MZP ten 7th pay phut lo turin sawrkar hnathawkte an duh

Mizo Zirlai Pawl (MZP)-chuan Mizoram sorkar hnathawkten 7th Pay anga hlawh lak an phut chu mi harsa leh retheite tan harsatna lian zawk thlen thei a nih dawn avangin state-in a la zo lo deuh nia an hriat thu an sawi.

Hemi chungchang hi nimin Dec 6 khan thuchhuah siamin MZP Gen. Hqrs. chuan an sawi a. Sorkar enkawl school hrang hranga zirlai naupang ten second term exam an neih lai mek a exam tibuai zawnga nawrh huaihawt a ni chu pawi an tih thu leh hriatthiam har an tih thu an sawi bawk a.

Zirlaite’n an kum khat hnathawh rah an seng theih nana exam ṭha taka ankaltlangpui theih nan sorkar enkawl school bika zirtirtute chu mass casual leave la lo a zirlaiten ṭha tak leh tluang taka an exam theih nana inbengdai hram hram turin an ngen tih an thuchhuahah chuan an tarlang a ni.

Advertisements
Aside | Posted on by | Tagged , , | Leave a comment

Mass Casual Leave chungchanga Chief Minister thuchhuak

“Zoram mipuiten duhsak taka min tawngtaisak thin avangin, kan sawrkar hi kan tluang hle thin a. Hengte avang hian Central Pay Commission recommendation pawh hi tum li lai a tihlawhtlingtu ah kan tang tawh a, kan lawm hle a ni. Tin, tihlawhtling tura kan hotuten an ngaihtuah apiangin sum dinhmun an in bih chiang a, chumi hnuah fel tak leh tluang taka thil a kal theihna turin Committee din in, chiang takin thil awmzia an zir a, chutichuan Central Pay Committee ruahmanna chu kan ti puitling thin a ni.

Tun tumah pawh hian Council of Ministers in kan thlir lawk tawh a, ti puitling ve ngei tur kan nih kan pawm a. Amaherawhchu, kan tih thin dan pangngai in Sub-Committee kan sawrkarin a din a, sum kalphung thar tur GST leh Demonitisation in a nghawng avanga kan sum dinhmun turte leh state dangte tihdan phungte kan zir ve a ngai a. Hengte avang hian Sub-Committee ah pawh Chairman atan mithiam Finance Minister lo ni tawh Pu H.Liansailova ruat a ni a, member dangte pawh mithiam vek an ni.

Hetianga Sub-Committee sum dinhmun leh State dangte tihdan zir chiang leh zual tura ruat hi kan tih thin dan pangngai a ni a; tin, Pay Commission rawtna hi tih hlawhtlin ngei kan tum tih a kawk bawk a ni. Heng kan tihdan phung hi Finance Minister zawhawmtak Pu Lalsawta’n Federation of Mizoram Government Employees & Workers (FMGEW) hruaitute lengah sawmin, thil kalphung a hrilhfiah a, Krismas vuakvetah Sorkar leh mipuite harsatna siam lo hram turin an ngen a. Pu Lalsawta hi Pu H.Liansailova leh Minister Pu Zodintluanga ten an tawiawm nghe nghe a ni. Hemi hnu hian kan Chief Secretary Pu Lalmalsawma, IAS pawhin lengah sawmin, Sorkar leh  mipuite harsatna siam lo hram turin a ngen a. Kan hlawhtling zo ta lo a ni. Tunah pawh hian FMGEW hruaitute leh member te hi nuar lo hram turin ka la ngen reng a ni.

Khawvel Chhandamtu Lal Isua lo piang tur hmuak a, khawvel leh Zoram pumpui a inpuahchah lai leh, ringtute hun pawimawh leh lawmawm kan tawn mek laia, hetianga Sorkar leh mipuite tana harsatna thleng tur pawh pawisa lo a, an nuar lui hi hriatthiam a har hle a. A dikna takah chuan kan Sorkar hnathawk mi singnga rual vel hi Zorama mi nuai 11 vel zingah hian a vannei berte an ni a. Thlakipin hlawh an la a, India ramah pawh State pachhe ber e tiloin, a hlawh tha ber te zing a mi an ni.

Kan thiam ang tawka in hnukhniama, tun hun pawimawh ber kan hman mek lai hian mipui leh Sorkar tana harsatna siam lo hram tura kan hotute ngenna pawhin awmzia a neih theih loh takah chuan leh kan Kohhran hruaitute pawh pun kan tum mek laia, harsatna siam an tih tlang takah chuan, keini a hminga Sorkar pawh hian kan tihtur tul te hreh tak chung pawhin kan tih a ngai dawn a. Zoram mipuite min hriatthiamna leh tanpuina tih takzetin ka ngen che u a. Tin, kan lehkhathiamte leh Pensioner-te pawhin Remna Lal pian champha lawm tura kan in puahchah lai hian, kan ramin harsatna a tawh loh nan, a tul ang anga, Sorkar a kal zel theih nan tlawmngaih chhuaha min tanpui tura kan sawm hun che u a thleng mai thei a ni. In inpeih reng kan beisei.

Theihpatawp kan chhuahna min tanpui zel tur leh kan dik tawk lohna min hrethiam a, min tanpui zel turin kan ngen che u a, kan beisei tak meuh che u a ni.”

Aside | Posted on by | Tagged , , , | Leave a comment

KUTDAWH By Ar eL Khawlhring

    A inchhâwng chung zâwl aţang chuan pu Liansanga chuan a han thlir thla a. A in chu a ropui takzet mai. Eirukna tel hauh lo va a sak ngei, inchhâwng sarih zet a ni. Krismas a hnaih tawh avangin an awmpuite nasa takin a cheitir a. A compound zau zet maiah chuan ‘Christmas tree’ tam tak dahin fâr thingkung puitling tawh te nen nasa takin a cheitir bawk a. Han hawi vel ila, mi tihlim ngawih ngawih thei tur khawp leh rilru dam sawng sawng theihna tur khawpa mawi leh nuamin a in leh a vêl chu a vul a ni. Mahse a hlim tlat si lo.

A nupui pi Saii hian kum 2 vel kal ta aţang khan a natna ber hriat theih si lohvin dam ni hmel a hmu mang lo va. Phai damdawi in ţha a an sawi zawng zawng pawh an pan kimin doctor ţha ţha an râwn zo tawh. Mahse a natna diktak an hmu chhuak thei chuang lo. An bei a dawng tawh kher mai.

              An fapa Johny-a lah ‘Addict’ mai niin tunah Revival camping centre lamah a awm mek a. Ani lah an manganpuiin a lakah an beidawng takzet tawh. Tunah pawh hian ţha taka a rawn chhuah an beisei vang pawh ni tawh lovin kâr khat tal damdawi ti lo va camp chhunga a han inkhung ve ringawt pawh hi an tan chuan a lawmawm em vang chauh zawka camp luhtir an ni.
.
Johny-a hian vawi 15 chuang zet chu camp a lut tawh a. Mahse vawi khat chiah inhlânin a rawn chhuak. Chu pawh councellor te’n an khalh fal rei bik ţhin a nin vang mai maia inhlân ve a ni. Camp chhuah ni aţangin a rui chhunzawm leh nghal pang ţhin. Tun ţumah pawh hian a nu leh pa thu hnial hreh vang chauha camp lut leh a ni. Ţhat chhuah tum tak takna rilru a pu chuang hauh lo.
.
.
                   Pu Liansanga chu a rilru a hah kher mai. A fanute pahnih erawh phai lamah college an kal a, anni thung chu sawiselna tur em em an awm lo. An awmna hmunah pawh nula ţha tak niin an sawi ve ve a ni.
Mahse an fapa ber heti hi a ni si a. Johny-a siamţha leh tur hi chuan thilmak a ngai ni ber tawhin a hria. He khawvel mihringte siamţhat phâk bâk niin a ngai tawh. Pathianin a siamţha thei tih chu a rilruin awih mah se, amah zilh turin rinna kawngah an nupaa an derdêpzia a han inhmuh chian meuh chuan a bei a dawng hle mai.

