SIALSUK RAM, CHAMRING KHAW DAIA MOTOR ACCIDENT TAMNA HMUN ‘VAI AWT’ AN TIH MAI KAWNG KUAL ULH LAI SIAMTHAT HNA THAWK

Sialsuk ram, Chamring khaw dai, chamring atanga km 2, World bank kawng kual laiah hian kum 2010 atanga tun thla thlengin motor 31 an accident tawh a, mi 8 laiin nunna an lo chan tawh a ni.

Helai hmuna chetsualna a thleng fo mai thin chu Disaster Management & Rehabilitation Department changtu Minister Pu Ngunlianchunga chuan ngaimawhin kawng ulh lai chu siam ngil nise tiin PWD lamah kawng khawih danglam phalnaa dil a, anni lamin rem an tih angin 25 jan khan amah Pu Ngunlianchunga hovin PWD egineer te leh amah tawiawmtu official mi engemawzat leh Sialsuk leh Chamring YMA hruaitute nen a hmunah enfiah a ni a, 26ᵗʰ Jan. atangin helai kawng siamthat hna hi thawh nghal a ni ang.

A kawng awmdan zirchianna atangin helai hmuna chetsualnaa thlen fo chhan hi thil pahnih a awm theiin a lang. Hmuifang tlang atanga kawng chhuk intanin Chamring paltlangin ‘Vai awt’ an tih mai thleng hian kawng chhuk hi km 4 vel chiah a ni a. Hnam dang truck rit phur, phai zawla tlan thang thenkhatin, gear te hmanga helai hmun an tlan hian km 4 vel brake rim takin an han hmang a, Vai awt an thlen hian an brake a ling thawthang tawh thin. Kawng chhuk kual ulh tak mai an han thlen khan motor control thei lovin helai hmunah hian an tlan liam leh mai thin niin a lang a, a bik takin rit phur motor khalh tan fimkhur nachang hriat a tha hle a ni.

A kawng kual ulh lai hi lak ngil a nih hian chetsualna thleng tur tam tak pumpelh theih a nih ngei a rinawm.

Helai hmuna chetsualna thleng thin hi abik takin Sialsuk leh Chamring khua ten an buaipui nasa em em thin a, an manganpui a ni. PWD hotute lamah pawh a kawng kual lai tih ngil danturte thlenin tlak dal lungrem siam te pawh an lo rawt tawh thin a, DM&R Minister in hetianga hma a rawn la ta chu lawmawm an tih thu an sawi.

Sialsuk ram hi a chhengchhia a, accident buaipui ngai an tamthin avangin DM&R Minister hian chhanchhuahna atana thil pawimawh hrang hrang; walkie talkie, stretcher, search light, head torch leh surgical glove engemawzat pek a tum thu a hmun enhonaah chuan a sawi. Tun hma lamin Sialsuk YMA hnenah hrui metre 200 coil hnih a lo pe tawh a ni.

Helai hmunah hian a chang chuan kum khatah truck ritphur vawi 6 lai mai accident changte a awm thin a, PWD Evangelical Union ten a hmunah ṭawngtaina nen hun hmangin Cross var lianpui mai an phun a, kawng sirah tlak dal cement bag ruakah lei chhung khatin, kawng thleng vel chhah takin an rem kual bawk a. Kumtin chetsualna thleng mawlh mawlh mai thin kha, Cross an phun hnuah kum 2 vel zet chu accident a reh vang vang a, tun thla January ni 13-ah khan Thenzawl-a diesel dah tur tank lorry a accident leh ta a. Cross phun vang hi nge, hetia chetsualna a thleng lo vang vang mai chu mak an tih thu Sialsuk leh Chamring YMA te chuan an sawi a ni.

Helai kawng siamṭhat hna hi ni 4 ni 5 chhung vela zawh hmanan inbeisei thu PWD Engineer te chuan an sawi a, kawng siamthat a nih chhungin khualzin motor darkar hnih khat han tih khaihlak deuh chang a awm thin dawn a, thil tha beiseina avanga hmalakna a ni tih hriaa dawhthei taka nghak hram hram thin turin Minister chuan helai kawnga kal thin mipuite a ngen nghal bawk a ni.


• COMMENT

Rinmawia Ralte
Motor accident chhan hi uluk takin consultant ruaiin kan lo chhui tawh a. Hetiang zawk hi niin a lang.
Kawng hi chamring lam atanga lo kal tan 300mtrs vel lai chhuk ngil ang reng tak a awm a. Henglai a kawi awmchhun pawh kawi na a ni lo. Chuan Vai awt hi a lo kawi thut a, driver ten kawng awmdan inthlak thut hi an lo inringlawk hman lo a ni. Hetiang chiah hian Thenzawl pelhah pawh kawng ngil thuitak hnu a kawi thut a awm a, mi 6 vel lai an accident tawh bawk a ni. Pu Ngunlianchunga chu a ti ṭha hle mai.

Advertisements
Aside | Posted on by | Tagged , , | Leave a comment

Grammy award semna ah Trump an nuihsawh

Sunday zana 60th Grammy Awards semnaah host- Jemes Corden chuan thil nuih zathlak leh hlimawm (fun) siamin, Hillary Clinton chu Donald Trump hmuhsitna (mocked) tilang turin Michael Wolff a lehkhabu ziak “Fire and Fury” tih kha laktawi (excepts)in an chhiar tir (cameo appearance) vel.

Zaithiam Camilla Cabello chuan, DACA ho “Dreamers” mi 700,000 chuangte thla vang rawn hauhvin, “United States chu Dreamers ho vangin a ropui a ni…” a ti.

Anti-Trump hi Kendrick Lemar, Cabello, Bono, John Legend, Cher, Snoop Dogg, DJ Khaled leh Cardi B, Trevor Noah leh Hillary Clinton-ten an tilang vel a ni. Hetianga Grammys semna hmuna US President Trump an beih a tawk chu a fapa Donald Trump Jr., chuan Hillary chu beiletin, “Fakenews lehkhabu laktawi Grammys semnaa a han chhiar chu, President atan a tlinlohna lawmman chu Grammy Awards semnaah an hlan a nih hi” a tihsak.

Nikky Haley, US Ambassador to UN pawhin sawiselin, “Grammys hi ka lo ngaina ve hle thin a, mahse, artists hoten Fire and Fury lehkhabu an han chhiar vel khan a ti khawlozo (killed) ta vek alawm le. Music ropui tak chu bawlhhlawhah chan tir lul suh u. Mi thenkhat keini ang chuan politics chawh pawlh loh music chu mawi kan tiin, kan ngaina hle a ni” a ti.

Bruno Mars chuan “24K Magic” album atangin, Album of the Year, Song of the Year, Record of the Year Awards a dawng a ni

CT Lalrinawma

Aside | Posted on by | Tagged , , , | Leave a comment

ASSAM REGIMENT PC. LALFAKAWMA MUALLIANPUI KHUAKOLKATA AH A BORAL.

Pu.PC. Lalfakawma (35) Muallianpui, Lunglei District chu 27th.Jan.2018 khan Command Hospital Kolkata ah a boral.

Pu PC. Lalfakawma hi Assam Regiment a thawk lai Quater Master a ni a, Kashmir ah Post mek a niin, leave lain Borakhpur Kolkata ah lo chhukin hun a hmang a, dt. 26.1.2018 khan Kolkata Hospitala awm damlo te kana hun a hman hnuah Bus a an awmna Borakhpur a pan laiin nikhaw hre lovin a awm a, a chhung ten buaipui ngalin sipai damdawiin ah dahluh a ni a, investigation te tih a nih hnuin Hospital lian zawk sipai damdawiin Command Hospital ah refer leh a ni a, investigation tih hnu ah a lu ah thisen nasa taka tling tih hmuh chhuah a ni a, hei hi tuarchhuak zo lovin ni 27.1.2018 khan a boral ta a ni.

Vawiin( 29.1.2018) zan khan Kolkata Mizoram House ah amah thlahna inkhawm Mizo Welfare Kolkata buatsaihin hman a ni a, he hunah hian Kolkata a Press Study Tour neia awm mek. MJA Lunglei Member thenkhat te pawh an tel a ni. Amah hi mitlawmngai leh Kohhran lamah pawh inhmang tak nia sawi a ni. A ruang hi Kolkata a sipai awmna Borakhpur ah dah a ni a, postmortem ngai leh tul dang te tihfel a nih hnuah naktuk(30.1.2018) hian a ruang hi thlawhnain Aizawl panpui a ni ang. Aruang an khua panpuina tur ah hian sipaiten an buai vek a ni.

Aside | Posted on by | Tagged , | Leave a comment

“PU LALBIAKZUALA ENKAWLNA MAN TUM SAK A NI ANG” – HOME MINISTER

Vawiin 29 Jan. khan Home Minister Pu R. Lalzirliana pisaah Sihphir Branch YMA hruaitute leh Police hotute nen Chief Minister Security leh 207 Pick-up Driver Pu Lalbiakzuala chungchang sawiho a ni a, bialtu MLA Pu R. Lalrinawma, Deputy Speaker a tel bawk.

Home Minister ho hian January ni 22, 2018 tlaia Serkhan a thil thleng chungchang Addl. SP (Security) hova an chhuichianna video chu thlirho niin, security motor inlehpelh theihna tur hmun remchang tam tak a awm tih hmuh a ni.

Home Minister chuan ngun taka an thu leh hla a ngaihthlak in an thiam loh naah in ngaihdam tawn a duh thu a sawi a, amaherawhchu thil pumpelh theih a nih laia Pick-Up driver in kut a tuar chu pawi a tih thu sawiin, amah enkawlna hospital bill zawng zawng pawh sorkarin an tum sak tur thu a sawi. Home Minister chuan he thil thleng atang hian mipui pawhin thil zir tur kan nei tel a, kawng laka lirthei pass kan in dil chhan tam tak a awm thei a; damlohna avangte, sahimna tur atan te pawh a nih theih avangin VIP an ni emaw ni lo emaw, pass nachang hi lirthei khalhtuten kan zir thar a ngai a ni, a ti a. Police-te pawh dan lek kawhtu an nih angin an hnathawhnaah te hawihhawm zawk leh nelawm taka mipuite nen an indawr theihna turin tan lak thar ngaia a hriat thu a sawi bawk.

Minister chuan media lama hemi chungchang thu dik tawklo darh nasa chu pawi a ti a, hetiang thu theh darhtute pawh thuchiang an hriat hma chu lam tang nei zawnga thu dik tawklo theh darh tawhlo turin a ngen bawk.

Vawiin khan IGP Pu Zorammawia hovin Pu Lalbiakzuala hi tlawhin hmanchawp tur cheng singnga an pek bakah a chhungte nen a inenkawlnaa hmalak zel dan tur an sawiho bawk.

WRITTEN BY
EMILY LALRINPUII,
MIS, IPRO
DATED: 29TH JANUARY 2018, 4:02 PM

Retold by : Saihmingliana Sailo

Aside | Posted on by | Tagged , , , | Leave a comment

PATHIAN HMINGA NGAIHDAM AN DIL ANGIN A NGAIDAM TA

• Police hoin ngaihdam an dil.
• Kutthlaklo nia insawi ten ngaihdam an dil leh si.
• ₹50000 an chawi?

