RO KAN ZAWNG by Faka Hnamte (Rags to Rag Picking)

Chaw ei kham veleh ka chhungte chuan hmanhmawh takin chaw min funsak a. Chaw dal chawm sa diam leh nghathu rawt polythene-a min funsak chu min pek pah chuan, “Bawlhlawh paihna kawrah lut tawh lo ang che u, Sakawrekhrik in kai ang,” min ti a. “Lut dawn lo, lut dawn lo,” tih pah chuan ka best friend teho in lam panin ka tlan nghal daih a.

Chhungte bulah khan Saihri lui chhaka Ruata te huanah theite lo turin kan kal dawn ka ti kha ania. Kan tum ram erawh Aizawl tlak lama bawlhhlawh paihna lian ber “Kham uih” kan tih mai lepse tura chhuak kan ni. Ka sikul kai ipte hlui ‘Pu Ro-hood-a’ min thuisak chhungah chuan magnet bial, rit lung mai bawlhhlawh paihnaa ka chhar leh ka nu chaw min funsak chu ka ak puar ve lang a.

“Ruata”
“Eih, lo kal rawh ka hman tep”
“Valpuia ka lo va sawm zawk ang”

Valpuia chu sawm hran ngai loin an in lam atang chuan kawihsapir nen a rawn lang a. A pu vawkchaw lak ipte lian pui mai, a ngal thleng dawna fual tur hi a rawn ak pai hnuk hnuk a. Amah pawh chuan ak lian a inti deuh a ni ang.

“Tui thak te ka pai a…” (a nui ţhâw mai)
“E… pai ve nachang ka lo hre miah lo a”
“Ka pai kep che u lawm. Mahse ka ta tur chu aieng telh. In taah chuan ka telh ve lo. Anu’n min rawn hmu hman a…!”

A ipte chhungah chuan tuithak Ostocalcium bur thum leh chaw fun a ak a. Valpuia hi chu kan puitlin hnu pawh hian tih nachang kan hriat loh thil kilkhawr te pawh lo ngaihtuah thlap thin a la ni reng mai.

January thla tir sikul luh hma a ni a, khua a vawt si, pem hlek pawh a pun zel a. Kan pem pun bakah kan chât khir te chu a pan zui lo choh a ni.

Ruata pawh a inpeih ve ta a. Ani pawh kawrlum ţial sawi vekin a kawr ipte chu a rawn puar a. A ipte rawn puar em em nachhan chu eng dang ni loin a nu-in lung rawh lum a ahtir leh a ni tih kan hre nghal a. Ruata hi naupang hrisel lo tak, khawsik ser ser ching a ni. Tun hnu hian mak ka tih em em chu Ruata te chhungkua khan lung an lo va ngah awm em em. Thlasik zual chhung, thla hnih chuang teh meuh nitin deuhthaw a rawn ak chhuak a; a lum a rehin a paih daih zel.

KA U THANGA

Ruata te huan lam pan tur ang deuhin veng thlang lamah chuan kan liam ta diak a. Chhungte’n min hmu pha tawh lo ni a kan hriat hnuah hmar lama ‘Kawr uih’ lam pan chuan thlamuang zetin kan inzui ta ţhâm ţhâm a. Ni hnih thum kal ta mai khan Pu Kai hausaa te tractor-in an in ţhiahna hnâwm a paih tih Valpuia’n a hmu a, chu mi hnuah naupang dang lut kan la hmu miah lo.

Kan haw huna kan mit tlai dan tur te suangtuahin kan hlim ngang mai. Kan tum ber chu video cassette dawra Bruce Lee a film, “The Big Boss” hawh a ni.

Kawng laka kan titi mam mam lai chuan Ruata’n, “Ka u Thanga” a rawn ti thut mai a. Thu dang sawi zui a ngai tawh lo. Hlauhawm a hnai tih hriain chak em em mai hian inthurual ang hrimin kan tlan thut a. Kawng kawi kan pil veleh kawng kama hnim buk phenah Valpuia nen rang lutukin kan dive lut a. Kan hnung daihah Ruata chu ipte zen ţût chung hian a theihtawpa chakin a rawn tlan ve a. A hmel atang chuan hlauhthawnna nasa takin a tuam vel mek a ni tih a hmuh theih. A iptea lung tum lian tak pahnih te chu a dawm beh loh chuan a balance a buai a. A dawm beh lahin ban vai loa tlan a ngai bawk si. Kan bihrukna hnim buk phenah chuan hnap tawlh purin a rawn lum lut ve tawl a. Ipte hruia hnap hruk zauh pahin.

“Tinge kan tlanchhiat…?”
“Min hmu a ni lawm ni?”
“Tuin?”
“I u Thanga’n min hmu a ni lawm ni?”
“Ka hre nang… amah in hmu mi?”
“Hmu nang…”
“In hmu emaw ka tia…”
“Min hmu lo reng reng”
“Tinge in tlan vak si?”
“Nang pawh ti nge i tlan vak”
“Ka u Thanga in hmu lo a ni lawm ni?”
“Ka u Thanga i ti sia…”
“Ka sawi zawh hmain in tlan vak a kan chhungte tu emawin min hmu emaw ka tia lawm”
“E…”
“Ka u Thanga te pawh hmana an kalin thil tha deuh deuh an chhar tih ka tum a… ”

Tunhnu hian kha mi tuma Ruata tlan muang kan tihzia kan sawi chhuah apiangin Ruata tlawmngai hian, “A nih, ipte zen chungin intlansiak ila,” tiin min cho ziah a, ipte zen chung chuan amah pakhatna a ni ziah. Ban vai loa tlan et et thei hmel kha a pu hrim hrim a.

A BU PUI

Kan hma lawkah chuan mual pum khuh hmawk bawlhhlawh chitin reng mai awmna chu a lo awm nghûk mai a. A rim pawh kan hre pha tan ta! Mahse, kan tan chuan tunlai naupangte’n KFC dawr an kal pelh a a rimin an ngaihtuahna a tiharh zawk ang thoa rim ngainatawm a ni. Africa khawmuala rangkachak leh lunghlu zawng mite’n rangkachak khur an pan ang maia thatho leh suangtuahna ropui tak nen chu lai hmun chu kan va thleng ta a.

Eng emaw châng chuan an lo hal fai kûlh thin a. Vawiin chu kan beisei aiin bawlhhlawh a lo tam a, video cassette pahnih hawhna daih chu kan hai chhuah theih kan inring hial. Cassette kan hawh huna naupang dangte’n min tlawn turzia leh TV enna a cassette hawhtute thutna chan that theihzia te chu tuma hrilh kan ngai lo.

