EUROPE-AH KRISTIANNA A TLAHNIAM NASA: MIZORAM ENGNGE A AN VE LE?

ᅠ Europe Social Survey-in a tarlan danin,kum 1000 liamta chhungin nasa takin kristianna a tlahniam a, tun kum 100 liamta chhung pawhin kristianna leh sakhawmi nihna chu nasa takin a tlahniam a ni. Europe khawmual puia cheng thalai kum 16-29 inkarah phei chuan sakhaw thila inhnam hnawihna an nei tlem hle, tih a ni.

ᅠPoland, Portugal leh Ireland ramah chuan thalai 10 zinga 1 chauhvin kartina sakhaw thila service neihah an tel a. Czech Republic 91% ten Sakhua an nei lova, 70% te phei chuan sakhaw thilah telna an nei ngai lo.

ᅠEstonia, Sweden, Netherlands ramah chuan 70-80% inkarin Sakhaw zawm an nei tawh lo. Ram 22 zinga 12 ah chuan Thalai ten pawl (denomination) emaw, sakhaw awmna mumal an nei lo.

Kum 1910 khan khawvela Kristian 66% chu Europe ah an cheng (Pew Research Center) a, kum 2010 ah erawh chuan 26% chauh an cheng tawh a ni.

Kristianna chu a tlahniam hle a, kum 100 chhungin 2011 ah Demographic Study angin ram 200 ah Kristian tluklehdingawn 2.18 an cheng a, khawvela mihring hmun thum zet chu kristian an ni.

Europe ah sakhaw la urhsun ram chu Ireland, Lithuania, Poland ram an ni. Poland ah thalai 17% in sakhua an nei tawhlo. Chutih laiin Poles/ Polish 47% te erawh chuan sakhua an thutak hle a ni.

Mizoram hi enge a an ve ang le?

Author: CT Lalrinawma

Advertisements
Aside | Posted on by | Tagged , | Leave a comment

HELICOPTER 2 SERVICE TURIN RUAHMANNA SIAM MEK, 2013 ATANGIN VIP TEN VAWI 69 HELICOPTER HMANG

• Helicopter hman man.
• Minister te helicopter hman zat.

Kum 2013 atanga vawiin thlengin, Chief Minister, Governor leh VIP dangte’n zin veivahna atan helicopter vawi 69 an hmang tawh a, an zingah hian Chief Minister chu helicopter hmang ngun ber niin, hemi hun chhung hian vawi 53 ahmang tawh a. Tunah hian helicopter 2service tur in ruahmanna a awm mek bawk.

Vawiin Assembly Budget Sesssion zawhna leh chhanna hun a Dr. K. Beichhua zawhna chhangin General Administration Department (GAD) changtu Chief Minister Pu Lal Thanhawla chuan, kum 2013 atanga vawiin thlengin Chief Minister, Governor leh VIP dang ten helicopter vawi 69 an hmang tawh tih sawiin, Chief Minister in vawi 53 hmang tawhin, Governorin vawi 10 leh VIP dang ten vawi 6 an hmang tih a sawi. Zin veivahna atana helicopter hman man chu darkar khatah Rs sing 70,000/- a ni thin tih Chief Minister chuan sawiin, kumin 2018, January atangin Rs sing 80,000/- ah tihsan a nih thu a sawi bawk.

Member te zawhbelhna chhangin GAD changtu Chief Minister Pu Lal Thanhawla chuan, helicopter chu a tulah hman thin anih thu sawiin, a tullo ah chuan tumahin an hman duh a rin loh thu a sawi a, helicopter hman man chu pek tlak nghal zel a nih thu a sawi. Mizoram a service mek Pawan Hans helicopter, hmanna man, za a 75 chu central sorkar tum a nih thu leh tun dinhmun ah Mizoram district headquarters leh hmun pawimawh dangah a service mek tih Chief Minister chuan a sawi a, tun a helipad awm mek te bakah hmun dangah pawh helipad siam turin ruahmanna kalpui mek a nih thu a sawi.

