MMA india champion Mizo chu Silver medal an pe

Tunlai hian Mixed Martial Arts-ah India ram aiawha chhuak tur thlanna, National Champion Bangalore-ah neih mek a ni a.

He intihsiaknaah hian Kawrtethawveng tlangval PMS Dawngliana chuan vawiin, 27th. August. 2017 hian a zawnin mi 5 a khel a, a chak fai vek a, a ropui hle mai.

Hetih lai hian an inbeih hnuhnung ber zanin 27th. August. Sunday Dar 11:00 Pm khan an zo chiah a. A ma țawngkam ngei hian a fiah ber awm e.

“Chakah min puang vek tawh a, ban pawh min phartir vek tawh a, mahse lehlam in an Complain a, khelh țhat tir leh turin min ti a, ka chak tawh a lawm tiin ka khel duh tawh rih lova, kan thlenna lampanin kan haw mek” tiin Pathianmalsawmdawngliana chuan a sawi.

Tunah hian lawmman, Medal semna hun an hmang mek a, Final-a a chak lo zawk vai pa hnenah hian GOLD MEDAL hlan a ni a, India ram puma Champion zawk Mizo tlangval erawh kut bengin a awm a ta a nih chu!!

Advertisements
Aside | Posted on by | Tagged , | Leave a comment

CHAWM BAWK, HAWP BAWK,BAR BAW BAWK, PAL BAW BAWK TEHO HI by Lalmanzuala

•Contract inpek dan diklo a tam.
• NECS contract hmuh dan a diklo.

Tun hma aţang khan PWD hi corruption khurpui tih a ni ţhin a. Specifications anga thawh chuan kawngte hi kum 10 – 15 daih tur a ni a.

Cement Concrete building-te hian kum 100 vel daih tura ngaih a ni. Contractor-te hian 10% vel hlêp tura ngaih an ni a. Kawng te hian kum khat êm pawh an daih ţhin si lohah leh building-te pawh kum 15-20 vela sak ţhat an ngaih fo ţhin si-ah chuan chuan 90% chu kawng siamna lovah leh in sakna tur lohah a kal ta ţhin ni-a kan ngaih thu te pawh kan sawi ţhin. Kan CM te berina PWD kum 30 chuang an enkawl hnu-a kawngte chu a chhe tawlh tawlh zawk mai hian ngaih a tiţha lovin, hriatthiam a har tak meuh a ni.

PWD-a thawkte chu a tê ber aţanga a lian ber thlengin an sawrkar hnathawhpuite aia khawsa thei zawk deuh veka ngaih an ni a.Contractor-tehian manţang mawi tâwk an pe ngei ni-a tlang ngaih a ni. A tê ber pawh an hna endiktu an nih avangin contractor-ten hlauh ena an en deuh vek an ni a. An hlauh chhan chu an hnathawh ţha tâwk lo, a nihna anga an report hlauh vang ni ngeia ngaih a ni.

Contractor-in 80-90% hnathawh nana a hmana 10% a hlêp chuan eizawnna tling chu a ni ngei a, mahse, hausak vak theihna a ni lo. PWD-a thawkte ang bawk emaw an ai mahahausa an nih deuh vek si chuan pawisa a hmanna tura an hman loh, an kuta awm ta chu a tam tham viau tihna a ni ngei ang. Chuvangin PWD hnaa inhnamhnawihte chu an hausa deuh vek a, an hnathawh chhiat chu mipuiin kan lo tuar ta ţhin a ni. PWD lam pum chu “Public Waste Department” an lo tih ţhin kha a dik chho zel a, a dik zual tawlh tawlh a ni.

Tun hnaiah hian Consultancy Services leh Contractor chi(breed) thar, North East Consultancy Services, a neitu Robert Romawia Royte a rawn awm a. Amah ngeiina a insawi dan leh a intlangzarh angin Detailed Project Report(DPR) ‘siam thiam riau bîk’ leh hna hmu thei bîk riau a ni a. A thiam thil hi SSA-a a awm lai aţangin a hmang ţan a. Kum 2009-a CM tharin an hnathawh tih ţhat leh vek ngai khawpa tawphnawk lutuk ti-a a puanzar chu thla 6 emaw vel hnu-ah hnathawh ţha leh entawntlak ti-a a puanzar leh tâk daih kha a thiam thil a hman ţanna-a ngaih a ni. Zawlnuam High School-a a thawh laia pawisa bo chungchanga mawhphurtu a nihna aţanga ‘tactic’ dangdai taka a inthiar fihlim thei kha chu thu dang ni se.

Chief Minister tharin SSA hna lâk dan chu cancel-a tihţhat leh vek ngai ti-a a puanzar atanga thla ruk vel chauha an tihdan chu felfai leh entawntlak ti-a an puanzar leh tâk mai aţang khan a thiam thil a hman thiamzia chu a lang ţan a.

Hetih hma deuh pawh hian a pian leh seilena ram atanga thlai leh thei/thing tiak la-a ‘hlawk’ taka hralh chhawn dan alo thiam tawh a. Vanglaini chanchinbu-ah te hial pawh a ‘bill lak dan mak’ chungchang an chhuah a ni. SSA thila chhungkhat hnaite motor man to taka hire dan te pawh a lo chawk chhuak tawh a ni.

