SERCHHIP MIPUITE’N DAMDAWI IN TAN MONITOR AN LEI

Serchhip khawpuia Whatsapp group  pakhat  “THUPUI SAWI HONA GROUP” chuan, Dt 7thOct 2017  atanga an lo tuak țan   JNM Hospital Serchhipa inzaina atana an khawl mamawh em em , VITAL MONITOR  Rs 95000 man  hlanna  an nei.

Vawiin Chawhnu dar 2:00pm  a CMO Conference Hall  a he Monitor (Wipro  GE  comen c80,US Company te siam)  hlanna  inkhawm tawi  hi  Pu V. Malsawma’n a kaihhruai a, Report  leh Monitor  tuak a nih chhoh dan  kimchang  Pu Lalbiakdika hnen ațangin ngaihthlak a ni. Pi Vanlalremi Ralte in Monitor thar hlanna neiin he khawl thar hi Serchhip District  a damlo/mipuite tan a tangkai tak hman a nih  ngei a beisei thu leh Hospital tana thawhlawm thawhtute zawng zawng  hnenah lawmthu  a sawi a, Monitor hi Dr Ladawngliana  Chief Medical Officer leh Dr ZD Lalmuanawma ,District Medical Superintendent  kutah a hlan  a ni.

Serchhip khawpui a Whatsapp group pakhat “Thupui Sawihona Group “ hian kan khawtlang hmasawnna atan eng  emaw tal kan ti ve thei lo’m ni tiin Serchhip JN Hospital inzaina room /OT (Operation Theatre)  in a mamawh em  em inzai (Operation) tih laia  damlo  dinhmun kimchang  taka lo tar langtu tur Monitor  chu  lei  tumin  Group member teah  tlem lua leh tam lua awm loin pawisa  thawh khawm  tura  puangzarin, mipuite hnena puanzar a nih hnu ni thum  (  dt 7.10.17 atanga 10.10.17 ) chhung khan  mipuite sum thawhkhawm  chu  Rs Nuaih khat  a tling nghal a, thawhlawm thawh hun khar  a nih hnu thleng hian Serchhip mipuite atangin  thawhlawm(pawisa)   hi a  lut  reng  a ni.

Tichuan  sum thawhkhawm zawng zawng hi a vaiin  Rs 148850  niin, he Monitor (Wipro  GE  comen c80,US Company siam  hi Rs 95000 a lei niin  mipui thawhlawm tlingkhawm hi  Rs 53498.20 a la chuang  hial a ni.

He Whatsapp Group ah hian  members  180 vel awmin thawhlawm thawhtute hi he group member te bakah Serchhip khaw tana mi țhahnemngai, hmun hrang hranga awm sawrkar hnathawk, sumdawng, kuthnathawkte leh bazar nuho thlengin mi 140  chuang an ni a, mi mal bank  AC pakhat hman  hawhsak niin  thawhlawm thawhtute hian a pawisa fai leh bank transtraction  hmangte in thawhlawm hi an thawh a ni
Serchhip-a whatsapp Group   pakhat  hian Serchhip khawpuiin  a mamawh te chu Sawrkar leh Politician  te  beisei kher loa neih /tuak ve dan kawng zawn/dap zel  tha tiin Serchhip District mipuite leh JNM Hospital  in a la mamawh  em em Naute eng hemna  te, inzai kher ngai lova kala lungte  awm chhut kehna khawlte  leh a dangte pawh  a tul dan anga tuak chhoh leh an inhuam thute sawiin Serchhip District Hospital thawktu (Nurse) te indaihlohna pawh  mipui sum tawhkhawm hmanga  nurse  chhawrsak ve  mai an duh hial thute sawilan niin he an thil tihchhan hi  politics inchirhthehna lam hawizawnga lo ngaihsak  lo turin  mipuite   an ngen bawk.

Vawiin a JNM Hospital tana MONITOR hlanna  inkhawmah hian  CMO, DMS te bakah Serchhip Damdawi In a thawktute( Doctorte) ten lawm taka lo dawngsawngin he Monitor  thar hnathawh  dan tur leh tangkai dan turte mi thiamte hnen atanga ngaihthlak  a ni bawk a , he hunah hian “Thupui Sawihona” Whatsapp  Group member bakah   leh thuthar thehdarhtute an kal tha hle a ni.

I ramin eng nge a tihsak theih che tih  zawt lovin , i ram tan eng nge ka tih theih tih inzawt zawk rawh.

Advertisements
Posted in Zoram History | Tagged , , | Leave a comment

KHAWVEL A THLIARKAR KHAWHAR BER – TRISTAN DA CUNHA

Tun hma a British sawrkar ropui takin a ram lo awp tawh tamtak ten zalenna (independence) an hmuh deuh vek tawh laiin ram te nau tam tak erawh chu tun thlengin an thu hnuaiah a la awm hlawm a. Tam tak chu ram han tih tur khawpa lian an ni lem lo. Chuvangin heng ram te nau ho hi ‘British dependencies’ an ti mai thin. A awmzia chu kawng engkim deuh thaw ah British sawrkar puihna leh tanpuina an dawng tihna a ni ber awm e. Heng Pitcairn Island, Falkland Islands, Diego Garcia, St.Helena Islands te hi British Depencies te chu an ni tawh mai awm e. St.Helena Islands hi thliarkar hrang hrangin a siam a ni a, heng Ascension, St.Helena leh Tristan da Cunha te hi St.Helena Islands tia hriat an ni hlawm a. St.Helena Island zinga pakhat Tristan da Cunha hi khawvel a thliarkar hla ber leh khawhar ber (World’s loneliest island) tia hriat chu a ni ta ni.

Tristan da Cunha hi South America khawmual pui leh South Africa ram in kar lai tak vel a awm niin, a thenawm thliarkar hnai ber St.Helena atangin mel 1320 zeta hla a ni. Tristan da Cunha hi volcano-tlangkangin a siam a ni a. A ram zau zawngin hi mel 38 biala zau niin, sea level atanga tehin feet 6760 a sang a ni.

He thliarkar hi kum 1502 daih tawh khan Portuguese lawng miten an lo zu hmu daih tawh a. Amaherawh chu he thliarkara mihringin chen nan a nghet taka an neih kum chu kum 1816 chauh kha a ni a. He thliarkar hmuchhuah atanga kum 300 hnu fe ah chauh mihring an cheng tihna a ni chu. Hemi kum vek hian British sawrkarin Portugal sawrkar lak atangin he thliarkar hi a nei ve leh nghal bawk. Hemi kum bawk hian British Navy te chuan mi pakhat William Glass chu he thliarkarah hian hnutchhiahin he thliarkara mi cheng hmasa ber a lo ni ta a ni. Hemi hnu hian lawng a zin mi ten an tlawh ve zeuh zeuh avang leh lawng a chhiatna tawk ten chen nan an hman chhoh ve zel avangin mihring pawh an pung chho zel bawk a. Tun ah hian he thliarkar a mihring awm zat hi an vaiin mi 300 vel a ni tawh a ni.

Kum 1816 atang kum 1940 thleng khan Tristan da Cunha a nun dan phung chu a ngai chho pat reng tih theih a ni a. Kum 1945 a Indopui II a lo zawh hnu khan thil tam tak in thlak thleng awm chho tanin factory te nau engemaw zat pawh thliarkar ah chuan bun tan a ni bawk. Tun hmaa pawisa ang chi reng reng hmang ngai lo leh mamawh lo khan Indopui II hnuah chuan pawisa te pawh an lo hmang ve tan bawk. British sawrkar pawhin roteltu tura a aiawh atan London Foreign Office atangin Administrator a ruat bawk a, hemi bakah hian kum khat vawikhat lawng lian tirin mipui mamawh leh damdawi thil te phur luh tir tan a ni bawk.

Hetia British sawrkarin an ngaihsak leh nun phung pangai ang ve taka an khawsak tak avangin Tristan ho pawh chuan nuam an ti ve tan hle a. Amaherawh chu nuam an tihna chu tlang kang volcano in kum 1961 khan a nuai ta hrep mai a. He tlangkang hian Tristan ho khawpui ber Edinburgh chu nasa taka sawisa in mipuite pawh chu an sa himnna turin British sawrkarin Cape Town ah a phur khawm ta vek a, hemi hnu hian Tristanians ho chu England ah phurh haw an ni ta vek a ni.

Tristanians mi tam tak chu kum tam tak he thliarkara lo awm tawh leh zin chhuak ngai lo an nih avangin hetia England a an han phurh haw vek avangin an nun phung a buai phah hle. Sapram atanga kal vek ni mahse an thliarkarah an lo chen rei tawh em avangin an zia a lo dangkam hret hret zel a ni.

Kum 1963 ah Tristanians tam tak chu thliarkarah kir lehin, hemi hnu hnian school leh damdawiin chu sawrkarin a sak sak ta bawk. Hemi bak ah hian sawrkar in sangha manna lawng dah khawmna tur harbour house a sak sak bawk.

Tristanians te pawhin an nun thar chu phur takin an chhunzawm tak avangin an hlim hle a.Tunah hian he thliarkar hian chaw hmeh chi hrang hrang zawrhna tlem te, radio station te, internet cafe pakhat leh video dawr pakhat leh swimming pool te pawh a awm ve tawh a, telephone leh fax machine pawh a awm ve tawh bawk.

Kum tinin British lawng RMS St.Helena chuan he thliarkar hi vawi khat tal tlawhin lehkhathawn bakah sa tin chi hrang chrang te, videos, lehkhabu, magazine leh damdawi chi hrang hrangte a rawn phurh luh sak thin.

Tristan da Cunha ah hian lehkha thawn hi a neitu te hnenah pe lo ina hming neitu kha an chhiar chhuak a, an in pe mai thin. Tristan da Cunha ah hian a hmunah Administrator awmin member 12 an awm ve bawk a. An term hi kum thum chhung niin kum thum danah an in thlang ve thin. Member inthlan ah hian Tristanians te chuan an thlan a te kha an in ti lian lutuk ang emaw, a in luling lutuk ang tih emaw an hlau ber thin. He thliarkarah hian police an la awm lo a, police station chu awm ve in, police ni lo in ralthuam tlem azawng an dah khawm zawk a ni.

Tristanians ho hi hnathawk vek an ni a. An hnathawh chu sangha man hi a ni mai a. Chuvangin he thliarkar hian unemployment problem a nei ve lo a tih theih awm e. Hmeichhe naupang ho hi a tam zawk chu lehkha zir turin St.Helena ah an tir thin a, chutah chuan A-Level te passin, hmeichhia ten hmasawnna an nei nasa tawh hle. Naupang ho school atanga an pass chhuah chuan an sawrkar te tak te hian an hna tur chu a lo ruat ve thei mai thin bawk. Tin,mipa naupang hi kum 15 an nih atangin sangha man tir an ni tlangpui a, chuvangin mipa naupang chu chak hle turah an ngai thin.

Tristan da Cunha ah hian social life a tam loh avangin mi in zu in lamn an uar phah hle a. Kum 1994 atanga chhutin Tristanians te hian kum tin zu hi mi pakhatin litre 50 zel in anga chhut an ni. Thlakhatah an sum lakluh hi British Pound 100 anga chhut ani chungin,an pawisa neih tam zawk atangin zu an lei thin. Thil mak tak erawh an life expectancy rate hi UK a mi te nen a in ang reng tho mai.

Tristanians ho hi an in thlah pung chak vak lo hle a. Tunah hian mihring 300 vel awmin chhungkua hi 80 vel an awm a. He thliarkarah hian hnam(surnames) 8 chiah awmin heng Glass, Swain, Rogers, Green, Hagan, Lavarello, Repetto leh Patterson. Kum 1986 khan Scot mi pakhat Patterson chuan Tristanian a neih avangin leh a chen hlen tak avangin Patterson chu Tristanians te zinga hnam thar ber a nih tak chu.

British sawrkar atangin Tristan da Cunha hian engmah tanpuina a pawisa zawngin a hmu ngai lo a. Amah leh amah hi a thawk in, a mamawh chu a thawk chhuak mai a ni. Mamawh an neih tam loh em avangin Tristanians ho hian an sangha man atanga sum an lakluh te, small scale industries leh thil te nau neuh neuh atanga sum an lakluhte hi an dam loh changa Cape Town khawpuia damdawia in enkawl nan an hmang thin.

