Rulngan Legend

● Rulngan zirchianna
● Rulngan chungchanga ngaihdan diklo te
● Rulngan a kak thei em Tunlai chu kâk leh kâk lohvah kan tui tlang deuh a ni maw. Hetianga han sawiho nikhua hian mahni tanna lama hleihluak deuhva che thin an awm chawk a, mi dang tan ngaihthlak a nuam lo thei. Kan mi thiam lamten an sawi tha peih vak tawh lo va, a zir ve lo deuh ber hi ka han titi mai mai ang e.Mizoramah hian rul tur hlauhawm hi 10 vel chauh a awm a, tur hlauhawm zinga chhiar tel ve si, a chuk hlauhawm lem lo rulnghawngsen chhiar telin. Heng zingah hian a hlauhawm zuala ngaih chu rulngan, chawngkawr, khuavangrul, zawngrul/ral leh chawnglei te hi a ni a, Heng zingah rau rau pawh hian rulngan hi tihbaiawm berah kan ngai a, a dik pawh a dik thawkhat hle.Rul dang ai chuan rulngan chungchangah hian kan pi leh pute atang tawhin sawi kan ngah a, hriat kan ngah a, rin pawh kan ngah ber lawt lak a. Khawvel pawhin he rul hi a zir nasa ber hial ang. Rulngan chungchanga kan sawi tam tak a hnuaiah hian kan rawn tar lang a, a lo dik ngei em tih leh a dik lo em tih pawh kan sawi tel nghal zel dawn nia.Rulngan chu a dum tle zar a ni.
ᅠA dum a tam hle a, rawng chi hrang hrang, a uk dal, a hring dum, a uk tak, a var dal leh rawng dang pawh a la awm. Rulngan zawng zawng hi eng rawng pawh ni se, a vangtan zawngin a var dal deuhvin a tial vek, a pian hlimah a lang chiang zual. A dum tak bik, dum hlang anga ngaih pawh hi han keu ila, a tialna chu a lo awm vek. Eng rawng pawh ni se, a awr erawh a eng deuh tuk vek.Rulngan mei hmawr fit khat vel hi a khawng em em, mi zak hnuaiah a chhun/vit/hawlh thin.
A mei hmawr hi chuti em ema khawng leh khauh a ni lo va, a tal velna leh a tan velnaah chuan a tikhawng thei ang a, mi pawh a hawlh rap rap thei ang. Mi zak hnuaiah ralthuam ang ema mi vit leh hawlh thin chu a ni lo.Rulngan tleng chu fei khawh ang mai a ni, hnahthial hmunah phei chuan hmuh hman a ni mang lo.
ᅠRulngan ramtla lai hi chiang taka hmutu zawng zawngin a chunga an sawi anga tleng khawh fua ang hian an sawi ngai ta lo, tun hma khan a lo tleng chak zual em maw ni dawn le. Rul tuan tha teh vak a ni tlat lo. Hlaivawm ramtla hmu tawh kan awm chuan, a tuan thatzia leh a tleng dum liam puat lai chu kan hmu fo ang.Rulngan hian thla a nei.
ᅠ A thla ni lovin, a bu awp chaw ei lo, a cher em em laia a vun chuang/chuar a nih hmel zawk, hei chu a thlalak pawh hmuh tur a awm.Rulngan zu rui chu a thle lung lung mai.
ᅠTun hmain tin zu leh rakzu hi ramhnuaiah an sa thin a, a hmunah an sawr a, a taife an paih mai zel a, a taife chu sazuin an tlan luih luih a, sazu chu rulhlaiin a lo veh ve reng a, rulhlai chu rulnganin a lo veh chhawng ve leh thin. Zu duh reng an niin a lang lo. Khawi maw laiah zu lo dawt awm ang taka lan tum erawh chu an nei thei ang tih chauh a ni.Rulngan hian mi a chhinchhiah thei.
ᅠA thei lo ve.Rulngan nuin bu a awp a, a pain a veng thin.
ᅠA tlangpui thuin rulngan hi dam chhunga a nu leh a pa inkawp an ni lem lo, an inthlah zawh hian an tal hrang leh deuh zel, awm dun lai erawh an nei ang, hei chu thil danglam teh chiam a ni lo, rulngan buah hian a nu chauh a awm tlangpui a, mahse a pawn lama a pa a lo awm tum a awm ve thei tho tih erawh a hriat a.Rulhlai hi rulngan nu a ni.
ᅠ A ni lo, rul chi dang daih an ni e, an inthlah pawlh ngai lo bawkMau hmunah chuan ‘Frrrrrrr’ ti khawpin a tleng chak.
ᅠ Eng rul nge maw ni ngai dawn le, hre mak theia rul te pawh a ni ang e. Rulngan hi rul tuan tha tak a ni lem lo, a video documentary kan hmuh theih apiang en ila a chiang mai ang.Rulngan hi a kâk thin.
ᅠSawi sei deuh a ngai ang hei chu. Rulngan a kak thei ti lama tangte hian an ring nghet tlat a, an rinna hi paihsak tum kher a ngai lo ve. A chhan chu, a kâk an tihna hmun leh ramah hian rulngan an hmu tel deuh ngei ngei tlangpui ve tlat a ni. A kâk lai hmutu nia insawite tan hian a video leh a sound han record mai kha a remchang bik hauh lo thei a, a finfiahna tha ber tur ni mah se a rem mai bik lo thei tlat a ni. Kan naupan laiin kan khaw lu rizap tlangah, tuifarfep kan tih mai, tuikhur hnar kawr a awm a, chutah chuan mi eng emaw zatin rulngan an hmu a, zanah a kâk thin an ti a, zan khat chu, chu le, a kâk e an tih kha kawmchar luhka atangin kan ngaithla a, thâm deuh tak leh fan deuhvin, kaaak….kaaak a tih chu kan ngaithla reng a, kangkang hram nen chuan a dang tlat si. Mahse rulngan a ni ngei e tia finfiahtu erawh zawng an awm hauh lo mai. Amaherawhchu, engati nge a kâk an tihna hmun bawrah hian rulngan an hmuh ve deuh zel tih hi a chhanna a vang khawp mai. A kâk thei lo titu lam tanchhan bul ber chu vocal cord a neih loh thu a ni a, a hrawkhrawl dâwt vela boruak hnawha a su thawm ri sûk sûk ang a nih loh chuan aw ri kan tih anga han kâk tur chuan a taksa atanga rik theihna a awm lo tih hi hnial ngaihna vang tak a ni. Han inhnial bap bap reng ila, tuna kan finfiah tawh chin, rulngan kâk an tih apiang sava a la nih zel bakah hian, a rulngan ngei a lo kâk a ni tih te pawh kan la finfiah thei maithei asin.Ngaihthlak leh chhiar nuam takin i inhnial zel ang u.

