Driver sawisak chungchang police te’n chhui

‘Ka rilru leh taksa a na a, hrehawm ka ti’
*The Aizawl Post January 26, 2018*

Chief minister vengtu police-te’n 207 motor khalhtu driver ansawisa nia sawi chungchang chu police-te’n case ziaklutin anchhui țan tawh. Hliam tuara damdawi ina awm mek driver Lalbiakzuala chuan a thil tawn hi pawi a tih thu leh hrehawm a tih thu a sawi a, “Ka rilru leh taksa a na a, hrehawm ka ti a, zahthlak pawh ka ti,” a ti.

Sihphir Venglaia cheng Biakzuala hi January ni 22 zana hliam tuar a ni a, Serkhan-ah chief minister vengtu police-te’n an sawisa nia sawiin, a pain FIR a thehlut a ni.

FIR hi Bawngkawn Police Station-ah an thehlut a, mahse an huam chhung a nih loh avangin Kawnpui Police Station-ah an lo sawn.He thil thleng chungchang hi police-te’n an chhui nghal a, Ningani pawh khan FIR thehluttu HV Lalnuntluanga hi kovin thu an zawtfiah tih thu dawn a ni. Hliam tuar Biakzuala erawh damdawi inah a awm avangin police-te hian an kawm thei rihlo tih thu dawn a ni.

Synod Hospital, Durtlanga awm Biakzuala hian hma a sawn tih thu dawn a ni a, Ningani khan MRI an ti. An zun an la siak a, a chet zawngin a taksa na a la na ti tih a sawi. “Nilaini zan khan ka mu thei lo a. Ka ke hi a na a, a mu chuah chuah a, a za bawk a. Doctor te’n MRI tih tur an ti a,” tiin Ningani tlai khan Biakzuala chuan The Aizawl Post a hrilh.
“Silai kawmin min chhu a. Ka nak lehlam lehlamah leh malpui leh khel an chhu. Min beng a, min hnek a,” tiin an sawisak dana sawi a, amah sawisatute hi mi 10 vel nia a hriat thu leh police uniform ha lo pakhat a hmuh thu a sawi.

A hnunga tlante kha VIP an ni tih a hriat thu a sawi a, ‘siren’ an tihrik bakah VIP light pawh a hmuh thu te a sawi.”Side ka pek loh chhan chu, kawng a zim a, side-na tur a awmlo a. Rit phur kan ni bawk a. Petrol pump kha ka tinzawn ta ngawt a,” a ti a, chuta a ding chu pawtthlain an sawisa ta niin a sawi.”

Inpelhtir tuma ding ka ni a, min tlanpel mai tura ka ngaih laiin ka sira țhu ka nau kha kawngkhar hawngin an pawtthla a, ‘Driver i ni em?’ an ti a. Mahse a ni lo tih an hriat hnuah kei kha min pawtthla a, min sawisa ta a ni,” tiin thil thlen dan a sawi.

Nikhaw hre lovin a awm niin a sawi a, Sentlang an pan laiin a harh a, mahse Sentlang damdawi ina an chiu lai a hre leh si lo niin a sawi.

“An duh dana ka pass hma thei lo kha pawi ka ti a, an mi hriatthiamna ka ngen a ni. Chutih rual chuan a theih anga hmaa ka pass chunga kut ka tuar hi mak ka ti,” Biakzuala chuan a ti.

Damdawi ina awm chungin social media lama a chungchang an sawi dan te a lo hriat ve thu leh rilru natna tur a hmuh hnem thu a sawi a, ‘Zu a rui,’ tih te, ‘Miin an fuihpawrh vangin thinrimin FIR an thehlut,’ tih te, ‘KM hnih a side duh lo,’ ti tea a chungchang an sawi a lo hriat thu te, ‘Kut an thlak lo,’ tia sawi an awm thu a hriat phei chuan a rilru a nat tak zet thu te a sawi.

“Zu ka in lo. A zanah khan Durtlang damdawi inah kan kal nghal a, khata min lo enkawltute khan ka ruih leh ruih loh chu an hre chiang khawp ang. A duh tan chuan an zawhfiah theih reng,” tiin zu a in lo niin a sawi a, “Driving license nei lo kha min ti a, ka nei a, mahse ka lo keng lo zawk a. Ramhnuaia thingzai phur tur kan nih avanga keng lo ka ni a,” a ti bawk.

Congress chhungkua an nih thu a sawi a, a pa pawh Congress ticket-a VC member atana thlan tlin lo ni tawh, VC treasure hlui a nih thu sawiin, chu’ng te chuan a rilru a tina zual tih a sawi.