Khawvel ram dang ngaihtuah chuan Tristanians ho nun dan hi a hahthlak hmel hle a. Amaherawh chu communication technology lamah nasa taka hmalakna a awm avangin engemaw chen chu a zia awm tan tawh bawk. Anni chuan he thliarkar khawhar tak, tumah in an tlawh pawh zen zen lo a awm a, tuma chim buai loha awm hi an thlang ber niin a lang.

Posted in Hriatzauna | Tagged | Leave a comment

60 MINUTES IN SIX DAY WAR

Israeli sana ah chuan zing dar 7:10 am a ni a, Israeli Air Force-a Fouga Magister training jet 16 te chuan an la tihchhin ngai loh ti turin Arab radar operator te hmuh a, air patrol pangngai ang thei ber turin an thlawh thinna pangngaiah an thlawk chhuak a, minute nga hnu ah chuan Israel thlawhna neih zawng zawng deuh thaw 183 te chuan khawthlang lam panin Mediterranean chung zawnah Arab radar te tichhe turin bomb an thlak a, hetiang hian a hma kum 2 kalta atang khan Egypt, Syria leh Jordan ram radarte hian Israel thlawhna thlawk hi a lo man fo tawh thin a, an thlawh san zawng leh an thlawhna lai ngaiah hetiang hian thlawkin, an base pan a an thlawhkir leh mai thin avangin eng teh vakah an ngaihsak lo va, Israel fighter Mirage(France) leh Super Myster jets te chu chhim lampanin, Egypt lam hawiin an inher a, an radio te off vek in feet 60 leka sangah thlawkin an pan tan ngar ngar mai le, Chu mi zing June 5, 1967 atang chuan indona lar leh hmingthang, Middle east hmelhmang thlak thleng vek tu indona, six-days war chu a lo intan ta a ni.

Israel leh a hmelma ramte hi thla tam fe chu an lo in ngur tawh a, Israel leh Arab ramte ralthuam leh thil neih nena khaikhin chuan a inthlau nasa hle mai, Arab ramte hian awlsamte a Israel hneh hi a inring tlat a ni. Israel hi kilthum atangin Arab ramte hian an hual a, Mediterranean tuipui a ni leh tawp mai a. Heti khawpa chan chau Israel tan hian indona ah kawng awmchhun chu chet hmasak a, rang taka hnehna chan tum a ni mai. Boruak a thuneih zawk chu thil pawimawh ber a nih tak avangin, Israel hmalam hun chutah chuan a innghat nasa hle, hetih hun lai 1968 hmalam hian United States hian IAF hnenah thlawhna hralh a la phal lova, a innghahna neih chhun chu France model anga a siam chu ani deuh tawp mai. Israel hian indo thlawhna 200 vel chauh a nei a, Arab ramte hian thlawhna 600 vel neiin Russian siam MiG fighters te pawh an nei tawh a, Soviet siam Tu-16 Badger bombers te phei chu Israel hruaitute hlauh ber a ni.

Pathian hnam thlan leh ruat bik an nihna a lo lang chhuak ta, preemptive strike lar leh hmingthang, ‘Operation moked’ an tih chu hman an tum ta a ni, Chhumlo chat lova Egypt air base te bomb tur hian Israel thlawhna chu hmun thum ah thenin a a bei lam leh haw lam bakah refueling ti lai an awm reng bawk a. Tichuan, lei lama Egypt thlawhna tlim hmur te chu thawkleh khatah an phin darh vek a, Jordanian radar operators te chuan Israel thlawhna thlawk hi lo manin Egypt sipai thuneitute an hriattir ve ngei a, nimahsela hemi hma ni hian an code hman an lo thlak avangin Jordanians te hi an lo hrilh chhawng leh lova, thil a pawi zo ta a ni. An beihpui thlak hun hi hmelma thawhna khalhtute chawei hun lai zing dar 7:45-8:45 AM chu Israel sana ah an thlang nghe nghe.
Chutih lai chuan Israel tana vanneihthlak takin Egypt air force leh armed force a an hotu te chu inspection tiin hmun dangah an awm lai a la ni leh zel a sawi a ni a. Chutah le Israel thlawhna te chuan feet sangkhat a sang a thlawkin Egypt thlawhna tum hmun 10 lai a, thlawhna lo in hung dul te chu an bi tum ta, Thlawhna thlawhchhuah theih loh nan runway an bitum hmasa ber a, chu mi zawh ah thlawhna te chu an phindarh leh ta a ni. Hetah hian Israel hian a secret weapon, ‘concrete dibber bomb’ an tih chu a hmang a, he bomb hi French siam niin parachute hmanga thlak a nih hnuah, rocket motor hmangin runway ah a puak ta thin a, a thawh nat em avangin, a hnuah phei chuan hman phal a ni tawh lo nghe nghe.

Thawhkhatna hi minute riat chhung lek in an zova, thlawhna dang lo thlawk leh in, thlawhna tumhmun dang 14 te pawh hneh takin an bomb leh ta a ni. He operation hi tan a nih hmain ngawrh takin thlawhna enkawltu zawng zawng te chuan thlawhna ralthuam thlakthleng leh a tui thun bakah thil tul dangte tiin hun rei tak enchhinna an lo nei tawh a, minute riat lek chhungin chung chu an zo vek hman tur a tih a ni. Tha thlah miah lovin Thlawhna lo dang lo thlawk let leh (second wave) te chu minute 8 chhunga thlawkchhuak leh vek hman turin an lo buatsaih hman a ni. Darkar 3 hnu(miute 170) a liam chuan, Egypt chuan thlawhna 293 a hloh hman tawh a, chung zingah chuan Russia siam MiG fighter 185, Tu-16 bomber te leh Il-28 bomber te an tel nghe nghe a, Israel chuan thlawhna 19 chiah a chân a ni.
Israel Air Force tan chuan indo chu a la zo mai lo, June 5, zanlai dar 12:45pm a ni tawh a, IAF chuan Arab ram dang, Syria leh Jordan air force bakah Iraqi H3 airbase te lam chu a hawi leh ta, Syrian air force thlawhna hmun 3 a thena hmun hnih chu an ti chhe vek a, Jordanian air force thlawhna neih zawng zawng 28 a chhe vek bawk. 1967 Indo (six day war) a han tawp chiah chuan Arab thlawhna 450 a chhia a, Israel chuan thlawhna 46 a hloh ve a ni. IAF avang hian Israel lei lam sipai, tank leh paratroopers te chuan Sinai, Golan leh Jerusalem ah awlsam te in hnehna an chan phah a, Sinai thlaler a tuiin tur nei lova arab sipai in retreat leh tam tak an awm bawk. Thenkhat chuan Sinai thlaler ah hian Israel air force hian cluster bomb a hmang niin an sawi. Six day war (Operation moked) hi hi khawvela air force operation hlawhtling ber pawl a sawi a la ni ta zel a ni.

Czars khiangte

Posted in Thu Ngaihnawm, True Story | Tagged , , , | Leave a comment

CHAKAI ESSAY by Soske Muanpuia

Chakai hi Sap ho chuan Crab an ti Vai ho chuan an ei țhin hnam dangte ang tho in. Chakai chi hrang hrang hi khawvelah engzat nge awm hriat a nilo a, anmahni pawh an in hrepawh in, an intlawhpawh lutuk lemlo. Mizoramah pawh hian chakai chi hrang hrang an awm a Aikam, Aidup, Aifiar leh Aium te hi a lar zual deuh te an ni awm e. Dan pangngaiin chakai hian a țhiante ang bawkin nghawng a neilo a, mahse a in kiltawih phahlo.

Bawppui lian tak tak pahnih a nei a, an style ve nge ka hrelo a an bawppui hi a intiat lo tlangpui, a remchan zawk vang a niang. Tin ke țang te tak tete pathum veve a sir lehlam lehlamah hian an nei bawk, heihi a țangkai hle a, chakai man țhinten an hnung khirhna tur liau liau a an pianpui ve a ni an ti.

Hmasang ațang tawhin chakai hian sakhaw bulbal an neih hriat a nilo a;  țawng upaah pawh ‘hmeichhia leh chakai in sakhua an neilo’ tihte a kan neih hi, hengte avang pawh hi a niang tun thlengin sakhaw mumal nei a pawl indin an tum awm hriat tur a awm lemlo.

Chakai meichher chhit hi a nuam hle a, hmanah pawh chakai meichher chhit turin kan țhian ho kan kal a, kan thawk rip khawp mai. Thimhlimah hmui kan chiah a, zan dar 8 velah man turin kan thawk chhuak a chakai man ngam kha kan lo awm leh miah silo a hmawlh in kan hawlh let kan hawlh let mai. Kan țhianpa phei chuan a cheh mawlh kha a hlau a,chakai man tum a kal e tiloin a hel zak zak mai asin.. Chuan tuiah kan cheng daih asin le….e a ni lehlo, zan ka ti tak e; zanah tui an cheng ngailo tak.

Dan naranin chakai hi chhum hmain thah hmasak tur a nia,  athah dan erawh ka hrelo.  Chakai hian a pangah mit an nei a an hmuh theih leh theih loh ka hre chiahlo a, mahse a mit lo chuan han hmuhna vak tur dang a nei bawk silo a a hmuh theih ngei ka ring. Hmulo se a cheh tur hi chehfuh theih ngaihna a awmlo a cheh țhelh zel ang. Chu bakah a mit lo a bawppui a hmuh daih thu a awmlo.

Chakai hian hnar a neilo a, a chhan chu a len tawh loh vang a ni. Kan hriat angin chakai hi a chêp/tawt em em a chuvangin taksa bung hrang neih duah hi țul a tilo a ni….a niang. Tin chakai hian nghawng a neihloh angin kawng pawh a neilo reng bawk a ni. Chakai sa hi a tui hle a chakai thau phei chu han ei hian tukhum sam hi a mawm hlap thei zu nia.

Chakai hian sakhua a neih loh avang hian a inkhawm ngai lo a, amaherawhchu chakai nunah hian mizo țhalai ten entawn tur tam tak kan nei awm e. Chakai hian ruihtheih thil a ti ngai lo a zuk leh hmuamah hian a fihlim hle bawk a ni. A țhiante a rel thu hriat a nilo a, tunlai țhalai te angin duhawmna thlahlelin ‘choak archang tawnin’ ngona a hman thu hriat tur a awm heklo. Zanah a mengreiin zing a tho tlai lo a, chhungte chawmhlawmin a awm ngailo, amah a in chawmzo a a fak awm em em a ni.

Chakai hian ei zawnnan huanthlai a siam hriat a nilo a, lui leh a kam vela cheng chi a nih avangin a remlo te pawh a ni mahna. Chakai hian family planning hi engtin chiah nge an kalpui hriat a nilo a, mahse chhungkua a cheng chi an nilo, mahniin kua an nei deuh fur țhin a. Mahni kua tur pawh lai peihlo chu an hmusitin an nuihzat em em țhin a an endawng hial țhin. Chakai tamtak chuan chen nan lung hnuai rem chang hi an hmang hmang ve nasa hle a, chakai man dawn chuan lung lian deuh deuh phawh nachang hi hriat a fuh hle, lung a awm remchan loh chuan phawh loh mai tur a ni.

Chakai hi an pian a nalh lo hle a; an mahni pawh an zak ve țhin hle. Ui te anga khawi fin a kawr han hak tir chiam pawh hi an rem lemlo hle. Tin anmahni hian in thlahrun nachin an nei ve bawk tih hriat tur a ni a; Khawifin țalh tum hi a fuh ber lemlo thei ang. Hmanah pawh kan țhianpa in chakai khawifin a tum a, ka țawngtheih tir dawn e a tia, kal ngil ațangin bul a țan a, a hlawhchham.

Chakai hian zai a ngaina lo hle aniang Idol leh Icon velah pawh a tel ngailo hle a fiamthu lamah a thlen chin lah ka hre heklo. Chakai hi țhenawm te tan a bengchheng siam ngailo mi tak mai an niin an ngawi chawi hle a. Sangha, kaikuang leh chengkawl te nen pawh hian țhenawm chungchangah an tualthu a chhiat thu hriat a ni ngailo. Chuvangin chakai hi țhenawm fel tak a ni ngei ang tih a hriat theih. Chuvangin Chakai angin a sir zawngin i kal lo ang u.

