I fate ngaihsak rawh

Ni khat chu zirtirtu hian School naupangte hnenah an nih chak a zawt hlawm a, kil khata naupang pakhat a lehkhabu a thil lo ziak neuh neuh hnenah chuan…

Zirtirtu: Nang kha engnge i tih i nih chak han sawi ve teh

Naupang: Cell phone

Naupang dang chu an lo nui hak hak a.

Zirtirtu: Engnge i nih chakna chan ?

Naupang : Ka nu leh pa hian kei aiin phone hi an hmangaih zawk a, lehkha min zirtir hman loh pawhin phone hi chu an khawih hman a, min infiampui hman loh pawhin phone hi chu an khawih hman a, an bula ka mut chak pawhin an phal lova, phone hi chu an bulah an dah reng zel a ni.

Zirtirtu chuan khawngaihna mittui thla chungin, naupang chu a kuah ta hial a.

Nu leh pa te u in cellphone ai khan Lalpa laka in ro chan in fate kha an hlu zawk daih a nia.

Aside | Posted on by | Tagged , | Leave a comment

“THE AMITYVILLE” IN HRÃNG CHU

Author : Andy K Zarzoliana

In hrang kan tih hi mawlmang takin ramhuai chenna in kan ti thei awm e. In chauh ni lo, a hmun hma chawpa hrang pawh sawi tur a awm cheu mai bawk. Chuvang chuan Mizo pi leh pute pawh khan in leh a hmunhma awm dan vel reng rengah puithuna an la urhsun em em țhin a ni. Chutih rualin, mihring finna lo sang zelin ngaihdan thar a rawn vawrh chhuak zel a, huai leh rau lampang bikah pawh ngaihdan a țhlur ta sung mai a ni.
Psychical Research ngaihdan ah chuan thlahrang leh thlarau inlar tam tak hi chu, hun kal liam tawh hlimthla rawn lang nawn leh mai a ni an ti ve tlat mai a. A hunlaia thil thleng ang chiah khan engtikah emaw a rawn lang nawn thin a ni an ti. Hetiang lam zir mite chuan, ‘Video Recording-Ghost,’ an ti a. Chu chu kum tam tak liam taa thilthleng thenkhat chu, Magnetic Particles – Electron vel avangin boruakah thamral lovin chambang ang a, chungte chu a changin mi thenkhatin kan lo hmu ta thin niin an ngai bawk a ni. Chutih rualin, ramhuai zawng a awm ngei mai, amaherawh chu, huai leh hrang nia kan sawi tam tak chu kan dawihzep luata leiah kan hmuh sual leh kan hriatsual vanga kan sawi hran tak pawh tam tak a awm ngei ang.

America ram-ah khuan in hrang leh ramhuai chenchilh hmun nia an sawi hi hriat tur a tam kher mai. Chung zingah chuan, New York khawpui daifem lama Amityville in ropui leh un zet pawh khu hmaih phal chi a ni hauh lo ang le. He Amityville in-hrang hi a hunlai chuan in hrang hlauhawm bera sawi a ni nghe nghe. A building innghahna leilung hrim hrim hi a mak khawp a, fur lai chuan a chheh vela leilung dangte ang lo takin a rawng a inthlak thin niin an sawi a, tin,rim danglam tak a chhuah țhin niin an sawi tlat bawk. Mizo upain “Thlan rim” an tih ang deuh hi a ni awm e.

Kum 1970 hmalam kha chuan Amityville hi hmun reh nuam tak a ni țhin a, kum 1974 a lo herchhuah meuh chuan, Defoe chhungkaw chenna, 112 Ocean Avenue-ah chuan thil rapthlak tak a thleng ta tlat mai a. Zing lam darthum velah chuan silai thuntling ri tih hriat fahran hi a zawnin a puak țhuai țhuai mai a, mi mutreh lai taka thleng a nih avangin silai puahna hmun chu an hre nghal mai lo va. Mahse, silai hmetpuaktu chu Defeo chhungkaw mi pasarih zinga an fapa upa ber, Ronald Defeo Jr a ni tih an hre leh a, chumi zan chuan a chhungte mutui lai chu a kaphlum vek ringawt mai a ni.

Ronald chu Police-in a chhungte a kahhlum chhan an zawt ngial a, vawiin ni thlengin a kahhlum chhan dik tak hriat a ni ta lo. Amaherawhchu, Ronald-a erawh chuan, “Aw danglam tak hian ka chhungte that turin min ti thin,” a ti ve mauh mai a; mahse, thu tlingah pawmsak a ni ta lo a ni. Ronald hi tlangval huaisen leh luhlul tak a ni a, in hnuai ber-ah room a nei hrang a. Chumi hmun ațang chuan mihring aw a hre thin a, chu aw chuan a chhungte tihlum vek turin a nawr thin niin an sawi.

