KHAWVEL-IN RALTHUAM LAMA INTLANSIAKNA SUM SEN A UAR ZUAL SAUH !

April 29, 2019 ah Stockholm International Peace and Research Institute (SIPRI) te chuan khawvel ram hrang hrangin ralthuam leh sipai chakna thil an senso (military expense) an chhutna tichhuakin, tun hma Cold War awm lai 1988 aiin, post-Cold War ah khawvel ram hrang hrangin ralthuam lama intlansiak chu an uar thar hle a, 60% dawrhin an senso a pung a ni, a ti.

Top 5-ah hetiang hi a ni : US, China, Saudi Arabia, India leh France chu a sang zualte an ni.

Khawvelin military budget a neih belhkhawm hi US$ tluklehdingawn 1,822 a tling daih a, kum 2018 ah kum 2017 aiin military budget hi 2.6% in a pungchho a ni.

US chu kum 2010 hnuah namen lova pungchhovin, President Donald Trump hunah “chiahpuam” ang deuhvin a pung thur a, khawvelah No.1 kaiin tlukpha an awm rih lo. US chu kum 2017 aiin 2018 ah 4.5% a pung chhovin, defense budget hi US$ tluklehdingawn 649+ a ni daih.

China pawh kum 24 zet defense budget tipung tluang zelin, kum 2017 aiin kum 2018 ah 5% a pung chhovin US$ tluklehdingawn 250 a nei. Kum 2013 atangin GDP atangin 1.9% an dah a ni.

India chu 2018 ah defense budget pung chhovin, US$ tluklehdingawn 66.5 niin, a punna hi 3.1% a ni thung.

Pakistan erawh 11% a pungin, US$ tluklehdingawn 11.4 a nei. South Korea pawh 5.1% a pung chhovin, 2018 defense budget US$ tluklehdingawn 43.1 a nei a. Russia chu 3 5% a pung chhovin, kum 2018 ah defense budget US$ tluklehdingawn 61.4 a nei a ni. Turkey chuan 24% a pungin, US$ tluklehdingawn 19 defense budget neiin khawvela military chak tehnaa 15na a hauh.

Post-Cold War atangin Global Military Budget hi a pumpuiin 76% in a sangchho dawrh a. Global GDP angin US$ 239 anga pungin, 2.1% a punna a ni.

NATO member 29 awmna chu an pung nasa hle a, 53% pung chhovin a vaiin an defense budget chu US$ tluklehdingawn 963 a ni. NATO member zingah US chu a pung nasa ber a, defense budget hi US$ tluklehdingawn (billion) 27.8 in a pungchho a ni.

Top 15 Defense Budget 2018
(US dollar billion tela chhutin)

USA – 649 billion
China – 250 billion
Saudi Arabia – 67.6 billion
India – 66.5 billion
France – 63.8 billion
Russia – 61.4 billion
UK – 50 billion
Germany – 49.5 billion
South Korea – 45.1 billion
Japan – 44.8 billion
Italy -27.8 billion
Brazil -27.8 billion
Aistralia – 26.1 billion
Canada – 21.6 billion
Turkey – 19 billion

Khawvelin “Remna leh Muanna” awm theih nan ti a kawng dapin, an tlangau reng a, mahse, intihnatna tur military/defense budget erawh chu an siam sang tual tual lawi a!

Kawtthlerah kut dawh, ei tur nei tha mumal lo sang tam tak an awm laiin ralthuam lama intlansiakna erawh chawlhsan reng an tum si lo! Remna Lal – Isua Krista tello chuan he Lei chunga cheng hringfate hian inremna tak tak chu kan nei dawnin alang lo ve!

CT Lalrinawma

Aside | Posted on by | Leave a comment

BSNL OFFICE KHAR SAK

Lawngtlai-a Mobile/Broadband Network ṭhat loh lutuk avanga Central YLA hmalaknain awmzia a neih loh avangin BSNL Office chu tiam chin awm lova kharsak an ni.

Apr 29, 2019, khan Central YLA chuan Lawngtlaia BSNL office chu tiamchin awm lovin a khar sak a, hemi chungchanga CYLA thuchhuahah chuan, “Kum engngemawchen Lawngtlai-a inbun tawh, hmasawn tum lo BSNL hnenah hian Central YLA chuan vawi tam tak ngenna siam tawhin an Office pawh kharsak an lo ni tawh a. An service upgrade na tur atan agreement siam a nih hnuah hawnsak leh an ni a. Amaherawhchu an agreement anga Lawngtlai-a an service-in hmasawnna a neih loh avangin Central YLA chuan ngenna a siam nawn leh a. Mahse, Central YLA ngenna in ngaihpawimawh a hlawh loh avangin vawiin (April 29, 2019) hian tiamchin awm lovin kharsak leh an ni.” an ti.

Central YLA chuan agreement satliah mai maiah lungawi a tum tawh lova, Lawngtlai mipuite lungawina tur a hmuh hma chu a tawlhsawn tawh dawn lova, BSNL Office kharsak an nih avanga harsatna tawk zawng zawngte hriatthiamna a ngen thu thuchhuahah chuan an tarlang bawk.