An fapa neih chhun a ni bawk nen, a naupanlai aţangin an duat lutuk a. A duh apiang leisakin a duh tinreng a nei thei a ni mai a. Tunah zawng kha’ng duatna kha hmangaihna a lo ni lo tih hre chhuakin a inhmuh chhuah hun erawh a tlai lek lek tawh.

Mite ngaihah chuan kohhran leh khawtlangah pawh pa ţha tak a ni ngei mai. Mahse a hausakna hian khua tihmu lo zovin, duhtawk lêm neih lohna chuan amah a bâwih tawh a, sum bawihah a tâng nghet tawh hle a ni. Ţawngţai a thlahthlam a, chhûng inkhawm an lo neih ţhin pawh an nei ngai meuh tawh lo.

A nupui a han ngaihtuah leh a, tunah pawh an nupa khumah a mu bâm mai. Na viau ni si lo hian natna hian a thlah mang lo va. Doctor-ah damna an hmu zo lo va, ţawngţai dam thei an pan pawhin eng an ang thei chuang lo. A natna tal hi hre chhuak se chu a ziaawm zawk tur a nia, doctor-te lah an hawihâi ang reng viau mai si.

           Chu zan khawhar takah chuan inchung zâwlah midang hriat lohin a rilru hah chu a hûi pap pap a. A in ropui zet chu a han thlir nawn leh a. A in tluka ţha leh lian, compound nuam bawk si hi chu veng chhungah a dang a awm lo. Aizawl khaw chhungah hrim hrim pawh a zahpuiawm lo pawl chu a ni ngei ang. Tunah phei chuan ‘Decoration light’ tam mangkheng, chi hrang hrang te chuan an chei a. Zan lama an han tiêng zet chu ‘Vai truck’ chu nêptê, a pêt hian a pe chuai mai a, ralkhat aţanga thlir pawhin in dang ai chuan a langsarin a ropui bik hliah hliah a ni.

Miten a in an luah man ringawt pawh ei sên loh an la lut a. Aizawl khaw chhungah dawr lian tak tak, hmun thumah ngawt a nei bawk. Contract lam pawh a buaipui hman meuh tawh lo zawk a ni.

Mahse hetianga pa ţha-a an ngaih leh mi hausa ni mah se famkim lohna riau a nei. Khawtlang tan chuan a sum chu a theh chhuak ui hauh lo. Mahse mi rethei, a hranpaa ţanpui te hi a duh dêr lo. A chhan chu retheih hi thatchhiat vangah a ngai tlat.

Aizawla an nupa-a an pêm tirh laia an retheihzia a chhût lêt a. A tumruhna avang leh a thawhrimna avanga hetiang dinhmun thleng thei a ni tih a inhria. Chuvangin retheih chu thatchhiat vangah a ngai hmiah a, chantawk khuarelah a puh fel hmiah mai a ni.

     Rilru hah zetin an nupa pindanah chuan a lût ta a. A nupui, an inneih tirha hmelţha tak, hrisel ţha tak ni ţhin kha chêr kiamin a lo mu dâng bei mai a. Sum zawng ngah teh mah se he inchhungah hlimna hmuh tûr a vângin hlim taka nui ri hriat tur a awm ngai tawh lo.

A nupui chuan khawsik a neih lêm loh avangin thâwm dîm takin a sirah chuan a inthawlh ve a. Zing dar 1 lai a ri tawh nachungin a mut a chhuak hauh lo.

‘Table light’ tihthim tuma a han ban lai tak chuan a sira khawhar hmel taka lo let ve bâm lehkhabu chuan a mit a la ta tlat mai. Chu chu thil dang ni lovin ‘Bible’ a ni.

Bible a chhiar khâtzia a han ngaihtuah meuh chuan han keu leh pawh a inthlahrung rum rum a. Mahse a thinlungah turtu mak tak mai a awm miau avangin ţi deuh tak, inthlahrung tak chung chuan a han keu va. A zuk hmuh hmasak ber chu helai thu hi a ni:

Tlang lamah te khian ka mit ka lên chho vang.
Khawi lama mi nge mi ţanpuina tur lo thleng ang?
Mi ţanpuina tur chu LALPA, lei leh van siamtu hnena mi a lo thleng ang.” (Sam 121:1,2)

A harh deuh huaiin a inhria. A hausakna ringawt a hmachhuan a, Pathian a lo be pawp ngai tawh lo reng reng tih a inhre chhuak a. A hausakna chuan an chhungkua-ah damna, hlimna a pe thei si lo.
A mangan hunah chauh Pathian a hre chhuak tih a han ngaihtuah thlen chuan a inthlahrung zual sauh a. Mahse tih theih a nei tawh lo. A nupui mutna kiangah chuan a ţhingţhi a, ngaihdam dilin a ţawngţai ta a. A tihtur a tih loh te hriattir turin Pathian a au va. A nupui damna tur erawh inthlahrun luatah a dil mai ngam lo.
.
Urhsun taka a ţawngţai zawh meuh chuan a thâwl huaiin a inhria. Tichuan bible bawk chu chhiar tur ber pawh hre chuang lovin a phêk a phêk kual a. Nakinah chuan helai thu hian a mit a la leh ta tlat mai a ni:

Malakia 3:10
Ka inah ei tur a awm theih nan sawma pakhat zawng zawng chu thawhhlawm inah rawn la rawh u; van tukverhte chu hawnsak che u in, malsawmna dawn sen loh khawp hial ka vur dawn che u nge dawn lo che u, mi han fiah teh reng u, Sipaihote LALPA chuan a ti,” tih thu hi.

Ni e, thawhlawm, Pathian ram pek chungchang velah chuan kohhranah a sâng filawr lak a. Amah rawn hnaihtu ber pawhin a thawh zatve a thawh pha ţawk ţawk chauh. Mi fak pawh a hlawh. Mahse sawma pakhat Pathian hnenah a lo pe ngai reng reng lo, a ui ţhin a nih kha.

Sawma pakhat chu han pe chiah se a tam dawn lutuk a. Aizawlah dawr lian zet zet hmun thumah a nei a. A dawr pakhat aţang ringawta sawma pakhat a pek tur pawh a tam tham lutuk. Chumi piah lamah a in luahtuho luah man zawng zawng aţanga sawma pakhat pek chu tam tham tak a ni bawk. Contract a lo thawh aţang te a chhût tel phei chuan Pathian rama a dah tur chu sâng vah vah tak a ni. Chuvang chuan a ui a ni ber, a lo pe ngai miah lo. Midang aia a thawh hnem chu tawk a lo ti em em ţhin.

Mahse a thinlungah inthiamlohna a lo lut ta. Sawma pakhat chu Pathianin, “Ka ta,” a ti tlat si a.

Khum aţang chuan a chhuk nalh a. Lehkhabu leh pen la in, a thawh chhuah zawng zawng chu a mal te tein a chhût a. A chhût chhuah aţang chuan Pathian ta tur chu a dah hrang ta a, amah paw’n tam a ti hle mai. Mahse ui thei a ni tawh lo. Ui lo va a pek phawt chuan Pathian pawhin malsawmnaa a vûr dawn leh dawn loh fiah a cho kha maw…

Safe va hawngin sawma pakhat, ‘Pathian ta’ chu a han la chhuak a, a fûn hrang ta nghal a. Chumi zawhah chuan Pathian hnenah a hlan a. Kohhrana chhûn luh turin a dah ţha ta a. Tichuan rilru hlim em em chungin zing khawvar dawn ruaiah chuan a muhil ve ta hram a.


“Bawiha pa, tho tawh rawh, kha i thingpui tur le.”

Chu aw a hriat chuan a harh kawk a, chutih rual chuan a mumang emaw a ti tho bawk. Chêt nachang pawh hre lo chuan a ka hau mai. A nupui pi Saii lah chuan nui ver ver chungin thingpui chawiin a lo en reng mai bawk si.
Chutah pi Saii chuan hrethiam takin,
“Bawiha pa, ni e, a mak lutuk, ka dam vek,” hlim hmel siaha a rawn tih takah chuan pu Liansanga chuan ngaihtuah chhuah a nei ta! Dan rual lohvin patlinga pumpa, a mittui chu a dîr ta zung zung a. A nupui lo dam tak nachhan chu ui lo va a pek avangin Pathianin malsawmnain a rawn um zui nghal tih a hre chiang em a ni.
“Lalpa, i che rang ngei mai maw,” a ti sap a.

