Mizoram Rural Development Department hnathawh that avangin chawimawina a dawng

• Self help group din tawh zat.
• IWMP hnuaia prpject awm zat.
• Rural housing hnuaia inchung tur lei tur zat.
• IAY/PMAY-G hnuaia in sak zat.

Mizoram Rural Development Department chuan thingtlang hmasawnna atana hnathawh that avangin sorkar laipui chawimawina a dawng.

Hemi chungchang hi nimin khan chanchinbumite hrilhin Rural Development Minister Pu R. Lalzirliana chuan Centrally Sponsored Scheme hnuaia IAY/PMAY-G a hna Mizoram-in a thawh that avangin Gold Award leh SPMRM ah te a thawh that avangin chawimawina a dawng tih a sawi a. Chawimawina an dawn theihna chhan chu Department thawktute tan hona leh thawhhona that vang a ni a ti a, tehfung hrang hrang enin state lian zawkte lehthal-a hetiang lawmman a dawng thei chu lawmawm a tih thu a sawi a ni. IAY/PMAY-G hi mirethei insak tanpuina a ni a ti a, he ruahmanna hnuaiah hian kum 2015-2016 chhungin in 870 sak a ni a, kum 2016-2017 chhungin in 1,796 sak a ni a.

He ruahmanna bika Mizoram in chawimawina a dawn chhan chu sum hman that vang leh hnathawh chak vang ani a ti a, SPMRM chu hmasawnna hna thawh tur, sum indaihlohna phuhrukna atan hman thin a ni a. He ruahmanna-ah hian Mizoram chu India ram state zinga hmang tha ber dawttu a ni.

RD Department hmalakna dang sawiin Minister R.Lalzirliana chuan Mizoram Rural Livelihood Mission kaltlangin district 6 ah hma lak mek a ni a, Self Help Group 2,000 din a ni tawh a. IWMP hnuaiah project 73 kalpui mekin khua 249 a huam a.

Ramri-a awmte pualin Border Area Development Programme hnuaia Block 16 ah nikum chhungin cheng nuai 4600 hmuh niin, kumin ah cheng nuai 5100 hmangin hna thawh leh tum a ni tih a sawi a.

Thingtlanga insakna tur Rural Housing Scheme hnuaiah kumin hian cheng nuai 470 hmangin mirethei te inchung tur rangva lei leh an tum niin a sawi bawk a.

Kum 2017-2018 ah hian Ni 100 inhlawh-ah ni 52 aia tam inhlawhna siam beisei a nih thu a sawi bawk.

Advertisements
Aside | Posted on by | Tagged , , , | Leave a comment

Sum Chheprelhtu te lakah na taka action lak tum

Pawisa tihthih hnua company chhui tawh zat.
• India rama nuai 10 aia tam lalut zat.

Prime Minister Narendra Modi chuan firm thenkhat sum chhehrel thupbo a, ram tana a pawizia ngaihtuah miahloa lo puite chu an chunga na taka sawrkarin kut a thlak tur thua sawi.

Nimina New Delhi-a Institute of Chartered Accountants of India din cham lawmnaah he thu hi sawiin Pu Modi chuan pawisa tih thih a nih hnuah company nuai 3 chuang chu chhui an ni tawh a, Registrar of Companies-in company nuai 1 aia tam an registration a tihtawp sak tawh bawk a ni a ti a. Hei bakah sum che vel khawih thin Shell company thahnem tak chhui chhiah an ni tawh thu leh an chunga dananga hma lak mek a nih thu a sawi bawk.

PM chuan Swiss bank-a danlova sum chhek ru thin te tan India leh Switzerland ten automatic tax information exchange regime an hman hunah a harsat tawh tur thu a sawi.

India ram ang ram lian taka kum khata cheng nuai 10 aia tam thawkchhuak mi nuai 32 chauh an awm chu thilmak tak a nih thu a sawi bawk.

PM chuan CA-te chu India eibar zawnnain hma a sawnna kawngah hmahruaitu ni turin a sawm a. Anmahni dawrtuten rinawm taka chhiah an pek theih nana fuih thin turin a chah bawk.

Aside | Posted on by | Tagged , , | Leave a comment

WBO Welterweight Champion Jeff Horn; Jeff defeat Pacman

Tukin, Pathianni tuk khan Suncorp Stadium, Brisbane, Australia-ah boxing khawvela hming langsar ber te zing a mi, Manny Pacquiao, kum 38 a upa lehAustralia Tualchhung tlangval Champion, Jeff Horn kum 29 mi chu an inhnek a, khawvel rinloh takin Jeff Horn hian Pac Man hi Unanimous Decision in a hneh a, WBO Walterweight Kawnghren chhuhsakin WBO Walterweight Champion thar a ni ta.

Boxing ngainatu te leh mipui mimir hrim hrim ngaihdanah Horn hi a chak ring an awm meuh lo a, inhnek tawp a judge te thutlukna pawh hian infiamna hrang hranga milarte sawisel a hlawh nasa hle.

Inhnek tan anih atangin Pac Man hian round tinah a hnek tam zawk in a lang a, round 2-ah Pac Man hian a kut veilamin Horn a mitko dinglamah kak hlawk khawp in a hnek a, inhnek chhunzawm zel a ni a, round 6-na ah tihpalh thilin Horn hian Pacman a beng chungah a tauh kak a, a thi duh hle a. Round 9-na-ah hian Pacquiao hian a khingpui hi a knock out lo chauh a, refree pawhin Horn hi warning in, “I dawng tawk fu tawh a ni, tun round ah hian engemaw tal min hmuhtir loh chuan inhnek hi ka titawp dawn e” a ti hial a, a inhnek chhunzawm thei tawh lo mai tura ngaih a nih laiin a rawn thawk chhuak leh hram a, Pac Man lu hi a lehlam lehlam, an intauhnaah a thi duh hle a, hei hian a inhnek tlemin a tibuai ve deuh niin alang a, round tawp lamah hian kum lama naupang zawk, Horn hi a rawn chetha ve deuh. Inhnek a zo a judge te thutlukna-ah Horn hi117-111 in a chak ta zawk a ni.

Inhnek zawh a judge te thutlukna puan anih rual hian khawvela infiam tam tak leh mi hrang hrangin social media leh site hrang hrangah an lungawiloh thu leh judge te an dem thu an tarlang nghal sup sup a ni.

Boxing expert, Teddy Atlas chuan thinrim zetin Horn chu a beih nasat em avangin judge ten an chak tir mai a ni a ti a, Judge in Horn a ban a phar sak chiah khan, “An chak tir a ni, he tualchhung naupang hian a beih nasat em avangin anchaktir a ni,” tiin a auchhuak hial a, “Dan dik tak ang a an inhnek (lands leh clear punch) en chuan Pacquiao hi hnehtu a ni,” a ti a, hei duhtawk mai lovin inhnek zawh hian Horn hi lawmpuina thu hlan pah in, “Ka lawmpui a che, infiammi ropui tak i ni. Ka ngaihdan chuan i chaklo zawk a, mahse i bei nasa khawp mai. Champion rilru i pu tih chu a chiang e,” a ti zui hram.

ESPN reporter T.J. Quinn pawh a ang nasa a, Horn chu mahni tualzawla inhnek anih vang maia chakah a ngaih thua sawi a, “Engti kawng zawng mahin Horn hian a hneh lo hrim hrim,” tiin, Tweeter lamah, “A 117-111 card? Ridiculous. This is a hometown hit job. Manny looked old, but mostly in control.” tiin a thailang zui bawk.

