Kan pawnlan dan hi a thuk a ni by Lalmanzuala

Rev Thansiama kha Mizote zingah chuan rinawmna, dikna leh huaisenna lama a ber pâwl niin ka  hria a. Finna lamah pawh khûm thei âwm an awm ka hre lo. A thusawi lâr tak kan sawichhawn fo chu: “Mizote kan pawnlânzia chu a thûk a ni” tih hi a ni.

He thu hi mihring duhzawng ni lova, Pathian duhzawng zawka kum 30 zet rawng a bâwl hnu-a a sawi a ni a.  A thawhpuite(Rev Saiaithanga tiam lovin) leh ringtu mipuite pawh mihring duhzawnga Pathian rawngbawl duh deuh vek an nih avanga Pathian duhzawnga rawngbawlpui theih alawi a neih lohna kha, he thu a sawina chhan tak chu niin ka hria.

Kan pawnlânna thûkzia lanchiannate ni-a ka ngaih ka han thurchhuak nual a, kan sawiho leh nak nak a niang chu.

1. Advanced Christmas Hman: Pian champhaphâk a nî tak a thlen hmaa kan lawm ngai loh avangin Lal Isua pian champhaphak a ni hmaa lo lawm hi dik lovin ka hria. Hetiang  hun kan  hman țhin chhan hi intâwllen kan duh vang ni berin a lang a. Chutiang tih nana kan Pathian pianni ber lo sawn kual vel chu a “pawnlân”thlakin ka  hria a ni. Țhenkhat Krismas ni dik tak hi  hriat a ni chuang lo, tite an awma Advanced Christmas a hma-a an hman tawh chuan December 25-ah hman tawh loh mai awm a ni. Kan hriat chinah khawvel ram danga hetiang ti ve an awm lo hian kan pawnlanzia lanna a nih em loh pawhin kan dangdaizia lantirtu chu a ni ang.

2.  Khawhar Chhûngte Hla Thlan:  Hei hi kan mitthi tawhte hriatreng nana tih ni berin a lang a. Kan va hriatrengte berin an hriat ve hauh si lohva an hriatrengna hun lo hman chuan țangkaina tak chu a neih hmel loh viau a ni. Kan mitthite ngai zûal bîk tak hi chu kan awm ngei mai a. Chutiang miin hetiang  hun hi a hmang a nih  pawhin ngai zûal vak loten kum tluana eng sawi lêm lova, ni 365-na a lo thlena han ngaih thar/zual thut te pawh hi a mak danglam ve a. Tuin emaw a ti a. Tih ve loh chu kan mitthite ngai ve lo anga lan hlauin kan ti ve ta tliar tliar ni berin a lang.

  1. Inneih  ni te, mitthi vui ni te hi thinlung taka inlawmpuia intuarpui thei chinte chauh kalna turah ka ngai a. A tam thei ang ber kal nana card kan sem chhuak chiama, TV te thlenga kan zualko țhin  hi chapo tak, kan thiltih apianga mi an tum tlat, mi lokal an tlem chuan mualphona anga ngai mi kan nih vanga hetianga țan la chiam chiam mai kan ni berin ka hria. Mitthi awm thu loudspeaker-a puan te pawh chuvang tho chu niin ka hria. Loudspeaker-a puan kher loh pawha  mitthi a awm thu hre ngei ngei chin chiah hi a vuina-ah pawh kal ila, thil inhmeh zawk tak a niin ka hria. Mitthi chanchin kan puang chipchiar lutuk țhin phei hi chuan kan awmna vêng leh kan  hnam a tichhangchhia-in ka hre țhin. Mitthi a awm chuan thlanlaih chu loh theih loh a ni a, “tur a ni” tih țawngkam hmanga puan phei hi chu ka Mizo tlawmngaihna awmze nei lova chantirna niin ka hre bawk.
  2. Vêng leh vêng inelna/intihsiakna a awm apianga a hmuna kal tura vêng mi zawng zawng inhriattir tawp zel mai te pawh hi thil țul tehchiam a ni lo va, kal vek theih pawh a ni hek lo. Taihmak inzirtir kan mamawhzia ngaihtuah phei chuan thil inmil lo tak a ni. Kan Mizo Lalte kha huaisen vanga lal an ni a. Khawdang lalte nena huaisen lama inel reng an nih vanga khua leh khua inkara inelna boruak awm reng a ni țhin. Chutiang zulzuia, chutiang boruak a awm tawh loh hnu pawha vêng leh vêng inelna kan nei nasa lutuk pawh hi thil țha ber  niin a lang lo.

  3. Mitthi ruang chunga thusawi țul tih tlat. Kan thusawite chu an nihna a uar zawng deuh veka sawi. Chutiang thusawi, ninawm ti lova, țha ti viau zawk awma kan ngaithla thei țhin te hi.

Kan Mizo pa ril H.K.Bawihchhuka khan, “Mizote hian lunglen leh mi tihdan lakchhawn bâk hi eng nge maw thiam kan neih le?” a ti a. Kan pawnlanzia lanna ni-a kan hriat a chunga kan sawi te khi lunglêng thei tak kan nih leh mi tihdan lachhawng fo mi kan nihzia tichiangtu tak an ni. Pachhe bere ti lova, hun pawimawhna hre duh miah lo kan nih hi a pawi ka ti hle bawk țhin.

