MI KUT TUAR HARH CHHUAK LOIN BORAL

Lalṭhathanga s/o Lawmpuia Lungtian khua chu Saihatlang kawn ah ni 2.7.2019 zan khan mi kut a tuar a. Nikhaw hre lo a a awm hnuin a tuk 3.7.2019 zingah a Ni in chanchin hi a hre ve chauh a. Kut thlaktu nia puhte hi V.Lalnunpuia (30) S/o V.Zatlunga leh Lalrinawma (32) S/o HC.Ngodo (L) Siahatla-1 te an ni.

Lalṭhathanga hi 3.7.2019 khan Lawngtlai ah refer a ni a, Lawngtlai atangin Lunglei/Serkawn ah, Serkawnah pawh enkawl a harsa deuh a ni ang 4.7.2109 zan dar 9.00pm khan Aizawl Civil Hospital thlenpui a ni a. Civil Hospital atang hian hemi zan vek hian City Hospital ICU ah dah luh leh a ni.

Lalṭhathanga hi a hnar leh ka atangin thi a chhuak nasa hle a thu dawn a ni a, a lu ding lam leh vei lam a hliam hian a thluak thisen zam tichat in a thluakah thi a tling ni a sawi a ni a, zai theih ni a ngaih a ni lo, a dinhmun hi a ṭha lo hle.

Amah sawisatu a puh te hi ni 3.7.2019 khan Siaha District Jail ah dah tawh niin thu dawn a ni.


Theih ang anga thawktu thahnemngai takten an enkawl mek laiin tukin 7.20am. khan a hliam tuar lovin City Hospital Aizawlah a boral zui ta a ni. A ruang hi Lai House Bungkawnah lak phei niin, 10.45am khan an khua Lungtian panpui a ni.


Nb: Hemi thu ah hian sawi a tam a, thu hretu tura rin ten an sawi ṭha duh vak tawh lo nia sawi a ni.


MI KUT TUAR A THIHNA

JOINT YOUNG LAI ASSOCIATION, LUNGTIAN
&
JOINT VILLAGE COUNCIL COURT LUNGTIAN

PRESS RELEASE

Kan YLA Member, Tv. Lalthathanga. S/o Lallawma Lungtian I. Dt. 3. 7. 2019 zan a, Lalrinawma S/o. Hc. Ngodo (L) leh V. Lalnunpuia. S/o. V. Zatlunga Siahatla-1, te kut tuara Nunna hial a chan hi keini Joint Young Lai Association Lungtian leh Joint Village Council Court, Lungtian te chuan pawi kan tiin, Kutthlak tute hi kan dem tak zet a, thu neituten an phu tawk hremna pe ngei turin kan phut tlat a, hetiang thil duhawmloh hi thleng tawhlo se kan ti.

Sd/-
( MC. LALHMINGTHANGA)
President
Joint Young Lai Association, Lungtian

( LEMMY V. VUANGTU)
Secretary
Joint Young Lai Association, Lungtian

( RB. CHUNGA )
Chairman
Joint Village Council Court Lungtian

( N. LALDINTHARA)
Secretary
Village Council Court, Lungtian

Aside | Posted on by | Leave a comment

Zu khapna danah grape wine ngaihhnathiam dawn

Zu khapna dan siamah Winery ngaihhnathiam a nih theihna turin hmalak a nih thu Minister Pu TJ Lalnuntluanga’n a sawi.

Champhai Grape Growers Society General Body Meeting vawi 12-na Tlangsam Winery-a a hmanpuinaah he thu hi sawiin Minister chuan, MIP sum hmanga bulṭan Tlangsam Winery chu theihtawp chhuaha tihhmasawn leh tum a ni a, Zu khapna dan siamah Winery ngaihhnathiam a nih theihna turin hmalak a ni, a ti a. Champhai Grape Growers’ Society member-te chu neitu thinlung pu chunga hna thawk tur leh taihmakna, rinawmna leh beidawng mai lova tihtak takna nena hma lam pan turin a fuih a. Intodelh tura ṭan lak kawngah zau taka a inhawn thu leh mimal taka finchhuaha ṭawiawm turin a sawm a ni.

Minister chuan Grape Winery tundin zelna tura hruaitu fel, thahnemngai tak takte leh Horticulture Department-te hnathawhah lawmthu a sawi a. Hmun nghet siama grape huan enkawl chuan thing leh mau chereu tur a veng tel avangin hetiang zawnga eizawnna kalpui chu nakin hun ngaihtuaha thil tha tak a ni, a ti a. Champhai Grape Growers’ Society-te an kalzelna turah duhsakna hlanin Mizoram tana intodelhna kawnga tha thawh zel turin a chah a ni.