A thiam thil hmang turin Corruption thila a sûlsutu Kristian ram, Nagaland a va pan a. Awlsam takin lawmmanah Cheng Vaibelchhe Nga leh a Chanve zet chu a va dawng mai a. A sum hmuh tam tham tak aţang a, sawma pakhat, nuai 30 Chhinga Veng Kohhran-a a pek chuan Enquiry a neihtir phah a. A dan bawh chhiat chu a nasat em avanga hremna na tak tuar thei a nih hria-in ban a dil ta a. Vigilance Case nei lai ban theih a ni lo chungin Sawrkar chuan ban phalna a pe ta mai thung a. Mahse, a chungchang chu chinfel a nih loh avangin tun thlengin Vigilance Case chu a la awrh ta reng a ni.

Tun kum 5/6 chhung hian Non-works dept ațangte-a a hna hmuhte chu a pumhmawn a nih deuh ngawt avangin a tamin a pawisa dawn pawh a tam tham hle a. A chhiah pektur ngawt pawh Cheng Nuaih 126 a ni hian a hausakzia chua tilang chiang a ni.

Hetiang a tihna lamah hian contract hna pêk nan leh thawhnana Sawrkar dan awmte chu Sawrkar hruaitute nena ţanghovin an bawhchhiain an palzût pawp pawp mai a.Central Vigilance Commission Guidelines-ah DPR siamtu Consultant chu Execution hna thawk tur chuan, “Conflict ofInterest” a nih avangin phal a ni lo va. Chuti chung chuan kan Sawrkar chuan a hmang mek a ni.

World Bank Project -ah pawh DPR siamtu chu Contract hna thawh chu sawi loh, Contractor hna supervise tu, “Supervision Consultant” a hrana rawih turah pawh an remti lo. Chuvang chuan, NECS-in an duh tawka estimate an siam a, anmahni bawkin open tender awm lova an thawk nghal hi Vigilance Commission guideline bawhchhiatna dik tak a ni.

Restricted tender an ko a nih pawhin, CPWD manual-in restricted tender koh dan a siam nen a inang lo. Hmu tur ruat sain a compare pui tur nen an chhang mai thin niin a lang a, transparency leh competition a awm lo hrim hrim. Tender reng reng chu competition a ni tur a ni.

General Financial Rules 2005 ang hian, “Ministry/Dept te chuan maintenance hna Rs.10 lakhs thleng man chu anmahniin an thawk thei a; a bak reng reng chu CPWD emaw, BRO emaw, Engineering Organisation dang, Works&Housing Ministry-in Accounting Procedure a duan anga works accounting system hmang hnenah an pe tur a ni” tih a ni a. Kan rama Works Dept ni lo ho hian works accounting system an hmang lo vek a. Chu mai a ni lova, GFR-in a ngaih pawimawh chu, “Sanction/A.A & Expenditure Sanction awm hnu-ah technical sanction chu competent authority-in a pe ang a, tender chhuahin contract agreement a awm tur a ni” tih a ni a. Hetianga tih hi hi a awm mumal lo.

Hmanni lawka State Finance Department Circular/Notification thar berah chuan, Works Department niloten an dept hna PWD- a pe lova an thawh theih chin a revise a;
chumi ang chuan:
S.E. nei chinin Rs.200 lakhs,
E.E nei chinin Rs. 100 lakhs,
SDO nei chinin Rs.70 lakhs leh
JE nei chinin Rs.50 lakhs thawk thei turin a ti thar a.
Hei pawh hian GFR requirement, works account vawng an nih loh avangin GFR kalh chu a ni tho.

Tin, Works Dept ni lo hi tunah SE nei an awm lova, 100 aia tam thawk thei an awm lo tihna a nih rualin, heti aia tam hi an thawk nasa khawp mai.

Tin, EE leh SDO nei pawh hian hna an supervise-tir chuang lo va, an rubber seal an hmang a ni deuh berin a lang.

Finance Dept-in Non-Works Dept te thawh theih chin a tuk tho chungin, State Sawrkar chuan Panel of Consultants siamin, a hnu-ah henghoina contract hna an thawhzui phalna an pe leh a. He lehkha-ah hian limit a siam lo thung niin a lang. Hei hi Central Vigilance Commission guideline leh GFR bawhchhiatna liau liau a ni. A thu hrimin Central Sawrkar dan kan hman hi keimahni thu-a kan tihdanglam theih a ni lo.

Panel of Consultants hi CPWD, Road Transport & Highways, Railways etc-ah pawh neih thin a ni a. Consultancy Service/DPR siam etc hna a lo awmin, heng list atang chauh hian tender an ko va; anniho hian competition-in tender an chhang thin a; direct-a offer an ti ngai lo. Tender chhangtu pakhat chauh a awm phei chuan re-tender tur a ni. Evaluation criteria/qualification criteria fel tak hmangin thlan thin an ni. Hengho hian contract an thawhzui phal a ni ngai lo.

Contract thawk tur chu DPR approve hnu-ah tender kova tehfung fel tak hmanga thlan leh tur a ni a. DPR siamtu a tel phal a ni lova; single tender chu vawi khatnaah pawm theih a ni bawk lo.

Contractor hna thawh tawh hi measurement la-in measurement book(M.B) ah record thlapin, Bill form-ah nen JE/AE-in ziak lutin E.E in a pass hnu-ah cheque hmanga pek thin a ni a. Non-Works Department-ah hian tu nge bill siam, tu nge check-a lo pass, works account vawng si lo, engtin nge cheque an tih, engtin nge nuai tam tak tak worksbill hi treasury-ah a tlang thin? tih hi zawhna lian tak a ni.

