DIHMUNZAWL-A IN RANGKACHAK, LEIVUNG TANGKARUA LEH CHINAI LUNGHLU KHA

“PHE building aia lian daih leh tha zawk Dinthar Presbyterian Kohhran Biak In ṭhiattuin ₹ 2,00,000-in a ṭhiat ngam,” -T. Sangkunga, MLA

Nikum lamah khan SIPMIU chuan Tlawng lui bula Dihmunzawl-a Water Treatment Plant ṭhiah nan cheng nuai 63.08 a seng a nih kha. Khatih laia Mizoram Assembly hnuaia Estimate Committee Chairman Pu Lalrinliana Sailo chuan, “Power sub-station dinna hmun tur tihzâwlna (earth work) atan a hranpain cheng nuai 35 hman a ni tho a. Min hmin lo a nia. Fimkhur rawh u,” a ti nghe nghe. Pu T. Sangkunga meuh pawhin, PHE building aia lian daih leh ṭha zawk Dinthar Presbyterian Kohhran Biak In ṭhiattuin ₹ 2,00,000-a a ṭhiah ngam thu a sawi tih chanchinbu lamah a lang.

THIL PAWIMAWH TE:
* He in ṭhiat tur zawnna (auction) hi an nei miah lo va, a ṭhiat turin SIPMIU-in contractor an pe tawp mai a ni.
* Water Treatment Plant hmunhma paih fai nan cheng nuai 6.42 an seng.
* Tlawng luia chinai paih nan cheng 69764.4 an seng.
* Leivung paih fai nan cheng nuai 42.94 an seng.

HETI ZAWNG HIAN
* He in ṭhiat tur zawnna (auction) neih a ni miah lo hi a fel tawh lo sa hrim hrim. Sawrkar department building ṭhiat tur chuan tender chhuaha auction neih a ni ṭhin a, SIPMIU-ah chuan neih a ni ve lo va, an contractor khan a duh zat zatin a ṭhiat mai dawn tih a chiang reng! He thilah hian SIPMIU Project Director Pu Valbuanga nge thiam lo, a phenah thiam takin midang an inrawlh zawk? A eng emaw zawk zawk a nih loh pawhin a ni ve ve ang.

  • Water Treatment Plant hmunhma paih fai nan cheng nuai 6.42 an seng a, bawlhhlawh paihna man to ber a ni hial ang. MLA Pu Rina sawi ang a nih chuan Power Sub-Station hmun tihzawlna atan a hranin cheng nuai 35 hman a ni tawh a, hetah a hranin cheng nuai 6.42 a lo awm leh a, thil mak tak a ni! He lai hmun khat hi ṭhuang hnihin an tifai ni tak maw!!! Eng pawh ni se, nuai 35 kha chu dahṭha phawt ila. Aizawl-a Mission Veng-ah hian bawlhhlawh pahna man hi thla tin cheng 50 an chawi ṭhin a, in 1000 vel lo awm ta se, thla khata Mission Veng-in bawlhhlawh paihna atana an senso chu cheng 50,000 tihna a ni a, Water Treatment Plant hmunhma paih fai nana an pawisa hman hian Mission Veng-a in tinte bawlhhlawh paih faina senso kum khat (thla 12) a phuhru thei zan a ni! Kum khat chhunga Mission Veng in tinte bawlhhlawh paihte hi hmun khatah dah khawm ila, Water Treatment Plant hmunhma an paih faite hmun khatah dah khawm bawk ila; BAWLHHLAWH HLU BIK chu a awm tih tu pawhin kan hmu thiam mai awm e!
  • A bul lawka lui awm, Tlawng luia chinai paih nan cheng 69764.4 lai an seng a, he tlawng luia chinai hi helicopter an paihtir a ni lo maw? Aizawl leh Kolasib hi kilometre 80 chuang hreta hla a ni a, Dihmunzawl leh Tlawng inkar aiin a let 30-50 vel laiin a hla zawk awm e. Helicopter chuanna rate hi ₹ 1300 a ni. Tlawng luia chinai an paihna man hian Kolasib-ah vawi 53 zet i zin thei. A tlangpuiin Pawan Hans-ah seat 10 a awm a; tlawng luia an chinai paihna man hian nang bakah i chhungte paruk bakah, SIPMIU hotupa Pu Valbuanga leh UD & PA Minister Pu Zodintluanga leh in ṭhiattu contractor te nen Kolasib-ah vawi 5 zet in kal thei tihna a ni. Dihmunzawl leh tlawng lui inkar tawi tea chinai paihna man hi a va tam em! A phurtu truck neitu/contractor chu tlawng luia nitina tui phur ṭhin Mizoram University tui phurte’n nihlawh an va ti dawn em!

  • Leivung paih nan cheng nuai 42.94 an seng leh tlat mai bawk a; leivung man tam a ni leh ta. A building/khawl etc. thiah nana cheng nuai 13 vel hmanga leivung paih nana cheng nuai 42.94 lai an hmang leh daih hi thil mak tak a ni. He leivung hi a pung thei em ni tih zawhna a awm thei. A thuhrimin, Dihmunzawl in ṭhiahna senso-ah sawrkarin cheng nuai 63.08 an seng, han tih hian sawrkarin an la na tlat a, a ṭhiahna man ngau ngau chu cheng nuai 13 vel chauh alawm an ti zel. A ṭhiat tura a hrana contractor la, bawlhhlawh paihtu tur pawh a hrana laa a hmuna thian faitu tur a hran theuhva contractor la an ni awm chuang si lo va, sawi hran phet an tum hi a mak riau.

Eng pawh ni se, khu lai inṭhiahna senso atana cheng nuai 63.08 lai sengtu contractor hi, mahni in saknaa leivung paih tur ilo fahrana han chhawr chakawm tak chu a nih hmel loh.