Champhai Grape Growers’ Society hi kum 2007-a din a ni a; member 148 an awm mek a ni. Grape Wine te hi a hlawmin kum 2018 thleng khan Radiant Manufacturers Pvt Ltd chuan a la ṭhin a. Baptist Church Mizoram chuan Sacramental Wine tur an siamtir a, Mizoram chhungah ‘Champwine’ an zuar chhuak bawk a ni.

Winery tundinna kawngah hma lak zel a ni a, Grape hmun tuaitharna turin Cheng nuai 45, Winery tihlenna tur Cheng nuai 60, GI Pipe phumna tur cheng nuai 10, building sakna tur cheng nuai 15, Cool Room 2 siam leh Fertilizer dealership-ah te Sawrkar atanga puihna dawn a ni a. Heng bakah hian a lakkhawmna leh a hralhna lam tur buaipui mek a ni a. Winery tihlenna tur sum hmang hian Zem lian 10 lei belh leha Capacity quintal 3000 a tihlen tuma inbuatsaihna neih mek a ni.

Aside | Posted on by | Leave a comment

BSUP SATU HI KA LA DEM THO!

A SATU HI KA LA DEM THO!
(Thibeh lo thu)

Thil hi a hmun dik taka dah thlap hian sawisel tur a awm lo thin angin, helai durtlang BPL In chim chungchangah ngaihdan a tam hle mai.

Athenin khuarel chhiatna an ti a, athen in a satu. Engpawhnise, khuarel chhiatna chu ani tehmeuh mai. Mahse, uluk deuhvin heti zawng hian i han ngaihtuah chhin teh ang u.

He in sak dan method hi chu PHAI RAM HMUN ZAWL LEH LEI NGHET taka in sak dan a ni. Phai leh hmun zawl, lei ngheh na ah chuan tuman bankhur an lai kurh kurh ngai lo.?

Entirnan: Mizoram ah pawh Champhai zawl ah te, Bairabi ah te, Sairang tlawng kam phaizawl leh Sihhmui phei vel ah te chutiang chuan lo sa ta se, a awm viau mai.

Foundation an lai khuar a, beam an chhung kual leh a, a chungah in kha an chherchhuan chho mai thin. He methode hi phai ah chuan a hmantlak em em a ni.

MAHSE, MIZORAM A HMAN CHI ANI EM?

A ni dawn em ni? Kan ram lei hi a nghet lova, tin, lirnghing kawng ani bawk. Khatiang building sang leh lian tun er-ur nan chuan khatiang hmun awih leh lei nghet lo an thlang te, tlangram in sak anga bankhur Feet 6/7 a laih ni lova khatianga nghah top ang kha a fuh lo ani.

Ban khur a lo ber ah feet 7 tala laih ni ta se, a dung, avang ah ban 4 tal a ding tlar vek anga, a lai ah hmun engemaw zah ah a ding bawk ang a, a chhe kher ang em?

Chutiang zawng chuan han ngaihtuah chhin mah teh?

(Note: Khuarel chhiatna thil erawh engmah in a dang zo chuang lo tih erawh hre tel ila)

