House ah Bru raltlante laklet tum dan sawifiah a ni

  • Bru raltlan awm zat
  • Electoral Roll a Bru raltlan awm zat
  • Bru raltlante awmna tura ruahman
  • Bru raltlante vanga sum hman ral zat tur

Mizoram Legislative Assembly neih mekah Aizawl West II Bialtu Pu Laruatkima zawhna Home Minister Pu R.Lalzirliana’na chhanna-ah Refugee Camp hrang hranga Bru awm zat chu 5407 an ni a, Mizoram Electoral Roll a hming chuang zat chu 10052 an nih thu a sawi.

Pu R.Lalzirliana chuan Bru raltlan lo kir duhte tan Ministry of Home Affairs remtihna angin ruahmanna siam a ni a, chung zingah chuan Housing and Cash Assistance chhungtin hnenah cheng 1,30,000, thla tin chhungtin tan cheng 5000 kum hnih chhung, Kum 2 chhung vek Ration a thlawna a dawn, inchhung bungrua leh blanket chhungtin tan cheng 3500 hu leh in hmun pek tiam an nih thu a sawi bawk a. Rawn kir duh te chu Mamit District-a khaw 48-a awm hmun siam sak, Lunglei District-a khaw 4 ah, Kolasib District-a khaw 10-ah dah tura ruahmanna siam a ni bawk a.

Bru, Mizoram mi leh sa dik tak lak kirna tur hian Road Map pali siam a nih thu leh, Road Map 3-a sum hmuh chu hman a ni tawh a, Road Map 4-na atanga hian cheng Vbc 4.7 leh cheng Vbc 5 te chu inpuahchah nan hman then a nih tawh thua sawi a ni.

Advertisements
Aside | Posted on by | Tagged , | Leave a comment

Central Board of Secondary Education (CBSE) exam zawhna puhruk chungchangah KS Rana an suspend.

CBSE zawhna puhruk chungchangah an hotu pakhat KS Rana chu ahna atangin an chawlhtir lailawk ta. KS Rana suspend a nih chhan hi examination centre a vilnaah a inthlahdul hle tih hriatchhuah a nih vang a ni.

School Education Secretary Anil Swarup-a sawi danin, pawl 12 Economics paper zawhna puhruk chungchang chhuinaah Delhi Police-te chuan zirtirtu 2 leh coaching centre-a zirtirtu 1an man a, Board-in he thil a chhuinaah hian KS Rana hi hrem ani ta a.

Human Resources Development Minister Prakash Javadekar-a’n he thila mawhphurtu chunga hremna lek tura a lo tih tawh angin Board chuan KS Rana hi a suspend ta tih Swarup-a chuan a sawi a ni.

Puan tawh angin, CBSE exam zawhna puhruk chungchangah hian nimin khan Delhi Police-te chuan mi 3-te hi an man a. Nimin la la khan court-ah hruai an ni.

Pawl 12 Economics paper zawhna chu exam tan a nih hma minute 40 velah zirtirtu 2-te hian an tiputru a, coaching centre-a tutor hnenah hian whatsapp hmangin an thawn a, ani chuan zirlaite hnenah a lo thawn darh ve leh ta a ni tih Joint Commissioner of Police, (Crime Branch), Alok Kumar-a chuan a sawi a ni.

Source: (AIR)

Aside | Posted on by | Tagged , , , | Leave a comment

VAIRAM DOCTOR LEH MIZORAM DOCTOR

“Gauhati ah in checkup in ka kal e,” ka ti a. Doctor chi hrang pathum ka rawn a, pakhat ka pan phawt a, midang hnenah min refer zel bawk a, ka mi rawn apiangin damdawi emaw chawh mai duh lovin Nithum chhung chu test chi hrang hrang ka bei ta.

Gauhati Doctor hi ka pan fova, Super Specialist hlir ka pan bawk a. Mizoram nen khaikhinin an thiam vak lo ni ta berin ka hria.

Mizoram Doctor chu an room kan lut chiah sentense nga vel kan natna kan sawi chuan lehkhapuan khatin Damdawi an tlar nghal thei a, kan past history lam pawh hrilh vak leh hriat vak tul pawh an ti lem lo niin ka hria. Kan Doctor ho hi an fakawm, an huaisen, an risk huai.. mi zai pawh surgeon kher pawh kan mamawh lem lo a ang, a rem rem leh tlawmngai thei thei in mi an zai awn awn a, an ti fuh phian a, mipui pawhin kan fak hle zel bawk a. Lo thi palh an awm chuan an taksa chhung chhiat nasat tawh an hawn zet hnuah eye experienced an hmang tangkai thiam hle bawk.

