HPC (D) leh mizoram sorkar inbiak tum thumna nei dawn

Mizoram sorkar leh HPC (D) hel pawl aiawhte inbiak vawi thumna chu tun thla ni 15 vela neih tura ruahman a ni a, Home Department hotute hnen atanga thudawn danin HPC (D) leh sorkar official-te inbiak leh hun atan hian December chawlhkar thumna tin zawn a ni a, a hun tur hi nimina Home department hotute inhmuhkhawmna-ah ruatniin, sorkar pawmpuina lak leh a ni dawn a ni.

Inbiaknaah hian Mizoram sorkar aiawh te chu Home Department-a Additional Secretary Pu Lalbiakzama ho anga. HPC (D) aiawh mi 6-te chu Pu Lalthaliana’n a rawn ho leh tura ngaih a ni a. Sorkar leh HPC (D) te hi August ni 10 khan an inbe tan a, October ni 5 leh ni 6-ah an inbe leh a. Tun hi a vawi thumna tur a ni.

Pu Lalbiakzama chuan inbiakna an neih tawhah inhrethiam tawn takin boruak tha tak hnuaiah an inbe thin niin a sawi a. Inremna an neih theih thuai a beisei thu a sawi bawk. Sinlung Hill Development Council (SHDC) chu thuneihna sang zawk leh hnathawk thei zawk tura thuam ni se ti a rawtna sawiho tawhin thui tak ruahmanna siamin inhriatthiamna a awm tawh nia thudawn a ni.

Kum 1994-a khatihlaia rammu HPC nena sorkarin inremna a siam atangin SHDC hi a lo piang a. Inremna thuthlunga lungawilo HPC mi thenkhat chuan HPC (D) hi dinin an rammu leh a. Hmar bial tan Autonomous District Council an ngiat zui a. Inrem tumin sorkar nen an inbe thin chungin harsatna eng engemaw avangin inbiakna hi a tlawlh leh thin a. Kum 2013-a an inbiakna chu inkahhai pawhsei chhung tur bituk kawngah an inrem theih loh avangin inbiakna a tawp a. Hemi hnu hian tharum thawhna chhuakin Police pathum leh HPC (D mi pakhatin nunna an chan a; HPC (D) hruaitu lawkte man an ni a, an ‘Army Chief’ invuah Lalropuia Famhoite phei chu Central Jail-ah ala tang mek a ni.

Advertisements
Aside | Posted on by | Tagged , | Leave a comment

Pawisa note thar man

Dec 1 khan Income Tax department te chuan Bengaluru leh hmundang an dapna-ah pawisa note thar, Rs 4.7 crore an man. Hei hi November 8-a pawisa note thar tihchhuah anih hnu a note thar a hlawma man tamber ala ni.

Official te chuan heng pawisa note te hi engineer pahnih state sorkar nena thawk leh an thawhpui (connected persons) te hnen atanga man niin an sawi.Nimin zing khan I-T mi leh sa 50 chuang leh police ten Bengaluru, Chennai leh Erode (Tamil Nadu) ah te pawisa note thar dapchhuah hna hi an thawk a ni.

“He an pawisa dapna-ah hian Rs 2,000 note thar Rs 4.7 crore leh pawisa note hlui 0.3 crore, avaiin Rs 5 crore leh Rangkachak tlang (bullion) 7 kg Rs 2 crore man hu zet hi civil contractor pakhat flat atangin hmuchhuah a ni.”I-T thuneitute mak tihber chu mipui vantlang tena pawisa note thar heti khawpa kan inchan loh lai leh, tlem tlem pawha lachhuak tura a buaithlak em em lai hian engtin hetizat pawisa note thar hi heng mite hian an neih theih tih hi a ni.Bank lam thuneitu tute emaw an inrawlh (connivance) a nihloh chuan heti zat pawisa note thar hi neih/kawl theih a ni lo tih senior I-T official pakhat chuan a sawi.

Department te hian dan lova pawisa hlui thlengna atana hman ni a rin, mi hrang hrang identity card engemawzat an man tel bawk.CBDT thuchhuah chuan, “Investigation hian hma a sawn zel a, heti anga dapchhuah hna hi hmun 10 dangah neih mek a ni,” a ti bawk.