Aside | Posted on by | Leave a comment

Pangzawl inkhelte buaina chu

NGAIHDAM DILNA

Dt 30 April 2019 a Ramrikawn SC, Pangzawl leh Bungtlang Chhim Veng inkhel ah khan thil felhlel a awm a, Bungtlang khaw chhung a Tournament niin final ah an khaw mi leh sa referee ah an hmang a, an khua a tan deuh ni a kan hriat avangin Match khel tluan duhlovin kan chhuak ta a, hruaitute kan dawr laiin buaina a chhuak ang tih kan hlauh em avangin hruaitute chuan fans te an awm hran tir vek a, Referee pawh Pavilion ah a awm, Champion a Bungtlang Chhim Veng an puan hnu ah lungawilo hle mah ila haw kan tum tawh laiin, RAWPUI khaw tlangval zu rui chu Bungtlang fans lam atanga rawn tlan phei in buaina rawn siam tum a, chumi chu Pangzawl thalai chuan hua in kutthlak an tum a, amaherawhchu kut an thlak nat hma in video a lang a hnunga mi, Pangzawl tlangval fel tak tak te’n an thelh hman hlauh, chumi lai te chu video in an lo la a, “referee khawih a tum” tiin an ti viral ta a, a pawi kan ti a, Zoram mipui ngaihdam kan dil tak meuh a… Lehlam fans zu rui pawr khatianga kut an lo thlak kha ngaihdam kan dil tak meuh a ni, Chutih rual in Referee khawih tumna thinlung erawh kan pu lo a, tuma’n an khawih hek lo, he video hi a la tu leh caption diklo tak a siam a ti darhtu chhui mek a ni a, Pathian zarah thudik kan hre thuai turah ngai ang…

Buaina ah khan Bungtlang Chhim Veng khan inhnamhnawihna an nei in kan hrelo a, Bungtlang tan a buaina rawn siam tu kha RAWPUI tlangval zu rui a ni tih kan sawi tel duh a, amaherawhchu kan tlangval thinrim thisen sa laklawh in kutthlak an lo tum kha a chungah pawh ngaihdam kan dil nghal e… Referee erawh kan kuthmawr pawh in kan khawih lo tih kan lo tarlang duh a ni.

Member
Pangzawl Games and Sports Association

Aside | Posted on by | Leave a comment

CYMA PRESIDENT IN TUIRIAL KHUA DRY VILLAGE-AH A PUANG

Nizan April 30 zan khan Tuirial Community hall-ah Central YMA President Pu Vanlalruata chuan Tuirial khua chu dry village ah a puang.

Dry Village-a puanna inkhawmah hian Central YMA President Pu Vanlalruata chuan Tuirial khawtlang mipui leh hruaitute kalkhawm hmaah thu sawiin Dry village a puan chu a theih mai a, tihlawhtling tur erawh chuan inlungrual taka tawrh inhuam leh huaisen tak a beih a tul thu leh teirei peih a ngaih thu a sawi a, mi tha tak ngawi reng, lo ral thlir ngawttu ni lo turin a chah a, Pathian malsawm tlak leh a tha lama khaw entawn tlak zu leh ruihhlo fihlimna khua ni thei ngei tura tangrual turin kalkhawm te a sawm bawk a ni.

He hunah hian Village council, NGO leh Zawlbuk Group YMA hruaitute pawhin infuihna thu an sawi hlawm bawk a ni. Program hmannaah hian Tuirial khua chu dry village puan a nih ang ngeia a lo hlawhtlinna tura hmalak an phur thu mipui kalkhawm te atangin thu dawn a ni.

Aside | Posted on by | Leave a comment

Officer ten recruitment rules an siam fuh lo nge itsikna an ngah zawk

To.
OPEN LETTER TO
Hon’ble Chief Minister
Governent of Mizoram
Zarkawt. Aizawl.

Subject: Mizoram lo chhuah ka dilna kha.

Respected Sir,
Dated 21/02/2019 Zirtawpni tlaiah i Office ah in kawmin Mizoram Leilung hausakna zawn, laihchhuah leh hman țangkai chungchang sawiin ka hriat ang leh Expirience neih te sawi dunin Mizoram lo chhuah ve chu min phalsak dawn phawt chuan Post ruak a awm thu leh ka hreh lo thu ka sawi anih kha,’ Application rawn ziakla zanah emaw naktukah emaw ka Bungalow ah pawh rawn dah mai rawh’i tih angin atuk Inrinni zan Inkhawm banah Ka rawn kal leh a, CM Bungalow ah in hmu lehin ka lehkha chu Secretary Industry ah i Forward nghal anih kha.

Tin, tun țum i Ministry hian hian Leilung hausakna Oil and Gas, Natural Resources in ngaih pawimawh emm avangin A Dept changtupa Dr.Thangtea pawh ka Application chu pe in Director Geology and Mineral Resources ah Post chu fill-up turin a Forward ve nghal bawka.

Amah erawh chu CM lehkha leh Minister lehkha pawh nise Sawrkar hna Group A phei chu Fair taka MPSC in Exam an conduct tawh avangin chutia luh mai theih anilo tih leh Advertisment chhuaha, Interview/Exam hma chhawn angai tihte poh ahrechiang ber ve ve tu kan nih hmela,khan inhmu ni poh khan kan sawilang tel nghe nghe. Competition neiha athiam ber luh kha țha ka ti.

Khatiang Department lamah kum 20 chuang teh meuh Post ruak tawh hnawh khah si loh kha a awmzia ka hre lova, nikum lam Master ka chhuah rual poh khan a awmzia leh hriat tum leh hnawh khah tumin ka rwn vir vut2 tawha, Petroleum Geologist Qualified Mizoramin kan la neih ve miah loh avang leh Oil Company lo lut turte Deal lo neihpui tur poh kan awma ka hriat loh avangin rawn luh kha ahun in ka hre ve takzeta.