Advertisements
Aside | Posted on by | Tagged , , | Leave a comment

Lalbiakzuala pa rilru a na

“Motor ah khan CM emaw, Minister dang tute emaw puitling deuh chu lo chuang ve se ka fapa Lalbiakzuala chungah hetiang thil hi a thlenglo tur ” tih ka ngaihtuah lai in, Motor ah khan CM a lo chuang ve reng tho tih ka hriat leh hnu hian ka rilru a na zual hle a ni “.

” A party ang pawn Congress ruhkawl tak kan ni a, Congress Ticket in VC ah te pawh Treasurer chanvo ka lo chelh ve thin.

Hetiang a nihlai a ka fapa chunga thil lo thleng hian ka rilru a tina tak zet zet a ni “.

HV. Lalnuntluanga,
F/o.Lalbiakzuala,
Sihphir, Venglai.

Aside | Posted on by | Tagged , , , | Leave a comment

Australia ah Wozniacki champion

Kum khat chhunga Grand Slam Tournament hmasa ber, Australian Open Tennis hmeichhe singles-ah Denmark mi Caroline Wozniacki a champion.

Vawiina final hmuhnawm tak khelhah Wozniacki hian Romania mi, Simona Halep-i chu 7-6, 3-6, 6-4-in a hneh a, world No.1 nihna a chhuhsak nghal bawk. Tun hi kum 27-a upa, Wozniacki–in Grand Slam title a lak hmasak ber a ni a, Denmark mi Grand Slam title la hmasa ber a ni bawk a ni.

Naktuk-ah mipa singles final khelh a ni ang a, Seed 2-na Roger Federer-a leh seed 6-na Marin Cilic-a ten an khel ang.

Aside | Posted on by | Tagged , , | Leave a comment

Padma Shri award A. Zakia hnenah hlan dawn

Ramchhung chawimawina sang, Padma Shri Award dawng turin Pu A.Zakia, Siaha thlan a ni.

Pu A.Zakia hi Primary School Headmaster hlui niin, kum 1930October ni 30 khan Saikao-ah a piang a. Ram pum huao Zirtirtu chawimawina sang National Teacher Award pawh a dawng tawh a, Mara tawng hmasawnna atana thawhlawk tak, Mara tawngin lehkhabu engemawzat lo ziak tawhin Mara Autonomous Dist Council hnuaia Mara zirlaibu thenkhat a lo ziak tawh a. Mara Grammar lehkhabu a buatsaih tawh bawk a ni.

Ramchhung civil mite chawimawina, Padma Shri award hrang hrang dawng tura thlan chhuah President-in a pawmpui zingah hian Padma Vibhushan dawng tur mi 3, Padma Bhushan dawng tur mi 9 leh Padma Shri dawng tur mi 73 an tel a, an vaiin mi 85 an ni.

Chawimawina dawng tur zingah hian hmeichhia 14 an tel bakah thih hnua dawng mi 3 an tel a, ramdangmi chawimawina dawng tur mi 16 zingah ASEAN member ram 10 atangin mi pakhat theuh thlan chhuah an ni bawk.

Padma Vibhushan dawng turin mi 3 thlan an ni a, India cricket captain thin, Mahendra Singh Dhoni leh billiards-a vawi engemawzat khawvel champion ni tawh, Pankaj Advani-te hnenah Padma Bhushan hlan a ni bawk ang.

Aside | Posted on by | Tagged | Leave a comment

RUSSIA-IN SYRIA-AH SAM-400 A CHHAWP BELH LEH TA: TURKEY-IN KURDS A LA BEI ZEL

Russia chuan tunkarah Syria ram chhungah SAM-400, surface air-to-air missile system battery 2 a dah belh leh ta. He mobile batteries te hi Khmeimim Air Base, Latakia province ah a dah a, a dang chu Naval Base a neihna Tartus, Mediterranean Sea tuipui kamah a bun a ni. Russia-in engzat chiah nge SAM-400 hi Syria ah a chhawp luh hriat theih a ni lo.

US Air Forces Pacific Command chuan comment an pe duh lo. US Special Operation Forces te chu Siria North-East ah, Eupharates River lamah an che a; Russian leh zsyrian militaryerawh West-South lamah an che tla thung a ni.

Russia leh US hian inrem siamna neiin, Operation an neih pawhin “deconfliction zone” an siam angin an che mai thin a ni.

Turkey chuan zsyria ram chhung luta Kurds a beihna chhun zawm zelin, Syrian hel thenkhat mi 10,000 velin Kurds te hi an beih pui a ni. Syrian helte zingah Turkey in sum leh ralthuama a tanpui an awm ve a, chungho chuan YOG leh Syrian Democratic Forces te chu Turkish militsry tanpuiin an bei chho a ni.