Enforcement Directorate (ED) te chuan Kolkata-based doctor pakhat hnen atangin Rs 2,000 note thar Rs 10 lakh an man bawk.

Aside | Posted on by | Tagged , | Leave a comment

Rs 10 thir lem a awm lo

Tunlaiin cheng 10 thir design inanglo chhuak a awm a, hengte hi Reserve Bank of India kaltlang a pek chhuah vek a nih avangin, a hman theih tih RBI thuchhuah chuan a sawi.

Mipui mamawh phuhru turin pawisa thir hrang hrang siamchhuah fo thin a ni a, thupui hrang hrang tilar turin design tharin pawisa thirte hi siamchhuah an ni bawk a, chuvangin a lenzawng te a bial dan emaw a thu inziak te a inanglo nual a, chengsawm thir thenkhatah ”Rupee Symbol“ a awm laiin, a thenah chuan a awm ve lova, an landanah danglam mahse cheng sawm an ni ve ve a, pawisa hmantheih a pawm an ni vek tih an thuchhuahah chuan tarlan a ni.

Mi thenkhat ten thil hrechiang lovin, heng pawisa thir nawite hi a lema chhalin thu an thehdarh a, dawrkai leh mipui nawlpuite ti chiai in, heng pawisa thir te hi an dawng duh lo ni a thu dawn a ni chu a pawi hle tih sawiin hetiang thudiklo thehdarh hi awih mai lo turin Reserve Bank of Indiachuan mipuite a hriattir a ni.

Aside | Posted on by | Tagged , | Leave a comment

Aizawlah dan lova in sak tam, Property tax hmuh tawh zat

Aizawl Municipal Corporation Commissioner Dr. H. Lalthlangliana’n Aizawl khawpui chhunga AMC phalna la hmasa lova in sak 61 zingah sorkar building 41 a tel, a ti.

AMC Commisioner hian nimin khan Aizawl-a thu thar thehdarhtute kawmin AMC-in Property Tax a lak dan leh Bldg. Regulations kalpui a nih dan a sawifiah a.

AMC Commissioner chuan chuan AMC huam chhunga in sa tur reng rengin dan ang thlapa insak phalna neih a ngai a, ‘In’ han tih hian mipuiin mihring chenna In ngawr ngawr ni turah an ngai a, mahse ‘Building’ tih hian Bawng In, Garage leh Leihlawn siam thlengin a huam a ni, a ti a.

Tunhnaiah Aizawl khawpui huam chhungah dan lova insaka awm em tih enfiahin kawngpui ân bakah hmun kilkhawr laite pawh fan kual a ni a, hetah hian Dan lova In sak 283 an hmuh chhuah a ni a, heng zinga 61 phei chu pass nei miah lova sak tawp a ni a, heng zinga 41 chu sorkar building a ni, Dr. H. Lalthlangliana chuan a ti a. Dan lova in sa-te chu siamthat chin tur chhinchhiahsakin, mualpho taka thiahsak aiah anmahni tihtir an nih thin thu a sawi a. Beisei leh rin ai maha mipuiin Dan an ngaih pawimawh thu sawiin, dan lova in sa an man chhuah tam ber chu hriat loh vanga lo ti te an ni a, hrilhfiah hnuah chuan thuawih takin tih tur chu an ti zel thin, a ti a. Sorkar hotu lian Politician-te atang pawhin Building Regulation an lekkawhna kawngah harsatna engmah an tawk lo chu lawmawm a tih thu a sawi bawk.

Dr. H. Lalthlangliana chuan kum 2015-16 chhung khan Property tax atangin Cheng Vbch 1 Nuai 14 Sing 5 Sang 5 & 450 hmuh a ni a, tun sorkar kum kal lai mekah hian Cheng Vbch 1 Nuai 68 Sing 7 Sang 1 & 51 hmuh tawh a ni a, kum thar March ni 31 thleng khawn chhunzawm a ni ang, a ti.

Aside | Posted on by | Tagged , , | Leave a comment

Sangha a formalin tel an sawifiah

H&FW Department chuan thu chhuah siamin an department thlakip chhuak HRISELNA monthly magazine thlahlui November a chhuaka phai sangha chungchang lo langin mipuite a ti thlabar chu pawi an ti tih a sawi a.

