NAUPANG NATNA LEH DAMDAWI CHUNGCHANG HRIATSUAL AWM THIN TE By : Dr. Lalhmuchhuaka

1. Lei durh leh Ka chhung na, pumpui chak loh hnathawh emaw kan tih hi a ni lo a, amaha lo na ve zawk a ni.

2. Nausen bual dawna a bualna tur tui pek hi chin loh tur, Naute damlohna thlen theitu zawk a ni.

3. Ha to dawna Kawthalo hi Ha to hrim hrim vang ni lovin, Ha ziau vanga thil hrang hrang an ei thin vanga Kawthalo an ni zawk.

4. Damdawi chhin hi naupang damdawi pekna tur a ni lo va, a chhin Plastic hi tehnaa hman zawk tur a ni.

5. Saisu rah awrhin naupang kaih a veng lo. Kaih tam ber, Febrile Convulsion hi amaha reh mai thin a ni.

6. Naupang ha thial hi Rulhut pai vang ni lovin, tlakchham neih vang zawk a ni. Tlakchham siamtu hrang hrang karah Rulhut pai hi a ni ve thei mai zawk a ni.

7. Nuin a chhang tur a paisan hian nu Hnutetui a chhe chuang lo. Nautein a hne chhunzawm zel tur a ni zawk. Nau Nuhah kan tih pawh hi Hnutetui leh Eitur tha kham khawp kan pek loh vang a ni zawk.

.8. Vitamins hi Than duhna leh Len thur thurna a ni lo. Vitamins mamawh lo inpek ve tawp kan ching. Hah dam, Chaw ei that, Hmawmsawm ei tlem, Thei ei tam etc. hi than duhna leh len thur thurna a ni zawk.

9. Nau thimhlim sual, Zan tah vei kan tih thin hi thil dang ni lovin, an puar that tawk loh vang te, an lum that tawk loh vang te, hnute an hnek laia boruak an lem palh vanga an pum nat vang te a ni fo zawk. Puar tha taka hnute dik taka hnektirin a reh mai. Naute hnute sual thin te pawh pawm dan dik thlapa hnek tirin a reh mai.

10. Awmnapui (Pneumonia) mi tam ber chuan an vei nawn sek lo. Awm na leng thin tam ber hi Viral leh Allergy vang a ni zawk. Rei tak khuh phei chu Pneumonia vang ni lovin, thil dang vang a ni fo.

I fa kha a hriselna a tha em?? Nu leh pa hian mawhphurhna sang tak kan nei ve a nia.

Advertisements
Aside | Posted on by | Tagged , , | Leave a comment

Muslim triple talag chu ram danpui kalh, thu tlinglo a ni

Supreme Court chuan muslim sakhaw zuituten inthenna atana triple talaq an chham thin chu ram danpui kalh, dan bawhchhiatna leh thu tlinglo a ni a ti. He thutlukna siamtu judge zinga a tam zawkin an thlawp a, Supreme court chuan triple talaq chu Quran zirtirna bul nena inkalh a ni a, pawm theih a ni lo a ti.

Judge pathumte chuan triple talaq hi dan mumal lo leh ramdanpui bawhchhiatna a ni a, tihtawp a ngai a ni an ti bawk.

He thu ngaihtuahtu bench-ah hian sakhaw hrang hrang-Sikh, Christian, Parsi, Hindu leh Muslim-te an tel a. Petition pasarih an ngaihtuah a, heng zinga panga hi muslim hmeichhiate’n an an thehluh a ni a.

Triple talaq danah chuan muslim mipaten an nupuite awlsam taka then turin talaq vawi thum an chham thin a, Muslim hmeichhiate chuan he dan hi an khing ta a ni.

Supreme Court thutlukna hi PM Narendra Modi, BJP President Amit Shah leh hruaitu dangten ropui an tih thu leh an lawm thu an sawi a ni.

Aside | Posted on by | Tagged , , | Leave a comment

CHHIATNA, KAWNG LEH A CHHEHVEL

• Kawng chhia a tam.
• MBBS Seat qouta tihtlem a ni.