Posted in Literature | Tagged , | Leave a comment

LUNGLEI BUL ZOTLANG KHAMAH BOLERO CHESUAL, A HMUNAH CHRISTY BORAL A KHALHTUIN HLIAM TUAR

5th November, 2017 sunday zan dar 10:30 p.m vel khan Lunglei bul Zotlang khamah-Bolero tlan liamah a hmunah Nl. Christy a boral a, a khalhtu Ramdinpuia erawh hliam tuarin Christian Hospital Serkawnah admit a ni.

He Motor tlan liamna lai hi Tyre works piah Pu Robuanga te in zawnah niin Pukpui lam atanga Lunglei lut tur a ni a, Zotlang kham a railing dah loh lai Mau leh Thirzai mai a hungna laiah a tlanliam a ni.

Bolero chesualah hian mi pahnih chuangin Motor neitu hi Pu Sangthanga, Chanmari (SDEO, Hnahthial) a ni a, Motor hi Ramdinpuia kum 17 S/o Sangthanga Lunglei khalh niin  Christina Lalhmingmawii 27 D/o V. Lalthlamuana, Chanmari Lunglei nen an chuang a ni.

image

Chanchin hriat a nih veleh hian Zotlang Adventure Club member-te rang takin an che chhuak nghal a, zan khawthim hnuaiah an hmanrua nen khamah an chhuk thla a, Motor hi  a hmalam chu a darh chhe hle niin sawi a ni. Christy ruang hi harsa takin lakchhuah a ni a, Ramdinpuia hi biak theihin a lo awm hlauh a ni.

Ramdinpuia hi Hospital-a admit a nih hnuah a khingkhang ruh a tliak tih hriat a ni a, hliam dang na lutuk nei lovin tukin lamah pawh a dinhmun a tha niin Hospitala thawktuten an sawi.

Christy ruang hi nizanah an in Chanmari Lunngleiah tlaivarpui a ni a, vawiin lamah vui a ni ang.

Posted in Zoram Crimes and Accidents | Tagged , , | Leave a comment

US-AH BAPTIST BIAK INAH MI 26 KAHHLUM AN NI: HLIAM 20 AN AWM

Nimin Sunday dar 11:20am khan Texas state a First Baptist Church, Sutherland Springs-ah misual pakhatin inkhawm lai a pawngkah chiam a, mi 26 in nunna chanin hliam 20 an awm bawk. Sutherland Springs hi San Antonio atanga chhim chhak mel 32 vela awm a ni. Thi zingah an Pastor Frank Momeroy fanu, Annabelle Renee Pomeroy, kum 14 a upa pawh a tel. Pastor Frak hi nimin inkhawmah tel lovin, Oklahoma a a zinbo lai a ni.

Biak In chhunga Pathian chibai buk a inkhawmho hi kum 5 atanga kum 72 inkar an ni.  Hliam tuar 2 chu hospital pan pui an nih laiin an thi. Hliam 10 te chu Brooke Army Medical Center, San Antonio ah helicopter a phurh niin, enkawl mek an ni.

image

Pastor Frank chuan Sunday hmasa khan sermon ngaihnawm tak a sawi a, chumi tum chuan, “Eng dinhmunah pawh dingin harsatna hma chhawn mah ula, Pathianin nangni aiin chung harsatna chu a hrechiang zawk a; harsatna karah pawh a kohna che u leh ti tura a ruat che u chu, thuawih takin in ti zawk tur a ni” tiin, a kohhran enkawlte chu a fuih a ni.

image

Hetianga mi kaphlum chiamtu hi Derin Patrick Kelly, kum 26 a upa a ni a, US sipai a kum 2010-2014 chhunga tang tawh, nupui fanaute a sawisak vanga hrem tawh niin, Court Martial hmanga ban a ni. Sutherland Springs atanga mel 35 a hla New Browndield a cheng a ni.

Mit a hmutute chuan Kelly hi a dum suit a inchei a, Valero Gas station atanga lo kalin a kawngah ballistict belt hreng a; silai Ruger AR-15 style assault rifle a keng a; Biak In chhunga lo inkhawm mekte chu ava pawng kah chiam ringawt mai a ni. Chutianga a kah chiam hnu chuan ama Car ah chuangin a tlanchhe zui a, mi thenkhatin um zui an duh a, tihngaihna vak an hriat loh laiin truck khalhtu pa pakhat Johnnie Lagendorff chuan tanpui ngai an awm tih hriain, Motor hmanga Kelly tlanchhia chu um zuiin darkar 1 ah 95kmp in a um pui ta a ni. Police ten  Kelly car nang chinga an va hmuh chuan thiin an hmu a; amah a inkaphlum nge, midangin an kaphlum tih a chiang lo, tih a ni.

image

                      Pic: Johnnie Lagendorff

Greg Abott, Texas Governor chuan Sutherland Springs a thil thleng chu an tuarpui thusawiin, thi chhungte an thlamuan nan an tawngtai pui tih a sawi a, Asia rama zin mek President Donald Trump pawhin Tokyo, Japan ram atangin, thi chhungte a tawrh pui thu leh “thil sual rapthlak” (horrible crime) leh “sual thiltih” (act of evil) a ni, tiin a demthu a sawi a ni.

Tun hnaiah Texas state a silai hmanga inthahna nasat ber niin, kum 3 chhunga US ah a vawi 3 thlenna a ni bawk. June 2015 khan White supremacist Dylann Roof chuan Mihang (Black American) Bible study nei lai mi 9 chu Emmanuel AME Church, Charleston, South Carolina state ah a kaphlum a; amah hi death sentence pek a ni. Sept 2017 ah Texas ah Burnette Chapel Church of Christ, Antioch, Tennesee ah gunman-in mi 6 na zetin a kaphliam bawk a ni.
                            Author: C.T. Lalrinawma

Posted in World News | Tagged , , | Leave a comment

LUNGZARHTUM RAMSIAL HI – By Sangzuala Pachuau

Lungzarhtum ramsial hi tun hnaiah ramsial ni lo leh, ramhnuaia sial tla bo rei tawh a nih a rinawm thu PCCF thu sawi ni awm tak kan hre tawh a. Nov ni 5 chhuak Zalen chanchinbuah chuan, ‘Sele ni lovin ka sial thlahte’ tih thupui hmangin Darlawn khua Pu Tlangthankhuma’n a sial thlah kal zel a nih a rin thu a lo chhuak a. He thu khar nan hian, ”Chhimtuipui Wildlife Division hotute chuan he sial an hmuh dan hi sawiin Sele a ang lo an tih thu Zalen an hrilh a. India rama Sele dang nen a inan loh thu leh sial chi khat rama lo awm rei tawh a ang niin an sawi,’ tih a hmang a. Chhimtuipui Wildlife Division hi a awm reng em, a awm a nih chuan a chunga sawi ang hian Zalen an lo hrilh reng em tih hi hriat chian tum mek a ni.
image

Lungzarhtum ramsial hi ramsial nge sial tih i hriat chian duh chuan a hnuaia ramsial document hi lo chhiar chhuak hram la, i ngaihdan kan lo nghak reng e. (thlalak hi thiante thlalak ka hmansak a ni e.)
image

RAMSIAL
SANGZUALA PACHUAU·
MONDAY, 30 OCTOBER 2017

Ramsial: Mizoten sial kan vulh a, in lama kawl chang awm mah se an hun tam zawk chu ramhnuaiah an hmang hial ang a, mahse vulh an nih tlat avangin mihring vulh, ran an ni a, kan ranvulh zingah chuan a ropui ber leh pawimawh ber a ni bawk. Mihring vulh loh, khuarela ramhnuaia awm, sial ang thova a ruala khawsa an awm a, chu’ng chu hming hranpa pe lovin ‘ramsial’ kan ti a, rama cheng sial tihna a ni mai. Ramsa a ruala awm thinte ang bawkin a pa, a pui, a la leh a note te hi a huhovin an awm a, ramsial rual kan ti a, a pachal, kum lama upa, chak leh huai ber a awm chawk a, chu chuan chi thlahtu nih a hauh deuh ber a, chumi bak chu a rualah khan mawh a phur tak tak lo niin hriat a ni. A rual hotu tak chu a puichhur ber a ni thin zawk. Ramsa a ruala awmte nunphung ang thovin amah ngamtu an awma chi thlahtu pui ber nihna a chelh zawh loh chinah amaha tla fal ta an awm a, a rual atanga chhuak kher lo pawh an awm thei tho bawk. Tin, a nu hur dang um vanga a rual atanga chhuak pawh an awm thin. Hetiang kher lo pawh hian a rual zing atanga hnawh chhuah, a pachal ni kher lo pawh a awm ve thin tih hriat a ni bawk. Hei bakah hian ramsial pa hi chhan hrang hrang avangin a rual atangin an chhuak thei a, chu’ngho chuan a paruala (a pa hlang) khawsak chang an nei ve an ti. A nu erawh a mala tla fal a awm ve ngai lo tluk a ni.

A zir miten an chhinchhiah dan chuan, ramsial dam chen hi mihringin an khawi dam rei zawng an chhinchhiah chu kum 30 a ni a, chutiang chenah chuan ramsial pa chu a chalngeng hman hle ang tih a chiang. Hei ai hian ramhnuaia awm, khawi ni lo chu an dam rei thei zawk maithei bawk. Mi thiamte chhinchhiah danin kum 5 vel bawrah hian a pa chu a taksa a puitling thawkhat hman tawh a, a len tur ang pangngai a ni chho tan tawh tihna a ni a, a ki leh a taksa erawh chu an dam chhunga thang danglam ve reng a ni tih mi thiamten an sawi a ni.
A pianhmang: In lama kan se vulh nen hian inanna tam tak a neih laiin a danglamna langsar tak tak pawh a awm bawk. A hriat awlsam nan in lama kan se vulh nen hian khaikhin mai ila a chiang thei zawk awm e.

1. Ki (Horn):
– Se ki hi a mum (conical) a ni a, ramsial ki hi se ki aiin a phek (flat) zawk.
– Se ki chu a pumin a dum (black) a ni tlangpui a, a chang chuan sial zingah pawh hian a ki eng a awm ve thin a. Mahse, hei hi chu piansualna chi khat ‘partial albinism’ vang niin an  sawi. Hetianga sial ki eng ho hi chu an taksa rawngah pawh a tuipal lai chauh var lovin a  taksa, a bikin a lu lamah rawng varin a kap ve tho thin. Ramsial ki chu a tlangpuiin a hmawr  a dum a, a laihawl vel atanga a kiber thlengin a eng (yellow) thin a, a laihawl hi a eng nasa  zual thin.
Ramsial ki hi a kual deuh vek a, kual lo a lo awm palh a nih pawhin a vang viau ang. Se ki erawh chu chhung lamah a kual lut ve ngai lo va, a zâr zawngin a awm deuh vek a ni.

2. Chal (Forehead): Vulh chi sial chu a chal a phek/zawl (flat) laiin ramsial chal chu chhung lamah a khuar lut (concave) thin. A chal hi hma lam atanga enin chhip pawng thur angin a lang bawk.

3. Thlukvum (Back ridge): Sial aiin ramsial hian thlukvum a nei lian/sang zawk.

4. Ke (Limb): A taksa nena khaikhinin sial aiin ramsial hi an ruakhau zawk.

5. Len lam (Size): Dan naranin mihring vulh ai hian nasa takin a lianin a sa pawh a muk zawk niin a lang. Tuna Lungzarhtum ramsial hi a dar (wither) zawna tehin feet 6 leh inches 3-5 vel a ni a, sial zingah hetianga sang hi record a la awm lo. Kan se vulh lian ber pawla kan sawi pawh hi quintal 5 a tling mawh viau a, mahse ramsial erawh chu a nu puitling hi kg 700 vel a ni tlangpui a, a pa puitling rih zawng hi kg 800-1200 vel bawr a ni a, Mizorama awm ang chi ramsial pa thankin chu kg 1200 vel a ni deuh hawlh a, a lian zual erawh chu kg 1500 vel lai a ni thei niin mi thiamten an ziak a ni.

Tin, a rawng hi a dum a ni tlangpui a, a khup chung hret achin hnuai lam var a ni tlangpui bawk a, chu chu a tuipal var tia an sawi thin chhan hi a ni. A chal hi a var paw phuk thin bawk a, a chenna ramhmul, sik leh sa azirin a rawng hi chu danglam hret hret pawh a awm thei.