A bu pui kan luhchilh tan ta. Kan hna kan tan tak tak hmain Valpuian, “Tuithak in phawt ang u,” a tih avangin tuithak chu kan in leh te te a.

Ka magnet bial lian kengin hma ka hruai a. Valpuia’n a Kawihsapirin bawlhhlawh pawnlang leh te tham deuhte chu a hai kiang zat zat bawk a. Mahse ka beisei aiin ka magnet chu a tangkai lo daih mai. Kuta hai mai a hlawk zawk. A man theih loh chi hnawmhnawk dang a tam lutuk. Perek nawi hip khawmna chi chauh a lo ni.

Valpuia pawh chuan a Kawihsapir aiin a kut a lo hmangthiam zawk a. Kan pathum chuan mahni seh seh mual hranah ti niawm takin a tam kan rinna lai laiah kan hai ta miah miah mai.

Thirchhia chu a lo tam ngang mai. Thirchhia bakah saidawium te pawh tlawm deuh mah se chhar tel tho chu tha kan ti a. Sangha ţin bur ruak leh ţin ruak dangte chu kan rap sawi nghal zel a. Ruata satha ipah kan chhar ang ang chu kan khung ta zel a.

Rei fe kan inhai hnu chuan kan satha ip pawh a khat mawi ta. A han khah takah chuan Ruata satha ip chu a lo lian em em mai a. Kan han hnûk chhuak dawn a, ţanhmun rem lo nen a hautak lutuk. Bur ruak kan rah sawiho karah khan thirchhe hralh huna a buk tirittu atan lung kan lo thun nual bawk nen. Primary sikul naupaang pathum tan chuan a rit ngei mai.

Valpuia paw’n a track kekawr kawng elastic rul a ngai pawimawh hleithei tawh lo a; a ţan zawnga a mawngkawkehkak chip taih taih te kha kan in-marble thâp lai chu ni se kan nuih nasa ngawt ang. Mahse, tuna kan thil tih lai hi chu thil tak tak, sum leh pai kaihhnawih a nih avangin nuih theih a ni lo.

Ruata paw’n a chawrche a chawrchein ip mawng lamah a lo nawr ve ţang ţang a, Valpuia nen eng tin tin emaw a lu lamah ţangin kawngpuiah chuan kan hnuk chhuak thei ta hram a.

Kan thahnemngai lutuk chuan kan chaw fun pawh ei nachang hre loin kan lo theihnghilh hmin hman der a, chawhnu her a lo ni daih tawh.

Naupang harhvang tak, kal that pangngai pawh a kal thei lo, zuang lim reng thin kha rei ngial tha pui chhuah a kan rohlu kan han hnuh tak hrepah chuan kan chau nasa mai a. Riltam tih pawh inhre lo lekin thirchhe buaiin kan buai nileng lo chauh a ni.

Kut pawh sil mang hlei loin kan chaw fun chu kan bar ta hawng hawng a. Chaw kan fak mawlh mawlh lai chuan Ruata kha a tho thut a, chaw hmuam ţûn chung hian, “Thil ka hmu,” tih leh phur fahrana khâm lama liam thlak a rual leh ta!

Chuti taka phur chu rod bung sei deuh a hmu thut a nih ringin Valpuia nen pawh kan lo tang hrû a. Ruata chuan bawlhhlawh piahna zawl chhe te, bawlhhlawh inchhek khawmna lai atang chuan Bangla channel-a kan hmuhnawm tih em em mai Street Hawk-a helmet ang a zuk khai chhuak nawlh a. A dum a ni lehnghal.

A hmai khuhna a awm lo a, a chhung dûp pawh a awm tawh lo. Mahse, mawi kan tiin pa kan ti kher mai. Ruata’n a chhar bik chu kan thik a ni. Thirchhia lah a chhar tlem ber bawk si.

Valpuia insum zo lo chuan, “Kan thil chhar reng reng inţawm vek tur kan tih kha aw!” a zuk ti hram a. “Aw in khum ve dawn lawm” tih pahin a mah chuan a’n khum hmasa te te a. Puitling helmet a nih bakah a cushion a awm tawh lo nen, a lu a te bawk si a, a hmui leh khabe chiah a lang thei. Fanghmir Lalpa a ang a ni tawp mai.

Intithei takin a zuang a, bike te khalh lemin “vroom vroom” a ti vak vak a. A chang leh posi te a la a. Chutia a sapatal vel lai chu Valpuia nen chil putin kawngpui atang chuan hrilhhai zetin kan thlir reng a. Mahse, thawklehkhatah beisei loh thil a lo thleng ta!

Ruata chu a dinna bawlhhlawh hlawm tam tak nen chuan thlang lamah an tawlh thla ta dial mai a. Kan han nuih chiam dawn a; mahse thih leh dam inkar a ni tih kan hre thiam ve tlat.

A rang a rangin Valpuia nen bawlhhlawh kara ke tlum thawih thawihin kan thiannpa ngaihven tur chuan kan liam thla ve nghal a. A helmet chharna lai kha hmun zawl tak tak niloin bawlhhlawh tling khawm inchhek vum mai mai a lo ni a. Khatia a han zuan a, a han tum vak vak takah khan a chim ta mai a ni.

Lengkir sang vak lo, tlak sual erawha thihna tham tur a ni ang. Chu mi hnuaiah chuan bawlhhlawh zingah a Street Hawk helmet khum chuan a lo let ngât a.

“Ruata, Ruata”
“Ummm…” (a rum ţuah ţuah mai)
“A na em? A na em?”
“Haw ang u (tap pur chungin a rawn ti a)”
“Tap suh, khawi lai nge na?”
“Ni e, tap suh i pa lo lutuk”
“Ni e, i tah chuan a na lo tihna a nih kha!”
“Khawiah nge ka beetar khing?”

A beetar khing zawnga bawlhhlawh kan hai hrep hnu chuan kan hmu ta hram a. Dimdawi takin Valpuia nen chuan kan han kaihkuah ve ngial a. Kan kal dawn ţan chauh tihah Ruata bawk chuan, “Ngawi r’u thil ka hmu,” a rawn ti leh ta. A accident hma khan a hmu tha ropui si a, tunah pawh thil tha deuh a hmu leh a nih ringin kan lo phur ve hle ringawt a.

“Telhawng, telhawng” tih pah chuan kawr kama hnim pik lamah chuan a bai phei uih uih a. A telhawng hmuh chu arbawm tiat dawn a ni. Tunah zawng helmet leh telhawng a nei tawh a, ti fuh a inti ngang a ni ang.