Engdang a sawi tawh lo, thingpui in hman pawh a ni tawh hek lo. A nupui pi Saii chu a bulah a ţhingţhittir a, mittui tla zawih zawih chungin Pathian hnenah lawmthu an sawi dun a.


                     Johny-a chuan a ning takzet tawh. A ‘Suffer’ zualpui chu a pel chho tawh (Suffer- tuar, damdawi khawih ţhin han nghei thut avanga taksaa ţhînlêtna). Mahse camping chu a ning ngawih ngawih. Tlân chhuah te a duh rum rum a. Mahse a tûk mai hi camping chhuah hun a nih tawh avangin a insûm ve hram hram a.
.
Addict camping a ni bawk a, tiţha duh vak lo pawh an tam khawp mai. Sâwmna vawikhatna chu speaker-in a siam tawh. Mi 80 vel zet chu la ţhu nghûkin ngaihsak tehchiam hmel pawh an la pu lo. Mahse ngawlvei rual na na na chu speaker sawmna hnuhnung berah, chhungte ngaihţhat nan an ding leh deuh vek ang tih chu Johny-a hriat sa a ni. Mahse ani erawh zawngin sâwmna chu chhân a tum bau lo.


Kutdawh putar bâl zet mai hian sai ip chu pu chungin mi in hrang hrangah chuan a lût lâwr dan dan a. Ţhenkhat chuan buhfai no khat te an lo pe a. Ţhenkhat erawh chuan VC hriatpuina lehkha a neih leh neih loh te an lo zawt a. Ani chuan chutiang lehkha a lo nei bawk si lo, an veng an han zawh lah chuan a riat nawi vel mai mai bawk si. Chuvangin ţhenkhat chuan buhfai no khat tal pawh lo pek ahnêkin an pêt chhuak lo chauh zel mai a ni. Chutiang chung chuan thlan tla hluamin in dangah pawh a lût zel a. A luhna thenkhat erawh mi rethei berh ve tak tak tho an ni.

In tla bal tawh tak, kawngka inhawng hiau maiah chuan a lût a. Nu tar lam lek lek tawh, rilru hah hmel deuh mai hian lo chhawnin lêng lut turin a lo sawm a. Chu kutdawh putar chuan tuisik in dil pah chuan buhfai no khat tal pe turin a khawngaihna a dil a. Chu nu chuan tuisik pek pah chuan a mittui a hru zauh a.
“Ka pu, min hre thiam rawh. Keini paw’n vawiin tlai buhfai thlak tur pawh kan nei tawh lo,” a lo ti a.

Chu kutdawh putar hmel chu a dur deuh khapa, a chhâng lêt lo. Mahse a hmelah chuan a inngaihtuah mûk hle tih a hriat a. A ngaihtuahna erawh hriat thiam theih a ni lo.

  Hah hmel taka thaw deuh huam huam chung chuan pu Liansanga in ropui zet mai chu a han thlir vung vung a. Chutah gate chu hawngin chau(h) hmel zet hian inchhâwng chung ber pan chuan a inpu pâr pâr a.
.
Pu Liansanga te chhungkaw chênna bika choka kawngka inhawngah chuan a dâk lut a. Pi Saii chuan chawhmeh a lo siam mawlh mawlh a.
“Ka pi, buhfai no khat min pe ve thei angem?”
.
Chu aw a hriat rual chiah chuan pi Saii chuan kutdawh putar lam chu hawiin za lutuk mai hian a nui ta uarh uarh a.
.
A nuihza zualpui a reh hnu chuan pi Saii chuan, “Bawiha pa, i ang lutuk, i inhmeh kher mai. I rawn hlawhtling em?” tih pah chuan a nui leh vak vak a. Chu kutdawh chuan a buhfai put lai chu chhuata nghah pahin a sam lem chu a la thla a, tui awmna lam panin a hmai chu a’n tuai fai thuak thuak a. Hrûkpuana a hmai hru zo rawn hawi chhuak leh chu putar kutdawh ni tawh lovin pu Liansanga ngei kha a ni leh ta.

.
                       Pu Liansanga chuan a nupui hnenah chuan a kutdawh dân chanchin chu a hrilh mawlh mawlh a. Pi Saii chuan uluk taka lo ngaihthlak pahin a hmel chu hlim hmel leh lainatna ngah hmel puin a inthlak sek mai.
.
Tichuan an nupa chuan ruahmanna an siam zui nghal a. Vawiin khan an veng chhunga mi harsa deuh nia a hriatte inah chuan a lût kim hman a. Chumite zingah chuan amah khawngaih a, buhfai lo petu mi harsa zualte chu Krismas thilpêkin an rul lêt ve thung dawn a ni.
.
Mi in-a a luh pah khan a mi la hriat chian loh te hming kha ‘Name plate’ aţangin a chhinchhiah zel a, chuvang chuan harsatna a awm lovang. Amah ngei chu kal duh tho mah se, mite inhriattir loh ţha zawka a hriat avangin an driver, mite hriat vak loh, a mi rin tak ni si chu thilpek pe tur leh a petu hming an lo zawt a nih paw’n sawi miah lo turin a ti anga, tichuan a aiawhin a kaltîr mai dawn a ni.
********
                      Pu Liansanga chuan an driver chu tîr chhuak nghalin vawiina buhfai pawh nei tawh lo nu khawngaihthlak kha a chanchin a va chhui tir nghal a. Amah pawh khan zawt thei chu a ni. Mahse chhûnah kha chuan kutdawh a ni miau va, a tan zawhna zawh vak kha a thiang lo deuh tlat. A ngaihtuah chhunzawm zel takah chuan veng chhung mi a lo hriat tlemzia te, mi rethei leh harsa zawk hriat a lo neih mang lohzia te a ngaihtuah chhuah chuan a zak thar em em a.
.
Vawiina kutdawh pu Liansanga buhfai lo petu mi harsa ve tak tak te’n Krismas hlim taka an lo hman ve nan an mamawh dan a hmuh ang zelin ‘Envelope’ chhungah chuan pawisa pek tur a dah nghauh nghauh a, uina rilru pakhat tê mah a pu tawh lo.
.
Driver rawn lêt leh chuan chanchin rawn sawiin kha nu khawngaihthlak tak khan pasal leh fa pahnih a nei a. A hnathawktu ber tlangvalin kum kal ta khan a boralsan a, pa ber hrisel lo, damdawi in luh ngai reng bawk avangin an harsa em em mai hi a lo nia. Tunah pawh an pa chu damdawi inah awmin a fanu-in a awmpui a, damdawi in ‘Bill’ pek tur pawh an lo nei lo chu niin.
Chu’ng thu an hriat chuan an nupa chuan an chek tlawk tlawk a. Pu Liansanga rilruah chuan buhfai tui ţha zet zet, kudam lama a ‘Stock’ ngei mai chu hre chhuakin a bag ngeia pek a tum khawp mai.
***************
        Speaker-in sawmna a han siam leh chuan Johny-a rin ang ngeiin an ding deuh suau vek a. Inhlân thei lo, sawmna chhâng lo chu mi pali vel chauh an ni, chung zingah chuan Johny-a pawh a tel ran a.

Mahse thilmak tak mai a lo thleng ta. Speaker-in sawmna hnuhnung ber a siam dawn lai chuan thâwklehkhatah Johny-a thinlung chu Thlarau Thianghlimin a rawn luah ve ta tlat mai le! Thlarau Thianghlim chuan sual a nihzia rawn hriattirin, mi luhlul mittui chu ama’n duh lo teh mah se a rawn far ta zawih zawih mai. A zak a, inthup tumin a kûn tlat a. Mahse Thlarau Thianghlim chuan hna thawh chhunzawmin sawmna hnuhnung berah chuan Isua Krista chu Lal leh Chhandamtu-ah pawmin a pian tirh ata a vawikhat nan thinlung leh tihtakzetin a inhlân ve ta nge nge a.

