Sudden Plays a Hand – 17

SUDDEN PLAYS A HAND 17

Gunman Lukor a thih thu chuan chawlhkar hnih lai chu a daih a. Chumi hnu erawh chuan mi sawi vel pawh chu a reh ta deuh a.
Cullin a ve thung chu SP ah chuan a leng fo tak a. Țawngkam țha tak taka biak zawng a hlawh na meuh mai. Mahse, chu chu a duhtawk si lo. A lo rin ai mahin Drait a chu Mary rilruah chuan a tlanghet a nih te chu a ring ta a. Tichuan, dahbo chu a pawimawh lehzual ta sauh mai a ni.

Chutiang rilru pu chung chuan BB lam chu a pan ta a. A va thlen chuan Gilman a leh Lamond a pawh an lo awm a, an inbiak thawm a hriat chuan Bardoe a chu a lo chhuak a, leng lut turin a rawn sawm ta a.
An luh hnu chuan, “I tana la țangkai thei tur te tih thinrim loh dan te hi i thiam lo emaw ni le?” tiin a han zilhhau a.

Inhau deuhthaw dawn dawn chung zel chuan an ti ti a. Cullin a chuan SP bawng ruksak zeuh zeuh tura a duh thu chu a hrilh ta a. Bawng pakhat an ruk zelah dolkar sawm pek a intiam a. Mahse, khawilai hmun emaw a lo dahkhawm phawt turin a hrilh a.

“Chu chu engtin nge ni zel ang?” Bull a chuan a lo ti a.

“Chu zawng, i hriat kher a ngai lo.”

“Chuti chu, kei aia â zawng mai rawh,” Bull a chuan a ti ta hmuk mai a.

Chutah zawng Cullin a chuan a hrilhfiah ta nge nge a. SP chu bawng ruk thawl sak vek a, chuta hralh tura nawr a tum a ni tih ye chu a hrilh ta a.

“Sturm chu nangma mi leh sa a ni lawm ni?”

“Ni e. Chuvangin inbawng ruk tur pawh khalhkhawm sa in in hmu mai țhin ang. Amaherawh chu, Green a țhianpa, Yorky an tih hi erawh chu ven deuh a ngai ang.”

Tichuan, SP bawng ru tur chuan an insawi rem ta a.

****************************

Drait a leh a nupui chuan SP chu an fang leh a. Chhinchhiahma pu lo bawng an hmu zeuh zeuh reng a. Tunhma lama chhinchhiah tura a lo hrilh tawh a nih avangin Drait a chuan mak a ti deuh viau mai a.

Sturm a rem tih loh vanga chhinchhiah ta lo an nih pawh a hriat avangin sawisel lam chuan a ti duh lo a. Mahse, a thawh țhat leh țhat loh te chu a zawt a, Mary chuan țha tawk a tih thute a hrilh a.

A cowboy dangte chungthu ah chuan Mary chu a lungawi vak lo. Biak reng rengin a rul tawk chauh zela an chhan țhin zia leh Shadow cowboy ho nena an danglam dan te chu a sawichhuak ta hial a.

An ti ti hmangah chuan Drait a chuan a nupui rilru kaptu awm ni a a hriat chu engnge ni tih a zawt ta chawt mai a. Mahse, Mary chuan rilru kaptu neilo niawm taka han phat mam hi a tum a.

“Tum chhin duh ting suh, Mary. I hmui hi dawt sawi nana siam a ni lo. Ranch enkawl hi thil namai lo tak asin. I ti țha thawkhat hle nain reilotea thiam kim theih mai a ni hleinem. Min hrilh kher phei chu a ngai lo maithei, mahse….”

“Ka bawng a bo zeuh zeuh alawm mawle. Țum khatah sawmhnih lek lek te phei zawng a nia.”

“I foremen in engnge a tih?”

“Zanah hmun khat a mi an ven hlanin hmun dang ami an lo ru leh țhin a ni.”

“Chuti chu, i mite zinga mi hrilh țhintu an awm a nih chu. Mahse, zam lem lo la, hetiang te hi awm ve tur reng ania, mahse, chhui zui chu a ngai ang.”

Yorky a bawng zawng vak vel nen chuan an intawk ta hlawl mai a. Bawng bo chungchang chu Drait a chuan a han zawt a.

“Nimin ah khan hetah ngei hian sawmnga rual an awm a. Hei, tunah sawmthum pawh kan khalhkhawm hlei thei lo. Sakawr hmuhma pawh a chiar dup mai.,” tiin Yorky a chuan a lo sawi ta a.

“Sturm a hnenah i hrilh tawh em?” Mary chuan a lo ti a.

“Hrilh lo ka pi. Keimaha chhui ka lo tum a.”
“Hnu chhui i thiam em ni ?” Drait a chuan a lo ti vat a.

“Thiam tehchiam lo. Mahse, Jim a hi chu Red Indian ang maiin a chhui thiam thung.”

“Chuti chu kan chhin dawn nia. Naktuk zingah a lo chho anga, foremen pawh kan hrilh miah dawn lo nia.”

In an va thlen chuan an pangpar khawina siamțhat chu Mary chuan a han en a, “He thil i rawtna hi lawmthu pawh ka la hrilh lo che a…” a ti a.

Drait a chuan, “Ka rawt a ni hleinem, Jim a rawtna a ni a, min puh mai mai a nih kha. Mahse, hrilh suh aw… tih chhan a nei a ni ang.”

Mary chuan a han ngaihtuah vang vang a. Chumi te pahnih awmdan chu mak a ti a, a ngaisang rilru ta viau mai a.

“Shadow a pangpar khu a bul chawpin ka rawn kar tir țeuh ang e,” Drait a chuan a han ti a.

Mary chu a hlim hmel ta em em mai a, “Chu tluka duh ka nei hleinem,” a lo ti vat a.

“A lawmawm a nih chu.”

Drait a haw dawn chuan an han inchibai a. A kal tak hnu chuan Mary chuan a pasal hmer na chu engemaw ti riau hian a hria a. Green a nena an țhian dun intih hmingțhat tum tawn dan leh an tlawmngaih dan te chu mak a ti zual sauh mai a.

Advertisements
Aside | Posted on by | Tagged , | Leave a comment

Sudden Plays a Hand – 16

SUDDEN PLAYS A HAND 16
Awmho chuan an lo hrilh ta nuaih nuaih mai a. An bengchheng a reh deuh hnu chuan Merker a chuan fel fak hian Sudden an pumpelh hram hram a tum chung pawhin Lukor a chuan a nawr lui tlat a ni tih te chu a lo hrilh ta a.
“Chu, Green a chu a fimkhur hle maw? Dik tak chuan tlanchhiat a tum a ni maw?” Camort a chuan a han ti khanglang a. Rum fe hian Sudden a chuan a lo melh ta kal mai a, Camort a chu a meng khup ta zul zul a.

“Ngaithla teh, phuahchawp pa! Khapa khan kei min tum loh avangin hmachhawn ka chak lo. Chu chu a thu hnuhnung ațang pawh khan a chiang a ni. Tuna i lo luh chiah khan Drait a ruang rawn khawm i beisei a, thil pakhat leh, mi dawthei, mi thu lak kawih ching leh uicho dawihzep lutuk i ni! Engtinnge i tih dawn?”

A vun him na chauh lo chu ngaihtuah ngam tawh hek lo, “Sheriff ka ni asin,” Camort a chuan a ti ta ngawt a.

“I chhuah ran viau loh chuan sheriff thi tawh i ni mai ang!”

Camort a chuan a vau tupa chu a han en țhin a, nuihsawh taka lo thlirtute chu a han en leh a. Ui tlawm ang maiin a chhuak ta zul zul a. An eu zui ta hluah hluah lehnghal a.

A changtupa ber thlen hma chuan Midway a inkahna chu Shadow Valley ah chuan an lo hre hman a. Vasco cowboy, an inkhak laia hmutu pakhat, a thil hmuh a țhiante hrilh hlan nghakhlel deuh a haw chuan Shorty a chu a hmu fuh ta hlauh mai a. A hrilh ta a.

“Kha pa kha chu cho mai mai suh. A hming ang ngawt a ni lo khawp mai, puakruk lah chu a kut nen chher zawm emaw tih mai turin a chelek lehnghal a,” tiin a thusawi chu a lo tlip a.

“Chu, a rang fu elo?”

“Kawlphe chu nep te a ni. Hmuh hman phei chu a ni a. Mahse, kut pakhat silai chuh tum awm taka lang, lehlam hman leh si te kha a hlauhawm tehlul nen, a hneh hrim hrim a ni ber e. Khawinge, kan haw tawh teh ang, min min lo sawi khalh ang e,” a ti a.
“Kei pawh a sawi hmasa ber nih ka tum a ni,” Shorty a chuan a lo ti ve bawk a, an ințhen ta a.

Chumi hnu a Sudden an Shadow Valley a lo thlen meuh chuan Midway thil thleng chu hre lo fa reng an lo awm tawh lo. Gate ah chuan Qullin a chuan a lo hmuak a, gate hawnsak pah chuan, “Khawpui ah chuan thil thar engemaw a awm lo maw?” a lo ti a.

“Han sawi tlak engmah a awm lo e,” Sudden a chuan a ti sam et a.

Qullin a makti chuan, “Kam tam tak chu a nih loh hmel a ni!” a ti rilru ta mai mai a.

A sakawr a thlun fel hnu chuan inlam a rawn pan ve ta a. Drait a chuan a lo be thuai thuai a.

“Midway ah chuan ka ai i lo va awh a ni maw?”

“Mai mai a. Kam tam veng a nih ngawt hi mawle! Merker a dawrah churut ka lei tih te pawh an sawi hial lo maw? Kha… zu ve ta che.”

Nick a chuan a lo la vat a, “A dik a ni tiraw?”

“Engnge i sawi chu ka hrethiam hleinem?”

Nick a chuan a hrilh ta kelh a.

“Chu engtin nge maw keimah emaw a tih theih mai che chu le?”

“A… kan len zawng hi a inang deuh a, ka lukhum ka kai kun deuh bawk si a. Chubakah, i sakawr ka lo hmang kher bawk si.”

Drait a chuan makti fahran hian a en a, “Eng a tinge i sakawr Nigger a i hman loh a?” a ti a.
“A… ka chhawr hah lutuk deuh a, hahchawl ve rih se ka ti a ni.”

“Khawpui kal ka tum kha min dang deuh reng a, buaina a awm i lo beisei reng em ni?”
“Beisei pawh a lo ngai hranpa hleinem mawle.”

Drait a chuan chung zawng zawng chu a han ngaihtuah a. Mi a ni leng lo tan chuan a chiang em lah taka, he a țhian chhar thar chawp mai lakah hian a nunna hial a ba leh ta tih a ngaihtuah neuh neuh a.

“Jim, dawt sawi hi i thiam hran lo a nia aw… Yorky a lah a thiam bik vak hek lo. Lawm lovah chuan min ngai lo la, heti teh fo hi chu a ni tur a ni lo. Nau awma awm fo tur chuan ka upa lutuk tawh a nia,” a ti ta hial a.

“Nick, thil enthlithlai mai tuma kal ka ni chauh a, a tawp kan thlen ka ring lo. Mahse, amahin min nawr chhen zawk si a….”

“Chupa Finger-shy an tih chu i hre reng em?”

“Mi sawi chu hria e. Tualthata eizawng mi, mi sual tak, thei inti tawk tak a ni….”

“…A kutzungte bul min hmuh tir ațang khan a hriat a. Ngawi teh, ka kua chu… sheriff lu ang maiin a nia a ruah tawh ni, ei leh in lam hi?”


Chumi tukah chuan Cullin a chu SP ranch ah chuan a lo leng a. Lukor a leh Sudden a te inbeih thu chu a sawi a. Lukor a chuan a tum loh zawk a bei a ni tih thlengin a hrilh ta vek a.

“Ka hriat dan chuan Lukor a chuan a farnu phuba laktum ni awmin an sawi a. Mahse, tak tak pawh a ni kher lo ang. Heng ho hi zawng chhuanlam hi an siam mai mai a….”

“Mister Drait a thah a tum maw? In hre ngai silo engatinge a tum ngawt a?” Mary chuan a lo ti ha mai a. A pasal chu ngaina vak lo awmin a lo lang țhin na a, chutia hmeichhe chungchang niawm a Cullin an a han sawi meuh chuan Mary hmel chu a lo dur ta khaih khaih mai a. Chu chu Cullin a chuan a lo hmu khiau mai a, chulam hawi chuan atu mah mah chuan engmah an sawi leh ta lo a.

“Kha cowboy Green a kha, vengtu țangkai tak a nih hi mawle, Drait atan reng a țangkai mai!!”

“Kei pawh hian a chungah ka baa nasa asin.”

“Chuti chu keipawh, i chunga a tihțhat avang chuan. Lo țanpui ve thei che ila ka ti ngei mai,”Cullin a chuan a lo ti a.

“Awi… min țanpui alawm… ka lawm ngawt asin.”

“Chu mai chu maw? Tih leh, dawhtheih hi zir tur ka ni reng a…. Mary, min ngaina viau la ka duh asin.”

Chuti a hming bul lama a han ko ve ta mai chu Mary chu a lo zak deuh rum rum a. Mahse, hre lo angin a lang a. Cullin a chu a haw ta mai nghe nghe a. A kal tak hnu chuan a thlir zui vang vang mai a.

Cullin a hi a ngaina nge maw, a rilru a a dah dan chiah te chu a ngaihtuah zui a. A ngaina tak tak nge ni a, pa fel takin nula thil kalhmang la hre mang lo a chhaih buau thiam vang hrim hrima a rilru la ve mai mai em ni ang? A ngaisang rilru hle mai a. A bula awm pawh chu nuam a ti ve ngei mai. Mahse, engemaw tak hian chupa bula a awm apiang rawn khaptu awm ang tlat hian a hre țhin a ni.

Chutihlai tak chuan Yorky a chu phur fe in a lo thleng ta a. A țhianpa, Jim a chezia chu Smoky a khan a lo hrilh tawh niin.

“Ka pi, khawpui lam chanchin i hre tawh em?”

“Hre tawh e. Cullin an min hrilh ni.”

“Chu, Cullin a chu a lo leng elo?”

“Leng e, Mister Green a chu hliam lohin a chhuak a, a lawmawm ngawt mai.”
“Dan pangngaia Jim a khalh thei chu an vang kher ang chu. Lo that palh pawh nise, engemaw ti talin ka that ve tho ang.”

Mary chuan Lukor an Drait a thah a tum chhan te chu a zawt ta a. Yorky a chuan tuin emaw hlawh neiin a ruai a nih a rin thu te chu a sawi ta a. Mary chuan Bull Bardoe a rawih a nih a rin thute, amah ngei pawh chuan chupa chu a hlauh thu te a lo sawi ve bawk a. Yorky a chuan a thiam ang tawk tawk chuan a han thlamuan ve a.