Aside | Posted on by | Leave a comment

BAWNGKAWN PLOICE TEN SILCHAR ATANGA LO CHHO MAXI CAB-AH ROHINGYA HMEICHHE 4 AN MAN

Bawngkawn Police-te chuan July ni 4, Ningani zan khan Bawngkawn leh Durtlang inkarah Silchar atanga rawn chho Maxi Cab pakhat atangin Rohingya Muslim hmeichhe 4 an man. Heng an mi mante phurtu Maxi cab driver 2 an man tel bawk.

Heng Rohingya muslim hmeichiate hi Zokhawthar lamah phurh chhoh leh tum an nih thu Police te chuan an sawi a, Silchar Maxi cab atanga Zokhawthar service maxicab-a an hlang tur an man a ni.

Heng hmeichhe palite hi Myanmar lamah phurh chhoh an nih hnuah Malaysia pan pui leh tur nia an hriat thu an sawi a, kum 20 mi pahnih, kum 14 mi pakhat leh kum 12 mi 1 an nih thu an sawi a, Protective home-ah dahluh nghal an ni.

Aside | Posted on by | Tagged , | Leave a comment

Tourism Minister in ‘Kut’ hmanna tur diklo a sawi?

Tourism budget-a khawvel hmun hrang hranga Mizo kut hmanna tur cheng nuai 100 awm anga Minister sawi hi thudiklo a ni a. Minister hi a hresual anih chuan a ngaihdam theih ang a. Hre reng chunga mipui bum tuma a sawi lang anih phei chuan ngaihdam a dil a ngai a ni.

Kumina Tourism Budget hi cheng nuai 978.21 chiah niin nikum khan cheng nuai 1,289.07 ruahman niin hei ai hian 31.77 % laiin a tlem zawk a. Revised estimate-ah phei chuan nikumah cheng nuai 3,290.63 hman anga ziah niin hemi aia kumin budget tlemna phei chu 236.39 % lai a ni.

Tourism budget-ah hian cheng nuai 854.62 chu hlawh tur niin cheng nuai 14.10 chu thawktute damlo enkawlna tur a ni a, cheng nuai 5 chu an zinna senso tur, cheng nuai 30 chu office enkawlna tur a ni a, cheng nuai 2.55 chu an motor enkawlna tur niin cheng nuai 3.50 chu thuchhuah leh intihlarna tur a ni a. Hemi belhkhawm hi cheng nuai 907.77 niin an budget pumpui atanga 92.79 % lai a ni a. Anmahni tan an inhmang zo titih tihna a ni.

