Lawngtlai DC transfer chungchang by Lalremliana Pachuau

Ka ziak lovang ka tizet tak na a!

Ka hriat tirh phat khan he thu hi ka ziak nghal a. Mahse, thuziak chhiar kawnga meng zim tak kan roreltute auh harh ngaihna a vân luatah ka post ta lo kha a ni a. Tlai khawhnuah ka post leh ta roh a nih hi!

Hlemhletna leh eirukna a nasat luat avangin CADC a Ministry chu ţhiah a han ni ta rup mai a. Ţhiah a nihna chhan ber, CADC enkawl tura Governor-in thuneihna a pêk Lawngtlai DC Dr Arun T, IAS patuai tak mai chu a rang a rangin zuk sawn a!

Congress sawrkarin a han sawn lawp dan lah chu Special Secretary tih a han ni zui a! Designation awm ngai lo siam chawpin Chakma Council huamchhûnga hlemhle taka sawrkar hnathawk hum tura Congress hmalakna tenawmzia hi sawiin a siak lo!

Pu Hawla leh a pawlte hian eirukna a zung nen kan phawi ang an han tikawisawi ve ngial kha a ni a! Zirtirtu tam tak, an post lama awm lova khawpuia bet fir ferte chhui chhuah an han ni ta lem a, a aia thui inchhui hlau niawm takin a chhui chhuaktu ber sawn duh khawp sawrkar kan hrawn hi a vanduaithlak hle!

Congress sawrkar thu tar i hria em? “Rorelna dik chu luipui angin luang rawh se” tih zuk ni a! A rang a ranga pawhthlak nghal chi a ni! Mahni thupui thlan chhuah pawh lekkawh ngam lo, a langa ţha duh ve ngawt, sual palzam awlsam tak si, fel leh ţha hre ve kura a taka kalpui ngam si lo hian, keini aia ţha kan awm lo hi ti fo lo mai teh se!

Ţhalai rualin in hming an han lam duh dan reng maite hi a zahthlak zo ta! Hnaisailo taka in hming hi pawng lam ngawt an ni lo. In thiltih rah liau liau niin heti taka an han hmusit ta mai che u leh, chutih laia zah nachang reng reng in la han hre tlat si lo mai hi chu sawi vak ngaihna pawh ka hre tawh lo! At khat in cheng a ni ta ve ang.

Advertisements
Aside | Posted on by | Tagged , , , , | Leave a comment

MIZORAMA TUMKAU NI KAWNGZAWH LO PIANCHHUAH DAN

Kumtin Tumkau Ni a lo thlen hian Kalhlen Kut hun laia Jerusalem-a Lal Isua sabengtung chunga LAL anga a luhdan hriatrengnan Mizoramah chuan Tumkau Niah tumkau nen Kohhran Sande Sikul naupangten ‘Hossanna’ tiin Marka ziak Bung 11:9-10 (A hmaa kalte leh a hnunga zuitute chu “Hosana! Lalpa hminga lo kal chu fakin awm rawh se, Ram lo thleng tûr, kan pa Davida ram chu chawimawiin awm rawh se, Chungnung berah khian Hosana,” tiin an au va..)_ hmanga au rualin zingkarah kawng an zawh thin a, hemi lo chhuahna chu :-

Kum 1934 Tumkau Ni khan Zosap Missionary Pi Zaii chuan Mission Veng Kohhran Sande Sikul Primary Department naupangte huikhawmin, Sande Sikul banah tumkau vaia zai chungin an kohhran Sande Sikul Department dangte an tlawh kual thin a, Lal Isua chawimawina hla chi hrang hrangte sa rualin an hlim hle thin. Hei hi a bul tanna leh hmasa ber a ni.

Kum 1938 a lo herchhuah meuh chuan Zosap Missionary Pu Mena hovin Tumkau Ni, chawhma Sande Sikul banah Mission Veng Kohhran leh Kulikawn Kohhran Sande Sikul naupangte chuan tumkau kenga kawngzawhin an intawkkhawm ta thin a. Hetah hi chuan Pathian faka zai rual mai lovin Marka 11:9-10 hmangin an aurual ta a ni. An intawkkhawm chu an hlim thei hle. Hun a lo kal zel a, Tumkau Nia tumkau nen Lal Isua chawimawina kawngzawh chu Mizoram Presbyterian Kohhran hrang hrangte chuan kan Zosap Pi Zaii leh Pu Mena tihdan entawnin an lo ching chho ta a. Tunah tak phei chuan Presbyterian Kohhran chauh ni lovin Kohhran hrang hrangin Tumkau Ni ah tumkau nen Lal Isua chawimawina kawng zawh kan lo nei ta a ni.