Mahse kan Pu te lam thiltih dikloh rawn hmu nghalin DG&MR Mizoram Sawrkara Group A Gazetted Post alut tur Geologist chu Master of science in(Geology/Applied Geology/Geophysics). chumi te pa thum chiah thiamna nei chu anlut thei tiin Recruitment Rules(RR)anlo siam bur mai hi alo nia, chung Degree neilo Geologist bon turu tak tak India ram leh khawvelah an ther ferfur tih poh RR siamtute hian achiang hle in a rin-awm. Chu thil chu midang te dan tumna leh duhsak zawngte chauh Kawng sial sakna ni a ka hriat avangin Nikum June thla vel khan RR chu siam ţha tur leh Competition neia anthiam ber anluh theih nante, Midangte kawng dalsak tlat annih loh nana RR amend ngei turin ka rawn ngen tawha, a Changtu Minister leh Secretary/Commisioner ngei pohin siam ţha turin 20/7/2018 ah Lehkha an lo thawn daih tawha,.

Nimahse kum khat zet hnu 21Feb thleng pawh khan chu Recruitment Rules chu anlo siam ţha duh chuang miahlo hi alo nia, amah erawh chu 28/2/2019 ah Mizoram Chief Secretary meuhin a hauh tak avangin ani la la RR chu Commisioner hnenah an thawn nghal thei leh mai si te kha amak a, amah erawh chu Service Association a an Officer rual te chuan State dang, Megalaya,Nagaland etc ah te poh Petroleum Geologist chu an neih bik loh thu leh Mizoramah poh neih veloh chu țha antih lam hawizawngin lehkha chu anziak ta mauh mai anih chu, Petroleum Geologist te, Engineering Geologist leh Mining Geologist te kha kan luh hi minlo hlau zek² hi alo nia, mak thei ngei mai, Leilung hausakna laihchhuah chu kan la hlat hle hian ahriat a..

MPSC Recruitment Rule Geologist Post chu Master in Geology/Applied/Geophysics chauh anih laiin Ni 16/4/2019 a UPSC Geologist Post RR chu Master of Science in Geological Science,Geology,Applied Geology or Geo-Exploration or Mineral Exploration or Engineering Geology or Marine Geology or Earth Science and RM or Oceanography or Marine geology or Petroleum, Geoscience or Petroleum Exploration or Geochemistry or Geo-Tech from Recognise University tih ani thung, heti hian Mizorama kan RR hman diklo zia chu ahriat mai awm e.

Areng thu ah keini ang Officer la țhalai, țawng duh si, inti thiam si, thil inti hresi, dikna duh leh hmasawn duh em em ang chi kha chu Kan Officer thawhpui turte tan khan kan lo huphurh awm sa em em hi alo nih hmela, Master Degree zo tawh kha ‘Muster Roll-in rawn lut mai rawh, he Post hi chu kan naute beisei an awm ve a’min han ti duh mai te kha amak a, Mizoram lamah chuan chhungte neih ţhat loh chuan Sawrkar hna pawh hmuh alo har fu dawn hi alo ni a..

Ahming a Mizo Zingah chuan Petroleum Geologist hmasak ber kan nihna angin rawn haw chang pohin School leh College, Naupang inkhawmna ah te thusawi tura sawm ka ni ve ţhina, Chung ah poh chuan Mizoram tana Petroleum lam thiamna neih ala ţulzia te, rawn zir ve tura ka duh thute ka sawi uar țhina, mahse Mizoramah chuan Chance anlo neih miahlo zawk hi alo nia, Khawngaiha he thil hi chu min siam țhat sak tur leh kan naute lo chhuak leh zel tur poh dan beh tlat nilo turte Competition zau zawka neia athiam ber leh Fit ber Sawrkar hnalak reng² ah chuan anluh theih ka duh tak meuh2 ani.

Mizoram Sawrkar ah chuan lo chhuah leh hi ka tumin ka ring tawh lova, Mizoram Leilung hausakna,Lung- alhtheih, Coal, Lignite kan tih kan neih ve te, Monitur a zawn chhuah aţul zia ka sawi te, Limestone te poh kan neih ve thu leh Gas te poh ahman ţangkai theih dan ka sawite, India ram Company chauh lo poh, Khawvel ramdang Company te nena InLink theih dan leh thawh hova Resources haihchhuah dan a awmzia leh kawng ka sawi te kha ataka tih hlawhtlin theih vek anih avangin Heng Officer RR siam thiam tak tak te hmang țangkai turin ka duh che a, Kei chu Competition neiin lo tling ta poh ni ila Office ka Join huna PAR ka submit hunah Recommend saklo te hial ansawi rik avangin ka thawhna tur Dept lamah chuan luhna chi ah ka ngai tawhlo.

Tin,thil pakhat i hnena ka sawi tho kan Quarry neihdan chungchang kha ngaipoimawh leh turin ka duh bawk che a, Heng kawngkama kan Quarry vanga Nunna kan chan fo tawh loh nan siam ţhat kha ațul takzeta, Legal Quarry chimin Nunna alak hi Natural Calamitist, khuarel chhiatna ni lovin Tualthahna anih avangin Quarry Licence pe tute hian mawh anphura, tin Insakna tur hmun laihna Clearence/NOC pek chungchang ah poh i Sawrkar Geologist te hi Briefing neih pui leh ațul takzetin ka hria..

Pathian leh kan Ran tan”titu Ministry hian hna poh in thawk nghal bawrh2 niin ka lo hmu a, Oil leh Gas chungchang poh Campaign a i Au hla ang ngeiin i ngaipawh chho niin ka lo hria a, chutih mek lai chuan i kutke tur ber Officer te heti anla nih ve laih2 rih avangin Zoram tana țha hnem ngaih hahthlak tur zia leh Khawhar thlak ţhin tur zia te hi hmuh thiam pui che niin ka hria…
A tawp ber nan chuan Hun hlu tak pe a, Kan Ram leilung chanchin hre duha keini teh lul min titi pui ve vangin lawmthu ka hrilh duh che a, hma lak pawh i tum tak takin niin ka hria a ropui ka ti a, i Duh angin i Vision leh Dream te tih hlawhtling turin i kutke ni thei dawn ta lo mah ila, Mizoram hmasawnnan tihtur ka lo nei ve anih chuan ka inhawng khop ang..

