MIZORAMAH MALARIA VEI ZAT TLAHNIAM

  • 2016 kum chanve chhung a malaria vei zat
  • 2016 kum chanve chhunga malaria vanga thi/boral zat
  • Malaria test neih tawh zat
  • 2016 ah malaria vei an tlem

Kum 2016 kal mekah Mizoramah Malaria vei zat a tlahniam nasa hle a. Kum kalta 2015 Jan – June thleng khan malaria vei zat mi 8727 an awm laiin tunkumah erawh mi 3914 chauh an ni thung.

Case tlakhniamna hi 55 % lai a ni. Pf vei zat hi
7543 ațangin mi 2880 ah tlahniam in (62%
reduction) malaria vanga thi zat pawh mi 13
ațangin mi 4 ah a tlahniam bawk (69%
reduction). A tlakhniam belh zel pawh beisei a
ni.

Jan – June, thla chhung hian thisen lak zawng zawng zat mi za zelah mi 11 lak tawh ang a ni a, Kum chanve ah kum khat chhunga target khûm der a ni.

Hetia case a tlakhniam theih chhan hi thawktute thawhrimna leh țanlakna te, LLIN (Thosilen chiahsa) khaw 733 leh hmun hrang hranga sem a nih vangte leh sawrkar leh mipui țawiawmna vang te a ni.

Advertisements
Aside | Posted on by | Tagged , , , , | Leave a comment

MPC thalai ten HOME MINISTER in KOHHRAN a DEM PAWI AN TI

Home minister Aw Setana Awrawl ah ngai

July 19, 2016 (Thawh lehni) a Aijal Club-a Home Minister Pu R Lalzirliana’n chanchinbu mite a kawmnaah Zu chungchang a Kohhran hruaitute na taka a demna thu a au chhuahpui ta mai kha MPC Thalai Gen.Hqrs chuan pawi kan ti, tiin thuchhuah an siam.

MPC Thalai chuan, Koh hran leh Thlarau Thianghlim zah lohna leh sawichhiatna lian takah kan ngai a. Home Minister kam chhuak hi setana aw rawl-ah kan ngai a, kan dem takzet a ni.

Mizoram a Kohhran hrang hrang leh NGO-ten Mizoram Kristiante chenna state ah zu zuar lo tura Congress sawrkar an ngen lawm lawmna te zahna leh pawisakna nei hauh lo a Congress sawrkarin zu a zawrh luih avangin chhiatna bawiah kan ram a inbarh lut mek a, mipuite sum leh pai dinhmun a tlachhia a, vantlang nun a nghawng chhia a, rukruk, tualthah, pawngsual a hluar a, chhungkaw tam takin buaina leh harsatna nasa tak an tawk a, nupa inthenna a tam a, chhungkaw kehchhiatna a thlen nasa a, mihringte hriselna a nghawng chhia a, thihna a tam phah bawk a ni.

Hetianga Congress sawrkarin zu a zawrh luih avanga heti khawpa kan ramin chhiatna a tawh pawi tia Kohhran leh khawtlang hruaitu ten an dodalna te haider luia Minister Pu R. Lalzirliana’n ring a la ti khawng lui tlat hian kan hnam kan sakhua a phatsan naah MPC Thalaite chuan kan ngai hial a. Tun hnuah chuan kan ram kan hnam kan sakhua him nana Kohhran leh khawtlang hruaitute thahnemngaihna zahthiam a pawisa tawh turin Minister Pu R Lalzirliana hi MPC Thalaite chuan kan phut a ni, an ti.

Aside | Posted on by | Tagged , , | Leave a comment

Mizoram Crime Review January – June An nei

AUTHOR : On

  • January – June 2016 chhunga tualthah thubuai awm zat
  • 2016 January leh June inkara rukruk awm zat
  • 2016 January leh June inkara naupang khuaikhem zat
  • 2016 January leh June Mizoram crime review

21st July, Thursday khan Northern Range a District SP leh SP Traffic te chuan DIG Pu LT Hrangchal hovin kum chanve Crime Review meeting Aizawlah an nei a, Kum 2015 leh 2016 January leh June inkar leh April leh June inkar chhunga dan bawhchhiatna dinhmun thlirin an zirho.

A pumpui ah kum 2015 January leh June inkar chhungin thubuai 1009 ziah luh a nih laiin kumin hemi hun chhungah chuan 1144 ziah luh ani a, hei hi za zela 11.80 in a pung a ni.

Nikum kum chanve chhungin tualthah thubuai 14 ziahluh a nih laiin kuminah chuan 9 chauh ziahluh a ni thung a, tualthah tum thubuai pawh 8 atangin 5 ah a tlahniam a ni.

Pawngsual thubuai ah chuan 27 atangin 9 ah a tla bawk a, Motor Accident avanga thihna thleng pawh nikumah 24 a nih laiin kuminah 15 ah a tlahniam bawk.

Hetihlai hian naupang khuaikhem thubuai chu nikum kum chanve chhungin 38 ziahluh a nih laiin kumin hemi hun chhungah 66 a tling chho a, rukruk thubuai pawh 576 atangin 710 ah a pung bawk.

Rukruk veng tur hian DIG chuan SP te chu tang lehzual turin a fuih a, mipui te pawh in leh lo, bungrua te dah fimkhur turin ngen thin ni se an ti bawk.

Northern Range police hotute thukhawm hian ILP bawhchhia te dapchhuah chu tun aia nasa lehzuala tan lak a tul thu an sawi a.

Thil sual titu a puh te, a bikin naupang khuaikhemna lam POCSO Act bawhchhetute chungchang, a huna taka Chargesheet thehluh hman loh avanga Bail a chhuah tir an awm loh nana tanlak a tul thu te leh khawtlang hruaitute leh VDP hman tangkai bakah Police te insawizawi uar te a tul thu an sawi a ni.

Aside | Posted on by | Tagged , , , , , | Leave a comment

AN KALSAN HNU NUNHLUI KA LO VAWNSAK TLAT MAW?

  • Hmangaihna awmzia
  • Hmangaihna chuan sual a siam tha thin

“Anu, A U Mama bialnu kha sex video te a nei a, a thlalak sexy deuh deuh te pawh a darh nasa ltk an tia, neih chi a ni dawn mawn le”
Ka fanu thu min hrilh chuan min khei zak mai a, ka thinrim in ka chhungril ah min khei zak mai a ni.

Fa hi pahnih chiah kan nei a, ka fapa Davida hi tette atanga nungchang mawi em2, kohhran leh khawtlang bel tlat, nihna te pawh nei kual ve nasa em2 a ni. A hnathawhna avangin khawdangah a awm a, a awmna khaw nula pakhat nen inngaizawng ve in kum khat zenzawn an inkawp hnuah palai tirh tum a kan intintuah lai mek ani.

Zanah chuan Apa nen, mami nen kan 3 in kan sawikhawm a, kan monu tur chu a thlalak sexy tak tak leh a video te pawh kan dawng ta nawlh mai ani. Kan lung a awi thei lo. Ka fapa, kohhran leh khawtlang a inhmang em2, ruihhlo engmah ti lo khan he nula, sex video pawh nei tawh hi nupui ah a nei ang maw??

Ka fanu hmelhriat pakhatin a chanchin a sawi tuitang lo bawk si, diktak chuan min ti hel a ni!! kan mangang em em a, kan rilru a hah a ni.

Ka fapa hian a bialnu chanchin hi a hriatpui nge a zeppui? A rang thei ang bera rawn chhuk turin ka fapa chu ka be ta a, an office chawlh veleh rawn chhukthla nghalin zanah A pa nen kan titi pui ta ani. A bialnu sex video a hriapui vek thu leh kha thil avanga a rilru a danglam chuan loh thu te sawiin ” a thatna ruk ka hmu tlat alawm” tih bakin min chhang lo. Mama, neihtlak a ni dawn em ni? “ka pa, neihtlak e, ka rawngbawlna tur a Pathian min pek a ni. Kan intawn hma in misual a tawng fuh a, a mualpho ta a nih kha. Ka tan chuan hmeichhe tamtak aiin a thianghlim zawk. A zahawmna chu keimahah a awm a, keimah ngeiin a hmingchhiat tawhna zawng2 ka nawhreh sak ang. Tunah phei chuan hmalam panin a kalmek a, a mualphona kha umzui tir ka duh tawh lova, mite zahkai turin enkawl ka duh a ni” . Ka fapa, officer, rilru tluang em en tawngkam khan kha sex video, ka mitthla a cham tlat kha a tireh zo si lo..
“Tunkum ngeia neih ka duh a, a rang lamin palai min tirh sak dawn nia” a ti bur mai si.

