SOUTH KOREAN HOVIN “NORTH KOREAN” HMELMATE BIAK DAN AN LO ZIR LAWK

Winter Olympics a lo tel North Korean hote lo biak dan tur chu an thlenna Inje Speedium Hotel & Resort a thawktu mi 150 dawn ten an lo zir lawk a, “Nuclear” (nuke) chungchang te, “Missile” tih te leh North Korean hovin an kawr hmaa badge atan an hruaitu hluite thla an tar pawhin, kawk kherlo turin an lo inhrilh. North Korea hian infiam mite leh cheerleaders telin mi 280 a rawn tir a ni.

North Korea leh South Korea chu kum 1950-53 ah indo chiam tawh an nih a angin, hnam thuhmun mah nise, inkal pawhlo, khawvel hmun dang daiha cheng ang an nih a angin, South Korea angin english -saptawng pawh an hmang uarlo hle a ni. South Korea ah chuan “Shampoo” tihte an hmang ve mai a, North Korean hovin an hre hauhlo, an ti.

Hnam khat ni mahse, entirnan “Chaw” an sawina pawh a in ang lova. “Thlai” chu South Korea hovin “namsae” an tih laiin, North Korean chuan “cheeso” tiin an lam daih thung a ni.

Vawiinah Dictator Kim Jong-un a unaunu Kim Yo-jong chu South Korean President Moon Jae-in chuan a chenna Presidential Palace “Blue House” ah a kawm a, Kim Jong-un a thuchah thlenin, North Korea zin turin a sawm a ni. Kim Yo-jong chuan, “Pyongyang ah kan inhmuh thuai ka beisei a ni” tiin a hrilh.

Kim Yo-jong hi North Korean hmeichhe thiltithei ber niin, “Rising Star” a ni mek a, Sept 27, 1987 a piangah ngaih niin, Kim Jong-un erawh January 8, 1984 a piang ni a ngaih a ni.

US chuan North Korea lakah South Korea chu a nem (soft) zovang tih a hlauh hmel a, US Vice President Mike Pence chuan, “Thil tih dikloh palh hauhloh tur a ni. Tunah Morth Korea chu a nuclear & missile program chungchangah nawrna sang ber kan pe mek a, an thiltih dan tha lo an chawlhsan ngei a tul a ni” a ti.
           By     CT Lalrinawma

Advertisements
Aside | Posted on by | Leave a comment

MYANMAR POLICE TEN MELBUK KHAW MOTOR 21 AN HREN BEH THARUM HMANGIN MELBUK PA HOVIN AN CHHUH SAK

February ni 6, 2018 (Thawhlehni) chhun dar 12 vel khan, Ṭiau lui ral, Uilui kama Melbuk khaw motor 21 zet, Myanmar sipaiten nikum Nov 28 atanga an hren sak chu motor neitute bakah mi engemawzat ṭangrual ten an hneh chhuh a, an lalet vek.

Thudawnnain a sawi danin, Melbuk mipuite hi mi 50 vel dawn lai an ni a, motor vengtu Police-te hi mi 5 leh an nupuite 2 an ni. He thil thlen lai hian Myanmar Police pakhat chu a nupui hruaiin khawchhunga a kal hlan a ni a. Melbuk atanga motor la tura kalte hian Police chhunchaw fak lai chu nangchingin motor vengtute hi an phuar bet a, an mobile phone leh silaite chhuhsakin motor chabi an laksak a, an motor te hi Mizoram lamah an khalh kai ta a ni.

Myanmar Police te chu Zokhawthar Police OC hnenah zualko nghalin, India Sipai hotute hnenah pawh thu an thlen nghal niin hriat a ni.

Melbuk motor neitute hian an motor tang la chhuak tur hian, theihtawpin hma an lo la tawh ṭhin tih an sawi a. Motor manna lehkha hi motor neitute emaw, khawtlang hruaitute emaw, Police leh sorkar hotute hnenah, pawh engmah hriattirna an pe lo niin an sawi. Khawtlang hruaituten he harsatna hi an sawi chang pawhin Myanmar police lam hian “Engmah man a ni lo”, tiin an lo chhang mai ṭhin niin an sawi.