Gauhati doctor super specialist ho hi an dawi vang nge an fimkhur vang ka hre lo. Vawi 2/3 hmuh an ngai a, test report tel lo chuan damdawi mumkhat min ziahsak duh lo zui. Ka han chik deuh a, an nep ka tih leh pakhat chu an hun zawng zawng kha damdawi in ah an hmang full thak a nih hmel.. NGO leh Kohhran ah an mamawh dawn tehreng nen.

Test tam fe ka tih hnu ah, uluk taka engkim min hrilhfiah hnuah damdawi chi 3 chauh min chawh a nih chu… An thiam lo deuh zawk tlatin ka hria. Mizoram doctor hi an lo thiam in, an lo huaisen zawk nge nge a nih dawn hi tiin ka ngaihtuah neuh neuh a.”

HC Lalmalsawma Zasai


Aside | Posted on by | Leave a comment

A RANG THEI ANG BER A KA ZAWH LOH CHUAN TRANSFER AH MIN VAU RENG :JE

Lunglei Țhalai Pawl chuan thuchhuah siamin Pukpui leh Tlawng inkar kawng siam chhe lutuk  chungchang a hma an lak meknaah hian Lunglei mipuite thinlung leh sum leh paia thlâwpna an dawn avangin lawmthu  an sawi a.

Dt:25.3.2018 a kawng siam țhat loh zia hmuhchhuah leh bawhzui a nih dan ah thu hrang hrang a tam hle a, Lunglei Thalai Pawl chuan thil awmdan mipuite hnena puan chhuah tha a ti a, hetiang hi thil awmdan a ni.

Dt:25.3.2018 khan Pukpui ram, Tuidumte Lui chhuah a PWD kawng siam zawh tawh chu  kut lawng pawha awlsam taka khawh theih khawp a chhia a ni tih  hmuhchhuah a ni a. Chumi boruak kal zelah Lunglei Thalai Pawl chuan Dt 26.3.2018 ah ‘kawng siam țha tawk lo Tihchhiat hnatlang’ a ko a. He hnatlang ah hian Pukpui leh Tlawng inkar a PWD in a thawh chin te enfiah niin hmun tam tak ah kawng siam zawh tawh ni si, kut lâwng a awlsam taka khawh theih hmuhchhuah belh a ni a. Heng zawng zawng hi a thlâ lâk vek a nih bakah video record pawh neih vek a ni. Hemi chungchanga a changtu Minister Pu Lal Thanzara’n House ah meuh”LTP ten a chhe lai tlemte, an hmu fuh”a ti hi Chhim mipuite min hmusit na tawp ah kan ngaia, mahni chanvo hneh lo lutuk Minister hi bang ngei turin LTP chuan a phut tlat a ni.

He kawng siam chungchang ah hian Lunglei Țhalai Pawlin nawr hmanhmawh ang leh mipuite dinhmun ngaihtuah lek lo a total road block nei tura Lunglei SP nawr anga puhna thawm te a awm a. LȚP chuan kawng hi țha se tih a duh ber a, a țhatna tur a nih chuan hna pawh muang deuh mah se pawi a ti lo hial zâwk a, April 15 2018 hma ngeiin kan MLA ten helai kawng siam a nih theih nan hian hma min lakpui tura intiam turin hming kan sign tir mai a ni.  Tin total road block chungchang ah hian E in C in Dt. 21/02/2018 (memo no A-33023/71/16/EC-PWD/66A) khan total road block neih tur tiin thuchhuah a siam a mahse LTP chuan, mipuite dinhmun ngaihtuahin Total road block hi tha a ti lova, joint meeting ah LMV chin tan 6:00pm to 8:00am hawn nise tiin rawtna SP hnen ah a thlen zawk a ni.
Hemi chungchang ah hian LDCC leh PWD Staff Welfare Asst Lunglei ten LTP in Lunglei an hmangaih avanga hma an lak na te an hahpui zia te,ngaihtuah miah lo leh thudik pawh tan ngam lo khawp a, an Pu te thlavang hauh zawnga  thuchhuah an siam ta mai hi LTP chuan mak a ti hle a, ngaihthiam har a ti takzet a ni. LTP chuan LDCC leh PWD Staff Welfare Asst Lunglei te hian, ‘ Lunglei an hmangaih ve em?’ tih a zawt a ni.

