Khualzin mite pan ber hmunah siam tum in i thawk tlang ang u..” Prime Minister Narendra Modi

“Mizoram hian Khualzin mite hip tura mamawh zawng zawng deuhthaw in nei sa vek a…khuazin mite pan ber hmunah siam tum in i thawk tlang ang u..” Prime Minister Narendra Modi

16th Dec khan Prime Minister Pu Narendra Modi chuan  chhungkaw 84,000  hnena kawlphetha chakna pe thei tura chhut, 60 MegaWatt  Tuirial Hydroelectric Power Project, 251,000,000 units kawlphetha chakna siamchhuak thei chu a hawng a. Mizoram mipui tan tangkai taka hman tur in Zoram mipui hnenah a hlan a; Mizoram chu India hmarchhak State zinga mahni state khamkhawp aia tam Kawlphetha siamchhuak thei state 3-naah a puang.

Prime Minister Pu Narendra Modi-a chuan Tuirial Hydroelectric Power  Project chuan Mizoram tan kawng tinrengah hmasawnna lian zawk  a nawrchhuah a beisei tih a sawi a. “He project kan hawng hian Hmarchhak bial tana kan intiamna leh kan thiltum hmasawnna nasa zawk siam a ni tih a ti chiang a; project kallai mek pawk a theih ang a rangin kan bawhzui zel ang; DoNER chu in kawtchhuahah kan rawn sawn tak avangin heng hmarchhak bial hmasawnna tura project rawn thehluh te hi a rang lamin  kan rawn ching fel zel dawn a ni”, a ti. Tuirial Power Project tuikhuah chuan kawlphetha a siam mai bakah lawng hmanga thingtlang khua te inkalpawhna te a rawn siam dawn a; Sangha vulhna liantham tak a ni thei nghal a; tui intur thianghlim lakna remchang a siam dawn a; Eco-tourism tan pawh remchanna a siamsak dawn a ni tih a sawi a. “Mizoram in Kawlphetha a siamchhuah theih zat chu 2100MW a ni nachungin  a siamchhuah tawh chu tlem te chauh a ni a; Mizoram hi Power Genrerating State a nih lohna chhan a awm  lo a; power tam zawk siam kan tum rualin Electric thirhrui thui zawk leh tam zawk thlun pawh kan tum a; kan tum ber chu power a intodelh state chauh ni lovin kan thirhrui thlun te hmanga India ram hmun thenkhat kawlphetha indaihlohna hmuna semchhuaktu nih kan tum a ni”, a ti. Central Sawrkar chuan Rs 1000 Crore hmangin Hmarchhak bialah Electric thirhrui thlun kual hna a thawk dawna he project ah hian Mizoram pawh a tel a ni” a ti.

Prime Minister chuan “Kum 2022 ah India in a zalenna kum 75 a tlin ropui taka a lawm theih nan India chu kawng tinrengah a inpuah chah mek a. Hetih  hunah hian kan ram chu  New India tih theih a changkang turin a awm tawh dawn a; “Kan thil tum tih hlawhtlin nan hian Start Up India, Make in India, Digital India, Swachh Bharat  Mission leh flagship programme tam takah  theihtawp chhuah mek a ni a; hengah te kan hlawhtlin leh zual nan  innovation leh entrepreneurship te hi kan chakna hnar a ni tih hriain kan ngai pawimawh a; innovation leh entrepreneurship parchhuahna atan hun remchang leh hmun remchang kan siam mek a ni”, a ti. “India khua leh tui tutepawh; hmeichhia leh mipa emaw, hnam ang emaw, sakhuana behchhan in emaw inthliarhranna awm lo a remchanna in ang tlang vek siam sak a, a thiam thiam , a tha tha dinchhuahna tur kan kan buatsaih mek a. Ka sawrkar chuan Competitive leh Cooperative Federalism a kalpui a; mahse state hrang hrangte intihsiakna chu thianghlim  leh hrisel ni se; State te hi ram hmasawnna nawr kaltu ber an ni tih kan hria a. State tenau ten State lianzawk te an el ve theih nan Centrally Sponsored Schemes kan intum sem dan pawh 90:10 in Hmarchhak bial tan chuan kan kal chhunzawm pui a; India rama District rethei deuh 115 kan thlanga chhuaka chung te chu nasa tak a tanpui kan tum a; chung zingah chuan Mizoram chhunga district thenkhat pawh a tel a ni”, a ti.

