MSU TEN CEMENT PHUR TRUCK 20 HRENG TAWH

Mizo Student’s Union (MSU) chuan mantlawm zawk Mizo mipui ten Cemnet an lei theihna tur leh mumal taka a man bithliah a nih theih nan hma an la mek zel a, Cement phur truck 20 an hreng tawh.

MSU Gen. Hqrs. chuan Cement Company ten Mizoramah man tlawm zawka an Cement siamte an hralhchhuah theihnan hmala in cheng 360 aia to a hralh chhuah a khap a. An hmalakna kal zelah nihnih leh zanhnih chhungin Mizoram Cement man to a hralh chhuah tur Truck phur 20 chu dawra pek remti lovin a hren sak a, Comapany hrang hrang siam Cement phur tu truck te hi CH Saprawnga Truck Terminal Rangva Mualah din tir an ni a. Cement phur truck dang lo lut leh zel tur pawh uluk taka enzui zel an tum thu kan dawng.

Hetih lai hian Aizawl khawpui chhunga Cement dealer thenkhat chuan a man toa an lak cement te chu a man toin bag khat cheng 440 atanga 480 inkarte in an la zuar a ni.

Cement rate chungchangah hian MSU Gen. Hqrs chuan Cement man tlawm zawka lei anih theih nana hmalakna kal mekah mipui thlawpna-ah lawmthu a sawi a, Cement Company lamin Cement tlawm zawka kan lei theihna tur thuchhuah an siam hma chuan hmalakna kalpui zel MSU chuan a tum ani tih sawiin chhel tak leh dawhthei taka thlawp tlat turin mipui an ngen a ni. Mizoram ah Cement Rs360 a zuar theilo tur chuan Mizoramah Cement rawn phur lut lo turin Cement Company te MSU chuan a ngen a ni.

MSU chuan Cement Company te Cement Rate chungchangah Meeting vawi engemaw zat alo neih pui tawh a, Company thenkhat ngai pawimawhlo an awm chu pawi a ti a, June ni 23 chhun Dar 12 hma a MSU Office Cement Rate chungchang sawipui tura leng turin MSU chuan a sawm nawn leh a ni.

MSU chuan Mizorama Cement lakluhna Rate leh hralh chhuahna Rate a zir chian danin
Valley Strong Lak luhna Bag khat cheng 325 a, hralh chhuahna cheng 440,
Star Cement lak luhna Bag khat cheng 235 Hralh chhuahna bag khatah cheng 460 ,
Topcem(OPC) Lakluhna bag khat cheng 310 Hralh chhuahna Bag khat cheng 470 ,
Dalmia Lakluhna Rate-320, Hralh chhuahna bag khat cheng 480
a ni tih an tarlang.

Author : Slchhunga Gooner    

Aside | Posted on by | Tagged , , | Leave a comment

MI VIT HLUMTU DAM CHHUNGA JAIL TANG TURIN HREM

May 7, 2008 a Nurse Remtluangi, Aibawka a chenna Quarters a vit hlumtu Lalthawmmawia chu Dam chhung tang turin Gauhati Hight Court chuan a ti.

Lalthawmmawia hi Aizawl District & session court chuan dam chhung tang turin a lo ti tawh a, Court thuthlukna ah hian lungawiloin a thubuai hi ngaihtuah tha leh turin Gauhati High Court, Aizawl bench ah a khinglet a, Gauhati High Court, Aizawl Bench chuan Tun hnai khan thuthlukna siamin District & Session court in thuthlukna a lo Siam tawh chu pawmin, Lalthawmmawia chu Dam chhung a Jail tang turin a ti ta a ni.

Author : Slchhunga Gooner    

Aside | Posted on by | Tagged , , , | Leave a comment

THIAN CHHAN THIH NGAM LEH NGAM LO

(He thu hi ka irawm a ni lo. Ka mi ngaihsan em em Pu K Zawla lehkhabu atanga ka lakkhawm a ni. Mizo thalaiten zirchhuah kan neih tak hlauvin tih thuah hetah hian ka han pho lang a ni. Ka post hmasa kha chhiar thei lo kan tam avangin ka post thar leh ta ringawt a nih hi. Tin, he thu hi phuahchawp a ni lova, a tak ngei a ni.)

Kumpinu sawrkarin Mizoram a awp tan tirh lai khan Tawi tlang bul Lungdaiah Chinhleia a lal a. Nikhat chu an khaw pa Rana leipui thlo chu sakeiin a ei zo thelh mai a, a khup bawk chauh a ei bang a. A zan a zanin daiah an phum nghal a.

A tukah chuan sakei chu an hual a. Mahse a kal kawi a kal kawi avangin an hual fu thei lova. Tuirini a kan thla ta daih a.

Sakei chu Tlungvel chhuah lamah a tawm ta a. Mi a mala kal seh tuma a veh a veh hnuah Tlungvel tlang lawn liamin Zilngai lui a zawh chhuk ta a ni. Zilngai luiah chuan Vanate vauah a tawm a. Vanate chuan Zilngai lui chu an vah pawha. Thlamah chuan Vana te unau thum tiamin mi pasarih lai buh sengin an riak a.

Tlai khat chu tlai chaw eina tur changel hnah Vana chuan a sat a. A sah lai chuan chu sakei chuan a rawn man ta thut mai a. Vana chuan thingbul a vuan tlat chungin, “Hei sakeiin min man e, min zuk chhan teh u,” tiin a auva. Chhan a hnekin midang chu thlam kilah an tawm im thap mai a. Vana au thawm a reh chuan tlangval Darsanga zualkovin an tlantir a.

Darsanga chu a tlan chak ngang a niang, thlama miten”Tunah Darsangan khua a thleng tawh ang em aw,” tia an ngaihtuah lai chuan lo lu ah, “Lo thlaphang reng reng suh u, kan lo kal e,” tih thawm an hre ta mai a ni. An lo thlen chuan thlam kilah an lo tawm thap mai a. Vanate upa ber Tuahkawla chu a thin a ur em em mai a, “Midang chu ka phut ngam lo, a u te pahnih in awm a, in nau in chhan ngamlo a maw?” a ti a, a vei tau nghat nghat mai a. Vana hi mit khing del a ni a, ei lovin a kalsan.

Sakei chuan Zilngai lui zawh chhukin Tuirial a thleng thla a. Paikhai kaia midum lei dawh ho a bei leh ta. Midum ho chuan an hlau em em mai a. An thlanchhe hman tawh si lo. En pawh an en ngam lova, an inlukhup fur mai a. Sakei chuan a duh ber a la a, an tlan chhe ngam chauh a ni.

A midum seh a ei zawh chuan Tuirial a zawh chho a. A kal zel a, luite a zawh ta a. Hetah hian mizo mipa hmeltha hmingthang, Zawngtah khaw mi, Thangtawi hmelthaa chakai khawrh lai seh hlum leh a ni.

Chu sakei sual chuan Phulpui lam a pan a, Riltui khua Dartuaha te unau za hlo thlo lai Aizika chu a seh leh ta a. A unauten Chemkawmin an sat sek sek a Aizika chu a thlah ta a. Mahse Aizika hi zan khat chauh a dam a, a thi ve leh ta a.

Tichuan sakei chuan Tlawng lui a pan chhuk a, Sairang khua in sarih lek awmna a thleng thla ta a ni.

Tlai khat chu Sairang tlangval Thatkhuma zanriah ei kham kamthuah chuan an thenawmte inhnuaia sakei zuang zoh zoh chu a va hmu ta thut mai a. “Kha sakeiin lak che u a tum e, fimkhur rawh u,” a va ti a. Anni chuan an lo hre tawh a, tapchhakah an lo tawm khawm laih tawh a lo ni a. An inau khawm a, in lian berah nunau an dah khawm a. Pa leh tlangval zawngin awmtual mei an chhem ta hluah mai a.

Chutia mei an ai lai chuan sakei chu thim chinah a rawn thu ve ta lur mai a. An han au thin a, a tlan duh der lova. Silaia kah an tum a, silaimu an thlauh palh a. Sakei en a ngai si a, an buai hle a ni awm e. A tawpah silai mu chu tlangval Bawkthanga chuan a dap fuh hlauh a, a kap ri thurh a, sakei chu a tlan ta a. Reilo teah inhnuaia vawk a rawn la leh ta a, a ei chhungin Police awmna an pan ta a ni.

A tukah chuan police hovin an veng ta a. Mahse kah remchangin a awm duh lova. A ri an hriatna lai an kah rawn ta chiam a, sakei chu a tlan leh ta a. A tuk tlaiah chuan Sairang dawrkai vai Hira bawng thlung lai chu a rawn man leh ta mai a. Ri thei apiang an khawng ri a, a thlah ve leh mai a.

Tichuan Tlawng dung a zawh chhuk ta a. Changsil chhakah lui thian faiin Overseer leh a hote an awm lai a ni a. Tlai chaw an ei laiin Gorkhali pa a rawn man leh ta a. Sakei chu thingthu nungin hmui rum rum khawpin an dep a, a thlah ta a. Zanah chuan buk pawnah mei an ai khawm a, sakei chu a lo kal leh ta. An zing huaisen ber leh buk lut hnuhnung ber Thanga chu a man ta a. Buk thlang lawk mau tluk lekah a hnuk thlaa, an inbei ta a ni..Thanga chuan, “Min zuk chhan rawh u, min chhan ngam loh pawn chemte tal min rawn pe ula, ka vit hlum mai ang,” tiin a au chul a. Thingthu nung te an paih thla a; overseer chuan lunghalna te a zuk vawm puak a..sakei chuan a hlau chuang si lova. Thanga chu a tihlum a, tiauphovah chuan a ei ri ta bup bup mai a. Midang chu lui hnar lam hla takah an insawn ta a.