Formalin (Formaldehyde) hi sangha khawina lam (Pisciculture)-ah natna hrik laka sangha venhim nan hmanthin a ni a. Hetih rual hian sangha thawnchhuah/hralhchhuah tur vawnthatna atan chuan hman phal a ni lo a, India ram hmun hrang hrangah sangha thawn chhuaka sumdawng ten a vawnthat nan formalin hi an hmang thin tih sawi a awm avangin sawiselna pawh a awm fo thin tih sawiin, Mizorama lo lut phai sanghate hi formalin hmanga sawngbawl vek an ni em tih hriat a ni lo va. A nunga khawi an nih laia formalin kai pawh an ni thei ang a ti.

An dept Food Safety Cell chuan an ei leh in reng renga thil thalo leh hlauhawm awm palh theite bawhzuiin a vil reng tih sawiin, hriat theih chinah sangha a ni emaw, thlai lam thil a ni emaw mihring tana hlauhawm khawp formalin pai hmuh a la ni lo va. Thil hlauhawm leh fimkhurna tur chi chumipuite him nan puanzar a ni thin a ni a ti.

H&FW department chuan Hriselna Magazine -a thuziak lo lang avang hian tumah chiai lo turin a ngen tih a sawi bawk.

Aside | Posted on by | Tagged , , | Leave a comment

Sorkarin Pawisa lem viltu tur siam.

Sawrkarin ramchhunga pawisa lem leng vel vil tur leh State Police Economic Offences Wing, Intelligence agencies leh Finance Ministry hnena hriattir thin turin a bika siam special cell a din thu Union Minister of State for Finance Arjun Ram Meghwal chuan Lok Sabhaa zawhna ziaka a chhannaah a tarlang.

Heng cell te hi ram dang nena inthenawm state-ah te dah niin pawisa lem dawn anih leh nihlo an vil reng a ni a ti.

Law Enforcement Agencieste chu pawisa lem veivir uluk taka vil tura hriattir anih thu sawi bawkin danloa sum chevel leh sum hlawm liantham chetvelna thlithlai tura hmala turin an hriattir bawk tih Mnister chuan a sawi bawk.

Aside | Posted on by | Tagged | Leave a comment

Bank official te hrem

Union Finance Ministry chuan pawisa tih thih anih hnuah Bank official 27 chu diklo taka sum tih chetna leh RBI kaihhruaina an zawmloh avangin suspend an ni tawh a, mi 6 transfer an ni tawh bawk a ti. Bank-te hian pawias tih thih a nih hnuah sum chevel khawihin taima takin hna rei tak tak an thawk a. Hetihlai hian official thenkhatin diklo takin thil an lo ti ve bawk a ni a ti .

Ministry chuan tluang taka pawisa che vel a kal theih nan theihtawp chhuah a ni a, dan kalha che leh thil diklo zawnga lo ti an awm a nih chuan an chungah hremna lekkawh a ni ang a ti bawk.

Aside | Posted on by | Tagged , , , | Leave a comment

Rural Dept. hnuaia hmalakna zir chiang

Rural Development Minister Pu R.Lalzirliana hovin Rural Development Department hnuaia hmalaknate endiktu, state hnuaia Committee sangber, Vigilance & Monitoring Committee chu Dec. 1 chawhnu khan Aijal Club ah an thukhawm a.

Heta tarlan anih dan chuan sawkar kum, 2016-17 chhungin MGNREGA ah kum in September thla thleng khan Central atangin sum cheng nuai 6534 hmuh a ni a, State Matching Share cheng nuai 48 nen District 8 ah ni 28 theuh inhlawhna a siam tawh a. District 8 a PMAY/IAY tanpuina sum hmanga miharsa te insak tur/ thawm that tur zawng zawng belhkhawm chu in 1818 a ni.

PMGSY hnuaiah cheng nuai 3995 hmangin kumin September thla thleng khan District 8 belhkhawm a kawng laih zat chu 185 niin heng kawng te belhkhawm thui zawng chu km 2514.13 a ni a. NSAP hnuaia tanpuina sum awmzat cheng nuai 708 atangin kum September thla thleng khan cheng nuai 585 pekchhuah a ni bawk.

