SANGAU LEH A CHHEHVEL KHUATE POWER SUPPLY NEIH LOH CHUNGCHANG LEH CURRENT BILL CHUNGCHANG AH P&E SE TAWNGCHHUAK

Dated Sangau The 21.5.2017 :
Thla ralta May thla chhunga Sangau khua leh a chhehvel ten chawlhkar 3 zet Power supply an neih loh chungchang leh current bill tam uchuak anga lang chungchangah Pu Zoliana SE Power & Electricity Deptt. Lunglei chuan, “Committee a hran liau liau in ka ko mek a, Kan lo discuss dawn e” a ti.

Pu Zoliana SE chuan “Tuna Bill an hmuh hi chu April thla Bill a ni” ati a. May thla chhung a chawlhkar 3 lai current an neih lohna Power Supply Bill chu a la chhuah loh thu a sawi bawk niin Sangau khawtlang aiawh a dawrtu Pu H.Rammawi, Ex Minister chuan Chhawkhlei Times palai a hrilh.

Thla ralta May thla chhungkhan Sangau 132 Kv sub stationin a chawm Sangau leh a chhehvel khaw engemawzat ten chawlhkar 3 lai power supply an hmuh loh chungchangah leh power supply bill tlem chuang si lo anga lang chungchangah Consumer Protection Assn. Sangau te leh VC NGO Joint committee te chuan inthurual a Power Supply bill pek loh an tum thu an lo puang tawh a ni.

Source: Chhawkhlei Times (Sangau)

Aside | Posted on by | Tagged , | Leave a comment

I LO HRE VE TAWH NGAI EM LE? ROMAN CATHOLIC ȚOBUL CHU

Roman Catholic hian kohhran hmasa ber leh bulpui ber an nih thu hi an inti-ta neih bur mai țhin a, chutia insawi țhin ta na ná nà chu mi tam ber te hian an ni tak tak ta emaw ti hian kan pawmpui chu a nih ták hlawm hi maw! tir’u maw? A nih leh chutianga an lo insawi dan ang tak chu a lo ni tak tak réng em ni le? nge ni-a an insawi dan ang hi an lo ni hauh lo zawk tih chu hre turin i han proof dawn teh ang u hmiang maw leee!

Chhiar chhuak vek r’u aw? Chutilo chu Roman Vatholic hote hian an chhaih buai an chhaih buai fo mai dawn che u nia. Fimkhur hi a ngai teh mai a nia…I lo thlir teh ang..

Roman Catholic pawl lo pianchhuah dan hi hriat sual a awl a, sawi dan chi hrang pawh a awm phah a ni. Anmahni zinga mi țhenkhat chuan, Roman Catholic kohhran hi, Lal Isua din kohhran kal zel niin an insawi a. Protestant mi țhenkhat, Roman kohhran chu kum zabi 16-naa kohhran siamțhatna a lo thlen hnua mi chauh niin an sawi ve thung a. Hei hi chu a engamah hi a dik tawk lo ve ve. Roman Catholic lo pianchhuah dan chu hetiang hi a ni.

Lal Isua thawhlehna thiltihtheihna leh Thlarau Thianghlim lo thlen avanga kohhran lo ding kha Romqn Catholic kohhran a nilova, Protestant kohhran a ni hek lo. Khatih lai khan an hming pawh hi hriat a la nilova, tuma’n an la lam ri ngai lo. Lal Isua din kohhran chu “Kohhran” a ni mai a ni.

Chanchințha a darh zau zel a. Kum zabi khatna tawp hmain Asia khawmualpui bakah Europe khawmualpui a thleng hmana,(T.T.16:6-15). Rom khawpuiah kohhran a dingbjman a ni. Mahse, chu chu Roman Catholic kohhran anilova, Rom khaw ‘KOHHRAN’ a ni.

Hun a lo kal zel a. Kohhran chanchinah ‘Catholic’ tih hming hi a lo lang ta a. Kohhran inkhawmpui lian hmasa ber chu AD 325 khan Naisia (Nicea) Khuaah a awm a. Zirtirna dik loin kohhran a rawn nawk buai avangin chu inkhawmpui chuan kohhran nihna leh awmzia a sawifiah a. “Kohhran chu One Holy, Cathiloloc & Apostolic church” a ti ta a ni. Heta țang hian kohhran nihna sawinaah ‘Catholic’ tih hi a lotel ta a; chu chu ‘Huapzo’ tihna a ni. Mahse, tuna Roman Catholic kohhran hi a la ni chuang lo.

Roman Catholic kohhran lo piannchhuah dam chu hetiang hi a ni. Khawchhak leh khawthlang lamah kohhran chu a lo dath zau zel a, kristian an lo pung tial tial a, thil danglam a lo awm ta a ni. A ram leilung a hran ang bawkin Lal hrang an awm a; lal an hran ang bawkin țawng a hrang a,; boruaka danglam ang bawkin hnamzia a danglam a; hnamzia a danglam ang bawkin ngaihdan a damglam a. Chu ngaihdan danglam chuan kohhran a hngawng a, thurin a khawih ta a ni. Chu chuan kawng tam takah rilru hranna leh inpumkhat lohna a thlen a. Chu chu kohhran awmdan tur a ni lova, thil țha a nilove tih hriaain nana takin inpumkhat leh turin an bei a; mahse, a sáwt ta lo a ni. Kum 1054-ah chuan a vawrtawp a thleng a. khawvelah chuan engtik mah a inpumkhat leh ngai tawh lo turin khawchhak leh khawthlang chu an lo ințhen ta a ni.

