NUNGCHA TE TAN KAWNPUI WEST IN AN KHUA AN KIAN

  • Kawnpui West te’n khua an rauhsan dawn.
  • Sorkarin kawnpui west te nuai 10 a pe ang.
  • Thorangtlang Wildlife Sanctuary huam chin zauh
Kawnpui West khaw mipuite’n Sanctuary hmun atan an khua an kian a, tunlai hian hmun danga pemchhuak turin an in singsa mek.

Lunglei district-a Thorang tlang bulthut-a awm Kawnpui West khaw mipui leh Mizoram sawrkar chuan inremsiamna neiin he khua a chhungkaw tinte chu an account-ah cheng nuai 10 theuh a thunsak a, khawthar sahna ruahman sak tawh chuang lo in he pawisa hmang hian an duhna hmun berah an inbengbel zui tawh dawn a ni.

Environment, Forests & Climate Change Department, Govt. of Mizoramin an website-a an tarlan danin Lunglei district khawthlang lam Thorang tlang leh a chhehvel a, inzarpharh ‘Thorangtlang Wildlife Sanctuary’ chu Mizorama hmun humhalh bik 10 an neih zinga pakhat a nih thu an tarlang a.

Dampa Tiger Reserve nena inkalpawh thei turin he sanctuary huamchin zauh tur hian department chuan hriattirna a lo tichhuak tawh a ni. Thorangtlang Wildlife Sanctuary in a huam chin hi sq.km 198 ni tura duan a ni.

He sanctuary huamchin leh a dep a khaw engemawzat awm zingah Kawnpui West chu hmun danga insawnchhuak turin tunlai hian an insingsa mek a, February ni 4, 2017 khan khawtlang huapin awm ni khamin an khaw thlahna hun hi an lo hmang tawh a ni. Kawnpui west inthiarchhuahnahun atan Mizoram sorkar chuan kumin March thla thleng hun a bituk sak a, tun dinhmunah In thiat mek leh thiat zo tawh an awm a, tunthla chhung hian an thiah zawh hman rin a ni.

In 45- khua niin Baptist kohhran hlang chenna a ni a, kohhran record-a a lan danin mihring 190 an awm a, primary leh middle sikul bakah health sub centre leh dak in an nei. Thal tuihul laiin an khua hi motor (pikcup) a tlanlut ve thei a, a panna kawng hi a chhoh ulh deuh avangin lirtheilut thei chhunte pawhin, thil an phur tam thei lo.Environment, Forests & Climate Change Department website-in a tarlan danin Thorangtlang Wildlife Sanctuary hi asang lai ber metre 1396 niin, Thenhlum, Laisawral, Sesawm, Bunghmun, Tleu, Dampui leh Kawnpui West-te’n an dep a, Thenhlumah Range Officer thuthmun, a awm.

Aizawl atangin Serchhip lam kawngah km 240 a ni a, Aizawl – Darlung road lama kalin km 115-a hla a ni thung.

He sanctuary-ah hian Sakei, Keite, Savawm, Ramsial, Sazuk, Sakhi leh Sanghal bakah ramsa, thing a cheng chi an tih ho; Hauhuk, Zawng, Dawr leh ramsa chi dang an cheng.

Sava lamah chuan Vapual, Kawlhawk, Vahai, Vahrit, Varihaw, Ramar, Bullut leh sava dang hmuh tur an awm.

Author :

Aside | Posted on by | Tagged , , | Leave a comment

Daniela lehkhabu leh hapta hrilhfiah tumna

Daniela Lehkhabu leh a Hapta hrilhfiah tumna by Lalremliana Pachuau

Bible zir mite ngaihtuahna luah reng thintu, hun lo la awm tur, lo thleng ngei tur chungchang hrilhlawkna, Zawlnei Daniela hmanga Pathian inpuanna hi hrilhfiahna tam tak awmin an vai hian Pathian thâwkkhum ang zia zanga ngaih vek tur an ni lovang. Isaac Newton-a khan, “Daniela lehkhabu duh lo chu Kristianna duh lo tihna a ni e” tiin lo sawi tawh a. Mat 24:15 kan en chuan Lal Isua ngeiin, “A chhiar apiangin a awmzia hre rawh se” tiin Jerusalem chhiat tur thu leh a lokal leh hun tur chungchang a sawiah pawh Daniela lehkhabu hi zir turin min fuih a nih kha.

Daniela bung hnihna at
ang khan Daniela hi khawvela lalram lo ding tur leh an tlukchhiat dan tur chungchang Nebukanezzara mumang kaltlangin hmuhtirin a awm ta a. Nebukanezzara chuan a mumangah milim hrawl tak mai hmuin milim lu chu rangkachak niin BC 605-539 chhûnga Daniela hunlaia Nebukanezara Babylon lalram a entir a. A âwm leh bânte chu tangkarua niin BC 539-331 chhûnga Persia lalram an entir leh a. A dawt lehah chuan a a pum leh a malpuite chu dâr niin BC 331-168 chhûnga Greece lalram an entirin a kête chu thir niin BC 168-AD 476 chhûnga Rome lalram, heng lalram zinga ropui ber a entir leh a. a tawp berah chuan a kephah, a then thir, a then bellei niin hengte hian Rome lalram kehdarhin Europe ram hrang hrang an entir leh ta a ni.

Khing lalram pali tlukchhiat dan tur pawh Daniela vek hian bung sarihah khan chiang takin a rawn sawi zui ta a, a rawn thleng dik ta thlap reng a ni. Babylon chu Sakeibaknei niin hemi dawtah hian Savawm rawn langin Medo-Persia entirna niin an lo ding chhuak dun a, BC 539 khan Babylon hi Savawm kâa nâkruh pathum awm pawh khawvel pum awp tura lal pathum – Lydia, Aigupta leh Babylon a rawn hneh entirna a ni bawk. A dawt lehah chuan Keitê ang, thla pali leh lu pali nei lo lang lehin hei hian grik sawrkar entirin Alexander The Great-a khan Babylon hnehtu Meo-Persian chu BC 331 khan a rawn hneh ve leh ta a ni. Thla pali leh lu pali hian Alexander-a lalram kehchhia, a general pali rual a entir a. Cassander, Luschimus, Ptolemy leh Seleucus te an ni.

Heng ramsa dawta Daniela ramsa hmuh hi chhuizui tul bik chu a ni ta a ni. A hmâa sa dangte lakah kha chuan danglam tak a ni; ki sawm a nei a. 7:8 Ki te chu ka ngaihtuah a, tin, ngai teh, an zing aṭang chuan ki dang pakhat te tak tê a lo chawr chhuak a; a hmâah chuan ki hmasa pathum te chu a bul rêtah an thlawn ta a : tin, ngai teh, he ki ah hian mitte, mihring mit ang mai hi a awm a, tin , kâ pawh a awm a, thil nasa takte a sawi a. Rome lalram ropui tak mai chu zawi zawiin a lo keh darh leh ta a. Constantine-a khan Rome aṭangin Constantinopole lamah Rome khawpui hi sawnin Rome bishop chuan thuneihna sang tak mai a nei zui ta thuai a. Stanley-a chuan, “Rome lalṭhutphah a han ruah veleh Bishop-in a luah nghal a. Constantine-a chuan thuneihna te, thiltihtheihna te chu Rome-a bishop kutah a pe hmiah mai a ni” tiin a lo sawi ta a ni.

7:19 Tichuan sa palina, a dangte laka danglam bik tak, ṭihbaiawm tak, a hate thir nia, a tinte dâr nia, ei buan buana, paawt sawma, a bâng nawi a ke hnuaia rap bettu chungchângah chuan thutak hriat ka chak ta a; a lu-a ki sâwm leh ki dang lo chhuaka, a hmâa pathum tlu ta chungchâng te; kha ki, mitte neia, a lan dân pawh a ṭhiante aia ropui bîk tak te nên khân. Tin, ka en reng a, chu ki ngei chuan mi thianghlimte chu a do va, a hneh a; Hmakhawsânga a lo kala, rorêlna chu Chungnungbera mi thianghlimte hnênah pêk a nih a, mi thianghlimte chuan ram an chan hun lo thlen hmâ loh chuan a hneh a. Hetiang hian a ti a: sa palina chu lei chung ram palina, ramdang zawng zawng laka danglam bîk, lei pumpui ei buan buana, chîla, pawtsawm tûr chu a ni ang. Tin, ki sawmte thu chu, hemi ram ata hi lal sâwm an lo chhuak dâwn a ni: tin, an hnuah chuan pakhat a lo chhuak anga, a hmâa mi te lakah chuan a danglam ang a, lal pathumte chu a titlû ang. Tin, chungnungbera kalhin thu a sawi ang a, chungnungbera mi thianghlimte a ti châu vang: hunte leh dân chu tih danglam a tum ang a, hun khat leh hunte leh hun chanve chhûng chu a kuta pêk an ni ang.

He lai chang hi chhiar ngun a ngai khawp mai. AD 376 aṭanga Visgoths hnam Rome khawpuia rawn luh an phal; ta tang khan hnam dangte nen Rome-ah an rawn lut ta hum hum mai a. Reiloteah Rome sawrkar chu hmun sawmah, Daniela sawi ang hian a phel ta a ni. Chung ram sawmte chu an hunlai leh tuna koh an nih dan nen :
AD 351 Alemani – Germany,
AD 351 Franks – France,
AD 406 Burgandians – Switzerland,
Suevi – Portugal,
Vandals – Africa,
AD 408 visigoth – Spain,
AD 449 Saxon – Britain,
AD 453 Ostrogoths – Italy, Lombards – Italy,
AD 476 Heruli – Italy.
Tichuan, Daniela sawi ang ngeiin heng lalram sawmte hi an la inzawm leh ang a, an zing atangin Daniela sawi ang hian hotu pakhat a lo la chhuak leh dawn ta a ni.

Hemi thleng hi a tawi thei ang bera khawvel lalram chungchanga Daniela lo hmuhlawk, thleng dik thlap chin chu a ni. Tunah erawh chuan Daniela Hapta kan tih mai hi kan han bihchiang dawn ta a ni.

Daniela 9:24 Bawhchhiatna tikin tûr te, sualna titâwp tûr te khawlohna thianfai tûr te, hmun thiannghlim ber chu hriak thih tûr tein i mite leh i khawpui thianghlim tân hapta sawmsarih ruat a ni e.

9:25 Chuvângin, Jerusalem tung ding leh sa ṭha tûra thupêk a chhuah aṭanga hriakthih a, lal a lo awm thlengin hapta sarih a ni ang, tih hrefiah thiam ang che: tin, hapta sawmruk leh pahnih hnuah chuan hriakthiha chu tihbo a ni ang a,a tâwpna thleng pawhin indona a awm ang, chhiatnate chu a inruat sa a ni.

9:26 Tin, hapta khat atân mi tamtak hnênah thuthlung nghet tak a siam ang a; tin, hapta chanveah chuan inthawinate leh thilhlante a tibâng ang; tin, titiautu chu tenawmna thla chunga chuangin a lo kal ang a; tin tâwpna, lo thleng ngei tûra ruatsa thleng chuan thinurna chu titiautu chungah chuan leih buak a ni ang,”
a ti a. Hei hi Daniela Hapta, Hapta 70 chu a lo ni ta a ni.

A nih leh engtik hunah nge Daniela Hapta chu a lo intan tak a? He hapta 70 chhûngah hian khawvel hun tawn tur, tawpna thlenga hun ruatlawk chu a awm ta a ni. He hapta 70 kan tih maite hi hapta 7, hapta 62 leh hapta 1 a then an ni leh zel a. Hapta hi Hebrai ṭawnga 7 tihna mai a ni a. Ni 7 emaw kum 7 emaw sawina mai niin Daniela hi chuan kum angin a hmang ta a ni. Tichuan, hapta 70 kan tih chu (7 x 70=490) kum 490 chhûnga thil thleng tur sawina a lo ni ta a ni. He hapta 790 lo inṭanna pawh ‘Jerusalem tungding leh sa ṭha tura thupêk chhuah’ aṭanga intan tih kan hmu ta a. Ezra bu kan chhiar chuan (1:1-3; 6:3-8, II Chro 36:22-23) ahte hian Lal Kura leh Lal Daria te hian Juda mipuite hi an rama kira temple sa ṭha tura an chhuah a phalsak thu kan hmu ngei mai, mahse Jerusalem tundinna tura thupêk erawh a tel lo tih hria ila. Nehemia 2:1-8 kan chhiar erawh chuan Nehemia dilna angin lal Artezerzia chuan Jerusalem tundin leh sak that phalna thupêk a chhuah kum BC 445/457 hi Daniela Hapta lo intanna chu a ni ta a ni.

BC kum hnih lo lang hi pawm dan chi hnih niin BC 445 zawk hi bible mithiamte leh khawvel chanchin chhuitu bik (chronologer & secular historian) pawm dan niin BC 457 erawh hi chu Seventh-Day Adventist lam pawm niin BC 445 hi chuan Isua AD 32 thleng khan Hapta 69 a hawl thlen laiin BC 457 erawh hi chuan AD 27 thleng a hawl phak a. Hawl phak kan han tih hian hriak thika lakbo thleng, (Lal Isua thih thleng) a huam miau avangin Historian tam zawk pawmpui BC 445 hi kei chuan ka pawm zawk a ni. He BC pahnih pawmtute hian an chhut dik ve ve erawh chu an hun inṭanna BC leh hapta 69-na tawp inkârah hian kum 483 a tlazep ve ve hi a ni. Mahse, danglamna an neih a awm ta thung a. BC 457 a hapta inṭan pawmtute hi chuan hapta 70-na pawh hi thleng tawhah an ngai hi a ni thung. Engtin nge an sawi le?

8:12 Tin, mi thianghlim tawng ka hria a; tin, mi thianghlim dangin tu emaw lo tawnga hnênah khân, “Hâlral thilhlan awm fo te, titiautu bawhchhiatna te, hmun thianghlim leh awmho chu rahbeh tura pêk an nih te chungchânga inlârna chu engtia rei nge ni dâwn?” a ti a.