GAD changtu Chief Minister chuan, tunah hian Mizoram ah Pawan Hans helicopter pakhat, a service mek tih sawiin, helicopter 2 service turin GAD lamin ngaihtuahna an hmang tih a sawi a, hei hi Pawan Hans lam pawhin an inhuam thu a sawi.

Member te zawhbelhna chhangin Chief Minister chuan helicopter hmangtu passenger tin te chu Rs nuai 7 sing 50,000/- zelin insurance tihsak an nih thu sawi bawkin, Mizoram kilkhawr tak tak atang pawh a damlohna leh tul pawimawh bik a, helicopter hi hman a nih theihna turin helicopter trum theihna tur siam, a awm nual thu leh helicopter service mekna line thenkhat ah indaihlohna a nasat avangin, helicopter 2 service turin ruahmanna, a awm mek thu GAD changtu Chief Minister chuan a sawi bawk.

Source : Zawlbuk

Aside | Posted on by | Tagged , , | Leave a comment

TRUMP-AN NORTH KOREA LEH IRAN BOMB DUHTU NATIONAL SECURITY ADVISER JOHN BOLTON A NEI TA : GEN. H.R MCMASTER LEH JOHN DOWD AN BANG TA

President Donald Trump chuan US National Security Adviser atan, American pa rum rut, a rilru pu mi ang JOHN BOLTON chu a ruat leh ta. John Bolton hi Trump’s National Security Adviser 3na tur a ni. Gen. H.R.Mc Master erawh chu a hnathawhna lamah kir lehin, sipai General arsi 3 bel a nih angin pension turin a kal hnai ang. John Bolton hian a hnathawhna Conservative din American Enterprenuer Insitute atanga bangin, April 9 atangin a hna a zawm turin White housr a lut ve bawk ang.

John Bolton hi “notorious hawk” an tih mai, pa rorum tak, American em em leh khawvelah US chauh pawhin UN tel lovin hma a hruai thei tih ngaihdan neitu a ni. Hetianga Trump’s National Security Adviser ah a awm chho tur hi Iran nuclear deal nuaibona tur hmanrua leh North Korea beih tumna ni turah an ngai.

North Korea chungchang chu kum 2015 ah New York Times ah ziakin, “Biak biak an tul lo ve, beih hmasak (first strike) a tha ber” a ti mai a. Iran nuclear siam tur chungchang pawh Israel-in run thut se duhtu leh a lehkhabu ziak phei chu “Surrender is Not an Option” a ni. Hetianga US National Security Adviser a nih chhoh chuan US Foreign Policy a rawn her danglam leh dawrh turah ngaih a ni.

Zophai inchuhnaah “Surrender is Not an Option” kan ti mai dawm ni chu le!

President Ronald Reagan leh President George Bush Sr., hunah senior position a lo luah tawh thin a, President Bush Jr,. hunah khan kum 2005 ah US Ambassador to UN a ni a, Iraq run turah chak taka hmalatu niin, UN Security Council pawh engvaka ngailo thin a ni. Vawikhat chu ti hian a ti: “UN Hqrs building chhawng 38 a chhawng 10 hi chu tul lo, khawvel community awmna a ni a, heng tel lo pawhin US chuan khawvel a kaihruai thei a ni” a ti niin an sawi.

US-in International Criminal Court a zawm dawn pawha duhlotu a ni a, a rilru suk thlek hi “America first” tih leh “Make America Great Again” tih rilru putu President Donald Trump duhzawng tak a ni. Fox News palai Roger Ailes chuan, “Bolton chu bomb vawmluttu (bomb thrower) a ni e” a ti!


President Trump chuan McMaster a chhuak tur chu Twitter ah fakin, “…General H.R. McMaster chuan tha taka hna min thawhpui vangin ka lawm tak meuhva. Hna ropui tak a thawk a ni. Hun lo kal zelah pawh thian tha tak kan ni zel ang. Official taka contact chu 9/4/18 ah a tawp ang” tiin.