Dave Hamartia

Aside | Posted on by | Leave a comment

BSUP mawlh hi

June 19, 2015-a khatih laia UD&PA Minister Pu Zodintluanga’n Durtlanga BSUP complex a tlawh khan DIPR press release in a tarlan dan chuan “Leimin leh tuihawk avanga building thenkhat sak zawh mek metre thum laia a tlak hniam bakah luah ngam tur a nih dawnloh avangin thiah leh vek a ngaih tur thu” Minister khan a sawi a. “Nakin zel atan pawha tha thei ang ber tur ngaihtuah chunga sorkarin hmalak a nih laiin khawimaw lai fello leh khuarel chhiatna avanga harsatna te awm thei a nih avangin uluk taka enpui a ngaih bakah hemi ina a kaihhnawih sorkar department dangte nen pawh la enthata sawiho leh a ngaih bakah peihfel chian a nih hma in enpui fo a tul thu a sawi bawk” tih tarlan bawk a ni.BSUP chhiattawh chungchangah awmze neilova politics rilru chhia pu-a inpuhmawh kan awm hi a tha lova, Pu Zodintluanga tih chim ang maia sawi te pawh an awm hman hi a fello hle.Amaherawhchu, he press release-a kan hmuh anga Minister berin a ngaihpawimawh bawhzui a ni ta em? tih te hi Inquiry Committee din a nih hunah an zawh tur a ni ang. Tin, a mawhphurtu official ten an enpui fo em? tih te pawh an zawt ngei tur a ni ang. Pu Vanneihthanga Vanchhawng Special Report-a kan hmuh anga tui hna chatlo te hi an sak lai te khan an hria em? A hlauhawm thei nge thei lo tih te an ngaihtuah tel vek em? tih te pawh zawhna pawimawh tak a ni ang.Khawi laiah emaw khan “failure” lian tak chu a awm ngei a. A chhan tak hi kan hriat a tul hle a ni. Minister berin luah ngam a nih loh thu a sawi kha engvangin nge luah ngam tura a hawn leh si? tih te hi zawhna awm a ni ta a. Kan journalist ten a hunlaia mawhphurtute leh tuna a mawhphurtute hi an zim buai loh chuan Mizoramin kan lo hriatfo tawh thin angin a zuzi leh ang tih hi mi tam tak rindan a ni.I awih lo mai thei a, MNF leh Congress hi politics-ah hian han inbei kual vel angin lang thin mah se, a intichhe tawn tur tak tak chuan an che ngam ngai lo. Mipui ka a tawh lova, full and fair investigation hi kan phut tlat tur a ni ang.Engpawhnise, tun dinhmunah chuan a hre velo te chuan ngaihdan mak pui pui phei chu lo sawi tawh hrih lo ila. Sorkarin thil nihna chiang tak zir tur Inquiry Committee a din a, chu committee chuan hlauh leh duhsak neilova hna a thawha report rintlak a buatsaih I lo beisei ang u.Maṭana Pachuau

Aside | Posted on by | Leave a comment

A KAIKUANG MI CHI THUM (3) TE.

Mizoram ah hian zankhat thilthu emaw, thawk-leh-khata chenna IN leh neih zawng zawng chân ta vek hi chhungkaw tam tak kan awm ta.! Mitkhap kar leka kan beisei ngai miahloh tur han tawrh thut mai te hi rilru a va na duh dawn em..! ‘Khuarel chhiatna’ ti a kan puh tam takte hi fimkhur deuh thin ila zawng hetiang em em hian kan tuar lo deuh tur hi a nia le.

Neih zawng zawng baka pùk chawp tak meuh meuha kan sual chhuah ve, kan CHENNA IN te hi thawk-leh-khat, mit khap kar leka an ral vek ta mai thin hi a chhan bulber A KAIKUANG MI CHI THUM (3) TE chu heng te hi an ni a.

  1. GEOLOGIST : Ni e, Mizoram chhunga khua leh mihring te khawsakna hmun, IN kan sakna tam zawk hi awihpang deuh vek ti ila kan sawisual kher lo ang, kô/awih pang reng rengah lei a nghet mawh bika, gravity a nasat bawk a vangin IN SAK kan fimkhur hle tur a ni. Hetiang hmunhma nei leh IN SAK tumte chuan mithiam zawk leh hre zawk, leilung zirmi GEOLOGIST biak rawn nachang hriat hi a fin thlak khawp mai. Mizoram hi SEISMIC ZONE V ah (Lirnghing kalkawng leh a nghawng rapthlak ber) kan awm tihte hi hre kar teh ang u. Hetiang lama mithiam zawkte biak rawn emaw rawih nachang hrelo a, RISK la chunga IN SA thinte chuan buaina hi kan la tawk fo dawn a nih hi..!
  2. ENGINEER : A chunga kan sawi tak angin, Geologist ten IN SAK nana hmun him a ni e, an tih thlap hnu ah, (A himloh phei chuan sak loh mai tur lah ni.!) IN sak dan tur hawizawng leh a thut hmun turte, a ngheh dan turte, IN rihzawng tur leh Mixing Proportion te uluk taka buatsaih turin ENGINEER (Civil & Architect) te biak rawn a, an thurawn lak hram hram hi kan va mamawh em…! A bikin kan Aizawl khawpui leh a chhehvel ah hian in tihhmuh (Danin min phut vanga râwn satliah ni lo deuh hian) sup sup teh ang u. Mahni chhungkua pawh chen ngam lohna tur khawpa sumdâwng rilru pu chunga IN SAK leh ngawt zelte hi sim a va hun em.! Nunna, sum, hun leh tha a hek zozai emai. A tuartu tan lah a na bawk si. Kan dam chhung baka kan tu leh fate tana rotling leh rinawm tur hian eng vangin nge ruahmanna tha kan neih loh fo thin le.?