Tichuan, chu ințhenna chuan kohhran hming dang a rawn awmtir ta a. Khawchhak lam kohhran chu Greek țawng hmang leh kohhran lo pianchhuahna bulpui a ni bawk a, “Greek Orthodox kohhran” an ti a. Khawthlang lam chu Roma ațanga inawp an ni bawk a, “Roman Catholic kohhran” an ti ta a ni. Chu tak chu tun thlenga ‘Roman Catholic kohhran’tih hming lo pian chhuah dan chu a ni (M.E.Gibbs-From Jerusalem to New Delhi-P.75).

Amaherawh chu hei pawh hi “Roman Catholic kohhran” tih hming pianchhuahna mai a ni a, tuna kohhran pawl hrang, Roman Catholic kohhran hi chu a la ni chuang lo. Khawchhak leh khawthlang kohhran sawi hranna hming mai a a ni. Kohhran hrang amg pawhin an inngai lova thurin lamah ngaihdan inang lo mah se, rindan diklo-ah an inpuh hek lo. Kohhran pakhat chhunga ngaihdan hrang angin an inngai a; kohhran pakhat chhungah an inkhung veve a ni.

Hun a lo kal zel a, Pope kohhran zia a damg ta. A kal tisa tual tual a, Bible zirtirna nen a inpersan tial tial. Chûng thil diklo chu siam țhat tumin P0pe kaihhruaina diklo sawi lang ngam mihuaisen an lo chhuak a. Mahse, chúng mite chuantuarna an lo nei ta. John Huss-a phei chu Pope thupek ang ngeiin an hál hlum ta a ni. Mahse, chu chuan mite thinlungah kohhran siamțhat a țulzia a tilang chiang tial tial. Kohhran chhunglam ațanga insiamțhat tumin, kohhraninkhawmpui lian (General council) pawh țum 3 (Pisa-1408; constance-1414-1418; Basel-441-1449)an ko va; Pope dinglaite pawh bànin a thar an thlang țha ngial naa, a lo kal sual thui tawh em avangin an siamțha thei chuang lova, inkhawmpui lian ngei pawh chu a hlawhchham ta a ni.

Tichuan, kohhran chu a tirah dik mah se, puan var tak maiabawlhhlawh kai ang mai hian, Pope kaihhruaina hnuaiah chuan a lo bawlhhlawh zo a, siamțhat a lo ngai ta a ni. Siamțhat a țulna chu tam tak awm mah se, a tlangpui chauh tarlang ila:-

1. Pope-in bible nena zirtirna nena inmil lovin thuneihna a chuh a, lalte chunga thuneih a tum.

2. Sum duhna a nasa. Sum hmuhna’n Bible zirtirna kalhin ngaihdamna lehkha (Indulgence) a zuar.

3. Mary ngaihsanna a zual a. Bible zirtirna bákah kalin, Mary chu Pathian nu, sual kai velo angin an pawm.

4. Bible zirtirna thudik Rinna avanga thiamchanna leh Ringtu zawng zawng Krista zara puithiam nihna an sawi bo.

5. Lal Isua thupek bákin Sacrament pa sarih an pawm a, chhang leh uaiin pawh Krista taksa leh thisen tak tak angin an inzirtir.

6. Thih hnua meia inkan thianghlimna an ring.

7. Pope leh puithiamte diklohna a hluar a, khawvel lamah an tlan nasa.

Hengte avang hian thlarau mi tam takin kohhran kal dan chu țha an tilova, an ngaithei ta lo a ni. A chhung ațanga siamțhat tumna pawh a hlawhchham tawh si a, a theih angangin siamțhat a ni ta a ni. Siamțhatna lama thawkrim zualte chu, John Huss-a leh Wycliff-a te thihhnu chuan, Luthera lrh Calvin-a leh Zwinglia te hi an ni ta a ni. Chûng mite hnathawh dan chu a dik nia hriain lalte pawhin an țan a. Pope-in kohhran a kalpui dan diklo chu an protest ta a. Chú tak chu protestant hming lo chhuahna hi a ni ta a ni. Tichuan, kohhran kal dana diklo awm chu huai taka an lo protest avang chuan, kohhran siamțhatna a lo thleng ta a ni (M.E.Gibbs-From Jerusalem to New Delhi P.147-148).

Tichuan, kohhran siamțhatna a thlen hnu chuan, ințhenna a awm leh a, hming thar pawh a piang leh ta. Dik lo taka kaldan dodal leh hnial ngamtute chu, ‘Protestant’ an ti a; chu chu “Siamțhatute” tihna a ni. Chú mi te epa kal, kal dan hluia kal zelte chu “ROMAN CATHOLIC KOHHRAN” chu a ni ta a ni.

Hei hi tuna kan sawi duh tak Roman Catholic lo pianchhuah dan tak chu a ni.
Chûvang chuan an nihna dik tak sawiin, Roman Catholic kohhran siamțhatna (Reformation) awm hnu-a Protestant kohhran kalhmang kalha ding an ti a ni (F.L. Cross- Oxford Dictionary of Christian church- P.1194).