207 driver kutthlak chungchang ah vawiin chawhnu hian Pu Zorammawia IGP leh a thawhpuite chu hliam tuar Pu Lalbiakzuala te inpui Pu HV. Lalnuntluanga te in ah ngaihdam dilin an leng a. Pu Lalnuntluanga chuan, “Keimah maia lo dawngsawng a thu tawp siam mai lo in, ka pa- Upa Laibata, ka nau- Lalrinzuala leh ka fapa nupui a nu HS.Lalthuamliani (Hliam tuar Pu Biakzuala nupui a nu) te ka ko khawm a. Pathian hming meuh a keini a kar ngaihdam min rawn dil nana chu ti in kan inngaidam ta a ni ” a ti.

Pu Biakzuala damdawiin awm man leh enkawl zui na tur chu a ṭul ang zelin a chhungte nen la sawiho zel nise tiin IGP te hian Rs.50,000/- ( Cheng singnga) chu Chhungkaw pa ber Upa Laibata chu an hlan ta a ni.

Aside | Posted on by | Tagged , , , | Leave a comment

Forensic files – DEADLY STRANGER by Bruce Kibby

Kum 1995, kum tir lam khan Serial Killer pakhat chu a che ta vak mai a. Ram chhung hmun hrang hrangah kal kualin a ngaihno beina tawktarh a hmangin hmeichhia te chu a thangah a awhtir a. Tichuan a that zui ta țhin a ni. Chutianga mi a thah zawh ve leh Police te man hman lovin a lo pilbo leh hman ta țhin a. FBI leh Police Detective te chuan he hriat loh serial killer țihbaiawm zet mai hi midang tu emawin a tawn leh hma ngei a an dan vat a ngai a ni. He pa hi Glen Edward Rogers a ni a; “The Cross Country Killer or The Casanova Killer” tia hriat a ni.

A sei deuh hlek a; chhiar peih tan chauh aw ni ang. A ngai ang diak diak ni lovin a ngaihnawm tur ang zawnga herrem a ni e. Chuan Forensic Files pangai mi kha ni lovin FBI Files a mi zawk a nia. Forensic Files tiin ka dah ta mai, pawi lo turah ka ngai.

Kum 1995, September 29 zing varțian vel hian Los Angeles Fire Department te chuan Van Nuys khua a hospital bul maia motor kang awm thu an dawn rualin kang țhelh turin an thawk chhuak ta nghal a. Motor dahna hmuna Pick up truck pakhat lo alh hluah hluah mai hi an va hmu a. Mei alh hluah hluah an han țhelh mit a motor chhung an han enfiah chuan mihring ruang kang ut huam tawh hi an hmu a. Fireman chuan Los Angeles-a Arson Homicide Department chu a be pawp ta nghal a. Homicide Department lam chuan an thudawn chu an rawn bawhzui ta nghal a ni. A hmun an lo thlen chuan uniform ha Officer pakhat chuan thil thlen dan leh an hriat chin te chu a lo hrilh zung zung a. Kangmei chhuah hlima lo hmu hmasatu nurse pawh thu an zawt fiah nghal bawk. Nurse sawi dan chuan zing khawvar hma hretin a morning shift hna țan turin hospital chu a lo thleng a. Parking Lot a lo thlen chuan truck lo alh hluah hluah chu a hmu a. Chu mei alh karah chuan mi pakhat samsei, truck tlan chhiatsan lai hi a hmu hman a. Mahse, a hmel erawh a hmu thei lo thung a ni. Chu mai bakah a hmain chu truck chu a la hmu ngai miah lo bawk.

Investigator-te chuan chu Pick up Truch chu ngun takin an han enfiah a. Motor chhung kan chhiat dan han enin kangmei chu motor hmalam atangin a kang țan a, a kang chak hle tih pawh a hriat theih a ni. Investigator-te rin dan chuan tum lawk reng vanga hal niin an hria a. Mei kan kai awlsam nan petrol hman ngei niin an hre bawk. Motor chhunga ruang awm chu hmeichhia ngei niin a lang a, mahse, hriat chian thei lo tur khawpin a kang chhia a ni. Mak tak maiin bungrua thenkhat chu mei alh lakah chuan an him hlauh mai. Chung bungrua zingah chuan bag, camera leh la sil loh roll film te a tel a. Technician-te chuan document țhen khat “Sandra Callagher” tih hming chuanna an hai chhuak bawk.

Ni a lo chhuah chuan Van Nyus Police Station-a LAPD (Los Angeles Police Department) Detective te chuan motor kang ta License Plate ațangin chu motor neitu chu an han zawng ta char char a. Chu truck chu Sandra Gallagher-i ta ngei a ni tih an finfiah thri ta a. Sandra-i hi pasal nei lai, a pasal, Steve-a hi Los Angeles-a khawsa a ni tih an hmu chhuak a. A pasal chu an han be pawp a, thu zawt fiah turin Venile Stationa an inhmuh theih nan ruahmanna an siam bawk a. Detective-te chuan truck chhunga ruang chu Sandra ngei niin an ring a. Mahse, Dental Record hmanga finfiah a nih theih nan ni eng emaw zah nghah a la ngai dawn a ni. Finfiah turin ruang chu a kan chhiat em avangin Detective chuan Steve-a chu truck chhung ațanga bungrua an lakchhuah te enfiah turin a han ti a. Steve-a chuan bag pack, camera leh film te chu Sandra-i ta ngei a nih tih a sawi a. Police-te chuan mei alh laka him roll film chu an han sil (develop) a. Steve-a chuan thlalak a mi chu a nupui ngei a ni tih a finfiah a. Pawmlai nei hmeichhia tualthi tam zawk hi chu an pasal te thah a ni chawk țhin. Chuvang chuan Detective chuan Stevea chu Sandra nen an inlaichinna a zawt a. Inhnamhnawihna a nei loh phawt chuan an rinhlelh zinga telh lova a awm theih nan Sandra-i nen an inlaichinna hriatfiah a duh a ni. Steve-a sawi dan chuan a nupui Sandra-i chu Truck kan hma ni chiah, September ni 28 khan a hmu ngei a. Chumi ni chuan hemi te nupa hi chhunchaw fakin an inhmu a. An nupa inkararah harsatna eng eng emaw an tawk a, zan eng emaw zah chu an awm hrang tawh nghe nghe a ni. Chumi țum chuan an harsatna te sawi duna insawirem an tum a ni a. Mahse, an inkar boruak chu a la rip hle reng tho mai. A sawi dan chuan tlai dar 2 vela Sandrai a hmuh chu a hmuh hnu hnun ber a ni a. A hnu tlai lamah a nupui hnen atangin call a dawng a; McRed’s Bar ațanga a lo biak thu sawiin Sandra-i chu a phur hle ni hian a lang a. Lottery $12000 a man thu a lo hrilh a ni awm e. Chuta tang chuan a nupui hnen atangin chanchin engmah hriat a nei leh tawh lo va, a kalna chin lah a hre hek lo. Detective-te chuan Steve-a thu sawi chu a dik ngei em tih finfiah a hmabak ta a ni.

Steve-an a sawi McRed’s Bar chu hnu chhui bul an tanna tur chu a ni a. Chutah chuan va kalin tu nge bar tender ni a, tu nge bar neitu? Khami zan khan tu te nge awm? Truck-a tanga Sandra-i thlalak an nei hmangin tu in nge Sandra-i ngei a ni tih lo finfiah theih? Khing zawhnate khi an finfiah hmasak phawt a ngai a ni. Tichuan, LAPD Detective-te chuan Steve-a sawi bar chu an va pan ta a, zawhna an zawt țan ta. Thlalak an han hmuh tir a, Bartender chuan Sandrai chu a lo la hre teh meuh mai. Bartender chuan Sandrai chu “Sam” tiin a lo hria a. Ni 28 zanah Bara a awm ngei tih a sawi a. Sandrai chuan lottery a man chungchang pawh mi hran hran hnenah a lo sawi ngei bawk. Chutianga an inbiak mawlh mawlh lai chuan customer țhenkhat chuan Detective te zawhna chu an lo hria a, Detective hnenah chuan ni 28 zana bara an awm ve thu an lo hrilh a. Thlalak a mi chu an lo la chhinchhiah a, Sandrai lo betu mipa pakhat chungchang pawh an hrilh tel nghe nghe a ni. Thlalak a mi chu “Sam” tiin an hria a, chu thlalak a mi leh mipa pakhat “Glen” tia an hriat nen an inkawm thu an sawi a ni. Glen-a hmelhmang an sawi dan chuan sambuang sei tak leh khabe hmul nei a ni a. Chu bar-ah chuan a hma ni eng emaw zah chhung ațang tawhin țhulh lovin a lo kal ziah țhin a. Chumi zan chuan Sandrai chu a ngaihven bikin hun eng emaw chen a be nghe nghe a ni. Chutianga an inbiak nel hnu chuan pawk taka langin Sandra leh midangte tan in tur a leisak a. Bar khar a lo hun chuan Glena chuan Sandrai hnenah chuan in lama va thlah a inhuam thu a hrilh a. Sandrai te chenna bul maia cheng ve angin a insawi a ni. Sandrai pawh chuan inthlahtir tur chuan a lo remti ve mai bawk a, tichuan bar chu an chhuahsan dun ta a ni. Chumi zan ațang chuan Customer-te chuan Glena chu an hmu leh ta lo va. An rindan chuan Glena hming tawp chu Rogers niin an hria a, mahse an chiang chiah mai bik lo. Glena pianhmang an sawi leh pick up truck atanga tlan chhe ta nia an sawi pa pianghmang chu an inang hle a, chuvang chuan Glena chu an chhui zui a ngai ta a ni.

An han chhui ta zel a; Glen-a chu Van Nyus bul velah a khawsa țhin tih an hre thei ta a. Vannei thlak takin a thlalak pawh an nei thei ta bawk. Photo line up siamin chu thlalak chu bar a witness te hnenah chuan an han hmuhtir a (suspect thlalak kha midang pa 4/5 vel thlalak nen dah pawlhin witness te kha an han entir ta țhin a. Witness ten confi taka suspect thlalak kha an kawk chat thei a nih chuan an mi duh a chu chiang takin a hre thei tawh mai dawn a ni). Photo Lineup ațangin Glen Rogers-a thlalak ngei chu McRed’s Bar-a Sandra Galagheri nena lo inkawm mipa chu a ni tih an finfiah thei ta. Detective-te chuan Glen Rogers-a apartment dap phalna an dil chhuak ta nghal a; apartment hi pick up truck halna hmun ațanga minute tlemtea kal thlen theih mai a awm hi a ni nghe nghe. Glen-a apartment chu an han dap ta a; Inchhungah chuan Glen-a chu ralthuam kengin a awm thei tih an hria, fimkhur takin kawngka chu an han kik a. Uniform ha silai keng ten inchhung chu an lut hmasa a, Glen-a chu a lo awm hauh lo mai. Glen-a chuan hmanhmawh takin in chu a chhuahsan niin a lang. In chu ngun takin an han dap a. Hmeichhe bag chhunga pawisa ip lo awm hi an hmu chhuak a. Pawisa ip erawh a lo ruak a, ID pawh a awm lo bawk. Dawhkanah chuan hmeichhe bengbeh khingkhat hi an hmu a, a hnuin thla tlem liamta a Stevean a nupui tana a leisak ngei a ni tih an finfiah ta bawk.