A hnathawhna lama a kal leh hnu pawn palai tirh lam kan ngaihtuah tha thei lo. Kan rial rei tak em avang khan ka fapa chu rawn hawthla in “kanu, kapa, in zahawm khawp mai. Amaherawh chu A kalsan tawh nunhlui, a nun tihreawm thin em2 tu kha ngatinge in hriatsak reng? Pathianin a theihnghilh sak tawh a, ngatinge a kalsan tawh nunhlui chu in vawnsak reng. keipawn ka hriatsak duh tlat loh avanga nei duh ka ni. Chuvangin lo tawngtaidun ula, a nunhlui vawnsak tlat lovin lo thlah tawh ang che u. Pathianin a theihnghilh tawh!!!

Ka fapa tawngkam chuan min van cho tak em. Mi nunhlui, kalsan tawh hnu leh Pathian theihnghilh sak tawh ka lo vawnnun sak reng a lo ni si.
Mama, i nei mawlh ang. Ka sawi zo thei lo, Pathian hnenah ngaihdam dil tur ka ni.

‘ KA SUALNA ZAWNG2 TE HI MITEN HRERENG THIN MAHSE. LALPA NANG ERAWH CHUANIN I THEIHNGHILH SI.

Pathian hma ah tunge tha famkim awm bik. Ka fapa in a duh a, mite hmuhsitna avanga a tawrhna zawng zawng atanga hruaichhuak tur khan Pathianin ka fapa kha a lo ruat reng si.

“”LALPA, ka lawm e, mite entleu leh zahna tamtak tuar hnu leh nun hreawm tak a hmang thrin, mipa sual a tawn avanga mite hmusit em em kha kan mo atan min pe dawn si. Kan bulah thlamuang taka a awm theih nan leh a nunhlui hmu theilo turin kan mit min tihdel sak la. A tana nu leh pa tha tak kan nih theih nan min pui ang che”” tih hi ka tawngtaina a ni e. Kan rawngbawlna kan lo hai teuh hle mai.

Hmangaihna diktak chuan a hliahkhuh thin!!

Aside | Posted on by | Tagged , , , | Leave a comment

KA CHHIM ZIN- R Zonuna RL Kawrkam Cabin

AUTHOR : R Zonuna RL

  • Zonuna Chhim zin Thu
  • Zonuna chhim zinin Chhawhchhi a hawn
  • Chhawhchhi ei chu Kakuk vumna
Chawei dawhkana CHHAWHCHHI Kg thum lai mai chu ka en vang vang a, ka lung a awi lo ru khawp mai. “Ka hawn chhan ber kan nu lah a lo tlan daih bawk si…,” ka ti rilru a. Ka thu ta vel mai mai a.
He thil lo thlen dan hi hetiang hi a ni :-

Naupang ho chuan, Apa chocolate min lo hawn rawh aw, lollipop min lo hawn rawh aw…,” an tih nak nak hnu chuan kan nu chuan, “Chawhmeh a tlawm deuh ka ring, i theih ang angin i rawn hawn dawn nia,” a ti a. Kan in bye bye liam ta a.

AWITHANGPA IANG LO
Lalawithangpa chhim zin kha Zoram chhunga zinah chuan a hlawhtlingin a lar ber mai awm e. A hun lai khan Zoram dung leh vang a thang chhuak tak meuh a, a lar a ni. Keia chhim zin ve, thenawmte paw’n an hriat loh nen chuan tehkhin chi a ni lo. A letling thawk a ni e. Mahse ka sawi ve chak miau si.

Sorkar hna, survey ho leh mawlmang ang reng tak ti turin chhimlam khaw lian vak lovah sawn ka kal a lawm le. Ka nupui neih pawha ka dinpui, ka thianpa te khua a ni a. Thlenna tur ka huphurh lo ngang mai. Ka thianpate chhungkua pawh an lo zinin kan inah hlir an thleng a, an inthlahrung ngai lo. Keipawh inthlahrung hauh lova ka thlen tawhna a ni.

Chhungkaw hulhar angreng tak an ni a, ka thianpa pa chu Pa Dawnga a ni. Tleirawlte a nih laiin Sakhi a kap a. An khuaa sakhi kap naupang ber a nih avangin Dawng-Sakhia an ti a. Tun thlengin a lar dan ber pawh a la ni. Ka thianpa farnute pahnih, pasal nei rual tawh tho ve ve an awm bawk a. Ka thianpa hi Zama a ni a, naupangtein MAR deh a thiam reuh a, Zam-Mardeka tiin a lar viau bawk. Eichawp dawr tereuhte hi an kawtah an siam ve a.

CHHHAWHCHI POWER!!

Ka thleng hma viau mai a, veng tawp lam atangin ka hna ka tan nghal a. An khua a lian vak lo bawk a, zan hnih bak riah a ngai lovang.

Ka luhna in pakhatah chuan CHHAWHCHHI hi an lo buk mek a. Chhawhchhi hi ka ngaina em em a, ka chawhmeh tui tih berte zinga mi a ni. Kg chanve ka lei nghal var a. Tlai hmeh atan siam hman ka duh si a, ka hawpui nghal nal nal a. Thlen in ka thlen veleh ka buaipui nghal char char a, mawm hlap khawpin ka denga, ka tem deuh reng bawk a.

Tlai chaw kan han ei ta chu ka duh bawk a ka chawm a, ka hmehbawk a. Midang chuan min khawihpui vak lo tlat mai! An nulate pahnih phei chuan an khawih lo hrim hrim tawp a ni.

“Chhawhchhi hi a tui teh a nia, ei teh u,” ka ti leh thin a; an nulate pahnih chu an nui pawt pawt ringawt a.

Nakinah chuan an nulate pahnih en pah chuan, “Mami, ei teh u, a tui tui nen engtinnge in ei loh phal zawk le,” ka’n ti leh a. Ka thianpa nupui Mali chu a lo nui har har a. “Mali en chung chuan, “Ngatinge?” ka ti deuh hu a. Mali chuan a sawi lo thei tawh lo,.
“Chhawhchhi ei hi KAKUK a vum duh an tia, an ei ngam lo a nih kha.”

Ka nuih hi a za khawp mai a. Midang pawh chu an nui ham ham a. Nula pahnih lah a nui uar uarah an tang a. Mi sawi pawh ka la hre si lova, mak ka tiin ka nuih a za a ni. “A vum duh” tih chu ka la fuh ngang mai! Chutah Pa Dawnga ta pek chuan, “A ho e mai a. Duh leh vum ther thur ang hmiang a langsar lo chiang e mai,” a ti a, kan han nui nasa khawp.

HISAP ZUI

Chawei kham pawh chuan engdang ka rilruah a awm tawh lo. Pa Dawngan, “Mami in mut dawnah Dawrte kha kalh tha ang che u. Tunlai dawr rawk a hluar em hi,” a tih pawh ka bengkhawn vak lo.
“Chhawhchhi kakuk vumna.”
Ka thinlungah hian a ri tlut tlut mai a. Hmn…kan nu ka va eitir nasa dawn em..!! A thu hrimah hmeichhiaah chutiang chuan thawk ta se, mipaah engtinnge ni ve ta ang. Naupan lai atang tawhin tun thlengin ka duh em em a, ka ei nasa bawk. Mahse ka engmahah a thawh ka hre lo. Ka engmah a len phah lova, han uai fual deuh per pur pawh ka taksaah a awm phah lo. Mipaah chuan a thawk lo a ni ngei ang.

