.

1 & 2 Chronicles hi Mosoretic Note atanga a lan dan chuan, Bu hnihte hi Judate chuan bu khat angin an lo nei thin a. Chu chu Origena leh Jeroma te sulhnu atangin a hriat theih a. 1&2 Chronicles-ah hian Pa Pathian kaihhruainain 1&2 Samuela leh 1&2 Lalte Bua inziak famkim tawk lo te chu Genesis atanga chhui chhovin, kim zawka ziakin, a thlen dan indawt thei ang berin a ziak a.

1&2 Chronicles hi Hebrai tawng chuan, “Divrei Hayamim,” tih a ni a. Greek tawng chuan, “Ephemerides / Ephemeris” an ti a. Arabic chuan, “the Books of Annals;” a ni a. Chu chu: Thil thlen tawh dan kimchang leh indawt thei ang bera ziakna tihna a ni.

Targum-ah chuan, Chronicles hi “Thlahtu chhuina,” “the Book of Genealogies, the Words of Days,” tiin kan hmu a. A chhan chu Bung hmasa 10-ah hian Adama atanga mihring inthlah chhawn dan a inziak vang a ni.

Chronicles hi Latin tawng chuan, “Paralipomena” tih a ni a. Greek tawng chuan, “paraleipomena” tia hriat a ni ve leh a. Chu chu: Thil thleng tawh chanchin ziaknaa kimchang tawk lo lai kimchang zawka ziak belhna, (things omitted from a work and added as a supplement) a nih vang a ni.

By Thanhlira, 9436360646.

Aside | Posted on by | Tagged , , , | Leave a comment

TANPUINA TUR SUM HREK A NIH HNU-AH PAKISTAN-IN JAMAT-UD-DAWA BLACKLIST-AH DAH by Kiddy Vanchhawng

A tawng pang pang a, a tal laih laih takna-in US meuhin a theihna chin china tanpuina tihtawp sak a vau a, a sum hmuh tur thenkhat an tihtawpsak meuh chuan rei a tang hleithei meuh dawn lo a ni ang nge, nimin (Inrinni) khan Pakistan chuan UN-designated terrorist leh 26/11 Mumbai attacks a a meizanghlaptu, Hafiz Saeed leh a pawl, Jamat-ud -Dawa chu Blacklist-ah a dah ta phawt e.

Hei hi Pakistan sorkarin Afghan Taliban leh Haqqani Network te a ramchhunga duhthuthla a him yaka an chetvel a hrek duhloh avanga US in tanouina $ 2 billion a tihtawp sak hnu a Pakistan sorkar chet lakna hmasaber a ni.

Kan hriat leh tarlan tawh thin angin Donald Trump-an Pakistan chu theihtawpa sum leh paia a puihna-ah engkawng mah a dolet lova Dawthei leh bumhmang mai ni a a puh hnu-ah heng ram pahnihte inkar hi a sang hle a nih kha.

Trump chuan, “United States chuan atthlak takin kum 15 kalta chhung khan Pakistan hi $33billion chuang tanpuina alo a pe tawh a, anni erawh chuan kan hruaitute hi mawl takah ngaiin dawt leh inbumna bak engmah min pe lo a ni,” tiin Tweeter-ah a sawi a.

“Afghanistan-a terrorist kan beih te tan a ramchhungah inhumhimna a pe a, tunah chuan a tawk ta, kan pui tawh lo ang,” a ti anih kha.

Trump hian nikum August thla a South Asia Policy thar duan a puanna-ah Pakistan hian terrorist beihna kawngah US hi a thawpui duhlo a nih chuan na zawka hrek a nih tur thu a lo puang daih tawh a, Trump hi a tawng mai mai lo viau a ni.