Ni eng emaw zah a liam hnuin Coroner (Kan sawi fiah tawh tlat) chuan Sandra-i ruang a endikna report chu a peihfel thei ta a. Ruang chu Sandra Galagher-i ruang ngei a ni tih a finfiah a, hal hlum a ni lo tih pawh a chiang. A chhan chu a hnar velah mei khu ung hip luh vanga awm țhin țing hmuh a ni lo va, mei khu kha a hip lo tih a chiang; chumi awmzia chu kang mei chhuah hmain Sandra-i kha a thi fel hman tawh tihna a ni. Tichuan nu, fa pathum nei chu kut hmang ngeia reh hlum a ni a, a thih hnuin hal zui a ni tih an hre thei ta a ni.

Los Angeles Detective-te chuan Glen Rogers-a chu tualthah thubuai an siamsak ta a, man phalna Warrant of Arrest tih chhuah nghal a ni. Glen Rogers-a hming, pianhmang leh chanchin te chu National Crime Information Centre ah dah luh nghal a ni a, NCIC hian ram puma dan kengkawhtu Agency 57000 zet a thlunzawm a. Khawi hmunah pawh Glen-a chu hmuh lo ni ta se an lo rek nghal chat tawh mai dawn tihna a ni. Detective-te chuan Glen Rogers hretu tawh phawt chu an zawng chhuak nghal ta zel a. An hnen ațanga an hriat dan chuan Bar a tlawh ngun hle a, a rem rem, a bikin insaknaah, a thawk mai țhin a ni. Detective-te chuan Glen-a hnathawhna hmun hrang hrang tlawhin a thawhpui te leh a țhian te an kawm lawr bawk a. An hnen ațanga an hriat dan chuan Glen-a chu pa thin chhia, a ruih tawh chuan che rawva thei tak a ni a. A bialnu hlui pakhat pawh kut a lo thlak tawh a ni awm e. Chuvang chuan an mi zawn lai meka chu a ruih phawt chuan tharum a thawh hreh dawn lo tih an hria a ni. A țhiante zinga pakhat chuan Glen-a chu hun eng emaw ti ațang khan a hmu tawh lo tih a sawi a, a hmu phawt chuan Police te chu a bepawp ang tiin a lo tiam a ni.

Ni tlem a liam leh hnuin Glen-a țhianpa chuan Police te chu a rawn bepawp ta a. A sawi dan chuan Mississippi a Jackson khaw pawna motel (thlen theihna leh motor dahna awm kawp nghal ang chi) pakhat ațangin Glen-a chuan a lo phone a ni awm e. Police-te chuan chu motel chu an va pan ta nghal chat a. Manager chu an han bia a; chu manager chuan Glen-a room number chu i he lovin a lo hrilh nghal a. Fimkhur takin Glen-a thlenna room chu an han dap ta a, mahse room chu a lo ruak ta tlat mai. Tual thattu nia an mi rinhlelh chu a lo insaseng leh hman ta tlat mai a ni.

Glen Rogers-a zawn hna chu chhunzawm zel a ni a. Police te chuan September ni 28 a hmeichhia a thah hnuin California lamah a tlan chhia niin an ring a. An thu rawlruk chuan Police-te chu Mississippi a motel pakhat ah a hruai thleng leh ta a. Mahse, vanduai thlak takin Police te thlen hmain Glen-a chu a lo insaseng leh hman ta tlat mai a ni. Police-te chuan mipuite hnenah ngenna (APP) an siam a, a insaseng hmain tu emaw talin an mi rinhlelha chu a lo hmu ngei an beisei a ni. Chumi hnu kum 1995, November ni 3 chuan Mississippi-a Jackson Police-te chuan tualthahna thleng report an dawn chu an bawhzui a. Linda Price-i chhungte chuan Linda Price-i chu bual thlengah thi in an hmu a. Kum 34 a upa, fa pakhat pawm leh pasal nei lo Lindai chu hmun eng emaw zatah vih a ni a, a hrawk hrui zai chah a ni bawk. Investigator-te chuan Evidence zawngin Lindai chenna apartment chu an han dap a. Technician te chuan pawi khawihna thlenna hmun chu uluk takin a thla an la thlap a, kut ze thla (latent finger print) tam tham zet an lakhawm bawk (Latent Finger Print: Mawlmang takin sawifiah ta i la. Bungrua eng emaw kuta kan khawih/tawk hian kan kutze thla kha mit lawnga hmuh theih si loin chu bungrua ah chuan a lo kai ta țhin a. Kan kut a thil tuihnang sweat gland kan tihah hian amino acid a awm a. Chu tuihnang chu burngrua ah khan a va bet ta țhin a ni. Mita hmuh tham loh kut ze thla chu bawlhlo hmangin an han dep kai a, kut ze thla chu hmuh theihin a lo lang ta țhin a. Chu kut ze thla chu thlalakna hmangin emaw finger print lifting tape hmangin emaw an lakai chhawng leh a. Tichuan suspect finger print nen an khaikhin ta țhin a ni.). Nasa taka an zawn ngial pawhin tual thahna hmanrua an hmu zo lova, inchhung ațangin thil hlu bo a awm lo niin a lang bawk. Tharum hmanga luhna hnuhma a awm lo va, tual thattu chuan a chhuah lamin kawngka a kalh niin a lang. Pawi khawihna hmun awm dan ațanga Detective-ten ngaihdan an siamnaah chuan Linda Price-i chu a hriat țhan mi ngeiin a that a ni.

Detective-te chuan a tuk zingah chuan Linda Pricei nu chu an han kawm ta a; ani hian tual thattu chu a lo hre khiah mai thei a ni. A nu sawi dan chuan Lindai chuan bialpa thar a nei a; a hming chu Glen Rogers-a a ni. A hma thla liam ta October ni 3 khan Linda-i chuan Glen Rogers-a chu Mississipi State Fair ah Beer vel an semna Puan Inah a tawng a. Ngaihno a lo bei zek bawk nen Lindai chu Glen-a zunah a uai nghal der mai a ni. Rei lo te hnuin in luah hawhin an cheng dun ta nghal a. A tir lam chuan Linda-i chu a hma zawng aiin a hlim zual emaw tih tur hi a ni a. Mahse, ahma ni lawk ațang khan Linda-i chuan “Duh a thlang sual em ni aw?” tiin ngaihtuahna a nei a. Anu hnenah chuan Rogersan thin thawk a nei thu leh a mood danglam thut țhin chu a hlau thu a lo hrilh a ni. Lindain a rawn biak pawh loh avang leh kawngka kik pawh a chhawn tak loh avangin anu chuan Rogeran a tina ta niin a ring a ni.

Ahma ang bawkin Rogers-a chu hmu tur reng a lo awm lo. Jckson Detective-te chuan chu hmun chu a chhuahsan daih tawh a nih an ring nghal a. Tichuan Glen Rogers-a hming chu NCIC Data Base ah an han chhu lut a. Californiaa tualthah thubuaiah wanted a ni tih an han hriat chuan Los Angeles-a Detective Mike Goblentz-a chu an va bepawp ta a. Tualthahna an nei thu leh Glen Rogersa chanchin hriatbelh an duh thu an hrilh ta a, a chhan chu an hnu chhui laiah chuan tual thattu a ni thei ve tlat a ni.

Heng tual thahna te hian inanna riau an nei a. California leh Mississippia tualthitate hi Rogers-a zunin a lo phuar tawhte an ni a. An pahnihin chhungte lak atanga awm hrang ve ve an ni a, Rogers-a tlan bo hma lawkin rawng taka thah an ni ve ve bawk. Inestigator-te rin dan chuan Glen-a chu a sapatal a, hmuh a nih thuai loh chuan a thil tih chu a bansan mai mai dawn lo tih an hria a ni. Man a nih thuai loh chuan a kut tuartu an pung ngei ang tih pawh an ring a. Jackson Police te chuan mipuite chu Glen-a an hmuh hlauh chuan Police-te hrilh hriat nghal vat turin an ngen a. Tichuan witness te chuan Glen-a an hmu thu an rawn thlen ta. Mahse, Glen-a chuan thuneitute chu pen khatin a lo hmakhalh leh hman ta tlat mai le.
Detective-te chuan Jackson khuaa FBI Field Officer an bepawp a. An rindan chuan California a tual a thah hnua a tlan chhiat ang khan Mississippi a chhuahsan tawh ngei an ring a. Tual thah thubuaia hnuh luh a nih loh nan phalna nei lova a tlanbo avangin FBI Agent te chuan Federal Warrant an dil ta nghal a. He tual thattu chimawm tak hi Federal hmanraw neih te hmangin an dang thei ang em le?.

FBI Special Agent, John Huber-a chuan State intelkhawm hnuchhuina chu a kaihruai ta a. Heng tual thahna te hi inbichilh tak takin a thleng a; Jackson khua a Linda Price-i thahna kha Nov ni 3 ah a thleng a, chumi hnu Nov ni 6 ah tual thahna dang a thleng leh ta. Chumi ni chuan Florida a Tampa Police te chuan Motel pakhat a Glen Rogers-a room luah hawh a tual thahna thleng report an dawn chu an bawh zui a. Linda Price-i ang bawkin nu valai tak pakhat chu bual thlengah thiin a lo awm a. A hnungzang, awm leh ban rek ah te vih a ni. Room chhungah chuan chu nu nihna hriat theihna tur engmah a awm lo va. Mahse Investigator-te chuan chu nu koki-a kross lem tattoo inchhu chu an hmu a. A jeans leh pheikhawk te chu toilet bulah chuan a lo awmkhawm ruih a. Kutsilna thlengah chuan bracelet hmuh a ni bawk. Chung Evidence awm ang ang ațang chuan Tampa Homicide Detective Jullie Massuci chuan tual thahna thlen dan kimchang chu a han riruat chhin a. A thawmhnaw an han enfiah chuan chemte vihna vanga Chik/pawp hrup mai chu a hmu a. Chumi awmzia chu a thawmhnaw hak chhanah vih a ni tihna a ni a, a thawmhnaw a phelh lo phawt a. Chung pawp te chu kawr hnung lama awm a ni a. Tu emaw chuan hnung lam ațanga rawn vehin a rawn vit tihna a ni ngei ang. Pheikhawk chung lamah chuan thisen far a awm a, chu chuan vih a nih laiin pheikhawk a bun a, a dinglai reng a vih a ni tih a entir a ni. Chu nu taksa/ruang hnuaiah chuan mipa sana a lo awm a. Investigator-te chuan tual thattu sana ngei niin an ring a. Bual thlenga saruaka ruang dah a nih chhan chu a pawimawh hle bawk. Hei hi a chhan chu tu emaw chuan chu nu taksaa Evidence awm ang angte tifaiin nuaireh a tum tihna a ni thei a ni. Towel hmuh a ni a, chumi hmang chuan chhuata thisen awmte chu hruk fai a ni tih a entir a. Tin bual thlenga tui chu herh hawin ruang chunga Evidence hnutchhiahte tlengfai nana hman a ni bawk a ni.

