B.A. (Mizo) zirlaibu-ah hian thu belhchian dawl lo hi by Lalmanzuala

   Mizoram University hnuaia B.A. (Mizo) zirlaibu-ah hian thu belhchian dawl lo tak a awm a. Chumi chungchânga Pu Vanlalhlana’n(ex-MLA) MZU thuneitute hnena thu a thlen hian a sawi chiang  hle a. A ngai ngaiin kan han chhuah chhawng a ni. 

  To,
         The Chairman,
         Board of Studies (Mizo)
         Mizoram University.
Subject: Pu R. Vanlawma thuziak “Mizo lalte leh an khua leh tui” (BA zirlai) chungchang. 

  Ka pu,
          Khawngaih takin ka thu thehluh hi min ngaihtuahsak a, a țul anga hma min lakpui turin ka ngen a che.

Pu R. Vanlawma thuziak “Mizo lalte leh an khua leh tui” tih hi BA zirlai a niin Fungki-ah telh a ni a. Fungki Phek 160-na para 3-naah chuan hetiang hi tarlan a ni a.

“Vailen dawn lai vel te kha chuan Sailo hi an lal tawh em em a, an khuaa mi hausa deuhte sum ît avanga an sualna zawn a, sual vak lo pawh sual anga ngaiha, an neih zawng zawng chhuhsak tak mai te pawh chîng an lo awm ta a, chu chu “ram” an ti a. Heng thil avang hian mipui an thlamuang lova, chhak leh thlang indo reh hlim hlawt khan Hmawngkawn Vanphunga khuaah mipui lungnih lohna a lo chhuak ta a. Mipui an țangrual a, an lal an bân a, thingthu nung an kentir a, tâikuangah tui an bun a, an hawlh luhtir a, “He thingthu nung tuia chiah mih ang țhak hian kan lalna hi mit rawh se” tiin an chhamtir a. Vûta thlah chhim chhak lamah a darh ta zel a, chhim lal te pawh a kangkai a, chu chu “Lal sawi” an lo ti a, lal tam fe an bâng hman a ni. Vanphunga chuan tlawm a ngai a, Lianphunga, Lungtian lal Suakpuilala fapa a zuk pun ta a. Hmawngkawn-ho chuan mau an lo kham a, a han kân a, pakhatin silai a hmet per a, a tlawlh ta mai si a. Chuta țang chuan lal chu an lal țan leh ta a. Hei chauh hi Mizo chanchina lal laka mipui helna kan hriat chhun a ni.” tiin.

Heta Hmawngkawn lal Vanphunga tih hi ka pu (ka nu pa) a ni a. Kum 1877-ah a piang a, kum 1949 khan kum 72 mi niin Hmawngkawnah a thi a. Tunah hian a fate pathum chu an la dam a ni. Ka pu hi lal zaidam leh ngilnei, mi khawngaihna ngah tak ni-a sawi a ni thin a. A lal chhung hian hetiang Pu R Vanlawma ziak ang thil thleng hi a awm lo hrim hrim a ni. Ka nute unau hian an ngaimawh em avangin Hmawngkawn khua thil hre deuh leh Pu Vanlawma kha țum thum vel inkawmna an buatsaih sak a. Chuta țang chuan Pu Vanlawma pawh hian a lo ziak dik lo tih a pawm thlap a, kei ngei pawh min hrilh a, siam țhat a nih tur pawh min hrilh a ni. Mahse vawiin thleng hian siam țhat a la ni ta lo.

A dik loh chianna em em chu a hun thu hian a tilang a ni – Pu Vanlawma hian chhak leh thlang indo reh hlim chhawna thil thleng angin a ziak a. Chhak leh thlang indo chu kum 1877 vel a ni a, indo rêm hlim chu 1880 vel ah ngai tai la. Pu Vanphunga hi kum 1877-a a piang a ni si a, chhak leh thlang indo reh hlim hian kum thum vel chauh a ni dawn a, lal pawh a lal lo ang, naupang chumchiap mai a ni. Chuvangin a dik thei lo a ni.

Tin Hmawngkawn khaw chanchinah hetianga Pu Vanlawma tarlan ang mipui lungawilohna leh thingthunung tâikuang tuia chiah hlum tira hetiang hian ka Lalna mit rawh se tia inchhamtir hi sawi a awm ngai lova, hetiang thil hi Hmawngkawn khuaah hian a thleng lo a ni.

Chutichuan, ka pu Vanphunga Sailo Hmawngkawn lal diklo taka a hming tarlanna zirlaibua a chuang reng mai hi pawm thiam har kan ti a. He thuziak hi tihdanglam/siamțhat a nih hma chuan zirlaiah hian tel hrihlo mai se tih hi kan duhdan a ni a. Kan ngenna min hriatthiampuia a țul anga hma min laksak turin ka ngen che a ni.
                       I rintlak,

               (VANLALHLANA)
                Venghlui, Aizawl

   He thu hi a chiang tâwk hle a, a thuhrim chuan sawi belh tur pawh awmin a lang lo. Sawibelh țul ni-a ka hriat chhan chu hetiang thu hian kan hnam nuna nghawng duhawm lo tak a neih vang leh a thuziak kalphung  hrim hrim  hi zirlaibu-a awm atan chuan a chiangkuang tawk lo hi a ni.

  1. Mizo lalte kha an huaisen vanga ram leh khua leh tui nei an ni a. A tlangpui thuin ram leh khua leh tui neitu an nih ang ngei khan an rorelna kha a țha-in a lâi(fair) hle țhin a. A nunrawng zawnga khawsa an awm ngai lo tluk a ni. An khua leh tuite’n ‘fathang’ an pêk khawma inrelbawl an nih avang khan an khua a len poh leh an khawsak theih phah țhin avang khan khua ațanga pêm chhuak turte kha an ui lo thei lo va. Chuvang ringawt pawh chuan khua leh tuite tana chimawm leh an huatzawnga thil ti chi an ni lo.
    A nihna takah phei chuan kan lalte inrelbawl dan kha a țha hle a. Dan leh dan tesêp an neih ang kha ziak leh chhiar thiam lo an nih laia hnam dangin an neih ve loh hial khawpin an țhain an chipchiar a ni. British-hovin min han awp pawh khan lal rorelna kha țha an tih avangin bân lovin ro an reltirzui zel zawk a ni. Mipui dem an hlawhna ber KULI te kha anmahni tihtir a ni lo va, Bawrhsapin ti tura a tih ang ti mai an ni zawk.
  2. Khatiang kha thil awm dan a nih avangin lal laka hel an awm ngai lo va, lal bân an awm ngai hek lo. Mizo History ziaktu hmasa leh langsar zual, Pastor Vanchhunga te, Pu V.L.Siama te, Rev Liangkhaia te, Pu Zatluanga te lehkhabu-ah “Lal sâwi” thu leh lal bân thu hmuh tur a awm lo hian hei hi a nemnghet a ni. Sabbath ni-a sabengtung khuakhuruma tla lak chhuah a thiang ang leh English grammar-a exception a awm țhin ang hian Mizo lal 300 dawnlai zingah khan lo sual fâl deuhte chu an awm.  Chutiang mi chu 10 bâk an awm lo vang.

  3. India a independent-a inthlang ram kan lo nih tâkah khan kan politician hmasate khan lal an châka an hmanhmawh lutukna lamah khan an kawng daltu ni-a an ngaih lalte kha a rang thei ang bera bân dan an ngaihtuah a. Lal zawng zawng kha lal sual anga chhuahin mipuite kha fuihpawrhin hmathehah an hmang ta a. Chuta țang chiah chuan Mizo Union mite leh Lal leh an lamțangte inkarah inhuattawnna boruak bawlhhlawh leh huatthlala tak mai chu a rawn awm țan ta a. Chu boruak chu tun thlengin political party hrang  hrang mite inkarah a awmzui ta zel a ni.  Hmanni lawka Pu Lalduhoma testimony khan hei hi a sawi chiang hle a, chanchinbu-a an chhuah kan han lachhawng  nghal a ni :
    Mizorama political party hmasa ber Mizo Union policy langsar ber chu ‘Lal bân’ a nih avangin, mahni leh mahni inbeihna leh inhuatnain Mizoten politics bul an tan tih thu sawiin, “Chu chu kan political system-ah a intuh nghet zelin, hnam dang tih dan entawn tlak lohte thlengin kan ching ve ta zel a, mimal insawichhiatna leh tlin lohna lai inhmuhsak tum reng rengin kan hmanhlel a ni,” a ti a; chu chuan ram siamna tur hmun chu indona leh hmelma siamna hmunah a chantir a, politics-ah Pathian ringtu nihna a lang thei lo niin a sawi.

  4. Kristian kan nih hma khan ZU kan buaipui ngai lo va, thil țha tih nan vek kan hmang țhin zawk a. Missionary hmasaten an rawn sawihnawm a, Kristian hmasaten SUAL-a an chantir chawp ațang chiaha kan ram leh hnam hi Zu-ina a tihchhiat hnam kan ni ta ang hian, inngeih taka awmho dial dial țhin kha Mizo Union boruak țha lo rawn siam khan inhawtawn hnamah min siam ta a ni. He thil-ina kan ram leh hnam nun a chhe zawnga a nghawng nasatzia hi ngaih mai ai hian a pawiin a huatthlala a ni.

  5. Kan tunlai khawvela chî leh chî inkara thil ho tê anga lang pawha intihbuaina a thlen hmazia kan  hria a. Hindu leh Muslim inkâr, Brahmin leh Dalit inkâr thilah tu pawh an fimkhur em em a. Lo țawng tlahawlh deuhte chu an ching nghal nek zel a ni ber a. Kan lalte chungchâng a chhe zawng leh thu belhchian dawl lo lehnghal lehkhabu-a a chuang hi a dik lo va. Zirlaibu-a a lo tel thei hi a makin a dik loh lehzual a  ni. Pu Vanlalhlana ‘dilna’ tihhlawhtlin hi MZU-a thuneitute tih tur dik tak a ni a, a rang thei ang bera ‘action’ an lâk a țha ang. Pu R. Vanlawma a awm tawh loh avangin he thu dik lo siamțha thei hi an awm a rinawm loh va. ‘Mizo lalte leh an khua leh tui’ tih hi zirlaibu ațanga paih nghal tawp mai hi tih tur awm chhun chu niin a lang.

6.  ……Heng thil avang hian mipui an thlamuang lova, chhak leh thlang indo reh hlim hlawt khan Hmawngkawn Vanphunga khuaah mipui lungnih lohna a lo chhuak ta a. Mipui an țangrual a, an lal an bân a, thingthu nung an kentir a, tâikuangah tui an bun a, an hawlh luhtir a, “He thingthu nung tuia chiah mih ang țhak hian kan lalna hi mit rawh se” tiin an chhamtir a. Vûta thlah chhim chhak lamah a darh ta zel a, chhim lal te pawh a kangkai a, chu chu “Lal sawi” an lo ti a, lal tam fe an bâng hman a ni. Vanphunga chuan tlawm a ngai a, Lianphunga, Lungtian lal Suakpuilala fapa a zuk pun ta a. Hmawngkawn-ho chuan mau an lo kham a, a han kân a, pakhatin silai a hmet per a, a tlawlh ta mai si a. Chuta țang chuan lal chu an lal țan leh ta a. Hei chauh hi Mizo chanchina lal laka mipui helna kan hriat chhun a ni.” tiin.

  1. He thu pawimawh lai tak te hi han en chiang zual ila. Hmawngkawn Vanphunga khua-ah hetiang thil thleng hi a awm lo va. A thuziak dik lo hi Pu R. Vanlawma ngeiin siamțhat a intiam hman a. Chu thu hretu chu Pu Vanlaltlana hi a ni a. Vuta thlah chhim chhak lamah a darh ta zel a, chhim lalte pawh a kangkai a, chu  chu “Lal sâwi” an lo ti a, lal tam fê an bang hman a ni…. a tih te hi Vuta thlahte lalna ram, Chhingchhip, Khawbel, Rullam, Vanchengpui, Lungpho, Thinglian atanga Biate tlangdung leh Khawbung, Samthang thleng a tihna ni tur a  ni a. Keini ngei pawh hian Mizo Union din hma hun thu kha kan hre pha ve a. Heng hmunah te  hian ‘lal sawi’ tih te, lal bâng tih te kan hre lo hrim hrim a ni.  ‘Mipui lung nih lohna a lo chhuak a, an lal an bân a… lal tam fê an bâng  hman a ni…. ‘ tih zawh chiah a,   Hei(Vanphunga chunga lungawi lohna) chauh hi Mizo chanchina lal laka mipui helna kan hriat chhun a ni.” tih leh nghal mai te hi thu tling lo a ni a. Hetiang thu belhchian dawl lo lutuk hi engti zirlaibu-a lo pawm thei nge an ni tih te hi zawhna awm thei tak a ni. He lai thu-ah hian Examiner-in engtin nge zawhna a siam ang, tih te pawh ngaihtuah tham tak a ni. Chhanna dik leh dik lo kha a inkawkalh nuaih mai dawn si a!
  • Mizo lalte bân an nih dan te, compensation pêk an nih dan te-ah khan thil fel lo tam tak a awm tih kan hria a. Khang thil kal vel khan politics leh thil pawimawh dang pawha Mizote kan puitlin lohzia a lantir țhin dan leh chu chuan tun thleng pawha hnam dang tluk lo kan nih phah zel thu te pawh kan sawi tawh țhin a. A pawi khawp mai. Khatianga kan thil tih dik loh thu pawma, a țul ang anga thupha te pawh chawi âwm kan nih laiin, chutiang kan mawhphurhna chu haidera Mizo lalte zâwk thiam loh chantir zui tumna niawm taka hetiang thuziak a awm hi chu a vanduaithlak tak meuh a ni. Puitling taka ngaihtuahna kan hman a hunin a țul a ni.