A hming hi:
Mizote tana sa pawimawh tak, thangchhuahna tur pawha kah tel ve ngaia an sawi chu tumpang a ni a, chu chu ramsial tihna a ni. Sa ropui tak leh kah pawh harsa tak a nih avangin an ngaisangin a lu tar thei nih pawh an chhuang thin hle bawk. Chutianga sa kah har leh ropui a nih avang chuan sawi dan hrang hrang pawh an nei a, tumpangsial tih te, fungtian tih te leh ramchalvawm tih te pawhin an sawi thin bawk. Kan hla hlui tak takah pawh an lo hmang thin a ni tih a chianna chu, ‘Tumpangsialin a vawr e Lalhmingliana,’ tih a awm a. Lalchhungi zaiah pawh a nutapa Hleithanga (Thenkhat chuan Ṭhahleia niin an sawi) ramsial kah a phuahna ah,

Fungtian lu nen Hleite tlangah au ve,
Kha zawng relthang khaw zo chhum ang,
A kiang kim rawh maw.’

tih kan hmu a, hla dangah pawh a awm nual mai. Hetiang a nih avang hian a hmingah ngawt pawh hian kan chiang lo hle a, tumpang, sele leh kawlfung bikah hian kan chiang lo zual niin a lang a, kan sawi ve thin zinga pakhat rauri hi erawh chu danglam deuhvin a lang. Hla hrang hrang bakah, thuziak leh thawnthu hrang hrang kan hmuh phakah chuan heng a chunga hming pathum kan sawi hi a lang hlawm a, mahse ‘ramsial’ tihah hian a leng vek nia a lan avangin, mihring vulh loh, ramhnuaia se rual lo awm, kan history leh kan thu leh hlaa lo lang bakah tun thlenga hmuh theiha la awm hi ‘RAMSIAL’ a ni tih chu a chiang ta phawt a ni.

Tumpang: Tumpang tih hi sawi zing viau mah ila, a nihna dik tak hre chiang han zawh chhuah mai tur an vang tawh bawk nen, ngun taka zir chung leh ngaihtuah chungin sawi fiah i han tum dawn teh ang. Tumpang kan sawi hian tumpangchal tih a ni deuh kher thin a, chu chuan thui tak a kawk nghal thei ang. James Dokhuma thawnthu ziah, Tumpangchal nge Saithangpuii tihah pawh khan tumpang ti satliah ngawt lovin tumpangchal tih a ni kher a. Chuta a sawi dan chuan, a ki berah (a ki ber tih hi a ki bul lama chuar awm nuk, a ki inkheh vanga a ki tuamtu tawlh tawm khawm zel hi a ni) bâk a lawi thei tih a nih bakah, a ki ber leh a ki hmawr inkar chu khawipui hnûn ang maia eng fîm kûk a nih thu a chuang bawk.

A chal pângah mi pathum an thu tlar thei a, a ki lehlam a khaikhupa dah kurkum chhungah raipuar an bawkvak lut han han thei tih a ni a. Pasaltha Sawibunga ramsial kah, hrâng nasa tak pawh kha tumpang tih a ni bawk. Tin, Mizorama sial lian hmingthang zinga sawi tel ve thin kha, Pawihbawiha tumpangsial tih a ni bawk a, a se rual ramtla zinga a nu hur, tumpangin a thlah a ni tih an sawi chiang hle.

Kha sial lenzia kha an chhinchhiah tha hle a, a chakzia pawh hahipa sawi a ni a, Saizahawla nena inbei kha a ni.

‌     Tichuan, tumpang chu ramsial a ni a, tumpang an sawi apiang hi a pachal a ni deuh zel tih a lang a, Pawihbawiha sial kha a tet lai atanga tumpangsial tih ni tho mah se, a thlahtu tumpangchal vanga chutianga sawi chu an nih zawk a rinawm. Chuti a lo nih si chuan tumpang hi a eng ber nge ni ta ang le, a hnu lama sawi chianah dah ta ila.

Sele: Ramsial a ni tih a chiang phawt a, Mizorama kan hriat lar ber pakhat, hlaah pawh an chawi vul, Darzo sih rawn tlantu kha ‘Darzo sele’ tih a ni. A pachal a ni a, a lianin a ki pawh a ropui tham hle a ni tih a chiang viau bawk a. Pu Lalhrima Sailo chuan sele hniak a hmuh pakhat chu a hunter boot No 8 hniak nen inthuah tawk deuhthaw khawpa lian a nih thu a sawi a, a hnua Hrangthanga’n sele chal a kah thu leh sial pangngaiin a khan lohzia pawh chiang takin a sawi a, ramsial pachal, sele tia sawi kan nei tho tih a chiang leh hle. Chutiang a nih chuan, sele chal lian tak tak, ropui tak tak kan nei tho tih a lo lang ve leh ta si a, tumpang leh sele chu a chi hran a ni em tih zawhna a lo awm leh thei ta a, hei pawh hi a khaikhawmna lama khaikhin atan dah tha ta rih ila.

Kawlfung: Ramsial chi tho a ni a, a hma lama Lalchhungi hlaa kan sawi kha ‘fungtian’ tih ni mah se, sele emaw tumpang emaw sawina ni thovin a lang tlat si a ni. Kawlfung hi chu a ropui leh a len avanga kap thin an ni pawhin a lang lo va, a ki vang liau liauva kap thin an nih hmel zawk. A ki hi hmanlai silai hlo bawm, tun thlengah hmuh tur tam tak la awm, ‘fungki’ hi a ni. Kawlfung ki atanga siam a ni tihna a nih ber chu. Mahse hetianga fungki atana an hman leh an sawi mai lo phei hi chu a pianhmang leh a taksa len lam, a nih phung, sele leh tumpang nen thuhmun a ni em tih hi chiang taka sawina hmuh tur a vang em em mai a, Mizoram State Museum-ah erawh a hranpa ngatin kawlfung lu chu an tar kalh mai thung. Hei pawh hi khaikhawmna lama sawi belhah khek leh ila.

Rauri: Ramsial zingah chuan sawi hlawh lo ber leh mi tam zawkin an hriat loh a ni a, amaherawhchu sawi a awm thin tho avangin awm lo tawp chu ni theiin a lang lo. Mahse rauri hi chuan danglam deuhna a nei ta thung a ni. Ramsial chi khat a ruala awm ve tho, a puitling pawh lian teh chiam lo a ni tih sawina a awm nual mai, kah pawh an tum ngai lo a nih hmel. James Dokhuma Khawhar In buah khan ‘ramsial rauri’ tih a ni a, kah tlakah an ruat meuh lo, a taksa a len loh bakah a ki a ropui tham lo bawk.

R.Kapzinga chuan a lehkhabu Khawhring leh Sai Ramah tih phek 204-naah chuan hetiang hian a ziak a. ‘Chuta tanga rei vak lovah chuan ramsial rual an lo kal leh a, an vai chuan pasarih an ni a. Ramsial te chi an ni a, a pachal ber pawh chu a dang ho ai chuan a lawk deuh naa ramsial lian chi zinga a pui naran tiat vel chu a ni ang tih tur chauh, buang deuh lek lek, a mawngtam lam chu sen deuh thâng hi a ni a. Upain sele an lo tih thin ang hi a ni maithei.’

‘Ka hriat ve dan ti ila ka hmuh ve dan a ni zawk ang chu, ramsialah hian a te chi leh a lian chi a hranin an awm a. A te chi zinga a pachal chu sele a ni a, a lian chi zinga a chal ki tha chu tumpang an ti leh mai a ni awm mang e aw ka ti a. Dik maw dik lo maw, ka hmuh ve tawh thin dan chu chutiang chu a ni ve miau va.’ tiin a sawi a. He a se rual hmuhna hmun hi Kahsalong forest chhung a ni a, Bangladesh ram chhung, Mizoram atang pawha hla lo a ni. Heta ramsial te chi a tih hi rauri ni ngeia a lan avangin kan pi leh puten rauri an lo sawi thin pawh hi Mizoram chhungah a lo awm ve tawh ngei a ni ang tih a tirinawm ta hle bawk, awm miah lo se chuan sawi ngawt chhan tur awmin a lang tlat lo a ni. Tin, sele leh tumpang chungchang a sawi pawh hi a hre fuh lo deuh niin a lang thei a. A tawpa khaikhinna lamah tihchian kan tum bawk dawn nia.

Khaikhinna: Ramsial tihah hi chuan thu dang awm theiin a lang lo va, kan chiang ta phawt a. Chi hrang hranga kan sawi thin khai khawmtu a ‘generic name’ a ni tih chu hnial ngai lovin a lang chiang a, hming hrang hrang kan vuah hi i han sawi chiang ve dawn thung teh ang.

Tumpang leh Sele hi a danglam em:
Mizote hian tumpang leh sele hi a hming ang hian se chi dang niin kan sawi thin tih a lang a, chu chu zir chianna leh chik taka ngaihtuah lovin kan pawm deuh burh ringawt niin a lang. Thu leh hla bakah mi hrang hrang sawi han lak khawmin chi dang niin a lang thei lo tlat. Tumpang leh sele kan sawi apiangin a pachal, a ki kheh chin, a taksa pawh puitling tawh a ni tih a lang a. Nimahsela engati nge hming pahnih kan lo pek tlat tih hi ngaihtuah tham tak a ni. Ramsial chanchin sawi tham reng reng kan hriat phakah chuan a pa puitling, a chalngeng chin tawh vek a kawh avangin tumpang emaw, sele emaw chu a pachal tia chhal tham a ni zel tih a chiang ta phawt a.
Ramsial lu ropui chin, tun thlenga miin an tar kan hmuh phak zawng zawng kan han enin, sele lu a ni e an tih leh tumpang lu a ni e an tih zawng zawng pawh han khaikhin ila, a chi hrang a ni thei lo. Sazuk hi chi khat rau rauvah pawh a ki pianhmang a inang lo nasa em em tih kan hriat ang hian, se chi khat, hming hran kan pek mai mai a ni tih a lo chiang ta a ni. A lu leh a ki hi se chi dang a ni tih fiah nan a hman tlak lo va, sele lu an tih leh tumpang lu an tih tam tak pawh hi a inang reng a, tumpang lu theuh theuh pawh a ki pianhmang te a inang lo tho va, sele pawh chutiang tho chu a ni ve a, a kual deuh te, a zar deuh te, a kual nasa deuh te pawh a awm thei vek a ni. Chuvangin sa thuhmun a ni tih a lang reng a, sawi tawh angin a lu leh a ki pianhmang ringawt hi chu a danglam vek theih avangin sa chi dang ni lovin sa thuhmun, sawi dan hrang ni maiin a lang bawk.

A hre awm mi leh upa thil hre tura ngaih tam tak kan zawh kual hnuah kan chiang thei ta a ni. Pu Ngunkama kum 70 mi, Sangau II, Vengthara awm, tawngah pawh Lai tawng ngat la hmang chuan, “Sele tih a nih chuan, a rual zinga awm lo, mahnia ramhnuaia rawl tihna a ni a, lawi kan sawi chuan chutianga awm chu ‘nale’ kan ti a, tun hnua bawng kan vulh ve chinah pawh, chutianga awm bawng chu ‘chawle’ tiin kan sawi leh mai,” a ti a. Hetianga tun hma atanga an lo hman tawh zulzui hian, ramsial pa, amaha tla fal sawi nan pawh kan hmang zui ta a lo nih hmel e. Kan tawng tam tak, thangtharten a tobul kan hriat mang loh hi Lai tawng a ni deuh vek mai a. Hei hian a rawn nemnghet taah kan ngai a ni.

A chunga kan sawi ang hi a nih si chuan, ‘sele’ tih chuan a rual zinga awm lo, mahnia tal hrang a kawk ta ran mai a. Ramsial pa, mahnia tla hrang chin kha sele a lo ni ta a, a rual zingah awm leh pawh ni se chu a hming chu a chhawm zel tho a nih hmel ta a ni.

Chutiang letling chiah chuan, ramsial pa chalngeng chin reng reng kha tumpangchal tiin kan sawi vek a, a rual zing atanga amaha tla hrang pawh ni se tumpangchal a nihna kha a chhawm zel lo thei bik lo a ni.