NRDWP hnuaiah RD Block 7 ah hmun thenkhat a hmalakna ‘Partially Covered(PC)’ pakua a awm tawh a;
NBA hmangin APL chhungkaw 586 leh BPL chhungkaw 1112 tan Ek In siam sak ni tawh in Vantlang Inthiarna hmun 4 siam a ni tawh.

MzSRLM hmalakna tur sum cheng nuai 1097 atangin cheng nuai 270 vel hmanga hna thawh tawh a ni a; IWMP hnuaia hmalakna tur sum cheng nuai 1700 vel pawh hman a nih theih nan thil tul hmasa tihfel mek a ni, tih tarlan a ni bawk.

Aside | Posted on by | Tagged , , | Leave a comment

AIDS dona ni hmang

Author:
  • Khawvel pum huap AIDS natna Dona Ni World AIDS Day chu Dec 1 khan Mizoramah urhsun taka hman a ni a, Aizawlah chuan, Millenium Centre kawtah Health Minister Pu Lal Thanzara hovin hman a ni a, Pu Lal Thanzara chuanHIV/AIDS natna hian Mizoramah kua a hreuh thuk hle tawh tih hi pawm leh awih harsa, mah se dik si a ni, a ti.

    Mizote zingah zuk leh hmuam insumloh avangin cancer vei tamna State Mizoram chu a ni a, mipat hmeichhiat hman khawlohna avanga HIV/AIDS vei tamna State a ni leh zel chu a zahthlak a, a mualphothlak a ni, a ti a. Sex vawikhat hman khawloh hian dam chhung daih thil pawi a thlen thei tih hriaa, nupa kar chauha hman tur sex hi a hun hma a hmang lova, thianghlimna vawng him thei nih tum a pawimawh a ni a ti.

    Health Minister chuan HIV/AIDS hi khawvel thiamna lo sang zel pawhin a tihdamna a la hmuhchhuah theih loh a ni a, a inven dan kawng erawh a awm avangin sex-a insum thei lo te pawhin he natna hlauhawm tak an kai loh nan condom hmang tura inzirtir a tul a ni, a ti a. Tangruala beih a ngai tak zet tawh tih sawiin kohhran, tlawmngai pawl, school leh mitinte HIV/AIDS dopuiah Health Minister chuan a sawm a ni.

    World AIDS Day-ah hian he natna rapthlak kai leh vei mektetana khawvel nuam zawk siam turin sawrkarin tan a la zel dawn a ni tih a sawi a. AIDS leh TB vei kawp tan ART leh TB damdawi hmun khat atanga pek chhuah tum a nih thu Pu Lal Thanzara chuan a sawi a. HIV positive ten TB veilo mah se, a venna atan Isoniazid Preventive Therapy (IPT) pek vek tura ruahman leh kalpui mek a ni, a ti bawk.

    October 1990 atanga June, 2016 thlenga Mizorama HIV dinhmun chu thisen test tawh mi 55,4644 atangin HIV positive 13,040 an awm a, AIDS vanga thi 1313 an awm tawh bawk.

    Mizoramah HIV inkaichhawn tamna chhan berchu mipat hmeichhiatna hman atangin a ni a, a vei zinga zaa 69.3 chuan mipat hmeichhiatna hman atangin an kai a, Nu leh pa atanga kai 414 an awm bawk.

    (DIPR)

    Aside | Posted on by | Tagged , | Leave a comment

    Rural Bankah pension lak theih tawh dawn.

    Mizoram Rural Bank branch hrang hrang ah nakum January thla atangin Pension/Family Pension a lak theih tawh dawn.

    Mizoram sorkar hnuai a pensioner leh Family pensioner ten State Bank Of India atang chauh a hlawh an lak thin chu Mizoram hmun hrang hranga he hamthatna la thin te tan a awlsam zawkna turin tun hnai khan Mizoram Sorkar Finance Department chuan ruahmanna siamin, nilainia thuchhuah a siamah State Bank of India kaltlanga pension la thin tupawhin an duhthlanna zawk a nih phawt chuan an pension hlawh lakna branch chu SBI atangin an duhna ber Mizoram Rural Bank branch ah an la thei tawh dawn tih tarlan a ni.

    Aside | Posted on by | Tagged , | Leave a comment