Aside | Posted on by | Tagged , | Leave a comment

Sudden Plays a Hand – 15

SUDDEN PLAYS A HAND 15

Chawlhkar hnih hnu velah chuan Gregory Cullin chu Rideout khuaah chuan ava leng a. Hotel ah chuan a han zawh vel hnuin a chhawng chunglamah chuan a chho ta a. Kawngkhar pawh kik lo in ava lut a.
Inchhung a lo awm chuan a inleng pa chu a hriatchian hnu chuan a silai kawm ata a kut chu a lasawn ta zal zal a. Amah hi pavalai tak, pa vantlang, hmelchhe tak leh mitmeng kal relh relh hi a ni a. Puakruk pahnih a malpuia țawn beh ngai khawpa fuala pai hi a ni a, zu um lah no pahnih hi a lo in chhawp a.
Zu chu a han inthlit a, a țhutfel hnu chuan, “Lukor, mi pakhat hnawksak tih ka nei a,” Cullin a chuan a han ti a.

“Pakhat chauh maw? I phawi rang ve hle țhin khan ka hria a?”

“Ka hming a lan ve hlek loh a ngai tlat a ni”

“A ni maw?”

Chutia a han tihel na chuan Cullin a thin chu a ti thawk ta that mai a, “Chu, dollar zanga i duh lo tihna em ni?” a ti ta a.

“Ni chiah e. Zanga te zawng, a tlem lutuk. Sangkhat hi ka rate hniam ber a ni. I ngam leh i thu, i ngam loh pawhin i thu.”

Cullin a chuan nep thei mawlh hek lo. “A nih leh le, ka ruai mai ang che. Midway ah lo kal la, chhuan lam eng engemaw siamin hun remchang nghakin lo awm phawt mai la. Tin, i hming tak chu hmang suh ang che, min an hria ang che. I mi thah tur hming chu Nicholas Drait a ni a, mi ranch kara tla zep mai a ni a. Bawng ruk hmang a ni bawk. Chutiang mi chu i hua a ni lawm ni?”

“Nung tlak an ni lo. Hman chawp tur sawmnga ka duh a, mahse, advance a ni lo a nia, hre rawh.”

Cullin a chuan sawmnga a han pe a, “Hman hmawh a ngai hle a nia. Awmlo lutuk anga langin thil ti lo la, tin, inkhawih tir reng reng suh. A khawih hman vaih che chuan i chhe nghal a ni mai. Amah chu kei aia lian mah hi a ni a,” a ti a.

“Sialimu dorzen khat a tawn tlang theih a thu a ni ang chu. Thi tawh ah ngai nghal la, i ngaimawh list ațangin tunah chuan thaichhe nghal tawh ang che.”

Tlangval pakhatin a lo thlir reng tih hre hek loin Cullin a chuan Rideout chu a chhuahsan leh ta a. Midway ațanga khawchhak lam pana a kal tur chu Yorky a chuan a lo hmu hlauh mai a. Khawilam pan tur nge a nih hriat tuma a en zui chuan Rideout thlengin a rawn zui ta hi a lo ni a.

Hotel a luh lai chuan Yorky a chuan manager chu a lo va be ru thuai a, mikhual pawh pakhat chauh a neih thu leh a hming pawh Fish in ti a ni a, zu a in nasa a, silai kah rang mi a nih ngei a rin zia te chu a lo hrilh a.
Chumi hnu chuan a bihruk na lamah a kir leh ta thuai a. Cullin a chhuah hnu pawh chuan a la awm ta reng a. A hnu deuh lawkah chuan Lukor a pawh chu a lo chhuak ve ta a. A silai pahnih pai te, a kut ding lam sen bik riau te, hlauh nei ni awm taka a hawi zak zak te chu Yorky chuan a lo chhinchhiah kiau a.

Han hriat leh chuan tur a awm a hriat loh hnu chuan Yorky chu a haw ve ta nghal a. Ranch ava thlen chuan Mary chu pawnah a lo awm a.

“Yorky, kan ngaih a țhalo hman tawh hial asin, khawi lam lamah te nge i kal a?” a lo ti a.

Yorky a chuan nuisang chung hian, “Ngai teh, ka pi, khawvel zawng zawng ka fang chhuak dawn ta emaw ka ti mai a, Midway ațang kawng hnai deuh ka zawng e ka tia, ka bo ta a, ka vak ka vak ta mai a. Noo York ka hnaih thuak awm e. Midway ah bawk chuan ka thleng leh ta hlawl mai a, kawng pang ngaiah ka lo haw leh ta nge nge a ni,” tiin a chhang a.

A riahkhawm naah chuan Sturm a chuan, “Khawiah nge i kal daih?” a lo ti deuh khur khur a, “A neitu nu hnenah i insawifiah ngial a ngai ang,” a han ti zui a.
“Ka sawi daih tawh,” Yorky chuan a ti a, a ngawi ta vang vang a.

A thil va hriat thar chu engtinnge a țhianpa Jim a a hrilh ang tih chu a ngaihtuah ta rauh rauh a. Mahse, a vanneih a siamin a tukah chuan Sudden a zawk chu a lo leng ta hlauh mai a.

“Nick an i pangpar chindan vel a sawi nasa em a, rawn hmuh ve ngei tumin ka lo kal ngawt mai a ni,” tiin Mary hnenah chuan chhuanlam a rawn siam a.

Mary chuan lawm takin a lo dawngsawng a. Sudden a chu a han hawi vang vang a, “Nick a hian i tih a nih vanga fak mai mai emaw ka lo ti a, i lo ti nalh em a nih hi le. Bathlarah hian pangpar bel han hung lehnghal phei la chuh,” a ti a.

“A ni tak e. Rawtna țha tak a nih chu. Ka lawm lutuk.”

“Nick a ngaihdan a nia. Ka han sawi chhawng leh mai mai a nih chu,” a ti a.

“Chuti chu, ka lawm thu pawh i rawn hrilh nghal dawn nia.”

Yorky a chanchin te chu a zawt a, Mary chuan a hma ni lama a bo thu te chu a hrilh a.

“Mi thar ngang hi a nia, a awm viau e,” a lo tihpui a.

A nau Yorky a zawng tura a kal pah chuan, “Nig, pangpar khawina thuah chuan Nick a ka hrilh lawk a ngai ang. Khawnge maw kan ramhuai pa chu le?” a ti bawrh bawrh a.
A bul lawkah chuan a nau Yorky a chuan bawng hnimbuk kara mi khalh chhuah tum hian a lo bei vel a. Anchhia a lo lawh mawlh mawlh mai a.
“Khalaiah khan i bo leh mai ang e,” tiin Sudden a chuan ava fiam a.

Yorky a chuan a țhianpa in a rawn fiam danah chuan a hma ni a a bo dan chu a hre tawh tih a hre mai a, “Ka mi hmuh duh tak ka hmuh che chu le! Ka bo tak tak te chu i ring a maw ni le?” a lo ti a.

“Ring hran lo e. Chhan țha te chu i neih ka ring.”

Yorky a chuan a thil va hmuh leh hriat te chu a hrilh ta vek a. Sudden a chuan lawmthu a hrilh a. Shadow Valley lamah chuan a haw leh ta a.

Shadow Valley a va thlen chuan Nick a hnenah chuan pangpar khawina thu vel chu a han hrilh a. Nick a chuan a en ran ran a, “Ka lawm e, Jim, kei pawhin lo ngaihtuahna chang hriat awm tak a nia,” a ti ta a.

Nihnih nithum hnuah chuan Drait a chuan midway kal a tum thu a sawi a.

“Kei pawh kal ka lo tum chiah asin,” Sudden a chuan a lo ti ve a.

“I thiltih tur chu ka rawn tihsak mai ang che chu.”

“Mahni ngei kal ngai chi a ni tlat. I thil lei tur chu han ziak chhuak la, keiman ka rawn lei zawk mai ange,” a ti a.

“A nih leh aw, ngaihtuah nachang pawh ka lo hre hleinem,” a lo ti a.

Tichuan a ngaihțhat lohna em em pakhat chu ti fel taah Sudden a chuan a inngai a. A sakawr Nigger a chu hmang loin ranch sakawr zinga pakhat chu a hmang ta zawk a.
Midway ava thlen chuan Pilch a chuan a lo lawm hle mai a. A thil lei tur ang ang te a lei zawh hnu chuan khawchjung chanchin te chu a zawt ta a. Pilch a chuan, mi pakhat , sual hmel tak, puakruk pahnih paiin mi pakhat nghah nei niawm in a insawi tih te chu a lo hrilh a.

Lumet tur leh chaw ei turin a chhuak leh ta a. Chung thil a tih zawh hnu chuan Merker a saloon ah a lut phei ta a. Chutia a kal vel chu Lukor a chuan a lo hmu a, a sakawr panga ND tih chuang ațang leh, a taksa pumrua vel ațang chuan a mi thah tum chu ni ngeiin a ring ta a. Mahse, la chian lehzual deuh tumin saloon lam chu a pan phei ve ta a.

A lo nuih lai tak chuan Merker a chuan Sudden a hnenah chuan, “Ka hrilh dawt mai ang che. Nick…,” a aw chu a han ti zawi thut a…,” a tan hian a hlauhawm a ni. Thah tuma zawng an awm a ni,” a han tisap a.

“A ni maithei. Sawlai dawhkan luahtu saw i hria emaw chu? Zaidam hmel tak saw?” nui chungin Sudden a chuan a han ti a, a lehhawi duh chuang miah lo bawk a.

“Tunhnai a lo thleng mikhual a nih saw.”
Lukor a chuan a mizawn chu hmu ta ngei a inngaiin a hna chu thawh zawh thuai thuai a, chu khawchhete chu kalsan mai thei tura inngaiin a ipte puar hnawk tur te chu a suangtuah vel a. A kiai sak a.

Sudden a chuan a mit bawr vel hliah deuh vek khawp aa lukhum a khum luih avangin a hmai chu a lang chiang vak lo a ni. A pa len lam thuah chuan Cullin a sawi ang reng kha a ti rilru reng a ni.
A puakruk pahnih pai ve khanglang chu a intih hlauhawm tumna mai mai ah a puh a. Tichuan, zu sem chhuahna dawhkan lam chu ava pan ta a.

Dollar khat hi zu manah chuan a rawn pe a, a nawi kir dawhkan a mi a han la tur chuan a kut ceilam zungte bul chu rawn tilang lui leh ni hian Sudden a chuan a lo hmu a. Lukor a chuan zu chu a han tem hlek a, inleng dang te ep zawnga ding chungin dawhkan chu a han ngheng a.

“Mi ranch kara tla zep ve ngawt ho hi mi tenawm tak an ni,” a han ti thla rawk a.
A țawng ring bawk a, saloon chhung chu a reh ta țhap mai a.

“Mi bawng an ru an ru țhin lehnghal a. Chutiang mi chu kei ka ni inti ve deuh, khawtlang chuan khaihlum zel tur. Mi dawihzepho!” a han ti leh tun tun mai a.

Chutia a han inhrosak vel pawh chuan tuman an chhang reng reng lo mai a. A tih thinrim tum ber pa lah chuan a thusawi hrelo ang mai chuan a awm mai mai si a.
Sudden a chu a han kawk ang ve vaw a, “Nang kha, engtin nge i ngaih?” a han ti ta a.

“I hre zawk daih ang chu!” ani chuan a lo tihsan mai si a.

A hmai chu a lo sen ta ap ap mai a. A thin chu a rim takzet a ni tih a lang mai a. Chupa chu silai chuh na chang pawh hre hlei lo, thil a ti harsa zo vek dawn… a tihdan pangngai bak sawn a ngai ta tlat a.
“I dawihzep reng reng. Tehlul……”
Chutia a tih pah chuan a han inkhawr vel a. A kut dinglam chu a pistol bul chetah chuan a han dah thla a. Sudden a chuan a kut veilam chu a en ran a, rang fahran maia a silai a han phawi chu a hmu kiau mai a. A phawi fel chiah tih chuan amah Sudden a kawng veilam ațang hian a lo de zawk mai a. Lukor a chu a pai chawn chawn mai a, a han ding sai ngar ngar a, hmalamah a petek phei ta a, a khupin a dawl ta lo a, a tlu sawp ta nak mai a.
Sudden a chuan a han pan phei a. A lu chu a han chawi a, a nghawng bul țhut taka kaw phat hi a hmu a, a thi tawh emaw ti chuan a han thawhsan leh mai dawn a, a lo meng țawk țawk a, a hma a mi chu a hrechhuak ta ni hian a lang a.

“Drait a… i ni lo…Sud..” a ti hman țawk a, a lu chu a thle bak a, Gunman thih dan pangngaiin pheikhawk bun chung ngeiin a thi ta a ni. Sudden a chuan a ruang chu a han dah ngil deuh a, ama lukhum chuan a hmai chu a khuh ta nghal a.

Chutihlai tak chuan sheriff chu a lo lut ve chiah a. Ruang kil tute ho karah chuan a rawn unzep lut tawlh tawlh a.

“Eng thil nge ni leh ta pek?”

“Eng dang ni lo ve, i tihdan pangngaiin ruang khawm tawk chiahin i lo thleng leh ta a nih hi,” Sudden a chuan a lo tihsan mai a.
“A thattu khawm tur pawhin ka lo kal asin! Tunge a nih i hria em?”

“Mi sawi chhawn chu hria e. A hming chu Lukor a ni a, ” Finger.. Shy an ti bawk țhin a ni. Hlawh neia mi thah ching mi a ni a, khawchhak lamah phei chuan sheriff rual hnih rual thumin man tura an beih huai huai a ni a. A kut dinglama a puakruk phawi tur awm takin a ti a, veilamin a kap thut zawk țhin. Chu chuan mi tam tak chu a chhaih buai fo țhin a ni.”

“Chu chu nang chuan i lo hria tiraw?”

“Hre lo. Aman min hrilh a ni. A pawisa nawi han la tur khan ka hmuh loh hlau niawm takin a rawn tilang a ni. Mak ka ti deuh reng a….”

“Tunge buaina siam țan tu zawk che u?”

Aside | Posted on by | Tagged , | Leave a comment

Sudden Plays a Hand – 14

SUDDEN PLAYS A HAND 14
SP lamah ve thung chuan inchei vel a ti zo thawkhat tawh bawk a. Mary chuan ranch hna lam a khawih ve țan ta a. Yorky chuan a pui țhin a, a țangkai phian mai a. Pawisa dawn leh hmanral ziakna bu chu an han en țhin a, a buai hian a buai nuaih mai a. Mary thinrim chuan halral vek mai hi a duh tawh a. Mahse, Yorky a chuan, a pawimawh zia te hrilhin Gilmana rei tak lungina a khung theih na tur a nihzia te chu a hrilh a.