Aizawl khawpui bikah hian AMC chuan IN SA turte tan dan khawng tak leh tha tak a kalpui mek a, hei hi mipuite kan him tlanna tur leh kan society tan a tangkai em em a, AMC in a phut angin Engineer te ruahman dan leh an beisei angin In neitute zawk hian IN kan sa thin em tih lai hi thil vei awm tak a ni. Kan tana tha tur leh khuareia kan sawtpui tur thilte pawh hi a neitu leh a chhawr ber turte hian kan hlamchhiah ni hian an lang fo mai. Mak tak a ni..!

Bultan that hi a zahve zo kan ti thin a ni lawm ni.? Hawh u, ngaihtuahna fim hmang ngam ila, bul tan tha turin in sangmar phawt mai teh ang u.

  1. ELECTRICIAN : Mitkhap kar leka kan chenna IN leh kan rohlu tam takte meivapa chan tirtu chu ELECTRIC/CURRENT hi a ni.

Ni e, mi tam takin IN SAK chungchang kan ngaihtuah a, sum sen tur zat kan hisap hian, Electrification lam hi kan ngaihtuahna luahtu a ni lutuk lo fo. Hei hi a pawi takzet a, Inchhung bungrua tur mitthla chung hian, Electric vanga chhiatna kan tawh theih rapthlak zia hi kan chhut ngun ngai em.? Kan inchhung mamawh (Home appliances) zinga electric hmang chi te hi kan beisei aiin a chhe hma in a tlo lo fo thin em.? Langlo lam ah hian kan rinphak aia nasa fe hian; Sùm, hun leh tha tam tak hi kan khawhral hian ka van ring em..!

Ni e, electric hi nel sual awl tak a ni a, mi thenkhat phei chuan hlauh takte in an hlau bawk a, a hlauhawm lah tak a, hriatchian ngai leh chhût chhuah ngai a tam vang hian, RISK mai chi lah a ni heklo. Tualchher thiam leh a suih eng thiam nazawng te Electrical Installation emaw House Wiring ti tura kan ruai ngawt zelte hi kan huaisen thin mang e.! Zirna in leh khawi training Institution a tanga zir chhuak Electrician/electrical engineer pawh ni se, Sorkar (MELB) tanga exam hmachhawna pass chhuak, permit nei leh hnathawk tura phalna pekte chauh hi hnathawk turin ruai thin teh ang u. Inchhunga kan nitin mamawh leh kan bungrua (Home Appliances), current hmang chi te hi Voltage leh Ampere hrang theuh mamawh an ni fur, chung miltawk a electric current te hi supply pek tur an ni a, wire size leh a behbawm hmanraw hman turte hi a hrang veka awmze neia rem khawm tur a nih vangin uluk a ngai hle. Bulb/LED light te pawh watt hrang hrang a awm vek angin, kan hmanraw chi hrang hrangte mil tura wire hman tur lenzawng (size) te pawh hi hriat chian ngai tak a ni. Hetiang a nih vang hian current/electric hrechiang lo a House Wiring tih ve ngawt hi chhiatna bul a nih thin vangin dan pawhin a phal hauh lo. Chuvangin mipuite tana him leh hrisel taka hman tur Electric/current buatsaih sak leh siam sak hi Electrician te mawhphurhna a ni. Hengte a vang hian a zirchhuak nazawng tan pawh hnathawh ngawt hi danin a phal hauhlo mai. Chung zirchhuak te tan chuan Sorkar (MELB) pawhin exam leh interview buatsaih leh thlapin, chuta tanga pass chhuak te chauh chu Electrical Installation leh House Wiring ti thei turin permit an pe chhuak chauh thin. An thiamna miltawk leh an skills levels angin class hrang hrangah then sawm leh an ni a, khawih theih chin bituk siam sak vek an ni bawk a, Permit hi renew ve reng a ngai bawk. Mipuite hian kan dikna chanvo pawh hi kan hre lo niin a lang. (Mizoram bikah phei chuan mipui te hian electrician te hi permit/License an nei em tih lo ensak a, lo phut nachang pawh kan la hrelo). ‘Chu mi kha mi hmunah chuan ka zir chhuak a..’ an tih tawh chuan Electrical Installation leh House Wiring ti tur hian kan ring em em vek ringawt zel mai chu a nih hi. Heng vangte hian i neih hlutak kha, mitkhap kar lekin MEIVAP ah an chang mai thin. Mipuite pawh hian kan dikna hi hrechiang teh ang u. Hmabak hi a van la tam em..!

Engpawhnise, a chunga kan sawi, CHENNA IN kan chân fo chhan leh puhtur kan zawna kan rik hluai thin hian rilru in arbo a zawng a, rinthu kan sawi huai huai thin. A mawhphurtu ber, “A KAIKUANG MI CHI THUM (3) TE” khi uluk takin ngaihtuah la, fimkhur phah nan hmang teh ang u.