“Kei chu kaih ka ngai lo, keimahin ka kal ang a, telhawng hi rawn keng zawk ula, kan inah kan sat phel ang a kan insem dawn nia,” phur serh surh tak a ni.

Kan telhawng hmuh chuan kuang sei deuh a nei a. Chawi ţung ţung ngai loin Valpuia nen chuan a kuangah vuanin kawng thleng kan hnuk chho a. Kan chaw fun ei bang leh tuithak bur thum pawh chu a ngai ngaiin an lo la awm a.

Kan ipte te kan la a, kan thirchhe zawn chu ina hawn nghal chi a nih loh avangin kawng sir hnim buk karah chuan a ip chawpin kan thukru ta hmak a. Nakinah vai thirchhe zawng Islama lo kal hunah put hah ngai loin he lai hmunah hian kan hruai mai dawn a ni.

IN KAN THLENG

In thlengin Valpuia nen kan telhawng chhar chu kan hnuk kawngtluan a. A khem neng nung tawh mai. Kan hnungah Ruata chuan bai uih uihin min rawn zui ve zel a, helmet pawh a la khum reng a, a chhar tirh a mi kha a la phelh lo reng reng.

Bawlhhlawh kara rei tak lo inphum tawh a khum reng avangin a lu a thak nasa hle a ni ang. A hiat sut sut reng a; a mit a rawn khuh zel avangin a helmet chu siam that sek a ngai a, a ke a bai bawk nen. A indaih lo kawngtluan a ni ber e. Mahse, a helmet phelh loin a lu a hiat thei hlauh a, chu chuan a chhawk ve deuh ka ring. A helmet chhungah chuan a lu mai bakah a kut pawh a la leng. Chu mai ala ni lo, ala hiat kual vel thei lehnghal.

Ruata te in kan thlen chuan khua a thim hle tawh a. Kawngkaah chuan kan telhawng hawn chu kan hnuk lut hrut hrut a. Intithei fahran hian Ruata chu helmet khum chungin kan hnungah a rawn vroom lut a; mahse, a ke a bai tawh lo reng reng. In chhunga nu pathum lo thu te chuan “Eheeee…..” an lo ti rual ţhawt a, kan telhawng hawn a len em avang chuan an lawm viau a nih kan ring.

Ka nu : “Khaw’nge in kal a?”
Valpuia nu : “Engatinge kha’ng te kha in rawn hawn?” (a aw ki atang chuan ani pawh a lawm viau lo a ni)
Ruata nu : “Lalremruat, engatinge kha’ng te kha I khum bûr?”

Zawhna chhan sen loh min zawt zut zut a ni ber mai. Ka nu leh Valpuia nu chuan kan haw har chu min ngaihtuah avangin Ruata te in lamah min lo zawng a lo ni.

Kan hmuipui pu ber Ruata chhanah kan khek nge Ruata ke bai tawh lo thut chu mak kan tih vang zawk? Valpuia nen chuan kan ngawi dun ngal a.

Ruata chuan, “Telhawng kan ei chak a, ram hnuaiah kan zawng a, a vang lutuk a pakhat chiah kan lo hawn thei…”a ti dek dek a, kan nute pathum chu za em em hian an nui ta chiam a. Chu veleh Ruata chu an ni ai maha za hian uar em emin a rawn nui ta vak a. Valpuia nen mak kan ti tawlh tawlh.

Hrilhhai taka rei fe kan din hnu pawhin an la nui tawp hleithei lo a. “Telhawng a…!” an tia an nui tha leh thin. Ka nu chuan nui bawk bawk chungin, “Chaihchun a nih hi…! A rih awm teh reng nen! Thlansaphulkaiin in rawn hnuk haw ve chu a ni awm si a” a rawn ti thei tawk.

Ruata khan chhungte bula insawi thiam nan chaihchun kha telhawng a ni lo tih hre reng chungin min hnuh hawtir a, amah aia kan len zawk mai bakah kan zingah pawh a dawih ber a, a chak lo ber bawk. Mahse a thluak hmang hian min hnen fo mai. Kha mi ni pawh khan ama’n a hnuh ve peih loh vangin a ke a lo bai der mai mai a ni.

In lama ka pa, thinurna meipui nena lo inur vut vut tawh pawh chaihchun thawnthu a’n hriat meuh chuan a dai leh ta! Chaihchun chu chhuanlam atan mai ni lo; min chhanhimtu a ni. Thinrim tana damdawi tha ber chu nuih hi a lo ni.

Ruata lah chuan bum fuh min intiin min fiam nan a hmang fo lehnghal. Naupan laia ka lo vel hrep lo kha ka inchhir ngawt mai. Tunah lah kei aiin pawisa a ngah zawk a, a velh chi tawh bawk si loh. Pawisa ngah chuan huai vak pawh a lo ngaih loh hi! Ka aw te hi thumin ka ban pawh hi sek phiar engang mah se pawisa ka neih si loh chuan ka tan eng nge sawt ang. 😀

Advertisements
Aside | Posted on by | Tagged , , | Leave a comment

MIZO NULA MISSIONARY LEH ASSAMESE TLANGVAL GOGOI by Apuia Tochhawng

Assam sawrkar hnuaiah hian Forest Range Officer niin kum nga vel zet ka thawk tawh a, Mizoramah Deputation in ka rawn chhuak ve zawk a, kum 1988-ah Assam-ah ka let thla leh ta a, tlangval puanthuah khai lai ka ni bawk a, Haflong-a ka chenna quarter-ah chuan ka thawl hle mai.

Kum 1989 May thla tawp lam a ni tawh a, Official thilah Guwahati pan ka ngaih avangin Guwahati pan tur chuan ka insiam a, ka insiam mawlh mawlh lai chuan kan bangla chowkidar Patel-a a lo lut a, “Saheb, khua a chhe si a, kawng lah a tha lo bawk si nen; khaw that hun nghak zawk la,” a rawn ti a, “Patel, naktuka ka thlen ngei ngei a ngai, ngun takin ka chenna saw lo thlithlai ang che,” ka ti a, a lu a bu nghut nghut a. Kan office leh kan chenna colony-ah hian zan lama vak chi rulngan te, chawngkawr te, keite te hial an rawn kal thin a, staff ho kan buai nak nak chang a awm thin avangin ka quarters chu lo veng ngun deuh tura chah ka ni a.

