HAWLA FALSE AFFIDAVIT CASE UPDATE …..

Vawiin 28th march khan Pu Lal Thanhawla chu a False Affidavit case chungchang a kan puhmawhna te chhang turin Serchhip Chief Judicial Magistrate in a ko kha ani a. Amah kal lovin a Advocate Lalremsanga Nghaka a inlan a. Ani hian Pu Hawla thiamthu sawi let ve na ( Written Objection ) hi a la peih fel hman loh avangin CJM hnenah theih luh hun a dil belh chiam a. Kan CJM chuan chuti taka han ngaihtuah buai ngai emaw counter affidavits/ documents lakkhawm ngai hnem thil ani lo ve….a tih sak hnuah pawh Natural Justice spirit dik tak neiin ( Justice should not only be carried out but it should seem to be carried out as such ) ni 27th April, 2018 atan hun a pek bakah Pu Hawla hian Objection mumal submit tur a neih loh phei chuan hemi ni la la hian….Consideration of Charge , ngaihdan mumal siam thei nghal turin Order a siam ta ani.

Pathian zarah dam chuan ni 27th April, 2018 chu Pu Hawla te nen Serchhip CJM Court ah kan insat kak ve ngei dawn ani. False affidavit case a duhtawk mai tawh lovin kan ZOPHAI 509 sq miles laklet dan tur te pawh kan inhrilh hrep duh mai thei a ni.

Tak takin, Pu Hawla hi a hranpa in a Kolkata insak leh hmun hrang hrang a a ro-sum ( assets) ngah lutuk avang hian Disproportionate Assets Case ( Corruption Case ) a rang lama siamsak leh bawk ka tum a. Kolkata a in leh lo hlut zawng te pawh Govt. Registered Valuer kan chhutchhuah fel tir leh thlip thlep tawh e.

Lalpa tih chu sual huat hi ani ber a, Mizo Kristian-in Pu Hawla a huat hle chuan Lalpa a tih hle tihna ani…kan ti tlang thei tawh mai lawm mi..??? Pathianin Mizoram leh hnam a kai harh dawn…thil ropui min tih sak dawn. He indona hi Lalpa indona ani…hnehna pawh Lalpa ta ani.

Advertisements
Aside | Posted on by | Tagged , , , | Leave a comment

LAI STUDENTS’ ASSOCIATION TEN LAWNGTLAI BAWRHSAP THAR OFFICE KALTHEI LOVIN AN SIAM

Lawngtlai Bawrhsap thar, Pu N. Chakhai chu Mar 27, 2018 khan Lai Students’ Association ten pisa kal lo tura ngenin a thlenna, Lawngtlai Circuit House-ah nilengin an thutchilh.

Kar kalta a Lawngtlai Bawrhsap, Dr. Arun T., IAS sawnchhuah a nih chungchangah Lai Students’ Association te chuan thil felhlel awm ni a ngaiin Lawngtlai Bawrhsap atana Mizoram sorkar-in a dah, Pu N. Chakhai chu DC mawhphurhna la hrih lo tura an lo ngen tawh bakah Mizoram sorkar hnenah Lawngtlai bawrhsap, Dr. Arun T., sawnna chu sut leh tura ngenna an thlen tawh a, hetihlai hian Dr. Arun T., hi Aizawl-ah la cham bawk.

He an ngenna bawhzui hian Mar 27, 2018 khan Lai Students’ Association te chuan Lawngtlai Bawrhsap atana Mizoram sorkarin a dah, Pu N. Chakhai chu pisa kai lo tura ngenin nilengin Pu N. Chakhai hi a thlenna, Lawngtlai Circuit House-ah an thutchilh a, Pu N. Chakhai pawh hian Lai Students’ Association te ngenna hi ngaipawimawhin Mar 27, 2018 lama sorkar thuneitute nena meeting pawimawh neih tura alo ruahman tawh te pawh a cancelled a, pisa hi a kai lo a ni.

Lawngtlai Bawrhsap sawn a nih chungchangah hian Central Young Lai Association te pawhin Mar 26, 2018 lamah meeting neiin Mar 27, 2018 lam khan PR an tichhuak a, an thuchhuah a an tarlan danin hetia hmanhmawh taka Lawngtlai Bawrhsap, Lawngtlai district tana mi thahnemngai tak sawnchhuah a ni hi an hriatthiamloh thu leh he thilah hian thil fel lo tam tak a awm ni a an rin thu an sawi a, hei mai bakah Bawrhsap sawnna hi sut leh turin Mizoram state sorkar-ah ngenna an thlen ve bawk a, vawiina Lai Students Association te hmalakna pawh hi a hmunah an ngaihven pui a ni.

Hetihlai hian Lawngtlai police te chu boruak thalo thleng palhthei tur vengin Mar 27, 2018 zing atang khan Lawngtlai DC office tualah an duty a, boruak thalo thleng erawh a awm lo.

LSA leh Central YLA hruaitute hnen atanga thu kan dawn danin tunah hian Mizoram state sorkar thutlukna an nghak mek a, an beisei ang thu lawmawm an dawng lo a nih chuan a tul dan anga a hmalak chhunzawm zel an tum.

Hetiang a Lawngtlai DC sawn chungchang a thu a awm mek lai hian Mar 27, 2018 thleng khan Lawngtlai DC Office Chamber kawngka luchung ah chuan Dr. Arun T. hming tar a la ni.