LALCHHUANZELA

Petroleum Geologist,
Dubai, United Arab Emirate

Aside | Posted on by | 1 Comment

DAN KALH A BRU VOTE LO PUN CHHAN

A ṭobul aṭangin

India danpui article 327 na chuan inthlan chungchânga dan siam theihna thuneihna sang tak Parliament leh State Legislature te a pe a. Election chungchânga dan siam chu House te tih tur a ni. He article tlawhchhan hian Parliament chuan Representation of People Acts, 1950 leh 1951 a siam ta a ni.

Bru chungchâng:
Mizoramah Bru-te hi kan unau ang mai a duat taka kan enkawlte an ni a, thangthar leh zual te phei chu Mizo hming an nei nasa tawh êm êm a. Mahse, chutih lai chuan Bru hnam feeling pawh a lo lian ve zel a, hmasawnna khairual lo chho bawk nen hmasawn duhna chuan helna a chawkchhuak a. He mi boruak kal zelah Mizo ten kan tuar ta fo a, mahse dawhtheih takin Mizote kan la awm zel. Kum 1997-ah boruak mak tak mai rawn awmin kan rikrâp leh kan tharum thawhna vang ni miah lovin an mahni bru helho aṭangin Mizoram chhuahsan tura thupek khawng tak mai an dawn avangin zankhat thil thu ah Bru chhungkaw tam tak te chu Tripura-ah an pem ta chiam mai a.

Hetia an duhthua pem si hi sorkar laipui ah raltlan anga inchhal in Tripura ah relief camp neiin an awm zui ta a. Hetia an pem hnu lawk kum 1998 ah MLA inthlan awmin vote an thlak lova; kum 1999 ah MP inthlanah pawh vote an thlak lo bawk. Bru te hi kan hriat angin hmun nghet a awm lo pem kual reng an nih avangin, an chhuahsanna hmunah vote an neih reng hi danin a phal loh a ni a. Tripura a an pem avang hian Mizorama vote an neih zel hi a rem tawh lo ani.

Kum 2003 khân Mizoram ah MLA inthlan a awma, kum 1998 leh 1999 a vote thlak lo, Mizoram chhuahsan a pem ten Mizoram a vote neih an rawn tum tlat mai a. Chu an duhna chu Election Commission of India chuan vanduaithlâk tak in a tihhlawhtlinsak ta tlat mai a. Tripura a pem Bru-ten vote an thlak theih nân Jammu & Kashmir Representation of Peoples Acts 1957 entawn in( Kasmiri Pundits transitory camp Jammu, Delhi leh hmun hran hranga chengte electoral roll ah thunin vote an thlak tir a ni). Hemi dan tlawhchhan hian Bru te vote neih tirin mi 4256 zet roll ah an thun ta a. Heng mite hian 2003 inthlan khân vote an thlak ta a ni. He mi kum hian Bru te tan hian special polling station buatsaihsak ni in Mizoram chhung, ramri ah vote thlak tir an ni a, venhimna khauh tak hnuaiah Bru te hi transit camp aṭanga phurh an ni.

Bru te hi hetiang a Kasmiri Pundits ho anga J&K RP Acts 1957 hmang a Electoral roll a an thun mai piah lamah Postal Ballot a vote an thlak tir leh zel hi dan kalh ni in; Conduct of Elections Rules 1961 section 17&18 chuan chiang takin by post a vote thlak thei tur te a sawi a. Tin, RP Act 1951, Section 60 ah a sawi bawk.

Chung by post a vote thlak thei te chu:
(i) Special voters
(ii) Service voters
(iii) Voters on election duty leh
(iv) Election subjected to preventive detention te an ni.

Hei hi ngun taka enin Bru-te hetianga an ti mai hi dan kalh a ni a, uchuak taka duhsakna a ni. Brute hi raltlan nilovin Tripura-a pem mai an ni. Tichuan 2003 leh 2004 MLA leh MP inthlanah te he dan diklo tak tlawhchhan hmang hian vote an thlak tir ta a ni.

Tichuan, kum 2004 MP inthlan khan Bru te hi Ordinarily Residents of Mizoram a ngaih ni in, an roll neihna Constituency ah ṭheuh vote an thlak leh ta a ni. A chunga kan sawi tâk ang khian, hetianga ECI in CEO Mizoram hnêna J&K RP Act 1957 hmang a remsiamna ruahman tura thu a pe pawh hi thil dik lo a ni a. Tichuan, kum 2013 ah khan ECI chuan RP Acts 195, Section 60 tlawhchhan in Bru-te hi postal ballot hmang a an vote a lo phalsak leh ta a. Kum 2003 leh 2004 a ECI in ruahmanna a lo siam zulzui hian 1997 khan Bru Tripura a pem te hi ECI chuan Ordinarily Residents-a pawm zui zel turin a lo ti leh ta a ni.

Kum 2013 MLA election ah chuan kum 2003 a vote 4265 kha vote 11243 laiah a lo pung ta a. Kum 10 chhunga Bru Tripura tansit Camp a awmte vote punna hi 163.61% lai a ni nghe nghe. RP Acts 1950 section 28 ah chuan heng dan te hi tihdang lam emaw siam that emaw ECI hian a ma thuin a ti ve ngawt thei lova, Central sorkar leh ECI te hi an in rawn tlang tur a ni. RP Acts 1951, Section 169 ah chuan dan siam ṭhat a ngai a nih chuan sorkarin ECI a rawn ang a, chumi ang chuan an siam ṭha thei ang. Hetiang anga inrawn tlang hian form 26A pawh siam ṭhat a nih kha.