Central Vigilance Commission ‘guideline’-in Consultancy Services Detailed Project Report(DPR) siamtuin a a DPR siam hna a thawh a thiang lo a tih laiin NECS chuan a project report siam hna a thawk nghal hmiah ţhin.

General Financial Rules-in Non-Works Department-in hna(works) an thawh a thiang lova, Works Department(PWD)-in a thawk tur a ni a tih laiin NECS chuan Non-Works Department, Home, Rural Department hnate chu a thawk mawlh mawlh mai a ni.

Hetianga hna a thawhte hi Tender awm lo tluk, hmaithinghawnna anga ‘Restricted Tender’ ti-a amah chauh an pêk deuh vek mai ţhin a ni.

NECS-in Central Jail-a ‘Separate Women Jail’, Rs. 1309.95 senralna tura a sak 1st Instalment Rs 5,12,23,000 an lak hnu-ah a bak Rs 9,84,56,000.00 lak lehna tur bill a theh lut a. He pawisa sanction-tu DoNER he bill-ah hian ‘technical sanction’ a awm loh avangin chutiang nena an bill thehlut turin a rawn hrilh a. IG Prisons chuan Jail Dept-in technical mi an neih loh avangin Chief Engineer(Buildings) chu’ng bill-te chu ‘countersign’ turin a ngen ta a ni.

Kan sawi tawh ang khian NECS chuan Non-Works Department-ah hna tam tak a thawk a. Anmahniina an duh thala DPR an siam chu anmahni bawk chuan an thawk a. Engineer/Technical mitena an enpui ve miah lovin bill an siam a, chutiang bill vaibelchhe tam hu chu Treasury chuan a lo pass ve thei zel mai a ni.

Hetiang bill hi Central Ministry chuan an lo pawm ve duh azawng lo mai a. Dan ang thlapa bill countersign chu an phût ta a ni. PWD hian heng bill hi a countersign dawn chuan an hnathawh chu Project Report nena inmil a nih lehnih loh an hriat a ngai a.

Hna hi thawh tawh a nih avangin ban te, beam te, slab te an zu ker kuak leh vek loh chuan an hnathawh chu DPR nen a inmil leh mil loh hriat theih a ni tawh lo ang a, thil tih theih loh tluk a ni tawh ang.

1st instalment Rs 5,12,23,000 chu countersign lohin an lo pe fel der tawh tihna a ni a. Chu chu dan kalh a ni a. A dang Rs 9,84,56,000 pawh chu dan kalh lo chuan sanction theih a ni dawn lo va, eng tin nge an tih zel dawn hriat a harsa khawp mai. Sudden Muanga tih anga tih nek neka fel thei tur nge, Exemption lak leh maina chi tih kan lo thlir dawn a ni.

Pu Robert Romawia hnathawh dante hi hetiang deuh vek hian ni a. A duh thalin DPR a siam a, a duh ang angin hna a thawk a, endiktu/endikna awm lovin bill a pass-tir thei zel mai niin a lang. Hetianga an tihna lamah hian tu dang mah tel ve lovin a hna petu leh amah inkar hi ni deuh ngawt mai hian a lang a. PWD hnuaia hnathawha a te ber atanga a lian ber thlenga mantang pek ngai kan tih ang kha a neih ve loh avangin mi dang zawng aia hausa thur thur thei awm reng pawh niin a lang a ni. Mi dangte aia hna hmu tama pawisa sanction pawh hmu tam zawk chunga a hnathawhte mi dangte hnathawh aia a la chhiat zawk zel bawk si chuan hlep hnema hausa thur thur awm reng chu a ni ang.

A thiam thil a hmanna chu amah tluk zetin hna pe ţhintute hian an hlâwkpui ni ngei tur a ni, hna lian ţha zawng zawng tih theih chu a hmu deuh vekin a thawk ta deuh vek mai a. Contractor dangte chuan chhungkaw fanau chawmna an nei tawh lo mai awm e, tih theihin an châwl ţhup ta mai a. Sawrkar Department lian ber, PWD ber pawh chu awmze nei lo-ah an siam a ni ta deuh ngawt mai a. Thawh loh hlawh an la ta deuh fo a nih awm hi.

NECS neitupa leh a duh apiang leh a duh ang thala a thawhtur hna pe mawlh mawlhtu kan Sawrkar hruaitu lûte hian AN CHAWM BAWK A, AN HAWP BAWK A, AN BAR BAW BAWK A, AN PAL BAW BAWK A NI E

Kan politician-te hian bungrua ang lekfanga lei theih thilah min ngai tawh a. Inlei tlinga sawrkar siam an ni deuh ngawttawh a. Chu chuan kan ram hi dikna awm tawh lohna ram, dan bawh chhiatna ramah a siam tawh a. Kan hnam hi chhia leh tha hriatna nei tawh lo hnamah a chantir tawh bawk a. Kan chhe ta em em mai a ni.

Chutianga mipuite lei thintu kan politician-te chu NECS neitupa hi chuan lei theih thilah a rawn siam ve ta thung a ni ta ber a. Kohhran te, NGO te pawh a lei thei zel niin a lang bawk a. A lei theih loh hi kan tlem lulai em a, kan Kristian ramah hian a vawk lal len a ni ta deuh ber mai.

A pawisa siampui langsar zual State dang CM leh CS-ten an thuihruaite nena Election-a an campaign-pui kan hriat chhun a ni deuh mai a. A car changkang khuh hawn huna Pathian rawngbawltu lian hunserh hmangtu-a hmang thei ngat leh Sawrkara hotu lu ber ber a khuh hawngtu-a hmangthei ngat a nih te hi a mak danglam ve hrim hrim a ni.

