Damdawi man tlawm zawrhna dawr hawng

Health Minister Pu Lal Thanzaran vawiin khan Aizawl Dinthar Veng, Health Directorate Office bulah man tlawm zawka damdawi lei theihna dawr Jan Aushadhi Store (Generic Drug Store) a hawng.

Pu Lal Thanzara chuan Mizoram chhung District Hospital tinah Generic Drug Store hawn a nih theih nan hmalak mek a ni, a tia, mipui hrisel nan sawrkarin theihtawp a chhuah a, mamawh zualpui phuhru turin doctor 26 lak belh an ni, a ti a. Heng doctor lak tharte awmna tur transfer and posting niminah tihchhuah a ni, a ti a.

Hriselna kawngah Mizo mipui thanharh a tul tih sawiin taksa insawizawi uar a, ei leh in, zuk leh hmuama insum turin Mizo mipuite a chah a ni.

Jan Aushadhi Store (JAS) ah hian damdawi dawr pangngaiaiin damdawi a let thum let li vela man tlawm zawkin a lei theih a. Damdawi hi a man to dan a zirin category 3 (A,B,C) ah then a ni a. A man to chi chu – A, a laihawl – B, a man tlawm chi – C tia bithliah a ni. Jan Aushadhi dawrah hian Group B thleng phak damdawi a awm mang lo.

Damdawi dang man tona chhan ber chu a tuamna leh a cheimawina te a ni a, a man tlawm avanga quality chhe chuang lo Generic/Jan Aushadhi damdawite hi a man a tlawm theih nan a tuamna man tlawm zawk, him tawk si, a chei mawina tello hman a ni, tih sorkar thuchhuah chuan a sawi a ni.

Jan Aushadhi/Generic damdawite hi National Accreditation Board for Testing and Calibration Laboratories (NABL) pawmpui laboratory ah a that leh that loh uluk taka enfiah vek a ni.

Advertisements
Aside | Posted on by | Tagged , | Leave a comment

3. G-20 Summit neih mekah India-in awmze nei zawk leh chak zawka firfiakte dona tur point 11 a duante a tlangzarh

Nimin khan Germany-a Hamburg khawpuiah G-20 Summit tan a ni a. Tun tum G-20 Summit-ah hian khawvel ram hruaituten an sawi tam ber chu firfiaka chetna tihbo chungchang a ni a. India pawhin awmze nei zawk leh chak zawka firfiakte dona tur point 11 a duante a tlangzarh a. PM Narendra Modi chuan G-20 ram hruaitute chu a rang lama firfiak te do tura chechhuak turin a sawm a ni.

India-in hmalakna tur point a duanah hian G-20 ramten firfiakte chungchanga thil hriat tur leh anmahni lo puitu ramte chungchanga thu pawimawh inhrilh tawn zung zungna tur inremna siamte, Weapons and Explosive Task Force din a firfiakten hmanrua leh bunrua an dawn thin danchah te leh misual man inpek tawn chungchanga dan thlahzalen te a tel a ni.

Prime Minister Narendra Modi chuan Hamburg-a G-20 Summit neih kar lakah hian ram hrang hrang hruaitute a kawm a. Vawiin khan South Korea President Moon Jae-in nen inhmuin South Korea leh India inlaichinnate an sawidun a. Make in India, Digital India leh Startup India programme kaltlanga thawhdun an remti a, President Moon hian PM Modi ngenna angin a hma thei ang bera India tlawh a tum thu a sawi.

PM Modi hian Italy PM Paolo Gentolini kawm bawkin an thawhdunna tih hmasawnna tur an sawi dun a. Ram pahnih eibar zawnna tih hmasawnna tura medium enterprise lama tan lak a pawimawh thu an sawi a.

Khawvel sik leh sa chhe mek siamtha tur leh Africa ram hmasawnna tura hmalakna te an sawidun bawk a ni.Pu Modi hian Norway PM Pi Erna Solberg a hmu bawk a. Eibar zawnna kawnga an thawhdunna tihchak an remti a. National Investment and Infrastructure Fund-a orwegian pension funds-te tel ve turin a sawm bawk a ni.

Aside | Posted on by | Tagged , | Leave a comment

MIZOTEN KHAWVEL HUAPIN “CHANCHIN THA” KAN HRIL ZEL DAWN EM?

• Zoram kohhran hrang hrang zat.
• Mizoram kohhran member zat.
• Kohhran hrang hrang missionary tirhchhuah zat.
• Chanchintha hril a tul.

Ram dangah, Hnam dang kara han awm ve takah chuan mi chi hrang hrang hmel hriat leh thian kan lo nei ve ta. “Mizo” tih lo hre tawh thin tawn fuh erawh chu zing lam Arsi ang pharha vang an ni. India mi ka nih awihlotu hi 99% chuang ka tawng tawh a, Mizo aiin”Naga” lo hre zawkin, “Indian ka ni” tih ruala zawhna ka dawn thin chu “Naga em ni i nih?” tih hi a ni! Naga-ho hi ramka la fan tlem nen, ka kal tawhnaah chuan an lo awm deuh zel a, tin, Pathian rawngbawlna lama in hmang chinte chuan “Mizo” te aiin “Naga & Nagaland” chu an lo hre zel bawkin ka hria.

Mizoram chhuah san tura ka kal dawn hian Directorate of Informations & Public Relations, Gov’t of Mizoram, leh Tourism Dept siam english-a Mizo leh Mizoram Chanchin ziakna (flyer/brochure) hi za chuang fe ken ka ching a; railways station leh airports vela hnam dang thian ka chhar tharte chu “Mizoram fak mawi pahin” ka pe ta thin a! Bangkok-a Irish nupa ka pek tum chuan, “Tourism Dept-ah thawk a mawi i ni e. In ram (state) i sawi mawi thiam em mai!” tiin, nui vur vur chungin min tihkhum tawh. Mizo hnam leh Mizoram sawimawi hi ka la bansan thei meuh lo!

Hnam dangin min hmuh dan te, hnam dang ziak miten Mizo leh Mizoram an hmuh dante chu ka chhiar peihin ka ngaihven thin hle a, “Operation World” tih lehkhabu chhah zet Patrick Johnston & Jason a te siamah chuan, “Mizoramchu khawvela kohhran active na ber zinga mi ni a, rawngbawlna pawh an ngai pawimawh a, mahse, an society chu eirukna (corruption) leh drugs addict tamna a nia; an thalaite zingah ruihhlo ngai an tam hle…” tiin an ziak a ni!

Ram dangmite chuan Mizo chu tute kan nih a, enge eizawn nana kan neih leh economic resources min zawh an ching a, kan thil thawn chhuah (exports) te pawh min zawt duh khawp mai. Third World Countries a cheng, India ram retheiah pawh State rethei ber kan nihzia te hi Google, Wikipedia etc atangin an han en thuai a, hrilhfiah nawn an ngai lovin, Dictionary dang keu belh an mamawh hauh lo. Chutih laiin World Missions-Global Evangelization lama tui mite hahawlh zawng tak leh mak an tih em em thin chu, hnam rethei leh State rethei si, kan tlem ngaihtuaha Missionary-India State pawnah leh Foreign (Overseas) lama kan intir chhuak nasatzia an hriat chuan mak an ti emem a ni. An chek tlawk tlawk a, an meng phawk a, tute nge Mizote chu tiin an ngaihven zui a; Mizoram hial chu hmuh an duhin an chak ta thin a ni! Chanchin Tha vanga Zofate chan hi a ropui tak meuh.