Tichuan, pawl hrang anga ding, Roman Catholic kohhran chu, Lal Isua din kohhran kal zel nilovin, kohhran siamțhatna lo awm hnu-a kohhran pawl hrang hming pakhat ve mai a ni.

Awle, khita țang khian Roman Catholic hote’n bulpui ber ni-a an lo inchhàl ve țhinna chu a lo diklo hle a ni tih chu kanhmu thei ta a. Lal Isua din kohhran hmasa ber, AD.30. kuma Jerusalema din chu an lo ni lo chiang hle tih chu laihlanin a awm ta a ni.

Nmm, remchangah Roman Catholic kohhran thurin chi hrang hrang te chu kan la lepse leh leuh dawn nia. Lo tlanbo hla suh u khai! A chhiar ve lo lo kha chu lenlai chán in ni mai!!!???!!!

Author : Tluangtea Chhakchhuak    

Aside | Posted on by | Tagged , | Leave a comment

RTE ACT KALHIN SSA ZIRTIRTUTE MIZORAMAH CHHAWR THIN AN NI

2010-11 leh 2015-16 inkar khan, Mizoram SSA Mission chuan Right to Education (RTE) Act-in a phal loh angin zirtirtu atana lak eng emaw zat chu an chhawr.

RTE Act chuan, zirtirtu atana lakte chu chhiarpui, inthlan leh chhiatrupna a thlena chhawmdawl hna thawh bak zirna kaihhnawih loah chuan chhawr a khap. Chutih laiin, School Education department-in SSA Mission hnuaia primary school leh upper primary school (middle school) zirtirtu atana an lak eng emaw zat chu zirna kaihhnawih ni loah an chhawr a ni.

Zirtirtu atana lakte hi coordi­nator, project assistant, data entry operator, additional state project director, deputy district project director, block/cluster resource coordinator, project assistant leh thil dangahte chhawr an ni.

Kum 2010-11 leh 2015-16 chhung vek hian RTE Act-in a phût, pawmpuina la loin primay school leh upper primary school eng emaw zat chu kalpui a ni.

Phalna nei loa sikul kalpui a nih dan chu, kum 2010-11 ah sikul 54, kum 2011-12 ah sikul 47, kum 2012-13 ah sikul 55,kum 2013-14 ah sikul 60, kum 2014-15 ah sikul 58 leh kum 2015-16 ah sikul 101 a ni.

Source-Vanglaini 5/06/17

Aside | Posted on by | Tagged , | Leave a comment

Mizo sakhaw kaihhnawih Sakung Phun atanga Khuangchawi thleng a Mizo sakhaw kawngkal chipchiar by Muantea Zofa

Zawhzazo awmzia.
Thangchhuah tura kalkawng.

Lusei tlangval nei nung tak indang sela, a sakhaw biak dan tur kawng kal zawng zawng chu hetiang hi a ni ang ;

1. SAKUNG: Hei hi sakhua han siam tanna a nih avangin Sakung an ti a ni. Vawkpa mal talh tur a ni a, an thiam hla atang hian an biak chu a hriat theih deuh awm e:
Sa in aw ka sa hrial lo chhang ang che.
Sakunga thovin ka sahrial lo chhang ang che.
Thlanchhaka thovin ka sa hrial lo chhang ang che.
Thianthlanga thovin ka sa hrial lo chhang ang che.
Khawlaia thovin ka sa hrial lo chhang ang che.
Kawtpuia thovin ka sa hrial lo chhang ang che.
Leiruta thovin ka sa hrial lo chhang ang che.
Lailawia thovin ‘
“Thawhhmuna thovin “ “
“Bualchhuma thovin
“Chumchiha thovin “
“Zinglaia thovin “ “
“Chhuatphova thovin “
“Chhuatcheha thovin “ “
“Mualliana thovin “ “
“Lenpuia thovin “ “
“Tuala sa lu tar ho chuan “ “
“Muchhipa thovin “ “
“Mulena thovin “ “
“Fuanthara thovin “ “
“an la ti leh a ni.

2. CHAWNG : Hetah hian vawk pa pahnih leh Vawkpui pakhat a talh ang a, vawk pa talh hla chu thuhmun, vawk pui chu naupangho tan mual buh atan theh tur a ni. Zu chu ngan 40 sak tur a ni, chu mi tur chu nula leh tlangvalin an deng ang a, chu mi aiah sum deng zu, ngan 7-in vawi hnih a theh tur a ni, thing ek zu ngan 7 bawk vawi khat a theh tur a ni.

3. DAWINO CHHUI :
( 1 ) Pathian} : Hei hi vawk te ve ve ni khata talh tur a ni.
(2) Hnuaite} :
(3) Lasi ; Hei hi vawkte bawk a ni a, sa kah leh sa awh lama hmuingil theihna tur a ni ber.
(4) Chung : Hei pawh hi vawk te bawk a ni a, thingkhawn chung ditipah a in an sa thin, a bangah chuan thlanvawng a tel ngei tur a ni. Ni atanga malsawmna te, ruah atanga malsawmnate awmtirtu chu tihlungawi tumna a ni ber.
(5) Vansen : Hei hi ar-hlui-sena biak tur a ni a, van chhumdum leh chhum sen karah malsawmna awm thei tur chu dilna a ni. Tuium hunna chung ditipah a serh an pe thin. Heng hi ni khat zel hnathawk lova sert tur a ni theuh.
(6) Hnuaipui : Hei hi vawk puia biak a ni a, lei thuah sawm atanga thuah tina malsawmna awm tur chu dilna a ni. Kawmchar thlang lam kil ban bulah an talh a, a lu leh a serh dangte thuk takah an phum thin. A sa chu ni thum chhunga ei zawh ngei tur a ni a, ei bang chu paih mai tur a ni.