A tukah chhunah chuan lawnga an inkar lai beih a rawn tum leh a, lungpui a rawn phen zut zut mai a. Mahse an vanneih a siamin Serhmun khaw kuli tur tam tak an lo thleng hlauh a, an au tlan ta a.

Sakei chu lui mawng lamah a kal ta daih a. Thui tak mai a zawh thla zel a, Tut lui a zawh chho ta a. Hetih lai hian Tut ah hian Reiek khaw mi sawm lai nghafuan vengin an riak a. An hotupa chu Taituka a ni. An zingah chuan an khaw tlangval chhuanawm Laibula leh tleirawl te pahnih Vuaia leh Bawkkuia an tel bawk a. Bawkkuia hi an tleirawl chhuanvawr a ni a, fapa mal a ni. An hlawhtling hle a, sangha an rep teuh tawh mai a.

Tlai khat chu zanriah eikham hmasa tleirawl Bawkkuia chuan sangha rep mei a va chhawm tha a. Chutih lai tak chuan sakei chuan a rawn man ta mai a. Bawkkuia chuan sangha repna ban a vuan a sakeiin a malpuiah a pet rum bawk a, an inpawt ta laih laih mai a. Sakei leh Bawkkuia inbei chu an chhan ngam si lova, bukah an tawm im thap mai a.

Bawkkuia chuan, “Min rawn chhan rawh u, hei min pawt thlu thei bik miah lo a nia,” a ti a. A thianpa Vuaia rilru so phut chuan, “A ni tak e, kan sat vak mai teh ang,” tiin va chhan a tum a. Mahse an hotu Taituka chuan a phal ta awzawng lo mai. “Sakei te sah hlum zawh em ni i tum, i tikawlh ting ang a, kan phek buai zo vek anga sin,” a ti a. Vuaia chu a zuai leh ta a.

Bawkkuia mangang chuan, “Ka u Laibul, nang phei chu kan khaw tlangval chhuanawm ber pawl i nih thin kha, min rawn chhan teh khai; hei engtinmah min ti thei bik miah lo ania,” a ti leh a. Laibula chuan, “A ni tak e, mau fei hian kan vit ang e,” a ti a. Taituka bawk chuan, “Sakei te mau feia vih hlum zawh em ni i tum? In ti kawlh ting ang a, kan phek buaizo vek ang ka ti fo a lawm le,” a ti hlur mai a. Laibula pawh chu a zuai ve leh ta a. Bawkkuia chuan, “Kei chu ni ila ka chhan ngei ang che u maw le; pakhat tal rawn lang teh u khai; engtinmah min ti thei lo a nia,” a rawn ti leh a. Mahse chhanna a awm lova, thei reh takin a reh ta tlawk tlawk zawk a.

Bawkkuia chu a chau ta a. Sakei chuan a hnuk thlu a, lui lam panin a hnuk thla a. Bawkkuia chuan Tuipuisuthlah a vuan leh ta tlat mai a. Sakei chuan a hnuk thei bik lova, an reh ta vang vang a. Bawkkuia chu a thi tawh emaw an ti a, an zuk auva. Ani chuan, “Min zuk chhan tawh rawh u khai, hei engtinmah min ti thei bik lo a nia, pakhat tal rawn lang teh u khai,” a lo ti a. A reh leh ta vang vang mai a. Nakin deuhah chuan an zuk au leh a. Bawkkuia chuan, “Min zuk chhan tawh teh u khai, chhan tlak ka la awm e. Nangni chu ni ula ka chhan ngei ang che u. Min chhan ngam loh pawhin chemte tal kha min han pe teh u, ka vit hlum mai teh ang,” a ti leh a. Chhanna a dawng lova, a reh leh ta tlawk tlawk mai a.

Rei fe hnuah chuan an zuk au leh a. Bawkkuia chuan, “Min au min au tawh suh u. Min chhan ngam lova, chemte pawhmin pe ngam lova. Tunah chuan a ngaihna a awm ta love. Chhan tlak ka awm ta lo, ka thi tep ta a ni e,” a rawn ri chuai raih mai a.

Tichuan Bawkkuia chu a thi ta a. Sakei chuan lui hleuh kaipui a tum a, li laiah chuan Bawkkuia ruang chu a thlauh ri ta burh mai a ni.

Anni chu thimtham hnuaiah haw an tum a, an indapchawp a. Chaw chhum hmin vel lai an kal tawh tih chuan an buk ngaiah bawk an chhuak leh ta luau mai a!! Sakei chuan an buk chu a lo bei a. An sangha rep zawng zawng a lo ei zo vek a. An bel te chu a lo chum sawi bei bui mai a. An hlau lutuk chu an tap lo chauh a ni.

Meichher an chhi ngam si lova, thim thamah bawk kal an han siam tha leh a; kawngpui an man fuh thei ta a. Reiek chu zanlai velah an thleng a.

Reiek tlangval ho chuan Bawkkuia ruang chu a zan a zan a lak nghal an tum a. Lal leh upa te chuan, “A thi a chu thi ni ta se, he sa hi sa sual tak a nih hi, khaw en i nghak ang u,” tiin an khap bet a. Mahse Tuahkawla ngaihdan a ni ta lova, “Naute Tut lia mu reng a, in luma lo mut ngawt ka thiam zawng a ni ve love, kei chu ka kal dawn,” a ti a. Fei a hawl a, chempui a ak bawk a, a kal nghal ta mai a. Tlangval ho chuan an zui a, Tut li atang chuan Bawkkuia ruang chu an zuk la ta a ni.

Bawkkuia chu a khaw mi zawng zawngte chuan an ui em em vek a, Reiek chu a ngui ruai mai a ni. A ruang chu an lal hovin a khaw nawtin an lo hmuak a. A ruang a rawn thlen chuan an lalnu chuan a pawnfen thulkhung a rawn keng a. Taituka hnenah chuan, “Taituk, mipa emaw ka lo ti che a, hmeichhia i lo nih hi. Kha hei hi feng rawh, hawh awi…” tiin pawnfen chuan a vawm a. Taituka chu a tap zawih zawih a ni an ti.

Tleirawl Bawkkuia thih thu hian Zoram dung leh vang a thang chhuak a. Khaw tin zawlbukah te, lal inah te, nula rimna leh titi khawmna hmun zawng zawng a luah khat a. Zoram mipuite rilru tinatu leh tithinrimtu a ni.

Nikhat chu Serhmun zawlbukah pasaltha huaisen ho an thukhawm a. Chutih lai chuan Reiek tleirawl Bawkkuia thih dan chuan an khaw zawlbuk a rawn deng ve chiah bawk a. Chu tleirawl thihdan chuan an rilru a tinain an thin a ti ur emem mai a.

An pasaltha Zingkela Ralte phei chu a thin a ur zual bik a. “Thian ten min chhan ru, chhan tlak ka la awm e ti tak lawm lawm a han chhan ngam lo reng chuh; kei ka han tel ve lo chu le…” a ti a, a vaibel dawn a seh keh rawp rawp mai a. A tho nghal a, bawhbel a kai chhova, a vaibel chu zawlbuk hnuaiah a paih nghal daih a. “Kan khuaah hian Saikei sum ruk rawn tla se ka va ti em!” a ti ta mai a.

Inah a haw a, zanriah hmeh atan chithak a rawt a, a nupui chuan tlai buh a deng bawk a. Chithak rawt chug chuan, “Thian ten min chhan rawh u ti ngawih ngawih a han chhan ngam loh chu leh, kei kan tel ve lo chu aw… chu ka thin chuh…hmn hmn hmn,” a ti a, a thil rawt chu a rawt tauh sawk sawk a, a rawt baw ta vek mai a.

A dang a rawt tha leh a, a chhu ta chawrh chawrh mai a; a rawtthleng chu a chhu phel leh ta phawk mai a. A nupui buh deng chuan, “Aww…. kha laia lo inhrosak vak tur em ni? Huaisen tak tak te pawh an awm ang a, tih ngaihna a awm lo a niang chu,” a lo ti a. Zingkela chuan, “Lo tawng suh, nang pawh kha ka rawn chhu hlum nghal ang che,” a tituk mai a ni.

Heta tang hian pasaltha huaisen hovin sakei an huatna a zual ta a. Serhmum khaw pasaltha ho Zingkela Ralte, Taitesena Khiangte, Vungtawna Palian, Dozika Ralte te chuan sakei tawh phawt chu an haw ta hlur mai a ni.

Tin, Bawkkuia a seh zawh chuan chu sakei chuan Tut lui a zawh chhova, Dap luiah a kai a. A kal zel a, Dapkhan khaw zing buh phur, Ruma a seh leh ta a. Nu pakhat zing buh phur vek chuan a hmu a. A khaw nawtin an tlan a, Ruma ruang chu an zawn haw ta a. Mi pathumin hnu an dal a. Hnu daltu zinga mi chem keng, Chawngchhunga kawrte tuiin lai chu a rawn seh leh ta a. A u Nela chuan feia khawh a tum a, a tawlhthlu a; sakei leh a nau inkarah chuan chuan a tlazep tawt mai a. Silai keng Zobuka chuan a kap vat a, sakei chu a inthiarfihlim ta a.

Chawngchhunga chu a thi nghal a. Ruang pahnih an zawn haw ta a. An lalpa Lalsavuta chuan hnudal awm a remti ta lova.

