Zangnadawmna phutin Kaladan Multi-Modal Transit Transport Road chu Lawngtlai District Land Owners Association in an dang chhunzawm.

India, Myanmar leh Bangladesh te inkalpawhna leh insumdawntawn nana kawngpui sial mek, Kaladan Multi-Modal Transit Transport Road (KMMTTP Road) chu Lawngtlai District Land Owners Association in an la dang chhunzawm zel.

       KMMTTP Road sial hnathawh mek chu he kawngpuiin a paltlang chhunga ram neitu intelkhawm, Lawngtlai District Land Owners Association chuan an beisei anga zangnadawmna an lak mai theih loh avangin nimin aṭang khan lirthei eng chi mah kal tlang theih lohin an dang a.He kawngpui sial hnathawktu company pahnih, RDS Private Ltd. leh Atlanta ARSS te pawhin an hnathawh an chawlhsan vek a ni.

     A hmuna tlawhtu, Lawngtlaia kan Corr. Lalngheta Ralte chu he kawngpui dangtute hian boruak duhawm lo leh thil thleng duhawm lo engmah a awm loh thu leh lirthei vei vak leh hnathawk an awm loh thu an hrilh a; Kawngpui sial hna thawktu Company hotute pawhin ram neitute harsatna an hriatthiampui thu leh an hnathawh chawlhsan tura an ngenna ngai pawimawhin hna thawh an tum loh thu Land Owners’ Association hruaitute hi an hrilh tih an sawi bawk.

      Kaladan Multi-Modal Transit Transport Road-in a paltlang ram chhungah hian ram neitu mi 160 velin zangnadawmna an la tawh a, tunah hian zangnadawmna la la lo mi 303 an awm mek a, he an thil nawr hi a hlawhtlin hma leh an lungawina tawk chhanna an hmuh hma chuan a ṭuldan ang zela hma lak chhunzawm an tum thu kan Corr. an hrilh a ni.
             (PTC Lawngtlai)

Advertisements
Aside | Posted on by | Tagged , , | Leave a comment

Central YMA in ruihhlo do tura a din Supply Reduction Service (SRS) batch 6-na hlan

Central YMA in ruihhlo do tura a din Supply Reduction Service (SRS) batch 6-na,a mawhphurtu turte Pathian hnena hlanna leh meeting hmasa ber chu nizan Feb.19 dar 7 khan Central YMA Hall, Tuikhuahtlangah neih a ni.

SRS puipa leh member te hlanna inkhawm tawi hi CYMA Vice President Pu R.Lalngheta’n a kaihruai a. Ram leh hnam hmelma Ruihhlo do tura YMA member branch hrang hrang tanga ruat, kalkhawm te chungah lawm thu a sawi a. SRS member leh puipa nihna an chelh chhunga tluang taka hna an thawh theih nan duhsakn a hlan nghal bawk.

Central YMA President Pu Vanlalruata chuan YMA in ruihhlo a do chhan hi tam tak a awm a. Kum 2004 YMA khawmpuiin kumpuan atana ruihhlo do a hman atangin ruihhlo do hi nasa zawkin kalpui a ni a, Engati nge YMA in ruihhlo a do tak mai tih zawhna pawh hi a awm thin a, kan hun tawn ang zelin YMA chuan kan ram leh hnam tan a hma alak thin vangin kan hmalak dan tur pawh a danglam ve zel a, Proxyvon chhuah hma leh chhuah hnua YMA hmalak dan chu a danglam tawh hle a ni a ti. Pu Vanlalruata chuan chuan Ruihhlo hi tangrual taka mar taka kan do chung pawhin kan hneh meuh lo niin a lang a, kan tanrual loh phei chuan kan hmabak hi a thim dawn hle a ni. Ruihhlo do hi anuam lo, mahse, a hunlaia hruaitu ten kan do loh chuan ti tur dang an awm chuang loa ni a ti bawk.