Nimahsela, Tumkau Nia kawngzawh chawhma Sande Sikul bana neiha bul tan kha tunah chuan zingkarah neih thin a ni ta daih a. He, zingkara kawngzawh sawn hun hi hriat mai a ni lo thung.

Aside | Posted on by | Tagged , | Leave a comment

LUNGLEI DC HOVIN PUKPUI TO TLAWNG KAWNG CHHE SIAM MEK CHUNGCHANG SAWIHO

• Aizawl – Lunglei world bank road sei zawng.
• World bank road len zawng.
• World bank road siam kum.

Nimin 26 march chawhnu khan Lunglei Bawrhsap Pi Lalzarmawii, IAS hovin a Office Chamber-ah Pukpui to Tlawng kawng chhe siamthat Rigid Pavement hna kal mek chungchang sawihona meeting neih a ni.

He meeting-ah hian EE PWD Lunglei Road Division, Er Lalchhuana leh a thawhpuite, Lunglei SP Pu Lalthafamkima Jongte leh a thawhpuite, Lunglei Additional DC Pu Benjamin Lalzama leh sawrkar hotu dangte bakah Lunglei Sub Headquarters YMA hruaitute, Lunglei Thalai Pawl hruaitute leh Zoram Drivers Union (ZDU) hruaitute an tel.Pi Lalzarmawii chuan World Bank Road chu Lunglei District mai bakah Saiha District leh Lawngtlai District mipuite mamawh chawkluhna kawngpui a nih avangin a pawimawh takzet tih a sawi a, “Kawng tha tak a rang thei ang bera kan neih theih nan inpawh tlang taka inrawn tawnin ruahmanna I siam ho ang u” tiin kalkhawmte thawhho puiah a sawm a ni.

PWD hotute chu kawngpui tha tak, changtlung leh rintlak siam tura tan la turin a chah bawk.

Meeting-ah hian tha taka inkawmhona hun hman a ni a. EE PWD Lunglei Road Division Er Lalchhuana chuan Lunglei Thalai Pawl, YMA leh ZDU te zawhna chhangin Rigid Pavement siam hna kal mek chungchanga an hmalak dan lehhmachhawpte chipchiar taka sawifiahna hun a hmang a. PWD hotute hian an hnathawh kawnga an harsatna tawh te sawilangin helai hmuna vut a tam thu te, air compressor hmanga theihtawp an chhuah thu te an tarlang.

Lunglei Thalai Pawl, YMA leh ZDU hruaitute chuan hemi kawng siam chungchanga an ngaihdan leh thil hriat duh hrang hrang te an sawilanga, PWD hotute chu kawng siam hi uluk zawka vil turin an ngen a. Hmalak chhunzawm zel dan tur te pawh sawihoin, hun lo kal zel turah inpawh tlang taka thurawn inpek fo nise an duh thu an sawi hlawm.

Aizawl – Thenzawl -Lunglei Road hi World Bank sum atanga siam niin kum 2011 khan hawn a ni. A kawng thui zawng hi 164.000 km a ni a, State Highway a ni. A zau zawng hi 7.45 m a ni a, a blacktop zau zawng hi 5.50 m a ni. Tlawng Lei hi 143.750 kmp ah a awm a, Pukpui hi 155.000 kmp ah a awm.

Pukpui leh Tlawng inkar kawng chhe lai zual bik hmun 9 a Rigid Pavement Work hi ruahman niin hna hi a kal mek a. SLT Infracon leh Tantia Construction ten heng hna te hi an thawk mek a ni.

Aside | Posted on by | Tagged , , , | Leave a comment

LUNGLEI TO PUKPUI KAWNG SIAM CHHE LUTUK VANGIN FIR THEHLUT, MINISTER LEH ENGINEER PAHNIH LIM HAL

26th march khan Lunglei thalaite chuan Pukpui – Tlawng inkar kawng siam chu chhia tiin Engineer te lakah FIR an thehlut a, PWD Minister leh Engineer pahnih limte an hal bawk.