Kum 1972 hnu lamah khan Assam state atangin Meghalaya leh Mizoram chu lak hran an ni a, Assam state chhunga tlangram awmchhun ni ta Karbi Anglong leh North Cachar Hills District enkawl tura post ka ni a, he tlangram pahnih hi tunhma chuan Khasi & Jaintia Hills, Garo Hills leh Mizo District in then a lo ni a, chu chu Forest Circle pakhat Hills Circle an ti mai thin a, he hills circle hi Conservator of Hills in a enkawl thin a, mahse Karbi Anglong leh North Cachar Hills District chauh an nih takah chuan a bialtu Ranger Officer in ka awm ta a ni.

Zing dar 10 a rik chuan ka inpeih fel vek tawh a, mahni chauha long run tur ka nih avangin ka mamawh tur Rifle te, pistol te, thingpui paina flask te, whisky um khat leh ka mamawh thil dang chu ka motor-ah chuan ka hlang fel a, Jeep chu ka han tirum ham ham a.
Khua a rawn dur khuih khuih a, Jeep hood chu uluk takin ka siam tha a, muangchangin ka tlanchhuak ta a.
Lumding Reserved Forest lam kaltlanga tlan a ngaih avangin chak takin ka tlan pur pur a, kelral(clouded leopard) ka hmu zauh zauh a, suamhmang an awm leh zauh thin tih ka hriat ve reng avangin fimkhur tak leh inralring ru tak chungin ka tlan zel a, ka silai pawh load sa in ka dah diam a. Khua a har duhin ngaihtuahna a bing duh vung vung hle mai a, Mizoram lama ka chhungte leh ka ngaihzawngte chu ka rilru-ah an awm vang vang a.

Sai rual(Rogue elephant) ka tawk thut a, ka tlan chak laklawh si a, anmahni sut hlau chuan ka motor chu ka herh kawi zawk a, a brake a lo chak vak si lo a, kawng sira hmawng buk tha zet (Figus reliosa) chu ka su bur mai a, nikhaw hre lo chuan ka let reng mai a.

Ka harh leh meuh chuan khua a lo thim chhulh chhulh tawh a, ka awm a na vawng vawng a, ramhnuai chu a reh tlawk tlawk a, ka chhak tlang lamah chuan tlumpui a kui dut dut bawk a, khawhar a hnem lo kher mai. Helai kawng vel hi chu chhun pachangah pawh thim rum rum khawpa ngawpui un a nih avangin zan thimah lek phei chuan chet a harsat tur zia ka hre sa nghal vek a, na sawi hman a ni lo, a nih loh chuan helai ngawpui dam duk hnuaia tlaivar hi a ni mai. Thingte chu Chhura rual rual an ni tawh a, thingsam a uai huai huai bawk a, ramsa hniak a chiar nuk bawk a, ka insaseng vat loh chuan ka chan tur chu a duhawm lo hle dawn a ni. Ka tlûkna hmun atang chuan harsa ti takin ka tho chhuak a, motor chhunga mi ka hmehen te, ka silai te chu ka la chhuak a, flask ami thingpui sa ver vawr ka pai chu ka han thli a, ka in khawlh khawlh a.

Whisky chu ka rêk chhuak a, dal deuh takin ka siam a, ka han lem sak a, helai kawng hi chu ka tlan ngun thawkhat tawh bawk a, khaw kar kawng vel chu ka hre chiang tawh bawk a, khawchhunga luh vat loh chuan ka nuamsa dawn lo hle tih ka hriat avangin helai atanga khaw hnai ber ka awmna atanga hnai ber kilometre hnih vela hla Phuloni khua pan mai chu a awlsam berin ka hria a, muangchangin Phuloni lam pan chuan ka kal ta a.

Sava hram ri mak tak tak te, bak thlawk ri leh phurh thin te chu ka ngaithla reng a, khawchhak lam atangin thla pawh a rawn chhuak duk duk a, chhun lama khua a chhiat nen chutia khua a rawn thiang ta kûk mai chu ka lawm angreng hle mai a, hliam tenau nena ruahpui vanawn han do leh rih chu thil chakawm tak a ni mawlh si lo va. Thla eng chuan chulai mualdung inkhawh zui mai chu khawhar ti zual tur tawk lekin a chhun eng no ruih mai a, tlangdung inkhawh kham ruah mai te chu thla êngah chuan chiang em emin a lang a.

Thawklehkhatah chhungrilah nuam tih lohna riau ka nei thut mai a, ka hmulthi a ding sung sung a, ka bul hnai velah chuan engemaw hian min vil renga hriatna ka nei a, enge ni ang? Sakei nge savawm nge keite ni ang? Ka silai chu ka hûm nghet sauh a.

Phuloni khua chu ka hma kawi hnih vela hla-ah chuan a awm tawh a, a khaw thlen hma chuan leilet a awm fir fer a, leilet lamah chuan phulrai nuam deuh mai hi a cham duai mai bawk a, helai vela hnam mawlho hian buh chin hi an eizawnna pui ber a nih avangin eizawnna dang han dap tumna em em pawh an nei chuang lo a, kumtluana leilet enkawl chu an damchhung hna a ni.

Cigar ka phawrh a, rifle chu ka bula khawkherh kungah chuan ka han tung a, tui ti takin meizial chu ka zu hlat hlat a, ka awm nuam lo kha a rawn chhuak leh a, engemawin min zui a ni tih chiang takin ka hria. Ka silai chu ka han kau a, ka torch light ken chuan ka han chhun kual pup pup a, engmah hmuh tur a awm si lo, ngun takin beng ka han chhi a, sa an nih chuan an thawm chu ka hre thei ngei ang, an thingtang rah rik emaw chu hriat tumin thawm chu ka han ngaithla a, chutah ka han hawi phei chu ka hma-ah hian hmeichhe pakhat hi a lo ding reng mai a, ka phu nasa ngei mai. Ka lungphu a inthum rawn tluk tluk a.

Chu hmeichhia chuan min rawn pan hnai a, mizo hmeichhia a lo ni lehnghal a, a hmel chu a zahawmin a nungchang a zawi hle ang tih a hriat theih mai a, “Ka pu I lo kalna a hla si a, ka inah lo thleng ta che, a ti ta a.
Chutia hmeichhia lehnghal ram palailenga zana chutia ka hmu ta mai chu ka mak tih a zual a, chhan nachang ka hre lawk lo lehnghal a. Amah bawk chuan, “Helai vela missionary-a awm hi ka nia, ka hming chu Zopuii a ni, i hliam te kha kan enkawl dawn nia, nurse ka training chhuak alawm,” a ti leh zel a.