  • Kei hi Sailo lal Vûttâia thlahte zinga mi ka ni ve a. Hmawngkawn lal Vanphunga kha ka pû Kaichhûma û a ni a. Nu hmun pa hmun an ni bawka an mizia pawh a inang hle a. Pu Vanlalhlana sawi ang khian lal zaidam leh ngilnei, mi khawngaihna ngah tak mi ve ve an ni. Kan hriat phâk chinah Mizo Union lo chhuah hma khan ka pû rorelna leh mimal nunah khawtlang mipui ațangin sawiselna a awm kan hre ngai lo tak meuh a ni.

    Hetiang hi thil awmdan dik tak zawk a nih avangin Mizo lalte, a bîkin Vuttâia thlahte dik lo taka heti taka sawi chhiatna lehkhabu mai pawh ni lo  zirlaibu-a a awm hi keini, an thlahte tan chuan ngawihbopui mai chi a ni lo.

    Mizoram University-a hemi chungchanga thuneitute hian kan rawtna ang hian an tih tur dik tak chu ti nghal vat turin kan beisei a ni e.

    Advertisements
    Aside | Posted on by | Tagged , , , , | Leave a comment

    THLÂK HI ENGNGE A ȚANGKAINA?- RK Lianzuala

    Kum hnih emaw chauh kal ta thleng khan Mizoram Presbyterian Kohhran hnuaia KȚP din ni atana pawm chu February ni 22 a ni reng țhin a, kum 2015 ațang khan nimin ang, February ni 16 kha a lo ni ta. Chutiang bawkin Chanchin țha thlen ni pawh January ni 11 ni kumkhua țhin, March ni 15-ah Presbyterian Kohhran chuan a pawm ta a, sorkar pawm tawh, January ni 11 chu Baptist Kohhranin a la hmang zui zel a ni. Chanchin țha thlen ni pawh kum za chuang daih, January ni 11 a ni e, tiin khawvel hriat khawpin (ti hial ila) Gospel Centenary kan lo lawm tawh a, Kohhran tam takin a pualin Hall te kan sa a, Aizawl Theological College-te pawh hi Centenary Building kan ti a, khuang lian kan siam bawk.

    Khami puala kan thil tih zawng zawng kha, hriam deuhin sawi ta ila, tlai khaw hnuah kan ching hnawk ta nuai mai a, kum 150-na chu Centenary ațanga kum 47-naah lawm a ngai ang a, kum 200-na pawh kum za-na ațanga kum 97-naah kan lawm ang, kum 1894 kha kum 1891 ni zawka kan pawm leh tâk avangin. Țhangtharah zawhna a la tam hle ang.

    Kum 2012 Synod Inkhawmpui thuchhuak, chanchin țha thlen ni sawn chhan nia sawi, March ni 15, 1891-ah Rev. William Williams-a’n Tlawng luia Kutbùl lui chhuah a lo thleng tih hi thudik pawh a ni mai thei a, a finfiahna leh he thu nemnghehna pawh kan nei nual mahna. Chuti pawh chu lo ni se, kha leh chen January ni 11 kan lo hman tawh leh, a kum za-na puala kan in sak leh thu tàr zawng zawng, Centenary puala kan thil tih zozai ngaihtuahin, thlâk kher hi a țul berin a lang lo khawp mai a, Kohhran mipuite leh hruaitu tam tak pawh hi kan hmin lem lo tih a chiang a, sawi ve theih nei hek lo i, kan ngawi mai mai chu a ni. Thil hi kan tidanglam duh a nih chuan, kan tihdanglam avanga a sâwtna tur leh, a hmaa thil lo awm tawhte a nghawng dan turte pawh kan ngaihtuah tel a pawimawh a, heti hrim hrim kan nih chuan, Krismas te hi Isua pian ni a lo ni tak tak hlei nem mawle … Good Friday, kum tin inthlâk sek te pawh hi hun nghet i nei ang u, kan la ti ang a, mittui hul vek hian kan la inhruai ang tih ka hlau rum rum tawh a ni. Țangkai lo buaipui kan peih lu hretah ka ngai.

    Hetiang bawk hian kum 2013 Synod Inkhawmpui Agenda-ah KTP din kum tihchian rawtna a lût a, kum 1953/54 tih inhnialna hi chu tun hma daih ațangin a awm reng. Mahse February ni 22, 1954-ah kan ding nghet țhin. Sawnin awmzia tak tak a neih loh avang pawh a ni ang. ‘Uluk takin kan chhui’ tiin February 16, 1954 hi KȚP din ni chu a ni e, kan ti leh ta mai a ni.
    Kan lo hriat danin –
    (1) Nov. 27, 1953 – Pu Owen-a hovin Teachers’ Training School, Mission Veng, Aijal-ah KTP din an rel.
    (2) Feb. 16, 1954 – Synod Standing Committee-in KTP din a remti.
    (3) Feb. 22, 1954 – KTP Committee Meeting hmasa ber neih a ni
    (4) Feb. 25, 1954 – KTP Committee thurel bawhzuiin General Organising Secretary-in lehkha a thawn chhuak – tih te a ni.

    Han en mah ila, ‘hemi ni hi KTP din ni chu a ni’ tih tur a awm miah lo. KTP din rel ni, din remtih ni, țhutkhawm hmasak ber ni, lehkha thawn chhuah ni – tih te a ni nuai mai a, kei chuan a hma zawnga kan lo hman, KTP Ni khenbehna tur khawp harh tharna ka hmu lo a ni.

    Tunlaia sorkar leh Kohhran thilah pawh a din ni, a hawn ni fel tak kan ruat a, kan hawnga kan din ang hi khatih lai khan a ni lo hrim hrimin a lang. Rawtna a awm a, pawm a ni a, an țhu khawm a, lehkha te an thawn chhuak a, rawng an bawl zui mai. “Hemi ni hian kan hawng e….. kan din e” tih a awm lo. Zêp nâk emaw, tunah pawh hian Chanchin țha thlen ni leh KTP din ni sawn leh thlâk velah hian kan hmin kim lo tih hi a chiang a, Pastor leh Upa te zingah pawh țul ti lo an tam khawp mai. Kohhran rorel sawiselte hi a hrehawm khawp maia, phunchiar nihna mai maite pawh a ni. Chuvangin țha ti si lovin, sawi chuang lem lovin kan bengkherh țhut vel mai mai a, thinlung erawh chu a hmin chuang lo.

    Kan rorelte, kan thil vei te, kan thil ngaihtuah te hi thil țangkai leh rawngbawl zelna atan pawha awmze nei ni se a duhawm țhin. Pathian ram zauna lam hawi lo tawp thil buaipui leh, sâwtna awm chuang lova thil thlâk chhênte kan chin chuan, hlim tlànna aiin neuh neuh kan hring țeuh ang tih hlauhawm deuh a ni.

    Aside | Posted on by | Tagged , | Leave a comment

    2018-A PUITLING S.S. ZIRTUR: 1 CHRONICLES BOOK OVERVIEW

    A HMING: Chronicles tih hi Jeromea’n “Chronikon” / “Words of days” tih a ziak atanga phuah zui a ni a.

    Septuagint chuan, “Things omitted” “Thil hmaih then” tiin a dah ve leh a. A bu hnih hi tun hma chuan Bu khat a ni thin a. Samuela Bu leh Lalte Bua an hmaih then chu Chronicles hian a kim thei ang ber leh indawt dan dik thei ang berin a ziak a ni.

    A ZIAKTU: Chronicles ziaktu hian Judate Babulon sala an tanna atanga an rawn kir leh hnua Judai rama lalte leh an thlahte chanchin a ziak tel nual avangin, Judate leh Kristiante chuan, Zawlnei Ezra ziak niin an ngai a. Jewish Babylonian Talmud paw’n Ezra ziak ngei angin a tar lang a. A ziak dan, tawng kau chheh leh thlah kal zel chhuina (style, vocabulary, and genealogies) atang hian (450 – 400 BC) vela Ezra ziak ngei nia ngaih a ni. Chumi hmaa ziak chu a nih pawhin, 538 B.C vela Persia in Babulon an hneh hnua lal Kuran Judate Jerusalema kirtir vek a, Jerusalem temple sa tha tura a tih lai vel ni tura ngaih a ni. (2 Chronicles 36:20-23)

    Talmudists chuan, Haggaia, Zakaria leh Malakia te pawh Chronicles ziaknaah hian an tel ngei a ring a. Kimchi leh mi dang dang paw’n ngaih dan hrang an nei thluah a ni.

    A CHHUNG THU: Chronicles hi Adama atanga tanin, Israelte thawnthu ziakna bu a ni a. Judate Babulon sal tanna atanga an rawn kir leh thleng chanchin kan hmu a ni.

    LEHKHA BU DANG NENA AN INLAICHINNA: Genesis-a Mihring thlahtu bul chhuina atanga Judate Babulon sal tanna atanga Jerusalema an kir leh thleng chanchin chu Samuela leh Lalte bua kan hmuh ai maha kimchang leh indawt dan fel zawka ziak a ni.
    SAKHAW THILA A PAWIMAWHNA:
    (1) Pathianin a mite a ngaih pawimawh zia leh anmahni kal tlanga a chatuan remruat tih hlawhtlin a tum dante kan hmu a.
    (2) Pathian an biakna atana Jerusalem Temple a saktir pawimawhna kan hmu a.
    (3) Israel lalte zinga Pathian nung be tha duh tute leh  milem biakna hmun ti chhe thin tute chunga Pathianin a duhsakna a lantir dan kan hmu a. Chumi rual chuan, Pathian nung be duh lo a, milem leh pathian lem biak ching ho a hrem dan kan hmu bawk a ni.
    (4) Isua Krista chu Pathian chatuan remruat anga rawn piang a nih dan pawh Chronicles atang hian kan hre thei a. Juda thlah kal zel atanga Davida a rawn pian dan leh Isua Krista chu Judate Messia ngei a nih dan kan hre thei a ni. 
    (5) Chronicles hian, Israel lalte hun laia Zawlneite ai maha Puithiamte an pawimawh dan min kawhhmuh a. Mimal leh chhungkua te, ram pum hmasawnna tur chuan engkima Pa Pathian thupek kan zawm a  tul zia min zirtir a ni.
    A bu chhunga zir ngawrh atana tha te:
    (1) Davida mi ropuite chanchin te,
    (2) Davidan Pathian tanpuinaa hnehna ropui a chan dan te,
    (3) Solomonan Temple a hlan leh a tawngtaina ropui zia te,
    (4) Solomona hausakna leh a thil tih sual te,
    (5) Pathian hminga inpawl khawm hovin a THU an zawm a tpawimawhna te,
    (a) Lal Asa’n Lalpa maicham leh Bungbel thianghlim a din thar dan te,
    (b) Jehoshaphatan Israel mipuite hnena Lalpa Dan zirtir tura Puithiamte a tirh dan te,
    (c) Joasa’n Lalpa chenna In a siam that dan te,
    (d) Josia’n Pathian ropuina tura thil a siam that dan te,
    (6) Manassea rorel dan te,
    (7) Judai rama Pathian an biak dan te,
    (8) Israel fate ram dang Sala an tan chanchin te,
    (9) Ram pum huapa sakhaw dik zui a pawimawhna te,
    (10) Milem betute chunga thil tha lo a thlen dan te kan zir thei a ni.

    INTRODUCTION TO 1 CHRONICLES

    Chronicles: Chronicles hi Adama atanga thlahtu chhuina a nih rualin, Israel fate Kanaan rama lal neia an awm laia thil thleng pawimawh chanchin kimchang leh indawt thei ang bera ziakna (a factual written account of important or historical events in the order of their occurrence) a ni a.