4. SEDAWI : Hei hi Sial talh hmasak her a nih avangin Sedawi an ti a, se pa tuai leh vawk pa an talh thin. Vawk pa chuan Sa bawk kha an bia a, sial hian erawh chu Khua an bia a ni.
“Chu mi biaka Khuain ka Chalvawm lo chhang ang che.
Pi Biaka Khuain, Pu Biaka khuain,”
an ti a. A chhuntu pa chuan ka chhun tirhna ni rawh se, ka lam tirhna ni rawh se, a ni a thla lovin, a kum a kipin ka chhun ang, a ti a. se pa zakdawh takah chuan feiin a han chhun zak a, in chhungah a luhsan ta vang vang thin a ni. Hei hi ni sarih serh tur a ni.

5. DAWINO : A chhui leh ang, Nambar 3-na en la.

6. SEKHUANG : Hei hi Sechal ki kheh tawh a ni Vawkpa pahnih a tel bawk a. Vawk chuan, Sa, sial chuan Khua an bia a. He mi tum hian mitthi rawp an lam thin. An chhungte thi tawh zawng zawng kha an lim an din a, chu chu mualah an lam thin a ni. Hemi tithei tawh hi chuan diar a tialin puan a tah tial thei tawh ang a, a inah tukverh a hawng thei tawh ang.

7. SEDAWI : A chhun leh ang a, dawino kha a chhuileh bawk ang. No. 3-na leh 4-na ang khan a tikim leh rih ang.

8. KHUANGCHAWI : Hei hi thangchhuahna chu a ni a,sepa 2 leh sepui pakhat, vawk pa talh tur a ni. Sial chuan Khua an bia a, vawk pa chuan Sa an bia a ni zel a, sepui kha chu tlangphal an ti a ni. Tun achinah chuan a inah bahzar te a siam thei tawh ang a, thangchhuah pa, pa ropuia ngaih a ni tawh ang. Mi nei zo, rual khum turn tak chuan khuang vawi 3 te an chawi a, zau an dawh a, chu chu Mizo tih theih sang ber a ni ta.Hetianga zau dawh thei chu Mizoramah hian an awm zeuh zeuh chauh a ni.Hetiang thangchhuah hi chu mitthi khua-ah pawh faisain an chawm a, an nuamsa reng reng tawh a ni, tia ngaih an ni. Sa leh Khua hi kan lo be ve ve tawh a, kan kai kawp a, “Sakhua” kan ti ta a lo ni ber a

Source : Mizo Chanchin by Rev. Liangkhaia
(Hei aia chipchiarin Pu K. Zawla te, Pu Vumson te, Pu B.Lalthangliana te’n an ziak).

Aside | Posted on by | Tagged , | Leave a comment

I LO IRIDIUM VE PALH ANG E by Hriata Chhangte

Iridium leh pawisa hlui chungchang.

Zanin chu Mizoram lama ka thianpa pakhatin…Hriata, Kolkata khawpui ah khan Mizo thenkhat ….. THIL HLU LUTUK buaipui an cham ve mek a, tutu te emaw thenkhat ( Hnamdang pawh nilo, mahni Mizo puite ngei chu Sum thawh/ Invest ve tur a sawmin, ni hnih khat chhung lek a CRORE tel a hausak thut theih niin an sawi ani awm e), nang i parawl lai ani bawk a lo va zir chiang teh khai…min rawn tih avangin ka va zawng chhuak mai a. invest ve duh niawm takin , uluk tawkin an THIL HLU LUTUK chu kan han inzawt ta a.

A mipa zawk chuan intih rinawm nan ti niawm fahran hian English nal ang reng tak chuan….min hrilhfiah an tum phawt a. Kei chuan… thianpa, English aiin Mizo tawng ka thiam zawk asin.. tin, nang aiin English pawh ka thiam zawk ka ring…..ka tih hnu chuan Mizo tawng chuan kan inzawt chho ta zawk a.

An thil hlu lutuk buaipui chu.. IRIDIUM hmanga Metal Coins hlui , hmanlai Metallurgical Technology a kan la san hmaa coins chi hrang hrang chhe har tur hisap a Iridium powder chu tih chan nana an hman thin, THIR NAWI ( Coins / Lockets etc ) te chu an THIL HLU LUTUK , a crore tel a an hralh tur chu a lo ni ta daih a. Ka nuih pawh a za lo, ka thin a rim nghal thut a mahse ka la insum a. Iridium chu eng nge a nih a, chuti fakauva a to nachhan awm te , engtin nge an hralh dan turte ka zawt leh a. A hmeichhia zawk chuan Iridium chu Radio-active metal a ni a, khawvel ah hmuh tur a vang tawh em em a, keini hi kan vannei a, Pathian zarah tak meuh meuh , Bangladesh lamah chutiang thir chu British sawrkarin an theihnghilh tam tak chhar tute’n min rawn be fuh hlauhva, chungte chu Kolkata ah hian lei duh an awm a…. a’n ti chho ta malh malh a. Ka thin chuan a tuar ta lova…