Ka zan mut hmunahte chuan, “Aw.. ka nupui duhtak, chawhmeh min chah tiraw. Chawhmeh tui uchuak Chhawhchhi ka rawn hawn dawn e. Tunhma aiin i ei uar dawn khawp. I duh ai tam i ei dawn. Zing thingpui hmehah lam ka hmanpui dawn che,” ka ti rilru a. Mithlaah a lo lang zut zut a… a han vum thur tur chu!! Ka nuihte a za deuh a, ka nui put put a. Nge kan nu hian a lo hre ru kar anga a lo ei tha duh lo em ni, a duh vak lo thin kha a nia. A tuk zana thil thleng tur reng hre lo chuan ka rilru ka kawm vel a.

A tuk zingah ka va kal leh nal nal a. Chhawhchhi chu Kg thum ngawt ka va lei ta a.

KA LENG REI HRET

Hemi ni hian hna zawh ngei tumin ka tang nasa khawp mai a, thim thet thetah ka zo hram a. Zanah chuan a tuka haw mai tur ka nih vangin veng tawpa kan lehkhazirpui thin tho Awmtea tlawh ngei ka ngai a.

Awmtea hi lehkha kan zir ho lai chuan Zahmawh Director kan ti thin. Nitin hian a thar diai sawi tur a hre teuh zel! Dar ri hre lo leka a zahmawh sawi kan nuihpui thin lai te kha aw…ka ngai thin mang e.

Zanah chuan ka va leng ta ngei a, Awmtea zia a lo la danglam teh chiam lo. A zahmawh sawi erawh a ngialngan tawh lo deuh tih mai a ni. A titiah a nupui lam lam chuan kan nui vak vak a, dar zat reng kan lo hre chang lo. Awmtea bula awm chuan hun hi a bo mup zel thin. Zan dar sawmpakhat lai a lo ni ta der a. Chhawhchhi… ‘a vum duh’ tih pawh ka lo mangnghilh der mai! Haw zai ka rel ta a.

KA HAWKDAK LUA

Ka haw ta hnak hnak chu ka thlen in ka hlat tawh lo tih chuan pawi ber mai chu ka tawng ta a ni.

Kawng sir mai in pakhatah hian tlangval rual tih hriat reng reng hi an lo nui hluah hluah mai a. An ngawi deuh thap a, an rawn nui chhuak leh hluai thin a. Tawng thawm a awm loh avangin an nuihzat ber chu tawngkaa fiamthu thawh a nilo tih a hriat reng a. An reh vang vang vang a, an nuih leh huk thin a. Ka va han hmu ve chak tak emm..!! Nui ve dawn lo mah ila ka hmu ve chak em a ni!.Ka hawkdakna chimawm chuan min pen kawitir ta nge nge a, a pawi zo ta a ni.

LO MAN RUUUU..

Tukverh atanga bih ka tum chu ka hmu mai thei lo tawp mai a. Bang hrulah chuan Thingzai hi an rem ur a, pakhat hi a filawr deuh bawk a.

Chu thingzai filawra ding chung chuan ka han bih dawn a. Inchhung pawh ka hmuh hma hma chuan ka thingzai rah chu a let but a, thingzai remkhawm chu a chim ri ta rum rum mai. Ui a bauh nghal a, tlangval ho ralkhel thawm a hriat zui nghal bawk.

Tlangval ho rawn tlan chhuah tum thawm chu a chiang ngei mai. Engtinnge ka tih tak ang? Ka rilru chu a vak kual thuak thuak a :.

“Ka tlan chuan an khuaa rukruk hluar lai a ni a, min um ang. Ka tlanchhiat loh chuan rukruk tum emaw min ti tho tho ang. Athenin min rawn tham ang a, min beng leh min hnek chawrh chawrh an awm bawk ang. An inpunkhawm ang a, ka thlen inte pawh an lo kal ang. Ka thlen inte…. An nulate pahnih… Ka zak dawn lutuk, a chi loh…”

Ka tlan ta.

Ka tlan liam hma chuan min rawn hmu hman chiang ngei mai.
“Kha misual…rukru,Jacket dum ha, lo man ruuu,” tiin an au ta chel chul mai! “Zova Samurai kha rawn keng rawh,” tih thawm te pawh ka hria a. Ka hma lam hun chu a van eng lo tak!

In thum vel ka tlan pelh hnu chuan bikbo dan zawn thain ka hriaa, mi inhnuai ah ka lut thla ta tawp mai a. Mahse chu inhnuai ber kher chu ka thlang fuh lo ngei e. Hremhmun aia a nawmna a awm ka ring lo, a sa ve lo tih chauh lo chu. A eng em em nge maw an dah ni? Thim zingah chuan ka chal, ka khabe, ka khup ka ngal, ka kezungpui ka ri phei fawk fawk a; ka ri leh chawrh thin bawk a. Kar lehah chuan ka kezungpui ding lam tin hi a thlawn hrim hrim ang!

Chu inhnuai chu engtin tin emaw tap leh hathial chungin ka tlanchhuak a. In dang hnuaiah ka tlan lut zel a. Inhnuai palina chu an lo hung ta tlat mai. Min umtute thawm chu inhnuai hmasa berah chuan a ri rum rum mai a. Na ti fe fe an awm ve tho ang. An tam hmel tawh em em lehnghal. Lamliana rawn tlan zel pawhan awm tho. An au nuaih nuaih a. An khaw tet tet nen Torchlight lah an nei eng phian lehnghal!

A ping tawh miau sia, lamlianah bawk ka tlan chhuak leh ta. Ui bauh chuah chuah chuan ka mangan a tizual. Ral atang chuan min hmu leh ta,
“Saw ta saw le.. Vaw hlum ang aw..”

Thihte chu a hreh ber ka niang. Ka fate an la te si. Bakah ka nupuiin pasal dang a nei leh ang a, ka phal teuh loh. Ka thinphu a rang sauh a. Misual nia min ngaitute thingfak leh samurai vel ka han dodai tur chu… Ka va han tlan chak tak em! Ka thlen in pawh min umtute nen chuan kan tlan pel ta hial mai. Keimah leh keimah chu ka inhua a, ka in hau rilru phei mawlh mawlh a :

“Hmelchhe pa, i hawkdak vang dek dawk vek a nih hi. Pachang til tial pui si nep lutuk, ker kawr mai..” Chutih rual erawh chuan pawisawi lo pui rukru tlana han tlanchhiat chiam mai chu ka inlainat em em bawk a.

Kawngpuiah ringawt chuan min nang ching thuai mai dawn si. Thluak hman a ngai a ni. Kawng kawia min umtuten min hmuhtheih loh veleh chuan mi huanah ka lut thla ta..Ka thluak tha ve thin tak mai chu a vir kual zung zung a. Ka Jacket tih a lo lang var a. Ka Jacket hak chu a chhung leh pawn awm chuang lo chi a ni. Tunah a dum a pawnah ka hmang a, a chhung lam chu a var leh a duma tial a ni. Rang lutukin ka letling thawk a, ka ha, a zipper ka pawt chho hrawih a; kawngpuiah chuan ka zuang chhuak leh ta.
“Aw Pathian, min lo ngaidam teh, dawt ka sawi mai dawn; ka mang a ang em mai.”

Min umtute tlan thawm pawh ka hre ve nghal chiah a. An lam pana tlan pah chuan, “Min chhan ruuu…” Ka’n au ring mai mai khawp. Kawngkawiah tak chuan kan in tawk a. “Min chhan ru, min chhan ru, ka hlau lutuk,” ka thaw huam huam mai. Ka hmelah hlau hmel tak tak a lang ngei bawk si ang a, lemchan dan tha a ni. Thianpa Zama chu a lo tel ve tawh chu niin, thingfak lian tha tak mai hi a keng a.

“E he!!! Thianpa, nang e law? Tunge ti che, engtin?

“Khu laiah khuan mipakhatin min hnek a, chempuia sah min tum bawk. Jacket dum a ha, a hmel ka hmu chiang thei lo.” Min hnek ka tih loh chuan ka chal leh khabe vel a pangngai lovin ka ring a ni, ka tauh nasa e mai.

“Mai mai shhala, kan zawng chhepa chuh… Ka hmuh vaih chuan hnar bo hmak khawpin ka hlap dawn a ni. Faka, Rawna nen khan Tuikhur kawngah tlan u la, lehkhalh rawh u. A hmu a piangin dim map lova hlap tur. Thianpa, nang chu inah lo va haw rawh.”