    1 & 2 Chronicles hi Mosoretic Note atanga a lan dan chuan, Bu hnihte hi Judate chuan bu khat angin an lo nei thin a. Chu chu Origena leh Jeroma te sulhnu atangin a hriat theih a. 1&2 Chronicles-ah hian Pa Pathian kaihhruainain 1&2 Samuela leh 1&2 Lalte Bua inziak famkim tawk lo te chu Genesis atanga chhui chhovin, kim zawka ziakin, a thlen dan indawt thei ang berin a ziak a.

    1&2 Chronicles hi Hebrai tawng chuan, “Divrei Hayamim,” tih a ni a. Greek tawng chuan, “Ephemerides / Ephemeris” an ti a. Arabic chuan, “the Books of Annals;” a ni a. Chu chu: Thil thlen tawh dan kimchang leh indawt thei ang bera ziakna tihna a ni.

    Targum-ah chuan, Chronicles hi “Thlahtu chhuina,” “the Book of Genealogies, the Words of Days,” tiin kan hmu a. A chhan chu Bung hmasa 10-ah hian Adama atanga mihring inthlah chhawn dan a inziak vang a ni.

    Chronicles hi Latin tawng chuan, “Paralipomena” tih a ni a. Greek tawng chuan, “paraleipomena” tia hriat a ni ve leh a. Chu chu: Thil thleng tawh chanchin ziaknaa kimchang tawk lo lai kimchang zawka ziak belhna, (things omitted from a work and added as a supplement) a nih vang a ni.

    By Thanhlira – 9436360646.