A lo enkawl tura ngaih lawyer Seale a chanchin te chu an sawi kai ta zel a. Yorky chuan, mi țhalo tak nia a rin thu te chu sawiin Jim a pawhin misual a nih a rin thu te chu a hrilh ta a.

Mary chuan Yorky a chu fel a ti em em mai a.
“Yorky, i kum aiin i upa a nih hi mawle. Chu loah Jim a hi chu a dik deuh zel tiraw?” a ti ta hial a.

“Tehreng mai. Kei ngei pawh hi misual i ni min ti se ka awih ang.”

“Ih Jim a hi sawichhe thei rual ka ni lo. A lakah ka ba nasa tawh lutuk a. Ka ngaihtuah zawk chu kei hi mițha ah min ngai se tih hi a ni zawk.”

“A ngai che tih a lanna chu heta i awm hi a ni mai. Jim a hian puih tlak loh chu a pui ngai hleinem tih leh, kei pawh hi min pui bawk si a…! A… keimahah hian țhatna tlem tal a awm ve ani maithei asin.”

Chumi hnu chuan Gilman a sual zia, Drait a tihchhiat a tum nasat dan zawng zawng te leh, chuta a hlawhchham hnu a thah a tum tak thu te chu a sawi ta zel a. Mary hnuk chu a lo ulh țeuh mai a.

Yorky a chhuah hnu chuan Mary chuan a han ngaihtuah zui vel țhin a. Inchi hnih in lo kap hnuai ta se chu…Shadow Valley chuan neitu a nei lo anga, a ni lah chu… suangtuah ngam pawh hi a ni lo.

Strum a lo kal chu Mary chuan account bu chu amahin a khawih vek tur thu a lo hrilh ta a. Strum a chuan, amah rinhlelh na lamah a ngai dawn dawn a.

Mahse, Mary chuan, thiam takin bawng enkawlna lamah a buai dawn em avang leh amah chuan thawh tur hranpa vak a neih loh avang a a hun awl a lo inzir a duh vang niawm in a hrilh mai a.

An bawng neih zawng zawng khalh khawm achhinchhiahna a panga siam vek turin thu a pe ta a. Mahse, Sturm a chuan a hma lawk favangah khalh khawm leh tho a ngaih tur thu leh mihring an neih tawk loh chhuanlam in a lo hnial a.

Mary chuan han hnial let ve vak ngaihna hre ve hek lo, “Ka ngaihtuah ang,” tiin a țin ta ngawt a.

“A tihdan pangngaiin sakawr a chung a chuangin a ranch chu a fang kual leh ta a. Bawng an neih zat chiah hriat duh vanga ti ni hran loin a insawizawi ve a ni. A lo haw chuan inleng a lo nei leh tawh a, Cullin a bawk.

Hawihhawm em em in Mary fakna remchang hlek a piang a fak duah hluah zel chungin Cullin a chuan hmeichhia a zawnga a it ber mai chu a kawm țan ta a. Mary țhutna pindanah chuan fel leh fai ti a ngaisang hmel em em chung chuan cowboy hawh tir tura a inpeih zia te chu a hrilh ta a. Chumi hnu lawkah chuan a haw ve leh ta mai a.

Cullin a haw hnu chuan bathlarah Mary chu a lo țhu mutthlu a. A lo harh chuan a pasal Drait a chuan ngun zet hian a lo thlir vang vang mai lo niin.

“Sakawrin ka va chhuak vak lawk a, ka lo mutthlu sek a ni, lo lut ta che,” a ti a.

Drait a inchhung han lut chuan Mary inchei fel dan te chu a han hmu ta a, “A țha. Hei, thilpek dawn țhate chu i neih hi mawle,” a han ti a.
“Engatan?”

“In enkawl nan.”

“Lindy tih deuh veka nih hi.”

“Mai mai a, Lindy phak chin te chu ka hre em.”

Zu um a hmuh chuan a han inthlit a.
Mary chuan Cullin a lo len thu te leh a bawng khalh khawm tura a thupek a foremen in a hnial dan leh Cullina pawhin awm a tih thu te chu a hrilh ta vek a. Drait a chuan hmel danglam deuh leh lungni lo hmel pawh a pu chuang lo a, lawm hmel lah a pu hran hek lo.
“Ani hi zawngin helai ram hi a it kumkhua a nia,” a ti ringawt a.

Mary chuan a pasal chu rilru thar hian a lo thlir vang vang a. Cullin a te anga inchei nalh ziam zuam chi zawng a ni hlek lo mai a. Mahse, Cullin a neih ve loh engemaw te, Lindy lo sawi țhin ang kha emaw ni dawn ni… neih a nei tih a hre ta a. Chaw ei ve nghal turin a sawm ta hial a.

An chaw ei tur a rawn pek vel lai chuan Lindy chuan Drait a hnenah chuan, “Massa Nick, i hmel a dik lo tawp mai. Kan mihring ho khuan an chawm țha tawk lo che a ni maw?” a ti thur thur a.

“Chuti lam a ni lo e. Ka chawchhum in min awm bosan vang zawk a nia,” Mary melh zauh pah chuan a lo ti a.

Chaw an eikham hnu chuan Drait a chuan a hrilh angin bawng an khalh khawmin an chhiar tawh em tih a zawt a.

“Favangah an ti dawn. Sturm a rawtna a nia. Cullin a pawhin țha a ti,” Mary chuan a lo ti a.

“Sturm a te chu ama mi leh sa alawm,”

“Cullin a hi i ngai sual lak lawh mai mai a ni lo maw?”

“Nang pawh a pui che a, keipawh min puih a tiam a ni si a?”

“A thinlung a danglam ta emaw ni dawn le, tunhma kha chuan amah bak tumah a puih ngai loh kha,”

A lukhum khum tuma a han la chu a hma kawphat chu a lo lang ta a. Mary’n a han hmuh chuan a hmel chu a danglam zo ta vek mai a. Drait a chuan, “Tunge maw lo hrilh che le? Cullin….a?”

“Ni lo. Pawi a tih hmel khawp asin.”

“A beidawng hmel a nih zawk chu!” Drait a chuan a ti ta a.

Aside | Posted on by | Tagged , | Leave a comment

Sudden Plays a Hand – 13

SUDDEN PLAYS A HAND 13
Nikhat chu Sudden a chuan Vasco tlawh a rawt ta a. Drait a nen chuan chawhnu lamah an kal ta a. An va thlen chuan Vasco leh a foremen, texan ve bawk chuan an lo chiauau a. An han țhut fel hnu chuan Drait a chuan thil pakhat a zawt ta a.
“Shadow Valley ka lo luah ve hi engtin nge i ngaih, tlang takin min hrilh la ka duh a ni?”
Chhang nghal mai loin Vasco a chuan, “Khaw lum hian tui te pawh a tihal huam huam e, ti teh u, dangro i han hnawnnphawt teh ang u,” a ti a. Zu chu a rawn thli te te a.
“Zawh awm tak a ni reng mai. Rawlin a kha chu bawng vulh mi pawh ni hran lo, eng emaw ti ti a lo tla zep mai mai a ni a, a dik takin, kan bawng pawh a ru zeuh zeuh duh ngei ang tih pawh ka ring a. Pawisa thawh lawm a a hmun leisak ka rawt a, mahse, a ni khan a lo hralh duh tak loah khan erawh chu ka hriat lohin thildang in an lo bei niin. An tualthah phei kha chu a hnu feah ka hre ve chauh a ni. Thudik tak a nia ka sawi, min pawmsak pawh ka duh a nia,”
“I sawi ang ang chu ka pawm e,” Drait a chuan a lo ti a.
“Rawlin a i ni lo a, bawngvulh ve i tum a nih pawhin ram leh a vel zawng zawng pawh hi tubta mah ni bik hek lo, ka bawngte, Big C bawng te nen phei chuan an in tlat pawlh ngei anga, chungte chu han in ngeihlohna chhan a tling hleinem.”
“In chibai hial teh ang.”
An han in chibai ta a, “Mahse, Cullina leh Bardoe a chu hetiang hian chibai ka buk ve thei lo.”
“Bardoe a chu bawng ruk hmang alawm,” Sudden a melh pah hian, “I sawi ang khan, Double X chuang bawng pawh a bawng zingah kan hmu a, mahse, a tih lai ngei man tumin kan la chang rih a ni.”
“Ni e. Chutiang chuan inhnialna a tlem nge nge a ni,” Sudden a chuan a lo ti a.
“A dik alawm. Greg erawh hi chu, thil lian tham tak tih tum a nei a. Mahse, a tih tum dan ka duh zawng a ni lo a, amah pawh ka hrilh tlang nghal tawh.”

“Tunlai chu ka chungah țhat a chhuah thar riau asin. Shadow Valley pawh ka chhiar ang anga min leisak turin a nih kha min dawn vel ni,” Drait a chuan a lo ti a.
“Chuti elo? chu ti chu, fimkhur nasa rawh. Tin, Double V ah hian țhian i nei tih han hria la.”
“Vawiin a ka lo leng chu hla deuh mahse a manhla hle mai. Nangpawh Shadow Valley ah țhian i nei tih han hre tawh ang che.”
Drait a hmel dur deuh reng țhin pawh chu chu mi ni chuan a hlim ve hmel khawp mai a. An haw kawngah chuan, “Vasco a bawng an ruk sak țhin in va hmuhchhuah kha a țangkai ngei mai. Tinhma zawng khan panga in min beihrawn țhin kha a ni a, tunah chuan Gilmana a awm ta lo bawk a, pathum leh pahnih kan inkhing dawn ta a nih hi,” a ti ta hial a.
“Gilmana kha a tlan chhuak a, Lamond a lah ala awm bawk si.”
“A dik alawm. Mahse, an inlan ngam lo a, chubakah an mahni mai chuan eng vak ti thei hek lo,” Drait a chuan a ti hman chiah tih chuan an hmalam yard za vel, hnim kar ațang chuan a lo de zawk a, a lukhum chu engemaw hian a rawn deng zawk gian a hria a. Chumi hnu ah chuan a puak ri chu an hre ta chauh a.
“Lo tlan rawh!” Sudden a chuan a ti a. Ko behchhan hnai ber lam pan chuan a tlan a, hnim karah chuan a pil bo ta a. Drait a pawh chuan a rawn zui thuai a. Mahse, phen tur a thlen hma chuan a beng bulah chuan silai mu chu ala rawn ving leh hram a.
Sudden a chuan, “A hnuhnung kha chu, a hmaa mi aia yard sawmnga vela hla ațanga kah a nih hmel a ni. Pahnih an ni mai thei. Sakawr te hi thuhruk phawt a ngai a nih hi,” a lo ti a.
Phen tur remchang an va thlen chuan leiah an bawk ran mai a. Silai kawm leh biang insi chat hian silau rikna lam chu an thlir dun a.
Drait a chuan a lukhum chu a han phawk a, “Lukhum țha tak asin mawle,” a ti bai bai a.
“Kha, a la țha tho alawm. Boruak chhuahna pahnih khat siam belh chuan a ti mawi lo chuang hleinem,” Sudden a chuan a lo tihsan mai a.
“Kan nghing enin an nghak a nih saw. Ngawi rawh, an hmu mawlh ang. A rawn kah hunah chuan a khukna veilam leh dinglamah kap ang che,” tih pah chuan Sudden a chuan lung lian deuh hian an piah lawk thing chu a deng nghing ta lawih mai a.

Chuveleh an rawn kap ta ngei mai a. Chutah, an nin an lo kap let ve thung a. Chutia an inkah tawp lamah chuan pahnih chauhin an rawn kap ta tih chu Sudden a chuan a hre thei mai a, a nui vur vur a.
An han nghak vang vang a. Nakin deuh ah chuan chhimbuk hram ang tak hi a lo ri a, a hnu lawkah chuan a dang niawm tak hian a rawn chhawn a.
“Chhang tu pakhat chuan a lo hnai bera kha kalsawn ta niawm takin a nghing lawih hi an hmu ta a. Drait a chuan a han kap țhuai țhuai a. A hnu lawkah chuan mi pahnih tlanchhia hi an hmu ta a. Pakhat phei chuan a lu a tuam bur mai a.
“E heu! Saw chu Beau a nih saw! Khawiah pawh a,sakawr saw chu ka hre zel ang. A țhian saw… Gilmana a nih saw. A pathumna khawiah nge ni le?” Drait a chuan a ti a.
“Kan va en dawn nia. Mahse, zawiin aw..,” Sudden a chuan a lo ti a.
Mei te chu an han zu leh rih te te a. An kal ta a. Tomini chu bawk khup hian a lo tlu ran mai a. A thi fel der tawh emaw tih tur hi a ni a. Mahse, Sudden an a han kawih zangthal chuan a lo la țawng hram hram a.
“Tui…um a …Cull..ina,” a ti thei țawk a, a lu chu sir zawngin a thle bak a, a chatthla ta a. Drait a chuan, “Kan hre ta,” a han ti vat a.
“A ti, kan tih ngawt chuan tumah kan hmin lo ang,” Sudden a chuan a lo ti a. Tichuan, Tomini chu Sudden a sakawrah chuan an hlang ta a. Midway lam pan chuan an kal ta a.
Thim thet thet chuan Midway chu an thleng ve ta a. An thil rawn hawn chu a dang deuh bawk a, an zui huai huai ta mai a. Sheriff office an va thlen chuan Drait a chuan a puakruk kawm chuan kawngkhar chuva han chhu bur bur mai a. Amah chu a tawlhsawn leh daih a. Camort a lo chhuak chu ruang phur sakawr chu a rawn hmuh veleh chuan, “E… in rawn hlawhtling ta elo?” a lo ti vat a. Sakawr chung chuang pahnih a han hmuh leh thuak chuan, “Khawnge Tomini?” a han ti zui a.
Chang fek fawk hian Drait a chuan, “I hnar hnuaia kha mawle. Tu ruang nge i lo beisei a?” a lo ti ta a.
Sakawr chung chuang pahnih leh mipui lo pung khawm te chu a han hmuh chian chuan ama thangah a awk ta chiah hian a inhria a. Tlanchhuahna ngaihtuah a ngai ta a ni. Mahse, mi a nileng chu ni bik hek lo le.
“Ka nauten Gilmana an rawn hawn ta emaw ka ti alawm mawle,” a ti ta rawk a.
Mipui zinga pakhat chuan, “I naute chu vawiin chawhnu khan Merker a dawrah zu an rawn in a, tunah pawh an rui mut harh tumin an la mu reng alawm,” a lo ti si a.
Dawt sawiah a rawn puh a ni tih hre mahse, han ngaih huat chu a tum bik lem lo. Mi ruang chanchin lam chu a zawt ta zawk a. Drait a chuan tawi kim fel fak hian a han hrilh a. Lo lambuntu pathum te zinga pakhat chu Lamond a a ni tih te a sawi a.