Sports columnist hmimgthang, Skip Bayless pawhin inkhel result chu Brisbane a inhnek an nih vang mai em ni ta a ti vebawk.FOX Sports reporter Dieter Kurtenbach chuan thu tam sawilovin he inhnek hi “Rigged” a ni a ti a; Green Bay Packers quarterback Aaron Rodgers chuan boxing infiamna hi”joke” a ni e a ti.

ESPN commentator, Stephen A. Smith chuan, “This is a horrible decision! Horrible!” a ti ve thlawt bawk.Hetihlai hian Pacquiao chuan an inhnekzawh hnu lawka zawhna chhangin, judge te thutlukna chu a pawm thu sawiin, “Kha kha judge te thutlukna a ni a, zahawm ka ti khawp mai,” a ti a, nakum lamah hian inhnek that leh a tum em ti a zawhna chu, “Tehreng mai, harsatna a awm lo,” tiin a chhang.

Horn hian kumin August thla a UFC lightweight champion, Conor McGregor bei tura inbuatsaih mek, boxing khawvela Vawk lal len, kum 40 mi, Floyd Mayweather chu a hming lamin — if he wanted “the walking stick or gloves, come have a real fight” tiin a cho zui.
Kiddy Vanchhawng

°°°°°°°°°°°°°°°°°°

Pacquiao (59-7-2, 38 KOs) chuan Jeff Horn (17-0-1, 11 KOs) chu sawisel kai takin hneh lovin a WBO welterweight title chan mah se an result chu boxing a thilthleng thin a nih avangin judge te thutlukna hi ka zah (respect) a, ka chakloh hi ka pawm a ti. Tin, an contract clause a rematch theihna a awm chu tihhlawhtlin a duh thu a sawilang nghal.

Horn hian PACMAN hi 117-111, 115-113 and 115-113 in a hneh.

Mafela Ralte
°°°°°°°°°°°°°°°°°°°°°°°

Aside | Posted on by | Tagged , , , | Leave a comment

SELE IN A THUNUN BAWNG 20 NEITU PU LALCHHEUVAN COMPENSATE A DIL

Lungzarhtum-Tlangpui (Lawngtlai District) a ramsial/sele (Bos gaurus), March 13, 2017 atanga Bawngrual zinga khawsa chu tun thlengin Bawng 20 vel thununin Bawngrualzingah ala awm mek a, hetihlai hian Environment & Forest Dept- in lakchhuah tuma hmalakna an kalpui chu an thulh ni a thudawn a ni a.

Chhimtuipui Wildlife Division-a Dy Conservator of Forests PC Lalchhandama hnen atanga thudawn danin, March 13, 2017 atanga tun thlenga Bawngrual zinga la khawsa ramsial hi Lungzarhtum leh Tlangpui khua ah te ualau takin a la khawsa zui zel a, Scooter khalh lai mi pakhat a beih leh Lawngtlai Thunder Club member a phin bak chu mihring tihnat a nei leh tawh lo ni a hriat a ni.

Thudawnna Chhimtuipui Wildlife Division-a Deputy Conservator of Forests chuan Lai Autonomous District Council (LADC) in ramsial awmna bul hnaiah hian warning signboard pathum an siam tih sawiin, mipuite hnenah tina lo turte, tha taka humhalh tur te bakah, kawngpui a motor tlan a lo tikhawtlai a nih pawha dawhthei taka nghak thin turin ngenna an siam thin thu a sawi a, hetihlai hian bawngvulh zinga ramsial awm chu lakchhuah tumin hmalakna kalpui ni mahse tun dinhmunah chuan he hmalakna hi thulh a ni rih niin a sawi.

“Ramsial hi hmundangah la chhuak mah ila, khawimaw lai hmun a dah tho a ngai a, tun dinhmun ah mihring tan a hnawksak loh avangin sawnchhuah tuma hmalakna a awm tawh rih lo,” tiin thudawnna Chhimtuipui Wildlife Division a Dy Conservator of Forest chuan a ti.

Hetihlai hian he ramsial in a thunun Bawngrual neitu Pu Lalcheuva’n Forest department a compensation a dil chu a phu ang tawk pek a nih theihna turin department chuan hmalakna a kalpui mek ni a hriat a ni.

Ramsialin a awmchilh bawng rual vulhtu Pu Lalcheua chuan March 13, 2017 atanga ramsial a awm atangin bawnghnute a la sawr thei lova, bawnghnute sawr theih bawngpui pali a neih mek te chu sawr theih an nih tak loh avang leh a bawng rualte chu a thunun theih loh avangin Environment & Forest Dept-ah compensation alo dil tawh a ni.

Bawng neitu Pu Lalcheuva hian bawngpui 9 vulhin, heng zinga 6 te chu hnute sawr lai mek an ni a, heng a bawngpui te atang hian ni khat ah Rs 1,000 atanga Rs 1,500 man vel a hmuchhuak thin ni a hriat a ni.

Thudawnna Chhimtuipui Wildlife Division-a DCF chuan ramsial hian tun dinhmunah Bawng rual 20 vel thunun mek tih sawiin, “Heng Bawng rual te hi a changin ram hnuai lamah a riahpui a, khawchhung a riahpui chang te pawh a nei a, a bikin Bawngpui te chu Bawng dang te lakah a hauh na hle,” a ti.

Lunglei Chanchin Thar

Author :    

Aside | Posted on by | Tagged , | Leave a comment

HUI “SIHPUI” HMALAK VA TUL EM

• Huisih ram a himlo.
• Vahui tlan thin Sih chu.

Huisih hi Kolasib dist.saipum ram chhung tuirial bul Neepco Road atanga km 2. Huisih Lui kamah a awm a. He SIH hi kum tin vahui sing rual in an tlan thin. Tin Zazuk, Sanghal, Sakhi, Saza leh sa dang dangin an tlan chur2 thin a.

Vahui hi mimal tuten emaw a sih hi pala hungin a chung an luhna tur ti awngin an man thin a, Forest dept.leh Saipum YMA te hian humhalhin a sih hi thirlen hialin an lo hung tawh a ni.

Ka sawi tum tak zawk chu he SIH hi tun thlengin Saipum YMA te hian an humhalh a, hah pawh an hah na ngiang mai.Thirlena hung erawh ramsa dang a tlan ve duh te kan hrek a ni ringawt mai, tin, Saipum YMA ten theih tawp a, an humhalh reng lai hian mimal ram periodic patta nei an awmni a sawi awm a, theih tawp a an humhalh hi tu ten emaw ka ram ti a an vah duai duai mai chuan a va ui awm dawn em..! Sangha dil in emaw lo khuap se va pawi dawn em.

He Sihpui hi kumtin june to August thla hian kan ram vahui chauh ni lo emaw tih tur Vahui sing rualin an tlan hi a chereu ang tih a va hlauhawm ve, a concern dept leh sorkarwildlife lam ten hma la in a ram hi vantlang leh sorkar kuta dah a, a kilometer sq.a humhalh a tul a, ram dang mi te tlawh thei a chei a va tha em!

Mizoramah he tiang SIHPUI hi a danga tam ka ring lo, Tuirial TrHEP Neepco bul mai kawngpui a tanga hla lo te hi tha tak cheibawl a, thuneih a pumhlum nena a ram humhal hi a br.YMA te duhdan pawh a ni.

Tunah hian a ram hi chereu mai thei a sawi a awm a vanginthunei tu sang zawk ten uksak pui a, humhalh nana project neihpui hi YMA te chuan an duh ngawih2 a ni…

(source:Lalthlamuanga, vice President YMA. Saipum Br.)