“Ka pi, Mining Engineer ka ni a, IRIDIUM chu Mizo zingah pawh a hre ve ber pawl leh hnimhnai ber pawl ka nih ka ring. Radioactive material an tih Uranium , Thorium ang chi te reng reng hi chu maw.. chutia nangni ang bawrin a zawrh kual a ken chi a ni lo hrim hrim. Kei chu min bum thei dawn chuang lo va, mahse bum theih a nual nual chu in neih ka ring. Tuna in buaipui ang chi buaipuitute hi ka tawng fo tawh mai…. ka tih khum deuh sak sak hnu chuan anni lam an thinrim ve leh ta thung a. IRIDIUM chu ka han Google sak thuak thuak a , a scientific hming te, a properties hrang hrang te…. kan hrilhfiah hrep hnu pawh chuan Anni chuan….” i Iridium tih leh kan Iridium tih chu a inang lo a nih hi” an la ti ta deuh deuh va.

Buaina dang kan tawk leh a. An Iridium chu crore tam taka lei sak tum tute khan ….. Security Deposit an lo dil lawk hlauh pek a. Ka pi, a THIL neitu zawk in nia, a leitu tur zawkte chuan a man an pek tlak vek nghal theih loh che u pawhin Advance emaw in THIL kha ho deuhva a riral loh nan Security tur sum tam tak an pe lawk zawk tur che u anidawn lawm mi…ka tih lah chuan, Ka pu, keini Company tih ve te sumdawn dan hmang hi chu i hrethiam ve lo a nih kha…min la tih khum. Khawvel insumdawn kalphung ah chuan THIL HRALH tawh dawn hnaih ah a hralh tu tur te’n sum rawn thawh ve tu tur an mamawh ngai tawh lova, Investor te hi chu sumdawnna tan tirh lamah an zawng/ anmamawh zawk thin ani ngai a ..ka tih khum a. Kan unaute sumdawn dan hi chu mak ve tak chu a ni.

Ka chhuahsan dawn hnaih ah chuan… Ka pu/ ka pi… eng pawh zuar ula, Bawng-ek kg 1 hi Cheng Vaibelchhe Sangkhat pawhin hralh dawn ula, a lei tu’n a duh chuan in hralh mai thei. Tuna in buaipui ang chi, hmanlai Coins tih vel hi chu a, Kolkata Museum ah emaw khawi lai thil hlui (Artefacts) zawrhna dawr ah kal ula a tam lutuk . Rs 10 atanga Sing man te pawh a awm thei ang. Hetiang in buaipui ang chi ah hian hnamdang ho hi Invest tir ve te tum thin zawk ta che u… Mahni Mizo leh Mizo ho chauh inbum kual lo hian…. Chutiang taka a hlawk a nih te chuan Vai phakar ho hian an tuipui ve phak ka ring khawp mai. Hei tuna ka rawn zawn chhuahna che u chhan pawh hi in thil buaipui ang chi avanga mimal leh chhungkaw nun chhe nasa em em tawh leh chhe mek te ka hriat nual tawh vang a ni a. Helaia Mizo pa ve riangruang, mahni ngaihdan mumal tak nei ka lo awm ve avang hian ka theih tawka rawn hrilhfiah che u hi ka bat niin ka hria. Min haw ta viau a nih leh…. in thu nise. Tin, hetianga inbumna kawngah pheihi chuan PATHIAN hming te phei chu lam tawh reng reng suh u. Pathian hi a awm tak tak roh a nia…tiin ka chhuahsan a.

Kawngkhar a ka chhuah dawn chuan…. A hmeichhia zawk chuan hmai zangthal ha chung hian…”Ka pu, pa fing hmel fu site pawh hian thil tha tam tak hriat loh inlo ngah ve anih hi…Kan thil buaipui ang chi chu maw… Mizoram ah chuan Officer lian te, Kohhran mi tak tak te pawhin an buaipui nasa asin” min la rawn tih khum hram a.
“Chung mi i hriat zawng zawngte chuan hetiang inbumna kawngah hian hlawk na pakhat mahin an la nei lo ti raw… Mi te buma sumkhawn khawm tu tlemte nangni ho tih loh chuan” ka tih khum leh hram a.

Ka haw kawnga ka rilru khawih ta em em zawk erawh chu…. Ngati nge keini Mizo Kristian te , patling/nutling fel ve awm tak tak hian thil ho lutuk, heng inbumna kawng ah hian kan lo inrawlh ve khuk vak zel mai thin aw…. tih chu a ni. A chhanna pawh ka hre nghal. SUM (Indian Rupiya) hi kan duh thang teh huam em hi a lo ni…..
India pawisa a nih tawh phawt chuan eng kawng pawha hmuh hi keini Mizo Kristian te hian kan hrehlo tlat ani. Sum hi hman tangkai tur chu ani ngei mai… Mahse a biling a balang a SUM hi thupui ber chi ani lo…..MIZO KRISTIAN kal fimkhur rawh.

Thil tihawm leh tihawm loh te nei thin Mizo kan nih thin kha i hrethar leh ang u. I lo IRIDIUM ve palh ang e aw.