Camort a chuan Lamond a a hmuh ngai loh thu chu a sawi rawk a, mahse, mipui zinga pakhat chuan a hna zana Pinto Pete a an zu in ho lai chu a lo hmu ni tur a ni, a lo sawi lang ta khauh mai a. Camort a chuan ngaihdam te a han dil leh rih țhin.
Drait a chuan thu tawp a hrilh ta a.
“Dawt sawi a sawt lo. Tomini hi a thih hmain a lo țawngchhuak a nia. Engpawh nise, ngunbdeuhin ngaithla rawh. Min thah tum an awm leh vaih chuan nangmah hi ania ka rawn beih nghal dawn che ni. I arsi bel khan a chhan lo ang che. Tin, Gilman a leh Beau a chu lo hrilh la, ka hmuhna apiang ah ka kap nghal dawn,” a ti ta a.

Aside | Posted on by | Tagged , | Leave a comment

Sudden Plays a Hand – 12

SUDDEN PLAYS A HAND 12

Thui pawh a la kal hma chuan Mary’n a rawn umphak a, “A pawi em mai! Khatiang kher kha chuan a ti tur che a ni lo,” a rawn ti a.
“I țawng ring em mai. Bawng ruk hmang satliah in a khatianga min tih mai mai ka duh lo. Valley ah ka kir leh dawn. Hetah zawng, ka ti buai mai mai ang che u. Mihring thlan i thiam vak lo niin ka hria.”

“Engati maw?”

“Sturm hi rinawm mawlh hek lo.”

“Big C ațanga lokal anih vangin i ti mai a nih chu!”

“Ni lo ve. Ka pi. Misual hi ja lo hmu hnem tawh hle a, pialral ațanga lo pen chhuak chiah pawh nise, ka ngaihdan chu a ngai reng tho ang. Khu, min tlawn lungawi tumin a lo chhoh khu,” Yorky chuan a ti a. A hnu lawk chuan Sturm a chu a lo thleng ve tak tak a. A lo nui vur vur mai a.

“Thupha chawi ka ba a ni. Khung ho khu kan zawt chiang deuh a. Kha sawn khan ka pi… a mawi lo zawngin i hming a sawi a lo niawm a, hei kan țhianpa hian a nihna diktak a lo hrilh ta a. Chutah, Tomini chuan chemte in a vawm ta a, a ni hi lo rang deuh lo se chu, a hmaia chemte bur ngurin tunah pawh hian a tlu reng zawk dawn a lo ni. Tunah pawh a beng a chan thuak a lo nih hi. A pi hming chhan duh vang ngatin. Ka tihpalh der a ni e, min hrethiam rawh aw…” tiin kut thinga chibai buk turin Yorky chu a han ban a, Yorky a chuan a lo la a, an in chibai ta a.

Sturm a kal hnu chuan Mary chuan, “Khatiang kha a lo ni maw le. Ka hming chhiat i hlauh vangin i nun ilo thap zuk nia! Mi thlang thiam lo min la ti fo em ni?” a han ti a.

“Ti thove. Sturm a khan a tih loh tur a ti tih a inhriat vang mai mai a nih kha.”

“Ih e… Yorky, ka pu kha,” Sam Pavitt a ang maia luhlul tih hlawh țhin a ni asin.

Chutiang deuh chu i ni ang a. A thu hrimah Sturm a a lo rinawm lo a nih phei chuan ka mamawh deuh deuh dawn che asin,” nui deuh saih chung chuan Mary chuan a ti ta a.
Sudden a leh Yorky a chuan Drait a inah chaw an ei a. Chumi zan kher kher chu Mary pawh a hlim viau mai a. An ti ti bawrh bawrh a.

A foremen thar te, a tuka Lindy nena incheina lei tura Midway kal a tum thu chu a sawi ta a. Mipa ho chuan thilțha engteh chiam mah a awm loh dan te hrilhin Drait a chuan Pilch a chu a țhian țha tan a nih vang leh mi rinawm tak a nih avangin dawr turin a hrilh a.

Chung chhung zawng zawng chuan Drait a chuan a nupui chu a en ngun hle mai a. An inhmuh tirha a ria dan te a ngaihtuah a, tunah pawh la ria tho mahse, a lo chum deuh tawhin a duhawm em em hian a hria a. Hman deuh lawka a nupuia a neih kha a ni ta lo emaw a ti rum rum hman a ni. Pa rilru chhaih buai khawpin a lo hmelțha ta a ni ber awm e.
An chhuah hnu chuan Sudden a chuan Yorky a chu Tomini a beih chungchangah fimkhur tawk lo deuh a a hriat avangin a zilhhau deuh hlek a.

“Heng mexican hote hi chuan an zak hnuaiah emaw an nghawng hnunglam ah emaw chemte an pai ru țhin tih te chu hriat ve tawh awm hi a ni a. I phu tawk aiin i chan a țha zawk ani, i thin a chhe lu deuh niin a lang. Naktuk lam chu fimkhur deuh tawh ang che. A vawithumna hi chu a vanduai theih a nia,” a ti a.

“A silai ngawt ka lo en alawm mawle. A kut han kuangkuah vel danah te khan hriatthiam awm tak zawng a ni khawp mai,” Yorky a chuan a ti ve niah niah a.

Drait a mu tur pawh chuan a nupui bazar kal tur, tunhma lama englai maha pawisa hman tur duh tawk nei ngai lo in thil a han lei vel tur te chu a khawngaih rilru hle a. Engtikah emaw chuan…a, min haw tlat si a…,” tiin a ngaihtuah vang vang a. Mahse, mi hrisel tih takah a muhil zui ve ta mai a.

A tukah chuan Yorky a chuan a sakawr tawlailir chu a khalh a. Lindy leh Mary chu an chuang a. Midway lam chu an pan ta a.
Midway an va thlen chuan bank bulah chuan an ding ta a. Chutihlai tak chuan Cullin a chuan a rawn hmu a. A rawn pan a, thiam tak mai hian Maru tan chuan vana arsi lak pawh a huam ngei a nih hi tih tur ngeiin a rawn kawm ta vel a.

“Ka ti khawtlai rei lo ang che,” tiin thian tak hian a kalsawn san leh ta a.

Cullin an sheriff awmna in a lo thlen lai chuan Camort a chuan a lo hui zoh zoh a. A han pan a, “Eng nge ni ta?” a han ti a.

Camort a chuan Drait a beinha rwmchang inti hre fahran chuan, SP Ranch a,Yorky an Tomini a,kah thu te a lo hrilh a. Chu chu, a ni Camort a chuan Yorky a leh SP neitunu chu inthuruala tualthah tum anga puh a lo rawt a.
An ngaithla zo chu Cullin a chu a insehruh a. “Mi a pa, ngaithla rawh, Tomini a khan, ama pi ngei nula sawi hmingchhiat a tum a nih kha! … Chubakah, chemte a mi thah tumin a vawm a, chutah, silaimu hliam a tuar ta chauh a nih kha. A kaptu in a tihsual ber chu a kaphlum lo kha a ni zawk. Thubuai chu han siam teh vaih, thudik hretu mi panga ka rawn thawn mai ang,” a ti a.

Camort a makti lutuk chu a meng tal tup tup tawh mai a. A tawpah zawng, “Chutia i tih chuan Drait a chu ka khawih lo mai tur alawm,” a ti ta ngawt a. Cullin a chuan, “Drait a chu i duh duhin ti rawh, mahse, Miss Darell leh SP ranch khi i khawih vaih zawngin savun hruiin ania i vun kha ka vuak lih vek ang ni. Hre reng rawh,” a ti ta a.

Camort a chu a ngaihna hre lo in a țhu vung vung a. Meizial a han tum lah chu a kut a khur nasa si, a ti thei der lo mai a. A hlawhchham chu a faifuk rut rut a. Judge hnena Cullin a nungchang thar chu hrilh turin a kalchhuak ta a.

Judge chu a lo muhil a. Camort a chuan a han kai tho a. Cullin a chu a a ta ni awma a han hrilh chuan judge chuan chungte chu thil thar a nih lohzia a lo hrilh a. Camort a vhu chungtlak deuh tak hian a lo ti ti pui a. Kumkhua atana thlan tlin a nih loh thu leh a ni chu mipui thlan pawh a nih ve loh avanga mi ngaihdan chu ti tehchiam a a pawisak loh thu te intithei tak hian a lo hrilhfiah vel a.
Camort a chuan tlawm zawk nih bik reng chu a ning deih a niang, “Tih ah chuan Governor in…i…a hriat vaih chuan…..”

“Khangte chu…..”

“Thuruk alawm, tirawh. Chu lam chu tawk se, i luruh chhunga thun ka tum tak chu hei hi a ni. Big C i ep vaih chuan i chhe nghal a ni mai tih hi a ni. Kawng lehlamah chuan Drait a awm lo sela chu Cullin a hian SP hi a nei anga, Midway chu a thu thuin a awmdawn tihna a ni. Nang hian lo țanpui la chuan,…,” tih pahin a lukhum a la a, “Țawng hi zawng dang a ro duh em mai. Min kaihthawh manah zu i chawi tur a ni,” a ti a, an chhuak dun ta a.
Chumi tlai chuan Midway sheriff chuan a kalna tur leh tih tur pawh tumah hrilh loin khua chu a chhuahsan a. Mel hnih vel a kal hnu chuan bawng kawngrau niawm takah hian a peng a.

Reivaklo ah chuan in chhe zet mai, langsar lo deuh mai hi ava thleng ta a. Han awmna awm pawh hi a ni lo nain awm tawk chu an awm ve reng a ni. Pa pakhat, tu a nih pawh hriat loh in a sak a ni a. Khual in ti a sawi țhin a ni.

Huai nei a sawi a ni nghe nghe a. Mahse, Camort a chu a puithu tehchiam lo a niang chu, kawngkhar chu a han kik a, mi pathum lehkhaden lo khel hian an lo hawn sak a. Ava luh chuan an silai an khung sap sap a.
Gilman a, Beau Lamonda leh Tomini te an ni. Camort a chuan engemaw chen Drait a hnawksak zia leh ani chu awm lo se, Cullin a rorelna hnuaiah an awm anga, chuvang chuan Cullin a țanpui apiang chu mahni ințanpui an ni mai ti a an rilru an chawhthawh hnu chuan an pathum chuan Drait a chunga phuba lak tur an neih țheuh dan te chu a han sawi pui a.

Chutah, Drait a chu an thah theih phawt chuan Dollar zahnih țheuh an hlawh ang tiin a hrilh ta a ni.

Aside | Posted on by | Tagged , | Leave a comment

Sudden Plays a Hand – 12

SUDDEN PLAYS A HAND 12

Thui pawh a la kal hma chuan Mary’n a rawn umphak a, “A pawi em mai! Khatiang kher kha chuan a ti tur che a ni lo,” a rawn ti a.
“I țawng ring em mai. Bawng ruk hmang satliah in a khatianga min tih mai mai ka duh lo. Valley ah ka kir leh dawn. Hetah zawng, ka ti buai mai mai ang che u. Mihring thlan i thiam vak lo niin ka hria.”

“Engati maw?”

“Sturm hi rinawm mawlh hek lo.”

“Big C ațanga lokal anih vangin i ti mai a nih chu!”

“Ni lo ve. Ka pi. Misual hi ja lo hmu hnem tawh hle a, pialral ațanga lo pen chhuak chiah pawh nise, ka ngaihdan chu a ngai reng tho ang. Khu, min tlawn lungawi tumin a lo chhoh khu,” Yorky chuan a ti a. A hnu lawk chuan Sturm a chu a lo thleng ve tak tak a. A lo nui vur vur mai a.

“Thupha chawi ka ba a ni. Khung ho khu kan zawt chiang deuh a. Kha sawn khan ka pi… a mawi lo zawngin i hming a sawi a lo niawm a, hei kan țhianpa hian a nihna diktak a lo hrilh ta a. Chutah, Tomini chuan chemte in a vawm ta a, a ni hi lo rang deuh lo se chu, a hmaia chemte bur ngurin tunah pawh hian a tlu reng zawk dawn a lo ni. Tunah pawh a beng a chan thuak a lo nih hi. A pi hming chhan duh vang ngatin. Ka tihpalh der a ni e, min hrethiam rawh aw…” tiin kut thinga chibai buk turin Yorky chu a han ban a, Yorky a chuan a lo la a, an in chibai ta a.

Sturm a kal hnu chuan Mary chuan, “Khatiang kha a lo ni maw le. Ka hming chhiat i hlauh vangin i nun ilo thap zuk nia! Mi thlang thiam lo min la ti fo em ni?” a han ti a.

“Ti thove. Sturm a khan a tih loh tur a ti tih a inhriat vang mai mai a nih kha.”

“Ih e… Yorky, ka pu kha,” Sam Pavitt a ang maia luhlul tih hlawh țhin a ni asin.

Chutiang deuh chu i ni ang a. A thu hrimah Sturm a a lo rinawm lo a nih phei chuan ka mamawh deuh deuh dawn che asin,” nui deuh saih chung chuan Mary chuan a ti ta a.
Sudden a leh Yorky a chuan Drait a inah chaw an ei a. Chumi zan kher kher chu Mary pawh a hlim viau mai a. An ti ti bawrh bawrh a.

A foremen thar te, a tuka Lindy nena incheina lei tura Midway kal a tum thu chu a sawi ta a. Mipa ho chuan thilțha engteh chiam mah a awm loh dan te hrilhin Drait a chuan Pilch a chu a țhian țha tan a nih vang leh mi rinawm tak a nih avangin dawr turin a hrilh a.

Chung chhung zawng zawng chuan Drait a chuan a nupui chu a en ngun hle mai a. An inhmuh tirha a ria dan te a ngaihtuah a, tunah pawh la ria tho mahse, a lo chum deuh tawhin a duhawm em em hian a hria a. Hman deuh lawka a nupuia a neih kha a ni ta lo emaw a ti rum rum hman a ni. Pa rilru chhaih buai khawpin a lo hmelțha ta a ni ber awm e.
An chhuah hnu chuan Sudden a chuan Yorky a chu Tomini a beih chungchangah fimkhur tawk lo deuh a a hriat avangin a zilhhau deuh hlek a.