Hetihlai hian Dt 26.3.2018 tlai a Sub Hqrs YMA, ZDU, SP, SDPO leh LTP te DC Chamber a meeting ah Lunglei SP in kawng viltu JE ( Pu. Rongurliana) a biakna a JE thusawi, “Pu.C.Lalchhuana SE, PWD Lunglei Circle hian ,’ a rang thei ang bera ka zawh loh chuan transfer ah min vau reng a, kan hmanhmawh na lamah hmun thenkhat ah kan lo uluk seng lo a ni” a tih chu sawi chhuah a ni a. Kalkhâwm te rilru a na hle a ni. Hetiang a thuneihna hman sual chîng Officer hi Lunglei ah tumah awm tawh lo se tih hi Lunglei Țhalai Pawl duhdan a ni. An lo la awm a, hriatchhuah an nih chuan Lunglei Thalai Pawl chuan a țul angin an chungah hma a la zel dawn a ni.

Lunglei Thalai Pawl hi Lunglei țhatna tur leh hmasawn na tur liau liau a din a nih angin Lunglei tâna țha lo chu eng thil pawh a dodal zel ang. Hemi atan hian Lunglei neitu thinlung pu, Lunglei țhatna tura thâ leh zung sêng ngam te chu lãwm tak in LTP chuan a welcome reng a ni.

Author : Sl Chhunga

Aside | Posted on by | Tagged , , , | Leave a comment

CHINA CHUAN KM 2 A HLAA MI THOSI TIHLUM THEI MILITARY RADAR TECHNOLOGY SIAM

China chuan ‘super-sensitive radar technology’ km 2 a hlaa thosi pakhat awm pawh chhui chhuaka tihlum thei tur an siam mek!

Chinese news outlet lamin an tar lan dan in ‘radar’ a ‘prototype’ an dah thosi zawng chhuaktu chu defence laboratory, Beijing Institute of Technology (BIT) ah an enchhin mek a. Hei hi hmelma, mihring emaw ralthuam emaw lam chhui chhuahna tur lovin thosi thah nan liau liauva hman tur a ni an ti.

Senior researcher, he project a thawk chuan thosi ang tiat lek chhui chhuaka finfiah theih hi science lamah chuan phuahchawp thil satliah mai a ni lo va, he technology hi laboratory a enchhinna atangin hman theih turin kan la chhuak tep tawh a, kan tum anga hman tlak a nih chuan mi maktaduai tam tak thosi avanga natna kai theih, sikserh, zika virus leh thil dang lakah kan chhan chhuak thei dawn a ni a ti.

Author : Saihmingliana Sailo

Aside | Posted on by | Tagged , | Leave a comment

QUALIFIED/TRAINED CHAUH LAK AN NIH THEIH NAN B.Ed SERVICE TRAINED ASSOCIATION DIN A NI

Kan ramah zirtirtu turin Qualified/Trained Teacher chauh lak an nih theih nana hma la turin Mizoram B.Ed Pre-Service Trained Association din a ni.

He pawl thar hian thuchhuah siamin tun hnaia Govt. Adhoc Aided High School-a zirtirtu lakah dan bawhchhia a thil tih a awm tih an hriatin pawi an tih takzet thu an tarlang a. “Sorkar hnuaia zirtirtu lakna reng rengah dan ang taka thil ti turin thuneitute kan ngen a ni” an ti. Dan lo anga zirtirtu lak hi sut leh turin thuneitute an ngen thu an thuchhuahah chuan an tarlang bawk.

An thuchhuahah chuan – “IASE-a B.Ed Multimode Programme kalpui mek hi Sorkar H/S leh HSS-a zirtirtu ni mek, kum 2015 hma lama lut, B.Ed la nei lo tana buatsaih a nih laiin, Govt. H/S leh HSS a zirtirtu ni lo leh 2015 hnu lama lut si training an awm hi kan dem takzet a. Dan bawhchhiaa B.Ed zir leh hna lak reng reng theihtawp chhuahin kan do zel dawn tih hi Mizoram Sorkar leh mipuite kan hriattir bawk a ni” tiin an tarlang bawk.

Aside | Posted on by | Tagged , | Leave a comment

ISIS LAKA AN ZALEN HNUAH IRAQI KRISTIAN TEN EASTER SUNDAY HMANG VELEH TA

  1. Ram bumroa kristian awm te an zalen tan ta.
  2. ISIS te karah pawh zam lova rinna vuantu te chu.

Islamic State firfiak pawl laka an zalen tak hnuin Ninevi phaizawla khaw pakhat, Qaraqosh khuaah chuan Kristian ten a vawikhat nan Easter Sunday an hmang veleh ta.