Aside | Posted on by | Tagged , | Leave a comment

DAMPA FIELD DIRECTOR CHU YMA CHO-AH DAMPA YMA IN AN NGAI

Dampa Group YMA chuan thuchhuah siamin Mamit Dist huam chhung, Dampa Tiger Reserve – a field Director V. Lalfala chu dawt hmanga mimal taka Dampa group YMA ziaktu lian (Secretary) beiah an puh a, a thil tih dan chu YMA a chonaah an ngaih thu an tarlang.

Dampa Group YMA chuan, Dampa Tiger Reserve chhunga thingzai ruk tam tham tak leh Cubic lung tam tham tak a man chhuah chungchangah a mawhphurtu ber ni a lang, Pu V lalfala field Director in Pu C. Vanlaldika, E. Phaileng kal tlang, Pu Lalrinfela Ralte ziaktu lian (Secretary Dampa Group YMA chu dawt hmanga mimal taka rawn bei a, a laka in tih hmingchhiat (defamation) case thehluh (file) tuma hma a la hi, YMA a chona-ah Kan ngai a, YMA chu kan Donna ngaiah lungrual takin Kan ding tlat dawn a ni, an ti.

“Mizoram Tiger Reserved Kan neih chhun hi tichereu zawnga hma la turin ni a lang, Pu Lalfala Field Director hian Dampa Group YMA huamchhung hi rawn kal tawh lo se” tih hi kan duh Dan a ni’ an ti bawk.

Aside | Posted on by | Tagged , , | Leave a comment

INDIA RAM CHHUNGA F-16 SIAM TURIN LOCKHEED MARTIN LEH TATA TEN THUTHLUNG ZIAK

Jun 19, 2017, Thawhtanni khan Lockheed Martin leh Tata Advanced System te chuan khawvela Indo thlawhna tha te zinga sawi, F-16, India ramchhung ngeia siamchhuak turin thuthlung (pact) an ziak fel ta.

India Air Force te hian Soviet-era thlawhna hlui ho thlakna turin thlawhna tam tham tak an mamawh a, mahse Prime Minister Narendra Modi sorkar hian Make In India ruahmanna ang in heng foreign supplier te hian heng thlawhna te hi an hralh phal emaw a nih chuan a lakluhna man chawi teuh teuh ngai hran lo turin India ramchhung ngeiah, India ram company te nen domestic industrial basedinin an siam tur a ni a ti deuh ngut a, Lockheed Martin pawh hian dollar billion engemawzat hlawh turin Fort Worth, Texas a an thlawhna siamna hmunpui hi an rawn suan deuh rup dawn a ni deuh ber mai.

PM Modi-a Make-in-India ruhmanna, hmun/ramdang a pawisa leh hnathawktu sen teuh aiin mahni ramchhung ngeia koh luh hi a fuh hmel viau a ni. He thil hi US President,Donald Trump nena an inhmuh tum pawh khan an thu khel lian tak pakhat a ni.

Vawiina Paris Airshow a he thu an puanna ah chuan, Lockheed leh Tata te chuan hetia production base India rama rawn suan hian US lama hna chu a pangngaiin a kal reng tho dawn a ni an ti.

“India rama F-16 siamchhuah hian US ah pawh Lockheed Martin leh F-16 supplier hna (job) tam tak a siam dawn bakah India ramah pawb thilsiam chhuah hna (manufacturing jobs) thar a siam ang a, chumai bakah hei hian India ram Industry te chu khawvela fighter aircraft supply ecosystem a sum hram na ber hmunpuiah a dah thei dawn a ni,” tiin heng firm pahnih te hian thuchhuah intawm siamin an sawi.

He thu hi PM Modi-an tun thla ni 26 a President Donald Trump hmu tura Washington a tlawh vawikhatna tuk lawkah puan a ni. Tun kum reilote kalta khan India leh US tehian ram venhimna kawnga thawhdunna tur ruhmanna an siam a. Tunah hian US hi Rusia leh Israel te nen India rama ralthuam supply tu lian 3 te nen zing ami a ni mek a ni.

An thuchhuah intawma an tarlan danin India pawhin khawvel ram hrang hrang a Indo thlawhna hman lar tak F-16 thawnchhuak thei tu nihna chance tha tak a nei a ni an ti bawk.

Tun dinhmunah hian F-16 thlawhna 3,200 zet hi khawvel sorkar hrang hrang 26 zetin an hmang mek a. Tuna India rama an siam tur model hi F-16 model changkang ber, Block 70 an tih ang hi a ni a, thlawhna 100 atanga 250 vel siam beisei a ni.

Tunah hian Tata hian C-130 militaey transport aircraft ruangam (airframe components) phei chu a sa fel diam tawh a ni.

Author : Kiddy Vanchhawng    

Aside | Posted on by | Tagged , , | Leave a comment

CEMENT COMPANY TEN CHHUN ZAN ZAWMIN MIZO MIPUITE MIN BUM; BAG 1 Rs.360/- A ZUAR THEI LO COMPANY TE GODOWN KHARSAK AN NIH THEIH NAN HMALAK A NI ANG : MSU

Mizoram cement hman zat.
Cement rate a hniam dawn.
Cement company te hlep zat.