Lenkhawmzai, kan hnam ro hlu ti meuh khawpa kan sawi te pawh hi lungleng thei tak kan nih vanga hlutsakzui zel kan ni. Mitthi/khawhar chhungte hnemna pawh a ni hranpa lo. Inhnemna a nih hlauh pawhin takna tel lova inhnemna a ni ang a, țangkaina dang vak a nei lo vang.
Mizote hi hnam fing tak leh mahni chemkalna bîkah chuan hnam dang aia hniam bîk hauh lo kan ni a. Hnam dan mawi leh țangkai, khawtlang inrelbawl nana kan thlahtuten an lo duang chhuak thiam te khan chu chu a tilang chiang a ni. Ziak leh chhiar thiam hma-a Dan leh Dan tesêp tam tak duang chhuak thei awm chhun an ni hial mai thei. Kan hming put dan te, man leh mual kan insiam dan te hi a thûkin belh chian a dawl a  ni.  “Zonunmawi” kan neih theih chhan pawh kha chu chu a ni.
A pawi  ber mai chu Missionary hmasten kan hnam nun min tihchhiatsak ațang leh kan politician-ten an politics khelmual chu mahni hmasial leh duhâmna hmuna an siam tâk avanga kan nun a lo letling zo ta vek mai hi a ni.

Kan finna te chu thilsual tihna lam hawi deuh vekin kan hmang ta a. Kan hnam nun mawi apiang kan tichingpen a, a chhe lai leh a țangkai lo laite kan uar tawlh tawlh thung a ni. Kan thil chin thar leh hnam dang tihdan kan lakchhawn te pawh a țha lai kan vawngzui lo va, a chhe lam leh țangkai lo lam kan uarzui zel thung a ni. Entirnan, Zaipawl Zai tih ang te hi.
Krismas kan hman mekte hi han en ila. A tak hmuh tur alawi awm lo, a behbawma rîk hlutna a ni. Lal Isua zirtirna laimu, Hmangaihna; Retheite Phurrit Phurhpui;Thilpêk/Thilphal; Dawhtheih/Tuarchhel; Nature nena inrem  te hi kan nuna hmuh tur awm mang lo, Krismas hun chu hengte an pawimawhzia leh kan inzirtir țhar tur an nih laiin thupui-ah kan neih chuang lo va. A pui a pangin thawmhna thar leh changkang neih te, biak in leh hmun dang cheimawi te, zaikhawm te, ruai țheh mup mup te hi kan ngaih pawimawh zawkte an ni a. Rev Thansiaman Isua awm loh aiin khuang awm loh kan hlau zawk ang, a lo tih ang khan Isua leh a zirtirna zawm ai chuan hengte hi kan ngaih pawimawh zawkte chu an ni tlat a ni.

Chuvang chuan ngampa tak leh huai takin, “Kan pawnlanzia chu a thûk a ni” tih thu hi kan sawinawn ngam a ni.
Hetiang thu kan sawi fo nachhan hi eng dang a ni lo va. Chawmhlawm ti tih, kutdawh ti tih dinhmuna ding chunga, mahni ke-a din tumna nei chuang lo va, a intichangkang zawng leh a intlakral zawng deuh veka kal kan nih vang te; kan ze tak aia kan ZENAWI kaihhruaia kan awm fo vang te; kan tlin lohnate chu zahpui nachang hria-a insiamțhat tum chuang lova, a hozawng zela kal kan nih avang te hian hnam dang, a bîkin Central Sawrkar hmuhsit leh ngaihthahin kan awm a. Nihna pawimawh chin, Governor, Union Cabinet Minister, Supreme Court Judge, Chief Election Commissioner, UPSC Chairman leh thil dangte pawh kan aia hnam hnufual zawka kan ngaih, Bodo, Mikir, Tripura Burman te pawhina eng hun emaw leh a eng emaw ber an lo nih/neih fir fer tawh, la ni/nei ve lo awm chhun kan ni hi a zahthakin a tlawmthlak lulai em a. Ka Mizopuite  hi hetiang lamah hian benharh che u beiseiin ka  han ri leh phawng mai țhin a  ni e.

Advertisements
Aside | Posted on by | Tagged , , , | Leave a comment

UPA CHAWHLUI BUATSAIH SAK

Nizan (23 Dec 2017, Inrinni zan) khan Pu P. Biakthangpuia, Thiltlang khua chuan an khua a kum lama Upa, kum 70 chunglam te tan Krismas Chawhlui a buatsaih sak.Nizana Pu Biakthangpuian kum lama Upa te chawhlui a buatsaih sakah hian Thiltlang khawchhunga kum 70 chin chunglam mi 59 zinga mi 34 in chawhlui hi an kil thei a, chawhlui kilna-a tel theilo te hi taksa lam chak lohna avang leh an hriselna dinhmun in a zirloh avang te a tel theilo te an ni.