Tumpangchal kan sawi reng reng chu a kiber nasa tak, a ki hmawr dum fim ral, a ki hmawr leh a kiber inkar erawh khawipui hnûn ang maia eng fim kûk tih a ni tlangpui a. Ramsial pachal kan tih hi kum 10 vel a nihin a ki hi a inkheh nasa zual tan a, a kiber pawh a nasa tawhin a ki laita pawh zaa sawmriat (80%) vel a lo eng tawh a ni. A ki pawh hrawl tham tak tak tawh, a kiber chuar lai pawh nasa tak, a hmawr zum nena a inkar pawh eng fim kuk tawh chin hi tumpangchal kan tih chu a ni ngei ang tih a rin theih ta bawk a, chutiang chu miin sele a lo ti emaw, tumpang a ni an ti emaw pawh ni se a dik thei ta vek tihna a nih chu. Khawi maw laiah lo sawi pawlh ta nawk nawk tawk pawh an awm ang tih hi rinhlelh rual niin a lang lo va, sele a ni e kan tih pawh hi tumpang an ti thei tho va, tumpang pawh hi sele an lo ti thei tho tih erawh a chiang ta a ni. A khaikhawmna ber tur erawh chu, ramsial pachal hi tumpang tih leh sele tiin kan sawi ve ve a, sa chi dang ni lovin sa thuhmun a ni tih hi a ni ta ni.

Kawlfung: Lai tawngah chuan ‘fung’ tih hi sial lam chi hrim hrim sawina a ni tih kan hria a, Pu Ngunkama vek hian, “Lai tawngah chuan ‘fung’ tih hi ramhnuaia awm tihna hrim hrim a ni e,” tiin a sawi belh bawk a. Chuti a nih chuan ramsial a kawk nghal chat bawkin a lang. A tir lama kan sawi, Lalchhungi hlaa ‘fungtian’ a tih pawh kha, kawlfung sawina ni bik kher lovin, ramsial hrim hrim sawin a ni thei tih a chiang ta a ni. Hetiang hian lo sawiin, ramhnuaia awm sial tihna a ni e ti mah ila, kawlfung hi sawi hran bik riau dan kan nei a, tumpang emaw, sele emaw ti ve lova kawlfung kan ti kher hian chhan a neiin a lang. Eng pawh ni sela, tun thlenga kawlfung lu kan hmuh phak chinah pawh, a ki kual tawi, eng fim nalh tak leh lian lo tak a la ni vek a. Hei mai bakah hian tun hma atanga Mizoten silai hlo paina atana an lo hman thin, ‘fungki’ kan hmuh phak zawng zawng pawh hi se ki lian lo tak, kual mawi tak a ni vek mai bawk a. Mizoram State Museum-a kawlfung lu tia an tar ngei pawh hetiang tho hi a ni. Tun thlenga India ram hmun hrang hranga ramsial (Indian gaur) nu kan hmuh theih zawng zawng hi a ki kual a tawiin a eng fim nalh thei hle a, Chuvangin kawlfung kan tih hi ramsial nu a ni ngei ang tih hi rinhlelh rual niin a lang lo. Hmanruaa an hman duhna bakah chuan a sa ropuina leh a lu tar tur pawh chhuan thama an ngaih loh avangin ramsial nu hi kawlfung chu a ni tih hi phat tur a awm lo.

Rauri: Rauri kan sawi thin dan chu a tir lamah khan kan sawi nual tawh a. Mizoten kan lo sawi ve thin tlat avangin a awm ve ngei a ni ang tih chu a rinawm hle a ni, awm lo tawp sawi thu a awm si lo va. Mahse eng sa ber nge ni ang tih hi sawi chiang fak thei an awm mai si loh avang leh, ramsial hming a put tel tlat si avangin ngaihtuahna a tibuai thei viau mai a. Chuvangin sial pianhmang pu ve si, ramsial aia fek leh a ki pawh ropui tham lo a ni tihna a lo ni ta a, chuti a nih si chuan chutiang sa awm chhun chu ‘Banteng’ hi a ni ta a ni. A nihna takah chuan banteng hi kan rama awm lo anga ngaih a nih si avangin ngaihdan neih thiam a har hle mai a. Mahse tuna kan rama awm tawh lo, tun hmaa kan rama lo awm tawh ni thei zingah chhiar a fuh mai ang em tih hi ngaihtuah a ngai ta a ni. Samak hi tunah chuan kan ramah a awm tawh hauh lo va, mahse tun hmain samak kap tawh te pawh sawi tur kan lo neih ve tlat si avangin, kan ramah hian a lo awm ve tawh thin a ni tih a lang a. Chutiang chiah chuan Banteng pawh hi engtik hun lai emaw chuan kan ramah lo awm ve tawhin kan pi leh puten ‘ramsial rauri’ an lo ti a ni ang e tih hi ngaihdan rinawm tak a ni thei ta a ni.

A lu ro tak ngial pawh hmuh tur a awm loh hian thil pahnih a entir thei a. Hun rei tawh taka lo awm ve, tun hnua awm ta lo a nih avang leh ramsial hming puttir ngai ve si, ropui tham si lo, kah tlaka an lo ruat meuh loh a ni ang tih hi a ni a, lo kap an awm a nih pawhin a lu hi a ropui tham ve lem loh avangin vawn that tlakah an ngai lo a ni thei ang tih hi a ni ta a ni. Tun thlenga an chenna hmun chu Myanmar, Thailand leh Java vel khi a nih avangin thil awm thei lo tawp chu ni bikin a lang lo va. Chuvangin Rauri hi kan lo nei ve ngei a nih si chuan, banteng lo hi chu puh tur dang a awmin a lang lo a ni.

Khaikhawmna:
Mumtaz Baig leh a thawhpuiten a DNA an zir chianna atangin sial (Bos frontalis) hi chi hnih (Gayal leh Mithun) awmin an sawi a, Mizoten sial kan tih pangngai leh sebawng kan tih hi a ni maithei. India rama ramsial (Bos gaurus) hi erawh chu chi khat chauh a awm avangin, Mizoten tumpang, sele leh kawlfung kan tih hi ramsa chi dang ni lovin, ramsa chi khat a ni. Rauri hi erawh chu a chunga kan sawi ang hian, research beih leh hnua tihchian theih a nih loh pawhin rin danah chauh a innghat a ni.
***********************

Posted in Fifth Column, Hriatzauna, Zoram History | Tagged , , , | Leave a comment

GREEK MYTHOLOGY : Creation Of Gods & Goddess.. by Chester Ralte

Greek- ho hi hnam changkâng leh ropui hmasa pâwl an ni a, Hmânlai thawnthu pawh ngah tak an ni a, lâr pawh a lâr hlawm hle. Chuvangin a hmasa ber atân an thawnthu a khawvêl leh Pathiante lo awmțan dan hi kan sawi ang a, a remchân dan angin hnam fing hmasa dang, Egypt te, Indian, Chinese, Mayan leh Scandinavian(Vikings) ho te kan la chhawpchhuak leh zêl turah ngai ila..

COSMOS : THE CREATION..

A tirin lei leh vân hi ala awmlova, thil ruak zau tak mai ringawt hi a awm a chu chu Chaos ani. Tichuan hun engemaw chen alo kal zêl a, tichuan chu ruak zau tak Chaos chu lo sakhat in thil thitheilo – Gaea(Gaia, Lei Pathiannu) Tartarus( Lei piahlam ram hremhmun) leh Hmangaihna Pathian Eros- te, Thim Pathian Erebus te, Zan Pathiannu Nyx te anlo chhuak a. Tichuan Erebus leh Nyx chu mudûn in an mahni ațang chuan Chhun Pathian Aether leh Êng Pathiannu Hemera alo chhuak bawk a. Tichuan Gaea- chuan mipa tellovin fa a paia, mipa a hring a, chu chu Uranus( vân Pathian ) ani. Gaea chuan chu a fa lo piang chu Pasalah a nei zui a, Uranus- lo pawh fa dang, Ourea(Tlâng Pathian) leh Pontis(Tuipui Pathian) te pawh anei bawk a.

Lei Pathiannu Gaea- leh Vân Pathian Uranus- te chuan fa râpthlâk tak tak paruk, Milian Mit pakhat nei pathum Cyclops – an tih, Arges, Brontes leh Steropes- te leh Lu sawmnga leh bân zâ țheuh nei milian pathum Hecatoncheires- an nei a, Greek țawnga, ἑκατόν (hekaton, “hundred”) ,χείρ (cheir, “hand”), Hundred hand, unau Briareus / Aegaeon, Cottus leh Gyges te chu. Mahse Uranus chuan chûng an fâ milian leh maksak tak te, ” Heng ramsa râpthlâk te hi ka pawm theilo, Pathian kan ni a, Pathiante chu țha famkim kan ni, chuvangin hêng thilsiam râpthlâk tak te hi Vânram ah an awm ve thei lovang, kan paihchhuak tûr a ni.” tiin lei piahlam khawvel hremhmun hrehawm Tartarus- ah an vâi hian a paihlût ta vek a..

THE FIRST TWELVE TITANS :

Chumi hnu chuan Lei Pathiannu Gaea leh Uranus te chuan fa dang sâwmleh pahnih, milian an nei leh a, chungte chu ‘Milian Sâwmpahnih (Twelve Titans)’ – an tih, Crius, Cronus, Coeus, Hyperion, Iaetus, Mnemosyne, Phoebe, Rhea, Tethys, Theia, Themis leh Oceanus te. Pathian te nû, Gaea- chu a pasal Uranus-nunrâwnna avang chuan a lâwmlo hle a, a fa hmasa te chunga a thiltih avang chuan a thinur reh theilova, A pasal ina Ni êng hmu tawh ngailo tûra Tartarus-a a paihluh afâ te chu lâk kîr leh a a pasal laka phuba lâk theihna hun tûr remchâng a melh rân a, a fa Titans- te zînga a tê ber Hun Pathian Cronus- chu apa ang bawka nunrâwng leh huaisen ani a, chuvangin an unau zînga apa Uranus- hmachhawn tûra a nu Gaea-i thlâwp ngam awmchhun a ni. Lei Pathiannu Gaea chuan apa beihna tûr râlthuam ah Cronus- chu favah hriam tak mai hi a pe a, Cronus- hian a pa Uranus ina Tartarus-a a unau paruk thitheilo te a tân tîr thute erawh a hre velo, A pa aiawh a Pathiante Lal leh Pathian chungnung ber nih theihna kawng țha ber ni a a hriat avangin anu Gaia- chu a thurualpui ve tawp a, anu Gaia erawh chuan tum dang daih alo nei si a. Zankhat chu, mî reh țhap tawh hnu ah Uranus- chu tuipui kam ah tuitakin a muhil a, a mutna kiang lawk thingbuk phêna rei tak lo bîrû tawh Cronus chuan thâwm dîm takin a va pan phei țhem țhem a, a fava hriam tak chuan a pa serh chu a hleh sak ta hlawk mai a. A serh hleh thlâk chu tuipuiah chuan a paih a, a pa serh ațang chuan Tisa châkna, Mawina leh Hmangaihna Pathiannu hmelțha tak mai Aphrodite-i alo piang a, A pa thisen ațang chuan Milian(Giant) leh Ash Tree Nymph/ Erinyes te anlo pian ve leh a. A pa hnenah chuan a thuneihna a tâwp tâk thu leh amah chu Lei leh Vâna thuneihna changtu anih tawh thu hrilh in a pa chu a man ta a.. Tichuan Hun Pathian Titan Cronus- chu Pathiante zawng zawng zînga Lalber alo ni ta a, a unaunu Rhea- chu nupuiah neiin an unau ‘Titans’ chuan khawvelah ro an rêl a, he an rorel hun chhûng hi ‘Golden Age’- an ti. Apa serh ațanga lo piang Aphrodite-i hi a hnu ah Zeus-a fapa Indona Pathian Ares-a nen inneiin fapa Eros- an nei a, (Eros hi Roman ho chuan Cupid an ti a, Valentine Day vela lâr deuh, naute thla nei, hmangaihna thal keng țhin lem hi ani.. CR) Eros- hi Spartan Lal Menelaus-a nupui Helen-ina Trojan Lal fapa Paris-a a hmangaih theih nan a Hmangaihna thal a kâp tu kha ani.

Uranus-a thisen ațanga lo piang Ash Tree Nymph, Lasi pathum Erinyes an tih, Alecto, Megaera leh Tisiphone-i te hi a hnu fe a Crete thliarkar a Zeus-a enkawltu te kha anni bawk a, Chuan Uranus-a thisen ațanga lo piang ve tho Milian(Giant) an awm bawk a, mahse hêng milian te hi Zeus-a leh a unaute hian an ngeih lova, an tihlum nual a, a țhen chatuana hrem turin anti bawk a. Giant- zînga pakhat Encelatus- chu Athena- in a that a, Eurytus-a chu Dionysus-an a that a, Hippolytus-a chu Hermes-an a that bawk anih kha, chûnglo milian dang Eurymedon te, Porphyrion leh Alcyoneus-a bakah milian ho zawng zawng chu an chatuan in hrehawm tak hrem anni bawk.