8:13Tin, a hnênah “Zing leh tlai sânghnih leh zathum thlengin; tah chuan hmun thianghlim chu thenfai a ni ang,” a ti a.

Daniela bu chhûnga hun ruatlawk pakhat, ni 2300 hi mi hian an sawi lang lo leh mai thin a. He mi ni 2300 hi ni khat anga chhuat chuan Daniela Hapta pawh a khung zo dawn loh avangin bible chhiarkawp angin kum 2300 tiin pawm a ni a. Heng kum chhûngah hian he Daniela Hapta 70 hi awmin he kum 2300 intanna pawh hapta 69 intanna, BC 457 kha niin pawm a ni ta a ni.

He hrilhlawkna a han hriat hian Daniela hian mak a ti lutuk a, Gabriela hian a hrilhfiah kim hmain a thidang ta hial a. Hrilhfiahna thenkhatte chu bung riat lamah hmu nual tawh mah ila, a la kim miau loh avangin bung kua-ah hian hrilhfiah zawk a ni ta a. Bung 8 leh 9 inkârah hian kum 8-12 chhûng mai awmin heng kum chhûng zawng hian Daniela hian hrilhfiahna chu Pathian hnenah a dil char char a, a dilna hi Pathian hian a va chhang har êm!
9:23 I dîl tirhah khân thupêk a chhuak tawh a, hrilh tûr chein ka lo kal a ni; duhawm tak i ni si a; chuvâng chuan thil chu ngaihtuah la, inlârna chu hre thiam rawh,

a ti daih a nih hi! An sawidan chuan Daniela mite tân Hapta 70 ruat bik a ni a, heta ruat tih hi Hebrai ṭawng chuan ‘lak hran’ emaw ‘sahthlak’ tihna niin kum 2300 erawh kha chu mi zawng zawng huap, mi tin tawpna thleng hun a hawl phakin chung kum aṭang chuan hapta 70 (kum 490) hi sahthlak a ni ta a ni, an ti.

8:16 Chutichuan, ka dinna chu a rawn hnaih a; tin, a lo kal chuan ka hlau êm a, bawkkhupin ka tlu a: mahse ani chuan ka hnênah, “Aw mihring fapa, hre thiam ang che, inlârna chu tâwpna hun a mi tûr a ni si a,” a ti a, tih a nih avangin. A nih chuan heng mite sawidan hian hapta 70 na, kum 7 chhûngah ah chuan eng nge lo thleng ta?

Hun khat, huntê leh hun chanve chhûng chu kum 7 chanve niin, a Ni ang zawng chuan Thup13:5 anga ni 1260, kum 3 leh a chanve hun sawina a ni. AD 538 khan Roman Catholic thuneihna daltu, Heruli, Vandals leh Ostrogoth te chu tluin a thuneihna a intan ta chiah a. Kum 1798 chu ni 1260 tawp kum chiah a lo ni leh a, an ti ta a. Mahse, Daniela hapta tawpna, tin tâwpna, lo thleng ngei tûra ruatsa thleng chuan thinurna chu titiautu chungah chuan leih buak a ni ang, tih erawh a thleng si lo chu a nih hi. A awm ang ve khawp mai.

Tichuan BC 445 zawk chu Daniela Hapta intanna atân pawm a nuam ta zawk hle tih kan hmu thei ang. Hapta 69 na a zawh rual chiah hian Thup bung 13:5 Tin, uanna leh Pathian sawichhiatna thusawina ka a hnenah pek a ni a, thla 42 che turin thu pek a ni bawk a, tih hi lo thleng nghal tur a ni tawh si a. Engvangin maw? Daniela 9:26 Tin, hapta khat atân mi tamtak hnênah thuthlung nghet tak a siam ang a; tih nen hian a inzawm tlat avangin. He kum 3 leh a chanve chhûng hian Daniela titiautu tenawm hian Israel nen inremna, kum 7 daih, hapta 70 tawpna tur thleng inremsiamna a neihpui dawn vang a ni. Israelte chu inthawina hmanga sual thupha chawi thin an ni a. Nimahsela, tunah hian chu inthawina chu an tân neih mi a ni lo.

An inthawina hmunah Mosolman Temple a ding miau sia lawm! He sakawlh hian inthawi a phalsakin an Juda hnam anga Pathian biak a phalsak dawn ni ngeiin a lang. Jeremia khan Judate kha Babylon salah kum 70 chhûng an tan tur thu a lo hrilhlawk kha Daniela hian a hre reng thin a. a hun a lo hnai tial tial tih pawh a chhut thiam bawk a. Tichuan, tawngtaiin Pathian a au a, chhanna pêkin a awm ta a ni. Kum 70 bawk Pathianin Daniela mite tân hian hun a pe leh ta a nih hi. Nimahsela, chu chu a lo la thleng si lo. Hapta 69-70 inkârah hian keini hun Church Age hi a lo tlazep ta tlat mai a ni tiin mithianghlim lawr nghakin kan awm ta thup a nih hi.

A tawp berah chuan Lal Isua hi engtikah nge a lo kal leh dawn tih hi Conservative lam leh Liberal lamten an sawi sawichhang ve lovin ka ngaihtuahna luah rengtu hmangin ngaihruatna ka siam ve dawn a ni. Ka thu lakna pawh hei hi a ni e. Thess II 2:3 Tuman engmahin tihder che u suh se; tluksanna chu a lo thlen hmasak zeta Dan Bawhchhepa, boral fapa chu a lo lan loh chuan chu mi Ni chu a thleng dawn si lo va.
2:4 Ani chuan Pathiana an vuah apiang leh, sakhua zawng zawng dovin, an chunga awm tumin a inchawimawi ang: chutichuan Pathian biak ina thuin Pathian ang hialin a intar chhuak ang tih hi han enchiang ula.

Thess II 2:7 Dan bawhchhiatna thuruk chuan tunah pawh a thawk mek a ni si a; nimahsela lak bova a awm hma loh chuan tunah hian a khaptu a awm.

2:8 Chu mi lak bo hunah chuan Dan Bawhchhepa chu a lo lang tawh ang, Lalpa Isuan ani chu a kaa thawin a tihlum ang a, a lo kala inlarnain a tiboral ang.

2:9 Chu Dan Bawhchhepa chu Setana chakna nen a lo kal ang a, thiltihtheihna tinreng te, chhinchhiahna tinreng te, dawt thilmak tinreng te nen a lo thawk ang, boral mekte tan fel lohna bumna tinreng nen a ni ang; chhandama an awm theihna turin thutak hmangaihna chu an pawm loh avang a ni. Chuvang chuan dawt thu chu an awihna turin Pathianin sual hnathawhna an hnenah a thlentir ang, thutak awih lova fel lohnaa lawm zawkte chuan thiam loh an chan vek theih nan”
tih nen hian.

Eng ang pawhin sawi mah se, Lal Isua lo kal hma hian thil thleng tur chiang êm êm mai a awm a. Lal Isua ngeiin Mat 24:15 “Chutichuan, titiautu tenawm, zawlnei Daniela sawia kha, hmun thianghlima dinga in hmuh hunah chuan (a chhiar apiangin a awmzia hre rawh se) a lo tih leh Paula sawi hian inanna an nei. Dan bawhchhetu (sakawlh) hi a lo lang hmasa phawt dawn a. Kohhran tluksanna lo thlengin he sakawlh kan tih ngei hi Jerusalem Temple leh kohhran biak in tinah thuin pathian anga biak a phut hmasa dawn tih hi a chiang reng mai a. Tunah hian Thlarau Thianghlim hian a lo lan theih loh nân a hupbet mai a ni tih pawh kan hria a ni.

Number 666 pu duh lo chuan a eiin a hralh thiang lovang tihin a kawh chiang êm êm mai chu sakawlh chhinchhiahna pu lo ngam mi thianghlim an awm dawn a, ‘Thih thlengin rinawmin lo awm rawh, tichuan nunna lallukhum ka pe ang che’ min titu hian zep miah lovah chuan Tribulation (Hun khirh) paltlanga Isua phat loh a kawk chiang tih hi a ni. Conservative lam erawh chuan Isaka, a pa Abrahaman a vih hmaa chhanchhuaha a awm ang te, Lota humhim a nih dan te leh Novate chhûngkua chhanchhuah an nih ang khan sakawlh hunah hian ringtu lawr hi a awm dawn a ni an ti thung a ni a. Daniela kum 2300 pawh hi tumahin chiang takin an la hrilhfiah ngam ngai lo chu a ni a, mihringin hrilhlawkna a lo zirna chanchin chu heng hi an lo ni ta a ni e.

Aside | Posted on by | Tagged , | Leave a comment

DESMOND DOSS – The Unarmed Medic (Mizo version) by Zaia



DESMOND DOSS – The Unarmed Medic

By Zaithan Mawia

“Japan sipaiho chuan medic (sipai zinga hliam bawihsawmtu damdawi lam thiam) chu min bitum deuh bik a. Medic leh BAR (M1918 Browning Automatic Rifle) kengtuho chu an huat ber kan ni a… keini min kah theih dawn phawt chuan sipai dangho chu an en kân duh hial a ni. Medic an thih chuan hliam bawihsawmtu tur an awm dawn loh avangin midang rilru a tichi-ai tih changchawia medic that tura thupek an ni. Medic pawhin ralthuam an keng vek a, kei tih loh chuan.”- Desmond Doss.



Tunge Desmond Doss chu?

Corporal Desmond Doss chu Indopui Pahnihna hun laia American sipai, 77th Infantry Division hnuaia mi a ni a. Hmelma sipai that miah lo pawh ni mai lo, silai hmet puak lo mai pawh ni satliah lo, eng ralthuam mah keng lo hrim hrim chunga America ram sipai chawimawina sang ber, raldonaa sipai huaisen bikte an pek thin, Medal of Honor dawng thei hmasa ber a ni. Tum khat inbeihna ringawta sipai 75 nunna chhanhim tur khan ralthuam a mamawh ve tlat lo.Desmond Doss chu kum 1919 khan Virginia State-a Lynchburg khuaah a lo piang a. A pa, William Thomas Doss chu thing mistiri a ni. Seventh Day Adventist chhungkaw kulmuk tak atanga seilian niin a nuin Pathian thu lama a kaihhruaina chuan a hneh hle mai a, Sabbath serh ngai pawimawh em em mai leh Bible-a thusawm pek parukna, ‘Tual that suh,’ tih kha zawm bur mai tum mi a ni.



Conscientious Objector:
Indopui pahnihna a lo chhuah hlimah khan Doss chu tlangval chêr ria dîn dên niin Newport News lawng chawlhnaah hna a thawk a. Kum 1942 April thlaah chuan an khaw tlangval dangte ang bawkin sipaiah a inpe ve a. Nimahsela, a Pathian thu rin dan nen a inkalh miau avanginsilai chelek chu a duh si lo; chuvangin ‘conscientious objector’ angin sipaiah chuan ziah luh a ni ta a ni.

[Ram thenkhat hian sakhaw thil vang emaw, mahni chhia leh tha hriatnaa an duhthlanna avangin emaw, miin ralthuam chelek duh lohna chhan tha tak a neih chuan indonaa an tel loh phalsakna dan an nei a. Chutiang mi chuconscientious objector an vuah a. Tun hma chuan an ral do duh loh aiah pawisa te pawh an chawitir thin. Doss-a pawh hi sipaia tang tho siin ralthuam chelek loh an phalsaka nih chu.]



Silai duh lo sipai:
Chu dinhmun erawh chuan a sipai tanpui dangte lakah a tlaktlum lohtir nasa hle thung. Sipai chemte takngial pawh a pai duh loh avang chuan elsên a hlawh nasa khawp mai. A thiante chuan kut thak hnawih nan an hmang fo a, Sergeant pakhat chuan silai keng tura a thupek a zawm duh loh avangin court martial-tir a tum hial a, an officer pakhat pawhin a pawl atanga sawn chhuah a tumna a hlawhtlin loh avangin rilru kim lo anga chhuaha bântir a tum hial a ni. Tharum thawh a hnualsuatna chu a dawihzep vangah puhsakin an training chhung zawngin deusawh leh kutthlak a tuar a. Chutiang zawng zawng chu tuar chhuakin medic ni turin a training chu a zo a, ral beihna hmunah a dawihzep lohzia chu a takin a lantir ta thung a: Silai tinzawnna phen atanga hmelma hmachhawnchu mi tu pawhin an thei mahna, hliam tuamna leh damdawi bawm chauh nena hmachhawn erawh mi huaisen tawpkhawk tan bak thil tih chi va ni suh.



Râl kâp lovin râl ramah:

Kum 1944-ah chuan Pacific tuipuia Guam thliarkar, Japan sipaite kuta awm la let tura beihnaah chuan an pawl chu an tel ve ta a. Fur khawchhe hnuaiah, khup chen chen diak dai ngai karah hmelma silaimu leng vel leh mortar puak dum dum karah chuan an pawl zinga hliam tuar enkawl lehhmun him lama senghawiin mahni sahimna pawh ngaihtuah lovin Desmond Doss chu a hmanhlel a. A telna tura an tih lem loh sipai patrol te pawh ama duhthua zui zelin vawi tamtak a feh chhuak a ni. Heta a hnathawh that avang hian huaisen chawimawina, Bronze Star Medal chu pek a ni ta nghe nghe.