Kum 2015 daih tawh khan Russia chuan a chhuan vawr SAM-400 thlawhna kahna chi “Triumf” a tih hi Syria ah a chhawp lut a. He advanced system hian multiple-short & long-range missile a kap chhuak thei a, sensor system tha zet a nei a ni.

June 2017 ah US chuan Syrian fighte jet, Russia siam Su-22 an bul hnaia lo thlawk chu a lo kap thla chaih mai a, Russia in demin zsyria a thinrim pui hle a nih kha. SAM-400 hi a chhuang bawk a, ram dangah sum tuak nan hralh a tum mek a. Newsweek chanchinbu chuan Qatar, Saudi Arabia, Turkey leh India pawhin awtin lei an tum a ni, a ti. Defense News chuan, India-in zsAM-400 hi lei tumin, US$ tluklehdingawn 5 sum sen a tum a ti. Turkey pawhin lei tumin July thla khan inremna siamin, US$ tluklehdingawn 2.5 man a lei ang.

Indo that vena chu ralthuam chhertu Company ten an ral thuam tukte an hralh theih phah a, chutih rualin mihring nunna tam tak erawhin a tuar thin.

Author : CT Lalrinawma

Aside | Posted on by | Tagged , , | Leave a comment

PHUNCHAWNG VENGA TAXI CHESUALAH DRIVER BORAL

23rd January, 2018 zing dar 6:30 vel khan Phunchawng vengah Taxi a chesual a, Driver a boral.

Thudawn danin Taxi hi Aizawl lam pana tlawn a ni a, Phunchawng veng chhung Culvert bulah tlan liamin a thlangah a tla a, taxi-ah hian puitling pali bakah naute an chuang a, Driver Lalngilneia (34) West Phaileng chuan hliamna tak tuarin Civil hospital panpui a ni a, damdawiin thlenpui a nih hnu lawkah a a hliam tuar lovin boral ta a ni.

Driver Lalngilneia ruang hi post mortem hnuah an khua West Phaileng panpui a ni.

Midang chuang ve te zinga 2 chu an na deuh viau a, ngaihtuahawm erawh an ni lo. Midangte chuan hliam na an tuar lo hlauh a ni.

Aside | Posted on by | Tagged , , | Leave a comment

CM GUARD TEN THINGZAI PHUR DRIVER KUT AN THLAK, HLIAM TUAR TEN ZANGNA DAWMNA PHUTIN FIR THEH LUT

Pu HV Lalnuntluanga, Sihphir Venglai chuan a fapa Lalbiakzuala chu “Chief Minister vengtu, duty ten na takin kut an thlak a ni” tiin, a tul anga hma lak sak turin vawiin khan Bawngkawn PS-ah FIR a theh lut.

Thu dawn danin January ni 22, nizan dar 10:32 khan Lalbiakzuala chuan a Motor 207, MZ-OI-F 3951 hmangin thingzai a phur a, Serkhan kawng chho, motor full load tana inpelh remchang lo laia an tlan chhoh laiin a hnungah Chief Minister Programme hmang zo hawng lam Pilot Car, Guard leh Medical Team Motor an rawn tlan chho a, Lalbiakzuala hian remchang hmasa ber, Petrol Pump Serkhanah a hnunga motor te hi a kian ta a ni. Kawng an inken fel hnu hian Pilot Car-a Guard leh Medical Team Motor-a chuangte chu motor atanga rawn chhukin Lalbiakzuala chu na takin kut an thlak ta mai a, Silai kawm te a an chhut bakah a lu lamah pawh an hnek nual niin thudawnna chuan a sawi.

Thudawnnain a sawi zel danin, hetianga kut an inthlak hnu hian Lalbiakzuala hi nikhaw hrelovin a awm a, amah khawihtute hian an tlansan zui nghal a ni. A hnunga rawn tlan, Thingzai a phurhsak neitu te chuan Lalbiakzuala hi bawihsawmin Presbyterian Hospital Durtlang Casualty an panpui nghal a, a taksa hmun dangah pawh kutthlakna hnuhma a awm nual niin an sawi. Amah hi a zun theih loh avangin vawiin lamah Damdawiin panpui leh a ni a, damdawiinah hian an Admit zui ta niin thudawnna chuan a sawi bawk.

He thil thleng chunchangah hian Lalbiakzuala pa Pu HV Lalnuntluanga chuan vawiin chawhnu dar 2:30 leh dar 3 inkarvel khan Bawngpawn PS-ah First Information Report (FIR) thehlutin a tul anga hma lak sak turin Police te a ngen a ni.