Pu VLA chuan kan khawpui lian deuhah chauh kan buaipui emaw kan tih thin No.4 pawh tunah chuan thingtlangah pawh an buaipui ber pakhat a ni chho mek tawh a, kan rinphak bak aia nasain ruihhlo hian min run tawh a ni. Kan thalai zingthawh bak hna thawh tur dang nei lo, Istiri leh Calendar mamawh lo, Chapal, T.Shirt leh Paijama nena nilenga hun hmang engemawzat an awm a, hei hian he hnam hawi zawng hi thui tak a hril a nih chuan tan kan lak a ngai viau dawn a ni a ti a.

‘Mizo te hi hnam tlem te kan ni a, hetih lai hian kan pung chak lo em em a, kum tina piang zat leh kumtina thi zat chhutin mi pathum an pian in mi pakhta thizel anga chhut a ni a. Heihi India ram pum Death and Birth rate 2.3% aipawhin nasa takin a hniam a ni. Zu leh ruihhlo dang avangte tein kan thi zawih zawihah nikum 2017 chhung khan mi 3000 vel chuan thi a, Mzio te hi kan pung chak lo hle a ni’, Pu Vanlalruata chuan a ti bawk.

SRS puipa te leh member thar te fuihna thu sawiin Central YMA Finance Secy. Pu Fabian Lalfakawma chuan kan ram leh hnam kan khawtlang leh kan chhungkaw tana pek chhuaka hnakhirh tak leh awlsam tea hmingchhiat theihna hmun, mahni nawmsakna leh mahni inchhung lum ngei pawh kalsan a ngaihna hmunah ram leh hnam tana thisen fartawpthlenga tang ngam tura branch YMA aiawha SRS member tura penchhuak te chu Pathian tihna nena, rinawmna leh huaisenna nena theihtawp chhuah theuh turin a chah a ni.

Central YMA CEC in a dinthar leh hnua ah tuna mi te hi SRS batch 6-na tur an ni a, Aizawl khawpui chhung City Branch hrang hrang atangin member 50 ruat an ni a, Central YMA OB atangin Asst. Secy Pu Peter Chhakchhuak chu Convener atan ruat niin, SRS 6th Batch hi June 30, 2018 ah an hun a tawp ang.

Posted on February 20, 2018

Aside | Posted on by | Tagged , , | Leave a comment

Bawngkawn Brigade a Pu R. Lalhmingliana in thiah sak Chungchanga J.Thankima College Ukil thusawi

Bawngkawn Brigade a Pu R. Lalhmingliana in thiah saka puh Govt. J.Thankima College official group a thuchhuah chu hei hi a ni.

THU DIK CHU HEI HI A NI.

Kum 2012 ah court hniam Civil Judge ah Pi B.Sangkhumi unaunu Pi B Lalhmangaihin Pu K Thanchhunga VC Pass No. 41/1970 lei anga in sawiin he VC Pass hmang (K Thanchhunga hian midang Lalmalsawmi hnenah he VC Pass vek hi hralh anga in sawiin Govt J Thankima College leh midang khinna CS No.43/2017 a kal mek) leh a pasal Pu Rodingliana (a pass-ah chuan Laltanpuia inti) VC Pass No. 43/1970 hmangin Civil Suit No.21/2012 ah Govt J Thankima College khin a ni a.
District Council Chief Executive Member notification dated 9.6.1960 hmanga Brigate hmun hi Rambuai laia India Sipai awmna a nih avangin VC in pass a pek theih lohna a nih avangin ni 12.07.2017 ah an case an withdraw a.
An in withdraw hma hian Court sang Senior Civil Judge ah Civil Suit No.101/2016 hmangin Govt J Thankima College hi an khing leh a. Govt J Thankima College Builiding sak pawh stay a ni a mahse District Court-a court sang ber District Judge-in ngun taka an thu leh hla a ngaihtuah hnuah ah College sak stay order chu ni 15.12.2017 khan thiah leh niin college hi sak chhunzawm phalsak a ni leh a. Civil Suit No.101/2017 pawh chu ni 28.03.2017 khan withdraw leh a, High Court ah an zual ko chho ta zel a ni.