Heng ho baka an la neih chu supplies and materials cheng nuai 10.50 te, minor works cheng nuai 35 leh other charges cheng nuai 22.44 chiah a ni a. POL an neih loh avangin khawi emaw hi an pawhhek a la ngai dawn zui a. Nikum leh kum hmasa lama sum hman dan atanga en phei chuan damlo enkawlna leh office enkawlnaah an indaih dawn loh nasat avangin other charges hi an pawh nasat hle a ngai dawn zui a ni.

Engapawh chu ni se ‘Kut’ hmanna tura an pawisa neih lai tak chu enchian a ngai ta a. Hemi lam hawia budget-a pawisa an neih awmchhun chu promotion of fairs and festivals-a cheng sing 1 an neih te, state matching share for festivals-a cheng sing 4 leh sang 4 an neih te, leh grants for organizing festivals-a cheng nuai 4 an neih te chiah hi a ni a. Heng ho belhkhawm hi cheng nuai 4.54 chiah a ni.

Aside | Posted on by | Leave a comment

UNION BUDGET 2019 – 20 KA LO THLIR DAN (6.7 2019)

By Lalrozara RZ

Tihdan phunga Budget documents Savun Bag sena ken luh a, Parliament a pharh lam kha chu French leh British tihdan kan chhawm a ni a. Nimin khan FM Nirmala Sitharaman khan Savun bag sen atang nilovin puan sena thleh thuma funin a pharh a Budget speech darkar hnih chuang hun a hmang a. A pharh zawh khan PM Modi”n ” I ti tha e, tui i in miahlo lehnghal a ” tiin a lawmpui thu a hlan. HM Amit Shah, DM Rajnath Singh, Former FM, Arun Jeitley bakah Minister dangte pawhin fakna leh lawmpuina an hlan sap sap.

India Budget buatsaih leh pharh hi Constitution in a pek ngat, President in pharh phalna a pek zel ngai, ( State ah chuan Governor) a chhia emaw a tha emaw Pass ngai a ni. Opposition member tan Pass pui duhloh ngawt chi a ni lo. Sorkar chhia leh tha a inthlau thei viau, Sorkar Budget in mipui hmasawnna a hawi loh chuan a thlangtu tlingtu mipui kan vanduai tihna a ni mai. Chuvang chuan mipui changkang/ pangngai chin chuan Budget hi ngaihvena thlir uluk a ngai.

Sorkar thar emaw Sorkar vawihnihna/ vawithumna pawh nise, Budget hmasa ber hi a pawimawh em em. Election laia Party intiamna kalpui dan tur bul tanna a ni a, intiamna ang Budget in a keng puitling thei dawn em, Sorkar tan tirhna Budget a fuh loh chuan kum 5 chhungin sorkar tha leh hmasawnna a awm thei lo. State sorkar pawh nise a danglam lo, term tawp chimchin tur a lang nghal ruak zel. Sorkarna chelh ve hrim hrim, kalphung naran chung chuan Economy tlakhniam raih raih awl tak a ni. Mipui Vote chhuah piahlam sorkarna hi a pawimawh lai ber chu a ni si a.

Tun dinhmunah India GDP 6.8 % a ni, tuna India mamawh chu rangtaka GDP 8 % kai chhoh a ni. CEA bang ta Arvind Subramanian, Top Economist phei chuan tuna 6.8 % atang hian 2.5% paih a ngai, India GDP diktak chu 4.5 % a ni, tuna tehna Methodology- Indicator hi a diklo a ti a, an hnial tla thei mai lo. Nikum mai khan RBI Governor Urgit Patel a bang a, chutah National Chief Economics Adviser Arvind Subramanian a bang leh hlawl a Tun Budget putluh hma nimin lawkah RBI Dy Governor Viral Acharya a bang leh tawp bawk a. Economy growth & Financial Management ah hian thil fello chu a awm a ni.

Nimin Budget a lang chu Central Sorkar pawisa buhzem/ tuikhur chhunga khawh lut huau huau a phai hle. Budget pharh zawh khan Sensex, Nifty leh Stock market lam a tlahniam nghal a. Election result puan chhoh lai khan sorkar nghet policy tha kalpui thei tur a piang dawn e, tiin Sensex, Nifty – Stock market te an sang zawt zawt a sin le !

Budget hmasa berah Petrol & Diesel man san nghal a tul a. Ram puma Transportation Rate a nghawng nghal ang, thil man a sang thuai ang. Oil leh thil man sang hian hniam lam aiin a sang chho tulh tulh ang tih hlauhawm tak a ni. Mi hausate tan Wealth Tax a thlawk sang hle, US aiin a sang dawn.