Motor an hren chungchang hi Teddim leh Falam DC te hnenah pawh Khawmawi, (Myanmar) khawtlang hruaitute leh, NLD Party hotute kaltlangin thu an lo thlen tawh thin a. Hmasawnna engmah an hmu thei lova. Parliament session neih huna sawi tur a ni tiin agenda-ah dah a nih thu te an lo hrilh thin niin Melbuk khaw mi te chuan an sawi.

Heng lirthei, myanmar police te hren zingah hian loan rulh mek te, chhungkaw eizawnna atana hman te a awm nual a, thla 3 dawn lai mai man ni si lo va an hreng bet ringawt mai chu an hrethiam lova, motor neitute chuan tihngaihna dang hre lovin intiamrualin an che chhuak ta mai niin an sawi.

He thil thleng avang hian border-ah buaina dang a awm hriat a ni lo. Hetia an motor an hnehchhuh hma pawh hian an motor te hi an tlawh fo a, engine te pawh ti nungin an start fo thin niin thudawnna chuan a sawi.

Melbuk hi Champhai leh Zokhawthar inkara awm, chhungkaw 150 bawr vel awmna khua a ni a. Zokhawthar Town area hnuaia awm a ni.

Aside | Posted on by | Tagged , , , , | Leave a comment

HUMAN TRAFFICKING LAMA INHNAMHNAWIH VAPHAI KHUAIN AN MAN

Ni 7, Nilaini khan Rohyngya state (Burma) aţanga mihring ruk hmang, Laskar Hussein-a, Johnny tia hming invuah bawk chu Vaphai khaw ramah Vaphai khaw tlangvalin a man.

He Laskar Hussein-a hi Burma ram aţang mihring tawlh ruknaa a phusa ber a ni a. Kar kal ta lam khan he vaipa hi Melbuk ramah police-ten, an mi rukte nen an awm tih report bawhzuiin an hual tawh a, an ruk zinga mi pahnihte hi an chhanchhuak a, a dang mi 4 te hi, he vaipa hian Aizawl lama a thawhpuite kuta hlan tura a chhuah hlan a ni awm e.

Tichuan, amah hi man lohin a awm ta a, police hian an um zui reng a, vawin 7/2/2018 hian police lam chuan Vaphai khaw ramah a awm tih report an dawng ta a ni. Vaphai khaw mipuite hnenah information pe nghalin Vaphai khaw mipuite chu misual man tur hian an inbuatsaih nghal a. Hetihlai hian Vaphai khaw tlangval pahnihte chuan sumo-a ţiau lama mi thlah tura chhuak mek, Ngursailova leh Lalramsiama te chuan he thu hi an hre ve hman a. Phai kawnga an kal mek lai chuan he vaipa hi kalkawngah a rawn chhuak hlawl mai chu an hmu ta a ni. Sumo hmasa zawka tlan, Lalramsiama chuan, a motor-a chuang tura tiin, Saikhumphai an thlen hnuah motor aţanga hnukthla nghalin a bawhbet nghal a, hruia phuar hlawm nghalin a man zui ta a ni. police lam hi phone a ni a, tunah chuan police kutah hlan a ni ta a ni.

Source Tuipuiral group YMA

Author : Saihmingliana Sailo

Aside | Posted on by | Tagged , , | Leave a comment

MŢKP Rorelna tetzia mai chu! By Lalremliana Pachuau

Member sing nga dawn lai nei ve lem, Inkhawmpui Budget atâna nuai 40 chuang siam ngam chuan nuho pawh tluk lovinInkhawmpui chungchangah thutlukna an siam leh ta a.

MBKHP member lam hian kum 3 chhûnga Rs 60 thawh an tum laiin a ţhalai leh fit zawkte erawh chuan Inkhawmpui thlengtu dawl nân member tinin Rs 10 aţanga Rs 20-a tihsan zuk ngam rih chauh a!