Heng nizana upa chawhlui kilna a tel te hian an ni ang kuma inhmuhkhawm, inkawm khawmna hun tha tak leh a huho a chawhlui an kilho thei chu lawmawm an tih thu sawiin an ngaihlu takzet a ni tih an sawi.

Chawhlui buatsaih saktu Pu Biakthangpuia hi sorkar hnathawk emaw sumdawng hausa emaw a nilo a. Vanduaina avanga kut dinglam chan tawh, nitin eichawp zawng ve mai a ni. Amaherawhchu hetichung hian mi pangngaiin an thawh theih ang thawh theihloh leh tih theih loh neih loh tum, mi tumruh leh taima hrat khawkheng a ni a. A kut lehlam chauh hmang hian furniture mai bakah mechanic hna thlengin hneh takin a la thawk thei a ni.

Pu Biakthangpuia chuan, ‘Ka neih chuangliama he chawhlui hi buatsaih ka nilo a, kum lama upa te hi ka ngaihlu a, ka ngai ropuia, an tana ka tih theih tawk tiin neih zawng zawng sengin chawhlui hi ka buatsaih sak ve tawp mai a ni,’ a ti.

Hetihlai hian tukin (Dec 24, 2017, Pathianni) zing khan YMA, Thiltlang branch te chuan an khawchhunga kum lama upa, kum 70 chin chunglam te hi hlim tak leh nuam taka Krismas an hman theihnan leh anni hi khawtlangin a ngaihlu em em a, englaimahin a theihnghilh nhailo a ni tih lantirnan Blanket an hlan ve vek bawk.

Thiltlang khua hi thingtlang khaw lian lutuk nilo mah sela khaw taima, thenawm khawveng inpawh leh khawtlang lungrual em em an ni.

Author :Kiddy Vanchhawng

Aside | Posted on by | Tagged , , | Leave a comment

A PASAL SAWISAK HLUM NIA RIN, HC LALTHANMAWII SANGAU CHU SIAHA CIVIL HOSPITAL AH POST MORTEM A NI, ZANIN VUILIAM ANI

A pasal kutthlakna avanga boral ta ni a sawi Pi HC Lalthamawii ruang chu Siaha damdawiin a post mortem anih hnuah zanin hian Sangau III thlanmual ah vuiliam a ni ang.

HC Lalthamawii (26) Sangau khua hi a pasal V.Nghakmawia Bualpui NG, S/o V.Rochunga nen inneiin Sangau III ah an chhungkua in an khawsa a, ni 20.12.2017 khan a pasal nen inhmuthiam lovin a pasal hian kut thlakin a sawisa nasa hle niin Sangau a kan palai thu dawnna chuan a sawi a, HC Lalthamawii hi a hmai a te pawh avung nasa hle a, a tukhum te pawh a duk nasa in a lu lam hi na a ti hle bawk. A taksa pumpui chu na a ti vek a, a mit mu dinglam a keh niin an sawi bawk.

HC Lalthamawii hi a taksa na a tih em avangin leh a hmai leh mit a vun nasat em avangin Ni 21.12.2017 khan Siaha damdawiin (Nursing Home) panpui a ni a, ataksa, a biktakin a lu leh tukhum te hu na a ti hle a ni. A hliam hi tuar zo lovin nizan dar 10:30pm khan a Siaha Nursing Home ah a boral ta a ni.

Pi HC Lalthamawii hian a fanu te 2, Olivia Vanlalhmangaihhlizuali Kum 3leh Sharon Lalrinngheti Kum 2 mite a boral san a ni. Hetih lai hian a pasal V.Nghakmawia (29) S/o V.Rochunga Bualpui NG chu a nupui thihthu a hriat veleh a sa himna zawngin Sangau Police Station ah a inpe lut nghal a, a nupui chu a sawisak loh thu leh tuna a boral chhan pawh rannung seh leh In atanga atlakna hliam avang anih a rin thu a sawi thung.

V.Nghakmawia’n a sawi zelna ah an nu inhliam chhan ber chu an in atanga a tlak vang a nih thu leh heta a tlakna ah hian a mit pawh a sawh na niin asawi thung. Tin, rannung seh avanga a hmai te pawh vung nasa anih a rin thu a sawi bawk. V.Nghakmawia hi tunah hian Sangau Police Station (Thana) ah kawl mek a ni.

HC.Lalthamawii chhungte hian a pasal V.Nghakmawia chungah FIR an thehlut nghal a, Mizoram Police Sangau Officer In Charge Pu Lalbiakhlua chuan FIR hi lo dawngsawngin Fir no. 297/2017 23.12.2017 anga ziah luh nghal a ni.

Pi H.Lalthamawii D/o Pu HC Tluangthanga Sangau hi Sangau Damdawiin PHC ah Doctor a awm loh avangin Siaha Damdawiin ah post mortem tur a kalpui mek a ni a, post mortem an tih zawh hian Sangau ah phur let lehin Sangau-III thlanmual ah vuiliam a ni.

