SAIPUM VC LEH N HLIMEN VC RAMRI BUAINA LA FEL LO

© Kolasib AW

August 27, 2019:

Ramri chungchangah Saipum VC leh N Hlimen VC te in hriatthiamlohna karah Pualreng Group YMA te leh Saipum VC te pawisa chawi turin an in hriattir tawn a, he buaina kalzelah Sub Hqrs YMA bultumin Pualreng Group YMA hruaitute leh Saipum VC te chu vawiin hian sawiho pui tum an ni.

Kumina neih Pualreng Group YMA Conference-ah ramngaw leh nungcha humhalh pass a ni a, hemi bawhzui hian an area-ah nungcha humhalhna thuziak, chhim leh hmarah an tar a, mahse hmar lam Saipum leh N Hlimen ramri nia an hriata an tar chu Saipum VC ten July 7 (Sunday) zan khan anmahni thu-a lo senghawiin an ram chin nia an hauh chinah an sawn a, a hnu lawkah signboard hi a chhe zui a ni. YMA te hian, “Pualreng Group YMA in a lo lawm a che, he group huamchhunga ram ngaw leh nungchate min humhalh pui turin kan ngen a che,” tih signboard-ah an ziak a ni.

Signboard chhia chungchangah hian Group YMA te chu an lungawiloh avangin August 19 khan emergency meeting an nei a, Saipum VC te chu an thil tihchhiat siamṭhat lehnan Rs 10,000 chawi turin an ngen a, ramri chungchang ah buaina siam an tum loh thu an sawi. “Information min pe sela tun an buainaah hian YMA kan tel a ngai lo ang,” an ti.

Amaherawhchu Saipum VC te hian advocate Raymond Lalbiakzama ruaiin Pualreng Group YMA te hi legal notice an pe ta zawk a, Rs 20,000 chawi tura hriattir an ni bawk. Hei hi chhanna pek an ni tawh a, Sub Hqrs YMA lamah pawh an harsatna hi thlen niin August 23 hmaa chinfel pui turin an ngen a ni. Sub Hqrs YMA OB te pawh hian an chungchangah hian sawiho turin vawiin chawhma dar 11 hian an Office-ah Saipum VC leh Group YMA te an ko a ni.

Kolasib AW palai thudawn danin a tirah N Hlimen VC te hian Saipum VC te chu ramri sawiho pui turin an sawm a, mahse Saipum lam hian chhuanlam siamin an ngaihsak duh lo a ni. “Kolasib DLAO-ah chuan kan harsatna hi kan thlen tawh a, mahse bawhzuina a la awm lo,” tiin N Hlimen VC te chuan an sawi.

VC pahnihte ram inchuh hi 3 km vela thui a ni a, Saipum lam hian Sap ho hunlai bawrhsap NE Parry ICS chuan a pek nia an sawi laiin N Hlimen lam chuan an hnena Parsen an in chhunluh avangin a hmaa Parsen ram chu an area-ah an chhal ve thung.

Hetih lai hian an ram inchuhah N Hlimen VC te chuan ram an ṭheh a, P. Patta siamna turah pawh an counter sign vek bakah tunhnaia ni 100 inhlawhna hnuaia plantation an siamnaah pawh N Hlimen hian thing phunin an enkawl niin an sawi. He thilah hian an lungawiloh vangin N Hlimen VC te chuan August 20 khan Press Release an siam a, Saipum VC te chetdan an dem thu leh a ṭul anga an ram chin humhalh tlat an tum thu an tarlang ve tawh bawk.

Aside | Posted on by | Leave a comment

TAXATION HIAN ENGTINNGE AN CHHUI CHIAN LE ?

Vawiin khan Zalen-ah Taxation Commissioner chuan KUhva phur-ah Rs 3000 an lak loh thu a rawn puang a, a lawmawm hle. PAwisa an lakleh lak loh hi Check Gate record-ah en theih a ni thu a sawi pawh hi a thlamuanawm hle mai. An chhui awlsamin thil chhui zawng zawngah hian an la chhui hahdam ber mai awm e.