Detective-te chuan ruang hmu chhuaktu, in vawngfaitunu chu thu an han zawt fiah a. Chumi ni Check Out hun pelhah nitina a tihdan thin angin a hna chu a țan a. Room 119 kawngka ah chuan lehkha phek a kuta ziah “DO NOT DISTURB” tih lo intar vah mai chu a hmu a. Chumi rooma chengte chuan chimbuai an duh lo nia a rin avang leh lehkha intar a hmuh bawk avangin chumi ni chuan chulai room bik chu a tifai ta lo va. Ruang hmuh a nih ni hian room luahtute chuan an room luah chhuahsan tura an inruahman ni a ni a, chuvang chuan room tifai turin a chhungah chuan a lut ta a. Bathroom a han luh chuan tualthahna rapawm zet mai chu a hmu chhuak ta a ni. Detective-te chuan room 119 a chengte chu a hriat mi an ni em tiin Motel Manager chu an han zawt a. Chu Room luahtupa chu a lo la hre thei na meuh mai; a chhan chu a hma ni in chu pa chuan “DO NOT DISTURB” tih sign pe turin Manager chu a lo ngen a. Ani chuan chutiang Sign an neih loh thuin a lo chhang a. Tichuan chu pa chuan zan khat dang a tan riah man pek belh pahin Inziahluhna ah chuan a room tihfai a duh lo mai bakah chimbuai a duh loh thu a lo hrilh hlawm a. A room lam pan chuan a let leh ta a ni. Chu pa chuan Phoon Book phek pawtthlain “DO NOT DISTURB” tih ziakin kawngkharah a tar ta a. Manager chuan chumi tlai lama chu pa vekin car var chhunga bungrua a thiarlut lai a hmu a. A riah man tur a pek lawk tawh avangin Motel chhuahsan mai turah a lo ruat bik lo va. Tichung chuan a hma lawka motel rawk a ni thu te hrilhin car chhungah bungrua riah loh turin a chah nghe nghe a. Tichuan a hnathawhna lamah a kirsan leh ta a ni.

Detective chuan Motel Office Record chu chik takin a han enfiah a, Room 119 inziahluhna lehkha pawh chu a hmu bawk a. Chu Registration Card ah chuan Glen Rogers-a hming leh signature a lo chuang a. A hnuin chu Card atang chuan Technician ten fingerprint an nemkai a, Rogers a finger print ngei a ni tih an finfiah leh a ni. Detective Massuci-i chuan “Glen Rogers” tih hming chu Computer ah a han zawng a, California leh Mississippi a Murder Warrants te chu a hmu chhuak a. Tichuan Agency dangte leh FBI te chu a bepawp leh ta a. Chutia a han biak chuan an mizawn lai Glen Rogersa chu Serial Killer a ni mai thei tih an hre chhuak ta a ni.

Investigator-te chuan tu nge tual thattu chu tih an hria; mahse, Tampa Detectivete chuan chu hmeichhia tualthita chu tu nge tih erawh an la finfiah thei mai lo. “Jane Dough” tih hmingpuin Morgue ah chuan dah a la ni a. Tu nge tih an finfiah theih phawt chuan amah leh midang pahnih thattu zawn hmuh kawngah a puih nasa ngei ang le.

California, Mississippi leh Florida a tualthahna thleng te chu mi pakhat nen suihzawm a nih hnu chuan FBI te leh Detective-te chuan Serial Killer chimawm tak Glen Rogers-a chu theihtawp chhuahin an zawng țan ta a. Tampa Motel room pakhata thi a an hmuh hmeichhia kha a nihna finfiah lovin a la awm a ni kan tih tawh kha. Media lama a chanchin an chhuah ngaihvenin nu pakhat, a fanu ni 2 lai bo tawh chuan chanchin a rawn ngaihven a. Chu nu chuan ruang chu a fanu Tina Marie Cribbs-i ngei a ni tih a rawn finfiah ta. Tina-i hi fa pahnih nei a ni a. A nuin Massucii hnena Tinai hun hnu hnung hman dan a hrilh dan chuan Tinai chuan hna a thawk zo a, Gibsonton-a ShowTime Bar-ah a kal a ni awm e. Chutah chuan thian thar pawh a chhar nual a. Chumi hmunah vek chuan a nu nen inhmu tur an ni nghe nghe. He Bar hi chhungkuaa kalna ang chi, inkawmkhawmna hmun ang hi a ni ber a. Chu bar chu Detective-te chuan a va tlawh ta nghal a. Bar Tender chuan Tinai leh a nu chu a lo hre ngei a. Nov ni 5 ni ah Tinai chu Barah chuan a lo kal ngei thu a sawi. Chumai bakah chumi zan chuan Glen Rogers-a pawh chu bar ah a awm ve ngei a. Glen-a chuan Tinai leh midangte chu a be kual a. Cheng 100 tlang hmangin an in tur a lei sak hlawm a ni. Bar tender sawi zel dan chuan chu pa chu pa nelawm tak niin Tinai paw’n a lo ngaina nghal vat a. A tawpah chuan chu pa chuan Tinai chu ride pui turin a sawm ta nghe nghe a. Amah insawi dan chuan a thlenna Motel chu hnaivai taka awm a ni a, Tinai chuan a nu hmu turin a hun takah a let leh ang tih a tiam nghe nghe a ni. Tinai pawh chuan a tawpah chuan a remti ve ta nghe nghe a, a thiante hnenah chuan a kir leh thuai tur thu a hrilh nghe nghe a ni. Tichuan chumite pahnih chuan bar chu an chhuahsan ta a. A hnuin Tinai nu chuan Showtime bar chu a rawn thleng ve ta a, a fanu lo lan hun chu a nghak ta ran mai a ni. Mahse a fanu chu a rawn lan tak lawk loh avang chuan a awmna chin hriat tumin a fanu Pager ah chuan a va hriattir thin a. A fanu nen hian thinlung inpawh tak an nih avangin chutia Pager a rawn chhanlet loh avang chuan a fanu chungah chuan thil pawi eng emaw tak chu a thleng a ni ang tih hriatna a nei a ni.

Detective Massuci chuan Tinai chuan Ford Festiva var a nei tih a hria, chutiang ang car var-a Glenan suitcase vel a dah lut lai kha Motel Manager khan a lo hmu a ni a. Tichuan Glen Rogers-a chungchang chu NCIC ah a update ta nghal a. A chanchinah chuan Festiva leh motor number te pawh a dah lut belh ta bawk a ni.

FBI Agent John Huberta chuan Glen Rogersan a nihna thup a tum miah loh chu mak pawh a ti hle a. A lan dan chuan man a nih leh nih loh pawh a pawisa lova dan lah a hlau hek lo. Midangte nen an indawrnaah a hming dik tak a hmang a, Motela a thlen pawn a hming dik tak hmangin a inziak lut mai a ni. Ama ta ni lo a mi thah car nen awlsam taka thlun zawm theina tur a mi thah car chu a khalh ngam a, midangten thil thleng an hria ang tih pawh pawisa lovin inthup a tum duh miah lo a ni.

Serial Killer zawnna chuan chanchinthar a luah khat hneh hle a. US chhimchhak lam TV Stations te chuan Glen Rogersa thlalak pholangin lo hmu an awm phawt chuan thuneitute bepawp vat turin an ngen nghal bawk a ni. Mipuite hnen ațang an dawn hnu chhui zui tur za chuangin FBI te beng a thleng a. Chung zinga rin tlak tak pakhat chu Mississippi a Jackson khua motel pakhat ațanga lo kal a ni. Mi hran pahnih hian chutah chuan Glena an hmu thu an rawn sawi a. A hma lawkin Jackson-ah chuan a awm ngei a, Motel lian vak lo pawh a tlawh ngun hle tih an hre leh ta zel bawk. Police-te chuan a thlenna nia an sawi Motel chu an hual ta nghal a. Entry Team chuan a pindan luah nia an sawi kawngkhar lam chu fimkhur takin an pan ta țhem țhem a. Hmeh puah mei theihin Silai an keng fur bawk. Police an nih thu sawiin Kawngka chu an han kik ta a. Pa pakhat hian kawngka chu a lo hawng a. Chupa nihna chu finfiah a la nih loh avangin Police-te chu an fimkhur ngang mai. Chu pa wallet atanga ID chu lachhuakin an han en a, a pian zia leh hmel chu Glen Rogersa nen an inang hle a. Mahse, an mi duh chu a lo ni tlat lo. Tichuan Hotel chhung zawng zawng chu an han dap a, a bul hnai vel te pawh ngun taka an dap ngial hnuin Glena chu an hmu zo lo a ni.

An mizawn Glen Rogersa hi a hma thei ang bera an man thuai a ngai a ni, a chhan chu a chetna hnu te han chhui kirin man a ni vat loh chuan midang pawh a la that leh ngei dawn niin a lang. Thuneitute chuan hepa thiltih hi tih tawp sak an chak zek zek tawh a. He Serial Killer hi khawiah emaw chuan a tualchai ngei a, a thah leh tur a zawng mek te pawh a ni thei a ni.

Serial Killer nia rin Glen Rogersa chu Florida ah an hmuh hnu hnung ber a. FBI te rin dan chuan California leh Mississippia mi a thah hnuin Florida-ah hian nu pakhat a that leh a ni. FBI te chuan chumi hnua a chet lehna chu Louisiana a ni tih an hre rang kher mai. Nov ni 10, 1995 khan fa pali nei, Andy Jiles Sutton-i chu Bossier City, Louisiana-a chenna Apartment-ah mi kut tuara thia hmuh a ni. A hmaa mi pahnih te ang bawkin a taksa chunglam leh hnung lam hmun tam taka vih a ni a. Bossier City Detective chuan Andy room mate leh a bialpa hlui te chu thu a zawt fiah a. Andy-i room mate hi waitress niin Andy thah a nih hma zan hian a bang tlai a. A tuk zing ang reng taka in lama a rawn haw chuan bed room kawngkhar inkhar ri a hria a. Roomah chuan Andyi leh a bialpa thar, Glen Rogersa te chu awm turah a ruat mai a. Țhutțhlengah chuan blanket a lo awm mai bawk avangin țhutțhlengah chuan a muhil ve ta nghal mai a ni. Chhun a lo nih chuan tu emawin an kawngka chu a rawn kik a, chumi thawmah chuan a rawn harh a, kawngka a va hawn chuan Andyi bialpa hlui hi a lo ni a. Chu pa chuan Andyi biak a duh thu a sawi a. Thil awmzia hrilh tuma rooma a va luh chuan Andyi ruang puana lo inkhuh chu a va hmu ta a ni. Detective hnena a sawi dan chuan Andyi chuan Glen Rogersa chu Bar ah a tawng a. Ni tlemte bak an la inzui hman awm lo ve. Apartment bulhnaia chengte chuan Glenan Festiva var chuanga Apartment a chhuahsan lai an lo hmu ve bawk a ni.