District Council Chief Executive Member notification dated 9.6.1960 hi an challenge zuai a, a hnu rei lo te-ah High Court-ah an withdraw leh a. Compensation dilna case an file leh ta zawk a. An VC Pass te hian belchian a dawl thlawt lo. Court-ah kal thui a nih dawn tak tak chuan an withdraw zel.

High Court ah an VC pass atan compensation chu WP(C) No.21/2017 hmanga dil a ni leh a. Kar hmasa ni 16.2.2018 khan Aizawl Bench, Gauhati High Court chuan an WP(C) case pawh chu a dimissed/hnawl sak leh ta a ni. Sawrkarin Cabinet thutlukna meuh a Sipai ram luah mipui tana hman tangkai a nih theih nana Community Development Project hnuaia Land Lease kum 2013 a Govt J Thankima College a pek hi thiah a nih si lo a, VC Pass (sawrkar thuchhuahin pek phal loh a tih) chiang lo hmuna sethlam lo sak chu, a ram neitu te chuan an thiat thei ngei ang. A neitu nia inchhal Pi B.Lalhmangaihi te pawh a cheng lo a. Pu R.Lalhmingliana hian a ram lo-ah (B.Lalhmangaihi or B.Sangkhumi ten kan ram an tih) chen theihna right a nei lo.

Chhuak tura Intiamkamna pawh Sawrkar hriatpuiin ziah a ni tawh a. Sub-Deputy Commissioner & Zonal Magistrate, Pu H. Lalramliana chuan February ni 25, 2016 khan Principal complaint-na bawhzuiin, a hmunah a enfiah a. He insaka cheng mek Pi Ramfangzauvi (Student sawi dan chuan Brigate hmuna Pi B.Sangkhumi te ram neih hrang hranga midangin in an sak loh nan leh an chuhpui tute enthlithlaitu an secret agent a dah, a thlawna a awm tir) w/o Pu R. Lalhmingliana chu kovin, March 2016 chhunga insenghawi a, anmahni pawh chhuak fel turin a intiam. An intiam chhunga an lo chhuah loh avangin College lam pawhin an ngaichang a, an nawr reng bawk.

Aizawl DC pawhin High Court-a case kal lai a nia tia nghah vang zawkin an chhuah tir lo a. High Court berin an case a dismiss te chuan thiam lohna a awm lo. Pi B.Sangkhumi te hian Pass buai miin an hum ngam loh hi an lei khawm a, an nin ukil ruaiin court-ah midang tihbuai an nei nual.

Helai Brigate hmunah hian pass lem leh buaina a tam lutuk a. Sawrkar ben harh nan he thil thleng hi ni mawlh se. Building/Insak hrim hrim pawh AMC phalna la hmasa lo chuan Aizawl hmun dangah sak theih lovin an strict viau laiin helai hmunah hian AMC hian kut an sil a, a huai huaiin an sa hmiah hmiah a. Dan lova insak phal loh titu an ngawih tlat chuan a ram claimtu in an thiat fo ang a, law and order harsatna a awm chho zel ang tih a hlauhawm. Govt J Thankima College hian Pu R Lalhmingmawia te bungrua hi an tichhia a nih chuan compensate ngei bawk se

( Facebook-a post saktu hi an ukil a nih avangin thudik chu kei Govt J Thankima College Ukil hian ka post ve a ni e. Ka sawi court order zawng khi Image file in ka nei vek a, facebook ka khawih vak loh avangin inbox duh chuan Whatsapp in ka number 9612163263 ah hian min dil thei ang

JC Lalnunsanga,
Standing Counsel for Govt J Thankima College).