    Aside | Posted on by | Tagged , | Leave a comment

    FORENSIC FILES (45): SIP OF SINS by Bruce Kibby

                 Texas State-a Wichita Falls
    Police te chuan tualthahna chhui chhuah theih loh pali lai an nei a. He khaw lian lo tak chanchinah hian pawi khawihna țihbaiawm ber a ni hial ang. Kum 10 aia rei mah tual thattu chuan hlawhtling takin Police te chu a lo bikbo san tawh a.  Bawlhhlawh bawma Coffee no hmanhnu hmangin tual thahna mak tak chu an chhui chhuak ta a ni.
                Kum 1985, January ni 19 khan kum 23 a upa, nurse hnathawk, Toni Gibbs-i chu a hnathawhna Wichita General Hospitala a zan duty zo chu a bo ta tlat mai. A bo atanga ni hnihnaah a car chu Hospital atanga hla vak lo, kawng reh ang reng takah hmuh a ni a. Car chhungah chuan midang finger print emaw hnu han chhui zui theina mai tur engmah hmuh a ni lo. Kar li hnu February ni 15 khan Texas-a Electric hnathawk pakhat hian Wichita khaw pawn hmun fianrial tak, US Route 281 ah Toni-i ruang chu a hmu a. A ruang piah lawk feet za vela hlaah chuan bei a tawkna hmun ni awm tak bus hlui chhe tawh tak hi a awm a ni. Bus chhungah chuan thisen a lo awm nuaih a, Toni Gibbs-i thisen ngei a ni tih finfiah a ni bawk. A lan dan chuan bus chhungah chuan vih a ni a, tanpuitu zawngin pawn lamah chuan hliam tuar chungin feet za chuang a rawn vak chhuak ang a, a thi zui ta niin a lang. Toni Gibbs-i hi Clayton Cemetery, New Mexico ah phum a ni.
                  Police-te chuan rinhlelh an nei ta thuai mai le. Toni-i ruang an hmuhna bulah chuan kum 24 a upa Danny Laughlin-a chu a bike khalh lai hmu a ni a. Laughlin-a hi khawpui chhungah bar vela mipa inphelh ruak kengkung ang chi a thawk a ni a. Polygraph Test ti turin an han tih chuan Loughlina chuan a paltlang zo ta tlat lo mai. Officer pakhat Office-ah lutin a hnenah chuan tualthahna chungchang chu a hriat thu a sawi a. Chu a thusawi avang chuan tual thahna hmunah awm angin a insawi a ni. Chuvang chuan rinhlelh a kai lo thei lova. Investigator-te chuan Laughlina’n Toni-i chu a mi hriat zawng a nih tih an hrechhuak a. A chhan chu Laughlina hian a hma kar tam vak lo liam ta khan night club pakhatah Toni-i hi a lo hmu a ni.
               Toni-i autopsy atanga mipa chi an lak leh Loughlina DNA chu an han khaikhin a. Result atang chuan thuthlukna fumfe tak an siam thei mai lo. Eng pawh chu ni ta se Danny Laughlin-a chu Toni Gibbs-i thah thubuai siam sak a ni ta a. Forensic Evidence hmangin Laughlina chu pawi khawihna nen thlunzawm ni chiah lo mahse thubuai ngaihtuah a nih laiin prosecutor te chuan thil thlen dan hmeh bela evidence awm te hmangin tual thattuah an puh a ni. Ni hnih chhung ngun taka thubuai ngaihtuah a nih hnuin Jury te chu thuthlukna siam hlei thei lovin an awm ta a. A thiam lohna emaw thiam channa emaw thuthlukna siam thei lovin an awm a. Tichuan Mis-trial puan a ni a, thubuai chu tihtawp a ni zui ta a ni. Juror 12 zingah pakhat chauhin Loughlina thiamlohna a hmu a. Chuvang chuan Prosecutor te chuan Case chu ngaituah nawn leh kher a ngai lo ve tiin thu an titlu ta a ni.
                Thla 16 a liam a, tual thahna dang a thleng leh ta. Hemi tum hian kum 21 a upa Waitress Tina Kimbrew-i chu thah a ni ve thung a. Tina-i chu a chenna apartment-a sofa chungah thia hmuh a ni. Autopsy ah chuan lazai sin te hi a chuapah hmuh a ni a. Chu chuan thaw thei lova siamin up hlum a ni tih a lantir a. Chu lazai leh sofa a lukham lazai chu an inmil a. Lukham chu Tina-i up hlum nana hman a ni tih a chiang. He case bikah hi chuan pawngsualna hnuhma hmuh a ni lova. Apartment Complex-a a thenawma cheng te chuan Tina-i ruang an hmuh hma dar kar 5 hmalam khan mipa pakhatin Tina-i apartment a chhuahsan lai an hmu a. Chu pa pianhmang an sawi dan chuan mingo, feet 6 leh inches 2 vela sang, sam dum leh lukhum hmathlawk nei chi khum hi a ni a. Danny Laughlin-a chu he case bikah hian rinhlelh zingah chhiar tel a ni ve lo, a chhan chu an mi sawi pa pianghmang leh a pianhmang an inmil lo a ni.
                  Ni tlem a liam leh hnuin Police-te chuan an hnuchhui laiah chuan hmasawnna hmasa ber chu an tawng ta. Calveston, Texas-a pa pakhat Faryion Wardrip-a chuan Police -te chu phone a biain Tina Kimbrew-i tual thihna chungchangah thu pawimawh tak hriat a nei thu a sawi a. Mahse, Wardripa’n mel 400 chuang a hla a tual thahna thleng chungchangah eng chiah nge hriat a neih le?
                Tina Kimbrew thah a nih hnu lawk May ni 9, kum 1986 khan mel 400 hla a Galveston, Texas-a cheng Faryion Wardrip-a chuan Police te call in thil hriat a neih thu a sawi a. Wardrip-a hi high school kal tluan lo, hna hnuaihnung lam deuh thawk lawr thin a ni a. Zu leh damdawi khawih ching a ni bawk. Ama sawi dan chuan Kimbrew-i chu a hnathawhna bar-ah a tawng a, thian an ni chho ta a. Drugs a khawih thin thu a hrilh avangin Kimbrew-i pawhin a drugs a khawi chungchang chu a hria a ni. Tina Kimbrew-i chu ama thah ngei a ni tih a sawi a. A chhan chu Tina-i chuan tual thahna thlenhma lawka a țhen tak a nupui hlui a hriat chhuattir vang a ni. A sawi zel dan chuan Kimbrew-i chu a haw tak zet a. Rak chel chul chungi Tina-i hnenah chuan a huat thu a hrilh a. Tichuan thinrim eng phiarin innghaisakna a thlen tir ta a ni. A chunga thil thleng tam takah chuan a nupui hlui Joanna-i chu a puhmawh a. Mahni inthiam lohna erawh a nei tlem hle thung.
               Police-te chuan Wardrip-a chuan Kimbrew-i apartment a chhuahsan lai hmuh a ni a, a tlai emaw a hma emaw man a ni dawn tho tih a hriat vangin a inpuang ta mai niin an ngai a ni. Tina Kimbrew-i thahna thubuaiah chuan “Thiamthu sawi tur ka nei lo ve” tiin an puhna te chu a pawm thlap a. Kum 35 tang tura hremna pek a ni. Lung inah chuan zu leh drugs a khawih thin a tangin a talchhuak thei ta a. Ngaihtuahna fim tak hmang theiin a rilru natna te paw’n an kiansan ta a. Tichuan a luh hun lai aia mitha zawk ni chunga tan in chhuahsan turin rilru a siam ta a. Lung ina a tan laiin Wardrip-a chuan High School Diploma a zir chhuak a, kristianah a inpe ta bawk.
                 Tina Kimbrew-i pa chuan Wardrip-a chu a tan hun tur kum 35 chu lung inah a hun a hman a ring a. Mahse, a ringsual hle mai. Thla 13 a tan tlin hnuin Wardrip-a chu Parole (kan sawifiah tawh kha maw) in chhuah lailawk a ni a. Chhuah hlen a ni ang tih pawh a hlau hle a ni. Kum 10 chhung zet chu Tina Kimbrew-i pa chuan a theih dan ang angin Wardrip-a chu lung ina a tan reng theih nan hma a la a. Tina Kimbrew-i chhungten theih tawpa an dang chung pawhin Wardrip-a chu a tan hun tur kum 35 turah kum 11 a tan tlin hnuin Parole bawka chhuah leh a ni. Tichuan, Wardrip-a chu Fordworth khawpawn lawka awm loneia eizawngte chenna Olney, Texas lamah kalin tah chuan a khawsa ta a. Chutah chuan a nu leh pa leh a unau pa 8 lai te chhawmdawlna a dawng a ni. Chutah chuan Olney Door & Screen Coy ah hna hmuin nun bul țan țha leh turin rilru a siam a. A hnathawhnaah chuan nunchang tha takin a khawsa a. Hamilton Street-a Church of Jesus ah taima takin a inhmang a. Sunday school zirtirtu ah te hial tangin nupui pawh a nei leh ta nghe nghe a ni.
                 Wichita Falls lamah thung chuan District Attorney, Barry Macha-a chuan enghlelh dang a nei a. A thuneihna huam chhungah tualthahna chhui chhuah thei loh tam tak a awm a. Chung tualthahna chhui chhuah theih loh zingah chuan Toni Gibbs-i thihna leh midang pahnih thihna pawh a tel a ni. Toni Gibbs-i thah a nih hma kum khat hmalam kum 1984 khan nurse ve tho kum 20 a upa Terry Sims-i chu a hnathawhna atangin in lamah a haw deuh chiah hi a ni a. Tu emaw hian a kawngka chu a lo kik a. A va hawnsak rualin kawngka lo kiktu chuan tharum hmangin inchhungah a rawn lut ta nghal a. Terry-i chuan thei tawpa țan khawhin huaisen takin a lo bei let a. Mahse, amah beitu chu tharumah a hneh loh em avangin tih theih a nei chau hle. Tichuan chu pa chuan a kut chu hnung lamah electrict hrui hmangin a khirh sak a. Pawngsual a ni a, tichuan vih hlum a ni ta a ni. Hliam tuar chungin minute 3 emaw 4 emaw vel chu a la dam mahna. Chu nula la naupang tak chuan a thih hma a hun hnuhnung berah chuan eng tak ngaihtuah  chhuak ang maw?. Ngaihtuah ngam pawh a ni lo. Terry Sims hi Crestview Memorial Park, Wichita Falls ah phum  a ni.
                 Terry Sims-i pheikhawkah chuan thisena finger print kai hi a awm a. Tin, Vaginal Swab pawh nakina DNA Test tih a tan vawn that a ni. Chu tualthahnaah chuan rinhlelh tlem a zawng chu an awm ngei mai. Mahse, tual thattu tak fiahna erawh a awm lo ni. A kum leh mai chuan kum 21 a upa Ellen Blau-i chu Restaurant-a a hna a zawh hnuin zanlai velah a car awmna lam a pan laiin a chungah vanduaina a rawn thleng ve leh a. Tu emaw hian a rawn man thut a, a car ah chuan nawrlutin Ellen-i chu khaw pawna hmun reh lam panin a car khalh tura nawrhluih a ni. Chulai hmunah chuan rehhlum a ni a, kawngsir lei chhungvuma phulah chuan hnutchhiah a ni. Amah lo beitu chuan Ellen-i car chu khawchhung lam panin car chu a khalh let a, kawtthler thim laiah a hnutchhiah ta a ni. Ni eng emaw zah hnuin Ellen-i ruang chu an hmu chhuak a. Khawlum vangin a ruang chu a lo chhe hle tawh a, Dental record hmangin Ellen-i ruang a ni tih an finfiah theih chauh a ni. Pawngsual a ni em tih erawh finfiah thei ni lo mahse pawngsual ngei nia ngaih a ni, a chhan chu a kekawrte pawhthlak a ni. A ruang a chhiat tawh avangin thuthluk tak siam erawh a harsa. Ellen Blau-i hi Midwestern State University, Wichita Falls a zirlai a ni.
               Kum 14 chhung zet chu heng tual thahna pathum te hi la chhui chhuah lovin an awm a. Tichuan Barry Macha chuan hnuchhuitute zinga a khaipa ber John Little-a chu heng Cold Case-te hi tharthawh leh turin a ti ta a ni. Tualthattu zawn chhuah chu Little-a tan mimal taka chona lian tak a ni ngei ang. Gibbs-i kha mimal takin a hria a. Amah leh a nupui te khan Gibbs-i bo zawnnaah khan an lo tel nghe nghe a ni.
                  Macha chuan Forensic Lab te chu Toni Gibbs-i leh Terry Sims-i te taksa atanga mipa chi an lak te chu an DNA khaikhin turin a han ti ta a. Ngun takin an han khaikhin a, DNA chu an lo inang ta chiah mai, tualthattu thuhmun a ni tih an hre thei ta. Tichuan, kahpaha mi thah ching “Serial Killer” hnu an chhui mek a ni tih pawh an hre tel ta bawk a ni. Heng tualthihna te inkungkaihna hi tuman an la hailang ngai lo va. A chhan chu heng case pathumte hi dan kengkawhtu hran theuh, inbiakpawhna hmanrua mumal pawh nei lovin an an chhui vang a ni a. Tunah chuan John Little-a chuan tual thattu pakhat a zawng mek a ni tih a hre chiang ta. Mahse, kum 11 lai a liam tawh a, a awlai hauh lovang tih pawh a hre chiang hle bawk a ni.
                 Wichita Falls, Texas-a hmeichhia pathum tualthi ta te Case File John Littlea’n a han ennawn leh chuan thil hmuh chhuah phurawm zet mai a nei a. Tina Kimbrew-i thah thubuai vanga Police kuta Faryion Wardrip-a a awm lai khan Police pakhat hian a hma thla tlemte liam ta a a thah tak Ellen Blau-i a hriat leh hriat loh a zawt a. Wardrip-a chuan a hriat thuin a lo chhang a ni. Mahse, chu hnu pawimawh tak a thu hriat chu bawhzui miah lovin a awm a. Amah Wardrip-a ngeiin a hnua interview-naah chuan, “Ka thusawi ah khan ngaihtuahna seng deuh se chuan keimah ngei hi an rinhlelh lian ber tur chu ka ni.” tiin a sawi nghe nghe a ni.
              Little-a chuan Wardrip-a hlin theihna tur Evidence a hmuhbelh leh ta bawk. Ellen Blau-i țhian țha ber Jenny Ball-i chu Wardrip-a kawmthlang lawka cheng hi a ni a. Chu chu Blau-i thahna bul lawka awm a ni. Chumai ni lovin a thiannu hnenah chuan Wardrip bul hnaia awm nuam a tih loh thu a lo sawi tawh bawk. Chu thil chuan a beng a verh ta vat mai a ni. Chumai a la ni lo, Toni Gibbs-i thah a nih lai khan Wardrip-a hi Toni Gibbs-i thawhna General Hospitalah khan Janitor-in (in tifaitu) a thawk ve a. Chu chuan inzawmna a nei a, Wardrip-a nen inzawmna nei zingah a tuartu pakhat a ni ve leh ta a. Toni Gibbs-i car kha Wardrip-a chenna hna vai ah hmuh chhuah a ni bawk a ni.
                   Tichuan, John Little-a chuan Wardrip-a DNA va la turin Olney, Texas-a kal turin thuthlukna a siam ta a. A chhan chu tualthitate hnen atanga an lak mipa chi kha Police ten an kawl vang a ni. Kum 1996 a lung in atanga chhuah a nih hnuin Wardrip-a hi Olney-ah hian a la cheng char char a ni. Tichuan  Little-a chu Olney-ah kalin Wardrip a DNA Profile pholang thei tur thil eng pawh lak theih beiseiin Wardrip-a hna thawhna factory chu kar khat ngawt a thlithlai tawh a. Thil duhawm lo a thlen loh nan hmanrua eng emaw a paih/hnutchhiah atanga nei dan a ngaihtuah a ni. Little-a chuan kawngkam lehlam atangin Wardrip-a chawlh lailawk hmang zo a hna chhunzawm leh tura coffee no keng chunga lo let mek chu a thlir reng a. Wardripa chuan a coffee inna no chu car chungah a nghat a. Little-a chuan thawk lawka coffee no chu va laksak mai tur em ni aw tiin ngaihtuahna a nei hman hial a. Mahse, vannei thlak takin Wardripa’n Coffee a inzawh chuan lehkha a siam coffee no chu bawlhhlawh bawmah a paih a. Little-a chuan chu hun remchang chu chuh vat a ngai tih a hria. Vaihlo thial nuap nuap chungin Wardrip-a chu a va pan hnai a. Chil chhakna tur no emaw bur emaw a nei em tiin a va zawt a. Bawlhhlawh bawm lam kawk chungin Wardrip-a chuan, “Nei e, lo va inlak mai ta che” tiin no awmna chu a hrilh a. Little-a chuan bawlhhlawh bawm chhung chu a han bih a, no hmansa pakhat mai ni lovin tam tham zet mai hi a lo awmkhawm ruih a. Wardrip-a no hman kha a eng ber chu nge tih la a hre der si lo, chet lak vat a ngai ta a ni. Wardrip-a lahin a lo thlir reng tawh bawk si, no chhunga coffee in ban tlem la awm chu a la ta chawt a. Chu coffee no tlangah chuan Cheese Cracker nawi a lo kai a. Wardrip-a cheese cracker ei lai a hmu bawk avangin a no duh tak chu a ni ngei pawh a beisei hle a ni.
                  DNA Testing ti turin no chu Forensic Lab lamah an thawn ta nghal vat a. Judy Floyd-i chuan skin cell a awm em tiin no chu ngun takin a han enfiah a. No tlanga Cheese Cracker ei bang nawi lo la bet chu a hmu a, chuta tang chuan DNA a la chhuak thei ngei pawh ang tih a beisei a ni. No atanga Epithelial Cell lak tumin Cotton swab tih thianghlimsa hmangin no chu a han hru a. Chuta cell lo awm atang chuan DNA chua lachhuak thei ta a. Coffee no atanga DNA a lakchhuah leh Terry Sims leh Toni Gibbs-i te hnen atanga Vaginal Swab atanga semen an lakchhuah a DNA te chu a han khaikhin leh a. Tichuan pawi khawihna hmuna DNA Profile leh Coffee no a DNA Profile te chu inmil thlap an ni lo tih a hmu chhuak ta a. Chutiang DNA Profile chu mipui vantlang zingah eng ang chiaha tam nge awm thei tih hre turin Judy Floyd-i chuan “DQ Alpha Test” an tih chu a han ti leh ta a, chu chu Chromosome No.6 a awm a ni. Judy-i chuan Wardrip-a DQ Alpha type ang chi chu avang hle a ni tih a hmu chhuak a. Chutiang Type chu midangah hmuh zen zen loh a ni. He Typing hi a vang hle a, a Profile ah chuan Genetic Profile dang te  nen a awmkawp vek a ni. Chutiang Profile chu khawvel mihring zingah pakhat ah chauh a awm thei a. A thil hmuh chhuah chu John Little-a a va hrilh ta a, chu thuthar a lo hriat ve leh chuan lawm avangin Little-a chu a zuang kual vak vak nghe nghe a ni.
                 Chutiang karah chuan Austin khuaa Forensic Lab lam ve thung chuan Terry sims-i pheikhawk a thisen kai finger print kha an lo nemkai (lift) thei ta hlauh mai. Wardrip-a finger print nen an han khaikhin ta a. Wardrip-a finger print ngei a ni tih n fin fiah ta. Terry Sims-i pheikhawk a phelhsak lai khan a kutah thisen a kai a ni ngei ang a; kuta thisen kai chunga pheikhawk a khawihna lamah a finger print kha a hnutchhiah ta tihna a ni.
               Faryion Wardrip-a chu man a ni ta; thu an han zawh fiah chuan Police te la hriat ngai miah loh Evidence dang pakhat sawi chhuah a nei leh ta. Kum 15 ral hnuin Police ten Faryion Wardripa chu Terry Sims-i, Toni Gibbs-i leh Ellen Blau-i te a thah vanga an han man chuan mitthita chhungte ban phak maiah chuan rorelna chu a lo awm ta a. DNA Evidence hmanga Police ten an han hmachhawn meuh chuan a inpuang ta nghe nghe a ni. Chutianga thu an inzawh fiah lai mek tawp dawn lamah chuan Wardrip-a chuan a tual thah pangana pawh a puang tel a. “Ka thah dang pakhat a la awm a sin. A hming chu Debra Taylor-i ni tain ka hria.” tiin. A sawi dan chuan Toni Gibbs-i a thah atanga thla hnihnaah Wardrip-a chuan Wichita Falls chhuahsanin Forthworth, Texas lam a pan a. Chutah chuan bar ah Debra Taylor-i, pawmlai nei leh fa pahnih nei a tawng a. Chu bar ah chuan Debra-i chu a pasal nena lo kal hi a ni a, mahse a pasal chu a hah deuh avangin dar kar khat vela hmain bar chu a chhuahsan a. Wardrip-a chuan lam puiah sawmin an lam dun a. Tichuan in lama hruai haw a inhuam thu a hrilh a, Debra-i pawh chuan a lo remti ve mai bawk a. Motor dahna an thlen chuan Wardrip-a chuan khuaikhem tumin chet a la ta a. Debra-i chuan a lo duh bik hauh lo mai, tan a lo khawh a. Tichuan Wardrip-a chuan a that zui ta a ni. Debra ruang chu insakna hmun fianrial ang ren takah a thehthang a, hnathawktuten kar khat hnuin a ruang chu a hmuchhuak chauh a ni. Debra thihna leh a hmaa tualthihna pali te kha thlun zawm na ni ngai lo. Debra-i pasal chu kum 14 chhung zet a nupui thattu a rinhlelh a ni a, mahse thubuai erawh siamsak a ni lo thung. Vawi 3 lai Pomygraph Test a paltlang tawh chungin Police te rinhlelh ber a la ni tho a. Chu rinhlelhna chuan a hring nun a vaw chhia a. Amah chhungte ngei pawh a lakah an hel a; a thian te leh a nupui chhungte pawh a lakah an hel a. Tu mai pawhin Ken Taylor-a chu a nupui thattuah an ringhlel a ni. Debra Taylor-i ruang hi Shannon Rose Hill Memrial Park, Forth Worth ah phum a ni a, March ni 24, 1985 a thi a ngaih a ni.
                He DNA Testing thar hian hlawkna dang a la keng tel ta cheu mai. He Test thar hian Toni Gibbs-i thah thubuaia a chungthu an lo ngaihtuah tawh mahse hremna pe lova awm ta Danny Loughlina chu a ti zalen ta a. Mahse, vanduai thlak takin he thu lawmawm tak hi hre pha turin a damrei ta lo va. A hma kum 3 liamta khan motor accident-ah a lo boral hman a ni.

                Tual a thah atang kum 15 dawn a liam hnuin kum 1999, October ni 4 khan Faryion Wardrip-a chuan tualthata an puhna ah chuan thiamthu sawi tur nei lovin an puhna chu a pawm a; Terry Sims a thah vangin tur hmanga chiu hlum tura hremna pek a ni a; midang a thahte thubuaiah damchhung vawi 3 lung in tang tura hremna pek a ni. Amah ngeiin,”Heng atang hian ka fihlim ang tih ka ngaihtuah ngai hauh lo. Evidence tam tak ka hnutchhiah tih ka hria. Detectives ten Evidence an khawnkhawmte leh thu min zawhna atang te khan kum 1999 a ka hming a lan loh ang bawkin kum 1986 ah pawh khan ka hming a lang  lova, khang hun laia min hre chhuak lo kha mak ka la ti tak zet a ni. Serial Killer ka lo ni reng si a.” tiin an hrechhuak tlai avanga mak a tih thu a sawi a ni. Barry Macha thung chuan an hnuchhuina kawngah khan tihsual tam tak an nei ngei thu a pawm a, mahse, an tihsual loh thung erawh chu Case kha ban san a tawp san mai lovin an chhui zel a, an chhui chhuak ta a nii tiin a sawi thung.