Tualthahna rapthlak tak a thlen ațanga kum khat hnuah US$ 80,000 velin LUTZ chhungkaw mi Pu George-a hnenah tihral a ni a. He in hi Dutch Colonial design-a sak a nih avangin a sum senso a tam kher mai a, a sakna atana an sum senso ngaihtuahin LUTZ Chhungkua chuan tlawm taka an lei avangin vannei an inti kher mai. Pindan paruk a awm a, tuihleuhna hmun bakah Boat-house a la awm cheu bawk. Kawmchar lam chu tuipui kam a nih angin boruak thiang a tleh heih heuh reng a. Hmun reh leh ralmuang tak a ni ngei mai.

Pu George-a hnenah kum khat liam taa building chhunga thil thleng engkim mai chu hriattir a ni nachungin a leitupa Pu George-a chuan a man tlawm vang leh tuipui kam boruak nuam a thlakhlelh avangin a lung a dum hliah hliah zawk a ni ber mai.

Tichuan, 1975, Dec 19 khan Lutz chhungkua chu, chu in-ah chuan an invawm lut ta a.

In chhung leh in hnuai pindan vel an han singsa kual a, a hmasa lama lo cheng Defeo chhungkaw bungraw thenkhat pawh a lo la awm nuam mai a, Radio hlui te, ham-rik te leh pheikhawk hlui te an ni nawk mai. Chhungpui pa ber GeorgeLutz a chu Methodist kohhrana lawi, sakhawmi ve tak a ni a, ani chuan puithiam kohva chu in chu then thianghlim hmasak zet a rilruk a.

Chumi zan ațang chuan tho a rawn puang ta chiam mai a, zan laiah te hian an mutna pindan bangah te an fu kur nguai mai a ni. Nu ber Kathy-i ngaihtha lo chuan a lo hmelhriat sa Catholic Puithiam, Father Ray-a chu an in thar malsawm tur leh then thianghlimna neih sak tur chuan an ruai a. December ni 18 -ah, George leh Kathy te chuan an bungraw rawn ken luhte chu a awmna hmun turah an rem țha mawlh mawlh a. Chutih laiin Father Ray pawh chuan, chu in then thianghlim nana a rawn ken tui-thianghlim chu pindan hrang hrangah a țheh kual țhat țhat a; a chhamphual mawlh mawlh bawk a. Chutia a chham lai chuan, vawileh khatah, patling aw hian, “Chhuak nghal rawh” tiin Father Ray-a chu a rawn ti ta mai a. Father Ray nuam ti lo chuan a chhuahsan a, nimahse, a thil hriat dangdai tak erawh a sawichhuak duh lem lo va.

Chumi zan ațang chuan Father Ray-a chu a dam lo va, a khawsik a sang hle a. A kutphahah chuan pem mak tak (stigmata) hi a lo awm ringawt mai a ni. Father Ray ngaihtha lo chuan aw a hriatna pindan bik chu hnaih miah loh turin George chhungkua chu a chah nghe nghe a. Chu pindan chu, Kathy -in puanthuina hmun tura a lo duan lawk deuh a ni nghe nghe a.

An in lei thar an luah luh ațanga ni tam pawh a ral hmain zanlaiah thawm mak pui pui an hre țan a. An kawngka leh tukverh kalhna chu a lo chhe leh ringawt mai țhin a, siam zin leh a chhe zing ting mai a ni. Mak tak maiin George-a zana a mutui lai chu zing lam dar 3 velah hian tihharhin a awm fo țhin a, kawmchar lama Boat-house lam chu chhan leh vang awm lovin a pan leh ringawt mai thin a ni. A hnu fêah Defoe chhungkuate kha, zinglam dar 3 vela thah an ni tih an hriat hnu phei chuan mak tihnain an khat a ni ber mai. Tin, Chhungpui nu ber chuan mumang mak pui pui a mang ta fo mai a, Defeo chhungkaw thihdan rapthlak tak chu zan khatah țum hnih thum lai hmuh chan te a nei ta hial mai a. A chang chuan, zana a muthilh lai hian, amah chu thlahlel taka pawm vawng vawngtu awm ni hian a inhre tlat mai a, Rilru lam Doctor pawh a pan phah fo reng a ni.

Mak deuh mai chu an fate mut duh dan danglam ta thut mai chu a ni. An in thara an lawi luh ațanga kar hnih hnuah chian bawkkhup zawng hlirin an muhil ta tlat mai a, mut hlima zangthala mu pawh zan rei lamah chuan khawih danglamtu awm ang mai hian an lo bawkkhup leh hlo thin a, a chhan an hre thei mai si lo. A hnuah chuan Defoe naupangte thah an nih lai khan bawkkhup zawnga thi an lo ni hlawm tih an hre ta a, Nu ber Kety-i phei chuan an fate mutdan chu a rap letling hial zawk a ni.

An fanu tlum ber Missy-i chuan an in chhungah an chhungkaw member ni ve lo hmeichhe naupang pakhat a hmu ta fo mai a, mahse, midang chuan an hmu ve thei reng reng lo va. Zan muttui laia Missy-i a han thanharh te hian chu hmeichhe naupang dawldang tak chuan mit khap lek lo hian a lo thlir vang vang thin a, thim karah a boral leh daih thin. Zankhat phei chu, Kathy-i hmuh lai rengin a fanu a khuma a mulai chu feet hnih vela sangah a kang va va ringawt a, Kety chuan mak a ti ngang mai. Missy-i khawihtu hmel chu hmu thei lo mah se Missy-i pindana chair-thuthlengbuk thei an dah chu awmze nei tak hian a su hliau hliau thin a. Chu chair thutthleng chu an rap rilru hle thin a ni.