Aside | Posted on by | Tagged , , | Leave a comment

J.Thankima College ten CHENNA IN ȚHIAHSAK VEK

Vawiin chawhma lamah khan Bawngkawn Brigade venga Pu R.Lalhmingliana leh a nupui fanaute chenna in chu J.Thankima College zirlai nia hriatte’n Pu R.Lalhminglianate nupa awm loh hlanin an lo țhiat sawp darh vek a, inchhung bungrua pawh a chhe hneh hle. In neitute chhungkua leh an ui leh ar vulh laite chu khawlaiah an hawihai.



Helai ram hi Pi Lalhmangaihi, Chaltlang leh J.Thankima College inchuh lai niin Pu R.Lalhminglianate chhungkua hi he lai hnaia J.Thankima College awm ve hma daih ațang tawha Pi Lalhmangaihi phalnaa lo awm tawh an ni.

Author : Raymond Lalbiakzama Chawngthu

Aside | Posted on by | Tagged , , , | Leave a comment

PWD IN SESAWNG LEH KHAWRUHLIAN INKARA TUIRINI LEI AN DAWH LAI CHU TUKIN ZING DAR 9:45 VEL KHAN A CHIM

Tukin zing dar 9:45 vel khan Sesawng leh Khawruhlian inkara Tuirini lei PWD in an dawh lai mek chu a chima a, mi pakhat, Pu HC Lalfakzuala chu a hmunah thiin, Tv. Laltleipuia Hmar, Sesawng khua vêk chuan hliam na tak a tuar.
He lei chim ta hi kumin January thla bul lama dawh tan niin thir hmanga dawh a ni a. A hlui thlakna tura ruahman a ni. Lei chim lai hian a Structure tlangpui chu dawh zawh tawh niin mi thenkhat chuan kein an zawh tlang fo tawh a. He lei chim lai pawh hian Pu HC Lalfakzuala leh Tv. Laltleipuiate hian kea zawh kai tumin leiah hian an kal phei a. Vanduaithlak takin lei zatve vel an thlen phei hnu hian thawk leh khatah a chim ta thut mai nia thu dawn a ni.
Chhiat tawh lai hian PWD CE Pu Lalsawmvela leh SE Pu Bowman leh PWD Officer dangte a hmuna an awm lai tak a nia, khawtlang hruaitute leh mi tlawmngai ten ruang lak chhuah hna hi an thawk mek a ni.

Zorammawia Colney
LPS LCO Sesawng

Aside | Posted on by | Tagged , , | Leave a comment

MZP HEADQUARTERS LUNGLEI PRESS RELEASE :

     Dt.9th November, 2018 khan Lunglei tlawha lo zin NERLP Chief Operating Officer leh a hote chu MZP Headquarters Lunglei hruaituten lo hmu in Dt . 27th May, 2017 a Assam Down Town University Guwahati a zirlai Lalhmangaihsanga S/o C. Chawnghranga leh R. Lalmalsawma S/o Lalchhawnsanga (L) Electric Veng Lungleiten vanduaina tawka nunna hial an chan chungchangah vawiin thlenga zangnadawmna an hmuh tur ang an la hmuh loh chungchang sawipuiin a rang thei ang bera zangnadawmna pe turin NERLP hotute hi an ngen nawn leh bakah Memorendum an thehlut nghal bawk.

MZP in an memorendum thehluhah hian vanduaina tawk chhungkua ten kum khat dawn liam hnu pawha nimnin lawka Rs 50,000 an dawng chauhte chu a lungawithlak an tih loh thu bakah NERLP atanga vanduaina tawkte dawn tur anga sawi an la dawng lo chu hriatthiam har an tih thute, vawiin thlenga an bungrua an la pek kir loh chu a rang thei ang bera pek kir an phut thu leh Police Investigation Report copy hmuh ngei an phut thute an sawi a ni.

