MIZORAM SUBORDINATE SERVICES SELECTION BOARD(MSSSB) DIN TUM HI

Kan hriat angin Nimin Ni 11 June 2019 a Council of Ministers thukhawmin Mizoram Subordinate Services Selection Board din tumna a pawm thu kan hria a.Hemi chungchang ah hian mipui nawlpui in hrilhriat nan leh Mipui te tan thil tha zawk tur ngaihtuahna kan sen theih nan tlem sawi ve ka duh a…

Mizoram Subordinate Services Selection Board chu enge a nih?

Kan hriat angin tunah hian Sawrkar hnaruak grade pay Rs 4200(UDC chunglam) hi Mizoram Public Service Commission(MPSC) in a la/conduct a. Hna lak hi hlawm lian chihnih in a then theih a. Chu chu Gazetted chin/officer leh non-gazetted(employee) a ni a.

Gazetted ah hian chi hnih : group A leh Group B. A langsar zual thenkhat chauh sawi ta ila. Group A ah Mizoram Civil Service, Mizoram Police Service, Mizoram Information service, Mizoram etc.

Group B gazetted ah hian a langsar zual chauh sawi leh ta ila. State Tax Officer, Employment Officer, Supply Inspector etc te an nia.

Group B ah hian non-gazetted an awm leh tho a. A langsar zual thenkhat : UDC, Assistant Grade, Sub-Inspector zawng zawng, Teacher, Nurse etc te an nia.

Group-B (Non-Gazetted) hna ho khi MPSC ina exam a conduct thin chu Mizoram Subordinate Services Selection Board(MSSSB) din tum hian a conduct tawh dawn tihna a ni.

Mizoram Public Service Commision leh MSSSB danglamna tur

Mizoram Public Service Commission hi India danpui(315 to 323, Part XIV) hnuaia din a nia. Hetih tak maia danpui siamtu ten an ngaihpawimawh chhan chu dik leh fel taka hna lak a ni thei nan a ni. Dik leh felfai taka hna exam conduct tur chuan politics a inrawlh/political interference a awm tur a ni lo a. He thil political interference awmlo tur chuan thuneihna sang tak, anmahni a ro inrel, ban mai mai thei lo, a ni tur a nia. Chu chu Danpui siamtu ten hre chiang in Public Service Commision member te chu SECURITY a pe a ni. Engtin?. Tam tak awm mahse point pakhat chauh sawi mai ta ila.

Public Service Commission, entirnan- MPSC member te ban tur chuan Supreme Court in Committee a din phawt a ngai a. Committee in an diklohna a hmu chuan President ah an thawn leh ang. A awmzia chu President chauhin a ban theih tihna a ni. A awmzia leh chu Mizoram kan minister te hian an ban theihloh a, an control thei lo tihna a ni bok. Danpui in a hum tlat kan tithei bok ang. Ka sawi tawh angin a tum ber chu Politics inrawlh loh/political interference awm loh hi a ni.

MSSSB ah lut leh ta ila. Chanchinbu a kan hmuhdan chuan he MSSSB din tum chhan ber pakhat chu ‘ MPSC chhawk zangkhai nan’ tih hi a nia. Hetia ngaihtuah chuan thil awm tak pawh niin a lang. MPSC lam erawhin hna exam conduct ah ‘ harsatna an nei lemlo thu an sawi a. Staff/thawktu erawh a indaih lo hle tih an sawi thung a. MPSC ina a thil buaipui hrang hrang hi hna hautak tak mai a nia. Staff/thawktu ngaihtuahin an efficient em em mai hi fak an phu hle bok. Hei chauh a ni lo. An hah tehlul nen staff te an polite em em mai te hi state sawrkar Department, mipui tana hnathawk ho hian en tawn hial thei se a lawmawm ngot ang.

Khimi atanga rilru a awm chu, Sawrkar tanchhan/argument MPSC chhawkzangkhai tih hi chhuanlam tha deuh niin a lang ta a ni. Chhuanlam a ni si chuan engvangin nge sawrkarin MSSSB din chu a rawt ta ang le?

MPSC, sawrkarin a control theilo atanga hna exam, sawrkar control thei kut a dah chu sawrkarna chelhtu Politician te tan chuan thil lawmawm tak a tling ngei ang. MPSC chhawk zangkhai a duh tak tak chuan staff/thawktu pek belh mai awm tak a ni laiin MSSSB din a tum ta mai hi chhan tha tak zawng a awm ngei ang.