Aside | Posted on by | Leave a comment

BJP IN ILP MIN PAIHSAK AN TUM EM?

In lo chhiar tawh nge la chhiar lo ka hre chiah lova, he chanchin thar hi a pawimawh hle mai!

Thawhlehni khan Supreme Court chuan Delhi lama BJP hruaitu pakhat, ukil ni bawk, Ashwini Kumar Upadhyaya PIL chu a hnawl. He BJP ukil hian Nagaland-in Inner Line Permit an hman chu India ram constitution Article 14,15,19 leh 20 nena inmillo tiin a khing a. India khua leh tui ten ILP hmanna state-a an duh duha an lut theilo chu ngaimawhin PIL a thehlut a ni.

Ashwini Kumar-a hian Bengal Eastern Frontier Regulation, 1873 hmanga state in ILP a neih hi paih a duh a ni ber e.

Ashwini Kumar-a hi Hindu kulmuk, dan hmanga a theih anga Hindu-India agenda buaipuitu te zing ami a ni.
BJP hi a huangtau sawt viau. A lehpekah Mizorama ILP kan hman hi an rawn ngaimawh angem?

In hlauhsiak lam pawh nilovin an sorkar lai phei chuan an hlauhawm tak tak niin a lang!

A hnuaia link ah hian kimchang zawkin a chhiar theih ang.
https://www.livelaw.in/news-updates/sc-dismisses-plea-challenging-inner-line-permit–146030

Maṭana Pachuau

Aside | Posted on by | Leave a comment

ZUK LEH HMUAM TI LEH TI LO

ZUK LEH HMUAM TI LEH TI LO
David Sailo on 4th July

A ti lo ber hian heti zâwng rilru hi ka pu leh tlat pek a…
(Taksa hriselna in a zirloh vanga ti lo te dahtha ta ila)

ZUK LEH HMUAM TI MI –
Hetiang an tih miau avang hian an ri bawrh bawrh a, an thil phal duh viau, zuk leh hmuam te chu in theh mai mai thil a nih vang pawh a niang, mi an pe thang a, thilpek nun an keng nghal a, an nelawm duh phian. Kawm an nawm phah a, zuk leh hmuam tih suam suam paha inkawm hi chu a phelh pheng phung a, a nuam zaw phian ang. An rilru a zau deuh nge nge in a lang a, anmahni a titu an nih avangin midang hriatthiamna thui tak an nei duh. An uikawm lova, pawisa thuhnuaiah awm lovin zuk leh hmuam manah an in seng phal tlat thin.

Mipa chu eirawng pawh bawl suah suah thei, thlan laih nikhua pawha tlawmngai thei tak tak an ni duh viau a, pawh an awl hle zawkin a lang. Mi Lighter, sahdah in ban leh in dil chawt chawt an nih avang hian uikawm a thiang lo. Sahdah paihtlawrh, kuhva tui chhak tlawrh, tuibur pik puat thin an nih vangin an tenchhe lo tlangpui bawk. Programme rei tak an ngaithei lova, tawite, hlawhtling tak an duh thin, zuk leh hmuamin a tur thin avangin. Hmeichhia pawh hi an rilru a zau duh phian mai.

Heng timi te hian ei theih loh an nei mang lova, zuk leh hmuam ber an tih theih tlat avangin sa leh thil dangah ei insum vakna tur an nei lo, an vannei hle. Ka tui lo an ngaihtheih loh avangin an thaw uih ve hman meuh lo.

TI LO MI –
Ho lam taka mi han theh mai hi an tih than a ni ve lo a, an kawm duh phian. Thian ho a Restaurant a chawlhte hian an ipte a thuk bik riau thin. An uikawm avang hian an lei ve hauh loh zuk leh hmuam timi te sum hman thlengin an uipui hle thin. Midang hriatthiamna an nei tlem zawk a, midang zawng zawngin zuk an chak laiin anmahni pakhat vangin zu lo vek se tih hial an duh a, an insumtheihna chu midang hrekna hmanraw tha bera hman duh hial an awm thin.

An tenchhe duh tlangpui a, an chimlim duh hle bawk. Invawng viau e ti lovin an dam hlei thei lova, Nerve, Sugar etc an ti fo a, ei theih loh apui an ngah duh viau a, hmel fai vung si hian an tawp ru hle thin. Zialin a ur miah lohna, sahdah leh tuiburin hmun an chanlohna in chhung thianghlim takah na an sawi reng thin.