Nikki Haley, US Ambassador to UN pawhin, McMaster chu thawhpui nuam a tih thu leh fakna tawngkam tweetin, “Ani ang thian tha tak ka nei chu ka lawm hle” a ti. Mc Master leh Nikki Haley te chuan UN Security Council-ah US thil thlir dan (Trump’s Foreign Policy) champion pui turin theihtawp an lo chhuah dun thin a ni.

Mi thenkhat chuan John Bolton hian Washington ah Lawmakers zingah hmelma tam tak a nei niin an sawi a, a bikin Democrat-ho phei chuan a thil thlir dan “consevative” rum rut leh khauh (tough) thin em avangin, an thlawp lo a ni. Mahse, US National Security Adviser kher hi chu Trump’s Cabinet top post zingah tel mahse, Senate-in pawm tlanna tura vote lak kher a tul dawn lo a ni.

Kar kalta khan Secy of State Rex Tillerson chu North Korea bomb thawr duhtu, CIA Director Mike Pompeo hmangin President Trump hian a lo thlak tawh bawk a, US foreign policy a lang tan riak ruak tan a ni.

“Fire and Fury” tih Michael Wolff ziakah khan White House Chief Strategist Steve Bannon chuan, John Bolton hi ruai turin President Donald Trump chu a lo hrilh tawh thin, tih a tarlang.

Hetih lai hian Trump aide pakhat, a Muller’s Investigation atan a “personal lawyer” John Dowd chuan Trump Admin chu a bansan veleh ta bawk. President Trump hian kum 4 chhung a rorelna turah “Khawnbawl Upa” tur a la rem fuh hlei theilo ni berin a lang. Kumin chho chuan inrem fuh chho turah ngai ang!

ᅠᅠᅠAuthor: CT Lalrinawma

Aside | Posted on by | Tagged , , | Leave a comment

Australia ah whale an thi ṭeuh

ℑukin zirtawpni zing khan Australia rama Perth khawpui atanga , mel 160 vela hla Hamelin Bay ah chuan short-finned pilot whales 150 chuang zet an rawn chhuak chiam mai a. Thuneitute lu an tihai hle.
ᅠℋengho chhanchhuak tur hian Biodiversity, Conservation and Attractions department an che nghal a. Anni hian theihtawp chhuah mah se, an hnathawh tibuai turin Shark an lo awm ve zel bawk sia. Zan a lo thlen meuh chuan pasarih bak damin an chhuak ta chuang lo.


ᅠᅠℋe thilthleng hi an hriat veleh thuneitute bakah volunteer 100 chuang an thawk chhuak nghal a. An tumna hi nasa hle mah se, an chhanchhuak hlei thei ta lo a ni.
ᅠℋetia whale an talbuai chiamna chhan hi khawlum zual zelin a tibuai niin hriat a ni.

ᅠKum 2009 khan whale leh dolphin 80 aia tam chu Hamelin Bay ah hian an lo thi tawh bawk a. Whale thih runpui ber chu 1996 khan thlengin, long-finned pilot whales 320 ngawt chu Hamelin Bay hmarlam mel 40 vela hla Dunsborough ah an lo thi ringawt tawh bawk a ni.

Aside | Posted on by | Tagged , | Leave a comment

NUNGCHA HUMHALH DUH SILAI TUNG TAM BER LICENCE NEILO AN NI – Pu Lal Thanhawla

• Silai tung zat.
• Lungzarhtuma ramsial.

Environment, Forest & Climate Change- department enkawltu Chief Minister Pu Lal Thanhawla chuan nungcha humhalh duha silai tung tam berte chu, licence neilo, vawn that tlak loh niin khatiang siamtu te kha zawn chhuaha man chi an ni zawk tih House-ah a sawi.