Thil dang leh chu Danpui din nih loh Central ah pawh Staff Selection Commission(SSC) a awm tho a. Mizoram ah MSSSB din hi pawi tivaklo tu emaw sawisel lemlo tu an awm a rinawm a. Hriat tur erawh SSC hi Estimates committee of Parliament leh Administrative Reform Commission recommendation zulzui a din a ni tih hre bok ta ila. Heihi tlem sawifiah leh ta ila.

Central hnuai group-B (non-gazetted) hna ho hi SCC in a conduct a. Hetah hian tu te emaw hian an fate emaw, an party worker te lo duhsak turin Prime Minister emaw minister te an hmu a rin awm lo hle. Heng bakah hna exam an conduct dan hi computerised hle a. Online ten an exam a. Interview a awmlo bok a. Written a score tam an tling zel mai.

Mizoram chhung ah erawh bialtu MLA, minister te Ina len hi thil harsa lo tak mai a nia. Party worker emaw Election laia sum hmanga tanpui tute chu duhsak theihna mual ah chuan an lo duhsak viau zel ang tih hi chu hre mai turah indah vek ta ila.

MPSC in group-B(non-gazetted) exam a conduct avang hian thalai tam tak , sawrkar hna zing-a sang ho, entirnan- MCS te beisei ngam lemlo Graduate tam tak tan Sawrkar hna an luh theih na chance a lo awm ta a. 99% dik leh fel takin a lo conduct tawh thin bok a. Thalai tam tak tan chance a lo inhawn tak avangin nasa takin lehkha an zir a. A then coachiang hial te kalin a in prepare nasa hle a. Thalai tam tak kalsual tur pawh a veng tiin sawi ta ila ka sawisual ka ring lo. A chhan ber chu an zir phot a, an thiam phot chuan tling thei turin an inngai deuh vek a. A chhan chu a thiam/merit in hna an lak thin vang a ni.

Zir chianna mumal, committee recommendation ang pawh awm mumal lova(?), MPSC chhawk zangkhaina tur tih hi CHHUANLAM mai niin a lang. MSSSB din a tum thut mai hian ngaihtuahna a tithui hle.MSSSB hi eng ang chiahin nge din an tum ? Autonomous body tur nge? Executive resolution in nge act of assembly kan hrelo a. Engtin pawh lo din se, Thil chiang erawh Politics inrawlh- induhsakna kawngkhar hawnsak theihna chance a sang hle tih kan hriat a pawimawh hle.

MSSSB kutah Group-B (non-gazetted) an dah chuan mipui tam tak hian kan rin ngam ka ring lo a.
Thalai tam tak thil tum/ dreams leh beiseina/ theuh ta ila a tha awm e.

Aside | Posted on by | Leave a comment

SAWRKAR SUM DINHMUN A THA ZEL

Finance portfolio changtu Chief Minister Pu Zoramthanga’n kum 2019-20 Mizoram sawrkar bufget nimina Mizoram Asembly-a a putluhah chuan Mizoram sawrkar sum dinhmun that lam a pan zel tih a lang a.Sawrkar sum dinhmun tehna pakhat Gross State Domestic Product (GSDP) atangin Mizoram sawrkar leibat chu kum 2015-16 atangin a tlahniam a, kum 2015-16-a GSDP atanga Mizoram sawrkar leiba 41.77% chu kumin tawp lamah chuan GSDP atangin 32.66% a ni dawn a ni.

Chief Minister chuan “GSDP atanga teha a kum tela kan leiba neih zat tlahniam zel hi thil lawmawm tak a ni a, kan phurrit tizangkhai tura theihtawp lo chhuah tawhtute zawng zawng chungah lawmthu ka sawi a, fak an phu tak zetin ka hria” a ti a ni.

Chief Minister chuan ram mipui dinhmun, hma an sawn leh sawn loh tehna Per Capita Income chungchang a sawi tel lo na a, Mizoram Per Capita Income chu a kum telin a sang chho zel a ni.