Khawvêl a Titans- hovina ro an rêl chhûng hi khawvel ropui lai ber tiin an sawi țhin a, Titans- unau te chuan fel takin rorelna an in sem a. Titans unau zînga naupang ber Cronus- a chu a hotu ber ani a, Hun Pathian ani bawk, a unaunu Rhea nupui ah anei a. Rhea chu thianghlimna Pathiannu ani a, Hmeichhia zawng zawngte enkawltu ani bawk. Oceanus-a chu Khawvel tui zawng zawng chunga thuneitu ani a, A unau Lui Pathiannu Tethys-i nupuiah neiin Tui lasi leh lui Pathian te thlahtu anni. Hyperion-a chu êng Pathian ani a, nupuiah a unaunu Theia-i, lei chung boruak zawng zawng enkawltu chu neiin Ni Pathian Helios-a te, Thla Pathiannu Selene-i te, Vârțian Pathiannu Eos-i te hi an fa te anni. Coeus-a chu Thiamna,mihring themthiamna zawng zawng pe tu ani a, A unaunu Finna Pathiannu Phoebe-chu nupuiah neiin fanu pahnih Leto-i leh Asteria-i te an nei a, Leto-i hi Zeus-a nen inneiin thal kah leh rimawi Pathian Apollo leh ramsa enkawltu Pathiannu Artemis-i annei anih kha. Mnemosyne-i chu hriatrengna, finna Pathiannu a ni a.

Tin, Themis-i chu hrilhlawktu Pathiannu ani bawk, Zawlnei hrang hrang leh Delphi- zawlnei te hnena hrilhlawkna petu a ni.

Crius-a chu vân chung arsi zawng zawng enkawltu ani a, Aries arsi bâwrkhâwm hi a chhinchhiahna a ni. Iapetus-a chu mihring hun kal leh thinlung enkawl tu a ni a, a unaupa Oceanus-a fanu Asia chu nupuiah neiin milian ropui tak phîr unau Prometheus leh Epimetheus- te chu an fa te a ni. heng phîr an fâ te hi mihring siamtu an ni a, Prometheus-a hi a thilsiam mihringte hmangaih tak mai a ni a, Mihringte hnena Mei(fire) a pêk avangin Zeus-a chuan chatuan in hremna a pe anih kha..

Tin, Chiron-a a awm bawk a, Titan Cronus-a leh Lasi Philyra-i te fâ ani. Chiron-a hi Centaur hmasa ber a ni a, A kâwng achin hnuailam sakawr, a chunglam mihring a ni. A fanu pakhat Endeis-i chu Zeus-a fapa Aeacus-a nen inneiin fapa pahnih Telemona leh Peleus-a an nei a, Telemona- hian fapa Ajax-a, Troy kulh beihna a tel kha anei a, Tin, Peleus-a hian fapa Achilles ropuia anei bawk anih kha.

Chiron-a hi chatuan mî, thi theilo a ni a, Greek ram Pasalțha tamtak chu hriamhrei hman dan a zirtir a, Achilles-a pawh a têt tê ațanga hriamhrei hmandan zirtir tu ani a, Tin Greek Pasalțha ropui leh lâr tak tak Asclepius-a te, Ajax-a te, mihring alu bawng rapthlak tak that tu Theseus-a te, Argonauts rammutna a an hotu Jason-a te, Zeus-a fapa Medusa thattu mihuaisen Perseus-a leh Phoenix-a te hi a zirtir chhuah te an ni.

Lei Pathiannu Gaea fa dang a pa Uranus-ina Tartarus-a a tântîr Hecatoncheires- leh Cyclops- te chu Titan Cronus- chuan a chhuah tîr duhta chuanglo a, a chhan chu a pa a beih dâwn lai khan anu hian a thiltum rûk leh a unau dangte hi a hrilh duhloh vâng a ni. Gaea-ina a thil tum a tupa Cronus-an a tih duhloh avang chuan a thinur hle a, tichuan Hrilhlâwkna thu a puang ta a, chu chu, ‘Titan Cronus hian fâ aneih hun ah a pa atih ang bawk hian a fâ ten a Lalna anla rawn chhuhsak dawn ani’ tih thu chu’..

TITANOMACHY : WAR OF THE TITANS :

Titan Cronus-a chuan a nupui, a farnu ni bawk Rhea-i chu a hmangaih hle nâ in Tartarus-a a unaute la kîr leh tûra a nu Gaea- ngenna a hnial avanga a nu thinurin apa ang khan a lalțhutthleng chu a fapate zînga pakhatin a chhuhsak dawn ti a anchhia a lawh kha hre rengin an fa piang hmasa ber Hades-a chu a dawlh ta daih a, an fa dang Demeter, Hera, Poseidon leh Hestia te pawh chu a dawlh leh ta vek a, an fâ apiang a dawlh zel avang chuan a nupui Rhea-i chu a lungchhia in a thinur hle a, tichuan a nu Gaea-i hnenah kal in tih dan tur a va zâwt ta ngawt a. Gaea-i chuan tuna Rhea-ina a pâi mek naute hian Cronus- chu ala hneh dawn thu alo hrilh a. Tichuan Rhea- i chuan Crete thliarkar a Mount Dicte tlâng a pûk ah fa chu a hring a, a hming ah Zeus- sâ in, Lasî, Erinyes an tih, Alecto, Megaera leh Tisiphone-i te chuan enkawl in kêl hnute in an châwm a. a naupan zual chhûng chu Zeus-a chuan Crete thliarkar ah chuan a nun a hmang chho ta a. Rhea-i chuan a nû thurâwn chu zâwmin Cronus-a hnena a kîr leh chuan an fa sên thawmhnaw chuan lungtum a fûn a, Cronus-a hnena hlan pahin a tâna a hrinsak fapa a nih thu a hrilh a. Cronus- chuan eng khaw sawi set set lovin chu lungtum chu lâ in a dawlh ta pawp a, bumin a awm tih réng a hre lo. Cronus- chuan a fapate zînga pakhat chu a dawlh lovin Crete- thliarkara lasî ten an enkawl tih tih a hre hauhlo, hre ngat se chuan a thinrim viau ngei ang.

A lo tlangval hnu in Zeus-a chu a nu Rhea-i chuan Olympus-a Pathiante chênna ah ala kîr leh a, a pa Cronus-a no hlântu ah a awm ta a. Chutianga hun engemaw chen an awm hnu chuan Rhea-i leh Zeus-a chuan a pa bum dân tur an rel a, Titanness Metis-i( damdawi leh ngaihtuahna siamtu Pathiannu) Rhea-i unaunu chuan damdawi siamin Cronus-a wine intûr ah chuan a telh a, chu wine chu Zeus-a chuan a pa chu pe in Cronus-an a in zawh chuan a pum ana ta vak a, a luak ta nghek nghek a, a hmasa berah lungtum a dawlh kha luakchhuakin, a fâte ho, a dawlh te zawng zawng kha puitling vekin a luakchhuak leh ta vek a.

Titan Cronus- hi milian ani kan tih tawh kha, a fâ a dawlh te pawh hi Pathian vek annih avangin an pa pum chhûngah a nung chungin an awm vek a ni. Rhea-i chuan Zeus-a chu a fapa anih thu leh a fa te chuan an paihthlâk dawn thu Cronus-a chu a hrilh a, Cronus pawh a thinrim kher mai, chûng a fâte Pathian naupangtê tê te chu nuaibo tum in Indo turin a unau milian ho te chu a sawmkhawm a, Mahse Prometheus, Epimetheus leh Oceanus-a te chu an telve duhlo a, Indona ah chuan Milian Atlas-a chu an hruaitu a ni a. Pathian naupangtê tê unau te chuan milian(titan) ho chu hneh rual niin an hrelo a, heng milian te hi a mal tê tê pawh a hneh rualloh leh thiltithei tak tak an ni si a.

Mahse A pi Lei Pathiannu Gaea-i chuan Zeus-a chu thurâwn pe in Tartarus-tânin a a pa Cronus-an a tân tîr a unau te chhuah tûrin leh an țanpuina dîl tûrin a ti a. Tichuan Zeus-a te unau chu mitthi khua Tartarus ah chuan kalin a pa unau a pa ina a hrem, Milian mit pakhat nei Cyclops unau te, Kut zâ leh lu sawmnga nei Hectoncheites te chu an chhuah zalên ta a. Cyclops- te chuan Zeus-a chu țêk leh khawpuirî (lightning & thunder) chunga thuneihna an pe a, Hades- a pawh intibo theihna lukhum (invisible Helmet) pe in Poseidon pawh Tiang thiltithei ( Trident) an pe bawk a.

Chûng a pa unau te chuan Zeus-a te chu țanpui an tiam bawk a. Titans ho te chuan Mount Othrys ah țanhmun an siam a, Zeus-a te unau chuan Mount Olympus-ah țanhmun siam ve in Olympus an inti a, tichuan Pathian te indona rapthlak tak Titanomachy chu an țan ta a.

Remruatna fel tak nen Olympus te chuan beiin Titans ho lambun tûra an dah Hundred handed Hecatoncheires- unau te chuan lungpui lian tak tak an chawi fur mai a. A hun tak ah Zeus-a te chu an hnungtawlh a, Titans- ho te chu Hecatoncheires- ho te lambunna huangah chuan thlêm lûtin Hecatoncheires- te chuan Titans- ho chu lungpui za tam takin anlo vawm rawn a, Titans ho te chu tlângin a chim hnan emaw tiin an tlân chhe darh chum chum a, tichuan Olympians- te chuan ûmzuiin nasa takin an in bei a, an indo thâwm avang chuan tlângte chu an khûr hlawk hlawk a, khawvel hi tuilian leh țek in a khat a ni ber mai.

A tâwp ah Cronus-a beidawng chuan a unau sakawlh râpthlak Typhoon chu a ko chhuak ta a, Typhoons- hi a hlauhawm êm avang leh a râpthlak êm avangin Pathian tam berte chu hlauvin an tlânchhia a, Mahse Zeus-a chuan chu sakawlh chu beiin kâwlphê leh țêk hmangin a that a, Sicily a Mount Etna hnuaiah an phûm ta a. Typhoons hi tlângkâng angin Mount Etna- ah hian ala thawk fo țhin an ti a, tun thleng hian he tlâng hi tlangkang irhchhuah țhinna hmun a la ni.

Kum sâwm lai an indo hnu chuan Olympians- te chuan hnehna changin Titans ho zawng zawng deuhthaw chu hremin Tartarus-ah an tântîr hlawm a. Milian Atlas-a chu a sâng thei ang ber a a koki a vân khi do tlat tûrin an hrem bawk a.

THE FIRST OLYMPIAN GODS & GODDESS..

Titans ho zîngah Atlas, Oceanus, Theia leh Themis-i te chauh chu Tartarus a paihthlak loh awmchhun an ni, Titan Iapetus leh Clymene-i te fapa Prometheus leh Epimetheus- te erawh chu Olympians-te lamah an țan avangin hrem an ni velo thung.

Tichuan Titans te Lalna chu paihthla in Zeus-a leh a unau te chuan khawvelah ro relin Olympians Pathiante an tih hun chu alo in țan ta a, Zeus-a chu naupang ber nimahse Pathiante zîngah chuan hotu leh hruaitu a ni a, an unau chuan ram leh thuneihna an insem vek a.

ZEUS: Dikna a roreltu ani a, Lei leh vân a roreltu ber a ni, nupuiah a unaunu Hera-i a nei a, mahse a lerh em avangin mihring leh Pathiannu dangte lak fâ tam tak a nei bawk.

HADES : Olympians unau zînga a upa ber a ni a, Khawvel piah lam zawng zawng, Mitthi khua a roreltu a ni.

POSEIDON : Khawvel a tui zawng zawng Pathian a ni a, Lîrnghîn tîrtu Pathian a ni bawk, Tuipui Lasî, Nereid Amphitrite-i chu nupui ah neiin fapa Triton- an nei a, Triton a hian fanu Pallas-i a nei leh bawk, mahse Pallas- i hi Athena-i nen an infiam laiin Zeus-an Țêk in a dêng hlum a, Athena-i hian Pallas-i hriatreng nan a lim Palladium a siam a, he Palladium hi Trojan khaw hnehtheihlohna thurûk kha a ni bawk.