Guam atang hian New Caledonia-ah rei vak lo an chawlh hahdam hnuin December thlaah Philipines thliarkar pakhat,Leyte-ah chuan sawn an ni a. Hetah hian Doss chu hlãng zawntu (stretcher bearer)-ah a tang ve thung a. Bronze Star pek nawn tlak khawpin a che pâ lehpek. Japan sipai machine gun pahnihin a dan chép, sipai hliam tuar pahnih chhanchhuah tumin inphên tur awm mumal lohna mual zawlah yard za vel zet a tlan hnuin him pialin sipaite awmna chu a thleng a. Pakhat zawk chu a lo thi hman hlauh mai. A la dam zawk chu engtin tin emaw chirdiak ke rêk pil hmawk hmawka dai chung chuan ngaw karah a bikbopui thei hram a. Mau hmanga hlâng siam chawpin Japan sipaiten an veh reng karah chu sipai hliam chu hmun him lamah a hnûk thleng zak a ni. He a thil tih huaisenthlak tak avang hian a vawi hnihna atan Bronze Star hlan leh a ni.

Hacksaw Ridge:
A kum leh, 1945 April leh May thla chhunga Okinawa thliarkar indonaa a chet dan huaisenthlak tak mai chu American sipai chanchina Desmond Doss hming dai tawh lo tura chuantirtu tur chu a ni. An pawl, B Company chu Japan sipai tanhmun tha zet mai, feet 400-a sang tlang pawng, Maeda Escarpment beihnaah chuan an tel ve a. Hetlangah hian Japan sipaite chu tawmkûk tha tak takah ralthuam tha tak nen an inkulh nghet hle mai a. He tlang chhip, American sipaiten ‘Hacksaw Ridge’ ti-a an koh bawkhan bei tur hian kham ko feet 40 zeta sang chu an lawn chhuah a ngai a ni. Vawi engemaw zat an beih hnu pawhin hma an sawn hleithei lo a. April ni 30 zanah chuan B Company sipai thenkhat khama an lawn kai chho leh chu hmelma puakrang silaiin an lo hawl darh ta er er mai a. Anni chhan tur hian Doss bawk a rawn che leh ta. Bawkvakin a thiante hliam tuar mi pali, hmelma machine gun bunna atanga feet 15 leka hnaia tlute chu a mal malin hmun him lamah a va hnûk let ta vek a ni.Chumi hnu ni li-ah chuan 1st Battalion chu a siruk lain an thawk chhuak leh ta a. An la che fuh ta chuang lo. Japan sipaiho chuan ruang chaicheh thlakin an lo kah rawn chiam mai a. American sipaite chu thi leh hliam an thal nghal phung mai a, loh theih lohin an hnungtawlh leh ta rih a. Silai leh mortar khu a han reh fel chuan chu tlang chhipah chuan American sipai pakhat chiah him damin a lo la chambang a. Desmond Doss chuan an thian hliam tuarte chu tlansan a tum ve hlek lo mai.

Hmun him lam atanga a thianten an theih ang anga an lo venna hnuaiah chuan Doss chuan an pawl sipai hliam tuara tlute chu amah chauh chuan a bawihsawm tan ta a. Hmelma silaimu karah chuan darkar nga chhung zet bawkvak kualin sipai hliam tuarte chu kham ko bulah a hnuk thleng a, hruizen hmangin khamah chuan midang lo bawihsawm turin a khai thla zel a. Hemi tuma hliam tuar thi mai tur a chhanchhuah zat hi official record-ah chuan mi 75 tih a ni a. Sawi dan pakhatah chuan, a tirah chuan mi100 angin chhinchhiah a ni a, mi inngaitlawm tak Doss chuan ‘sawmnga lo liam an ni lo ang e,’ a tih tlat avangin 75-ah hian an ziak tlem ta ringawt a ni an ti nghe nghe a ni.

May ni 2-ah chuan an tanhmun atanga yard 200-a hlaa hliam tuar pakhat chu hmelma silaimu leh mortar karah thawkchhuakin a va chhanchhuak leh a. May ni 5-ah pawhinkah bur burna karah leh hmelma laipuimu tla puak dup dup karah an pawl laipuipu officer hliam tuar chu enkawlin hmun himah a senghawi leh a. Hemi ni tlai lamah hian hmelma tanhmun atanga feet 25 leka hnaia American sipaian kahthluk chu bawkvaka va panin silaimu thlawk fua fua reng karah hmun him lamah a senghawi leh bawk.

May ni 21 zana hmun pakhat an beihnaah chuan hmelma beih letna laka an tawmim laiin sipai dang pahnih nena an tawmna khurah chuan grenade an rawn vawm lut a, a kea pet chhuah a tum laiin a puak ta hlauh mai. A keah chuan hliam na tak a tuar ta a. Nimahsela, medic dang ko buai duh lovin amahin a hliam chu a inenkawl a, hlâng zawntu an lo thlen hun nghakin darkar nga zet a lo inbawihsawm a ni. Hmun him lam pana an zâwn mek laiin hmelma tank beih an tâwk leh rih a; chutih lai chuan Doss chuan amah aia hliam tuar nasa zawk a va hmu fuh leh hlauh mai a, hlãng atang chuan a tawlh thla a, hliam tuar nasa zawk chu buaipui hmasa turin a hrilh a. Amah chu sipai dangin lo tanpuiin hmun him lama insasengpui a tum mek lai chuan sniper silaimu a lo dawng leh hman a, a ban veilam ruh chua tliak hmawk mai. A ban tliak pawh chu amahin silai kawm nen a cher khawng a, yard 300-a hlaa hliam enkawlna hmun chu amahin a vak thleng ta thak a ni.

Okinawa hmuna indonaah hian Desmond Doss hian tum li ngawt hliam a tuar a. May ni 21, 1945 khan sipai lawng, USS Mercy hmangin indona hmun atanga lakchhuah a ni ta a ni.A hun hnuhnung:Desmond Doss hian Leyte-a an awm lai khan TB a kai hlauh mai a, indo zawh hnuah kum nga chuang zet enkawl zui a ni a. A chuap khing leh nak ruh panga zet paih a ngaih phah a. Damdawi pek sual vangin a beng a ngawng zui bawk. Indo tantirh lam, 1942-a a neih a nupui Dorothy Shutte chu kum 1991 khan a thi a; nupui dang, Frances Duman chu 1993 khan a nei leh. Thawk harsatna a neih avanga damdawi ina hruai a nih hnuah March ni 23, 2006 khan Piedmont, Alabama-ah a thi ta a. A ruang chu sakawrtawlailira phurin chung lamah sipai helicopter ten an vil bawk a, National Cemetery, Chattanooga, Tennessee-ah April ni 3, 2006 khan ropui taka vui liam a ni ta.


Medal of Honor:

Desmond Doss kha ralthuam chelek duh lo, hmelma sipai laka kut lek miah lo a ni chungin hmelma lakah zam lo leh chhel takin, a hna chu a tih tura tuk/beisei chin pel rawkin (beyond call of duty) huaisenna tawpkhawk lantirin a hlen chhuak a ni. Chu a huaisenna leh ram tana a inpekna ropui tak avang chuan US President Harry S. Truman hnen atangin Congressional Medal of Honor chu kum 1945 October ni 12 khan a dawng ta a. Hmelma sipai laka ralthuam lek duh lo, ‘conscientious objector’ zinga he chawimawina dawng hmasa ber a ni a. Amah anga ralthuam lek duh lo, Medal of Honor dawng hi midang pahnih chiah an awm a; Vietnam indo laia sipai medic ve tho, Thomas W. Bennet leh Joseph G. LaPointe te an ni. Anni pahnih phei hi chu indona hmunah râl hmatawngah an thi nghe nghe a ni.Nikum, 2016 kum tawp lamah khan Desmond Doss chanchin behchhan lemchan ‘Hacksaw Ridge’ tih film chu tihchhuah a ni a. He movie Director hi Mel Gibson niin Doss lemah hian Andrew Garfield a chang a ni.

[Source: Wikipedia, Badass of the Week.]

Aside | Posted on by | Tagged , , , | Leave a comment

RALTHUAM THA LEH ZEI – “THE DRONES-PREDATOR”(MQ-1 Predator unmanned aircraft an tih bawk chu) -Ct Lalrinawma

  • Ralthuam changkang Drone
  • Drone hmanga ralbeihna
  • USA in ralthuam a chher
Kum zabi-20na inher liamin kum zabi-21na, kum sangbi thar (new millennium) alo in her chhuah meuh chuan khawvel hi a danglam nasa in, mihringte rilru suk thlek a danglam na sa em! Indona hmanrua atana hman thin- silai, fei, chem, hrei pui leh sakawr thlengin a danglam ta. Scientist ten Robot tualthat thei, indona hmuna hman tur an duan mek te chuan Human Rights mit a tikhamin, sawisel a hlawh. Global Cop-America pawhin he kum sangbi tharah chuan indona hmanrua a nei changkangin, mi ram dai leh pal su kher lovin, robot thlawk thei hmangin a duh duh ram ami a kaphlum ta fo mai! Ralthuam changkang, tha leh zei (smart weapon) chu a ni chiang. Thiamna a sang ta hle.

Tunlaia US sipaite hmanrua changkang tak, U.S leh khawvel tana terrorist mi hlauhawmte kahhlum nana a hmanrua-sawiselhlawh tak chu ‘DRONE’ tia koh niin, kum 10 kaltaah khan Pentagon pawhi 50 bak a nei lo; tunah Drone thlawhna hi 7,500 a nei. He drone thlawhna hmang hian mi firfiakte chu an tawmbona hmun leh ramah ava kaphlum mai zel a. Hei hian sawisel, dem a hlawhin CIA Director atana lakluh thar, U.S counter-terrorism hotupa thin John Brennan pawhin sawisel a hlawh phah. Drone thlawhna hi pilot ngai lova thunun, duh lai chu fuh taka kap chat thei hmanrua a ni. Internet i hman chuan i taksa leh hriatna chuan i rilru a tizau (expands) ang. Net chuan kan rilru leh ngihtuahna khawvel hmun dangah hruai daihin hmun danga awm ve angah a dah thei; drones erawh chuan kan taksa ngei chu a hmunah a va awm tir ang hi a ni. Kum 20 chhung lekin 3-D printing lo chhuakin, technology lamah inthlak danglamna nasa tak alo awm a. He kum Sangbi thar, kum Zabi-21na hian hmasawnna a thlen rualin, chhiatna nasa zawk pawh a thlen ngei ang.

A bikin U.S military ah danglamna a siam nasa. Tunah chuan ramhnuai pilril leh thlaler ramro a thlan chhuak leh vangvat kaia chau tak leh fimkhur taka an hmelmate Zawhte Sazu veh ang taka veh them them a ngai ta lo. Drones (Predator) thlawhna hmangin a duhte chu a va that tawh mai thin a ni. Drones hi U.S military te chuan Air Force’s fleet leh aircraft-ah, hmun thuma thena hmun khatah an vuah deuh vek tawh a ni.

Nikum 2012 chhungin Afghanistanah drones hmangin hmelma te vawi 447 an bei a; kum 2011 aiin vawi 294 zetin an hmang tangkai. White House pawh Black house tih hiala siam thei President Barack Obama’n office a luah tan atangin U.S military te chuan Pakistan-ah indona puang lo mahse, drones hmangin hel 300 chuang an kaphlum. Kumin 2013 ah pawh Pakistan ah vawi 5 drones hmangin, Yemen ramah vawi 8 an hmang tawh bawk.

US venhimna hmunpui Pentagon chuan Drone Base hi Africa hmar thlangah siam tumin, Muslim firfiakte leh helho-al Qaida nena inzawmte beih zel a tum.

Indo lawng lian leh thlawhnate’n cruise-missile hmanga an kah tum target kah nan darkar an hman laiin, drones/predator erawh chuan intelligence thuthawn a dawn rual rualin a tum a kap nghal thei a, hei hian chhiatna leh midang tam zawk thihna a thlen tlem zawk avangin- drones hman zel hi US chuan a duhin tha a ti. “The Robotics Revolution and Conflict in the 21st Century” tih ziaktu Peter Singer chuan “Drones hian tactic atanga thurin thlengin, he kum zabi 21na hi a thlak danglam a ni” a ti. Indona chuan a tih danglam mek laiin, drones chuan remna siam turin a tidanglam mek bawk. Helte leh an hotute tan pawh drones hmanga kahhlum an awlsam dawn avangin, ‘tlanbona reng reng a lo’ tih mai a awl hle dawn niin a lang. Kum kalta khan President Obama chuan ‘mihring khalh ngailo lirthei (unmanned aerial vehicles) duang turin thupek a siam a, drones erawh boruaka hman chi. Africa rama a ruka Samak leh Sai that thinte veh nan pawh drones thlawhna hi hman tum mek a ni.

Drones hmu chhuak turin kum 100 zet a her liam. 1898 ah Nikola Tesla chuan remote-controlled hmanga lawng tih kal dan a hmu chhuak a. Indopui -Ina laiin US chuan mihring khalh ngailo thlawhna a siam chhuak a, mahse, indona hmunah tirh a ni lo. Indopui-II hun laiin company pakhat Radioplane chuan, drones ang chi siam tumin an bei a; chu hmunah chuan Marilyn Monroe pawhin hna alo thawk tawh a ni.

1944-ah Navy’s Project Anvil chuan B-24 Liberators an tih chu U.K atanga thlawh chhuah tirin mihring thunun a ni a, bombs chak tak phurin Germany-ah him nana pilot chu parachute hmanga zuangthla tur a nih laiin, program a hlawhchham avangin a hnua US President ni thei tur unaupa Joseph Kennedy chuan a thih phah, B-52 chu a hun hmaa a puahdarh avangin. Vietnam War ah US chuan drones thlawhna hi hmelmate che vel enthlakna hmanrua (reconnaissance) atan a hmang a, mahse, kum 2001 hma kha chuan “Drone Age” hi alo in hre chhuak tak tak lo.

Afghanistan indo tan kum 2001-a lei lama US military te chet zan atang erawh chuan drones-Predatorhi indona hmanraw pawimawh tak a ni chho ta. Afghanistan indonaa hman hmasak ber Predator (no. 3034) chu National Air and Space Musuem, Washington ah an dah tha. Drones-Predatorhmanrua hman zel leh hman dan turah ngaihdan insual a nasa hle a ni.