Agricultural thar chhuah hralhna lam harsatna sutkianna a hawi tawk lo, MSP lamah sum dah a tamlo lehnghal a, Budget hian Farmers te dinhmun dawmkanna a hawilo tia sawisel a hlawh nghal Ni e, India Farmers te hi Loan la a, hmala an ni tlangpui a. Khuarel chhiatna piaha Marketing system felloh vanga tlachhia an tam a, mahni intihhlum/ inthahna a tam hle. Home Ministry hnuaia National Crime Record Beureau lah hian kum 2016 atang khan National Crime rate a phawrh chhuak duh tawhlo a Farmers mahni intihlum, Hnam leh hnam, Sakhua leh Sakhua buaina Religious Persecution lam Records pawh a hriat mumal theih ta lo a ni.

Industries thil siam lam reng rengah Imports tih tlem tum a ni, hei hi chu ram zawng zawng kalpui leh duhdan a ni. Imports material bungraw lakluh tihtlem ringawt avang hian India tualchher Manufactural Technology Quality a san loh chuan, ramdangin India kut chhuak an lei tam lovang, Exports a tlem phah ve tho ngei ang.
China & Pakistan nen kan in-ep ut reng, ramri lamah a puak sa a ni ber. Min han zuam em em lehnghal a, min cho ve khanglang zawk elo minti deuhin ka hria Diplomatic levelah kan invau dum dum reng bawk a. Defence budget a hniam em em lawi si a. Ralthuam kan neihsa cheihnumna ( Maintenance fund) tam loh vangin Airforce thlawhna a tla hnem ta, 2012 atang khan Fighter & Helicopter 44 zet a tla tawh.

Budget hian thil tha tam tak, GST rate siam that leh Luxury Item lam Tax tihsan ang chi te, Welfare Schemes lam fakna tur pawh a tam viau, chulam chu dahtha ila. A buaithlak ber chu Budget chu hmuh tur beiseina atanga hmanralna inkar a ni.

RBI leh a hnuaia Nationalised Banks ten sorkara devident fund/ surplus fund pek luh turah tan an lak a ngai viau dawn niin a lang. Thlirna hrang hrangah inhnial fe theih a ni chungin, sawiselna lam a ri ring chho zawkin ka ring. I lo thlir ang..

Aside | Posted on by | Leave a comment

Assam ramri ah buai leh

Nimin khan Mizoram leh Assam ramri, Cachar district a Lailapui khuaah ramri chungchanga buaina tenau a thleng a, thelhmih leh a ni.

DIG (Northern Range) Pu Lalbiakthanga Khiangte hnen atanga thudawn danin Cachar Forest department hotute’n Lailapur khaw tawntirh a awm, tunhma a Cinema hall ṭhin an ram chu hung an tum a. Hemi hria hian Vairengte tlangval rual chhukin an thiltih tum hi an dang a, a hnu-ah helai a building hi chei ṭhat an tum leh a, chu pawh chu an dang leh a. Hman kum lawka ramri buai laia hmathar lak loh ni se tia state pahnih inremna bawhchhiatna a nih thu Kolasib district thuneitute’n an sawifiah hnu-ah an ṭin darh ta a ni.

Hetih lai hian Cachar district bawrhsap hian helai hi a hma lama inremna-ah a tel pha lo tiin ṭan a khawh ni a hriat a ni. Hetianga boruak a awm takah hian Kolasib district bawrhsap Pu Zoengsanga bakah SP leh official engemawzat chu Lailapur-ah hian an chhuk thla a. Tun dinhmunah chuan boruak duhawmlo a awm lo ni a thudawn a ni.

Aside | Posted on by | Leave a comment

MHIP Day vawi 45-na hmang

Mizo Hmeichhe Insuihkhawm Pawl MHIP Day vawi 45-na nimin khan state pumah hman a ni a, MHIP General Headquarters chu tiam chim awm lova tih tawp rih a nih avangin, MHIP branch hrang hrang ten an remchan dan angin an hmang a ni.

Chief Minister Pu Zoramthanga chuan Zemabawk MHIP Day lawmna a hmanpui a, thusawiin chhungkua leh khawtlang nunah hmeichhia an pawimawh a ti a. Chhungkaw tinuamtu ber an nih thu te, an tawngkachhuak leh midangte nen an indawr danah thui takin hlimna leh hlim lohna thlen theitu an nih zia hre reng turin a chah.

Chief Minister chuan tunlaiah zu leh ruihhlo in chhungkaw tam takah harsatna a thlen thin thu sawiin, chutianga buai chhungkua te chuan Pathiana beiseina a innghat tlat thin tura chah in, sawrkar pawhin ruihtheihthil avanga buai, dam duh te enkawlna tur siamin hma a lak mek thu a sawi. MHIP Day hmang tura kalkhawmte chu hriselna ngaipawimawh turin a chah a, vaihlo leh a kaihhnawih thil ten mihring taksa chhung a tihchhiat theih dan te sawiin, sahdah, tuibur leh adangte laka fihlim turin leh midang pawh hrilhhre turin a chah a ni.