22nd March, 2018 Assembly Session-a zawhna hmasa ber MNF member Pu Lalruatkima zawhna, nungcha humhalh duhna avanga silai tung zat leh vawn that dan chungchang a zawhna chhangin Environment, Forest & Climate Change Department changtu Chief Ministre Pu Lal Thanhawla chuan nungcha humhalh duhna avanga silai tungte hi mi 248 an ni a, Silai tun tawhte hi Licence nena rawn tung, tlemte an ni a, an tunna division theuhah kawl that an ni a, heng mite hnenah hian lawmman pek an nih loh thu a sawi.

Zawhna neitu Pu Lalruatkima’n DCF Wildlife-a silai tun, physical a, awm tawh silo, Padma Shree Pu James Dokhuma silai tun pawh awm lo chungchangte, sorkarin a hria em? tih a zawhna chhangin Pu Lal Thanhawla chuan Pu James Dokhuma silai tun, single barrel chu Department in case siam a, a enkawl, DCF (Wildlife) Division-a dah chu, engemaw lai khan a bo tlat mai a, DC (Aizawl) lamah licence leh registration te dap a ni a, hmuh a ni lo a, Department leh sorkar a bangbo hle a, a tak tak ang zo lo mahse, lawmthu sawi nan leh ngaihsanna entir nan, a aiawh silai dang deptt. neih sa dah a ni, a ti.

ᅠTunlaiin mimal leh pawl ramsa humhalhna chang hria an awm nual a, kan lo thangharh hi a lawmawm a, sorkar pawhin lawmthu a sawi a. Arms Act 1959 hnuaiah rules siam thin a ni a, a thar ber Arms Rules 2016 a ni a, hetah hian Airgun te pawh licence neih vek ngai a ni a, khawchhak lam atangin China siam airgun a lo lut a, sava leh ramsa veh nan hman thin a ni. Nungcha humhalh duhna a lo lian zel a, pawl thenkhat thahnemngai, an mahni thu a, humhalhtute nen pawh sorkar nen thawhhona neih a ni a, YMA mahni bu zawla hma la tam tak an awm bawk tih kan hria a, lawmthu kan sawi a ni, a ti.

ᅠZawhna neituin voluntary a silai tung ten la leh dawn se phal a ni em? division hrang hranga silai tun te physical in a awm reng em tih leh zawhbelhna dang chhangin Chief Minister chuan “silai tunte hi a tam ber chu UT silai a ni a, Licence pawh an neilo a, vawn that tlak teh chiam pawh a ni lo, a bo kha, a uiawm bawk lo, khatianga, lo siamtute kha dan ang chuan zawn chhuaha man chi an ni hial zawk a, action lak chi a ni zawk. An vawng thalo a ni pawhin khatiang thil ṭenghneng kha an kawl reng peih lo a niang, thiam lohna an nei lo.

ᅠᅠDan lo a, siam a ni a, UT silai ang chi kha dan loa siam a ni a, sorkarin a humhalh tur pawh a ni lo, an man chuan an destroy thiang a ni” a ti.

ᅠᅠMember dangte zawhbelhna chhangin Lungzarhtuma ramsial chu India danah tihhlum thiang a ni lo a, bawng neitute compensation pek tum a ni a, ramsial hi a awmna tur hmuna phurh tura hmalak mek a ni tih Chief Minister chuan a sawi bawk.

Aside | Posted on by | Tagged , , | Leave a comment

CHAMPHAI KHAWPUI 1970 CHHO VELA THING TUAH HUN LAIA ANGAH AN LET LEH MEK – Pu TT Zothansanga

2017-18 chhung a, MIZOFED Champhaia gas thleng zat.
Mualkhang Gas Bottling Plant dawn tam zawng.

FCS&CA changtu Pu John Rotluangliana chuan, Mizorama eirawngbawlna gas phurtu Carrying Contractor te hun chu kumin September-ah a tawp dawn tih sawiin, heng mite hun hi pawhsei sak an nih dawn loh thu leh Indian Oil Corporation (IOC) chuan kumin April-ah tender a ti chhuak dawn niin a sawi.