“Awle. Lamlianah khan a tlan thla zel,” ka ti a.

Tlangval samsei hniang hnuang zu heh hmel zet leh tleirawl sa inphut pian nalh deuh leh Surpi heh hmel zet mai hi Tuikhur kawng lamah chuan an tlan liam nghal a.

Ka van lawm tak em! Thin phu dawt dawtin thlen inah ka lut a, Pa Dawnga a lo thu kur mai! Pa Dawnga chuan,”Misual an um kha i hre ve em? Kha kawr thar i va nei a ni maw, i chhuah dawn khan a dum i ha sia?
“Ka van haw roh mai mai tak. Dawng-Sakhia mai mai chuh!
“Nia, Awmtea nen Jacket kan inthleng a,” ka tih chuan a ngaih a tha leh mai a. Ka mu nghal. Ka mut erawh a chhuak therte lo. Ka va han thi teuh ther ther tak em! Ka tiril a khur der der reng a. Ka nupui ka ngai a ni.

Haw thuai thuaia zanin ka chunga thil thleng hi ka nupui hrilh ka chak tawh a ni. Engtin tak comment pe ang maw? A nuih a za viau ang em? Nge min hau ang?

Misual chu an zawng tlaivar ta thak a. Kei chu zing takah ka haw ta nal nal a, ka tlawh chak tawh loh khua chu ka hnuchhawn ta a ni.

CHHAWHCHHI RIANGVAI

In ka thleng chu a lo reh thiap mai a! Ka pa chiah a lo awm.
“Khawnge naupang ho? Khawnge Angaihi?”
“A…i nupui chu nizan khan i nu nen an inbat deuh a, an in lamah a riak phei rih a nih kha. I duh hun hunah va hruai haw mai rawh. Ngatinge i chal kha?”
Ka ngawi reng a. Dawkana Chhawhchhi chu ka en vawng vawng a, riang riaua hriatna kan nei tlat pek a! Ka thu hnawk a, ka nupui hruai haw vat vat a; chhawhchhi ka eitir hun tur ngaihtuah chungin ka en ngai ka en ta reng a.

Aside | Posted on by | Tagged , , , , | Leave a comment

August thla chhungin Free Wifi Service Pe Hman mai thei

July ni 22, 2016 (Friday) khan Zirtawpni apianga an tih thin Congress chuan MPCC Friday Political Session an nei a, hetah hian Minister Pu Lal Thanzara chuan thusawiin a chan dept. hrang hrangte atanga hmalakna te a sawi.

ICT Deptt lama hmalakna te:

Mizoram Sawrkar chuan Internet Connection Village Council khaw tina thlun zawmna tur BHARATNET-II project a buaipui mek a. He project hi National Optical Fiber Network (NOFN) tia koh thin kha a ni a. A tum ber chu Village Panchayat khua te, Mizoram tan chuan Village Council nei chin khuate, internet 100 Mbps a chak thlun zawm vek a ni. NOFN Project enkawl tur hian Central Sawrkar chuan Special Purpose Vehicle, Bharat Broadband Nigam Limited (BBNL), Company Act hmangin a din a. BBNL hian state hrang hranga hna thawk turin Central Public Sector pathum, BSNL, PGCIL leh RAIL TEL kutah hlan a ni.

Central Sawrkarin Digital India Programme a puan tak hnu phei kha chuan NOFN Project hi a pawimawh zual a. Digital India Programme-in tih hlawhtlin a tum ‘digital technology’ hmanga mipuite chawikang tur chuan internet leh digital technology hmang thei tura buatsaih hmasak chu thil tih mak mawh a ni ta a. He tih lai hian NOFN project hna kal mek chu a muang em em mai si a. India Sawrkar lam pawgin NOFN project hnathawh dan kal phung ennawnin, kalphung thar a rawn duang ta. A project hming pawh NOFN ni tawh lovin BharatNet tiin an thlak a. Central Public Sector Company chauhvin thawk lovin State Sawrkarte thawh puiah an rawn sawm a. Nikum June thla daih tawhah khan Mizoram Sawrkar pawhin kan mamawhna a san em avangin he ruahmanna thar hi kan pawmpui thu kan hrilh nghal a. Hnathawh dan tur an rawn duang mai dawn emaw kan tih laiib Central Sawrkar chuan ruahmanna a rawn siam fel hlei thei lova. Thla hmasa June thla mai khan ruahmanna thar chu a rawn siam fel ta a.

He ruahmanna thar hi Andhra Pradesh Sawrkar hmalak a zul zuia duan a ni a. Khaw hrang hrang thlun zawmna tur Optic Fiber Cable lei hnuaia phum thin kha, electric power line hrui awmsa hrulah thlun turin ruahmanna thar chu siam a ni a. AP sawrkar hian an state chhunga district zawng zawng 13 te chu thla sarih chhung lekin power line hrual a hrui thlun hna chu an zo mai a. Tin, internet service rual hian Cable TV leh telephone connection an pe thei nghal bawk a ni. Keini state tlangram angah phei hi chuan OF Cable lei hnuaia phum ai chuan AP ten an kal phung anga Electric Line hrula an thlun ang hi a that zawk thu sawrkar laipuiah pawh kan thlen ve reng thin a nih avangin, ran takin hma kan la nghal a.

Study Team, ICT Deptt. Secy kaihhruaina in P&E leh Science & Technology Department Officers te chu AP sawrkar hmalak dan zir chiang turin an zin nghal a. Study Team te hian report chipchiar tak an pek bakah rawtna siam angin AP State Fiber Limited (APSFL) te chu zin turin kan sawm nghal a. APSFL Managing Director, Shri Sambasiva Rao te, Shri Hari Prasad, Technical Adviser to Chief Minister, AP leh Gopichand Tumalal, MD, Terasoft te chu an rawn zin a. Ni 27.06.2016 khan Minister hrang hrangte hmaah BHARATNET Project chungchang leh Andhra Pradesh-in an Andhra Fiber Net hlawhtling taka an thawh dante rawn sawifiahna hun an nei a ni.

BHARATNET Project hi Universal Service Obligation (USO) Fund atanga hna thawh tur a ni a, USO Administrator leh BBNL-A CMD ni bawk, Shri Sanjay Singh, IAS te nen kan officials te inbe pawp rengin BHARATNET Project thawh dan tur ruahmanna pawh siam chhoh mek zel a ni. Kan Chief Minister-in an duh dan angin leh ICT Minister ka nihna angin District pahnih tal March 2017 hma a thawk zo turin ruahmanna hi chak taka kalpui mek a ni.

He ruahmanna anga khawtinin Internet Connection tha an neih theih chuan kan ram chhunga hmasawnna rahbi hrang hrang kan thawh mek te hian nasa takin an chhawr tangkai thei dawn a ni. Chung zingah chuan Education leh Health Care System te hi a chhawr nasa pawl turah ngaih an ni a. School zirtirtu an mamawh ang neih theih lohns hmunah te zirtirna tha zawk an neih theihna tur atan ruahmanna pawh kalpui mek a ni a.

Tin, Health Sub-Centre a doctor kan dah theih lohna hmunah te pawh doctor an rawn theihna turin ruahmanna siam mek a ni. Central Project hrang hrang kan thawh zawh tawh reng connectivity that tawk loh avanga report tlai thinte pawh awlsam zawkin a report zung zung theih tawh ang a. A hun taka report theih a nih chuan project pawh chak zawkin kan kal pui thei ngei ang. Tin, Mobile Service Provider hrang hrang ten he network hi hmang tangkaiin thingtlang kilkhawr zawkah Mobile Service tha zawk neih a awlsam phah sawt tawh bawk ang. Tin, Mizoram sawrkar tan pawh revenue tha tak kan lakluh theih ngei kan beisei bawk.

_Mizoram sawrkar chuan free WiFi Service, Aizawl khaw chhunga mobile tower awmna hmunah dah a nih theihna turin Telecom Infra Service Provder leh Telecom Operator te nena tangkawpin hma lakna chak takin a kalpui mek a. Ruahmanna ang chuan August thla chhung hian he Service hi tan hman beisei a ni.