Christian ministry, Open Doors chuan kumli kaltaa ISIS ho vanga loh theih lohva he Kristian khaw tlanchhuahsantu zinga mi Anis Behnam, 58- university-a zirtirtu ni thin an kawmnaah he thu lawmawm tak hi hriat a ni a. Behnam chuan vawiin Sunday hi Qaraqosh khaw tan Easter kan lawm leh ni hmasa ber a ni a ti. Tunhma chuan Qaraqosh khua hi Iraq ah chuan Kristiante khaw lian ber a ni thin.

Tihhlum leh tihduhdahna nasa tak kan tuar avang khan Isua thawhlehna niah hian nun thar neih leh kan duh a, beiseina sang tak kan nei. Lalpa a tho leh ang khan Krista nen nun thara khawsak hi kan duh dan a ni a ti.

Kum 2014 khan ISIS firfiak pawlte hian tihluihnain Kristiante chu Islam a an inleh loh chuan chhiah tam tak chawitir an nih tur thu leh chu chu an duh loh chuan thah an nih tur thu an lo hrilh avang khan loh theih lohvin an khua chu an chhuahsan hlawm a.

Tunah chuan Mosul khawpui leh a chhehvel Ninevi phaizawl te chu ISIS lakah an lo zalen ve ta a, zawi zawiin in te sain an pianna ram leh khuaah chuan an inbengbel leh tan tan a ni.

Behnam chuan ISIS ho an chet hma kha chuan Qaraqosh ah hian Kristian 50,000 zet kan awm ve a, tunah chuan a zatve, 25,000 chauh te chu kan kir leh thei a, 1,000 chauh emaw pawh ni ila hetah hian kan cheng leh dawn a ni. Kei chuan heta kumkhuaa chen hi ka duh dan a ni a ti.

ISIS te vangin kan khua hian kum 3 chhung ngaihsak a hlawh thei lo va, in tam tak tihchhiain an hal a. Tunah chuan kan in te sak that kan tum leh mek hlawm a, he hmun hi ka nun tam ber hmanna hmun, ka seilenna a ni a, ka hmangaih a ni, chuvangin ka kir leh lo thei lo a ni a ti bawk.

Behnam chuan khawvel puma Kristian te chu taksa, rilru leh thlarauva nun thar an neih leh theihnan leh him leh thlamuangtaka an ram ngeia an khawsak theihnan tawngtaipui turin min sawm a ni.

Open Doors chuan a hmain Ninevi phaizawla in 678 chu cheithat a nih leh tawh thu leh Qaraqosh khaw bikah hian in 286 sak that a nih thu an lo sawi tawh a.

Qaraqosh khuaah hian Lalpan thil ropui tak a tihsak mek a, dawr te, restaurant te an hawng leh ta a, naupangte nitinin bus khatin Mosul a sikul kal turin an chuang leh ta. Asuria khawpui Baghdeda lamah pawh Kristian kir leh an pung zel bawk.

Open Doors leh a thawhpui pawl dangte hian Ninevi phaizawlah hian in dang 392 sak belh hna an kalpui chho mek a, chhungkaw 700 chenna tur daih in neih an beisei thar leh bawk.

US Vice President Mike Pence khan nikum October thla khan United States sawrkarin ) tuar Iraqi kristiante hi tanpui an nih tur thu a lo puang tawh bawk a, tunah hian Ninevi phaizawlah Trump-a sawrkar chuan concrete step te an siam mek bawk a, Kristiante khawpui ram tawh chu an dinthar leh mek a ni. Hemi atan hian U.S. Agency for International Development chuan U.N. Development Program Funding Facility for Stabilization, Iraq hnenah $ maktaduai 75 a pe tawh nghe nghe a ni.

Author : Saihmingliana Sailo

Aside | Posted on by | Tagged , , , | Leave a comment

Mizoram ah HIV vangin mi 322 zet an thi

  1. HIV vangin nitin mizoramah an thi
  2. HIV vanga thi zat
  3. HIV hmuh ṭan kum
  4. HIV test tawh zat

Mizoram Legislative Assembly neih mekah Aizawl West II Bialtu Pu Lalruatkima zawhna Health Minister Pu Lalthanzara’n a chhanna-ah HIV/AIDS avangin Mizoramah tun Sorkar Kum, 2017-2018 chhung khan mi 322 an thi tawh tih House a hrilh.