Assembly thutkhawm nimin 22 march ah rorellai member Pu TT. Zothansanga zawhna leh zawhbelhna te chhangin Supply Minister Pu John Rotluangliana chuan, Mizoram a gas phurtucarrying contractor te rate chu a hniam lutuk tih sawiin, hemi avang hian gas an phur tha duhlo a, gas a harsat phah tih a sawi. Contractor te chu IOC lak an nih thu leh kumin september thleng contract an la neih thu a sawi a, a tlangpuiin contractor te hi thla 6 chhung an hun pawhsei sak an nih thin laiin, IOC lam an nawr angin, heng contractor te hi an hun pawhsei sak an ni dawn lo a, hemi vang hian IOC chuan thla thar April-ah hian tender a ti chhuak dawn niin House a hrilh.

Pu John Rotluangliana chuan Mizorama gas harsatna chu sorkarin a hria tih Supply Minister chuan sawi bawkin, gas phurtu carrying contractor te’n an phurh that duh loh avangin FCS&CA in a dil angin department chuan eirawngbawlna gas phurhna tur R 8,08,000/-, a approved sak tawh niin a sawi. Mizoramin kan rin pui ber Mualkhang Gas Bottling Plant chu MT 100 chauh len theihna a nih avangin Sairanga MT 500 lentheihna hmun chu IOC-ah an pe fel tawh niin a sawi a, hetihlai hian thuneihna pumhlum Mizoram sorkarin a neih loh avangin thil tih a harsa niin a sawi bawk.

Pu John Rotluangliana chuan, Mizorama Gas Agency leh Petrol Pump thlenga hawn belh turin IOC-ah an thlen thin thu sawiin, IOC thuneihna a nih avangin IOC tih dan dan a nih thin thu a sawi bawk.

Pu TT Zothansanga zawhna chhangin Supply Minister chuan,Champhaia gas harsatna thleng chu sorkarin a hriat thu a sawi a, mipuite harsatna sukiang turin sorkarin theihtawp a chhuah mek thu a sawi. MIZOFED, Champhai hnuaiah Consumer sing 1,4205 an awm mek thu leh 2017-18 chhung a, MIZOFED Champhaia gas thleng zat chu bur 26112 a nih thu a sawi.

Pu TT Zothansanga chuan Champhai khawpui chu kum 1970chho a, thingtuah thin hunlaiah an let leh a ni ber tih sawiin Gas Agency neih belh an mamawh hle tih a sawi.

Vanneihthanga Vanchhawng

Aside | Posted on by | Tagged , | Leave a comment

CADC GOVERNOR’S RULE-AH DAH A NI, LAWNGTLAI DC LA PHEIIN PU N CHAKHAI DM&R DIRECTOR LAWNGTLAI DC ATAN RUAT

Danpui 6th Schedule-in a duan angin CEM Amit Kumar Chakma kaihhruai CADC chu a kal theih toh lo tiin Governor Lt Gen Nirbhay Sharma chuan Governor’s Rule hnuaiah a dah a. Thla li chhung emaw, CADCinthlan awm mai tur result a zira Council thar a pian hma chuan Lawngtlai Deputy Commissioner-inadministration a enkawl dawn niin sorkar thu chhuak in a tarlang.

Governor chuan complaint hrang hrang avanga Lawngtlai DCDr Arun T chhuichhianna behchhana he thutlukna hi a siam niin thu chhuah chuan a tarlang a. CADC term kal lai mek hi kumin April 21 hian a tawp dawn a, Dr Arun T-a’n CADC administration a chhuichian hma hian Governor vek hian khatih laia Lawngtlai DC, tuna Aizawl DC ni lai Dr A Muthamma chu CADC-a thil felhlel ni a ngaih te chhuichiang turin a lo ruat tawh bawk a. Dr Muthamma chhuichianna leh Director of Local Fund Audit-in CADC account a chhuichianna te chu chipchiar taka zirchiangin tunhnai khan a tichhuak a ni.

Hetihlai hian CADC-a inthlanna buatsaih tur hian State Election Commission chuan ruahmanna a nei chho mek a, inthlanna neih hun tur hi puan la nilo mah se, inthlanna a hman tur EVM chu Chawngte ah phurh thlen ni tawh.