Aside | Posted on by | Tagged , | Leave a comment

VICTOR GODDARD-A THIL HMUH MAK

• Hun lo awm tura zinna.
• Thil thleng tur hmuhlawkna chu.
Sap ho nge nge thil mak tak tak tawn leh hriat hi anlo ngah bik e.hnampui leh hnam upa nge nge.

Pilot pakhat victor Goddard-a thil tawn tlem kan thai lang ve nge…a mak ve em a ni..chhiar peih in awm takin kan post ve thawr nge..a sei vak lo nang a.

1934 khan British Royal Air Force Pilot Victor Gaddard-a chuan kawng a bova. Scotland chunga a thlawh laiin thlipuiin a rawn nang ta thut mai a,a thlawh zêlna tûr chin a hre ta lova. Chulai bulah chuan Drem thlawhna tumhmun hlui kha zawn hmuh beiseiin, chhûm zîng hnuai lamah chuan a bir thla ta a.

A rin ang ngeiin Drem tumhmun hlui chu a zu hmu fuh hlauh mai a, chuta tang chuan a thlawh zêlna lam tûr kawng pawh a hre chhuak thei dawn ta a ni. Chu tumhmun hlui chunga hniam têa a han hrût kual vêl lai chuan thil dangdai deuh mai a lo thleng ta. Chhûm let but but hnuaiah si khan niin a kah ên sûr ang mai hian chulai vêl chu a lo êng uarh mai a. Drem chu hmun hlui, rauhsan mai ni lovin, chei hnûm tha tak mai hi a ni a. Tunhmuna hnathawktute pawh a dumpawl suit a inthuamin thlawhtheihna rawng eng an lo hmang hlawm a. Mak angreng takin hniam têa hrut e ti lo chuan chuta hnathawk tumah an rawn dâk chho hauh lo. Chu chu 1934 kum kha a ni a. Khatih lai khan a takah chuan Drem tumhmun kha rauhsan hmun hlui chhe tak a ni.

Goddarda’n a tlawh hnu kum li, 1938 kuma indopui pahnihna a lo hnaih tâkah khan Drem tumhmun hlui pawh chu thlawhna sipaiten trainingna hmun (flying school) atan an hawng thar leh ta chauh va, chutah chuan British training thlawhna chu silver rawng ni tawh lovin, rawng eng (yellow) ah an thlâk chauh a ni. Dik takin Victor Goddard-a khan chhumpui zîng mup atanga a lo thlawh chhuah khan,a hnu kum li lo la awm tûr (future) ah a rawn thlawk lût zâwk a lo ni.

Author : Mp da Geret    

Aside | Posted on by | Tagged , , , | Leave a comment

KAN INLU LEM LEM (Pan lai nun)