Hetiai hian nimin khan US chuan Pakistan duhthlan tur (option) chhawpchhuah a ni a, US thawhpuia a ramchhung a Afghan Taliban leh Haqqani Network te him taka an inkulhna leh an chetvelna tihtawp emaw chumi a nih loh chuan US hnen atanga tanpuina a hmuhtur zawng zawng chan vek emaw thlang mai turin US chuan option a chhawpchhuah sak a, Pakistan hian a sarhu laiin pawr takin, ‘Khawvel hi a zau tawk a, US hian kan hrawk min chawm lo…” han ti ve pang oang mahsela US hnen atanga tanpuina a dawn tur tawp mai tur hi Pakistan hian a tawrh ngam hi a rinawm loh reng a ni.

Aside | Posted on by | Tagged , , | Leave a comment

MYANMAR KALTLANGA RAM DANGA HNATHAWKA CHHUAK AN AWM THIN, HEI HI A HIMLO TIH MIZORAM POLICE TEN THUCHHUAH AN SIAM

Tunhnaiah Mizo thalaite Mizoram chhuahsanin Myanmar kaltlangin ramdang – Singapore, Malaysia, Macau etc-ah inhlawh turin an kal thin tih hriat a ni a. Hetianga inhlawha kal hi thil itawm leh tha tak angin lang mahse, a himlo hle a. Hemi chungchangah hian mipuite kan fimkhur zawk nan Mizoram Police chuan thil kalhmang sawifiahin thuchhuah an siam.

1) Agent te hian an sawm chhuah laiin kal man/riah man/chaw ei man a thlawn vek turin an sawi tlangpui thin a, mahse an sawi angin a thlawn a ni ngai reng reng lova, an hnathawhna tur hmun, ramdang an thlenin service charge atan an thla hlawh, thla 6/ thla 7 hlawh atang tein an rulh tir leh thin.

2) Myanmar an thlen hian an hna zawn chhung training an neih tir a, hemi chhung hian document lem hmangin agent ten Myanmar passport an siamsak thin niin hriat a ni. Hei hi Myanmar ram dan kalh a ni a, a hremna chu kum 7 lungin tan theihna a ni a. Myanmar Police ten an man pawhin inbuaipui theih a ni lo.

3) Ramdanga hna an thawh hian harsatna lo tawkin, haw leh mai pawh duh leh thin mahse, agent ten an lo senso tawh kha an rulh let tir thin a, inlama chhungte tan phurrit, leiba nasa tak an insiam thin a, rawn haw thla mai theilovin Myanmar-ah te an tangkhang ta thin a ni. Mizoram rawn let a harsa hle tawh thin.

4) Myanmar khua leh tui anga an kal tawh avangin harsatna leh buaina an tawh palh pawhin, Mizoram khua leh tui anga inbuaipui a harsa tawh thin. Thihna hial an lo tawk a nih pawhin an ruang hi Mizoram a lakluh theih a ni tawh lo.

5) Agent te’n thawk tur anga an sawi apiang thawk lo theilo dinhmunah an din avangin, an tum lawk miah lohin mipat hmeichhiatnaah humsual an dai phah thei.

6) Dan ang thlapa in Register, Placement Agent hi an la awm lova, Agent te hian thiam tak leh kal chakawm thei ang berin an sawi fo thin.

7) Ram pawna hnathawka kal dawn pawhin Indian Passport chauh hman tur a ni.

Aside | Posted on by | Tagged , , , | Leave a comment

SANGHAL SA HMANGA RUAI ṬHEH

Champhai district a Diltlang (NE Diltlang) khua a UPC (NEI) kohhranin sanghal sa hmanga Kum Thar ruai an ṭheh nia hriat a nih avangin Environment, Forests & Climate Change department chuan enfiah turin officer an tir.

Diltlang khua a UPC (NEI) kohhranin kum thar ruai atana sanghal sa an hmang ni a puhna enfiah tur hian Champhai DFO leh Hnahlan RO hovin department mite chu tun hnai khan an kal a. An thil hmuh dan report hi sorkarah an thehlut ang.

Thudawn danin Diltlang UPC kohhran hi chhungkaw 15 vel an ni a. Sanghal tlaw 2 an chhar niin an insawi a. E,F & CC department hotute erawh chuan kah hlum niin an hria a. Sazuk an kap bawk niin an sawi.

Aside | Posted on by | Tagged , , | Leave a comment