                 Kum 2008 khan Wardripa kha thiamthu sawina hun tha siamsak a ni lo tiin Federal Magistrate chuan thi tura hremna pek tawh chu hnawl ni rawh se tiin rawtna a siam a. June ni 14, 2011 khan the 5th U.S. Circuit Court of Appeals chuan Court hniam zawkin State of Texas hnena Wardrip hremna pek chungchang ennawn leh emaw dam chhung lung in tan tir zawk tura thu a lo pek tawh chu a lo paihthlak sak tawh bawk. He case hi US District Court-ah ngaihtuah that leh tura thawn a ni dawn a (thawn a ni tawj zawk mai thei). Tunah hian Livingstone bula Polunsky Unit ah a thih hun nghakin (Death row) hun a hmang mek a ni.

    Aside | Posted on by | Tagged | Leave a comment

    FORENSIC FILES (44): SMOKING OUT A KILLER by Bruce Kibby

                Tun țuma kan sawi leh turah hian college zirlai pathum chu rawng taka thah an ni a. An vai mai chuan mi pakhat thah ni mai hian a lang a ni. “Nula hmeltha lam deuh leh kum la naupang lam deuh a thlang bik emaw ni aw !” tih tur hi a ni a. Police lam chuan rinhlelh an nei ta thuai mai. Mahse, mi zawng zawngin chu pa ngei chu tualthattu dik tak a nih an ring bik vek lo. Kum 20 chhung chu “Tu nge tualthattu?” tih chu zawhna a ni. Kum tam tak Evidence an lo kawl that chuan atawpah chuan thudik rapawm zet mai chu a rawn phawrh chhuak ta a. “Veng chhungah țum khatah mi rawva leh nunrawng tak pakhat aia tam an awm a ni lo maw” tih han ngaihtuah ringawt pawh thil tapthlak tak a tling a ni.
                 He thil thlen hun hi Fall Semester (Khawiah emaw chuan ka sawifiah tawh, sawifiah tawh lo mai ang) țan hma kar khat hma lam, kum 1981 khan a ni a. Susan Schumake-i chu Carbondale khua a Southern Illinois Unversity-a a let leh hlim chauh a ni a. Senior Year han țan thuai thuai chu a chak tawh tak zet a ni. Heng lai vel hian Radio Station ah hna a hmu thar hlawl a ni a, thu puan chhuah lam hna a țan ve dawn mek a ni. August ni 17, tlai dar 6 rik hma hretin Susan-i chuan campus panin a hnathawhna Radio Station chu a chhuahsan a. Hemi zana a zanriah kil pui tur a țhiannu va hmuh a tum bawk a ni. Mahse, a țhiannu hnen chu a thleng ta hauh lo mai. A thlen lawk loh avang chuan a thian, chaw a ei pui tur chuan Susan-i room-mate Marry chu a va phone a. Ani chuan a awmna chin a hriat bik loh thuin a lo chhang a. Khua a lo tlai a zan a rei tial tial bawk a, zanlai thlen dawn hnaih vel ațang chuan a țhiante chuan țhian dang te phone chhawng zelin a awmna chin an ngaihven a, a kalna tur awm nia an rinnaah te chuan an zawng bawk a ni. A tukah pawh Susan-i hnen ațanga thu thar hriat tur a awm loh avang chuan Police-te chu chinchang hrilhhriat an ni ta a ni.
            Susani zawn hna chu Police lam chuan an țan ta nghal a. Chumi zan chuan Officer pakhat hian zirlai ten Campus (zirlai naupang chenna khawmna-Mawlmang takin sawi ta mai i la) pakhat ațanga Campus dang pan nana an hman thin lei sakhat kungtum sira hnim rahhrual nuaih ni a lang hi a hmu a. Chung țul pik te chu rin aiin a lo sang zek lehnghal a, a phena awm thil han hmuh mai pawh a harsa a ni. Kawlphe khawnvar hmanga a han chhui zui zel chuan Susan-i ruang chu a va hmu ta a.  A nu leh pa tan chuan thu lungchhiatthlak tak mai, an fanu thih thu han hriat chu thil hriat chakawm lo ber a ni ngei ang. Chanchin an hriat meuh chuan a pa chu insum zo lovin a țap ta a.
                    A lan dan chuan Susan-i chu sawisak niin, pawngsual a nih mai bakah reh hlum ngei niin a lang. Police-te rin dan chuan pawi khawihna chu Susanin Radio Station a chhuahsan hnu lawk, tlai dar 6 leh dar 6:30 inkara vela thleng angin an chhut a. Chumi awmzia chu Susani kha khaw en lai ngeia bei leh hruai boin a awm tihna a ni.  Khaw en lai renga thil thleng a ni a, chu thil thleng chuan mitin a barakhaih a ni.
               Police te chun rinhlelhawm nia hria emaw hmu nei emaw an awm em tiin thu an han zawt țan a. Tualhthah chungchang a sawi duh nei te chu rawn penchhuak a sawichhuak turin an ngen bawk a ni. A bialpa hlui tiamin, Susan-i țhian hnai vai tawh phawt chu Police ten thu an zawt fiah a. Chung zingah chuan Susan-i thinlung lo hnehsak tum, mahse Susanin a thinlung kawngkhar a hawn sak tak loh te pawh an awm a ni. Chunghote chu rinhlelh zingah an tel lo thei lo va. Chu mai bakah Policete chuan “Pawi khawihtu chu pawn lammi a ni em?” tih thleng an ngaituah tel a ngai a. Tualthahna thlenna hmun tlawhpawh a harsat zia ngaihtuah chungin chunglai hnaivai a chengte pawh uluk taka an en thlithlai a ngai tel bawk a ni.
                 Chutia Police ten hnu an han chhui zui zelnaah chuan thil thleng rual ni thei awm ang tur hi hmuh chhuah an nei a. Susan-i thah a nih ni tak khan Campus Gymnesium tana sak mek a sub-contractor chuan țum hnih ngawt mai tualthahna a rinhlelh lo ni tawh mi pakhat hi a lo ruai a. Chung hmeichhia pahnih tualthi ta te chu University-a zirlai an ni. University ah chuan nitin mai nula hmeltha tak tak sang tam tak an vei suau suau a ni a. Chungho bul hnaia hnathawk  a nih vang chuan rinhlelh a kai bik a ni.        
                 Susan-i tualthihna chungchangah Investigator ten ni eng emaw zah chhung an hnuchhuina ațang chuan John Paul Phillips-a chu rinhlelh zinga a langsar ber a ni a. He pa hi țhatna lai hriat tur leh sawi tur awm lo, pa thinchhe ve tak mai a ni a. Kum 15 emaw 16 emaw vel a nih laiin an insualnaah Baseball Bat hmangin naupang pakhat chu vuakhlum a lo tum tawh nghe nghe a ni. Sawi tawh ang khan John Paul Phillips-a hi kum 5 hmalam khan Southern Illinois University zirlai hmeichhe pahnih pawngsual leh thah thubuaiah rinhlelh ber a ni a. Kum 21 a upa Theresa Clark-i chu Campus pawna a chenna apartment ah pawngsual a thah a ni a. Chung hun lai chuan John Paul Phillips-a hi feet 100 vel leka hla apartment ah a cheng ve a ni. Police ten thei tawpin an chhui a, finger print hmuh tur a awm lo va. DNA lah hmang țangkai turin ban phakah a la awm lova, witness pawh an awm hek lo. Chu case chu han chhui zui ngaihna vak a awm lo a ni ber. Mahse, Police te chuan John Paul Phillips-a ngei chu pawi khawihtu niin an hria a. Finfiahna erawh an nei thei lo a ni. Chu tualthahna ațanga kum khat hnuin kum 24 a upa Kathleen Mcsharry i pawh a chenna apartment ah puangsual a vih hlum a ni leh a. Chu apartment bul lawkah chuan John Paul Phillips-a hi a lo khawsa leh ngei bawk a ni. Hemi case ah pawh hian John Paul Phillipsa bawk hi rinhlelh a ni a. Sawi tawh ang khan DNA hman tangkai hma leh figer print hmu tur awm bawk si lo case a nih vangin han chhuizui ngaihna vak a awm lo va. Heng tualthahna pahnihah te hian John Paul Phillips-a manna tur khawpin finfiahna a țha tawk lo a ni.
                 Vanneih thlak takin Police ten Susan Schumake tualthihna ah hi chuan hmasawnna a nei thei ta thung a. Susan-i autopsy an tih laiin Medical Examiner chuan Susani taksa ațangin midang sam/hmul ni ngei tur, zai hnih a hmu chhuak a. Susani thattu sam/hmul ni ngeia rin a ni. Chu sam/hmul chu Serh hmul ngei a lo ni bawk. Chu serh hmul nena khaikhin a tan Phillips-a chuan ama hmul chu hnial eih lovin a lo pe ve mai bawk a. Microscopic Examination atangin Susan-i taksa a serh hmul chu Pillips-a serh hmul a ni lo tih an finfiah a. Chuvang chuan Phillips-a chu rinhlelh zing ațangin chhiartel a ni ta lo phawt.
                   Hmul/sam finfiah a nih tawh nachungin Susani chhung te chuan Susani thattu chu tudang ni lovin John Paul Phillips ngei chu niin an ring a. Police ten an khuahkhirhna hnuaiah dah lova man pawh an man loh avang chuan an hrethiam lo tak zet a ni. Mahse, chhan țha tak a awm ngei ang tih an ring thung a. Heng thil thlen hnu hian Phillips-a chu midang pawngsual avangin tan in ah khung a ni ta nghe nghe a ni.
                 Police te chuan Susan Schumake-i case ah chuan hnu thar an nei thei ta hlauh mai. Dormitory hnung lama Pilesfort luite ah chuan Susani bag eng an chhar a. Bag chhunga a wallet dah erawh hmuh tur a lo awm lo. A thiante sawi dan chuan Susan-i hian $10 vel hi chu a ak ziah țhin a ni ngai a. Pawisa erawh hmuh tur a lo awm lo. Tin, Campus-a hnathawktu pakhat hian Susan Schumake-i tualthihna ațanga hla vak lo ah bag lian vak lo, a rawng sen hi a chhar a. Chu bag chhungah chuan Toiletries a lo awm a ni. Chung zingah chuan a neitu chhui theihna tur hmanrua hmuh an nei ta. Chu chu damdawi bur a ni a. Damdawi burah chuan Daniel Woloson tih hming a inziak a, Maynard Correctional Centre atanga an chawh a ni. An han chhui zui ta a. Daniel Woloson-a chu Parole a chhuah lailawk mek a ni tih an hre thei ta a. Tichuan an mi ngaihven zawng tak a ni ta nghal phat mai a ni.
                 Daniel Woloson-a hi mi in rawk vanga lung in atanga chhuak hlim a ni a. Inhlawh a hna thawk lawr mi a ni. Tin kha tualthahna thlen lai khan Campus ah hna a thawk ngei bawk. A hnathawhna leh tualthahna thlenna hmun chu meter za tlem te a inhlat hi a ni a. Police ten chuan thu an han zawt fiah țan ta a. Wolosona chuan tualthahna thlen lai vel khan hmun dangah daih awm angin a insawi a, a țhianpa nen an awm dun niin a insawi a ni. Police te chuan Woloson a chu hun a hmanna nia a sawi ah chuan an hruai kual a. Mahse, a mi sawi a thianpa chu an va zawng chhuak thei ta hauh lo mai. Wolosona chuan Police te chu țha taka puihbawmin enfiah a tan a a sam leh hmul chu a pe a. A tuka thu zawh fiah nawn an han tum chuan hmuh tur awm lovin a lo bo ta hmak mai a ni. A chenna chu an han dap a. A room-ah chuan lehkha pawhthler nuaih hi an hmu a. Chung lehkha pawhthler te chu a țhen toilet ah paih an ni a a țhen bawlhhlawh bawmah paih a ni bawk. Lehkha them te chu an han remkhawm a, chuta lo inziak chu suicide note niawm tak hi a ni:

    ” I don’t know why it is always me.