Inkhawmpui ţanpuina atân inkhawmpui chhimtute thawh zat tur chu Rs 901,160 lek a ni ta a. Pawisa hlut lohzia ngaihtuah thleng phaa ‘Rs 100 tal i thawh ang u.Tichuan, Rs 45,058,00 tal kan thawk chhuak dawn nia’ tingam nimin rorel palai zingah khan awm tak maw? Thingtlang lam leh Unit tê zawkte, inti hmangaih taka thusawi pawl an awm leh ngei ang!

Mahse, unau duh tak, kum khat dana Rs 100 pawh thawk chhuak thei lo khawpa ţhalai min ngai a nih chuan thinrimna awm zawk tak a ni! Thingtlanga sum harsatzia ka hriatpuiin ka hmuhpui tawh che u.

Sangha, ulawng, kaikuang, chakai emaw hmuhphiah etc hmangin Rs 100 kha kumtluanin han thawk chhuak teh mah. I inkhawmpuia malsawmna i dawn tur zat hi kan hre seng lovang.

Khawpui mi sikret, kuhva leh kâmràm ni khat leina zat lek hmang thawhlawm thawh ai chuan Thlarau hian a pawl em em zawk ang che. Palai 463-ah hian mahni intodelh chunga inkhawmpui buatsaih ngam an awm ngang lova ni ang e.

CKŢP Engkimtithei kan Pathian hi Inkhawmpui dawl turin a rintlakzia lantir ula, in thawm hriat a a nuam dawn em. Kohhran ţhalai dang zawngte hnena mahni intodelh Pathian, Engkimtithei a nihzia hi han tarlang ula, kan inkhawmpuite hi an va ropui dawn em.

Aside | Posted on by | Tagged , , , | Leave a comment

HIV positive te hman tur CD 4 Count Machine 3 Mizoramah dah belh a ni.

Aizawl Kulikawna Health Workers Training School Conference Hall-ah Health & Family Welfare Minister Pu Lal Thanzara’n CD4 Counting Machine pathum mipui hman theih turin a hawng a. He hun hi Mizoram State Aids Control Society (MSACS) buatsaih a ni.

Health Minister Pu Lal Thanzara chuan CD4 Count pawimawhna sawiin HIV positive-te taksa a natna dotu tam leh tam loh enna a ni a, CD4 Count hi an damdawi eiin hna a thawk tha nge tha lo tehna pakhat a ni bawk a, chumi a zir chuan an damdawi ei lai thlaksak an ngai thin a ni, a ti a. Hemi avang hian HIV positive tawh phawt chuan thla ruk danah CD4 Count an tih tir ngei a ngai a ni, a ti.

Health Minister chuan HIV Positive-te CD4 Count tih hmasak ber enin za a sawmsarih vel chuan CD4 Count hniam an nei a ni tiin hemi awmzia chu tunah HIV positive tih hmuhchhuah ni mahse an kaina a rei tawh a, hei hian HIV test tam a, hmuhchhuah hma a pawimawhna a tilang chiang hle a ni, a ti a. CD4 Counting Machine hi Mizoramah pathum chauh a awm thin a, MSACS hmalaknain tunah hian CD4 Counting machine pathum Kulikawn, Kolasib leh Mamit Hospital-a dah tur a awm belh dawn a ni tih sawiin heng CD4 Counting Machine-te hi a man a to bakah National AIDS Control Organization (NACO) ten phalna an pek a ngai a, state dang mihring tam zawk leh indaihlo zawk te pawh pek an nih loh laia Mizoramin pathum a dawng chu a lawmawm hle a ni, a ti.

Kulikawn Hospital-a CD4 Counting Machine awm tur chuan Aizawl Civil Hospitala hnathawkte a chhawk zangkhai theih dawn bakah Aizawl-ah phei chuan hmun hnihah CD4 Count a tih theih tawh dawn a ni, a ti a. Heng khawl tangkai leh man to, a thlawna in test theihna ni bawk hi hmang tangkai ngei a ngaih thu a sawi bawk.

MSACS Project Director Dr. Lalmalsawmi Sailo chuan thu sawiin CD4 Counting machine hi district tina ART centre-ah dah ngei tura tan lak a ngai a ni, a ti a. District hrang hranga HIV positive ten hmun hla tak tak kal ngai lovin awlsam zawkin CD4 Count an ti thei tawh dawn a ni, a ti a.