Hetiang kalphung hi Sawrkar kalphung awmze nei lova siamtu, chu chuan kawng hrang hranga Sawrkar kalphung a chhe zawnga a nghawng nasatzia leh kan Pathian thu ber pawh SUM nena inthlung nghet tlat a nihzia a lantir a.

Hetiang kalphung hi kan ram leh hnam tan a hlauhawm tak meuh a. A hmu-a a hretute hian a dik loha a hlauhawm em avang leh țhangtharte hmakhua tur ngaihtuahin kan do a, kan tihtawp a ngai a ni.

Aside | Posted on by | Tagged , , , | Leave a comment

MAYWEATHER A HLAWH PANGNGAI BAKAH PAY PER VIEW ATANGIN DOLLAR MAKTADUAI 300 HUI NGEI TURA NGAIH A NI – Thangkhuma (T-a)

Mayweather-McGregor inhnekah boxer chanvo puanzar a ni lo. McGregor-a promoter, UFC President Dana White-a thusawi atangin a tlem berah Mayweather-an dollar maktaduai 100, McGregor-an dollar maktaduai 75 an dawng ang a ti a, hei hi khawvela media lianten an puanzar dan a ni tlangpui.

Mahse, ESPN chuan inrinni khan chiang zawkin a tar lang a, a tlem berah Mayweather-an dollar mtd 100, McGregor-an dollar mtd 30 an lak tur thu a puangzar.

An inhnek zawh khan McGregor-a hnenah dollar mtd 30 cheque (check) an hlan ngei a, Mayweather-an dollar mtd 100 cheque a dawng ve thung ang. Hei ringawt hi an lakluh tur erawh a ni lo.

Pay-per-view an hralhna atangin chanvo an neih belh dawn a, Mayweather chuan dollar mtd 300 a hui ngei tur thu a sawi.

Pay-per-view hi an hralh hnem viau a nih hmel a, an inhnek dawn tep khan pay-per-view lei tum an tam lutuk avangin a leina Showtime online a jam hial. Chuvangin inhnek hun pawh kha an sawn hla a, an ruahman aia tlaiah an tan phah.

Pay-per-view hi eng zat nge an hralh chhuah puanzar a la nilo thung. An beisei dan chuan “The Money Fight” atang hian dollar maktaduai 700 rut thei turah an inngai.

(300 dollars into Indian rupees = 19,20,15,00,000.00 Tluklehdingawn sawmpakua, vaibelchhe sawmhnih, maktaduai khat leh nuai nga tih vel a nih hiii..vnt)

Aside | Posted on by | Tagged , , | Leave a comment

Hnahlan khuaa grape chingtute pawl khatah an in chhungkhawm

Hun rei tak chhung Hnahlan khuaa grape chingtute pawl hniha awm thin chu pawl khatah an in chhungkhawm.

Society pahnih, Hnahlan Grape Grower Society leh Hnahlan Grape Farming & Processing Cooperative Society Ltd., a hruaitu te’n inzawmkhawmna tura hma an lak tawh chu tluang taka kal tlangpui zel a nih hnuah nimin khan Society pahnihte chuan Inremna Thuthlung (MoU) point 6 chu lungrual taka pawmin inremna saui an tan tih kan corr thudawnna chuan a sawi.

Society pahnih inzawmkhawm hming atan hian ‘Hnahlan Grape Grower & Processing Society’ tih a ni ang a. Society thar hming hi Official a sawrkara a in register hma chu a tuldan a zirin Society pahnih Registration a khawi emaw zawk zawk hmangin Company, sawrkar te an dawr thin dawn niin an sawi a, charman atan C. Vanlalhriata ruat a ni.

Hnahlan khuaa grape chingtute hian an thlai thar hralhnaah harsatna nasa tak an tawk mek ni a sawi a ni a. MLPC Act hman a nih hnu hian an wine siam chhuah Zawlaidi chu a hralhna a awm tawh lo tluk a ni a, hetihlai hian Ministry of Agriculture and Farmers Welfare chuan an sum hloh cheng vaibelchhe thum vel Market Intervention Scheme (MIS) hmangin rulhsak dawn a. Tun atanga rei loteah grape chingtute hnen a thlen beisei a ni, an ti.

Grape Chingtute hian National Cooperative Development Corporation (NCDC) nen tangrualin winery changkang leh lian zawk din tuma hmalak tan mek a, Wine quality tha tak siam chhuak a, hmun danga wine siam chhuah te el pha tura ruahmanna siam a ni. Grape variety tha zawk hlawhtling taka ching puitling thei turin Indian Agricultural Research Institute (IARI) nen thawhhona neih tum mek a ni bawk.

Aside | Posted on by | Tagged , | Leave a comment

Delhi Health Minister Satyendar Jaina’n shell company 4-ten fund an dawn dan sawifiah ngaihna hre lo

Delhi Health Minister Satyendar Jain chuan chanvo a neihna shell company 4-ten fund an dawn dan CBI hmaah sawifiah ngaihna a hre lo.

CBI chuan kum 2015-2016 chhung khan Prayas Info Solutions, Akinchan Developers, Managalyatan Projects leh Indo-Metal Impex Pvt Limited kaltlanga a zavaia sum cheng Vbch 4 nuaih 63 dawn a nih thu an sawi a. Khatih hunlai khan Minister leh a nupui chu heng company-ahte hian a hlawkna hmun thuma thena hmun khat chanvo nei ni-a sawi an ni.