Thu dawn danin 25.3.2018 (Sunday) khan Lunglei thalaite chuan Pukpui – Tlawng inkar kawng siamthat mek chu a hmunah an en, kawng siam mek chu, siam a nih danah an lungawi lo hle a, zanah emergency meeting nei nghalin Pukpui – Tlawng kawng an siam mek chu a chhiat em avangin PWD-in hna an thawh mek chu tawp san turin an hriattira, 26 march zing lamah heng kawng siam thalo lai te tihchhiat hnatlang kovin Lunglei thalai engemawzat nimin khan an thawkchhuak a ni.

Lunglei thalaite chuan helai kawng siam thalo taka a mawh phurtu zawnchhuah phutin Pu Lalchhuana, SE PWD Southern Circle leh Pu C. Lalchhuana, EE PWD Road Division Lunglei lakah Lunglei Thalai Pawl General Secretary J. Lalzawmliana chuan FIR a thehlut nghal a, chanchin buatsaih lai hian JE PWD Road Division ami chu Police ten thu an zawt tawh a ni.

26 march vek khan Lunglei Thalai pawl te chuan kawng siam thalo chungchangah lungawi lohna lan tir nan Chawhnu dar 3:00pm khan Lunglei Mizofed kawtah PWD Minister, S.E PWD Lunglei Circle leh EE PWD Road Division Lunglei te lim an hal a. Mipui kalkhawmte chuan Kawng hi a siam dan tur dik tak leh tha thei ang bera siam ni rawh se, PWD SE leh EE chhe taka hnathawktute hi sawrkar hian suspend rawh se, Pu Lal Thanzar PWD Minister in min tiam angin PWD Road Division, Lungleiin an chan chin Lunglei – Kanghmun S siamna tur cheng nuai 250 hi Sorkar hian release nghal rawh se, PWD hian Pukpui to Kawmzawl road khawih mek khi estimate zat min hrilh rawh se, an siam mek pawh khi tha takin siam rawh se tiin resolution an pass a ni.

Aside | Posted on by | Tagged , , , , | Leave a comment

Dept hrang hrang demand pass a ni

Nimina Assembly Budget Session chhunzawmah Pu Lalsawta’n sorkar kum thar, 2018-19 chhunga a dept. enkawlhrang hrangte sum hman tur a vaiin – Cheng Vbch 2,491 Nuai 28 Sing 4 Sang 2 a pu lut a, House in lungrual takin a pawmpui.

A deptt. enkawl hrang hrang 4 sum hman tur te hi– Law & Judicial Deptt. sum mamawh Cheng Vbch 21 Nuai 75 Sing 1 Sang 4; Taxation Dept. sum hman tur Cheng Vbch15 Nuai 84 Sing 4 Sang 8; Finance Dept. sum mamawh- Cheng Vbch 2,335 Nuai 75 Sing 2 Sang 3 leh Planning & Program Implementation Dept. sum hman ur Cheng Vch 117, Nuai 93 Sing 5 Sang 7, a vaiin – Cheng Vbch 2,491 Nuai 28 Sing 4 Sang 2 a ni.

Pu John Rotluangliana pawn pu lut vein, a deptt. enkawl hrang hrang 3 – Food, Civil Supplies & Consumer Affairs dept sum mamawh – Cheng Vbch 249 Nuai 10 Sing 9 Sang 7; Transport Dept. sum mamawh Cheng Vbch 45 Nuai 2 Sing3 Sang 1 leh Tourism Dept. sum hman tur Cheng Vbch 12 Nuai 89 leh Sang 7, a vaiin Cheng Vbch 307 Nuai 2 Sing 3 Sang 5 chu house in a pawmpui a ni.

Aside | Posted on by | Tagged | Leave a comment

Lawngtlai DC sawn chhan bial mipuite duhdan an tihhlawhtlinsakna.

• Autonomous District council ten hnathawktute hlawh ah sum hmang hnem.
• ADC te sum hman dan

Chief Minister Pu Lal Thanhawla’n Lawngtlai DC sawn a nih chhan chu bial mipuite duhdan an tihhlawhtlinsakna a ni a ti.