      Hetia Johny-a a inhlan lai tak hi pu Liansanga te nupa Pathian hmaa an ţhingţhit lai tak niin amah Johny-a tan an dilsak lai tak a ni a, an driver-in mi harsa-te hnena thilpek hnuhnung ber a pek lai chiah a ni bawk.
Chu’ng mi harsa zual, chhungkaw sawmpakhatte hnena thilpek, envelope kâwmah chuan he thu hi a inziak thliah a:
ISUA THILPEK
Buhfai no 1 avangin.
From
Kutdawh.
Tih hi a ni.

                     Hmalam hun thim zawnga thlir mek pu Liansanga te chhungkua chuan naktip lawka lo thleng tur Lal piancham chu hlim em emin an hmuak ta a. Ui lo va Pathian hnena an pek avang leh mi chanhai zawk an khawngaih avangin vanah ro an khawl khawm zel a, an lallukhum a chhah deuh deuh a, he leiah ngei pawh malsawmna an dawn belh zel dawn tih chu an la hre chh’awm zel dawn a ni.
.
(Krismas lo thleng turah hian chanhai zawk te tan, a tê emaw, a lian emaw, engemaw tal i ti ve dawn lawm ni? Pathianin i thiltih a theihnghilh hauh dawn si lo)
A TAWP TA

Ka Krismas hla phuah ve hi in lo ngaihthlak ve duh tak mialin:
Ramthar Pastor Bial Zaipawl
Ropui rawh se
https://mizotrack.wodemo.com/file/391237

Lal piancham hman nuam vek u le.

Aside | Posted on by | Tagged , , | Leave a comment

HINDU/BUDDHIST TE HIAN MIN ZUAM TAWLH TAWLH DAWN A ANG by Rev. Lallura

Kum 2008 January thla khan, Chiang Mai (Thailand) a, Buddhist ho zinga hma-la te Conferenceah kan nupa-in kan han tel ve a. Chuta Singaporean, Philippines a rawngbawl a awm Mission hotu lian tak pakhat chuan – Mizo kan ni tih a hriat veleh, kan hma a lo kun-in chibai min buk a – “Mizo in ni a, ka zah (respect) a che u, khawvel a missionary tir chhuak tamber hnam in nih avangin” a rawn ti tawng mai. A lawmawm hle na a – ngaihtuahna a ti kal thui hle.

Conference tawpni-ah, he Singaporeanpa te nen kanlo in chibai lai mek-in, Naga nupa he Conference-a lo tel ve te – anlo lang ve a, an pa chuan – chu Singaporean pa hnenah chuan “En ta che… kan vun rawng leh hmel te hi – Indian kan nih loh zia hi – Tihluihna –in India ah kan awm a ni…” tiin lamtanga min sawm hmel tak a, min melh zauh zauh chungin a rawn ti bawrh bawrh a. Chu Singaporean pa chuan, ” Mizoram hi  Independence lo sual ve tawh an ni a, an ni chuan ralthuam dah fai vek-in, missionary an tir chhuak ta zawk a, khawvel a missionary tir chhuak tam ber hnam  – entirna tha lutuk an ni (very very good example)” a lo ti fel hmiah mai a. A lawm-awmin, kan hming a mawi hle mai.

Missionary tir chhuak tamber hnam, za a za kristian inti ngam hnam kha Chakma district a lo pian tak avang te pawh a niang 87.1 % ah kan tla thla ta…, tlak hniam lam pan chungin, India ramah third highest literacy (91.58) nihna kan la hauh pha ve ngat ngat bawk a. Kan ram kilkhawr leh kan hnam la naupan leh tanrualna chang kan hriatloh ngaihtuah-in, hma kan sawn chakin, hnam chhuanawm tak kan lo ni a tih ve theih awm e.

Mizoram
Christian 87.1 %,
Buddhist 7.93 %
Hindu 3.55%
Islam 1.10 %
(Nagaland erawh 90.2 % an la ni thung).
(Meghalaya 83.3 % an la ni ve bawk)

Amaherawh chu, hepa hian Mizo te hi min han bel chiang se – heti tak hian hnam pum huap-in min fak a ngem le? Kum 2001 khan, Pathian khawngaihna azar-ah, hetia min fak tute ram, Singapore-ah Pathian hruaina in ka han kal ve tawh a. Ka cham chhungin, Police ka hmu miahlo, police chu an awm ve na a, mihring an rinawm-in an polite em a, Police-in hna an nei ve lo(neilo tak tak chu an ni lo a) ni maiin an lang. Mipuiin an thinlung chhungrilah, sorkar dan an zah a, an zawm vek mai a ni. Zan dar 12 ah, motor tlan awm miah lo mahse – traffic light (red light) a en chuan, mi pahnih/khat lek pawh nise, an ding a, tumah an awm chuanglo ti-a, kaltlang a awm ve lo. Green light lo lan an nghak mai a ni. Chutiang khawp a, hnam rinawm chuan kun-in chibai min han buk a nih chu.

Hnam belh chiandawl tak ni ve phei ila chu, khawhawi pawh a nuam leh zual mahna le! Hnam belhchian dawl chu kan ni thei ngei mai, mahse hnam belhchian dawl ni tur chuan, kan chak lohna lam pirlan fo a ngai ve a. Chuvangin, kan that lohna lam/chaklohna lam han pir lang ta ila…kan thatlohna kan pirlan rual rual hian – kan thalo fai vek hauhlo tih kan inhriat tel pawh a tha tho awm e.

Indo na leh in khelhna-ah reng reng hian, va beih (attack) a pawimawh rual rual-in, min rawn beih letna laka lo in-ven (defence) thiam a pawimawh thin.

Mi ram a thlarau sual-ho va bei a, Setana ram va thiat-a, Pathian ram va zauh tuma Kohhran ten sum leh pai tamtak nen tan la-in, Missionary kan in tir chhuak chum chum mai a, ringtu tamtak awm tawhna ah pawh mahni kohhran ala awmloh avang te pawhin Church plant turin kan intir nasa hle. Khawvel hriat tham khawpin kan thawm a ring a, kan thawm a na.

Chutiang chu pawnlama kan landan a nih avangin, Setana min beih letna, Zoram chhunga, sualna-sawi zah thlak ta tak leh, Kristian te tih awm loh tawp thil – corruption, pawngsual, inthah etc. ah te reng reng hian fihlim awm tak kan ni.

Kan thurin Bible in min zirtir “sum tamtak ai a, hmingthat” na um leh ngai pawimawh a, ram hmelhmang lanchhuah tirtur kan nih lai a, kan tunlai Zoram chanchin (testimony) te hi a zahthlak hle. Lal Isua min chhandamna hlutak hi engmahlo ah kan chantir zo dawn tak ngial e.

Chutih laiin, taxi pute leh mi thiltihbo lo chhartute testimony a ngaihnawm hle thin. Mizoramah chuan thil a bo theilo tluk a ni e…ti a sawi lai mekin, khawvela chhungkaw lian ber/nupui ngah ber record kan siam te, drugs hluar zia leh overdose a thi tam zia te, ram pumhuap kawngchhiatzia leh electric power khawpkham loh mipuiin kan tuar lai a, tute emaw chu, ram hruaitu hausa 7na ah an tel tih te chhiar tur a awm ta nual bawk. (Nepal hi tun hma khan khawvel ram rethei 10 a a tel laiin, lal kha khawvel mihausa 10 zingah a tel.. an ti thin). Chu chu, a thlum a al ei za, ei bil thi thi ..tih thinna Mizoram hian kan hmabak em ni ta le ?

Hmanlai pi leh pu te, an mahni bawr, in run-a, anlo in thah chiam thin laiin, hnam dang-in hmuntha/ramtha minlo chuh khalh zo tawh. Kan tunlai boruak hi thlir ta ila, Kan Politician te pawh lal inchuh a, lal theihna tur a nih chuan engpawh tih kan huam ta mai te, mahni leh mahni kan inpir a, kan inbeih laiin,, um chhuah leh harsa khawpin chakma-hoin min luhchilh a, kan fate chanvo hial an rawn chuhpui ngam ta….zung an kaih thuk hman tawh hle.