Tun din hmun aiin Mizo te hi hausa hlek phei ila chuan, population wise-a khawvela LALPA Mission vanga mihring leh sum thawn chhuak tam ber “Hnam” kan ni ngeiin ka ringthin a ni.”

Mizo te chuan kum 130 liamtaah Chanchin Tha dawngin, kum 100 kristian hnam kan ni a. India ram mipui tluklehdingawn 1.3 zingah maktaduai 1.5 (1.5 million) awrh chauh kan ni a, kan rethei viau mai, mahse, Isua thupek ropui (Great Commission) chu kan ngai pawimawhin, kan mawhphurhna leh tihturah kan ngai hmiah a; state rethei tak chungin Mizoram pawn leh Foreign ah Missionary 4000-5000 inkar kan tir chhuak mek a ni. Hnam tlem te”Tlang chunga khaw awm ang” mai leh Lal Isuan, “Kei khawvel entu ka ni. Tu pawh mi ringa mi zuitu chu thim hnuaiah a leng tawp lo vang” a tih kha, a takin keini Mizo Hnam chuan kan tawng a, tun hma deuh chuan India ram state 27 zinga lehkha thiam-ziak leh chhiar thiam tamna (2nd highest literacy percentage) kan hauh mek a ni. A boruak lah Air Condition ang a ni…” tih hnu chuan, Krista Chanchin Tha vangin min ngaihsan phahin, min en hniam ngai tawh thin lo!
(A hnuaia mi hi “Mizoram Statistical Handbook, 2016, Gov’t of Mizoram siam chhuah a ni. Mizoram Kohhran te hi an thawk thain, an lo ropui viau mai)

Kum za Kristian ni mek Zofate hian, he kum zabi 21na kan hmekah hian eng kawng nge kan zawh mek le? Kum za dang kristian ni turin kan kalphung hi a in rem fuhin, a dikin kan hria em le?

Author : Ct Lalrinawma    

Aside | Posted on by | Tagged , , | Leave a comment

KHAWVELA IN TO BER PAWL MUKESH AMBANI IN- ANTILLA

Khawvela mihausaber pawl Mukesh Ambani in chu khawvela in to ber pawl a ni bawk. A in hming hi Antilla a ni a, South Mumbai ah Altamount Road ah a awm.

Facts:
1. Antilla hi 4 lakh square feet ani.

2. “Antilla” hi Atlantic ocean ah mythical island a nia, Mukesh Ambani te in hi he island hming atanga phuah a ni.

3. An in hi chhawng 27 a ni. Mahse chhawng thenkhat hi chhawng hnih aia sang an nih avangin, a takah chuan, chhawng 40 ang vel a nia, building pumpui san zawng hi feet 570 a ni.

4. He building ah hian staff 600 an chenga, engtiklai pawhin an enkawl. Staff te tan hian an hahchawlhnan pindan hran siam a ni.

5. An inah hian, swimming pool 3, health spa, salon, ballroom, yoga leh dance studio a awm.

6. An inah hian private theater a awm bawka, he private theater chungah hian garden a awm. He thetaer ah hian mi 50 an thu thei.

7. Chhawng 6 hi an car 168 te park nan chauh dah a ni.

8. An inah hian lift 9 a awm a, Ambani te tan a hranin private lift a awm a, guset leh mikhual te tan a hrang.

9. An inchhungah, motiff pahnih – ni leh lotus par hi lunghlu – crystal, pearl amaw marble ah chhawng tinah vuah a ni.

10. Helipad 3 a awm.

Author : Eunice Chawngthu

Aside | Posted on by | Tagged , , | Leave a comment

BOXER HLAWHTLING MANNY PACQUIAO TESTIMONY -Gilbert Renthlei

Philippines thingtlang khaw pakhat Mindanao-ah rethei bakberh takin a rawn seilian ve a. Retheih nak alaiin a nu leh pa an inthen zui. A nu leh a nau chawm turin harsa takin a inhlawhfa tauh tauh thin a, a nunah chuan awh tur a tam lo khawp mai. Zingah hma takah a tho va, riltam pawh sawi lovin khawlaiah a theih ang angin a inhlawh fa a, a thawh loh chuan an nghei a ni mai.

Retheih nak alaiin sual kawng a rawn zawh chho va, insual a hratin khawlaiah pawisa hlawhin a insual ta fo mai a. Insual lam a tihmi em avangin boxing lamah a lut a, a lo timi phian mai, Boxing khawvelah a hlawhtling em em mai a, khawvel huapin title 10 chuang a la a, sum tam tak a hlawh chhuak a, zu a heh a, nula a lawm bawk a, mahse amah kaltlanga a Chanchin Tha puanchhuah duhtu Krista chuan Pacquiao chu a bo rei a phal lo.

“Pathian hian thil tum a nei a ni,” tia sawiin Boxer ropui Manny pacquiao chuan, “A ropui zia puangchhuak tur leh mi engmah lo atanga mi tangkai taka hlangkai theitu Pathian a ni tih lantir turin a ram zauh nan Pathian chuan a lamah min hnuk let a ni,” tiin Manny pacquiao chuan Pathianin alama a koh nachhan a sawi.

Manny pacquiao hi Roman Catholic chhungkua atanga seilian a ni a, a nu hnen atang pawhin Kristian inkaihhruaina pangngai tak a dawng. Mahse boxing a luhchilh a a hlawhtlin chhoh viau hnuah Pathian a hawisan a, a hming maia Kristian niin Boxing a khelh atanga a pawisa hlawh hmang chuan a nu leh a unaunu te chu a chawm a, khawvel lamah tlanin pawisa a hmang nasa hle bawk. “Pathianni chuan ka inkhawm ve ziah thin a, mahse Thawhtanni atanga Inrinni thlengin bar-ah zu ka in thin,” tia sawiin, “Pawisa ka khel a, mipat hmeichhiatna lamah ka tlan a, ka hmingchhe ve hat nghe nghe, tawngkam bawlhhlawh pui pui ka chhak chhuak a, dawt ka sawi a, chutiang tih chu pawisakna reng reng ka nei lo,” tiin hetih hunlaia a nundan a sawi.

Hetih lai hian tum khat chu a thinlung vit zawrtu lehkha thawn a dawng ta tlat mai. “Ka lehkha dawn chu ka han hawng a, ka nu lehkhathawn a lo ni a. Chu lehkhaah chuan ka nu chuan pawisa ka thawn ngai tawh loh avangin ka nauin lehkha a zir zawm thei tawh lova sikul a bang hial a ni tih min rawn hrilh a. Ka rilru a na hle. Zu leh saa pawisa ka sen nasat em avangin ka nu leh ka nau rethei takin an awm tih ka hriat chuan ka tap lo thei lo a ni,” tiin a sawi.

Hemi hnu lawk hian Juan Manuel marquez nen a vawi thum nan an inhnek a, a chak zo ta lo. An inhnek zan hian Manny Pacquiao chuan inlarna a hmu ta, “Ka mut hmunah chuan ka beng ngei hian Pathian aw ka hre ta tlat mai. Chu aw ka hriat chu khawpui ri ai pawha a let 10 chuanga ring a ni. Aw chuan ‘Ka fapa, ka fapa, engah nge min kalbo san?’ tiin a rawn sawi a ni,” tiin a sawi a. A inlarnaah chuan ramhnuai mawi tak mai, pangpar mawi tak takin a bawm khah luk maiah hian hruaia awmin vantirhkoh pahnihin an hruai niin Pacquiao chuan a sawi a, “Pathian aw ka hriat lai chuan ka thi ta ni hian ka hria a. Ramhnuai mawi tak maiah hian ka lo awm a, ka thingthi a, ka hmai lei siin ka tawngtai a. Chutih lai chuan eng var tak mai hian min rawn chhun a, aw chuan min rawn be ta a. pathian chuan hun hnuhnung a nih tawh zia leh Ama hnena let leh tura min sawmna te, a rawngbawl hna ka thawh dan turte min hrilh a ni” tiin a sawi.

