KHAWPUI KOHHRAN DINHMUN by David Sailo.

• He thuziak nuihtiza leh fing tak si hi chhiar hmaih phal chi a ni loin ka hria. Tunlai khawvel ah politic ruihchilh tih hriat thuziak a tam a, a ninawm em em laiin hetiang thu Fifth Column zinga dah theih lek lek a rawn ziak hi a ṭha a, a hlu tak zet a ni.

1. PASTOR & PRO-PASTOR
ᅠᅠ Pastor ah hian thlarau mi leh Tisa mi an awm a, Pathian thu zir chhuak țheuh țheuh Camping/Crusade a rawih tlak miah loh an awm. Politics ngaihven em em thusawi a piang deuhthaw a sawikai thin an awm a, hmunpui(Headquarter) a General Secretary, Executive Secretary, Superintendent etc Post chelh an chak fur a, chutiang tur chuan Pastor Junior zawk leh khawpui Kohhran Upa langsar deuhte an hmelhriat tha thei hle bawk. Sorkar hnathawk ang bawkin Transfer/Posting a lungawilo vui ngam chiah si lo an awm ve thluah bawk thin.

ᅠᅠ Inkhawm zan leh Kohhran/Bial Committee a nih lem loh chuan tih tur an nei lo hle a, a bikin chhunlam ah inleng an neih loh chuan Quarter ah thutthleng seiah an mu zawn zawn thin. Hmanlai Pastor tha leh taima ke ngata bial fang thin an țil țiak tawh a, hun awlah pawh Bible leh Pathian thu bih melh melh an vang țan a, thutthleng seiah Phone an khal nuap nuap a, Kohhran Concern Whatsapp Group velah an lawr peih/hman hle.

ᅠᅠBial fan an thatchhe tlangpui a, Home Visit phei chu phut chuan a phuttu an hah mai mai tawh. Mamawhtu te hnenah Chanchintha pu thlengtu ni lovin Officer chet a che in an Quarter ah pan an ngai sek tawh zawk thin. Bial chhung Kohhran tlawh dawnin Taxi, Bus etc ah kal an tum tawh lova, Bial chhung Upa lirthei neite an Phone kual zung zung thin a, hetiang tur hian biak that em em 4/5 an neisa reng bawk thin. Kohhran Hmeichhia leh Thalai Bial/Tualchhung Committee ah Pastor Quarter tih changtlunna lam sawiin Pastor thenkhat chuan inthlahrung map lovin an duh zawng an sawi zuah zuah bawk thin.

Pro-Pastor te hi Pastor te ai mahin an inla puithuin an kum a phu lovin an intipuitling al duh hle a, zing tawngtai atangin Kamis banbul/T-Shirt nghawng nei an bilh lut ap thin. An hna atan hian a pawimawh a niang. Pro-Pastor nupui la nei lo te chuan Kohhran thalai nula zingah an mit an len uluk thin hle. An tawngkam a tha thei hle a, Pastor aiin lenvah an taima zawk a, thusawi pawh an thiam zawk mah duh. Bike an nei tlangpui a, tarmit an bun duh bawk.

2. KOHHRAN UPA
ᅠ Zingkar emaw tlai lam emaw i lenna/damlo kanna ah Sport Shoe simple tak emaw Savun Chapal nawhtlet chi bun, Kamis banbul bilh luh loh ha i hmuh chuan Kohhran Upa an ni duh. Inrinni tlai a nih chuan sam dumna pawh an lu ah a kai luai mai thei bawk. Inkhawm naah khiangkawi ipte hi dar vaw liama ahin a ngheh tehreng nen koki lehlamah an ak thla deuh zan kher thin a, savun ipte an ken chuan a hrui tawmkhawmin an khai bawk thin.

ᅠChi hnihin an ințhen phawk a, Upa țawngduh leh kawm nuam, kuhva leh zial pawh ti ve thei, nu ho leh Thalaite pawn an fiam a an ben thuk thuk ngam chi an awm a, in la fekfawn leh chimlim em em chi an awm bawk.
ᅠᅠ Chihnih an awm avang hian Kohhran rorel a chiri chang a awm fova, a bikin rawngbawltu rawih kawngah inhnialna an nei fo, a chimlim ho hian ri bual bual chi an ngaithei lova, tunlai mimirin an lawm ang hi an ngaisang lo lui tlat thin. Crusade Camping a Kohhran hlimna a sosan te hian an kut an ti phu ve aih aih thin a, zo vat vat se an ti rilru thei hle. Thlarau lam thil aiin Kohhran inkaihhruaina/relbawlna an No.1 thin.
‌‌ᅠᅠEngngemaw khawn nei lo chuan Kohhrante an tlawh peih bik meuh lova, Thlarau bo an pan ngai lova, thlarau bo ten an pan bawk hek lo. Thusawitu rawih kawngah duh fir leh uluk viau siin an thusawi a ngaihnawm lo thei hle a, heng ho hian thu an sawiin mipui an mutthlu nasa thei hle.