Aside | Posted on by | Tagged , | Leave a comment

Ka Pu, I Hausa Ti Raw?!!

  • Hausakna thurûk chu
  • Tunge Hausa
  • Mahni Neiha lungawi te hi mihausa an ni

Ka tlai chawhmeh tur Dâl chhum firulh dal zet chu kan hawp zauh a. ‘ Thenawmte chawhmeh țhing ka châng leh ang nge, a tuiril zawng hi ka la hrang ang a, atak awmchhun ka chawm ang’ tih vel ka ngaihtuah melh melh mai mai lai chuan ka kawngka chu an rawn kik dat dat a. Keia parawl tlaran naran in ah tehlul hian tu khaw kha an rawn leng ngai si lova mak ka ti ru hle a. Nu ho chawhmeh zuar vâk vel takngial pawhin zawrh enah min en tawh lo, ka lei sak ngai lo miau a.

Kawngka chu a rawn ri leh dat dat a, ‘a tu chu ni maw ‘ ti rilru chungin kawngka chu ka va hawng a. Pawnah chuan Tuikuk mipa naupang tê hian Mautuai min rawn zawrh a tum hi a lo ni a, ka lei duh loh thu ka hrilh dawn zet a, a incheina phuai pawr phang mai ka hmuh chuan ka lainat ta deuh a, lut tura sawm pahin thutna awmchhun ka khumah chuan thu tura hrilh pahin a mautuai zawrh chu a man zat ka zawt nghal a.

Cheng sawm man a nih thu min hrilh rual chuan lei sak ta tehreng pawh ni ila tui taka siamna tur a bawlhlo ka nei lo hrim hrim tih ka hria. Mahse, a zuartu Tuikuk naupangte chuan ka khawngaih thla a la riau reuh a Ka lei sak ta nge nge a. A ril a tam hmel em a ka hriat avangin chhun lama ka Lakhuihthei ei bang chu a plate chawpa chhawpin ei turin ka hrilh a. Riltam tihhriat zetin a hmawm nghal zawt zawt a.

Ka chawhmeh chhuan ka off zo ka let leh chuan plate chu a lo thlek vâng vâng a, ” A rawng a mawi hle mai. Ka pu, i hausa ti raw?” a rawn ti a. Chhan mai nachang pawh hre lova ka din reng lai chuan lawmthu min hrilh a, min chhuahsan ta a.

Ka dinna ngaia ding reng chung chuan plate hlui rawng da râng riai chu en in ka Dâl chhum rim chu hip vang vang pahin Tuikuk naupang chhuak turin a athu sawi, ” Ka pu, i hausa ti raw?!” a tih chu ka ngaihtuah zui a.

Ka Parawlna in khawro ruak huai mai chu ka en kual a. Englai mahin hausa ka inti ngai lo a, mi pawn min ti ngai lo. Mahse, kha mipa naupangte dinhmun awm angte kan ngaihtuah a. Thli tleh leh ruah sur changa tawmhulna tur in te, chaw leh chawhmeh te, thawmhmaw te, Ni e, ka lo hausa reng a lawm!!

Ka neih loh leh tlakchham te, a nei zo zawkte neih awta ka buai thin ziate ka ngaihtuah a. Ka duhthusama in sang ka sak tihlawhtling tura ka beihna rilru zawng zawng chu thlakin ka neih sa zawk chu chhuang takin ka thlir ta zawk a.

Tuikuk naupangin Lakhuihthei a eiruahna chu ka silfai a. Khuma naupang thutna khuar kalh chu ka pawt mar phal ta lo. Mihausa min nih tirtu a ni si a.

Aside | Posted on by | Tagged , , | Leave a comment

MIZORAM VEHICLE TAX SIAM THAT A NI

Kum 15 chhung lirthei chhiah Lifetime Tax tum khata pek thin chu lirthei thenkhat tan tum 3 thleng pek tlak theih turin vawiin khan sorkar chuan hriattirna a chhuah.
July 22 The Mizoram Gazette a sawrkar in thuchhuah a siam danin, Mahni duhdana tum khat emaw, tum hnih emaw, tum thum emaw pe thei tur lirthei te hi Maxi-Cab, Auto Ricksaw leh Taxi te an ni a, lirthei ke 2 nei leh mimal lirthei chu dan pangngai in tum khatah kum 15 chhung Lifetime vehicle tax hi la pek tur a ni a, Commercial Vehicle dang zawng zawng pawh tuna an pek dan phung awmsa, kumtin a Tax pek chu tihdanglam lovin chhunzawm tur ani.

Aside | Posted on by | Tagged , , | Leave a comment

Republican Presidential Nominee Donald Trump-an a pawm ta !

Mi tam takin kan hriat lohva kan post mai chu hei hi a ni. US Inthlanpuia Presidential Candidate lian pahnihte hi an Convention-ah Vice-Presidential leh Presidential Nominee an puang phawt a, ni thum ni-ah Vice-President atâna nominate hian a pawm chuan Nomination Speech a sawi ṭhin. A ni li ni, a tawpna niah thusawi hnuhnung berah Presidential Nominee chuan an nominate-na chu a pawmin Danald trump-a chu Republican Presidential Candidate a ni dawn ta a ni. Kan puang hmanhmawh mah mah ṭhin !

Step by step :
President a chuh dawn tih a puan khan contestant 15 dang hmachhawn tur a nei nghal a, chung zingah chuan Jeb Bush, Ted Cruz etc te ang hming hriat hlawh, mi tam takin Republican Presidential Candidate ni tura an lo rinlawk an awm a. Tlâng sang tak lawnchhuah tur a nei nghal a. Tichuan a candidate puite chu a mal te tein a bei a, a hnuaichhiahin a paihthla nghauh nghauh a. Republican Primary chu Popularity hmanga hnehna chan chu a tân kawng awmchhun anih avangin a tumah hian a hlawhtling hle anih kha! Amah nuihzattu tam kha a chih a, a chanchin chuan mi ngaihven a hlawh zual sauh a.

Republican Convention :
Convention an ṭan a, pawnah buaina siam neuh neuh awm mah se, Party chhûng boruak a ṭha tial tial a. A ni tawp a lo thleng ta a, chutah chuan speaker pawimawh tak takin donald Trump a nihna leh a zinkawng zawh an rawn sawifiah ta a. Republican Nomination Chairman rawn langin ani chuan Republican Party hian inlungrual takin Donald Trump hi an Party Candidate atâna an thlanzia khawvel mipui hmuhah rawn tarlangin ani aia America-in a mamawh an awm lohzia tarlangin Donald Trump a rawn zuar chhuak mawi hle a.
Angelina Jolie-i pa Actor lar Jon Voight chu big screen-ah rawn langin Donald Trump-a hlawhtlinna, anihna dik tak, thil chhe siam ṭhatu a nihna, America sipai hmangaihtu leh mi rethei dawmkang a, ṭhalaite hna siamtu a nihzia film hmangin a rawnpuangchhuak a. Donald Trump-a chu hnathawk mi, thil chhia siam ṭhatu a nih tumah hai theih rual lohvin a rawn tarlang a. American mipui, Celebrity ngaisang reng renga nungte nunah chu chuan nasa takin thu a sawiin ngaihsanna nen Donald, Donald……Donald tiin mipui an sahawk hum hum ta mai a nih kha!

Paypal dintu Thiel-a chuan Gay leh Republican a nih thu chhuang taka puangin Donald trump a rawn endorse a. Chu chuan Republican Party chhûngah hian mi tin tân hmun a awmzia an rawn puangchhuak nalh hle a ni. Chumi hnuah chuan kum 36 chhûng zet a ṭhian hnaivai lo ni tawh Colony Capital CEO, Tom Barrack a lo lang ve leh ta a. Politician an rawn lang ta lo!

Tom-a chuan Donald-a nihna an hriat zen zen loh, chhûngkaw ngaihsak mi a nih ruala mi tumruh a nihzia an chanchin dawt ni lo hmangin a rawn puangchhuak leh a. Pa anihna chu a fate hlawhtlinnaa langchhuak, tu tân maha hai mi a nih lohzia leh chhûngkaw pa a nihna pawh a nupuiah a lanchhuahna dik tak, mitin hriat chu a rawn phawrh chhuak nalh hle a.