Bungraw phur thin ngei ten an sawi hi engtinnge ni ve ta ang.
Taxation gate Vairengte-ah hian Rs. 3000/- kan chawi thin .. He thu Kuhva phur thinten an sawi lai hi mipakhat maiin kan hrelo. An sawi lai hretute hi … Deputy Commissioner Kolasib. Superintendent Of Police, Kolasib. District Agriculture Officer, Kolasib. DIPRO Kolasib. Journalist engemawzat leh Vairengte dai a kudam endik ni a kal thenkhat…
Challan engkim fel vekin lei tha (Urea) kan phurha Vairengte Taxation gate-ah Rs. 500/- min laksak, kan lawm lo hle mai.. Heihi ka thianpa sawi a ni.
Lei chi phur lam hian a Challan fel lo ah Rs. 2000 min laksak a, a fel vekah Rs. 300/- te min laksa tho … Lei tha phur thin te.. Commissioner hmaah hian an sawi hreh lo a ni.

=Heihi Social Media a thuthang naran a ni em?
= Malaysia vel atanga Kuhva rawn lut Waybill Taxation Department, Mizoram-in an lo pek ve ngawt dan hi hriat chian chakawm tak a ni bawk awm e..
= Pawisa an pek an sawi hi Gate record-ah a awm hi Commissioner hian a ring reng reng em ni?
= GST hman a nih hnuah Taxation check gate zawng zawng tihbo vek tur a nih thu India ram Prime minister khan a sawi si a, Vairengte a Taxation check gate a awm thu commissioner-in a la sawi hi an permission hmuh a chakawm hle mai..
= Social Media a thuthang naran tur ka rawn ziak leh a ni.

Aside | Posted on by | Leave a comment

High Court in Serhmun mipuite sum kar 6 chhunga pe turin ti

Aizawl: Mizoram
sawrkarin Dampa Tiger
Reserve ram zauhna
atan khua lak belh a tum Serhmun mipuite chu order an hmuh atanga kar 6 chhunga sum pe turin a ti.

Gauhati High Court,
Aizawl bench chuan
thuremna hi Ningani khan tichhuakin Serhmun khua
atanga insawn turte chu
order an hmuh atanga kar
6 chhungin an account-ah
nuai 8 theuh dah tur leh
nuai 2 dang chu an insawn
huna pe turin thuremna a
siam a. He thil duh lo
chhungkaw 9-te chu Mamit
DC-ah representation
thehlutin an dilna te enfel
a nih hnuah thla 2 chhunga
chingfel turin Mamit DC a
hriattir bawk.

ZALEN thudawn
danin Serhmun khuaah
hian in 238 an awm a, an
zinga chhungkaw 2 hian
sawnchhuah an duh lo
hrim hrim a. Chhungkaw
226 chuan sawnchhuahna
sum hi dawn an duh a,
chhungkaw 9 chuan an
huan ram hlutzawng anga
sum hi chhut an duh thung.

ZALEN palaiin
Serhmun Relocation Committee hruaitute a biaknaah an buaina court-in a
chinfel takah chuan a tam
zawk chuan khua hi an
chhuahsan nghal mai an rinthu an sawi a, chutih rual
chuan school session a laklawh avangin nakum
March thla velah an chhuak
zawk thei mai thei niin an
sawi a. Serhmun khuaa
chhungkaw tam ber hi Kawrtethawvengah an insawn rin niin inhmun pek
an tum nia thudawnna chuan a sawi.

Aside | Posted on by | Leave a comment

Mizoramah HIV pung zel

AIDS
Ram chhung hmun dangah HIV/AIDS vei an tlem telh telh laiin Mizoramah chuan a pung hret hret zawk nia a lan thu August 7 a District AIDS Prevention and Control Committee (DAPCC), Aizawl ṭhutkhawmah tarlan a ni.

DAPCC thutkhawm hi Aizawl DC Pu Vanlalngaihsaka’n kaihruaiin hetah hian Mizoram chhunga HIV/AIDS chungchang khaikhawmna atana hman, Aizawl Civil Hospital leh Synod Hospital, Durtlanga chhinchhiah a nih dan tarlan a ni a. HIV/AIDS kai awlsam bik tura ngaih zinga ngaih pawimawh fal bik, naupai lai te thisen kum 2017-a an enfiah atangin Mizorama naupai za zela 1.19 chuan HIV hrik an pai a; hei hi ram pumah a sang ber a. Ram puma naupai, HIV hrik pai chu zaa 0.28 an ni. Kum 2017-a zirchiannaah tho, ram puma puitling zingah HIV hrik pai zaa 0.11 an awm a, Mizoramah chuan he natna hrik pai hi zaa 2.04 an ni a. Ram chhung hmun dangah HIV/AIDS vei an tlem telh telh laiin Mizoramah chuan a pung hret hret zawk niin a lang a, hei hian Mizoram him loh zia a tilang niin thutkhawmnaa tel mithiamte chuan an sawi a.