Upa leh Upa inngaisang deuha lan hi an hreh em em vek a, Upat puite thusawi laia ngaihnawm ti a lo thlir deuh deuh upa an awm ngailo. An mutthluk der loh leh chanchinbu/Bible an bih daih thin. Tualchhung, Bial leh a chungchiah te, Headquarter Committee pawimawha OB/Member nih an chak vek avangin lamțang tete an awm duh viau bawk. Bialtu Pastor Programme a zui zing deuh chu an inti thei ve hle thin.

Inla fekfawn tak Upate hi inchhung khurah an fekfawn kher lo a ni maithei. An faten Kohhran lamah an hnung an zui meuh lova, chhungkua atangin Kohhranah an mal țan ngawk a, thuneih viau an tum thin. Upa phawk tak te hi an fate an tih tlak duh viau zawk.

3. KOHHRAN ȚHALAI
ᅠᅠ Rawngbawl hi nuam an ti em em a, hrehawm tawrh tur reng an nei lo. Committee, Sumtuak hnatlang, Fellowship, Hla zir, chanchinbu chhut hi an hna pui ber a ni. In ngaizawng an awm fir fer a, inzui regular tak, hlazir ban tawh zan dar 10 vela la inzui haw fo thin, rawngbawlpui ten an sawi chhuah hreh si mit ti kham tak si an awm nual. Hnatlan, Fellowship leh thil tih hona ah thut dun kher an tum thin.

ᅠᅠAn infiam na thei hle a, inkhawmban ah biakin kawtah an hla zir chawl hi an nui khek uar uar thin, mipa ho hi an nui lum hul hul bawk thin. An pawn lang hle a, a Active ho inpawh leh innelna hi Drug Addict/Zu ngawlvei piangthar te tan in barh luh ve mai mai na chi a ni lo. An tan an hnawk tlat thin.
ᅠᅠ Țhalai zingah Pathian thu tui chilh tak Kohhran leh pawl duh khawp lohna sawi thinte chu chanvo tha an nei ngai lova, an thiante nin an hlawh a, mi Boring takah an ngai a, Evangelical Cell Member velah an hnimphum ve țawk thin.

Whatsapp Group te hi chi hrang hrang Member pumpui, Committee chin, Sub-Committee etc an nei dum a, Pathian thu a leng lo hle a, fiamthu leh inkahna a ni zantin ringawt mai. A hruaitu lamte hi a uang uangah an țang thin. Vawikhat an hla rem man hi a to hle a, an hun tam zawk an hmang a, an han rem a, an zai that leh that loh hi a hlawhtlinna an tehna ber a ni. An hla zir hla thu avanga Testimony nei sawi tur an awm ngai meuh lo. Inkhawmpui nikhua in zaipawlte zaithiam loh dan indawtin Chairman in a ko thin.
ᅠRampum huap zaipawl an zai hnuhnung ber a, Bial Zaipawlin dawtin Tualchhung Kohhran zaipawl ah pawh a lian deuhin an zui leh a Kohhran te ber an zai hmasa ber thin.

Thalai zingah hian inlamah pawh ei tui em em lemlo te hian thiltih nikhua in Refreshment an duh changkangin an duh tui thei hle. Thlarau bo ten an Programme ah hian hmun an chang tlem hle a, Picnic ni chiah si lo huau huau rawngkai an rawt chhuak thiam hle. Kar khat chhung a kan nula/tlangval fel tak tak te Programme khat lutuk en hian Chief Secretary leh DGP tur kan chat lak pawh hi thil awm tak a ni.

Veng changkang zawka ngaih Kohhran thalaia phusa te hi veng mi nghet ni lovin thingtlang atanga zirna/hnathawh vanga chhungte ina awm leh mi inluahte an ni zawk tlangpui. A awm nghet zawk thalaite hi Active member ah a tlem zawk an ni duh viau. Zaipawl Form hi inelna tling a ni tawh bawk.

Zai NUNG Zaipawl neih tum ai chuan Zaipawl, Drama/Skit, Worship Dance, Beat Group intihsiak vel hi kan tuipui mek a, Isua rawngbawla a hmangaih Thlarau bo te ngaihsak paha hengte hi buaipui lovin Heng buaipui zawk chung hian rawng an bawl pah zawk a ang hle. Thalaite zinga thusawi thei tak Bial leh tualchhunga Thalai hruaitute hi anmahni inah chuan chhung inkhawm hmang tura a tur a tur ngai an ni duh viau bawk.