Chutia min han biak tak bawrh bawrhah chuan ka hamhaih a reh a, ka zui ta a, kawng chin a hre hle mai a, mahse mak takin kawng atangin min penpui zawk a, mi a beisei deuh emaw chu le ka ti rilru hman a, kawng atanga chil pik phak lekah chuan thlan vung hi a lo awm a, chu thlan chhu kawkin he thlan hi tuma hriat loha awm mai mai tur ania, mahse he thlan a lo awm tak ngawt nachhan hi i la hria anga, i thin a rim ve viau mai thei a ni,” a ti a, a tawng pah chuan a sehchilh nawk nawk a, a thin a ur a ni tih a hriat hle mai.

Khaw lam pan chuan kan kal leh a, leiletah te chuan uchang an lo tlak tluar tluar a, khaw chhung kan hlut a, khaw chhunga in te chu a lo thim khup vek tawh a, an mu reh tawh a ni ngei ang, dai kawngkhar te chu a thing thip thep a, Zopuii chenna in lam chu kan pan phei zel a.

In chhe tawh takah hian kan inzui lut a, bati a han chhi a, in chhung chu thla thum vel luah tawh loh ni awm fahran hian a chul rup tawh a, a khawharthlak duh vung vung hle mai. Ka hliam te chu kan silfai a, uluk takin min tuam sak thlap a, chaw ka ei a, ka eikham chuan meizial ka han zu vang vang a, ka hma ah chuang lungngai hmel takin a thu kun lap a, ani anga hmeltha hi chu Mizo nula zingah an awm tam lo hle in ka hria a, fit ruk zeta sang ka ni a, palian inkhaithli thlerh thlawrh ka ni chung pawh hian ka beng chen vel zet chu niin ka hria. A ngo in a pian a nalh si a, a hnute bu kawh lah mai te chu chil puta en tham niin ka hria.

“Aizawlah hian ka nu leh pate an awm a, dawr lian tawk kan nei a, ka pa chu sumdawng hausa hmasa pawl a ni a, Doctor zir ka tum a, mahse interview na ah ka tlin loh avangin ka zir thei ta lo a, Shillong-ah nurse ka zir ta a, ka zir chhuak a, Civil-ah reilote ka thawk a, ka pianthar tak avangin Missionary in ka chhuak a, ka nu leh paten remti lo hle mahse Lal Isua chanchintha puan darh hi ka koa tla-ah ka ngai tlat a, ka chhuak lui ta a nih hi,” a ti a.

“I chau awm si a, mu rawh aw, mutna ka siam ang che,” a ti a, khum awn tlei tlawi deuhah hian mutna min siam sak a, ka mu thuai a, ka mutna khum chu ka inleh zawngin a chik tuarh tuarh a. Pawn lamah chuan thli rum a thaw vung vung a, pawn lamah chuan pen thawm ka han hria a, mi pahnih vel niin ka hria a, kawngka an rawn chum dawt dawt a, “Tunge a chhungah khan awm?” an rawn ti a.

Mak ka ti hle mai a, Zopuii chuan a chhang mai turah ka ngai a, mahse a reh ta tlawk tlawk mai si a, pawn lam atang chuan vin angreng takin, “Tunge khatah khan awm? Rawn hawng vat rawh,” an rawn ti leh a.

Ka tho chhuak a, kawngka chu ka va hawng a, Zopuii mutna chu ka va en hram a, mahse tumah an lo awm hauh lo mai!

Putar pakhat leh tlangval pakhat hi an lo lut a, putar sam tuak var vo mai hian, “Ka pu tunge i nih?” a ti a.

“Helai bialtu Ranger hi ka ni, Official thilah Guwahati pan tum ka ni a, kawng lakah ka che sual a, ke-in in khua hi ka rawn pan a, khaw thlen dawnah sawn Zopuii inti hian min lo hmu a, he inah hian min hruai lut a ni,” ka ti a, anni pahnih chu makti lutukin an inen a, tlangval zawk chuan, “Ka pu dawt i sawi lo maw?” a han ti a, “Dawt ka sawi ve ngai lo,” ka ti hmak a.

Putar chuan, “Ka pu min rawn zui teh,” a ti a, kan inzui chhuak a, kawngka chu kan kalh a, thil engemaw dik lo chu a awm a ni tih ka hre nghal mai a.
Ka luh hmasakna in atanga in ngana-ah chuan kan lut a, an chhungkua in an lo la meng thap a, putar chuan, “Dhoni, kan mikhual hi eitur han siam sak teh khai,” a han ti a, an nu ni awm tak chuan kel hnute leh chhang ur hlim tih hriat tak mai hi min rawn chhawp vat a, ka han ei a, a lo tui zêk a.

Putar chuan a chhungte chu mu turin a han tir a, an mut reh hnu chuan, putar chuan laltin eng chau tak mai hi ka bulah a rawn chhawp a, “Saheb, I chauh viau ka ring a, mahse thil engemaw hrilh duh che ka nei a ni, mahse ka thu hrilh tur che hi ka ka atanga chhuak a ni tih i sawi chhuak tur a ni lo, min tiam rawh,” a ti a

A duh ang chuan ka intiam a.

“Saheb, milian, officer i ni a, ka ring ngam che a, ka thu sawi tur hi ngun takin lo ngaithla ang che,” a han ti te te a. A sawi zawm zel a.

“Kan khua-ah hian sumdawng hausa deuh mai an awm a, kan khua-ah chuan an hausa ber ang, an hausak avangin miin an tlawn a, an hlau bawk a, he khua hi an thunun a ni, he khaw roreltu an ni ber mai, fapa tlangval hmeltha deuh mai, lehkhathiam bawk si hi a awm a, Calcutta-ah MA a zir zo a, a hming chu Gogoi-a a ni, an chhungkua hi Hindu ruh em em mai an ni a, an duh loh zawnga awm chu an tiduhdah thei hle niin an sawi.

“Tichuan, mizo nula pakhat Zopuii hi kan khua-ah hian a rawn awm a, kan chhungkua hian kan ngaina em em mai a, kan inlenpawh reng thin a, kan chhungkaw zinga an damloh chuan min enkawl thin a, kan tan chuan a hlu thlawt a ni, tunhma chuan Hindu kan lo ni ve thin a, mahse Zopuii zarah Lal Isua chu Lal leh Chhandamtu-ah kan lo pawm ve ta a ni.

Hla taka tawng ang mai hian a aw chu hriat a har hle mai a, ka han en chuan a mittui a lo parawl kuang mai a.
“Saheb, tichuan Zopuii chu Gogoi-a chuan a ngaizawng a ni tih kan hre ta a, a lenchilh tluk tluk mai a, Zopuii pawh chuan duh chin a lo nei ve mai bawk a, zanah te hial an riak dun tih kan hriatin kan rilru a na ngawih ngawih mai a, Lal Isua chanchin min hrilhtu berin chutia nulat tlangval nawmchenna lama min tlansan mai chu kan thinlung a na vawng vawng mai a ni, Zopuii pawh chuan min hel deuh ta tlat a, tunhma anga infiama inkawm bawrh bawrh thin kha kan inkarah leikak thuk tak a awm tawh a, khawlaiah inhmu in inbe fo mah ila, thinlung tak chuan kan inpawh thei tawh lo.