MHIP Day vawi 45-na hi Aizawl veng hrang hrang-ah hman a ni a. Mission Veng-ah chuan MLA Lalchhuanthanga chuan he ni hi hman puiiin thu a sawi a, ram leh hnam tlu chhe mek tungdinga kaitho tur leh a hliamte tuamdam turin nute chu ramin a au a ni a ti. Ruihhlo hluar ta em em chu a vei awmin, ruihhlo avanga thihnain hmeithai a siam hnem lutuk pawh in chhung lam atanga inzirtir thar a ngaih thu a sawi bawk. Khual zahawm Pi Esther Lalruatkimi pawhin thusawiin, Pathianin mihring a siam dan anga mipa leh hmeichhe dinhmun sawiin, inpuitawn tûr annihna lai te a sawi a. Ram leh hnam tana hmeichhia te tih theih san tawh zia hriaa tang sauh sauh tûrin kalkhawm te a chah a ni.

Mamit Bialtu Minister Pu H. Lalzirliana chuan Lengpui Joint MHIP Day lawmna hun buatsaih a hmanpui bawk a. He hunah hian thusawiin, MHIP te chu Mizo Zia rang vawnghim tlat tur leh hnam boral mai tur venghima theihtawp chhuah zel turin a chah a. Hnamdang neih loh khawhar in kal uar tura fate fuih sauh sauh turin a chah bawk a ni.

Nimin vek khan MHIP Serchhip Hrrs bultumin Chhiahtlang Ramlai Hall-ah a huhoa hman a ni a, he hun hmanpuitu I&PR Minister Pu Lalruatkima chuan ram leh khawtlang siamtha tura chhungkaw pawimawhna leh a uaptu nute pawimawh zia sawiin, ram inrelbawlna Sorkar tha nei tur te, mipui tha nei tura tan lak a tul zia sawiin inchhungkhur ah inzirtirna a tul thu a sawi a. Ram natna chu Moral Reform hmangin a tihdam leh theih ani tiin, MHIP member kalkhawmte chu an dinchhan (Motto) tha tak leh pawimawh tak tihlawhtling ngei tur a theihtawp chhuah thar leh turin a chah bawk.

MHIP Day Vawi 45-na hi MHIP Branch te chuan mahni remchan dan anga hmangin, vengchhunga vohbik te leh kum 70 chunglam te hnenah thilpek hlanna te neih a ni a. Hmun thenkhatah chuan intihlimna hun te hmangin, vengchhung thenfaina hun te, damlo kan chhuahna hun te, intihsiakna hun atan, naupang venhimna kawnga inzirtirna hun atan te leh tanpui ngaite tanpuina hun atan he ni hi an hmang a ni.

Aside | Posted on by | Leave a comment

MAMIT-AH NCPCR CHAIRPERSON MR. PRIYANK KANOONGO HOVIN BENCH SITTING NEIH A NI.

Vawiin khan DC Conference Hall, Mamit-ah National Commission for Protection of Child Rights ( NCPCR) leh State Commission for Protection of Childs Rights (SCPCR) bultumin naupangte dikna chanvo humhalhsak ngai lungawilohna thlen duhte tan thehluh theihna hun hman a ni a. Mr Priyank Kanoongo, Chairperson (NCPCR) leh Pi Sangzuali Vanchhawng Chairperson( SCPCR) te chuan Bench Sitting hi an thutchilh a ni.

Vawiin Bench Sitting-ah hian Pu Priyank Kanoongo chuan naupangte dikna chanvo humhalh kawnga India sawrkarin hma a lakna hrang hrangte leh Mamit District chu India rama District hnufual thlante zingah a tel avangin naupangte’n an dikna chanvo an hmu em tih chu ngaihpawimawh bik anih thu a sawi a. Naupangte dikna chanvo humhalh kawnga thawktu leh enkawltu Department hrang hrangte chu an mawhphurhna hun bi tiam chhunga hlenchhuak ngei turin vawiin Sitting-ah hian ngen an ni.

Vawiin Sitting-ah hian Mamit District, Kolasib District bakah North Tripura District chhung atangin naupang an dikna chanvo chang phalo ni-a inhria an inlan a. Heng harsatna thlente hi Chairperson, NCPCR hian lo ngaihthlaksakin an harsatna chu eng anga bawhzuisak ngai nge an nih tih chu naupang enkawltu Officials -te nen hian sawiho zui nghal niin hunbi tiam chhung ngeia an harsatnate chinfel turin Bench Sitting-ah hian tih a ni.