4. KOHHRAN HMEICHHIA
ᅠᅠ Incheina sanna ber hmun a ni. Thalaite aiin inchei an uar zawk a, an par chhung thin. Rilru tak tak ni lova Inchawimawi/infak hluak hluak an peih hle a, an rilru chhungril ah erawh inpawhna an neilo thung. Sermon te hi tha an ti thei hle a, inkhawm ban haw kawng bak a daih zui ngailo thung. Lam mai thei hi a tam zawk an ni.

Fate sualna sawi peih tak, hahthlak ti tak leh tawngtai Subject a thawh peih takte hi fate tan tlaivar, chawnghei a tawngtai peih erawh an tlem hle. Missionary in Kohhran an tlawh hian an chibai sup sup a, an ngaihsan thu an sawi a, an fate tih ah chuan an duh miah lo thung. Nu valai leh upa lam deuh tawh ten nikum atang khan Facebook AC neih an thiam țan a, rin loh tak tak hi Fb lamah an lang leh hlawl thin. Thalaite tluk zetin Whatsapp/Phone khawih peih an tam hle.

KHAIKHAWMNA –
ᅠᅠPa ber, Nu leh fate Kohhrana inhmang țhap țhap chhungkua hi nawm hmel taka lang siin inhau tam ber an ni duh khawp mai. Chhungkhur ṭhahnemngaihna inchenlo lutuk vangin an inhau/khak tam hle.
ᅠᅠMisual ka ni, mi tling lo ka ni ti a sawi fo thin Kohhran mite nihna sawi hian an haw hle lawi thin.

Duh tawk leh phawt ang…
(A zawng zawng an ni lova, thlalak hian awmzia a nei lo.)

Advertisements
Aside | Posted on by | Tagged , , , , | Leave a comment

RUSSIA-IN US PALAI 60 A HNAWT CHHUAK VE LEH TA: YULIA SKRIPAL A THA CHHO ZEL

Russian Foreign Minister Sergei Lavrov chuan Washington-in Russia palai 60 zet an hnawhchhuah thungrul nan Moscow a US Embassy a palai 58 leh Ektarinburg khuaa US Consulate atangin 2 hnawt chhuakin, St Petersburg a US Consulate chu kharsak an ni, tiha puang ve leh ta. St Petersburg hmun an khar chhan hi Seattle khawpuia Russia Consulate kharsak thungrulhna a ni, a ti bawk.

Salisbury, England ah Russian double-agent an tih Sergei Skripal (66) leh a fanu Yulia (33) te chu Russian Spy ni a rin ten March 4 khan “Novichok” military nerve agent hmangin thah tumin beih an tawk tih a ni a, chumi thu kal zelah West ram 25 zetin Russian palaite hi 130 teh meuh an pet chhuak a ni.
Hemi chungchang hi Chhiar teh

Maj. Gen, Alexander Makhailov, Russian security agent FSB hlui chuan, hetiang thila khawvel hmaa Russia thiamloh chan tira a diklo zawnga hruaitu British PM Theresa May chu bang turin a phut tih sawiin, “Novichok nerve agent dik taka beih an nih chuan dam chhuah chi a ni lo” a ti. Russia pawhin UK sorkar chu thil awm dan kimchang puang turin leh anmahni mi leh sa Russian ngei, Sergei Skirpal te pafa awm dan puangturin an phut a, UK lam erawh chuan an ram chhunga tualthah tumna chanchin erawh puanzar tul an tilo thung.

Sergei Skirpal (66) dinhmun chuan hma ala sawn loh viau laiin, a fanu Yulia Skirpal (33) erawhin that lam a pan chak viau, tih a ni. US leh Russia chu inthungrulh tawnna (tit for tat)in an la kal chho zel a ni.

ᅠᅠᅠᅠᅠAuthor: CT Lalrinawma
ᅠᅠᅠᅠᅠᅠᅠMarch 30, 2018

Aside | Posted on by | Tagged , , , , , | Leave a comment

POPE FRANCIS-AN “HREMHMUN A AWMLO” A TI-Scalfari, founder “La Repubblica” newspaper

Good Friday, 2018—— Italy rama Liberal chanchinbu lian tak “La Repubblica” chanchinbu Founder Eungenio Scalfari chuan, Pope Francis interview a neih tumin “Hremhmun a awm lo (there is no hell)” a ti niin a ziak a, he thu hi khawvelaha darh chak hle.