Advertisements
Aside | Posted on by | Tagged , , | Leave a comment

7th PAY REPORT HI by M. Lalmanzuala

7th Pay Report hman ve leh hman ve loh thu chu kan thukhel lian ber a ni ta mai a. Engtin nge kan kal zel dawn hriatthiam a harin a huphurhawm khawp mai.

Sawrkar hnathawkten an hmuh tur dik tak ni-a ngaia an nawr mup mup laiin kan Sawrkar hotute erawh chuan hman harsa an la ti rih niin a lang a. Mipui mimir ațang pawhin hman rih loh țha ti an tam fê zawk niin a lang.

He thil kan buaipuina chhan ber chu thil pawimawh danga kan buai fo ang bawkin Sawrkarin a tih tur a tih loh vang a ni.

State Sawrkar ve lêm chuan Pay Commission chu State dang tam takte tih ang bawka neih ve mai âwm a nih laiin neih țul ti lovin U.T. kan nih laia kalphung chhunzawmin Central Pay Commission-ah kan ingnghat a. Chuti a nih chuan Central Pay Commission recommendation apiang chu pawm ve zel tur kan ni mai a. Mahni Pay Commission nei si lova, behchhan ber zawm leh si loh chu tih dan mumal lo tak a ni. Hetah hian kan Sawrkar a thiam lo niin ka hria.

Pay Revision neih a țulna chhan ber chu hun inher zelah thil man a lo to tial tial a. Chuvang chuan sawrkar hnathawkte tan an hlawh chu chhungkaw châwm nana a tâwk tawh loh vang a ni țhin. Pay Commission chuan thil man to zel dan(Price Index) ngunthluk takin an zir a. Chuta țang chuan sawrkar hnathawkten chhungkaw chawmna tâwk an neih theihna niawmah an hlawh chu an bithliah ta țhin a ni.

Engkim tih theih deuh thawa kan ram pawn lam thila innghat kan nih avangin Mizoram pâwna thil man a to chuan kawng tam takah min han nghawng ve nghal lo thei lo va. Kan sawrkar hnathawkte hlawh pawh pung ve lo thei lo tluk a ni.

Sawrkar  hnathawk hlawh a pun chuan miretheite hi a tuartu ber tur an ni ang, tih hi mi tam tak ngaihdan a ni a. Mirethei tih hian a huam zau viau a. Lo/huan neitute hi a tam ber an ni ang a. Anni  hian an tawrh dan tur hriatthiam a har deuh. An thil thar man hi a khat tawkin a to chho reng tawh a. Hlawhfa hlawh pawh a khât tawkin a pung fo va. Tunhma kum 10 vela Rs 200 ni țhin kha Rs 350 a ni tawh. Chu pawh chu hmun hrang hrangah a inang lo fur bawk. Thil dang dangah pawh thil man chu a to chho fo a ni.

Hmun danga thil man a to avanga hlawh tihpun a nih țhin laiin kan ramah chuan ram dang ang bawka a khât tawka thil man a to chhoh fo va, hlawh a puna ram danga thil man a to ve nghal mai loh laiin kan ramah chuan hlawh pun veleh thil man a to nghal ziah țhin. Heti kawnga chhût  hi chuan sawrkar hnathawk hlawh pun hi miretheite tana a hlauhawmna tur hriat a  harsa deuh a ni.

Kan sawrkar hnathawkte hlawh hi India ram State dang tam taka mite aia sang zawk a ni a, kan State sum dinhmun nen a inmil lo tih hi thu dik hnialna tur awm lo a ni. An hlawh tam hrim  hrim hi sawisel ngawt tur ni lo  mahse, kan budget pawisa a ei hêk nasat êm avangin bih chian ngei chu a ngai a ni. Bih chiana siamțhat ngei chu a țul a, chutiang tih chu kan sawrkar tan thil awlai a ni si lo va, chu chu a kaikuang tak chu a ni zawk.

A siamțha theitu kan Sawrkar chu hemi kawnga engmah ti thei lo khawpin amah leh amah a inphuar a, chu chu a buaithlak lai ber chu a ni. Politician-te hi mahni hmasialna nei lova, ram leh hnam tana inpumpeka thawk tur an nih laiin an nihna chu mahni hamhai nan an hmang ta hlauh a. Hlawh an insiama hamțhatna tam tak an inpe a. Chu chu ram inrelbawl nana kalphung tur a nih loh laiin, tihtâwp emaw tihtlêm emaw aiin an titam tawlh tawlh a. An service kalphunga hlawh nei tura awm sa, sawrkar hnathawkte nena inkhaikhinin hlawh nei tur ve rêngah an inngai a. Kan Chief Minister pakhat phei chuan Chief Secretary-ina an hlawh aia tam a hlawh chu thil inhmeh lova a ngaih thu a sawi hial a ni. Hei vang hian hetiang thil pawimawhah kan sawrkar hotute hi thutlûkna dik, harsa sî(hard decision) siam thei dinhmunah an ding lo a ni.

Sawrkar hnathawk hlawh chungchangah phei hi chuan uchuak taka hlawh leh hamțhatna inpe ve tho an nih avangin sawrkar hnathawkten hlawh pun an phût hi  hnar ngawt hlei thei pawh an ni lo. Tun  hma-a Central Pay hlawh pun apianga  an lo pêk ve ziah țhin avangin tihdan thar leh dang an siam te a nih loh chuan pawm loh ngawt tur a ni lo vang. A thuphung(principle) chuan Sawrkar hian hlawh pung pek hi a bâ a ni.

Sawrkarin a pêk rih lohna chhana a sawi chu sum harsatna a ni a. Hei hi a dik khawp ang. Mahse, kan sawrkar hian sum harsat loh lai hi a nei ngai meuh lo va. Central Sawrkar pawisa kan dawn hi a hmanna tur dik takah chuan hmang ila, kan harsa lo mai tur a ni a. A hman lohna tur deuh veka kan hman avangin kan harsa lo thei lo țhin a ni.