Heng thute hi sawirik a ni fo a, mahse, mi tam takin an awi hreh a, a awi hretute zinga mi ni thei ngei Pu Zoramthanga chuan Mizoram sawrkar sum dinhmun that chhoh zelzia chu a sawi ta a, a awi hrehte pawhin an awi ve thei tawh mai thei a ni. Chief Minister-in lawmthu a sawina leh a fak phu a tih chu sawrkar hmasa a nih loh chuan puh tur dang a awm lo a ni.

Sum lakluh a pung (revenue surplus) a, mahse, sum indaih lohna a awm zel tho (fiscal deficit) a, hei hi chu mamawh a san leh mamawh a tam zel leh changkan vang a ni ti ila, thui tak a dik a ni. Mahse, lungawi mai tur a ni lo a, Mizoram sum lakluh ve chu a hmuh tur beisei atanga 10.49% vel chauh a ni.

Thawhchhuah tipung tur chuan Chief Minister chuan chhiah khawn leh lak chu Mizoram sum hmuhna a ni a, ‘Mipuiten chhiah pek hreh lo ila, chhiah kan pek tling khawm atang hian kan ram hmasawnna tur kan su kaw hawk kawk theiin a rinawm” a ti a. Chhiah pe taima turin mipui a sawm a ni. Chuti a nih loh chuan sawrkarin sum hmuhna tur a hisap chu a hmu pha dawn lo a ni.

Sawrkar leibat pung chu insawiselna atana hman thin a ni a, dikna chen pawh a awm a, leibat hrim hrim chu kaluh leh hmanna a inbuk loh chuan pung leh awm lo thei a ni lo. Mahse, sawrkar hmasa pawhin a titlem tial tial thei a, chutiang tur chuan sum renchem te, hman thiam te, a hmanna tur dik taka hman te a ngai thin. Chu lamah chuan Mizoram sawrkar chelhtute chu mipuiin an thlir tih pawh a inhriat a pawimawh hle.

Nimina Chief Minister-in sawrkar sum dinhmun a sawi chu a hruai sawrkar thawhchhuah a la ni lo a, sawrkar sum dinhmun kum 2015-16 atanga tha chho ta chu sawi tak angin sawrkar hmasa thawh chhuah a ni. Chutiang dinhmun chu a MNF sawrkar chuan a vawngnung chho zel dawn em tih mipuiin an lo thlir dawn a, nakkum March thlaah tuna Mizoram sawrkar chu sum dinhmunah a hmel a lang chauh dawn a ni.

Mizo aw

Aside | Posted on by | Leave a comment

Journalist te ṭan an ngai

Matana pachau

Lawngtlai journalist te intuaitharna-a IPRO Pu C.Lalhruaitluanga’n a sawi – khawvel thiamna sang zelah journalist te tan nasa zawka tan lak a tul tih te leh internet tangkai zawka hman kawnga journalist te insangmar deuh deuh tur an nih thu te hi kan journalist te hian ngaihtuahzui nachang an hria angem aw? A bikin internet hmang tangkai chungchang te hi.

Hmannia Lelte in Pu Ct Rinawma hnena award a pek khan an pek chhan pakhat chu international news, Mizo te tana a ziah tam tak tangkai an tihna zawnah a ni a. A tangkai lah taka, Mizo tawnga chhiar te tan chuan.

Pu Ct-a hi a khat tawkin ka be zeuh zeuh thin a. A sawi dan chuan breaking news Mizo tawnga a rawn ziah te hi a hunawla internet news a chhiar atanga thingpui in pah tea a ziah a ni hlawm a.

Mak deuh chu Pu Ct-a dawn ang chiah chiah hi journalist te hian an dawng ve thei vek a, an phone atangin internet an neih phawt chuan BBC, CNN, Fox, ToI…khawvel ram tina news agency ten an puanzar hi an hmu thei vek a ni. Chu chu Pu Ct-a pawhin Mizo tena kan lo chhiar theih turin Mizo pa thlirna tel pah ten a rawn ziak thin a. Engvangin nge kan journalist te hian an tih ve zung zung mai loh? tih hi zawhna awm chu a ni awm e.

Kan sawi thin a, sawi leh ila…Mizoram kan journalist 95% hi chu journalist hming pu tlaklo khawpa thatchhia leh an hna thiamlo an ni a. Chu’ng ho chuan min chawm a, a hahthlak takzet. Journalism hi an umhlum lo chauh a ni ber e!