Inlarna a hmuh hnu hian mumang mai mai tiin theihnghilh a tum nasa hle a. A nundan chuan beidawnna a thlen a, chu chuan Pathian mamawh ngawih ngawihin a siam ta a ni. Nikhat chu a inlarna hmuh lam a ngaihtuah tawh mang loh laiin Bible a chhiar a, chutah chuan Pathianin mi pakhat a mumang kaltlanga a biak thu a chhiar a. Chutah chuan a mumanga inlarna a hmuh kha a hnena Pathian inlarna a ni tih a pawm theih ta chauh a ni.

Chutianga inlarna a hmuh a pawm hnu chuan a inlarna hmuha a thil hmuh hrang hrang leh aw a hriatte chu a ngaihtuah chhuak a, chumi hmang chuan Pathianin a thinlungah thu nasa takin a sawi a. A nundan thin bansana Lal Isua Krista tan inpe tawh turin inhlanna a nei ta a ni.

“Ka piangthar a, chhandamna ka chang a, kawngdik ka zawh avangin ka lawm hle a ni,” tia sawiin manny Pacquiao chuan, “Kan zavai hian pianthar hi kan tih makmawh a ni. Krista chuan mihring hi kan pianthar loh chuan Pathian ram kan luh a rem lo tih a sawi a. Chuvangin keima mimal tan tak pawh pianthar hi a pawimawh hle. Isua Krista chuan, ‘Keimah hi kawng leh thutak leh nunna chu ka ni. Keimah kaltlang lovin tumah Pa hnen an thleng lovang’ tia a lo sawi angin Lal Isua kaltlang lo hi chuan Pathian hnen thlen theih a ni lo. Lal Isua hi Lal leh Chhandamtua i pawm chuan chatuan nunna i lo nei dawn a ni,” tiin a sawi.

Pacquiao a pianthar hnu hian a nunah inthlakthleng tam tak a rawn awm nghal a, hun rei tak chhung Boxing zirtirtu (trainer) atana a hman Freddie Roach chuan, “Manny Pacquiao nunah hian danglamna mak tak tak a rawn awm a. Amah a inthunun thei ta em em a, a nightclub (zana in tawl lenna club) a hralh a, zu a nghei a, hmeichhia a ngaihsak tawh lo. A nupui nen an inkara buaina neuh neuh awm chu a reh a, mi tha takah a inthlak danglam nghal a ni,” tiin a sawi.

A pianthar hnu hian a nuna pawimawh ber chu Lal Isua leh ama inkar a ni tih a sawi a, “I nunah Lal Isua i nei a, i nunah Pathian a lal ber a nih chuan he khawvel ropuina te hian awmzia a nei tawh lo va, i nunah chuan Pathian a pawimawh ber tawh a ni,” tiin a sawi.

A pianthar atang hian nitin Bible chhiarin zirchianna (bible study) a nei thin a, hemi chungchngah hian, “He dan bu hi vawng reng la, zirchiang la, a chhunga thu inziak zawm turin i nun uluk hle rawh. Tichuan i nun a tluang ang a, i hlim zel ang,” tia sawiin, “Pathian thu hi i nun kaihhruai nana i hman phawt chuan i nun leh i tawng thlengin a veng che ang a, i nunah thlarau thianghlimin hmun a chang dawn a ni,” tiin a sawi bawk.

Boxing a hlawhtlinna tam tak a chan bakah fanau malsawmna a dawng a, politics lamah lutin inthlanah a hlawhtling chho zel a, vawiinah pawh hian Manny pacquiao hi Philippines roreltu Congressman a ni a, mi thenkhat chuan Philippines President pawh a chuh mai an ring. Malsawmna a dawn tam tak atang hian Pacquiao chuan Biak in a sa tawh a, mi harsa te chenna tur community center a sa bawk. Politics-a a luh chungchangah Pacquiao chuan Congressman a nihna chu Pathian thu puandarhna remchang a ni tih a sawi a, eirukna dova ram tana thawh a tul thu a sawi

“Rinawm taka mipui rawngbawla tanpui ka duh ber. Sorkar hian pawisa a thei a, mipui tana thawk turin thiltihtheihna pawh a nei. Mahse sorkar mi tam tak chuan anmahni inhaivur lam ringawt an buaipui si,” tia sawiin Pacman chuan “Kei chuan Pathian tih chungin mipui rawngbawl hi ka duh ber a ni,” tiin a sawi.

“Pathian hian mal min sawm nasa em em a, politics ah leh boxer ka nih angin hlawhtlinna ka hmu nasa a. heng ka hlawhtlinna te hi tangkai taka a rawngbawl nan ka hman Pathian hian a duh tih ka hria a, keimahah hian Pathianin thil tum ropui tak a nei a ni,” tia sawiin Floyd mayweather a hneh loh hnu lawkah Manny Pacquiao chuan, “Pathian remruat dan hi kan beisei dan leh kan duh danin a rawn kal vek lo va, kan beisei loh dan ang te, kan suangtuah phak bak tein kan hnenah a rawn thleng zawk thin a ni. Eng pawh kan chungah thleng se, lungawi taka a chanchin tha puan darh mai hi kan tih tur a ni a. Vawiinah hian a hming puang darh tur ka ni a, ka hming tih lar ringawt ka ngaihtuah hi a thiang lo,” tiin a sawi.

Aside | Posted on by | Tagged , , , | Leave a comment

“NUCLEAR FREE-WORLD” TURIN RAM 122-IN LUNGRUAL TAKA HMALAK AN REM TI TA

Nimin July 7, 2017 ah UN Hqrs, New York ah ram 122 palai kalkhawmte chuan kan chenna khawvel atanga “Nuclear ralthuam” paih bo vekna turin, lungrual takin khapna dan tur phek 10 zeta chhah chu an pawm tlang ta. He sawihona leh vote laknaah hian Netherland ram chiahin a duh lo zawngin vote a thlak a ni. Netherland hian a ram chhungah US Nuclear bomb a kawl vang a ni. UK erawh a tello hrim hrim thung a, lungrual taka thu tihtlukna chu kan thlawp, a ti thung.

Kum 70 liamtaah Atom bomb, Hydrogen bomb hna thawh dan leh a thawh nat dan, thil a khawi pawi theih dan chu USchuan Japan ram Hiroshima leh Nagasaki ah khawvel a lo entir tawh a, chumi hnuah atom leh hydrogen bombs ang hihman zui a ni ta lo. US-in Japan khawpui ber Tokyo a lo bomb thawr lo te hi a lehlam zawnga chhut chuan an zah ngaihzia leh Pathian hriatna an neih zia a tilang chiang hle (MSR a ziak tawh US-UK leh Soviet Union Nuclear bomb targets… tih ziak chhiar teh-CT).