Kum bi thliaha HIV/AIDS vei chhinchiah dan ang chuan Mizoram chhunga he natna vei zinga a tam ber chu thalai, hna thawka chhungkaw din chho thei rual, kum 25 leh kum 34 inkar te an ni a, anni hi positive zingah zaa 39.8 an ni. A tam ber dawttu chu chhungkaw din tawh leh khawtlang tana tangkai taka thawk thei tura ngaih, kum 35 leh kum 49 inkar an ni a, positive zinga zaa 28.13 an ni a. Tleirawl, nulat tlangval hmang chho rual, kum 15 leh 24 inkar zinga mite chu positive zinga zaa 24.17 an ni.

Mizoram chhunga HIV/AIDS inkaichhawnna ber chu mipat hmeichhiatna fimkhur lo taka hman vang a nih thu thutkhawmah hian tarlan a ni a, mipat hmeichhiat hman fimkhur loh vanga HIV/AIDS kai chu a vei zawng zawng zinga zaa 65 an ni a. Inchiuna hriau thianghlimlo inhmantawm avangin zaa 30.37; nu leh pa atanga naupangin an vei chu zaa 1.65; a chhan hriat loh zaa 0.29; mahni anpui kawp atanga inkaichhawn pawh kum 2015-16-ah zaa 1.8 niin kum 2018-19-ah chuan zaa 2.59-ah a pung chho a ni.

Aizawl DAPCC thutkhawmah hian HIV/AIDS donna kawnga hmalatu hrang hrang aiawhte pawhin harsatna an tawh dan te an sawi a. A tlangpui thuin HIV/AIDS vei te khawtlangin an en dan chu thlak a ngai niin an sawi a.

Mizoramah chuan HIV/AIDS veite dinhmun chu dinhmun zahthlak tawp a la ni chhunzawm a, Malaria dona hmanrua thosilen miin an lei hreh loh laiin Condom, AIDS laka himna pakhat lei chu thil zahthlak a ni leh thung a. Inenkawlna hmun pantu nih a zahthlak a, veng tam takah Drop In Centre awm khap a ni a. AIDS/HIV chungchanga inzirtirna poster tar ringawt pawh veng tam takah phal loh a nih bakah Condom leh Syringe pai te pawh mi thenkhat ten an la chhuhsak zel avangin hmabak a la thui hle a, mipuite rilru a inhawn phawt loh chuan hma lak a har hle tih an sawi a ni.
(IPR)

Aside | Posted on by | Leave a comment

MNF SORKAR IN TLUNGVEL V/C A THIAHNA ORDER GAUHATI HIGH COURT IN A TIH TAWP SAK.

(A ngai angin Tlungvel V/C te an function leh dawn.)

Mizoram sorkarin tun thla, August ni 6-a Tlungvel VC a thiah chu, Tlungvel VC te Gauhati High Court ah zualkoin, High Court chuan tunkar nilaini, August ni 21 khan sorkarin Tlungvel VC a thiahna Order chu a ti tawp.

Tlungvel Group MNF ten Tlungvel VC, Congress member 4 leh MNF member 2 te chu point 10 hmangin Mizoram sorkar ah an khing a, Ombudsmen court ah an hekna point 9 ah thiam changin point pakhat, ‘an thuneihna piah lama ram inpe’ tih hmangin LAD Department chuan Tlungvel VC chu August ni 6, 2019 khan a thiat ta a ni.

Tlungvel VC te hian an thiahna chhan point hi mipui kalkhawmin, Tlungvel ram chhunga ram awl te VC ten compensate awm thei turin lo siam rawh se an tih vanga an mahni hminga ram pe an nih thu sawiin, heng te hi khawchhung cheina tura ruahman a ni a, mipui kalkhawmin ti tura an tih anga ti an nih thu an sawi a, hek an nih hnuah an hminga ram an pek te chu Revenue Department ah paihtir leh vek nia sawiin, chuti chunga VC thiah a ni chu Gauhati High Court ah an khing ta niin an sawi.