Vawiin Bench Sitting-ah hian Dr Lalrozama, District Bawrhsap, Mamit chuan NCPCR Chairperson leh SCPCR Chairperson leh Members-te’n Mamit an rawn tlawh chu lawmawm a tih thu sawiin North Tripura Officials-te, Kolasib lam atanga Officials lokalte chungah lawmthu a sawi a. Bench Sitting chuan naupang enkawlna kawngah rah tha a chhuah ngei a beisei thu a sawi bawk.

Vawiin Bench Sitting-a Case lut 17 zinga a langsar zualte chu POCSO Case avanga enfiah ngaite tana a hrana enfiahna room chungchang, naupang zirna dawng rual nisi mi 1516 zirna dawng lo chungchang, Home Assessment Survey atanga a lan dana naupang kum tling lo hnathawka chhawr luih mi 45-te chungchang bakah Zirna In-a mipa leh hmeichhiate inthiarna a hranga awm lo chu hunbi tiam chhunga chinfel tura tih a ni.

Vawiin vek khan Mr. Priyank Kanoongo Chairperson NCPCR leh Pi Sangzuali Vanchhawng, Chairperson SCPCR-te hian I&PR Conference Hall-ah thutharthehdarhtute kawmna an nei a. Thuthar thehdarhtute’n zawhna an neihte hi an chhang nghal a ni.

DIPR

Aside | Posted on by | Leave a comment

Inthiarna siamsak tam

Sawrkar laipui chuan Swachh Bharat Mission (Gramin) hian chenna in vaibelchhe kua leh nuai 62 tan inthiarna sak a ni tawh tih a sawi. Lok Sabha-a ziaka zawhna chhangin Union Minister of State for Jal Shakti Rattan Lal Kataria chuan faina kawnga hmalaknain a tuam hi thingtlang khuaah zaa 99-in a pung a. Kum 2014 October ni 2 khan zaa 38 chauh a la ni thung tih a sawi a.

District 632, state leh UT 30, Gram Panchayats nuai 2.50 leh thingtlang khua nuai 5 sing ruk sang sarih leh zali sawmkua pariat chu pawnlera inthiar awmlohna open defecation Free-a puan a ni tawh tih a tarlang bawk.

Aside | Posted on by | Leave a comment

LIRTHEI INTLANCHHAWK DAN TUR LEH A HUAM CHIN TUR

  1. Intlanchhawk hian mimal motor leh Sorkar motor, Two-Wheeler zawng zawng (exempted bik tihloh chu), bungraw phur lirthei zawng zawng a huam ang.
  2. Lirthei registration number tawp berte tlan chhuah theihloh ni chu hetiang hi a ni ang –

Thawhtanni (Monday) ah Registration 1 leh 2 a tawp
Thawhlehni(Tuesday)ah Registration 3 leh 4 a tawp
Nilaini (Wednesday) ah Registration 5 leh 6 a tawp
Ningani (Thursday) ah Registration 7 leh 8 a tawp
Zirtawpni (Friday) ah Registration 9 leh 0 a tawp

Tlan chhuah phalloh hun hian
Zing dar 9:00AM atanga Tlai dar 5:30PM inkar a huam ang.

  1. Mizoram District dang lirthei zawng zawng te, State pawna lirthei registerte, Private Motor leh Bungraw phur motor Aizawl khawpui chhunga awm leh rawn tlanlut tur reng reng te pawh intlanchhawk hian a huam ang.
  • Lirthei intlanchhawk hian
    Inrinni (Saturday) leh Pathianni (Sunday) bak ah Sorkar Holiday-te a huam lovang

  • Taxi bik chu Sticker A, B leh C hmanga intlanchhawk kalpui mek ang hian
    Zing Dar 9:00AM atanga Tlai Dar 6:30PM inkar an intlanchhawk ang.

  • Inrinni (Saturday) bikah Chawhnu Dar 1:00PM atangin Taxi-te hi an vaia
    tlan chhuah phalsak an ni.

    Tin, Pathianni (Sunday) leh Sorkar Holiday ah
    pawh Taxi-te hi an vai a tlanchhuah phalsak an ni.

    A HUAMLOH TUR TE
    1. Governor, Chief Minister leh Speaker-te (an carcade tiamin) a huam lovang.

    1. Public service vehicle (passenger phur chi lirthei) entirnan – City Bus/Bus, Maxi Cab/Sumo (State dang registered huamin), Auto Rickshaw, InstitutionBus, Department Bus, Two Wheeler Taxi.
  • Police department motor duty, Traffic Police duty-te, Fire (F&ES) motor, excise & Narcotics motor duty, Medical & Hospital Emergency duty, Ambulance/Morgue van, Executive Magistrate law and order duty leh
    emergency duty, Media mi te (MJA sticker tar te chauh), PHE emergency
    duty leh PHE tui sem, P&E emergency duty, Bawnghnute sem, Chanchinbu sem, AMC hnuaia Bawlhhlawh paih (Garbage) motor duty, Army leh Para- Military Force, Government Department/Office Despatch Rider-te.