Sum lama harsatna kan nei reng chungin, kan ziaawm ta deuh e, tih pawh awm chuang lovin eng emaw hunah chuan hlawh pung chu an pe nge nge țhin a. An pek hun chu eng dang a ni lo va, NEXT ELECTION-ORIENTED a ni deuh ber țhin.

Tun țumah pawh hian kan sawrkar hian 7th Pay hi pek ngei a tum a. A hun erawh chu nak kum election enzâwn a ni deuh ngawt ang. Inthlan huna an hlawkpui emaw an țangkaipui tur hun an thlir rih ni berin a lang.

Sawrkar hnathawk hlawh tam hian, a tam hrim hrim bâkah nghawng țha lo tam tak a  nei a, chu chu kan zir chiana kan siamțhat tur tak chu a ni. Hlawh tam hian TA/DA leh thil dang dangah pawh ‘entitlement’ sâng zawk a pe a, chutiang thila pawisa luang ral chu tam tak a  ni. Heng bâka hamțhatna dang ‘medical re-imbursement’ etc an dawn te hi a tam thei ang ber leh chin tâwk nei lo hi a ni deuh ngawt mai a ni.

Hetiang thil kal vel hian kan sawrkar kalphung hrim hrim  hi nasa takin a khawihbuai a. Hlawh tihpun huna, ‘fitment’ an tihna lamah thil tithei bîk leh duhsak bîk an awm țhin avangin ‘mahni hlawha lungawi, midang hlawha lungawi lo’ an awm phah ta țhin a. Inelrelna te, duhâm zêlna te a rawn awm belh zel a. Chu chuan sawrkar hnathawkte zingah “work culture” a tihchhiat zual phah a. Ram leh  hnam tana hnathawh aiah mahni tâna thawh kalphung a rawn hring a ni.

Sawrkar hnathawkte dinhmun hi a țhat êm avangin tu pawhin an ban phâk chin chinah sawrkar hnathawh hi an tum vek ta mai a. Hna dang tawh phawt chu hmuh hniam leh tuipui tlâk lohah kan ngai a ni ber a. An tam êm avang leh an hlawhte a tam êm bawk avangin leh  kan ramin thar chhuah leh siam chhuah alawi kan neih bawk loh avangin sawrkar hnathawkte hlawh  hi kan ‘economy’ innghahna ber leh kan GDP tehfung ber a ni ta deuh ngawt mai a. Chu chuan awmze neia ram ‘economy’ siamna kawng a ping ti tih dêr mai a ni.
Chu chu kan politicianten POLITICS KHELH nana an han hman deuh vek tâkah phei chuan kan ram kalphung DEMOCRACY a letlinga khâina-ah a lo chang ta bawk a ni. A va rapthlak êm! He sawrkar hnathawk hlawh tam tham tak siam dan leh kalpui zel dan leh an hnathawh dan kalphung hrim hrim pawh  a fel tâwk loh êm avangin kan hnam nunphung leh “moral” ber pawh nasa taka eichhetu tak pakhatah a chang ta a ni.

Siamțhat dan ni-a ka hriat tunhma pawha ka lo sawi tawh țhin chu hei hi a ni. Ngunthlûk taka zir chian hnu-ah kan phû tâwkin sawrkar hnathawk hlawh hi siamțha vek ila. Chu chu tuna mi aia hniam a ni ngei ang a. Chu hlawh thar chu sawrkar hnathawk lâk thar apiangten an  hman tur a ni ang a. Tuna a thawk laite pawhin promotion an hmuh apiangin hlawh hlui ring lovin hlawh thar an ring tawh ang a. Hlawh hlui neitu a pension rualin hlawh hlui pawh a tâwp nghal zel ang.

Hetiang thutlûkna pawimawh siam tur hian kan CM/Minister/MLA-te hi hlawh leh hamthatna dawng lo tura an insiam êm loh pawhin an inpawhhniam hlê a ngai ang. Chuti lo chuan engmah an ti thei lo vang. Ngaihdan han sawi ve rawh u le.

Aside | Posted on by | Tagged , , | Leave a comment

ZONUN MAWI by Lal Chungnunga, Ex. CYMA President.

Bus-ah i chuang a, i bula ding, seat chang ve lo kha engatinge i seat-ah i țhut tir? bus fare a tumsak che em ni? tumsak lo, nang aia a upat avangin i zah a, i seat i kian mai a ni.

Ruaițhehnaah chaw dawh turin i intlar a, i ril pawh a țâm ve tawh. Mahse i hnunga putar chu i kian a, i dawh hmasaktir țhin. Hei pawh eng dang vang mah a ni lo, i Zonun ze mâwi lo lanchhuah vang a ni. Zinnaah mi motor chhia a lo ding a, motor chhe siam thiam miah lo chunga “engtizia nge”? ti-a i din chilhna chhan pawh zonun ze mâwi hawihhawmna nangmaha nung reng kha a lo chhuah vâng mai a ni. Zing dar 2 a ni tawh a, mitthi dar ri val val chuan i muhil tui lai a tiharh che a, YMA tlangau-in tunge thi, engvanga thi nge tih a rawn puanga, vanneihthlak takin i chhungte an ni lo hlauh mai. Mahse i muhil zui thei ta lova, chutiang ang hunah chuan țanpui ngaite țanpui turin ruahsur hnuai-ah pawh kê i pên țhin. I exam hun a hnai, a nih loh leh a Shillong-a lehkha zir kan intih hmuh tan tirh lam khan Khasi ho chuan “Mizote chuan mitthi an lawm a, tui tak leh hlim takin ruang an zaipui tlaivar a, a tûkah phûr takin thlan an lai leh țhin” min ti. Mitthi lumena hlim viau thu a awm lova, thlan laih phûr viau thu a awm hek lo, kan mizia an hre lo a ni. Kumin kumtir lam khan Tlungvel tlangval pakhat a bova, nasa takin khawtlangin an zawng a, mibo zawng tlangval tlawmngai hnatlangte zanah an lo hawng a, dawrkawn ah nulaten thingpui nên an lo hmuak a, pa pakhat chu lo ding chhuak in “Mizo kan ni kan hmel a țha” tih hla thu hi a sawi a, mibo zawng tlangval tlawmngaite hmel kha țha a ti hle a ni. Rîkrum thil a lo thlena kan fuankhawm thuai țhinte, damlo mangangte hnena a thlawna thisen kan pe țhinte, hmeithai In kan sak sak țhinte leh țanpui ngai YMA ten kan țanpui țhin hi chu a ropuiin a hlu êm rêng a ni. Ngaihtuah ngun ngai ta chu a chunga kan sawite khi tuna kan dinhmun, tuna kan mizia hi a la ni em? tih hi a ni.