A tukah chuan awmni an kham a, zanah chuan Lalsavuta chu a tawng chhuak ta a. “He sakei hi kan tihhlum phawt chuan sialin ka ai ang. Tupawhin sakei lakah vanduaina an tawh chuan sialin ka thisen ang, a ki erawh ka teh lo” tiin tlang a autir a.

A tukah chuan mipa puitling tawh phawt chu sakei hual tur chuan an chhuak ta a. An hual fuh thei lawk lova. A tawpah chuan tlangdungah, Then kung karah mei lang ngohvin a lo tawm a. Tlangval Laltaia chuan a meiah a man lawk a, Then kungah a vet a, a huk tuar tuar mai a. Tlangval ho an tlan chhova, a nung chunga zawn haw an tum a. Mahse upaten an awih lova, an kap hlum ta a ni.

A tukah chuan a intiam ang ngeiin Lalsavuta chuan a lu chu sialin a ai ta a ni. He sakei aih tluka khawtlangin an uar leh an phur hi Zoramah awmin an ring lo hial a ni.

Hun leh ni a ral zel a, Serhmun mi huaisen ho duhthusam a lo thleng ta. Bawkkuia thihna avanga an inhrosakna ang ngei khan Serhmunah chuan sakei huai sum ruk zet mai a lo tla ta a. Hual theih mia a khawsak loh avangin kar an kam ta zawk a. Zan khat chu kar chu a per ta a. Mihuaisen ho kha an thleng hmasa ber a. Kar chuan a lo kap fuh ngei a, mahse sakei chu thi baw nguaiin a lo kal bo hman tawh a. Mihuai ho khan bei zui nghal mai an duh a, lalin a phal lova.

A tukah chuan tlangau a rawn au a. “Sakei hual tur a ni a, mipa tawh phawt chhu chhuah vek tur a ni eee,” a rawn ti ta a. Mihuaisen pathum Dozika Talte, Vungtawna Palian leh Zingkela Ralte te kha an thleng hmasa ber a. Taitesena erawh a la thleng ve lova.

Sakei chu kawrte kam bawn zingah a lo bawk a. Vungtawna chuan silai chuktuah meuhvin vawi thum a hmet a, a puak thei lova. An mikhual silai chhia a lo keng zawk chu niin. Zingkela chuan feikibarin a vit a, a pawt vak a; sakei chuan a rawn bawh a, a dawrah a hap a, a thing nawk a, a tlu ta a. Vungtawna chuan silai hmawrin a hawlh vak a, sakei chuan rawn bawh lehin a lu a rawn hmuam sak a, a pet kawk ta vu mai a. Vungtawna na tuar chuan a ke a er ngawng ngawng mai a ni. Dozika thin ur chuan sakei chu a sat a, hruikualin a chem a lo bat a, hrui chu a chhawkhmawk a, sakei erawh a tawk na silo.

Dozika leh sakei inbei lai chu lo thleng ve tawh zinga mi pakhatin feiin a rawn khawh a, Dozika hrawkah tak a rawn khawh bur chat mai a. Mi huaisen pathumte chu an tlu ta vek a. Mipui ho chuan an thlir thup mai a.

Chutih lai chuan Taitesena chu a tlanin a rawn tlan thla a. “Thiante inhliama engatinge ka la inhliam ve loh? Hmeichhia, pawnfen feng tlak ka lo nih hi,” tiin a rawn au thla lauh lauh mai a. Upa ho chuan, “mihring kan pamhmai lutuk e,” tiin an lo man bet a. Mahse an inrin loh hlanin a zuang lut a, sakei chu a va sat a, a malpuiah a lo sehsak ve leh ta a ni. Mihuaisen palite chu an tlu khawm ta ruih mai a ni.

Dozika u Thangdama chuan silaiin a kap a, sakei chu a lo chau ta hle a. Mihuaisen kaiza veng ho khan fei nen a rualin an bawh ta phut mai a, an chhun hlum ta a ni.

Pasaltha ho kha tumah an thi nghal lova. Dozika hrawka fei kha an phawi mai thei lova. A hrawka tlawh chhan chungin an pawt vak a, a thaw hawk a, an phawi ta hram a. Chau takin an zawn haw a. A thih dawn chuan, “Tuman min tipalh love, sakei min sehna hi a na em a, ka tuar lo a ni,” a tia, a thi ta a. Sakei khan a seh ve hauh si lova.

Midang pathumte chuan zawn an duh lo vek a, an kuah haw hlawm a. Zingkela chu a nupuiin a lo hmuak a, “Naupang infiamnaah chhangchhe pa i lo zuk tel ve mai a, engtinnge kan lo awm tak ang le?” a lo ti a. Zingkela chuan, “A na hlei nem, ka dam leh mai dawn a lawm,” a ti a, a nui hawk hawk a. Mahse a dar, sakei sehna kha a tla tep a lo ni a, a thi ta thuai a.

Vungtawna kha rum lovin a tal a tal a, zanah a thi ve leh a. Taitesena chu a biak theih reng a, mahse ani pawh a tuk chawhnu herah a thi ve ta tho a ni.

Heng pasaltha huaisen ho thih hun hi kum 1902 buh tuh lai a ni awm e.

Hengte hi thian chhan thih ngam chu an ni. Thangtharte zirtir turin an nun an hlan ta. SALUTE.

Author : R Zonuna RL @Kawrkam Cabin (Vawksa Street)    

Aside | Posted on by | Tagged , , , , , | Leave a comment

MIZO MIPUI TA TUR CHENG NUAI ZARUK LEH SAWMRUK PALI (664 lakhs) CONGRESS SORKAR IN A DUHSAK ZAWNGTE A PE.

Hnam chhantu pawl member te’n NLUP sum an puk?
Sorkar sum a pung awm lovin an puk.

Sorkar in pawisa a neiloh avanga chhungkaw tam takin harsatna namen lo kan tawh laiin Mizoram a rorel mektu Congress sorkar chuan a duhsak zawngte hnenah cheng 666400000.00 pung awmlo in a pe a, heti zat atam pawisa dawngtute hian rulh let pawh an tumlo in sorkar pawhin hmuhlet tuma thinletna a neilo niin CAG report ah ziah a ni.

Mizoram hmasawnna hnathawhna tur sum NLUP atana pawh pen atangin mi 5 hnenah cheng Vaibelchhia 3.77 lai kum 2012 leh 2014 inkar khan puk tir an ni tawh a. Hei bakah hian Horticulture leh Vety Department te pawhin NLUP sum cheng Vaibelchhia 2.68 lai chu mi 25 hnenah anpuk tir bawk a, a vaiin NLUP sum pung awmlo a puk tir hi cheng vbc 6.64 a tling a, a puk hnem ber chu Hnamchhantu Pawl a ni a, he pawl hian cheng Nuai 20300000.00 zet an puk a ni.

Heng pung awm lova sum puk tu te hian kumin September thla ral hma hian an rul vek tur a nih laiin vawiin thlengin rulh mumal an la neilo a. Mipui pawisa puktu thenkhat te leh an pawisa lakzah.

1.Ramhmangaiha, Hnam Chhantu. cheng Nuai 230 a puk atangin cheng nuai 33 a rul tawh.

2.Samuel Tea Factory Cheng nuai 57.77 atangin cheng nuai 1.24 a rul tawh.

3. Lallura Pachuau, Cheng nuai 10 puk atangin cheng 1 pawh la rullo.

4. BT Nghinglova IPS (Retd)*, Cheng nuai 30 a puk atangincheng 1 pawh la rullo.

5. PC Lalawmpuii (CDAR) Cheng nuai 50 a puk atangin cheng 1 pawh la rul lo.
(Source : 15, March, 2017 Assembly session)

Aside | Posted on by | Tagged , , | Leave a comment

A RUKIN PANGZAWL KHAW MI 50 VEL HMINGIN ZU CARD SIAM A NI.

Zu card arukin an siam .
Kohhran upa hmingin zu card an siam.

Thu dawn danin Pangzawl khua tlangval pakhat in Zu card Lunglei a siam a tum chu, a hminga siam a lo ni tawh thu an hrilh a, chu mi kal zel an chhuina ah Pangzawl khua mi 50 vel hmingin Zu card hi siam ani tih hmuhchhuah ani.

Heng pangzawl khaw hming hawh a Zu leina card siamtu te hian Baptist kohhran upa leh VCP hming te pawn an siam a, Heng hming a siam ho chu in hmu khawmin FIR theh luh a ni. Mahse anmahni hi Pangzawl ah lo kalin ngaihdam an dil hnu ah, Social media, news paper leh local news a ngaihdamna siam tur in an inrem.

Mahse vawin June 23 (Ni 2 a ralhnu) thleng hian ngaihdam dilna siam a la ni lo a, chu bakah a siamtu te hi excise a thawk leh sawrkar hnathawk ni a hriat a ni a, Police lam nen pawh an in link vek tih a chiang hle a ni.

He tiang anga mi hming hawh a Zu card siamtu te hian khaw hrang hrang hming pawn an siam nual ang tih a rin theih a, sum dawn nan a hmang an ni tih a hriat hle.

Home Minister hian he thil hi lo hre hram sela, Police ah chuan an in hrethiam zel si a, Tin khaw hrang hrang hruaitute pawn in khaw hming a Zu card siam an awm leh awm loh lo en ve vek teh u.