“Heng mexican hote hi chuan an zak hnuaiah emaw an nghawng hnunglam ah emaw chemte an pai ru țhin tih te chu hriat ve tawh awm hi a ni a. I phu tawk aiin i chan a țha zawk ani, i thin a chhe lu deuh niin a lang. Naktuk lam chu fimkhur deuh tawh ang che. A vawithumna hi chu a vanduai theih a nia,” a ti a.

“A silai ngawt ka lo en alawm mawle. A kut han kuangkuah vel danah te khan hriatthiam awm tak zawng a ni khawp mai,” Yorky a chuan a ti ve niah niah a.

Drait a mu tur pawh chuan a nupui bazar kal tur, tunhma lama englai maha pawisa hman tur duh tawk nei ngai lo in thil a han lei vel tur te chu a khawngaih rilru hle a. Engtikah emaw chuan…a, min haw tlat si a…,” tiin a ngaihtuah vang vang a. Mahse, mi hrisel tih takah a muhil zui ve ta mai a.

A tukah chuan Yorky a chuan a sakawr tawlailir chu a khalh a. Lindy leh Mary chu an chuang a. Midway lam chu an pan ta a.
Midway an va thlen chuan bank bulah chuan an ding ta a. Chutihlai tak chuan Cullin a chuan a rawn hmu a. A rawn pan a, thiam tak mai hian Maru tan chuan vana arsi lak pawh a huam ngei a nih hi tih tur ngeiin a rawn kawm ta vel a.

“Ka ti khawtlai rei lo ang che,” tiin thian tak hian a kalsawn san leh ta a.

Cullin an sheriff awmna in a lo thlen lai chuan Camort a chuan a lo hui zoh zoh a. A han pan a, “Eng nge ni ta?” a han ti a.

Camort a chuan Drait a beinha rwmchang inti hre fahran chuan, SP Ranch a,Yorky an Tomini a,kah thu te a lo hrilh a. Chu chu, a ni Camort a chuan Yorky a leh SP neitunu chu inthuruala tualthah tum anga puh a lo rawt a.
An ngaithla zo chu Cullin a chu a insehruh a. “Mi a pa, ngaithla rawh, Tomini a khan, ama pi ngei nula sawi hmingchhiat a tum a nih kha! … Chubakah, chemte a mi thah tumin a vawm a, chutah, silaimu hliam a tuar ta chauh a nih kha. A kaptu in a tihsual ber chu a kaphlum lo kha a ni zawk. Thubuai chu han siam teh vaih, thudik hretu mi panga ka rawn thawn mai ang,” a ti a.

Camort a makti lutuk chu a meng tal tup tup tawh mai a. A tawpah zawng, “Chutia i tih chuan Drait a chu ka khawih lo mai tur alawm,” a ti ta ngawt a. Cullin a chuan, “Drait a chu i duh duhin ti rawh, mahse, Miss Darell leh SP ranch khi i khawih vaih zawngin savun hruiin ania i vun kha ka vuak lih vek ang ni. Hre reng rawh,” a ti ta a.

Camort a chu a ngaihna hre lo in a țhu vung vung a. Meizial a han tum lah chu a kut a khur nasa si, a ti thei der lo mai a. A hlawhchham chu a faifuk rut rut a. Judge hnena Cullin a nungchang thar chu hrilh turin a kalchhuak ta a.

Judge chu a lo muhil a. Camort a chuan a han kai tho a. Cullin a chu a a ta ni awma a han hrilh chuan judge chuan chungte chu thil thar a nih lohzia a lo hrilh a. Camort a vhu chungtlak deuh tak hian a lo ti ti pui a. Kumkhua atana thlan tlin a nih loh thu leh a ni chu mipui thlan pawh a nih ve loh avanga mi ngaihdan chu ti tehchiam a a pawisak loh thu te intithei tak hian a lo hrilhfiah vel a.
Camort a chuan tlawm zawk nih bik reng chu a ning deih a niang, “Tih ah chuan Governor in…i…a hriat vaih chuan…..”

“Khangte chu…..”

“Thuruk alawm, tirawh. Chu lam chu tawk se, i luruh chhunga thun ka tum tak chu hei hi a ni. Big C i ep vaih chuan i chhe nghal a ni mai tih hi a ni. Kawng lehlamah chuan Drait a awm lo sela chu Cullin a hian SP hi a nei anga, Midway chu a thu thuin a awmdawn tihna a ni. Nang hian lo țanpui la chuan,…,” tih pahin a lukhum a la a, “Țawng hi zawng dang a ro duh em mai. Min kaihthawh manah zu i chawi tur a ni,” a ti a, an chhuak dun ta a.
Chumi tlai chuan Midway sheriff chuan a kalna tur leh tih tur pawh tumah hrilh loin khua chu a chhuahsan a. Mel hnih vel a kal hnu chuan bawng kawngrau niawm takah hian a peng a.

Reivaklo ah chuan in chhe zet mai, langsar lo deuh mai hi ava thleng ta a. Han awmna awm pawh hi a ni lo nain awm tawk chu an awm ve reng a ni. Pa pakhat, tu a nih pawh hriat loh in a sak a ni a. Khual in ti a sawi țhin a ni.

Huai nei a sawi a ni nghe nghe a. Mahse, Camort a chu a puithu tehchiam lo a niang chu, kawngkhar chu a han kik a, mi pathum lehkhaden lo khel hian an lo hawn sak a. Ava luh chuan an silai an khung sap sap a.
Gilman a, Beau Lamonda leh Tomini te an ni. Camort a chuan engemaw chen Drait a hnawksak zia leh ani chu awm lo se, Cullin a rorelna hnuaiah an awm anga, chuvang chuan Cullin a țanpui apiang chu mahni ințanpui an ni mai ti a an rilru an chawhthawh hnu chuan an pathum chuan Drait a chunga phuba lak tur an neih țheuh dan te chu a han sawi pui a.

Chutah, Drait a chu an thah theih phawt chuan Dollar zahnih țheuh an hlawh ang tiin a hrilh ta a ni.

Aside | Posted on by | Tagged , | Leave a comment

Sudden Plays a Hand – 11

SUDDEN PLAYS A HAND 11
Drait a țhut veleh chuan, Pilch a chuan, “I ti țha e. Shadow Valley,” tiin a lo au va, mipui pawh chuan an lo zawm bawk a, an au ta sup sup mai a.

“Bengchheng suh u. In ngawih loh chuan court hi ka ti tawp ang,” ti a au chungin judge chuan dawhkan chu a chum ri bur bur a.

An dawrkai pa chuan a lo hlau lo nasa mai a. “Han tum chhin teh,” a ti ta a. Thler fe hian an nui zui a.

Sheriff chuan judge bengbulah chuan, “Min tlawm der mai dawn ka ti! Eng emaw ti tala lehthal dan a awm lo maw?” ava ti sur sur a.
Judge chuan a han ngaihtuah ran ran a. A tawp a tawpah chuan thil hriatchhuah țha tak nei niawm tak hian a han nui suih a. Dawhkan chu a han chhu leh kauh kauh a, “Kan thubuai hi kan la zo lo ania. Gilmana hian a bawng hralh chu a ruk a ni phawt mai a, thil ru a puh pa hian chu chu hre rengin a lo leisak a ni. Chuvangin thil sual ti tura phiarpui leh lo dawng tu a ni,” a ti ta a. Gilman a chan chu a chau tawh sa bawk a, a ni tan chuan chhiat lehna tur chuang awm tawhlo a ngaiin hmelma pa chhiat lehzualna tur a nih ringin a lo țawng ve ta a.

“Chu chiah chu thil kalhmang chu a nia lawm, judge, kan pahniha kan ruahman vek a ni,” a lo ti a.

Judge chuan, “A puh pa chuan sawi tur a neih chuan ka lo ngaithla leh zel ang,” a han ti a.

Chulamah chuan Drait a chu a lo inring chiah lo na a, mahse, a lo ding chhuak ta a, “Gilman a chu foremen a ni a. Bawng tihral theihna a nei a ni. Ka lei a, thang an kam takin tiin ka lo inveng mai a ni. Ani suahsual chu keiin enge hlawkpui tur ka neih reng reng a?” a ti ta a.

“Bawng chu i lei tlawm lutuk reng reng,” Bardoe a chuan a lo ti ve ngawt a.

Chutah zawng, Vasco a chu a lo țawng chhuak ve ta a, “Tlawm lutuk love. Keipawhin chutiang chuan ka leitir phal asin. A reng reng thuah a note pakhata dollar sarih chu tlawm i tih chuan kum thuma upa nangin dollar sawma i lei tho chu?” a lo ti ve khauh mai a.

Drait a vuak chauh nana an tha thawh chak lutuk phengin a lo ințawng awk hlauh mai niin. Bardoe a chu a ngawi ta rauh rauh mai a.

Cullin a pawh chuan a lo ngaithla kar a. Drait a tih chhiat kawngah chuan an hlawhchham chiang hle tih chu hria in, mipui ngaihsan zawng a nih takin leh Drait a sawisakna hun remchang țha zawk a lo la her chhuah beiseiin leh tuna Drait alamțang anga han lan chu nakin deuh a Drait a a lo tualthih hunah pawh tuman a ni chu an rinhlelh loh nan tiin a rawn țawng chhuak ve ta a.

“Dikna hmachhuan in kan sawi ve teh ang. Drait a sualna finfiah an tumna zawng zawngte kha, ruk ruk hmang thu chang vek a ni a, court hmaah ngei pawh dawt a sawi țeuh tawh kha,” a han ti a.

Judge chuan makti zet maiin a lo en ho mai a, “Chu eng i tihna nge ka pu?”

“Thil tisual a puh reng reng an puhna a thiam chang an nih hnuin nang khan kawngdang a puh belh theihna i nei lo. Dan hi ka hre ve nual asin. Mahse, mister Seale a hian ka ngaihdan chu a dik leh dik loh han sawifiah teh se,” a la ti ta deuh deuh mai a.

Phur zet hian Seale a chu a lo ding chhuak a. Court hian a thuneihna bakin thil a ti tawh a ni. Hetiang tjil tih theihna reng reng eng dan bu ah mah a awm lo….

“…Chubakah, puhna leh thiamthu kan hriat tak ațanga suala puh hi thiamloh chantir ala nih cheu chuan court hian thilsual buru tak a ti a ni ang,” a rawn ti ta piap piap mai a.

Towler a chu a ka ho mai a. A zak lutuk chu a sen awp awp mai a, theih se chu lawyer khanglang chu hmun leh hmunah a thal tawp duh ngei ang. Cullin a hnenah chuan, “Lo nghak hret la chu kei pawhin suala an puh hi an puhna zawng zawng ka hlih thlaksak dawn ngei mai,” a han ti te te a. Sheriff hnenah chuan, “Sheriff, Gilman a hi man la, a chungthu rel turin hreng rawh,” a ti ta a.

Court an han bang ta chu le, an haw haw chhuak hi a ni ngawt mai a. A hma lawka khaihlum se ti rilru ngei ngei tu pawh khan lawmpui ber ang maiin an zui a, Drait a leh Sudden a relhruk tum chu an bawr huai huai ta mai a.

Merker a zu dawr a zu in tur chuan Drait a chuan a sawm ta ngawt a. An kal pah chuan Seale a te, Cullina te hial pawhin an rawn ti ti pui a.

Chumi tlai chuan Drait a te nupa chuan an dinhmun thar chu an sawi dun a. Court a an thiltih dan te chu a lap zawng chauhin Drait a chuan a hrilh a. Cullin a lo țawng ve dan te pawh chu a hrilh tho a.

“Chu, Cullin a i ngaihdan chu a lo dik lo a ni maw?”

“Ni hran lo ve, an chan a chau tih a hrehiang em a, a hmingțhatna turin a lo ti vel mai mai a ni. Heng zawng zawng hi a bul tum tu chu amah vek a ni ang tih hi ka ring nghet tlat.”

Chumi hnu chuan SP Ranch cheibawl vel dan tur chu an sawi chhunzawm zel a.
Drait a chuan, Mary chuan hmeichhia a mamawh dawn avangin Lindy chu chhawm mai se tiin a han rawt pui a. Mary pawh chuan a lo remti ve zel a. A tawpah chuan, “Ka duh duhin ka awm thei dawn ta a, ava tihzia em,” Mary chuan a ti ta phawng mai a.
Chutia amah ning awm em em maia a han țawng takah chuan Drait a chuan a ngaimawh deuh a ni ang, “Khawiah pawh awm la, ka nupui chu i ni tho tho. I theihnghilh vaih zawngin…,” a ti ta a.

“Min that mai dawn a ni ang maw?” Mary chuan a lo ti ha a.

Drait a thin han thawk phut pawh chu a lo reh leh hman deuh tawh a, “Silaimu pakhat sen na tham pawh i ni lo e. Mahse, a mipa zawk chu ka that chiang viau ang,” a ti ta a.

Drait a chu a kalchhuak ta a. A chhuah hnu chuan Mary chuan, thil awmzia te chu amah chauh a țhuin a ngaihtuah ta neuh neuh a. Mal țan ngawih ngawih hian a in hria a. A pasal chuan a thusawi chu a hlen ngei anga, hmeichhe awm ve chhun, Lindy lah chuan a pu chu Pathian biak hian a bia hi a ni ngawt mai si a.

Cullin a chu a ngaihtuah kai ta zela. Ani zawng a nikhua deuhin a hria a. A pasal rin ang chuan Shadow Valley tihchhiat tum tuah chuan a puh ve phal lo a. Tih emah chuan a theih ang anga puih pawh a intiam a ni si a.


A tuk lamah chuan SP Ranch lam pan chuan an kal ta a. Yorky a chuan Lindy chuanna sakawr a chuangin Mary chu a kal bawk a. Drait a leh Sudden a chu an kal bawk a.

Lawyer chu a lo awm vang tawh a. Putar tawi deuh nen hian an lo hmuak a. An va thlen chuan, “Heng zawng zawng hi i ram vek a nih hi, Miss Darell,” a lo ti chul mai a.

Mary chu a han hawi vel țhin a, zau a ti em em mai a. A ringhlel dawn dawn a ni. Putar lo ding ve chu a pu hunlai ațanga chaw chhum lo ni țhin a lo ni a.

“Ka han hmuh che khan, Miss Mary a lo haw leh ta emaw ka ti dawn mai asin,” a lo ti a.
“Ka nu i hria elo?”

“A sakawr neih hmasak ber pawh keima sawi zawi sak a ni alawm. Helaiah phei chuan kan lo la phei lo. In in an dan chu zawng fian phel ang chiah in ni.”