Pu Modi-a chuan nimin khan a Cabinet in ‘new central sector scheme’ a siam tih a sawi a; hetah hian North East Regional Infrastructure  Development Scheme(NERDS) pawh a tel tih a sawi a. “NERDS-ah hian Physical Infrastructure – Power, Water Supply, inkalpawh leh inthlunzawmna lam(connectivity) leh Tourism tihchangtlunna lam awmna bakah Social Sector  Project – Education leh Health( Zirna leh Hriselna) lama hmalakna tur ruahmanna siam a ni” a ti. He scheme thar hi 100% Centrally Funded Scheme(central in sum a tum vek tur) a ni ang tih a sawi a; “he scheme atan hian Rs 5300Crore Central in a dah dawn” a ti bawk. Pu Modi-a chuan NLCP hnuaia project kal mek te pawh March 2022 a zawhfel vek a nih theih nan puihna pek chhunzawm a ni dawn tih a tarlang a. Connectivity chu hmasawnna kawnga Hmarchhak bial ti thuanawp tu a nih tih sawrkarin a hriat thu sawiin “National highway te siam nan sum cheng vaibelchhe sang tam tak sen a nih tawh thu sawiin hmalak chhunzawm nan Special Accelerated Growth Development Project in the North East hnuaiah  Rs16,000 Crore chu sanction a ni leh dawn” a ti. “Hmarchhak bial tih hmasawn nan kum 3 chhungin Rs30,000/-Crore  ruahman a la ni leh ang” a ti bawk.

Hmarchhak bial state khawpui zawng zawng te chu Indian Railway Map-ah tarlan Sawrkar chuan a tum tih a sawi a, India in Rail Line project thar 15 hnuaia relkawng Km 1385 a sei, Rs 47,000/ Crore senga siam a tumna-ah Mizoram pawh a tel tih a sawi a; “Aizawl khawpuiah Double Gauge relkawng a la lut dawn a ni” a ti. Hei hi  India sawrkar in ‘Act East Policy’  vung taka a kalpuina hmanraw pakhat a ni tih a sawi a. “Mizoram chu India tan South East Asia sumdawnpuina tur atan kawtchhuah remchang ber a ni a; ramdang 2 – Myanmar leh Bangladesh te insumdawntawnnaah te thleng pawh, Free Transit Point-ah a la remchang leh cheu a; Mizoramin heng zawng zawnga a hlawkpuina tur hi a liantham takzet a ni” a ti.

Pu Modi-a chuan India in Bilateral projects a kalpui mek te chu zawh tep an ni tawh thu a sawi a; “chung zingah chuan Mizoram kaihhnawih Kaladan Multi Modal Transport Transit Project, Rih-Tedim Road Project leh a dang te chu Mizoram tan chauh ni lo Hmarchhak bial hmasawnna atan hmasawnna liantham rawn thlen tur te an ni” a ti. “Ziak leh chhiara in sanna te, in ram mawina te, in zingah Saptawng thiam tam tak in awm avangte hian Mizoram hian Khualzin mite hip tura mamawh zawng zawng deuhthaw in nei sa vek a. Adventure tourism, Cultural Tourism, EcoTourism, Wildlife Tourism leh Community Based Rural Tourism-ah te hmabak eng tak in nei a. Tourism hi eizawnna siamtu lianber in state ah hian a la ni thei mai awm e.

Kum 2 chhung khan Mizoram a Tourism Project 2 atan cheng 494 Crore ruahman a ni a; chu chu Eco-Tourism leh Adventure Tourism atan a ni a; hemi tan hian Cheng115 Crore pek chhuah a ni tawh a.  Central sawrkar chuan khualzin mite hip turin Mizoram a National Park te leh Wildlife Sanctuaries te thawm thatna leh enkawlna atan tanpuina pek a tum a. Mizoram hi khuazin mite pan ber hmunah siam tum in i thawk tlang ang u”, a ti.

Prime Minister Pu Narendra Modi chuan Mizoram chhunga mau te chu tunhmain Forest dan khirh tak vangin hralh a harsa thin tih a hriat thu sawiin siam that a ni tawh a ti a. ” Mizoram chhunga mau te hi a huan neitute tan permit dil kher ngai tawh lovin in hralh thei a, hmanruaah siamin sumah in chan tir thei tawh ang”, a ti.  Mizoram chu  carbon negative state leh 100% Organic state ni thei nia a hriat thu a sawi bawk a ni. Mizoram chu infiamna khawvelah an chhuanawm tih sawiin infiamna khawvela Mizoram hlawhtlinna te tarlangin Mizo football khelthiam te leh infiammite an hming hmerha lam chhuakin an hlawhtlinna a chhuan thu a sawi a. Aizawl Football Club hlawhtlinna ropui a tih thu sawiin “Mizoramin football a thiamna chu khawvel mite hriata ‘Global Identity’ siam sak tur khawpin a sang a ni” a ti. Mizoram in football thiltihtheihna nelawm leh duhawm ‘footbal’s soft power’ a nei tih sawiin Mizoram mipui zawng zawng Krismas leh Kumthar hlim tak a hmang tur a duhsakna a hlan nghal a ni.