Bossier Detective chuan Glen Rogersa hming chu NCIC ah a han zawng a, Murder Warrant pathum lai a nei tih a hmu chhuak ta nghal a. Tichuan State danga Police te leh FBI te chu a bepawp ta nghal vat a ni. Los Angeles Police-te chuan Bossier Police-te chu hnuchhuina a an hman a tan Glen Rogersa a thlalak an rawn thawn nghal a. Louisiana TV Stations te chuan tual thahna chanchin chu TV lamah an chhuah a, TV lo thlirtute chu Glen Rogersa ngaihven turin an ngen a, mahse he dan lak atanga tlanbo mek mi hlauhawm tak hi mahni ngawt a va pawh mai lo turin an hrilh hriat bawk a ni.

Special Investigator John Huber-a leh hnuchhuitu dangte chuan Glen Rogersa an zawn hmuh mai theih loh avang chuan an hnual hle tawh a. An hnu chhui lai mek an chhui zawh hmain Glen Rogersa chuan midang a lo that leh hman tlat zel a ni. FBI leh Hnuchhuitute rin dan chuan Glen Rogersa chuan kar 6 chhungin mi 4 lai a that tawh a. Mi a thah zawh apiangin a thahna State a chhuahsan nghal zel a. Hmun thlan bik a nei lo bawk. Theih tawp an chhuah chung pawhin Investigator-te chuan an umpha thei tlat lo a ni. Tunah chuan Glen Rogersa pianhmang leh a car hman te chu ram chhung hmun tinah an thehdarh a ngai ta. Agents te chuan Truck khalhtute chu Festiva var ngaihven pui turin an ngen a. Truck dinna hmun leh chawlh hahdamna hmunah te chuan an mi duh chanchin tarlanna lehkhate an tar a. Mipuiten Glen Rogersa thlalak an lo hmuh theih nan Press Conference an ko bawk. A kut tuartu tur ni thei te vaukhan lawk an duh mai bakah tu emaw talin Glen Rogersa chu a lo hmuh mial an beisei a ni. Media kaltlangin Glen Rogersan a mi thah te a bitum dan kimchang an tarlang a, a kal tawhna chin pawh chiang takin an tarlang tel bawk a ni. FBI te chuan Glen Rogersa chu 10 most wanted list ah telh a ni ta bawk. Hetianga misual tu emaw 10 Most Wanted L telh a nih hian FBI ten hnuchhuinaa an hman tur sum leh hmanrua te chu tam taka tihsanin a awm mai bakah media te ngaihven pawh a hlawh leh zual a. Chutianga hma an han lak takah chuan thu rawlhruk pawh an dawng tam chho ta tial tial a. Chung zinga lo call tu pakhat chuan Glen Rogersa chu Mississippi a Pool Hall pakhata a awm thu a rawn sawi a. Tichuan FBI Agent pahnihin an thu dawn bawhzuiin an va ngaihven ta nghal vat a.

Misual zawnna kawnga Media hmanga hmalak nasat luat vanga harsatna awm thei pakhat chu ngaihven luat vanga an mi zawn ni ngeia lang, ni leh si lo (hmuhsual/hai) report an thlen thin hi a ni. Chutiang chiah chuan Pool Hall-a an mi hmuh chu Glen Rogers a lo ni lo tlat mai. Tichuan Investigator-te chuan Glena chet thawh lehna tur chhut lawk chungin a zawnna lamah chuan an insawrbing leh ta a ni.

Agent John Huber-a hian dan lak atanga biru case ang chi tam tham zet a lo buaipui ve tawh țhin a. Chuta țanga a tawnhriat dan chuan dan lak ațang biru ten harsatna an tawh hian hmun an hriat țhanah an kal chawk țhin a. An țhiante emaw an hmelhriat te an pan țhin a ni. Chutiang a nih vang chuan Glen Rogersa chhungte chu an ngaihven a, a chhungte leh țhian tam zawk chu Kentucky ah an khawsa tih an hre ta a ni. A chhungte leh țhian te ngaihvenna kawngah chuan an tha leh zung pawh an sawrbing hle reng a ni. Kentucky thuneitute chuan dan lak ațanga biru mek Glen-a chungchang ngai pawimawh tura ngenna an dawng a. Chu ngenna chu Kentucky State Police, Detective Bob Stephensan a han hmu chuan “Glen Rogers” tih hming chu a lo hre ngang mai. Dik tak chuan he pa hi kum 2 chuang a lo zawng tawh a. Glen Rogersa hi a chhiahhlawh kum 71 a upa, Mark Peters bo chungchang leh thah nia rinhlelh chungchanga thu zawh fiah a tan an mi duh/zawnlai a ni a. State hran hrana pawi a khawih hma kum 2 hma lam khan a unaupa chuan Kentucky State Police-te chu bepawpin an chhungkaw inteah ruang an hmuh thu a hrilh a. Policete chuan ruang chu Mark Petersa ruang ngei niin an hria a. An hmuh hnu hnun ber țum hian Petersa hi Rogersa nen an awm dun a. Petersa kut leh ke phuarna hrui leh an chenna a hrui pakhat chu angkhat an ni tih finfiah a ni. Thuneitute chuan Petersa thih chhan chu an finfiah thei lo va. Rogersa pawh an hmu zo lo bawk. He case hi la kalpui zel niin chhui lai mek a ni a. Rinhlelh pakhat an nei a, chu pa chu Glen Rogersa hi a ni. Mahse, a awmna chin an chhui chhuak thei lo va, lirthei chi hrang hrang hmanga a tlan chhe kual reng bawk avangin chhui zui a hrasa te pawh a ni mahna.

Investigatorten Kentucky lama an insawrbingna chuan awmzia a rawn nei chho țan ta. Kum 1995, Nov 13 chuan Glen Rogers chuan Kentuckya Lee County khuaa a chhungte a rawn tlawh ta hlawl mai. Chu in a chhuahsan ve leh in neitunu chuan Kentucky State Police-te chu a phone nghal vat a. Chu nu sawi dan chuan a vahpa chuan car var te lam deuh a khalh a, khawthlang lam Interstate 75 lam pana a kal thu a sawi a. Detective Stephensan Rogersa hmuh a nih thu a lo hriat ve leh Glen Rogersan Road 75 rawn pawh tura kawng a zawh tur nia a rin kawngah chuan a lo chang ta a. Rei pawh a nghah hmain Fiestiva car var chu a rawn tlan ta. Detective chuan a umzui ta nghal a. A rilru chuan midang ni lovin Glen Rogersa ngei ni se a ti hle mai. A umzui mek car zawn a thlen chuan a khalhtu chu thlalak a kawl a mi ngei a ni tih a hria. Detective chuan an hmunpui lamah back up a dil ta nghal a. A bul hnai lawkah chuan Police Officer pakhat hi a lo awm rengchang hlauh a; chu Officer chuan inumna chu a rawn zawm ve nghal a. Hnaih lutuk lovin an zui zel a, Police in an umzui mek a ni tih a hria a ni ngei ang ding tura an han tih chuan ding duh lovin a aia chakin a tlan zui ta zel a. A tlan zelna tur mel eng emaw zahah chuan Policeten Road Block lo siamin lirthei veivak te chu inthiar fihlim turin an zaizirin an hrilh mawlh mawlh bawk a. Tual thattu man hleih thei loh chu a um tawpna a ni ngei pawh an beisei a ni. Chu road blockah chuan Officers silai kengten an lo nghak ta ran mai a. Car chu a rawn lang ta, car ke chu an han kap a, a la ding duh mai lo, a tlan tlang ta zel mai si. Detective chuan a hnungah a umzui ta zel a. An umlai car chuan lirthei tam tak tlanpelin wrong side ah te a tlan kawi zawr zawr a. “Car chu a ding ngei tur a ni” tiin din tir an tum ruh ngang mai. Atawpah chuan car chu kawngpui ațanga pengin kawngsira khuar lo awmah zuk insawhin a ding ta nghe nghe a. A chhunga lo chuang chuan ralthuam a ken leh ken loh an hriat loh avangin fimkhur takin an pan hnai a. Dimna tel hauh lovin chu pa chu an va țham chhuak ta. A hmelah chuan beidawnna a lo lang a, a chan chau zia pawh a hriat theih a ni. Police thuhnuai awm chu a hreh ngang mai. Țang eng ang mahse an tam hneh bawka a hnung khirh sakin an thuhnuaiah an dah thei ta. Thla 2 chhung zet ram chhung hmun hran hranah pawi a khawihna vanga hmeichhia pa 4 laiin nunna an chan hnuin a tawpah chuan Glen Rogersa chu Policete thuhnuaiah a awm ta a ni.

Fiestiva car var number ațangin chu car chu Florida-a a thah tak Tina Marie Cribbsi ta ngei a ni tih finfiah a ni a. Technician-te chuan Evidence zawngin car chu ngun takin an enfiah a. A chhungah chuan Kekawrbul thisen kai nuaih, blanket leh hmeichhe pawisaip an hmu a. Chung bungruate chu Los Angeles, Mississipi, Florida leh Louisiana a tual thahna leh Glen Rogersa thlunzawmtute an ni. FBI lam chuan Evidence vel chu an lo thliar hrang zel a. Tichuan FBI te leh State panga a Police te (Kentucky State tiamin) chu case chungchang sawiho turin Kentucky-ah an inhmukhawm ta a. Special Agent John Huber-a chuan chu meeting chu neih a nih theih nan theih tawp a lotanpuiin ruahman a lo siam a. An thil hriat te leh finfiahna an nei te an inpe tawn a. Chumai bakah FBI Laboratory lam chuan Evidence te chu an lo zirchiang bawk a ni. Tichuan Agency tin chuan Evidence an nei theih ang zawng zawng te chu an lo zir chiang thei dawn tihna a ni.

Investigator-te chuan Case zinga Evidence an nei țhat ber nia an pawm tlan chu Florida case kha niin an hria a. Tampa Detective Jullie Massuci chuan Evidence an nei te ennawn leh turin Detective dangte leh Prosecutor te chu a hmu kual a. Bual thlenga sana an hmuh kha Glen Rogersa ta ngei niin an hria a. Mississippia a thah tak Linda Price-i nena thla an lak dun pakhatah chutiang ang sana chu Glena chuan a lo bun a ni. Detective Massuci chuan Case ah chuan an chak ngei a ring hle a a chhan chu Evidence te chuan Glen Rogersa chu “Tual thattu ngei a ni e” tiin a kawk vek a ni. Man a nih lai khan Tinai car a khalh a; car chhungah Glena kekawrbul thisen kai an hmu a, chu thisen chuan Tinai DNA a mil a; Registration Card-ah Glena hming sign ngei a awm a; motel room no 119 a mitthi an hmuhnaah khan Glena finger print hmuh a ni bawk. Tin, man a nih lai khan a car khalh chhunga bungrua eng eng emaw an hmu nual bawk a ni.