Source: Chhawkhlei Times

Aside | Posted on by | Tagged , , | Leave a comment

KHAWVELA SAKAWR MAWI BER AN TIH CHU by Saihmingliana Sailo

Chinese hovin vanram sakawr an tih hial, hetiang chi sakawr mawi zet mai hi, Akhal-Teke an ti a, Turkmenistan (Asia ram) chhul chhuak a ni an ti. BC 3,000 aṭanga hmuhchhuah tawh, sakawr chi hova upa ber niin tunah hian khawvel pumah 1250 chiah an awm nia sawi a ni a, a tam ber chu Russia leh Turkmenistan ah an awm.

A hmul rangkachak rawng lek lek, tle siau mai hi a danglamnaleh mawina ber a ni a, a zuanzangin a chak em em bawk.

Aside | Posted on by | Tagged , | Leave a comment

ISLAM LEH MIDDLE EAST POLITICS by Kima Sailo

A bua tih chi ni mahse Israel leh Palestina inkar chauh ni lo “Middle East” buaina chingchivet lutuk mai khu thiam ang angin thai ve leh mai mai ila.

A hmasa berin Middle East-a sakhaw lian ber chu Muslim-ho vawn Islam a ni a, a chi zawnga tam ber erawh Arab-ho an ni. Arab-ho zawng zawng, a zavai lo deuh si khuan Muslim an ni a, Muslim zawng zawng erawh Arab an ni lo. Sawi tawh ţhin angin Islam sakhuaah hian peng hran a awm ve thliah a (Mizorama kohhran 100 dawn awm ai chuan an la zia!), a hlawm lian ber erawh Sunni leh Shia niin Arab chi-ah pawh hian peng neuh neuh tam tak a awm bawk.

Islam bakah hian sakhaw dang dang, a langsar deuh Judaism, Kristian peng chi hrang hrang bakah, Zoroastrianism, Druze leh Yazidism-te an la awm leh a. Chumi piah lamah chuan a chi ang zawngin Jew, Kurd, Armenian, Circassian, Turk, Persian, Azeris, Pashtun, Druze leh a dang tam tak an la awm bawk. Hemi chin chauh pawh hi thluak tibuai tham chu a ni der hrim hrim tawh maithei.

Islam sakhua hi Kristian dawta zuitu ngah ber niin sakhaw lianho zinga ţhang duang ber a ni mek a; zuitu vaibelchhe hnih dawn awmin khawvel mihring 25% vel hi Muslim an ni. Muslim ho hian ram 50 velah tam ber (majority) nihna an luah mek a, an sakhaw lehkhabu thianghlim chu Quran niin Gabriel-a kaltlanga inpuang Pathianin Muhammad-a a zirtirna leh a chanchin phuah khawmna bu a ni ber. Tuna an pun chak dan ngaihtuah chuan kum 2050-ah Kristiante aiin an tam tawh zawk ang.

632 AD-a Muhammad-a a thih khan a fapate puitlin thlenga dam an awm loh avangin a thlaktu atan Abu Bakr-a, Mohammad-a thurualpui leh țhian hnai tak chu Caliph hmasa bera puan a ni a; ani hun lai hian Quran pawh mumal tak phuah khawm a ni nghe nghe. Abu Bakr-a chu 634 AD-ah a thi leh ta mai a, Umar Khattab-a, Uthman Affan-a, Ali Abi Talib-a (Mohammad-a cousin leh makpa ni bawk) leh Hasan Ali-a ten a ai an awh zui ve leh a. He’ng Caliph palite hi Sunni Islam-ah chuan “Al-khulafa’ ar-rashidun” (Caliphs dik tak) tia sawi an ni ţhin a, an rorelna hnuaiah hian Persia leh Byzantine thlengin Islam lal ram pawh chu zauh a ni nghe nghe. (Caliph hi khawtlang leh sakhaw thila Muslim-ho hruaitu a ni a, prophet anga en ni ve lo mahse Muhammad-a aiawhtu niin kum 1258 thleng khan Baghdad-ah a ţhu a, Ottoman-hoin an lak hma kum 1517 thleng khan Egypt-ah a ţhu leh a, Ataturk-a’n he title a tihbo, kum 1924 thleng khan Ottoman Sultan-ho chu an Caliph zui ve bawk a ni).

Umar-a khi 644 AD khan Persian-ho chuan an that a, a thlaktu tur Uthman-a thlan chhuah chungchangah pawh an buai hle tawh a; 656 AD khan Uthman-a pawh chu thah ni ve lehin Ali-a chu Caliph-a puan a ni zui ta a. Chu chu Islam Civil War hmasa ber (First Fitna)-in zuiin Ali-a pawh chu 661 AD khan Kharijite-ho chuan an that ve leh ta a ni.

Buaina chhuak zui tur ven nan tiin Caliph thar Hasan-a chuan remna a zawng a, hetih laia Muslim lal pakhat Mu’awiyah-a chu paih thlain kar loah chuan Umayyad lal ram ropui tak a ding zui ta a. Heta țang hian Muslim khawvel chu a phel ta tak tak a, a tam zawkin hruaitu hmasa palite khi Caliph-a pawmin anni pawl hi Sunni tih an ni a, lehlamin Ali Abi Talib-a chauh chu Caliph dik a ni tiin a thlahte rorelna chauh an pawm zui thung a, anni hi Shia tih an ni ta thung a ni.