Ni khat chu George-a chuan an in chhawng hnuaihnung berah pindan rûk a hmuchhuak hlawl mai a. Chu pindan chu rawng sena chei a ni a. Chuta țang chuan thil tuiril mak deuh mai hi a rawn hnam chiam mai a, mak tak maiin an ui khawilai Harry chuan chu pindan chu a hnaih ngam reng reng lo va. Tin, chu pindan chu a rim a na em em mai lehnghal a, a chang phei chuan awmngaihna awm lo hial khawpa rim nat chang a nei hial a ni. Chumi in an luah ațang chuan thil hmuhsual kan tih ang hi an ngah em em mai a. Tum khat chu, George-a chuan, a nupui Kathy-i mu laichu kum 90 mi, pitar cher chhe zet angin a hmu tlat pek a. A mangang chuan a mit a han nuai ngial a, tawk fang hnuah a thilhmuh chu a pangngai leh ta chauh a ni. Zan khat leh pawh an nupa-a mei lum an ai laiin tapchhaka thingthu nung karah chuan lu bung hek huam mai hi a lo letreng an hmu thut mai a, Kety hlau lutuk chu a țap chiam mai a ni.

George-a chuan an in luah chu a hlau thar ta hle mai a, an nupa chuan silvera siam Kross kengin an țawngțai ta chiam mai a, an țawngțai lai chuan an kiangah thawm rapthlak pui pui hriattur a awm reng a. Nakinah chuan an inluah chu thla khat vel chauh an luah hman tihah, luah chhunzawm zel tlaka an hriat loh avangin an tlanchhuahsan ta ringawt mai a ni.

He The Amityville in hrang chanchin hi a darh zau chak viau nghe nghe a, lehkhabu hiala siam a nih bakah, a Film pawh an siam hial a, hralh a tla hle nghe nghe a ni.

Kan sawi tawh angin khawvelah hian thil mak leh ramhuai hnathawh dangdai tak tak hi hriat tur a tam hle mai a, sawi vek sen pawh a ni lawnge!!

Hnampui kan tih ho pawh khuan an lo buaipui nasa thin hle a, Mizote pawh hian hetiang lam hawi chanchin hi sawi tur kan ngah hle awm e. Amaherawh chu, kan rama Jordan lui a rawn luan luh tak chinah chuan hetiang thil hian hmun an chang pha tawh lo mai zawk niin a lang. Chutih rualin, kan țhenawm ram angah te chuan sawi tur tam tak a la awm a ni.

Aside | Posted on by | Tagged , , , | Leave a comment

THLAWHNA TICKET, ENGKIM THLAK DANGLAM TU…

Author : Edwan Chhakchhuak

Delilah chu hmeichhe duhawm tak mai, hmeltha bawk si, nu hnap mai leh smart tak a ni a. Ngaizawngtu pawh a ngah thei hle a ni. Amaherawhchu, Delilah chuan thildang zawng aia a duh chu “hmangaihna dik leh rinawm” a ni.

A duhzawng chu a hmu ta ngei mai….a hming chu ‘Tim’ a ni. Online a intawng an ni a. Tim chu Virginia Beach U.S a khawsa ani a, Delilah ve thung chu Canada a khawsa a ni.

Tim chu Delilah duhzawng tak a ni tehreng ang em….???

Hun leh ni te an ral zela, an in hrechiang tulh tulh a, an inngaina in, hmangaihna tuipuiah chuan an lut thuk hret hret a. Kumsul tam a vei meuh chuan an lo inhmangaih ta hle mai.

Chutiang chuan kum 5 zet social network hrang hrang hmangin hmangaihna kawng chu tluang takin an zawh dun zel a. Delilah pawh chuan Tim a hmuh theihna tur atana pawimawh tak; thlawhna ticket pawh chu a pawisa inkhawl atang chuan alo nei thei ta der mai. Phur takin Virginia Beach, U.S a kal tur thlawhna ticket chu ala a, chumi ni la la a inhmu tur chuan an intiam a, Tim pawh chu phur takin airport lam pan chuan a kal nghal a, inhmuhna tur an sawiah chuan a lo nghak ta ran mai.

Chutia nghakhlel taka a hmangaih Delilah lo thlen hun tur a thlir reng lai chuan Airport T.V a thlawhna accident an puan chuan a thin a thawng kher mai. Thupuangtu chuan Toronto,Canada atanga Virginia Beach pana lo thlawk thlawhna chetsual thu chu thiam takin a puang mawlh mawlh a, Tim erawh chuan lungngai takin leh ngaihnawm ti lem lo takin, a beng a hup a, in lam panin a tlan haw ta nghal a ni. A bialnu chuanna a ni tih a hrechiang hle a, a rilru chu a na hle mai.