Chakma Autonomous Dist Council sorkar ṭhiah a nih tuka Lawngtlai DC sawm chhuah nghal a nihna chhan zawhna chhangin Chief Miniser hian, tunhma aṭang tawhin a bial mipuite leh MLA-te’n DC atan Mizo an duh zawk thu an sawi ṭhin avangin tun hi hun remchangah hmangin sawn a ni a ti a; an duhdan tihhlawhtlinsak sorkarin ṭha a tih avangin Mizo ngei, saw lam mi, Lai, Mara leh Chakma te’n an pawm tlan theih thlangin dah a ni, a ti.

Chief Minister Pu Lal Thanhawla hian zawhna dang chhangin CADC sum chu pay advances atan MDC leh mi dangte’n an hman thu sawiin Chief Minister chuan an sum hman hi a vaiinCheng Vbch 10, Nuai 5 Sing 3 Sang 3 leh 30 a ni a, rul tura hriattirna lehkha pek anih hnuah sum hi an rul zo vek tawh, a ti.

Hetihlai hian Autonomous Dist Council-te zingah Lai Autonomous Dist. Council chiahin NEDP sum an dawng a, an dawn zat chu Cheng Nuai 290 a ni a ti a, sum hi Phaizawl leilet (WRC) siam ṭhat nan te, thlanmual inhmanṭawm tur siam nan leh Vawmbuk leh Diltlang South-a playground siam nan te pek a ni, a ti bawk.

Dist Council pathum te hian an sum hmuh tam ber chu Council hnuaia hnathawkte tan an hmang tih sawiin Chief Minister chuan, hnathawkte hlawh atana sum an hman dan chu LADC-in zaa 82.46; MADC-in zaa 92.92; CADC-in zaa 90.90 a ni, a ti a.

Hmasawnna hnathawh nan LADC-in an sum neih zaa 6.15 an hmang a, pension hlawhah zaa 11.39; MADC-in hmasawnna hnathawh nan zaa 7.08, CADC-in zaa 9.10 an hmang a; Autonomous Dist. Council pathuma thawkte’n hlawh hi ṭha takin an la thei vek a ti.

Aside | Posted on by | Tagged , , , | Leave a comment

LAWNGTLAI BAWRHSAP SAWN CHUNGCHANGAH CYLA INHMA LA DAWN

Tunlaia Mizoram titi luah tam leh social media lama sawi hlawh tak, Lawngtlai Bawrhsap sawnchhuah anih chungchangah Lawngtlai District a NGO lianber, Young Lai Association chuan hma a la dawn.Nimin lama kum 2016-2018 atana Central YLA Executive Committee Meeting vawi 14-na leh a hnuhnung ber tur, Pu J. Sangthangpuia Central YLA President kaihhruaina hnuaiah neih ah he thu hi ngaihtuah a ni a. Meeting chuan, Dr. Arun T., (IAS) Lawngtlai DC hun lo taka sawn a nih thu ah, PR siamin,”Transfer order sut leh a nih theih nan” hmalak ni se, hmalakna in awmzia a neih loh chuan a tul ang a chak tak a hmalak ni rawhse, tiin a rel.

Lawngtlai Bawrhsap hi kar kalta khan a zin hlanin Lawngtlai atangin Aizawl (secretariat) ah, “Special Secretary to the Govt. of Mizoram” atan sawn a ni a. A hna tur hi la ngaihtuah tur a ni. Amah thlak tur hian Pu N. Chakhai, Director, DM&R chu ruat nghal a ni a, vawiin (Mar 27, 2018) hian Dr. Arun T., IAS nen hian thuneihna inhlan felin Dr. Arun T hian Lawngtlai a chhuahsan dawn niin thu kan dawng.

Hetihlai hian nimin khan Assembly session neih mekah Dr. K. Beichhua, MLA zawhna, ‘CADC ṭhiah a nih aṭanga reilote chhunga Lawngtlai DC transfer nghal a nih nachhan’ chhangin, District Council & Minority Affairs department changtu leh House Leader, Chief Minister Lal Thanhawla chuan, ‘hman aṭang tawhin Lawngtlai DC atan Lawngtlai district mipuite leh MLA te ngei pawhin Mizo ngei an duh thu an sawi ṭhin’ tih sawiin, hemi vang hian Lawngtlai DC, Dr. Arun T., chu sawn a ni a ti a, Lawngtlai DC atan hian Mizo ngei dah niin, mipuite duh dan tihpuitlinna atan thlakthleng an nih thu a sawi bawk.