Scalfari chuan Pope nen an inkawmna niawm tak, “It is an honor to be called a Revolution” tiin, La Repubblica-ah a ziak a ni.
“Misualte thlarau chu an thih hnu lawkah a awm tawh lova. Chatuana hrem ngai an awm lo a ni” tiin.

Hetiang thuziak a lo chhuah ve leh Vatican City lam chuan chhanna leh sawifiahna tichhuak nghalin, Scalfari hian Pope hi interview a neih pui hran lo tih sawiin, Scalfari hian kum 2013 ah pawh Pope Francis thusawi ziktluak lovin a tichhuak tawh tih an puang. Catholic News Agency chuan, Scalfari thuziak (article) chu “thuziak rinawmlo” (not a faithful transcript) a tihsak a ni.

Catholic blog Rorate Caeilo chuan ti hian a ziak a, “Thlarau tha” (good souls) leh “Thlarau tha lo” (bad souls) chungchangah, “They are not punished, those who repent obtain the forgiveness of God and enter the ranks of souls who contemplate him, but those who do not repent and can not therefore be forgiven disappear”-PopeFrancis, tiin.

Pope 266na, Pope Francis hi Europe khawmual pui atanga lova Roman Catholic Pope awm hmasaber a ni a, West Hemisphere atanga thlan awm chhun, Argentina khawpui Beunos Aires atanga zi chhuak niin, mi hmingtha leh sulhnu ngaihnawm ngah tak mi a ni. Kum 21 a nihin Jesuit pawl zawmin Pope Francis a nih hmain Jorge Mario Bergoglio a ni.Italy rama Fascist rorel hun lai, Benito Mussolin hlauva pi pu atanga Argentina lama tlanchhia an ni.

Author : CT Lalrinawma

Aside | Posted on by | Tagged , | Leave a comment

TRUMP-AN SECY OF VETERAN AFFAIRS ATAN ADMIRAL RONNY JACKSON A RUAT: DR. DAVID SHULKIN A BANG


President Donald Trump chuan Secretary of Veteran Affairs atan Rear Admiral Ronny L. Jackson, MD a ruat thar ta. Secy thin Dr. David Shulkin erawh a bang (resign) thung a ni. President Trump chuan Dr. Shulkin chu theihtawp chhuaha Veteran Affairs tana thawhnaah a fak a, mahse, Admiral Jackson a ruat thu hi Twitter ah a rawn puang a ni.

Admiral Ronny Jackson hi kum 2013 ah President Obama lehPresident George W.Bush te pawhin “personal physician” ah an lo hmang tawh thin a, Trump pawh nasa taka beih tawka rilru chiangkuanglo ang hiala an puh chiam tum khan, January 2018 ah a hriselna uluk takin endiksaktu kha a ni.

President Obama khan Ronny hi a fak hle a, “Ronny anga mi thianghlim leh ram hmangaihtu hi an tamlo a ni” a ti hial. Trump pawhin “personal physician” ah a hmangchho a ni. Trump a hriselna chungchang puanga darkar chuang hun hmanga press conference ah khan Trump hriselna chu a tha tawk tih sawiin, “Diet mumal tak nei phei sela chuan kum 200a dam hial thei ang” a ti.

Iraq, Italy leh US Naval Medical Center, Potmouth ah te lo thawk tawhin, mi rin kai leh hna ghawk tha a ni. President Trump chuan Rear Admiral (lower half) atangin Rear Admiral (upper half) ah kaisan tirin, hei hian a hlawh thleng a tisang chho a ni.

Author: CT Lalrinawma

Aside | Posted on by | Tagged , | Leave a comment

Assembly ah zawhna leh chhanna hun hmang.

• Asemmbly ah lehkha pawimawh pharh a ni.
• Assembly zawhna chhanna a putru. A tiputrutu man a ni.
• Mizoram Godown a buhfai awm zat.

Assembly Budget Session neih mek ni 13-na vawiinah zawhna 6 chhan a ni a, House dawhkanah lehkha pawimawh 4 pharh a ni a, Minister 2-te Demand sawihoin pass a ni.Session ṭan hun tura ruat zing dar 10 leh a chanve-ah Speaker Pu Hipheia’n chang thianghlim a chhiar hnuah zawhna leh chhanna hun hman zui nghal a ni a.

Vawiina zawhna hmasa ber, Er. Lalrinawma zawhna, starred question no. 189-na – Aizawl – Tuipang kawng Double lane laih turah hian mi eng zat hnen atangin nge ram lak tum a nih? Engtia zau nge a pumpui thu-ah lak tum a nih? A ram hlutzawngte chhut chhuahsak an ni tawh em? tihte chhangin Land Revenue & Settlement Minister Pu R. Romawia’n mi 3,288 hnen atangin ram lak tum a ni a, preliminary notification ang chuan a pumpuiah ram hectare 399.22 lak tum a ni a, a ram hlut zawng erawh chhut chhuahsak vek an la ni lo, a ti.