Ha var tha em em, Ulcer leh pum la chiangkuang lo an tam duh hle a, ka rim lam hlamchhiahte chu an thaw a rimchhe thei hle a, anmahni an inhre der lo!! An bula titi, zai leh awm hrim hrim hian pum a no nghulh thei thin. A ti mi te aiin ka rimtuina (Mouth Freshner) an ngaihpawimawh thiam a tul hle.

TLIPNA –
Zuk leh hmuam hi that lai hun, kum 50 vel thleng hi chuan sum kar lo lekin a tih barh barh theih a, kum upat hnuah a lang duh thung hle tih hriat a tha. A nghei/sim tur hian tawngtaia chunglam kar bur bur tulin a lang lova, theihna peksa kan ni. Chunglam hming lam lo hian vai ho hian an simin an ti lo nasa e mai.

“Tunlaiah zial zu mi aiin zu lo mi an hnawksak zawk tawh” an ti thin a, kan ti ve miah lo a nih pawha rilru zau put hi chu Mizo kan nih angin a tul ve tho mai.

Aside | Posted on by | Leave a comment

MI KUTTHLAK RAWNTU MAN

Aizawl Police aṭanga thu dawn danin, July 2, Thawhlehni zan dar 9:45 vel khan Lalngaizuala, Kawrtethawveng khua, tuna Republic Hmarvenga awm chu Republic Veng leh Venghlui inrìna Hmawngkai Tuikhur bulah sawisak rawn a ni a, damdawi-ina hruai ngai khawpin a hliam. Hemi chungchang hi police-te’n an chhui nghal a, sawisak rawntu mi pathum an man.

Lalngaizuala sawisak rawntu police-in an mante chu – Zonunsanga (25) s/o Michael Lalchuailova, Prince Lalrinkima (25) s/o Lalengkima leh Laltluangliana (23) s/o Lalnuntluanga, Venghlui, Aizawl vek an ni a; an pathum lakah hian Aizawl Police Station-ah thubuai ziah luh a ni.

Aizawl district police chuan, kut inthlak rawn reng reng an ngaih thutak thu tarlangin, “Thubuai siam zel tura hmalak tum a ni a, mi tin fimkhur turin kan inngen a ni. Criminal record neih hian thubuai neitu tan hna dilna leh a hma lam hun zelah harsatna a thlen theih avangin mi tin fimkhur turin kan inchah a ni,” an ti.

-Vanglaini

Aside | Posted on by | Leave a comment

MIRETHEI IN A AR KHAI LUTTU

MIRETHEI IN A AR KHAI LUTTU
Ziona Zahau

Pu Ramvela chu a thi ta a. A thihni chuan keipawh ka va kal ve a. An in chu in ropui a nilo a, hmana kan inkawm ve laia a sak ang reng khan ala awm a. Han en reng reng pawhin miropui an awmlo tih a hriat hle a ni. Mahse khawhar hnem tur a lo kal an tam a, mi tam tak lungchhe vankaiin an tap a. A tu leh fate lah thlamuanpuiawm khawp a tam anlo awmin, chhiat tawh a karah an vei suau suau hmuh chu a thlamuan thlak ang reng phian mai a.

Ka thutna atang chuan mi che vel en pah chuan nunhlui ka lo ngaihtuah mai mai a.

Pu Ramvela, kei chuan Rama tia ka koh thin nen hian tlangval lai atanga inkawm chho kan ni a. Thingtlang tlangval lehkha zir sanglo, taima ve tak kan ni dunin ka inhmu a, mi minhmuh dan chu ka hre lemlo. Nupui te nei chhoin kan khuaah chuan kan la khawsa dun zel a. Nupui te neih a han puitlin tak tak takah chuan mizia alo dang chho a, kei hian pawla inhman nuam ka ti a, mi biangbiak pawh ka thiam a, party ah te in hmang chhoin kan khuaah chuan pa lar ka ni chho ta mai a. A ni erawh mi tawng tam vaklo a ni a. Rual a kawm tamlo a. Hnathawh a peih rum rut a. Kan veng a pa pakhat ve mai a ni.

Kei chu ka sawi tak ang khan rual ka kawm zau a, mirilru sukthlek ka man chak em em mai bawk a. Kan khua a milian MLA leh officer lian tak tak an lo kal chang hian kan in hi innghah nan ber an hmang thin a. An haw dawn te hian ar hi duhsak lan tirnan ka hawn tir thin a. Hetia ka tih vang hian pekin lukhawng a nei an tih thin ang hian contract tenau eng eng emaw hi ka neih theih phah hle a. Bill lak dawn te hian lawmthu sawinan thil tha dang engemaw hi ka ken leh thin. Milian tam tak ka hmelhriat a, ka hlawk pui a, an ni pawhin engkawng emaw tal chuan min hlawk pui ve bawk a, chu chu hringnun hman dan tur ni hian ka hria a.