Tun hnai July 4 ah North Korea chuan nuclear warhead vuah theihna tur Inter-Continental Ballistic Missile (ICBM) 933km pha a test a, nuclear ralthuam lah a rukin Iran nen an chher ru a puh niin, North Korea hian nuclear bomb hi 15-30 vel nei tawhin chhut a ni. Sairawkherh tha deuh neih a, saihlum tha deuh deuh hrual mum, chang tha pho ro, belmang a hrual mum dum tle hlarh neih hi chuan, mipa naupang tan sava veha ramhnuai vela chet tlat tlat chu nuam tak a ni thin. North Korea Dictator Kim Jong-un pawh thisen lum lai leh, a hmel en reng rengin leh a sam meh dan atang rengin a dawn a tawi tih a chiang reng mai si. ICBM (Sairawkherh) tha zet a neih chuan, a saihlum hrual mum (nuclear bomb) hmanga US leh a thawh pui ramte chu han perh zauh a chak et et ngei ang le!

Elayne Whyte Gomez, President of UN Conference chuan,”Khawvelin nuclear laka zalenna a duhzia a entirna a ni” tiin, ram 122 zetin nuclear ralthuam tihbo (ban) an thlawp chu lawmthu a sawi a ni. He thuthlung siam phek 10 zeta chhah hi Sept 20 khian New York a UN Annual Assembly ah pharhin pawm a ni ang.

Beatrice Finh, International Campaign to Abolish Nuclear Weapons, Geneva chuan, “Nuclear Programs kal puina awm tih tawp (ban) vek kan duh a ni. Kum 45 kaltaah khan Biological weapons neih khap a ni a, kum 25 kaltaah Chemical weapons khap leh a ni a, tunah chuan Nuclear weapons khap a ni dawn ta” tiin, an thutlukna chu a lawm hle. Kum 2 hnuah ram 50 zetin khap burna an pawm chhohzel theih chuan, International Law a ni thei dawn a ni.

Kum 1968 ah Nuclear chungchangah nei ve phal lohna/duh miahlohna “Non-Proliferation Treaty” (NPT) siam a lo ni tawh a, he Dan siam ang chuan UN Security Council member nghet US, China, Russia, France, UK tih lohte chuan nuclear program kal pui loh tur tih a ni. Mahse, India,Pakistan ten NPT hi an ziak ve duh lova. Israel lahin “Nuclear ka nei” a ti duh lo na in, a lo berah 100-120 chu a nei ngei niin Nuclear Watchdog te chuan an ring a ni. Gen. Colin Powell, Chairman of Joint Military Chief of Staff leh US Secy of State hlui chuan Diplomatic Cablewire ah, Israel hian nuclear a neih thu a lo sawi tawh a ni.

Iraqi President Saddam Hussein khan Biological weapons hmangin a laka rinawmlo leh amah dotute nia a ngaih mipuite chu a lo bei tawh a, tunah Syria President Bashar al-Assad chuan Chemical weapons hmangin amah dotute a bei tawh bawk a ni.

Author : Ct Lalrinawma    

Aside | Posted on by | Tagged , , , | Leave a comment

Mi rorum leh ropui Bear Grylls chanchin

Edward Michael “Bear” Grylls hi June 7, 1974 khan Donaghadee, County Down, Northern Ireland ah a lo piang a, kum 4 a nih thlengin helai hmunah hian a awm a. Chumi hnu chuan an chhungkua in Isle of Wight – a Bembridge hmunah an in sawn.

A pa Sir Michael Grylls hi Politician niin a nu hi Sarah Lady Grylls a ni a, a nu pawh hi Politician fanu ve tho a ni. Bear Grylls hian unau nu pakhat Lara Fawcett a nei a, a unau nu hian a hminga “Bear” tih hi karkhat leka upa anih laiin a phuahsak a ni.

Grylls hi Ludgrove School leh Eton College a in zirchhuak a ni a, mountaineering club ah te telin bul a tan a, chumi hnu kum 2002 ah Birkbeck, University of London ah part time in Hispanic lam zirna a graduate a. Hemi hnu hian University Of The West Of England ah a graduate a ni.

Kum naupang te a nih laiin, a pa hnen atangin tlang lâwn leh lawng khalh te a zir a, a pa hi Royal Yacht Squadron a member a ni. Tleirawl (teenager) a nih laiin skydive a zir a, Shotokan Karate ah pawh Second Dan Black Belt a dawng nghe nghe a ni. English, Spanish leh French tawng te a hmang thei a. Amah hi Anglican sakhua a ni a, hei hi a rinna kawngah a tân chuan a inghahna ber pawh a ni.

Kum 2000 ah Shara Cannings Knight nen inneiin fa pathum: Jesse, Marmaduke leh Huckleberry te an nei a ni.

School a kal hnu hian Himalaya tlang te a lâwn duh vangin Indian Army a zawm a, kum 1994 – 1997 inkar chhung hian British Army leh 21 SAS tan a thawk bawk a ni. Kum 1996 ah, Zambia ramah a parachute a parh theih loh avangin a chesual palh a, a hnungzang ruh pathum a ti tliaka ni! Kum 2004 ah Grylls hi Royal Naval Reserve ah Lieutenant Commander rank pek a ni a, kum 2013 ah RoyalMarines Reserve ah Lieutenant Colonel Rank pek leh a ni bawk a ni.


A CHANCHIN NGAIHNAWM ȚHENKHAT TE :

1. May 16,1998 ah Grylls chuan a naupan lai atanga alo châk êm êm Khawvela tlâng sâng ber Mount Everest chu a lâwn chhuak a, a accident -na a a hnungzang ruh 3 a tih tliah ațanga thla 18 naah a lâwn chhuak a ni! Kum 23 mi niin a lawnchhuak a, a hunlai kha chuan a lâwn chhuak theinaupang ber pâwl a ni nghe nghe.

2. Himalaya tlâng lâwn tura a inbuatsaih lai hian, kum 1997 ah Briton zinga Ama Dablam tlâng lâwn chhuak thei naupang ber a ni a, he tlâng hi Sir Edmund Hillary chuan “tlang lâwn theih loh” tih hiala a lo sawi țhin a ni.

3. Kum 2000 ah, a team te nen Royal National Lifeboat Institution tana sum tuak nan British Isles chu jet skis hmangin an fang kual a, ni 30 chhung hun an hmang a. Chu mai bakah a thianpa, tlâng lawnnaa a chetsuala vangake ruh ti tliak tan sum hmuhsak nan saruakin ama siam bathtub hmangin Thames luiah a in kar a ni!

4. Kum thum hnuah, a team a mi panga te bakah a naupan laia a thianpa, Mt.Everest a lawnpui ni bawk Mick Crosthwaithe te chu hruaiin North Atlantic Tuipui chu lawng hampuar theih chi hmangin an kân a ni!

5. Kum 2005 ah, balloonist leh tlang lawnmi ni bawk David Hempleman Adams leh Royal Navy Freefall Parachute Display Team an leader, Lieutenant Commander Alan Veal te kiangah Grylls chuan world record a siam a. Grylls chuan open-air dinner party nei sang ber record a siam a, he record siamna atan hian Grylls chuan meter 7,600 a sangah hot-air balloon (Balloon boruak lum hmanga thlawkthei) hnuaiah chaw a ei a ni. Hemi atana a inpuahchah naah hian parachute hmangin vawi 200 chuang a zuang a ni.