Pu HV Lalnuntluanga hian a fapa, pawisawi lo kutthlaka a taksaa hliam tawrh tirh a nih bakah rilru lama hliam an tawrh tir chu a hriat thiam loh thu tarlangin, an fapa chu chhungkaweizawng tu ber a nih vangin a taksa hliam enkawlna leh a thawh theih loh chhunga an chungkaw eiturte, a damloh laia a motor thawhchhuah tur ang hu sorkarin chawi turte leh, a rilru hliam na tak avanga zangna dawmna cheng nuai 5 pe tura hma lak pui turin Bawngkawn Police te chu, a ngen tih FIR ah chuan a tarlang bawk.

Thu dawn danin Lalbiakzuala kut thlaktute hian motor chabi leh Document paiwmawh te pawh an laksak vek a, vawiin tlai thleng khan tu berin nge heng doccument te hi kawl tih pawh Lalbiakzuala chhungte hian an la hre lo a ni.

Pu HV Lalnuntluanga FIR thehluh hi Bawngkawn Polic bial chhung a nih chiah loh avangin Kawnpui Police Station lama thawn tura tih a ni a. Hemi hma hian Aizawl SP lamah an thawn niin thudawnna chuan a sawi bawk.

Author : Vanneihthanga Vanchhawng

Aside | Posted on by | Tagged , , , , , | Leave a comment

AAP MLA 20 BANNA PRESIDENT IN A PAWM

Jan 21, 2018, (Pathianni) khan Aam Aadmi Party (AAP) MLA 20, office of profit bawhchhia ni a puh te chu Delhi Assembly atangin ban (disqualified) an ni ta.

Tunkar kalta kar tawp lam khan Election Commission of India (ECI) chuan President Ram Nath Kovind hnenah heng MLA 20 te hian office of profit an bawhchhia tiin ban turin a thlen (recommend) a, AAP MLA te hian ECI in ban tura a recommend chungchang hi Delhi High Court-ah thlenin dang (stay) turin an dil a, Justice Rekha Pali bench chuan hei hi ngaihtuahin ECI recommend-na hi a tidanglam ta lo a, vawiin khan Election Commission recommend hi President Ram Nath Kovind hian a lo approve ta a ni.

He thil hi AAP lam chuan rorelna lamah an kalpui mai thei tih an sawi a, “President hnenah hian hun min pe tura keimahni ngei kal kan inbeisei laiin tunah hian he thu hi kan dawng ta mai a ni. AAP chuan a tul a nih chuan HC emaw SC hial pawh kan thleng ang,” tiin Delhi minister Gopal Rai chuan a sawi.


KEJRIWAL

He thilah hian Congress chuan AAP hian BJP leh EC tanpuina an hmu niin a puh a, Congress hruaitu, Ajay Maken chuan,”AAP hian he thila thtlukna siam chawlhkar 3 aia rei mah tikhawtlai turin BJP leh Election Commission puihna an hmu a ni. December 22 hma khan he thutlukna hi siam nisela hengAAP MLA 20 te hi disqualified an ni ang a, Rajya Sabha inthlanah khan vote an thlak thei dawn lo a ni,” a ti.

BJP lam erawh chuan chuti ang thil chu engmah a awm lo a, EC hian a tihtur a ti mai a ni an ti thung.

Kar kalta Zirtawpni khan EC hian President hnenah heng AAP MLA 20 te hian office of profit an bawhchhia tiin disqualify tura ngenna a thlen a, heng MLA te hian March 13 2015 atanga September 8, 2016 inkar chhung khan Parliamentary Secretary hna an chelh a ni.

February 2015, Delhi Assembly Election, MLA 70 neihah khan AAP hian MLA 67 an nei a. March 13, 2015 khan Ministers te pui turin Parliamentary Secretary 21 zet a ruat a ni.

Hetia MLA 20 an ban chuan AAP hian MLA 46 a la nei dawn a, majority la chelh pha mahsela heng MLA ban tak bial 20 ah hian Bye-election neih a ngai dawn ta a ni.

Author :

Aside | Posted on by | Tagged , , , , | Leave a comment

DELHI-A HALPUAH SIAMNA HMUNA KANGMEI CHHUAKAHMI 17 IN NUNNA AN CHAN

Nizan zantir, dar 6:20 vel khan Bawana Industrial area, Delhi a, halphuah leh halmawi lam siamna hmunah kangmei nasa tak a chhuak a, hmeichhia 10 telin mi 17 an kang hlum a, midang 30 in hliam an tuar a, mipa pakhat leh hmeichhe pakhat chu inchhawng atanga zuangthla in an him bawk.