Washington based- The New America Foundation pawl chuan, US sipaiten Predator hmangin al-Qaida leh Taliban hel hruaitu pawimawh (high value) mi 50 zet an that, a hlawhtlin thlak, tiin an fak. Nikum 2012 khan President Obama chuan “Hetiang drones/predators hmanga ral beihna hian civil mite thihna a tih tlem bakah, America tihnat tumtute awmze nei taka beihna a ni” a ti. U.K based The Bureau of Investigative Journalism chuan, 2004-ah CIA ten Pakistan ah ringawt mi 2,629 – 3,461 an that a, an zinga 475-891 chu civil mi an ni, a ti. The New America Foundation chuan Bureau of Investigative Journalism thusawi hi an sawi uar mah mah tiin, mi 1,953 – 3279 an ni a, civil thi pawh 261 atanga 305 inkar chauha ni, an ti thung. CIA erawh chuan engmah an sawi duh lo. US Counter-terrorism chief (tuna CIA Director thar) chuan, drones-predators hmanga mi thah hi international law leh ram chhungah, 2001-a dan siam hnuaiah, Sept 11 a US beitute beih let nan a thiang (legal) a ni, a ti. Kumin Jan 24 khan UN chuan US-in drones hmanga mi a thahna hi sawiselin, civil mite thihna a thlen nasa , a ti.

Drone/Predator thlawhna enkawltu- Air Force drones pilot te chuan an tawm kuk hmun him (bunker) air-conditioned ah awmin, zantin an chhungte an kawm thei mahse, 30% chuan harsatna engemaw (burnout) tawkin, 17% in awm nawmlohna, mawlh riautu (stressed) an tawk thin, an ti.

He Kum zabi 21na hian indona lamah pawh hmasawna leh changkang a va hring nasa em!
source: Time/ The Cambodia Daily

Author :

Aside | Posted on by | Tagged , | Leave a comment

KAN NU!

  • Jona nupui chu.
  • Tawnsabawp nuthai
  • Hei ha hui ha
Kan han tleirawl chhuak a, thiante nen nupui duh zawng kan han sawi khawm chang te kha chuan kan nupui turte chu ‘si’ hlir sawm kha an ni ringawt mai. Han nei thei ngat ila kan nupuite hmel that dan tur chu sawiin a siak lo. Bawhchhe lo zan tin na na na chu Vanram kai mai pawh awl zate tur a ni. Duhthusam kha nei ta vek ila thianpa Chhante-a khan a nei tha ngawt ang. A han sawi tak tak kha chu kan duhthusam pawh kan iai leh rum rum zel.

Tlangval phanchang nih tawh hnu, mahni’n mamawh pawha kan inngaih vak loh laiin mamawh a min hretu thenawm khawveng leh chhungte nawrna vang liau liauvin kan han zawng ve ta poh a. A mak khawp mai nupui hi a zawn a zawn chi pawh a ni lo, a neih a neih chi a lo nih hi! Duhthusam zawn hmuh a lo har em mai.

Thianpa Sawma te ho lahin bilbawlawk ve te te an han nei a, a eng-ahmain kum inrual reng si kha min han intih upat san nghal pang a. Tlangval laia mahni hnungzang nuai phareng khan nupui neih hnu chuan an ban pha ta lo va. ‘I mamawh’ min tih teh fo avang chuan mamawh thar ve ta riauah ka inngai chho ve ta deuh a. Mahse, buaina pakhat a la awm tlats! neih mai tur zawk hi an vang a ni. Nitin naupiang tam tak zingah ‘ka fa’ tih tur pakhat mah awm ngai lo chu khuanu min siam dan a nih pawh ka ring ta nek lo ve.

Mangan tawpah chhung ten, ‘a ni hi a fel, a tuan a tha a, a nungchang pawh a tha’ an tih ngei chu thian ten ka hriat loh hlanin min lo ruk sak chu niin ka leng lai min ko haw a, ka nupui tur chu ka room-ah chuan a lo thu thim map mai a, a han em avangin zan thimah chuan a meng tle kiau reuh a. Chheiraw! Ka va bawh chhe nasa dawn si ve! Duhthusam nen chuan a va inpersan ta si em. Mahse, dah let leh chi ni tawh hek suh a nuam leh a hrehawmah pawh ka nupui a lo ni dawn ta a nih chu.

Zanah chuan inlêng an tin a, kan han mu dun tur chu keini ang fan ngai loh ram la nei tan chuan a huphurh awm ngang mai. A ni pawh huphurh tih hriat takin a mu kawm ngal mai a. Mite ngum lang hi chu a var deuh sar a ni ngai a, kan nu ngum erawh a thim mup mai a, a hang chu thuhran a la tle tel kher chu ngaihthiam a harsa a ni. A colour fuh vak loin black and white ang tal paw’n lang se a la ngaihthiam theih, black ringawt hi chu a ngaihdam theih thlawt loh a ni. Light ka han off chu amah a lo hang bawk nen hmuh theih hi a ni tawh lo hrim hrim. A thim em avangin Khum ka han dap deuh chuan a hnute ka tawk fuhpalh a, a sa ta phat mai! ‘I va zak lo ve’ a ti ram hmak a. ‘I pasal ka nia lawm’ ka tih pawhin, ‘ka duh lo, ka chhung ten an phal lo’ a ti ta tlat mai si, inruk zanah chuan hnung lam kan inchhawn tluan zak a.

Zan hnih zan thum a liam ta, kan khawsak phung chu ka nu leh pa te tan pawh hriatthiam har tak a ni. Thal thlah loh zan tin mai chu ka pa lah chuan, ‘ka fapa hi a pa vak lo a ni ang a’ ti a ka nu hnena a phun ru sep thin chu ka hre zeuh zeuh, mahse, ka nupui berin duh miau hek lo le. A sawi dan chuan, ‘ka nu leh pa ten pasal i neih hma chu tumah mipat hmeichhiatna hman pui suh min ti’ a ti deuh tlat. Kan inru tawh a lawm tih pawn, ‘kan la innei tha lo a lawm’ a ti tlat si a. Amah a hang bawk nen khua hi avar mawlh lo a ni.

Ka pa beidawng chuan thil chinchang min zawt ta ringawt a, ka han sawi fiah takah chuan, ‘kan haw tir leh mai dawn em ni ang’ a ti ta ngawt a. Mi mah nupui nei intih ve tawh nak alaiin eng em ti lo mah ila malpui pali lo chu kawpkim dawn lo riauvin ka hria, mahse, a ngaihna a awm hlawl lo, kan haw tir ta ringawt a.

Ka nupui a haw takah chuan khua a har ve vung vung tho mai. Ani pawh a haw ta kha a chhung ten a ni meuhin pasal a hmu chu an lawm teh reng nen an hrilhhai khawp mai a, thil awmzia an han zawt chu an thu a lo awih lutuk vang chu lo niin an mangang leh ta si a, ‘pasal neih tawh te chuan tih a pawi tawh hleinem, va haw leh rawh’ tiin an lo hau liam liam a.

Sunday zingah chuan chaw ei hmain chhung inkhawm hunkan hmang a, ka pain thu a sawi lai chuan Kawngka chu a lo inhawng riai riai a, rin loh deuhin kan nu chu Kawngkapuiah chuan a lo dak heu mai! Kawngka biang ngheng ar ar pahin ti hian a au lauh lauh a.
‘AN PHAL TÁWH’ (A tawp hi thluk fân-sân raih tur a ni).

Khatia a ni berin AN PHAL TAWH a lo tih hnu kha chuan ka chhungte paw’n “an phal tawh chuan harsatna tur a awm tawh loh chu, ti khan hlim takin awm dun tawh rawh u” an ti ta ringawt a. Keipawh chu lawm avangin lehlam hawiin ka vei nuih suk a, ka hadar vuah a la thlawn zui. Zan kan mu chu kan lai ve deuh te pawh a ni mahna ngam leh ngam lova ka han chul kual chu ‘Kha kha chu ka zunna’ a lo ti nulh a.

Ni khat chu kan nu damlo sa rawp si chu kan khawbul Luiteah Chakai ka khawrh sak a, a lo vang phian lehnghal a, thli leh ruahin min lo nuai bawk si nen ka thim lut titih a. Ruah ka do avangin ka hritlang dawn ngei tih ka hrethiam mai. Hetiang hritlang tirah chuan Zu lum pip pep in a tha an tih chu ka hre ve tawh thin.

Zan chaw ei khamah chuan veng mawng hmeithai zu zuar in lam chu ka pan nghal a. Khua a la chhe deuh bawk si, current a awm bawk si lo nen a thim nasa mai si a hahmai lei chek tauhin ka tlu pek a, ka hadar lah a lo per chhuak lehdaih si nen a tuk khaw eng a zawn atan ka hnutchhiah ta ringawt a.

Hmeithaiin bulah chuan inhau thawm ri bawrh bawrh ka hriat avangin bang awng atang chuan ka va bih a, nuthlawi Saihlupuii; a pasal hnuhnung sual ve êm avanga intlan tight ve deuh reng thin chu a chhung te chuan, “Roenga hi a sual si, Zu a heh bawk si then hmak la, nei tawh lo mai rawh” tiin an lo zilh malh malh a. Saihlupuii lah chuan,”Ka nu, ka pa, ka then thei tak tak lo, ka hmangaih êm a ni” tiin a lo chhang ve bawk a, chu veleh ka piah deuh thim lai atang chuan amah Roenga ngei mai chuan, “Saihlupui, i tanna ngaiah khan tang tlat rawh” a lo ti lung lung a, a tlu khut a, a chatthla nghal der a.

Hmeithaiin chu ka thleng ta ngei a, Zu chhuan hlim la lum vat vat a awm loh avangin No-ah ka thli a, meiah chuan ka hem lum a, ka tlak pap pap a. Ka in tam ta deuh bawk nen zu lum a lo ni bawk nen ka kai tan ta khawp mai, kan titi chho a ka haw dawn meuh chuan zanlai a lo ni tep tawh a, mu leh mal pawh nei lo, tluk leh ding-awn chungin kan In chu ka 4wheel thleng thei hram a. Mu leh mal nei tawh hek lo i ka thuamhnaw ka hlih leh hlih loh pawh ka hrechiang lo.

Kan nu, a han em avanga pangti lum ngah tak kiangah chuan ka inthawlh ve ta nghal a, hapui thial rup rup pahin min lo kuah ve surh surh a, harh chiang lo ve ve ta chu chetpawh kan che peih teuh lo mai, keipawh chu ka chatthla fel chu a ni nghal ringawt a.

Ka chhipsama min phih dawrh chu chiang vak loin ka hria, min rek nghal nawk nawk chuan min ti harh chiang deuh a, mahse, ka la vai ruai tho a. Current a awm si lo, khua a chhiat avangin Inchhung lah chu a thim chhah mup mai bawk si, patling aw chuan, “Ka nupui te lo zen i tum vel maw? Ka sat dawn che” tiin min rek chhuak nawk nawk a, kan chempui dahna lamah chuan min nam kat dawr dawr a, Chempui a chuh ngei dawna ka hriat avang chuan ka bula tukverh awm chu ka hawng rawp a ka zuang chhuak nghal a, ka zuan chhuahnaah chuan ‘misual’ ti a au tuarh tuarh chungin a lo zuang chhuak ve nghal.

Ka tlanchhiatna lamah chuan ka harh chiang a thuamhnaw inbel map lovin ka lo tlan then nelh nelh tih ka inhrechhuak a, engvanga tlanchhia nge ka nih erawh inngaihtuahna hman a awm lo, ka hnung lawkah chuan min lo um tawh si, kan thawmah midang lo harhin min um rawn a ni ta ber a. A thim em avang chuan kawng hmu tha thei tawh hek lo khuarah ka tlu bawk thlawrh a, min lo nangching a, min lo bawh nghal a, eng emawni thil nem deuh nuak chuan min do pelh relh a. Midang lo thlengin torch light êng a min lo chhun chuan an é dual a, ka pa lah chuan Adama suit-in, Chempui hum chungin ka mawng bawrah chuan min bawh rân mai bawk a. Mipat mipatna hman tum te pawh kan ang hial awm e.

Thil awmzia kan han sawi chiang a, khatia ka rui haw lutuk kha kan room-ah emaw ka luh tiin ka pate room-ah zawk ka lo lut a, kan nu bulah emaw ka inthawlh ka tih kha ka nu bulah zawk ka lo mu kûk chu niin, ka pa damlo men pui lo haw chu nupuite mamawh ration thlak turin a silhfen hlipin lo inthawlh ve a lo tum a, chutia mahni nupuite kianga lo mut khalh ta kuk chu zen tum emaw min lo ti a, kan lo inum then nelh nelh chu a lo ni a, nuih a za duh lo ngei mai.

Nupui te lo neih ve takah chuan a chawmna tur tapchhaka zawn ang kha a lo ni ringawt lova, kan nu hi hmelah malsawmna dawng tam lo mahse hnathawh lamah erawh a chhawr tlak phian a, han ti thinrim ila, chumi khami chu tisuh han ti ila tirawh tih ngai miah lova hma hmiah hmiah chi a lo ni bawk nen a zia phian mai. Englo thên tur nei ve lo mah se Sumdawn lam hi a thên ve na lam a lo ni bawk a eng eng emaw nepnawi zuar kualin dawrte kan siam sak a, a hmingah ‘NEPNAWI NGAWR NGAWR SHOW ROOM’ ka vuah sak a, saptawng a tel ve hrim hrim avang chuan a lawm ve khawp mai.

Kei erawhin ka naupan lai atanga ka lo chak em em tawh angin fanaute neiin han leikang deuh se Motor ka la zui san daih ang tih hi ka rilrua lian ber a la ni reng mai!!

Author : Jona Fanai Jr.

Aside | Posted on by | Tagged , | Leave a comment

Court-in a koh kal theih loh avangin PRISM President leh General Secretary te Police-in man

Vawiin khan PRISM President Pu Vanlalruata leh General Secretary Pu RL Liantluanga te Police ten manin, Bail-a chhuah leh nghal an ni.