Nihar Kanti Chakma zawhna – Tlabung Greater Water Supply Scheme engtikah nge an thawh zawh theih ang? Estimate Amount min hrilh thei em? Tlabung Greater Water Supply-atan tui pump chhuahna tur bik transformer dah a ni tawh em? tih te chhangin
Public Health Engineering Department Minister Pu Zodintluanga’n Tlabung Greater Water Supply Scheme hi ni 5.6.2014-ah Commission a ni a, ni 22.9.2017-ah zawh fel a ni a. Estimate Amount chu Cheng Vbch 4 leh Nuai 41 a ni, a ti a. Tlabung Greater Water Supply atan tui pump chhuahna ur bik transformer dah a ni, a ti bawk.

Zawhna 3-na, Dr. K. Beichhua zawhna – Tun dinhmunah Mizoram chhungah hian supply godown eng zat nge awm? Buhfai stock eng zat nge awm? Heng supply godown-te hi buhfai stock nana hmantlak loh eng zat nge awm? Buhfai godown a mi mihring ei tlak loh a awm em? tihte chhangin Food, Civil Supplies & Consumers’ Affairs MInister Pu John Rotluangliana’n
Tunah hian Mizoram chhungah Supply Godown 155 a awm, a ti a. Mizoram chhung hmun hrang hrang Kudama Buhfai Stock awm zat, tun thla ni 6-a chhinchhiah dan chuan quintal Nuai 1 Sing 1 Sang 2 & 326.21a awm a. Buhfai dahkhawl nana hman tlak loh kudam 17 a awm a, tun thla ni 6-a chhinchhiah dan chuan Phalhrang kudam-ah mihring ei atana tlak loh buhfai quintal 50.36 a awm, a ti bawk.

Pu John Siamkunga zawhna, starred question no. 192-na – S. Vanlaiphai-a Higher Secondary School mipui ṭangrualin an din hi kan sorkar hian Adhoc Aided Status-ah min dahsak theiang em? Runzawl High School (Private), Cherhlun a mi hi dinhmun ṭha zawk Adhoc aided status-ah emaw hlankai dan min ngaihtuahsak thei em? Tarpho High School (Public) hi dinhmun ṭha zawk Adhoc aided status-ah emaw hlankai dan ngaihtuah theih a ni em? tihte chhanna chu chhanna inang vek – Tunah hian Private School-te khawtlangin a din ho hi zirchian mek an ni, tih a nih thuin School Education Minister Pu H. Rohluna’n a chhang a ni.

Zawhna 5-na, Pu K. Sangṭhuama zawhna – PHE tui bill pekna Chhinga Veng counter-ah hian bill pek theih hun last date an siamah hian bill an dawng duh ṭhin lo tih sorkar-in a hria em? Tui bill pekna counter hi tun aia zing hian a siam theih em? tihte chhangin Public Health Engineering Department Minister Pu Zodintluanga’n he thu hi zawhna a lo luh veleh Deptt. thuneitute a enfiahtir a, hetianga Bill dawn duh loh a awm thua an lo chhan avangin vawiina sorkar anga an chhanna chu Bill dawn duh loh a awm loh thu ni mah se Bill pekna Counter zawng zawngte chu last date-ah pawh Bill dawng vek turin hriattir an ni, a ti a.
ᅠOn-line-a Bill pekna te siam a nih tawh avangin tuna Aizawl khawpui hmun hrang hrang 15-a counter awm mek te chu zawi zawia tihbo tum a ni, Minister chuan a ti bawk.

Er. Lalrinwma zawhna – Tun dinhmunah zirtirtu office lama attached-a dah an awm em? Lo awm ta se mi eng zat nge dah an nih? Heng zirtirtute ai hi school lamah dah an ni em? tih chhangin School Education Minister Pu H. Rohluna’n tunah hian
ᅠ‌ᅠZirtirtu office lama attached 254 an awm a, zirtirtu indaihlohna avangin school-ah an aiawh dah an ni lo, a ti.

Zawhna leh chhanna hun hman zawh hian Speaker-in nimina House chhunga chhan tur zawhna, House-a chhan a nih hmaa Social media-a a chhanna thehdarh a ni chu pawi an tih takzet thu sawiin, a lo thehdarhtu, Assembly Secretariat-a thawk mi pakhat chu chhui chhuah a ni tawh a, Police-in an kawl mek, a ti a. A phu ang tawk, a na thei ang bera hrem nise an duh thu sawiin House member-te ngaihdamna a dil a ni.