Pu Hruaitluanga fuihna hi thinlung leh tihtakzetin Lawngtlaia kan journalist te chauhlo pawh hian ngaihtuahzui se, social media te hi tangkai takin hman tum se, a sakechek ho luahlan vek tur khawpin tan an la thei a ni. A nih loh chuan “facebook journalist” ho thu report trenghneng te te hi kan c/p, forward chhen mai dawnin a lang.

Aside | Posted on by | Leave a comment

Pahoss beneficiaries te lawmpui

Chief Minister Pu Zoramthanga chuan nimin khan Parking House Support Scheme (PAHOSS) hnuaia beneficiary thlan chhuah batch hmasa ber mi 99 hnenah pawmpuina lehkha, Approval Letter a hlan.

Nimina Approval letter semchhuah hian sawrkar atanga Parking House sakna tura puih tiamna entirin, 1st batch atana tanpuina pek tur zat hi a vaiin cheng nuai 1,746 a ni. PAHOSS hi Aizawl khawpui AMC area chhunga traffic jam tiziaawm tura hmalakna niin, PAHOSS beneficiary te hian an in sak sa emaw sak lai mek leh la sak turte emaw, man chawia vantlang motor park-na atan an buatsaih dawn a ni.
PAHOSS atan hian Mizoram sawrkawrin kum 2018-19 budget ah Rs 1000 lakhs dah a ni a. Kum 2019 2020 budget ah Rs 6000 lakhs a dah leh bawk.

Aside | Posted on by | Leave a comment

MLA FUND PUNG

Finance minister Pu Zoramthanga CM chuan MLA fund nuai 50 a tihpun a nih thu a sawi

Nimin June 13,2019 Budget Session zawha Press mite a kawmnaah Pu Rama chuan kum 1 chhunga MLA fund cheng vaibelchhe 1 ni thin chu nuai 50 a tih pun a nih thu zawhna chhanga sawiin, kum 1 atan MLA fund chu cheng vaibelchhe 1.50 a nih tur thu a sawi.

Aside | Posted on by | Leave a comment

ZOHNUAI AH VAI THEKA CHHAWR TIH TAWP A NI DAWN

Ṭhekaa vai chhawr khap
YMA in vai an hrek

YMA Zohnuai Branch Executive Committee meeting no.7 of 2019 Dated 11.06.2019 chuan Vai theka a chhawr chungchang ngun taka ngaihtuah a ni a, Dt. 1.07.2019 atangin Zohnuai huamchhungah hian Vai theka a hnathawh phal a ni tawh lovang. Tin, theka a chhawr mek te zingah emaw, theka a hnathawh chungchanga harsatna nei kan awm a nih chuan Branch YMA Secretary hnen ah a rang lama hrilh tur a ni ang a, Branch Executive Committee in an chungchang a ngaihtuah nghal ang.

Vai theka a thawk lui an awm a nih chuan an chungah YMA Zohnuai Branch in hma a la ang.

Aside | Posted on by | Leave a comment

Group B te Mizoram Subordinate Services Selection Board hmanga lak remti

Ni 10. 6. 2019 Chief Minister Pu Zoramthanga hova Council of Ministers, CM Cabinet Meeting room-a thukhawm chuan Mizoram Public Service Commission kaltlanga hna lak tam lutuk chhawkzangkhaia, an hna lak leh thawh turte a hun tak zela MPSC in an kalpui thin theih nan Group “B” Non-Gazetted recruitment chu MPSC mawhphurhna atanga lachhuak a, Mizoram Subordinate Services Selection Board hmanga lak thin ni tawh se tiin a rel a, hemi atan hian Mizoram Subordinate Services Selection Board din tura thutlukna siam nghal a ni.

LDC, UDC, Assistant, Taxation Inspector, contract teacher etc. a huam.

Aside | Posted on by | Leave a comment

BIBLE HOUSE BUL LEI DAWH A CHIANGKUANG LO.

Hriatna monthly news megazine a mi
Zd Lalvunga ziah ka rawn copy/Paste e.