HIV positive-te taksa fit leh fit loh bakah an dinhmun en chian zawk nana thil tangkai tak a nih a beisei thu a sawi a. HIV/AIDS chungchanga Mizoram dinhmun enin hemi natna a darh zel loh nan mitin kan tan rual a pawimawh thu a sawi bawk a ni.

Mizoramah hian HIV positive ART center-a in ziak lut mi 12,000 vel awmin heng atang hian ART damdawi eilai mek mi 6,623 vel an awm a ni.
(DIPR)

Aside | Posted on by | Tagged , | Leave a comment

‘Mipuite hi eizawnna ngelnghet leh rethei tawh lova siam kan tum’- Zoramthanga

Ni 08.02.2018 (Nilaithawhṭanni) hian North Vanlaiphai Community Hall-ah MNF Hrangturzo West & East Block Joint Conference neih a ni a. He hun hi MNF President Pu Zoramthanga’n hman puiin khaw hrang hrang aṭangin mithar- Khawlailung-20 Bungtlang-12, Keitum-24, Hmunzawl-55, Hriangtlang-26,Chekawn-3, N.Vanlaiphai-42, leh Mualcheng chhungkaw hnih aṭangin a vaiin mithar 182 MNF-ah a lawmlut.

Khuallian MNF President Pu Zoramthanga chuan, “Inthlanpui kan hmachhawn turah hian MNF chu thawhpui party dang MLA candidate nei lovin kan mal kal dawn a, tun hmain thawhpui ZNP leh MPC-te pawh kan lo nei tawh ṭhin a, thawhpui neih hi a fuh ngai lo tih kan hre tawh. A fuh teuh ber chu kum 1998 khan MPC nen kan thawk ho a, MLA 34 lai kan nei a, mahse sorkar kha kum khat bak a kal lo. AMC inthlanah khan kan mal kal a, rorel lai Congress-in thawhpui an nei zawk chung pawhin MNF chu kan dawk zawk mai a ni.

Mal kala theih tawpa beih hi a thlumzia kan lo tem tawh a. Thenkhatin BJP nena inzawmna nei ang dawn dawnin min sawi ṭhin a, thawhpui chungchangah BJP nen ngat phei chuan inzawmna pakhat mah kan nei lo leh zual a, kan thuthlungah chhim leh hmar ang kan ni e. Congress ni lo zawng zawng, Congress sorkar duhlo intelkhawm NEDA leh NDA-ah kum 2014 MP inthlan dawnah kan tel ve a. MPC leh ZNP pawh an tel ve tho. Mizoram Kohhran Hruaitu Committee (MKHC)ah Chairman chu Synod Moderator a ni a, ‘tah chuan UPC/Seventh Day leh kohhran hrang hranga miten hruaitu chanvo an chelh a, Synod khan kohhran dang rinna emaw, UPC rin dan a va pawmpui ta e tihna a ni lo a, Seventh Day pawhin Sunday an serh phah hek lo. Chutiang deuh chuan MNF hi NEDA leh NDA-ah a tel avangin BJP-ah a tel tihna a ni lo,” a ti a.

ZPM chungchang sawiin, “ZPM hian innghahna tur Unit bulfuk an nei lo a, an zinga nei awmchhun ZNP leh MPC lahin an nei mumal tawh hek lo a. Thawkho anga lang si hi pakhatah lungrualin an inhlawmkhawm thei lo a, hotu berah an buai nghal pang a, an kal kal hian lokal ve se, MNF tan engto leh hlauh tur chhete mah a awm lo,” a ti bawk.”