Ka thianpa Rama erawh chu a hringnun chhiar dan hi a dang deuh a. A thlirna kawng taka han thlir pui chuan titha ka ti ve tho a. Mahse ka ngaihdan takah chuan a â ni hian ka hria a. A ni chu lo nei a ei a zawn lai atang khan a thil phal em em mai a, a thlai thar phur a haw pah hian naupang berh deuh te fanghma pek te a ching a. A chawhmeh hawn lah thenawm te thar tem a uarin kan khua a hmeithai leh thawk mawh deuh ni a hriat ho hi a sem ve thin bawk a. Kei chuan khang kha sem loin zuar se ka ti thin.

A hnuah lo neih bansan chuangloin huan nghet te a nei a huan nghetah chuan sangha dil te a dah a. Khanghu leh balhla te a dah bawk a. Serthlum an chhungkaw ei tawk kung sawm vel a awm bawk a. Khanghu chu a eizawnna ber a ni a. Khanghu awmloh changin balhla leh a lo lam thlai hmangin sum ala lut thin. In lamah ran vulh a tui em em a. Vawk pahnih an kawl reng a, ar hi an ngah thei em em bawk thin. Sunday a piang hian a ar neih chu kan khua a harsa deuhinah a chawi lut thin a. Sa ei khat deuh ni a a hriat te inah a khai lut thin ni hian ka hria.

Vawi khat chu mirethei thil a pek thin chungchang chu ka sawi pui a. ‘Ar te hi i ngah si a, hetia mirethei ina khai lut renglo hian milian an lo kal chang te hian rawn khai lut ve thin la. I vawi khat khai luhnaah chuan an hrelo che a nih pawhin i vawi tam khai luh hnu chuan an hria ang che nga, i tan hlawkna ala tam dawn lutuk a nia’ tiin thurawn ka pe a. Mahse a ni chuan ‘mi hausa te chuan sa duhtawk a ei an nei a, mirethei leh sa ei tur neilo ten sa vawikhat ei an lo neih pawh kha thil hlu a ni zawk ngai e’ tiin min hnial fithla a.

Ka pa hnenah Rama nen kan inbiakna chu lungawilo zet hian ka hrilh a. ‘Milian te ar leh thil dang pe ve thin se chuan thil tam tak ka sawipui thei anga, keimah kaltlang pawhin hlawkna a neih tam dawn tehlul nen’ tiin ka vui hial a. Mahse ka pa chuan ‘lo ngai reng rawh, mihausate in a ar khai lut lo a, miretheite in a ar khai lut tu hi a nihlawh zawkah ala tang dawn a nia, nangpawhin a hnen atang hian thil zir rawh’ tiin min khak ta zek a. Mahse ka pa sawi leh ka thianpa rilru put hmang chu ka pawm zawng a nilo ve ve.

Ka thianpa Rama nen chuan fate kan nei a, kan fate an puitling chho ta zel a. Kei chuan kan khawsak a harsatloh avangin phaiah te sikul ka kal tir a, lehkha zir sang tak tak an rawn ni chho a. Ka hmelhriat te a zarah an tihpui nain sawrkar hna an phak ang tawk tawk an nei chho a. Kan khua chhuahsanin khawpui lamah ka inbengbel ta hial a. Khatih lai kha chuan ka nun hi a nuam a ni.

Rama erawh hnathawkin a fate a chawm a, lehkha pawh Aizawlah an zir a. Zirsang tur khawpin sum an neilo a. Zir sang em em pawh an awmlo. Mahse a huan lamah erawh malsawmna a dawng hle a. Huan lian tak a nei tawh a. A huan atanga a thar chhuah chu kan khaw sawrkar hnathawk ho hlawh tluk zet a tam a ni ve hial a. Mahse, mirethei leh harsa te thil pek a bansan lo a. Kan khaw dai pitar Thiangi phei kha chu Pu Rama ar eizo tu an tih hial khawp a ar a talh sak ngun kha a ni a. A thih thleng khan thil tam tak a tihsak a. Pitar leh a fapa tlangval chauh a awm kha an ni a. A fapain hnathawh angai si a, a thawmhnaw suk ngai ang ang te pu Rama te chhung hian an suk sak thin. Hmeithai ten an mangang huna buhfai an puk ngamna ber in chu pu Rama te in hi a ni bawk a. Pu Rama te thil neih chu mirethei ho ta a ni vek mai thin a ni. An thiltha tih zawng zawng hi ka hriatpuilo a, ka hriatpui chinpawh sawi zawhsenloh khawp a tam a ni hial ang.