He hlawm lian pahnih bakah hian vawiinah chuan Islam hi ţhuang liin an kal tawh a, a lian ber Sunni (80%) leh a dawttu Shia (20%), Sunni aţanga chhuak tau Ahmadiyya leh sawi tham lutuk loa te Khawarij-te an ni.

Sunni-ho hian Caliph atan Mohammad-a chhungkhat hnai emaw thlah kal zel nih kher ţul an ti lo a, an zinga a tam zawk hian Sunni Islam zirtirna Madh’hab an tih zinga pakhat chu vuanin ţhenkhat erawh chuan Wahhabi Movement (Sunni hlang deuhthaw awmna Saudi Arabia Muslim-ho kalpui) an vuan thung.

Shia emaw Shiite-ho hi chuan Caliph chu Mohammed-a thisen kai ziding turah an ngai a (Ali-a thlah kal zel khi, ISIS boss pawh kha a inchhal kha), Iran tih loh Islamic ram zawng zawngah a tlem zawk an ni. Hei bakah hian a duh rum pawl, mahni duh dana Qur’an letlinga kalpui tum Radical Islam an tih mai pawl lian tak pathum Taliban, ISIS, leh al-Qaeda an awm leh bawk a. Taliban-te hi Sunni rau rauah Hanafi peng niin, al-Qaeda leh ISIS erawh Wahabi Sunni an ni thung.

Tichuan Middle East buaina bulthum tak tak chu hetiang hian ţhen hlawk theih a ni ang:

Saudi Arabia vs Iran:

Saudi Arabia hi Sunni-ho power house a ni a, Iran erawh a lehlam Shia-ho bu pui a ni thung. An pahnih hian Middle East-ah “Boss” zawk nih an tum ngar ngar a, a nihna takah chuan ram ang ni loin Sunni vs Shia inepna a ni zawk mah. Yemen, Iraq leh Syria-a buainaahte pawh chi bing bakah hel leh hel lo an thlawp hrang nuaih ve ve reng a ni.

Nikum mai khan Saudi Arabia chuan Iran thlawp zawng leh Saudi lalte sawisel ţhin Shia puithiam pakhat Nimr al-Nimr-a chu a tihlum a, inbiakna hlawhtling nei zui hlauh lo phei se Sunni vs Shia War a chhuak lek lek a nih kha. Al-Nimr-a tihhlum a ni hi Iran mai ni loin khawvel puma Shia Muslim-ho chuan an haw hle a, Saudi Arabia thiltih dan chu demin ram hrang hrangah lungawi lohna an lantir a nih kha.

Yemen: Yemen hi kum 2011 aţang khan a la buai chawl lo a, an buaina bulpui ber pawh Saudi Arabia puih ruknaa lalna chelh hram hram Sunni sawrkar leh Iran puihnaa chu sawrkar paih thlak tumtu Shia Houthi helhote inbeihna a ni. Houthi helho hian Yemen khawpui Sana’a pawh an la nghe nghe a, Sunni sawrkar hlui chu Yemen ram chhim lam Aden-ah an insawn duai duai phah a nih kha. A tikhawlhkham zual turin an inkarah hian al-Qaeda leh ISIS-te an inrawlh chamchi bawk.

Iran: Kum 1979-ah khan West lam awn ţhin lal Shah chu Iran Revolution hmanga paih thlak niin Khomeini-a hoa Islamic sawrkar (Shia) din zui a ni a, chuta ţang chuan Juda-ho ram din thar Israel chu a rumţhaih ta char char mai a ni. Sipai a thuam chak a, nuclear program pawh a kalpui thuak thuak a hman a, kum 2015 khan P5+1 an tih mai ram (US, UK, China, Russia, France leh Germany) te nen inbe remin an chawlhsantir thei hram a ni.

Iraq leh Syria: Syria-a hian inthlahchhawng lal reng mai (dictator) Assad-a chu Syrian helhote’n democracy tundin tumin an bei a, an zinga lian ber Free Syrian Army-te chuan US leh ram 28 inzawmkhawm EU aţang sum leh ralthuama puihna an dawng reng nain an hlawhtling thei lo. Hel dang dang kara langsar Al-Nusra an la awm leh bawk a, anni hi radical Wahhabi Sunni niin Saudi Arabia chuan an mawng a hiat ve thung.

Hei bakah hian Lebanon aţang Shia hel pawl Hezbollah an la tel leh a, anni hi Syria bakah Israel bei tura Iran-in sumpaia a puih rengte an ni.

Iraq-ah hian Shia 60% leh Sunni 40% vel awmin a tlem zawk Sunni zuitu Saddam-a rorelna hnuaiah khan kum rei tak Shia-ho chu an awm a. Saddam-a khaihlum a nih hnua US phuahchawpsak sawrkar chu a nawi zui nen bu khuar reng al-Qaeda chu al-Qaeda in Iraq (AQI) intiin Iraq leh Syria rambung ţhenkhat an la a, Islamic State in Iraq and Syria (ISIS) invuah zuiin ISIL leh IS ringawtte pawh an nih zui leh nghe nghe kha. Syria leh Iraq hi a tlusawp mek reng a, refugee-ten Mediterranean Sea kanin Europe an lut chho ruih ruih a, ramri ralmuang Shengen Agreement thlengin a buai zo a, Brexit-te interview-naah kan inzawh phah ta a nih hi.