NERLP hotute hian MZP ngenna chu ngai pawimawhin rangtaka hmalak an tum thu an sawi a, Vanduaina tawk Lalhmangaihsanga leh R. Lalmalsawma te chu an chhungkaw dinhmun pawh an hriatpui vek thu leh ralna pawisa bakah eizawnna ngelnghet an neih ngei theih nan theihtawp an chhuah tur thu an sawi a ni. NERLP hotute hnenah hian an ngenna in awmzia a awmlo a nih chuan tun aia nasa zawka an nawr leh tur thu MZP hruaitute hian an sawi bawk.

MZP Headquarters Lunglei hruaitute hian an zirlaipui vanduaina tawkte chu misual pawikhawih ni a an rin tlat thu bakah pawikhawih tute man chhuaka hremna pe tur leh an chhungte hnena zangnadawmna pe ngei turin Assam Chief Minister hnenah an lo ngen tawh a, zirlai pawisawi lote tawrhna hi hre rengin an thlavang hauh turin MZP chuan theihtawp a chhuah a, a tawp thlengin a bei zel dawn a ni.

                Sd/-
    (K. LALREMRUATA)
             Secretary
      MZP Hqrs Lunglei.

Aside | Posted on by | Tagged , | Leave a comment

PHILIPPINES PRESIDENT DURTERTE A THINRIM: CANADA LEH US RALTHUAM LEI TUL A TI LO: ICC CHHUAHSANAH A VAU

Philippines President Rodrigo Duterte chuan, Bureau of Customs kum 116 tlinaah thusawiin, “Canada leh US ralthuam chu lei turin hma la suh u tih Military ka hrilh tawh e. Duh dan an ngah lutuk a. Ram danga mi min lei tir thei tur kan dap ang” a ti.

President Duterte hian Philippines rama ram dang siam, a ruka rala foreign cars lak luh, Lexus SUV, BMW etc tih vel Customs hovin 20 vel a tihchhiatnaah a tel pui a ni.

Hetianga President Duterte thusawi chhan hi Canada sorkar chuan US$ maktaduai 235 (Peso tluklehdingawn 12) man Helicopters 16 a lei tur tum chungchang ah ennawn an tum tih sawiin, “heng helicopters te hi raldo nan lo vin, disaster works atan leh sipai thi leh hliamte phurh nan chauh a ni tur a ni,” an ti deuh tlat a. President Duterte chuan, “Helicopters ka duh chhan chu kan ram chhim lama Islamic helho leh Communist helte tukdaih ka duh vang a ni a. Chutiang sipai thi leh hliamte chauh phurh nana tih chu thil nuihzathlak (crazy proposition) mai a ni e” a tihsak hmiah mai.

Rodrigo Duterte chuan, “President ka nih chhungin anmahni beih nan emaw, anmahni ven nan kan hmang ang kan ti thei lo. Tam lam neilo ka ni e” a tihkhum. Ruihhlo a donaah a chet nat em vangin, mi 4000 vel tihhlumnaah “human rights” leh “extra-judicialkilling” nasa taka awma puhin, International Criminal Court (ICC), The Hague lamin amah (Durterte) chu chhui turin an kal pui mek a. ICC Prosecutor Ms Fatou Bensoude chuan, diklo taka ruihhlo dona chhuan lama pawisawi thahna tam tak awmin sawi a nih vangin, thil awmzia chhui fiah a ni ang, a ti.

Durterte chuan, “Asia ramah pawng inthahna (massacre) a awm nual a. Keimah chauh chu min chhui duh (hit) a ni maw. A tha vek e. Han ti zo ula, keini pawhin ICC chu kan chhuahsan ang” tiin a vau let bawk.

Novemthla 2017 khan Manila-ah President Trump leh Canadian PM Justin Trudeau te chu a lo hmu tawh a ni. Trump a thlawp thusawiin, “Mahni ram hmangaihtu a ni” a ti bawk.