Tichuan a hna ațang chuan ban a hlauh thu te chu Seale a chuan a lo sawi a. Mahse, Mary chuan ban a lo tum lo tawp mai a. Lindy nena thawk dun turin a ti ta a. Amah Miltona lah pa inngaitlawm tak mai a lo ni a. Lindy chu a tluk loh tur zia leh lo puih chu a inhuam thu te a han sawi chuan Lindy chu a lo lawm ve hranpa leh a. Tichuan Rod Miltona chu lawm takin a hna ngai chelh zui tur chuan a awm ta a.

Mary chuan a inchhung chu a han enkual dan dan a. Pindan pakhat erawh chu a lo inkalh bam a. Miltona chuan tunhmaa Mary pindan țhin a nih avanga a pa, in tuma khawih phal lo a kalh a nih thu te chu a hrilh a.

A han enkual zel chuan chei a ngaih zia chu a hmu zel a, pawisa tam tawk a mamawh dawn si a, engtia tih tur nge ni ang ti a a rilru a a lo hisap nauh nauh lai chuan Seale a chuan Gilman misual a thil lo tih laihlan a nih tak azarah leh Drait a felna zarah ranch hminga dollar sangthum chuang lai a awm thu leh a duh ang anga a hman theih tur thu a lo hrilh thuai a.

Chutia Gilmana chung chang a han sawi zauh chuan lung in ațanga a tlanchhuah thu te a hriat chhuah tir a ni ang chu, Drait a hnenah chuan, “Zawlnei i lo nih hi mawle. Gilman a chuan a chaw rawn petu deputy a lo bei thut mai a, a phuar hlawm a, a chabi a laksak bawk a, a tlanchhuak ta daihin an sawi kha,” a han ti a.

“Misual ven ngai dang kan nei pek a nih chu,” Drait a chuan a lo tihsan satliah mai a.

Sakawr in vela lo zi kual mai mai mi panga hian an rawn hnaih a, an lukhum phawkin Mary chu an rawn pan a. Seale a chuan, “Naute u, hei Miss Darell hi a neitu thar chu a ni a. Tun ațang chuan ani hnen ațang vek hian thupek in dawng tawh ang,” a lo ti a.

Pali te chu pa rothap awm hmel deuh deuh hi an ni a. Pakhat erawh chu chi inpawlh tih hriat tak hmel hi a pu a.

Chupa chuan, “Ka hmuh che avangin ka lawm em em a ni, ka pi,” a han ti a. Seale a hnenah chuan, “Mister Gilman a hi a lo haw leh dawn nange?” a han ti leh a.

“Haw dawn lo, Tomini. A tawk e,” Seale a chuan a lo ti a. Mahse, Tomini a chu a la ding reng mai a, “Engnge ila nghah?” a han ti leh a.
“Ele, thupek!” Mary melh hraw pah chuan a ti ta a.

Drait a chu a lo pen hnai a, Tomini an a pi thar tih zah a tum dan chu lo hrethiam in, “He ranch ah hian hnathawh tur a awm loh chuan tumah rawih in ngai lo. Hnathawh tur a awm a nih chuan thawk ula a ni mai,” a rawn ti ta a.

A thiltih tum chu a hlawh chham der a ni tih inhria in leh Drait a kher kher chu a chanchin a lo hriat dan in han chhaih chi a ni lo tih a hre bawk a, a țhiante kaltawh chu a zui ve ta mai a.

Miltona hnenah chuan Drait a chuan, “Heng ho hi Pavitt a mite reng an ni em?” a ti a.

Seale a chuan a lo chhang vat a, “Ni nang, Miltona chauh tih lo chu, Gilmana khan a ban vek tawh alawm,” tiin a lo chhang a.
“Ka ring reng a ni, Jim, engtin nge i ngaih hlawm?”

“An nep hmel ngawtin ka hria. Kha chi pawlh phei kha chu buaina siam chi a nih kha!”

“Ka ngaihdan chiah a ni. Gilmana a ngaihsak teh hiam dan pawh kha la duh lo.”
Drait a chuan a nupui hnenah chuan, “Ban la a țha ang,” a ti ta a.
Mary chuan, a thu thu ani tih han tihlan ve na remchang niin a hria a, “Ka la ngaihtuah ange,” a lo ti a.

Chumi hnu chuan Lindy leh Miltona chaw eisiam chu an ei ta a. An eikham chuan Drait a leh Sudden a chu an haw ta a. Yorky a erawh chu an hnutchhiah a. Yorky a chuan sakawr chu ava ngaihven bawk a. Mary pawhin a nu pindan chu hman a tum avangin a lo va en vel a. Țhutthleng lian berah chuan a țhu a, engtia han chei danglam tur nge ni ang ti a a ngaihtuah vang vang lai chuan a sir kawngkhar rawn inhawng ri pawh chu a lo hre lem lo a.

” A.. bawng lalnu zuk ni reng a! Bawihi, ka hmu thei che a, ka van lawm em!” a rawn ti ta a.

Mary chu a tho zawk mai a. A han en nak chuan Lamond a lo nui sawng chu a hmu ta a. A â ta emaw a ti hial a ni.

“Hetah te i lokal a, i â ta em ni?” Mary chuan a lo ti a, “Drait an a hmuh che chuan…,” a han ti zui a.
“Amah vengtu nen khan ka hmu alawm”

“Ven a ngaih ka ring lo”

“Henglai ah hian a ni bak ven ngai an awm hleinem. Ka han sawi ta mai a…. mahse, i hrilh lo ang tih ka hre bawk a…”

Tih el deuh hian, “I va hrethei ve!’ Mary chuan a lo ti a.

“I ngaizawng lo tih ka hrechiang a, chuvangin tunah pawh ka lo kal a nih hi. Chibakah, he ranch hi i ta a ni tih ka hria a, Gilman a a tlanbo tawh si a, foremen i mamawh ka ring a… Engtin nge ni ang?”

Mary chuan a han en vang vang a, “Hetah hian i tan hmun a awm lo. Engtikah mah a awm lo ang. Khawngaih takin kal nghal rawh,” a ti ta chat mai a.

A hriat tirh chuan a awih lo dawn dawn a, a hmel hlim chu a reh hmak mai a. A thin chu a rim ta em em mai a, “E..e..e..i tan ka țha tawk lo maw? Ka duh hun hunah ka kal ang.. mahse, ka kal hmain ka duh chu ka ti phawt…..,” a chakna sual nen chuan a pan phei ta ruak ruak mai a.

A hmel hriat tawh țhin aw ngei mai chuan a sawi zawh hma chuan, “Kal mai la a țhat zawk ka ring, Beau,” rawn ti thawm hi a hre ta thut mai a.

A han hawi chuan kawngka pakhata Yorky lo ding ran chu a hmu ta a. Pawisa awm lo fahran hian, “A… nang i ni maw?” tih pah chuan, “I thang thang na ah..,” tih leh kah rual tum chuan a puakruk pai chu a han phawi mai dawn a. A silai kawm chu a han khawih hman zet hi chuan Yorky a chuan a lo phawi felin amah chu a lo tin ran tawh mai a. Beau a beidawng chuan a lu te chu a thing vel ta mai mai a. Phawirang ti a an sawi ve laih laih nih nak a laia, sawi tur a awm ta lo.

“A hun takah i kut che i ti tawp a nih kha, zawnga. Han che leh hret la chu tunah chuan i tunhma nun a zirin a chhuk zawngin emaw, a chho zawngin emaw i kal vang vang tawh tur… kal vat rawh!” Yorky a chuan a ti ta a.

Lamond a chuan a naka puakruk hmawr do na chu hre ranin pawn lam chu a pan ta a.

Bathlar hmawr an va thlen chuan Yorky a chuan Lamond a mawng tamah chuan a tlawh ta zawt mai a. A hnuai lunghret zawlah chuan hmai lei nawr chawtin a tla ta a. A lo tho chhuak leh chu a hmai chu a thi nung mai a.

A hnu a Shadow Valley a Yorky a sawi dan takah, amah leh amah in seh ngam khawp hian a thin a rim tawh a. A hma aia a phawiran deuh a beisei teh reng emaw ni, a kut chuan a silai chu a han dap leh that that a. Mahse, a hmaa a chelh loh dan kha a hrechhuak leh thut a, a puitlin ngam leh ta lem hlei lo a. Anchhe lawh bawrh bawrh chungin a sakawrah chuan a zuang kai a, a tlan ta nal nal mai a.

Mary chu a lo dang sawp sawp a, a khur hlawk hlawk bawk a. A han țhu a, “Ka lawm lutuk, Yorky, a lo kal chhan kha i rawn hre hman em?” a han ti chhuak a.

“Hre lo, ka pi, ka lo thleng ve hlawl a ni. Engtiziaa helai a la awm fo nge maw ni le, i hre lo maw?”

Mary chuan a rin dik theih mai chu a ring na a, a lu a thing ta zawk a.
“Kan pu thah tumin hun remchang a zawng a ni ang. Heta foremen hna a thawh chuan chu hun remchang chu a hmu ngei ang le..”
Mary rindan phei zawng a ni lo na a, tunhma lama hmeithai hmelțha a iai loh thu te a lo sawi ve tawh danah ni thei mai awm chuan a hria a. SP a lungmuanna neih a beisei pawh chu hla tawlh tawlh dawn hian a hre țan ta a ni.
“Mister Drait a khan Shdow Valley cowboy pakhat chu chhawr thei tur khan min hrilh a, Yorky, lo thawk mai ta che?” a ti ta a.
“Chutia min sawm chu ka lawm khawp mai. Thawh pawh ka thawk chak khawp mai. Mahse, Cicle Dot a kir leh turin ka lo intiam tlat tawh a ni.”.
Tichuan, Yorky a chuan, a ni zawng a la naupan deuh avangin Green a a țhat zawk tur thu te chu a,sawi hmuh ta a. Mary chuan a lo beisei ngam loh zawk a ni a. Chumi hnu chuan tlai lama sawi fel atan tiin an khek ta rih a.
Mary chu pawnah chuan a chhuak a, a sam chu a thlir vang vang a.
“Thlir vang vang tlak a ni reng a,” rawn ti tu hi an awm a.
A han en nak chuan, Cullin a chu a lo nui vur vur mai a. Hmeichhe ngaina ngai lo han ngaina ve țan a nih bak ah a ranch chawp a neih tum tlat kha a ni bawk a, țhat chuh chu a han tum em em khawp a.
Cullin a chuan Mary foremen atan chuan ama chhawr lai ngei, man lova a chhawr atan a rawn pe a. Mary chuan chung thil phenah chuan awm a awm ang tih rin ngaihna hre hek lo. Cullin a chu fel hi a ti em em mai a. A ngaihsan tak turin Cullin a chuan Mary lawmthu sawi pawh ngaithla duh lo chuan a,han tlansan vel a.
A liam chiah tih chuan Yorky a chu a lo lang a.
“Mister Cullin a nih kha. I ngaina vak lo tiraw?” Mary chuan a lo ti thuai a.
“Zin pui atan a ni leh rul thlang dawn ta ila, rul ka thlang zawk ang,”Yorky a chuan a ti ta daih a. Mary chu engmah sawi loin a lut ta a. Yorky a chu a pu leh a țhianpa ngaihdan ang ang a țawm ve mai a ni ang chu maw a ti rilru a. Mahse, mahni a ngaihdan siam thei tawk tak chu niin a hre lawi si a.
Tlaiah chuan Shadow Valley lamah a haw leh ta a. Zanah chuan Sudden a leh Drait an Yorkyba leh Mary te ho chuan thil awmzia chu an sawi ho ta a. Drait a chuan, Mary in Lindy ngawt a,awmpui chu a ngaihțhat loh thu te a sawi a. Tin, mipa tu emaw tal awm ve se țha a tih thu te a sawi bawk a.
Mary chuan, Yorky a chu a bula awm mai turin a rem mai lawm ni tiin a dil ta hlauh a.
“Rem tho ve. Mahse, a naupang deuh a, engtin nge i ngaih, Jim?” Drait a chuan a han ti a.
“Yorky a zawng, a taksa ai hian a lu hi a upa zawk a nia. A lo lawm em em bawk dawn vei nen. Chuloah rikrum thilah hian a țangkai tlat a ni,” Sudden a pawh chuan a lo ti ve a.
“Ni e.. kei phei chuan vawihnih ngawt mai ka tawng tawh a. A hmasain Bardoe a, tunah Lamond ,” Mary chuan a lo ti a. Chumi ni a an thil tawn te chu a hrilh ta hlawm a. Cullin a lo len thu leh foremen tur pek a tiam thu chen chuan a hrilh ta vek a. A tuk zingah chuan Yorky a hoin Mary leh Lindy chuan SP Ranch lam chu an pan leh ta a.
Miltona bakah, mi thar pakhat, pa san țha len lawn, hmai rualrem lo tak hi an lo awm ve a.
Chupa chu Cullin a rawn tirh, SP foremen tur Sturm a a ni a. Yorky a chuan a pi chu foremen thar tur nen chuan a kalsan a, ama pindan tur lam pan chuan a kal ta a. Cowboy ho awmna a țawng nak nak thawm hi a hre ta a. A han ngaithla chiang deuh hlek a, Tomini a an tih kha a lo țawng lar lar a.
“A harsa lo tawp ang… Lamond a,sawi hmangin nula hian ranch lam engmah hriat a nei si lo a. Thlakhatah sawm nga chu min pe em em ang. A naupangin a hmel a țha si a, nakin deuh ah chuan a inah hian ka la riah ve mai hmel a ni.”
Yorky a chuan a tuar ta lo a. Kawngkhar lam chu a hnaih hret a, a tlawh hawng ta țhuai mai a. Mi panga lo awm ho chu an lo ding rual țhap hlawm a.
“Tomini, mi daw heh leh mi tenawm tak i ni. I silai chuh nghal rawh!” a ti ta a.
Tomini chu a meng kal kal mai a. An ti ti chu a lo hria a ni phawt mai a. Engemaw tal a tih loh chuan a thil ruahman chu a thlawn vek dawn si a. A silai hlat thei ang bera a kut chu dahin a kuangkuah than mai a.
“Naupang ka sualpui ngai lo,” a ti ta ngawt a.
“A ni ang. Hmeichhia vhauh a ni lawm ni i sual ngam? Injun a kara fa lak pa! I hmaia rawn ben kher em ni i nghah?”
Chutah zet zawng Tomini pawh a insum zo ta bik lo aniang chu, a kut chu a ohe zauh a, a hnunga chemte chu a phawi a, Yorky a chuan, chemte tle zeuh chu a hmuh veleh a silai chu a chuh vat a. A kap ta nghal a. Chemte chuan a biang a rawn thawi fua a. A hnung bangah chuan nghet zet hian a bur ta ngur mai a.
Tomini a erawh chuan a koki ruhtliak na ti lutuk chu a zi ngawlh ngawlh mai a, ama țawnga anchhe lawh bawrh bawrh chung chuan a puakruk chu a han chuh leh a.
“Tim duh ting suh! A lehpek chu i pumah a ni tawh ang,” Yorky a chuan a lo ti a.
Chutih lai tak chuan Sturm leh Mary chu thaw hlawp hlawp chung hian an lo lut a.
“Engtizia nge ni ta?” an rawn ti a. Yorky chuan, “Engdang ni lo e, ka pi. He uicho dawihzep lutuk hian.. ni lo lovin min ti a, ka tuar ta lo a, chemte in min vawm lehnghal a… a thla kan pawh sak mai a nia,” a lo ti mai si a.
Mary chuan, banga chemte bur vu chu a han hmuh chuan a khur zawih zawih mai a…”Engatinge chutia a tih ngawt che a?” aw khur dar dar hian a han ti a.
“Lamond a hming han sawi rik ah ngawt pawh chuan Mary chu a țim sung sung thei mai a. A tihngaihna hre lo chuan, foremen thar hnenah chuan, “Kha, thawk nghal mai thei i ni em?” a ti ta a.
“Thei e. Ka rawn in keng nghal vek alawm. Hengbho hi kan hrawm deuh dawn em ni?”
“Aw… hei hi ka goremen, in foremen a nih hi!”
“Ka ban nghal a che. I hliam kha tuam la thlawk bo nghal rawh! Nangni pawh, in hlawh chu thlakhatah sawmli a ni ang. Hepa,ruala chhuak ve duh in awm em?”
An ngawi țhap hlawm a.
“Ngaithla rawh u. Hna țha taka in thawh chuan hrawn hrehawm ka ni lo ang. Amaherawh chu, in hauh leh silai lek hi ka duh lo. Nang pawh, Yorky, hetah i thawk dawn a nih chuan hre reng rawh.”
“Khang lang a che,” tih pahin Yorky chuan a lo melh kawk a. A chhuahsan ta daih a.