“Chutia nupa anga khawsa dun ta chu Zopuii chu a lo rai ta a, a rai a ni tih a hriat chuan Gogoi-a chuan a hmusit zui ta viau mai a, an insawisa thawm chu kan hre ta fo mai a, va chhan chu kan duh thin a, mahse kan hlau miau si a.

“Zankhat chu Zopuii te in piaha kan kel inah ka thil theihnghilh va lak tumin ka kal a, ka thil theihnghilh chu ka lak hnu chuan ka let leh nghal a, Zopuii in chu kal pelh mai ka han tum a, mahse ngaihthat lohna lian tak mai ka nei thut mai a, bang awng atang chuan ka bihthla ta a. Gogoi-a chuan Zopuii chu a lo sawisa a, Zopuii chu thi hnuang hian chhuatah a lo mu a, Gogoi-a chuan, ‘nang hmeichhia hi ka duh tak tak ngai reng reng lo che, nupui hual ka nei daih tawh, ka fa hi i tihtlaktir duh loh avangin ka that dawn che a ni,’ a han ti a, a hmel chu ramhuai hmel dik tak a ni tawh, a mit te chu a sen rum mai a, Zopuii hrawkah chuan a rek a, Zopuii chu a na lo tawrh tawh nen chuan a tuar zo ta ngang lo a ni, engatinge khatihlai khan ka lo tlan luh mai loh le! Tun thleng hian ka inthiam thei ngang lo va, ka tap tlawk tlawk mai a ni.

“Zopuii ruang chu a pu nawlh a, sawti lamah sawn a kalpui ta a, zui zel turin huaisenna nei tawh hek lo I, ka thlir liam ta ringawt a.
“Chutia Zopuii bo ta ringawt chu an zawng huai huai mai a, khuaa mite chuan rindan kan nei theuh a, mahse tumahin kan sawi chhuak ngam lo, police an lo kal a, mahse tihngaihna an hre bik lo a, an let leh mai a, chuta chin chu Zopuii tawng thawm ni awm tak te, helai vela a tap thawm te chu kan hre thin a, kan hlau em em vek a, Gogoi-a chu hmannni kha’n a ramvak savawmin a seh hlum a, a hmel pawh hmuh tlak loh khawpin a seh chhe vek a ni,” a ti ta a.

Mak ka ti kher mai a, dawt zawng a sawi hauh lo tih ka hria a, a thlarau ngei pawh ka hnenah a rawn inlar si a. Mahse a thlarau chu khawnge a kal tak ang tih chu ka ngaihtuah zui vawng vawng a.

Aside | Posted on by | Tagged , , | 1 Comment

DAMPA TIGER RESERVE A NGAU KAPTUTE MANTU MAN AN NI

Thu kan dawn danin nikum December thla laihawl vela Dampa Tiger Reserve huamchhunga Ngau (capped langur/Trachypithecus pileatus) kaptu mi 3 te chuan anmahni mantu Forest Guard 3 te lakah FIR an thehlut a, nimin kham West Phaileng police ten an man.

Kan thudawnna in a tarlan danin heng Ngau kaptu mi 3- V. Rualsailova s/o V. Lalramthara (L), Lalrinawma s/o Deri leh Noela s/o Kumara te hian anmahni mantute lakah hian FIR anthehlut a, he an FIR thehluh avang hian anmahni mantute hi police ten la in nimin (Thawhlehni) bek khan bail a chhuahtir lehnghal an ni.

Ngau capped langur/Trachypithecus pileatus) te hi Schedule 1 animal (mang mai hlauhawm, humhalh ngai bik) an ni a, a tihlumtu hremna hi WPA 1972, Section 51 hnuaiah kum 3 lungin tan leh Rs 10,000/- aia tlem lo chawi a ni a, hemi piahlamah hian protected area chhunga sapelh pawh hi dan bawhchhiatna tho niin hremna pek belh theih a ni.

Author : Kiddy Vanchhawng Vanchhawng

Aside | Posted on by | Tagged , , | Leave a comment

RAHPUAH BOMB RAP PUAK

Date 15.1.2018, Thawhtanni Zinglam dar8 vel khan Lawngtlai District khawthlang lam, Parva khawbul,Bondukbanga khua ami, Jitua Tongchangya chuan Chawhmeh zawnga an ram kalna ah rahpuah bomb rap puak palhin hliam na tak a tuar.

Zingkar khan Jitua Tongchangya, kum 26 mi leh a thianpa Morokto Tongchangya te hi chawhmeh zawngin ramah an kal a. Chawhmeh an zawn zawh hnu hian Hmunphiah kek turin an kal leh a, chutia Hmunphiah kek tura an kal lehnaah chuan Jitua hian Rahpuah bomb hi a rap puak palh ta a ni.

Bomb hian Jitua kephah vei lam (a kheimit hnuai lam zawng) a thlawh dar vek a, a ngal dinglamah hliam natak a tuar bawk.Jitua Tongchangya hi tukin zing dar 7:30 vel khan District Hospital Lawngtlai rawn thlenpui a ni a, amah enkawltu Dr. Vanlalremsiama chuan a dinhmun chu nunna atana hlauhawm a nih loh thu sawiin, vawiin vek khan Lunglei lamah a refered a, chawhnu lam dar 1 vel khan Lunglei an pan nghal.

Bondukbanga hi India ram chhung, Myanmar atanga km 5 vela hla a awm a ni a, Rahpuah Bomb hi India ram chhunga kam anih thu leh Myanmar Sipai kam nge Arakan Hel Pawl kam tih an hriat loh thu Jitu hruaitute chuan kan Palai an hrilh bawk.(PS: Tongchangya ho hi Chakma angah kan ngai thin a, mahse anmahni erawh hi chuan Chakma an inti lo a, Dainak an inti a, Tribe hran niin an insawi a, kum 1989 khan Bangladesh sorkar chuan Tongchangya ho hi indidenouscommunity pakhat angah a pawm. -KV)

Aside | Posted on by | Tagged , | 2 Comments

US hnenah Apple-in chhiah dollar tluklehdingawn 38 (Rs tldn 2425.92) a pe dawn

* US chhiah lak dan thar avangin khawvela company lian ber pawl Apple-in chhiah awlna tura ram danga sum a dehchhuah thin tihdanglam a tum.