Tichuan zan 8:30 a ri ta, thlawhna chesual lo se, a bialnu chu alo thlen a hun daih tawh a ni, hlim takin an inhmu ngei ang le, mahse…………!!!

Tim chu lungngai takin a room ah chuan a lut chho a, chemte a keng a. . . .A va lungngai tak em, sawifiah thiam rual a nilo.

A nu leh pate lo haw chuan Tim; a room a lo let reng chu an hmu ta a, a dulah chemtea invitna an hmu bawk a, a kut ah chuan Delilah thlalak a lo hum ran a, lehkha them ah chuan,”A tlai zo ta kan inhmangaihna” tih alo in ziak a.

Chutiang bawkin Delilah te accident hnu lawk, chumi ni vek chuan Delilah nu leh pate’n Delilah room an singsak laiin a Diary an hmu fuh ta hlauh mai a, chutah chuan Tim thlalak hlir a lo awm a, a Diary kawmah chuan, ” Kan inhmu ngei ang….thihna pawhin min lo dal mahse”. tih a lo inziak a.

An ruang chu an nu leh pate remtihna in, a rualin vuina hunserh hmanpui an ni a, hmun khatah an vuiliam dun ta bawk a ni.

An damlaiin inhmu hman lo mah se, an thih hnu tal chuan inhmu ve tak ang maw..?

Aside | Posted on by | Tagged , | Leave a comment

ȚIAU LUI AH TLA HLUM

Author : Slchhunga Gooner

Lalngailiana (35) s/o Zathanga, Sailulak khua chu nimin April 29, inrinni chhun khan Mizoram leh Myanmar in rina țiau luiah balu an la zo , luia a inbual che sualin tui ah a tla hlum.

Amah hi tui thiamlo, tui cheng ngailo ani a, a tlu sual palh niin tui thuk lamah a lut ta ah an ngai, a kalpuite pawhin a tla laitak an hmulo niin an sawi. A ruang hi he thuziah lai hian hmuh ala nilo.

Amah hi Sailulak VCP Pu Sawmdawnga nau niin, a nupui leh a fate pahnih a kalsan a ni.

Aside | Posted on by | Tagged , , | Leave a comment

ANTHONY JOSHUA AN WLADIMIR KLITCHKO HNEH

Author : Mafela Ralte

Anthony Joshua chuan Wladimir Klitschko chu ROUND 11na ah Knocked out in a IBF belt a humhim bakah WBA leh IBO champion a ni tel ta bawk a ni.


Joshua hian 5th ROUND ah Klitschko hi a knock down a, Klitschko hian 6th round ah a knock down ve thung a, 11th round ah Joshua hian Klitschko hi vawihnih knock down lehin referee chuan match hi titawpin Joshua hi chak a puan a ni ta a ni.


Aside | Posted on by | Tagged , | Leave a comment

PASALTHA KHUANGCHERA PUK LUH THU

Author : Apuia Tochhawng

Ailawng khaw chhak lam atanga thla lo chhuak chu seki tia a ni tawh a, Ailawng khaw naupang pawnto thawm chu thler tinah hriat tur a awm a, luhkapui tlangsanga paho titi laih laih te, lenglen ar khuang ri thliai thliai thawm te chuan Ailawng khua chu a fan vel a.

Ailawng khaw nula hmeltha, unau sal sarih kara hmeichhe awmchhun, an khawnbawl upa fanu Thangtei te inah chuan dan pangngaiin chumi zan chuan Ailawng khaw tlangvalho an buk leh luih tawh a, nghapui suar ân meuha phulraw chhuat tliang hun maia bawk zun zun lah bo lo. Thangtei chuan a bane den chih sa chu vawkchaw belah a chhung lut a, dawl chan sa chuan a khahchih zui zat a. Vawkchaw hawlhna chuan a hawlh rawk rawk a, hmui a kaih chhunzawm leh ta a.

Val Upa Thangchhunga chuan, “Vawiin ka ramvak chu lungpher lui kamah sairil ka la e ka tia, vanneih asiamin sakuh ka kap teh hlauh a, aikam ka man bawk a, chhungtlai zet chu ka man awm e,” a ti a.
Hauchhunga chuan, “Khulai puk khu sawi leh tih a tam ta riau mai, hmanni-ah kan thirdengpa nen kan va ramvak a, puk kawtah khuan chhun chaw kan fak a, ka tirilah hian min tham er er reng mai. Puithuna thil hi ka awih ngai lo a, mahse puk chhung thim mup mai ka va en a, chuta ka thil hmuh chuan ka hmulthi a tiding sung sung mai a ni. Khatia ka va hawi phei kha hmannia sakei seh hlum Aikhuma kha a lo ding reng mai a, kan thirdengpa ka hmuh a, ani phei chu a thidang zui nghal a, a lo harh leh chuan a ranga arangin kan haw nal nal mai a ni. Kan thirdengpa phei saw chu lu kawlh rawtin a nat saw, kan puithiamin daibawlin a thawi a, mahse a la tha chhuak thei lo a nih ber hi,” a lo ti ve a.