   • Author:  Kiddy Vanchhawng

Aside | Posted on by | Tagged , , | Leave a comment

Fact-Finding team in ramri chungchangah Bairabi Zophai an tlawh.

Sorkar Laipui-a Home Ministry jt. Secy Pu Satyendra Garg kaihruaiin Mizoram leh Assam sawrkar aiawh te Fact-Finding team chuan ramri chungchang ngaihtuahin Bairabi zophai nimin march 27, 2018 khan an tlawh a.

Zophai hmun pan hma hian fact-finding team leh joint NGO aiawhte chu kolasib DC Conference Hall ah an thukhawm a. He hunah hian MZP aiawhin president Ramdinliana Renthlei leh CYMA president Pu Vanlalruata ten memorandum an thehlut a.
ᅠᅠ Pu Vanlalruata chuan Mizoram chu India Sawrkar leh thenawm State ten ram chhung ami a nih ang takin zah takin dawr thin se tha a tih thu a sawi a, ramri chungchangah pawh Sawrkar Laipui chuan fel leh dik taka thutlukna a siam a beisei thu fact-finding team hnenah hian a tarlang bawk a, tun thla ni 8 a zophai hmuna Assam Police kut tuar zirlai te leh chanchinbu mite chu zangnadawmna Sawrkar Laipui in a pek ngei a phut thu a tarlang bawk a ni.

MZP te memorandum thehluhah hian Mizo mipui tena ramri a an ngaih leh innghahna chu Bengal Eastern Frontier regulation 1873 tlawh chhana 1875 kuma ramri siam chu a nih thu tarlangin, hetih hun lai hian Mizoram chu British India emaw British myanmar hnuaiah a awmloa hemi avang hian hemi kuma ramri siam hi Mizo tena Mizoram leh Assam ramri a an pawm dan a nih thu a sawi a ni. Ministry of Home Affairs tihchhuah Prime Minister’s vision report march 2018 chuan Hailakandi a cheng mihring zaa 98 chu dan loa pemlut an nih thu tarlan a ni a, heng dan loa pem lut te lakah hian ram hloh an tumlo a ni a ti bawk. Hemi bakah hian Delhi a CS level meetinga Zophai hmun hming dang vuah a tarlan chu an pawm ngailoh tur thu a sawi bawk a ni.

Zophaiah hian Mizoram leh Assam aiawhte an thukhawm a, thutkhawm zawhah Union Jt.Secy in chanchinbu a hrilh dan chuan Zophai leh a chhehvel chu reserve area a ni a, reserve area huam chhungah eng lam mahin kut thlakloh tura an inrem thu sawiin hetih lai hian Hailakandi, Cachar leh Kolasib a Forest Hotute kaihhruaina hnuaiah joint Inspection team din a nih thu a tarlang a, he team hian April ni 30 ral hma in reserve area huam chhunga dan phalloa in emaw hmunhma sak a awm leh awmloh an enfiah anga, dan loa sak a awm anih chuan dan hnuaiah thiah a nih tur thu a sawi bawk ani.

Hemi bakah hian Union jt. Secy chuan Reserve area chu Mizoram emaw Assam emaw a nih thu sawi theih ala niloa, Union Home Secretary level ah report thehlutin la thutkhawm leh turin a beisei thu a sawi bawk a ni.

Pu Satyendra Garg chuan chanchinbu mite zawhna chhangin Hailakandi huam chhungah dan loa pemlut an awm leh awmloh a hriatloh thu sawiin an awm anih chuan Assam Sawrkar in dan ang takin hma a lak a beisei thu a sawi a, Zophai hmuna Mizoram leh Assam Police Duty te chu insaseng nghal tura a beisei thu a sawi bawk a ni.

He hunah hian Union Jt Secretary bakah hian Mizoram Sawrkar aiawhin Home Department Secretary Pu Lalrinliana Fanai, Addl Secy Pu Biakzama, Home OSD Pu David H Thangliana, Kolasib DC Pu Zarzosanga Kolasib SP Pu Abhisek Dhania bakah Sawrkar hotu dangte an tel a, Tlawngai pawl aiawhin MZP, CYMA, NESO aiawhte an tel bawka Assam Sawrkar aiawhin Home Principal Secretary Pi L.Sweety Changsan DGP R.M Singh bakah District hotute an tel a ni.

Aside | Posted on by | Tagged , , , | Leave a comment

Mizoten Professionalism kan tlachham

Mizote hian tlin lohna leh tlâkchham kan ngah hle a. Chu’ng zingah chuan mahni duty ngaih pawimawh bera neiha, thiam tak leh tling taka kan hna kan thawh theih nana zir tur ţul apiang zira, intuaihnum (up-to-date), Saptawnga Professionalisman tih hi niin ka hria.

Hmanni lawk khan chanchinbu ţhenkhat chuan, Miami Masters Tennis-a Roger Federer a chak loh vanga No. 1 nihna Rafael Nadal laka a hloh chu tun thla hnih chhung zet, Clay Season-a a khelh loh dawn bawk avangin a hloh chhunzawm dawn tiin thu an chhuah a.

Tun dinhmunah hian Federer hian Nadal hi point 100 chiah chauhin a pha lo va. Nadal hian French Open thlengin point 5000 zet hum(defend) tur a nei a. Federer chuan hum tur a nei miah lo thung. Chumi awmzia chu Nadal hian hemi chhunga champion a nihna 4 leh finalist a nihna 1 a hum vek loh chuan Federer hian awm mai mai chungin No. 1 nihna a chang leh mai zawk dawn a ni.