High Court thupek hi LAD Department ah hriattir a nih hnuah LAD-in thuchhuah an siam ang a, VC te hi a ngai angin an kal leh dawn a ni. Hetihlai hian Tlungvel Group MNF chuan VC thiah vangin Advisory Board member tur an insiam tawh a, Circle Inspector hoin mawhphurhna pawh an insiamrem tawh a, sorkar pawmpuina an nghak mek bawk.

  • Chanchinthar DD News:

24th August 2019 (Inrinni)

Aside | Posted on by | Leave a comment

ZORAM POLITICS HAHTHLAK!!

24th August

CHAKMA MINISTER A HNAI EM?
Kan Ruling Sorkar leh Nationalism vawng nung ber ni a in chhal MNF hian Chakma Minister an la lut khut mai angem? Central lam atang hian an Project leh Plan hlawhtlin nan hian karna nasa tak a awm mek niin an sawi a, a buaithlak dawn hle mai. CM hovin Minister dang dangin Central an dawr thu kan hmu fo a, a hlawhtlinna, tu emaw tih danah Work Order han pawtthla hmak erawh kan la hmu lo hian a ti awm ang viau mai.

MNF INTERNAL –
MNF Sorkar hian bul an tan phat atangin theih tawp an chhuah a, Budget an neih hma hauh, Congress NEDP chuangbang vel chuan Party mi, a chuanhnuai deuh an ti lungawi a, Nuai 3 chin hnuai lam an sem chum chum a, a lut thuk chinte chuan an nghak zawk a, an ngawi kar mek, a â zual ho hlim lai a ni. Chung chu an hmang zo a, an Budget a tak ram la thleng si lo, sum lamah an buai angreng viau in an sawi.

MNF ah hian Candidate pawh chuh ve lo, hruaitu Senior, Hnam Run a thû tak mai a awmin an sawi a, tunlai hian an sawi duh hle. Chalfilh tlanga Vanzau Resort tuaihnumna tura a panna kawng siamna Vaibelchhe tel teh meuh dah chu CM bial mi thenkhat leh Hnam Runa thû tak hian an insem zo niin an sawi a, Chalfilh Bialtu hi a lungawi lo hle a, Chalfilh MNF pawh an rilru a na hle tih thu ka lo hria.

Chalfilh Bial chauh ni lo, MLA Candidate loh man a tam dawn hle ni a ngai pawl an awm tan a, Party chhungah sawi neuh neuh a ti tam. Thu mai hlir a la ni a, a tak ram a la awm loh miau avangin Campaigner Harcore ten inbum emaw an inti tan mek tawh a, hna hmu hlek te lakah an mit leh bemg an chhi kar mek a ni.

NEDA zawm siin BJP an dah NIL angreng hle a, malsawmna chân huama an ding a nih ngawt loh chuan State BJP an tih that hun hi a la thleng maithei. Tunah CM hovin Central an dawr suau suau a, State thenkhat Airport tih changtlunna, Infrastructure Work atan Vaibelchhe tel an Sanction sak mup mup laiin keini dawr ve ho chu “Lo en pui a tiam” tih velah kan la tang leih leih hlawm a nih hi.. A chhâi dan tawk min thiam viau anga, Budget pawna ingnghat Flagship hi a tawl der ang tih a hlauhawm tan der mai.

ZPM LAH HI –
Mi pakhat a sapatal mek a, ZNP hotupa hian ngawih a la chuh mai mai niin a lang. A mi tangkai tam tak hnawl an ni mek a, a rik rap hunah chuan Journalist nge IPS Retired hi thawmna zawk ang tih kan thlir thup!! Tu hian nge ZPM hi keng nung thei zawk anga, mi leh sa ngah zawk ang? Secretary General Post khat chauh awm chu luah fel tawh an awm a, a hnuai lampang ruatah pawh SG hian awmzia chu a nei mek niin a lang. Administration a mumal loh chuan an tet hak ngei ang.