An pasaltha Ralchhunga chuan, “In sawi takah chuan hmanni sakei sual Aikhuma sehtu ngei mai kan hual tumin khulai puk bul khu ngawi zawn a ni a, Patheua nen kan tangdun a, puk chhung atangin thawm mak deuh mai hi a lo chhuak a, rul lian pui su thawm ngei niin kan hria a, kan hanngaithla chiang deuh a, rul su thawm ngei mai a ni. Tleng ri hruah hruah thawm kan hria a, kei pawh mi tham ur ur thei a, Patheua phei chu a awm a nuam lo hle tih ka hria a, a za sek mai. Pa thinphut nei lo ve ve kan ni-in ka hria a, mahse min tham dan a na tlat,” a ti ve a.

Thangtei chuan meiling sem kual dan dan pahin, “Chulam ringawt in sawi a, zan kan mu thei lo mai dawn alawm le,” nui her her chungin a han ti a, a ni tak e maw ti-in an thlawhhma chungchang chu an sawi zui ta daih a.

Ailawng thlang lama awm puk nelawm loh zet mai chuan Ailawng khaw titi a siam tam hle mai.Puk bul bul vela ngaw chu chhun pachangah pawh thim rum rum khawpin a un a, ni sat lai ber pawhin a chhun tlangzo lo a, thingte chu Chhura rual rual an ding khung mai a, hrui lian pui pui malpui tia tia a inherh ngen ngun mai bawk a, keiha hling, ramsamkhuih leh sechal hling a la tam em em bawk a, chu ngaw ringawt pawh chu huai nei awma mawi a ni a, tumpangchal leh sele a la awm a, nghalchang leh nghalrual hnu a awm nuk mai bawk a, chu puk atang chuan tui tam tawk tak hi a rawn luang chhuak hum hum mai a, chu lui chuan a thlanga lungpher lui chu a zuk fin a, mahse puk atanga tui lo chhuahna hnar awm reng reng chu an hre thei lo.

Tlai khat chu tlangval pahnih hi hmanhmawh baklengin an lo tlan haw a, “Saphaiin Satkunga a dawlh,” tih thu an rawn thlen a, Val Upa Thangchhunga chuan thil awmzia a lo zawt vel a. Tlangval upa zawk hmulphurh chhe tak chuan, “Puk dinglama awm zaihri thing ding kha kan kit a, a ler lamchu ramtheihai kungah a va in vaw kai a, naupang lawmah tiin theihai chu lawh kan duh a, Kunga nen hian kan zawh phei zai zai a, ramtheihai hmin tuar chu iptepui khat dawninkan lo a, kan hmanhmawh loh avangin theihai kungah chuan thlifim dawn pahin vaibel kan han zu khawmuang leh rih a. Kan let leh chu saphai puka tleng lut chu kan hmu a, a puar viau mai a, Satkunga kan rilru-ah a lo lang rual thawt aniang chu kan han au rual thawt a, mahse chhanna reng reng a awm lo. Thei reh takin a reh vawng vawng mai a ni. Kan kalsan laia a lo dinna hmun chu chiang takin kan han en a, hnim a pe sel sul mai a, a iptepui leh a diar kan hmu a, a pawnven pawh kan hmu bawk a,” a ti a.

Thangchhunga chuan chek tlawk tlawk pahin, “An tlangval neihchhun a ni si a, a va pamhmai em!! Amah chauh hnathawk thei a ni si ale(h)” a ti vawng vawng a.

Satkunga chu an khaw tlangval tlawmngai leh fel tak a nih avangin an khawngaih em em a, a nu leh pa pitar putar mai an ni tawh a, Satkunga chu an eibel ber a nih avangin ani ber a thih chuan an ei bel a keh tihna a ni a, khawtlangin an lainat em em mai a.

Lalpa Sailianpuia chuan, “Saphai chu chah chhuak ila kan that thei anih hlauh zawngin ka seki lainawt hian ka ai anga, tupawh saphai beihnaa thi an awm a nih chuan ka selâ hian ka thisen ang,” tiin thu a chhuah a.

Khawtlang mipui an thinur tlang bawk a, thah an tumruh hle mai. Kel an chah a, a ni khatna-ah chuan a rawn chhuak duh lo reng reng a, a ni hnihna-ah pawh chuti tho. A ni thumna-ah pawh a la reh vawng vawng a, hmun dang a pan tawh a ni ang an ti a, an beidawng lek lek tawh a, a tukah chuan a rawn chhuak ta zul zul mai a, a lian kher maia, a lu lawk chin pawh ui pum tia a ni ang. Khuangchera chuan, “Silai nei zawngin kah rawn vak ila, a la thi lo anih chuan feiin kan chhun rawn vak mai dawn nia,” a ti a.

Puk atang chuan a tleng chhuak kim tawh a, kel chu a pan a, kel chu a hmaa be be thin kha a ngawi hmak a, a aikaih a niang chu che lo chang lo chuan a ding khawng reng a, dawlh a tum mek lai chuan Khuangchera chuan a lu-ah tak mai chuan a kap phirsi leuh mai a, thuntling tih hriat reng reng mai chuan an inruan ulh ulh mai a, chulai ram chu silaikhu-in a bawh zo ta a.