Kumin chho chu tualchhunga kan boruak hip a zangkhai lo hle mai. Tui lian leh leimin rapthlak pui pui thawm, kan hriat ve țhin aia hriat hrehawm kan hre nasa a, mi vanduaite tuarna a nasa hle mai. Fur ruahtui a tam a, kawng chhiat a zual a ni mai thei. Hawina lam apiangah kawng a chhe hle vek emaw tih tur a ni a, Mamit lamah Maxicab-a kawng chhiat thu ziah pawh huat thu a tling a, Champhai lah chu vanram ang mai, hrehawm tam tak tuara thlen ngai a ni ta hial. Silchar lam lah chu, Sairang lam kawng nuam țhin kha, tu pa mo nei sual emaw ang deuhin, a țha zawk kha a chhe zawk a lo ni leh tawh a, khualzinte pawhin Sihphir lamkawng an zawh tam leh ta. Lunglei lam hi, tun hnaiah engnge a an, ka hre chiah lo.

Khawpui chhungah pawh, Bawngkawn leh Zemabawk Helipad inkarte hi a țha thei ngang lo a, veng tam takah kawng a chhe hle a, a țhen chu SIPMIU sulhnu, siam țhat lohva kalsan rihte a ni a, a țhen hi PWD-in khawih an phal rih lo, te hi an ti deuh emaw ni?

Khawpui dai féma Tuirial kawng pawh, thâwk khat lai khan kan han ri hak a, hotuten an en rup rup a, ri hak kha a reh a, kawng chu a țha chuang hlei lo a. Tlang ram kan ni a, ruahtui a tam bawk si a, kawng a țha mawh a ni, kan ti a, mi ramah ruahtui a tam ve tho an ti leh bawk si!

Burma ramah, Thán tlanga kan tlan laiin sàn lam tehnaah tuipui zàwl ațangin feet 7,600 chuang a ni a, Phawngpui tlang aiinfeet 500 zetin a sang zawk a, kawngpui zau namai lo tak tur an sial ruah mai bawk si. Tlang ram, ruahtui tam si kan nih vang ngawt hi chu a ni dawn em maw ni? Hotute leh mi thiam zawkten an tih miau si chuan, Engineering ni khat pawh zir ve lo hi huai takin kan țawng ngam bawk si lo.

Kan hriat erawh chu – kan kawng hi a țha lo takzet a, kan ngai pawimawh tâwk lo niin kan hre bawk a, mutmawh hnar mawhah neih ila chuan, kan ziaawm ang tih hi kan ring bawk a ni.

Kawng chungchang bâkah Chakma lam thawm a lo lian leh a, chumi kal zelah chuan Minister of State pakhat a báng ta hial a, a bàn hi Chakma te avanga kan harsatna sutkianna ni tak ang maw? Sawi ngam a har khawp mai. Țangrual thei ila, kan thil duh leh țhahnemngaihna te hi dan hnuaiah awmze nei deuha lantir turin, tu pawl mah hian an lakah beisei nei lo ngam ila chuan, kan phawkhai a ruai deuh mahna. Inthlan a lo hnai leh ang a, an zara thuneihna chan emaw kan duh leh tlat si chuan, kan mamawhte lakah chuan khauh a har țhin si. Hmanah Kumpinu lalțhutthleng chungchangah kan rual u fe-te khan, ‘Lalțhutthleng leh nuthlawi an bùk leh dawn e, nuthlawi a käng lo a pawi ber mai’ an lo ti daih tawh a, lalțhutthleng hi engkim bùk nan kan hman chuan, kan ram leh hnam hi chu a käng zel ang tih a hlauhawm ngawt mai.

Hei, nimin lawkah MBBS seat kan neih țhin chu nikum aiin 8 laiin a tlem ta tih leh, tuna kan la neih ve hram hramna te pawh College țha ber ber a ni tawh lo khawp mai tihte kan lo hre leh ta a, AIIMS, Lady Hardinge, Maulana Azad, JIPMER ilo-ah te khan kan la nei em? Kan lo fual fe tawh reng em, ka hre chiah lo. Politics-a kan inbeihnaah pawh hmasawn zel kan mamawh khawp mai a, kan țanrual thiam lohzia leh, kan lungawina riau hre fuh laklawhte hian min zuam riau ang tih a hlauhawm ta khawp mai. Engkim hi politics ngaihtuah dana ngaihtuah vek tur a nih ka ring lo a, ram leh hnam tana țhahnemngaia mi sawite hi rorel lai pawl mi nih avanga huatthu-a lâk vek tur a ni lo ang chiahin, eptu lam rilru pute pawhin, ram leh mipuite țhatna tur aiin rorel lai pawl tihmualpho kan tuipui ang tih a hlauhawm tho. Kan ram hi hmasawn mamawh zual tak ni pawhin a lang a, kawng tam takah hian kan țanrual a, a huhoa kan chêt thiam loh chuan, tuna tifuh emaw intite pawh hian kan la tuar ve tho dawn asin.