Kristiannaah te, lehkhathiam tam lamah te, missionary tirh chhuah hnem lamah te ‘quantity’ ah chuan India leh khawvel kan deng chhuak a ni mai thei.

Mahse tamlam aiin, tak-lam (quality than quantity) a pawi mawh zawk a vang-in, kan puanven i sawi chhing leh ila. Zoram kristian te – Lal Isua zirtir ni thar leh in, kan ram chhung atangin Kristianna rimtui kan chheh vel (ram then-awm) ah lo luang chhuak zel se. ” Khawvel eng in ni e” tih hmingpu tlakin, kan Kristianna Eng hi, Central India hotu te mit hmuh ah te, ram thenawm min hual vel tute, ram pawn lamte thlengin, kan Mizo nunze mawi, leh Kristianna hi lo eng chhuak nasa leh zual se, sumtak mission field a luan luhtir pawhin awmzia a neih leh zual ang.

Mizo te hi lehkha thiam an ni a, an sap tawng a tha a, Kristian an ni a, an rin awm bawk a – kan company/Agency/organization/ kan airlines a thawk tur kan duh etc. ti hi rawn awm nawk fo mai se, a va nuam dawn em! Thalaite future chu a eng khawp ang.

India ram a cheng, Indian kan ni ta sa sa, India hnuk leh India kaihruaitu (lead tu) (Politics ah ni kher lovin) dikna, rinawmna, taimak-na leh thiamna te thlengin, India tan a ‘good example’ ni thei ila, a va tha dawn em !

Delhi a Anti-Corruption Branch chief Mukesh Kumar Meena, Delhi sorkar sum buaina (scams) sang ber te lo chhuichhuak thintu chu Mizoram ah anla rawn sawn lut ta deuh deuh a. Engti tura rawn transfer ni tak ang maw? Eiru ramah Mizo te hi min tir lut se, kan inhmeh zawk tur a nia le…

Ringlo mite aiin, ringtute min rin ngam ava hun tawh em ! Chutiang kan nih ngat chuan India ram ti engtu – Krista hmel – hnam zah-awm – Kristian hmingpu tlak kan ni ngei ang. Kan te a, kan hmel te a thalo a nih pawhin- rinawmna lam leh thiamna lam ah mite kan khum thei. 

Solomona pawh Pathian hnenah diltur diktak a dil avangin – hausakna tamtakin Pathianin a vur, Solomon anga hausa hi khawvelah an awm leh a ngem le? A dil leh um avang ni lovin. Pathian thinlung a hneh avang a ni – a ram leh felna zawng hmasa tu te tan chuan…Pathianin thu a tiam tlat a.

Josepha pawhin, hun harsat ber lai pawhin (Potiphara nupui – a pi ngeiin a thlem lai pawh-in) mi hring lawmna a zawng lova, Pathian mit hmuha thiltha a tih tlat avang-in, hre-awmna leh harsatna han tawk rap rap thin mahse – Pathian-in, Agupta ram Prime Minister-ah leh, Aigupta ro-sum enkawltu – ah a hlang kai mai a ni. Josepha Prime Minister a hlangkaitu Pathian nung be ve tu, Mizo kristian te hi, kan biak Pathian-hian India ram ro-sum enkawltu-ah, roreltu-ah eng tikah tak min hlang kai ve ang maw????

Kan hriat theuh angin, tuna, India ram Prime Minister 14na Narendra Damodardas Modi (1950 a Gujarata lo piang) May 2014 a Prime Minister a lo thu tan hi Bharatiya Janata Party (BJP), Hindu nationalist bakah member of the right-wing Rashtriya Swayamsevak Sangh (RSS) ngat a ni. A tum ber chu, Hindu ram chawikan leh Hindu ram zauha India ram hi Hindu rama siam a ni tih kan hre theuh awm e. Hengho hian kan Kristian takna leh Pathian tihna leh zahna an hmu a ngem? Nge min nuihzat ang?

Lal Isua hnungzuitu, Pathian lawmna zawngtu ni thar leh in, a tan i rinawm zawk ang u. Tangrual ila, zoram siamthat/chawikan hna-i thawk tlang tawh zawk ang u. Kan lawmman hlu tak vanah a awm tawh si a.

He Bible chang hi kan tan a pawimawh hle : “Chutichuan unaute u, Pathian khawngaihna avang hian, inthawina nung leh  thianghlim leh Pathian lawm tlak ni turin in taksa chu inhlanah ka ngen a che u;  chu chu in rawngbawlna awm reng a ni.He khawvel dan ang hian awm suh ula; Pathian duhzawng, a tha leh lawm tlak leh,  that famkim chu in hriatfiah theih nan, in rilru athara awmin lo danglam zawk  tawh rawh u”. (Rome 12:1-2)

Aside | Posted on by | Tagged , , | Leave a comment

PRISM IN AWMZE NEI A SAWRKAR HNATHAWK TIH TLEM A TUM

• Sawrkar hnathawk awm zat.
• Sawrkar hnathawk ten Mizoram sum an hman zat.
• Mizoram budget aṭanga mipui chan zat

PRISM chuan thuchhuah siamin PRISM Party kan sorkar hunah, “Eizawnna hna thar nuaikhat singnga kan siam ang a. Tuna Mizoram budget tam zawk kan hmanna sawrkar hnathawk te hi ennawnin, tih tlem a tul a nih chuan awmze neiin kan titlem ang,” Pu Lalrinzuala Chawngthu, General Secretary chuan a ti niin an tarlang a.

Pu Lalrinzuala Chawngthu chuan kan budget leh sawrkar hnathawk zat sawiin, Mizoram 2017-2018 budget cheng vaibelchhia 8,803.10 niin Hlawh (Salary & Wages) cheng vaibelchhia. 415.41 (33.77%) a ni a; Pension atan cheng vaibelchhia 846.66 vbc (9.61%) niin hlawh leh pension-ah cheng vaibelchhia 3,828.07 (43.48%) ruahman a ni bawk.

Hei bakah facilities atan cheng vaibelchhia 2,560.14 dah ni bawkin a vaia sawrkar hnathawk hlawh leh hamthatna atana sum dah hi cheng vaibelchhia 6,951.43 niin chu chu budget pumpui atanga 78.97% a ni. Chumi bang cheng vaibelchhia 1,851.67 budget pumpuia 21.03% chauh mipui chan, hnathawhna tur a ni a, hnathawhna tur sum tlem avang hian hmasawn a har em em a ni.

Kum 2011 Census-ah khan Mizoramah mihring 10,97,206 awma record a ni a, Kum 2017-ah hian mi 11,50,000 vel awm angin an chhut. Sawrkar hnathawk zat hi 47,824 (4.16%) vel leh thawk lo mi 11,02,160(95.84%) vel nia chhut a ni bawk.

Tichuan, Mizoram mipui zaa 5 pawh tling lo chuan kan budget an insem zo titih tihna a ni, a ti.

Tunhnai lawkah Mizoram Building and Other Constructions Workers Welfare Board-a thawk mi 36 lai ban an nih hnuah an hna a buai phah lo mai ni loin ‘a hma aia hna a kal that zawk thu’ LESDE Joint Director Pu K Valy sawi chu tarlangin Pu Lalrinzuala Chawngthu chuan, heta tang hian sawrkar hnathawk 50,000 vel awm mek hi titlem ta pawh ni ila sawrkar kalphung hi a buai chuang dawn lo tih a tarlang chiang hleah a ngaih theih a. Tuna sawrkar hnathawk hlawh leh inrelbawlna senso atana kan sum hman tam tak hi hmasawnna ngial nghet kalpui nan kan hmang thei ang a, kan ram chuan rahbi pangngai kan rap tan ve thei dawn a ni, a ti a. PRISM Party kan sawrkar chuan eizawnna hna thar nuai khat singnga kan siam dawn a ni, a ti bawk.