Jamu & Kasmir Representation of Peoples Acts 1957 hi state danga hmantheih anilova, hetiang state pakhat hman atân bik liau liau a dan siam hmang a Bru-te vote a neih tir leh Postal Ballot hmang a vote thlak theih tura Ordinarily Residents of Mizoram a Bru-te a puang hi a dik thei lo a ni.

Kum 22 lai Mizoram chhuahsan tawh bru te hian khawi khua leh vengah mah in leh lo an nei tawh lova, kum 20 chuang state pawna an pemchhuah tawh hnu pawha Mizoram a in leh lo la neia Ordinarily Residents of Mizoram a ECI in a dah tlat hi a dik thei lo a ni.

ECI hian Mizoramah hian Bru Tripura Camp a awmte hi an in leh lo leh an awmna khua rawn zawng se pakhatmah hmuh tur an nei lovang.

Aside | Posted on by | Leave a comment

EI MUAN LEH KAL CHAK

Kan tarlan fo tawh angin, rang taka chaw eia dawlh zung zung loh tur a ni a, kan thil eite chip taka ţhial sawm a, zawi muanga ei ţhin tur a ni. Hei hi thil ho tak anga lang, pawimawh tak si a ni a. Ril a ţâm lutuk chuan, vawkpui chaw hapa hap buan buan leh dul hmul khât phuar khawpa thil ei nghek a awl a; mahse, taksa tan a ţha lo va, insum hrâm hrâm tur a ni.

Rang taka thil eia lem pawp pawp hian thin thîp (heartburn) leh pum nâ a thlen thei a, taksa rihna a pung duha hriat a ni bawk a. Zawi muanga thil ei ţhinte aiin rang taka thil ei ţhinte rihna a pung duh zawk a ni.

Kan puar tih hriattirna (signal) min petu hi hormone pakhat, leptin a ni a, leptin hi thaua tisa thliar sin tê ber (cells) aţanga siam chhuah a ni a. Thluakin ‘Ka puar tawh e’ tih hriattirna dawng tur hian darkar chanve vel a duh thei a. Zawi muanga thil kan ei chuan he signal vang hian thil kan ei tlem phah thei a ni.

Japanese-ho hian thil ei dan pakhat, ‘hara hachi bu’ tih an nei a, “I puar tak tak hma, za a sawmriat (80 %) vel thleng ei rawh,” tihna ang a ni a, thil ei nasat lutuk (overeating) venna ţha tak pakhat a ni. Kan puar tak tak hma, duh tawk kan ei hmaa kham tur a ni. Chaw khawrh khat chu ka la ei thei ang, tih vela kham hmak tur a nih chu; mi ţhenkhat, buh duh ve tak tan chuan a har ve det maithei a ni.

Tin, kan thil ei ţhial sawmna tur hâ kan nei a. Kan thil eite ţhial sawm lova rang taka kan dawlh pawp pawp hian, ha hnathawh tur pumpuiin a thawk tel a, pumpui a hah zual a. Pumpui hah vangin harsatna hrang hrang kan nei thei a. Kan pumpui a ţhat loh chuan kan taksa pêng dangte pawhin a tuar a; chuvangin, kan pumpui hi kan duat hle tur a ni.

Zawi muanga thil ei leh kea kal tam hi taksa rihna tih hniamna ţha tak pakhat a ni a. Kea kal hi insawizawina ţha tak ni mah se, zawi muang leh thatchhe tak, silipar hnûka kal hne hne erawh a ţha chuang lo.

A ţha ber chu chak tak leh zawi muanga kal chhâwk tur a ni. Entirnan: Minute 5 vel chak taka kal a, minute nga 5 vel tho zawi muanga kal, heti anga kal dan thlak hi a ni. Sazupui leh satel inthansiak thawnthu kan hre ţheuh ang a. Sazupui leh satel kan nih kawp a ngai a nih chu.

Dr Lalkhawngaihsanga
GILEAD THINGHNAI

Aside | Posted on by | Leave a comment

INDIA ARMY TEN VUR RAMAH KE HNIAK 32X15 INCHES AN HMU !

April 30, 2019 (MSR): Indian Army Mountaineering Expedition Team te chuan April 9 khan Mount Makulu, Mt. Everest atanga mel 12 a hlaah ke phah lian zet, hniak (footprint) 32×15 inches an hmu a, he thil hi Mihring lian tak hniak nge, ramsa chi khat Brown Bear emaw, Vur rama cheng Yeti-the Beast ni ang tih an hre thei rihlo.

Hetianga ke phah rahna niawm tak hi hmun dangah pawh hmuh a lo ni tawh thin a, mahse, DNA te enchhin a nih loh vangin thawnthua Vurmi (Snow Man) lian tak awm thin tia sawi thuvauk (myth) mai mai tih an chiang thei lo.

CT Lalrinawma

Aside | Posted on by | Leave a comment

Zaa sawmnga sorkar inenkawl na’n

50% VEL!

Nimina Civil Service Day hmannaah khan Chief Secretary Pu Nunmawia’n thu pawimawh leh chhinchhiahtlak tak tak a sawilang a. Mahse, PIO to Chief Minister/IPRO Pi Emily Lalrinpuii’n sorkar thuchhuaha a tarlan tak loh pakhat Zonet in a puan hi I lo en lawk teh ang.