6. Kum 2007 ah, Grylls chuan Parajet Paramotor hmangin Himalaya, Mt.Everest bulah a zuang thla a, meter 4400 a sâng, a tlâng chhim lam mel 8 ah a zuang thla a. A zuan thlâk dawn hian Grylls chuan chu lai hmun chu -60°C (-76° F) a vawt niin a sawi! Oxygen a tam tâwk lova, a hmaa a record aiin meter 3000 laiin a sâng zawk a ni. He a thil ti lai hi Discovery leh UK a Channel 4 te chuan video an shoot sak a ni. Grylls chuan Everest paltlang a tum a, mahse Chinese Airspace ten Everest chhim lam chauh ti tura phalna an pêk avangin Everest zawn tak chu a paltlang ta lo a ni.

7. Kum 2008 ah, Grylls chuan a team a mi pali te nên khawvel a tlâng hla/awmna fâl ber zinga mi, tuma la lâwn chhuah loh, Antarctica ami chu lâwn chhuah an tum a. He thil hi Naupang tanpui ngaite tanpui nan leh mihring chakna neih tihlan nana hman an tum bawk a ni. Hemi pah hian a team te nên chuan lawng hampuar chi hmang leh jetski hmangin Antarctica tuipui kam vel chu fan kual pah an tum bawk a, chu bakah vûr ram thlaler zau tak te pawh chu fan kual an tum bawk a ni. Mahse vanduaithak takin Grylls chuan kite-skiing an tih laiin a dar ruh a ti tliak palh a, an tum ai hmaa an haw a ngaih phah ta a ni.

8. Kum 2008 ah, Grylls chuan a thian fu ke kim lo, Al Hodgson leh Scotsman Freddy MacDonald te nen thli chakna hmanga indoor a thlawk rei ber niin World Record an siam a. A hmaa record lo awm tawh te chu second tlem tê in an khûm a ni. He record pawh hi Global Angels tanpui nan a tih a ni.

9. Bear Grylls hian lehkhabu 18 vel bawr a ziak tawh a, a lehkhabu chhuah hmasak ber chu Facing Up (UK)/The Kid Who Climbed Everest (US) tih a ni a, he lehkhabu ah hian Mt.Everest a lâwn chungchang a ziak a, hemi hnu hian lehkhabu eng emaw zât tihchhuah belh lehin a autobiography pawh bu 3 lai a ziak tawh a. Hun khirhkhanadam khawchhuah nana beih dan tur lam hawi lehkhabu 9 ngawt mai a chhuah tawh bawk.

10. Grylls hian TV Show 12 vel bawr a nei tawh a, chung zinga mite hriat hlawh leh lâr ber chu Born Survivor, Man vs. Wild tia kan hriat lâr hi a ni a, kum 2006 a a chhuah tan kha a ni a, a hlawhtling êm êm a, season 7 lai mai a tichhuak thei a ni!

11. May 17, 2009 khan, The Scout Association chuan Chief Scout nihna kum 5 chhung lo chelh tawh Peter Duncan chu thlakin Grylls chu Chief Scout atan an ruat a. Gilwell 24 hmunah July 11, 2009 khan he nihna hi an hlân a. Chief Scout 10 na chiah a nih bakah Chief Scout ni thei naupang ber a ni bawk. April 9, 2015 ah chuan The Scout Association te chuan Grylls chu Chief Scout nihna chu 2018 thleng chelh turin an pawhsei sak a. Grylls chuan, “Khawvela Youth Movement lian berin UK Chief Scout nihna chelh zel tura min ti hi ka lâwmin ka inchhuang takzet a ni”, tiin a sawi.

12. Grylls hian mite tanpuina kawngah ke a pên nasa êm êm a, The Prince’s Trust tân ambassador a ni mêk a, an pawl hian United Kingdom ah kum naupang zawk te tan training tam tak an pe țhin a ni.

13. Global Angel, UK a pawl pakhat khawvel hmun hrang hranga naupang tana thawk thin an ni a, kum 2007 a din a ni a. He pawl tan hian Grylls hian sum a thawk chhuak hnem êm êm bawk a. Mount Everest a a lâwn te, World Record a siam te leh a tlâng lâwn thenkhat te atanga a sumhmuh te chu he pawl tana a tih vek a ni. Chu mai bakah Grylls hi Care For Children tan ambassador a ni bawk a ni.

A KAMCHHUAK ȚHENKHAT TE :

1. Inah hi chuan guitar leh piano ka tum tlangpui thin.

2. Eton College ka kal lai a ka teacher Mike Town hnenah hian lawmthu ka sawi duh a, ani hi tlang lawn lama min fuihtu leh min tiphur tu ber a ni.

3. London ah chuan taxi kan neih hmangin school naupangka hruai thin a ni.

4. Filming kan tih zawh hian, ka thiante nên ramhnuaia bar ah kan thu ho a, kan la dam avang hian ka lâwm thei hle a ni.

5. Ka thian, ka thawhpui te hi ka chakna hnar an ni.

6. Mi te hian inah rannung i ei thin em ti in min zawt fova, kachhanna chu, ka ei ngailo tih a ni.

7. Kan chhungkaw thlalak hi ka pheikhawk ah ka dah tha thin.

8. Wales ramah khuan thliarkar thuruk ka nei a ni!

8. Kar khatah hian ni 6, rei lo tê tê ka train thin a, mahse tihtakzetin minute 30 chhung ka train thin a ni.

9. Ka Kristianna hi ka chakna thuruk leh min tung dingtu ber a ni.

10. Nitinin ka nupui leh ka fate nen kan tawngtai ho thin.

11. Mt. Everest chhip ka thlen khan, naupang ang mai in ka tap tawp mai a ni!

12. Ka lehkhabu duh ber chu Laura Hillenbrand ziak, Unbroken a ni.

13. Ka Hero chu ka pa hi a ni a, ani hian tlâng lâwn min zirtirthin a ni.

14. Ka hero dang leh chu Roger Federer hi ni.

Aw le! Tun atan chuan tâwk rih phawt se, Bear Grylls show hlawhtling êm êm mai, Animal Planet channel vela kan lo hmuh thin, ‘MAN vs WILD’ chanchin ngaihnawm leh maksak tak tak i lo châng leh dawn nia. Chubakah a show pakhat ‘Running Wild with Bear Grylls’ pawh ilo chang dawn nia,he show-ah hian Celebrity ho a hruai thin a, ‘ Man vs Wild’ a a tih thin ang ho kha a tih pui thin a ni. I lo ngaichang reng dawn nia.

Author : FrEdy Lalrinmawia Renthlei    

Aside | Posted on by | Tagged , , | Leave a comment

US & UK LEH SOVIET UNION “NUCLEAR BOMB TARGET” HMUN A LO RAPTHLAK E! NORTH KOREA RAM TARGETS AN SIAM ZO TA

Kan chenna khawvel (Planet Earth) hi a Siamtu Pathian ni lovin, a siam Mihringte ngeiin kan la tichhe vek dawn niin alang. Pathianin khawvel a siam a, a nih tur ang taka a duan chhuah zawh khan Bible chuan,”Pathianin chu chu a en a, tha a ti hle a” (Gen 1:25) tih min hrilh a ni. He khawvel vawiin thlenga a la chhe lo hi “Lei chi” (salt) leh “Khawvel eng” (light) kristiante kan la awm vang chauh a ni. Ringtuten he khawvel hi Vanah kaisan vek ila, a nawmna leh hlutnate a bo vek ang! Rev. Dr. John MacArthur Jr., Grace to You Ministry leh Tele-Radio Preacher ropui leh hmingthang phei chuan, “Khawvelah hian Ringtute hi lak bovin awm ta ila, kum 7 chhungin khawvel hi amah leh amah a in tichhe vek ang” a ti bawk.