Tûk chhuah nuam vek u le.

Author : RK Lianzuala

Aside | Posted on by | Tagged , , | Leave a comment

Chakma issue fimkhur a țul

Chakma issue kan kalpui dan hi haw haw in kan bei a, kan ram sahthlak tirin UT kan la neih tir thei hram mai thei a ni. Kan tiat pui chei lai hian central sorkar khuan minority hi a chhan fu si a.

Chakma candidate loh tihte pawh hi a fuhlo. Congress emaw MNF emaw ticket a tling an nih chuan helama an hotute’n an thunun thei dawn a. BJP emaw independent emaw an nih chuan a thlun phelh ang char charin khulamah an che mai ang. Emotional deuhva he issue hi kalpui chi a nilo.

HC Vanlalruata

Aside | Posted on by | Tagged , | Leave a comment

ZNP in chakma candidate nei dawn lo

ZNP Party chuan nakum Assembly inthlanpuiah Chakma Candidate an neih dawnloh thu an sawi.

ZNP chuan nimin khan Secretary R Thangpuia hmingin NGO-Co-ordination Committee Chairman hnenah lehkha thawn a, NGO-Co-ordination Committee-in Chakma Candidate nei lo tura an ngenna chu an Party PAC-in a ngaihtuah hnuah nakum Assembly inthlan lo awm turah khawi bialah mah Chakma Candidate dah lo turin thuthlukna an siam tih an hriattir a ni.

Aside | Posted on by | Tagged , | Leave a comment

KAN SORKAR CHU LUNGPUI CHUNGA NGHAVAWK THEIHNGHILH ANG MAIIN A NGAWI LEH VUNG VUNG : PU DUHA

• SEDP hi chawthing herlum ang lek.
• NEDP hi a ho lutuk.

Nimin 21/8/17 khan ZNP chuan an pisaah chhung inkhawm an nei a, he hun a thusawitu Pu Duhoma chuan, Central Pool atanga MBBS Seat kan hmuh thin chu tihtlem a lo ni ta a. Meghalaya seat 42, Nagaland seat 30, Arunachal Pradesh seat 24 pek an nih laiin keini chu seat 17 chauh pek kan ni ta a, seat 8 ngawtin kum dang aiin kan tlahniam ta a ni. Chubakah, kan seat hmuhna College-te hi ranking hniam te te deuh vek an ni a, College tha kan chang pha ve ta lo bawk.

Hei hi na taka Central sorkara thlen vat awm a nih laiin, kan sorkar chu lungpui chunga nghavawk theihnghilh ang maiin a ngawi leh ta vung vung mai a. Muhil der ang maia auh harh theih loh sorkar kan hrawn hi vanduai kan inti a, an lakah hian beisei tur kan nei ta lo a ni a ti.

Pu Duha chuan, Tunlaia MNF-in an Economic Policy SEDP chu an thil thar zawrh chiam mai hi chaw thing her lum chawp lek a ni e. Inthlan hmasa daihah tawh khan, ni 18.6.2013 ah SEDP bu hi an President-in Vanapa Hall-ah a lo tlangzarh daih tawh a, VII-na “Rahbi Pawimawh turte” tihthupui hnuaia (7)naah cheng nuai thum leh a tul chuan a aia tam pawh pek an tum thu hi an lo puang daih tawh a ni. Phek 19-naah chhungkaw tin tan thla tin cheng sangli pek an tum thu a chuang bawk. Phek 23-naah kum nga chhung atan chhung tin tan cheng nuai thum pek an tum thu hi tarlan nawn a ni bawk. Heng policy-te hi Party dang pahnih thawhpui chunga an lo tlakpui daih tawh hnu kha a ni e.

Congress sorkar pawhin a takin NEDP an han kalpui ta a. Beneficiary thlan chu an Block, Unit leh V/C te kutah bawk dah lehin, Vote zawn nan an hmang leh mek a, NLUP nena a danglamna chu a hming chauh hi a ni e.

SEDP leh NEDP te hi kum tam tak chhung an lo hlawhchhampui tawh leh an tihpuitlin duh tak tak lohte vek tho kha an ni e.