Ka faten nupui pasal an neia, kei hnathawk theilo in ka silawng chho ta a. Ka nun nuam tak thin kha ka faten nupui pasal an neih takah chuan alo inthlak a. Ka mo te nen kan inngeihlo chho a. Ka fapa te lahin an nupui te an hlau si. Ka thu a lal talo. A hrehawm ka ti a. Makpa te ina han awm lah a chi ka ti silo. Kan khua chu ka ngai thin em em mai a. Ka han haw ta fo a. Ka han haw chang chuan pu Rama chu kan khawtlangah zah a kai tawh hle tih ka han hmu thin a. Khawtlangah nihna engmah ala chelh duh chuanglo ta fan a. Mahse mi ho chuan an titi na atang kan khaw paah an zah ber a ni tih ka hrethei. A fate lah sawrkar hnathawk awm miahlo mahse an inchawm zo vek a. A mo te lahin amah an zah si a. A rorel leh athurin chu tuman an hnial ngamlo tih alang reng a. A fate pawh chuan inhrang an chan hnuah mirethei puih an bansan lo a. Pawisa tam puia vur na tur nei biklo mahse sunday a sa hmeh tur an pek te, naupang pen leh pencil leisak mai mai te thleng a a neilo zawk te puih zel an chin thin chu an bansan lo.

Ka ngaihtuah chiang a, hausa pui nilo mahse an chhungkua an pung chak em em mai a, an hrisel hlawm a. Rualbanlo leh piangsual an awmlo a. Mi ban ngai khawp a rethei lah an awm heklo. Chhungkaw inhauh buaih buaih an nei ngailo a. A upa a piang an zah mai thin. Hetiang chhungkaw din hi a harsa hle a ni tih ka chiang emem mai a. Chuvang chuan khawvel hausakna lamah malsawmna a vurin awmlo mahse kawng dangah malsawmna an dawng nasa hle a ni tih ka man thiam ta a. Kei helei hausakna a vur a, nun chhungril hlimlo ai chuan an nun a nuam ta daih a ni tih ka hrethiam thei ta a.

Tunah pawh hian boral hmasaah tang ta mahse ka la awt zawk ta tho tho a. Pathianin a bula cheng tawh turin a duh lutuk anga, a la chho hma a nih ka ring tlat a. Pian nawn leh theih nise amah ang hian ‘mirethei ina ar khai lut thin tu’ ti a mite hriat lar nih ve ngei hi ka tum ngei ang.

“Mi hausa te ina ar khai lut thin ai chuan mirethei te ina ar khai lut thin tu chu van hian mal a sawm ngei ang”

Aside | Posted on by | Tagged , , | Leave a comment

BSUP BUILDING CHIM HI

ZONET ka Interview ah heng Building him loh zia hi ka lo sawi lawk tawha, ka Interview en chuan inhre mai thei,Action lakzui a awm lova tun hi a thleng ta, țawng chhuah leh ngaiin ka hria..Building awmna leh achhakah leimin na chhip/ Crown ațang khian en ula In dinglai leh Soil/Debris/Rock Slide ,lei tawlh khi a inhlat lo, pressure a na thei lova, Building leh Slide inkar ah Gap a awmlo, Load/Volume a na loh tih a chiang. Heti khopa Building lian leh ţha thar bawk si chuan dawl zo tura ngaih a ni a, Foundation chhete pawh a awmlo em ni..?Building thlanga Kawngpui awmin Road cutting a ni a, Laipuitlang incident ang chiah kha a ni. Neglegent vang,fimkhur loh vang liau a ni a, Natural Calamitist ani lo. Durtlang chauh a nilo, Lawipu Mirethei chenna in sak poh khu a hmun ngeiah ka en tawh a, Building sak a ţha lova, khi a awn nual. A bul hnai te ah Quarry nei an awm nual. Bomb hmanga Mine a ni a, Building a nghawr dur2 thei. Building țhenkhat khu Evacuate a, Thawmţhat a nih loh chuan Durtlang ang chiah hi a hmachhawn dawn.Quarry khu sawrkar in titawp emaw en țha leh rawh se.
Building sak hma hian tu nge Geotechnical Investegation ti? DPR in a phut ngei awm sia? Investigation ti lova sak a nih phei chuan hrem ngai an awm ngei e.Detail enquiry ngaichang ang.Zela Ralte

Aside | Posted on by | Leave a comment