             Author: CT Lalrinawma

Aside | Posted on by | Tagged , , , , | Leave a comment

Mizoramah BPL kan awm em

Sorkar tehna ah chuan Thingtlangah ni khata  Rs 32, Khawpui ah Rs 47 hman tur nei lote hi BPL anga ngaih tur an ni.

Chumi awmzia chu thla khat ah Rs 972 emaw Rs 1,407 hman tur nei phalo chhungkua te chu rethei anga ngaih an ni ta a.
Heng mite hian Luxury thil- TV, fridge, electronic bungrua man to chi washing machine, smartphone, septic tank, etc ang hi an nei thei lova ngaih a ni.
Heng tehna hi an thlak ve deuh sek reuh a. Sawiselna a nasa thei khawp.

Heng bak ah hian ram neih, in neih, thuamhnaw, ei in chhekkhawl, faina lama san dan, inchhung bungrua, lehkha zir chen, hnathawk thei zat, khawsak dan tlangpui, naupang dinhmun, leiba neih nasat dan, pemkual a tul chhan tihte aṭangin an dinhmun an en tel ṭhin.
   Heng tehna pawh hi an thlak ve reng a, state hrang hrangin anmahni hman tur an siam hrang bawk ṭhin.
    Sum lakluh ngawr² ni lovin a laluttu engzat nge awm a, a eiraltu engzatnge tihte chhut a ṭul tihna a nih chu. Mahse heng tehfung te hi dik taka hman an ni lem lo.
Dik taka teh dawn chuan Mizoram mipuite hi  kan tla zo deuh vek a ni maiin ka ring.

An chhut dan chu sawi chiang dawn ta ila-  thawh chhuah ngawr ngawr ni lovin an ei leh in – chaw, tel, current etc tih vel kha  ₹32 man hu hman tur an nei or an nitin khawsak chu ₹32 vel senna a ni phak em tih a ni ber mai.

    Gas hmang ta ila, kuhva 20 man lei leh ta ila, engemaw kang ta ila, chaw kg 1 chhum ta bawk ila, ₹30 a chuang hma khawp mai.

   Chi kg 1 hi thla khat ei  ta ila, nitin ₹1 ang a ni ṭep a, chini kg1 ei leh ta ila nitin ₹2 ang deuh a lo ni der a, tel 100 man hi thlakhat kan ei chuan ₹3 ang a lo ni leh der mai. Cable pawt ta ila, nitin ₹30 kan hmang ral nghal ang a ni der a. Rin ai hian kan khawsak a sang duh khawp a, kan chetvelna chuan ₹100 a kai vat mai a ni. In chhungkaw nitin chetdan kha han chhut la, i hrethiam vat ang.

   Buhfai kg khat man aṭang chhut chuan BPL chhungkua chuan phone leina tur a nei ta lo mai ni lovin, top up tur a chuang hleithei lo tihna a lo ni a. TV a nei zo lo a, Settop box a nei zo dawn lo tih pawh chiang sa a ni. Fridge, washing machine, electric oven, heater, electric iron tih vel pawh electric bill sang tur vang ngawt pawhin a nei thei dawnlo tihna a nih chu. In leh lo chu miin lo pe pawh ni se, BPL ni chung chuan heng bungrua hi chu a enkawl theilo tho tho.

BPL ni lo chunga nih tlat hi a zahthlak a,
Amaherawhchu kan khuaa kan nih dan tlangpui hi kan sorkarin in khua atangin chuti zat lo thlang chhuak ru an tih vanga hruaituten an dahluh bawrh bawrh te an ni a. Kan duham vanga kan va nih aiin Duhsakna chi khat a nih hmel a. Sual a nih a rinawmlo.

  Mahse BPL list a awmloh vanga phunnawi hi kan tihloh tur a ni a. List a awm tuma ṭan lo lak ching kan awm a nih phei chuan ringtu in vuah ve chi a ni lo ang.