Heti ang a nih mek lai hian Lawngtlai district a NGO lianber ber, YLA leh LSA te bakah Young Chakma Association (YCA) te chuan Lawngtlai Bawrhsap sawnchhuah a ni hi an hriatthiamloh thu thuchhuah siamin an sawi thung.

Aside | Posted on by | Tagged , , , , | Leave a comment

LAWNGTLAI BAWRHSAP SAWN CHUNGCHANGA LAI STUDENTS’ ASSOCIATION THUCHHUAH

No.C. 11011/3/18- LSA/GHQ/Lti

The 25th March 2018: Lai Students’ Association General headquarters; Lawngtlai chuan, Lawngtlai DC, Dr. Arun T(IAS), Lairam leh Hnam tana tha thawh hlawk tak mai, kum khat em pawh a la awm hma leh a hmathlir tam tak pawh a hlen hma hauh a, Dt. 22/3/2018 tlaia kan rin loh leh beisei loh tak maia hmamhmawh taka Mizoram sawrkar in a, Transfer Order Vide No. A22012/18/2016- P&AR(CSW) a chhuah mai hi, LSA General Headquarters; Lawngtlai chuan a hrethiam lo tak zet a ni.

Hriselna lama kan pachhiat zia leh hmasawn ngai kan nih zia hria a, theih tawpa Lawngtlai District Mipuite tana thawktu, Hospital Thianghlim leh Hmasawn ber te zinga Lawngtlai District Hospital min hlankai puitu, District Hospital; Chief Medical Officer, Dr. Thani Pachuau Transfer Order Vide No. A22012/2/2012-HFW/Pt sawrkarin a chhuah leh mai pawh hi, LSA General Headquarters; Lawngtlai chuan mak a tiin, Dt. 27/3/2018 ral hma ngei a heng mite Transfer Order hi sut leh nghal turin Sawrkar kan phut tlat a ni.

Chutih rualin, Dt 23/3/2018 tlaia DC charge latu Pu N. Chakhai chungchangah erawh LSA chuan a mimal emaw hnam ang pawhin Harsatna a nei lo va, Officer chhuanawm tak, ram leh hnam tana theih tawpa ke pen fotu ni zel turin a duhsakin a beisei fo zel zawk dawn a ni. Chutiangin Politics inchirhthehna remchanga hman buai tum lo turin Political Party tin leh mitin kan ngen nghal bawk e.

Tin, Dt 26/2/2018 a Lawngtlai SP Pu Lalsanglura Transfer-na Order chhuak tawh Vawiin thlenga a aiawhtu tur Order la chhuak ve si lo te, Pu Lalzuiliana DEO Dt 28/2/2018 -a Pension chhuak tawh, Siaha District nena Lunglei DEO Pu Lalramthianghlima’n Vawiin thlenga min la vil ho te hi, a rang thei ang bera an aiawh tur rawn dah nghal vat turin sawrkar kan phut bawk a ni.

LSA General Headquarters; Lawngtlai chuan Posting and Transfer chungchangah Mizoram sawrkar chu, District thleih bik nei lo tur te leh; District hnufual kan nih ang taka Officer tha ber ber leh thawktu dang pawh tha ber ber min pe fo zawk tura a beisei lai a, hnathawk tha leh hmasawnna kawnga inpe zawk Officer te lachhuak a, hrem ngaite seng khawmna ang maia Lawngtlai District a hmang thin ni a lang fo hi lawi a ti in, heng hi LSA chuan a theih chhung chu a dodal zel dawn a ni.