Vawi khat chu YMA programme hmangin thingtlang khua, Aizawl ațanga km 170 vela hla ah ka zina. “Aizawl zaithiam rawn hruai hram ang che” an tih avangin mipa pakhat leh hmeichhe pakhat ka hruai a. Kan haw lamah chuan pitar kum 70 mi ka phur tel a. Chu pitar chuan “motor hi ka rui leh țhin, tukverh bulah ka lo țhu ang e” a ti a. Ka zaithiam hruaite chuan motor an rui lo, mahse an kian duh lo. Aizawl city bus-ah hian a awm nêm zawk hmeichhia hrim hrim chu sawi loh, aia upa tar chak lo seat kian thei lo, ken tur a ni tih pawh hre lo, High School naupang chu sawi loh, College zirlai leh țhalaite zingah an va tam tehlul em! Mizo zia hre lo țhalai duh aiin kan pung chak ta hi a pawi a ni. Anmahni thiam loh a ni vek lovang, a zirtirtu tur nu leh pa thiam loh a ni tel ngei ang.

Ei leh in-ah hian tunlai hian Mizozia hawihhawmna a lang ta lo bawk. Fatu-ah ka țang fova, țhalaite zingah hawihhawmna hmuh tur a vang ta hle a ni. Ṭum khat chu mo lawmna ruai țhehnaah chawei tur an intlar țhup a, tlangval pakhat chuan a hma chiah a ding putar pakhat chu ” ka pu, ka hmanhmawh deuhva….” tiin a hmakhalh a, zahna chang hre hauh lovin zu bâr tûn tûn ngam a! Kawng laka motor chhia, ûksak miah lova tlan pêl țhin driver an tam sawt hle mai. Hawihhawmna hi kan mawipui a ni tih hria a kan zir thar a țûl takzet a ni.

Doctor, super specialist pawhin en se “nula, tlangval, nang zawng i hrisel e” an tih ngei ngei tur khawpa hrisel si, eng mitthi dar mah ina a kaih harh zawh loh mutui țhalaite zîngah an pung zel hi punna țha a ni lo bawk. A thuhrimah, eng mitthi dar mah in kan thin a țhawng ta miah lo mai hi a MAK ta a ni. Tunhma chuan thih dan rapthlak deuhva thi an awm chuan Zoram a dêng chhuak țhin a nih kha. Mizo nih tinuamtute leh kristian zirtirna lan chhuahtirtu kan nunze mawi, mi zawng zawng tana entawn tlak kan neihte hi khawvel hriata kan hming ti thangmawitu a nih zêl theih nan uar leh zualin i chawi nung zel ang u khai.

A ziaktu hi Central YMA President lo ni tawh Pu Lalchungnunga, Ramhlun North, Aizawl a ni a. Dt.11.12.2017 zan Dar 9:30  vel khan a boral. Amah hi Kal (Kidney) ṭha lo a ni a. Hun rei tak lo inenkawl tawh a ni.

A thuziak hi a ṭhat em avangin Amah hriatrengnan kan dah e

Aside | Posted on by | Tagged , | Leave a comment

IMANUELA THI ZAMA’N by Kima jongte

William Cowper (Cooper) chu November ni 26, 1731-ah Great Berkhampstead khua, England-ah a lo piang a. Kum 6 mi lek a nihin a nu in a thihsan a. Nu duattu pawh nei mumal lova seilianin, naupang khawngaihthlâk tak a ni țhîn. Harsatna tamtak kara seilianin, a nunah chuan hlawhchhamna leh beidawnna tamtak  paltlang tur a awm a. Chutichuan, kum 1763 chho vêl atang phei chuan depression nasa tak a lo nei ta nghe nghe a ni. St. Alban’s Hospitalah te enkawl a lo ngai ta hial a ni, tiin a chanchin ziahnaah chuan chhinchhiah a ni nghe nghe a.
  
Hetih hunlai vêl hian “Amazing Grace, How sweet the sound” (Khawngaihna mak mawi leh duhawm) tih hla phuahtu, John Newton nên intawngin, an in kâwmngeih ta êm êm mai a. Newton-a kaihhruaina nên chuan zawi zawiin a depression pawh chu a lo ziawm ve ta viau zêl a. Depression a neih lai, kum 1771 vêl kha niin a chanchin ziahnaah chuan tarlan a ni a;  he hla chuai theilo, There is a fountain filled with bood, Drawn from Immanuel’s veins (Imanuela thi zamah, Thisen lui a luangchhuak) tih hla hi a phuah ta a ni.
  
He hla thlûk mawi leh lung kuâi tak mai, a thu hmanga mi tamtakten piantharna an lo chan tawhna leh an chan mêkna hi William Cowper chuan Zachhariah 13:1 “Chumi niah chuan sual leh bawlhhlawh tlen fai nân, Davida chhûngte leh Jerusalem luahtute hnênah tuikhur (Lal Isua thisen sawina) hawnin a awm ang…” tih Bible chang nghahchhana a phuah a ni.
    “There is a fountain filled with
      blood
      Drawn from Immanuel’s veins.
      And sinners plunged beneath
      that  flood,
      Lose all their guilty stains.”
  