Mizo Students Union (MSU) Gen. Hqrs. hruaitute chuan vawiin atangin Cement bag khat cheng 360 a zuar turin Company hrang hrangte an hriattir a. Rs 360 a zuar ve thei lote chu Mizoramah an sumdawn ve reng a rem tawh loh tur thu an sawi.

MSU Gen Hqrs. hruaitute chuan vawiin chhun dar 12 khan MSU Pisapui-ah thuthar thehdarh tute an kawm a. MSU President Pu RB Lalmalsawma chuan Mizoram pumin thlakhata cement kan hman ral zat hi bag nuaih 3 atanga nuai 5 inkar a ni tlangpui a. Cement rate an zirchianna leh state dangte nena kan inthlauhna te, Non Trade hovin an leitheihna zat te khaikhin vek hnuah Mizorama cement rate hia sang uchuak hle a. Cement company te hian chhun zan zawmin min bum reng a, state danga engemaw chhiatna avanga an sum hloh te hmuh let nan min hmang nasa tih hi MSU hmuh dan a ni. Tunah hian company in Agartala a, cement an tih thlen theihna te, Silchar-a, an pek na te, Mizoram chhung a company lian te hnena an pek theihna te nen lam hriat ani tawh a. Cement te hi Meghalaya state a, Jowai leh a chhehvel atanga rawn phurhluh deuh vek ani a, chumi atanga Agartala leh Aizawl hlat zawng inthlauhna hi Km 30 aia tamlo ani a. Diesel hek viau na hman tur pawh,awm lo mahse, Aizawl leh Agartala a, Company in cement an thlen tir theihna rate hi Company hrang hrang te, rate lakkhawm in cheng 80 -100 inkar deuh vek a ni, heti chung hian Agartala lam hian tax an chawi tam zawk leh nghal a. Aizawl a Cement zuar Company thenkhat te phei chu, Central subsidy hmute pawh an la awm cheu a ni, a ti.

MSU President chuan, State dang an pekna atanga chhut in Aizawl a Cement zuar Company pariat te hian Mizoram atanga hlawkna an hmuh chu cheng nuai 200 atanga nuai 400 chuang niin kum khat a an hlawkna chu Cheng Nuai 2400/- atanga Nuai 4800/- bawr vel daih a ni a. Company in rate an rawn siam hi State sawrkarin a duhthu a abituk sak (fixed) ngawt theih a ni lova, GST pawh hi hman ni ta se India- rama state zawng zawng rate chu a inang dawn chuang lo a ni a ti.

RB Lalmalsawma chuan Cement hralhna rate Company in, a duh anga arawn siam mai hi Ngun taka an zir chianna ah bag khat cheng 360 a an zawrh chhuahin an hek lo tih an hriat thu a sawi a. Man tlawm zawka Cement tha kan hmuhtheih nan Bangladesh leh Bhutan lam company lakluh dan tur pawh kan ngaituah hman hial a. Chutih lai chuan, MSU ngenna ngai pawimawhin Cement Company pakhat chuan, ban an rawn phar ta a, naktuk zing atang hian Aizawl khawpui chhungah Cement bag khat (50kg) hi Rs. 360/- in mipuite tan chhawp chhuah ani dawn ta a. Company dang te pawhin vawiin atanga ni reilote ah hian hemi rate hian an rawn zuar ve turah kan ngai a.

MSU in, a zirchian hnu atanga Cement rate Rs. 360/- anga zuar theilo erawh chu Mizoram a, an sumdawn ve reng a rem lova. Ngenna pawh ngai pawimawhlo te chu an Godown khar sak nghal vek turin thuneitute kan ngen nghal a ni a ti bawk.

Source: (LPS)

   

Aside | Posted on by | Tagged , | Leave a comment

TUILIAN VANGIN MIZORAMAH MI 12 IN NUNNA AN CHAN TAWH A, CHENNA IN 877 A CHHE BAWK

Leimin hnawl ruang hmu ta.

Ruahsur vanga in chhe zat.

Disaster Management and Rehabilitation department-in tun thla ni 9 leh ni 13 inkara ruahsur nasa avanga Mizorama chhiatna thleng an lakkhawm atanga a landanin Lunglei district-ah mi 10 an thi tawh a, Aizawl district leh Serchhip district-ah mi 1 ve ve an thi bawk.

Leiminin In a hnawl leh tuilianin a chim chhiat hi a vaiin 877 a tling tawh a. Heng zinga luah tlak lohva chhe vek chu 220 a ni a, siam that theiha chhia in 657 a awm bawk a ni.

Luah tlak loh khawpa In chhe vek hi Lunglei district-ah a tam ber a, 165 a ni a, Lawngtlai-ah In 51 niin Siaha-ah In 4 leh Serchhip-ah In hnih a ni a.
Siam that theiha chhia hi Lunglei district-ah tam berin In 299 a ni a, Lawngtlai district-ah In 280 chhia-in Aizawl district-ah In 65 a ni a, Mamit district-ah In 14 leh Serchhip district-ah In 9 te a ni.

Tuilianin thlai huan a tih chhiat hi hectare 137 a ni a, Kolasib leh Serchhip district a mi te an ni hlawm a. Sangha dil 62 a chim chhia a, Sanghad dil hi Kolasib district ami vek a ni. Ruahsur vanga chhiatna hian chhungkaw 651 te chenna in leh eizawnna a nghawng chhia niin sorkar report chuan a tarlang a ni.