    I know i can’t handle prison again…

    I know everyone is better off this way”..

    tiin a lo inziak a ni. Woloson-a hair sample test result chhuah hma chuan Policete chuan Wolosona chu an zawng chhunzawm ta zel a. Mak tak maiin Wolosona Hair sample leh Susani taksa a hmul an hmuh te chu an inmil ta hauh lo mai. Chuvang chuan ani pawh rinhlelh zingah telh a ni ve ta lo. Hnu dang han chhuizui mai tur a awm tawh lo va, case chu chhuizui lova hluihlawnin mai turin a awm hman tep a. Mahse, Kidnapping leh pawngsual vanga lung in tang mek, John Paul Phillips-a chuan a lung in tanpui pa, Thomas Makabee hnenah chuan tual a thah thu chapopui taka sawiin a lo hrilh a. Tual a thah dan lo hrilhin tualthattu chauhina a hriat, thil thlen dan kimchang tak a lo hrilh a ni.
                Phillips-a chuan college zirlai naupang Kathleen Mcsharry leh Theresa Clark-i te a thah dan kimchang tak a sawi chhuah mai bakah Waitress pakhat Joan Wetherall-i pawh a thah thu a inpuang tel bawk a. Mahse, Susan Shumake-i hming erawh a sawi chhuak hauh lo thung. Mi pathum a thah thu dik takin a sawi a, a palina hi eng vanga sawi lo nge a nih? Susan-i hming a lam ri tel ve lo tlat. Mahse, mipui ngaihdan chuan amah ngei chu mawhphurtu ah puh a ni. Police-te pawn John paul Phillips-a ngeiin Susan Schumake-i kha a that a nih an ring a. Mahse, lo ring sual ta se tualthattu dik tak zawk chu man lovin a tualchai mek tihna a ni ang.
                   Kum 1986, November thla a lo her chhuak a, lung in a tan laia a lung in tanpui bula hmeichhia pathum te a thah thu a inpuanna ațangin a mi thah te zinga pakhat, John Wetherall thah thubuaiah John Paul Phillips-a chungchang chu ngaihtuah țan a ni a. He thubuaiah hian thiam loh chantir a ni. Hremna a dawn ni in Phillips-a chuan rorelna ngaithlatu mipui hmaah Susan-i chu a thah a nih loh thu a sawi nawn leh ngat a. Roreltu chuan finfiahna hrang hrang ngun taka a enfiah hnuin Phillipsa chu thi turin a thuthlukna a siam ta a ni. Mahse, thi tura hremna kenkawh a nih hmain lungphu chawlin Phillips-a chu a thi ta a. A thih hian kum 40 a upa chauh a la ni nghe nghe.
                 Sawi tawh ang khan Phillips-a khan hmeichhia pathum a thah thu uan pui takin a sawi a; Susan-i hming erawh a lam chhuak hauh loh thung. Susan-i chhung te chuan Susani tualthihna ah khan Phillips-a chu mawhphurtu ah an la ring ta fan a. Ani ngei chu mawh phurtu niin jailah a thi ta-ah an ngai a ni. Amah ber a thi tawh chuan “Susan-i thawnthu chu a tawp ta e” tiin ngaihdan te pawh an nei a. Mahse, țhenkhat thung chuan “Tualthattu chu Phillips-a ngei a ni e” tiin ngaihdan an siam theih hauh lo thung. A chhan tak ni a lang chu Susani thih dan kha a hma a kan sawi mi pathum te thih dan aiin a danglam zawk tlat a ni. Phillips-a mi thah pathum te kha zan thim hnuaia thah an ni a. Susan-i erawh kha chu khaw en lai ngeia thah a ni. Ho te angin lang mahse thil eng emaw chu dik felhlel deuh chu a awm ngei niin a lang. Hnuchhuitute zinga mi Lt. Paul Echols hi Susani nen College ah class mate an ni thin a. A dawhkanah chuan Susan-i nena thla an lak dun dahin tualthattu zawnchhuah ngei chu a tum ruh hle.
               Kum 2000 a rawn her chhuak a; Susani tualthihna ațang pawhin kum 20 dawn lai a liam ta.  A hma a Test tih nana Biological Sample (tisa them tiin hre ta mai i la) tam tham zet mamawh țhin khan tih dan thar PCR hmangin biological sample tlemte pawh Test a tih theih ta a. Analyst te chuan Susan-i autopsy ațanga an lak biological sample them te chu an han Test ta a; chuta țang chuan tualthattu DNA Profile an la chhuak thei ta a ni. Tunah chuan tu in nge Susan-i kha that tih chu Police te chuan an hre thei thuai dawn ta niin a lang. Vanduai thlak takin John Paul Phillips-a DNA Profile chu an lo vawng țha hauh lo mai. Tih dan phung pangai ang lo takin Investigator te chuan Phillips-a ruang phawrh a nih theih nan hma an la ta a. Tualthattu a nih leh ni loh finfiah a ngai a, chuvang chuan a DNA chu an nei ngei a ngai a ni.
                 Mithiamte chuan Phillips-a thling atangin a DNA chu an la chhuak ta a. Pawi khawihna hmuna DNA an neih leh chu Phillips thling atanga DNA an neih chu an han khaikhin chuan an lo inmil ta hauh lo mai. Susan-i nu chu an han bepawp a. An thil finfiah chungchang a han hriat chuan a lung a chhe hle a, a fanu thihna chu a theihnghilh ngai lo a ni tih a hriat a ni. Chu a thu hriat chuan a ti lungnghur hle a ni tih pawh a hriat a. Mahse Police te chuan hnu an chhui zui zel tur thu leh tualthattu chu an chhui chhuah ngei tur thuin an hnem a ni. Susan-i pa erawh lungnghur ai mahin a thin a rim zawk niin a lang a. Chutiang karah chuan a aia thu lawmawm lo zawk a la awm ta cheu mai. Susan-i taksa atanga DNA an lak chuan State chhunga misual finfiah tawhsa DNA an lo vawn that te DNA pakhat mah a mil lo va. Police te chuan chu pawi khawihtu chu State Data Base ah (misual DNA vawnthatna) a la awm lo tih erawh an hrechiang ta a ni.
                  Tualthattu chu Phillips-a a ni lova; State DNA Data Base a DNA an neih zing a mi pawh a ni lo tih a chiang ta. Tu chu nge ni ta ang? Police te chuan eng tin nge hnu an chhui zui tak zel ang le? An tih theih awm chhun chu kha tualthahna thlen laia rinhlelh midangte chhui chhunzawm zel a tu DNA nge a mil tih zawn chhuah a rinhlelh an zawh rak thlenga a thawh a ngai ta a ni. Hmabak a ko hle mai. Chung an mi ngaihven zinga pakhatna chu Daniel Woloson-a kha a ni. He pa hi a tir atanga an mi rinhlelh kha a ni a. Kha tualthahna thlen ni khan tualthahna thlenna hmun atanga metre 300 pawh tling loah hna a thawk a. Chumai mi lovin Police ten thu zawh fiah an tum khan a tlan bo ta daih a nih kha. Daniela chu an han zawng ta ngar ngar a. Vanneih thlak rakin Michigan-a Motor hralhna hmunah an hmu ta hlauh mai. An va zawn chhuah hian nupui thenin fa pakhat a lo nei tawh a. Tichuan Police te chuan thu zawh fiah an han tum ta a. Police te nena inbiangbiakna neih a lo duh hauh lo mai. Daniela chuan kum 1981 daih tawhah khan Police te hnenah khaikhin a tan ama sam/hmul leh a finger print te a pek tawh tawh thu sawiin Police te chu an hnuchhuih laiah thawhpui a chak vak tawh lo thuin a lo hrilh hlawm a ni. Investigator te chuan Daniel-a DNA Sample chu an mamawh tak zet a, mahse Danielan a lo pe duh mai bik si lo. Chu mai ni lovin Court chuan “Chhan tha tawk a awm lo ve” tiin Daniel chu Sample pe ngei turin a lo ti lui duh bik si lo. A DNA sample erawh an nei ngei a ngai thung a ni.
               Hnu an chhui țan tor khan Daniela hmul/sam an nei ngei mai. Mahse, chu sam/hmul chuan zung (root) a keng tel lo va. Chuvangin Genetic Profile kimchang tak hailan theih a ni tlat lo. Chuvang chuan Investigator-te chuan tihdan phung pangai ang lo takin Daniela DNA neih thei dan tur chu an ruahman ta a ni. 
                  Sawi tawh ang khan hun a duh rei hle mai; Susan-i tualthihna atangin kum 20 dawn a liam ta a. Lt. Paul Echols-a chuan Susan-i thattu chu an zim sawt hle tawh niin a hria. Mahse, tualthattu dik tak chhui chhuak tur chuan DNA hmang chauha finfiah theih a ni. Vanduai thlak takin an mi rinhlelh Daniela chuan a DNA sample a pe duh si lo. Chuvang chuan Michigan State Police te chuan Daniel-a DNA chu dan ang thlap a neih ngei tumin thuthlukna an siam ta a. Tichuan, Daniela chu a chetla leh khawsak phung te enthlak an tum ta a. An thil tum ber chu hmangrua eng emaw atanga Deniela DNA neih a ni. Tichuan chu DNA hmang chuan tualthattu a ni nge ni lo an finfiah thei dawn tihna a ni. Mahse an thil tih tum chu thil awlai a ni hauh lo mai. Achhan chu Deniela hi Motor part zawrhna dawra hna thawk a ni a. A bul hnaia rinhlelh kai hauh lova va kal chu a thawhpui te bakin an ti thei lo a ni. Chutiang karah chuan Police te chuan tun hnai maia Danielan a car a hralh tih an hre ta a. Chumai bakah zial a zu thin tih pawh an hre tel bawk. Tichuan chu car chu a neitu thar hnen atangin an chhuichhuak ta a. Motor chhung an han dap a, ashtray ah zial bung tam tham zet an hmu a. An vanneihna belhchhah turin car leitu chu zial zu lo mi a lo ni leh zel a. A thiante pawn car tukverh ah an zial zukna bung te an paih chhuak thin tih thu pawh an hre leh ta zel a ni.
                 Sawi tawh angin zial bung chu tam tham zet a ni a, chung zinga pakhatah tal Daniela DNA chu hmuh ngei an inbeisei a ni. Chung zial bung te chu DNA Analyst, Jennifer Andrew-i hnenah an va thawn ta a. Andrew-i chuan zial bung filter chu a mal te tein a chep hawng a. Filter hi DNA awm duhna bik a ni a, a chhan chu filter ah hian chil emaw skin cell emaw kha a inchhek khawl ts thin a ni. Chung sample (filter) te chu bawlhlo hmangin an han sawngbawl a, chu chuan DNA kha a thliar hrang dawn a ni. Chutia an han sawngbawl chuan tu nge tih la hriat loh mipa DNA Profile an nei thei ta a. DNA Analyst hna hi nuam awmang takin lang mahse a hahthlak em em a, mahse hna an zawh meuh hi chuan an lungawi hliah hliah thung thin a ni.
                 Police te chuan an DNA Profile neih thar chu kum 20 liam ta a Susan-i taksa atanga DNA sample an hmuh nen khaikhin a tan Southern Illinios Forensic Science Laboratory ah an va thawn leh ta a. Ngun taka an han khaikhin chuan Daniel Woloson-a DNA nen a lo inmil ta chiah mai le! Kum 20 chhung zet an lo buaipui tawh tualthahna chu chhui chhuahin a awm dawn ta. Police tawngkam ang phei chuan Lottery man ang vel an ni. Mahse, an hna a la tawp mai lo. Lt. Echols-a chuan zial bung atanga DNA Profile an neih chu Daniel-a DNA Profile ngei a ni tih finfiah turin Daniel hnen atang ngeiin DNA a mamawh ta a ni. Chumai bakah Daniel-a chu a tlanbo leh loh nan a dan a ngai bawk a. Chuvang chuan Lt. Echols-a chuan Daniel-a chu chhimbudawi a tum ta a. Deniel-a chu Evidence phuahchawp hmangin a han hmachhawn ta a. Hetia a tihna chhan hi Daniel-a manna tura Arrest Warrant a nei theih nan Deniel-a hnen atangin thu eng emaw tal a hriat ngei a ngai a ni. Tualthahna thlen laiin mita hmutu an awm thu a han sawi zeuh a. Anihna takah chuan witness an awm hauh lo a ni kha. Hna a thawhna a a thian pakhatin tualthahna hmun pawhtu kawngtum zawha Daniel-an bag rawng eng ak chunga a kal lai a hmu thu a han hrilh a. Chumai ni lovin chu bag ah chuan finger print an hmuh thu a hrilh tel bawk. Inngaihtuah hman miah lovin Deniel-a chuan “Kha bag atang khan pawisa bak ka la hlei nem” tiin a rawn țawng chhuak ta a. Hrilh nawn kher ngai lovin thudik tak a sawi tih chu Lt. Echols-a chuan a hrethiam ta nghal a. Daniela chu bang kila ui note zim ang mai a ni ta. Man a ni ta nghal a. A DNA sample pe tura nawrluih a ni ta bawk. A DNA chu an han khaikhin ta a. Rinhlelh rual lovin Susan Schumake-i taksa a DNA an hmuh neitu ngei a ni tih chu an finfiah ta a ni.
                  Prosecutorte chuan “Eng vanga Susan Schumake-i kha that nge a ni” tih an hrethiam lo tak zet a. An rin dan chuan Daniela khan mahni chauh a kawngțuma kal lai Susan-i chu a lo hmu ang a. Hmun fianriala mahni maia kal ta chu khawi a tum ta a ni. Tlai lam khaw thim dawn ruai a ni tawh avangin tuman Susan-i authawm lo hria emaw bei a tawk lai lo hmu emaw an awm lo va. Daniel-a chuan Susan-i chu pawngsualin a rekhlum zui a, Susani taksaah chuan ama DNA chu a hnutchhiah ta a ni. Susan-i bag rawng eng chu lain a inthiar fihlim ta nghal a. Bag chhunga purse a cheng 10 lo awm chu lachhuakin bag chu lui te ah chuan a paih a. A tlanna lamah chuan ama bag, a chhunga Doctorin damdawi a chawh leh toiletries vel awmna chu a thlauh ta a ni. Sasan-i kha pawngsual a thatzui tura malman bik a ni hauh lo. A hun leh hmun dik lo ah a lo awm palh mai chauh zawk a ni. Daniel Woloson-a lakah Police ten finfiahna țha tak an nei chungin Daniel-a chuan Susan-i tualthihnaah khan inhnamhnawihna a nei lo tiin tan a khawh ve thung a ni.
               Susan-i thah a nih atanga kum 25 liam hnu kum 2006, March thla khan Daniel Woloson-a chu First Degree Murder ah thiam loh chantir a ni ta. Kum 40 chhung lung in tang tura hremna pek a ni.
                  Tunah chuan University thuneitute chuan Susanin kha kawng țum a zawh a thah a nihna kawngah khan kawngpui dawhsan (over bridge ang chi) siamin zirlai naupangten kawngțum țihbaiawm tak chu an zawh a ngai ta lo. Chu kawngpui dawhsan chu a hmingah Susani hriat reng nan “Susan Schumake Memorial Overpass” tia vuah a ni. Susan-i nu chuan chu kawng dawhsan siam nan chuan eng zat tak seng ang maw tiin zawhna a siam a. Susan-i pa thung chuan “Chu kawng dawhsan siam nan chuan nunna hlu tak pakhat laksakin a awm a ni” tiin a chhang thung a ni.
                  Thubuai ngaihtuah a nih hnua Detective ten tualthahna hmun an va tlawh leh chuan chu lai hmunah chuan pangpar leh balloon te a lo awm nual a. Susani an lainatna lantir nana an dah a ni ngei ang.
                     ***********************