Health Minister in HIV/AIDS avanga thi zat a sawi hi kum January thlenga mi a nih avangin thla hnih a la kim lova, ni 316 chaih a ni. chuti chung chuan chhinchhiah chinah nikum leh kum hmasa aiin HIV/AIDS vanga thi hi an tam zawk a.
Kum 2015-2016 khan HIV/AIDS vanga thi mi 139 Mizoramah an awm a,
kum 2016-2017 khan mi 225 an thi a ni.

Health Minister chhanna atanga a lan danin, kum 2013 atanga January 2018 HIV/AIDS vanga thi mi 1662 an thi tawh a. kum 2013-14 atanga 2017-18 (2017 December thleng) khan MSACS hnuaiah thisen 317356 endik a ni a, chung zinga 7641 chu HIV Positive an ni.

Mizoram-ah hian kum 1990 October khan HIC Positive an awm tih hmuh chhuah a ni a, tun hnai kum hnih chhung khan a darh nasa hle a ngaih a ni. (AIR)

Aside | Posted on by | Tagged , , | Leave a comment

KUM THUM CHHUNGIN POLICE SILAI BO 6 AWM, SILAI LICENSE NEI 21,159 AWM

     

  • Mizorama silai awm zat.
  •  

  • Police silai bo zat.

Home Minister Pu R. Lalzirliana chuan tun hnai kum thumah Police etc. silai bo 6 a awm tih House hrilhin, tun dinhmunah Arms License nei mi 21,159 an awm tih House a hrilh bawk.

Assembly Sessionah ziaka zawhna chhan chi-ah MNF member Lalruatkima zawhna, Home Minister Pu R Lalzirliana chhanna atanga a lan danin, MizoramA Arms License te hi permissible Arms License a ni a, chungte chu Rifle (NPB), Shotgun (BL/ML), handgun (Revolver/Pistol) (NPB), 12 Bore (SBBL/DBBL), .22 Maniature a ni tlangpui.

Restricted Arms License chu Mizoram sorkar pek theih a ni loh thu Home Minister chhannaah chuan tarlan niin, Ministry of Home Affairs in a pek thin a nih avangin Mizoram sorkarin record a nei lo tih ziaka chhan a ni.
Police etc. te silai bo a awm em? A awm chuan engtikah nge a bo? Eng silai te nge bo? tih zawhna chu Police etc. te silai chu kum 2014 ah 4, kum 2016 ah 1 leh 2017 ah 1 a bo va, silai bo te hi 9mm Pistol, Glock Pistol, INSAS Rifle leh AK 47 te a nih thu Home Minister chhanna ah chuan tarlan a ni bawk.

Home Minister chhannaah chuan, kum 2012-2018 chhungin Aizawl district-ah silai chi hrang hrang 725 register a awm tih tarlan niin, Serchhip district ah 27, Lunglei district-ah 16, Kolasib district ah 118, Lawngtlai district 810, Siha district-ah 113, Champhai district ah 90
leh Mamit district 426 a awm tih tarlan a ni.

Aside | Posted on by | Tagged , , | Leave a comment

Khawiah nge kohhran inunauna chu! by Lalremliana Pachuau

Kan kohhran sawihona hmun pakhat hian tun hnaiah Presbyterian tlangvalin nupui a nei dawn a. A nupuia ţhian kha Baptist lam anih avangin ţhianah hman a rem loh thu an Pastor-in a lo hrilh a.An han sawi thlak tak zelah chuan keini lam Pastor ţhenkhat pawhin hetianga inneihtir an neih thu sawi a awm zauh bawk a! Rev Vanlalzuatate thusawi leh an Pastor thiltih hian huang khat an dai lo chiang hle!

Kan inpalaitawn leh ta tih mek laiin inneih ţhian thu hla mai maiah pawh kohhran bil kan han la vâwng ta mai hi chu a Lal Isua zia lo hi ka va han ti tak. An han sawi zui zelnaah Presbyterian unau lam khaipa deuh an va zawt a.

Ani pawhin mimal ngaihdan an kalpui ţhin pawi a tih thu leh an dân hman mek a rawn thawn an tarlang tel bawk a. Ni, kohhran inunauna hi kan tun lai pastor naupang, Mizo ze mawi hre mang loho vang hian a chhe thui zel ang tih hlauhawm tak a ni!

Mo ţhian atâna kohhran bik kohhran bik tihna ramah kan chan mai zawngin kan biak Pathian hi kan hre lo hulhual tihnaa ni ang. Kan khawvel tawh hle tihna a ni bawk ang. Presbyterian leh Baptist hi bible-ah i kir ngam teh ang u. Zahthlak zozai êm mai.

Aside | Posted on by | Tagged , | Leave a comment