Hetihlai hian kar kalta Thawhtan zan dar 9 vela ruahsur vanga leiminin Lunglei District-a Changpui khuaa Pu Chhuanmawia te chhungkaw luahlai Assam type In a hnawl hnu a Nu ber Lalhunmawii (32) ruang hmuh a nih a, vuiliam a nih hnu june 18, sunday chawhnu dar 1:30 vel khan Vanlalpeka (3) ruang pawh mi tlawmngaite’n an hmu leh ta bawk. Ruang zawng hian Changpui khaw thenawm hnai Lungchem, Thenhlum, Bungtlang, Buarpui, Bunghmun leh a chheh vel khua atang tein mi tlawmngai engemaw zat an thawk chhuak a ni. He in chimah hian Pu Chhuanmawia leh an fate pahnih dang pawh a hnawl ve a, mahse, vanneihthlak takin an dam khawchhuak a ni.

Inrinni khan Minister Pu Zodintluanga chuan a Bial chhung Changpui khuaa chhiat tawhna hmunah hian kalin chhawmdawlna awm thei ang te a ngaihtuahsak a. Changpui-ah hian chenna in pathum a chhe vek a, an khaw chunga field a khik avangin in thenkhat chu thiah a ngai dawn bawk.

Bialtu Minister hian mitthi, chenna In chhia leh tlawmngaia ruang zawnga kalkhawm (Changpui bakah a khaw thenawm; Lungchem, Thenhlum, Buarpui, Bungtlang West leh a chhehvel khaw dang YMA te hnenah tanpuina a hlan nghal bawk.

Pu Zodintluanga hian Changpui a thlen hma hian a bial chhunga mi pathum thihna Phairuangkai a tlawh YMA hnatlangte tanpuina a pek hnuin a bial hmun dang chhiatnathlenna hmun hi kawng ping vang in a thleng mai thei lo a, PWD ten Changpui panna Buarpui kawng ping an laih tlang veleh nimin khan a tlawh leh nghal a ni. Marpara S lamah pawh tuilian leh leimin vangin nunna pathum an chan a, ruang pahnih an hmu tawh a. Pakhat hi la zawn zel rih a ni. Marpara hi Tleu Quarry chim vangin bialtu MLA hian a awmna lam atangin a kal pawh thei rih lova, Lunglei DC lam atangin a puihna theih ang ang dapin hma a lakpui a, hnatlangte puihna tur pawisa fai a pe bawk.

Hetihlai hian june 18 khan Marpara S khuaa-ah hian electric current kal sual nia sawi avangin chenna in 4 bungrua engmah chuh hman lovin a kangral vek bawk.

Aside | Posted on by | Tagged | Leave a comment

MSU HRUAITU HLUITE LEH A NI LAI BAKAH ACCJSU HRUAITU HLUI TE COURT-A INLAN TURA KOH AN NI

B,Sairengpuii’n phuba a la ta em ni.
?

B.Sairengpuii chungchangah tlaikhawhnuah court a inrawlh.

Chief minister power vang a ni em?

Persons with Disabilities (PwD) Commissioner Pi B. Sairengpuii rawih nawn duh lohna lantir nana kum 2016 January thlaa MSU leh a thawhpui Aizawl City College Joint Students’ Union (ACCJSU) hmalakna avanga Mizoram sawrkarin Pi B. Sairengpuii a nihna ațanga a chawlh/bantir ațanga kum khat a ral hnuah, sawrkar leh MSU lam te țha takin an inrem emaw tih laiin vawiin June ni 19, 2017 khan MSU leh ACCJSU-a hruaitu hlui leh hruaitu la ni mek mi 12-te chu court-in August ni 2, 2017-a inlan turin a ko.

MSU hruaitu hlui leh ACCJSU hruaitu hluite charge-na leh hrem theihna dan an tarlante chu:
1.143 IPC-Punishment:unlawful assembly… imprisonment for six months.

2. 145 IPC-Joining unlawfull assembly armed with deadly weapon-imprisonment for 2 years.

3.147 IPC-Punishment for rioting- imprisonment for 2 years.

4.152 IPC- Assaulting or obstructing public servant when suppressing riot… imprisonment for a term which may be extend to 3 years.

5. 353 IPC-Assault or criminal force to deter public servant from discharge of his duty- imprisonment for 2 years.

6.427 IPC- Mischief causing damage to the amount of fifty rupees… imprisonment which may be extend to 2 years.

MSU hruaitu hluite:
1. PC Lalrinhlua, Ex-President
2. R. Lallawmsanga, Ex- Vice President
3. Lalremruata Chhangte, Ex-General Secretary
4. Lalengzuala Pautu, Ex-Asst. General Secretary

MSU hruaitu la ni mek te:
1. Benjamin Lalnghaka Fanai, Vice President
2. T. Nengkhansut, Treasurer

ACCJSU hruaitu hluite :
1. B. Lalruatpuia, Ex-President
2. Samuel Laltlansangzuala, Ex-Vice President
3. Malsawmsanga, Ex General Secretary
4. Albert Vanlalchhanzuala, Ex-Asst. General Secretary
5. MS Dawngzeli, Ex-Treasurer
6. J. Lalawmpuia, Ex-Fin. Secretary

Author : Slchhunga Gooner    

Aside | Posted on by | Tagged , , , , | Leave a comment