Thuduawnnain a sawi danin, CBI-ten thu an zawhfiah hian Minister leh a nupui hian company hlawkna hmun 3-a hmun 1, cheng Vbch 1 Nuaih 62 dawn chungchang hi an sawifiah thei lova. Kum 2010 leh 2012 inkar chhung pawh khan heng company-te leh Delhi-a company dang kal tlanga Cheng Vch.11 Nuaih 78 tihchingpennaa inhnamhnawihah Health Minister hi puh a lo ni tawh a ni.

Puan tawh angin, Zirtawpni khan Delhi Health Minister Satyendar Jain leh a nupui bakah an vua leh vang mi 4 – te lakah CBI-in FIR an ziaklut a. Aam Aadmi Party chuan Health Minister an puhna chu behchhan mumal awm lo leh dawt mai a nih thu an sawi ve thung a ni.

Aside | Posted on by | Tagged , , , | Leave a comment

Mizo Police Officer chhuanawm : INDIAN POLICE OFFICER CHAWIMAWINA SANG BER DAWNG TUR PU LALBIAKTHANGA KHIANGTE (IPS)

Mizo police officer tha tak a nih avanga United Nation Mission hnuaia venhmin hna thawk tura tirh tawh Pu Lalbiakthanga Khiangte chuan chawimawina ropui tak a dawng dawn.

A hnathawhna hmunah mittlung leh tling taka hna a hlen thin avangin tun Independence Day, August 15, 2017 khan India rama Police Officer huaisen leh hnathawk thate chawimawina sang ber Police Medal for Distinguished Service dawng tura thlan a nih thu puan a ni a, remchangah medal hlan a ni ang.

Kum 52 mi Pu Biaka hi 1988 khan Mizoram Police Service (MPS)-ah tlingin hna a zawm atangin fak a hlawh hle. Mizorama hmun khirh leh harsaah a awm kual viau tawh a, mawhphurhna sang leh ruahmanna fing tak nena beih ngai bakah thawhrimna leh hratlak a tulna hmunah hmingtha takin a tih tur a hlen thin tiin a chanchin an ziak a, hei hi Mizoram Police lal ber Director General of Police Pu Thianghlima Pachuau (IPS) chuan a pawmpui thlap a ni.

Aizawl chhim lam veng pakhat Venghnuaiah piangin a sei lian a, Lalnghenga (L) leh Lallianite fa 10 zinga mi niin an unau hi hmeichhia paruk leh mipa pali an ni. 1992 khan Rosaline Ngurzamliani Sailo nen inneiin fa pali, hmeichhia leh mipa pahnih ve ve an nei.

2005 atangin ama in Chanmari West-a Chawngbawla Section huam chhungah an khawsa. Police officer a nih tan atanga tun thlengin a hnaah ram tan hlawhtlinna lian leh ropui tak tak a thawk chhuak nasa a, Mizo police officer chhuanawm ber pawl a ni mek.

2003 atanga 2008 chhungin Kolasib District SP a ni a, hetih chhung hian tualthahtu a chhuichhuah danin sawi a hlawh. Ni 3.11.2006 khan Bualpui ram chhunga thing hmunah ruang an lai chhuak a, a hnuah Lalrinpuia Ralte s/o Lalvuana, Thuampui, Aizawl a ni tih an hria. A hovin a thattu an zawng zui a, kar hnih chhungin Manipur leh Assam-ah a thattu ngei nia rin mi panga an man.

Ni 28.4.2007 khan Kolasib atanga km 12-ah tu nge a nih pawh hriat theih tawh loh ruang an chhar a, thla hnih chhungin Mizoram hmun hrang hrang leh Assam-ah a thattu ngei nia rin mi panga a man leh vek a ni.

2009 atanga 2012 chhungin Aizawl District SP nihna a chelh a, chhiahpuam avanga mipui tamtak an talbuai laiin mawhphurna sang tak a kovah a awm. Dan lovin mipui 10,000 chuang hnen atangin Rs vaibelchhe 300 vel chheprelh a ni a, an pek let theih loh avangin buaina nasa tak a thleng.

He thil avang hian Aizawl District-ah thubuai 18 ziah luh a ni a, chawl hman lovin Pu Biaka leh a hoten an chhui a, mipui tan an thawk. Mipui sum tamtak bo pil hlen mai tura ngaih tawh pawisa fai leh bungrua Rs vaibelchhe 35 vel hu an la let leh thei.

Aizawl SP a nih lai hian a awp chhung district hmar lamah hel pawl HPC(D) an che hrang viau a, Mizoram Police nen an inkap fo mai. Pu Biaka hian hruaitu tha a nihna bakah a finna, huaisenna leh ruahmanna siam thiam a nihzia a lantir.

Rim taka a beihna zarzo telin HPC(D) sipai hotulu ber Ropuia Famhoite leh sipai lal ber dawttu Lalbiaknunga a man ve ve. A hnu lawkah HPC(D) President Lalsangbera chu New Delhi-ah a man bawk a, a hnathawh avang hian hel boruak a tudai hle a, Mizoram sorkar nen inremna zawngin an indawr zui thei ta bawk a ni.