“(Mizoram sorkar) budget atanga za-a sawmnga vel chu sorkar hnathawk hlawh, inrelbawlna leh pension hlawhah te hman a nih thu a sawi a” (Zonet https://www.youtube.com/watch?v=u51KaYQvMj4 @3:15 mins)

Thil chi hrang hrang kan sawi a, nationalism tih te, Chakma issue te, Tuikuk issue te, CAB te. Kan politician tam zawkin an sawi ngai loh leh Mizo mipui min sawipui ngai loh tih hiala sawi theih chu kan sum leh pai dinhmun leh inrelbawlna chungchang hi a ni. Pu Nunmawia sawi hi I lo ngaihtuah chiang ve ngai em? Mizoram sorkarin sum a hmuh zawng zawnga a chanve chu amah leh amah inenkawlnan a hmang tihna a ni. Fatuten ruai chawi chanve an ei ang a nih chu. Hei hi kan dinhmun a nih a, tihdanglam kan tum loh chuan kan ram economy hian hma a sawn thei dawn lova. Hetiang renga inrelbawl hi a hlawk (efficient) loh em avangin sorkar hna tullo emaw a tellova hnathawh theih ang ang te hi tihtawp a ngai.

Kei ka lo chik ve chinah Pu Vanlal Ruata leh PRISM-a a thawhpui te chauh hian party ang leh pawl ang chuan sorkar sum renchem leh efficient zawka inrelbawl hi an aupui a. An “Mipui Manifesto” ah te khan uluk taka an zir hnua tha tura an hmuh dan te an ziak nghe nghe. Party-a an inleh hma phei kha chuan party tin te hnenah an duh phawt chuan hmang tangkai turin an pe hial awm e.

Mizoramah hian, sawi ang khan thil hrang hrang kan han sawi thin tak naa, kan buaipui ber tur pakhat chu kan economy hi a ni a. Hei hi kan ngaihthah berte zinga mi niin a lang lawi si. Sorkar hi kum 5 danah kan thlang thar ziah a. Kan sorkar chu a lian tulh tulh a, mahse a efficient tak zel hi kan hre bawk si lo a ni.

Ruling party MLA lehkhathiam tak tak te leh opposition lam te hian hemi chungchang hi legislator an nih angin dan hmangin address thei se a tul takzet. Hetia social media-a kan lo sawi te hi sawichhuah loh ai chuan a tha a, mahse action la tu kan nih loh avangin action la theite hian action an lak a ngai a ni. A nih loh chuan kan sorkar hi sorkar thawhhlawk (efficient) ah a chhuak thei ngai lovang, kan ram pum mai hi sorkar-a innghat deuh thup kan ni bawk si a.

Sorkar sum hman tul miahlohna nia I hriat te hi a awm mial lo maw?

Comments

Lalkamlova

Sorkar hnathawk te hlawh pun a vang a hek ta lam a ni chiah lo ang an hlawh tur chu a hranpa liau liau ani zawk e

Head hran daih a ni Sorkar in a hnathawk te hlawh tur a chhut chhuak sa a central ah a va dil a ni zawk e

Ram chhung a hnathawh ngaihna tur dang chu a hrang in an dil leh mai a ni zawk

PW D kawng sialna tur a a dil chhuah kha Sorkar hnathawkte hlawh ah a pe ngawt theilova

Lo neihna Agri lam a tan budget lo kal hi Sorkar hnathawk te hlawh a hmang ngawt theilo bawk

Miretheite insakna tur kha hlawh a tan a hman theih a ni bawk lova

Sorkar in ram hmasawnna tura Central a a dil chu sorkar hnathawkte hlawh tur nen a inhen tawk lek tihna a ni zawk ang e

Lal Rimawia

Sorkar hnathawkte hi ram leh hnam hmasawna atana hmanraw pawimawhber pakhat niawm tak an ni.Vawiin Ni thleng hi chuan,chutiang chu a la ni silo anih hi.Chuti a hnekin,Mipuite harsatna thlentu Sorkar Deptt.leh Officer te hi an lo ni zawk hlauh palh anih phei chuan.Mipui kan fing ve zel a, Sorkar inrelbawl dan, A hnathawkte a enkawl dan, a hnathawkte hnathawh dan ah angai angrenga kan kal chuan..Mipui bet tawngkhawng lutuk thawhharh hluai hun hi a la thleng lovang tih pawh sawi harsa tak ani.

Mings H. Hmingmawia

sawrkar hnathawk awm lo se chuan mizoramah hian sum lengvak a tlem awm hi ka tia, private hospital leh firm vel hian employer hi a chhawr sang ngam si lo a, agriculture a sum dah hi a hranpain a kal lo, project leh hnathawk hlawh chu a hranin a kal a, budget san chhan pawh thil danga gman tur sum budgeta dah a tam loh vang a ni mai a, sawrkar hnathawk in sum an ti hek anga ngaih fo hi chu a fuh lo hi ka ti thin,, hman deuha sawrkar hnathawk an hrut tlem pawh mizote tan a pawi tawh nak laiin mizor tan chuan sawrkar hna hi tam se a la tha ber mai

Danga Ralsun

Hman deuh khan, Officer pakhat chuan, an Dept.-ah chuan, thawh tur nei lo nghawngawrh awrh phak ṭhiau sawmhnih chuang an awm thu a sawi a. Tun hun, computer hman hnu phei hi chuan, sorkar hnathawk ṭhenkhat hi chu pension tir pawha pawi lo, pension mahse hna khai lak chuang lo tur an awm nual hmel a. Chutih laiin, sorkar thar hian, an mi leh sa te duhsak theihna zawnga, a awm lai tihtlem chu sawi loh, siambelh zel hi an tum a nih chuan, economics ṭhan aiin party chakna tihpun kha an tuipui tihna pawh a ni thei ang chu. Chuvangin, Department tin te enfiah a, games khel hman em em engzat nge awm / online reng hman engzat nge awm tih finfiah a, voluntary pension a kal ṭhen tir hi a fuh ang.
Thawk mang lo a pawisa tel kan tum ta fo mai te hi heng hnathawktu awl lutuk lo tam zel entawn te hi a ni thei hial a ngem ?
(Thlirna tlang dang aṭangin..).