MNF-in inchibai nan leh inzir nan term hnih an mamawh a, Congress-in kihhnawk thenfai nan Term hnih an hmang mek bawk. Mitdel tlahawlh ang maiin rikna ngaiah an ri reng ringawt mai a nih hi. Chaw thing her lum chawp kan ring rei lutuk ta a, Zoram mipuiten pumpui nat kan vei zo takngial dawn e. Heng Party pahnih te hi thim thuah hnih an tih fo hi an ni mai ang em ?

Tamil Nadu-ah buhfai man tlawm, Amma Canteen, Amma Mineral Water, Amma Salt, Free Mixer Grinder etc vote zawn nana hmanga an subsidise chiam chiam avanga an Economy-in a tuar takzia kan hre theuh awm e. Sem Policy leh ruihhlo hian kan thlarau nun lamin a ei chhe mek a, hmeithai kan ngah ta hle.

Thawhrimna, rinawmna leh tih tak zeta Lalpa lam hawi chiah hi kan damna tur a ni tih i hre thar leh ang u a ti bawk

Aside | Posted on by | Tagged , , | Leave a comment

TUIKHUAH AH PI LALRINPUII THI A HMUH A NI

Durtlang North YMA hruaitute hnen atanga thu dawn daninLalrinpuii d/o Pu Lalramthanga Durtlang north ( thirchherthiam tia hriat) chu Durtlang Gosen venga Pu Zodintluanga huana tuikhuah ah thi a hmuh a ni.

A chetsual dan nia sawi chu hetiang hi a ni.
Tuikhuah atang hian an in ah, tui an In tur bik an pipe thin a. Tuikhuah bula tui pump khawl chu a nun theih loh avangin a siam a, inchhung lamah current switch a off theihnghilh a, current a lo kal si a, current in manin, tuikhuah ah a tla lutzui ta niin thu lakna hian a tarlang a. A hmu hmasa tute hian an zuk hmuh hian a lo boral tawh a ni.

Durtlang North Biakin chhak a, a pate kawmchhakah in thar sain an la luah lut lo a, a pasal duh angin an in sak thar hi an chei bawl nawk nawk ang a, a ruang hi lak chhoh a ni ang a, heta tang hian vui tur a ni ang.

Author : Robert Pearson Varte

Aside | Posted on by | Tagged , , | Leave a comment

HONG KONG-AH “DEMOCRACY” NGIAT VANGA MAN TE CHHUAH PHUTIN KAWNG AN ZAWH MUP MUP

Nimin Sunday khan Hong Kong mipuite chuan China lam tang, Hong Kong sorkar thiltih dan duh lovin, democracy duhtu zirlai hruaitu 3 an man te chhuah tura phutin kawngzawh an nei a, mipui 22,000 chuangin kawng an zawh a ni.

Hong Kong sorkar, China thunun chuan tun hnaiah kum 2014 a “Umbrella Movement” tih tichhuaktu, ni 79 zet democracy ngiata zirlai sang tam tak punkhawm tirtu, organizers pathum Joshua Wong (20), Nathan Law (24) lehAlex Chow (27) te chu jail a thla 6-8 tang turin a hrem a, chung mite chhuah an phut a ni.

Nimina kawng zawhtute hi Hong Kong MSU & MZP tih mai turte an ni a, heng zirlai 3 an man te hi Dept of Justice lam chuan, kum 2014 a thil kal tawh chu thlirkirin, dan lova mipui pungkhawmna siamtu tiin, an hrem a ni. Law Secy Rimsky Yeun chu a bik taka beiin, “Zak theilo lutuk, China uibuk” ti tein an sawi a ni.

Mizoramah hman deuhva thil kal tawh vanga MSU hruaitute Court hmaa inlan tura koh ang deuhvin, heng zirlai hruaitu 3 te hi sorkar chuan tun hnaiah manin, jail ah atan tir a ni. He buaina hian engtia rei nge a awh dawn hriat a ni lo. Ray Wong (24) chuan, sorkar thiltih dan hian pro-democracy hote thendarh a awm tawhte a tipumkhat leh dawn a ni, tiin zirlai hruaitu 3 te chhuah an nih hma chuan kawngzawh emaw, punkhawm zai an rel dawn a ni.