Zahmawh-ah lo ngai lo u la. Naupan laia thil thleng ve pakhat ka rawn sawi ve mai dawn a ni a, a zahmawh viau hran lo. A reng rengah zahmawh kan tih tamtak hi chu a dawngsawngtu leh ngaithlatu, chhiartute rilru put hmang leh dawnsawn danah hian a innghat viau mai a. Chutihrualin a sawitu paw’n a sawi dan kawng; mi rilru a dik lo zawnga tibuai thei emaw, mi ngaihtuahna hruaikawi thei zawnga a sawi chiah hian a zahmawh ta țhin.
.
Mi tih loh dan pawh a ni chuang lo bawk a, naupan lai nun leh pan loh deuh lai nun te pawh a ni ang, i’n thaikawi ve teh ang.
.
Hmanni chu țhiante nupa kan pahin an fanu chu ka chhawnchhaih vel mai mai a. Ka thiam ang tawkin nau lawm dan chi hrang hrang ka hriat hmang chuan ka lawm vel a. Hmui tizum kawh deuh pût chung leh lu thin pah chuan, “A koh koh koh … A tûih tûih tûih … Kurukûih kûih kûih ….” tih pah chuan, “Nakinah chuan Ventluangi kha a țhiante khan an la lu lem lem țhin ang a” ka ti kher a, a nu nui lai pawh a tum hmak mai. Duhtawk ta mai lo chuan, “Mim, in naupan laiin in inlu lem ve țhin em ?” tiin ka zawt a. Vin fé-a min chhan pah chuan, “Lu lem ngai lo. In inlu lem țhin em ni ?” tiin min zawt let a. Rang zet hian, “Lu lem lem țhin e. Inpa hi kan lu lem nasa țhin alawm, kan luk nasat ber pawl a ni hial ang” ka ti a, anpa chu a melh zawk a, a nuih a za miah lo. “A pa hi a chhun ang a, a Sikul bang hian vawiinah kan inlu lem hi a rawn ti haw nitin mai ang a(h)” ka tih hnu chuan min chhuahsan ta daih a.
.
Țhianpa Dika kha kan lu lem nasa țhin reng a. Amah kha a ngo reuhin a tituai deuh pur mai si a, a luck țhinin luk lem a hlawh viau mai. Ani chang ni lovin tlema tituai țha deuh kha hmeichhe lemah chantirin kan lu lem nasa țhin khawp. Pakhat mai duhtawk lo khan pathum pali te khan kan han bawh rawn mai țhin a, an tan khan a lo va’n hrehawm țhin dawn tak.
.
Thingtlang khaw pakhat Sikul nei lo, an VCP hnenah, “Hei, Sikul in nei bawk si lo a, in naupangte hian eng nge an tih țhin ?” tiin an zawt a. VCP chuan, “E le … an inlu lem suau suau mai” a ti e tia fiamthua an sawi ang deuh tak tak hian Sikul te chu kal ve bawk mah ila chawlhlawk lai leh Sikul ban; Sikul chawlh ni apianga kan han inkawm khawma kan inkhualtelem țhin kha chu, a takin Serh te kha tilang em lo mah ila inluk lem kha a serh zinga a mei kha a ni ve chiang mai. Mipa chauh pawh kan ni bik lo, hmeichhia kan kawm țhinte pawh kha kan lu lem ve țhin tho. Mahse, sawi vek lo mai ang, an zak palh ang.
.
Țumkhat chu Sikul tlangah țhianpa Dika leh Mp-a nen kan pathumin kan inkhualtelem a. Dika kha ka nupui lemah a țang a, ka lu lem nasa țhin viau mai. Mahse, thil buaithlak leh uirena tenawm a thleng ta tlat. Ka feh hlan chuan Mp-a chuan ka nupui Dika chu a lo lu lem ve ziah mai a, patling thinrim a sosang țhin ngei mai. Chhungkhatpa ka ni a, ei bel ber niin hna thawka ka chhuah a țul țhin si. Chutih lai lahin ka awm loh remchanga hmangin țhenawmpa Mpa chuan ka nupui Dika a lo lu lem fo bawk si, rilru a va na duh țhin tak. Tlai khat chu ni dang aia hmain ka feh ka haw a. In ka thlena ka thil hmuh chu a mi den a na kher mai. Mpa ngei chuan Dika chu a lo lu lem nasa mai hi a lo ni a. Patling thinrim insum hman tawh lo chuan pawi leh pawi lo pawh ngaihtuah chang tawh lovin Mpa thil chu ka chempui chuan ka chhawk sak ta hmawk mai a, na a ti viau. Mahse, a tuk leh maiah chuan Mpa thil chu lo dam țha leh var tawhin a hma ai maha sei leh lian chu a lo țo leh der tawh hi a lo ni a. Dan ngaitein ka feh hlan bawk chuan an lo inlu lem leh ta tlauh tlauh a. Chutiang reng reng chuan chumi tlai hun chu kan hmang zo ve țhak chu a ni a. Kha kan inkhualtelem thawnthu kha a film-in siam ta se; hralh a kal viau ang nge kal lem lovang tih hi ngaihtuah thiam a har ka ti khawp mai.
.
Țumkhat pawh ka u te țhianho hian High School tualzawlah ball an pet a. Ka Cousin, T.te-a nen chuan kan tel ve phak loh avangin tualzawl chhak phul rem laiah chuan chhawl kan phah a, kan lo inlu lem ngat ngat a. Kan thlang maia ball petho țang em ema an inchuha an au tuar(h) tuar(h) lai chuan keini pawh an chhak maiah chuan kan lo inlu lem țe țhawt țhawt ve bawk. A chung zawka țan inchuh chuan kan inlehthal țiang țiang mai a, a chunglama țan ve leh theihtawpa rangin kan han indep zawt zawt a, chutiang reng reng chuan thlan tla phungin kan inlu lem ta anih kha. Ka inluk lem tawh zawng zawngah ka la hah ber țum a ni hial ang.
.
Dendrite an hnim rui țhin tih kha kan hre ve a. Kan u pakhat (A hming ka sawi lo mai ang. Tunah chuan Aizawla College pakhatah a thawk nghe nghe 😀 ) leh ka nau nen Colgate toothpaste hnim ruih kan tum ve alawm. Rei tawk fang kan hnim hnu chuan kan ruih vang nge ni tehreng; kan U-a chuan inluk lem lem dan chi hrang hrang chu min zirtir ta a. A lei bih zawng te, a sir hem te, a sakawr chungchuan zawng te leh pawsi chi hrang hrang mai chu min zirtir ta a. Kan unau chuan pawsi chi hrang hrang hmang chuan kan inlu lem ta tlauh tlauh mai a, a hahthlak duh phian mai.
.
Pan lai nun sawi ta sa sâ, thil dangah pakai daih teh ang. Inluk lem ringawt zawng, a tak pawh ni hlei lo, a ho em mai.
.
Zan khat chu ka pu(Ka nu u) te Inah kan riak a. Ka pu fapa Ruattea nen chuan uluk mangkheng hian ngaihtuahna zawng zawng sengin hla kan phuah dun pek a. A tuk Sikul kalna-a țhiante bula intithei taka sak hman ngei tum chuan kan han bei ngial a, theihtawp kan chhuah hnu chuan –
.
“Indona-ah Thangtea-pa ka zam ngai lo” tih chu kan phuah chhuak thei ta hram a, a thluk tur kan duhdan a la inang lo zui. Mi pahnihin uluk taka theihtawp chhuaha phuah atan chuan a tawiin a ho mah mah deuh chu a ni. A reng rengah Thangtea-pa pawh kan ni tawp si lo a le.
.
Ruattea nen bawk hian kan kawmchhakah kan inkhualtelem a. Silai lem kan siam a, kan ramvak țhin a. Sa lah kha kan kap thei dun nasa mai si; Sakhi, Sazuk, Savawm, Sanghal … a changin Sava lam chi kan kap bawk. Kan sa kah chu kan hawn a, kan siam a. Kan ei zoa kan va ramvak leh a, a dang kan va kap leh a … chutiang chuan a ngai hlir chuan a kual ta reng mai a. A tawpah chuan kan ning ta deuh a niang; kan sa chân hmunah chuan ngawi rengin kan țhu a, sa kah zai pawh kan rel tawh lo. Ruattea chu ngawi rengin a tho a, a haw ta daih a. Keipawh ka haw zui ve nghal daih. Sa hmeh reng kha chu a mi ngei a lo na ve bawk a ni.
.
Sikul tlangah tho hian kan inkhualtelem leh pek a. Lalhriata hi Setana lemah a chang a, Thingthiang kungah hian a awm a. Biakhlua Pathian lemah changin Thingpui kungah a awm thung. Keini mihringho chu leiah awmin Setana chuan min tiduhdah țhin khawp mai. Lungte te hian min rawn vawm țhin a, Pathian awmna Thingpui kung lamah kan tlanchhe leh ham ham țhin. Nakinah chuan khawvel a lo tawp ta a; mihringho chu kan thi ta vek a. Tumah hremhmuna kal duh awm hek lo; vanramah kalin Pathian awmna Thingpui kungah chuan kan lawn ta vek a. Setana(Lalhriata) chuan amah chauha Thingthiang kunga awm reng chu nuam a ti bik ta lo a niang, Thingthiang kung ațang chuan a rawn chhuk a, Setana ber chu piangthar vein Thingpui kungah chuan a rawn lawn ve ta daih a. Khawvel awm tirh ata Setana vawikhat piantharna a ni hial awm mang e ka ti țhin.
.
T.te-a nen bawk inbailemchhuan kan rawt pek a. Kan In ami Bel la chhuakin chi te soda tih vel te chu kan keng tel vek bawk. Mahse, inbailemchhuana a bai ber tura kha kan hre si lo. Hnahkhar hnah kan mal țeuh a, kan bai ta hluah a. A hmin tawh awm velah chuan kan bai chu kan ei ta a lawm; hnahkhar hnah chu a zawr lo nasa mai si, a tui a phak bawk si, a kha fuk lehnghal. Mahse, inbailemchhuan a ni miau a, a tui emaw tui lo emaw, ei hrim hrim kha a țul a nimai. A tihnawn chi viau loh khawp mai.