Heng bakah hian, kan thawhpui duh tak, Mara Students’ Organisation (MSO) te’na Pj N. Chakhai tlawmngaia DC Charge la rih lo tura kan ngenna tlawm tak mai, (Letter No. A 11011/2/18-LSA/GHQ-Lti.) avanga Social media-a thuthang dik lo leng vel tena a thlen palh theih, Chi leh chi inkara inhmuhthiamlohna thlen palh an hlauh thawnna a vang a, nimin Dt 24/3/2018 Emergency Executive Commitee meeting hial nei a, Resolution an pass Vide No.1. MSO(H)/GS/Adm&Estd/2016-2019/37-a LSA thu chiang zawk mipui hnena chhuah tura min ngenna zahawm tak chu, LSA General Headquarters;Lawngtlai chuan lawmawm a ti in, puitlin thlak a ti tak zet a, hun lo la awm lehzel turah pawh, thawhhona tha tak nen a Pawl pahnihte’n ke kan pen ho zel a beisei tak zet zet a ni.

“PATHIAN LE, KAN RAM LE, MIPHUN CA AH”

UNA VOCE

ᅠᅠᅠSd/-
F. MANGHRIMTHANG
General Secretary
Lai Students’ Association
General Headquarters; Lawngtlai.

Aside | Posted on by | Tagged , , , | Leave a comment

PORN-STAR STORMY DANIELS INTERVIEW-IN MI BENG A VERH: MELANIA TRUMP A LA NGAWI RENG

Tunkar Sunday-a “CBS’s 60 Minutes” tiha Porn-star Stormy Daniels interview tihchhuah chuan sawizui a hlawh hle. He nu puitling film-changtu Stormy Daniels hia hming tak chu Stephanie Gregory Clifford a ni a, kum 2006 a billionaire Donald Trump nena an inkungkaih dan chu zep nei map lovin a sawi hmiah hmiah. President Trump chuan Daniels-i puhna tam tak chu phain, “fake news” a ti.

Stormy Daniels lo hmeichhe pakhat Playboy model “Karen McDougal” pawhin Donald Trump nen a nupui neih lai rengin inlaichinna nei angin a rawn insawi bawk a, he nu hi CNN lamin an kawmna an tichhuak thung.

Daniels-i kawmtu pawh hi CNN a thawk thin Anderson Cooper a ni. Hetih lai hian President Trump a nupui Melania Trump chu ala ngawi reng a, a thupuangtu erawh chuan Trump leh Melania fapa Barron-a kum 12 lek chungchang sawi chhuak ve ziahlo turin an duh tih a sawi.

Tunkar hnih chhungin Stormy Daniels leh Karen McDougal ten President Trump chu mipat hmeichhiat thilah rawn puh hmingchhe viau mahse, Trump a thiltih that vanga a larna ‘rating” chu a rawn sang chho dawrh a, 42% a kai chho a ni, mahse, 54% erawhin a hnathawh that chu an la pawmpui lo niin an sawi (CNN’s Poll). He Poll atan hian mi puitling chin 1,014 ngaihdan lak a ni.

Poll a lan danin 63% chuan Trump chu hmeichhe chungah che zei lutuk deuhvah an ngai a, 21% chuan nupui pasal nei reng chunga kawppui neihna (extra-marital affairs) ah fihlim lovah an ngai a, 16% chuan ngaihdan vak an nei lova, 5% te chuan Hmeichhiaten tlang takin an affairs neih dan an sawi tur a ni an tih laiin, 4% erawh chuan inremna an siam chuan an ngawi ve mai mai tur a ni, an ti.

Mizoram ah US ang takin thil chhuiin zalenna kal pui ta ila, engnge kan an ang aw.

ᅠᅠᅠᅠᅠAuthor: CT.Lalrinawma

Aside | Posted on by | Tagged , | Leave a comment

A tlan loh ni-ah Vettel a chak ber

March 25 a ni a, number 5 Sebastian Vettel-a tan vanneihna hun duhawm tak a thleng. Chawlhni a nih avangin tute tan pawh lirtheia tlan chhuah palh vek a ni a, F1 season țanna Australian Grand Prix-ah Ferrari driver Vettel a chak ber.

A hmasa ber ațanga tlan chhuak Mercedes khalhtu Lewis Hamilton erawh a vannei ve lo. A tir ațangin hma a hruai ngar ngar a, a hnung chiahah Ferrari driver Kimi Raikkonen awmin second 3.3-in a falsan hman a, pathumnaah Vettel a tlan.