Sorkar hmasain Bible House bul lei’ Girder bridge ah hian thil felhlel a lo inphum ru nual a ni.He hnathawk tur hian blue hill Engineering Firm chu thlan an ni a.Estimate Amount pawh mipui hmaa puan chhuah chin chu cheng nuai 222(laks) a ni a.
He hnathawk tur hian, blue hill engireering team chuan Design siamin sorkar pawhin an la pawn puiin hna tak² thawk tur meuh chuan Blue blue hikk Engireering team te chuan M.P. Steel Franrication, Peter street khatla te chu an ruaia, Blue hill engineering team hian Design bak hi an khawih lova, M.P. Steel Fabrication hian steel work bridge bik hi 99.90% an thawk a ni.

Blue hill engineering chuan Construction Design, Sawrkarin a pawm(Approve) tawh sa chu, Deptt.hriat lohvin anmahni thuin an ti danglam daih a. He bridge atana thir hman tur tam tak chu an titlem ta vak mai a. Hetiang thul pawimawh, mipui sum hmanga dik lo taka tih a ni hi a hmangtu mipui leh lirtheu te tan a him lo tak zet a ni.

THIL DIK LO
1) Top chord(End member)Internal Blade 20mm hman tur anih laiin 16mm chauh hman a ni.

2) Top chord(Mod Member) hi 16mm hman tur a nih laiin 10mm chauh hman a ni.

3) Coss Grider hi 2 Number of ISMC 250(20mm) hman tur a nih laiin OSMB 600 hman a ni.

4) Sway Brave 2 ISMC 250-400T/5T hman tud a nih laiin ISMB 350(MIDDLE) leg ISMC 400(Single) hman a ni.y

5) Bracing 2 ISA 150✖150✖16.16 B/B hman tur a nih laiin,2 ISA-65✖65✖6mm chauh hman a ni.

6) Stringer ah ISMB 350 hman tur a nih laiin ISMB 300 hman a ni.

7) Diagonal (Mind member) ah hian 20mm hman tur a nih laiin 16mm leh 10mm hman a ni leh a. Blades pawh dah kim a nilo.

8) Vertical (Mid member) ah hian 20mm hman tur a nih laiin 18/10mm hman a ni a, Blades pawh dah kim a ni lo bawk

  1. Shear connector ISMC 75 pawh a nihna anga hman a ni la (Angle 65 x 65 x 6mm) chauh hman a ni leh bawk.

Heng atang mai pawh hian he lei(bridge)- ah thilmak pui pui a inphum a. He Grinder Bridge, Bible House bula mi hi Dept. official-ten Dt.22nd January 2019 khan mipuite hman theih tura an hawn kha a ni.

SUMTHUNINU AN CHHUI DAWN EM?

Construction of Girder Bridge,Bible House bul Upper Khatlaa mi lei mipuiin kan hriat dan chuan mizoram sawrkarin Tender a chhuah cheng nuai 222 (laks) kha Blue Hill Engineering-ten am thawh zawh tak, thil fel lo tam tak awm dan chu hetiang hi a ni..

  1. Complain Tresle: A awmzia chu Dawhkan hnuai dona, Steel Iron-a siam chumi atan chuan Rs 3,700,000/-(Thirty seven lakhs) hi he Aizawl lei atan sanction leh a ni. Hei hi Temder lova pek a ni. He Tresle hi an tangkaina awm lovin thiah leh vek a ni.

An thiah hnuah Steel ho hi Footpath siam nan hman leh vek a ni. (He Tresle siam hi Dawt hmanga tih vek niin a lang). He Tresle hi teh in(Measuring)-in Estimate chu Rs.1,000,000/-(Ten lakhs) in a Complete theih nia a lan laiin, Rs.3,700,000/-(Thirty Seven lakhs) ngawt hi sanction a ni daih si a ni. Nakin ngaihtuahna a kal thui thei hle a, sum indaih lohna kan ngah tehreng nen ‘A Mak’ tih loh rual a ni lo.

  1. FOOTPATH/ PREDESTRIAN OVER BSRIDGE: He Footpath hi mipui hriat miah lohva sum siam belhna a ni. Hemi atan hian Deptt. Hian tender a chhuab (Float) lovin Rs.11,100,000/-(one crore eleven lakhs) teh meuh mai sanction lehin footpath siam nam a bungraw lei ho hi Tresle siam tawh sa, thiah lehna material kha an hmang tih kan sawi tawh kha. Nuai za chuang an sanction naah hian a tak takah he footpath Rs.2’500’000/-(twenty five lakhs)-a siam zawh theih nia a lan laiin nuai za leh sawm leh pakhat tehmeuh mai sanction a han ni leh hi khawvel thilmak 7 zinga pariatna tal a ni ngei ang. Mipui hriat miah lova heng thil siam pahnihte uchuak taka an sanction hi sawrkar kal liam ta CONGRENG sorkar PWD hmanga a ruka Blur Hill Engineering Team leader pu Zahawm tak Dr.R.Lalthlamuana hnena hlan in a kutah an dah a ni. (without any complain and negotiate))