Nimina mipui 22,000 chuang pungkhawma kawng zawhtute hian Court of Final Appeal building an pan a. Zirlaite man te chu “politic thila phiarrukna” tiin, chhuah an phut a ni. Kum 1997 ah Hong Kong chu British-in kum 150 zet a awp (crowned colony) hnuah China kutah a pe let a, Mainland China chuan “One China-Two System” angin rorelna a kal pui a, mahse, indirect-in Beijing chuan Hong Kong hi a thunun a ni ber.

Author : CT Lalrinawma

Aside | Posted on by | Tagged , , , | Leave a comment

MOBILE PHONE TIH BO ZAWN DAN

1. A hmasa berin i phone kha i la tibo lo anih chuan i phone IMEM number kha chhinchhiah thlap ang che.

2. IMEM no en dan chu- I phone-ah khan *#06# tih type la, a lo lang mai ang.

3. IMEM number hi phone bo zawn nana hmanraw tangkai tak anih avangin chhinchhiah ngei ngei ang che.

4 I phone i tibo emaw an ruksak che a nih chuan IMEM number i chhinchhiah digit 15 kha cop@vsnl.net ah mail rawh. Police tihbuai a ngai lo.

5. I phone awmna chu IMEI number hmangin darkar 24 chhungin an lo chhui chhuah sak ang che.

6. I phone number pawh lo thlak mahse i phone kha a nih chhung chuan an chhui chhuak thei ang.

I phone i tihbo a nih chuan hetiang hian cop@vsnl.net ah email i thawn dawn nia:-
Name:
Address:
Phone model:
Maker:
Last used No:
Email for communication:
Missed Date: (Tihbo ni)
IMEI No:

Aside | Posted on by | Tagged , | Leave a comment

PATHIAN THU ZIR HI I UAR TEH ANG U by Dr John Hlychho

1. THUHMAHRUAI
Bible chuan, “Hnathawktu, Thutak thu fel taka hmang chu a zak tur a ni lo angin, Pathian ngaiha ţhaa in-entir turin ţhahnem ngai rawh” a ti a (2Tim.2:15).
He thu hi, a Țawngbul aţanga dik taka lehlin chuan, “THUTAK THU DIK TAKA ȚHEN-HRANG THIAM CHU A ZAK TUR A NI LO. CHUTIANG MI ANGA PATHIANIN A NGAIH THEIH NÂN CHE THEIHTAWP CHHUAH RAWH” tihna a ni.

Hei hian PATHIAN THU HI ULÛK TAKA ZIR TUR A NI A, A NIH TUR ANG THLAPIN KAN ȚHEN-HRANG THIAM TUR ANI TIHNA A NI (Accurately Divides Dispensationally, Prophetically, Historically, Applications, Classes, Subjects, Divisions, etc.).

Hetihlai hian, Pathian Thu hi Pathian Thu a nih avang leh, a thûk a, a ril êm avang hian, tam tak hi chu a awmzia (meaning)-te pawh hi hriatthiam vek theih a ni lova, hriatthiam vek sên pawh a ni lo.

A Zir-mi (Theologian/Bible Scholar)-te hlei hlei hian PathianThu ropuina leh hlutna an hrechiang a, an hriatthiam loh ziaan inhrechiang tulh tulh ţhin.

Chuvangin, Mi zawng zawng hriatthiam chi leh pawm harsa lem lo chi a awm laiin, Bible Thuhar deuh-te chu pawngpaw zuam a, basa ngam ngawt chi a ni lova, Mahni-a lo hrilhfiah ve ngawt chi pawh a ni lova, Ţawngkam thiammi-tuteemaw sawi lo pawm ngawt chi pawh a ni lo.A Ţawngbul lam te, Mithiam-te sawi leh Hrilhfiahna hrang hrang râwn aţanga fimkhur taka ngaihdân leh thutlûkna siam hi a him a, a finthlâk ber a, thlarau, rinna leh hriatna atân a hlawk ţhin.

2.1. PATHIAN THU HI ZIR TAM A ȚUL
Mi tam tak chuan, Pathian Thu hi Kum 10 chu sawi loh, Kum 4 (Basic Theology, BTh/BD level) chhung tak ngial pawh kan Zir lova, Mi tute emaw Ngaihdân mai mai ah kan innghat a, huai takin kan sawi ve ţhin.

Kan Source leh Ngaihdân Lâkna Mihring kha, Bible Thlir Diklo leh Pathian Thu Hrechiang êm êm lo te an lo nih hlauh phei chuan kan Thlarau Nun min tichhe der tihna a ni.