Chhûngkua ngai pawimawh mi leh hlawhtlinpui ngaisang hnam an nihzia hria tân point pawimawh tawp a ni. Thiel-a hian Lebanese chhuak a nihna sawi langin Donald a hnuaiah mi tin an lenzia a rawn tarlang chhuak thiam hle bawk. Chutah, a fanu chuam Ivanka a rawn lang ta, a va han sawi ṭha em! Hmeichhe vote mamawh a nihzia a hai lova, a pa hnuaia 40% employee chu hmeichhia an nihna leh an hlawh pawh mipa nen a inanzia rawn sawiin US Five Star Hotel a Gen. Manager hmeichhe pathum zinga mi hmasa chu a pa ruat a nihzia a rawn puang ta a. Chumi piahlamah hmeichhia a ngaih pawimawhzia a taka lantirin a pain hmeichhiate tâna a thawhhlawk dan thiam tak maiin a puang a, hmeichhe-ho tân Donald Trump-a chu mi ṭha tawpkhawk angin a lang ta a ni.

A pa chu hnathawk mi a nihzia leh a hnuaia hnathawk tur mi talent thlan a thiamzia, engpawh thawk se, a hnuaia hnathawk tê ber aṭanga a lian ber thlenga a biak pawh a, an thusawi a ngaihthlak a, team anga hlawhtlinna an chan tawhna sawi chhunzawmin a pa nena rei tak thawk dun an nih tawh avangin a thusawiah dawt pakhatmah a tel lo tih America-in a hre si a, point a score lianin sawizui a hlawh tak zet zet a ni. A pain mi baihvai leh hna nei lo, sawrkar tih dik loh vanga hna chân leh mangang a puite a han sawikual hnuah tunge Donald-a kha ngaina lo ngam ang a, buaina nei tuin nge hnar thei ang le?

Khawvela a duh ber chu a Trump Legacy niin tunhnai kum 8 liamta chhûnga America Economy tlakchhiatna chi hrang hrang leh tih dik loh avanga Middle East, Syria leh Libya buaina avanga a pa awm hle hle theih loh thu sawi kaiin Businessman a nih laia sawrkar hnathawh muang leh sum uchuak senna ni si, a taka a siamṭhat tarlang pahin a pa chuan a hmangaih ber Trump Company kalsana US dinhmun siam ropui leh tura President nihna a chuh dan a han sawi chu mi tinin Politician sawi a ni lova, Company pakhata Executive Vice President thusawi a nih avangin dawt a sawi hian khawvelin an ring mawlh lova ni. Ivanka thusawi dikna nemnghet turin a hmelah dikna chhiar theih a ni a, Innocent a lang bawk si! A pa ngei chu ko chhuakin ani chuan Republican Party in US Presidential Election a Candidate atâna an nominate-na a pawm thu a rawn puang a, nomination speech a nei zui ta a ni.

Thusawi danglam chu
A hma chuan thu mak leh rorum pumpui a chhamchhuak chamchi a, ka sawilawk ang chiahin tunah chuan a thusawi ki a va danglam ta em! “Tunhnaiah tualchhungah buaina an tawk a, hmun hrang hrangah chhiatna a thleng a, mipuite chuan humhimtu an nei lova” tiin thiam takinAmerica leh Middle East chu ram thim tak, buaina hmuna khatah chhuahin Donald Trump-a chu Law & Order nen President ni turin ṭhutthleng a luah dawn a. Chutih chuan chuan hun ralmuangah mi tin kan cheng ang a, Border khar phuiin hun ralmuan hma loh chu kan invenghim ang a, chutih rualin Trump Organization tâna Billion a siam ṭhin ang bawkin America leh a chhûnga cheng mipuite tân trillion dollar thawkchhuakin mipuite chuan tunhma ang khan thinlung uangthuang takin zalenna leh ralmuanna hnuaiah kan lêng tawh dawn a ni a ti ta daih anih kha!

Hillary dik lohna, thiam lohna leh khawlohna zawng zawng tarlang nawnin heng zawng zawng buaina bul chu Hillary leh Obama niin anni hian American mi leh sa nunna an hlut lova, hna lah pawn lamah thawnchhuak zovin ISIS an hmuchhuak a, Iraq buaina a chhahin Syria lah misual kutah a tluchhia a. China an ngam loh luat vangin pawisa kan chân a, NATO lah Europe ram dinhmun a chhiat avangin a tlachhia a, US bak pur tur nei lovin NATO vangin sum kan chân a. Iran hnenah nuclear ralthuam siamna kan Pek bakah mipui sum hmangin pawisa tam tak kan pe a, Israel chu chhan thut ngai thei dinhmunah kan dah ta a nih hi, tiin a opponent hi a khing hneh mep mep hle a. TV a ṭan lam nei lo, a thusawi ngaithlatu tân chuan Hillary chu ram hmelma dik takah a chhuah hmin der anih kha!

Heng a thusawi zawng zawng piahlamah hian a hnuaiah chuan an thiltih kawnga Expert ber ber nen thawk hovin Vice President ṭha ber nen America hi kan siam ropui leh dawn a ni a han ti a. Chu chu a hnathawh ṭhin dan an sawi a nemnghehna niin chutiang lama thiamna nei inti tân ngaihzawnawm takin a insiam a, mipui hmuhah erawh rintlak a nihna a tarlang chhuak thiam lawi si a ni. Ni e, mi tam tak chuan finna nei lo, Opportunist dik tak a ni an ti a. Opportunist awmzia kan man loh luat vang chauha sawi an ni. Hun ṭha inhawng a chuh thiam vang chauha sumdawnnaah pawh hlawhtling, Risk la ngam a ni a. Politician ten ram hi an siam ṭha tak tak ngai dawn lova, Political System hmanga siam ṭhat theih anih loh avangin System pawna mi hian ka siam ṭha dawn ta a ni, a tih kan hriat loh luatah sapṭawng kan hriat, a awmzia kan man chiah loh kan lo sawi ve ta chhen a ni e.

Sawi tur a tam a, kan duhtawk ang. Engvanga Donald Trump hi duh viau nge ka nih ka tih chuan The Four Horseman, ka thu post hnuhnung ber dawttu-ah khan a chhan leh vang chiang takin ka tarlang tawh a. Mi pangngai, thil a chhiar a a thu chhiar awmzia hre mi ni ngai tân chuan Donald Trump-a hi a duh lo thei lo tih ka chiang e. Thawhlehni atangin Democrats Convention an nei ve leh ang a. Politician hlun, a thusawi dan pangngai reng khan thu a han sawi ve ang a, zoram Politician-te nen danglamna nei vak hek lo, mipui bum leh thei tak ang maw?

Aside | Posted on by | Tagged , , , | Leave a comment

The Four Horsemen (Khawvel chhiatna hmahruai ???)

Kum 1971 a ni a, President Nixon-a hunlai niin Rangkachak hmanga pawisa hlutna an chhut chu tih danglam niin FIAT MONEY kan tih mai hi a lo piang ta a ni. He Fiat pawisa hi ka sawifiah tawh nangin ka sawi ṭha leh ang.

Tan inah i tang a, Cigarette an sem ngai lo. Meizu mi hlir awmkhawmna hmun, Cell-ah i tang si a, meizial chuan nasa takin hlutna a nei tih i hrethiam ang. Meizial hmang chuan chhangthawp pawh i thlengtheiin tui thianghlim pawh i thleng thei ang. Chumi awmzia chumeizial khan hlutna a nei tihna a ni. Chutiang chiah chuan US chuan pawisa note, hlutna nei a siam chhuak ta a, i thil mamawh thleng nân i hmang ta a ni. Tichuan, kan tun hunah hian Dollar, Euro, Pound Rupee etc zawng zawng hi sawrkar Fiat Money an lo ni ta a ni.