Kum 1997, July ni 11 khan Tampa Motel Room a Tina Marie Cribbs thah a nih ațanga kum 2 dawn a vei hnuin Glen Rogersa chu First Degree Murder ah thiam loh chantir a ni a, a hnuin Florida ah thi tura hremna pek a ni. Chuta tanga kum 2 hnuin Glen Rogersa chu Los Angeles lama Sandra Callagheri rehhlum leh a ruang hal chungchanga a thubuai ngaihtuah turin lak sawn a ni leh a. Prosecutor chuan vanduaina tawk ta hun hnuhnung hman dan vel chu jury te hriat turin a sawi chhuak a. A sawi dan chuan September ni 28, 1995 khan Sandra leh Glen te chuan McRed’s Bar an chhuahsan a. Truck chhunga an awm laiin Glena chuan mipat hmeichhiatna hmanpui tumin chet a thawh a, an inchai zui ta a. Glena chuan Sandrai hrawkah rekin a thawkna dawt chu a tikeh sak ta a. Sandrai chu a thi zui ta a ni. Tichuan Evidence te nuaireh a an awm theih nan Sandrai ruang leh truck te chu Glena chuan khawnvartuiin a leih huh a, a hal zui ta a, a tlanchhe ta nghal a ni. July ni 16, 1999 khan Jury chuan Glen Rogersa chu tual thah thubuaiah thiam loh a chantir a, a vawi hnih nan California State ah chuan Thi tura hremna pek a ni. Los Angeles Detective Mike Coblentz chuan Glen Rogersa zawn beipui thlakna kawngah inhnamhnawih tawh phawtten thawhhona țha tak an neih theih avang chuan a lawm hle a. Los Angeles Police Department te, Mississipi Police Department te, Florida Police Department te, Louisiana Police Department te leh Media lam te nena thawhhona țha tak an neih avangin hlawhtling takin an hnuchhuina an khar thei phah a ni. Glen Rogersa chuan Thi tura hremna pahnih lai a nei tak avangin Louisiana leh Mississipi prosecutor-te chuan mitthi ta chhungte tan tawrhna dang thlen belh leh kher tulin an hre lo va. Thubuai dang ngaihtuah leh a nih chuan mitthi chhungte rilru a thar thei a, rilru natna a tharin a tleng leh ang tih an hria a ni. Chuvang chuan heng thubuai pahnihte hi chu an titawp zui ta a.

Glen Rogersa hian a lo berah naupang 11 zet te chu nu nei lovin a siam a. Detective Massuci chuan, “Detective ang leh Police ang ni lovin, hmeichhia ka nihna angin sawi ta i la hmeichhia tam tak chuan Glen Rogers-a khawlai leng thei lova a awm tak avangin himin an inhre ngei ang tih ka ring a ni. He pa hian mihring nuna a ngaihlu lova, mitthite kalsan tak an chhungte tawrhna tur pawh a dawn lo va, pawisak a nei lo a ni. Lung ina a awm ta hi ka lawm a, lung in pawn lamah a ke a chhep leh tawh dawn loh avangin ka lawm leh zual a. A chhan chu hmeichhe dangte dinhmun derthawngah a dah thei tawh dawn lo a ni.” tiin Glen-a an man tak avanga lawmawm a tih thu a sawi a ni. Investigator-te chuan tual thahna chhui zawh loh tam takah Glen Rogersa hian inhnamhnawihna a nei ngei an ring nghet hle a. A chhungte bula a sawi dan chuan dawrzawn chuang zet a that niin a inchhal a. Thuneitute chuan chung la chhui chhuah loh tual thahnate chu chhui chhuah an ni theih nan leh Glen Rogersa nen inzawmna an nei em tih chhui chhuaka case tihtawp a ni theih nan chung la chhui chhuah loh tualthahna te chu an la chhui zui ta reng a ni.

Kum 1999, Valentine’s Day kha Glen Rogers-a tihlum tura ni ruat chu a ni a. Mahse, Florida Supreme Court ah appeal theh lutin State-in an puhnate sawhngheta tanpui turin Evidence an phawrh tha tawk lo tih a țanchhan a ni. A appeal chu March 2001 thleng khan tih khawtlai a ni a, a tawp ah hnawlsak a ni ta nghe nghe. 2005 April khan Glen-a hian Appeal dang a thehlut leh a; heihi la rel fel loh a ni. A appeal ang a Death Sentence hi paihthlak a nih chuan California ah pawh tih hlum theih a ni tawh lovang.
A tawp ta.

Aside | Posted on by | Tagged , | Leave a comment

ROHINGYA BUAINA: US DIPLOMAT A BANG DAIH! “AUNG SAN SUU KYI CHU PUARPAWLENG MAI A NI”-Bill Richardson

Myanmar sorkar chuan UN meuhvin demna thu a siam vangin, Rakhine state (Myanmar) atanga Bangladesh a thlabara nunau tlanchhia (refugees) “Rohingya hnam” raltlan 700,000 dawn chungchanga a hmalak chhoh dan thlir pui tura International community huapa “International Panel Board” a siam member zinga mi Bill Richardson chuan a bansan a, hei hian ti ti a ti tam chho hle. He Panel hian “Rohingya crisis” chin felna turin, Myanmar sorkar thurawn pein, an hmalak dan a en pui thin dawn a ni.

He Rohingya crisis vanga International Panel-ah hian member 10 awmin, UN Secretary General thin Kofi Annan chu chairman atana ruat a ni.Bill Richardson chuan tunkar liamta Ningani khan he Panel member a nihna a bansan tih puangin, “Aung San Suu Kyi chubeisei leh rin ang a ni lo. Puarpawleng (bubble) ang chauh niin, an hmalak dan chu sorkar hmai phih fai (white wash) tumna leh hruaitute tihlawm (cheer leading squad for the gov’t) a ni e” a ti.

Bill Richardson hi New Mexico state Governor thin leh President Bill Clinton hun laia Cabinet pawimawh pakhat a ni.

Hetianga Bill Richardson ban hnu lawkah Aung San Suu Kyi thupuangtu Thaung Tun chuan, “Bill Richardson hian ama ngaihdan (agenda) a nei a, International Panel member te hi Rakhine state ah zin puiin, thil endik pui an ni a, Richardson hi a tel ve lo a ni” tiin, bang mai turin an ngen tih an puang ve thung a ni.

Bill Richardson erawh chuan, hetianga puhna hi thudik lo a ni tih hrilhin, US Secy of State Rex Tillerson ngenna angin Myanmar chu Rohingya buaina vangin a hmain a lo zin tawh tih sawiin, Yangon-a US Embassy leh State Dept te thil awm dan a hrilh tih a sawi ve bawk.

Bill Richardson chuan, “1980’s chho atangin Suu Kyi chu ka lohre tawh a, ka zah a, mahse, Rohingya chungchanga harsatnaah chuan mawhphurhna (moral responsibility)a la duh tlat lo. Pawi ka ti hle a ni. Dec 12 a Rohingya buaina chungchang ziaktu, Reuters journalists Wa Lone (31) leh Kywa Soe Woo(27) te chu jail atanga chhuah tura kan sawi pui dek dek chuan a puakkeh (she’s exploded) ta mai a ni” a ti.

Wa Lone leh Kywa Soe Woo te hian Rakhine state tlawhin, Myanmar sipaiten Rohingya nunau an sawisak leh khawhal, pawngsual leh crimes against humanity an tih dan kimchang an ziak a, khawvelin thudik a lo hre ta. Chu veleh Yangon hmunah police ten zanriah eiah sawmin, “thuruk puang darhtu” tiin, Dec 12 khan a rek ta hmak mai a ni. He journalists pahnihte hi UN, International media, Human Rights Watch leh Amnesty International leh West ramte chuan chhuah thuai turin Myanmar sorkar chu an phut a ni.

International Panel Board member, South Africa Defense Minister hlui Roelof Meyer chuan, Myanmar sorkarin Bangladesh atanga Rohingya hnamte lak kirlehna tura Myanmar sorkar hmalakna chu “tunah rih chuan a tha hle a ni” a ti.

Myanmar sipaite pawhin Rohingya hote thattua puh, sipai 10 te chu an man tawhin an sawi a, Sept 2017 khan khaw pakhatah kalin sipaite chuan “Muslim terrorist” tiin, Rohingya hnam te kaphlumin Buddhist hote thlanah an phum tir niin an sawi a ni.

Myanmar sorkar chuan Bill Richardson thiltih dan chu “mimalinbeihna” (personal attack) an tihsak. Bill Richardson hian, Suu Kyi chu “Rilru lama hualbeh” (siege mentally and classic bubble) tiin, “danglamna thlen tur erawhin beiseina erawh ka nei” (still hope to change), a ti. US State Dept thupuangtu Heather Nauert chuan, “Richardson chuan thil ngaihven (case for concern) a nei a ni” a ti bawk.

UN leh US chuan Myanmar atanga Rohingya Muslim um chhuahna leh thahna chu “chibing thenfaina” (ethnic cleasing) ti hialin a puh a; Myanmar sorkarin nasa takin a pha thung a ni. Mi thenkhat chuan Myanmar sipaite chu War Crime Tribunal ah hlei hluak taka che leh mi tiduhdah (atrocites against Rohingya) tiin, war-crime case pek an duh a ni.

Europe ah Serbia-Kosovo inbeih laiin hetianga “ethnic cleansing” an tih hi a lo awm tawh thin a, chunga mawhphurtu Serb military leh politician pawh War Crime Tribunal, The Hague ah manin rorel sak fo an ni thin. UN chuan “ethnic cleansing” hi a ngai thutakin, a ngai pawimawh hle thin. Hetianga indona chhuan lama hnam bilte chunga hleih neih luata chetna hi khawvelin a pal zam duhlo a ni.

Author : CT Lalrinawma

Aside | Posted on by | Tagged , , , | Leave a comment

KHA TAP THAWM KHA by Biaka O’Renthlei

Mizoram chhim lam khaw lian ve tak pakhatah Mo hruaiin kan kal a, khami ṭuma ka thil tawn kha ka dam chhung hian ka theihnghilh leh tawh ngai lo vang.

Kan thlen zan chuan eng vang teh hrep nge mawni ka muhil thei lo mai ni lo vin mut chhuahna awmzia hian min man pha lo hrim hrim, mutna ngai lo vah ka mut thut vangte niin ka’n puh deuh rawk a. Mut chhuak lo na na na chu tiin pawnah chhuakin vana arsi pe tuarh maite chu thlirin ngaihtuahna chuan hmangaihte lenna tlang ahrut veuh veuh mai.

Chutia inngaihtuah muk fe a van lam ka hawi voh voh lai chuan veng mawng lam atang hian patling ṭap ri ang deuh hi ka hre deuh vuai vuai a, ka beng chhe ri emawni aw tiin ka’n ngaithla chiang a, ka beng chhe ri awzawng alo ni lo. Kan thlenin lam pan chuan pa pakhat lungchhe vankai a tap rawih rawih hi arawn kal chho boh boh a, street light engah chuan arawn hnai zel tih pawh ka hmu thei nghal. Veng mawngah chuan thlanmual a awm a, thlanmual piah lam zawng chu dai hnai, naupang sava vehna vel niin sunhlu leh ser kung neuh neuh a awm nual bawk a, zan rei hnua han kal vel ka chak loh zawng tak mai a ni, chutia patling thankin zet tawh zanlai pelh hnua thlanmual lam atanga rawn tap chho ta rawih rawih mai chu lehlam zawng taka ngaihtuah chuan mirap deuh lek lek zawk hial a.