MPC
VC By-Election ah an chuh dawn loh thu leh an Party mite chu an duhzawng Vote mai turin an hriattir a, an fing thiam angreng ngawt mai. An Party hian Candidate han siam chhin se, ZPM zawmlo hlim, vaupung tina em em si, Member ngah hmel tak hi an Vote hmuh zat hriat a chak awm!! Mahse an fing thiam tlat.. Tam hmel tak ni zel rawh se, Vote hmanga mualphona theih chen chen pumpelh a ngai miau a…

Party dang chu leh pek ah aw..

David Sailo

Aside | Posted on by | Leave a comment

UNION FINANCE MINISTER HLUI ARUN JAITLEY A THI

UNION FINANCE MINISTER HLUI ARUN JAITLEY A THI : UITU AN TAM

Aug. 24, 2019 (MSR): Vawiinah BJP Politician tha leh Union Finance Minister hlui Arun Jaitley (66) chu AIIMS Hospital, Delhi ah a thi. Amah uitu an tamin Bollywood leh Zaithiam hoten uina an ziak nasa hle.

PM Narendra Modi pawhin, “thian tha leh hlu tak, thian ropui” ka chan tiin, a uizia a sawi.

Arun Jaitley hian kum 52 mi a nihin lung zai tawk tawhin, kum 2018 khan kal thlak a tawk tawh a ni. PM Narendra Modi sorkarah dinhmun pawimawh chelhin, kumin May a Lok Sabha election ah erawh hriselna that loh vangin a ding lo a ni. BJP tan lungchhiat zual tur chu an mi tha Sushma Swaraj-i hmanni lawkah an lo chan tawh bawk a ni.

CT Lalrinawma

Aside | Posted on by | Leave a comment

KAN CHIEF MINISTER: NGAIHTUAHAWM KA TI…

Tukin Local Newspaper ( Vanglaini leh Aizawl Post ka la ve a…) chuan kan CM-in Delhi a cham chhunga Central Minister pawimawh a hmuh kual chanchin an rawn sawi ngaihnawm/ phurawm em em laiin, a hmuh kual ho Minister ( NITI AAYOG telin) te apiang hnenah , an Department chan hisap map lova, rem leh rem lo thlu lova, eng thu hla nge vawrh tur tih te mai pawh ngaihtuah lek lova a MAU / RUA chungchang hlir a sawipui zel mai niawma lang erawh hi chuan ngaihtuahna a ti bing mup mup mai.Keia hmuh dan chuan kan CM hi mi ngaihtuahawm tak a lo ni ta tlat mai ka ti. A CM hmasak tuma Central sawrkar a Planning Commission awm thin kha tun ah chuan kalphung hrang hlak nei NITI AAYOG in BJP sawrkarin an lo thlak daih tawh a, Central sawrkar dawr dan hrang ( different approach ) a ngai tawh tihte pawh hi vanduaithlak takin kan Pa- Zorama hian a la hre fuh thei meuhlo niin a lang. A CM chhung hian a inthing harh hman ang em le….???A CM hmasak khan Guwahati a North East Incharge a ka awm ve laiin Ministry of Mines in North East States 8 te atangin an Geology & Mining Department Secretary / Director te Aizawl ah kan ko khawm a. CM hi appointment lain kan Controller General , India rama kan Office ( Indian Bureau of Mines) a lal ve ber nen a chenna in ah kan hmu ve ngei a. Kan CM chuan kan CG,IBM, Napur hnenah chuan NE Special Assistance Schemes hnuaiah Mizoram tan bik eng eng emaw a lo sawi chhuah nual ka beisei teh reng nen…khai raw chheih le…Sikruk la thli nat theih zia te, Mizote chuan Israel ram kan ngaihsan zia te, Mizoram chu Natural Airconditioned anih dan te kha kan CG,IBM chu tui lutuk maiin a’n lecture khum teh reng anih kha. A thusawi te chu kan pu khan polite takin ngaihnawm ti hmel takin a ngaihthlak chhuah sak ngei a. State Guest House a kan haw leh hnu chuan…Mr. Chhangte, your CM loves to talk, right ??? He certainly is a very enthusiastic public leader. I think if he continues to be in that mode , am hopeful that a small State like yours can certainly make giant leaps …tiin min la hrilh cheu va.A tukah Workshop chu a rawn hawng leh ta ngei a. A hma nia kan pu hnena a sawi ngai chiah chiah, a indawt dan thlap khan a rawn sawi leh ta pang pang a, NE States aiawh rawn kal te kha chuan a thusawi style kha an lawm phian a. Putarin a tu leh fate thawnthu a hrilh ang style, ngaihnawm satliah deuh, hlin tur tak tak awm silo style a thusawi hi kan CM hian a thiamin , a uar phian reng a. Kan tea break lai chuan…kan CG chu ka bulah rawn kalin…Mr. Chhangte, your CM shlould know what to speak, where and when. Relevant things at relevant meetings…a ti ta daih mai a. Sawi zawm tur ka nei ve ta lo.Heti taka nawi deuhva ri berh berh renga kan ram hi kum 5 dang kan kal leh ringawt dawn anih chuan…kan ram leh hnam hian dingchhuak tura phurna( motivation) leh beiseina ( hope) kan hloh fel hman ang tih ka hlau em mai.Kan CM hi thin harh dan tha deuh hria te inlo awm mial chuan ….tlawm leh zah pawh dawn lovin Mizoram leh hnam chhan nan liau liau pawh …sawm hranpa ngai lovin rawn in borti ve thruai ngam teh u khai. PLEASE…..