  • Rualbanlo te tana Special Vehicle-te a huam lovang.

  • District dang atanga Sorkar thil pawimawha duty-te, Law & Order leh
    Essential Commodities duty-te chu Aizawl City Traffic Police-te an hrilh
    hmasak hnuah an lirthei tlan dan tur ruahmansak an ni ang.

  • Lirthei 407 (truck) leh a chunglamte National Highway-54 Bawngkawn leh Zemabawk inkara tlan dan tur Traffic Police-ten an lo ruahman tawhsa anga tlan tlang tur te a huam lo bawk ang.

  • A chunga a huamloh tur sawibak ah hian engemaw hriatlawkloh
    Emergency case leh ṭulbik tak tak thilah chuan
    Aizawl Traffic Control Room Phone Number: 0389-2322307/ 2313061/ 9366553559 (Jio)/9774440722 (Vodafone) ah hriattirin an thu leh hla ngaichang hmasa in an ruahmanna siamte zawm thin tur a ni.
    He thupek zawmlo man te chu Section 179 of MV Act, 1988 hmanga hrem an ni ang.

    (RODINGLIANA CHAWNGTHU) MPS
    Sr. Superintendent of Police Traffic :Aizawl : Mizoram

    No. RO/TRF/SP Noti-7/08/393 Dated Aizawl, the 3rd July, 2019.

    Aside | Posted on by | Leave a comment

    USA in Sikeisenah Flag zar dawn

    SALUTE TO AMERICA : “SIKEISEN-AH KHIAN AMERICA FLAG KAN LA ZAR DAWN A NI ” -Donald J.Trump

    July 5, 2019 (MSR): Democrats leh anti-Trump hote sawisel luai luaina karah, President Donald J. Trump duhdan angin America Independence- July 4 chu ropui takin, “Salute to America” tih thupui hmangin Washington DC-a Lincoln Memorial Mall tual zawlah hman a ni a, hetah hian US military branch hrang hrangten an ralthuam chhuanvawr an entir vel a, a hmuh nawm hle. American mipuite pawhin chhuang takin, President Trump thusawi lai leh an chung lawka khawvela indo thlawhna tha tha ber ber chi an lo thlawh laite chuan, “USA! USA! USA!” tiin an lo au hulh hulh mai thin a ni !

    President Donald Trump chuan America ram hmasawnna bul thut (key developments) history sawiin, American sipaite chu ram leh hnam tan leh khawvela zalenna awm nana an beihnaah a fak thiam hle a, Donald Trump hmaah chuan US military service nih chu chakawm duh tak a ni ang. A thusawi hi 45min a tling tep a, a thusawi laiin US military branch hrang hrangin a thiam leh theihna entirin, an chungah indo thlawhna chi hrang hrang an lo thlawk thin a ni.

    Trump chuan, “Hello America! Vawiinah, vawiin tlaiah hian zalenna hlimna (joy of freedom) nasa tak neiin kan lo pungkhawm a, chutianga zalenna chu changtu niin kan hrereng a ni. Vawiinah hian hnam pakhat angin ni bik tak neiin, America chu zahna chibai kan buk (salute to America) a. Kan history-a kan pasaltha huaisen leh mipuite chu kan ngaisangin, US military a mipa leh hmeichhe huaisen, US puanzar huaisen taka lo venghim tlat tute chu kan fakin, kan chawimawi a ni” a tiin, US military branch hrang hrangte a fak thiam hle.

    President Trump chuan a nupui duh tak First Lady Melania, ban no taka kai chunga a lo pen chhuah laiin, chung lamah Air Force One thlawhna lian leh hrawl zet a lo thlawk a ni.

    Trump chuan, “Hun reiloteah Space Force a awm dawn a. Engtikniah emaw chuan khi chung vansanga Sikeisenah ngei khian, US puanzar (flag) chu a la inzar pha vat vat dawn a ni. Van boruak chu US ta a ni” tiin, American thalaite chu sipai (armed force) atang turin a sawm zui a…

    He tih lai hian an chung zawnah nuclear bomb phur thei thiau, tunlai khawvela indo thlawhna tha chungchuang leh man to bon tawp, B-2 Spirit bomber chu F-22 Raptors pahnih ten rawn vengin an lo thim hlim Bak lenin, khawchhiat laia Vamur thlawk leu kual vel angin, Washington DC khawpui chungah hniam takin an lo thlawk a ni. Mipuite pawh sahawin, “USA, USA, USA!” tia kut bengin, chung lam thlirin an hawi kual vel a, amah President Trump pawh hawi kualin mipui chu a tukhum a chhawn hial thin a ni !