Saphai chu a lo thi chiang ngang mai a, diriam takin an sat sawk sawk a. An lal Sailianpuia chuan a lo tiam tawh ang ngeiin a seki lainawt chuan a ai ta a ni.

Chuta tang chuan sawi a tam leh zual a. Rulpui a la awm tih te, rulfepnei a awm tih te chu an sawi nuai nuai mai a, a bul velah chuan naupang leh hmeichhia, dawihzep deuh chu kal ngam bar pawh an awm lo a.Val Upa Thangchhunga chuan, “Puk khuan hlet a nei angem le?” a ti a, a nei lo ang, nei nise saphai kha a hlet lamah a chhuak ang chu an lo ti a.Puk chuan hlet a neih leh neih loh chu an inrinsiak huai huai a.

Thla arkaiden zan a ni a, Thangtei rimtu an tam leh pek hle mai. Chumi zan chuan pukin hlet a neih leh neih loh mawlh mai chu an sawi a, Suakphunga leh Chawngkunga chu an inhnial bing ta a.

Suakphunga chuan, “Chawngkung nang ang thu haw lam leh kal lam hre lo khan min hnial lo mai teh, nang vanlung meihawl rapkeha thi mai mai tur i puten an tlanchhuak chauh che a nih kha le,
”Chawngkunga chuan, “E!! Suaka kan retheihna hmusit zawnga min chungtlak fo mai le, engmah i pawi ka sawi lo asin,”
Suakphunga chuan, “Chungtlak ang, kumtin maia mi zem kotlanga dak reng in nih hi,” a ti leh a.
“Suaka, kan thlawhhma-in a zir ve ngai lo a, kan thatchhiat vang ngawr ngawr a ni bik lo asin, duhtawk teh ang, ka tlawm e”
Suakphunga chuan, “Min la chhang ngam ka ti, nang hmeithai fapa hmawng hnuaia mi ve mai mai, min chhang duh hlek lo mai rawh, khawnge kan hlap teh ang che,” tih pah chuan rapchunga thingfak chu lain Chawngkunga chu a tin ta ur mai a.

Thangtei chuan, “U Suak, i va zak lo ve, U Chawnga hian a ngaihdan a sawi ve a ni mai a, chu chu tinge i huat? Tianga buaina i siam dawn a nih chuan kan inchhung hi rawn rap tawh lo la ka duh, ka pa phei chuan hria se a beng duh ang che,” a ti ta a.Val Upa chuan tlangvalho hnenah chuan, “I haw teh ang u kan boruakin a zir lo ve,” a ti a.

Zawlbuk an thlen chuan mei an tithim sauh sauh a, Suakphunga chu an sawisa hrep mai a. Suakphunga te chhungkua hi an hausa a, dar hmingthang tak an nei a, kumtin buh kham an thar ziah a, a chapovin thian bulfuk pawh a nei thei lo a, an hausakna a chapopui hle a ni.

Chumi zan chuan Thangtei muhil thei lo chu a let a let a, Chawngkunga zaidamzia leh a dawhtheihzia te kha a ngaisang a, a khawngaih bawk a, a ngaizawng ru ta riau mai a ni.

Pukin hlet a neih leh neih loh inhnial nana tlangvalte tualthu a chhiat phah a hriat chuan Khuangchera chuan , “Ka fiah dawn a ni,” a ti a, a nupui Thanchhumi chuan, “Tih sa loh loh; i thih phah reu reu ange” a lo ti hluk a.

Khuangchera tawngkam chuan khawchhung a deng chhuak thuai a, an lal upa min Tlangkhuma chuan, “E khai Khuanga hi kan khaw daingul leh phaw a ni a, chuti maia thi tur chuan ka la phal love,” a ti a.

An thenawm khawvengte chuan lut lo turin an ti a, mahse Khuangchera tum chu an sawhsawn sak thei chuang lo. Milunglian a ni miau a.

Khuangchera chuan mau roin meichher pasarih a siam a, chumi ni tukthuan eikhamah chuan puk lam chu a pan thla ta a, a liam tur chu Thanchhumi chuan tap zawih zawihin aum a, lut lul suh a ti ngawih ngawih a. Mi thahnem fe chuanKhuangchera chu an zui bawk a.

Khuangchera chuan meichher a chhi a, pukah chuan a lut ta a.Thehhmeh ang vawng vawngin a reh a, puk atang chuan bak tam lutuk mai chu an rawn thlawk chhuak a, an val upa Thangkima chuan, “Kan pasaltha kan chan ta,” a ti chuai raih a.

Ni a vanlaizawl a, Khuangchera lah chu a la reh vawng vawng mai si a, a thih an ring deuh vek a, chu puk chu an râp a ni. Khua a tlai hret hret a, Khuangchera lo chhuah leh beisei deuh reuh, beisei ngam tak tak si lovin an awm a, tlangval pakhat chuan, “A ruang hlawm tura luh chu ka ngam lo,” a ti a.