Khi’ng bakah khian tun hnaia lar Israel leh Palestina buaina a la awm leh a, hei phei hi chu kum 3000 vel liam ta thil a nih khan hriat tlan a ni. Juda mite lo luah ram, um darh an nih hlan luaha lo inthlahpunga Palestinian lo intite leh kum 1800 chhoa haw khawm Juda-te chu an inhmu-Sakhi ta reng mai a. Kum 1947-a United Nation-in he ram Jewish leh Arab Palestinian-te tana a rin phelsak aţang khan an indo zauh zauh a, Israel nuai bo tur Palestinian Liberation Organization (PLO) pawn 1964 daih khan din a ni. Anni bakah hian a khat tawka Israel sai dum dum reng mai Sunni lam Hamas-te pawh an la awm bawk.

Turkey-ah khuan Muslim lal ram ropui Ottoman Empire chu kum 600 vel tehreng dinga indopui pakhatnaa a side fuh loh avanga a keh darh hnuin Ataturk-a hoin sakhaw zalenna democracy ram din tum a ni a, tunah erawh Erdogan-a hoin Sunni Islam sawrkar din an awn leh tawh; “Kum 680 AD-a Battle of Karbala-ah bawk kan let leh dawn em ni?” a ti khui khui mai a nih kha.

He’ng chanchin tlem chauh tarlan karah hian a tibuai zual turin Sunni Saudi Arabia vs Shia Iran bakah Oil leh resources dang avanga thurualpui tur zawnga hmanhlel, sawrkar bil leh helho thlenga thlawp ruk lam nei reng mai America leh Russia zuk tel reng mai bawk si hian khawvel hi a tiharsa zual a nih hi.

Tun hnai boruak thlir hian Capitalist Downfall hi a hnai em ni le?

Aside | Posted on by | Tagged , | Leave a comment

HRIAT ZAU NA : Herta Kasparova.

         Picture a khai hlum kan hmuh hi Herta Kasparova ani a, 21st June 1923 khan Trest khua Czech Republic ah a piang a, a Piantirh ata piang sual niin a ke dinglam hi a chaklo bik a,chuvang chuan a kal bai ani. A piansual avang hian a naupan tet lai atanga a Tleirawl chhuah thlengin  tih duhdah leh hmuhsit a hlawh nasa hle a, Indopui achhuah khan German Secret Police Gestapo ho chuan a tawng thiam na chu an ngaisang hle a, Trest khua a Gestapo tan tawng lettu(translator) a hman an duh ta a, Documents leh inbiakna a lehlin sak thin ani.
      
        Vawikhat chu Trest khawmi te chuan Radio atangin Indopui a tawp tiin, German an tlawm thu an hre ta a, Chu veleh Trest khua a German mi awm te leh Kasparova i te chhung tan chuan boruak a in thlak letling hlawk ta mai a,Kasparova i leh a chhung te chuan hrem/tih duhdah(Tortured) an hlawh nghal a, mahse Radio atanga an thil hriat chu thu diklo ani tih Trest khawmi te chuan a hnu lawk ah an hre veleh a,Indo chu alo tawp awkawng lo a,German pawh an la tlawm hek lo, chutah zet chuan Trest khawmi te tan boruak a in thlakthleng leh ta..German sipai te chu an ralthuam kim nen Trest khawpui an rawn lut ta rup rup mai a, Trest ah ro an rawn rel tha leh dawn tihna ani.Chuta tang chuan Kasparova i chuan a thin ur na leihbua in amah leh a chhung te ti duhdah thin tute chu dimdawi na tel lovin an chungah Phuba lak ngei a tum ta a, 7th May.1945 ani a, Kasparova i pawh SS ho bulah a awm chawt a, vawileh khata a chunga POWER sang tak awm ta chu nuam pawh a ti hle a, a kawh apiang chu SS techuan man nghal zelin, a kut trang a hmeh rik chuan an that nghal hmiah hmiah zel a ni. Hemi ni hian tlangval 4 a kawk a, Firing squad in an kaphlum nghal a, Darkar 24 ral hma in mi 29 chuang an kaphlum hman a ni.

Indopui chu a tawp tak tak ta a, German an tlawm tak si ah chuan Kasparova i chu a rukin Austria ah a tlanchhia a, mahse 1946 khan man niin TREST ah thawnkir a ni a, a chungthu an ngaihtuah lai chuan tihian a sawi a,” mi tamtak thihna ka thlen tih ka hria a, mahse khatia ka tihna chhan kha Phuba ka lak letna a ni” tiin.

13th September 1946. 6:38 p.m. ah Kasparova i chu khaihlum a ni a. Khaihlum a nih na tur hmun an hruai lai chuan an khai na tur a hmuh in a hlau lutuk chu a tlu nghe nghe a, Guards ten an kuah thleng a ni. Public hma ah khaihlum a ni a, mi sang tamtak in an thlir a, lawm avangin an inchibai sup sup a, School naupang te pawh a hmun ah entir vek anni a,an khaihlum lai thlalak chu Postcard ah an siam nghe nghe a ni.
      ( Kasparova i hi a chantawk a hmu kanti dawn nge mi vanduai khawngaihthlak tak ani kan ti ang le?!