Aaron Ramsiam

He thil hi chu mipui rilru ah Sawrkar hna thawh ai mahni kutkawih a dinchhuah nachang kan hriat hunah a reh chauh ang. Hlawh tihpun leh allowances hrang hrang aiah StartUp Business, Agriculture, Horti leh Husbandary hrang hrang ah te capital investment interest tlem zawk a Sawrkar in scheme tamtak mipui te hriatah a tlangzarh ngam hun hunah ani mai. Rilru sukthlek a dik tawhloh zia lanna pakhat chu Sawrkar hnathawh an aim anih loh pawn Party ruihchilh in contract chhe te ah kan lo innghat leh zel hi ani! Taihmak inzirtirna lam aiin sum hmuh dan awlsam leh sum sem kan in zirtir zel chu ani sia leh.

Cvl Ramnghaka

Hah taka kawla nichhuak chhiara hnathawk thin Chhungkaw eizawngtu tamtakten thlakhatah cheng singkhat an lakluh loh laiin sorkar hnathawk tamtakte erawhin cheng nuai chuangte an hlawh ania, thenkhatte phei chu an la thatchhe em em zui

Chhana Vanchhawng

Education department pawh hi REFORM a ngai. Primary school leh Middle school 30 pawh nei tling lo hi an tam lutuk. Hengte hi sum luanralna lian tak a ni chiang khawp mai. Private school ah naupangte an tam lutukkk. Chuvangin Zirtirtu lak thar pawh ngailo hian a siamrem theih hial in ka ring.

Manuni Chhakchhuak

Inrenchem chu sawiloh, an sahmim puarna tur chuan budget te chu tiral vek mahse pawi an ti dawn em ni, sawrkar hnathawk hlawh ti tlem chu sawiloh, an hlawh pun dan ringawt a nih hi an buaipui😂😂

Tbc Lalvenchhunga Tbc VaiVa

Hei hi 2018-19 Mizoram Annual Financial Statement phek 22 na a mi a ni a. A sawifiah chiang ber awm e. Headwise chu a hnuaiah hian a lang a. Capital expenditure hi 21% chauh a ni a. Revenue expenditure /sawrkar inrelbawlna ah hian 78% vel a kal niin sawrkar ngeiin a chhu lang. Pie chart hnuai zawk ah hian en I la, khawi chin hi nge capital expenditure tih pawh a lang chiang a, capital assets tur atan budget 2% chiah 2019 ah dah a nih hmel

Manuni Chhakchhuak

Inrenchem chu sawiloh, an sahmim puarna tur chuan budget te chu tiral vek mahse pawi an ti dawn em ni, sawrkar hnathawk hlawh ti tlem chu sawiloh, an hlawh pun dan ringawt a nih hi an buaipui😂😂


Aside | Posted on by | Leave a comment

TULUM KHAM BUNG HUAI

Vanhnuailiana khua Tualte In sang Lal In a dung hlam za sawmnga a sei, a vang hlam sawmhniha lian leh Tualte khaw Zawlbuk pathum lai mai chu Tualte khua-ah chuan a langsar lurh mai a. Lal In leh Zawlbuk kûl run mai chuan Tualte khua chu arpui-in a no a awp ang mai hian a uap khup hian a lang a.

Thing leh raw innawh lai tih takah chu’ng hun lai chuan ral a ti-in tuichawi leh thingphurh ilo fahranah pawh ralmuang lo reng rengin hmeichhiate’n an hun an hmang a, Vanhnuailiana’n khawchhak pawih ral lakah do a lak lai a ni a, rawlrala che te an hlauhawm em em mai a, nunau pawh zuah loa an lu lak an chin avangin pasaltha ngah khua an bawh ruih ruih a, Vanhnuailiana khua-ah chuan pasaltha hmingthang tak tak, Zampuimanga te, Vanapa te, Chawngduma Tlau te, Zabiaka te leh pasaltha dang ral sam kuai pha chin ngat pawh an tam avangin khua pawh a ngah chak hle a, Awnnu atanga Tualte a kai meuh chuan In sang chuang an kai der tawh a ni.

Tualte atangin Lungdup kai an tum a, an ram zuan tur en thlithlai turin Vanapa hovin pasaltha sawmhnih zet leh Lal Upa pahnih nen Lungdup ram pan turin an inpuahchah ta a.
Lungdup hi Kelkang khua atanga hmar lam a ni a, Kelkang Biak In atangin chiang takin a lang thei a, Dilkawn ram chhunga awm a ni a; ramngaw dur dup mai a la ni.
Khuangchawi thla a de tan tihah chuan zan sarih fai nen an chhuak ta a, tlangdung zawhin an kal ngar ngar a, sa hnu a tamin sapui kut hrûkna hnuhma a tam mai a, ral nen intawk thut thei reng an nih avangin beng an chhi ngun em em mai a, an Awlan ngul sei reng ruang nen chuan inring rengin an kal miah miah a.

Tuipui an pel a, tuipui atanga rei fe an kal leh hnu chuan khua a tlai lam ta bawk a, riahbuk an sual ta a, an riahbuk sualna atanga chhak lamah chuan bung lian em em mai hi a ding khung mai a, bung hnuai maiah chuan puk bel hul mai hi a kaw bawk a, a landan chuan a nelawm hranpa loh hle mai a. Eng huai huai emaw awm duhna chi tak niin a lang a, chu lai vel chu chhun pachangah pawh ni a hmu ngai lo tih hriat taka hmun chukchurudun hi a ni a.