Author : Makima Fanai    

Aside | Posted on by | Tagged , | Leave a comment

INHLAWHNA AH BORAL

Lallianzuala (16), S/o.R.Hrangdawla, N.E.Khawdungseichu vawiin 22.06.’17 ah Tuidam (Leilet) ah inhlawh in a kal a, a inhlawhna ah hian tuikawng siam tura tih a ni a. Tlailam dar 3:00 alo nih chuan a lu na a ti hlê mai a, a inhlawhna Pu.Zasiama chuan Leilet thlam ah damdawi(nachhawkna) a awm thu leh chutah chuan va kal a, va ei mai turin a ti a. Thlam lam panin a kal ta a.

Amaherawh chu Leilet thlam a inhawn har tak em avang chuan Leilet neitupa ngaih thalo chuan a hlawhfa rawih dang te nen an va thlithlai ta a. Lallianzuala chu Leilet bial chhung ah chuan a hmai phum zawnga lo tluin, Leilet bial chhunga tui tlingah chuan a hmai chiah zawngin a lo tlu reng mai a ni. A inhlawhfak pui te leh Leilet danga hnathawkte inko khawmin an chhan thei talo a ni…!!

Amah hi rawlthar taima tak mai, thawh tur tul tul engmah thawh hreh neilo. A nu leh pa innghahna, an hnathawk tu, an rin ber a ni a. Tin tlailam a lo nih a, chanchinthar (vanglaini) in tin deuhthaw a sem kual zar2 thin a ni.

Aside | Posted on by | Tagged , | Leave a comment

MIMA in Bazar India an dodal.

MIMA ten vai dawr an haw leh tawh.
MIMA hian anmahni aia tlawma dawr siam apiang an hua a nih hmel.

Mizoram Merchant Association (MIMA) Gen. Hqrs. chuan Chaltlang Lily venga Pu KL Biakchungnunga Ex-MLA buildinga sumdawnna lian Bazar India hawn tum an dodal a, home minister an sawipui.

Nimin Ni 22.6.2017 zingah Mizoram Merchant Association (MIMA) Gen. Hqrs. Hruaitute chuan Home Minister a chennainah an kawm a, MIMA hruaitute chuan sumdawng lian Bazar India chuan, Pu K. Biakchungnunga building, Chaltlang lily vengah inhawn tumin hma an la nasa tawh hle a.MIMA hruaitute pawhin a building neitu hi tum 2 lai lenchilhin, ti lo hram tura ngenna lehkha nen a hnenah hian an thlen tawh bawk thu te Home Minister hi an sawipui a.

Hnamdangin mizoram a sumdawnna an dil theihna 2yrs. validity ILP chu Mizoin an tih theih loh ang chi niloah chuan pe lo hram tura ngenna lehkha an thlen bakah an sawipui bawk a.

Trading regulations Act te hi Arunachal Pradesh in tuna an hman mekte hi a hmunah kal chilha zirchian dante a awm em tih an sawipui bawk a ni.

Home Minister chuan, Home deptt. hotute kokhawm a lo sawipui a tum thu leh hemi kawnga hmalak a tulziate sawiin darkar khat chuang lai Inkawmna hi neih a ni a. A chungah a MIMA hruaitute an lawm hle.

Tunah hian hnamdang sumdawng liante’n Mizoramah sumdawn an rawn tum tan hle a, chimral a kan awm lohna turin mizote hnam angin I tanrual ang u hei hi sumdawngte hmakhua chauh a ni lova, Mizo hnam tan ani tih hre thar turin MIMA chuan Mizo zawng zawng a ngen a ni, tiin nimin khan thuchhuah an siam.

Dingdi

Aside | Posted on by | Tagged | Leave a comment

KHURCHHE MUALA RAMHUAI CHET DAN by Apuia Tochhawng

Khawhri rama Paawh tlangdung an tihah hian Khurchhe mual an tih mai hi a awm a. Paawh tlangdung dinglam sirah a thuk lam hriat theih loh khur hi a awm a. Chu khur atang chuan khu a lo chhuak thin a. Chu khu chu meikhu anga khu dum ngun ang hi a ni ve lo a, laiking bel rawh ang chem chema phe hlek hlek hi a ni a, a khur kotlanga hnimahte pawh chuan mei inting te pawh a awm iar nghe nghe. He khur hming chawi hian chulai ram chu Khurchhe mual an ti a.

Hmanlai deuh khan helai ramah hian nupa rek hian lo bing an nei a. Lo an hal zawh chuan buhte tuhin thlai chite an han thlak a. Lo lai takah chuan Hmawng chikhat Zaihri thing an kihthluk chu a mu zuah mai a, engtikawng maha khawih chet zawh chi hi a ni lo reng reng a. A ler lam chu a kang ve nual a, a mût nasa hle nâin a kang bang pawh chu a la lian em em tho mai.

Buh a to a, thlaite pawh an rawn chawr a, hnuhpui an kuai a, hlo thloin an nupa chuan an riak tluk tluk mai a, an thlo zo dawn tawh a.

Tuk khat an han bung tur chu Zaihri tuluang lian zet mai, an loa langsar ber mai chu a lo bo daih mai a! Mak an ti ngang mai a, a hlauh pawh an hlau deuh roh a. An pa zawk chuan hlau deuh chung chuan a han belchiang a, a tlengna hnuhma engmah a awm lo a, thingtuluang chunga an hlo chheh nen lam chuan a awm lo tawp ringawt mai a ni. Mihring eng anga chak pawhin put zawh rual a ni lo a, pu pawh nise a hnuhma engemaw tal awm tur a ni. Hnuhma engmah hmuh tur awm lo chuan a awm lo ringawt mai a ni.

Hlo an thlo zo a, kar engemaw zat chu an lo lam chu an han rial a. Tuk khat chu lo lam kan turin an pa Pu Lianmawia chu a kal a. Tlai a lo ni a, a lo haw thei lo a, an nu chuan vau luiah chakai a khawrh a nih a ring deuh a, mahse awmnuam lo angreng tak chuan a awm reng a. Zan dar 10 velah pawh chuan a la rawn haw theih tak lohah chuan a pasala pa te chu a va hrilh ta ringawt a.

Pu Lianmawia nau tlangval pahnih leh an makpa pakhat nen chuan an lo lam chu zuk finfiah tur chuan an liam ta vang vang a. An thlam an zuk thlen chuan a lo thim thiap a, chhun lama a bai chhuanna hnuhma chu an hmu a, a meizial zuk bung an hmu bawk a. An han au thin a, chhawntu reng reng awm lo chuan a rehin a reh tlawk tlawk mai a. Nakin deuhah chuan luidung zawha meichher chhi rawn kal hi an hmu ta a, an thaw huai a.

Meichher chhi chuan a rawn pan zel a. A kal chak tial tial a, a hnu deuhah chuan a thlawh hian a thlawk hian an hmu a, lo mawng a rawn thlen chuan meichher chu a thi leh hmiah ringawt a.

Lianmawia te makpa Thangliana chuan, “Kan thil hmuh kha mihring a ni hauh lo mai; haw vat ila, khawtlang pun an ngai a ni. A zahthlak hle na-in a tih loh theih dawn loh a nih hi maw,” a ti a. A chak thei ang ber chuan an haw leh ta a.

In an thleng a, an inhrilh darh zung zung a. Zanrei pawh sawi lo chuan mibo zawng tur chuan tlangval leh pavalai deuhte chu ram lam panin an liam sung sung a. Lianmawia nupui chu thlabarin a khur zawih zawih reng a, muthilh a tum a, a thei si lo. Zing khawvar dawnah chuan a lo chhing sek a, mumang a lo nei a, a mumangah chuan mihring taksa pu, a lu erawh chu kel lu ang hian, “In lo hi kan vangkhua a ni. Kan naupangte tualchaina in rawn vat chereu a, kan lung a awi lo a ni, tunhnu-ah chuan kut rawn thlak tawh suh u,” a rawn ti a, a harh zawk a, a hlau em em mai a.

Mibo chu nili an zawng tawh a, a hnuhma engmah chhui zui tur awm loa khuangcher bo tawp a nih avangin zawn ngaihna a vang hle mai a. An khaw pasaltha pahnih Chhiarliana leh Vankunga te chuan Tuiphai luidunga Tuikhur chhuah lam chu an va fang a. Kham hual velin a chawi hi a ni a; a ram a mawiin a lunglenthlak hle.

Chengkawl puk chu an han tinzawn deuh a. Tuikhur chhuah atanga tuibur hmuamda awm vel an kal hnu chuan puk chu an han thleng chho a, puk chu a lo bel hluau a, puk kilah chuan Lianmawia chu a lo mu ngât mai a. Tui em emin a lo muhil bawrh bawrh a, a bulah chuan fangra te, chakai kawmkawraw te, vaimim fafu te chu a lo let phung a. Makti takin an inen he haw a, an kaitho ta a. A rawn harh chuan tui a rawn lam nghal a. An tuithawl chu an han pe a, a han khiat khawlh khawlh a. An chawfun te chu thetin an eitir a.

Muangchangin an inchhawm haw a, kalkawngah chuan a chau tih hi a hriat hliah hliah a, an han inpaw leh lawp lawp thin a. Mibo zawng dang te’n an rawn chim a, hlang an siam a, an zawn haw ta a.

In an thleng a, a nupui chu a lo na viau mai a. Ani pawh chu a chau si a, an muthilh tir a. A muthilh hlan chuan a nupui chu a tawngvai bual bual reng a. A thusawi chu ramhuai a hlauh thu te, loa a kal duh tawh loh thute a ni ber a, an ngaih a tha lo tlang kher mai.