    Hetianga Trump-an stage-a thu a sawi lai hian Acting Defense Secy Mark Esper leh Chairman, Joint Military Chiefs of Staff Gen. Joseph Dunford Jr., chu ko chhuakin, a thusawi laiin Trump chu a laia dingin an lo din pui a ni.

    US military te hian MH-60 Jayhawk helicopters, MH-65 Dolphin helicopters, C-144 turbopop plane te chu mipui chungah an rawn thlawh tir a, an lawm hle. Trump chuan, VH-92 Helicopter chu Marine One ni turin, Maryland ah Marine Corps test & evaluation neih mek a nih thu te sawiin, US Army ta Apache Helicopter raltuthei 4 pawh entirin, an rawn thluak kual a ni.

    Donald Trump thusawiah hian “Pathian” hming lam rik zauhna hi a awm thin a, “Kan vaiin in thuhmun neiin, thinlung hmun khat puin, kan zain Pathian Engkimtithei (Almighty God)a kut chhuak leh siamte kan ni. Pathianin malsawm vek che u rawh se! Pathianin United States of America malsawm rawh se!” tiin, Vice President Mike Pence leh Trump Admin official te chu mipui hmaah a ko chhuak a ni.

    US Military Band party te chuan, “The Battle Hym of the Republic” tih chu music nen play ruai ruaiin, an lo sa bawk a! An boruak hle. Hetih lai hian US Navy Blue Angels an tih, thlawhna 6 chu hniamteah meikhu chhuah mawi tak siamin an lo thlawk kual delh delh a, an hmuh nawm.

    Donald Trump chuan a thuchah sawiah hian, “Kan hnam chu tun hma zawng aiin a lo chak zual ta. Tunah chuan a lo chak zual tak meuh a ni. Kum 65 kalta chhungin US Air Force ten America venghimin, American sipai pakhat pawh hmelma thlawhnaten an that lo a ni. A chhan chu van boruak (skies) khi USA ta a nih vang a ni” a ti. Kut an beng dur dur!

    Lincoln Memorial Mall hi kum 97 kaltaa “Symbol of Unity” tura siam leh din a ni a, chu hmun atang ngei chuan President Trump chuan July 4-a America Independence Day ah thuchah a sawi a ni. A thusawi hi a fimkhur hle a, kum 2020 atana campaign theihna tur rim nam a awm lo. Trump thlawptute chu “Make America Great Again” tih lukhum sen an khum fur a, hetih lai tho hian Anti-Trump Campaigners-Anti-War & Codepink Organization hoten National Park-ah “Baby Trump” balloon lian tawk 20ft zeta lian chu an lo zarin, US flags an hal a, US Secret Service ten flags haltu 2 an man phah nghe nghe a ni.

    US President te hian July 4 chu Independence Day holiday ni mahse, thuchah an sawi ngai meuh lova. 1951 khan President Harry Truman chuan Independence kum 175na pualin thuchah a sawi a, chumi hnuah Donald Trump hi a rawn ni leh chauh a ni.

    Dems atanga US chuh tum, Sen. Bernie Sanders chuan, Trump thiltih dan sawiselin, “Mahni a lal hrawt (authoritarian)duhtu thiltih a ni a, National Park enkawlna sum US$ maktaduai 2.5 sen ral a ni” a ti. Gay-Mayor leh Dems atanga US President nih tum Pete Buttigieg chuan, Trump thiltih hi mahni himlo inhria thiltih a ni, a ti bawk.

    July 4 a Trump Admin thiltih hi Russia Today chuan, US a media lian CBS, MSNBC, ABC leh NBC chuan Live-in an pe chhuak duh lo, a ti ! Hetih lai hian American 86% te chuan Independence Day hi lawm ngei phuin an hria a, mahni chhungte nen hlim takin an lawm a ni.

    America chuan British awpna hnuai atangin Independence vawi 243na an lawmna a lo ni ta. Independence Day hi a tirah chuan July 3 emaw, Aug 2 ah rawtna a awm a. President John Adams nupui chuan a pasal hnenah “Great American Festival” turin July 3, 1776 angin ziakin rawtna lehkha a thawn a, mahse, JULY 4, 1776 chu “Declaration of Independence” tur an ziakna ni tak a ni a, Aug 2-ah chuan Palai 56 zetin hming ziakin an nemnghet chauh a ni. Continental Congress-ah July 4 chu America Independence Day atan a puang ta a ni.

    CT Lalrinawma

    Aside | Posted on by | Leave a comment