.
Amah nen vek hian veng hmawra Pu Tluanga te in sak laiah riah kan tum leh pek a. Rappuichungsang an relna sirah hian bungrua leh eng ilo dahna tur chhuar(ti mai ang) zau nuam fe hi an rel duai mai a, riahna’n kan it khawp mai. Chawhnu dar hnih bawr vel a ni a, riak tur chuan kan inpu lut dun ta a. Zana chhit tur Bati kan keng a, puanhlap sin tur keng ve vein rilțam huna ei turin saharin chawțhing tlang kan fun bawk. Kan mut hma chuan an sitting room tur; chhuat la phah mumal lohah chuan Lengkhawm hla sain kan lam kual dun ta a. Kan zai tui bawka maimichhing meuh chuan kan lam ta. A ruka meng ru zauh zauh chung chuan inpal theihna tur hnawk te chu kan kân thauh thauh mai a, buai miah lo leh inchhuih bahlah awm miah lovin in rel hnawk nuai(h) karah chuan kan lam kual zak zak reng a. A tawpah chuan Pathian thlarauin min awmpui chiang mai, maimichhing chung paw’n tlu miah lovin kan lam char char thei a nia kan ti a, ropui hi kan ti dun khawp. Diktak chuan kan meng ru ve ve țhin tih kha kan inhre ru kur reng siah. Dawt sawi chu awlsam dun ve mai mai.
.
Duhtawka Thlarau thianghlim hruaina hnuaia kan lam hnu chuan kan mutna turah chuan kan lawn a, kan riak țan ta. Khua lah a la hma nasa mai si a; kan mu țan chauh tih chuan T.te-a chu a ril a țam a, kan chawțhing ken chu a ei zo titih nghal der. Kan mut vang vang hnu pawh chuan khua chu a thim duh lo kher mai a, T.te-a chu a beidawng deuh der tawh. Kei chuan, “Tunah dar hnih vel a ni a, dar ruk velah khua a thim ang a. A rei tawh lo lutuk, dar thum, dar li dar nga chiah a awm tawh” tih pah chuan ka kutzungțang chu ka thliak nghauh nghauh a. T.te-a chuan, “Dar nga chu engtik velah nge a rik ang ?” a ti a. Kei chuan, “Minute sawmhnih velah chuan a ri tawh mai ang” ka ti a. “Minute sawmhnih chu a rei nge a tawi?” tiin min zawt leh a. “Darkar khat vel a niang” tiin ka lo chhang a. Hun; minute, darkar tih vel kha a awmzia la hre ve hek lo le, ngaihțha deuh chuan kan mu leh ta a. Mahse, khua chu a thim theih tak mai loh avang chuan haw leh mai chu kan rawt a. In ka thlen chuan ka nu dar zat ka zawt a, dar thum a lo ri țep tawh hi a lo ni a.
.
High School kan kal ve lai, pawl kua kan nih chhoh vel khan ruihtheihthil han tih ve te kha kan ching chho a. Thawkkhat lai kha Ganja zuk kha kan uar zual. Ganja hian hming hi a ngah viau awm e – Marijuana/Mari, Cannabis/Bis, Weed, Țíp, Ganja… Țip han tih hian at a awl hmel ber ni hian ka hre țhin. Hming hrang hranga koh dan a tam sa nen; a zu țhinho lah khan hming hran kha kan la phuah zui țhin kha a ni a. Kan țhianho pawh chuan hming hran vuahin ‘Lalzawngi’ tiin kan sawi mai țhin. Ni khat chu Sikul ka kal lo a, tlai Sikul banah chuan țhianpa Dika hian ring leuh loh zet hian, chhungte an awm nge awm lo tih leh miin an hria ang nge hre lo ang tih pawh ngaihtuah lem lo chuan, “Lalzawngi tiho kha min man chhuak maithei a nia aw” a rawn ti loh loh mai a. Chhungte’n an hre ve vek si, “Lalzawngi in ti a mi ?” tiin min dawp nghal titih der mai. Ka țawng tu huat thu suh ah, Lalzawngi hi mipangngai pha zan lo hi a ni bawk si, nuam lo duh tak chu a ni.
.
Hmânah ka u te hian kawmthlangnu, Nu Lianchhawni hi a hming hi leh țawng chuan ‘Chhulianpawngi’ an ti a. Zingkara Nu Lianchhawni loleng chu ka nu nen an titi tui lai tak mai hian, “Nu Lianchhawn, i hming hi leh țawng chuan Chhulianpawngi a sin” ka lo ti a, an țawng lai an tawp chaih a, ka nu nen chuan an hrilhai hmel viau.
.
ZU KA BILH VE
.
.
Eden huan ațanga kan Pi leh Pu Adama leh Euvite bawhchhiatna chhawmnung a , thisena țhan hnan tlat mihring fapa kei ve mai pawh hi Thlarau thianghlimin min pawlna karah hian sual lam rau pawh hian a pawl hian mi rawn pawl ve zawt zawt fo țhin. Tisa lam pawha buan chak lo nih sa nak alaiin rinna lamah phei chuan ka derdep em em a, sualah hian ka tlu rawk rawk fo mai.
.
Naupang mai kan la ni a, rei pawh a lo rei ve ta viau. Mahse, Mizoram buai hun chhung nen tehkhin ralah chuan rei em em zawng a la ni bik lo e. Khatih lai khan Pawl thum zirlai ka ni a, sawi tawh angin sual hian min beih nasat em avangin ka phaktawk sual khawih loh ka nei lo a, tihtauh ka hratin chhungte thu awih loh pawh ka hrat hle. Chu ka saltanna sual lak ațanga min chhanchhuaktu tur chu ka au ve lawm lawm țhin a. Mahse, țanpuitu hmel ka hmu mai bik lo. Kawmthlangpa Upa Mânga meuh paw’n min chhan thei lo a ni ngei ang.
.
Naupang harhvang ve tak, sualin a beih nasat em em ka thinlungah chuan sual ropui lutuk nia ka hriat; Ka u leh Uruatfela, tlangval ve pui tawh paw’n a ruk ngata an tih țhin Zu bilh ve chu ka chak ta tlat. Engtin nge an bilh/um a, eng nge an hman țhin tih pawh ka hrechiang fumfe lo. Mahse, sual hi chu a lo sual khawp a, a kawngah hian min kai lui nge nge țhin.
.
Tlai Sikul banah chuan keimah chauhin Inah ka awm a, dan ngaitein sualna nen chuan kan inpawl leh zawt zawt a. Min pawltu sual pawh chuan a vawrtawp a thleng ta; chaw bel ka hawng a, chaw țhing awm zawng zawng chu thlengah ka dah chhuak ta vek a. Zu ka bilh dawn chu a ni ta der mai. Mahse, a dawibur, dawidim a ngai tlat, ka nei bawk si lo. Mahse, sual hi a lo sual khawp ka tih tawh kha, kawng min kawhhmuh ve leh mai țhin.
.
Mi fate paw’n damdawite an ei a, an rui țhin tih chu ka hre ve kiau a. Kan damdawi dahna bawm chu ka hawng a, kawțhalo damdawi thi tawh, hmana ka pu te min pek, awm țeuh mai chu ka la chuak a, ka kheh ta vek a. Chu’ng damdawi mumte chu ka rawt dip a, chawțhingah chuan ka phul a, ka chawhpawlh kual ta vel a. Kawțhalo damdawi chu ka telh hnem bawk a, a tak țhain ruih a awl viau ka ring tlat a, ka phur kher mai. Mi paw’n an ei ruih theih chu Zu atan a hman theih ka beisei tlat.
.
Chutia duhtawka damdawi leh chawțhing ka chawhpawlh hnu chuan ka inpeih ta. Mahse, a umna tur bel emaw, thil dang ka neih loh avang chuan ka u te Stayfree bawm ruak pathum chu ka la a, chutah chuan ka khung a, ka țawn phui thlap a, rappuichungsangah ka dah ta khiau mai le. Tunah chuan a thawh huna ruih chiah ka hmabak ta.
.
Exam zawh zan a ni a, ka cousinte ho nen chuan kan inhawtbuk nasa tawh hle. Khiang kung chu ni ila a buk nasa pawl tak kan ni ang. Ka zu bilh pawh chu tlaiah khan ka hawng tawh a, a nam țha ham ham viau mai a, ka phur tawh hle. Sawr pawh sawr lo chuan bur pahnihah ka chhunglut hmiah a, tui tlem ka leih a, zanah chuan ka pai chhuak ta țat țat a.
.
Kan unauho chuan ka zu chu in ruih a, tlaivar kan tum ruh hlawm hle. Chhungte bulah pawh kan tlaivar dawn tih kan sawi vek. Tichuan le, Nu Sâii te in bul kawr thim laiah chuan kan ding khawm țhap a. A upa ber Dp-a chuan a nau, ka hming anpui Biaktea ve tho chu i naupang ber, in hmasa ber rawh a ti ta a. Ani chuan zu bur chu a lek kang a, a chhin a hawng ta. Chil lem khalh khalh leh thinphu dup dup chung chuan kan lo thlir țhap a. Bur chu a ka-ah chuan a chuktuah a, buh leh tui inpawlh nuaih chu a ka chhungah chuan a chhunglut barh a, a lem ta khulh mai le.
.
Thawklehkhatah a rawn țhen chawt chawt a, “A kha lutuk a kha lutuk” tih pah chuan a luak nghal bawrh bawrh a, a țap nghal pur bawk. Dp-a chuan zu te chu a kha țhin a lawm tih pah chuan bur chu a la a, kan vai chuan kan in ta vek a.
.
Mahni țhuthmun țheuhah chuan kan țhu țhen tlawk tlawk hlawm a, kan luak leh barh barh țhin bawk. Ngawi rengin kan vai țah pur hlawm ta mai. A khak dan kha a kha lutuk em bawk a ni.Tlaivar tum em em kha țap pur chungin ngawi rengin kan haw ta sap sap hlawm a, tuma’n kan rui lo a ni ngei ang le.
.
Engpawhnise; ka zu bilh anga bilh ve hi awm ve tak maw !?
.
Sawi tur a tam a, sawi ngam loh lah ka ngah, duhtawk phawt mai ang.