Hemi hnu hian Spekaer-in a sawm angin Minister Pu Lalsawta’n lehkha pawimawh 3 House dawhkanah a pharh a, Minister Pu John Rotluangliana’nnimina Pu K. Sangṭhuama’n Transport Dept. Bus chungchang a zawhna a chhannaa tihdikloh awm tihdikna House dawhkanah a pharh ve bawk a.

Hemi hnu hian Minister pahnih – Pi Vanlalawmpuii Chawngthu leh Chief Minister Pu Lal Thanhawla te’n sorkar kum thar, 2018-19 chhunga an dept. enkawl hrang hrangte sum hman tur ‘demand’ House-ah an pu lut a.

Pi Vanlalawmpuii Chawngthuin pu lut hmasain, a deptt. enkawl hrang hrang 3 – Fisheries Deptt. sum mamawh Cheng Vbch 9 Nuai 2 Sing 4; Co-operation Dept. sum hman tur Cheng Vbch 17 Nuai 65 Sing 1 Sang 2; Sericulture Dept. sum mamawh, Cheng Vbch 19 Nuai 34 Sang 6, a vaiin – Cheng Vbch 46 Nuai 1 Sing 5 Sang 8 a pu lut a.

Chief Minister Pu Lal Thanhawla’n a demand pu lut zui vein, a deptt. enkawl hrang hrang 9 – Legislative Assembly sum mamawh – Cheng Vbch 25 Nuai 40 Sing 4; Governor sum mamawh Cheng Nuai 13 Sing 6; Council of Ministers sum mamawh Cheng Vbch 4 Nuai 57 Sing 9 Sang 4; Vigilance Dept. sum hman tur Cheng Vbch 6 Nuai 57 Sing 2 Sang 5; Secretariat Adminisration Dept. sum Cheng Vbch 116 Nuai 54 Sing 1 Sang 5; Personnel & Administrative Reform sum mamawh Cheng Vbch 3 Nuai 87 Sing 7 Sang 7; General Administration Deptt. sum hman tur Cheng Vbch 130 Nuai 18 Sang 7; District Council & Minority Affairs sum mamawh Cheng Vbch 365 Nuai 45 Sing 9 Sang 6; Environment, Forest& Climate Change Dept. sum hman tur Cheng Vbch 77 Nuai 58 Sing 2 Sang 2; a vaiin Cheng Vbch 730 Nuai 33 Sing 3 Sang 6 a pu lut ve leh a.

Minister pahnihte Demand hi member-te’n an sawiho hnua Minister 2-te’n sawifiah ngaite an sawifiah hnuah Speaker kaihhruaiin Minister-te demand hi pass a rem leh rem loh buka ni a, remti lo tumah an awm loh avangin Minister 2-te demand hi House-in lungrual takin a pass a ni.

Heti hian sorkar kum thar, 2018-2019-a deptt zawng zawng enkawlna tur sum, a enkawltu Minister-te’n an put luh chu pass kim a ni ta a. Heng sum hman tura pass takte hman phalna Bill, “The Mizoram Appropriation (No. 2) Bill, 2018 chu Speaker-in a sawm angin Finance Minister Pu Lalsawta’n House-ah a pu lut a. He Bill hi sawi zui lem loin House-in lungrual takin a pass ve leh a ni.

Vawiina House tih tura ruatte tih zawh fel a nih tak avangin karleh Thawhṭannia chhunzawm leh turin vawiin Session chuSpeaker Pu Hipheia’n a titawp ta a ni.

Aside | Posted on by | Tagged , | Leave a comment

Mizoram sorkar leh HPC(D) te’n thawhtanni ah inremna an ziak dawn

Mizoram sorkar leh Hmar People Convention (Democratic), HPC(D) te’n inremna an ziah dawn thu Chief Minister Pu Lal Thanhawla’n a sawi.

Vawiina Assembly Session-a a Demand sawihona a khaikhawmnaah Chief Minister Pu Lal Thanhawla chuan HPC(D) leh sorkar chu nasa takin inkap ṭhin lo mah se, hun rei tak ata tawh an innghirngho reng a, HPC(D) te hian tihluihnaa chhiah te khawnin mipui an rikrap ṭhin a, mipuiin harsatna nasa tak an tawk ṭhin, a ti a.

Hun eng emawti kal taah khan sorkar leh HPC(D) te hian inremna an lo nei tawh a, an ralthuamte pawh Sesawngah an tung a, mahse hemi ṭum hian ralthuam tak tak pakhat mah an tung tel lova; pipe chhia hlir an rawn ‘surrender’ a ni, Chief Minister chuan a ti a.