Hetiang thil an report dawn te hi chuan kan sports writer-te hian thlir thui deuh ţhin se, kan ti a ni e.Heng bakah hian kan TV/Radio thupuangtuten hming an lam sual nawk nawk baka thu dik lo(factually incorrect) an puan hriat tur a awm fo te hian kan hnaa kan fimkhur lohzia leh ‘serious’ lohzia a tilang ţhin bawk. Thu an puan hma darkar khat emaw talah BBC/CNN te hi ngaithla ţhin se, hnam dang hming leh ram dang hming an lamsual tam takte hi an lamsual loh phah thei ngei ang. Mizo ţawng leh khaw hming atan chuan an thawhna hmunah mi thiam zawk rawn tur an nei ngei ang a, news an chhiar hma lawk te hian script hi enpui se la an tangkaipui ngei a rinawm.

Kan ţawng hman dan dik MAL te, Language Committee tena ţhahnemngai taka min zirtir chung pawha, kan hotu luber berte a hmang dik lotua an ţang fo te hi hemi kawnga min hnungtawlhtirtu a ni. Assembly Speaker meuhin BȖK tih aia BUK a tih tlat thu te pawh kan han sawi tawh kha.

Zirtirtute hian ni khatah period 2 an la tlangpui a, chu chu darkar 2 vel bak a ni lo. Sawrkar hnathawk dangten ni khata darkar 7/8 an thawh laia hetiang tihphung kan neihna chhan hi an zirtir hna tling taka an thawh theih nana inlama inbuatsaihna hun tam tawk an neih nana tih a ni a. Zirtirtute zingah 90% vel chu hetianga inbuatsaih lo va, an hun tam tak chu mimal thil, Kohhran, Tlawmngai Pawl thil tea inhmang niin an ngaih theih a. Kan zirtirna ‘quality’ a hniam viau chhan hi chu chu a nih a rinawm.

Lehkhabu zuar dawr neite hian an lehkhabu leitu tam ber chu “Vai” zirtirtute an ni a, Mizo zirtirtu an awm ngai meuh lo an tih hian thu tam tak a sawi hmel a ni. Anni pawh hi ‘professionalism’ tlachham pawlah kan dah thei ang.

Kan sawrkar hnathawkte zingah an hnathawh nana hriat tur pawimawh hriat nana dan bu te, instructions/orders te a hranpa chhiar peih hi an tam lo hle a, a tlachawpa inzawng an ni deuh fur mai. PWD te phei hi chu kan sawi fo ţhin angin hna dawrawm tak taka thawk an ni deuh vek a. Hna thiam nana inzir chu sawi loh an hriat sa te pawh an hmang dik lo zawk ţhin ni ngeiin a lang. Kohhran upate phei chu an hna tak aia Kohhran ‘minute’ leh Kohhran thil dang, inkhawmpui etc ngai pawimawh zawk an ni fo ţhin.

Kan sawrkar hnathawkte thawhchhuah hi sumdawng hisapin chhût ta ila, hlâwkna awm lo, hlohna deuh vek an ningei ang. Chuti chunga mipui mimirte pawh kal pangngaia kan la kal zel thei hia a mak a. Central Sawrkar atanga pawisa kan hmuh hi a tam tham em a. Chutiang lengvel chu eng emaw ti kawng kawnga kan dawn tlan theih zel avangin kan la awm hram hram ni berin a lang.

Heng kan tlin lohna zawng zawngte hi chhiatni ţhatni leh Kohhran leh khawtlang thil danga kan inhmanna te, tihdan ţhaa kan ngaih zelnain a khuhmawi ţhin vang a ni ber ang.

Dan kalha thiltihna lamah erawh chuan kan fingin kan zei em em mai a. Hmun danga thil ţha thil ţha lo-a kan chantir tamzia hian chu chu ă tilang chiang hle. Chu chu kan profession leh kan professional-naber chu a ni ti ila kan sawi sual deuh ang em? Khawiah pawh mi fel fâl tlem azawng chu an awm tih erawh hria ila.

Kan hruaitute ber hi an hnaa chiang lo ber leh ‘professional’ lo ber an ni miau a, mi dang tan chuan tih ngaihna tak a awm lo chu a ni e.

• Author: Lalmanzuala.

Aside | Posted on by | Tagged , , | Leave a comment

Apple in India ah smartphone hmangtu maktaduai 10 neih tum

Cyber Media Research (CMR) in a report danin Apple chuan india rama smartphone hmangtu maktaduai 10 nei company  zinga 11 na nih tumin ṭan an la mek. Xiaomi, Lava, Oppo, leh company 7 ten maktaduai 10 hmangtu an nei mek a. 11 na hi tun kum chhungin nih ngei an tum.

ᅠApple company siam iphone te hi an to deuh avangin India ramah hralh a kal tawk lova. Phone hralhchhuah tam lamah an aia company te zawk an tluk thei meuh lo. Mahse an hlep hnem thei hle thung.

ᅠApple hian iphone hmangtu maktaduai 10 nei turin kum 8 ngawt hun an hmang dawn a, Xiaomi chuan kum 2 chauh ah an smartphone hmangtu maktaduai 10 an nei hman thung.

ᅠKum 2017 khan India a iphone hmangtu hi 8.9 million an tling a. Tun kum 2018 chhung hian 10 million tling turin beisei an ni.