Vawiin ‘Bengvar Inkhawm’ hi Pu SL Ngursailova Sailo, General Secretary chuan kaihruaiin, Pu Lalthuamliana Secretary hnen atangin report ngaihthlak a ni bawk a ni.

PRISM chuan Kristianna hi a tha bik a ni tih lantir a, kan Pathian chawimawi tur te; kan chhehvel hnam te aia ropui zawk kan nih lantir tur te; Zohnahthlak te inpumkhatna atana kan unau te hipkhawm tur tein, Mizoram hi ram ralmuang, dikleh fel taka ro inrel, hna neilo awm lohna, mi hrisel leh hlim chenna, ram hausa, hnam dang ten tlawh an chak ram dinpui atan mitin kan sawm che u a ni.
Tun hi duhthlanna hun a ni e.

Aside | Posted on by | Tagged , | Leave a comment

SIM CARD NUMBER NGAI CHIAH HMANGA SERVICE PROVIDER DANGA INLEH DAN

  1. I SIM hmanlai ațang khan 1900 ah PORTMOBILE NUMBER hi SMS thawn rawh.

Eg. PORT 9856549217

  1. UNIQUE PORTING CODE (UPC) SMS in i dawng anga, a hman theih hun chhung tur nen a rawn thleng ang. Kha kha chhinchhiah ang che.
  2. I inleh duhna company office ah kal la, (Airtel ațanga Vodafone a i inleh duh chuan Vodafone office ah i kal dawn tihna a nih chu) Porting Form leh Customer Acquisition Form i fillup dawn nia.

  3. I passport size photo leh Proof of Identity (Voter’s ID, PAN Card, Aadhar Card, Driving license) Xerox copy i keng tel ang a, pawisa tlem chawi a ngai ang.

  4. I SIM Card thar tur an pe che ang a, i SIM vuah laia service/signal a bo veleh (kar 1 vel nghah ve a ngai țhin) i SIM thar kha i vuah dawn nia. Darkar 2 hnu velah a rawn nung ang.

Tikhan, i phone number ngai chiah hmangin company dangah i insawn daih mai ang.

Aside | Posted on by | Tagged | Leave a comment

Top 30 interesting points from – PRISM MLA ELECTION MANIFESTO, 2018

1. Leilung hausakna leh hydel project atanga kan chanvo tihpun.

2. Assam enkawl lai Innerline Reserved Forest laklet tum.

3. Eizawnna hna thar 1,50,000 aia tlem lo siam.

4. Kum 2020 atanga unemployment allowance pek.

5. Hna thawk duh tana work permit siam.

6. Mizorama state pawn mi inhlawhfate chhiah laksak.

7. Theological (eg. ATC, AICS etc.) degree pawm.

8. Sports association hruaitu-a active politician tel khap.

9. Works department chang lo Chief Minister.

10. Minister leh MLA hlawh leh facility tihtlem.

11. District leh Civil Sub-Division ramri siam that.

12. Town-a Municipal din vek.

13. Village Court-te 2nd Class Magistrate thuneihna pek.

14. Power & Electricity Department leh Printing & Stationery Department te corporation-a leh.

15. Minister leh MLA te kum tin an thil neih puanzartir.

16. Eiruk hmang man mai baka an eiruk sa chhuhsak.

17. CBI-te general consent pek.

18. Ration-a buhfai, chini, khawnvartui leh tel sem.

19. Pawl leh mi mal hnuaia hnathawkte pension, medical, leave, maternity leh accidental benefit siamsak.

20. Tar pension thla khatah kum 70 – 79 tan Rs 1000, kum 80 – 89 tan Rs 1500 leh kum 90 chin chunglam tan Rs 2000 pek.

21. In hmun nei lo chhungkuate in hmun pek.

22. Chenna in nei lote in saksak.

23. Hmang tangkai si loa ram zau pui pui neite ram chhuhsaka ram nei lote ram pek.

24. Paper Mill, Saw Mill leh Plywood Mill din.

25. Bairabi HEP, Tuivai HEP leh Kolodyne Phase II HEP te bawhzui a, hydel project atana ruahmanna awm dang tihtawp.

26. Kawngpui enkawl hna outsource.

27. In tin internet pek.

28. Aizawl leh khawpui dang zauh leh khawpui chhung kawng zauh.

29. ‘Look West Policy’ kalpuia Bangladesh nena insumdawn tawnna tha neih.

30. Loneitute tharchhuah hralh theih nana regulated market kalpui.

Aside | Posted on by | Tagged , | Leave a comment

ZAN-A MU THEI LOTE TAN: by Tluanga Hualngo

Zana muthlih theih loh hi hrehawm tak a ni. Kan mut a chhuak em em a, mahse, kan muhil thei tlat lo mai a, zingah hmâ taka kan thawh a tul bawk si, buaithlak deuh mai a nia.

Zanah awlsam tak leh tui taka i mut thei nan heng ka sawi tâkte hi lo in ve ta che:

1. Balhla pumkhat kha fai takin sil la, a hmawr ve ve atang tan bung rawh. Chuan, Thak-thing phut fian (table spoon) khat nen tui glass no khat nen chhum rawh. Rei chhum a ngai lo, a so chuan a tawk. Chu chu a sat tawh loh hunah mut dawnah i in ang. I mut a tui viau ang. Taksa tan a hrisel bawk si.

2. Pudina hnah 5 velin la la, tuiso-ah thlak rawh. Tuino glass khat ni se. Chu chu mutdawnah i in ang.

Muttui

Aside | Posted on by | Tagged , , , | Leave a comment

THINLIAN/THIN NATNA (JAUNDICE/HEPATITIS)- Dr. C. Lalrampana

Thinlian (Jaundice), thin natna hi natna chikhat a ni buaipuiawm tak a ni a; Mizo chuan ‘Thinlian’ kan ti a; hei hi a awmtirtu chu natna te ber chi, tur inkaihnawih theih, leh damdawi tur nghawng tha lo avanga awm thei nia ngaih a ni. Thin atanga mit lo luang tur daltu a awm hian thisenah mit a lo tam a; chu chu mitliam (Jaundice) an ti mai thin. Hetianga a awm chhan hi mit luan bona kawr tereuhte te kha hnawhtu a awm avangin an luang ral thei lova chuvang chuan thisenah mit a lo luang lut thin tihna a ni. Mit chu thisena a luan tawh chuan thisen chuan a lo fawp darh a; chuvang chuan mit leh vunte a lo eng chhuak thin a ni. Infection Hepatitis hi tuibawlhhlawh in atanga taksaah natna hrik te reuhte te virus a luh vang a ni ber. Mithiamte chhut danin hetiang natna vei zinga za zela 15%-in an thihpui thin nia ngaih a ni. He natna hian tumah thliar a nei hran chuang lova, ngam loh lah a nei lem hek lo. A salbeh tawh chu thlah a tum vak tawh thin lo. Hepatitis hi A; B; C; D; E; F & G thleng a awm a. chungte chu a mal malin tawite tawitein han belchiang lawk teh le:

HEPATITIS ‘A’
Hetiang thin natna hi Hepatitis ‘A’ natna hrik avanga awm a ni a; HAV tia hriat lar a ni a; mihring leh mihringina inkaichhawn theih a ni. Ei leh in leh ek atangtea inkaichhawn theih a ni. Hetianga inkaichhawnna hi ‘Fecal-oral’ an ti thin. Mirethei chhumchhia awmkhawmna hmun leh chettawp luaktukna hmunah inkaichawn awlsam bik hlea ngaih a ni bawk. Mipa rawlthar leh mipa puitling Sex hman avangin hetiang natna hi inkaichhawn a awlsam em em bawk. Tin, damdawi hman sualna avanga inkaichhawng tam tak an awm bawk.

HEPATITIS ‘B’
Hei hi thin natna chi khat Hepatitis ‘B’ virus (HBV)-in a thlen a ni. A bikin hriau thianghlim lo inhmantawmna avanga inkaichhawn awlsam em em a ni. Tattoo chhut kai nana hriau zum thianghlim lo inhmanpawlh avangin inkaichhawn a awlsam em em bawk. Hetiang veite chu an chau ngawih ngawih a, an luak a chhuak a; an zun a nu dum deuh nguai a, an ek a eng dal dang thin.