Author : Biaktea Hillu Ralte    

Aside | Posted on by | Tagged , , , | 2 Comments

HOLOCAUST LEH HOCKER-A: by Kima Sailo

• Juda suattu hming hriatloh chu.

• Tunge Hocker chu.

Chiahpuam leh Awke buaipuitute buaipui tur thil dang hi a rawn awm leh hnai tawh ang em aw tihte rilru sir, kil chep deuha a awm laiin Holocaust lam sawi daih te’ng!

Europe-ah chuan kum 500-1500AD chhung kha Middle Age an ti a, he’ng hunlai hian Isua thih chhana mawhphurhtir an nih angin Judate huatna (antisemitism) a nasa hle a ni. Catholic kohhran siam ţhatna Reformation (1517-1648) leh Lutheranism hunah pawh hei hi a hluar chho zel a, Judate chu mimal bakah a huhoa tihhlum an ni ta fo mai a. Hun a kal zel a, kum zabi 19 a lo nih chuan Volkisch Movement an tih mai, chi bing inngaih ropuina chu German leh Austria-Hungary-ah rawn irh chhuakin chu chuan Aryan (India, Iran leh Europe-a thlah chungnung bik nia inngai) thlah ziding nia inhriatna leh hnam dang, a bikin anmahni ela ertu ber nia an ngaih Judaho huatna chu namen lohin a nasa ta a ni.

Indopui Pakhatna (1914–1918) khan Judaho huatna hi a chhem alh zual sauh a, mipui vantlang chuan kha indonaah khan German an chak lo tih kha an pawm thei lo a ni ber mai. Indo a tawp hnu pawha ţangrual pawlte’n an dangchara an rep zui chhanahte khan politician-te, a bikin Juda sumdawng lian leh ram rorelnaa inrawlh phaho chu an puhmawh ber a, chu lungawi lohna chuan kum 1933 khan Volkisch Movement tuaithar leh turin Hitler-a Nazi a au chhuak ta nge nge a nih kha.

Hitler-a’n Aryan (German) thisen firho ‘hak zauhna’ (lebensraum) tura a hmachhawp lian ber chu Joseph Hell-a ziah dan chuan, “Juda-ho ţingmit” a ni tawp mai a; chu chuan “Shoah” an tih bawk Holocaust, Europe-a Juda mi maktaduai ruk suatna chu a thlen ta a ni. Puitling chauh tihhlum an ni lo a, naupang rilru thianghlim maktaduai khat leh a chanve nunna lak a ni bawk. Holocaust-ah hian Juda mi ni lo, Romani leh Aktion T4 patients an tih mai pianphunga rualbanlote leh thluak lam fel lote, Soviet sipai an mante, homosexual-te, Jehovah’s Witness-te, Slavs leh Poles etc. tam tak suat an ni bawk.

Hetiang hian kum 1941 leh 1945 inkar khan Nazi Schutzstaffel (SS an tih, Protection Squadron) te hmalaknain Judaho suatna chu ţan a ni ta a, German-in a awp chin Europe ram hmun hrang hrangah, “Juda-te chinfelna” programme chu an kalpui ta mup mup mai a ni.

Hitler-a hrohrang a na tual tual a, sawrkar chuan Juda-ho chu society pawnah hnawlin (Nuremberg Laws of 1935) kum 1933 aţang chuan mitângte nghaisakna tur hmun, Concentration Camp an tih chu an buatsaih ţan ta a. 1939-ah indona a chhuak a, Einsatzgruppen an tih mai Specialized Paramilitary Unit-te chuan kum khat lek chhung chuan Juda maktaduai hnih an suat ta nghal mai a. A bulţanna chauh a ni tih lantir nan 1942 kum laihawl aţang chuan Europe hmun hrang hranga Juda mite chu khawmin Concentration Camp-a tihhlum tur chuan Relin an phur khawm ta ruih ruih mai a ni.

Judaho hian an bei let lo a ni loa, ralthuama an khan loh êm avangin an hneh ngang lo a ni mah zawk a. Kum 1943-a Warsaw Ghetto Uprising an tihah phei chuan Juda mi 20,000–30,000 velte chuan an hriam hmuh ang ang khawmin Waffen SS sipaite chu thla khat zet an dangchat a ni.

Nimahsela World War-I phuba lak tuma thi leh thau pawlha inpuahchah German sipai tha chakna chu hneh chi a ni lo a, pitar-putar, nunau leh piangsual chenin Juda mi tawh phawt chu Concentration Camp, ramsa khawsakna ni zawk awm taka hmun hreawm leh rimchhiaah chuan beng khawmin hnathawh nasat leh ei chhiat luat avanga thi hmasate ruang chu ruhro ni zawka mawi a la damate chuan hnuk khawmin an hal mup mup ţhin a; hawina lam apiangah ruang chu a intiang vum el ul ringawt mai a ni. Hnathawk tlaka an ngaih loh tam tak chu ‘Ur Hlumna Pindan’ (Gas Chamber) panin, silai leh talhfiak nen naupang pawisawi lote chu an khalh khawm a, a tahtawla an thlan chhuah hnuah hrawka hnawh chi gas hak hlum turin nau hnute tui pe lai pawh an nawr lut a; chutiang chuan Juda maktaduai eng emaw zat chu an suat ta miah miah mai a ni.

Ţangrual ramte’n thapui an chhuah tak tak hnua German a tlawm (1945) khan Auschwitz-Birkenau Concentration Camp an thenfaina lamah American Intelligence Officer pakhat chuan thlalak 116 vel awmna album, The Hocker Album an tih zui taka chu hnawmhnawk karah chharin US-ah a hawn a, he album neitu hi Nazi SS officer Karl-Friedrich Hocker-a ngeia hriat niin Concentration Camp-a thlalak ţihbaiawm ber berte dah khawmna a ni a, tunah hian US Holocaust Memorial Museum (USHMM), Washington-ah vawn ţhat a la ni. He album hi a kawltu officer hian kum eng emaw ti ral hnuah ama nihna thupsak tura ngenin USHMM-ah hian a pe hnuhnawh chauh a, album phek hmasa bera lang chu Richard Baer, Auschwitz camp-a kum 1944-1945 inkara Commandant leh a Adjutant, Karl Hocker-ate thlalak a ni.

German a tlawm hnu khan “Mihringin a mihringpui vek laka a tih atan chuan a rapthlak tawpkhawk e” tih khawpa che rawva SS officer-te hi theih ang anga chhui chhuakin, rorelsak an nih hnuah an tihlum ta nghauh nghauh reng a; a album aţanga chu’ng mi rawng berte zinga a phusa ber pawl nia rin Hocker-a pawh chu a chanchin kimchang chhui ve niin kum 1939-a 9th SS Infantry Regiment a zawm thute, 1940-a Neuengamme Camp-a Commanding Officer a nih thu leh heta ţang hian 1943-a Majdanek leh 1944-a Auschwitz Concentration Camp-a an sawn leh hnuah Soviet Red Army leh Allies sipaite’n hnehna hla do chhama January 1945-a an rawn phin darh khan document lem siamin a put chhuak ta a ni.