Aside | Posted on by | Tagged , | Leave a comment

NATO-IN RUSSIA PALAI 10 A HNAWT CHHUAK VE LEH TA: US-WEST RAMTEN RUSSIA PALAI 115 AN PET CHHUAK TAWH

Russia Spy nia rinhlelh ten March 4-a Salisbury, England a Russian double-agent (ex-Spy of Russia)Sergei Skirpal (65) leh a fanu Yula (33) chu “Novichok” military nerve-agent hmanga thah an tum tihna thu kal zelah US leh a thawhpui West ram 23 zet te chuan, an rama Russia palai (diplomats) 115 an hnawt chhuak ta.

NATO-a Russian palai 30 awm thin zinga 10 pawh an puanthuah tela Moscow haw nghal turin hriattir an ni leh ta bawk. NATO Secretary General Jens Stoltenberg chuan, “Russia palai a tlem thei ang ber chauh awm tir tura hmalak ani” a ti.

Sergei Lavrov, Russian Foreign Minister chuan hetianga Russia palai um chhuah vak hi US hmalakna a ni, tiin a dem hle. Russia hian hetianga tih hi thungrulh ngei an tum thu an puang. “Ha aiah ha” (tit for tat) tiin, West ram leh Russia inkar chu a la khi zau zel rih a ni.

US State Dept thupuangtu Heathers-i chuan, hetiang turin karhnih chhung chu mawngvawmba ang sekin an buai pui tih a sawi a, “Russia hian ram dang tihbuai leh enthlakna chu ngawrh takin a thawk a, tihtawp a ngai a ni” a ti.

British PM Theresa May chuan, “Kan ram leilungah hetianga ngawirenga mi thahna (silent murder) lo awm hi ram pum venhimna (national security) atan a tha lova. Engtikniah emaw chuan kan khua leh tuite ngei chu hetianga tihhlum an ni thei a, kan fimkhura kan lo inven a tul” tiin, West ramten Russia palaite chu 130 zet an hnawt chhuak mai thei niin Parliament a hrilh

Novichok leh Skirpal te pafa beih an nih dan hi March 14 ah kimchangin post siam tawh thin a ni e. ↓↓

RUSSIA SPY-TEN TURIN MI AN HRAIHLUM THIN EM NI? : UK-AH RUSSIAN 14 AN THI TA :  UK LEH RUSSIA INKAR BORUAK A CHHE CHHO HLE

March 14, 2018 (MSR): Niminah Russian pa, President Vladimir Putin hlauva Britain rama tlanchhiaa political asylum diltu leh Putin sawisel rengtu (critics) Nikolai Glushkov ((68) chu London-ah a chennah thi a hmuh niin, nerve agent hmanga thah ni ngeiin a Ukil chuan a sawi. Hemi hma lawk hian Russian Spy hna lo thawk thin, double agent Sergei Skripal te pafa chu, a fanu nen an chenna Salisbury, UK ah  novichok hmanga beih niin an sawi a, an dinhmun a thalo hle. Hemi lo pawh Boris Berezovsky pawh thah a lo ni tawh bawk.
ᅠᅠHetianga Russia ram atanga tlanchhia thah zuina hi British PM Theresa May chuan Russia sorkar thiltihah ngaiin, hremna lek a tum a, Nilaini khan National Security Council meeting pawimawh a ko nghal a ni. Hemi hma hian US President Donald Trump chu biain, Trump chuan PM Theresa May chu eng pawh ti se, full support a pek thu a hrilh. PM May hian EU leh NATO hruaitute bakah, Germany Chancellor Angela Markel-i pawh thil awm dan a sawi pui a ni.
ᅠᅠUK’s Home Secy Amber Rudd chuan UK secret police leh security service MI5 hotute hmuin, hetianga Russia link thihna hi chhui chiang turin a hrilh bawk. Heng Russian thite taksaah hian nerve agent an tih “Novichok” an hmu thin a sawi a ni. Novochok hi kum 1970’s-1980 khan Cold War laiin Russia hian a lo siam chhuak tawh a ni.
ᅠᅠNikolai Glushkov (68) hi 1990’s khan Airlines pakhat Aeroflot leh Berezkovsky LogoVaz company ah Finance Director niin, US$ maktaduai 122 tichingpena puhin man a ni a, 1999 ah Putin-an jail ah a khung tir a; kum 5 a tan hnuah chhuah a ni a, UK ah 2004 ah a tlanchhe zui a, 2006 ah political asylum pek a ni.
ᅠᅠHman kum 2006 khan President Putin a sawisel thin, KGB agent hlui Alexander Litvinenko chu “radio-active polonium” hmangin, London ah vek tihhlum a lo ni tawh bawk. UK-ah ringawt President Putin a sawisel thintu Russian mi 14 an thi tawh a ni, an ti.
ᅠᅠHetiang thil hi Russian chuan nasa taka phain, “finfiahna awmlo” tiin a sawisel a. Maria Zarkhorova, Russian Foreign Ministry thupuangtu chuan, “UK-in hremna a lek kawh vaih chuan kan theih ang angin, kan thungrul dawn a ni” a ti.
                   CT Lalrinawma

PM Theresa May chuan, “Novichok” tur hmanga inbeihna chununrawng thiltih (barberic act) a nih thu leh Skirpal leh a fanu Yulia te chu an dinhmun a la tha lo hle, tha taka an dam chhuah leh a beiseiawm lo, a ti.

British sorkar chuan “Novichok” nerve-agent kai an awm em tiin, mi 50 chuang chu hospital-ah an enfiah tawh a ni. Yulia-i te pafa buaipuitu Police DS Nick Bailey pawh a taksaah tur hlauhawm a kai em tih uluk takin an check bawk a, ani hi chu hospital atanga chhuah tir a ni tawh.