Zan a lo ni a, damlo menpui turin nula leh tlangval an rawn kal diah diah a. Tlai lam deuhah chuan tlangval pahnih hi rui chhe chhaw takin, damlo in lam chu an rawn pan chhar chhar a, an pawr khawp mai a. “Tupawh ka cho,” te chu an han ti a. Damlote in thlen hma kawi khat a la awm tihah chuan kawngchhak atang chuan hmeichhe na tuar rum ri an hre ta mai a. An hlau lutuk chu an tlanchhia a, pakhat zawk chu bawngeka hmai phum tawt khawp chuan a tlu a.

Lianmawia te inlengho chuan thil awmzia an lo zawtfiah a. Anni chuan an thil hriat chu an hrilh a; ngaihtha lo tak chungin an ngawi thap a.

Nakin deuhah chuan lenghawn ar a khuang thliai thliai a, Lianmawia nupui chu a irhfiak ak ak a, a chatthla chu a ni ta mai a. Tap thawm a ri chuah chuah a, in singsa in an buai nghal nuai nuai a. Nupa induh tak an ni a, an inneihna pawh thla nga pawh a la tling lo a. Chutia an nu zawk a thi ta mai chu an lainat em em mai a ni. Lianmawia lah chu thi ang derin a let reng bawk si a, lo harh ta se hrilh a huphurhawm dawn hlein an hria a.

Nithum hnu velah chuan Lianmawia chu a rawn harh hlawl a, “Ka ril a tam,” a rawn ti a. Chaw an pe a, a chaw eikham chuan, “Khawnge Makimi?” a ti a, a thi tawh tih hrilh chu anhuphurh ngei mai. Lianmawia pa chuan aw a han thian kharh kharh a, a boral thu chu a sawi ta a. Chu thu chuan a deng na hle a ni ang; a thu hnawk a, a mittui a sur zung zung mai a.

Tlema a pangngai leh deuh hnu chuan a thiltawn chu a han sawi a;

“Khatia ka feh kha chawhmeh hawn tur maian te ka sik a, kan vaua sihah chakai te ka va khawrh bawk a. Hmeh khawp ka man ang tihah chuan thlamah bai ka chhuang a, a hmin chuan chaw ka fâk a, ka kham chuan ka haw mai ang chu ka ti a. Meizial ka zu te te a, ka zuk kham chuan thlam kawngka ka khar a, thlam luhka atang chuan kan buh chu ka han thlir vel a, buh hmel lo lang tan chuan ka lung a dum khawp mai. Buh fabel an tih ang chi hi ni dawnin ka hria, kumin chu kham kan thar ngei dawn e, ka ti rilru neuh neuh a.

“Kal ka siam a, lei ka rap chiah tihah chuan hneh takin ka zakah hian engemaw hian min rawn la lawp mai a. Ka hlau ngang mai a. Pakhat chu ka han hmu a; hmelchhe zet mai, tereuhte hi a lo ni a. An rimchhiat zia chu sawiin a siak lo; luak a pawt nghulh mai a ni. Tuiphai luikamah kan chawl zawk a, tui in turin min ti a. Ka han in dawn a, mahse ka in thei lo. Ka tui in tur chu a rimchhe em em vek a, ka lem thei thlawt lo a ni.

“Pukah min dah tawp a, min kalsan leh a. A hnu deuhah chuan min rawn dinhual khup khup mai a, an hotupa ber ni awma lang chuan, “Engvangin nge kan khua in vah chereu vak mai ni?” a han ti khur khur mai a, a zamawm duh ngei mai. A hote lam chu a han hawi a, “Engtinnge hremna kan pek dawn?” a han ti a. A hote zinga pakhat chuan, “Tihhlum mai tur,” a lo ti a. Pakhat chuan a nupui duhlai hi tihlum zawk ila,” a han ti leh a. An inhnial nuaih nuaih mai a. A tawpah chuan an hotupa chuan min en ang kel kul a, “Nang hi chu kan zuah ang che,” a ti a. A hote hnenah chuan, “Eitur pe ula, kalbosan vek ang che u,” a ti a. A sawi zawhah chuan sa tuihnai chi tinreng mai min rawn hlui a, ka ei hnem ngang mai, puar eleuhin ka ei a,” a ti a.

Amah hmutu an khaw pasaltha Chhiarliana chuan, “I fangra ei bang te, i chakai eina hnuhma te kha kan rawn hmu a, chung chu sa tui tak hmuhin i hmu mai niin a lang,” a lo ti a.

Chuta tang chuan Lianmawia chuan a lo chu a ngaihven zui ngam tawh lo reng reng a, midang pawh an kal ngam tawh hek lo.

Vawikhat an pasaltha ramvakin an lo hlui chu a va pawh hlawl a. Thlamah chuan a han chawl khawmuang a. Chutia thlamuang taka a awm lai chuan thlam chu a rawn insâwi luai luai mai a, a rang rangin a tlan haw vang vang a.

Vawikhat chu pasatha rual hian sazuk an kap hliam a, an umzui a, chulai khurchhe mualah chuan a tlanlut tlat mai a. Lianmawia te lo lu-ah chuan sazuk chu a han khek that that a. Pasaltha pahnih chuan an veh chho a. Fimkhur em ema an veh chhoh lai chuan Lianmawia nupui thi ta Makimi rawl tih hriat reng reng kha a rawn nui hawk uar uar mai a. Hlau takin an inen he haw a. Chutah le, thisen thang nghuat mai hian a rawn theh hlup mai a. An hlau lutuk chu an tlanchhe nghal chawn chawn a, lungthilin a rawn vawm zui ur ur bawk a.

Chuta chin chu tumahin chulai Khurchhe mual chu an tlawh pawh leh ngam ta lo a ni.
***************************

Aside | Posted on by | Tagged , , | Leave a comment

LALNU ROPUILIANI THLAN KHAWIAH NGE by B.Lalrinliana

Lalnu Ropuiliani thlan awmna hi zawn çhhuah a, haichhuah nise tiin Hnahthial Group YMA Conference chuan kun 1996 khan a rel a. Chumi chhuichiang tur chuansub-committee dinin, hma lak nghal a ni.

Kan hriat theuh angin Ropuiliani an man hnu kum 1894 atang kha chuan an lalna khua Denlung chu an mipuiten Ralvawnga an pemsan tak avangin khawram a ni ta mai a, Saihnuna lal hma kum 1919 thleng khan khawram a ni.A bul tan nana ka’n sawi duh chu a hma chuan Denlung leh Ralvawng hi Hnahthial Group YMA huam chhung ami ve vean ni. Group committee pawh hian a khawi zawk pawh hi Ropuiliani thlan awmna nise, pawi tihna tur a awm lo. Kan tum ber chu Chhimlam Lal huaisen leh lar thlan zawn chhuah a ni.

Tichuan sub-committee chuan Denlung leh Ralvawng tlawh ve vein, thil hre deuh leh upa la damte kawmkual bakah, lehkha bu hrang hrang atangin Ropuiliani chanchin leh thlan hmun chu chhui a ni ta a. A lo rei deuh a thlan hmun inchuh ang deuh lek leka a kal ta hi a pawi a,chumi khami chuan chuti chuan a sawi tih lam kan sawilang lo ang a, lehkhabu ziak hma leh hnu hian upa kan kawm ngeite thusawi pawh a danglam leh tak nual avangin, Ropuiliani te History atanga thil chiang kan hmuhte i lo tarlang mai ang:

Lalnu Ropuiliani hi Chittagong atang khan ruhro ni lovin, ruang ngeia hawn a ni:
Lalnu Ropuiliani Chittagong jail-a a thih khan, Jail superintendant chuan Lunglei Bawrhsap hnenah report a rawn pe a Lunglei Bawrhsap chuan a lehkha chhanna ah ti hian a ziak;
“G.Lala interpreter & 10 Lushai are going to Chittagong to fetch Ropuiliani’s bones… * Heta bones a hman hi Pi Lalsangzuali Sailo khan ‘Ruhte’ tih nan a hmang a, chuvang chuan Ropuiliani kha ruhro-a rawn hawnchhoh angin a ngai ta mai niin a lang. Mahse Dictionary tam berahhian Bones hi plural-a hmang lovin singular noun-ah a hmang deuh zel. New World Dictionary of the American language,The New Oxford Illustrated Dictionary, Fank & Wagnallis New Encyclopedia te, Chamber Dictionary te chuan ‘Bones’ tih hi ruhrel chauh sawi nana hmang lovin taksa damlai leh thi, leh tawih mek sawi nan a hmang a. JF Dictionary chuan “Ruang’ tiin a dah.Tin, Shakespear-a thuziakah khian ‘fetch” a hman khi mi pakhat ruhro tlahrang nuai emaw, a khawma awm emaw la tur an nih chuan ‘collect’ a hman a rinawm.

Fetch a hman avang khian a thil laktir tur chu thil hlawm khat, thendarh ni lo a nih hmel viau a ni.

2. Tin, Lunglei Bawrhsap hian Lawngleng pahnihah tlangval 10 a tirh na chhan pawh hi ngaihtuah chian chuan ruhro mai ni lo Ruang’ ngei la tur an nih vang a ni. Mi pakhat ruhrola tur chuan hmun hla leh ei tur harsa karah mi 10 lai a tirh a rinawm loh.