HEPATITIS ‘C’
Hei hi thin natna chi khat Hepatitis ‘C’ virus (HCV)-in a thlen a ni. Thisen thianghlim lo inpek pawlh avangte leh hriau thianghlim lo inhman pawlh nasat avang leh hemodialysis avangtea inkaichhawn theih a ni. Tin, thlan atang leh chil per atang pawhin inkaichhawn a awlsam hlea ngaih a ni. He natna atang hian Cancer leh cirrhosis kai awlsam hle bika ngaih a ni bawk. Sex hman avanga inkaichhawn erawh a awm meuh lo. Tihdam pawh a harsa a; mahse, tihdam theih a ni.

HEPATITIES ‘D’
Hei hi thin natna chi khat Hepatitis ‘D’ virus (HDV)-in a thlen a ni. Hepatitis ‘B’ veisa atanga inkaichhawn a awlsam bik. Hriau thianghlim lo inhmantawm avang leh Sex hman avanga inkaichhawn theih a ni.

HEPATITIES ‘E’
Hetiang natna Hepatitis ‘E’ hi natna tam vak lo a ni a; Hepatitis ‘E’ virus (HEV)-in a thlen a ni. Ei leh in atang leh tui thianghlim lo in atangtea inkaichhawn theih a ni. Hei hian thin natna hlauhawm tak a thlen em em lem lova, invenna vaccine hranpa teh chiam a ngaih loh avangin antiviral damdawi hman ve mai theih a ni.

HEPATITIES ‘F’
Hei hi thin natna chi khat Hepatitis ‘F’ virus (HFV)-in a thlen a ni. Thisen test atanga a lan danin hetiang natna hi a tlem hle a; eng atanga lo awm nge tih pawh hmuh chhuah a la ni chiah lo bawk.

HEPATITES ‘G’
Hei hi thin natna chi khat mahse, a nihna chiah leh a chhan dik tak finfiahna la awm lem lo a ni. Hetiang natna hi a hlauhawm chi leh hlauhawm loh chi pawh chiang taka thliar hran theih a ni rih lo.

Ngun takin en la, Hepatitis ‘B’ & ‘C’-te khi a hlauhawmin a dam har ber a; inenkawlna senso pawh a hau takin a buai thlak duh hle. Mahse, hengte hi enkawl hma chuan rang taka tihdamleh theih a ni. A dangte pawh khi enkawl thuai chuan tha takin an damleh thei tih hre reng ang che. Dawhkana Chukchu vak lai hi chema na taka i sah chhum hmawk chuan Chukchuin a tuar rual khan Dawhkan khan a tuar ve nghal a; a chhiat phah thin. A thihna tur tawk chauha i kut phaha i ben hlum erawh chuan a thi tur dik tak Chukchu chiah khan tuarin a thih phah a; Dawhkan chu him takin a awm reng thei a ni. Hetiang chiah hian Vai Damdawi (Allopathy) chak pui pui nghawng na tak tak hmanga natna hrik i chhut chawrh chawrh hian Dawhkhan chhana Chempuia Chukchu na taka sahhlum ang tho hian taksa khawlpui dangin a tuar ve nghal hrep thin a; chuvangin, natna pakhat enkawl dam anga i inngaih lai mek khan a dang enkawl ngaiin a lo awmleh nghal zel a; taksain nasa takin a tuar zui phah thin a ni. Chuvangin, a theih chhung chu vai dawmdawi aiin thawk muangin chhu na lo zawk mah se, Ramhmul damdawi (Herbal medicine) hi hman hram hram tum thin ang che. Herbal Treatment & Home remedy, ramhmul damdawite hmang hian I natna enkawl thin la Vai damdawi nghawng tha lo pui pui nei ai chuan a dam rangin a dam a chiang zawk tih hriain hmang uar hram hram ang che. Hepatitis enkawlna atana thate chu hetiang hian thlir ila:

THINLIAN DAMDAWI
Thin natna satliah Hepatities ‘A’; D’; ‘E’; ‘F’; ‘G’ –te tan heng ahnuaia tarlante hi a tha tawk hle a; vai damdawi ei vak vak ai chuan mihring taksaah nghawng pawi a nei tlem zawk a; khuarei atan a rintlak zawk bawk tih hre reng ang che. A engemaw ber hi hmang thin la, an rintlak em em tih hre reng ang che.

1. Tuktin zingkarah leh zantin mut dawna tui thianghlim tam tawk in thin a tha

2. Nitin Coconut tui pava 1 in thin a tha

3. Futui in a tha a, khawla her aiin kheh chawpa feh ngei a tha. Tin, a zikno la thur tel deuh hlek ni thei se a tha lehzual
Buhtun (Barley) tui in a tha
Tuilum in thin a tha

4. Neem tui leh khawizu inzata pawlhin black pepper dip1/2 tsp pawlha nitin v2in thin tur
Butter hmanga Purunvar kan ei thin atha.

5. Apple tui um (cider vinegar) leh Carrot tuipawlh in a tha
Buluih (Radish) hnah densawm tui no 1-ah basil tui thirfiante 1 pawlhin nitin vawi 2 kar 3 chhung in thin a tha
Nimbu tui firah tui thianghlim a inzata pawlhin vawi 3 talin a tha

6. Snake Guard hmanga siam thingpui in thin a tha
Khawizu thinfiante 1, buhtun powder thirfiante 1 leh tui no 1 pawlh nitin v2 in thin a tha.

7. Zingkarah Tomato tuiah chi leh pepper tlem pawlh in thin a tha

8. Jaundice Berry hnah densawm tui emaw a powder emaw nitin in thin a tha.

HEPATITIES ‘B’&’C’ DAMDAWI BIK
Thinlian natna dam har chi leh tawhkhrih tak Hepatities ‘B’ & ’C’-te tan heng a hnuaia mite hi vai damdawi aia tha zawka ngaih a ni a; Damdawi in atanga beidawng haw tawh tam takin an dampui hlauh thin avangin hetiang natna hi i vei emaw, I chhungten an vei emaw a nih chuan a engemaw ber hi hmang mai rawh.

1. Chakai leh tumbu den pawlah chiu tlem telha in thin a tha

2. Mutih kau var rah leh thing hmarcha ei pawlh a tha a; tin a rah a awmloh chuan a hnah leh thing hmarcha ei pawlh a tha hle bawk.

3. Japan hlo hnah densawm tui no ½ ah khawizu 1tsp leh Nimbu tui fir no 1 pawlh nitin zingkar chhun leh zan mut dawnah in thin a tha.
Lambak hnah densawm tui zing tin in a tha.

4. Ramhmul chi hrang hrang hmanga Genesaret Herbnal-in a siam BR-Mix Nitin rialno 1 khat zel vawi 2 in thin a tha hle bawk.

5. Aidu leh chakai densawm ei a tha

6. Mithi sunhlu hnah a zungte thlengin densawma Bawnghnute no khat nen in a tha.

Heng zingah hian serial No. 2; 3; 4-te khi an tha zual bik a, chung zingah pawh chuan No. 2 & 3 khi tha bik leh zuala ngaih a ni.

Aside | Posted on by | Tagged , , , | Leave a comment

KAN REVEREND/DOCTOR-TE BIHCHIANNA (Doctor of Divinity (Honorary Doctorate) hi hmingbula dah chi a ni em?)

1. THUHMAHRUAI
Mizo Christianna in Kum 100 hmêl kan hmuh  ve meuh chuan, Pathian Thu zir mi, Mithiam kan ngah ve ta hle mai. DUHSAKNA DEGREE (HONORARY) dawng pawh kan ngah ta hle mai bawk. A lâwmawm viau lai hian tlêm chu kan zir chian a ţhat a rinawm ta.

Mizo zinga HONORARY DOCTORATE degree nei te hian Hmingbul (Formal Title) ah an dah deuh vek mai a. Zirchhuak-te nên mipuite tân hriat hran an har ta hle mai. He ti nuaih nuaih-a kan kal chuan a dik dawn leh pek lo. REV. DR. kan ngah tulh tulh anga Kohhran hi a ho tulh tulh mai ang tih te pawh a hlauhawm ta.