Salisbury hmuna Zizzi Restaurant leh Mill Pub te chu Yulia-i te pafa-in an tlawh vangin, chungte pawh chu anti-chemical weapons police ten chhuiin an enfiah a, Skirpal te thutna leh nikhaw hre lova an tlukna Salisbury Park-a thutthleng sei te pawh uluk takin enfiah a ni.

Thuthang pakhatah chuan Sergei Skirpal hian Russia ram tlanchhiat san mahse, an ram chu a ngaih em vangin President Vladimir Putin hnenah ngaihdam a dil a, a rama kir leh a duh a ni, mahse, Putin-a chuan a ngaidam duhlo, an ti. He thuthang hi Kremlin erawhin a pha nasa hle. Sergei Skirpalhi Russia Spy agent thin niin, sum eirua puhin man tura tih a ni. Chumi a man hlau chu sahimna zawngin UK-ah kum 2010 khan a tlan lut a, chu chu “Novichok” hmanga thah tuma um zui a ni ta a ni.

Russian ex-Spy Alexander Lenenvitko pawh England-ah a thingpui in turah “polonium” hmanga hrai hlum a lo ni tawh a ni. Chutiang titua police-in man tura a tih chu Moscow lamin UK a thawn turin an pe duh lo. Hei vang hian Russia leh Britain inkar hi a lo chhe hle tawh thin.

“NOVICHOK” A HLAUHAWM RENG EM?
ᅠᅠSoviet Union an nih laia Nuclear Scientist pakhat Vladimir Uglev chuan “Novichok” chu hlauhawm tak a ni tih sawiin, a tirah “novichok” ni lovin, a codename-ah “Foliant” tih a ni, a ti. Uglev hi Soviet scientist 3 zinga “Novichok” top-secret chungchang sawifiahtu a ni. Russia chuan “Novichok hi kan siam a ni lo, British hovin an siam chawp leh World Cup lo awm tur tihbahlah tumna a ni,” an ti thung.

Vladimir Uglev chuan kum 1995 a Ivan Kiridi (Banker) tihhluma nih khan, amah ngei pawh police ten ringhlelin thu an zawt tih a sawi a, an company secretary Leonid Rick pawh hren a ni. Uglev te hian Volga River kamah Nerve-agent Lab/ company an nei a, heta an Labaratory ah “novichok” hi siam a nih ringin thu zawhfiah a ni, tiin Novaya Gazeta (Russian) chanchinbu chuan a ziak.

Uglev hi tun hma chuan USSR’s State Scienctific Research Insitute of Organic Chemistry & Technology, Shikhanny -Saratov hmunah 1972-73 ah a lo thawk tawh thin a ni. A sawi dan chuan novichok siam chhuah tumin, tihpalh thilthu ah mi 3 in an thih phah, a ti.

Kum 1993 khan Russia chuan Organization of Chemical Weapons Convention-ah ram 192 zinga signatory a nih dawn khan a sawi tel a, kum 1990’s chhova siam “Foliant nerve agent” chu chemical weapons tihbo tur zingah a tel tih a ni. Mahse, a rukin a lo kawl tha nge ni, tunah khawvelin an buaipui ta hle a nih hi. Novichok an tih tak hi 1970’s-1980’s daih tawhkhan, Soviet Union hun laia siam chhuah niin an sawi a, an siam chhuahna lamah Scientist Andrei Zheleznyakov leh officers 2 in nunna an chan phah, an ti.

US chuan Russia ramah Diplomats 755 a nei a, Moscow a Embassy bakah, Consulate Office chu St. Petersburg, Vladisvostok leh Yakateriburg ah a nei a, heng Consulate te hi Russia chuan a kharsak ve a rinawm.EU ram 28 zingah Austria, Greece, Portugal, Malta tih loh chuan Britain leh US thlawpin Russia palai an ram atangin an hnawt chhuak theuhva, a tam zawng erawh a in ang lo.

Kum 1986 khan President Ronald Reagan chuan Soviet Diplomats 55 a lo hnawt chhuak a, kum 2001-ah President George W Bush chuan Russian palai 50 zet a hnawl bawk a, tunah President Donald Trump-an Russia palai 60 a pet chhuak a ni.

ᅠᅠᅠAuthor : CT Lalrinawma

Aside | Posted on by | Tagged , , , , | 1 Comment

IN NEI LOTE INSAKNA TUR PMAY-HFA HNUAIAH DPR RS.236.97 APPROVED NIIN, RS.57.48 CR SANCTION A NI

In sakna nei loten in an sak ve theih nan Mizoramin chenna in nei lo chhungkaw 15,798 tan Rs.236.97 lakhs a dawng dawn. PMAY-Housing For All (Urban) hnuaia in nei loten in an sak ve theihna tur hi Beneficiary-Led Construction (BLC) component hnuaia mi a ni a, chhungkaw pakhatin Rs.1.5 lakhs theuh an dawng dawn a ni. He pawisa hian Mizoram chhunga urban area 23 te chu a huam vek dawn a ni.