Arawn chho zel a, chiang deuh hleka hmuh theih chin arawn thlen chuan pa upa lam lek lek tawh, hmaihmul met ngai lo tih hriat tak, bal ṭawphnawk ve deuh mai, jacket dum fual bal khak zet ha a ni tih ahmuh theih mai a, pheikhawk bun lo vin ke lawngin akal mai bawk. Thlasik ainṭan tawh a, Zokhaw lam phei chu boruak athiang nuamin avawt ruih mai si nen ke lawnga han kal nan chuan kei, ka peih der awm si lo va. Athu hrimah he pa pawh hi tunhnaiah lu asun anih ka ring ngawt mai a, chutih rualin aṭap ri erawh ahnai tial tial a, tiril afan deuh ruih hian ahriat lawi si. Enge maw titak hian mimawlh deuh tlat hian ka hria a, aṭah thuchham ka ngaihthlak chian theih hnuah phei chuan lung akuai riau mai a, a mittui far hma chi lo nih nen han ṭahpui ve maite pawh achakawm letling zawmah a.

Aṭah hla chham ngaihtlak nuam tawk velah chuan ading a, ka ngaithla reng a, alusun chu anamai lo hle ang tih ahriat reng mai. Varanda light kan off avangin athim chinah thuin ka meizial zuk lai chu ka’n hip leh vang vang a, ka ṭhut hmun arawn kal pelh lai chuan ahawi kual lem lo bawk nen min hmu ang paw’n alang lem lo va, kan thleninte inpiah atanga in-ngana velte chuan kawmchhak ser hmun chhete siamin ṭhutna nuam deuh mai ansiam a, apiah lawkah chuan bung lian lutuk lo, chhun lama thlan han tih daih nan a nuam tawk vel zar nei ve thluah tawh si hi ading bawk a.

Bung hnuai bawr velah chuan ahan ṭhu ni maiin ka ring a, aṭap ri ka hriat dan tang chuan. Muhil thei bawk si lo mahni chauh a men kawr ai chuan lusun hnemte chu azia zawk alawm le tiin ka han ṭhu chho ve te’ng tiin rilru ka siam ta diah a, ka han thlen chhoh chuan han biak ngawt dan tur ka van ru phian lehnghalah. Ani lah chuan abulah ka awm ve tih pawh hre lo ang mai hian aṭah dan angai reng mai si, titi pui dan ngaihtuahin ka biak hmasak loh chuan min be hmasa dawn lo tih achiang reng mai bawk nen,”Ka pu, eng thil nge ni ta a? Zanlaiah nangmah chauha i ṭah rawng rawng mai le,” ka’n ti ngawt a.

Min chhang lawk lo chuan ala ṭap reng tho mai, kei lah luhlul ka chhuah ve deuh vangin ka nghak ve ran bawk a. Rei tawk fang hnuah chuan,”Vala, i hre duh lo vang, kei aia lungchhia hi khawvelah an awm lo asin, haw la va mu leh zawk rawh,” min ti ta daih mai a. Mahse, aṭawngkamah chuan hnemtu angai tih erawh ahriat hle si.

“Min hrilh duh phawt chuan tlaivar paw’n ka ngaihthlak sak peih che alawm min han hrilh ve la,”

Aṭap abang ta deuh bawk nen “Anih leh aw, insawi thawl nan pawh aṭha alawm,” tih pahin meizial ka neih leh neih loh min zawt pah a, kan pahnih a kan pak khuk talh talh hnu chuan he ti hian min hrilh ta a:

“Kum 30 lai alo liam ve ta reng mai, khang hunlai kha chuan kan khua hi sorkarin hmunpuiah-te ala hman lem loh avangin thingtlang khawlian pangngai ve mai, lo nei a eizawng vek kan ni ṭhin a, kei pawh nupui fanaute neiin inhrang kan chang ve tawh nghe nghe a.

Kan fate hi hmeichhia pathum niin a upa ber hi kumriat mi anih lai a ni a, amilai chu kumruk niin apang ber erawh kumkhat leh achanve chauh ala ni. Tlangram lo nei a eizawng tihtakah a u-te sikul kal hlan chuan ate ber chu api leh pu bulah dahin kan feh san mai zel a, a u-te ban veleh anlam haw a, inlamah inkhual lemin antheih ang tawk tawkin eirawngte anlo bawl ve mai ṭhin a, hah takin kan han hawng a, fate chaw chhum rimin min han ur ham ham ṭhinte kha hah ati damin dam nawm zia min hriattir ṭhin.

Nikhat chu kan nu chuan ‘vawiin chu ka awm anuam thei reng reng lo mai, haw hma deuh teh ang, ngaihṭhat lohna enge maw hian mi man tlat’ ati leh ṭhin a, kei erawh chuan eng teh hehu-ah ka lo ngaihsak lem lo na in chutia nupuite’n antih tak tlatah chuan ‘ni e mawle’ ka tih sak ve ta mai a. Nidang chu nise tun ang hunah hi chuan chawhmeh ilo vaiin kan la buai viau ang tih tur hi a ni, feh kawng aṭanga khaw lan theihna hmun kan thlen chuan tlailam dar 3:30 vel chauh ala ri nghe nghe. Mahse, kan thil hmuh erawh hmuh anuam teh chiam lo, kan in awmna thler zawn vel atang chuan mei khu hi achhuak nguai nguai ni mai hian kan hmu a.

Kan in anih tak mialin tih thuah hmanhmawh baklengin kan tlan haw ta hlawk hlawk mak a, rin ang ngei ngeiin thui pawh kan tlan hmain Zualko tur tlangval panga lai mai hi kan tawk nghal pang mai a.

Thu khuh anthiam a, mahse, anthusawi atang chuan muangchan chi-ah kan ngai lem lo, anni erawh chuan muangchanga kal turin min ti deuh sek bawk a.

Reilote-ah khua kan lut chu a ni mai reng a, kan in thlen hma, inruk velin min la dang ang tihah chuan kan veng pa ho vin min lo dang nghalin tih theih kan neih tawh loh thu min hrilh nghal mawlh mawlh a. Kan nu nen chuan ‘Khawnge kan fate’ tiin kan rak chel chul tawh mai a ni.

Chutah tak chuan a ni, khawvela ka aw hriat tawh zawng zawng zinga tawrh har ka tih ber mai chu ka hriat tak ni! Kan in chu a alh hluah hluah mai a, mei alh invaw ri hlup hlup karah chuan ka fate pathum chu an-awm a ni tih hriat em em hian ‘Anu Apa ana lutuk min chhan r’u’ tih ri kan hriat tak chu!

In akan ṭantirh lai hi khawchhunga nu leh pa leh thalai lam awm tlem lai alo ni hlauh nen, tin, naupanga thukhawchang tihtakah naupang khawlai leng vel pawhin inkang anla hmuh ngai lem loh avangin inchhung lam khu luih luih chu pawn lam akan alh hma chuan ‘mei an va’n chhem khu em em’ anlo ti mai mai a ni awm a. Chutih hunlai chu feh kawng atanga kan khaw lan theihna kan thlen hma deuh a ni, akan alh hnuah ṭhelh mih tumin khaw chhunga awm ang angin anbei a, kan fate chhan tum vangin tlangval pahnih chu anlo inhliam tawh nghe nghe.

Akhaih, kan peng thui lutuk dawn e. Chutia, patling rualin min man beh kara fate mangang au ri hriat chu ava han hreawm teh lul em! Theih tawp chhuahin ka tal chhuak phut mai a, in chhunga tlan luh ka tum chu kan inkawt ka thlen hmain min lo man bet leh hman a, kan nu pawh chutiang tho chuan!

Mei alh invaw ri hlup hlup kara ka fate pathum bang thlanglam kila inkuah khawm raih mai chu meikhu kar atang chuan ka va hmu thei vuai vuai a, awmngaihna ka hre hlawl lo, ka tha tawp ka chhuah chung pawhin ‘tlan luhin awmzia anei tawh lo, nunna dang kan chan belh tawh tur a ni lo’ tiin min man bet ṭhup mai bawk si. Tuite chuan han leih ve ṭhin tak mahse ṭhal tui van lai alo nikher nen asawt si lo, kan nu lam ka va hawi a ṭap chungin afate au vin a au rawih rawih bawk a, kan fate pawh chu mei alh chuan akang nasa tawh a ni tih hriat em em hian ‘Apa apa min chhan r’u’ anti lawm lawm bawk a.

Kan fanu te ber kumkhat leh achanve milek phei chu ṭawng fiah mang lo hian mei alh invaw ri hlup hlup kar aṭang chuan ‘Anu na anu na’ tiin aṭap rawng rawng bawk a.

Nu leh pa tan chuan ava na teh lul em! Anat zia hi khawvel fang chhuak mah ila a-ai na a-awm tawh chuang lo vang.

Kan fanu upa ber chuan anaute chu kilkhatah chuan akuah khawm ṭawk ṭawk tih chu ka hmu phe vuai vuai thei a, ka thinlung hi ana lutuk, ka la sawifiah thiam lo, ka sawifiah thiam thei bawk hek lo vang.

Kan fanu u ber chuan theih tawp chhuah a rawn au vin ‘Anu Apa… Ka naute tal hi rawn chhan hram rawh u’ arawn ti vawng vawng ri chuan ka taksa pum min fan chhuak a, Kan naute ber ṭap ri chuan ka thling thlengin min fan chhuak bawk, chutih lai tak chuan a ni khawvel a hmuh hreawm ber leh hmangaihna nasa ber ka hmuh tak chu!

Ka fanu te ber, hnute pawh la nghei lo, ni pawh la vui zo lo lehnghal, zankhat em pawh anu tel lo va la riak sawn thei lo vin ‘Anu na, anu na’ atih ri chuan anu chu a au ei ta!

Kan nu chu ṭap hawm hawm chungin’Ka duatte u, lo thlaphang reng reng s’u aw, heta hi in nu ka awm e’. Tih leh tal chhuah phut rualin, inkang hluah hluah karah chuan atlan lut ta, kan chhuat thing phekte chu akan nasat tawh avangin kan nu tlan lut pawh chuan arap kaw hawk hawk mai a, ‘ Bawihi te u, ka lo thleng e’ tih pahin harsa tak chungin atlan zel a, arah chin apiang achim thla zel bawk a. Kei pawh theih tawp chhuahin tlan luh ve ka la tum fan a, ka tha neih zawng zawng ka sawmkhawm hnu pawhin ka tan chuan thirtiang palchah tum pawh a awlsam zawk ang tih tur khawpin min man beh rawn hneh si.

Ka nupui chuan ka fate bul ava thleng ta, athawmhnaw hak laite chu akang hluah hluah a, afate mangang chuan inhumhimna zawngin annu chu anlo ban lawm lawm bawk a, vawikhat pawh na tih vang a ṭe chhuak hauh lo vin afate chu duat tak a kuah khawmin athlamuan a. Ka fate chuan annu ṭang belin anin kuah khawm a, ka fate leh ka nupuite taksa kang mek chunga thlamuan hmel taka aninkuah khawm chu mei khu mup mup kar atang chuan ka en reng a, mei alh kar aṭanga min rawn enchungin kan nu chuan hlim hmel takin min rawn nuih a, ‘Mangtha aw’ tia hmui phun sapin in chu achim zui ta a ni.

Khami hnu atang khan ka khawvel chu hremhmunah achang zo ta a, ka fate tan engmah tih sak theih ka nei lo va, khawvelah hian thlakhleh tur pakhatmah ka nei tawh ngai lo, tap chunga khawvel hman hi ka tan chuan anuam ber tawh a, ka mittui hi min hnemtu awm chhun alo ni ta a ni,” tiin aṭap chhunzawm leh nghal a.