Thinlung chhungril taka khawharna thûk tak, harsatna namênlo leh beidawn rum rumna dinhmun leh tuarna nasa tak ațanga lo piangchhuak a ni a; he hla thu țha êm êm leh a thlûk mawi bawk si hi mite hnênah Lal Isua thisen thiltihtheihna avanga beiseina thar petu a lo ni ta a ni!
  
Eng anga sual bawlhhlawh tawh leh nung tlâklo nia inhriate tan pawh thisen zarah ngaihdamna a awm a ni, tih min hriattîr, “Min la ngaidam duh e!” Amen! Helai chang phei hi chu hnuk ulh lova sak a harsa ka ti țhîn:
   “Mi sual thi tûr an khenbeh khan,
    Faina lui chu a hmu;
    Amah angin sual mah ila,
    Min la ngaidam duh e.”
Chu Thisen lui chuan, a zawng hmutu apiangte chu englai pawhin a lo welcome êm êm reng a; Pathian khawngaihnain a khat a, misual fâina lui a ni a. Chu Thisen lui  chu chatuan pawhin a kang dâwn lo a ni! A va ropui tehlul êm!
  
Bianga mittui luang zung zung chunga sak a nuam țhîn-
  “Thisen lui chu ka lo hmuhin,
    Khawngaihnain a khat;”
    Chatuan pawhin a kang lovang,
    Mi sual faina lui chu!”

Aside | Posted on by | Tagged , , | Leave a comment

THE BATTLE OF STALINGRAD (Khawvel in a theihnghilh tawh lo tur Indo na rapthlak chu) by Fredy Lalrinmawia

Kum 1939 ah Nazi Germany chuan Khawvel Indopui 2 na bul intanna turin a thenawm ram te a run a , ‘Blitzkrieg’ tactic hmangin reilo te ah France, Poland, Belgium leh a dang te chu a la thla ta hmiah hmiah maia, France pui tura British sipai rawn thawkthla te pawh hlau thlabarin an ram lamah an tlanchhe chho leh a nih kha. Germany chu hneh theih loh ngam rual loh angin khawvel chuan a hmu ta.

Europe khaw thlang lam pang te duh tawka an lak thlak hnuah chuan German ho chuan Europe khawchhak lam pachal USSR run turin a in buatsaih leh ta rum rum mai le, June ni 22 kum 1941 ah Operation Barbarossa a launch ta piap mai le , ( chu chu german hoin USSR an beih tanna operation hming ani) , Soviet ho chuan theihtawp chhuahin lo dan tum mahse German palchal chu ngam ngang loin a ni telin a retreat ta hum hum mai ani. Kum 1942 a rawn in her chhuaka German sipai te chuan USSR khawpui Moscow leh a khawpui lian leh pawimawh ber ber – Leningrad ( tuna St Petersburg) leh Stalingrad ( Volgograd ) te kawtchhuah an rawn thleng ta.

Stalingrad bik hi Russia chhim lama khawpui lian tak, Volga lui kam (West lam) a awm ani a , Russia chhim lam oil hosakna german hoin a duh tak mai lak nan a dangtu awmchhun a ni a, Stalingrad hi thla 2 chhung vela la hman turin German ho chuan an inngai ani. July ni 17 , 1942 ah chuan Stalingrad khawpui chung chu German Bombers te an hliah thim ta khup mai le , kar loah an bomb sur chuan Stalingrad khawpui building zawng zawng deuh thaw chu a deng sawp nghal ani. Tichuan lei lam sipai , tank leh infantry ten chet an la chhun zawm leh nghal.

Nimahsela German ho chuan an rin ang ngawtin Stalingrad lak chu a awlsam dawnlo tih an in hre ta a a chhan chu building chim leh khawpui sawprawp ah an tank te an che tha theiloa an sipai te pawh duh angin an che theilo , Russian ho lah chuan chuti mai mai a Stalingrad laktir chu an tum bau lo bawk. Khawpui chhunga inbeih naah chuan nasa takin thisen a chhuaka leh lam leh lam ta chet a harsa a ni. Stalingrad hi a german hoin an lak chuan russia chhimlam oil hausakna zawng zawng chu an sipai te nasa taka tihchak nan an hmang thei dawn tih khawvelin a hai lo, khawvel mit chu Stalingrad ah a fu ta thup mai le. Stalingrad a sipai leh supply rawn chawklut tur hian Volga lui kan a lawnga rawn kai angaia , chung lawng te chu german fighter hoin chawlh awm hauh loin an bei char char reng bawka chuti chung chuan Russian sipai te chu an beidawng duhlo, German ho rin ai daihin Russian sipai te chu anlo tough ani.

Khawpui chhunga inbeina a kal zela , german hoin Russian ho chu Volga lui lamah an nawr tawm telh telh a , Stalingrad khawpui 95% chu german hoin an la tawh a ni. (Hetih lai hian British Newspaper pakhai chuan ti hian a ziak : Germany chuan ni 35 chhungin Poland a la thei a , Stalingrad ah chuan ni 35 chhungin Building 1 an la thei trawk a , France kha ni 46 chhungin an hneh a , Stalingrad ah chuan ni 46 chhungin kawng 1 an cross thei trawk ani ). 1942 kum tawp lam an rawn hnaia, German ho chuan Stalingrad chu 95% awp tawh mahse an la la tak tak thei chuanglo , chutah le Russian thlasik rapthlak a rawn thleng ta , hmun thenkhatah pheichuan -55 Degree C a vawt te ani.

German hoin an tawrh nasat ang bawkin Russian hoin an tuar nasa amaherawhchu a ram mi ni ta vang vang chuan anlo hmang zawk . Khawvawt hnuaia Stalingrad khawpui chhunga an inbeih reng lai chuan Russian lam chuan Operation Uranus an rawn launch ta thut mai le .. He operation hian a tum chu hmun hnin Stalingrad chhim leh hmar lam atanga German line tihchhiat a Stalingrad a german sipai te hualbeh ani. An tum ang ngei chuan an hlawhtling ta , German Army in an chhuan vawr em em an 6th army , Stalingrad la thei tur saa an ngaih te chu hualbehin an awm ta riap mai le.