  1. KEINI (MISUAL) HO BAWK HIAN CHING CHHUAK LEH TEH ANG U
    HONORARY DEGREE kan tih mai hi Latin ţawng HONORIS CAUSA aţanga lo kal a ni. Mi chung chuang bîk, khawtlâng leh ram tâna contribution ţha chungchuang nei te tân a ni. Chumi-ah chuan an hnathawh a field a dang ang angin chawimawina an hlan dân pawh a dang ţhin. A tlângpui thuin heng ang Degree hi hlan a ni tlângpui.

Doctor of Law (LL.D.)
Doctor of Letter (Litt.D.)
Doctor of Science (Sc.D.)
Doctor of Pedagogy (Ped. D.)
Doctor of Divinity (D.D.)
Doctor of Music, etc.,

Mizo fate dawn tam tak hi Pathian rawngbawltute an nih tlângpui angin Doctor of Divinity (D.D)  khi niin alang.

HONORARY DOCTORATE degree dawng hmasa ber nia lang chu Lionel Woodville a ni a. Kum 1470 khân University of Oxford chuan a hnathawh ţhat chungchuan avangin Doctor of Divinity Degree, Duhsakna hi a hlan a. A hnu-ah phei chuan Salibury Bishop-ah a ţang zui ta nghe nghe a ni.

  1. MI RAM-A AN HMAN DÂN
    Khawvêl ram changkâng, First World Countries kan tih mai UK, Australia, New Zealand, America leh ram dang engemaw zât ah chuan, hetiang CHAWIMAWINA HONORARY DOCTORATE DEGREE AN HMUH HI HMINGBUL (FORMAL TITLE)-AH AN DAH VE NGAI LO. An chanchin ziakchhuahnaah erawhchuan Honorary Doctorate Degree a lo lâk tawh te nen lam an sawi chhuak thung ţhin.

Amaherawhchu, khawvêl pumpuiin kan ngaihsân rawn, Pathian rawngbawltu ropui Billy Graham te ang erawhchu miten phu hliah hliah-a an hriat avangin an dah sak a ni. AMA KA AŢANGIN “DR. GRAHAM-A KA NI” TIA A INSAWI HRIA ERAWH TUMAH AN LA AWM LO, AN TI.

Amah Billy Graham hian Honorary Doctorate degree hi hmun (Seminary leh University) hrang hrang 20 aţangin a dawng daih tawh zawk a ni. Zirna pangngai-ah chuan, Wheaton College aţanga B.A.  degree a neih bâk thildang tehchiam a nei hran bik lo. MAHSE, REV. DR. A NIHNA LAM AIIN A RAWNGBAWLNA AVANGIN MITE ZAH LEH NGAIHSÂN A HLAWH ZAWK A NI.

  1. FORMAL TITLE-A HMANG TEN SAWISÊL AN HLAWH
    Benjamin Franklin chu University of St. Andrews in 1759-ah leh, University of Oxford in 1762-ah te khan a “Scientific Accomplishments” avangin Honorary Doctorate Degree an hlân a. Hemi avang hian amah leh amah chu, a Hming bulah “DR. FRANKLIN” a inti ta mai a, sawisêl a hlawh nasa hle.

Peter Hollingworth Governor – General of Australia (2001-2003) chuan a Hming-bulah “Dr.” dahin, ”DR. HOLLINGWORTH” a in-tih avangin sawisêl a hlawh hle bawk. Ani pawh hian Honorary Doctorate Degree hi Australia ram University hrang hrang 6 lai aţangin a dawng tawh bawk a ni.

  1. SAWI-BUAI THEIH A NI TLAT MAI!
    Kum 2001 khân George W. Bush khan B.A. a lo zir chhuahna, Yale University chuan Honorary Doctorate hi hlan an tum a. Mahse, Zirlaite leh Faculty-ten an pawm thei tlat lo mai a, an boycott ta hial a nih kha.

Kum 2005 khân University of Ontario chuan, Dr. Henry Morentaler, Medical Doctor, (Gynecologist) chu Honorary Doctorate pêk an tum a. Mahse, Canada ramah Nau tihthlâk (Abortion)-ah hming-chhiatna lo nei tawh a nih avangin Mipui 12,000 laiin an hming ziak-hnan (Signed) meuhvin University-ah duhlohna an thlen a nih kha. Khing kan sawi te khi entirna ang chauh a ni. A dang pawh sawi tur a tam hle ang.

  1. MIZORAMA KAN HMAN DÂN HI…
    Mizoramah chuan, Chawimawina – Honorary Doctorate Degree dawngte hian, an Hming-bulah “Formal Title” angin an hmang deuh vek.

Lehkhabu leh Article an ziak rêng rêngah pawh an dah zel a, Programme-ah an telna zawng zawngah pawh an dah tel zel.

A duh thawh zualin a tâwp lamah D.D. tih emaw an la ziah belh bawk.

An Visiting Card (business card)-ah pawh an dah vek tlangpui.

  1. MIZORAMA KAN DAWN DÂN HI A NGAIHSÂN TLÂK EM?
    FIMKHUR NGAIHNA TE.
    Bible Seminary tam tak leh University tam takah chuan sumdawnna chikhat a ni tawh.

An Mission/Seminary sponsor theitu turte hi Honorary Doctorate degree an pe ţhin tawh.

Bible Seminary ţhenkhat-ah chuan, Rs.15,000/- in lei tur a awm laiin, ţhenkhat chuan Rs.20,000 an phut.

An Honorary Doctorate degree pêk tam tak chu Sponsor zui turin an intiam tir loh pawhin Sponsor zawn sak turin an in tiam-tir ţhin.

He Post Ziaktu pawh hi Bible Seminary 2 ten Honorary Doctorate pêk an tum ve tawh ka nih avang leh, Bible Seminary hrang hrang lo deal ve tawh ka nih avangin, rinthu sawi mai mai ka ni lova, a taka ka thil tawn aţanga sawi ka ni.

HETIANG HI THIL AWMDÂN NI MAHSE “MIZO-TEN HONORARY DOCTORATE DEGREE AN DAWN ZAWNG ZAWNG HI A LEM A NI” TIHNA LEH “AN QUALIFIED LO VE” TIHNA CHU A NI HAUH LOVA, PHU HLIAH HLIAH LEH ZAHAWM TAKA DAWNG CHU TAM TAK AN AWM ANG TIH CHU I RINGHLELH LOVANG U.

Hei erawh hi hre rêng ila, A PERSON WITH INTEGRITY IS A ONE-MAN ARMY.

By Rev. Dr.L.R. Colney, Founder/President, Restoration India Mission, Odisha.

POST SCRIPT:
“IN SOME COUNTRIES, RECIPIENTS OF AN HONORARY DOCTORATE MAY, IF THEY WISH, ADOPT THE TITLE OF “DOCTOR”. MANY UNIVERSITIES, HOWEVER, REQUEST THAT AN HONORARY GRADUATE REFRAIN FROM SUCH PRACTICE. A TYPICAL EXAMPLE OF UNIVERSITY REGULATIONS IS, “HONORARY GRADUATES MAY USE THE APPROVED POST-NOMINAL LETTERS. IT IS NOT CUSTOMARY, HOWEVER, FOR RECIPIENTS OF AN HONORARY DOCTORATE TO ADOPT THE PREFIX ‘DR.'”

  1. “Education Quality Accreditation Commission”. http://accreditation.info. 
  2. “Oxford Brooks University Regulations”

3. http://en.wikipedia.org/wiki/Honorary_degree).

SOURCE:-
http://www.misual.com/2009/06/29/kan-reverenddoctor-te-bihchianna/
http://lr-colney.blogspot.in/2011/08/kan-reverend-doctorte-biah-chian-na.html
http://www.drjohnhlychho.com/2014/11/doctor-of-divinity-honorary-doctorate.html

Aside | Posted on by | Tagged , , | Leave a comment