National Highway No. 54-ah lirthei rawk leh suam a hluar a, Kolasib leh Aizawl SP a nih laiin dan leh thupek khauh takin a kengkawh. Ei leh bara Mizoram chawmtu ber kawngpuia mi sual chetna bei letin rukhmang mi 15 ngawt manin boruak a ziaawm phah hle.

Aizawl SP a nih laia a hmalakna chhinchhiahtlak tak pakhat chu 2009 krismas leh 2010 kum thar lawmnaah hri tha lo tichhuak thei halpuah leh halmawi chi hrim hrim pakhat mah hal a ni lo. Sorkarin a khap a, ani’n a kengkawh a, tha takin tlawmngai pawl, kohhran leh media a thawhpui a, ropui takin sorkar thupek a tihlawhtling.

2010 khan inbumna hmanga mihringa sumdawnna bei letin hnuhma ropui tak a nei bawk. A kaihhruaina hnuaiah Goa-ah Mizo hmeichhia pali leh Naga hmeichhia pasarih an chhanchhuak a, Mizoram Police Team-in mihring hmanga sumdawnna bei leta hlawhtlinna a chan hmasak ber a ni. 2011 khan Mumbai-ah Mizo hmeichhe pali leh Haryana-ah Mizo hmeichhe pakhat an chhanchhuak leh bawk.

2014-ah Indian Police Service (IPS)-ah hlan kai a ni a, tunah hian Assistant Inspector General of Police (AIGP) II nihna a chelh mek. Mizoram Police huang chhungah a aia lal post pathum – DIG, IGP leh DGP a awm.

Hmun hrang hrangah awmhmun khuar mah se Mizoram Police-in anmahni ta bil, ram nghet an nei bar lo. AIGP II a nih atanga tun thlengin Pu Biaka hian Mizoram Police tan an inbunna sawhnghet turin rim takin a bei a, a thiltih avangin Mizoram hmun hrang 20-ah Police-in a nghetin ram an nei tawh a ni.

Hel pawl ta leh dan lova silai a mansak ringawt pawh 60 aiin a tam tawh a, heng zingah hian AK-47, LMG, M-20 Pistol, .303 Rifle, .380 Revolver, 9mm Postol, SBBL silai, shotgun siam chawp leh silai mu tamtak a tel.

Pu Biaka hian India President Ram Nath Kovind-a kut atangin Police Medal for Distinguished Service a dawng ang. He chawimawina dawng thei tur hian kum 21 aia tlem lo police officer hna a chelh a ngai a, Police Medal for Meritorious a dawn atanga kum ruk hnuah chauh a la thei bawk.

Hnathawk tha a nih mai bakah kum nga chhung Annual Confidential Report (ARC) enin Chief Secretary hovin Committee-in ngun takin an thlir a, Ministry of Home Affairs hnenah thawnin anni’n chik takin an lo endik ve leh thin a ni.

Aside | Posted on by | Tagged , | Leave a comment

Stanford university din dan; Mite hi an lan danah teh ngawt suh ang che

Kum 132 lai liam ta, kum 1885 daih tawh khan nupa tar lam tawh pakhat hian inthlahrung takin chutih laia zirna in lar tak Havard university hotupa ber president chu hmuh tumin an pan ve rawih a.

University hotupa ber secretary in a lo hmuh chuan chutiang thingtlang mi, an nu zawk puanzeh hlui lam tawh a inthuam, an pa zawk lah suit pawr tawh lam hate chuan Havard universiy ah tih ve tur an nei lo ti rilruin hmel nur tak hian a lo dawngsawng a.

Pu Leland a chuan dam te hian president kan hmu duh a ni a han tia.Secretary chuan “a buai lutuk, hmuh mai mai theih a ni lo ang” tiin bung takin a lo chhang a.

A nupui pi Jane-i chuan “kan lo nghak thei alawm” a lo ti ve bawk a. Darkar khat aia tam a liam hnu pawh chuan secretary chuan luh tir phal loin pu Leland-a te nupa chu beidawnga an kal bo mai a beisei a.
Nimahsela pu Leland-ate nupa chu kal bo mai lo chuan president hmuh phal hun nghakin an la thu tlat si.

Chutia an hawn duh mai tak loah chuan secretary chuan Havard president chu va biain “rei lo te bak an hmu lo ang che, an kal leh vat mai ang” tiin. Mi pawimawh tak takte pawh a hmuh hman loh laia chutiang thingtlang mi berh tak anga lang, thuamhnaw phualuai lam tawh inbelte a han hmuh chuan president chuan intivei leh tham lo hmel tak hian a lo thlêk a. Chu nu upa lam tawh chuan president hnenah chuan “kan fapa Standford-a hi Havard University ah hian kum khat chhung lek a lo kal ve tawha, nuam a tiin he university hi a ngaina hle thin.
Mahse nikum khan kan fapa chu kum 16 mi lek niin a boral ta hlauh si a.Chuvang chuan he campus chhung remchang laiah hian amah hriatrengna siam kan duh a ni” a han ti a.

President chu mak tiin a phawk deuh hru bawka. Bung deuh tak hian “ka pi chutiang hriatrengna lim chu Havard a lo kal boral apiang tan a siam theih loh ang. Chutianga kan tih zelte’n thlanmual a ni dawn a sin” tiin a chhang a. Pi Jane i chuan “chutiang lam ni lo e, Havard tan building pek kan duh ka tihna zawk a ni” tiin a hrilhfiah thuai a. Chumite nupa inthuamna sit taka han melh vel pah chuan “hetiang in lian sakna tur hian sum tam tak a ngai tih in hre lo em ni? Havard building sakna’n hian cheng maktaduai sarih leh a chanve daih sen a ngai asin” a han ti a.