3.Pi Lalsangzuali sailo(RIP) lehkhabu ‘ Tlawm ve lo, Lalnu Ropuiliani’ phek 174/f ah khan “Ropuiliani kuang chu Ralvawng mipuiin Selesih lui kamah an lo hmuak a, mipui en theih turin Lianpawnga leh Zahnuka’n kuang chu an kar hawng a’ tiin a ziak a. Kuang an kar hawn thu hi chu Ralvawng leh Denlung upa deuhho leh Vandula thlahte pawhin an sawi thei fur. Ruhro bawm mai a nih chuan “Kuang’ han tihtur chi em ni dawn? Tin, ruhro ngei pawh chulo nise, Ralvawng khawlaia phum tur a nih si chuan daia lo kar hawn kha a tul tehchiamin a lang lo. An khuaa phum loh tur ni ta chu, zui ve thei lo nunau hmuh atan an karhawng ni zawkin a lang. An karhawnna hmun Selesih luikam hi Ralvawng khawhnuai, Denlung panna kawng peng a ni. Lungleia Ropuiliani chungchanga symposium kan neih tuma Ralvawng aiawha thusawitu khan he ta kuang an karhawn tum hian an mrkhur tawk lova, Lalnu Ropuiliani hnar leh banrek an tihkhem palh thu a sawi a. Ruhro chu nisela hnar leh banrek a neih a rinawm loh.

4. Tin, Pi Lalsangzuali Sailo lehkhabu phek 200-ah khan kumpinu sorkar chuan tawihthuai theih lohna hloin Ropuiliani ruang chu chulhin, a ruhte an la chhuak a tiin a ziak a. Hei hi report engmah hmuhtur a awm lo. Khang hunlaia Sap sipai hotute India rama awmte kha a tam zawkchu kristian an ni a, kristian mitthi sawngbawl dan bosalin ruhte an chiahfilh a rinawm loh.

5. Note on the South Lushai Hills Administration report for 1894-95, para 14-ah chuan ti hian ziak a ni: “A party of 10 Lushais came down to Chittagong and carried back Ropuiliani’s corpse. This was the first voluntary visit ever paid by Lushai party to Chittagong.

“Ruang sawi nana ‘Bones’ tihah khan kan hmin tlang lo a nih pawhin chiangkuang takin “Corpse’ tia ziahna a lo awm tho a; heng atangte leh a chunga point hrang hrang atangte khian Lalnu Ropuiliani chu Chittagong atang khan Ruhro ni lovin Ruang ngeia Mizorama lak chhoh a ni tih a chiang hle.

Lalnu Ropuiliani hi Denlungah ngei an phum:

Lal Vandula hi kum 1889 khan Denlungah a thi a, khanglaia lal ruang sawngbawl danin a kuang ur ni ngei turah ngaih a nih bakah, an thlahte thu inhlan chhawnah pawh kuang ur ngei a ni. Vandula thih atang chuan kumpinu sipai officer tereport-a a landan pawhin Denlungah hian Ropuiliani chu lalah a thu zui nghal a, Shakespear leh a hoten an man thleng (1893) khan Denlung lal a ni. Hemi hun chhung hian Denlung lal in kawtah chuan Vandula Lungdawh chu a awm ta tlat atang pawh hian Vandula chu Denlungah ngei phum a ni tih a hriat theih awm e. Tunah chuan a nupui Ropuilian hi Denlungah ngei an phum a ni tih tilang tur point hrang hrang I lo thlirho teh ang:

1. Sairuma S/o Lalthuama (Ropuiliani fa naupang ber) kha Lunglei Bawrhsapin 1924 khan Vandula thlahte leh an lalna chanchin a zawt a. Chuta a thusawi pakhat chu:‘’Ka pi Ropuiliani chu Chittagong-ah a thi a, a ruang chu sorkar-in an rawn thawn a, Vandula thlanah Denlungah an phum,” (He thuziak photo copy hi Pu Lalvuana Sailo lehkhabu ” Mizoram humhalhtu Lal Vandula leh Ropuiliani’ tih phek 246-247 ah khan hmuh theihin a awm)

2. Tom Herbert Lewin (Thangliana) Diary, 1896 a mi chu Mandalay chanchinbu pakhat Zosuankhang an tih chuan a tarlan danin, Mizo Lalnu Ropuiliani kuangah chuan Jail a a hman thin No leh a tan chanchin ziahna lehkhabu dah a ni. Hetiang tak hi Denlunga kan ruangruh hai chhuahah khan hmuh a ni.

3. Saihnuna (S/o Dotawna S/o Vandula) Rotlanga a lal lai hian a fanu Lalziki kum 1 mi chu thih ngamin a na a. Saihnuna hian a pi leh pu (Vandula te nupa) bula dah ngei a duh si a, a thi thuai dawna an hriat avangin kum 1920 khan Denlungah Lalziki chu paw phein, an kai ta chuk chuk tih Saihnuna fate la damte zawhfiah theih an la awm hlawm a.

Hei hian Ropuiliani chu Denlungah ngei dah a nihzia a tichiang hle.

4. Hrangphunga (S/o Vandula) tupa Maj. Saibuanga’n (s/o Thanzama, Thiltlang lal) an thlahtute chanchin a ziahah khan, Lal Vandula chu a kuangur ruhte Denlungah an phum a, a luruh erawh chu an phum tel ve loh thu a sawi a, a luruh leh Lalropuii leh a fate thenkhat luruh chu a khawmin Thiltlangah an phum thu a ziak a ni.

## Ralvawnga an ruhro hai chhuahah khan puitling pahnih ruh chikim, luruh pahnih telin hai chhuah a ni a, Vandula te nupa chu ni sela luruh pakhat chauh hmuh a rinawm.

5. Pu Thangthiauva (90) Pangzawl, a pa Taitea, Khawngbawk lal Sangtuala (s/oVanhnuaichhana)Khawchhiar thusawi a chinchiah danin, lal Sangtuala hova upa zawng zawngte Ropuiliani vuina Denlungah an tel vek thu leh, ruhro ni lova ruang ngeia an phum thu a sawi. Hemi tum hian Denlung khua chu a hnim viau thu a sawi tel.

6. Pi Zachhungi, Hnahthial Bazar D/o Zabova (Vandula khawnbawl upa leh pasaltha) kawmnaah khan a pain Ropuiliani chu Denlungah ngei phum a nih dan a hrilh thin thu a sawi. (Kawmna video lo en pawh in awm ang)

7. Ralvawng lam thusawitu te’n, “Ropuiliani ruangruh ni tur chuan Denlunga an haichuah kha 1895 ami daih tawh si kha a la lang tha lutukin, ruh ral pawh a la awm lova, a ni thei lo’ tin an sawi thin a. hemi chungchangah hian ruang, a pangngaia phum chu nise hmuh tur vak a awm tawh lo ngei ang. Amaherawhchu he Denlunga kan ruangruh haichhuah hi a chhip atanga a keler thlengin eng hlo emawa zut vek a tih a hriat a, thlan khur hai hawn atanga rei lo teah a a ruh inzawmkhawm pawh a tla darh ta vek a ni. Art & Culture atanga rawn endiktute khan he hlo hi engemaw zat an la a ni.

Denlungah ngei an phum a ni tih tilang chiang tur hian sawi tur a la tam hle a, mahse ngun taka ngaihtuahna hmang duh tan chuan, a chunga kan tarlan atang ringawt pawh khian a chiang tawk hle.

A tul dan azirin Thanhulha te nupa, Ralvawng lal, leh Ralvawng ngeia thi tate thlan bo tak daih dante kan la ziak leh ang. Thudang alai chuan, FB lama ziaktuin ‘Ropuiliani hi Chittagong atang khan ruhro ngein an rawn hawn tih hi Jail report-ah a chiang” tia a rawn ziah kha, he Jail report hi produce tur a awm em tih ka zawt duh a, he report hi thlan hai kum leh symposium lai pawh khan sawi rik a awm ngai lo.

Aside | Posted on by | Tagged , , | Leave a comment

HMANLAI MITE AN NI EM NI?

He thu hi kum hnih dawn lai mai chu ka lo zep ve ta reng mai. A nihna takah chuan sawi chhuah hi ka duhlo hle ani. Tuman min awih sak ka ring ngailova, chu’ng vang te pawhani ange, ngawih bopui ka tum ta hial mai. Nikhua a lo reia, miten lo awi dawn mah suh sela puanchhuah zai ka’n rel veta chu a nia.

Ka zan mutui lai chu ka harh hlawl a, ka khualzinna hmun tur pawh ka ngaihtuah nghal roh roh bawk a. Nie, ka huphurh takzet a ni. Mahni hna vanga kal tur mah ni ila min lawm kher ka ring tlatlo ani. Ka duatpuii hmel duhawm zet chu ka mitthlaah chuan a lang zut a, ka ngaih a zual telh telh ani ber mai. Engpawh nisela, naktukah chuan ka kal tho chu angai dawn si ale(h).

Zing khua alo var a, ka phone call dawn chuan min ti lawm kher mai! Ka pu/hotu te pahnih, an lokal ve dawnlo emaw ka tih te khan rawn kal an tum ve thu ka dawng ta hlauh mai. Ka huphurhna chu hnara hlitphawi an sawi ang maiin reh nghal mah suh sela, zo thlifimin khawlum vanglaia min chhem heuh heuh ang mai hian, a reh hlen dawnlo tih hre mah ila a zia awm khat viau mai. Kan pathum chuan kan tum ram chu kan pan tlang ta hlawm a. Midangte chhuk vek hnuah motor dang hire in kan kal zel mai. Kan tihtur ber ka la sawilo, lehkha han zirtir tura dil a ni tawp mai. Kawngah chuan thil eng eng emaw te kan sawi chova, chutih mek lai chuan kei chu ka lo muhil bawrh bawrh mai a.
“Amawi, harh rawh. Kan thleng e,” tih thawmah chuan ka meng diar diar a, ka thil hmuh chuan ka mit chu a ti bial kawk mai nia mawle. Kea kal a ngai chu lo niin. Motor chu a inher vut a, a liam leh ta nghal nal nal mai. Tha tholo zet chuan ka kal ve zel a, ka pute pahnih erawh an nui sang reng mai. Mak ka ti viau leh nghal.