Hemi chungchangah hian UD&PA changtu Minister Pu Zodintluanga chuan mi harsa zawktena in an lo neih ve theih nana DPR hautak zet mai siam leh buaipui a, a hlawhtlinna kan hmu ta hi Department-a thawktute thawhrimna rah a ni tih sawiin Department-a thawktute zawng zawng chungah lawmthu a sawi a. Tunah chuan mi harsa zawk, in sakna nei loten sakna an lo nei ve thei dawn tawh a, Sorkar pawhin tumah inthliarna awm lova In nei lo, danin dil thei tur chin a bituk apiangte chu Department-in an lo dawnsawn vek tawh dawn a ni tiin Minister chuan HFA chu inthliarna chi a nih loh thu leh huapzo programme a nih thu a sawi bawk.

Sawrkar laipuiin in nei lote tana in sak sakna tur Pradhan Mantri Awas Yojana-Housing For All (Urban) a kalpui mekah Mizoram chhungah Aizawl khawpui leh census towns 22 atan Mizoram Sorkara UD&PA Department chuan Housing Demand Survey neiin in sakna nei lote tan dilna hun a hawng a. Hetiang in sakna dil thei chu mi harsa zawk (Economically Weaker Section –EWS), in nei lo leh kum khat chhunga sum lak luh zawng zawng nuai thum aia tam lo te an ni. India Sorkarin PMAY-HFA a kalpui tan tirh atangin Mizoram State chuan theih tawp chhuahin, District tinah DC kaihhruaina hnuaiah District Screening Committee kaltlangin PMAY-HFA Guidelines sawi anga dil thei ngei an nih leh nih loh enfiah leh thlitfim an ni a, dil thei ngei an nih chuan a diltu apiang chu thlei bik nei lovin DSC hian Sorkarah a thlen zel a ni.

Mizoram chhunga urban area hrang hrangah demand assessment neih hnuah Mizoram Sorkara UD&PA Department chuan application a dawn zawng zawng 39,696 atangin 29,354 chu dil thei (eligible) an ni ngei tih a finfiah hnuah DPR siamin Central Sorkarah dilna a thehlut a ni. Demand survey hi state dang aia kan tihzawh hma avangin Ministry of Housing & Urban Affairs hotute chuan sanction hmasak zingah Mizoram chu a telh a, hmalakna hmasa atan Aizawl leh Lawngtlai thlangin Aizawlah beneficiary 846 leh Lawngtlaiah beneficiary 500 tan sanction hmuh nghal a ni a, a rang thei ang berin kalpui nghal a ni. Amaherawhchu Sorkar kalphungah beneficiary-te hnena pawisa direct-a pek tur a nih avangin engemaw zat thlan tawh sa te zingah bank account leh Aadhaar Card fel loh vangin duh angin hmalak zung zung a ni thei lo a, mahse bank account leh Aadhaar Card chungchanga harsanate chu tun dinhmunah chuan a harsa zualpui chu sutkian a ni tawh nghe nghe a ni.

Mizoram urban area chhunga in nei loten in an lo neih ve theih nana demand survey mila DPR siam hi UD&PA Department aiawhten Ministry of Housing & Urban Affairs, Govt. of India hnuaia Central Sanctioning & Monitoring Committee (CSMC) hmaah 26th March, 2018 khan New Delhi-ah an zuk sawifiah a, CSMC hian ngun taka a lo thlir hnuah DPR approval hi a lo pe ta a ni. PMAY-HFA (U) Mizoram kalpuina tur DPR hi approve a nih takah chuan Central Sorkar pawhin release thuai theih a inbeisei a, March 2018 tawpah a release hman loh pawhin April 2018-ah chuan release hman ngei a inbeisei thu UD&PA Department aiawhte an hrilh a ni.

Aside | Posted on by | Tagged , | Leave a comment

LUNGLEI CIVIL HOSPITAL A CT SCAN A BO? By Ramtea Chhangte

February ni 12 ,2018 chhuakah Vanglaini palaiin Hospital & Medical Education Department hotute thusawi a ziah dan chuan Aizawl Civil Hospital bakah Lunglei Civil Hospital, Mizoram State Cancer Institute leh State Referral Hospital ah CT Scan khawl dah a nih thu hmuh a ni a.
ᅠCT Scan khawl hi pakhat Rs.280 lakhs man a nih thu pawh Vanglaini chanchinbu hian a ziak nghe nghe a ni.
Ti hian :

Mizoram sorkar chuan State Referral Hospital leh district hrang hranga damdawi-in thuam ṭhat nan New Economic Development Programme (NEDP) aṭangin cheng vbc. 72 man hmanraw chi hrang hrang ṭha a lei tawh. Sorkar kum tharah pawh State Referral Hospital-a medical college dinna tura thuam nan cheng vbc. 20dah leh tum a ni.
ᅠᅠHospital & Medical Education (HME) department hotute sawi danin, State ReferalHospital-a ‘Mizoram Institute of Medical Education and Research (MIMER) din tura sorkarin hma a laknaah, NEDP aṭangin kum 2016-17 chhungin cheng vbc. 28 hman a ni a, kum 2017-18 chhungin vbc. 15 hman leh niin, sorkar kum thar 2018-19 chhungin vbc.20 dah leh tum a ni.
ᅠᅠNEDP sum hmangin Mizorama damdawi-in ṭhenkhata hman tur hmanruate pawh lei a ni a, tunah hian ram dang aṭanga hmanraw ṭha tak tak – Rs. 11,58,975 man incenerator, Rs. 15,43,596 man oxygen plant, Rs. 33,60,000 man dialysis machine leh IOKVA UPS Rs. 5,23,000 mante chu lo thleng mai tura ngaih a ni…………………..
ᅠᅠHME department hotute sawi danin, NEDP sum hmangin district hospital-te pawh thuam chak mek a ni a, district hospital thuam ṭhat nan hian kum 2016-17 khan cheng nuai 900 leh 2017-18 chhungin nuai 2000 pek a ni; kum 2018-19 chhunga pek zat tur erawh hriat a la ni lo.
ᅠᅠNEDP sum hmangin district hospital tan ultrasound, endoscopy, digital x-ray leh colposcope khawl tharte lei a ni. Chief Minister-in district hospital zawng zawngah CT Scan dah vek a duh thu a sawi tawh a; CT Scan khawl pakhat chu cheng nuai 280 man a ni a, Mizoram STate Cancer Institute, State Referral Hospital, Aizawl Civil Hospital leh Lunglei Civil Hospital-ah te awm tawh mah se, radiologist an indaih loh avangin district hospital dangah an la dah thei lo niin an sawi.