He thil dik lo tam tak mai hi, Steel Engineer or M.Tech te Ruaiin ACB( Anti- Corruption Bureau) hian chhui chhuak nhei turin Director ACB ah Criminal Complaun Dt.11/3/19 khan thehluh a ni a.

He Complain thehluh a nih hian ACB lam chuan hma la nghalin chhui chhuaka lailang turin chhui phalna pe theitu Vililance Deptt. Chuan ngaihtuahin chhuanlam dawrawm tak siamin an la mgawih bo phi ta rih a ni. ( He thu ziah lai hian) anmahniah interest awm lo turah ngaihsak rih phawt ang.)

Thilmak tak lo lang ta chu, hetiang taka thil diklo leh fel lo hi engvangin nge Detpp.Approval ang lova Agreement a ruka siam danglama, Blue hill Engieering team leader R.Lalthlamuana hian bumna anga hna a thawh hnua Completion Certificate neia Bill hi a lakchhuah fai vek hian Dan rorelna a thleng tawh niin a lang a. Lo hum tum leh hna lo latu Deptt. An awm a nih vaih chuan “Kohluihna ri”an la hriat ngei lo beisei phawt ang u.

Lalbiakmuana Chhakchhuak

Aside | Posted on by | Leave a comment

VAI MISTIRI RILRU

A hming chu Ali-a lo ni ta se. Ali-a i rawih tirh chuan hlawh tam a beisei lo ang. A zah em em ang che. ‘Ti rawh,’ i tih apiang a ti nghal mai ang.Tan hun hmain a lo thleng ngei ngei ang a, nilengin taima takin a thawk ang a, ban hunah pawh a la thawk malh malh ang.Eng vangin nge a taihmak em em? A hlawh bak beisei a nei a ni!

Chutianga kar hnih chuang a thawh hnuah Ali-a chuan, “Ka pu, ka permit a thi a, a thar min siamsak rawh” a ti ang! I han ngaihtuah a, fel i ti em em mai si a, siamsak loh ngawtna chhan tur i hre mai lo. I tih tur chu “Aw!” tih deuh chiah a ni. A bak chu i thlalak leh ID chiah a dil ang che. A va han awlsam em!

Vai mistiri fing chuan DC office lama an permit siamtir hna chu mi dang an tihtir daih mai a. Anmahni zingah hian a ti thang an awm a, hlawh neiin an tihtir mai thin a ni. Chuni chuan DC office-ah leh in Local/Village council hruaitute thlengin a hmelhriat vek! Mahni ngei inlan a tul chuan ni khat bak hna a thulh lo vang.

A ‘vai pass’ thar a lo chhuah hma chuan, hnathawhna hmunah bak khawiah mah chhuakvak lovin inah a tawm ngat ngat thei a. A pass a lo chhuah hnuah chauh a leng chhuak ang.

Pass a nei ta. Sponsor-tu copy i dil loh chuan a pe kher lo vang che. Sponsor-tu hian kan copy hi kawl nachang kan hre lo tlangpui!
Pass a neih hnu ka hnihna velah, “Ka pu ka hlawh min punsak rawh..” tih thu a sawi ri faih faih ang. I pun loh chuan hmun danga hna hmu thei angin a lang tlat lehnghal. Ali-a chu a fel i ti si a, a hlawh i punsak ta a.

A hlawh i punsak hnu chuan a sahdah nuai chhung a rei hret tih bak danglamna a nei lo. A thatchhe ta zawk mah mah em ni tih tur a ni.

I sawisel a. “Hna a tam si a, mistiri pakhat rawih belh loh chuan kan zo har ang,” a ti leh ang. Amah aia naupang, mistiri patuai in rawih belh ang. Humhalh chunga hna a zirtir bakah hna awlsam lai hlir a thawhtir avangin mistiri thar chuan hna a thiam tak tak em tih i hre thei miah lo vang. Chumi bakah ‘mistiri thar’ chuan ‘head mistiri’ Ali-a hnenah, ‘hna hmuhsak lawmman’ eng zat nge a pek phei chu i hre lo lehzual ang.