Mihring leh mihringte intihnat duhna avanga indona hmun, sang tam tak thisen luanna leh inthahna ram Cambodia, Vietnam leh Laos ram te chu chipchiar taka zir chungin ka fang tawh a. Vietnam rama bomb thlak vanga mihring piansualna tamzia leh, thing leh mau leh leilungin an tawrh nasat zia te, Laos rama bomb thlak vanga a zungzamin thing leh mau leh boruak a suasam dan te chu rapthlak tak a ni! Iraq, Syria leh Afghanistan ram hrehawm turzia te hi ka ngaihtuah fo va. Chutih rualin heng ram, thih hlauhawmna leh mihring nunnain hlutna a neih loh ramah te hian Pathian hmangaihna thuchah keng a, “Chanchin Tha hril” erawh ka chak hle.

Tunlaiin Nuclear ralthuam nei North Korea leh US-Japan-South Korea tangho indo se tih te, India leh China inkhuai nuai se tih te, India leh Pakistan chu nuclear ralthuamin in phin khum vel se tih te, Israel leh Iran indo tawh se, etc tihte kan sawi thin a, indo tak tak chiah sela chuan “A rapthlak turzia hi, aw ka sawi thei lo!” tih hla ang maiin, a khawih chhe turu buru rapthlak hlein a rinawm.

Pathian tihna leh hlauhna nei miah lo, a changa ramsa rilru ang lek pu a mahni mihring puite tihlum a, tihrehawmtu leh suat duhtu hi khawvelah an lo piang vein, rorelna pawh an ko kiah chuangin, thuneihna an kutah awmin an lo chelh tawh thin a; chung zingah chuan heng mihring- Galigula-The Schizophrenic Emperor, Nero-Fifth Emperor of Rome, Attila the Hun-The storm from the East, King John-Cold Hearted Monarch, Torquemada The Spanish Inquisitor, Prince Vlad Dragula, Francisco Pizarro-The Conqueror of the Incas, Bloody Mary-1: A Catholic Queen in Protestant Country, Ivan IV-The Terrible-Tsar of All Russias, Elizabeth, Countless Bathory-Countess Dragula, Rasputin the “Mask Monk”, Joseph Stalin-20th Century Tyrant, Adolf Hitler-Father of Final Solution, Islse Koch-Bitch of Buchenwald, IdiAmin-The Butcher of East Africa, Pol Pot-Architect of Genocide, Saddam Hussein of Iraq leh Bashar al-Assad of Syria ten an mipuite an sawisak dan te chu rapthlak tak a ni. Kim Jong-un of North Korea-Hermit Kingdom lalpa thiltih vel dan pawh hi, mihring nih phung piah lam daih a ni.

Cold War laia US-UK leh USSR inbeih tum dan
Thil hlauhawmzia hrechianglo apiang hi hun thim leh hlauhawm zual lai pawhin, khauphar thawven ching leh hirha deuh, mawl huaisen fu fu an ni fo mai! Thil thalo leh hlauhawmin a hnu lam a nghawng tur an ngaihtuah phak thin loh vang a ni.

US chuan a hmelma (arch-foe) bera ngaih, Soviet Union (USSR) chu kum 1948 daih tawh khan nuclear bomb hmanga bomb tumin ruahmanna a lo kal pui daih tawh a, chu ruahmanna thuruk chu a codename-ah “Half-moon” tih niin, Soviet Union ram chu Atom bomb 50 zetin a kah tur khawpui leh hmun a lo siam lawk diam a. Tunah pawh US hian North Korea hi bei turin target bik hmun a siam fel vek tawh a ni.

US chuan Soviet Union (tuna Russia) chu vawi 133 a kap ang a; chungah chuan khawpui (city) 70 a target a, Lenningrad (St Peterburgh) chu Atomb bomb 7 in a vawm khu luih anga; Moscow khawpuiah erawh Atomb bomb 8 a thlak thung ang. Hetianga US ruahmanna ‘America First Nuclear Plan-1948’ chu “Nation-Killing Concept” an ti a, hnam puma inthah puk theihna thil a ni.

He ruahmanna tihbaihawm tak, a huhova Hremhmun kawngkhar chhuih dawt theihna tur leh liam diak theihna hi Navy lam hotu Admirals rualte chuan tha an ti lova. US Air Force hotute thil kal pui tum dan chu an pawmpui thei lo. Admiral Arthur W. Redford chuan, “Indonaa tel ve lote thah chiam chu a tha lo a ni” a ti. Rear Admiral Raph A. Ofstie, Japan rama Atom bomb thlakna tura mawhphurtu meuh pawhin, “Zahngaihna tello leh nunrawng thiltih (ruthless & barbaric) a ni a, American value-ngaihsan zawng a tichhe vek a ni” tiin, a sawisel bawk. Mi tha leh Pathian ringtu nghet te vangin, khawvel hi a lo la chhe lo mai mai a ni ber e.1950 ah chuan US chuan a policy thlakin, military hmun puite chauh (counter forces-military facility) beih tur a ti ta a ni. Kum 1960 ah US chuan ruahmanna dang siam lehin,”Single Integrated Operation Plan” (SIOP) a ti a, US chuan UK thawhpuiin, US Forces leh UK Bomber Plan an siam ta. Chu tih hun lai chu President John F. Kennedy hun lai leh Cold War vanglai kha niin, SIOP targets ang chuan bi tum bik hmun 3,729 ah nuclear ralthuam 3,423 an thlak dawn a ni! Heng targets hmun te hi Soviet Union, China, North Korea leh Eastern Europe a Soviet awp beh ram leh military base te an ni. 80% chu military base a nih laiin, a dang zawng chu civilian chenna khawpui an ni. Soviet Union ramchhungah khawpui lian (urban industrial complex) 295, China-ah 78 an target a ni.

Heng bombs thlakte hian Soviet Union mihring 54% chu reiloteah ruhro leh vaivutah a chan tir ang a; China mipui 16% pawh an thi bawk ang. Chung thite belhkhawm chu maktaduai 220 an ni ang a, chawplehchilha vaivut a chan bakah, nuclear & atomb bomb zungzam vangin an thi teuh bawk ang.

1955 ah William Struth report chuan, UK’s Central War Plans ang chuan Hydrogen bombs 10 chu UK tuipui kamah thlak lo ni ta se, mihring 1/10 in an thih phah ang a, UK rama farm-land te chu economy tihchhiat nan an bomb an ring a ni. UK chuan hetiang a nih vangin Soviet Union nuclear hmunpui (nuclear arsenal) chu tihchhiat vek a tum tur a ni. He UK-in kum 1958 a Bomber Command-Emergency War Plan a siam ang chuan, Soviet khawpui 44 a tichhe vek anga, mihring maktaduai 38 in thih phah turin an ruahman a ni.

UK hydrogen bomb 1 zel chuan Soviet Union ram khawpui a deng ang a, Moscow ah erawh hydrogen bombs 4, Leningrad (St Petersburg) ah 2 thlak a ni ang. UK leh US chuan kum 1960’s chhovah indonaa tel dun turin inremna an nei a, US leh Soviet Union an indo chuan UK-in Soviet Union khawpui 25 te chu a lo bei ve ang, tih a ni.

Soviet Union pawh a muhil mai mai bik lo!
President Ronald Reagan khan USSR/ Soviet Union chu “Thim Lalpa rorelna ram” tiin a lo sawi tawh a, anni Soviet Union phei chuan mipui tawrhna tur an pawi ti vak hauh lo! USSR Joint Intelligent Committee chuan US leh UK ai daihin an duh chhe zawk a ni. “Probable Nuclear Targets in UK” tih an siamah chuan, London khawpui chu Hydrogen bombs 8 lawihin an bomb nghek ang a, Edinburgh khawpui chu Atomic bombs 2 a beiin, Glasgow khawpui chu Hydrogen bombs 4 laiin an bomb thawr bawk ang.