PRISM hruaitu 2 te hi court a inlan loh vanga man an ni a, Kau Tlabung thubuai chungchangah an lungawiloh avangin Court thawhpui tawh loh an rel a, hei vang hian nikum December a court a kal tura kohin an kal lo a. Feb 16a court a hruai turin special judge Lucy Lalrintharin Aizawl P/S hnenah thu pein man an ni ta a ni.

PRISM hruaitute hi tunkar Ningani-ah Special Court (Prevention of Corruption Act)-ah inlan tura tih an ni.

PRISM chuan thuchhuah siamin, an pawl hmalakna hrang hrang avanga eiru chhuichhuah tawh mi 300 zingah mi pakhat chiah lungin ah khung a la ni a, a tam ber chu sorkarin an thlavang a hauh thin zawk a ni tih an sawi a .Corruption Case hrang hranga Court-a prosecution witness-a an din thinnaa eiru te hrem an ni thei lo leh an zalen zel mai hi Prism chuan a hrethiam zozai tawh lo a. Chuvang chuan nikum November an President Pu Vanlal Ruata chuan, beiseina sang tak nen sorkar leh Court in mipui chhana ram hmelma te chunga dik taka hma a lak hun kum 10 pumhlum thak an thlir tawh a, an la hmu lo tih sawiin. Tunah chuan ram hmelma eiruk hmangte thiltih hi, mipui court-ah, mipuiin dik leh diklo an thliar turin an thlen tawh zawk rih dawn a ni,” a ti a ni.

PRISM thuchhuah chuan Eiru man ngam si lova an pawl President leh General Secretary man an ni chu an lungawilo tih sawiin, an kal zel dan tur an ngaihtuah zui dawn tih an sawi a ni.

Aside | Posted on by | Tagged , , , | Leave a comment

Aizawl City College Joint Students’ Union-in NIAS Kolkata-a an zirlaipuite thlavang hauhin sorkar nawr zel dawn

Aizawl City College Joint Students’ Union (ACCJSU) chuanSorkarin zirlaite a ngai pawimawh tawk lo hle ni a sawiin NIAS Kolkata-a an zirlaipuite thlavang hauhin sorkar chu na zawkin an nawr zel dawn tih an sawi.

ACCJSU huaihawt hian vawiin khan college zirlai thahnem tak in NIAS Kolkata-a zirlai harsatna tawka au chhuak te thlavang hauhin kawng an zawh a, kawngzawhte hian hmun hnih – Sikulpuikawn leh Chanmari atanga zawh tanin Vanapa Hall kawtah an intawkkhawm a, an kawngzawhnaah hian ‘Zirlai diriam ching sorkar an duh lohthu te, Mizo zirlaite’n an dikna chanvo chan an duh thu te, an zirlaipui harsatna tawk mekte ngiahsak tura sorkar an phut thu te, zirna In hriat chianloha sorkarin zirlai a tir an duh loh thu te, zirlai awm tha duh lo anga zirlaite puhtu sorkar an dem thu te an auchhuahpui a ni.

Vanapa Hall kawtah ACCJSU President Zorinsanga’n zirlaite thlavang hauha kawngzawh an ni a, kawngzawhtute resolution siam chuan sorkar a koh eih ngei a beisei thu leh a ko eih zo lo anih chuan hma an lak zel tur thu te a sawi a ni.An resolutionah chuan, Mizoram sorkar-in zirchianna mumal awm lova Mizo zirlaite hriatchian loh zirna Ina a tir chu pawi an tih htu leh tun hnuah hetiang hi thleng tawh lo se an duh thu an tarlang a. Mizo zirlaiten Mizoram sorkar tihsual vanga harsatna leh buaina an tawh mek laia sorkar hotuten diriam taka tawngkam an cheh khum chu an rilru nat thu leh sorkar hotute chu ngaihdam zil tura an phut thu te, an zirlaipui exam duhte sorkarin an exam ngei theih nan hma la se, an exam thei lo emaw . certificate lem an dawngemaw a nih chuan Mizoram sorkarin a thil tih sualah mawhphurhna lain an harsatna enpui zui se an duh thu te, tun hnu zelah zirlaite hmakhua tur ngaihtuah bawk se an ti a. Mizoram sorkarin NIAS-a an zirlaipui a tirh harsatna tawk ten sum tam tak leh an hun hlu tak an senral rulh let nan sorkarin zangnadawmna pe ngei tura an phut thu te an tarlang bawk.

Kawng an zawh hnuah sorkar dawr turin ACCJSU hruaitute an kal a, mahse an beisei anga thil a thlen tak loh avangin ACCJSU chuan thutkhawm hmanhmawh a ko nghal a. Sorkarin zirlaite a en dan chu na an ti a, Mizo zirlaite a ngai pawimawh tawk lo hle nia an hriat thu an sawi a. Hei vang hian vawiina an resolution pass tak tihlawhtling turin ACCJSU chuan a tul anga hmalak chhunzawm zel nise an ti a, naktuk zing dar 9 atangin ACCJSU member zawng zawng te’n Chief Minister bangla kawtah Sitting Demonstration neih ni se, tlai dar 2 thleng sorkar thu ngaichangin, hun tiam chhunga an thil phutte tihhlawhtlinsak an nih loh chuan naktip Nilainiah Aizawl khawpui chhungah tiamchin awm lo Total Band huaihawt ni se, an ti.

Aside | Posted on by | Tagged , , | Leave a comment

Forensic Files: Sex, Lies and DNA

  • Forensic hmanga tualthattu chhuina
  • Thisen awm leh awm loh enna
Forensic Files: Sex, Lies and DNA.
Earl Moris-a chu California-ah chawlh hmangin a thangbo lai mek a ni a. Chuti lai chuan rin lo deuh maiin Arizona-a an In lam phone call atangin a nupui bo thu a dawng ta tlat mai.
“Engtin maw?”,
” Ka nu a bo”,
“Eng thil nge thleng?”,”Ka lo haw nghal e” tih chu an inbiakna a ni. Hmanhmawh taka In lam pana a haw vat a ngai ta. A nupui, Ruby Moris-i, bozawnna kawngah chuan Police hnuchhuithiam tam tham zet, Forensic Scientist te, DNA Testing mai bakah Coast Guard te pawh an inrawlh hial a. Chu an hnuchhuina atanga an thil hmuhchhuah chuan tu mai pawh , a bik takin Earl Moris -a tiamin, a barakhaih chiang hle.

Ruby-i leh Earl Moris-a te chu sumdawnna ah inkawpin nupa an nih thleng pawhin an inkawp chho ta zel a. Kum 20 chuang inneih tawhin fa puitling thiau tawh pathum te nu leh pa an ni mek a ni. Heng Moris te nupa hi Accountant ve ve nihin an nupa chuan an pual bikin Accounting leh Tax Preparation Firm an enkawl dun a. Engmah lo mai atanga bul tanin kum tam tak chhung an enkawl dun a, an hlawhtling ta. An sumdawnna hlawk tak chuan Millionaire nupaah a chhuah ta hial a. An fa te pathum chu Phoenix khawpawn deuh tlanga In ropui nuam takah an chawi lian a ni.

June 4.1989 khan Earl Moris-a chu an fanu upa ber Donna Kay-i concert-naa a zai en turin California lam a pan a. An fanu hi Country Singer nihin hmabak eng tak nei lai a ni. Ruby-i thung chuan a pasal ruala kal ve lo turin thutlukna a siam a. A chhan pawh a fanu pakhat zawk Cindy-i nen Cindy-i In thara hman a tan Furniture vel lo leipui a tum a ni.

Mahse, Pi Ruby-i chu sunday tukah bazar tura an ruahmanna niah chuan Cindy-i te Inah chuan a lo lang ta tlat lo mai. Tichuan Cindy -i chu a nu leh pa te In lam pan chuan a inkhalh chhuak ta ngawt a.

Cindy-i chuan chutianga han thulh leh vel chu a nu tihdan phung a nih loh thu sawiin Pi Ruby chuan Cyndi-i chu phone-a biaa an thil ruahman te a thulh thu a hrilh hmasa a nih lo chuan bawhpelh miah lovin an intiamna ni a vawng thlap thlap kha a ni ngai a. A hman leh lo tur thu pawh a sawi si lo. Cindy-in a nu leh pa te In a va thlen chuan Ruby Morris-i chu Inah a lo awm hauh lo. Burglar Alarm lah tihnun lovin alo awm a. Ruby-i pocket book pawh a lo awm lo bawk. A car erawh a lo awm a. Mahse an dahna thinah chuan a lo awm lo thung.

Ruby Morris-i kha nu chengvawng leh chekngel, che fel thlipthlep mi a ni a. A fanu chuan thil vel awmdan chu a diklo vel vek a ni tih a hmuthiam nghal thuai a. Tui herhhawna dawt (faucet) atang chuan bualthlengah (bathtub) tui a far keuh keuh a. Thawmhnaw bal te lah chu insukna khawlah vawmluh nuaih an ni a. Mahse, suk an la ni si lo. Chhuatphah tihfaina shampoo chu hnutchhiahin a awm bawk a. An thil hmuhchhuah zinga ti luhai tu ber tu chu .22 pistol, thawmhnaw dahna a an dah fo thin, chu a lo bo daih mai. Cyndi Morris-i chuan Police te chu a phone-in thil awm dan chu a hrilh ta nghal vat a.

Sergeant Lee Luginbulh, Maricopa County Sheriff a mi chuan mi thenkhat ang thoin he mibo pawh hi darkar tlemte hnuin an hmu ve leh thuai a beisei a ni.Earl Morris-an a nupui bo thu a hriat ve leh chuan a chhungte biain California atanga ding taka In lam a pan nghal tur thu a hrilh a. Police te chuan Cyndi-i rin dan chu a dik ngaia a nu chungah eng thil pawi hai emaw a thleng a nih ngai chuan a awmna chin hriat theihna tura han chhuidawn thei tur thil eng emaw chu inchhung atangin an hmuh ngei an beisei a ni. Earl Morris-a chu California atanga an In a thlen hun awm ang tura an beisei aia rei-ah a lo thleng a. In a lo thlen chuan Police te chuan amah chu be chakin an lo za zek zek tawh a. Detective chuan an nu nen an in bakkaih ngei em tih an han zawt a. Earl Morris-a chuan a nupui nen chuan han inhnial chang te chu awm ve bawk thin mahse an inlaichinna chu tha pangai tak nihin dan pangai bakin an awm lo thu Police te hnenah chuan a hrilh a. He tiang thil sawilawk lo va kal chhuah ti vel hi a nei tawh ngai em tia an han zawh chuan “Aw.. a hma pawhin a ti tawh a lawm, thinrim lai ang te hian. Mahse, dan naranin a lo call leh thin” tihin a chhang a ni. Morris-a chuan an nupaa an neih .22 pistol, a hmuh hnuhnun ber tuma thawmhnaw dahna a an dah, chu a awm lo ngei a ni tih a nemnghet bawk a. Police te chuan thil ni thei tur awm ang chu an ngaituah tel ve vek a. A bo a ni thei ang em? A intihlum a ni thei ang em? Miin an that a ni thei ang em? ti thlengin an ngaihtuah vek ani. Earl Morris sawi dan chuan California atanga a lo haw kawngah a motor chu a chhia a.

In rawn thlen nan Car a hmang hawh niin a sawi a ni. Mahse, Detective Luginbulh chuan Earl Morris-a motor khalh hawh (rental car) hnung lam bawm a han enfiah chuan thil rinhlelhawm hmuh a nei ta tlat mai. A zin thawmhnaw bawmah chuan thlawhna chuan dawna bag vela thilthem an khai thin (Airine luggage tag) lo in vuah vah mai tunhnai lawka San Diego tanga Pheonix thlawhnaa zinna chu a hmu a. Chumi tuma zinte hming chuanna (Passenger List) a han en dan dan chuan Earl Morris a hming a lo chuang ve hauh lo. Mahse, G. Morris tih erawh a hmu thung a.

Police te chuan mi hran hran thlalak an dah khawm zingah Earl-a thlalak tel ve na chu airline crew, tu emaw talin, Earl-a kha thlawhnaah a chuang ngei a ni tih a lo hriat hlauh takin tihin an han hmuhtir ta a. Flight Attendant zingah pakhat chuan a chhawlleng fumfe lo lutuk vangin a lo la chhinchhiah nalh mai le. Chung thil awmdan inmil lo lutuk te avang te chuan Police te chuan an tlawh hmasak tumin tualthahna hnuhma awm hmuhhmaih an nei mial em tihin Pu Earl-a In chu dap nawn leh turin thutlukna an siam ta a. Police te chuan mithiamte chu anmahni tanpui turin an pun a, Luminol hmanga chu In chu enfiah turin an han ngen ta a ni. 《Luminol chu chemical chi khat a ni a; hmun khawi laiah emaw khan an han phuh a. Light thim danglam bikin an han chhun leh a. Thisen a enzymes awm te nen an han intawh chiah khan Luminol chu a lo eng (glow) ta thin a ni). Forensic uisathiam te chuan In neihtu mut pindan atangin an thil zawn chu an han tan ta a, khum lu bang chuLuminol-in an han phuh a. Chulai hmun chu rawng pawl-in a inthlak nghal ta pang mai. Chhum pian zia ang maiin a lo lang kulh a. An hrethiam rang kher mai. Lt Rod Englert chuan, “Ka hmuh phat atang khan kha rawng pawl insemdarh dan te, pianhmang leh thil far len dan te atang khan silai kahna in chak taka a phuh a ni tih ka hrethiam nghal a ni ” tiin a sawi a. Chutiang khum lu a an hmuh ang chi chu silai atanga kah a ni chauhin a awm thei a ni. Vuak leh chemte-a vih chi ang ah te hi chuan thisen per dan ziarang (Blood spatter pattern) danglam daih a ti chhuak thung thin. Awngphah chungah chuan thisen them sin te te an hmu a. Awngphah chhungah pawh thisen an hmu tel bawk. Chu mi zawh chuan Luminol chu bual Inah an han phuh leh ta a. Tui inphuhtirna bawm vel zawng deuh thaw chu a lo eng ta pup mai. Luminol test chuan mutna pindan pawn hual veltu cement chungah leh pindan chhung chhuatphahah te pawh thisen a awm a ni tih a lailang ta bawk. Pindan chhuat, carpet a phah chhuah vek, te chu an lo eng (glow) tan leh ta uar mai. An thil hmuh mek atanga a lan dan chuan chu lai hmunah chuan pawikhawihna a thleng ngei a ni. Thihna a thleng lo a nih pawhin tu emaw chu chu lai hmunah chuan hliam nasa tak a tuar ngei a ni tih a lang bawk. Mahse Detective te chuan chu thisen chu tu hnen atanga lo chhuak nge a ni ti ngaihdan an nei hauh lo . Chu mi hre thei tur chuan thisen kai-ah (bloodstain) chuan DNA test an han ti ta a. Thisen Test Result chuan an vaiin a barakhaih chiang hle. Chu Result chuan chhungkaw thuruk tuihnai lo leh lungchhiatthlak tak mai te a lo phawrh chhuak dawn ta a.