Darkar 5 dawn kea kan kal hnu chuan kan thleng ve ta hram e. Thir hling nei hian sang takin a inhung kual vek a, luhna pakhat chiah a awm bawk a. Ralveng tih hriat tak, fei leh chempui lo huma, palian tak tak pali kan va hmu a. Nguntakin min melh khar hlawm a, ka pu te chuan an han bia a, tichuan kan inzui ta hlawm a. Kawngka vengtu pahnih chu an rawn tel ve lemlo.

Kan kal zela, ka hling rah chuan min ti harh zawk mai. Ka pu te emaw tia ka lo zui chu ka han en chiang a, putar pahnih, khabehmul sei tak an ni tlat! Ka ngaih a tha mawlh lo a ni. Ka ngaihtuah chet chet a, kawnga kan kal laia an awmdan leh chezia zawng zawng te kha! Ka rap ru riau tawh ani.

Thui kan la kallo tih chuan ka pu te hmuhin ka hmu leh a, nichin maia thil te kha chu ka hriatna atangin paihbovin a awm chu a ni der mai. Ka mit sulha, nikhua reng ka hre ta lo.

Ka mit chu ka meng kawk a, ka thil hmuh chu a mawi dangdai kher mai. Thing hring mawi tak mai te, sava hram chiah chiah mai te leh van dumpawl raih te chu inchawih ka ti kher mai. Ka mutna chu ka han en a, phul hmun mawi em em a nih zia pawh ka hmuh hmaih hauh lo. Chutia mawiti taka thlira ka hawi kual meklai chuan thil ka hrechhuak zawk mai. Engtin nge hetah hian ka muttheih? Ka tluk lai vel kha chu ka hre rei ruai a, mahse hmun khawro tak a ni tlat mai si? Khawnge min hruaitu te kha? Khawnge ka pu te pahnih? Zawhna hlirin ka khata, hman hmawh takin inbengkan mai ka han tum chu ka tho thei ta hauhlo mai. Theihtawpa ka han beih ngial hnu pawh chuan char beh ang hmiah hi ka ni mai si. Mangang taka ka awmlai chuan tawng nak nak thawm ka han hria a, ka pute chin ka hriat loh bawk avang nen, ka dinhmun ngaihtuah tel bawk nen chuan ka rilru chu hlauhthawnnain a khat hneh hle mai.

Ka hawikual ruai a, ka piah deuh lawk atang chuan mi pali an rawn kal pheia, hmun awih deuh taka rawn chho ngei an nih ka ring a ni. An lu a rawn lawr hmasa ber miau a. Hlauthawng taka ka lo uipui tui lian thlir voh voh lai chuan ka pute an tel ve tih ka chu ka va hmu thei ta a. Ka kiang chu rawn thleng thuaiin, “Kha, i harh ta maw?” nui var var chung hian min han tia. Ka that tawh thu te leh ka chet theihloh thu ka lo hrilh thuai a. Engtia heta awm ngawt nge kan nih te ka zawt nghal zat a, min chhang lemlo. Kawng thlanga luiah an insil daih lawk thu te min hrilh luam a, A ruk tak chuan an vai maia min kalsan mai chu ka rilru a na ve hle ani. Mahse ka pute, ka hotute an ni tlat mai si.

Palian tak leh sek tha tak mai, hmeltha vur chuan a tui mak tak hi min han intir a, ka ke chu a dam nghal hmak mai.

Ni tak e, hling ka rah kha a ni ngei ang le. Tichuan reilo te kan awm leh hnu chuan khawchhung lam pan chuan ngaihtha takin kan kal leh ta hlawm ani. Di leh mau hnah chu a chungah hmangin, dapin ngei mai a ni tih chu ka hre nghal mai a, chu khua chu ka rin aiin an tam hmel zek mai.

Khawlaiah naupang an lo tla noh noh va, ka phur kher mai. Ka pute lam ka va hawi pheia, an ni pawh an phur hle a ni chek ang chu, an khi heu thei nia mawle. Muangchang chuan kan kal zela, naupang min hmu tawh phawt chuan min zui dul dul hi ani ber mai. A awmlo hranlo e. Pitar nau awm te leh putar hnang hlai te pawh kan va hmu phei nual a, mak ti takin min en zui he haw zel zawng ani e. Ka rilru te te chuan, “Khawvel a changkan tawh tehluk nen, engtin ngehetiang nun hi inlo la neih theih le…” ka ti vawng vawng mai.

Min hruaitute chuan inlian fal tak mai, kawtzawl zau tak leh rem fahran mai neiah hian min hruai lut a, an lal in anih chu ka ring deuh va. Chu inah chuan rawlthar te mai hi a lo awm a, min han hmu chu a lo dinghluai a. “Kha, kan bawlhlo chu in rawn hawn ta maw?” a han ti thuai a, ka pute pahnih chu an bu nghat nghat mai. Thil awmdan erawh ka man pha ve hauh silo. Kan han thu thlan daia, min hruaitute pahnih chu ngawi rengin an chhuak zui ta a. Chu rawlthawr pawh chuan a zui chhuak ve bawk a. Ka ringdik chiah mai, chu kan awmna chu lal in ani tih ka pute chuan min hrilh a, chu rawlthar chu an lal a nih thu te min hrilh nghal bawk a. Mak ka ti kher mai! Engtin nge rawlthar naupang tak chu an lal anih theih? A thilsawi awmzia te kha enge niang le.? Ka pute chuan min chhanglo chuan an nui dun suk a. An lal (ti tawh mai ang) chu a rawn lut leh thuai a, thei hrang hrang a rawn keng lut a, kan ei tlang ta hlawm a ni.

Hmun danga thleng sawn lemlo chuan lal inah chuan kan thleng khawm a, a zau tha helh hawlh bawka a nuam phian mai. Ka phone ka han on a, messege pathum a lo awm reng mai. “Khaw nge i awm a?”
“Kan zawng nasa teh mai che a nia..enge itih?”
“Khawiah chuan awm ang che maw aw..” tih te chu number lawng atang hian ka dawng a. Signal a awmlova, khua pawh a thim tep tawh bawk nen, “Ka chhungte’n min hriatpui tho,” ti rilru chungin ka off leh ta zawk a.

Pawn lam chu ka han hawichhuaka, naupang reng reng hmuh tur an awm lova, min zui dul dul tu te kha khawnge maw an awm le…an haw darh ta a ni ngei ang le.

Khua chu a thim fel chu a ni der ta mai. Zanriah kan han kil a, arsa buhchiar, maian leh sakhirep bai pawlh te leh a dang dang te chu kan kil taih a. Ka pute pahnih leh an lal naupang tak chu kan ni mai a, midang an awm velo erawh mak ka ti kher mai. Ka pute erawh mak ti hmel pawhin an awm ve lemlo a. Eng em em sawi chuanglo chuan chaw chu kan han bar malh malh a, rinloh tak maiin kawl a rawn phe zauh zauh a, thil puak ri durin a rawn zawm nghal a. Lal chu chhuak nghal vatin kan umzui nghal zat a, a kawtzawla lungpui, patling pawm aia lian hret awm vel chu a chawi ta luk luk mai le. Na takin a han sawh dawp dawp a, kawl phe leh thil ptduak dur dur chu a reh ve ta a. A hmel en ang aiin a chak kher mai. Tichuan zanriah kan han eikhama, leng khawthawn chu ka duh ta tlat mai. Ka pute chuan an remti bawk a, in hnaivai tlawh tur chuan ka chhuak ta a.

In pakhatah chuan ka va dak lut a, tlangval thenkhat hi an lo thu laih a. Nula pahnih hmeltha tak puan lo tah mek chu an rim ni ngeiin ka ring nghal a. Leng tur chuan min au nak nak a, ka lut ve thuai a. Ka mawng ka’n hung fel awrh tih chuan an titi chu an zawm leh sap sap a. An chhungkhat pa ber ni ngeia lang chuan chanchin te min han zawt a, ka’n hrilh hnu chuan, “I rawn thleng har kan ti lutuk chea..aa…thil ka han hrilh ang che..” a ngawi deuh vang vang a. “Kan lal khi a naupang iti em.?” a han ti te te a, ka lo bu nghauh a. “Amah khi rawlthar mai a nih i hria ang a. A naupan tet lai chuan naupang duhawm tak ani thin a, a nu leh pa fa hmasa ber anih avangin duat pawh a hlawh teh asin…ponto rual a rawn ni chhova, a mizia a dang ta telh telh a. Naupang hlim leh tawng duh tak nisi kha a tawngmawh ta hle mai a ni. Rawlthar a rawn ni chhova, chak namenlo tak meuh meuh in a chak hle a, amah kalh zawnga awm te chu a paih lawng lawng mai thin. Kar lovah chuan a nu leh pa te chuan an boralsan a, fapa mal a ni bawk nen, loh theih lohvin lalah a thu ta a nih khi maw..” a han ti a, amah chu a meng khup deuh lap mai. In leng dangte pawh chuan chu a thusawi chu an hriat fo hnu nimah se an beng an chhi hra hlawm hian a hriat a.
“Tinge ka pu, lal in lenglut leh chhuak te, khawnbawlte leh upa te an va awmlo ve..” ka han tih chuan min chhang thuai a. “Ni tak maw…a inah khian tumah an luh zen zen ngai hlei nem. A sipai rin bik pali nga bak lo te chu. A upa te leh khawnbawlte pawh hi, hei i hmuh ang hian kan leng ngamlo chu a nih ber hi le..sawi ta zel mai ila, a nu leh pa thih dan kha a sin mak chu. Khatia chakna maktak a rawn neih chhoh takah khan kan lalpa leh a nupui chu an kangral vek asin…tuma hal lah chu an nilova, an awm mai mai lai chu an kang ngawt mai ani. Keipawn ka hmu ve nghe nghe asin.. ” a han tia. Tumah rengin tawngzai an rello. An lal naupang te chu hlauhawm viau thin mah sela, an hmangaihna leh khawngaihna mitmeng chu ka hmu thei a ni. Tichuan tin zai rel ka tum ta a. Ka chhuah dawn chuan, “Han fimkhur tawh aw…” tiin min chah tliar tliar hlawm a.