    Aside | Posted on by | Tagged , | Leave a comment

    TUALTHAT TU KHAIHLUM NI RAWH SE’ TIHAH REPUBLIC KHAWTLANG AN LA DING

    Local Council, YMA, MUP, MHIP leh VDP te telna Republic Veng Joint Action Committee chuan thuchhuah siamin “January ni 9, 2015-a an khawtlang a pawi sawilo mi 5 lai mai rawng taka thah an nihna champha a lo thlen hian Republic Veng khawtlang chu an rilru a na thar hle tih an sawi a, Pu Sangliansiama te chhungkaw tawrhna kha an theihnghilh tawh dawn lo a ni” an ti. Hetiang thihna rapthlak lutuk ang hi tun hnuah Zoram khawi hmunah mah thleng tawh lo se an duh tak meuh tih an thuchhuahah chuan an tarlang.

    Republic veng JAC chuan Rawng taka mi 5 lai mai that a, naupang rilru thianghlim tak mai pawh zuah lova hmelma ang maia diriam taka nghaisa tu Laltlanchhuaha chunga an thuchhuah tawh, “he tualthattu hi khaihlum ni rawh se” tihah hian Republic Veng Joint Action Committee (JAC) chu a la ding nghet tlat tih Zoram mipui te hnenah an hriattir nawn leh a. Laltlanchhuaha hi Republic Veng khua leh tui a nihna an hlih sak a, a thiin emaw, a nung chungin emaw Republic Veng khawtlangah lakluh an remti lo tih an sawi nawn leh. He tualthahna rapthlak tak chungchangah dik taka rorel a nih theih nan daltu an awm chuan Republic Veng khawtlangin a tul angin a hmachhawn zel dawn tih an tarlang bawk.

    Kha thil thleng report thlir duh tan –
    https://www.youtube.com/watch?v=MP5hU11NPGo .

    Author : Vanneihthanga Vanchhawng

    Aside | Posted on by | Tagged , , | Leave a comment

    Kohhran (Synod) hian eng kan ti zo ta nge ni aw? by Lalremliana Pachuau

    Hnam tê tak niin kan ram luah pawh a zau lo. Ţhenawm khaw veng inngaihsak tak ţhin, chhûngte aia ţhenawmte nena inunau ţhin hnam kan nih ţhin kha. Nimahsela, kan ram kalphung hi a danglam tawhin lung a va awi lo tak em!

    Inlungrual ţhin hnam kha kohhran vangin kan inhlat tial tial a. Thingtlang khaw tê takah pawh kohhran tehhrep vang hian kan lungrual hlei thei ta lo! Kan kohhran mi a nih loh chuan, kan kohhran pawm dan a nih loh chuan tih hi Pathian thu a ni hrep lo!

    Mizorama kohhran zawng zawng inlungrual tlanna, anmahni ruaitu lam ngaihtuah miah lova Missionary atâna kan pawm tlan Pu Buanga leh Sap Upa te chungchang thuah hian Setana duhdanin kan buai mek hi a zahthlak lam a ni.

    Missionary Day tiin lawm mah ila, kan thinlungah Chanchin Ţha lo thlen ni ni bawk hi Synod lam chuan Chanchin Ţha lo thlen ni a ni lo ve. March ni 15 zawkah Chanchin Ţha a lo thleng e an ti a. Chutah chuan duhtawk mai se a ţha tur!

    Chutia ta lo chuan kohhran dang zawng zawng pawh he ni hi pawm ve turin an han ngen mauh mai a! Lal Isua a tel ve tawh ka va ring lo em! Kan chhui kan chhui tih a nih si chuan Rev Williams-a lo thlen hma fe khan Tlabungah Thangliana hovin Krismas lawmin Pathian thu hi kan hnenah a lo thleng daih tawh tih pawh chhui thlen awm!

    Ni lo, ni lo! Synod hian a dawn tawi a ni! Thudik hailan tumna ni se, Tlabunga chanchin ţha thleng hi lam rik a ni ngei ang. Thangliana kha missionary ni lo mah se, chanchin ţha lo thlen ni buaipui kan nih ngai chuan ani khan krismas-ah meuh chanchin chhia khang a hmanpui Mizo hnenah khan a sawi lul lovang!

    Kohhran anga kan inunauna hi hmelmapa tân chuan hmuh mawh tham a tling a. A lian pahnih han in palai tawn ţan leh thu pawh a tân rimawi a ni hauh lovang. Kohhran hrang 100 dawn awm avanga kan inenhranna hi hnawk ka va tiin Lal Isua hian nâ a va ti dawn tehlul em!

    Lal Isua hmangaihna leh tlawmna nun aţanga Synod-in kohhran dangte a ngenna hi lo piang ni se chuan, “Kohhran lian ber kan ni a. Kohhran dangte nen pawh inlungrual takin chanchin ţha lo thlen kum 100-na pawh kan lawm tawh kha.

    Hawh u,  March ni 15 hi chanchin ţha lo thlen ni a nih angin serh ila. Jan ni 11 pawh hi Pu Buanga leh Sap Upa, kan rama ênna meichher chhitu an nih angin tunhma ang bawk khan i serh ila, kan unau dangte nen lungrual takin Pathian i chawimawi zawk ang u” an tih ngei ka ring.

    Aside | Posted on by | Tagged , | Leave a comment

    Donald Trump : Zam ngailo Mi huaisen by Ricky L.Colney

            Awle INDIA president pawh nilo, US President daih chanchin hi tinge kan ngaihven em em thin ti a in zawt tamtak kan awm fo thin a, a Ho ti pawl lah kan bang hek lo, mahse hriat theuh angin Khawvel ram thil tithei ber chu USA a ni a, chumi ram hruaitu chu Donald Trump a ni. INDIA ram hruaitu pawh ni lo tinge a chanchin chu kan ngaihven em em kan tih chuan US Politics hian khawvel a sawi nghing thei a,US President a zir zelin khawvel thil in thlakthleng pawh hi a danglamin awmzia a nei thin.

    US foreign policy leh an domestic policy te hian nang leh kei thlengin min nghawng ve (Petrol man, sum leh pai hlut na/ leh Sakhua thil thlengin)tih hriat chuan hlate khua ram hruaitu mah nise kanlo ngaihven ve thin ani tih i in hrilhhre thar leh hmasa phawt teh ang u.

           Tunlai hian Donald Trump a chanchin tuihnai lo taka ziak lehkhabu(Fire and Fury) tihchhuah ani a,Aizawl thlengin titi ti tamtu pakhat ani leh der tawh..Ka Post hmasa ( The New Boss :Donald Trump) ah khan Trump a mizia leh thil thleng chanchin engemaw chen chu kan sawi tawh a,tawi thei ang berin a chunga thilthleng dang i han sawi zawm leh dawn teh ang.
            1). JERUSALEM Boruak : Donald Trump a chuan a vawikhat nan khawvel ram dang tih ngam ve loh tiin Jerusalem chu Israel khawpui ah a puang tih kan hre tawh a,chumi chuang khawvel ram hrang hrang ah nasa takin nghawng a nei a nih kha..tichuan UN in America thil tih chu demna VOTE a la a, chuta America thiltih dem tu ram te chu Donald Trump a chuan a theihnghilh ngai tawh dawnlo a, a chhinchhiah vek dawn tih pawh a sawi a,a sawi ang reng chuan a thiltih dodal tu, a sum ringa nung ho, US in pawisa tam taktak a a tanpui thin te chu Donald Trump a chuan a hrek tan ta a, a hmasa berin UN hnen a tanpuina a pek thin chu $285 millions chuangin a chhawk tlem ta nghal a, a dang pawh la tih tlem zel a tum ni a hriat a ni. UN pawh an mangang khawp mai..(sawi zau lo mai ang) tichuan UN Assembly a US dodal tu langsar tak pakhat Pakistan pawh chu na takin Trump a chuan a kheng zui a. Terrorists te tanpui tu ah puhin US a pui thalo a ti a, Pakistan hnen a tanpuina an pek thin pawh tih tawp emaw tih tlem a ni ang a ti a, $255 Millions an pek leh tur pawh tunah hian withold a nih tur thu an puang tawh nghe nghe. Donald Trump a hi pa Rorum tak mai, tha chu tha, thalo chu thalo ti bur mai chi, engmah sawi hreh emaw sawi ngamloh nei lo a ni a,Engtin zel nge UN lama amah dodal tu ram te hi a tih chhoh zel ang tih chu rinthu bakin kan la hrelo na chungin ama lehkhabu ziah ah ngei a sawi ah chuan Phuba la let ziah thin mi a nih avangin a pal zam mai chu a rinawm loh hle a ni.

           2). Donald Trump a hnuai ah AMERICA mipui leh sumdawnna leh economy in nasa takin hma a sawn.
    Donald Trump a thlantlin anih hma khan Democrats leh Mi lar Celebrities tamtak bakah Economist te pawhin Trump a thlantlin anih chuan US chu a tlu chhe vek dawn, US Economy chu a tlu chhe vek ang tiin an lo hrilh lawk chamchi a,tichuan Trump a chu President ah thlantlin a ni zui ta mai bawk si a, mahse anlo hrilh lawk ang chuan engthil mah a thleng ta reng reng lo. Donald Trump a thlantlin anih atang khan America Stock Market/ economy chu a zuan in a zuang nghal awrh awrh mai ti ila kan sawi uar miahlo ang.Kum khat chhung President hna a chelh chhung hian thla tin in DOW/Economy chu Record break zel in a sang tual tual a,Tun hnai mai khan US History a la thleng ngailo Record a break ta nge nge ani.

    Thlakhat chhung ringawt pawhin a ram mite tan Hnathar a sing chuang fe te a siam sak mawlh mawlh reng a,a rorelna avang hlawkna an hmuh tawh tehi a Value chuan $6 trillion chuang ani tawh ani.