Chuvangin, Pastor an nih mai vang emaw, Pathian Thu Zir an nih ve mai vang emaw, kan Kohhran Upa an nih vang emaw-a Pawngpaw rin-ngawt chi a ni lo.
A Theih chen chenah chuan Mahni ngeia Pathian Thu hi zir a, chhui a, fiah ve thlap thlap a ţha hle a ni.

Mi tam tak chuan, Zir lo leh Chhui pawh chhui chhin miah lovin (a dik leh dik lo pawh kan ngaihtuah/chhût peih lo) Theologian leh Pastor-te Sawi leh Zirtirna a nih phawt chuan… i-he lova zawm leh pawm tawp kan ching, hei hi a ţhatna leh ţhatlohna, a hlauhawmna leh a hlauhawm lohna a awm.

Fimkhur a ngai hle. Tuteemaw avanga i Chatuan hun tur a buai chuan a pawi hle dawn a ni. Theological Education (Pathian Thu Zirna) Huangah chuan, BTh/BD te hi Basic Education (Zirna inţanna) a ni a, M.Th hi Theology Branch Pakhat Chauh (Theology/History/Biblical/Missiology/OT/NT/etc.) an Zir avangin (chu pawh an zir tam lo), Mi Pangngai chuan an Specialization pawh an Chhuanpui lo hle.

Ph.D. pawh Branch (Department) hrang nei ve tho a ni a, Ph.D. ah hian an Zir-bing leh-zual a, an sâwr zim leh-zual avangin an Zir-bing loh lam chu an in-chhuang lo tlângpui a, an Zir mêk pawh an hre ber chuang lo.

2.2. HUN HNUHNUNG LAM BIK ZIRNA NGAIHTHAH
Bible-ah hian Hun Hnuhnunga Thil Thleng Tur Bible Hrilhlâwkna (Predictive & Historical Prophecy) hi 2500 vêl awm anga chhût a ni a, chung zingah chuan 2000 te chu a Thleng dik tawh niin an sawi!

J. Barton Payne chuan, Bible Hrilhlâwkna hi 1,817 awm angin a sawi thung (OT-1,239, NT-578, Encyclopedia of Biblical Prophecy). A inziak zât chiah chiah (exact number) lam aiin, a tam lam khi ngai pawimawh zawk ta ila.

Lal Isua Lo Kal Lehna (Second Coming) hi Thuthlung Thar Bu 27 zinga Bu 23 ten chiang tak leh fiah takin an sawi-langbawk.Khiti khawpa tam Bible-a “Hun Hnuhnung Thu leh Bible Hrilhlâwkna Thu” (Eschatology/Bible Prophecy) a inziak si chuan, a Pawimawh thaw-khat hle a ni ang, tih a hriat theih awm e.

Hetihlai hian Theological College tam takah leh Kohhran (Denomination) tam takah hian Zir leh Ngaihven a Hlawh mang hauh lo mai hi Thilmak tak a ni!!

Kan Kohhran (Denomination) vang nge, a Zir-mi (Theologian)-tevang nge, an Zirna Hmun (Theological College) vang? tih hi Zawhna Pawimawh tak a ni.

Lal Isua’n Pharisai & Saddukai-te hnena, “Tlai lam a lo nihin ‘Khua a ţha dâwn a ni ang, kâwl a sen êm mai,’ in ti ţhin a. Tin, zingah chuan ‘Vawiin chu khua a chhe dâwn a ni ang, kâwl a sen a, khua a dur êm mai,’ in ti ţhin a. Van awmzia inhre fiahthiam si a, nimahsela hun chhinchhiahna-te hi in hre fiah thei lo” a tih kha kan ang viau mai (Mat.16:2-3).

Mizo Kristian-ten kan hriat-lâr êm êm, DISPENSATIONAL TRUTH tih Lehkhabu Ziaktu Rev. Clarence Larkin hi Kohhran Ziding (Main-line Church) Pangngai Baptist Kohhran Pastor Hlawhtling leh Ngaihsânawm tak a ni.

Kan hriat angin Rev. Billy Graham pawh Baptist Pastor tho a ni. Rev. Larkin hian Bible-in HUN HNUHNUNG LAM BÎK A ZIRTIRNA (Eschatology/Prophecy) chu Kum 30 Chhung zet, Ţawngţaina nên a Thlûr bing a, Thlarau Thianghlim Pâwlna aţanga a Thil Hmuhchhuah-te chu Lehkhabu-ah a ziak a.