Aside | Posted on by | Leave a comment

MINISTER DAWRNA PROSPECTUS

24th August

In hrilh harh leh law law ang aw ni.

Thingtlang leh khawpui atang pawhin Minister dawrin kan kal dawr dawr hlawm a, an ni lam min lo hmachhawn dan ah hian Prospectus ka siam a, a dik vek lo maithei. Heta tang hian i Pass dawn leh dawn loh, Mark i hmuh theih dan i in dap thin dawn nia.

PS HNENAH LO DAH RAWH –
Hei hi Mark hmu hniam ber pawlte an ni. Lehkha i ken ve lauh lauh chu en pawh en sak mang lo che in a PS hnena pe tura a tih che chuan i thleng sang vak lovang. Duh duha an tirh phar, an Mood Off changa an vin phar ve thin an PS te hnena dah ringawt khan uluk takin a ensak tawh lo maithei che.

LEHKHA ZIAH SAK –
I lehkha siam kilah a thai sak che emaw, A letter Head hmangin a ziah sak che a, a thlenna tur hmunah kalpui turin a ti che a, i va kalpui a, a reh vang vang thin em? Thenkhat chuan Pen tui hringin min ziah sak tiin Pen tui rawngin awmzia nei ni awm takah an ngai a, a hmanlai tawh a an ching tawh meuh lo. Lehkha inziah sak satliah ringawt hian thlen thui a har viau mai. Department lam hotu tlankhalh hmasa a, Officer ten “Ka sa him nan pawh han thai tir ve hrim hrim la” an tih lâwk erawh chuan a tangkai viau bawk.

“KA LO ENZUI DAWN NIA AW” –
Uluk takin a hmaah ding meuhin i sawi pâng pâng a, a ni chuan a harsat dan leh a awlsam dan kam khat pawha sawi lova “Ka lo enzui dawn nia aw” a tih sam et chuan a enzui dawn hlek lo tih hriat a tha. I chhuah hun hun kha a theihnghilh hun a ni mai.

PHONE CALL –
Hei hi a pawimawh khawp mai. A ngaih pawimawh zawng i nih lanna tur a ni. I awm lai ngeia a Concern hotute emaw, Minister dang a biak sak nghal zung zung che chuan a ngai pawimawh hle che tihna a ni a, i hlawhtlin pawhin i hre nghal anga, i hmu dawn lo a nih pawhin tlang takin a hriattir nghal ang che. Ka lo enzui dawn nia tih vel mai mai nen a in ang lo.

OFFICE AH LO KAL RU –
Programme, zin tih vel vangin i hmu thei lo mangang chuan an in lam i pan a, Office ah lo kal ru a tih chuan i pawimawh lutuk lo tihna a ni tih hria ang che. An ngaih pawimawh tak tak chu in lamah an ko zawk thin a, an sawi ho sur sur thin. Office ah chuan Interview dang nen in thu hmur anga, ho lam tak takin a nam liam zung zung ang che u. In lamah engmah i sawipuo hleithei lo a nih chuan i thlengsang vak lovang.