Aside | Posted on by | Tagged , | Leave a comment

INDIA-IN AMERICA AI A AWH ZO ANG EM? INDIAN PM NARENDRA MODI-AN WEST BANK TLAWHIN US$ MAKTADUAI 40 A PE

February 10, 2018 khan Hindu nationalist Indian PM Narendra Modi chuan helicopter hmanga West Bank tlawhin, Palestinian Authority Mahmoud Abbas nen an inkawm a, hemi hmain Jordan King Abdullah II nen Palestinian chungchang an sawi dun a ni. PM Modi chuan Palestinian-ho tan, a bik takin media, hospitals, education atan US$ maktaduai 40 a pe. PM Modi leh President Abbas te hian US$ maktaduai 50 zet infrastructure a hman tur an ziak fel a ni. Narendra Modi hian PLO hotu thin Yasser Afarat zalhna thlan tlawhin, pangpar a dah.

PM Narendra Modi hi Indian PM West Bank tlawh hmasaber a ni. West Bank atangin UAE leh Oman ram tlawhin, Indian hnathawka awmte hmaah thu a sawi ang.

Modi leh Abbas te chuan news conference neiin, PM Modi chuan, remna a awm thuai a duh thu leh “Remna chu inbiaknaleh inhriatthiamna hmangin a awm thuai ang” a ti. Abbas chuan India chu US- aiah Israel leh Palestinian inkara palai hna thawk turin a ngen a ni.

Abbas hian nikum Dec 6, 2017 a President Trump-an Israel khawpui atan Jerusalem a puan hnu atangin, khawvelah zin velin remna lai hna thawk turin ram dang a sawm vel chiam a, mahse, a tum a la hlawhtling zo rih lo. Abbas hian EU Hqrs Brussels te tlawhin EU chu palai hna thawkturin a sawm a, a bikin France leh Russia leh China te pawh a lo tah awh tawh bawk.

President Mahmoud Abbas(82) tan hian Palestinian Authority chuan US$ maktaduai 70 man zet BBJ1-Boeing 737-700 Airliner chu an order mek niin an sawi a, an chahna regd nos B-5286 a ni. Hei hi Israel sorkar chuan a sawisel a, Israeli PM Netanyahu pawhin ama pual thlawh “Prime Minister’s Air Force One” a neih loh lai leh Palestinian refugeenuai chuang riltam dangchar a an awm laia hetianga lo tih hi a sawisel sak a ni. Mahse, Palestinian te hian ram dang hmuhah Palestine Independence ram entirna tur angah an ngai a ni.

President Trump chuan remna zawnga dawhkan kil an duh tak loh avangin, kum tin UN kal tlanga Palestinian refugee tana US$ maktaduai 400 dawn a pek thin chu a titawp a, Palestinan refugee te hi an buai phah phili nasa hle a ni. US khuan kum tin foreign assistance atan US$ tluklehdingawn 64 vel a pe chhuak thin a, Trump a policy “America first” vangin tam tak fund pen dan ennawnin tihtawp mek a ni. Hetianga US berin a puanthuah leh tiffin a senghawi takah chuan ram rethei zual, a bikin Africa ram tam tak chu tampui mitthi in a tlak buak a hlauhawm hle.

West Bank atangin Tel Aviv a Ben Gurien International airport, darkar chan ve leh thlawk chu an tawm a ngaih hmel a, Gaza ah airport chu kum 2001 khan Germany, Spainm Japan, Saudi Arabia leh Morroco ramin US$ maktaduai 86 senga an lo siam sak chu Gaza War ah Israel-in a nomb chhiatsak a, khawvel dem an hlawh phah hle.

January thla UN Gen Assembly in Jerusalem chungchanga vote a lak khan, India chuan Palestinian tan zawngin vote a pe a ni.