Kum 10 Pathianin eptu lama min dah chhan chu kan sorkar laia kan tih diklohte sim leh inzir a, insiamṭhatna hun atan a ti a. Kum 2013 thlenga Congress sorkar hmasa kha chu tlemin sawiselna a la ziaawm deuh a, chumi hnu lamah chuan mipuiin sorkar nawn leh tlaka an ngaihloh khawpin kawngpuiah leh development hrang hrangah an ṭhat lohzia kan hmuh phah ta a, tunah chuan anmahni ngei pawh hian tlin nawn leh an inrin tawh loh avangin mahni inhaivurin Contract leh supply hnate chu Vai an thurualpui a, ‘Savawm khuai la’ ang maiin maimit chhingin mipui sum an ham bawrhbawrh mai a ni. Congress sorkar chuan kohhran leh mipui hmaizahna nei hauh lovin zu a zuar lui a, mipui lawm zawng siama tlin leh hi an tum tawh lo a ni, inthlan dawnah Congres dinhmun hi MNF dinhmun zawk ni ta se, kan hlauthawng ngawt ang,” MNF President chuan a ti bawk.

Pu Zoramthanga chuan, “Pathian leh mipui zarah MNF kan sorkar chuan SEDP hmangin kan ram leilung hausakna hai chhuakin chhungtinin kumtin cheng nuai 5, nuai 7, nuai 10 leh nuai 15-te lakluh theihna turin kan inruahman a. Ei leh bara Zoram mipui intodelhtir hi kan tum ber pakhat chu a ni a, ‘Mipuite hi eizawnna ngelnghet leh rethei tawh lo tura siam kan tum’ a. Thalaite khawvel thar kan siam ang a. ‘Pathian leh kan ram tan’ malsawmna chhiar sen loh kan haichhuak ang. Chumi atan chuan hnathawh nan chhungkaw khat tan cheng nuai 3 aia tlem lovin kan tanpui ang che u.

Kan hun hmasa kha Central-ah Congress sorkar lai a ni a, chuti chung chuan sum tam tak sawi chhuakin New Capital-ah khawpui thar kandin a, PMGSY, Bamboo Link Road leh thil dang hmangin Zoram hmun hrang hrangah kawngpui kan lai thlur seng sunga, CH.Chhunga Bus Terminal te, Ch.Saprawnga Truck Terminal te, Bawngkawn to Durtlang kawng te, Millenium Centre te leh thil dang tam tak sawi mai sen loh kan ti a. Tunah chuan Central-ah Congress a sorkar tawh lo lehnghal a, Mizoram mipui mamawh ang chu duh thalin kan sawi chhuak thei ang a, kan SEDP-ah hian sum lamah harsatna a awm lovang,” a ti bawk.

Pu Zoramthanga chuan, “Congress chu Central-ah an tla fai vek tawh a, State inthlan apiangah an tla zel a, a zik la awm chhun Mizoram Congress sorkar hi kum tawp lam Election-ah a zik kan fik hmawk ang a, a tam berah MLA 10 pawh an neih ka ring tawh lo. Kum tawpah chuan India ramah Punjab State-ah chiah an sorkar tawh ka ring. Pathian leh mipui zarah MNF kan sorkar ngei ngei ang tih lo ring rawh u,” tiin a sawi.

Rev.B.Vanlalduha, Presbyterian Pastor pension, ZDF Advisory Board-a Fin.Secy. pawhin thusawiin, “ZDF-in MNF a thlawp nachhan thupui ber kalphung thara Decentralize system rorelna, District sorkar leh tualchhung sorkar dina mahnia ro inrel ve theihna, kan mamawh ang zela budget insiam ve theihna hi Party dangin hman an duh loh laiin MNF chuan policy-ah telh thlapin a lo khung fel thlap a. Chuvang chuan MNF sorkarna siam tura theih tawpa puih chu kan titlu ta a, kan bei zel dawn a ni,” a ti bawk.

Block pahnih Joint Conference hian a hnuaia mi ang hian lungrual takin Resolution an pass nghal :-
1. MNF President Pu Zoramthanga kaihruaina hi kan ring tawk a, a kaihhruaina hnuaiah Zoram pumah leh Hrangturzo constituency chhunga khawtinah MNF-in kumin inthlanah hian hnehna kan chan ngei kan ring a, hemi atan hian theihtawp kan chhuah zel ang.

2. Kohhran leh tlawmngai pawl duh loh Congress sorkarin zu a zuar lui hi na takin kan dem a. Zu zawrh avanga Police leh Civil mi engemawzat an boral hi pawi kan ti a. Chuvangin, he sorkar hi paihthlak ngei kan tum.