Lo sul haw hunah chuan an piah lama au thawm an hria a, Khuangchera rawl ngei a ni tih an hriat chuan an pan phei hum hum a, ani chu chau tih hriat takin puk hlet kawngka-ah chuan a lo thu kun lap a.
Zawhna a tam ngei mai, “Enge i hmuh..rulfepnei chu a awm tak tak em? Rulpui chu i hmu em?” tih te chu an zawt nuai nuai a, mahse Khuangchera chuan, “A thim hle mai, meichher chhit theih a ni si lo a, a khawharthlak mai chauh a ni,” a ti duh chauh a.

In an thlen chuan Khuangchera chu a khua a sik zui a, a tawngvai bual bual reng a, thlanfimin a bual a, chumi zan chuan a na buai hle mai a, tuivawtin an leih reng a, an puithiam chuan daibawlin a thawi a..thenawm khawvengten an tlaivar pui a.

Thla hnih zet lu kawlh rawta a na chu a chhe kawk kawk mai. An lalpa Sailianpuia pawhin a rawn kan a, chutiang chuan a damlo chuan khawtlang a nghawr a..a damloh natem avang chuan engemaw hmuh a nei ngeiin an ring a. Puk chu an tih leh zual sauh a ni.

Puithuna atthlakin a la tuam laia he puk a lutchhuak ngam hi mi namai lo a nih zia a tilang chiang hle awm e.

Khuangchera a luh hnu kum za sawmnga velah Bombay Youth Adventure ten oxygen, headlight, hruizen bagul vuah te, doctor nen lam an rawn thawk a, hemi ni hi kum 1985 Febuary ni 12, dar 2:20PM ah an lutchhuak a, a sei zawng hi 119 metres a ni.

Hemi hma kum 1975 Mizoram UT kan nih hlimah Pu Darthawmchhuaka Nagaland state-a Agriculture Superintendent chuan Ailawng YMA chu phungbawmah rawn sawmin Petromax nen Torchlight nen luhchhuah an tum a, mahse thui pawh an kal hmain an petromax mantle a tla hlawk a, an torchlight bulb a keh hmak a, an let leh ringawt a. Khuangchera hnu-ah chuan Bombay Youth Adventure ten an rawn luhchhuak ta a ni.

Aside | Posted on by | Tagged , | Leave a comment

KOLODYNE THUNDER BIKER ZINGA PAKHAT LUNGZARHTUM SELE IN A BEI – Vanneihthanga

Vawiin chawhnu dar 2 vel khan Kolodyne Thunder Biker-te leh Bullet Club hrang hrang member te chu Bualpui Ng-a Shalom Mission Home tanpuina pe turin an feh chhuak a, kawnga an tlan laiin an zinga rider pakhat chu Lungzarhtum Sele chuan a bei thut mai a. Rider hian a banah hliam na tak a tuar a, ngaihtuahawm erawh a ni lo hlauh.

Sele in a beih hi James Vanlalhriatchhunga Lawngtlai Chanmari veng a ni a. Lawngtlai Bullet Club member a ni. Vawiin khan Shalom Mission Home tanpuina pe turin rider engemaw zat te nen Bualpui Ng an pan a. Lungzarhtum ram chhung an tlan laiin Sele hi kawngpuiah rawn lang thutin James-a bike khalh lai chu a bei a, a ban ding lam, kiu chungah feet chanve zetin, thuk takin a tai thler a ni.

.
James hi Bualpui Ng PHC panpui nghal a ni a, a hliam te thui sak nghal a ni a, ngaihtuahawm a ni lo niin thudawnna chuan a sawi.

Shalom Mission Home tanpuina hlan tura kal te hi; Aizawl Thunder Club member te bakah Aizawl Son’s of God te, Hnahthial 54 Riders, Lunglei Royal Knights, Lawngtlai Bullet Club leh Saiha Kolodyne Thunder Club te an ni a. Rider 54 an ni.

Helai hmuna Sele chal awm hi a hlutawm viau rualin khualzin vei vakte leh tualchhung mite tan pawh a hlauhawm thei viau mai a. Awmze nei leh tha zawka enkawl dan tur hi thuneitu ten an ngaihtuah ran a ngai hle a ni.

Aside | Posted on by | Tagged , , | Leave a comment

PRESS RELEASED NO.8 OF 2017 KUM 2018 MLA INTHLANAH MNF PARTY A MAL DIN DAWN

MNF Party President Pu Zoramthanga hi kan ring tawk a. Mi taima, Pathian tih mi, mi inngaitlawm, saptawng thiam leh mi biangbiak thiam a ni a. Tin, India Sorkar leh MNF inremna neitu a ni a. Central Sorkarin a thu leh hla a ngaipawimawhin a zah a. Pu Zoramthanga kaihhruai MNF party Policy (SEDP) hi Central Sorkar Development rilrem leh duhzawng tak a ni a. MNF kan sawrkar chuan Zoram mipui tan hmasawnna ropui tak a thlen dawn a ni.