Nimin March 27, 2018 khan Assembly House ah MNF MLA Pu Lalruatkima zawhna Health Minister Pu Lal Thanzara’n ziakin ti hian a chhang.

Pu Rk-a : CT Scan hi engtik ah nge lei a nih a, engzat nge lei a nih? Engzah man nge, tute nge supplier?
Pu Thanzara : CT Scan hi February , 2013 khan pakhat lei a ni. CT Scan man hi Rs. 1.65 crore man a ni a, supplier chu WiproGE Pvt.Lts., Bangalore a ni.

Pu Rka : District Hospital CT Scan neilo an awm em? An awm chuan khawi Hospital te nge ?
Pu Thanzara : Awm e. CT Scan hi District Hospitals Lunglei, Siaha , Lawngtlai, Serchhip, Champhai, Kolasib, leh Mamit ah te hian a awm lo.

Hetih lai hian Mizoram Pradesh Congress Committee ( MPCC) official website ah chuan Lunglei Civil Hospital ah CT Scan (16- Slice) hi bun a nih tawh thu leh NEC fund ațanga lei a nih thu hmuh a ni!

Nimin march 27 , 2018 thleng khan Lunglei Civil Hospital ah hian CT Scan hmel hmuh tur a awm lo.

Aside | Posted on by | Tagged , , | Leave a comment

PWD ENGINEER LEH POLICE HOTU THENKHAT TRANSFER LEH POSTING ORDER TI CHHUAK

Nimin 27th March, 2018 khan Mizoram sorkar chuan PWD Engineer thenkhat leh Police hotu thenkhat transfer & posting order a tichhuak.PWD Road Division Lungleia SDO (Tlawng kawng viltu ni bawk) Pu Samuel Lalnunpuia MES chu Lawngtlai Division ah SDO (TC) hna chelh turin sawn a ni a, a aiah Pu Lalhmangaihzuala AE, Engineer in Chief Office hnuaia thawk lai chu dah a ni. PWD, Road Division Lungleia EE hna chelh mektu Pu Lalchhuana pawh EE (Works) hna chelh turin CE (Highway) Office, Aizawlah sawn a ni a, PWD Road Division, Lungleia EE atan Pu Samuel Ramdinthara CE Office a EE (Works) chelh mek chu dah a ni bawk.

Hetih rual hian Police officer transfer leh posting pawh tihchhuah a ni a. Pu Mukesh Kumar Meena Addl. DGP chu Director, ACB ah dah a ni a, Pu Neeraj Thakhur IGP(Intelligence) chu IGP ah dah a ni. Pu LH Shanliana Director ACB chu IGP (Iintelligence & Law & order) ah dah a ni a, Pu Joseh Lalchhuana DIG(Northen Range/Southern Range) chu DIG (Training ah dah a ni a, Pu John Laldina OSD(PHQ) chu DIG (Hqrs) ah, Pu Lalbiakthanga Khiangte DIG(Hqrs/Training) chu DIG (Nothern Range ah, Pu Davesh Kumar Mehrta chu SP Mamitah, Pu Neihchungnunga SP Aizawl chu DIG(Sothern Range) ah dah a ni.

Author: Vanneihthanga Vanchhawng

Aside | Posted on by | Tagged , , | Leave a comment

SORKAR HNATHAWK DINHMUN

1.OFFICER LIAN –
ᅠSecretary chinah ngai ila, an Cool deuh raih a, thil tam tak an hria a, hria angin an awm duh meuh lo. Incheina pawh an Simple phian a, Kamis banbul leh bantluan a ni deuh tawp mai. Ministry ah biak țhat tur chin an hre hle a, Minister fingvar vaklo chu tih takzetin an bawl hneh thin hle.
ᅠHeng ho zingah hian an nupuite anmahni aia tawhkhirh zawk an awm nual a, pasalte aia lo Officer zawk an awm nual. Kohhranah chanvo pawimawh an chang duh hle a, an nupuite hi Pangpar Committee velah an phusa duh viau bawk.

2.OFFICER TENAU –
ᅠHeng ho hi Officer lian aiin an inti Officer mah zawk a, Secondhand Velvet Coat ûk an ha duh. Engineer an nih chuan chakai khawrh kawr leh Sneaker an nei Ori thei hle thung. Sorkar kalphung thuk tak hre pha chiah si lovin an inti hre thei hle a, Minister Appointment an neih te hian an intithei thin hle a, an sawi sek thin. Sub-Division leh District chinah an awm chuan an chungah awm an awm tawh lo emaw tih mai turin an ila lal thiam ve hle thin.
ᅠKohhran an belh chuan puitling Sunday School zirtirtu an ni duh a, Christmas fatu ah an ruat fuh hlauh chuan chem an nei nalhin an inti thei hle thin. Uisa an ngaina tlangpui bawk.