3. Zoram pumah leh a bik takin Hrangturzo constituency, Tuichangral inkalpawhna kawng hrang hrangte hi bialtu Minister kan nei reng chung pawha a chhe em em vek hi na kan ti a. Siamṭha thuai turin sorkar kan phut.

He Block Conference hi N.Vanlaiphai khaw chhehvel aṭangin mi tam takin an rawn chhim a, Pu R. Laldawngliana, President, Hrangturzo East MNF Block-in a kaihruai.

(R.LALHMANGAIHA)
Joint Secretary
Media & Publicity Dept
Mizo National Front
Memo No.MNF/Media/01/2018/171
Dt.08.02.2018.

Aside | Posted on by | Tagged , , , | Leave a comment

GERMANY-AH SORKAR HMEL THAR A LANG DAWN TA : ANGELA MERKEL’S PARTY-IN PORFOLIO CHANG THA DAWN LO

Germany General election neih zawhah sorkar siam thei party chak fal bik an awm loh vangin, “Sawhchiar sorkar” (coalition gov’t) a piang leh dawn ta. Chancellor Angela Merkel kaihhruai Christian Democratic Union (CDU) party chuan Social Democratic Party (SDP) an thawhpui dawn a, inremna nei thawkhatin, CDU party hian a hma angin, Cabinet pawimawh an chelh zui thei dawn ta lo.

SDP hotu Martin Schultz chuan, inremna siam tawh niin, mahse, SDP member460,000 te rawnin vote lak a ni ang, a ti. Sorkar hmasaa CDU party in an chelh Finance, Foreign, Labor, Family, Justice leh Environments ministry chu SDP hian an chang dawn a ni.

CDU party mi chak, Finance Minister thin Wolfgang Schauble chu SDP mi chak, Hamburg City Mayor Olaf Scholz chuan a thlak ang. Chancellor Merkel-i hote lam chuan Chancellor, Economy, Defense, Health, Education, Agriculture ministry an chang ang.

Angela Merkel hi ama party atang pawhin sawisel a tawk nasa hle. Merkel-i hian kum 2015-2016 chhungin a ramah Refugees maktaduai 1.2 zet a lakluh vangin, refugee lak luh chiam chiam duhlo pawl Far-rights party te chuan kum 50 hnuah German Parliament rawn luh phahin, zung an rawn kaih chho mek a ni.

SDP pawh hian Indopui 2na hnuah an chet chhiat tum niin, 20% chauh vote an hmu a, CDU pawhin 33% chauh an hmu a ni. CDU hian “Jamaican flags” an tih mai nena tangruala pro-Business ho Free Democratic leh Green Party nen sorkar intawm siam tumin January thla khan an inbia a, an hlawhchham a ni

Author :

Aside | Posted on by | Tagged , , | Leave a comment

Naupang khawngaihthlak, ni eng hua Monroe-i chu


Engatinge Ni hi ka huat bik le?
Naupang dangte ang ka nih loh chhan hi enge ni aw?

Naupan laia infiam nuam i tih thin dan kha i ngaihtuah let ngai em. Kan infiam a, kan tlan a, kan tlu a, kan ṭap a, kan nui leh a. Chuti reng reng chuan hun kan hmang a, ni hi tawi kan ti ṭhin a nih kha.


He naupang kum 5 mi Monroe ve thung hi chu a vanduai a, a vanduai dan hi a thuah hnih thuah thum a ni ber. He naupang duhawm tak hian ni eng huat (solar urticaria) leh UV ray huatna a nei kawp hlauh mai a. A tan khawvel hi a khawlo tak zet a ni. He natna hlauhawm tak hi nizung natna pangngai ang a ni lova, nieng natna a ni ber mai. Hetiang natna nei hi chu nisa hnuaia dah chuan minute 5 lekah pawh dinhmun hlauhawm ah an awm nghal mai thin.