Police te chuan Morris-a te mut pindana thisen an hmuh chu Pi Ruby-i thisen ni ngeiin an hria a. Mahse chu thisen chu Pi Ruby-i thisen nen han khaikhin turin Pi Ruby-i taksa (body) chu a awm si lo. Mahse Science chuan thisen them kai (blood stain) chu DNA Testing hmangin tu thisen nge tih a finfiah thei a ni. Entirnan , Morris-i fate thisen an enfiahin Scientist te chuan chu thisen chu a nu leh pa hnen atang lokal a ni leh ni loh an hre thei a ni dawn a ni.

Naupang DNA Za a 50 (50%) chu nu leh pa pakhat zawk zawk atanga a chhawm a ni a. A dang 50% chu a pakhat dang a chhawm lo zawk zawk atanga lokal a ni. Entirnan naupang DNA a 50% chu a nu hnen atanga a chhawm a ni a, 50 % dang leh chu a pa hnen atanga a chhawm a ni thung. Fa ten nu hnen atangin DNA an rochun ngei a ni tih chu thil thlentirtu (factor) pawimawh tak tuna an DNA zirchian lai mek a an thil zawn chu a ni. Napangten an DNA chanve chu nu hnen atanga an neih leh a chanve dang chu pa te hnen atanga an neih a nih vangin naupang DNA Profile leh nu or pa, tu emaw zawk zawk DNA profile te chuan a pakhat zawk (nu or pa) DNA profile thliarhran nan Scientistte chu genetic information kimchang a pe thei a ni, chu nu or pa thisen (blood sample) tel kher lo pawhin. (Eg: Naupang pakhat chu ‘A’ ni se. A nu chu ‘B’ nihin a pa chu ‘C’ lo ni ta se. Naupang ‘X’ DNA ah chuan 50% chu a nu ‘A’ hnen atanga a rochun a ni a. 50% dang chu a pa ‘C’ hnen atanga a rochun a ni thung. Tichuan, naupang ‘X’ DNA profile leh a nu ‘A’ DNA profile hmangin naupang pa ‘B’ DNAprofile chu thliarhran/identify theih a ni).

Kha mibo, Ruby-i, nu leh pa te DNA Profiling leh Police ten thisen far an hmuh tak kha lo inmil ta se, Scientist te chuan mibo Ruby-i leh a unau te DNA Profile kha an thil hmuchhuah te (findings) nemngheh nan an bihchiang (analyze) leh dawn ta a ni.

Scientist ten Cindy Morris-i DNA leh Police ten thisen far anhmu tak DNA an han khaikhin (compare) chuan Matching Band pakhat an hmu a. Chutiang chiah bawk chuan Ruby-i unaupa DNA Profile leh thisen far an hmuh kha an han khaikhin leh chuan Matching Band an hmu leh bawk. Chuti a nih chuan chu thisen chu Ruby Morris-i thisen nih theihna a sang ta hle mai. Mahse, Scientist te chuan thil danglam bik hmuchhuah tel an nei tlat mai.

Earl Morris-a DNA leh a fanu Cindy-i DNA Profile an han khaikhin chuan Matching Band a awm ta hauh lo mai. Chuti a ni chuan Earl Morris-a chu Cindy-i hringtupa (biological father) a ni ta lo. Tichuan, Earl Morris-a DNA leh a fa upa ber Randy-a DNA te an han khaikhin (compare) leh ta a, a hma ami ang tho khan an inmil lo (Matching Band awm lo) tih an hmuchhuak leh ta. Earl-a chu Randy-a pa dik tak (Biological father) a lo ni bik lo bawk. Randy-a DNA chuan a pu (a nu pa) DNA nen a lo inmil ta daih mai. Tennessee-a Dan lam kengkawhtu ten DNA Test result an lo hriat chuan Ruby-i pa Clyde B. Williams-a chu incest (chhungkua emaw laichin bul hnai emaw inngaihna/inneihna) in an puh ta . DNA Test atanga a landan chuan Ruby-i pa khan Ruby-i kha kum 15 lek a nih laiin a lo khuaikhem a ni. Prosecutor Bill Clayton-a chuan, “Min barakhaih chiang tak zet. An chhungkua pawh a barakhaih ngei kan ring a; Earl Morris-a hlei hlei kha a barakhaih ang” tihin a sawi a hial a ni.

Morris naupangte chuan thuruk puan tur dang an la nei ta cheu mai. An nu khan a thih hma lawk khan a pasal Morris-a leh Peggy-i (Ruby-i laizawn) te kha an inngaizawng (affairs)a ni tih a hriat hnuin nguina (depression) nasa tak a neih thu an sawi a. Ruby leh a fanu Cindy-i te chuan vawi khat Earl-a leh Peggy-i te chu Phoenix thlawhna tumhmunah an lo hmu dun tawh a; Peggy-in a ruka Earl-a hmu tura thlawhna Phoenix a kal tumin. Ruby-in ngaihzawng ruk a neih chungchangah a pasal Earl-a a chhuahchal a, mahse Earl-a chuan a titawp duh bik tlat lo .Sgt. Lee Luginbuhl-a chuan ti hian a sawi a, ” Peggy-i hi han en i la, Ruby-i thah a duh chhan tur leh hun remchang a nei a ni” tihin a sawi a. Ruby-i bo lai vel khan Peggy-i kha Louisiana a chen lai a ni a. Mahse kar tawp a San Diego-a kal a chawlh hmang turin ruahmanna pawh a lo siam diama ni tih police te chuan an han hmuchhuak leh ta zel a ni. Earl-an vawi duai lo phone-in Peggy-i chu a be thin tih pawh an chhui chhuak bawk.

Police te chuan Peggy-i chu an han dawp ta a. Peggy-in Police te hnena a inpuan dan chuan Ruby-i bo hnu atanga rei vak lo ah khan Earl-a kha San Diego-ah hmu turin a ruahman a. Mahse thlawhna a nang hman ta lo a ni. Mahse, Police te chuan Earl-a kha San Diego-ah a kal ngei a ni tih an hria, thlawhna chuan dawna bag vela thilthem an khai thin (Baggage claim tag) a suitcase-a lo in vuah an hmuh vang chauh pawh ni lovin Earl-a car kha San Diego Airport-a lirthei dahna ah an hmu a ni. Chu car chu fai deuh angin a lang a. Mahse Luminol hmanga lirthei chhung an han enfiah chuan passenger thutna lam chhuatah chuan thisen tam tham zet a awm a ni tih a lo lang a. Thisen chu a tam em avang chuan chu thisen chhuahna nu/pa chu a thi tawh ngei ang tih an ring bawk. Car chhunga thisen DNA Analysis atang chuan Morris te nupa mut pindana thisen an hmuh, Pi Ruby thisen a ni tia Scientist ten an nemngheh tak nen khan a lo inmil leh ta chiah bawk.

Zawhna awm ta chu “Khawiah nge Pi Ruby-i ruang chu a awm tak ang?” tih a ni. Police te chuan Pi Ruby-i ruang awmna chu an la hre mai bik si lo. A ruang kha Earl-a khan San Diego ah phur ni se eng vangin nge chutah chuan a phurh kher ang?. Chung zawhna han chhuihdawn theihna tur hmanrua (clue) lah an la nei bawk si lo. Mahse, chu hmanrua chu an nei dawn ta niin a lang.

Chu chhuidawn theihna tur hmanrua (clue) chu San Diego-a lawng te chi chawlhna hmunah a awm a ni.

Morris te nupa khan lawngleng an nei a. Chu an lawngleng chu San Diego Lawng te chi chawlhna hmunah (Marina) an dah a. Marina-a thawkten Police-te hnena an sawi dan chuan Earl-a kha June ni 5 ah Marina-ah chuan awmin lawngleng pawh inhawlchhuak turin a la chhuak a ni. Police ten chu lawngleng zawnga an va kal chuan a bo a ni ti an va hmuchhuak a. Coast Guard te chu lawngleng zawn hmuh sak turin an han ngen ta a. Anni chuan San Diego lawngchawlhna vaukam atanga mel 13 vela hlaa chutiang lawngleng tiat vel chhunga mak tak mai a kangmei chhuak an hmuh chanchin, kang a leh pil zui ta chanchin an lo hrilh a. Chu lawng pilta atang chuan dam khawchhuak an awm lo va a chhung khawiah pawh mihring han hmuh tur a awm lo tih hriat a ni bawk.

Thil danglam deuh pakhat chu chu lawngleng kan dan chu a ni. Lawngleng laili atangin kangmei kha nasa takin a chhuak a. Dan naranin lawng khawlpui (engine) awmna pindan emaw tuialhthei dahna (Fuel compartment) emaw atangin kangmei a intan thin a. A tir te a tangin a rinhlelhawm em em mai a ni. Thil lang chiang ta chu kha lawng chhuat lailia thil sawr thei chungah khan laltin a awm anga, a lan dan chan chuan tu emawin a vawm lut a nga kangmei kha a chhuak ta a ni thei a ni.

Chhinchhiahna (Record) atanga a landan chuan Earl Morris-a khan June ni 5 zingah lawngleng te chi hmang hawhin chhun dar 12 velah a kir leh chauh a. Chu chu Coast Guard ten Lawng kang/alh lai an hmuchhuah hun lai vel kha a ni. Ruby-i ruang kha Lawng a kan avanga Pacific tuifinriat mawnga pilta ah khan a awm a ni tih chu a lo lang tan ta a. Prosecutor lam chuan Ruby Morris-i kha thah a ni ngei a ni tih tichiang turin finfiahna an ngah tawkin an hria a. Chungte chu an remkhawm tan ta a. Fianfiahna an neih te chu Ruby Morris-i thisen, khum leh silaimu kahna hliam nasa tak ama Ina a khuma tihlumtu te an ni. Kha thil thlen laia awm kha tu nge?

Earl Morris-a. Earl Morris-a chu a nupui Ruby-i thattua puh a ni a, mahse, chu case chuan tawp lam a la hnaih hauh lo. Investigator te chuan barakhaihtu thildang an nei leh ta. Earl Morris-a insawifiahna te chu Forensic Science tan chuan chona nasa tak a ni ngei ang le.

Kum 1991 ah chuan a nupui a thah avangin Earl Morris-a thubuai chu ngaihtuah a ni ta a. Prosecutor te chuan Ruby-i ruang kha hmu tur a awm miau lo avangin Jury te chu tualthahna a thleng ngei a ni tihin an hmin (Convince) a ngai a. Engmah lo atanga case chu an tan a ngai dawn a.

Ruang hmu tur awm lo mahse pawikhawihna a thleng ngei a ni ti finfiahna (Corpus Delicti) hmangin tualthahna a thleng a ni ti an finfiah a ngai a ni.

Prosecution lam sawi dan chuan June ni 4 sunday tuk khan Earl Morris-a khan an mut pindan ah lutin a nupui chu a kap a. A ruang chu pindan lehlam chiahah chuan hnuklutin a thawmhnaw a hlihsak a. Thisen kai te tireh nan bualthleng ah (Bathtub) a dah a. Thisen kai vel a tih reh hnu chuan Jogging Suit haktirin a lu-a hliam thupbo nan lukhum (baseball cap) a khumtir a, an motor dahna ah chawi pheiin car chhungah a dah ta a. A car khan bungrawdahna (Trunk) a nei lo avangin duhthlan tur dang nei lovin car hma lama passenger thutnaah a dah a ngaih phah a ni.

Tichuan Earl-a chuan inchhunga thisen kai zawng zawng – khum lu atanga bualthleng leh chhuat thlengin a tifai ta vek a. Chung thisen hrukfai vek tawh te chu a hnuah Luminol hmanga lailan vek a nih kha. Earla chuan San Diego zin lamtluang chu tanin a nupui ruang a bul seat-a awm nen chuan mel 400 dawn lai car in a inkhalh a. Kawngtluanin a nupui lua hliam atang chuan thisen a farthla reng bawk a, Seat hmalam chhuatah chuan a far thla a, chu chu a hnuah Luminol Test hmanga hmuchhuah a ni. Earl-a khan kawng lakah tuialhthei thunin vawi khat a ding a, tuman a mi phurh chu a thi a ni ti reng an hre lo.