February 1943 a lo inherchhuah chuan German 6th army , Stalingrad chhung a awm te chu an in surrender ta. Khawvelin hneh theihloh ngam rual loh a ngaih German Ral-lian chu a vawi 1 nan khawchhak pachal Russia lakah a tlawm ta, Russia chuan Nazi Germany chu hneh theih anni tih khawvel mit hmuhah a tar lang ta ani. He battle ah hian German sipai nuai 7 chuang leh Russian Sipai leh Civilian Maktaduai 1 aia tam an thi a ni.

Aside | Posted on by | Tagged , , , | Leave a comment

Mermaid naute a piang?

Dec, 6 nilaini khan Muskura Bibi, 23, chuan Chittaranjan Deva Sadan Hospital, Kolkata ah naute neiin vanduaithlâk takin a naute hi a piangsual hlauh mai a. Darkar 4 hnuah a boral leh ta.

He naute hi vanduaithlak takin mermaid syndrome a lo nei hlauh mai a. Naute duhawm tak hring tura an inngaih laiin mermaid ang tak naute an nei ta hlauh mai a ni.

He naute nu leh pa te hi rethei leh hnathawk nasa tak niin a pai lai hian inentirna tur leh damdawiin ṭha panna tur an nei lova. Naute dinhmun hi a pai chhung zawng hre miah lovin a awm ngar ngar a. Naute a lo pian hian a naupai chu a piangsual tih a hre ve chauh a ni.

Dr Sudip Saha, child specialist chuan “A nu leh pa te hian sum harsatna avangin inenkawlna ṭha an ngaihtuah thei lova. Nutrition tlakchhamna leh thisen dawn ṭhat tawklohna avangin hetiang piansualna hi a thleng thei a ni” a ti.

• Sirenomelia an tih, mermaid syndrome an tih bawk hi natna vang tak a ni a. Ke pahnih inbelhbawm emaw a ṭhen lai inzawmin emaw an awm ṭhin. Naute 60,000 – 100,000 vel naute piang ah pakhat te chu hetiang natna nei hi an awm zauh ṭhin chauh a. Ril ṭhang puitlinglo leh kal ṭhang puitlinglo an nei duh a. An pian hlimah chuap leh lung fello vangin an boral duh hle.

Source: National Organization for Rare Disorders

Kum 2016, Uttar Pradesh state a nu pakhatin a nei tawh bawk a, chu naute chu minute 10 chauh a dam.

DAILY MAIL CHANCHINBU A ṬAWNG FIMKHUR LO.
He thu hi Daily Mail chanchinbu chuan facebook page ah post in “It died just four hours later” tiin a caption a ziak a. Naute sawi nan, mihring nilo sawina “It” a hman avang hian comment ah an sawichhe nasa hle nghe nghe a ni.

image

Aside | Posted on by | Tagged , | Leave a comment

MI TIBUAIA UI SEH TIRA PUH POLICE-IN MAN KIM.

Tun  thla December  ni  3, Pathianni  tlai  lam khan  Phuldungsei tlangval  pathum,  Aizawla  awm  Lalruatkima,  Lalhriatpuia leh  Lalrosanga  te  leng haw chu Vaivakawn Zohnuai-ah  tlangval 4-in  kut  lo  thlakin  ui an  seh  tir  bawk. Thudawnnain  a sawi  danin  Ruatkima te  thianho  hi  Aizawla Bungkawn Vengah lehkhazir  leh  inhlawha  awm  an ni a. Zohnuaiah  an  leng haw lam  chu  tlangval 4-in  lo  tibuaiin,  kut an  thlak  a,  ui  (pitbull) an  seh  tir  bawk  a. Mi  tlawmngai  ten civil  hospital  an  panpui  a  ni. Ruatkima  hian  a dar  ruh  na a ti  hle  niin thudawnna  chuan sawiin,  ngaihtuahawm  erawh a ni lo niin  a  sawi  a ni.

Pawikhawihtute hian  Ruatkima  hmaiah  leh  Lalrosanga banah  ui  an  seh tira,  vaccine  an  la  mek niin  a  sawi  bawk. He thil  thleng chungchangah  hian Vaivakawn  police  station-ah  FIR  thehluh niin,  pawikhawihtua puh te  an man kim  tawh  tih  Vaivakawn police  te  chuan the  zozam  times  an hrilh  a.

Pawikhawihtua  puhte  hi  ui  neitu Lalrawngbawla, Vaivakawn  Zohnuai bakah  Vaivakawn Zohnuaia  mi  in luaha  awm  –  Lalthangzuala,  Serhmun, Remruatpuia  Serhmun  leh Lalhriatchhunga, Champhai  te  an ni  tih  police  chuan an  sawi. Phuldungsei  jt. YMA  secretary-in  an khaw tlangval  te chunga  thil  thleng  hi pawi  an tih  thu  a  sawi a.  Phuldungsei  village council,  joint  YMA  leh NGO dang zawng zawng ten  he thil thleng  chungchangah hian  ‘aw’  chhuah  ngei an  tum  tih  the  zozam times  a  hrilh  bawk.

Source: Zozam Times

Aside | Posted on by | Tagged , , | Leave a comment

Israel hnambo kan ni lo

Vawiin December 3 chu kan kohhran Ramhlun Vêngchhakah ka hmang ve a. Chawhnu inkhâwm bàn hnu dâr 3-ah Belgium nula doctorate zirlai, MZU behchhan deuha lo kal Miss Alexia Ingber chuan Mizo zinga Juda inti, Manase thlaha inngaite chungchângah min rawn interview a.

A hnênah chuan he thil hi ka buaipui lohna a rei tawh thu ka hrilh hnûah Mizo zinga Israel thlah nia inngaihna lo awm ṭan dàn a bul thûm aṭangin ka hrilh a. Ka thil hrilh tlangpui chu:

  1. Mizo leh Israel inanna an sawi tam tak hi phuah chawp a ni. Chhui chian a dawl lo.
  2. Kan sakhaw biak dàn a inang an tih hi Juda-ten sa thiang leh thiang lo an nei a, hmánlai Mizote erawh chuan thiang leh thiang lo an nei ve lo.