Tun ṭumah erawh hi chuan inrem duhin sorkar aiawhte nen ṭhahnemngai takin an inbia a, tunah hian inrem turin engkim tihfel a ni tawh a, Karleh thawhtanni Easter Monday-ah inremna an ziak dawn a, Mizoram sorkar aiawhin Chief Secy-in hming a ziak ang, a ti.

Mizoram sorkar leh HPCD inbiak hnuhnun ber leh political level inbiakna hmasa ber tun thla ni 7 leh ni 8-a neihah khan Sinlung Hills Development Council chu a hming thlaka Sinlung Hills Council tih zawk ni se tia rawtna a awm a. Thuneihna sang zawk pek leh inthlanna neih dan turte pawh duan a ni a. Hei hi Assembly-a dan siam tura la put luh tur a niang. Inremna thuthlung ziah hnu hian HPC (D) mite’n an ralthuam an tung nghal tura ngaih a ni.

Aside | Posted on by | Tagged , , | Leave a comment

Lawngtlai DC sawn chhan inthlan dawn hnaihah tawng lama harsat rinna vang

Tunhnai a Lawngtlai DC, Dr.Arun T, Aizawl a sawn a nih avanga lungawilohna chuan reh lam a la pan hleithei lova, vawiin khan Lai Students’ Association Office, Lawngtlai ah AllNGO Joint Meeting neiin April 7 thleng Sorkar hmalakna ngaihchan nise an ti.

Vawiin a Lawngtlai a All NGOs Joint Meeting, Lai Students’ Assn Gen.Hqrs. President Lalchhuanliana’n a kaihruai ah, hian Lawngtlai a pawl hrang hrang 13 aiawh te telin DC sawn bakah Department Head thenkhatte Sorkar in a transfer chungchang ah sorkar kaldan chu an duhkhawp loh thu an sawi a. DC chungchang bik ah pawh Central YLA leh LSA ten Mizoram Sorkar a an thuthlente chu chhanna mumal engmah Official a dawn a la nih loh vangin tuna Lawngtlai DC mawhphurhna la mektu chu Sorkar lam atanga NGO aiawhte lungawina hmuh a nih hma chuan Office hna thawk lo tura ngen nise, an ti a. State Sorkar a Lawngtlai DC sawnna Order sut tur a ngenna kalmek chu April 7 thleng ngaihchan phawt tha an ti a, Sorkar hmalakdan azirin hmalak zel dan tur chu la ngaihtuah leh ni se an ti.

Vawiin Assembly Session-ah Dr Arun T sawnchhuah a nih chhan sawiin Chief Minister Pu Lal Thanhawla chuan inthlan hnaih tawhah hnam dang a nih avangin inpuhmawhna tam tak a awm theih avang leh tawng dang hman ngai a nih avangin Dist Council hotute leh MLA ten hman atang tawha lakchhuah sak tura an tih avangin an la chhuak mai tih a sawi a, chhan dang engmah a awm lo a ni a ti a, Pu Arun T chu a hnathawh naah mi fakawm nia a hriat thu a sawi bawk.

Aside | Posted on by | Tagged , , , , | Leave a comment

Pi Lalawmpuii leh Pu Lalthanhawla te department sum mamawh pass a ni.

Vawiin Assembly Budget Sessionah Chief Minister Pu Lal Thanhawla dept enkawl hrang hrang 9 sum mamawh cheng Vbch 730 Nuai 33 Sing 3 Sang 6 vawiin khan member ten lungrual takin an pass a,A deptt. enkawl hrang hrang te hi –
Legislative Assembly sum mamawh – Cheng Vbch 25 Nuai 40 Sing 4;
Governor sum mamawh Cheng Nuai 13 Sing 6;
Council of Ministers sum mamawh Cheng Vbch 4 Nuai 57 Sing 9 Sang 4;
Vigilance Dept. sum hman tur Cheng Vbch 6 Nuai 57 Sing 2 Sang 5;
Secretariat Adminisration Dept. sum Cheng Vbch 116 Nuai 54 Sing 1 Sang 5;
Personnel & Administrative Reform sum mamawh Cheng Vbch 3 Nuai 87 Sing 7 Sang 7;
General Administration Deptt. sum hman tur Cheng Vbch 130 Nuai 18 Sang 7;
District Council & Minority Affairs sum mamawh Cheng Vbch 365 Nuai 45 Sing 9 Sang 6;
Environment, Forest & Climate Change Dept. sum hman tur Cheng Vbch 77 Nuai 58 Sing 2 Sang 2; a vaiin Cheng Vbch 730 Nuai 33 Sing 3 Sang 6 a pu lut ve leh a ni.