He naupang Nambucca Heads, New South Wales a awm hi nisa hnuaia a awm chuan a chau a, a vualin a durh a, a sen vual tup a. Chu mai bakah luakchhuak, ruhna leh pumna a nei nghal mai ṭhin. Hei vang hian a bik taka siam kawr (UV protection suit) a hak a ngai a. Chu chu pakhat pawh $2200 man ngawt a ni a. A hautak rem rem hle.

Chhunah khawlai a chhuah dawn apiangin a suit tel lovin a chhuak thei lova. A inthuamna tellova a chhuah chuan thih a hnaih nghal mai ṭhin.
Chu chauh a la ni lova, Fluro light bulb pawh a haw tel hi a buaithlak em em a. Tunlai khawvelah fluro bulb kan uar si a. A tan zan chhuah pawh fimkhur a la ngai leh zel tho mai.

Fluro lights.


A chunga mi hi partyna an kal tuma an lak a ni a. An lak aṭanga minute 15 velah chuan a hmai a vung a, a hmui a durh nghal mai a ni. Hetiang hi a nih avangin zanah pawh suit hak a ngai fo thin.
Dawrpui ah pawh a kal tha ngam ngai lova. A nuam tih ber chu thla eng hnuaia infiam a ni.

A dinhmun hi a khirh em avangin an inchhung pawh a bik taka duan a ngai a. A lum lutukin a buai a. Chuvang chuan an inchhung pawh Celsius degree 20 aia sang lo turin an vawng tawp mai a ni.

Chhun enga chhuak ṭha theilo na na na chu inchhungah infiamna chi hrang hrang a zir ve ṭhin a. Skate pawh inchhungah a ti mai thin a. A hak tur hian a bik taka doctor te duan sak kawr a ha a, a chungah school uniform leh kawr dang a ha mai thin.


Monroe hi zanah emaw ni tlak hnu ah tuipui kam ah te a leng ṭhin a. Chu chu a nuam tih ber a ni a. Zanah meichher chhia chhuah te a hrat hle. Zan thla eng lo chhuak hi a tan chuan chhun hun ṭha a ni ber mai. A enkawlna hi a hautak em avang leh amah hi a ṭhan duh viau si avangin a nu leh pa ten ṭangpuina an dil hial thin.

Monroe natna ang vei hi khawvel ah naupang pahnih chiah awmin an hria a. Pakhat chu London ah chengin an pahnih hian an inbe pawp tawh a. An la inhmu lo naa, an thlalak leh video te an inthawn a, an pahnih hian an inhmuh theih hun tur nghakhlel takin an thlir mek a ni.

Author: Vanlalruatliana Renthlei

Aside | Posted on by | Tagged , , , | Leave a comment

US SORKAR AN “SHUT DOWN” LEH DAWN EM? “AN DUH CHUAN ‘SHUT DOWN’ LEH ANG HMIANG MAW LE. KA HMU DUH A NI” -President Trump

Naktuk atangin US Federal sorkar chu “Shut Down” a ni leh dawn em tih chu American-ho ti ti ber a ni leh ta. Spending Bill atan March 23 thleng khi kal pui tur a nih laiin, March 5 ah hian Deferred Action for Child Arrivals (DACA) chungchangah Trump Admin hunbi tiam tawp hun a ni a; Democrats hote chuan DACA chungchang hisawi fel a nih hma chuan “gov’t spending bill” hi pass pui an tumlo niin an sawi.

House leh Senate lam pawh “shut down” thlen nawn loh nan mawngvawm ba ang sekin an buai a, House lamah erawh chuan sorkar khar (shutdown) a nih loh nan House Speaker Paul D. Ryan hovin thu an pass tawh a, 245-182 vote in an chak a, Democrats-hoten“shut down” duh zawngin an vote leh deuh vek a ni.

House Minority (Democrats) leader Nancy Pelosi (California)chuan, “Donald Trump hian policy chiang tak a nei lo” tiin a lo sawisel tawh a ni.

House a thu pass tawh chu, Senate lamah lo pass ve leh 100-60 angin a ngaih vangin, Senate Majority leaders Republican Mitch McConnelli chuan, inbiakna chu tluang takin a kal zel a, inremna turin hmawr kan bawk tep tawh a ni, a ti.