Nimahsela he Album chhar a nih takah hian Concentration Camp-a SS officer pakhat, camera hnungchhawna tiang nena Gas Chamber-a lut tur a thliar lai thlalak chu hmuh a ni ta a. He officer thla hi hnung zawnga lak ni mahse a pianzia chuan Karl Hocker-a a an em avangin, indopui tawp hnua SS Officer-te rorelsakna Frankfurt-a neihah inhnamhnawihna a neih lohzia nasa takin sawi mahse Forensic thiamna hmanga chhui a ni ta a ni.

Thlalakah chuan Hocker-a nia hriat bula Nazi sipai ding chuan khatihlaia hman lar tak rifle Gewehr 41M an tih chu a keng a. Angle hrang hrang aţanga zira, an hriat sa chu Rifle sei zawngte, a boot bun san zawng, tiang ken sei zawng leh thlalak aţanga Rel kawng inkar zau zawng ngaihtuaha a hnai zawka lo lang Officer kar zau zawngte nen lama an chhuidawn bakah hmalam hawia a thlalak nena an han din duntir ngial hnuahte chuan Hocker-a ni ngei chuan hria-in hremna lekkawh ngei pawh an tum khawp mai. Nimahsela amah a ţan tlat avang leh finfiahna tak a awm theih si loh avangin kum 1965 khan Officer dangte a ţawiawm avang tala manin kum 5 chhung tantir a ni ta chauh a, 1970 khan chhuak lehin a pension thlengin Cashier hna a thawk zui ta a ni.

A tan chhung leh a chhuah leh tak hnu thleng pawh hian thuneitute ngaih chu a ţha thei chuang lo a, a chhuina hi kalpui zel tho niin kum 1943 leh 1944 inkar khan Hocker-a hian nunau ur hlumna tur Zyklon B poison gas, kg 3,610 lai mai chu Hamburg-a Tesch & Stabenow aţang a lei nia hriat a ni leh a, finfiahna chiah awm lo mahse kum 1989 khan German Bielefeld district court chuan kum 4 tang turin a hrem leh ta a ni.

Hocker-a hi kum 89 mi niin 2000 kum khan a thi a, a thih thleng hian Juda suatna rapthlak, a bikin gas-a nunau ur hlumnaah chuan inhnamhnawihna a neih loh thuin a ţang tluan a ni. Concentration Camp dam khaw chhuak pakhat erawh chuan SS Officer zingah chuan “Hocker” tia koh ţhin an awm ngei thu a sawi thung.

Aside | Posted on by | Tagged , , , | Leave a comment

TOPCEM LEH MSU IN INREMNA ZIAK

• MSU ten Cement chungchangah an thu an zuk.
• Mizoram Cement rate tur.

29th June, 2017 chhun dar 12 khan TOPCEM Cement company aiawh te leh MSU chuan inremna ziakin Aizawlah Cement bag 1 cheng 420 leh Mizoram pumah cheng 500 aia to lova zuar turin inremna an ziak.

MSU leh Topcem ten inremna an ziah hnu hian mipui tan leitheih tura zawrhchhuah nghal a ni. Inremna an siam ang chuan Aizawl khawchhung ah Taj Cement (PPC) bag khat Rs 390/- leh Topcem (OPC) bag khat Rs. 420/- aia to lo leh Zoram pum ah Rs 500/- aia to lova hralh tura tih a ni. Heng rate bithliah aia to zawka zuar leh hralh te chu an hnena report turin MSU chuan mipui te an ngen a. An ngenna ngaipawimawh lo Cement company dang lakluh leh hralh chhuah chu a rem dawn lo tih MSU chuan thuchhuah an siam bawk.

MSU chuan Cement man bithliah chungchanga an hmalakna kal mekah an rate phut leh beisei aia to a hralhchhuah tura tih, truck trip engemaw zat chu CH Saprawnga truck terminal ah an la hreng mek a.

MSU Gen Hqrs. President chuan Cement rate chungchangah MSU chu a dinna ngaiah ala din thu leh an hmalakna ah mipui thlawpna an ngen thu a sawi.

Author :    

Aside | Posted on by | Tagged , | Leave a comment

Dep dep dep

Thenawmpa Pa Nghiha chu zan lamah a in hnem deuh tih hriat zet hian pawr phingphengin arawn lut a, “Chawimawina kan nei dawn a, rawn kal ve rawh aw, lo insiam la ka rawn sawm ang che,” tih leh chhuah a rual nghal. A mak thin! Hepa zet hi chu aw!!
Missionary tlachhia kha a nia, fiamthu a an sawi thin, thlathar tir apiang a Facebook status a ‘Hurray Pay Day’ tih a update ziah vang a aruaitu Kohhranin an koh haw tawp kha a ni.
Tin, a hmel a chhe hle, chuvangte pawh chu a ni maithei ringthar tumah a siam belh lo va, Arunachal a a post ve lai phei kha chuan a rawn chawl haw ti ti ber chu,”Kha vainu han neih uih zia kha, hman a ka tuikuk nula dep ai pawhin a nei uih,” tih vel mai mai kha a nia. Missionary ve meuh chu tiin a lawina Kohhran in testimony sawina hun te an pe ve a, a thu sawi thin tlangpui pawh Zakaia patet zia leh theipui kung san zia, Arunachal theipui phei chu a lian lutuk a patling nileng tlan hual tham tih mai mai, uire nu hur tur zia te kha Biakin khawk rum rumin ahan sep mai thin a, mihlim ho an chhuak sap sap thin.

Chutia patling englo thankin zet tawhin min rawn sawm ta chu sa free lawm hrim hrim mi tan chuan hmaih phal chi ni hek lo le, kal ngei pawh ka tum ruh hle.

CHAWIMWINA A KAL TUR KAN THIAN HO.
1. Thuamkaka : Ani hi pathlawi niin a hur hle. Zahmawh sawi hi a hna ber niin a zakmawh hle bawk. A hmel hi inhriatthiam dan tur chu zawngtah tuvu ang hi a ni, a puar thei lai chu a tuvu vek a, a pian erawh analh chuang lo. A ke veilam leh dinglam a inseihleih avangin ‘Thuam kebaia’ ti tawk an awm bawk. Hmanhmawh deuh a akal hmuh chuan thirsakawr khalh a ang em em a, hmelchhe viau e ti lo chuan duhtawk a a inchei ve deuh chuan rin ai takin ala hmelchhe tho.

Insawitheih hi a thiam zawng niin ‘Lei’ hmanga eizawng tur nise a tawngkam thiamna hi hausakpui tham a ni, mahse, vengmawng tuikhur bul a mi thlam luah duh loh ang deuhah a awm a, radio pakhat neiin international news a inti hre ber a, a bak chu zahmawhin a chhunzawm leh mai thin. ISIS a haw em em a, a insawi thinrim tun thin, a sawi tawp lamah erawh ISIS ho hur zia leh mi pawngsual an hrat zia te, an neih len a rin thuin a titawp daih zel. Sa free alawm ve viau a hei erawh kan in manna pakhat niin avbakah chuan eng kawngah mah min pha lo! A tha lamah ka tihna anih chu.