Scotch Whiskey tamna ram, Scotland tuipui kama tuihnuai lawng (submarine) Lawi tui cheng ang maia bawk dum fur mai te chu Hydrogen bombs 4 leh Atom bomb 4 hmangin an bomb pilin, an bomb alh zuai zuai ang. PM Winston Churchill phei kha chuan BBC ho hnenah, Hydrogen bomb thawh dan rapthlak dawn em avangin mipui a ti thlabar lutuk dawn a, chuvangin puang lo turin a hrilh a ni, an ti hial.

1959 ah UK’s Royal Air Force (RAF) ten Atomb bomb 71 an nei a, US-in 168 a nei tawh a ni. 1961 ah British-in Hydrogen bomb a nei tan tih a ni.

Jet Fighters-ten Nuclear Bomb an thlauh palh a hlauhawm !

India rama “Right To Information Act” (RTI) hi US- a”Freedom of Information” dan entawna siam a ni a, Mizo te pawhin RTI hi kan hmang tangkai sawt viau. Thil lawmawm tak a ni. Erics Cholossa chuan US-in Nuclear ralthuam a neih chhoh dan leh hman a lo tum dan hi Freedom of Information hmangin US thuneitute hnenah “Nuclear Arms Race, Command and Control” tih hi lo dil chhuak a, chumi atang chuan khawvelin nuclear hmanga inbeihna awm thei thuruk a lo hre ta a ni.

Nuclear-Hydrogen-Atomb bomb te hi Jet Fighters leh Bombers ten an lo phur kual fo tawh a, chung an phurh kualna lamah chuan chetsual pui palhin, khawvel chhiat vak theihna a lo thleng tep thin a lo nia! Keimahni mihring leh mihringte ngeiin kan chhiat rupna ni hi kan siam a rinawm. Kum 1950-1968 inkarah ringawt vawi 700 lai chu Nuclear ralthuam 1,250 zet an lo chetsual pui tep a, mahse, an puak darh hman thin lo a ni, an ti.

Lt. Gen. James M. Kowalski, US Air Force Global Strike Command, 20th Air Force “Around the Clock” hotu chuan, “Nuclear ralthuam te chu vawn him a ngaiin, uluk tak (save, secure & effective) a enkawl an ngai tak meuh a ni,” a ti.

Jan 23, 1961 khan Goldsboro, North Carolina state-ah B-52 strategic bomber chuan Hydrogen bomb a phurh chu a lo titla palh tawh a, mahse, amah tuamtu-phurtu Parachute chu inhawng tha hman lovin thing kungah a lo tang hman hlauh a ni awm e. Chumi tum chuan bombs chu 4 megatones, TNT bomb chak zet maktaduai 4 puak tluka thawk na a keng tel, an ti. Chutih lai chuan lo puak dur sela chuan Washington, Baltimore, Philadelphia khawpui bakah,New York City thenkhat pawhin a tuar hle ang, an ti a ni.

Hetiang taka thil hlauhawm mah ni se, US sorkar chuan a mipuite hnenah “Goldsboro thil thleng chu a hlauhawm lo,” tiin, a sawi tlat, an ti. He Goldsboro hmuna thil thleng hi John F. Kennedy chu US President atan lakluh hma ni 3 a thilthleng niin, Parke F. Jones chuan a sawi. He accident hi B-52 Strategic bomber thlawhna lian hrawl zet chuan Sreymour Johnson Air Forces Base-Goldboro ah dan pangngai (routine flight) angin thlawh velna neiin, East Coast lama a neih laia thil thleng a ni. Hydrogen bomb a phur hi a lo awm hrang palh a, palhat chu Faro, North Carolina-ah a tla a, a phurtu parachute chuan thing kungah a tan pui hlauhva, hei hi Big Daddy’s Road-ah a ni. Tlema tlemah mahni an in bomb hlum teuh tep a nih chu.

July 1956 khan Suffolk, England ah Royal Air Force (RAF) ten Atom bomb an lo tipuak palh teuh hle bawk. Jan 1987 ah pawh Wittshire hmunah Hydrogen bomb phurh pawh anbuai phah tep a, hei hi “top secret” an ti bawk.Khawvel hian Nuclear ralthuam hmanga indona a la hmachhawn lo na in, a rapthlak lutuk dawn avangin a hna thawh dan hrechiang tute chuan “Nuclear bomb” siam a, indona a chhuah palh hi an hlau tak meuh. Cold War laiin”Cuban Missile Crisis” ah nuclear ralthuam hmanga invaunaa lo awm tawh a, October 1983 pawh khan President Ronald Reagan a President kum 3na leh Iron Lady PM Margaret Thatcher-i term 2na hman mek lai te, British Spy zei leh hmingthang “James Bond” lar vang laite pawh khan “Nuclear ralthuama in epna” hi a lo nasa tawh thin a ni. Cuban Missile Crisis lai khan President John F.Kennedy chuan Soviet Union kha vauvin, darkar 48 chhunga Cuba hmuna an missile bun te chu inla chhuak turin a vauva, amah pawhin “Nuclear bomb kah chhuahna” hmet mai turin, “War Control Room” a thu tawh a ni, an ti thin.

Sept 20, 1983 a South Korean Airlines, Flight-007-Boeing 747 chi, passengers 300 phurin Soviet Union boruak a dai palh zauh an lo kahthlak tum te, US-in UK ah Cruise missile a dah tum te, West Germany ah Pershing-II missile a bun tum tein Nuclear hmanga indo tura invauna hi a lo awm tawh thin bawk.

October 22, 1983 phei chuan Hyde Park, London ah mipuiten nuclear ralthuam duh lovin an lo pungkhawm chiam tawh a ni. President Reagan kha America President ni tawh zinga rorum leh pa ber, Iran leh Soviet Union vau daitu tih a ni thin a, a hun laiin “Star War” program a kal pui chiam a, mahse, thenkhat chuan Star War kha conspiracy theory leh Soviet vau zam nana policy phuah chawp mai a ni, an ti bawk. Mahse, a hun laia siam Trident-D5 nuclear missile phur tura siam bik, nuclear bomb 8 zet phurtu te chu theuneulo tak a ni. He Trident-D5 hi US chu hmelmaten nuclear ralthuam hmanga beih a nih hun chauhva beihletna tur a ni. Soviet Union chu a tluchhe ta, Ronald Reagan leh Iron Lady Margaret Thatcher te pawh an awm ta lo. Mahse,Trident-D5 chuan a ralthuam phurh chu phur ning tawh hle mahse, hman hun tur hriat a nih tlat loh vangin, kum 2042 thlengin a la phur zel dawn a ni.