Aside | Posted on by | Tagged , | Leave a comment

Sudden Plays a Hand – 10

SUDDEN PLAYS A HAND 10

Cullin a thung chu amah chauh chuan a nui huk huk mai a, “Drait a a that ang a, chumi avang chuan ani kan khaihlum ang a,” a ti a, a lungawi hliah hliah mai a. Big C a va thlen chuan Lamond a chuan a lo nghak ran mai a..

“I hna ngai i rawn beisei leh em ni? Drait an a ban che a ni maw? Engatinge?”

“Ka bum vangin. Mahse, a chhan diktak chu nula kha ka rim lai min rawn hmuh vang a ni. Engkim huamna tlak a nia aw….”

“I vannei ngawt alawm. Kei ni ila, ka that ang che.”

“Ani pawhin min thah a duh alawm. Mahse, nula chuan min lo chhan a, min that lo turin a lo ngen a, Drait a chu thah a, nula chu neih ka tum chiang alawm.”

Cullin a chuan lawmna tur a chhar leh ta a. Mahse, a inthup tlat a, “Anih leh, Drait a i thah hunah ka lo ruai leh dawn che nia,” a ti ta a.

“Chiah,” Lamond a chuan a ti a, a chhuak ta a.

Cullin a chuan thang pathum khan tak tak kam ta a in ngaiin, “Pa fing chuan a tih tur zawng zawng midang a tih tir zet zet maibalawm…,” a ti a. Amah chauh chuan a nui ta vur vur mai a.


Chawlhkar hnih chhung chu buaina nei loin Shadow Valley chu an awm ve teh tlat a. Mahse, Drait a chuan thlamuan tak tak nan a hmang chuang lo. A hmelma te chuan engemaw chu an raw ti leh ang tih chu thil chiangsa ah a ngai reng reng a. A tih pawh an rawn ti leh ngei a.

Nikhat chu, an nupa a ramhnuai lam pana vahchhuah an tum lai chuan sheriff Camort a leh a hote paruk lai hian gate ah chuan luh an rawn dil ta mai a. Drait a chu a lo chhuak a, “Min duhna i nei em ni?” a rawn ti a.

“Tehreng mai. Hei hi manna tur che lehkha a nih hi,” intithei fahrah hian Camort a chuan a lo ti a.

“Hei, i taimak fu hi mawle, eng thil nge in rawn phuahchawp leh tak a?”

“Mi bawng ruk tih ang reng mai mai a nia,” tih pahin Camort a chuan a hote a han melh rulh a, “A silai kha laksak ula, kutkawl bun tir nghal rawh u. A hnial chuan kap nghal ang che u,” sheriff chuan a han ti vel thur thur a.
Wall-eye a leh a țhiante chuan hreh deuh chung in sakawr chung ațang chuan an rawn chhuk dawn a, chu tih lai chuan Drait a chuan vin zetin, “In sakawr chungah khan awm rawh u, in him zawk ang. Tunah ralthuam nen vek, keima thuin ka lo kal dawn. In ngaihdan a nih loh deuh chuan ka foremen Quilt a khian a rifle in a tin reng che u a, mitmei ka hmuh chuan Midway khuain sheriff tak tak kan thlang țha dawn a ni mai. Heng i mi rawih ho hi chu an rin aia rang in a nia ka man phiar mai dawn ni. Tih luihnaa min man te i tum leh a nih ngai chuan Army rawn hruai tawh rawh,” a ti ta khawl mai a.

Camort a chu a sen ta awp awp mai a, “Tun bak man i ngai tawh dawn lo. I chhiatna tur ka hre hneh em,” a ti ta a.

Chutihlai chuan Sudden a leh Yorky chu an lo lang ve ta chiah a.

“Jim, hei, Tluman min rawn sawm leh a, khawpuia len i duh em?” Drait a chuan a lo ti mai a. Chutah, Mary hnenah chuan, “Yorky a hian a lo hruai vel dawn che a nia,” a han ti leh a.

An kal ta chu Sudden a leh Drait a chuan hma an hruai a. Sheriff leh deputy te chuan an zui a. Quilt a chuan gate thlengin ava thlah a, “Ngawi teh, Nick, a hmaah in kal a, khang misual ho kha kal tir zawk teh u… tihpalh engemaw te a awm ang e,” a ti a.

“D lianpui ziak dan kengkawhtu a nih hi i lo hrelo a ni maw?”

“Dan lek kuai i tihna em ni? Finrawl a thawh vaih chuan a man nghakin hremhmun in a ka zau takin a ang reng tih hi hre lul rawh se,”

“I mite vauna chuan ka tih tur min țhulh tir chuang dawn lo e aw…,” Camort a chuan a lo ti a.

“Quilt a khan a vau awzawng lo che. Thutiam tluang tlam a sawi mai a nih kha. Ani hi zawng thutiam hlen țhak mi a nia.”

Chan țha a inti deuh bawk a, Camort a chu a dang zawkah a țang ta a. Ngawi reng chuan Drait a te țhiandun hnungah an kal nghiai nghiai a.

An ni țhiandun erawh chu zawi te te hian an ti ti a. Khua an lo thlen chuan a reh țhuap mai a. Bank kawtah chuan Drait a chu a chhuk a, a va lut a. Camort a chuan a puakruk kawm hi a han khawih vei zuk a, mahse, Sudden a mitmeng a hmuh veleh chuan a thlah leh ta ruai ruai a.

Drait a chu a lo chhuak leh thuai a. An piah lawkah chuan Pilch a chuan aw țial ruan a au hian a lo ko a, “E khai, Nick, Dollar sawm min hlawhtir ta a nih hi. Silai nen ngei nangmahin i lokal ang tiin dollar sawm kan inthap alawm,” a lo ti chul a.

“I ti țha e. Ka țhiante pawisa chu a ni em lawng chu maw?”

“Ni teh suh ei. Kha i hnunga pathau deuh hlim hmel tak, a awma arsi bel pui kha mawle,”

Drait a chuan a hnunglam chu a han hawi zauh a, “Khai a. Mi anglo te chutia lo tih tur em maw ni le? Khawnge mi reng reng hi?”

“Ele, rorelna inlamah. An ruahman fel vek tawh alawm. Tluma khan rorel tu tur pawh thlan chhuah țhalh a ti pek ang chu. Mahse, a ngai ang te kha a ni mai. Thuhretute pawh sawi dan tur an hrilh fel vek tawh , roreltu pawh a theih hram chuan rui loa kal tur a ni awm e. Mahse, Nauva, i chung thu chu a dik ang thlapin an rel hmel a ni. A nih loh vaih chuan silai mu a ving dawn! Khawnge tunah ka dollar sawm chu min han pe teh, Camort, nangni ang thau liak luak hi an thi thut duh a nia,” a ti a.

Camort a chuan a pawisa chu a pe a. Pilch a hi an khaw dawrkai lian ber a ni a, khawchhungah chuan thunun theih a ngah mai. Camort a pawh hian a hlau lo hran lo. Court an va thlen chuan an lo en țhup mai a. An lut ta a.

“Khi khi, tang awmna tur chu a nia,” tiin sheriff chuan Drait a chu a han kawhhmuh ngawt a.

Drait a chuan, “Min dah han tum chhin teh reng,” a lo ti mai a. Tlar hmasaa țhuthleng pahnih in hung lam chu a țhianpa nena an țhut nan a pan ta ngheuh ngheuh mai a.
Sheriff chuan han tihluih chi niin a hre ta lo a.

Judge țhutna tur tih chauh loh chu a lo khat țhup tawh mai a. Cullin a te, Vasco a te, Gilmana te chu an lo awm a. Seale a pawh chu a lo awm ve teh tlat a. Bardoe a leh Lanty a pawh an lo awm ve bawk a. Drait a an lo hmuh chuan an meng rum tlang hle mai a. Merker a meuh pawh a lo awm ve a. Țhutna chang lo ho chu bang nghengin an ding tlar țhup mai a.

Hnunglama kawngkhar chu a inhawng a, judge chu rui lo hian a lo lut ve a. Mipui ho chu a tarmit phen ațang chuan a rawn melh kual den den a.

Mipui zinga pakhat chuan, “Nuam a tih hmel loh a ni. A zing thingpui in pawhin a kua a puar chuang lo a nih hmel,” a lo ti lawng lawng a.

“Khawnge tang chu? Engatinge tang awmnaah a awm lo?” a rawn ti lur lur a.

Drait a chu a lo ding chhuak a, “Tang ka ni aw zawng love aw… keima thua lo kal ka ni asin,” a lo ti a.

Towler a chuan a hre lo der vel a. Sheriff in sawifiah tuma a riat nuah nuah chu ngaithla zawk angin a lang vel a.

“Thil tih ngailoh tak a nih hi,” tih pahin an mi puha lam hawi chuan, “SP bawng rua puh i ni a, i pha dawn nge i pawm mai dawn?” a han ti a.

“Ka thiam leh thiam loh hmu chhuak tura țhu i ni lawm ni?”

Roreltu chu thinrim awm zet hian, “Gilman a kha thu hretu hmunah han ko rawh,” sheriff hnenah chuan a ti ta a. A lo din chhiah chuan, “I sawi tur chu sawi rawh,” a han ti leh a.

Gilman a chuan, “Kha pa, Drait a kha SP ațangin bawng za ru ah ka puh a ni. Varțianah a khalh lai ka mite pahnihin an hmu a ni,” a rawn ti ta a.

Drait a chuan, “Za chiah a ni tih i hrechiang maw?” a lo ti a. Gilman a chu a bu nghat a, “Bawng chhinchhiahna pawh la pu lo thimthama chutiang zat han zawn khawm chu ava harsa awm ve?” Drait a chuan a lo ti a.

“Chutia nanga zawn khawm a ngai hleinem… khalhkhawm sa vek alawm,”

“Ka rawn lak atan ti raw?”
“Ni lo. Keimahnin chhinchhiah kan tum vangin. Chuvang tak chuan a ni, a zat pawh ka hriat chian ni,” tifuh inti tak hian Gilman a chuan a han ti a. Amah lah chu a hawi valh valh tawh mai a.

“Engatinge i mite chuan bawng rutute chu an lo dan loh?”

“Pahnih lek an ni a. Nangni panga ngawt in ni si alawm. Ka hriat veleh sheriff hnenah la hrilh nghal vat a. Sawmnga dang chah leh turin min ti a, ka chah leh chiah a, i rawn ru leh ta reng a ni.”

“I pu Seale a chu heng thil hi i hrilh em?”

“Ka la hmuh loh avangin ka la hrilh lo. A thuhrimah chung bawngte chu hmuhkir leh ka inrin avangin ka hrilh lo bawk a ni.”

“I chhuanlam pahnihna chu ka ring zawk mah. Ka ruk a ni e ti mai ila chu, he rorelna hun hi ka ti tawi deuh tur hi a ni a.. mahse,,…”

“Chu chu inpuanna ang chiah a ni.
Chhuanlam mai mai ka ngaithla dawn lo,” Towler a chuan a lo ti hmak a.

“Chhuanlam i ngaithla dawn lo reng a ni. I țhutna a țhu khan chuti mai maiin thu i pawtchat tur a ni hek lo, i tui chu hal eng ang mahse. Thudik ka hrilh dawn che a, Pathian hming chhalin ka ti a che. I ngaithla dawn khawp mai!” Drait a chuan a ti ta khawl mai a.
Tu mihrinna chak chak ti niawm fahran hian Drait a leh judge chu an inmelh ta kal mai a.

Zu heh zawk leh upa zawk a ni bawk a, judge chu a dawih zawkah a țang ta a ni ang, “Ka lo ngaithla ang e,” a ti ve ta a.

Drait a chuan, “Kha ui cho nena inremsiam veka bawng te chu la ka ni. A bawng hralh chu tuma hriat a duh lo a, SP in tangka fai tlachham a a sawi avangin zing varțian a la turin min ti a ni. A ni lawm ni?”

Mi reh țhuap karah chuan, “Heng bawngte hi pakhatah dollar sarih hisap ang zelin ka lei a, a man pawh ka pe vek a ni,”

“I fiah thei em ni?” Judge chuan a lo ti a.

Chutia a han tih chuan Gilman a chu a lo nui vel a. Drait a chuan, “Thei dawn lawm ni, Mister William” a lo ti ve a.

Bank manager kum sawmnga dawn țep tawh hmelpu chu a lo ding chhuak ve ta a. Rual kawm tehchiam chi a ni lo a, pa dik chet chawt nia ngaih a ni a, mipui mimir pawhin an zah viau a ni.

“Pu Drait a hi min dawrtute zinga mi a ni a, tunhnaiah khan tangka țum hnih a la chhuak a. Zasarih leh zathum sawmnga in. A note number te chu chhinchhiah tur a min ngen avangin ka lo chhinchhiah zel a. Chung note te chu kan pek chhuah ang chiah chiahin a lo lut leh tawh a ni. Mister Gilmana hian ama puala dah tura a rawn dah a ni e.”