Sawrkar chiahin pawisa note siamchhuak turin thuneihna a nei ta a. Nimahsela, Bank kan tihte hian Lending (Puktir) hmangin pawisa awm miah lo ata pawisa an siamchhuak thei ta a ni. US Federal Reserve Bank a Share 80% zet mai hi mimal, tu an nih hriat theih loh, helaia RTI Act kan tih ang hmanga an zawh pawha Ram tâna hlauhawm tih chhuanlam hmanga an hnial kalh hnenah hralhin anni hian Bank tân hian sum an thawh ta a. Fractional Reserve Banking kan tih mai pawh hi ka sawifiah tawh nangin sawi nawn leh a ngai dawn ta a ni. Dân chuan Bank hian a thingrem awmkhauha pawisa emaw pawisa tluka hlutna nei a dahṭhat let tam tak fiat currency print a phalsak tatlat a ni. Chutiang chiah chuan Commercial Bank kan tihte hian an thingrem awmkhauha pawisa an neih let engemawzat puktir theihna an nei ta bawk a ni. $ 10,000 hu lek nei khan $ 1,00,000 an puktir thei ta tlat a ni.

Kum 50 chuang he Fiat Currency system hman anih hnu hian pawisa note chu khawvel awmtirh ata a pung ta thur thur mai a. History a currency of supply sanna ber kan hmu ta a, nimahsela, tunge a hlawkna tel a, hnemhnanpui ta le? Ni e, sawrkar leh bank, he fiat currency issue thei leh an pawisa siamchhuah lo dawng hmasa thei mimal leh sumdawng pawl te chu hlawkna teltu an lo ni ta a ni. Anni chuan thil man a to hmain an duh duh kha a man tlawmin an lo lei thei ta a, hei hi mak ti suh, khawvel kalphung, miin an sawichhuah ngai si loh leh kan titi luahtu ni ngai si lo a ni. Heng mite hian share emaw in emaw lo lei lawkin 2007 Financial Crisis ang khan Bubbles a lo awm phah ta a ni. Bubbles ka tih hi Zoṭawnga sawi dan mawi bera ka hriat chu Chiahpuam Puakdarh a ni mai awm e.

Financial Year a han tawp a, tunhma pawisa hlutna pangngai ang khan thil kan lei thei ta miah lova, mi tam tak chuan tunhma kan thil neih angnei turin Bank kan pan a lo ngai ta a, hausa leh rethei kâr a rawnzau ta tial tial a ni.

US kan en chuan an GDP a dollar zawng zawngah hian mathei lovin $ 5.50 leiba a awm anga chhut a ni ta a, an duh emaw duh lo emaw Debt Slavery hnuaiah mipui tam zawk chu an kun ta mek reng anih hi. He harsatna an tawh mek laka Sawrkar-in inchhanchhuahna hmanrua chu a leklam chu Leiba bawk a ni leh ta a ni. Nimahsela, eng anga tam currency pawh print thei mah la, leiba lakah chuan talchhuah theihna a awm si lova, a aia tam bat belh zel kha tihtheih awmchhun a ni ta a ni. Hausakna hi print chhuah theih ni se, Zimbabwe khu khawvela hausa ber a ni thei ang chu, mahse pawisa siam tam hian hausakna a kawk ngawt lo tih kan chiang thei tawh awm e. Tuna khawvela pawisaawm zawng zawng zinga 97% hi leiba a ni ta mai reng a ni! Dawt emaw i ti ang e, dawt a ni hauh lova nia. French mithiam Voltaire-a khan, “Lehkha puana pawisa zawng zawngte hi mathei lovin an hlutna pangngai dik tak, 0 ah an kir leh vek ṭhin” a lo ti tawh reng a ni.

Khawvel hian chhuan thum chhûng Capitalism leh Communism inbeihna a thlir liam tawh a. Kum 1980 chhovah Russian Economy tlachhe ṭanin Russia chu a kehdarh ta a, Capitalism chuan khawvelah chungnung ber nihna a hauh ta tih US dinhmun kan enin kan hria a, kan hmu ta a nih kha. Capitalism chungchuanna chuan kentel a nei ta a, chu chu leiba hi a ni ta tlat a ni. Tunah hian engvangin nge America dintu an Founding Father-te hmathlir kha heti tak maia a kalsual tak a, American Dreams an tih ṭhin pawh heti tak maia herh sawih a nih tak mai chu le? Margaret Thatcher, Ronald Regan, Economist Milton Freidman leh mi dang dangte chuan he capitalism idea hi nasa taka thlawpin leibat huai kawngah America chu nasa taka kalin The Great Depression-a ka ziah ang chiah khan vawikhat mai ni lo, 2007 Financial Crisis ka ziah angin vawihnih chu an tuar ta ngawih ngawih anih kha!

Economics chuan kalphung chi hnih neiin mihringin khawvel hi eng angin nge a enkawl a, hausakna hi engtin nge a semdarh tih zirchiangin chungte chu Classical School of Economic leh Neoclassical School of Economic tih an ni a. Classical School hi chuan Sawrkar inrawlh loh lam thlawpin mihringte hi Natural Resources tel lovin kan nung thei lo an ti a, Neoclassical erawh chuan sawrkar a tam thei ang bera inrawlhtir an thlawp thung a.What actually is – a nihna ang ngau ngau chuan tih Classical thupui chu What aught to be – anih dan tur ang zawkin tiin neoclassical chu a chungnung ta zawk a. A nih dan tur anga nun tumna chuan leiba namên lo a hnutchhiat ta a ni. Regan-Thatcher Revolution tia an sawi mai hunlai aṭang khan nasa takin thuneihna leh hausakna chu a tithei zingah a virkual nasa ta a, Neoclassical hi an champion pui a ni, an ti hial reng a.

The Great Depression of 1932 hnuah khan mipui hum nân The Glass Steagall Act chu legislate a ni ta a. Chu chuan Bank lian leh tê a thliar hrangin Bank leh Investment Bank te kâr a siam danglam ta a. Kum 67 hnu, 1999 khan Undersecy of Treasury Larry Summers thuneihna hnuaiah President Clinton-a kha he Act hi a nuaibo ta a ni. Tichuan eng Bank pawhin mipuite hnen aṭangin deposit la theiin an duh ang angin an hmang leh thei taa ni! Wall Street chu Casino lianpui, Las Vegas anga Casino, tintihhlimna hmun ni ve lo, pawisa virkualna, mipuite hnena sawhkhawk chhe ta nei thut thei reng a ni leh ta a. He hmuna awm Financial World a company lianpui puite, zan khat thilthua tluchhe mai thei, an tlukchhiatin khawvel mipui zawng zawng a nghawngna, an chetsual pawha sawrkarin a bail out leh mai ṭhinte thuneihna hnuaiah hian khawvel hi a kun ta tlat mai a ni. an pawisa thapna turu lutuk avangin khawvel chu 2007 khan a tlusawp nuaih a, Greek chu a rampumin a EU pui ten an bail out a ngai a, khawvela bank lianpui pui tlakchhiat vanga leiba tlingkhawm hi khawvel rampum GDP aiin a sang ta a ni!Min bail out loh chuan engkim a chhesawp vek dawn tiin sawrkar an vau dai thei a, an thiltihtheihna lakah chuan US meuh pawh a tualdawih ta a nih kha. US hian bail out nân $ 25 trillion a seng a, Europe lam hian $ 1.4 trillion an seng bawk. Hengte hi khawia mi nge kan tih chuan mipui pawisa tlingkhawm a ni ngawt tawh lo, a print a an print a ni ta tlat a ni. A awmzia chu Bank bail out nân sawrkarin pawisa a puk lawk tihna a ni. A hma khan khawvela pawisa awm zawng zawng zinga 97% hi leiba ka tih kha dawt anih lohzia a chiang tauarh mai a ni lawm ni? A pawi dan hi kan chhut thiam ang em aw, helai hi hrethiam turin ka van duh tak che u êm! Capitalism kan tihah hian sawrkar hi a lian tur a ni ngai lova, nimahsela Capitalism vulna hmunah chuan loh theih lohvin sawrkar chu a fawng lian ber chelhtu a ni ta tlat a ni. Ka sawi lehtur chiah hi chhiar uluk rawh. Free Market-ah chuan a thawk ṭha apiangin hlawkna an tel tur a ni a, thawk ṭha lo chu a tluchhe mai ṭhin.