Author: Ricky L Colney

Aside | Posted on by | Tagged , , , | Leave a comment

Dampa ngawa ngau kaptu man

Dampa a ngau ( capped langur / Trachypithecus pileatus)  schedule 1 animal ( mang mai hlauhawm , humhalh zual bik ) kaptu mi 3 zinga 2 chu Dampa Forest lamin Police kutah an pe. Pakhat hi an in man buaina lamah hliam nei ni awm a sawi a ni a. Doctor thurawn angin Aizawl Civil Hospital lamah refer a ni. A dam hunah ani pawh hi jail lama thawn tur ni awm tak a ni.

Ngau kaptute hi Kawnmawi, Chhippui khua an ni. An mahni hi
1. V.Rualsailova s/o V.Lalramthara (L)
2. Lalrinawma s/o Deri
3. Noela s/o Kumara te an ni.

Ngau kaptute chungah hian dik taka rorel a nih theihnan enzui zel tum a ni. Court lamin schedule 1 ramsa a nih hi hre reng bawk se kan ti hle.

( Penalty as per WPA 1972, u/s 51. Minimum 3 years imprisonment with a fine not less than Rs 10,000 )

( Dampa Forest Guard te an thawk tha in an chhuanawm tak zet a ni )

Aside | Posted on by | Tagged , | Leave a comment

Audio file atanga vocal paih dan

Sound track siam hi thil harsa tak a ni a. Tam tak tan chuan a theih loh tluk a ni. Siam buai ai chuan kan hla neihte atanga vocal nawhreh mai hi thil awlsam zawk a ni. Computer atangin Ti hian ti teh ang.

Audacity hi i duh zawk zawk download la, Audacity for PC.exe (24mb tah hian guide file a tel). Audacity for PC (12mb tah hian guide a tello a a te bawk. Install la, open rawh.

I music file kha han select la, i lakluh hunah drop down menu aṭang kha click la, Split Stereo Track tih kha i select dawn nia. I file kha Left leh Right ah a lo inṭhen ang.

Right/bottom zawk kha select la, effect click leh la Invert tih kha i select leh dawn nia.

File chung zawk kha click la, effect aṭang bawk khan mono ah dah la, a file pakhat zawk pawh kha ti leh rawh.

File kha han save la, han play chhin teh. Vocal tlem a la awm chuan – Effect aṭang khan Amplify ah lut la, uluk deuhin thlang kual la, volume kha zero ah han dah den den la, Vocal ber kha i hre thei mai ang.

I duh ang track chu i nei thei ang.

Aside | Posted on by | Tagged , | Leave a comment

CHRISTMAS TREE CHEI LEH IN CHHUNG CHEI KA NGAM TA LO by Dr. John Hlychho

Krismas Duhawm, Ropui leh Hlimawm a lo thlen hian ka theih tâwka nasa-in Inchhung, Pâwn leh Christmas Tree te cheiin, Krismas Hriat rengna tur Thawmhnaw etc. te ka leiin ka insêng nasa ve țhin.

Mahse, Kum 2007, December 20-a ka Thiltawn chuan, ka lo tih-țhin zawng zawng te, ka lo buaipui țhin leh ka lo insen țhin zawng zawng chu… ZAHNA-AH a chan tir zo ta a! Ka rilru leh ngaihtuahna zawng zawng thlâkin, Rilru Thar, Ngaihtuahna Thar leh Tihdân Thar hmangin Krismas ka Hmang ve ta a ni.

December 20 Tlai Dar 5 velah chuan, Krismas Hriat rengna Atâna Suit ka țhuitir chu ka va lam hnu-in, Suit Thar nen-a Biak In leh Zaikhawmna Lamtuala ka lâm tur te, Suit Thar Man-to tâwk nén-a Pulpit ațanga Krismas Sermon ka sawi tur-te ka hisap a, ka hlim ru hle a ni.

Kalkawnga Muangchanga Hlim taka Lirthei khalh-a ka tlân lai chuan, Kawngsira Hmeichhe Naupang pakhat lo țap mek, mittui hru fap fap, a Nu niawm tak, Nu-tling Kum 60 mi velin a lo thlem mawlh mawlh hi ka va hmu a.

A tirah chuan, Nutlingin a Fanu Khawlaiah a vèl țap emaw ka tih avangin, ka Lirthei khalh chu ka tiding a, va țhelh turin ka va pan a ni.

Mahse, an bul hnai ka va thlen chuan, chu Hmeichhe Naupang thusawi leh a Nu-in a lo Thlêmna Aw chuan, min tiding chawt a! Ka inhriat hman hmâ-in, ka biangah mittui a luang reng chu lo niin!!!