Earl morris-an San Diego a thlen ve leh chuan a lawng chu hnukchhuakin tui lamah a tawlh luh tir a. Khaw-en lai rengin, Ruby-i ruang leh puan thisen kai nuai leh a thahna hmanrua te chu Lawngah a hlang a. Khawnvar leh Khawnvartui-te pawh a keng tel bawk. Tichuan, Lawnglengte zawk pakhat dang a hmanhawh hnuin tuipuiah inthai chhuakin a lawngleng hman hawh chu ama lawng chuan a hnuk a. Vaukam atanga mel 13 hla Pacific Tuifinriat ah, Earl Morris-a chu a lawng tichhe turin a inbuatsaih ta a, a nupui ruang chauh ni lovin a inhnamhnawihna evidence la bang zawng nen phum bo a beisei a ni. Khawnvartuia lawng a leih huh hnu chuan lawngleng a hman hawhah a lawn a, khawnvar a chhi a, lawng chhuatah chuan a vawm ta a ni. Coast Guard ten an hmuh hmain chu lai hmun chu a chhuahsan a. Chutia Earl Morris-an chulai hmun a chhuahsan hnu reilote ah chuan Chanchinthar lawrtu (News Crew) ten Lawng alh/kang lai mek, tui a a pil hma minute tlem a la awm tihin a thla chu an lo la hman a. Ruby emaw lawng emaw chu hmuchhuah a ni ngai ta lo.

Thubuai chai na-ah chuan Earl Morris-a chuan a thiamthu maksak deuhin a sawi a. A inpuan dan chuan a nupui chu a thi a, a ruang pawh kha lawng kang leh pil ta ah khan a awm ngei bawk. Chu mai ni lovin kha lawng kha a ma tihkan leh tihpil a ni thu a pawm bawk. Mahse, a nupui kha ama thah a ni lo tihin tan a khawh tlat thung. A sawi dan chuan a nupui khan suala inngaihna (quilt) leh rilru hnualna(depression) vangin a intihlum a ni – tisual a a inngaih chhan dik tak pawh a pasal chu a fate pahnih pa a ni loh vang leh a pasal khan a laizawnnu Peggy-i nen an inngaihzawn avangin depression a nei niin a sawi a ni. A sawi zel dan chuan a ngaihtuahnaa lo lut hmasa ber chu a nupui a intihlum avang khan amah chu an mawhpuh ngei dawn a. Chutiang a ngaihtuah hnu chuan thutlukna a siam ta a. Chu a thutlukna chu a nupuiin thil a lo ti tawhte thup bo vek chu a ni.

Chu mi hun thleng chuan, thil kalhmang chhuina atanga a nihna dik tak chhutchhuah (CircumstantialEvidence) atang chuan Ruby-i chu a thi ngei a. A ruang ka hmu, a hliam ka hmu, inkap lai ka hmu, emaw silai kah ri ka hria titu tumah an awm lo thung.

Earl Morris-a sawidan chuan a nupui chu a lu veilama silai kahna hliam tuara hmuin an .22 caliber pistol a hmang nihin a sawi bawk. A nupui kha amah leh amah a inkahhlum hnuin a hmu nia sawiin amah chu mawhpuh ani ang tih a hlauh avangin a ruang chu lawng ti pilin a thehthang ta niin a sawi bawk. Mahse, Forensic Evidence te chuan a sawidan ang lo zawngin an finfiah ta tlat thung. Thisen per dan atanga a lan dan chuan Ruby-i khan amah leh amah a intihlum thei tlat lo.

Earl-a khan silaimu luhna kha Ruby-i lu veilamah niin a sawi a, mahse Ruby-i kha kut dinglam hmang mi a ni thung si. Kut dinglam hmang tan mahni lu vei lama inkah chu thil theih lo hulhual a ni, a bik takin Morris te neih .22 pistol barrel sei chi angah phei chuan. Mahse, hnialna chak ber chu khum lu lama thisen per dan atangin a ni. Chu thisen per dan (Blood patterns) atang chuan thisen kha thuahhnihin a per a ni tih a lailang a, pakhat chungah a dang. Hei hian silai kha vawi 2 kah a ni tih Forensic Expert te a hrilh a. Vawi khat kahin thisen per dan hrang pahnih a siam thei lovang. Thisen per dan hrang hlak pahnih an per dan angle pawh inang lo a awm a, chutiang chu silai vawi khat hmehpuahin a siam thei lo a ni. Chuan mahni intihlumin lu-ah silai vawi hnih a kap ngai lo bawk.

Jury te chuan hun tawp lama Earl-an “Mahni intihlum a ni” tia a tanchhan chu dawt phuahbelhna pakhat dang angin an ngai a. Earl-a chu tualthah thubuaiah thiam lo chantir nihin kum 25 atanga damchhung lungin tang tura hremna pek a ni ta.

Lt. Rod Englert a chuan, “Earl-a khan Ruby-i hnuhma thlauh tam tak a nei a. Ruby-i sulhnu kha chhuatah te, El Camino (Chevrolet Car sawina) ah te leh khum ah te khan a thlauh/hnutchhiah a ni. Chungte hmang chuan Ruby Morris-i khan a chungah eng thil chiah nge thleng tih min hrilh a ni ” tiin thil thlen dan chu a sawifiah a. Bill Clayton-a thung chuan, “Tumah awm lo, silai leh inpuanna pawh awm lo. Science chuan Ruby Morris-i min pein pawikhawihna a thleng ngei a ni ti finfiahna (Corpus Delicti)min pe bawk a ni. Car chhunga thisen leh DNA Testing kha awm lo ta se helai-ah hian thu-in ka be lovang che u. Earl Morris-a pawh mi zalen a ni ngei bawk ang” tiin a sawi ve thung a ni.

Author : Bruce Kibby

Aside | Posted on by | Tagged , , | Leave a comment

PHILIPPINES PRESIDENT RODRIGO DUTERTE-AN MAOIST COMMUNIST HEL TE A VAU NA HLE : PEACE TALK TIHTAWP NGHAL A NI

  • Duterte a tawng lian.
  • Duterte a’n maoist te a vau
Niminah Philippines President Rodrigo Duterte chuan Maoist Communist hel “New People Army” ten Philippines Army 6 that a, 2 an rukbo hnuah, sipai thite ruang vuina chhim lam khawpui Cagavan de Oro hmunah thusawiin, “Thisen chhuah hi ka duh lova, mahse, nangnin inthlan takah chuan, a tha vek e. Tunah thla 6 chhung inkahhai siam pawh ka titawp nghal a ni. Kan hmanraw neihte nangmah beih nana hmang turin ka buatsaih a ni. Thlawhna tam tak kan nei a, jets kan nei a. Engkim (bombs) ka rawn thlak dawn a ni”, tiin Maoist helte chu”Terrorist” tiin a koh bawk.

Duterte chuan, “Heng terrorist hote hian kum 50 lo awm leh tur atan Filipinos an that duh tih min hrilh a ni” a ti. A sawi danin Communst helte hian Sipaite chu vawk angin an that a ni, a ti bawk. “He hun (generation) hman mekah inremna a awm a rinawm ta lo”a ti.

President Duterte hian sorkarna a chan tirhin, kum 1960’s chho atanga Communist hote helna chu remna siam pui a tiam a, Hel hruaitu an man tam tak chu chhuahin, remna zawnga inbiakna nei turin Norway ramah a tir a ni. Heng helte passport hi titawp nghal vekin, man theihna thupek chhuah nghal a ni bawk.

“An duh chuan, thi tura lo kir leh kher aiin Europe ramah inhumhimna (asylum) an dil nghal thei ang” a ti hmiah mai.

Author : Ct Lalrinawma

Aside | Posted on by | Tagged , | Leave a comment

TARPHO NAUPANG KUM RUK MI BO DAN MAK TAK CHU

  • Ramhuaiin naupang an hruaibo em ni.
  • Tarpho naupang khawngaihthlak.
  • Khawmu chawi hi enge.
  • Chin hriat loha bo.
A hmasa in he chanchin mak leh danglam tak mai hi, “Science in a finfiah theihloh thil te” tih lehkhabu ah chhuah a ni tawh a, Mahse duhthu a sam loh mai bak ah Fb lam ah kimchang lo nuai a post ka hmuh avang in naupangbo laia awm ngei ka kawm chiang a, post hi ka siam ta a ni.

Tarpho khua hi In 90 vel chauh niin, Lo nei a ei zawng a tam zawk an ni a, An ei hmuhna ber chu buh leh thlai chin a ni. 2007 kum a ni a , ‘Tluanghmungalung Ram’ chu lo ah nei in Buh leh bal pawh a tha hle a,.Mimkùt thla chanve a ni a, Buh te chu an hringdùp mai a ni.

An Lo neih na hi khua atanga a hlat tham a vangin Ramriak an tam thin hle a, School naupang leh chhumchhia deuh tih loh chu Hlo thlo in an riak deuh vek mai thin a.

Pu Rualthawnga pawh A Lo ah riak in, In lam ah A nupui leh A fate pahnih- A upa zawk Lalhmingthanga(6) leh A nau chu an Nu in In lam ah a awmpui thung. Lo lam ah An pa hlothlo pui turin, lang in a feh zeuh zeuh thin a, Inrinni tuk chuan Anhnah, vaimim leh Thlai rah la turin, zing ah midang ang tho in, Lo lam pan in an kal ta a, Lo chu tluang takin an thleng ta a ni.

Pu Rualthawnga hi Pu lalenga nen an inri a. Pu lalenga hian a fate pahnih a riahpui a. Thlam pawh inhnaih tak in an sa nghe nghe. Lalhmingthanga hi naupang luhlul leh huaisen engmah hlauh nei miahlo a ni a. A pa Pu Rualthawnga pawh hi hlauh hrelo, mitaima leh hnathawh hrat khawkheng ani a. Lo vata a riah te hian A mal ve si a, mau bati a siam a, zan ah lo a vat hmiah mai thin a ni.
Zan a mau bati nen a a Lo vat Thiltlang Pa ho lui riak in an hmu a, mak an tiin an ngaisang hle a ni.

Tun a An Lo neih hma kum chiah hian An vau ah Sih hnum leh bel em em mai hi a awm a, tui tlan tur dang awm ta lo chu a hai ta vak mai a, Naupang an rak chuah chuah mai a ni.

Thawm lo hre pha ve te chuan tlai hawn kawng ah, “Naupang rak chuah chuah kha i hre ve em an tia,”
“hria e, Vahai nupa inchhaih emaw ka tia sin” a ti hem mai maw le.
A sih hai avangin he lai an vau Ramhuai te hi an pem niin pa pakhat mumang ah a lang a.
A mumang ah chuan “Rualthawnga’n kan chenna in a tichhe vek, hlauh a nei silova, pem mai ang u, engtin emaw tak phuba kan la ve ngei ang” an lo ti a ni.
He mi avang hian a fapa lalhmingthanga hi an rubo ta em ni ang le? A bo ni a, a hawnpuitu leh thil engkimhretu-Vanlalthanmawia tawngkam i lo ngaithla tawh ang u le.

”’Hminga a bo ni hian mak tih deuh deuh ka nei a,
Lo an lo thleng kha a tawng mawh em em a, thlam hnuai ah a thu ngawi reng a. A nu vaimim lakna mual piah ah Amah in a kalve a. Lo a fangkual a, thingluang ah te a tlan lawn zawi zawi mai a, kum 6 mi tih atan chuan mak tak a ni. Chaw ei a hun chuan a nu in a ko a, chaw an ei a. “Kei chu ka eikham tawh a, sava veh ka duh avang in an rual a haw lo in kalsan ka tum a. Thui fe ka kal tawh tih chuan Hminga nu chuan min lo Au a, “Mawia min lo nghak ve roh” a tia, Hmingte hmanhmawh roh” a ti sek bawk a. A bo na a ka hming lanna tur hrim2 a niang – kalsan ka tum nen, ka lo nghak ta a!

Min rawn umpha tep tih ah Hminga chu chak tak in a tlan a, puanchhemuh bur a hnuk a, kan hma ah a tlan ta daih a. Kan hmuphak manglo, kawngkawi ah kan hmu zeuh zeuh. A chhak fe ah sunhlu tla a lo chhar a. A nu in “Hmingte lo kal roh” a tia. Min zui mai dawn maw kan ti a, min zui mai lo A nu in, “Muang suh, min lo um pha rawh” a tih pawn kawngtluan mai chuan min umpha thei reng reng lo a ni. Khua kan hnaih angreng viau tawh a, kan rual in a kal miahlo tihna a nih chu.

Chawlhna hmun kan thleng ta a. Reife kan chawlh hnu ah a rawn thleng ve ta a, “kan chhak ah sava an awm teuh a, ka han pel ang e ” ka tia, ka han chho a. An thlawk vek a, Va uk pakhat hi khiang thingbuk karah a tawm a, ka en ngial pawn ka hmuthei miahlo a. Hminga a rawn tlanchho a, ka hma ah a rawn kal a, “bengchheng suh, ” ka tia. Ka hma a a rawn kal chiah khan, Va ùk chu a hma a ka hmuh theih miahloh kha chiang takin ka hmu ta a..ka perh a. A tla thla a, ka va chhar a. Kan hawilet chuan, Ka bul mai a awm, Hminga chu hmuhtur reng reng a lo awm tawhlo ani. Ka Au a, ka piah fe ah ‘Eih’ a tia, ka Au leh a,’ A aia piah ah zawite in a ‘Eih’ leh a, ka Au leh a, min chhang ta miahlo a ni.

Kan awmna atang hian kan chhak kawng chu shotcut in a pawh theih a, tah chuan a kal a nih ka ring ta a. Kawng ah ka chhuk a, A Nu poh a lo kal tawh a. Hmanhmawh tak in ka kal a. Shortcut in a pawhna chhak hlek ah A Nu chu ka hmu a, “Hminga i hmu em? ka tia, “hmulo” a ti si. Ka zuk chhuk leh a, ka Äu vak vak a, A reh vawng vawng mai a ni.