Ani hi Hun Hnuhnung Thu leh Bible Hrilhlâwkna lamah chuan a Sulsutu a ni. A Lehkhabu Lâr zual-te chu:- Dispensational Truth, The Spirit World, Rightly Dividing the Word, The Second Coming of Christ, Book of Revelation, Book of Daniel, Why I am a Baptist? tih te an ni.

Rev. Larkin hian a Hunlaia Bible “KING JAMES VERSION” (1611) a hman avangin a Lehkhabu-ah hian siam-rêm ngai awm zeuh zeuh mahse, heti chung hian, Kum 1912 vêla a Lehkhabu Ziak-te chu Tunlaia Bible Scholars tam tak-te (Hun Hnuhnung lam zirtirna bikah) Thu lâkna hnâr ber leh an Thu-chai ber ala ni reng a ni.

Rev. Larkin-a Lehkhabu Ziak-te en a, han Zirchian hian, khitianga Lehkhabu Ropui leh Ţha leh Hlu khi Pathian Thlarau Thianghlim Finchhuahna leh Ţanpuina tello chuan a ziak thei hauh lovang tih a chiang hle.

Theological College rêng rêng hi, an PATHIAN THU PAWM DÂN a zirin (Doctrine/Denomination Zirtir dân zulzuiin), Bible Zir dân leh Chhiar dân leh Hrilhfiah dân a in-ang lo theihle bawk.Theological College Ţhenkhat chuan Thlarau Thianghlim Hnathawh leh Lal Isua Thilmak Tih-te (Miracles) leh Hun Hnuhnung/Hrilhlâwkna (Eschatology/Prophecy) leh Chanchin Țha Hrilh (Missions/Evangelism) lam hi an Ngaih pawimawh hle laiin, Theological College țhenkhat chuan an Ngaihthah hle thung.Entir nân, Theological College ţhenkhat chuan, Daniela Bu te, Thupuan Bu te hi Hun-Hnuhnung (Eschatology/Prophecy) lam Zirtirna a ni tih an pawm na a, an Pawmdân leh Sawifiah duh dân a dang lam hle. Entir nei leh Tehkhinna, Thlarau lama Entir nei (Symbolic/Allegory/Spiritual) ang lekin an ngai thung .Chuvangin, hetianga Pathian Thu lama Ngaihdân kan lo siam ve ţhinnaah hian Denomination Kalpui Dân hian Nghawng lian tak leh thui tak a nei ţhin.

Hei hian a rawn Târlan chiang tak chu, KOHHRAN PAWL (DENOMINATIONS) HRANG HRANG-TE HIAN PATHIAN THU KAN ZIRTIRNA-AH HIAN TIH-KIM-LOH (FAMKIM-LOHNA) KAN NEI ŢHEUH tih a ti-chiang hle.

Chu chuan min Zirtir chu, Eng Kohhran (Denomination) pawh hi Hmusit tak leh Deuhsawh taka Vânram kai lo tur hul-hual anga va ngaih hi a fel chiah lo niin a alang.
A Chhan chu, Pathian thu hi a ril a, a thûk a, a zau êm êm a, Zir zawh theih a ni lova, Hriat-kim sên a ni lova, Hriat vek theih pawh a ni hek lo. Pathian Thu Zir-chhuak leh Hria inti-te pawh hian “A ŢHEN PAWH KAN HRE LO” tih hi kan Châng-Thlan a la ni reng mai!!!

2.3. PATHIAN THU KUM 43 CHHUNG ZET A ZIR!!
Rev. Finis Jenning Dakes (1902-1987) pawhin Kum 43 chhung Bible a Zir hnu-ah, Khawvêla “Study Bible” Chhuanawm ber pawl “DAKE’S ANNOTATED REFERENCE BIBLE” chu a chhuah nghe nghe a!

Rev. Dake hi Church of God Pastor a ni a, Pastor leh Evangelist ni-kawp, lâr leh hmingthang tak, Premillennial Dispensationalist a ni bawk. Trinity zirtirna pawm a ni a, a Sawifiah dân erawh a dang deuhvin an sawi.

Trinity pawm ţheuh ţheuh Kohhran (Denomination/Theologian)-ah pawh hian, Trinity Sawifiah dânah kan lung rual vek chuang lo tih hre rêng bawk ila.