Hmeichhe Naupang chuan, “A-Nu, A-pa’n min thihsan achinah khan, Thawmhnaw thar pakhat mah ka nei ve thei tawh ngai lova. Hei Kum 6 lai chu a liam tawh a. Nangmah lah chuan, “Nakkumah ka lei ang che,” i ti a, Nakkum chu i sawn zêl a. Kumin-ah pawh ka nei leh thei dâwn lova.

Dik tak chuan, Thian-ten Thawmhnaw thar nén an Inkhâwm leh ang a, Kei erawhchu, riru nâ deuhvin, țap chungin Inah Krismas ka hmang leh dâwn a nia. Nuuu, ka tân hian khawvélah hian nung dama ka awm hi awmzia a awm lovin ka hria, thih mai ka duh a ni…” tiin, a lo insut hraih hraih a.

A Nu chuan, “Mâmte, i sawi dik lutuk. Masi apiangin Kawrthar leisak che ka tiam a. Mahse, Kan ei tur leh Damdawi manah ka lo hmang leh țhin a ni. Inhlawhna lah tumahin kei Tar chaklo hi min pe duh silo!

Mahse, Mambawih, thih thu chu sawi lul suh aw. I Pa kha, kan retheih luat avangin a Nunna kan chhan thei lova. Rilru nâ takin mual min liamsan a. Nang chuan thih lam thu chu khawngaihin sawi lul suh aw…” tiin, hnukulh teuhvin a sawi hi ka va hre pha a.

Ka Thu hriat chuan Min Khawih na ngang mai!! Chu Minute tlem-te chhungah chuan Țek den aia rang leh chiang hian, Ka Nu & Pa ka hriat theih tirh atanga, Ka Pianthar Ni leh Chu-mite Nufa Inbiakna ka Hriat thlengin… Ka rilru, Taksa leh Thlarau chu min Fanchhuak nghal vekin ka hria a ni!!!

Nu & Pa-te Duhsakna dawnga Krismas Thawmhnaw Thar ka neih theih ziah laia, Kum 6 Chhung Vawi khat mah nei thei lo an lo awm tih te, Dam loh hritlân laia Damdawi man kan tlâkchham ngai loh laia Damdawi man tur neih loh avanga Nunna hial chan an lo awm tih te, Rethei leh Harsa tak, Ei tur leh Silh leh fen takngial pawh nei lo an awm laiin KEIIN KA DUHTÂWK KA NEIH PIAH LAMAH IN LEH LO-TE KA CHEI A, CHRISTMAS TREE TE KA LO CHEI MAWI MAI MAI A, KRISMAS SUIT TE KA LO LEI MAI MAI TIH KA INHRECHHUAK A! KA RILRU A HREHAWM EM EM A, KA ZAK CHEM CHEM MAI A NI.

Tichuan, ka Pawisa ah, Krismas Hlim taka kan hmanna tura ka la dahthat Rs.5000/- chu ka phawrh a. Engmah sawi lovin (Dik tak chuan, ka hnuk a ulh a, ka țawng chhuak ngam tawh lo a ni zawk mah awm e), chumi-te nufa chu ka pe ta a ni!!!

Ka haw ta vang vang a, In ka thlen chuan, Christmas Tree leh In Cheimawina zawng zawng chu ka thiat vek a. Kan nu leh ka Faten, “Engti zia nge?” tia min zawh chuan, “Nakinah, Chhung Inkhawm kan neih hunah ka sawi ang” tiin, hnuk-ulh, Aw lawi vekin ka chhâng a.

Khami Zân ațang khân, Krismas a lo thlen apianga ka Chei thin – Christmas Tree ka paih nghal hmiah a. Ka In ka chei ngai tawh lova, Krismas-ah Thawmhnaw thar ka lei ngai tawh lo bawk. Ka lo Insen țhin ang zawng zawng kha bansanin, Van Lal Fa Inpêkna leh Inhlānna hre rengin,

    Krismas Hun hi, Mahni Inhaivurna ni lovin- Midangte tâna Inpêkna hun;
     Mahni neih belhna ni lovin- Retheite tâna Insenna hun;
     Mahni Incheina hun ni lovin- Midangte cheina hun;
     Mahni Lâwmna zawnna hun ni lovin- Midangte tana Malsawmna nihna hun atân – Krismas Dik Tak chu ka hmang ve țan ta a ni.

❤ KRISMAS DIK TAK HMANG TURIN DUHSAKNA SÂNG BER KA HLÂN CHE ❤

Aside | Posted on by | Tagged , , | Leave a comment

CURENT MAN VANGIN SAITUAL TLANGVAL A THI

Nimin chhun dar 1  vel khan Keifang khaw chhung a electric line  short in a man Tv. Lalchhanchhuaha kum 17 s/o Parkungi Saitual Venglai chu a thi

Lalchhanchhuaha  hi mi inah hnathawkin an inhlawh a, cement  inchunga an awm laiin current short vanga wire kang chat lo uai thla chuan Lalchhanchhuaha hi a man fuh palh hlauh mai a, Saitual damdawiin ah hruai nghal a ni a, mahse a nunna chhan hman ani ta lo ani. A pawi takzet ani.

Keifang khaw chhung line hi curent short nasa avangin a puak nasa hle niin thudawn na hian a sawi.

Aside | Posted on by | Tagged , , | Leave a comment