RUAHMAN LOH DANIN

Lap 58 tlan turah Raikkonen chuan lap 19-ah tyre thlakin a tawp thleng daih tur tyre a vuah. Hamilton-a team-te chuan tyre thar hmang Raikkonen-an hamțhatna a neih phah hlauvin lap 20-naah tyre thlak turin Hamilton chu pitstop-ah an ko lut ve nghal.

Tyre nem ber chi hmangin Vettel chuan hma a hruai zui a, tyre a thlak ve mai lo. Qualifying-a che ţha tak leh beiseiawm taka intlansiak hmachhawn thei American team Haas an che sual nasa kher mai.

Kevin Magnussen-a tyre an thlaknaah a ke hnung lam an vuah nghet lo va, lap 22-na a tlan tihin kual 3-naah harsatna a tawk a, kawng sirah a ding ringawt.

Lap hnih hnuah a teammate Romain Grosjean chuan tyre vuah nghet loh avang bawkin harsatna a tawk ve leh a, Haas tan a mualphothlak a, point an hmu lo.

HAAS LUNGCHHIA, FERRARI LUNGLAWMNA

Kawr sirah an car a ding ringawt a, chak taka tlan vak a him lova virtual safety car hmangin intlansiak an thunun. Tute mah inlehpelh awi a nih loh bakah tlan chak theih chin bituk siam a ni bawk.

Hetih lai tak hian Vettel chuan a tyre a thlak a, tlan chak thei lo Hamilton chhuah khalhin hma a hruai zui thei. Lap 32-naah safety car a chhuak fel chauh a, intlansiak tak tak an chhunzawm leh ațangin lap 16 chiah a awm tawh.

Hamilton chuan Vettel lehpelh tumin a nawr vak a, a tlan sual phah nghe nghe. Pahnihna ni mai turin a ţanhmun a sawh rem a, a tawpah second 5.9 ngawtin pahnihna Hamilton aiin Vettel a thleng hmasa a, Raikkonen chu pathumna niin Ferrari driver pahnihin dawhsan an luah ve ve.

Ferrari team nôte Haas chet sualna avangin Italian team-in malsawnna an dawng. Nikum ang bawkin season țanna Albert Park-ah German driver Vettel chuan hnehna a chang let a, Mercedes leh Hamilton-an kum zawnin an tuar ve thung.

VANNEI LEH VANDUAI

A vawi 47 nan F1 tlankawngah Vettel a chak a, dawhsan vawi 100 inhlangkai thei palina a ni nghal. Hamilton nen vawi nga world champion ni hmasa zawk nih an inchuhna kawngah fuh thei ang berin season a țan.

World champion ni lai Hamilton erawh Melbourne-ah a lunghnur leh. Kum nga chhungin vawi li a hmasa ber ațanga a tlan chhuahna a ni a, pakhatna a ni zo lo vek. Briton hian vawi sarih ngawt Albert Park-ah a hmasa ber ațangin bul a țan tawh a, țum hnih chiah chak ber ni chungin a tawp a khar.

Red Bull driver Daniel Ricciardo chu palina niin Australian zinga Australian GP-a dawhsan luah hmasa ber nih a tumna a puitlin zo leh lo. Chutih rualin a tan result țha tak a ni a, pariatna ațangin a tlan chhuak.

Renault engine an hman ațanga an tlan hmasak berah McLaren khalhtu Fernando Alonso chu pangana a ni a, kum thum Honda engine an hman chhunga McLaren chet țhat ber a tluk nghal.

Kum zawnin Australia-ah Haas-in point an hmu lo va, 2009 hnua a vawi khat nan Melbourne-ah Force India-in point khat mah an thawk chhuak lo bawk a ni.

AUSTRALIAN GP RESULT & POINT

1 Sebastian Vettel (GER) Ferrari – 25pts
2 Lewis Hamilton (GBR) Mercedes – 18
3 Kimi Raikkonen (FIN) Ferrari – 15
4 Daniel Ricciardo (AUS) Red Bull – 12
5 Fernando Alonso (SPA) McLaren – 10
6 Max Verstappen (HOL) Red Bull – 8
7 Nico Hulkenberg (GER) Renault – 6
8 Valtteri Bottas (FIN) Mercedes GP – 4
9 Stoffel Vandoorne (BEL) McLaren – 2
10 Carlos Sainz (SPA) Renault – 1

Aside | Posted on by | Tagged , | Leave a comment