President chuan chumite nupa chu an inthiar fihlim thei tawh mahna tiin a han ngen vel bawk a. Pi Jane-i chuan an pa lam chu hawiin zawite hian “chutiang chu university din nana pawisa ngai zat anih chuan keimahni ngeiin university kan din zawk mai dawn em ni?” tiin a han hrilh ser ser a. Pu Leland a chu a lo bu nghut a. President chuan _uai_ tiin mak alo tih hmel hle.

Tichuan pi Jane-i leh pu Leland-ate nupa chuan Havard university chu chhuahsanin, Palo Alto California lam panin an zin ta a. Chutah chuan tun thlenga khawvel puma University tha chungchuang, University top five ah pawh lang pha ngar ngar *Standford University* chu an fapa neih chhun *Standford-a* hriatrengna’n an din ta zawk a ni.

Thubelh: Standford university hi khawvela University tha chungchuang panga(top five) zingah tel rengin Art and humanities, Engineering and technology, Life sciences and medicine, Social sciences and management, Natural sciences zirnan chuan hei aia University tha a awm chuang lo ang.

A campus zau zawng hi 31sq. km bial vel daih niin tunah zirlai sing khat sangruk zathum sawmthum paruk vel an awm mek bawk.

Standford university chhuakte tawhte din company lian tak tak kum khata sum lakluh pawh dollar vaibelchhe tak sanghnih zasarih chuang daih a tling phak hial nia. Tin, Standford university a zir chhuak tawhte zingah billionaire, astronauts leh mithiam tak tak chawimawina ropui tak tak dawng phak an kat nuk bawk a ni.

Aside | Posted on by | Tagged , | Leave a comment

NAUPANG NATNA LEH DAMDAWI CHUNGCHANG HRIATSUAL AWM THIN TE By : Dr. Lalhmuchhuaka

1. Lei durh leh Ka chhung na, pumpui chak loh hnathawh emaw kan tih hi a ni lo a, amaha lo na ve zawk a ni.

2. Nausen bual dawna a bualna tur tui pek hi chin loh tur, Naute damlohna thlen theitu zawk a ni.

3. Ha to dawna Kawthalo hi Ha to hrim hrim vang ni lovin, Ha ziau vanga thil hrang hrang an ei thin vanga Kawthalo an ni zawk.

4. Damdawi chhin hi naupang damdawi pekna tur a ni lo va, a chhin Plastic hi tehnaa hman zawk tur a ni.

5. Saisu rah awrhin naupang kaih a veng lo. Kaih tam ber, Febrile Convulsion hi amaha reh mai thin a ni.

6. Naupang ha thial hi Rulhut pai vang ni lovin, tlakchham neih vang zawk a ni. Tlakchham siamtu hrang hrang karah Rulhut pai hi a ni ve thei mai zawk a ni.

7. Nuin a chhang tur a paisan hian nu Hnutetui a chhe chuang lo. Nautein a hne chhunzawm zel tur a ni zawk. Nau Nuhah kan tih pawh hi Hnutetui leh Eitur tha kham khawp kan pek loh vang a ni zawk.

.8. Vitamins hi Than duhna leh Len thur thurna a ni lo. Vitamins mamawh lo inpek ve tawp kan ching. Hah dam, Chaw ei that, Hmawmsawm ei tlem, Thei ei tam etc. hi than duhna leh len thur thurna a ni zawk.

9. Nau thimhlim sual, Zan tah vei kan tih thin hi thil dang ni lovin, an puar that tawk loh vang te, an lum that tawk loh vang te, hnute an hnek laia boruak an lem palh vanga an pum nat vang te a ni fo zawk. Puar tha taka hnute dik taka hnektirin a reh mai. Naute hnute sual thin te pawh pawm dan dik thlapa hnek tirin a reh mai.

10. Awmnapui (Pneumonia) mi tam ber chuan an vei nawn sek lo. Awm na leng thin tam ber hi Viral leh Allergy vang a ni zawk. Rei tak khuh phei chu Pneumonia vang ni lovin, thil dang vang a ni fo.

I fa kha a hriselna a tha em?? Nu leh pa hian mawhphurhna sang tak kan nei ve a nia.

Aside | Posted on by | Tagged , , | Leave a comment

Muslim triple talag chu ram danpui kalh, thu tlinglo a ni

Supreme Court chuan muslim sakhaw zuituten inthenna atana triple talaq an chham thin chu ram danpui kalh, dan bawhchhiatna leh thu tlinglo a ni a ti. He thutlukna siamtu judge zinga a tam zawkin an thlawp a, Supreme court chuan triple talaq chu Quran zirtirna bul nena inkalh a ni a, pawm theih a ni lo a ti.

Judge pathumte chuan triple talaq hi dan mumal lo leh ramdanpui bawhchhiatna a ni a, tihtawp a ngai a ni an ti bawk.

He thu ngaihtuahtu bench-ah hian sakhaw hrang hrang-Sikh, Christian, Parsi, Hindu leh Muslim-te an tel a. Petition pasarih an ngaihtuah a, heng zinga panga hi muslim hmeichhiate’n an an thehluh a ni a.

Triple talaq danah chuan muslim mipaten an nupuite awlsam taka then turin talaq vawi thum an chham thin a, Muslim hmeichhiate chuan he dan hi an khing ta a ni.