* Apple hian US-a inbun ngheh leh zuala hna thar 20,000 vel siam turin ruahmanna a siam.

* Apple-in vawi khata chhiah a chhunluh tur Rs tldn 2425.92 hi Mizoram sorkar 2017-2018 budget Rs vaibelchhe 8803.10atanga chhutin Mizoram tan kum 27 leh a chanve budget a niphak.US-in chhiah lak dan thar a kalpui tak avangin Apple chuan ram danga sum a dehchhuah dollar tluklehdingawn 250 vel atangin chhiah atan dollar tldn 38 (15.5%) a pe dawn.

US corporate tax rate tihhniam a nih atanga vawi khata chhiah chhunglut tam ber tura ngaih a ni a, technology campany lian hian US-ah hmunhma thar din belh a, hna thar 20,000 siam belh a tum bawk.Ruahmanna a siam dan chuan tun atanga kum nga chhungin US economy-ah dollar tldn 350 chuang thawh thei turah a inngai.

Apple hian chhiah a tam thei ang ber awl a duh avangin an hmunpui ber US chhuahsanin chhiah lak tlemna ramah phone, tablet leh gadget dang dang an siam thin a ni.

Apple-in chhiah awl tuma hma a lak dan hi US mai ni lovin European Union leh UK-a ram roreltute chuan an sawisel nasa hle thin.

Donald Trump pawhin inthlan campaign laiin nasa takin a sawisel. US President a nih hnuah chhiah lak dan siam tha turin hma a la a, hei vang hian nikum June khan Apple’s chief executive officer Tim Cook chuan US-ah thil liantham chi thum kalpui a intiam.

Apple hian chhiah lak tlemna rama hna a thawhna atanga dollar tldn 246 vel an hui tawh a, US sorkar chuan heng a sumdehchhuah atang hian 15.5% chhiah pek a pawmsak angin nilaini khan Apple CEO Cook chuan dollar tldn 38 an chhunglut dawn tih a puang.

Apple hian US-ah hnathawk 84,000 vel a chhawr mek a, kumin atan US bika khawl an siam chhuahna tur leh zuar chhawngtute tan dollar tldn 55 hman chhuah a inbeisei.

Trump-a sorkar chuan chhiah lak dan thar ‘2017 Tax Cuts and Jobs Act’ kalpuiin January 1, 2018 atangin hman tan a ni.He dan hnuaiah hian sumdawng lian hnena corporate tax 35% a lak thin chu tihtlem niin 21% lak a ni tawh.

Apple chuan he dan thar avang hian US-ah a tam thei ang sum hman tumin ruahmanna a siam a, ram danga hma a lak tawhna pawh hnuhkir a tum a, a tum dan chiang tak erawh a hriat theih rih lo.

Apple hian October 2016-September 2017 (kum khat) chhungin thil siam chhuah hralhna atangin dollar tldn 230 a hui a, dollar tldn 48 chuang hlep a nei niin an tar lang.

Author : Thang Khuma T-a

Aside | Posted on by | Tagged , , , | Leave a comment

TUNHNAIAH HAULAWNG KHUAAH SCRUB TYPHUS A LENG NASA, A VEI MI 94 HMU CHHUAK

• Rannung seh a leng em ni.
• Rannung seh vangin Haulawng an buai.

Tunlai hian Haulawng khuaah rannung seh natna (Scrub Typhus) a hluar hle a, nimin khan medical team ten Haulawng an pan.

January ni 16, Thawhlehni khan Haulawng PHC-ah Haulawngkhaw mi 111 test-ah mi 44 chu rannung seh natna vei an ni tih hmuhchhuah a ni. Hemi hma lama Haulawng PHC-a test zawng zawng te nen mi 185 thisen test-ah rannung seh natna vei mi 94 an tling tawh a ni.

Bialtu MLA, PC.Lalthanliana chuan rannung seh natna test-na tur hi 200 thawnin a senso hi a tum vek a ni.

Haulawng PHC, Medical Officer Dr. Lalnunpuii chuan mipuite chu chi-ai lo turin a chah a, Lunglei atangin IDSP team, an kal thu leh blood sample te an lak thu sawiin, Aizawl atangin Dr. Pachuau Malmalsawma IDSP, State Nodal Officer hovin a zir chiang tur Haulawngah an kal nghal bawk a ni. Dr. Lalnunpuii chuan, Scrub typhus vang lo paw’n a positive ve thei tho a, a thente chu a dam tawhte a hma a, lo vei lo dam tawh (past-infection) te an ni bawk. A pawimawh ber chu hritlang khawsik nen a leng kawp a, in enkawl uluk a pawimawh a ni” a ti. Bialtu MLA zarah test kid tam tham tak an neih thu leh hemi avanga test tam tak an tih theih thu sawiin, test an neih tam avanga positive hi hmuchhuak tam an ni thei ve tho tih a sawi bawk.

Author : Vanneihthanga Vanchhawng

Aside | Posted on by | Tagged , , | Leave a comment

AFFIDAVIT DIKLO CHUNGCHANGAH PU HRIATA CHHANGTE IN THUBUAI A THEHLUT

Kum 2013 Assembly inthlanpui a chuh dawna Affidavit diklo thehlutah Chief Minister Pu Lal Thanhawla a puh hnuah nimin 17ᵗʰ January khan Pu Lalhriatrenga Chhangte chuan Serchhip District Court-ah thubuai a thehlut.

Pu Hriata Chhangte hi a u Senior Advocate Pu C.Lalramzauva hovin Ukil 4 in an tawiawm a, Serchhip a MNFParty Worker thenkhatin an tawiawm bawk.

Kum 2013 inthlanpui dawn a affidavit a siamah Chief Minister Pu Lal Thanhawla hian Kolkata-a a inhmun neih a ziak tel lo niin Pu Hriata Chhangte hian a lo sawi tawh thin a. Hemi chungchang hi Election Commission hnenah a thlen a, EC lamah complaint siam hun a lo tawp tawh avangin Court lama kal mai turin thurawn an lo pe nia sawiin, Affidavit-a inhmun a ziah lan tel loh bakah inthlanpui neih tawh thenkhata affidavit hrang hranga Pu Lal Thanhawla kum zat inang lo thluah chu tarlan belh lehin, Serchhip District Court-ah hian Chief Minister lakah hian thubuai a thehlut ta a ni.