In ka thleng chu a lo la eng at a, inchhung chhuatah chuan lal chu a lo mu at mai. A bulah chuan putar pahnih hian kilin, an chham pual mawlh mawlh bawk a. Eng in nge min mawlh tehreng ni, ka hlau miahlo. Hlauh a hnekin ka pan hnai hret hret a, an bulah chuan ka va thu ve ta ngawt mai. Zanriah kan kil laia thil thleng ang chiah chu rawn thleng lehin, kawl a rawn phe zawr zawr a, thil puak dur dur chuana rawn zui leh ta. Tun tum zet zawng thli a thaw vuk vuk leh nghal. Ka lenna pa in, “I rawn thleng ta maw…” a tih te kha mak ka ti leh hnuhnawh kher mai. Chu khua chu ka kal dawna an sawi ang a nilo tih ka hre leh hnuhnawh a, khaw chhung kan luh a ka pute ka hmuh dan te ka hrechhuak ta uar uar mai bawk nen, ka thauvah min man ta tlat mai. Ka bula mite pahnih chu an nui huah huah a, ka lam an rawn hawi chuan an mitmeng chu a var lup mai bawk nen. Ka tim uaihh uaih mai nia. Thli thaw vuk vuk leh kawl phe te, enge a nih pawh hriatlohva puak dur dur thawm chu a nasa tual tual mai bawk nen. An pahnih a pakhat zawk chuan lal chu tho turin thu a han pe a, a thu a awih em em mai leh nghal. Min man bet a, min muttirin, amah pawh chu a mu ve leh mai bawk a. Hetih lai hian ka che thei hauhlo. An pahnih chuan an han chham leh ta phual phual a, an lu an thing dun lawp lawp bawk a. Ka hnungzang chu a rawn puar pawp pawp a, a na zawk mai. Ka hrethiam ta! Ka taksa hman an tum ani ngei mai.

Ka chet theih miau loh avangin mangan a sawtlo zual kher mai. Rei tawk tak an chham hnu chuan ka vun hriatna chuan hmun a awh zau sawt a, ka mitsir chuan ka dinglam leh vei lam ka melh thuai a. Ka awih theilo hial zawk! Thla in phan tuau mai hi ka taksa atang chuan a rawn to a nih chu. A hlai hlup lehnghal.

Ka bula mu ve reng chu a rawn sen vek a, a kangral ta daih mai! Tih theih ka neilo leh hlau lutuk chu ka thidang ta hial a.

In chep takah chuan ka harh chhuak hlawla, ka che ve thei ta e. Engkim mai kha ka mumang nise ka tia, a ni hauh silo. Ka thla te chu ka thunun thei hauhloa, bak thla ang mai a ni. Ka tap vawng vawng ringawt mai a ni.

Kawng khar a rawn inhawng a, putar pahnih hian eitur atan sa tuihnai tak mai min rawn pea. Ka ril chu a tam viau mai, mahse ka ei thei tlatlo. Ka luak lam lam a chhuak a ni. Pakhat zawk chuan,”Tunah chuan kan chhiahhlawh i ni ta..!!” Nui huah huah a ti chungin min khar hnan leh ta!

Chutiang chuan ni thum lai min khung hnu chuan min kai chhuak ve ta nge ngd a. Ka chau hle a, engmah ka ei thei ngai silo. Tui erawh ka in ve thin a. Pawnah chuan min phuar betin che theilo lekin min siam ta a ni.

In chhungah anluh lawk hlan chuan chu khaw mipuite chu an rawn chhuak tuau tuau a. Ka bulah chuan a khawh hian an rawn inkhawh phei zawt zawt mai. Chutah a hma zana ka lenna pa chuan mittui tla teuh chung hian min rawn pan hnai a, chem hriam hmel tak a rawn hum phei bawk a. Ka thla phu hlup hlup chu a rawn sat ta ngheng ngheng mai le. Na engmah ka hre hauh lo nia! Rang takin putar pahnih chu an rawn tlan chhuak thuai a, lei an rawn rah rual chuan ka tha pawh chu a bal hlawk mai. Rang takin mipui te chu an thlawk bo zo ta (an thlawk chiang alawm!).

Thinrim tih hriat zet hian min sawisa a, in chep takah chuan min khung leh ta.

Zan a rawn nih chuan thawm ri rak rak ka hria a, ka hlauthawmg ngei mai. Kawngkhar a rawn inhawng a, ka rinloh lutukin tlangval rual sawm vel zet an lo nia. Min hruaichhuak tura lokal an ni. Tichuan rang takin min thlawhpui a, in ruak zau takah hian kan tum thla riai riai mai. Anmahni ka han en chuan zawhna hlirin ka khat a, thil thleng zawng zawng chu ka hrethiamlo takzet a ni. Naupang atanga pitar putar chenin anlo awm khup mai si.

Thawm a reh vawng vawng hnu chuan mipui zing ata chu ka hmaah hian pa lian tha thelh thawlh tak mai a rawn chhuak a. Diar a khim vah a, a pian en reng reng chuan mi namai ani hauhlo tih ka hre nghal a. “Ka hming chu Dothanga a nia, Tualzau khaw pasaltha hi ka ni. Kan zavai hian rauthla mai kan ni tawh a, kan chet dan hrang hrang mak i ti pawh kha a awmlo hran lo e. Hmanah kha chuan lal tha leh fel tak hnuaiah kan tual chaiin, sa leh ral hmaah kan zam ngai na heklo. Mahse, kan lalpa leh lalnu te chu mak tak maiin an kang hlum a, a chhan kan han hriat chuan khang mi pahnihte chungah khan phuba lak chu kan tum ta a ni. Mahse kan lal fapa chu hun engemaw chen an lo thunun tawh a, a tha ngam reng kan awmlo. Tichuan kan zavai hian hal hlum kan nia. Kan lal fapa thlak turin an rawn hruai che a ni e. Keini rauthla tan han hneh chu sawiloh, tawh tak ngial pawh kan theilo ani..” a han ti charh charh a. A thin a dam mawlhlo tih ka hre mai.

Ka riltam em avang chuan ka chau hle a, an hria a ni chek ang chu, buhchangrum leh sa min hlui ta nghek mai. Ka ngaihdan chu ka sawi ve ta a.

Khawvar veleh chuan inte ah chuan min hruai thuai a, chau tak angin ka awm der ta a. Ka rin lawk ang ngei chuan putar pahnih chuan min rawn tlawh leh ngeia, pawna min kaih chhuah laite chuan ka pai tuang tuang a. Khua a rawn dur khuih khuih a, kawl a phe leh ta zuai zuai mai. Thli lah chu a thaw leh vuk vuk a, thil puak dur dur chuan a rawm zawm leh zat mai. Putar pakhat zawk chu a vanvadak he haw a, “Saithiang, lo inrawlh hlek suh. I hring chan laia ka meichher dawl hleilo.” A ti tuar a. Rauthla leng rual chu an rawn khawm tup tup a, putara te chuan mak an ti kher mai.

Chutia ka haua an en he haw lai chuan ka kekawr iptea ka chemte ah chu phawrhin ka’n vit dun ngheng maia, chhamphual tello chuan tar chaklo mai an ni bawk a, an inringlo nen an te rwng rawng ani ber mai. Leiah chuan an let tawp a, vutah an chang ta daih mai a. Chu veleh kawl chu nasa mangkhengin a rawn phe zawr zawr a, mipa pahnih leh hmeichhe pakhat an rawn lang a. Anmahni ka hmuh chuan Tualzau khaw lal, a nupui leh a fapa te an ni tih ka hre mai a. Lawmthu min hrilh hnu chuan van lamah an vai mai chuan an kang delh delh a, ka hmuh phak chhung chu ka thlir reng a, an bo fel ta a ni. Chutia an bo fel hnu chuan nikhaw hrelovin ka let hlawm tawpa, engmah ka hre zuilo.

Ka han harh chuan min lo kil bial laih a, aizawl damdawiinah pakhatah hian ka lo mu reng mai. Chanchin min zawta, engmah reng ka sawi ta lo. Ni khua a lo rei a, Tualzau khua a awm leh awmloh ka zawng a, chutiang renga lo awm silo. Tichuan ka thil tawn chu ka zep ta reng zawk a ni.
************************************

Author : Zorammawia Amawia Ralte    

Aside | Posted on by | Tagged , | Leave a comment