Supreme Court thutlukna hi PM Narendra Modi, BJP President Amit Shah leh hruaitu dangten ropui an tih thu leh an lawm thu an sawi a ni.

Aside | Posted on by | Tagged , , | Leave a comment

CHHIATNA, KAWNG LEH A CHHEHVEL

• Kawng chhia a tam.
• MBBS Seat qouta tihtlem a ni.

Kumin chho chu tualchhunga kan boruak hip a zangkhai lo hle mai. Tui lian leh leimin rapthlak pui pui thawm, kan hriat ve țhin aia hriat hrehawm kan hre nasa a, mi vanduaite tuarna a nasa hle mai. Fur ruahtui a tam a, kawng chhiat a zual a ni mai thei. Hawina lam apiangah kawng a chhe hle vek emaw tih tur a ni a, Mamit lamah Maxicab-a kawng chhiat thu ziah pawh huat thu a tling a, Champhai lah chu vanram ang mai, hrehawm tam tak tuara thlen ngai a ni ta hial. Silchar lam lah chu, Sairang lam kawng nuam țhin kha, tu pa mo nei sual emaw ang deuhin, a țha zawk kha a chhe zawk a lo ni leh tawh a, khualzinte pawhin Sihphir lamkawng an zawh tam leh ta. Lunglei lam hi, tun hnaiah engnge a an, ka hre chiah lo.

Khawpui chhungah pawh, Bawngkawn leh Zemabawk Helipad inkarte hi a țha thei ngang lo a, veng tam takah kawng a chhe hle a, a țhen chu SIPMIU sulhnu, siam țhat lohva kalsan rihte a ni a, a țhen hi PWD-in khawih an phal rih lo, te hi an ti deuh emaw ni?

Khawpui dai féma Tuirial kawng pawh, thâwk khat lai khan kan han ri hak a, hotuten an en rup rup a, ri hak kha a reh a, kawng chu a țha chuang hlei lo a. Tlang ram kan ni a, ruahtui a tam bawk si a, kawng a țha mawh a ni, kan ti a, mi ramah ruahtui a tam ve tho an ti leh bawk si!

Burma ramah, Thán tlanga kan tlan laiin sàn lam tehnaah tuipui zàwl ațangin feet 7,600 chuang a ni a, Phawngpui tlang aiinfeet 500 zetin a sang zawk a, kawngpui zau namai lo tak tur an sial ruah mai bawk si. Tlang ram, ruahtui tam si kan nih vang ngawt hi chu a ni dawn em maw ni? Hotute leh mi thiam zawkten an tih miau si chuan, Engineering ni khat pawh zir ve lo hi huai takin kan țawng ngam bawk si lo.

Kan hriat erawh chu – kan kawng hi a țha lo takzet a, kan ngai pawimawh tâwk lo niin kan hre bawk a, mutmawh hnar mawhah neih ila chuan, kan ziaawm ang tih hi kan ring bawk a ni.

Kawng chungchang bâkah Chakma lam thawm a lo lian leh a, chumi kal zelah chuan Minister of State pakhat a báng ta hial a, a bàn hi Chakma te avanga kan harsatna sutkianna ni tak ang maw? Sawi ngam a har khawp mai. Țangrual thei ila, kan thil duh leh țhahnemngaihna te hi dan hnuaiah awmze nei deuha lantir turin, tu pawl mah hian an lakah beisei nei lo ngam ila chuan, kan phawkhai a ruai deuh mahna. Inthlan a lo hnai leh ang a, an zara thuneihna chan emaw kan duh leh tlat si chuan, kan mamawhte lakah chuan khauh a har țhin si. Hmanah Kumpinu lalțhutthleng chungchangah kan rual u fe-te khan, ‘Lalțhutthleng leh nuthlawi an bùk leh dawn e, nuthlawi a käng lo a pawi ber mai’ an lo ti daih tawh a, lalțhutthleng hi engkim bùk nan kan hman chuan, kan ram leh hnam hi chu a käng zel ang tih a hlauhawm ngawt mai.

Hei, nimin lawkah MBBS seat kan neih țhin chu nikum aiin 8 laiin a tlem ta tih leh, tuna kan la neih ve hram hramna te pawh College țha ber ber a ni tawh lo khawp mai tihte kan lo hre leh ta a, AIIMS, Lady Hardinge, Maulana Azad, JIPMER ilo-ah te khan kan la nei em? Kan lo fual fe tawh reng em, ka hre chiah lo. Politics-a kan inbeihnaah pawh hmasawn zel kan mamawh khawp mai a, kan țanrual thiam lohzia leh, kan lungawina riau hre fuh laklawhte hian min zuam riau ang tih a hlauhawm ta khawp mai. Engkim hi politics ngaihtuah dana ngaihtuah vek tur a nih ka ring lo a, ram leh hnam tana țhahnemngaia mi sawite hi rorel lai pawl mi nih avanga huatthu-a lâk vek tur a ni lo ang chiahin, eptu lam rilru pute pawhin, ram leh mipuite țhatna tur aiin rorel lai pawl tihmualpho kan tuipui ang tih a hlauhawm tho. Kan ram hi hmasawn mamawh zual tak ni pawhin a lang a, kawng tam takah hian kan țanrual a, a huhoa kan chêt thiam loh chuan, tuna tifuh emaw intite pawh hian kan la tuar ve tho dawn asin.

Tûk chhuah nuam vek u le.

Author : RK Lianzuala

Aside | Posted on by | Tagged , , | Leave a comment