Thla hnih leh ni li a liam ta! In i la sa zo lo. “Balu/brick hi a tha vak lo..” a ti zauh ang. A man ngaiin a aia tha lei tur a hriat thu a hrilh ang che. I lei chhintir ang. A tha tak tak ang. I leitir chhunzawm zel ang. A tha tak tak em tih i hre chhunzawm tawh lo. Ali-a chuan commission eng zat nge a lak tih pawh i hre tawh chuang lo. A zuartu dawr leh nang, a man petu inkarah Ali-a chu a awm ta tlat mai a. Dawrah balu/brick man pe lovin Alia hnenah hlir i pe ta mai a ni.

Thla thum a ral a. In innel viau a. “Mami/Mama a dam em?” tih nachang a hria a. Karimganj lama an chhungkaw chanchinte a hrilh che a. “Ka pi/pu/pa/nu.. dam lo.. fapa nupui neih.. kan khuaah haw lawk a ngai,” a ti tan ang. A lo haw apiangin coconut a rawn hawn ang che. Mistiri thar zawk chuan a ai a awh tam tial tial ang.

Thla li leh ni li a liam leh ta! In sak i la zo si lo. Ali-a chuan chawlh zeuh zeuh a ching a, i rawih tum hauh loh mistiri thar chu a ‘regular’ ta mah mah zawk a. ‘Hna a thiam lo’ i tih dawnin a harsa laiah Ali-a chu a awm zel bawk si.

Thla rukna. Plaster hna in zawh veleh vai mistiri hnawih hna chu a tawp tawh dawn.A va nuam dawn tak em! Ali-a chu kar khat lai te ‘an khuaah a pa dam lo kan turin’ a haw leh thin. I ring tak tak em? Alia chuan i hna pek theih chu a tawp dawn tawh tih a hriat avangin hna dang a zawng tan tihna a ni! Tichuan, mistiri junior chuan a hmawr a bawksak ta che a nih chu!

Ali-a chuan a helper –te hlawh atang leh a junior mistiri-te hlawh atangin chanvo a nei maithei. I bungrua a chahsak che avangin commission a ei mai thei. Chu chu tunlai thil awmzia a ni!

Lengzem (edited)

Aside | Posted on by | Leave a comment

Ruihhlo do kawngah YMA leh sorkar thawkho dawn

MIZORAM POLICE SUB-ORDINATE OFFICERS’ ASSOCIATION
GENERAL HEADQUARTERS : AIZAWL : MIZORAM

PRESS RELEASE Dated 9.6.2019

Tunhnaia Social Media kaltlanga Bawngkawn Police Station kawta Police duty-te leh mi thenkhat intihbuaina ni awm tak video clip leh thu theh darh chung changah thudik hailan a nih theihnan Mizoram Police Subordinate Officers’ Association (MPSOA) chuan June ni 7, 2019 (Zirtawpni) khan SP Aizawl Conference Hall-ah Extended Emergent Meeting a ko a. He thil thleng hi uluk taka a zir chian hnuah hetiang hi a thil hmuh dan a ni.

Ruihhlo in Mizo thalaite pul hri ang maiin a man a, thalai duhawm tak tak kan in vuiliam zawih zawih avangin Mizoram a rum a. Ruihhlo do kawnga sawrkar tha tichak tur leh Mizo thalaite venghim turin ni 5.8.2016 khan Mizoram sawrkar bultumin Mizoram Police, Excise & Narcotics leh Central YMA te chuan thawhhona thuthlung an lo siam ta hial a ni. Tichuan, Police, Excise & Narcotics leh Central YMA Kumpuan Committee hnuaia Supply Reduction Service (SRS) te chuan dar inngheng rialin Mizo thalaite ruihhlo laka venghim turin tha kan thawkho ta a ni.

Hetia lungrual taka kan thawhho laiin ni 1.6.2019 (Inrinni) zan khan vanduaithlak takin SRS duty-te leh tleirawl rualkhat inkarah inbakkaihna a lo thleng a. Police hotute thupek ang zelin Police Station-a duty-te chuan kan phak tawk leh theih tawkin kan tihtur chu kan ti zel a ni. He buaina chungchangah hian thiam chan inchuhin Social Media-ah thu belhchian dawllo tam tak vawrhdarh a ni a, a pawi hle a ni.