Author : Vanneihthanga Vanchhawng

Aside | Posted on by | Tagged , , , | Leave a comment

Zephyr Drama – Zoram Hlimthla – I by Lalremliana Pachuau

Awke Night ‘Engkimtithei’ i en chuan i nui bawk bawk ang a, manganna meuh pawhin hun khat ata a kiansan hial ang che. Mahse, chu drama phena Zoram hlimthla an tarlan erawh chuan i ngaihtuahna kil khat a luah reng lawi si ang.

A hmasa berah chuan sapţawng ngaihsanna i hmu ang a. Ngaihsanna avanga sapţawng thiam tak takna awm si lo chuan i ngaihtuahna a hruai kawi nasa viau a nih loh chuan i chim chin a hriat hle tihna a ni ang.A dawt lehah chuan Korean ngaihsanna dik lo i hmu leh ang. An hlawhtlinna, an thawhrimna ngaisang mang si lova kan nuna hlawkna sengluh tur awm hauh lova Korean ngaisang thiam lo kan nihna kan hmu leh ang.

A dawt lehah chuan duhamna kan hmu a. Thu ţha tak tak sawi chunga ţhenawmte ram nek ching kan hmu a. Wordplay mawi lutuk, ‘Harhfimin a ei’ tih kan hmu leh ţhinte hi a ni, Zephyr danglamna chu ni! Eiru sawi nâna hming phuah nalh zet a ni e.

Harhfima thil eitu kan hmuh rual chiahin midang sawiseltu chu a famkim bik lohzia leh harhfima ei vetu tho a nihzia kan hmu lawi a! Ţha kan intihnaah hian kan sualna zet hi chu kan thukru thiam takzet zetzia kan hmuh kha dawt a ni lo!

A dawt lehah nupui pasal kan inzawn dan ţha lo zet mai kan hmu leh a. Nu leh pa tam tak hian an fanute tân hmangaihna ai chuan sum leh pai an thlan tawh zawkzia leh mi hausa leh hausa inneihtawnna rama kan chen tak mekzia a pholang nalh hle a nih kha!

Aside | Posted on by | Tagged , , , | Leave a comment

MNF IN CHAKMA AUTONOMOUS DISTRICT COUNCIL INTHLAN AWM TURAH BEIHPUI THLAK TAN

MNF Vice President Dr. R. Lalthangliana chuan Chakma Autonomous District Council (CADC) inthlan lo awm turah beihpui thlak tanin, Chawngte-a programme a neih hnuah nimin 17ᵗʰ january khan Borapansury khuaah vantlang inkhawm a nei a, mipui 500 chuang zet an kalkhawm niin thudawnna chuan a sawi.

Dr. R. Lalthangliana chuan thusawiin “Mizorama district council pathumah Congress sawrkar hian buaina an tawk mek a. LADC-ah CEM an thlak a, MADC-ah buaina inmung mek a awm bawk a, CADC-ah pawh CEM thlak a ni a; chutianga Congress an buai mek lai leh, central sawrkar leh India ram hmun hrang hranga Congress an tlak mek lai te, Mizoram state inthlan lo awm tura Congress an tlak dawn avangte bakah, CADC inthlan lo awm tura Congress in thlak dawn avangin a lawmawm takzet a ni,” a ti.

Dr Thangtea chuuan “MNF-in sawrkarna kan siam lai khan CADC area hi hmun ralmuang takah kan siam a. MNF sawrkar laia kawngpui kan laih leh blacktopping kan tihte khavawiinah chuan zawh tlak loh khawpin a chhe zo ta a. Congress hian CADC-ah kum 40 chuang sawrkarna an siam tawh a, nimahsela, development engmah an thlen lo va, mi thiltithei thenkhatte’n an mahni inhaivur nan an hmang a. Tunah chuan, ram hmangaihtu MNF chuan sawrkarna kan siam ngei tawh dawn a, chumi hunah chuan development pawh kan sawrkar lai ang khan kan thlen leh ngei dawn a ni” ati bawk.

Tlabungah pawh YMA Hall-ah hun hman niin Dr. Thangtea chuan, “Mithiam rualte’n an duan SEDP hmangin, sawrkar hnathawk awm lohna chhungkuate damdawi inenkawlna chua thlawnin (free medical treatment) kan pe dawn a, SEDP kalpuina atan Mizoram Development Bank din a ni ang a, Mizoram khaw hrang hrangah dah zel a ni dawn bawk. Chu bakah, thalai thiamna hrang hrang nei, hna hmu si lote tan hna kan siam dawn a, lehkhathiam hna hmu lo hi a sing tel chu kan sawrkar chuan hna kan siamsak dawn a ni,” a ti bawk.

He hunah hian Pu Thangtea chuan West Tuipui Block-I & II atangin voters 106 MNF-ah a lawmlut niin thudawnna chuan a sawi.

Author : Vanneihthanga Vanchhawng

Aside | Posted on by | Tagged , , , | Leave a comment

TANGRUAL PAWL A SAWRKAR CHUAN IN ANGKHAT VEKIN SORKAR ZAR KAN ZO DAWN – PL Liandinga

17th January, 2018 khan Zoram People’s Movement Tangrual PawL Intuaitharna hun ZNP Gen. Hqt. Office, Treasury Square-ah hman a ni.

He hun hi ZPM Steering Committee Vice Chairman Pu Lalthansanga (Chatea-a) Ex- MLA chuan kaihruaiin, Pi F. Lalrintluangi, Secretary Finance Department in hunserh hmangin Pu PL Liandinga’n zirtirna hun a hmang.

Pu PL Liandinga chuan, “Mizorama roreltu inchherchhuan thinte’n kan ram leh mipui an enkawl dan a fuh tawk loh avangin vawiina kan ram dinhmun chu India rama State pachhe ber leh hnufual ber kan la ni tlat mai hi a lungchhiatthlakin, hnam ang pawhin a mualphothlak hle a, hetiang zela kan ram a kal chuan tun aia chhiatna rapthlak zawkah kan ram hi a inbarhlut ang tih a hlauhawm hle a ni” a ti.

Pu PL Liandinga chuan “ZPM in kalphung thar hmanga Zoram siamthat an tumna kawnga an tih tur leh tih loh turte point hrang hranga siamin sawifiahna hun a hmang a, tangrual Pawl a sorkar chuan Party sorkar niloin mipui sawrkar a ding dawn a, inthliarna awmloin mitin ten in angkhat vekin sorkar zar kan zo dawn a ni” a ti bawk.

He hunah hian ZPM Treasurer Pu F. Rodingliana leh Pu Lalduhoma, ZNP President pawhin thusawina hun an hmang bawk a ni.

Author : Vanneihthanga Vanchhawng

Aside | Posted on by | Tagged , , | Leave a comment