    Kan hriatthiam theih dan tur chuan heti zawng hian i han sawi teh ang, Barak Hussein Obama President term kum tawp ber ah khan US chuan Manufacturing Jobs(hna) 17,000 chuang an hloh a, Donald Trump a President term khat na ah erawh chutiang hna chu 171,000 chuang a rawn siam thar hman der tawh ani.Tun thleng a Donald TRUMP an a ram mi te tan hnathar a siam zat chu 2.7 Million chuang ani tawh a, Hna neilo (Unemployment rate) pawh kum 17 chhung a a hniam ber tum a rawn nichho nghal a, Unemployment chu 4.7% ah a tla hniam a ni. Obama khan a term tir ah khan US leiba kha $200 Billions chuang a siam kai hman a, leiba te chu rulh a hnekin a pung chho char char a, Donald Trump a rawn President hnu thla hmasa berah erawh chuan US National Debt(leiba) chu $12 Billions a tlathla hman a ni. Hetiang zawng zawng hi Zoram mi tam zawk hian kan hriat pui veloh chhan chu MEDIA kan lo hmuh leh chhiar phak ho a bik takin CNN/BBC/TIMES/Daily Mail etc..etc te hian Donald Trump a thiltha tih reng reng engmah an tarlan duh loh vang a ni.

           3). Donald Trump a rilru a kimlo maw?!
    Liberal ho leh MEDIA hovin mipui te hnen ah min fah an tum ber pakhat chu Donald Trump a rilru a kimlo tih te hi a ni a, a rorel dan chu a Presidential lo an ti a, a thiltih a piang an sel a,mahse a thiltih leh rorel dan te chuan rahtha a chhuah zel bawk si..
    America ram chu Obama hnuai ah khan Thiangzau ram ah a chang hman a tih theih a, Kanja(marijuana) te chu an thlah zalen a, free takin zawrh chhuah leh lei an phal chho zel a, a bik takin Liberal Democrats ho sorkar na State ah a ni tlangpui bawk a, tin Kristianity chuan beih a tawk nasa hle bawk a,Trump a chuan Sakhaw dang bia ho mitmei veng lek lovin Kristian Sakhua chu a rawn dah lian nghal a. Kohhran hruaitute chu a inleng thang ber ber te an ni a,  Hmun pawimawh ah tawngtai na hman leh Pathian thu sawi chu a uar hle bawk.

    Hetiang te avang hlei hlei hian Liberal ho huat a hlawh nasa a,Tun thlengin ni khat pawh awl lovin Donald Trump a chu an bei reng mai anih hi.China leh North Korea techu Obama hun lai khan US hian a hlau emaw tih mai turin an chungah engmah Action chu sawiloh, a dem zawng pawn thu an sawitha ngam lo anih kha..chuvang chuan CHINA leh North Korea te chu an pawrh zual zel a,tun dinhmun hi an thleng ta te pawh ti ila kan sawisual lovang. Mahse DONALD TRUMP a rawn lang ve ta a, ani chuan thu thup mawi lemlo takin a nihna ang takin a rawn deng ta pawp pawp mai a, chu veleh Experts inti ho leh MEDIA zawng zawng te chuan TRUMP a chu Mi a, rilru kimlo, khawvel ram hruaitu te dawr thiamlo an ti nghal a, mahse Donald Trump a chu alo a vaklo aniang tunah chuan CHINA chu a hma ai fe in an thunun tawh a, North Korea chungchang ah pawh CHINA chu a tam zawk a ngawi ta a, US duh danin hma a la ta fo mai anih hi. Tin Donald Trump a chu Ram hruaitu dang an la treat ngai miahloh angin Ropui takin an lo dawngsawng bawk a nih kha.

    North Korea chungchang a hma lakna pawh Mimawl thil tih tiin an sawi thin a,mahse North Korea chuan Donald Trump a TWEET deng khawng tak tak chu insiam that nan an hmang ta hlauh em ni tih turin hun rei tawh tak chhung a tih tawh ngai reng reng loh REMNA lam hawi zawngin hma a rawn la ta thut mai a, South Korea nen Inbiakna tha neih te a duh thu a rawn sawi chhuak ta anih kha. sawi tur tam hle mahse a sei lutuk dawn point dangah kai leh mai ang aw.

           4).Fire and Fury : Donald Trump a, President anih kum khatna chanchin Lehkhabu ni a a ziaktu Michael Wolff an a sawi Fire and Fury chu an zuar chhuak ta a, hralh pawh a kal nghal chur chur hle mai a,a ziaktupa hian a lehkhabu chu Donald Trump a, President atanga paihthlak anihna tur hmanrua anih a rin thu a sawichhuak hial ani.

    He lehkhabu ah hian Trump a chu ziak leh chhiar pawh thiam mumal lo ang leh a nupui nen an inkar pawh thalo ang te, Thil chhe tinrengin a puh a. Tun lai hian CNN, BBC, Reuters etc..hovin chaw tui berah an hmang mek a, a tam thei ang ber an sawi/khel a..a chhung a thu inziak chu thu belhchian a dawl em tih lam reng an ngaihtuah pui ve lo..

    Mahse he lehkhabu hi mi tamzawk chuan Thu belhchian dawllo a ni tih an pawm a, a ziaktu Michael Wolff a hi tun hma pawha thu belhchian dawl lo hmang thin alo ni a,a lehkhabu hralh tam theih na turin thu diklo tak tak hmangin Donald Trump a hi a hmang ni a sawi a ni. A lehkhabu review tu mi lar tak tak te chuan hetiang hian an sawi a,
    ” thil ho te te te pawh a ziak diklo a nih hi” The New York Times..
    ” A ziaktu ber pawh hian a ziah thenkhat te chu a dik em a sawi theilo a nia”-Business Insiders.
    “Too Stupid and malicious for words” National Review..
    “Blithe Ignorance” New York Post.
    “Real factual errors..makes you wonder about the overall content” -Brian Stelter. CNN.

    Awle sawi vek lo mai ila..hetiang atang ringawt pawh hian he LEHKHABU hi a rintlak awm loh zia chu kan hre mai awm e, Chawtak khuk a lo khukpui vak chi chu anilo tihna anih chu..amah Donald Trump a chuan lehkhabu chungchang chu hetiang hian a sawi a, Tunah chuan RUSSIAN Collusion chu thu belhchian dawllo, Dawt vek a ni tih kan hrechiang(proved) ta zel a, Russia nen a thawk dun awm chhun te lah Hillary Clinton i leh FBI te lek anlo ni zawk a, FAKE MEDIA te leh he Dawt phuahchawp Lehkhabu hmang hian tunah a nasa thei ang berin ngaihtuahna an seng leh a, hetia ti ti lo hian Inthlanna/election ah hnehna chan tum zawk rawh se” tiin a tweet a ni.

            Donald Trump a hi a tlin tirh phat atang khan Democrats ho chuan hmanrua hrang hrang hmangin tih tlak an tum a, a hmasa berah chuan “Inthlanna a FAIR lo”, tiin thil tih dikloh a awm an ti a,an han chhui chiang a. Vote te an chhiar tha ta reng a,mahse Donald Trump a chu a fair mai piah lamah a hma aiin Vote a lo hmu tam zawk tih an hmuchhuak leh si a, Chutah a ti diklo ho chu Democrats vek anni tih hriatchhuah ani leh zel bawk a, Mithi tawh ten Vote an lo thlak nasa hle tih hriat a ni..tichuan RUSSIA in an Pui an ti leh a, an chhui leh a.  Kum khat aia tam dawn an chhui tawh a, RUSSIA nen a lo thawk dun chu TRUMP a nilovin HILLARY i lam bakah FBI te an lo ni tih hriat a ni leh a, chutah HMEICHHIA tamtak rawn dingchhuakin TRUMP a chuan diklo takin alo khawih tawh thin tih ten an rawn puh leh ta a, an chhui chiang a, chutiang hmeichhia te chu Hillary Campaign committee te khan Donald Trump a puh mualpho turin sum an lo pe tih hriatchhuah a ni leh tawh a ni. Donald TRUMP a chu chawl lovin a hmelma ten beihna tur an zawng reng a,a thiltha tih pakhat mah an puanzar sak duhlo a,a HMELMA te chu khawvel a thiltithei leh milian ber ber te an ni bawk si a chuvang chuan Donald Trump a hian PATHIAN kaihhruaina leh Venna a mamawh tak zet a ni e tiin duhtawk hrih mai ang aw.

    Aside | Posted on by | Tagged , , | Leave a comment

    PAWNGSUAL CHUNGCHANGAH- Indian Evidence Act 1872 tih danglam zinga pawimawh zualte:

    1) Pawngsual thubuaiah emaw, hmeichhe zahawmna tibawrhbang zawnga kutthawhna hrang hrangah te hian finfiahna lak laiin tawhsualtawktu nunhlui, mipat hmeichhiatna kawnga humsual a lo dai tawh ang chite reng reng chu tanhmun titha thei tur atana hman a remchang lo (Insertion of Section 53A).

    2)Section 376, Sub-Section (2) hnuaia pawngsualna chi hrang hrang sawm leh paliah te khan mipat hmeichhiatna (sexual intercourse) an hmang ngei a ni tih finfiah a nih tawh hnuin chu mipat hmeichhiat hman duhna chu hmeichhe ‘remtihna’a ni nge ni lo tih finfiah a ngai a nih chuan; hmeichhiain Court hmaah, “Ka remtihna (consent) a ni lo,” tia a sawi chuan chu chu innghah nan Court chuan a hmang tur a ni. (Substitution of Section 114 A).

    3) Pawngsual thubuai hi ngaihtuah a nih laiin, a bikin cross-examination (Cross-examination chu ukilin a khingpuite thuhretu thu a zawhfiah hi a ni) ah hian pawngsual tawktu nungchang mawi lohna lai hailang thei tur te, hun Kal tawha mipat hmeichhiatna lama a dai hriat tawh ang chi hawi zawng hian zawhna zawh loh tur a ni (Amendment of Section 146 of IE.ACT).

    HMEICHHE DUH LO CHUNG (Against her will).
    Comments….Heta ‘against her will’ tih hi hmeichhiain a hnial chung leh duh lo chung (resistance and opposition) a mipat hmeichhiatna hmanpui tihna a ni… -(State of UP Vs Chhoteylal decided on 14 January, 2011 in Criminal Appeal No. 769 of 2006).

    A REM TIHNA TEL LO(Without her consent). Comments…..Heta consent tih tawngkamin a sawi awmzia chu mahni chhia leh tha hriatna fim tak hmanga remtihna a ni. Nawr luihna te, vau behna te, bumnate leh thu dik hriat tawk loh vanga remtihna te hi he changing consent a tih hi chu a ni lo (Satpal Singh vs State of Haryana decided on 28 July, 2010 in Criminal Appeal No. 763 of 2008,).

    Duhthlanna thiang tak (voluntary participation) hi consent tih awmzia chu a ni… -(State of HP Vs Mange Ram AIR 2000 SC 2798)

    Author: Luaia Hrahsel

    Aside | Posted on by | Tagged , , | Leave a comment

    TIGER LONGI BRAND AMBASSADOR ATAN MISS INDIA MIZORAM, RODY VANLALHRIATPUII

    Tiger Longi Industry chuan an Brand Ambassador atan Miss India Mizoram, Rody H. Vanlalhriatpui chu inremna an siampui a, Rody hian ambassador ni lai Kasauti-a Prena-i lema chang, Shweta Tiwari chu a thlak dawn a ni.

    Longi Industry ‘Bikaner’ hi Longi Chilli Powder siamchhuaktu an ni a, an brand name hi ‘Tiger’ a ni a, khawvela chilli powdersiam chhuaktu lian ber pawl niin, Rajasthan-ah hmunpui an nei mek a ni.

    Bikaner hi Rajasthan-a spices company lian ber a ni mek a, Bhujia company lian heng – Bikaji, Bikano, Haldiram leh BC Bhujia te spice sypply-tu hi an ni.Heng bhujia-ahte hian Longi product chilli powder te hi hmanvek niin, an hmarchate hi Mizoram aṭanga lakluh Mizo Hmarchate (Bird Eye Chilli) kan tihte hi ani deuh ber.

    Tiger Longi hian an kum 50-na an lawm mek a, ram hrang hrang aṭangin Namkeen factory lian neitute an fuankhawm a, hemi denchhen hian Rody-i pawh hi Rajasthan-ah hian a cham mek a, ni 10 chhung vel zet chu hmun hrang hrang fang kualin hun a hmang dawn a ni.

    Tiger Longi Industry hian an brand ambassador tur hian Rody-i hi an sawm a, Mizo zinga Company leh Industry lianten ambassador atana an sawm hial kan awm ta hi a lawmawm hle a ni.

    Author : Kiddy Vanchhawng

    Aside | Posted on by | Tagged , , | Leave a comment