Social Media-a thu darh pakhat, a thupuia – Thil thlen dan chu hetiang hi a ni (A sei deuh na a side A&B hriat hi a tha a nia, chhiar chhuak hram rawh) tih hmanga thuziakah thil thleng dan a chin chhuaka hria ni awm tak leh SRS-te dinhmun sawifiahna ni awm taka lang, a thu tlangkawmna a, ‘A hnu lam hi a tul dan a zir a puan zar leh kan tum dawn nia’ tih inziakah hian, dawt thu, Police Department pumpui hmai timawk thei tarlan a ni a. Hetiangin Hetia boruak ri leh deuh hluaiah hian Bawngkawn PS atang chuan Police Constable 1 zu rim nam hian a rawn vai hauh a, CYMA hruaitute kan ni a, tia thil awmzia an hrilh hnu a, CYMA Asst. Secy hmai chhana “Ve mai mai a che u” an tih leh zel avang chuan an pute hnenah a ni hi chu dah bo rih turin an ngen ta hial zawk a ni.

Hetianga Constable zu rim nam chunga duty anga puhna hi dawt chiang tak a ni a. Thil thlen dan chu hetiang hi a ni. Buaina a thlen a tleirawl rual buaina siamtu a puhte Bawngkawn PS-a hruai an nih lai hian P.S kawtah SRS member leh mi engngemaw zat an pung khawm tawh a. Mahni Office kawt kaia buaina lian zawk a thlen belh hlauvin Bawngkawn PS duty-te chuan pungkhawm te chu inbengdai a, buaina leh bengchheng siam lo turin an hrilh a. Hetih laia Duty Officer te hi Non-Mizo (hnam dang) an nih avangin an thupek angin Constable duty-te chuan buaina leh bengchheng siamtute hi an thiam dan leh tihdan thin pangngaiin an khap a ni.

Social Media-a thuziak kan tarlan tak, hming tarlang ngam lo, dawihzep tak leh tlanchhe chunga ziaktu hian Police Constable pakhat zu in hauhlo zu rim nam tia dawta a puh hi Constable Zonunmawia a ni a, amah hi zu leh ruihtheih thila buailo, City Police zinga discipline tha leh rintlak tak a ni. Amaherawhchu, mipui lam atanga zu rim nam anga sawi leh Police Station chhunga luh chilha a service tichhe thei an nih thu hial vauna a awm takah chuan Bawngkawn P.S O/C leh Duty Officer-te chuan Breath Analyser an ham tir a, a result-ah chuan zu far khat pawh a in lo tih finfiah a ni. Hetianga zu rim nam chunga duty-a an puh thu leh Breath Analyser ham tir a nih thu hi Bawngkawn Police Station GDE No. 4 Dt 2.6.2019 ah chiang takin a lang a ni. A duh apiang tan he record leh test result hi a en theih reng a ni.

Kan thawhhona thuthlung anga theihtawpa inlungruala ruihhlo kan do mek laia Central YMA (SRS) te leh Police Department inkara hem thlaka Police duty zu rim nama puh hi MPSOA chuan a ngai thiamlo in a la thu tak hle a ni. Mipui vantlang hriat a mimal leh pawl tihmingchhe tura dawta in puh hi India danah sual lian tak a ni a, a hremna pawh IPC Section 500-na hnuaiah kum hnih (2) thleng lung in tan emaw, pawisa chawitir emaw, a inkawp emawa hrem theih a ni. He thil hi MPSOA chuan Police Department zahawmna humhim turin a thlir liam mai mai dawn lo a, a tul angin a umzui zel ang.

Tichuan, buaina tipunlun thei zawnga thu veivirna kawnga insum turin ruihhlo do kawnga kan thawhpuite leh Social Media hmangtute kan ngen a, mahni kut zala dan leh thupek keng kawh mai lovin thuneitute thawhpui a, an kuta innghat ngam turin Mizo mipuite kan ngen tak zet a ni.

Sd/-
Inspector (C.LALREMLIANA)
President

Sd/-
SI (ALBERT LALBIAKMAWIA)
Establishment Secretary

Aside | Posted on by | Leave a comment