Thla kalta khan Israeli PM Benjamin Netanyahu chuan kar 1 dawn chamin India a lo tlawh a, Israeli technology hmanga agriculture lam Israeli siam ralthuam chher hralhna turte an sawi fel a, ralthuam hralh turah US$ tluklehdingawn chanve dawn tur man Israel siam, India-in a leisak ang. Modi hian nikumah Israel ram hi a lo tlawh tawh a ni.

West Bank atangin United Arab Emirates (UAE) hmna India hnathawktu nuai 9 chuangte hmu turin PM Modi hi a kal ang. Gulf states ah indian (vai) hnathawka awmte chuan kum tin US$ tluklehdingawn 35 chuang India ah an chhungte an thawn thin a ni.

Mizoram state rethei pawhin Human Resources siamin, ram danga hna thawh leh sum lakluh kan zir a hun ta. Job oriented education kal pui pawh a hun ta e.

UAE ram hian kum 2015 ah khan India rama US$ tluklehdingawn 75 zet investment an siam a ni. UAE ram bikah Indian hna thawktu nuai 3 awmin, chungho chuan 2016khan an chhungte hnenah US$ tluklehdingawn 13 chuang an thawn thei a ni. CNN chuan “India-in Gulf ah sum an zawng a, tunah an rama invest ti tur Narendra Modi chuan a zawng leh a ni” a ti.

Author : CT Lalrinawma

Aside | Posted on by | Tagged , , | Leave a comment

ISRAEL-IN IRAN LEH SYRIA A VAU: SYRIA RAM CHHUNG A BOMB NGHEK !

February 10, 2018 zing dar 6am (local time) a Israeli Air Force indo thlawhna F-16 chu Syrian anti-aircraft missile hmanga kah thlak sak a nih hnuah, vawiinah Israel chuan Syria ram chhunga Iran leh Syrian Aeriel Defense System hmun 12 leh Aeriel Defense batteries 3 dahnate chu a va bomb sak ul ul a, thi leh hliam an awm leh awm loh puan a ni lo.

Syria leh Israel inrina lai Golan Heights vela Israeli military te pawh inral ringin, indona awm thut hmachhawn thei turin an inbuatsaih a ni.

Israeli Defense Forces (IDF) thupuangtu Lt. Col. Jonathan Conricus chuan, “Syrian anti-aircraft missiles 15-20 vel chuan Israeli indo thlawhnate an lo kap ngei a, mahse, pakhat mahin a fuhlo. Him takin an mission an tithei a ni, Iran leh Syria hian meipui an tialh zual (playing with fire) a ni” a ti.

Hetianga Syria leh Israel inkar boruak vangin Ben Gurien International Airport, Tel Aviv pawh zing dar 9 thleng khan thlawhna thlawk chhuak leh lut tur tihkhawtlai an ni.

Iran Supreme National Security Council chuan, “F-16 kahthlakkha Israelte tan warning mai a ni e” a tihsak a. Syria erawh chuan, Israel thiltih dan chu terrorist thiltih a ni, hetianga an chet fo chuan nasa zawkin kan chhanglet ang” tiin an vau let bawk.

Iran Dy Chief of Revolutionary Guard Brig. Gen Hossein Silamini chuan, “Zionist sorkar chu hremhmunah um liam rawh u. Iran chuan Middle East a US military base leh Israel tichhe thei turin chakna a nei a ni. Syria chuan mahni inveng turin dikna a nei a ni” tiin Syria thlavang a hauhsak.

Israel chuan Moscow chu Syria thunun turin a ngen a, Israeli palaite chuan Russia palaite chu be pawpin, Syria chet dan chu thunun a ngai a ni, a ti. Moscow chuan Israel leh Syria chu phuba inla tawn lova, boruak tidai a, inthungrul tawn lo (restraint) turin a ngen a ni.
                       CT Lalrinawma

Aside | Posted on by | Tagged , , | Leave a comment