Kum 2018 MLA General Election-ah hian MNF Party, Pu Zoramthanga kaihhruai hian sawrkarna kan siam ngei dawn a. Kan sawrkar laia Zoram hmasawnna, Pu Zoramthanga hnathawh zawng zawng te kha Zoram mipui hian kan la theihnghilh lo a ni. BJP Party in an mithar lawmluh, MNF mi leh sa an tih te hi a theih ang angin kan finfiah a, belhchian a dawl lovin dawt vek a ni. MNF Party hi “Pathian leh kan Ram tan” ti tu ‘Hnam Party’ a nih angin, Kum 2018 Election-ah hian Siaha District-a kan note MDF Party bak tu Party mah kan thawhpui dawn lo. Mizoram, Nagaland, Kristian tamna State-ah te hian ‘BJP an sawrkar ngai dawn lo a ni’ tih Central BJP te hian an hrechiang em em a. Chuvang chuan, BJP hmelma Congress paihthla tur hian Tualto Party thianah min siamin, NEDA kaltlangin thawhho puiah MNF Party te pawh min sawm a, kan tang ho mai a ni. Mizoram BJP te hi sum leh pai it vanga BJP ve mai mai an nih zia, Central BJP hruaitute hian an hrechiangem em a ni.

‘PATHIAN LEH KAN RAM TAN’

Sd/-
LALNUNZIRA PACHUAU
General Secretary
Information & Publicity Deptt.
MNF Sub Headquarters, Lunglei.

Memo No MNF/SHQ(L)/Info/2016-2018/46 :
Dated Lunglei, the 28th April 2017

Copy to:
(1) Editor, __________________ News Paper/Cable TV, in chanchinbu/Cable TV zahawm takah min tih chhuah sak turin.

(2) Office File.

(LALHMINGLIANA SAILO)
Secretary
Information & Publicity Deptt.
MNF Sub Headquarters, Lunglei.

Aside | Posted on by | Tagged , | Leave a comment

KUM 25 THING LEH THING HNAH EI TAWH, DAMLOH A NEI NGAILO

Author : Kiddy Vanchhawng Vanchhawng
Apr 23, 2017

Khawvelah hian mi mak tak tak sawi tur hi an tam hle mai a, he thu hi vegetarian lam tan chuan hriat a nuam ngawt ang le!

Pakistan ram Punjab bial a pa pakhat chuan tun kum 25 man chhung khan Thing hnah hring tharlam leh leh Thing (woods) alo ei tawh a, hritlang khawsik damloh ala nei chhin eih lo.Mehmood Butt, kum 50 mi hi Gujranwala district, Punjab province lam mi a ni a. Kum 25 mi anih lai atang in hnathawh mumal a neih loh avangin chaw ei tur mumal a nei lova chuvang chuan Thing hnah tharlam leh a kung ei hialo ching tan tawh a ni.

Butt hian, “Kan chhungkua hi kan rethei em em a. Engkim mai hi kan nghei a ni deuh mai a, ei tur pawh hi ka hmu mumal lo a ni. Chutichuan khawlaia kutdawh a vah teh ngawt ai chuan thing ei mai pawh a tha zawk e, tih ka ngaihtuah ta a ni,” a ti.”Tunah hi chuan Thing hnah tharlam leh thing ei hi ka habit tlat tawh a ni,” tiin Butt chuan, ‘The News International’ a hrilh.

Kum engemawti kalta ah khan hna te hmu ve in, chaw mumal taka ei tur pawh a nei ve theih tawh a,mahse a thil eithin danglam tak chu a ei chhunzawm ta zel tho niin report chuan a tarlang.

Butt hian a Sabengtung Tawlailir hmanga thil thiarin nitin Rs 600/- a hlawh a, damloh a nei ngai lova, englai pawh in thing hnah leh thing tharlam ei tur a melh reng thin a ni.Ama sawi danin Banyan, Tali leh Suck Chain thing te chu a favorite an ni.

.
A thenawmpa, Ghulam Mohammad chuan, “Damdawiinah kalin doctor a rawn ngai lova, engtin nge kum heti zat mihring hi thing hnah leh thing ei in a damloh ngai loh tih hi mak kan ti takzet a ni,” a ti.

“Enghunah pawh kawngsirah a tawlailir a tiding ang a, thing hnah leh thing zar a ei mai zel a ni,” a ti.

Butt hi an chhehvelah chuan miin thing hnah leh thing a ei a, a damlo ve ngai silo an hmuh thin avang hian a lar hle niin report chuan a sawi.

Aside | Posted on by | Tagged , | Leave a comment

French Open ah lawmnan tipung dawn

Author: Francis Da Gunner
Kumin French Open lo awm turah an lawmman sum dawn tur chu 12% a tihpun a ni a, mipa leh hmeichhe chak berin 2.1 million euro an hlawh dawn a, nikum aiin 100,000 euro in a tam dawn a ni.

First round a tla ten 35,000 euro theuh an hlawh bawk ang.Roland Garros director Guy Forget chuan lawmman atana an sum ruahman 36 million euro hi nikum aiin 4 million eurovelin a pung a ni tih a sawi.

2017 French Open hi May ni 28- atanga June ni 11- thleng awh tura ruahman a ni.

Aside | Posted on by | Tagged , | Leave a comment