CADC-ah hian MDC bial 20 a awm a. He inthlannaa hman tur electoral roll tihchhuahah chuan voter hmeichhia 15087 leh mipa 15478, an vaiin vote nei thei mi 30565 an awm.

Hetihlai vek hian nimin khan Mizoram sorkar chuuan Lawngtlai DC Dr. Arun T IAS chu Special Secretary to the Govt. of Mizoram a sawnna order a tichhuak a, a department chan tur chu la siam tur a ni a, Pu N.Chakhai MCS, Director, Disaster management & Rehanilitation Department chu Lawngtlai DC atan hian a dah thung.

Vanneihthanga Vanchhawng

Aside | Posted on by | Tagged , , | 1 Comment

National Human Rights Commission chuan Assam leh Mizoram DGP te insawfiah turin thu pe

Zophai, Bairabi-a Assam Police te’n March 8 & 10-a Mizo journalist kut an thlak chungchangah vawiin khan National Human Rights Commission chuan Assam leh Mizoram DGP te ve ve chipchiar taka insawfiah turin thu a pe a, chawlhkar 4chhunga insawifiahna (detailed report) thehlut turin a hriattir nghal bawk.

NHRC thu chhuah in a tarlan danin, insawifiah tura hriattirna hi Commission-in complaint a dawn avanga DGP te hnena thawn a ni a, Zophaia buainaah khan police te’n silai an hmehpuah thu a inziak bawk.

“Journalist kut tuar te hi ground report buatsaih turin Zophaiah hian an kal a, an press identity card te an tilang chungin police hian duk chur khawpin an vua a, journalist tamtak in hliam na tak an tawrh phah a, an zingah hmeichhia pawh an tel,” tiin NHRC thu chhuah ah hian tarlan a ni.

Aside | Posted on by | Tagged , , | Leave a comment

RUSSIA PRESIDENT ATAN “VLADIMIR PUTIN” THLAN TLIN LEH A NI : EPTU PARTY LIAN BER CANDIDATE ERAWH HNAWL A NI

March 18, 2018 a Russian Federation ram inthlan chu a zan dar 9pm (GMT) ah ballot box khar a ni a, vote 60% a tla sawi niin, kum 2012 inthlan erawh 65% a tla. President nilai Vladimir Putin chuan vote zawng zawng 74% hmua chhut a ni (official erawh puan a la ni lo deuh).

President Vladimir Putin hian kum 18 chhung thuneihna a chelh tawh a, tun tum hi President atan a thlan vawi 3na a ni a, kum 2000 leh 2008 ah thlan tlin a lo ni tawh a, mahse, an ram danin a zawna term 2 bak a nih theih loh vangin kum 2007 khan Prime Minister Dmtry Medvedev nen nihna inkian tawnin, Putin chu Prime Minister term a chelh zuai a ni.

President Putin chuan, “Economy ka siam tha ang a, politics inkhelh ve a buai pui a ngai lovang” a ti mai thin a ni, an ti.

Tunhnaiah Russia ram chu khawvela military ralthuam nei tha ber tur leh nuclear arsenal siam tha angin a insawi bawk. A atchilh pawlte chuan KGB Colonel thin Vladimir Putin hi an atchilh nasa hle.

Tun tum inthlanah Opposition party lian ber candidate tura tih Navalny chu Central Election Commission in chuh ve theilo turin a tih vangin, party tenau atangin mi 8 zetin an chuh ve a a ni. Russian Communist party hotu Pavel Grudinin leh Putin a ngaihsan em em thin leh amah chhertu Politician pakhat fanu Ms Ksenia Sobchak te telin, anni erawh chuan Vladimir Putin-a ne pawh an ek pha si lo. Tihian President Vladimir Putin chuan kum 2024 thlengin Russia ram a hruai dawn ta a ni.

Sawiseltute chuan hmun thenkhatah voting fraud-thildikloa awm tiin, sorkar leh industry vela thawktute reng reng vote thlak luih tir an ni, an ti.