A nu nen chuan kan Au a, kan zawng nawn leh ngial a, tihngaihna hrelova kan mangang ta si chuan , khua ah tlan hawngin Y.M.A president- hnen ah tlan lutin, thil awmdan zawng zawng leh tanpui kan ngaih thu a hnen ah kan thlen ta a. Y.M.A -Pre-pu LalRamsanga’n minlo buaipui nghal in, hruaitu thenkhat nen a hmun pan in kan tlanthla leh ta a. Tichuan Y.M.A hruaitu dang te nen information centre atang in an rwn au ta a,tichuan khwtlang anrwn chimthla ta a ni”, tiin Vanlalthanmawia hian a sawi a ni.

Hetia vantlang kan chim thlak meuh hi chuan unau hmelhai dawn a ni tawh a ni.
————–

September 15.2007 Inrinni tlai chuan Tarpho khawtlang chu an buai ta mup mup mai le..Tlangau chuan ‘Pu Rualthawnga fapa Lalhmingthanga, Lo atanga A nu te nen an hawng Tun thleng in a la hawlo a, Mipa zawng2 chhuah khawm a,zawn tur ani e’ ti in a rawn au ta a, mipa zawng zawng chu, Chaw ei sawk sawk in kan chhuak khawm ta a. Hetih hun lai hi a tlai tawh viau a, mi thenkhat chuan “mi In ah a awm a niang” te an ti a. A mawngzang zual ten khawchhung leh kawmkar te an han fang kual thuak thuak a. Mahse Rin ang ngawt a ni lo. hmuhtur reng2 a awmlo.

An Lo neih na lam hi Tarpho hmar lam, Thlanmual pan na kawng niin, Thlanmual ah chuan Tlangval rual leh val upa te chu kan in nghak khawm ta a, thenkhat phei chuan A bo na hmun an zuk thlengthla hman nual bawk a. Thlanmual atang hian a bo na hi hnaite a ni.

Unau hmel hai vel ah A bo na hmun chu A nawlpui chuan kan thleng thla ta a,Val upa ten a zawn dan tur te sawi in pathum vel a in zui in a bo na ram chhehvel chu kan phek zawn ta chiam mai a ni.

Kan kuk vak vak a, Hmingte ti in, Aw rawl tawp tawp in kan Au vak vak a, chhangtu tur reng reng a awmlo. Kan zawng uluk hle mai a, Thängpik te pawh kan dai thlu vek a. A bo na atang hian kan zawng zau in,kan ri le lu mai a ni. Khawmu chawi a nih chuan Khäm ah emaw Puk ah emaw an dah duh upa ten an tih avangin, puk awm apiang te pawh kan lut zel a. Feh kawng ah hian ‘Tlaran’ kham a awm a, sathar te, saza te hmunpui a ni. Akham a tha in, a sei hle a, Hruizen nen he lai kham te pawh hi an lawn in hruiin an in thlak thlaa. Khampang puk thleng in an en kim hle bawk a, mahse khawilai ah mah hmuh tur reng reng a awmlo.

Zan dar 12:00 pel rawk a kan zawn a, Kan Auh vak2 pawn engmah hnuhma leh Athawm leh a mah reng reng hmuh tur a awm lo a. Kurùng Bak pùk, Bak Sing tel fe awm na thleng thleng kan dap vek a. Buhpawl zing a hriau bo zawn ai pawn a beidawn thlak zawk mah a ni. A bo na hmun bul kawng ah hian meipui anlo chhem vut vut mai a, chu chu kan pan khawm ta hlawm a, kan in nghak khawm leh a, A kal hla zual te an rawn thlenkim meuh chuan zing lam Dar 1:00am A ri thuak tawh a, Val upa leh Nula te thingpui lum kan han in a, A ai a hla leh zau zawk dap tur in kan chhuak leh ta a ni.

He mi zan hian Ruah a sur deu reng a, Ruahsur kar ah hreawm ti hmel tu mah awmlo in zan khua in kan zawng a, Kan Au a mahse hmuh tur reng reng a awmlo.

Chawlhnituk a ni a, khaw chhung ah chuan Naupang khangaih thlak Hmingtea bo dan bak chuan hmun a changlo. Ho tak mai a chin hriatloh a a bo ta hmiah chu,mitin mai chuan mak an ti a, A bo zan hian an In khat deu thaw in an tlaivar a ni.

Photlang valrual leh val upa te chuan Zan thim leh Ruah tla reng kar ah zankhua thak a an zawn hnu in beidawng ang reng tak in khawvar tawh hnu ah Hmingtea bo na hmun ah chuan in hmu khawm leh in,In lam a Chaw ei tur in kan hawng ta hlawm a.

He mi ni hian Biak In pawh khar a ni a, Chaw te kan han ei kham chuan kan in nghak khawm a, Uluk leh zual a zawng tur in kan in puahchah leh ta a ni.

Hmingtea bo hi kum chhiat kum a ni in, Ruah tui atam hle a. Lei min a tam in hmun hrang hrang ah lei a min sen veng vung mai a ni.

Khaw eng a ni ta bawk a, Hmuh inbeisei tak ina bo na hmun atang chuan uluk tak in kan zawng leh ta a. Kan däp zau khawp mai a, Ring tak tak in kan Au a, Kan kùk vak vak a. Beidawng lo a, theihtawp chhuah a, nileng thak a kan zawn leh pawh chuan A ke hniak em pawh hmuh tur reng reng a awm chuanglo . Thlanmual ah silpaulin zar in, Rv ah kan hmang a. Rv a rawn let ten an beidawn thu bak sawi tur an hre ta lo.

A tam zawk chuan Ramhuai hruaibo/khawmu chawi ah an ring ta hmiah hlawm a ni.

Sunday zan pawh hian A bo na hmun ah mei an chhem hluah a,zan rei tak thleng kan zawng a, Rinni zan leh sunday ni leng kan zawn tawh avangin Val upa ten Tlaivar a zawn an ti ta lo a, In lam ah hawng in A tuk a zawng leh tur in tui tak in kan muhil ta a ni.

Naupang khawngaih thlak Hmingtea bo dan maktak chuan Reilo te ah khaw thenawm te beng a thleng in, Zoram a tuam chhuak ta hial a.Thawhtan Ni a rawn herchhuah chuan khaw thenawm Khawhri khua atang in mipa zawng zawng lo chho in min rawn zawnpui ta a. Nileng in kan zawng leh a hmuhtur reng reng a awmlo.

A tuk Thawhleh Ni chuan, S.Chawngtui lam a khawnawt in an rawn chimthla ta bawk a. Hmuntin kan däp a, khaw 3 zet val upa leh valrualkan han awmkhawm ta chu kan tam ta hle mai. Nasa zawk a zawngin, Ramhnuai hmuntin deu thaw ah kan ri chuah chuah mai a ni. Mahse hmuh tur reng reng a awm chuanglo.

Nilai Ni alo herchhuak a, thingsai khua atang in mitlawmngai 20 vel an rawn kal veleh bawk a. He mi Ni pawh hian nasa tak a zawng in, hmuhtur reng reng a awm chuanglo.

Ninga Ni chuan,kan khawchhak lawk a awm, Cherhlun khua atangin funpui nen naupang bo zawng tur in A khawnawt tak meuh in, an rawn thawk chhuak leh ta bawk a. Tarpho khua chu Khawmpui lian dawng ang hrim in, khaw hrang hrang val rual te chu kan inpel suau suau ta mai a. Hmingtea bo na leh a chhehvel Ram mai ni tawhlo in, Tarpho ram chhung zawn in kan zawng ta a ni.
——————

Hmingtea naupang khawngaihthlak chinhriat loha a khuangcherbo avang chuan Tarpho khua chu buaina leh lungngaihna chhumpui in a chim mup hi a ni ber a. Khaw thenawm khua pali atanga Valrual an han fuankhawm ta chu an tam ngang mai.

Middle school chu Rv ah hmang in,Tarpho branch Y.M.A hruaitu te leh nula tlangval te chu an buai em em mai a. Ramhnuai ah khual khua atanga lokal te hruai an ngai a, nula ten thingpui lum in, ei rawng an bawl a. Mizoram hmun hrang hrang atangin tanpuina sum pawh a rawnlut mawlh mawlh bawk a. Mibo zawng pawl committee din a ni ta hial a, hetihlaia vcp Pu MC. Vanlalruata chu chairman a ni.

Khual khua atanga mizo tak leh tlawmngai tak a valrual rawn fuankhawm te chu hmun hrang hrang a insem darhin, Pawlkhat zel ah hian Tarpho tlangval pali vel ten zui zel in, hmun hrang hrang kan fang chuah chuah mai a ni. Tarpho ramchhung hmuntin mai chu kan dap a, Tuichang kham thlengin dap vek a ni a, S.chawngtui lam ramri thlengin uluk takin pawl hrang hrang in an dap a, an au a, an ri chuah chuah mai a ni.

Pawl dangin Aithur nen kan inri na lam an dap bawk a. A then tuiphai lam ah an kal bawk. Tarpho ramchhung puk awm zawng zawng dapchhuah vek hial a ni ngei ang. Fehkawng lam a, ‘Tlaran kham’ pawh Hruizen nen a inthlakthla in, mihring awm theihna zawng zawng chipchiar lutuk taka dap vek a ni a. Hnahhriphai thleng in, zawn lohna hmun a awmlo. Khawthlang lam, Ramtharuam, sihphir lui leh char lui thleng in, Ralzawn ngawpui mawng thleng in, zawn vek a ni a, dap chipchiar poh leh avang tulh tulh hi a ni ringawt mai a.

A bo atangin ni nga ngawt a liam tawh a, ruah lah chu a sur duh em em mai bawk nen, zan lam ah zawng tawh loin, zing atangin, pawl hrang hrangah inthen hlawmin, hmun tinah mihring ke hnu hi a chiar dup mai a ni.

Zirtawp ni a ni a, Ruahsur kar ah pawh hrehawm sawilo in, ramhla tak tak leh ngawpui chhung ah te zawngzel in, hmuntin an fang mup mup mai a. A then beidawngin, Rv lam ah an let a, a then an chhuak bawk a. Mitin mai chuan Ramhuai/Khawmu chawi ah an ring vek tawh hlawm a ni.

He mi ni hian pawlkhat-Cherhlun lam atanga lo kal te chuan Aithur khua nen a kan inrina ‘Ralzawn’ ram ah an va zawng a, an hawn lam chuan, an y.m.a hruaitu pakhat chu a tawi khawmuang a. An piah kawr ngawpui hnuai ah chuan naupang rak nawk nawk thawm a hre ta a, a va pan hnai a, naupang rual kawr halo a hmu a ni awm e. Hei hi an hawn tawh hnu a, an inhmuhkhawm naa a sawi a ni.
“Enge in tih?” tiin a zawt a. Chung naupangte chuan “chakai kan khawrh” tiin an chhang a ni.
Ama sawi danin “engin emaw min mawlh a, sawichhuah nachang pawh ka hrelo” a ti a ni.

Cherhlun khua lam ah hian Naupang pakhat in, mumang a nei a. Tarpho ami naupangbo kha changel buk kar ah a muhil in a hmu a. A pa hnen ah a hrilh a. Mumang mah ni se, tarpho lama thangmek te an zu phone a, thenkhat tam tak in changel hmun zawn in anzawn chiam phah a, mahse hmuh a ni ta chuanglo a, a mak em a, kan zep tel ve mai mai a ni.

Hmingtea bo cham Inrinni a lo thlengta reng mai. Hmun hrang hrang kan dap a, Ramngaw dur pui pui te, luikawr leh tlang leh kham leh hmuntin reng kan dapngial pawh chuan khawiah mah hmuhtur reng reng a awmlo. A kawr them takngial pawh hmuhtur a awm mawlhlo a ni.

Chaw eikham chuan Rv middle school ah a nawlpui a zawn hna chu khar a ni ta a ni. Khaw thenawm atanga tlawmngai tak leh hreawm pawh pawisalo leh a sur a sa hnuai a, tha leh zung tam tak leh mahni hna tul kalsan a, naupangbo min zawnpuitu te chu hreh viau mah se an khua lampan in an hawng ta hlawm a. Tarpho khawtlang an chungah kan van lawm tehlul em.

Chawlhni a lo thleng a, Tarpho khua tlangval te chuan kan la zawng reng tho a, mahse a dam tumah reng in anringtawhlo.Val upa ten Hnarlèn deu tur in min hrilh a, thil uih leh rim danglam deuh te chu rang tak in kan pan a, hnuhma a pherh veng vung mai a ni.

Upa ten ti hian an sawi a, ”ramhuai/khawmu chawi/hruai te chu an bona hmun ah meichhemtur a ni a, ngawireng in chan tur a ni. Chu meichhem chu a rawn ai a, a hnunglam atangin man thut tur a ni” an ti a. Chutiang chuan a bona hmunah mei kan chhem a, zantin reitak tlangval ten kan in chan chhawk a, mahse meilum rawn ai tih zan reng a awm miahlo. Kan zawng rei tawh in, hna te a tul tawh si a. A nawlpui in kan zawn pawh kan titawp veleh ta a, mahse tlangval panga vel zel chuan inchhawk in rei tak kan la zawng reng tho a ni.

Ni leh thla a liam a, kum a vei a, A reh tulh tulh emaw tih turin a chanchin reng reng hriattur a awmlo. Naupang khawngaihthlak hmingtea chu engtin tak awm ang maw le. Mitthi anga sawngbawl a, a vuina hun hman a rem silo. A hriatrengna lungphun dawn ngawt se a ni thei silo. A NU LEH PA tan a va’n na dawn em!

An fapa duatlai chin hriatloha han bo ta daih mai zawng…Hmingtea Pa, Pu Rualthawnga chu- A fapa bo atanga kum thum aia rei mah kha, Inrinni tlai thim dawn hian a bona hmun ah a kal ziah thin a sin.
Sunday mireh lai te hian tlaiah a fapa hmuh beisei takin a kal ziah thin a, mahse hmuh tur reng reng a awm silo, beidawng tak in a hawng leh thin.

Naupang khawngaihthlak Hmingtea chu khawiah tak awm ang maw le.

Author : NightPrince Renthleytlangval

Aside | Posted on by | Tagged , , , | Leave a comment