Poseidon hian sakawr thi theilo pahnih Xanthus leh Balias- kha Achilles-a pa Peleus-a leh Thetis-i te inneih khan a pe bawk anih kha, khami sakawr pahnih kha Achilles-an Troy beih nan a a hman te kha an ni.

Tin, Gorgon Medusa nen fâ pahnih sakawr thlâwk thei Pegasus leh Mi chak huaisen Chrysaor te an nei bawk. Poseidon hian Pathiannu te leh mihring te lakah fâ tamtak a nei bawk.

HERA : Zeus-a nupui a ni a, Pathiannu te zînga Lal ber a ni bawk, Olympians- unau te zînga a naupang ber a ni a, inneihna leh chhungkaw enkawltu bâkah hmeichhia te enkawltu Pathiannu a ni bawk.

Thîkthu chhe tak mai a ni a, a pasal Zeus-an a mihring lak fâ a neih te chungah nasa takin phubâ a la țhin a, Zeus-a fapa Hercules pawh kha a nausên laiin thah tumin rûl chukna mî a tîr a, Hercules-a hna hahthlâk sawmlehpahnih pawh kha ama remruat vek a ni bawk.

DEMETER : Khawvel Sik leh sâ enkawltu leh thlai chi țhatna Pathiannu a ni a, a fanû Persephone-i Hades- an a rûk lai khan a fanu zawngin khawvel hmuntin ah akal a, sik leh sâ pawh a enkawl hman loh avangin khawvel sik leh sâ a buai a, mihring tam tak an boral a nih kha.

HESTIA : Olympians unau te zînga pasal neilo awmchhun a ni a, mihring thinlung vêngtu leh chhungkaw enkawltu Pathiannu a ni.

THE SECOND OLYMPIANS GODS & GODDESS :

ARTEMIS : Artemis- i hi Zeus leh Leto-i te fâ a ni a, Ramsa leh Pasalțha te véngtu Pathiannu a ni. Troy indo lai khan Trojan ho lam țanpuiin Greek ho riahbûkah Colchis ram ațanga a lâk sakeibaknei lu pahnih nei a chhuah a, mahse Achilles-an alu alo sâhbun sak avangin Achilles-a kha a hlau hial anih kha..

Tin, Agamemnon-a, Helen-i pasal Menelaus-a unaupa in Artemis-i ramsa humhalhna hmuna Sazuk- a kâp a, Artemis-i aiin ka ramvachal zâwk ti a a uan zui avângin Greek sipai te Troy kulh bei tûra an chhuah dawn laiin Thlî a thâwt tîr duhlo a, an lâwng pawh a kal theilo a nih kha.

APOLLO : Zeus-a leh Leto-i te fâ tho a ni a, Thalkah leh rimawi Pathian a ni. Zeus-ana mihring hmeichhia a ngaihzawn avangin a nupui Hera- bâkah Pathian dang te nen Zeus-a an phiarru a, chuvang chuan Zeus chuan Apollo- hi hremin Troy kulh a sak luih tîr a nih kha. Trojan ho ina an Pathian Biak ber a ni a, chuvang chuan Achilles-a ke artui a Trojan Lal fapa Paris-a kah tîrtu kha a ni a, Paris-a thal mu tih ngîl sak in Achilles- a kâp hlum a nih kha..

HEPHAESTUS : Zeus leh Hera- i te fâ a ni a, Mei Pathian ani bawk, a kê a bâi avang hian a nu Hera- i hian duhlovin a paih a, mahse Achilles-a nu Thetis-i leh a unau te’n lo chharin an lo bawihsawm a, chuvangin Achilles-a pawh a duat hle a, Achilles-a hmanrua zawng zawng te pawh a aia țha awm tawhlo tûr khawp a țha in a siamsak a, Lui Pathian Xanthus leh Lui Pathian dang têna Achilles-a an beih rawn laiin Achilles-a alo chhan bawk a nih kha.

HEBE : Zeus leh Hera- i te fanu a ni a, Țhat lai leh Vânglai Pathiannu a ni.

DIONYSUS : Zeus leh Thebes Lal fanu Semele- i te fapa a ni a, Zû leh Lei țhatna thlentu Pathian a ni. Semele-i hi Zeus-a nupui Hera- in a huat a vangin tihhlum a tum a, Nikhat chu Semele-enkawltu anga in siam danglamin Hera-i chu a va inlan a.

Hera-i chuan Semele-i chu bumin , Engtik ni ah emaw a fa paina Zeus- chu a Lal thuam a inthuam a ațêk thiltihtheihna nena a hma a inlan tûr a ti tûrin a chah a, Chu Thu chuan Semele-i chu a ti lâwm hle a,

Tichuan Zeus- an a rawn tlawh leh hmasak berah chuan alo sawi ta ngei a, Zeus pawh chuan ngaihtuah chianglo in a lo tiam ve mai bawk a, a hriatchhuah leh meuh chuan Pathian meuh ina a thil tiam tawh chu sût leh theih a ni tawh silo. Zeus chuan thi thei mihring Semele chuan a țêk sa lutuk chu a dâwl zo dâwn lova, a hma a a inlan vaih chuan meivâp ah a chang nghal dâwn a ni tih a hre sa a, mahse a thutiam bawhpelh theih a ni silo.

A ngaihzâwng hma a a ropuina thuam famkim a inthuama a inlâr chuan a hlauh ang ngeiin meialh chuan Semele chu meivâp ah a chantîr nghal a, mahse Zeus chuan a naupai lai chu chhanchhuah sakin a enkawl seilian a, a hmingah Dionysus-a vuah ta a ni.

HERMES : Zeus leh Maia te fâpa a ni a, zaipawl leh zin mî te vêngtu Pathian a ni, a ke ah thlâ a nei a, chu chuan chak tak tak in a thlâwk kual țhin.

PERSEPHONE : Zeus leh Demeter-i te fanu a ni a, Mitthi khaw Lalnu a ni, Mitthi khaw roreltu Pathian Hades-an rû in nupuiah a nei a nih kha.

ARES : Indona Pathian a ni a, Zeus leh Hera-i te fapa a ni, Pathiante zînga țuanrang ber a ni a, Mei Pathian Hephaestus-a nupui Aphrodite-i chhuhsakin fapa Eros-a an nei a, Eros-a hi Helen-in Paris a a hmangaih theih nana Heleni thinlung hmangaihna thal a kâptu kha a ni bawk. Amazon Lalnu Otrera nen fanu pali Hippolyta, Antiope, Melanippe leh Penthesilea an nei a, Penthesilea-i hi Trojan Indona ah Troy Lal Priam-a țanpui tûrin a kal a, mahse Achilles-an alo tihlum a nih kha.

Tin, Hippolyta-i hi sawidan pakhat ah chuan fanu Diana neiin an sawi bawk.(Diana-i chi DC Comics a Wonder Woman kha a ni a, a movie pawh in an siam bawk kha).

ATHENA : Zeus leh Metis-i te fanu a ni a, Indona leh finna Pathiannu ani bawk a, Athens- khaw dintu hi a ni bawk. Pathiannu Pasal neilo a ni a, Amah biakna temple chu Athens khua a temple ropui Parthenon khu a ni..

Hengte hi Greek ho Pathian, Olympians an tih te ber chu an ni a, henglo pawh hi Pathian tenau tam tak anla nei bawk..

END OF DEMIGODS & HEROES.

Héng Pathian naupang zâwk te bâkah Pasalțha tam tak hi Zeus-a fâ leh an thlahte an ni a. Zeus-a hi a lerh êm avangin Pathiannu te mai nilo, Mihring te lakah pawh fâ tam tak a nei a, a hmeichhe hmêlțha tih chi a hlah ngailo. Hêng mihring lak a a fâ neih te, Milian leh thiltithei tak tak(Heroes & Demigods) bâk ah Pathian dang te’n a mihring lak a an fa neih te chu an tam êm êm a, chûng an fa te chuan fâ an nei leh a, tichuan Pathian thlah michak leh thiltithei tamtak anlo piang ta sup sup a, chûng Pathian thlah thiltithei tam tak te chu an in têlkhâwm ang a, nakin ah phei chuan Pathian te anla do duh mai dâwn a a hriat a vângin Pathian dangte hriat loh in a rûkin Zeus-a chuan chûng Pathian thlahte tihboral nan chuan Troy indona kha a a hmâ daih ațang tawh in alo ruahman tawh a. He Troy indona a Pathian thlahte that chimit tûrin Achilles-a kha a lo ruat lâwk tawh a, a tum ang rêngin Achilles- a chuan Mi chak leh Pasalțha, Pathian thlahte chu a tihlum hnem na ngîang mai.

Achilles-a kha a lo huaisen êm avang leh a thinlung a sak êm avangin Zeus-a khan a duh ang ang pawh in a hrual leh thei silo a, Troy indo lai a Greek ho hruaitu ber Agamemnon-a nena Achilles-a an inhmuh thiamloh khan Achilles-a khan indona ah tel a tum tawhlova, Greek rama haw daih a tum a, Greek rama Achilles-a a haw daih chuan Zeus-a thiltum chu a hlawhtling dâwn silo, mahse Achilles-a thinlung sak lutuk chu Zeus-an a tih nêm theih ngangloh avangin Patroclus-a, Achilles-a tha chang dâwltu chu Hector-a a tihlum tîr a, chuvang chuan Achilles-a chu haw leh lovin Zeus-a thiltum ang chuan a awm ta anih kha.

A ruahman ang ngeiin Achilles-a chuan Pathian thlah mi chak tam tak chu a that a, Mahse alo ropui zual zêl a, Mihring te mai nilo, Pathiante pawh in an hlau a, a chhan chu a thinlung sak leh luhlul lutuk chu tumahin an dâl zo lo, mihring te mai nilo Pathiante a hlaulo a, kut a thlâk zêl avang chuan Pathian tamtak te chuan a lakah kut an lek ngamlo hial a, Troy indona a Trojan lam țanpuitu Pathian ropui tak tak, Artemis-i leh a unaupa Apollo te, Aphrodite-i, Enyo-i leh Indona Pathian Ares-a te pawhin an hlau a, an hmachhawn ngamloh avangin Trojan Lal fapa Hector-a thinlungah thinrimna leh huaisenna an dah a, Achilles-a bei tûrin an bum chhuak a tih theih hial âwm e.

Trojan sipai te chuan Achilles-a hmêl an hmuh ringawt pawhin bîkbo na an zawng a, Troy khuaah phei chuan naupang țap thlêm nan a hming an hmang țhin an ti. He a ropuina leh hmingthanna avang hian Zeus-a chu a rûkin a mangang êm êm a, a chhan chu Achilles-a nu tuipui Lasî Thetis-i chu Pathiante zah khawp a ropui a ni a, Achilles-a pa Peleus-a pawh Greek ram zawng zawng a hmingthang khawp a Pasalțha lâr leh huaisen, Greek mi zawng zawng ina an zah khawp a ropui ani a, Chumai bâkah Pathiante anga thi theilo tûr a Pathiante malsâwmna leh duhsakna dâwng pha ngat a ni a, an nupa ropui zia chu an inneihna ruai pawh kha Pathiante chênna Olympus tlângah ngat nei an nih kha.

Chuvang chuanin Zeus chuan Achilles-a a tih khawngaihthlak emaw, a lo ropui zual zêl chuan a nu Thetis-in Pathian dangte sâwmkhâwm in an hel anga, Achilles-a tan Zeus-a leh a unaute chu paihthla in, a Lalna an chuh ang tih a hlau bawk si a, engkim a remruat nimahsela a rûk tak chuan a rilru a buai kher mai.

Dik tak chuan Achilles-an Troy a kal hma khan Hector-a leh Ajax-a kha anlo in mal beih a, Ajax-an a tihlum țêp a, mahse Zeus-an Achilles-a thah atan alo ruat lâwk avang leh Achilles-a chan a chhiat chuan a nu Thetis-i a lungawilo anga, alak ah an hel ang tih a hlauh avangin Zeus-an an in bei lai a ti tâwp a nih kha.( Troy movie a Hector an a tihhlum Pa lianpui kha Ajax-a chu a ni a, Achilles-a cousin a ni bawk.)