Chu’ng ho zingah chuan tlangval pahnih an kal ve a, ral pawh la that lo, pasaltha hnung zuia ramchhuak ve thin an ni a, Lalkhuma leh Lianhnuna te an ni a, mawngzang leh taima tak an nih avangin an hruai tel ve fo thin a.
Zanriah an ei kham a, an riahbûk kawtah chuan meipui an chhep a, an titi luam a.

Chutihlai chuan an chhaka Bung zar atang chuan thawm mak tak hi a rawn ri su su mai a, a reh leh mai a, an phawklêk tlang hle mai a, Lianhnuna chu a thlabar viau mai a, mahse a dawihzep bika tan a duh loh avangin a intipachang hram hram a.
Chawngduma chuan, “Enge ni na vei, ka han finfiah ngat teh ang, Lianhnun min rawn zui rawh,” a ti a, Lianhnuna chuan hreh tak chungin a zui ve mai bawk a, a rilru chuan chulai hmun chu chhuahsan vat a chak a, Chawngduma zui chu a chak mawlh lo a ni.

Bung hnuai chu an han thleng a, thil engemaw rim thang nghur mai hi a lo nam vung vung mai a, Lianhnuna awm chu a nuam lo takzet a, Chawngduma chuan a meichher chuan a han en vel a, mahse engmah hmuh tur a awm si lohah chuan chhukthlak leh mai chu an tum ta a.
Lianhnuna chu Chawngduma hnungah chuan a kal a, a inpal khut mai a, a tlu nawk a, kut vawt ngiak nguak hian a hmui chu a rawn hup chut a, Chawngduma chuan thawm engmah hre lo chuan a kal miah miah a, Lianhnuna chu au chhuah a han tum a, mahse a thim mup a, nikhua a hre zui ta lo.

Chawngduma chuan a hnunga kal chu Lianhnuna ni ngei turah a ngai a, a thiante hnen a zuk thlen chuan a han lehhawi a, Lianhnuna chu a hmu ta lo. A thiante pawh chuan, “Khawnge Lianhnuna kha?” an lo ti a, Chawngduma chuan, “Ka hnungah khan a kal ve reng emaw ka tia sin, a ke pen ri pawh ka hre reng alawm,” a ti a, an han au vak vak a, mahse thehhmeh ang hmiahin a reh tlawk tlawk a.

Tuibur hmuamda pawh a tling lo ang tihah chuan an chhaka Bung zar chu na taka sâwitu awm ang mai hian a insâwi luai luai mai a, Lianhnuna aw ngei mai chuan, “Ka nu, ka nu, min chhan rawh,” a rawn ti chuai raih raih a, Zabiaka chuan, “Lianhnun, lo zam hlek suh, i thiante kan awm e,” tih pah chuan inhrosak pahin a bul vela hnim chu a han sam buan buan a.

An vai chuan Bung lam chu an pan a, an silai chu an kap thuai thuai a, thlang lama kawrah chuan Lianhnuna thla chu a ai tuar tuar mai a, Vanapa chuan, “Lianhnun, hlau reng reng suh, Vanapa ka ni ngai e,” tih pah chuan a chem chuan hnim chu a sam buan buan a.
Lianhnuna thla chu a rawn hnai zel a, an awmna bul a rawn thlen chuan a ai thawm pawh chu a reh hmiah a, Zabiaka chuan, “Puk chhung lam saw va lut chhin ila,” tih pah chuan a lut a, puk chhung chu a lo bel hul mai a, “Kha keimah Zabiaka ral hmaa zam ngai lo,” tih pah chuan a silai a han hmet puak dur mai a, a meichher ken chuan puk chhung chu a han en vel a, puk kilkhatah chuan Lianhnuna chu a lo mu reng a. Chawngduma leh Vanapa an rawn lut ve nghal a, Lianhnuna chu an zawn chhuak a.
An riahbukah chuan an zawn thla a, Lianhnuna chu a vawt vek a, a thla ai pawh a reh a, an han sawi nawk nawk a, a harh thei lawk lo a.

A taksa chu a rawn lum tan a, a rum tiah tiah a, a rawn harh ta hlawl a.
Lianhnuna chuan, “Kut hit thlur maiin min rawn hup chut a. Hneh taka lak ang lawp ka ni a, vawilehkhatah puk chhungah min theh thal nawk a, ramhuai tam fe mai hi an lo ding a, an mit te chu a tung sul mai a, an Lalpa hma-ah min din tir a, min melh kul mai a, ‘Engatinge ka phalna la miah loa ka ram chhungah in riah? That phiar tur che u kan ni asin,’ a ti khur khur mai a, min ngaidam rawh i ram chhung a ni tih kan hre lo a ni, ka ti a, ani chuan, ‘zanin bak in riak tur a ni lo, naktukah in chhuahsan ngei ngei tur a ni, a ti a, ka mitkhap kar lek chhungin an bo duak mai a ni,” a ti a.

An inen hrek hrek a, Lianhnuna chu mi dik tawng tlem leh dawt sawi mai mai chi a ni lo tih an hre theuh a, dawt a sawi lo ang tih chu an thiltawn atangin an hre theuh hlawm a.
Zingkhua a var veleh chuan an kal nal nal a. Chulai hmun chu an tlawh leh tawh lo. Chu’ng pasaltha rual Zoram pum dengchhuak khawpa huaisen leh hmingthangte thil tawn chu a hria apiang te’n mak an ti theuh mai a ni.

Aside | Posted on by | Leave a comment