Pi Vanlalawmpuii Chawngthu deptt. enkawl hrang hrang 3 sum mamawh pawh pass a ni a, chungte chu–
Fisheries Deptt. sum mamawh Cheng Vbch 9 Nuai 2 Sing 4;
Co-operation Dept. sum hman tur Cheng Vbch 17 Nuai 65 Sing 1 Sang 2;
Sericulture Dept. sum mamawh, Cheng Vbch 19 Nuai 34 Sang 6, a vaiin – Cheng Vbch 46 Nuai 1 Sing 5 Sang 8 a ni.

Vawiin khan sorkar dept te sum mamawh pharh hun a tawp a, vawiin vek khan heng sum mamawh hman phalna, The Mizoram Appropriation (No. 2) Bill, 2018 chu pass nghal a ni.

Aside | Posted on by | Tagged | Leave a comment

Pwd hnathawktu ten an thawhpui misual an ṭan em ni

PWD STAFF WELFARE ASSN PRESS RELEASE

Lunglei 28/3/2018: PWD Staff Welfare Assn. Lunglei chuan thuchhuah siamin Aizawl-Thenzawl-Lunglei Road kawng chhiate siamthat hna theihtawp a kan thawhpui ten an thawh mek lai a thalo deuh lai awm te avang a kan thawhpui te Pu R.Rongurliana JE leh R.Laldinliana MR a thawk mek te chu Lunglei Police ten la in Police station-ah hruai an ni a, Pu R. Rongurliana JE chu thu zawhfiah tur a koh mai emaw kan tih laiin ‘Corruption Case in man i ni e’ tiin Lock Up ani hi keini a thawhpui te hian hriatthiam har kan ti a, kan rilru pawh a na hle a ni.

Hei mai hi ni lovin kan thawhpui R.Laldinliana, MR/Chowkidar tun a Pukpui hmun Hot Mixed Plant enkawl tur a dah mek pawh, Police ten la in Police station a hruai a ni bawk a.

A ni phei chu nasa taka vuak leh nghaisak niin amah pawh a kal thei lo leh haw thei lovin a awm a, a chhungten Police station atangin Motor a phurh hawn a ni a. Tunah pawh hian Christian Hospital, Serkawnah Admit a ni a, enkawl mek a ni.

Hetiang taka kan thawhpui te kawng tha kan neih theih nan a thahnemngai taka thawktu te a chhan leh vang mumal awm lova kut thlak an ni hi tawrh thiam har kan ti hle a ni .

Hmalak dan tur sawiho tur a DC, Lunglei in Meeting a koh mek laia kan Pute thlalak/Lim hal a lo ni leh zel phei hi chu a na kan ti takzet in a Mizo lo hle kan ti bawk.

Heng kan han sawi tak zawng zawng te hi PWD Staff te hian na kan tiin hriatthiam har kan ti a.

Tun hnuah chuan hetiang ang thil hi tuma chungah mah thleng tawh lo se tih hi kan duhthusam a ni an ti.

PWD Lunglei Circle, PWD National Highway Div-IV, PWD Quality Control Sub Div, PWD Lunglei Div, PWD Bldg. Div leh PWD Electrical Div. Welfare Secretary theuh ten hming an ziak a ni.

Aside | Posted on by | Tagged , , , , , | Leave a comment

THENZAWL VENGHLUNAH BUNGRAW CHUH HMAN LOHIN CHENNA IN A KANG

28th March, 2018 chawhma dar 11:30 vel khan Pi Neihthiangi Thenzawl Venghlun, Assam type chenna in chu bungraw chuh hman lohin a kang a, thi leh hliam an awm lo.

Pi Neihthiangi te hi chhungkaw member pali an ni a. Chhungkaw nu ber Pi Neihthiangi hi kum 80 mi vel niin mit khaw hmu lo a ni a, kangmei chhuah lai hian bathroom ah a inbual a, him dam takin an chhanchhuak hman niin thudawn a ni.

Kangmei chhuah chhan hi electric short vang a nih an ring. In kangah hian Gas cilynder bur hnih a puak a, thelh mih rual lohin kangmei hi a nasa chho ta a ni.


VC kaihhruaina hnuaiah Joint YMA te nen kang tuarte buaipui dan tur rel nghal a ni a, YMA branch hrang hrangah veh bur khawn sak phawt mai nise tiin an rel a, an chenna In sak dan tur chu zanin lamah la ngaihtuah leh an tum a ni.

Aside | Posted on by | Tagged , | Leave a comment