3.OFFICER NGHET LO –
ᅠOfficer hming pu ve si Sorkar Motor pawh kawl a hawl chhuak ve thei an awm. RD Department ah hian Central Project hnuaiah SIRD ah te Faculty, Asst Director, Director etc a awm a, chutiangin Health Department ah NRHM velah a awm bawk. Post hming ropui tak tak nghet si lo an awm nual a ni. SSA leh RMSA ah hian Dy Project Director, Dy. District Coordinator tih vel ah hian Middle School leh High School Zirtirtu thenkhat Deputation in an dah bawk a, Post hming a ropui ang hu in thil erawh an ti thei lem lo.
ᅠMotor ah Designation Plate an tar a, nuam an ti em em a ni. A hrechiang lemlo tan chuan lal hmel tak chu an ni ve.

4. LDC, UDC, ASSITANT LEVEL –
ᅠHeng ho hi Office a hna tak tak thawktute an ni a, thiante leh chhungte bulah “Kan pi” “Kan pu” tih sawi an peih hle a, in tih theih nan tak hmangin an sawi ve sek thin. Office bana an pute Motor a an chuan haw ve hlauh chang hian an inti thei hle a, sawi nuam an ti viau thin. An pu/an pi bikte hian duhsak bik viau ang hian an in sawi deuh vek țhin.
ᅠOnline Shopping vel Office ah an sawi peih hle. Incheina an ti sang tlangpui a, a bikin Office ah biak an har an tih hi heng Level ho hi an ni tlangpui.
ᅠAn in thîk ru țham a,pute laka tlaktlum tum ran vek an ni. A hmei a pa in lirthei an lawm hle a, Scooty/Bike emaw Secondhand Car emaw neih an tum deuh vek țhin. An titi thui deuh chuan “Office ah chuan” tih țawngkam hi an zep thuai mai thin.

5. POLICE
ᅠSub-Inspector(SI) chin hnuailamah hian mahni hna ning hi 80% aimahin an tam ang. An level pui hnanghet dang thawhtur awm se an chak ngawih ngawih deuh vek a ni. An hah hle a, an hlawh a chuti lua lo. MPS Junior te te ai chuan Inspector te hian hna an thiamin dan an hre zawk mah a, SDPO te hian a rukin an rawn duk duk zawk thin.
ᅠ Constable chin hian Bike neih vek an tum emaw tih tur a ni a, hlawh tam si lovin Loan hmangin a tam zawkin Bike an lei a, tunlai phei chi Bullet Bike an intih hmuh a, hlawh tlem nak laiin Loan ah hlawh an han Cut leh chu zu inmi phei chuan chan an nei tlemve thin hle.
ᅠZu in an tam hle a, Duty hleithei lo, hrem dawna tihtak tak theih si loh an awm nual. Traffic Police te hi an inpawlhsawp ve hle a, IR, MAP, Homeguard thlengin an awm nuai mai.
ᅠCity Police ah hian 6ft a ngaih angin sang tak tak anawm nual a, taksa inphut tak an vang hle a, cher kur diau duau an tam hle a, an sang a, an chak hmel lem loh thung.

6. ZIRTIRTU
ᅠZirtirtu hi chihrang an tam khawp mai. A nghet pangngai, Contract, CSS te an ni nuai mai. A nghet pangngai Senior ho hi an awmna khuaah an Subject zirtir aiin khawtlang leh Kohhran kaihhruai an hnehsawh zawk a, Kohhran Upa an tam hle. A senior ho hian School tan thahnem an ngai teh chiam tawh thin lo.
ᅠ‌ᅠA Junior deuh ho ah hian fel deuh deuh School leh zirna atana thahnemngai an awm nual a, a in chi an nih chuan Headmaster tan pawh tih ngaihna vak an awm lova, an in tha en vel mai mai thin.
ᅠᅠSSA leh RMSA a thawkte hi kum lama naupang zawk an ni tlangpui a, hnadang hmu si loin an in ti Bright thei hle a, fing ziktluak si lovin an inti fing viau hlawm bawk. SSA Staff tam zawk hi MNF hunlaia lak niin Congress hunlai hian thawm an nei vak lo. RMSA ah hi chuan Congress hunlaia lak deuh vek an ni a, Politics lama hmelhriat inti neitha tak tak an tam hle, Zirtirtu nisi, District Office, Directorate leh Secretariat a hmelhriat neih that avanga țhu vung pawl pawh an awm.

7. SORKAR HNATHAWK POLITICIAN
ᅠOffice tin ah an awm. Heng ho hian an dawhkanah chanchinbu an pharh duai thin a, an Party țan zawngte thup tum viau mahse an tui zawng atangin an thawhpuiten an chiang viau mai. Chanchinbu leh tunlai thilthleng atangin Politics rawngkai thawhpuite rilru en nan titi tur an vawrh chhuak thiam hle. Thingtlang lam dawrtute an neihin in bial lam engnge a an hmel? tih angreng an lo sawipui hram thin.
ᅠRuling lam mi an nih chuan Transfer/Posting ah hlauhthawn an nei lo hle a, Office ah pawh an thaw viau thin.
ᅠOpposition lam mi an nih chuan Ruling dem chiah lova Sorkar demna an sawichhuak thiam thin hle.

******************

Aside | Posted on by | Tagged , | Leave a comment