2. K.T.I : Ani hi patil kan tih ang chi hi niin a tilte in chaw a bar thin. Kan veng ho ti ti a an sawi danin a hmelchhiat pasal hmuh zawh inring lo inti pa a ni e an ti. Zahna kawnah pawh zahna ti zak thei tur khawp a zah tur hre lo, mahni thu a ‘Pathlawi’ title in pe ve ngawt kha ania, tilte erawh a nei lo. Kan veng chhung a safree awm tawh hrim hrimah phatna a sawi ngai lo va, sawm loh pawh a inti neitu thiam tak niin a ni pawh hi a hur hle.

A virgin leh gin loh ka hriatpui lo va, mahse, a bialnu te lakah a virgin a hloh tawh thu a sawi zing hle. Mi patil ve te chu sports lam an thei tlangpui a, Mizoram an ti hmingtha a ngaihsan tawk pawh kan nei teuh, ani ve hi chu tupa bawp sei seiah amah ai a bawp tawi zawk a cho thin chiah hi Sports lam a la ti ve. Mawngmirh neih ahrat hle, a sawi zak lo va mi zingah a mawngmirh kawm chhuakin lian a tih thu sawi chungin a kutphahah a vah tir zut zut thin.

Vawikhat mizopa ekin-ah a tla tawh a eklung tui loh zia hahip in a sawi thin bawk. Zu hi a duh ve em em a, a ruih apiangin a hmeichhe theih tawh zat sawi pahin a chaw barna lai pathum hi lek pir vohin,”In awih loh chuan hnim ula,” a ti sek thin.

Tin, K.T.I hming a put chhan hi akhup tuah em avangin naupan lai atanga ‘Khuptuah-i’ tia koh thin a ni, alo nulat tlangval hnu chuan a thinrim phah fo avangin K.T tiin an ko va, alawm phian, facebook profile name-ah erawh Kattie-i a inti ve tlat bawk.

3. LAL-A : Ani ve thung hi chu midang aiin a hmel chu a tha chuang lo va, a pian erawh tlemin a nalh bik chuang lo. Councillor tlachhia niin chhungte’n buhpho vengah pawh an ring zo lo. ganja a heh hle a, a ruih sual chang chuan nula rimna-ah a che uih thei hle, tumkhat kan nula rim te in ah chaw ei a siam hluai tawh. Kawngchhe tuitling a len den a hrat hle, tin thaw uih lamah tuma’n kan cho lo.

Kan VCP te bawng vawihnih a pawngsual tawh, Coat Suit alawm hle. sam khuih pial hi nuam ati a, a inchulh mawm thei hle, a hmutu tan erawh hmuhphiah hmun a sahriak leih a ang.
A hahmai pakhat a bal a, “Ka Lucky Charms,” tiin a sawi thin. Tun thlengin bialnu a neih kan la hre lo va, kan khaw thenawm a leilet buh hmunah a inhlawh thin, “Kan khuaah chuan ka to ber,” tih kha a lo insawitheihpui em em a, ni e, a to em a tuman an nei ngam lo!

4. KEIMAH : Ka hmeltha fal hle, insawithei duh ngat ni ila ka thlanlungah ka nula theih tawh zat an ziak kur nguai ang. Ka zakzum em em a, ka hmelthat em vangin kan veng zu zuar Ka ni Dari pawhin min sitar hle. Midangin min ngaihzawn em em chu hre lo mah ila luck ka inti ve em em a ni, camp ka luh zin tawh em avangin camp mutbu leh thleng, fian, no.etc ka nei hrang thlap tawh. Ka ti ti tui ber chu U.S.A Politics niin mi ngaihsan ka hlawh thin.

KAN KHUA
Kan khua hi Aizawl atang nithum motor tlan leh ke a peih chin chin kalin athlen theih a, kan khaw hming hi ‘Khaw chhete’ niin in 18 kan awm a, nula pakhat awmin chu pawh nuthlawi a ni. Kan ei zawnna ber chu lo neih niin kan intodelh em vangin buh seng zawh atang hi chuan zu bilh kan ching hle. Mipa hi atlangpuiin hmeichhia an ni lo va, hmeichhia pawh mipa an ni miah lo bawk. Aizawl kal thei chin kan ngaisang em em a, motor chuang tawh ho ti ti chu dawt tih hre reng mah ila kan awih vek tho.

Patil pakhat leh tuai pahnih kan nei a, kan in chu a tlangpuiin ‘Di in’ niin a neinung deuh in erawh Di in tho. Chhungkaw khatah member 10 tal chu awm ang vek kan ni a, puitling pakhat awmnaah naupang 7 vel awm ang zel kan ni.

Zahmawh sawi kan hrat chhan ber pawh hi kan rawp em vang a ni pakhat a, kan nula neih chhun nuthlawi hi a luck em em a, mahse, avawih uih thei hle. Inleng tlangvalte vawih barh a ching hle bawk.

Kan khuaah hian Kohhran 6 awmin a chhin var an tam ber a chhungkaw 10 lai an ni. Vawk talh tham nei an awm chuan mihlim ho in chawimawi phutin an in ah an lamruih chilh thin.

CHAWIMAWINA
Kan thian ho chu kan han kal ve ta poh a, sa free lawm thah tih takah kan phur hle, kan thlen chuan ei an la peih chiah lo va, khuangpu a ‘Rap’ a an lo lam tuau tuau, sa ei tur anni bawk a hlimrui an tam khawp mai, tlar hnung berah kan thu tlar dal mai a. Kan zak lo hrim hrim, sa rim chuan hnar averh a, ei bang fun haw dan mawlh mai chu kan lungkham a ni.

Chutia chhuat chim dawn dawn a an rik mup mup lai chuan pitar pakhat hian lam pahin min rawn en sek a, a tawpah phei chuan kan bulah a rawn vir phei ta. “Het..chhe na na na, usu khamba mam mam ba na re…,” tih pahin kei, a sir ber a thu chu min rawn dep lauh lauh mai a, thiante chuan va lam ve mai rawh min tih chuan tih chi-ah ka ngai lo. A hrim hrimin sa free vang a kal chu ni lo ila achhin var ho Biakinah ka inkhawm nguarh ang. Bulldozer kohran thalai leader ka ni ve tlat.

Min rawn dep leh thin,”Chu pitarte chu ava rawp reuh e,” ti rilru chung chuan ka’n dingchhuak ve hram a, min rawn dep leh thin a chang leh ka malah, achang leh ka mawngah.. Huiham.. Dep dep dep Kohhran an nih hi ka ti rilru hmiah.

Tawnghriat loh chham pah a min rawn dep reng chu sa ei chakna a ti reh tlat, khuang ri pawh a muang tan. Dung dung dung… Dung dung dung.. Kal hma a kan lo peg sek kha a lang chhuak ta, kan pitari lah chuan min rawn la dep euh euh. Thianpa Thuamkaka phur lutuk ta chuan khuang beat a pitarte in min rawn dep reng chu en kar pahin ‘DEP DEP DEP’ ‘DUNG DUNG DUNG’ ‘DEP DEP DEP’ thian ho chuan khuang beat rualin DEP DEP DEP kan han ti tak tak mai chuh, min dep rei peih lo ngei mai, kan tuifal ta, lamtualah chhuakin ‘DEP DEP DEP’ kan va lamtui tehlul em!

Khuang ri a tawp; keini kan la tawp ve phal lo, thian ho in lamtualah kan la kual kan thu chham DEP DEP DEP… Min nawr chhuak a, sa free ei an phal ta lo. Keini thinrim laklawh chuan fatu ho bulah sa bel kan lam hual zui, DEP DEP DEP.

Author : Biaka O’Renthlei    

Aside | Posted on by | Tagged , , , | Leave a comment