Ka insum zo lo chuan chu putar bal zet mai chu kuahin kan dun ṭap hawm hawm a, tih theih ka nei si lo. Afate pakhat tal nunna kohkir leh theih ni se ka nunna ka hlan sak ngei ang, chu tiang bawkin he putar pawh hian ati ngei ngei ang tih chu sawi lo va chiang sa a ni e.

Ziahni : 7/June/2012

Aside | Posted on by | Tagged , | Leave a comment

VAWITHUM THING RAWH! By Chhantea Pautu, Paradise Lodge

Sazu chanchin lam ngawr ngawr kan sawi dawn a, zahmawhah lo la lo hram ang che u aw; hmeichhe ho chhiar phei chu phal lo mai ta ila a tha ang!?
.
Ka Phone hmanlai clipboard-ah hian hawrawp mal 5000 chauh a len avangin ka naute Phone ka hman remchàn theih loh chuan a pawimawh lai chin bâk ka ziak hman ngai lova; chuvangin in lo chhiar hmanhmawh hle mai dâwn nia, in chhiar zo hman lo palh ang!
.
Sazu chanchin chu zîak tan nghal mai ila! Kan zun hian kan khung leh hmain mipa chuan kan thing hmasa deuh kher thin, hei hi zahmawh lam a ni lova, zun fep nei ngah chi tân phei chuan khung hmaa thin ngei ngei a tha, kap hîng lutuk tur a véng thei, thin zât erawh a inang lo nuk àwm e; chuti chung chuan number kawpkim loah chuan 3 hi number kawpkim ber leh pawimawh tak niin a lang a, vawithum thing chu kan tam ber mai thei(?) Zahmawh lam a ni lo kan tih tawh kha, mipate zîak loh dàn nghet tak a ni zâwk!
.
Ka han zung a, ka ‘englo’ ka han phawrh a, ka han lekchar chiah hian, “Ka zung” ti mai lo hian, “Sa ka zâwn” ka ti fo thin! Chu ka sa zâwn chu a bawma ka kalh hnan leh hma hian thin hmasak ngei ngei a ngai ziah a; a chhan chu in hriatthiam ve mai kha!
.
Naupan lai deuh, zah kan hre ve tan tawh tih hian mak tak maiin nikhat chhung ringawt pawhin ‘tlem te te tam deuh’ hi ka zung sek ziah ringawt mai a. Ka pa ngaihtha lo chuan kan khuaa Chhingchhip Doctor rawn kal remchàn laiin min entir ta nghe nghe…
.
DOCTOR: I sazu phawrh rawh!
(Hreh zetin ka han phawrh a)
DOCTOR: E hee…tihtham a awm lo a nih hiii…! Engmah tham a awm reng reng lo!
(Doctor chu a fiamthu han tidâwn ila a nui miah si lo. Ka sazu a sawina nge ka zun a sawina ka hre lo hrim hrim, a en lai erawh kha chuan far khat pawh ka zung thung si lova; zakin ka ngawi reng a. Chutah, Doctor han chêt dàn chu a mak kher mai; ka phalna la lo leh ka thu ni miah lovin ka sazu awmchhun chu a han lip ta ngawt mai a nih chu mawle; chîang fahran hian a han thlêk zui leh ta nghal a. Naupang mah ni ila zah kha kan hre ve tawh a sin le)
DOCTOR: Vawithum thing rawh!
(Kei chuan vawithum chu ka han thing a; mahse vawithum thin kha eng’e a tangkaina leh a awmzia ka hre lo reng reng!)
DOCTOR: A mak hle mai!
(A makna lai mak ti ve tur pawhin ka man pha ve lo!)
DOCTOR: Vawithum thing leh rawh!
(Vawithum ka han thing leh a!)
.
Ka han inentir zo chu ka pa chuan, “Doctor chuan engtin nge a tih che?” tiin min lo zâwt a; kei chuan, “Vawithum thing rawh!’ a ti!” ka ti ve tawp mai! Tlêm te te tam deuha ka zung thin chu a reh chhawm chho ve ta mai a; vawithum thin kha a ngeih viau a ni mai thei! A hnu, ka rawlthar chhuah chhoh hnu leh ‘tlangval’ tia sawi theih kan nih hnu, tunthleng hian ka zun apîangin ka ‘englo’ chu vawithum ka thing ta deuh ziah a; mahse vawithum aia tam pawh ka thing tho!
.
Tumkhat chu ka ‘englo’ khungna kawngka kalhna khâwl leh ka ‘englo’ chu a intâwk làwi ta tlat mai; a bâwm kalhna khâwl chuan ka ‘englo’ vun chu ka zip hnan palh ta hlauh mai a; a na chai chai teh e! Chumi tum chuan ka duh reng vang ni miah lovin ka ‘englo’ chu mi zîngah phawrh a ngai leh ta! Ka hreh a, a na bawk si; a nawm vang ni miah lovin ka si hlarh hlarh mai a! Tap rual ka ni tawh lova, tap rual ka ni tawh loh vang tak chuan mi zîngah ka phawrh hreh hlê bawk; dik tak chuan Doctor-in a en lai ai kha chuan ‘tihtham’ a awm ve tlat tawh a(ang ka ring) Ka hre chiah chuang lo!?
.
Harsa tak chuan ka ‘englo’ chu kan han chhuah zalèn ve ta hrâm a nih kha! Chuti ang thil a thlen hnu chuan #CL_Remruata_Rex_Chawngthute ang, zun fep ngah avanga kap nei hîng thei deuh ang chi hi chu an zung lai ka hmuhfuh phawt chuan, “Vawithum thing phawt rawh!” ka ti ta ziah a!
.
Tin, heti hi a ni a; Sazuk-Sih-Tlâng hla neih kum a ni. Lo a kàng thain a kàng mam fai puk mai a; ka thianpate lo vau luitèah ka thianpa nen tui kan thehkang a. Thlai-chi-thlâk hun lai a nih avangin ka thianpa nu leh pate pawh thlai-chi-thlâkin an feh ve a; an thlai chi ken zingah hmarcha chí a tel ve nghe nghe!
.
Tui chu kan han thehkang ta a, nghavawk lian leh sei fu fu hi an lo tam mai a, tui tlêm lai a nih avangin man an nuam hle mai! Chutia kan hlim hle lai chuan ka thianpa nu leh pate tawng thawm chu ka han hria a; chutih lai chu ka thianpa pain hmarcha chi a theh lai a ni.
.
A nupui chu a han ko a, “Rozîk rawn kal teh” a han ti a; a nupui chu a bulah a va kal var a. (Hetih lai hian kan hmu pha reng; anni chuan min hmu lo!) Ka thianpa pa chuan, “Phawrh rawh” a han ti leh nghut a; a nupui chuan a hrethiam a ni ang, phawrh tur tak a phawrh dik chat tlat! Ka thianpa pa chu kangvar ni sen sa hnuaiah a zung ta tur tur a; a dâwt a lian a ni mai thei, a hâw lian ngang mai! A han zung zo a, a nupui chuan khung sak leh mai a han tum a; mahse ani chuan, “Ngawi rawh, la khung suh!” a han ti a. Pi Zîki chuan, “Ngati nge!?” a’n ti há a; ani chuan, “Vawithum thing rawh!” a han ti nghut a!
.
Chuta tang phei chuan vawithum thin chu a pawimawh hle a ni tih ka hretthiam lehzual ta a!
.
Vawithum thing rawh!!

On

• 23ʳᵈ September, 2017

Aside | Posted on by | Tagged , , | Leave a comment

TOE VAN IN SCORPIO A HNUK A, SCORPIO HIAN HMEICHHE PAKHAT A HNUK VE LEH CHHAWNG NIIN SAWI A NI, A HNUK HLUM NGE THI SA A HNUK HRIAT A NI LO

Nizan (January ni 27, 2018) zan dar 9 vel khan Tlawng road Maubawk ram chhung St. Charles School (Roman Catholic School) bul kawngpuiah ruang chhar a ni a, Police lam ten a hliam te endik a an buaipui fel hnuah Lalfamkimi (37) d/o Kawlchhunga ITI Mualpui veng a ni tih hriat a ni.

Nizan khan Tlawng Road-ah tlangval pakhat chu two wheelerin Reiek kai tlawng lam panin a tlan a, Toe van, Scorpio hnuk, Aizawl lam pana rawn tlan mek nen an insulpel a, zan thimah chiang vak lovin toe truck ina a hnuh scorpio chuan hmeichhe pakhat a hnuk leh chhawng niin a hre ta tlat mai a. A motor hmuh leh hmasak ber sumo driver hnenah chuan a thil tawn chu a hrilh a, sumo a in turn mek laiin Eon car rawn tlan chho chu lo phardingin a thil tawn chu a hrilh ve leh bawk a. Ruang hnuk nia an hriat chu an um chho tlang ta a ni. Maubawk ram chhung St. Charles School bul an han thlen chuan kawngpuiah ruang chu an han hmu a, an din chilh hlek a, an chhak lawkah zawi muanga in hnuk Toe van leh scorpio te chu kein an han um phak thuai a, Toe van khalhtute leh scorpio neitute chuan chutiang an hnuh an lo hre der si lo, an lo hrilhhai hle mai si niin thudawnna chuan a sawi.

Scorpio hi Pu Marina Ramhlun veng ta a ni a, nimin piah lamah khan a nau ten reiek lama kal tumin an hmang a, Reiek kai tlawng an kan fel chiah tihin a engine a thi thut a, an han tinung leh mai a, mahse a pawt hleithei ta tlat lo mai a. A neitupa Pu Marina an han bia a, a gasket a kang a nih ringin tlan luih tum lo mai turin a hrilh a, 207 tir thlain chu chuan hnuh an tum a, a hnuh zawh meuh loh avangin Traffic Police ho Toe van chu hman a dil leh ta a ni. Traffic Toe Van hi repair ngai a ni a, nimin chhun khan theih ang anga an repair hnuah nimin tlai khan Reiek kai tlawng kama scorpio hnuk turin an liamthla a, an inhnuh tan hian khua a thim tan tawh a ni.

Zawi muanga inhnuk chho zelin ruang chharna hmun thlen hma Km 3 velah zunram thiarin an ding a, chulai hmuna an din lai chuan scorpio hnung lamah te pawh an zung hlawm a, engmah chutiang an hmuh loh thu thudawnna chuan a sawi a ni.

Chanchin buatsaih lai hian ruang hi engtia scorpio-ah hian in hnuk nge tih tumah sawichiang thei an awm lova, hrui-a a in thlunna hnuhma hmuh tur a awm lova, a thawmhnaw a inbat tang nge tih pawh hriat a ni lo. Pheikhawk a bun lova, kawr a ha lova, bra erawh a hreng niin thudawnna chuan a sawi bawk a ni.

Vawiin lamah scorpio neitute, ruang a hnuk lai hmu nia sawi tute leh police lam ten thil thleng an hriat leh an hmuh dan te an sawiho dawn a, thuchiang zawk nghah mek a ni.

Author : Vanneihthanga Vanchhawng

Aside | Posted on by | Tagged , , , | Leave a comment