Hetih lai hian White House ah President chu Republican lamin an kawm a, ani pek chu a dinna ngaiah a lo la ding ngur mai a, lung pui lum sawn harsa tak ang mai leh “Sai pui kal lai” ang maiin Immigration leh Border Security chungchangaha ngaihdan a lo sawh sawn duh hauh lova! “Democrats hote chuan Immigration chungchang an ngaihtuah duh lo a nih chuan, an thu thu a ni e; shut down chu thleng leh mai ang hmiang maw le. Ka hmu duh a ni” a ti leh ta hmuk mai.

President Trump hmute zingah Virginia State atanga Republican Congressional member tum 2 thlan nawn tawh, mid-term election a a dinhmun thalo tak Rep. Barbara Comstock chuan, “Shut down awm fo chu a tha lo a ni, tu tan pawh a tha lo ve…” a tih lai mekin Donald Trump chuan a thusawi lo pawt chah sakin, “I duh chu i sawi thei alawm, mahse, Democrat hote thlawpna chu Immigration chungchangah kan hmu rih lo a lawm. Kan ramri kan hung felloh chuan ram kan neilo a ni. Ramri awmlo chu ram a ni lo” tiin. Shut-down hi a thleng leh rup mai thei a ni.

Gov’t Funding bill hi February 8 hi a tawp hun a ni. President-Republicans leh Democrats hote chuan broad budget deal an nei thei lo a nih chuan “shut-down” thleng leh tura ngaih a ni. President Trump chuan sum chu Defense leh Border Security atan hman tam a duh laiin, Democrats hote chuan sorkar hmalakna hrang hrang atan an duh a, domestic leh military an hman duhdan a inhmu theilo a ni ber.

White House Chief of Staff, Gen. John Kelly chuan Capitol Hillah Lawmakers te hmuin, President Trump a ngaihdan a va hrilh a, “President Trump chuan DACA (Dreamers) tan March 5 piah lam pawh sei chu a tum hmel loh a ni. Immigration Policy chu thlawpin DACA ho aia tam daih 1.8 million te chu America khualehtuiah lakluh a duh a lawm. Tunah tak hian DACA anga register te hi 690,000 an ni a, ani chuan 690-1.8 million daihin a ti tam zawk a ni” a ti. Trump hian a thil tum chu sawhsawn mai a tumlo bur niin a lang. Mahse, Democrats hote chu DACA hmangin a kar let ve tlat a ni.

Sarah Sanders, White House thupuangtu chuan, “President chuan shut-down a duh a ni lo. Mite chu an hna (job) theuh tha takin thawk se a duh a ni. Democrats hoten shut-down ah an vau a ni, hei hi Immigration Reforms an duhloh vang a ni. President chuan a fight duh a, a hmasa zawkah pawh kan hria. Hnehtu kan ni a, tunah pawh hnehtu kan nih ngei kan ring a ni” a ti.

Author :

Aside | Posted on by | Tagged , , , , | Leave a comment

Țhasiama Senoneihna Tlang ah tlahlum

Nimin Dt.5.2.2018 (1:30 Pm) vel khan Chungbika Kum 18 Leilet (Myanmar) khua chu a tlahlum.

Chungbika hi a țhianpa nen Sumo chang turin an khua Leilet a țangin Vaphai ah rawn chhoin an motor chan an nghah phahin Țhasiama Senoneihna tlang hi an va en a, Darkar chanve vel an awm hnu ah haw an tum chu mipa lawnna ah chhuk an tum chu a chesual ta mai niin a țhianpa chuan a sawi.

A hnuai kawng thlang ft.15 vel ah a ruang hi hmuh a ni a, a ruang an hmuh hian alo la chatthla lo deuh a, Rev. H.Luaia PCI Administrative Secretary te chhungkua tlang lawnin hmuin Vaphai an rawn phone nghal a, mi tlawmngai leh Pu Luaia te chhung hian a ruang hi an la chhuak a ni.

Țhasiama Seno neihna Tlang ah hian hriat theih chinah tlahlum (Nunna chân)an la awmlo ni a hriat a ni bawk.

Aside | Posted on by | Tagged , , | Leave a comment