I chhiar chiang ti raw? Kum 2007-08 Bank tlukchhiat khan a nih thawk ṭha lote an tluchhia em? A teuh lo mai! Kha Banking Crisis vanga tuartu ber chu mipui an ni ta daih mai a ni. Socialism chu mi hausa tân, Capitalism chu mi rethei tân tih kha an kalphung a ni ta hauh lo mai tih kan hrethiam tawh ang ti raw? Sawrkarin bank a bail out kha socialism kan tih a ni a, chu chu Capitalist rama thleng a ni ta a ni. Mi hausate thil sual tih vangin mi rethei ten an tawrhna hi a namai lo hle tih pawh i hmuthiam ang. Vietnam War vangin $ 670 billion, World War II vangin $ 3.5 trillion, Bank bail out vangin $ 25 trillion mipui pawisa ni si, an kuta la pêkchhuah loh hmanral a, puklawk a han ni ta mai a nia! Khawvela Economist rual rilru hahzia hi i chhut thiam kher lovang, mahse ka sawi hi awih mai rawh! A zual zawpui vaihlen hlo tih ka la sawi dawn chauh a ni.

9/11 hnu khan Federal Reserve Chairman Alan Greenspan-a chuan Treasury Bills Interest Rate chu 1% chauh ni turin a tlakhniamtir ta a. Bank tân pawisa puk a nuamin nasa leh zualapawisa pukna a thleng zui leh ta nghal a! Mihringin a mamawh lian ber chu sum leh pai ni lovin RAM a ni. Chenna hmun i neih a ngai a, in leh lo i mamawh bawk. Chu aia mamawh pawimawh hmasa i nei thei lovang. Chuvang chuan US-ah chuan Company lianin in a sa a, an zuar a, an hralh ṭhin. Housing Bubble vanga 2007 a tlakchhiatna vang khan miin in a lei ṭhulh thei ngawt lo, puk chawpin an lei mek reng a ni zawk. Hetiang lo hian US a mipui vantlangte khuan in leh lo an nei thei tlat lo tih kan hre dawn nia. Thil tenawm uchuak chu hei hi a ni, mi rethei thei hnenah pung tam tak awmin pawisa an puktir leh Hispanic leh Minorities te hnenah ui hauh lova pawisaan puk luihtir hi a ni. Ka sawizau dawn lova, an puk luihtir hian heng mite hian chenna in an nei thei chauh avangin an puk lo ngam lo tih bak ka sawi thui lovang.

America Politics a kalsual ta chiam mai a, Campaign nân pawisa maktaduai tel tehmeuh Congressman, Senators leh President ten an mamawh a. Chung petu chu heng Financial Corporation hi niin anmahni kalh zawngin Law an legislate ngam ta tlat lova ni. Bank tâna hlawkna (Interest) chu National Interest aiin a pawimawh zawk an ti ta mauh mai a, chu chu tuman an hnialthla ngam si lova ni. US Federal Reserve Chairman an thlan hian duh duh an ruat ngawt lova, an duh loh zawng an dah vaih chuan Wall Street hian a VETO thla hmiah thei a ni a, sawrkar chungah miin kan hriat tam loh avangin heng Financial Gian-te hi an lêng tih kan sawi ngai ta lova ni! Democracy chu mipui reorelna niin Plutocracy chu mi hausate rorelna ram a ni a, America, kan ngaihsana kan ngaih ropui êm6em hi anihna dik takah chuan Plutocracy a lo ni ta a ni. Wall Street leh Financial Corporation hi regulate dawn la, FED kaltlang a ngai a, chuta an hotu chu Wall Street thuhnuaia awman ni ta zel si a ni.

Goldman Sachs kan hria a, kum 2007 chhiatna thlen hma lawk khan Invesment Bank aṭangin Commercial Bank-ah inletin sawrkar lak aṭangin venhimna a dawng thei tihna a ni. Bank an tlukchhiat hma khan security, a taka hlutna nei lo tih Great Financial Crisis-a ka sawi tawh tam tak leiin mi hnenah an hralha. Banking system a tluchhe dawn tiin bet a siam a, mi hnenah inthapna a siam a, mortgage hlutna nei lo leiin chungte hmang chuan Michael Swenson leh Joas Birnbaum te chuan kha chhiatna a lo thlen khan $ 4 billion zet hlep an neih phah ta hial a ni! Bank rawktu lian ber an lo ni ta a ni. Nimahsela, chung thildik lo tawpkhawk an tih hmangin hrem an la tawk lova, pawisa tam tham tak an la rut ta mawlh mawlh mai a nih hi! Thil sual reng an ti ve thei lo!

Tuna US a damdawi an hralh chak ber leh an hralh nasat ber chu antidepressant a ni ta daih mai! He kalphung dik lo lutuk sawitu mithiam rualte hian eng nge an sawi tak ber? Thil nihphung min hrilh zet a, mahse engmah tihtheih a awm tak tak lohziain thu an khar si anih hi. US Economy hi a tlukchhiat hun hunah khawvel pawh a tluchhia a ni mai dawn a. Chu tlukchhiatna lah chu thleng thuai turin tunah hian sakawr vanglai ang maia chakin a tlan hmanhmawh mek a ni si. He chhiatna a tawh ngei ngei tura an ngaih chiansa laka an hum theihna chu kum 1974 a German Economic Miracle ang chauh kha a ni. Allies-ho khan Germany International leh National leiba zawng zawng kha an thaichhiatsak vek a. Hnathawktu leh a thawksaka inkâr leiba erawh kâr eng emaw zat chhûng thai bo lovin Germany Economykha a rawn tho chhuak leh ta a ni.

US hian chutianga a tih nân tuna puk chawpa in nei zawng zawngte leiba ngaidamin an in dik takah a pawmsak a ngai ang a. Chumiin harsatna a thlen tur chu an Savings neih ang ang kha an leiba milpuiah a hmansak a ngai si dawn a ni. Tax an pêk dân kalhmang a thlak danglam a ngai dawn bawk. An thil tharchhuah emaw siamchhuah apiangah Tax an chawi a, an eiral lamah Tax erawh an la lo. Nimahsela, kan sawi tawh angin Financial Gian-te hian an pawisa an chân phal dawn lova, sawrkarin an chungah eng dân mah a lekkawh ngam lo tih kan hrechiang tawh a, chhiat bak chu hmabak dang an nei tawh lova ni! Nakin lawkah chuan an Fiat Currency, Dollar hian hlutna a nei lo thuai ang a, ba an ngah luat avangin lehkhathem satliah mai mai a lo ni tawh ang. Chu chuan International Currency Exchang nghawngin ram dang pawisa hlutna pawh a chhia a ni nghal mai dawn a ni. Kawng hrang hranga mithiamte thusawi a bengkhawn a, hma a la a nih loh chuan The Greatest Financial Crisis hi kan hmachhawn thuai dawn tih tuna kan kaldan hian atichiang a, sawibuai theih thil a ni ta love.

Democracy a ding chang leh thei ang em? Thei tehreng mai si e. 1830 khan President Andrew Jackson-a khan Second Bank os US kha a hneh a, 1900 tir lamah khan Teddy Roosevelt-a khan JP Morgan leh Rockefeller a hneh leh a, 1930 chhovah Franklin D.Roosevelt-a khan Wall Street pumpui a hneh tawh bawk a nih kha. Chutiang ang mi Politician ropui an neih chauhin US Economy khu a tluchhe lovang a, chutah tak chuan Donald Trump-a aia duh leh thlan tur an awm lo ta chiah a ni. Nimahsela, an politician leh bankers tam zawk khuan Donald Trump-a te ang, Wall Street thuneihna hnuaia kun lo tur, mahnia pawisa nei a, Billionaire ni hi an duh dawn si loh avangin thiam takin mipui thluak an su mek reng a, Mizoramah pawh America Economy hrechiang hauh si lovin Donald Trump-a lo duh lo ve satliah ngawt kan tam phah ta hle anih hi. US hian a economy siam ṭhat a, leiba laka filhlim tura ṭan a lak tak tak theih nân râl aṭang hian i lo ṭang ve ang u, an pawimawhin kan dinhmun thlak danglam vek thei an ni si a.

Heng Four Horsemen- Fiat Money, Banking, Debt leh Plutocracy hian khawvel chhiatna an thlen thei ngei e.

Aside | Posted on by | Tagged , , , , | Leave a comment