Delhi Chief Minister Arvind Kejriwal chuan kangmei chhuahnahmun hi kangmei chhuah atanga darkar 5 hnu-ah a tlawh chauh a, kangmei chhuah chhan hi chhuichiang turin thu a pe a, kangmei chhuahna hmun a thleng har lutuk hi eptu lam ten an sawisel nasa hle.

Kangmei hi nimin tlai 6:20 pm vel khan In chhawng hnuaiber atangin a chhuak a. He inah hian a hmalamah chiah chhuahna a awm a ni.

Kangmei hi a darh chak hle a, chunglam a kan kai chho nghal a, helaia hnathawktu tam zawk chu chunglamah hian mei hian a dang ta a ni. Hetihlai hian hnathawktu 2, Roop Prakash(kum 24 mi) leh Sunita, (kum 45 mi) te chu inchhawng tukverh atang hian a hnuai leiah an zuang chhuak a, an him hram a, mahse an ke ruh tliak in hliam an tuar a ni.

Kangmei chhuah thu hriat anih rual hian rang takin kangthelh motor (fire engines) 15 ten kangmei chhuahna hmun hi an pan nghal a. Chhanchhuah hna thawktute hian kangmei thelhmit tur hian darkar 3 dawn lai an hmang a, nizan vek khan theih ang angin chhanchhuah hna thawh nghal a ni.

GC Mishra, Director, Delhi Fire Services chuan, “Chhawng hnuaiber (basement)-ah hian ruang pakhat hmuh a ni a, chhawngkhatna (first floor)-ah midang 13 ruang hmuh a ni.” a ti a, police te chuan heng nunna chan te hi kangmei avanga thi (charred or choked to death) vek niin an sawi.

Damchhuak zinga pakhat, Roop Prakash chuan he inah hian Chinese firecracker pack thin a ni a, helaiah hian a pack chiah tih thin a ni a, siamchhuah a nilo,” a ti.

Police te chuan helai hmun neitu, Manoj Jain hi an man nghal a, a kawppui, Lalit Goel nen hian he In neitu hi an nih leh nih loh an finfiah mek a ni. Manoj lakah hian thubuai, 304 A (causing death due to negligence) hnuaiha leh 285 IPC (negligent conduct with respect to fire or combustible matter) ziakluh nghal a ni a, DCP (Rohini) Rajneesh Gupta chuan chhui chian nghal a ni a ti.

Chief Minister Arvind Kejriwal chuan kangmei avanga nunna chan chhungte hnenah zangnadawmna Rs 5 lakh theuh pek an nih tur thu a puang a, PM Modi chuan, “Kangmei avanga nunna chan chhungte ka lainat tak zet a, hliam tuar te pawh an dam leh thuai ka duhsak bawk,” tiin a tweet.

Author :

Aside | Posted on by | Tagged , | Leave a comment

BEKANG EI SUAL VANGIN DAM LO

Bekang eisual avangin Mamit Damdawiinah nizan thleng khan mi 27 admit an ni a. heng zingah hian a tam ber chu Venghlun a chengte an ni.

Chung te chu –

1. Pu PC Sanglura, Charkawn

2. Pi Sangzuali (Pu Sanglura nupui)

3. Nl.Lalrinfeli (an fanu)

4. Nl.Lahmingchhuangi (an tunu)

5. Pi Ruattluangi, Tlangveng

6. Tv.Rothanzama ( A fapa)

7. Pu C.Lalhlira, Bungveng

8. Tv.Thuamtea, RVS

9. Pu Asanga fanu te pahnih, Bungveng.

10.Pi Vanrammawii, Charkawn.

Heng bakah hian Nl.Sawntei Unaunu Bungveng chu khum an chan loh avangin Damdawi pek an nih hnuin hawtir leh an ni. Nl.Manguri D/O Pu R.Sanglura Charkawn leh Tv.Buanga, RVS te pawh Damdawiin ah admit an nih hnuin in lamah enkawl zui mek an ni. A tlangpui thuin dam lote hi niminpiah zirtawpni zinga Bekang ei an ni tlangpui a.

RVS chhungkua chaw eikhawm ho atangin admit an awm bawk. Bekang an ei sual hi a thawk muang deuh niin a lang. Nimin lama ei, engmah na la nei rih lo te pawh fimkhur a ngai ang. In sawiselna neih veleh Hospital pan vat tur a ni e. Natna lo lan chhuah dan chu khawsik sang, pumna, luakchhuak leh kawthalo a ni tlangpui.

Aside | Posted on by | Tagged , , | Leave a comment