Reagan era-a ralthuam chher leh tuk thar 90% zet chu US leh Soviet Union inremna thuthlung vangin tihbo an ni zo ta.SIOP pawh “Operations Plan O Plan) 8010” tia thlak tawhin, hei hian Russia, China, North Korea, Iran leh Syria an tin zawn ber a; ram dang kah thut ngai a nih chuan last-minuteah ngaihtuah that tura tih a ni. Chuvangin US hian “NORTH KOREA” bei turin ruahmanna fel fai tak a nei dim diam sa ang tih hi, i ring ngam ang u. President Barack Obama khan”Nuclear Weapons Employment Strategy” a tichak a, US chuan military targets nei sa diam tawhin, “A tulah chauh nuclear ralthuam chu hman a ni ang” a ti

Author : C.T.Lalrinawma    

Aside | Posted on by | Tagged , , , , , | 1 Comment

MAHNI NUPUI VAWHLUM

Nimin (7.7.2017) zing dar 5:50 vel khan, Vanlalnuna kum 37 Tahan, Myanmar mi chuan a nupui Cheuzakimi kum 28 Suangdaw (Myanmar) chu a vawhlum a. Ruang hi post mortem tura kalpui mek a ni a, Tualthattu hi police ten an latawh bawk. Maubawk Branch YMA ten mitthi hi kuangah an dah a ni.

Tualthattupa sawi danin, a vuakhlum tak a nupui hi April ni 3 velah pawngsual tawk niin, a pawngsualtu hi a sawi duh lo a, uire a puhin a rilru na in a dawpna lam ah kut hi a thlak ta a ni. Fa kum 3 mi leh nausen thla 3 vel mi an nei a ni.


COMMENTS
Siamtei chawngthu Siami
_ _ A nupui hi saruakin a sawisa a. a ban ruh a vuak tliah sak hnuah a hliam hrep hnu a la chet theih siin “pawnfen feng rawh” tiin a la vau zui a ni awm e.
A nupui hi a nau neih atanga ni 4 naah dd in in entir turin a kal a. a haw lam ke a a kal miin an khawngaih in an phur a.chu chu a pasal hian i uire a ti ta tiin an thenawm ten an sawi.


A nupui fa kum 3 mi poh a naka tui sa a leihsakna.↑


A khup a tih pem sakna↑


A biang hi a pahrawn in chemtea a tai thler sakna a nih hi.↑

Author : Robert Pearson Varte    

Aside | Posted on by | Tagged , , , | Leave a comment

LAL ISUA’N “TI ȚHIN RAWH U” A TI CHIAH EMAW NI LE? by Dr John Hlychho

1. KOHHRAN-TE HIAN KAN TISUAL ELO??
Țumkhat chu Phaia lehkhazir, English Service-a inkhawm ţhin Mizo Țhian pakhat hian, tifuh inti takin, “Lalpa zanriah ţheh chungchangah hian Kohhran-te hian kan tisual lian khawp mai…” tiin, ka hriat theih ngei tur hian a sawi chhen mai a!!

Ka ngaih ţha lo chuan Restaurant-ah “Coffee tui tâwk ka khilai ang che…” tiin ka luhpui a, thil awmzia ka zawt ta chawt mai a.Thil awmzia a han sawi chuan ngaihtuah ti thui tak Bible châng, Kohhran serh leh sang nên-a inzawm pawimawh tak mai thu-ah a rilru a lo buai viau a, Kohhran-te chu ti dik lo min ti a, min lo dem viau mai chu lo niin…!!!

2. ENGLISH BIBLE-AH, “TI ŢHIN RAWH U” TIH A AWM LO MAW??
He Mizo Tlangval, lehkhathiam hian, eng Pathian thu zirtirna nge a lo dawnsawn sual chu a sawi duh lova. Amaherawhchu, a complaint tâk ber chu, “Mizo Bible-a Luka 22:19 thu, “Hei hi ka taksa, in aia pêk tura chu a ni, mi hriat rêng nân hei hi ti ţhin rawh u” tih laia “ti ţhin” tih ţawngkam tak hi English Bible-ah a awm lo. Mizo Bible Letlingtuten an belh-chawp leh an tih danglam a ni”, tiin ngaihdân a lo siam chu niin!!

English Bible-a Luka 22:19 thu hi kan han en chuan, “DO THIS IN REMEMBRANCE OF ME” tih chauh a lo in-ziak kher kher bawk nen…”ti ţhin” tih chu dik lova ngaih a awl hle dâwnin a lang ta a ni.

3. BIBLE BU DANG LEH CHÂNG DANGAH PAWH EN VE BAWK LA??
Bible hi Pathian thâwkkhum, nunna thu a nih avangin chiang fek fawka hriat-fiah leh hrilh-fiah a har a.A châng chuan ţawng danga a fiah zawk châng a awm a, a châng chuan mahni ţawng ngeia a fiah zawk châng a awmtho bawk. A châng chuan a kawppui, Bible bu dang leh Bung danga kan en chuan a lo fiah êm êm bawk.

Helai thu-ah pawh hian, Luka 22:19 chauh en chuan a buai theih viau mai thei. Mahse, hemi thu vêk hi Paulan 1Kor.11:24-25-ah chiang takin a târlang a.

Bible Scholar-te chuan, Paula ţawngkam hi en-in, a sawifiah chian fel-fai fek-fawk theih dân ațang hian, Paula hian Lalpa Zanriah chungchang hi Lal Isua hnên aţang ngeiin (êngin a chhûn thlûk lai vêl hunah emaw khân) a dawng niin an ngai hial a ni.A chhan chu, 1Kor.11:24-25 thu hi Luka 22:19 Sawifiahna ang deuhthaw a ni tlat a ni. Zawlnei Isaia chuan Pathian thu-in kawppui a nei vek a, kim lo a awm loh thu a lo sawi tawh bawk a nih kha (Isaia 34:16-17).

4. A ŢAWNGBUL LAMAH “TI ŢHIN RAWH U” TIH A NI RENG ALAWM LE!!
Sawi tâk ang khian, Luka 22:19-ah chuan, “ti ţhin” tih ţawngkam chiah hi English Bible-ah awm lo angin a lang naa, Bible bu/châng dangah, 1Kor.11:24-25 ah chuan chiang takin “TI ŢHIN” (THIS DO YE, AS OFTEN AS YE DRINK IT) tiin English Bible pawhin a ziak tho a ni.Mizo țawnga “TI ŢHIN” (Luka 22:19, 1Kor.11:24-25) tih hi Greek “POIEITE”, hman a ni a.

Greek “POIEITE” (do this/as often as/ti țhin) tih hi a grammatically chuan, “present imperative active” a ni a, “a prolonged form of an obsolete primary; to make or do in a very wide application (more or less)” tiin an hrilhfiah a ni.Hei hian “a khât tâwka tih-nawn fo” a kâwk. Chuvangin, Lal Isua khân, “HEI HI KA TAKSA, IN AIA PÊK TURA CHU A NI, MI HRIAT RÊNG NÂN HEI HI TI ŢHIN RAWH U” tiin a lo sawi chiang hle a ni.

Mizo ţawng hian Greek ţawng chiah chiah hi a lo la-chhawng zâwk a, English hi duhthu a lo sam lo lek lek zâwk chu lo niin!Lalpa Zanriah Sacrament chungchanga țawngkam pawimawh tak, “Mi hriat rêng nân hei hi ti ţhin rawh u” tih hi Mizo Bible-ah hian dik takin an lo letling a, hlauhthawn tur rêng rêng a lo awm lo.

Hetiang hian ngaihtuahna min pe hial, Mizo Bible Letlingtute kha ţhangthar-te aiin an zir sâng lo zawk naa, an lo va fingin, an lo va fakawm êm! Thlarau Thianghlim hruaina ngeiin Bible kha an lo letling a ni ngei ang, ka ti ta a ni!!

Chuvangin, ringhlel lovin, thlamuang tak leh lâwm tak leh châk takin, Lalpa Zanriah Sacrament hi i țheh fo ang u.

Aside | Posted on by | Tagged , | Leave a comment