Chu thu chuan mi rilru a deng kher mai. Kiltin ațang chuan diriam aw hi a lo ri ta sup sup mai a. Chumi karah chuan, Gilmana mangang chuan, “In tisual a nih chu. Ranch puala dah tura ka tih zawk a ni,” a lo ti a.

Drait a chuan, “Judge, chhinchhiah chiah rawh. Bawng man ka pe tih chu a phat miah loh chu,” a lo ti a.

Williams chu a lo ding chhuak leh a, “Mister Gilman, bank in kan tisual lo. A țum hnih hnihin ziaktu hnena i hrilh lai pawh ka hre ve a ni. Mahse, SP Ranch puala dah tur i ti ta bawk a, ka lo sawn leh ang e,”

Gilman a chuan a in puang fel fai vek tih a han hriatchhuah chuan hnehtu niha a mi huat ber tihchhiat a tumna chu ama chhiatna zawk a lo ni ta tih a hre ta a. Țhian țha hmel hmuh in beisei in a han hawi kual ruai a. Hmuh tur an awm bawk si lo. Chu a chhapah, a bak dang a lo la awm ta cheu mai.

“Tunhnaiah bawng i hralh bawk lo maw?” Drait a chuan a la ti ta deuh deuh mai a. A pha nasa mai a. Mahse, Drait a chuan, “Bardoe a hnena a kum thum a upa za i hralh kha? Dawt sawi a sawt lo viau ang…mihring i kutziak ngei heta hi ka nei a nia,” ala ti ta deuh deuh mai si.

Lehkhathem a han hmuh chuan ama kutchhuak ngei a ni tih a hria a. Khawlum tehlul nen chuan a khua te chu sik deuh ur ur hian a hria a, he ramhuai pa hian eng eng emaw a lo hriat pek le?”

“Ka lo theihnghilh a ni. A man kan la inhlan loh bawk avamgin,” a han ti leh ngawt a.

“A nih leh chung bawng man chu SP Ranch pual tur em ni?”

Gilman a chu a bu nghat a. “Chuti chu hmanni deuh ah tawh khan dahfel vek a ni, i va lawm dawn em!’

Thinrim zet hian Gilmana chuan Bardoe a chu a han melh a. Drait a chuan a lo hrilhfiah thuai a, “I ring dik thuak a ni. Bardoe a chuan pawisa chu dawn a tum meuh mai a, keiman ka dawng a, bankah ka dah a ni e,” tiin.

Judge chuan Bardoe a chu a rawn.melh dan ațang chuan engemaw tal a tih a beisei tih a hre thei mai a.

“Sawi tur dang ila nei em?” a han ti a.

“He thil hi ka hrilh duh che a ni. Gilman a hian bawng min leitir a. A man chu amahin neih a tum a. Tichuan, kei chu bawng ruah min puh ta a. Khaihlum ka nih beiseiin. A thil tum hi hlawhtling sela chu bawng chu a hmu kir leh anga, a bakah, dollar sangkhat leh zanga in ala hlawk dawn a, tuman a ruk ruk chu an hre lo lehnghal ang a, chutiang bawk chuan Bardoe a leina pawisa chu tih a tum tih a chiang a ni.”

Aside | Posted on by | Tagged , | Leave a comment

Sudden Plays a Hand – 9

SUDDEN PLAYS A HAND 9

Drait a chuan, “A țha,” chu a ti ngei taka, mahse, Sudden a chuan lawm hmel vak lo awm tak hian a hmu tlat mai a, “Engnge a chhan ni ang aw?” a ti neuh neuh a.

Seale a chuan kohna lehkha a hmuh chuan mi tihder tumna a ni mai ang em tiin a ngaihtuah a. A lo nih loh chuan a pawisa lo hmuh ve na tur chu a buai zo dawn ngei mai! Shadow Valley ațanga lokal chu a ni si a, a neitupa lah Drait a an tih, pa ngainatawm lo zet kha a ni si a, hming ziaktu lah chu, James Green tih a ni lawi si a. Inchhung ava luh chuan hman ni lawka chhim lam ațanga lo kal ni a insawi, cowboy kha ava hmu ta hlawl mai a.

“Nangmah hi elo?” a han ti a.

“Ni e, mawle. Hlawhchham thu hrilh tura pu Eli a han hmuh leh chu ka hreh si a… Țhu rawh khai,” Kil khata hmeichhe lo țhu ve hnenah chuan , “Hei, Luke Seale a a nih hi, reife chhung chu nangmah zawngin a lo buai tawh asin, ka pi,” a han ti a.

“Kei a zawn te chu hmeichhia, a nu rual emaw mipa Frank tih hming pu asin. In fiamthu a nih vaih chuan….”

“Chutiang ti tur khawpa â niin min ring em ni? Ngun deuhin lo ngaithla rawh,” a ti sauh sauh a. Chumi hnu chuan a chhui chhuah dan zawng zawng chu a hrilh ta kelh a. Seale a chuan, Cullin a dollar sangkhat kha a chan mai dawn hian a hria a, hnialna khan chi hran hran a dap vel a. Mahse, Sudden a chuan, Mary Pavitt te lo inneih tir tu pastor lehkha leh an fa Frankie an tih mai baptisma channa lehkha copy te nen lam a rawn phawrh ta thliam si a.

Chung zawng zawng an phawrh fel hnuah pawh Seale a chuan mihring chu a ni chiang ngei em tiin a la ringhlel ta cheu a.

Chutah zawng, Mary chu a lo țawng chhuak ve ta a.

“Mister Seale, Mary Pavitt chuan a pa in a chhuahsan hma chuan amah chu i hmu țhin em?”

“Hmu fo e”

Mary chu a tho a, engah chuan a rawn inlar lang ta et awt a, “Ka chhun i hria emaw chu?” a rawn ti ta a. Seale a chuan a han en ang ren rawn a, “E heu! A thlalak chiah chiah zuk ni che a,” a ti ta hial a.

“I ang e min ti fo reng asin. I lungawi tawh em?”

A lungawi hle na a, hnial dan kawng ala awm mahna tiin ala pehhel ta hram a, “A awm viau mai. Mahse, enchian deuh a la ngai dawn a, a la rei deuh ang,” a ti ta a

Sudden a chuan, hman hmawh turin a hrilh a, chumi hnu chuan an ințhen ta a. Sudden a chuan, “He nula hi a chanai diktak nei lo in a awm rei tawh em mai a, i han hmanhmawh anga, dollar sangkhat lai hmuh theih hna tur mah nise a manhla vak lo thei ve bawk a ni,” a ti zui ta hram a.

A liam tak hnu chuan, “Big C kalkawng hnaih ber lo kawh hmuh ta ila a țha tur,” a ti vang vang a.

Sudden an a sawi lawk ang ngeiin Seale a chuan Big C lam chu a pan ta nal nal mai a. Ava thlen chuan, “Eng thlichhia in nge rawn let lut che?” Cullin a chuan a lo ti a.

“Chanchin țhalo deuh mai ka hria,”

“Tu tana țha lo nge? I tan nge ka tan?”

“Kan pahnih atan. SP kan chan ta!”

“Nangma tih khawloh vek a ni mai alawm. Engtinnge?”

“Ro luahtu kha a lo lang hlawl mai”

“Dan kaihlek i thiam tehlul nen. A nihna chu i sawi bo thei lawm ni?”

“Chutia han tih chi a ni lo. A fel thlap si. Mahse, chutiang tak chuan a hnenah phei chuan ka sawi lem lo.”

Cullin a chuan tihdan tur chu a rel ta a. Ranch chu sawichhiat a, hralh vat tura lo hmin turin lawyer chu a chah ta a. Mahse, Seale an ranch neitu chu tunge a nih a han hrilh chuan a phawk ta hru mai a. A rilruah tihdan tur dang a han ngaihtuah leh a. Tichuan, a hmaa a lo sawi zawng zawng kha a țhiat leh vek a. A nula it zawng tak chu a ranch it em em mai neitu a lo ni reng tih a hre ta a. Chu a chhapah, mi azawnga a tihchhiat chak ber hnenah a lo awm bawk si. A zeldin thui hman hle mai a. A tawpah chuan Seale a hnenah chuan, “Ka sawi ang zawng zawng kha chu theihnghilh leh mai rawh. I tihtur chu SP ranch chu a rang thei ang berin chu nula kutah chuan hlan mai rawh. A bak chu keiman ka ti vek ang,” a ti ta a.
Cullin a thiltih dan hmang chu makti tak chungin Seale a chu a haw leh ta a.

Cullin a ve thung chuan a sawi thui zel a, SP a neih vaih chuan chulai ram vela ranch lian ber neitu leh hausa ber a ni dawn si a. Bardoe a chu dahțhat mai tur. Vasco pawh ala hnawksak dawn a, a ranch chu leisak a nih loh pawhin nek sawr mai tur. Shadow Valley hi erawh chu ala țangkai dawn a.
“A..Mary duhzawng a nih chuan Shadow Valley ah chuan in ka sak sak mai ang,” tiin a nula it em em, SP neitu lo ni ta, a nupui tura a suangtuah chu a ngaihtuah ta a.

“Nicholas Drait, nang erawh chuan min dip avangin i chhe dawn a ni! Cullin a chuan a rilruin a ti ta a.


Jack Gilmana chu, SP in bathlarah chuan a lo mu thlu barh barh mai a, “I ban phar rawh,” tih thupek a han hre thut mai chu a phu zawk mai a. A han enchian nak chuan, chutia rawn ti tu chuan a fiam mai mai a ni tih a hre ta a. Silai pawh a keng lo a.

Cullin a chuan, “Hei, rawk i awl viau awm hi mawle. Ranch pawh hi an laksak daih dawn che hi,” a han ti vel a.

“Ka taksa a damchhubg chuan min laksak lo ang.”

Cullin a nuam tih zawng tak mai hi a ni a. Mi rilru han tihnat vel te hi a chaw tui ber emaw tih mai tur hi a ni a, churut a han phawrh a, Gilmana chu a han tho te te a, a thil hriat te chu sawilang țha duh lawk si lo hian a han chhaih kual vel a. Chutah, Gilman a chu a thin a rim tawk ta hle nia a a hriat hnu chuan a hrilh ta chauh a. Drait a chu Gilmana chuan a huat zual phah sawt a beisei a ni. Cullin a chuan Drait a hnawksak dan leh thah vat atana a duh thu te chu a sawi zel a. A dik tak chuan ama tih ngam loh chu Gilman a tih tir a tum rilru a ni. Drait a bawng neih thu te a sawi kai zel a. SP bawng vek a nih thu te Gilman a chu a hrilh ta a.

Gilmana chuan, “Chutiang a neih chuan a ruk a ni mai alawm,” a lo ti a.

Cullin a kal tak hnu chuan a en zui vang vang a, “Tual ka that dawn a nih phawt chuan, Cullin, uicho, lo inring hmasa rawh,” a ti bai bai a.

Cullin a ve thung chuan, “Gilmana lawm zawng a sawi lo a ni tih inhre reng chung chuan a haw a. Mahse, thang khat maia lungawi chi ni hek lo, Bardoe a tlawh haw leh tumin 8B lam panin a kal ta a.

Shadow Valley hrula kal a ngaih avangin ramri bul lawka a kal lai hian mi pakhat, sakawr chung chuang hi a hmu ta a. Beisei loh takin Mary a lo ni reng mai a. A hmuh veleh a um ta a. Kar lohah a umpha ta mai a. Lukhum phawk meuhin, zah awm tak hian a be vel a.

A rokhawm thu a lawmpui zia te chu a hrilh vei luam a, Drait an engtin nge a ngaih ve tih te a zawt a.

Mary chuan, “Kan la sawi dun lo,” ti ringawtin a lo chhang a.

Cullin a chuan a duhsak thu te chu a han hlan ve luam a, Seale a hnenah pawh thil tih fel rang tura a lo hrilh thu te a hrilh a. Tichuan, an ințhen ta a.

8B a va thlen chuan Bardoe a chuan a lo lawm teh vak lo a, a hnar hran chuang lo a. Zu a han thli rap rap a, intithei ang reng takin Cullin a chuan, SP ranch neitu an hmuh thu te chu a sawi ta a. Tuna Drait a hnena awm nula a ni tih a han sawi veleh chuan Bardoe a chu a lo phawk ta hru mai a. Gilman a khawingaihthlak tur thu a han sawi zawh chuan, “Gilman a mai mai…. keimah zawk hi a nih chu khawngaih tur,” Bardoe a chuan a lo ti a.

“Engtizia maw?”

“Lo ngaithla teh. Drait an min thah țhelh ni khan nula pakhat ka hnungah ka chuan pui a, a hma darkar khat leka ramhnuaia a kawng bo ka chhar a ni a. Tlanbo tum a nih leh a bo a ni tih a han sawi khan ka hnenah inchhung enkawlah ka sawm a, a duh a ni. Khatia min kalsan takah khan Drait a khan a ru ta a. A hnuah ka nauten an lo man leh a, Drait a an khaihlum dawn lai takin tuna Drait a mikhual pahnih… ‘An ruh chu hremhmunah kang ral rawh se, SP chu ka ta ni mai tur a ni a, a neitu duhawm zet nen chuan… mahse, ka nei tho tho ang.

Cullin a chu a lawm rilru hle mai a. Hmarua atan chuan a tu a te pawh a țhatna tur a ti thei an nih phawt chuan pawisa hek lo. Tihah chuan hriamhrei pawh a hriam țhat leh a hlauhawm ting a ni mai a…..

“Drait a hi chu a dehkhirh hrep ang. Tin, nupuiah a nei nghal mai a nia ka rin, ” a han ti a.

“A lem chuang hleinem. Hmeithai pawh an hmel a țhat phawt chuan ka pawi ti chuang lo.”

A zu no chu a tlak khawlh a, “Ka duhsak a che, Cull. Mahse, langsar lutuk chuan engmah ti suh ang che. Gilman a kan hloh tawh a, Vasco lah kan chan tawh bawk si. Camort a leh Judge pawh khu an zam titih tawh a nia, keini pahnih ngawt chu kan chak tawk lo mai tur a nia,” a han ti a.

“Lungngai mah ta che. Drait a kan dahțhat huna SP ka neih hunah chuan an sahuat takah a nia kan khen fak fak mai ang ni.”

A inleng pa a thlah zawh hnu chuan Bardoe a chu a lo kir leh thuai a, “Mister Cullin, ka fuihpawrh e te chu min ti vei maw? I tan mi loin keima tan a ni la thawh dawn ni. Ramhuaiin pu bo daih che sela a nia ka tih ni,” a ti nuah nuah a.

Aside | Posted on by | Tagged , | Leave a comment