A LUT THÛK TE –
Heng ho hi chuan an Mobile Phone ah an be mai a, a inah an len chilh mai a, Office ah an hmu kur ve zut ngailo. Unit lehkha, Block lehkha tih velin a ti buai ve lova, an naute Zirtirtu a thun ve tur pawhin Phone in an sawi fel thei. An tlin tur, an hlawhchham tur hi an hre lawk vek thin. Campaigner rinrawl, Headquarter a hotu ve deuh an Kid chuam, an vuavang Contract thawka an chhawr tangkai em em te an ni duh viau.

Block, Unit, Group tih velin heng ho hi an luahlan in an hmakhalh mang lo. Party aiin an pu chuam Minister chu an Number One a ni. Heng hmelhriat that hmanga hmalak hi hlawhtlin a awl duh ber.

Kan la chhunzawm dawn nia…

✍️ David Sailo

Aside | Posted on by | Leave a comment

Lungtian mipuiin kawngzawh leh Bandh an huaihawt

Ni 23.8.2019 khan Lungtian khaw mipuite chuan Lungtian tlangval thihna a mawhphurtu a puhte Interim Bail a Siaha Jail atanga chhuah tir an nih avangin an lungawilohna lan tirin Bandh leh kawngzawhna Lungtian ah an nei.

Tv. Lalthathanga (27) Lungtian khua chu July Ni 2 2019 khan Siaha tlangkawn, Sap School Veng a Siaha Tlangkawn mi pahnih, V. Lalnunpuia S/o V. Zatlunga leh Lalrinawma S/o HC Ngodo (L) ten sawisa rawnin Tv. Lalthathanga hi a hliam tuar lovin July Ni 5 khan Civil Hospital Aizawl ah a boral a ni.

Tv. Lalthathanga Lungtian khua kutthlaktute hi Police ten man in, Siaha Jail ah ni 40 vel dah an nih hnuah Interim bail in Tualthattu a puh mi 2 te hi chhuahtir an ni.

Hetiang a hun rei lote chhunga Lalthathanga (L) kutthlaktute bail a chhuah tir an ni hi Lungtian mipuite chuan an ngaithiam lo tak zet a ni tih lantirin vawiin (23.8.2019) hian kawngzawhna leh bandh an huaihawt a, Village Council Lungtian-I, Lungtian-II leh Lungtian Joint YLA ten he kawngzawh leh bandh hi huaihawtin Siaha leh Sangau inkar Kawngpui, Lungtian peng ah road block siamin nimin zing dar 6 am atanga tlai dar 6 pm thleng khan eng motor mah kaltlang phal lovin nilenga duty in kawngpui an dang a ni.

He kawngzawhna ah hian Lungtian mipuite an chhuak tha hnem hle a, khawchhung veng hrang hrangah Lungtian tlangval sawisatute hunreilote chhunga Jail atanga interim bail a chhuahtir an nih an dem zia an au pui a ni. Lungtian mipui pungkhawmte chuan vawiin ni thlenga thuneituten thiltisualtute laka Charge sheet an la siam lo ni a an hriat avang pawhin an lungawilo tak zet tih an au chhuah pui bawk.

Lungtian mipui kawng zawhte hian Resolution hetiang hian an siam bawk :

Lungtian JAC (Joint Young Lai Association & Joint Village Council Committee) in a Tv.Lalthathanga tualthih chungchanga mawhphurtute V.Lalnunpuia S/o V.Zatlunga leh Lalrinawma S/o Lalrinawma S/o HC Ngodo (L) An phu tawk hremna pe ngei tura kan phut thu Press Released (Dated 5th July 2019) a chhuah pawh zah zolova Interim Bail a chhuah leh mai an ni hi kan duhlo in an hnen atang hian midang chungah pawh thil tha lo a thlen leh mai ahlauhawm avangin arang thei ang bera Jail a thawn let leh vat turin thuneitute kan phut tlat a ni. Jail a dah luh leh vat an nih loh chuan an chungah engpawh thleng se JAC in mawh a phur lo vang tiin Resolution an siam bawk a ni.

Lungtian khaw mipuite hian Lungtian tlangval tualthihna a mawhphurtute Jail atanga interim bail a chhuah an nih avanga an lungawilohna lantirna atan In tin ah Flag dum an zar bawk.

  • © Chhawkhlei Times
Aside | Posted on by | Leave a comment