  3. Mizo sa biaknaa thil pawimawh ber pakhat chu vawk (vawkpa sût nghâk) a ni. Juda-te tân erawh chuan vawk chu sakhaw thil tenawm ber pakhat a ni.

  4. Juda-ten ui sa an ei ngai lo. Mizote erawh chuan vantlang saa ngaih a ni lo chungin ui sa ei ṭhin a ni. Tunah phei chuan Aizawla sa to ber a ni hial ang.

Vawk sa leh ui sa thianghlim lo tih bo ṭhak khawpa hnam bo nih chu an bo lutuk deuh a ni mah nà!

  1. Israel hnam bo ni ta ila, ṭawngah hian inang pahnih khat tal awm ve àwm tak a ni a. Kum 20 aia tam mah Biblical Hebrew ka lo buaipui tawh a, Mizo ṭawng nen inang ka la hmu lo.
  • Tûna Israel rama Mizo pêmte khu Israel thlah dik an nih vànga pêm an ni lo a, Juda saphun an nih hmasak avànga pêm thei chauh an ni. Tûnah phei chuan Mizoramah saphuna an insiam hmasak a ngai tawh.

  • Juda thlah hi lo ni palh hlauh pawh ni ta ila, Kristianna tlansana Judaism zawm chhan tur hi kei chuan ka hre lo. Isua Krista tlanna hloh leh tura Judaism-a inpek chu bona double a ni ang.

  • Juda nih duh chhan pakhat chu economic thil a ni. Hnam pachhia kan ni a, hnam changkâng, Pathian hnam thlan lehnghâl zinga tel chu khawvêl thila hnianghnàrna a ni ang. Hnam hausa ni ila, Israel thlah nih an châk bik lo ang. Mizo zinga Judaism zawmte pawh hi a tlângpui thuin sum leh pai dinhmuna mi hnuaihnung deuhte an ni ber. Hnam thlan zinga tela an hausakna chen ve an duh tel niin a lang.

  • Dârkâr khat zet min kawm hnuah min ṭinsan ta a. Nakkumah lo kal leh a tum a, min rawn tlawh leh tùrin ka’n chah tâk kha!

    Author: Rev Chuauthuama

    Aside | Posted on by | Tagged , , | Leave a comment

    PATHIANNI ZAN ATANGA BO PU LALRINMAWIA RUANG TIAU LUIAH HMUH A NI

    Pathianni zan atanga chin hriat loha bo Pu Lalrammawia-ruang chu, nimin Dec 6 khan Tiau Luiah hmuh a ni.

    Pathiani zan atanga chin hriat loha bo Pu Lalrammawia kum 43 s/o Ralliantawna Tlangsam chu nimin khan a ruang Tiau Lui, Kerawh Liah hmuh a ni.

    Pu Lalrammawia hi Tiauah huan neiin a riak a, Pathianni tlai khan an riahna hmun atanginNew Fartlang (Bulfekah) Buh deng turin a thianpa nen an kal a, Zan dar 7 velah amah a, an riahna lam pana a haw chu a chin hriat lohin a bo zui ta a ni.

    Thawhtan leh Thawhlehniah chhungkhat laina hnai te’n zawngin an hmuh mai loh avangin nimin Nilai khan Tlangsam Branch YMA te chuan an zawng a, Nimin dar 11:15 khan Kerawh Liah hian a ruang hi an hmu ta a ni.

    Thudawnnain a sawi danin Pu Lalrammawia hi tlusual palhin tuiah a tla niin an ring a, tui hleuh thiam lo a nih avangin a chesual a nih rin a ni. Pu Lalrammawia ruang hi nimin tlai khan Tlangsam Thlanmualah vuiliam nghal a ni.

    • Author: Vanneihthanga Vanchhawng

    Aside | Posted on by | Tagged , | Leave a comment

    ISRAEL RAM KHAWPUI ATAN JERUSALEM PUAN A NI TA : DONALD TRUMP-AN MUSLIM WORLD PAWI A SAWI

    Khawvel hunbi chhiar dan a ” tehna ber” leh hun vawngtu” ang maia ngaih, Pathian hnam thlan ni a inngai-Israel te chuan US President Donald Trump kaihhruaina hnuaiah “hunbi thar” hmel danglamna tlang an chuang mek ta!

    Niminah a lo sawi lawk leh kum 2016 a US Presidential election American leh Juda mipuite a lo tiam ang ngeiin, US President Donald Trump chuan Diplomatic Reception Room, White House atangin khawvel hriatah “Jerusalem” chu Israel ram khawpui a nih thu a puang ta hmiah. Arab-Palestinian Muslim World chu thinrimin an sosang hle a; chutih laiin “Arpui a lungchhia, Sanghara lung lawm” tih ang maiin, Israeli-Juda mipuite chu an lawm hle thung.

    President Trump chuan,” Vawiinah hian, a tawp a tawpah Jerusalem chu Israel khawpui a nih thu kan pawm ta. Israel chu mahni ke a ding ram leh hnam a nih angin, hnam dangten anmahni khawpui (capital) an nei angin, amah ngeiin khawpui a neih chu a dikna leh chanvo a ni. Judaten hman lai atangin Jerusalem chu an lo din a ni” a ti. A thusawi lai hian US Vice President Mike Pence pawh a sirah a ding a ni.

    Israeli PM Benjamin Netanyahu chuan hetianga Donald Trump-a thusawi hnu lawkah “Israel te tan ni chhinchhiah tlak” (historic landmark) a ni” tiin, “Israel-Palestinian te inkara Remna kawng zawn kawngah pawh he thil (Israel khawpui Jerusalem a nihna) hi a tel tur a ni” a ti.