                             .author: CT Lalrinawma

Aside | Posted on by | Tagged , , | Leave a comment

SBI NO QUEUE HMANG TANGKAI ANG AW by Mamuana Pfs

(A la hre lo te pualin)

Nitin a kan khawsak phung alo sáng chho zel a, thil thar alo chhuak a, chu chu tha viau a kan hriat laiin a aia tha lehzual alo chhuak ve reng bawk a.keini takngial pawhin internet khawvel kan chên a, kan nui ve ta ham ham mai chu a ni a,a lawmawm viau mai!

Chutiang bawkin State Bank of India lam pawhin,an customers te tana samkhaina zawk leh an tan pawh a hnathawh alo awlsam zawkna’n tiin,tun hma a an tihdan phung an thlak ta a,an Bank atang a pawisa la chhuak (Withdraw) duhte tan pawh Coupon pe hmasa in,Cash counter lamah computer-in customers te coupon number a lam hun nghahtirin ruahmanna an siam ta.

Amaherawhchu hei hian a dawrtu lam te min tihmasawnna em em a awm hranin ka hrelo ve tlat a,tun hma a hun rei tak tak kan nghah ang deuh tho kha a la ni maiin ka hre thin.Mahni ngeiin coupon lak a,cash counter room ah hun paih teuh a ngai reng tho mai.Anni tan erawh thawktu indaihloh kár ah chuan alo awlsam zawkin hnathawh alo nuam zawk pawh a ni mahna!

Chutiang alo nih chuan engtiangin nge a dawrtu lam hian hun tlem zawk pawisa lak chhuahna’n kan hman theih anga,engtinnge kawng awlsam zawk kan zawn ve tak ang tih hi kan ngaihtuah a tha khawp mai.

Mahni ngei kallo leh coupon la tur pawh a rei tak tak intlar ngailo tur a thiltih dan a awm reng alawm le!
Google Playstore lam chuan kan harsatna te sukiang turin android application pakhat SBI NØ QUEUE min lo chhawpchhuahsak reng mai a,hei hi kan hmanthiam phawt chuan i hun hlû tak leh i tha leh tui séng hauh lovin,awlsam takin i hun ah tak i pawisa la chhuak turin i kal theuh mai dawn a ni.

He link 👉🏻 https://play.google.com/store/apps/details?id=com.sbi.noqueue ah hian i lut ang a, application hi i download ang.

A tihdan kalphung chu a hriat theih nghal mai a,mandatory a dahkhah tur alo awm anga,chungte chu a hmasa berin :

Hming : I hming

Phone No (Hei hi kan account nena kan link sa kha…)

I pawisa lakchhuah tumna State Bank Branch (I account hawnna) hming i type lut ang.

Pawisa la chhuak tur kan nih avangin kan lak chhuah duhzat azir kha’n option alo pe thla tuar anga,entirna’n ; Cash withdrawal below Rs 40000/- tih te Cash withdrawal below Rs 40000/- tih te alo awm vek ang.

Chu chu i process ang,i coupon number tur a rawn hrilh che anga,chumi rual rual chuan i hma a intlar la awmzat nen lam a rawn hrilh hre nghal vek bawk ang che. A va awlsam em!

Engemaw chang phei chuan,counter a coupon la hauh silo kha’n hetianga ka tih hian ka hma a la te hnung chiah ah te ka la thei a,a mak khawp mai!
Ka sawi awmzia chu,cash counter room ka han luh chiah khan,rei ka thu ngailo tihna anih chu,online a gas la ho ang deuh hi a ni ber mai,Mizofed pawhin online a booked hmasa ho an pek hmasak zel hi!Chutuang deuh chu a ni awm e.Hmun dangah chuan a ni vek kherlo thei bawk a!

Kan hun,kan tha save kan duh chuan he application hi lo download la,lo hmang ve la,i inchhir hauhin ka ringlo.

Aside | Posted on by | Tagged , | Leave a comment