Hun Hnuhnung Thu leh Bible Hrilhlâwkna Thu lam (Eschatology/Bible Prophecy) Lehkha ropui tak tak ziak a, Mithianghlim Lâwr (Rapture) leh Krista Lo Kal Lehna (Second Coming of Christ) lam lo Zir-bing a, lo Tuipui Hmasa-tute chu Rev. Clarence Larkin, (Baptist Kohhran Pastor), Khawvêla Evangelist hmingthang ber Rev. Billy Graham (Baptist Kohhran Pastor & Evangelist), Rev. C.I. Scofield (Episcopal Church Pastor) te an ni a.

Rev. Larkin leh Rev. Scofield-ten BIBLE-A HUN HNUHNUNG LAM ZIRTIRNA an rawn chawi lâr hi a hnuaia Evangelical Scholars leh Bible College-te hian an rawn chawinung chho ta a ni. Tlêm-te chauh lo târlang ila:-Drs. Arno C. Gaebelein, A.J. Gordon, James M. Gray, R.A. Torrey, Hary Ironside, John F. Strombeck, Lewis Sperry Chafer, Alva J. McClain, Charles Lee Feinberg, Charles Ryrie, John F. Walvoord, John R.W. Stott, Oswald J. Smith, Paul D. Feinberg, Herman Hoyt, Roy B. Zuck, J. Dwight Pentecost, J. Barton Payne, John F. MacArthur, Ed Hindson leh Tim LaHaye, etc. te hi a lâr zual-te an ni.

Theological College-ah hian (a lâr zual chauh)- Dallas Theological Seminary, Biola University, Philadelphia Biblical University, Grace Theological Seminary, Trinity Evangelical Divinity School, Liberty University, Bob Jones University, Wheaton College, The Master’s College & Seminary, Talbot Theological Seminary, Fuller Theological Seminary, Billy Graham Evangelistic Association leh Moody Bible Institute, etc. ten HUNHNUHNUNG LAM ZIRTIRNA leh hetiang lam hawi Thuziak lamah ţhahnemngai takin an lo thehdarh bawk a ni.

3. TLÂNGKAWMNA
Pathian Thu kan Zirna leh kan Ngaihsaknaah hian kan “Thulâkna (Source) leh Pawmdân (Thurin) kha a pawimawh hle” a ni, kan ti tawh a.

Kan Thulâkna leh kan Pawmdân kha kan Bible Chhiar-dân leh Zir-dân min Kaihruaitu pawimawh tak a ni nghal a. Thulâkna Dik lo leh Pawmdân Dik lo kha kan innghahna a nih tlat chuan engtikah mah Pathian Thu kan Ngaih-dân, Sawi-dân, Hrilhfiah-dân leh Pawm-dân a fuh thei ngai lovang.

Entirnân, Pathian Hmangaihna chauh tuipui a, a Phuba lâkna leh a Thinurna lam tuipui miah lo leh ngaihsak miah lo chuan, Pathian Thu a Hrilhfiah dân a dik tâwk lo tih a chiang nghal a.

Chutiang bawkin, Hun Hnuhnung lam leh Hrilhlâwkna lam (Eschatology/Bible Prophecy) tuipui miah lo leh zir miah lo chuan, Hun Hnuhnung lam leh Hrilhlâwkna lam chu lau leh ho takin a sawiin a hrilhfiah ţhin ang tih chu thil chiang sa a ni bawk.Chuvangin, Pathian Thu ka Pawm-dân leh ka Thulâkna-te hi a dik em? tih kan in-enfiah fo a ţul bawk ang. Mahni In-enfiahna turah hian, Bible Chhiar tam a ngai a, a “Awmzia” hriat a ngai bawk.

A “Awmzia” Hre tur chuan, a Zir-mi leh a Hria-te leh Lehkhabu-te kan rawn tam a ngai bawk.

A Zir-mi leh a Hria-te leh kan Lehkhabu rawn zingah hian, Bible Zirtirna Ziding Dik tak Kalpui leh Pawmtu an ni em? tihkan chian a ngai bawk.
Bible Zirtirna Pang-khing chauh Pawm hnên aţang chuan, Bible Zirtirna Dik leh Tluantling kan dawng thei ngai lovang.
“I THU HI KA KE ATÂN-TE HIAN KHAWNVÂR A NI A, KA KAWNG ATÂN ÊNG A NI” (Sam 119:105)

Aside | Posted on by | Tagged | Leave a comment