Mahse Achilles-a chu alo ropui zual zel a, chuvang chuan Pathian ten an huat nan leh an țanpui duhloh nan Achilles-a thinlungah chuan thinrimna nasa tak a dah a, Hector-a a tihhlum khan a ke artui vit tlangin hrui a thil tlang a, Sakawr tawlailir a hnûk in Troy kulh a fankual pui hnu ah Greek mi te riahbûk thleng a hnûk a nih kha. Lal fapa ve meuh khati khawp a mualpho leh hmuh hrehawma a nghaisâ kha Pathian te pawhin râpthlâk anti a, a hma a khawngaihtu te pawh in an huat phah ta rêng bawk a, chu tak chu Zeus-a thiltum a ni. Tichuan Pathian thlah mi chak pui pui, mihring pangngai ina an hneh rualloh khawp a chak leh Greek sipai te ho ina an hnehloh tûr ang chi mi chak bîk te a tihhlum zawh in Zeus-a thupêk in Achilles-a chu tihhlum a ni ve ta a ni.

CREATION OF HUMAN :

Titan Iapetus leh Clymene-i te fapa Prometheus leh Epimetheus te chu Zeus-a chuan mihring siam tûrin a ti a. Prometheus-a chuan lei (clay) ațangin Mihring ruangâm a siam a, Pathiannu Athena-in nunna thâw pê in minung anlo ni ta a, Epimetheus-a chuan ramsa te siam hna a thawk ve bawk a. Prometheus leh Epimetheus- te hi Titans ho leh Olympian te indo lai khan Zeus-a te unau lamah an țang a, chuvang chuan hremna an hmu velo a ni.

mahsela Prometheus-a chuan chûng a mihring siamte chu Pathiante chauhvin an neih theih Meialh(fire) chu pêk mai a tum ta a, A tûk zîng a vân chung sânga Ni Pathian Helios an a mei sakawr tawlailir a Nî alo hnuhchhuah lai chuan a Meialh țhenkhat chu lâ in mihringte hnenah a pe a. Mei enkawl dân leh hman dânte a zirtîr hnu in a kalsan ta a. (Greek ho te chuan Nî khi Zîngkâr ah Ni Pathian Helios an Mei sakawr tawlailir a rawn hnûk chhuak a, tlailam a khawthlang lama hnúk liam leh țhin ah an ngai. CR)

Mahsela Zeus-a’n Prometheus-a thiltih a hriatchhuah chuan a thinrim kher mai. Chuvang chuan Prometheus-a chu tlâng pangah khâidîat in a phuar bet a, chatuan thleng a a thinlung chuk chhuak tûrin Mulukawlh thu a pe a.

Nilêngin chûng mulukawlh te chuan a thin chu an kher ta țhin a ni..
Chumi hnu chuan Zeus leh Hephaestus a chuan mihring an siam leh a, Hermes-a chuan țawng theihna leh thinlung ngaihtuahna te pe in, Pathian dangte pawh chuan thilpêk tam tak leh hriselna te an pe hlawm bawk a. Tichuan chu mihring chu lo nung in hmeichhe hmasa ber chu anlo siam ta a, a hmingah Pandora-an vuah a, Pandora- tih chu ‘Thilthlâwn pêk’ tihna a ni ber mai. Tichuan Pandora chu Epimetheus a nen in neiin hun rei tak chu hlim takin an khawsa a. Pandora chu Pathian te chuan thilpêk an pe țheuh a, Zeus-a pawh chuan dîlchhûtna pe in, bâwmtê (box, pandora box) a pe tel bawk a, chu bâwm ah chuan thilsual leh țhalo tam tak khungkhâwm a nih avangin Zeus-a chuan hawng hauhlo tûrin a ti a. mahse Pandora chuan hawn châkna a a khah tlat avângin a hlim a kim theilo. Pathian leh Pathiannu ten thil ropui tak tak an pêk hlawm țheuh avangin Zeus-a thilpêk chu a danglam bîk hle in a ring tlat a, Țumkhat chu a pasal Epimetheus a awmloh hlânin thingremtê chu a hawng ru ta a.

Chu thingrem a han hawn rual chuan tunlaia khawvel hri țhalo hrang hrang, Natna, îtsîkna, duhâmna, chapona leh thil țhalo chi hrang hrang te chu anlo thlâwk chhuak ta sup sup mai a. Pandora-i mangang aû thâwm a hriatin Epimetheus-a chu hmanhmawh takin a lo haw a, thingrem chhîn chu rang mangkhêngin a han khâr a, mahse thil țhalo zawng zawng te chu anlo thlâwk chhuak zo hman vek tawh a.

Hemi zân hian thingrem chhûng ațanga aw lo chhuak an hria a. Chu âw chuan, “Min chhuah tîr rawh. Beiseina ka ni e,” a rawn ti a. Pandora leh Epimetheus-te chuan an chhuah a, mihringte hnêna beiseina pe tûrin khawvelah a thlâwk chhuak ta a ni.

DEUCALION’s FLOOD : ZEUS DELUGE :

Pandora ina Thil țha lo bâwm a hawn ațang a sualna lo chhuak te chuan mihring te chungah hna an thawk țan ta a. a ni têlin sualna alo pung a, Natna râpthlak tak tak te alo thleng reng ta bawk a. Mihring in an mihring pui te sâ an ei a, hmun tinrêng chu sualna in a khat tlat hlawm a, chuvang chuan Zeus-a chuan khawvel a mihring te chu tihhlum vek tumin Tui a len tîr ta a.

Mahse khawvelah chuan Pathiante rawngbawl țhin leh mifel chhungkua pakhat a hmu a, chu mite chu Deucalion-a te chhungkua an ni. Deucalion-a chu Prometheus leh Tuipui Lasî Clymene-i te fapa a ni a, nupuiah a pa unaupa Epimetheus leh Pandora-i te fanu Pyrrha-i neiin fapa leh fanu te an nei hlawm a. Zeus-a chuan mihringte tihboral nan khawvelah tui a lêt tîr dawn tih sawiin an chhungkaw in chhanhimna tûr Lawng tuk tûrin a ti a. Tichuan tuilêt chhûng zawng Lawngah chuan an chhûngkua a awmin tuilêt a kâm hnu chuan an lawng chu Mount Parnassos-ah a ding ta a. Tichuan Pathiante hnenah lawmthu sawi nan inthawina te an nei a.

Khawvel mihring ah an mahni chhungkua chiah an awm ta a, Tichuan a fâ te chuan Pathian chi hnuaihnung deuh Tuipui Lasî te, Ngaw hnuaia chêng țhin Lasî te nupuiah neiin mihring chhuan thar anlo indin leh ta a.

An fapa Hellen chuan Lasî Orseïs-i neiin fapa leh fanu te an nei a, heng an fa te hi hnam hrang hrang dintu anlo ni ta zêl a ni.

Heng hi Hellen leh Orseïs-i te thlah kal zelte chu an ni. An fapa Aeolos-a thlah te chu : Aeolos a chuan nupuiah ah Tlângram Lasî Enarete-i neiin fapa Sisyphus-an nei a, a ni hi Corinth khaw dintu a ni bawk.

Tin, Aeolos-a fapa pakhat Iocus a chu Cretheus hnam dintu a ni bawk a. Magnes-a chu Macedonia lalram dintu a ni a, a thlahte chu Macedonian an ti.

Perieres-a chu Messene hnam dintu a ni bawk.

Tin, Ion-a chu Ionian hnam dintu a ni.

Hellen fapa pakhat Dorus-a thlah te : Dorus-a fapa Aegimius a chu Dorian hnam dintu a ni a, Dymus-a cgu Pamphylus- hnam dintu a ni. Dymames-a chu Pamphylian hnam dintu a ni.

Hellen leh Orseïs-i te fapa Acheus-a thlah te chu Acheian hnam dintu a ni. Tichuan an hnam ang zêlin hmun tinah anlo darh ta zél a,  Greek hnam huaisen leh ram ropui tak tak te khu anlo din ta a ni.

Posted in Thu Ngaihnawm | Tagged , , | Leave a comment

INBUMNA A TAM THLA 7 KALTA CHHUNGIN CHENG NUAI 40 CHUANG MIZORAM MIPUIIN AN CHAN HMAN

Tunlai hian online hmanga inbumna a hluar hle a, thla 7 kalta chhung khan online hmanga inbumna avangin cheng nuai 40 chuang Mizo mipui ten an chan hman niin thu dawn a ni.

Mizoram Police chhinchhiah danin March atanga September, 2017 inkar chhung khan misualte chuan online hmanga inbumna avangin Mizo mipuite sum Rs. 40,05,000 chuang an laksak hman niin tarlan a ni a, hei hi an hnena kala in-report chauh an ni a, hei aia tam daih hi misual ten an laksak rin a ni.

Mi bumtute hian mi hnenah hna hmuhsak thei anga insawi te, ATM card leh pin an zawh hmangte leh thil thawn tur nia insawi hmang tein an bum thin. Heng mi bum hmangte hi mihang (Negro)-ho leh Bihari/Jharkhand lam mi an ni tlangpui a, Negro-ho hian internet kaltlangin mi an bum ber a, Bihari/Jharkhand te hian phone hmangin hma an la deuh ber.

Mizoram Police te chuan misual thenkhat chuan phone hmanga mi ATM card number zawtin card number an hriat hnuah internet-a thil lei nan an hman bakah an pawisa chu Account dangah an transfer leh thin niin an sawi.

Heng mite hi a tlangpuiin Nigerian leh vai mi sual thenkhat inkawp an ni tlangpui tih an sawi. Hei bakah hian ram danga hna hmuhsak thei nia insawiin appointment letter lem an pe a, an insurance, visa leh tuldang buaipuina tur nia sawiin sum tam tak an laksak hnuah an bibo leh ta thin a ni. Hei bakah rangkachak leh thil hlu dang thawn tur anga insawiin a khulnatur sum an dil a; sum an hmuh veleh thawn leh si lovin an bibo ta thin niin an sawi bawk.

Police te chuan hetiang a mi sualin sum an laksak hi hmuhlet leh a harsa hle niin an sawi a, mi bum hmangte hian Account dangah rang takin an lo transfer thuai thin niin an sawi. Misualte hian phone number hrang hrang an hman thin avangin hmuhchhuah/man an har hle tih an sawi bawk.

A tlangpuiin mi sualte Account hman hi chhuichian a nihin Mizo Account a ni tlangpui thin a, Mizo zingah bank account hralh ching an awm thu an sawi a, hei hi thil pawi tak leh dan phal loh a ni. Mi Account chu mi sualte hian leichhawngin thilsual tih nan an hmang ta thin niin an sawi.

(Source: ZALEN)

Author : Vanneihthanga Vanchhawng

Posted in Technology, Zoram Crimes and Accidents, Zoram History | Tagged , , | Leave a comment

Pawisa tih-thih atangin Company lem nuai 3 dawn khar a ni.

Prime Minister Narendra Modi-a chuan pawisa tih-thih atang khan Company heng, a tak awm lo nuaih 3 dawn khar a nih tawh thu a sawi.

Prime Minister chuan pawisa tih-thih chu vawi duai lo sawiho thin a nih tawh thu a sawi a. “Indira Gandhi-i Prime Minister lai pawh khan committee khan cheng 100 note tih-thih a lo rawt tawh a. Khatih hun laia Minister Yashwant Rao Chavan khan pi Indira Gandhi hnenah khan rawtna a thlen a, mahse, a pawmsak ta lo a ni,” Narendra Modi-a chuan a ti a. A party ni lovin ram hmasawnna ngaipawimawh chu nise khatih hun laia pawisa tih-thih pawh kha thil tha zawk tur a ni, a ti.

Nimin khan Kullu-a vantlang inkhawmah Prime Minister chuan Congress party leh corruption hi thenhran theih a ni ngai dawn lo, a ti a. Ram chhunga kum 70 lai Congress-in ro a rel lai khan an hruaitute chuan corruption, dawtsawi, hnam leh chi leh kuang inthliar leh hna inpek chungchanga induhsak biknaahte chauh ring an rawlh a ni, a ti.

Pawisa tih-thih a nih hnu khan company lem nuaih 3 dawn leh bank account thahnem tham tak tihtawp a nih tawh thu a sawi a. Cheng Vbch sang 4 zeta thubuai nei company sing 5 lai chhui zui an nih thu a sawi bawk.

Posted in National News | Tagged , , | Leave a comment