    Hetih lai hian Gaza Strip, Beirut-Lebanon leh Arab-Muslim World ah te chuan “Jerusalem khawpui Israel tana puan” duhloh entirnan US, Israel flags te halin, Donald Trump lim te halin, Beirut khawpuia Palestinian ho phei chuan “Donald Trump- mi a pa” ti tein an au dual dual a ni.

    Hamas hote chuan he thil duh loh entirnan Ni 3 chhung thinurna hrik thlak tumin “Day of Rage” hman an tum a; Israeli Security Forces te pawh an inral ring hle.

    Manuel Hassasian, Palestinian General Delegate chuan, “Remna kawng zawn tihtawpna” (kiss of death of peace process) a ni” tiin Donald Trump thiltih dan chu a dem hle, “Middle East ah indona a puang mek a. Khawvela Muslim tluklehdingawn 1.5 te zingah indona a puang mek a ni” a ti. President Trump hian dodalna leh buaina leh tharum thawhna nasa tak a awm ang tih vaukhanna tam tak karah “Jerusalem” khawpui chu Israel te khawpuiah a puang ta tho a ni.

    image

    Saeb Erakat, Palestinian Chief Negotiator chuan, “Tunah chuan Two-State Solution chu a zuzi ta” tiin, US thiltih dan chu a dem hle. Palestinian hote hian  US hmalaknaa Middle East remna kawng zawnnaah tel an tumlo tih an puang a ni. Palestinian hote chuan “Jerusalem chu kan chatuan khawpui” tiin, Red-Lines peltaah an ngai a ni. An rilru a na ngawih ngawih. Independence an hmuh chuan East Jerusalem lam chu an chanvo, khawpui tura an ngaih a ni. West Jerusalem lam chu kum 1949 ah pawh Israel te awp leh chan a ni a, kum 1967 a Six Day War ah khan Israel Army huaisen ten East Jerusalem pawh Arab-Jordan etc kut atangin a chhuh sak a ni.

    President Trump hian hun rei tawh tak atanga US Foreign Policy chu a rawn tidanglam dawrh mai a; engnge a nghawng zel tur erawh a hriat rih loh a ni.

    Kum 1995 khan US Congress chuan “Jerusalem Embassy Act” tih chu an lo siam tawh a; Tel Aviv atangin Jerusalem khawpuiah US Embassy sawn tumna a ni. Mahse, tu President mahin an sawn mai thei lova; a tawp a tawpah Donald J.Trump chuan a rawn puang ta rawt mai a ni.

    British PM Theresa May chuan President Trump hi be nghalin, a thil puan leh tih chuan rah tha a chhuah loh tur thu hrilhin, “Middle East remna kawng zawn a tisukuk ang” tiin, Britain erawh chuan Tel Aviv atanga Jerusalem a UK’s Embassy sawn mai an tum rihlo tih a sawi bawk. US lam tang thin France, Germany, EU, Turkey, Saudi Arabia, Jordan, Egypt te pawhin President Trump thiltih dan hi an sawisel a ni. Donald Trump erawh chuan ram dang pawh an Embassy te chu Tel Aviv atanga Jerusalem khawpuia sawn turin a sawm a ni.

    Jordan Lal King Abdullah II chuan Turkey President Recep Tayyip Erdogan be nghalin, karleh khian Jetusalem chungchang ngaihtuah mup mup turin Organization of Islamic Cooperation (OIC) ram 55 chuangte koh khawm a, extraordinary meeting neih an tum a ni. “Jerusalem hnam tin tana ruihna no” a nihna tur a lo inher chhuak tan mek niin alang.

    Kum 1973 khan Arab ram, Oil & Gas ngah ho chuan Israel chungchanga America thiltih vangin US chu an ensan (embargo) a, uchuak takin khawvelah tuialhthei man leh gas a to chhova; thil man a sang em em a, tun tumah hian OIC te hian US hi an ensan leh ngam ang em?

    An-Nahar News chuan Donald Trump leh Israel-Judate ram petua ngaih British Foreign Secy Arthur Belfour chu khaikhinin, “Trump: Belfour of the Century gifts Jerusalem to Israel” tiin a ziak kuau mai ! Belfour Declaration tih duangtu Arthur Belfour kha Muslim ram te chuan an dem bang thei lo. Palestine rama Israel ram theh saktuah an puh a ni. Mizoram a “Chakma Autonomous District Council” theh saktu ang ve deuhvah an ngai.

    Chutih laiin Judate-Israel fate erawh chuan, hmakhawsang atanga Jehova’n an thlahtu Abrahama hnena ram a lo pek, hruaitu ropui Mosia hova ram tiam lam pana an pan tauh tauh, Joshua hova Jordan Lui daikaia an luah niin an sawi thung a ni. Bible ringtu kristian te erawh chuan Israel ram thar lo piang ta chu Pathian remruatah ngei an ngaihsak a, an tan em em thin a ni!

    Aigupta ramah te, Babulon ramah te, Europe-Germany, Poland etc ah te sala man leh tihhrehawm leh thah chimih tumin Israel fate  chuan beih chiam lo tawk tawh thin mahse, “Mahni mit naute” ang maia enkawltu leh vawngtu Abrahama Pathian, Jakoba Pathian leh Isaka Pathian chuan Israel fate chu vawiin thleng a hrereng a; a theihnghilh hauh lo a ni. An nghah Messiah-Isua Krista chu a vawikhat Leia a lo kal tumin, a pianna leh  seilen dan a “tlawm” em avangin “hai palh” mahse, a vawi 2na lo lan hunah “hai rual lohva” a lo lanna turin Jerusalem khawpui leh khawvel chu zawi zawiin, chak tak si, hmuh leh hriat theih si lohvin- lang fiah em em lawi siin, a inbuatsaih mup mup zel a ni! “Muang a kan ngaih angin, LALPA chu a thutiam kawngah chuan a muang lo ve!”

    • Author : Ct Lalrinawma

    Aside | Posted on by | Tagged , | Leave a comment