60 MegaWatt  Tuirial Hydroelectric Power Project hawnna inkhawm, Sipai Lammual a neihah hian Union Minister of State pahnih –  DoNER Minister Dr.Jitendra  Singh leh Power Minister(Independent Charge) Pu R.K Singh te pawn thu sawina hun an hmang a. Power Minister Pu R.K Singh hian Prime Minister lawmna thusawiin DoNER Minister Dr. Jitendra  Singh chuan lawmthu sawinain 60 MegaWatt Tuirial Hydroelectric Power Project hawnna inkhawm a khar thung a ni.

60 MegaWatt  Tuirial Hydroelectric Power Project hawnnaah hian Mizoram Chief Minister Pu Lal Thanhawla chuan Mizoram mipui aiawhin Prime Minister Pu Narendra Modi chu lo lawm tih a sawi a, hmasawnna ruhrel liantak Mizoramin a neih theihna tura hnathawktu zawng zawngte chungah lawmthu a sawi bawk a ni. Chief Minister Pu Lal Thanhawla chuan Mizoram in kawng hrangah midangte umphak tura theihtawp a chhuah thu te, India rama state ralmuang ber a nih theih chhan te, state faiber pawl a nihna te leh boruak thianghlim tak a la awm thu te bakah Central puihnain chak leh zuala Mizoram chuan ke a pen theih thu leh theihna sang tak Mizoramin a neihte a tarlang a. Mizoram dinhmun chiang zawka rawn hmu turin Prime Minister Pu Narendra Modi chu zan 2 tal riaka rawn zin leh ngei turin a sawm a ni.

Prime Minister hi Mizoram Chief Minister leh Mizoram Governor Lt Gen Nirbhay Sharma(Retd.) ten Lengpuiah lo dawngsawngin Lammual-ah an rawn kalpui a. Lammualah hian Minister te bakah Central leh State Official pawimawh te leh mipui nen hun hman a ni a. 60 MegaWatt  Tuirial Hydroelectric Power Project siamtu NEEPCO chuan Telivision Screen lianah an Project chungchangte mipui hmuh turin an tarlang a ni.

Advertisements
Aside | Posted on by | Tagged , , , , | Leave a comment

LALRINPUIA AN MAN CHUNGCHANG A THU AWMZIA

Mizoram Table Tennis Star Indian National Player Lalrinpuia Kum 18 s/o Lalchhuankima Maubawk Veng chu Mozambique ah a țhianpa Mizoram Table Tennis Star vebawk Lalhunhlua New Capital Complex nen New Delhi a an chenna hmun a țangin African mihang pakhat in bia in an inkawm a, Mozambique a kalna tur ticket ka nei a induh chuan a thlawn in inkal thei ang ati a. Tichuan anni țhiandun chuan lawmtakin kan  hman lai tak ania kal ila tiin an kal dun ta a.

Mozambique hmun hrang hrang hmun lar leh tourist ten an tlawh țhin te tlawh dunin ni hnih an cham hnu in India ram pan in lo let an tum ta a. Mahse an ticket neih hi ni indawt a nita a. Hunhlua hi rawn thlawk haw hmasa in mihang inchei smart thlerhthlawrh takmai hian hei hi khawngaihin minlo ken ta che, Delhi ah ka chhungten Airport ah anlo lam ang  tiin thawmhnaw niawm tak chu a thawn a, ani pawh hian ahan dap thuak thuak a pheikhawk niin ka hria a tiin amah Nunhlua hian min hrilh.

A tuk a Rinpuia rawn haw pawh chu thuamhnaw minlo kensak ta che tiin an rawn kentir leh a, mahse ani hi Mumbai Airport ah lo man in a thilken, damdawi phalloh thil a hriat hauhlo a thil pawitak a ken chu anlo mansak ta a ni.

A man tute ngeipawn diktakin ama ta a nih an ring lo a, tin, amah hrechiangtu India ram hmun hrang hrang ami tepawn a case riptak hi a neitu ngeiin mawh a phurh theihnan theihtawp chhuahin hma anla mek zel bawk a ni.

Vawiin lamah pawh theihtawp chhuahin India ram hmun hrang hrang a Mizo Welfare te leh Officer awm te, amah hmangaih a lainattu a mizo pui hmun hrang hrang a awmten theihtawp atan anchhuah reng a. Table Tennis Federation of India leh infiamna lam a India ram a Sport Association hrang hrang ten Rinpuia tan an theihtawp an chhuah reng bak a. Delhi Chief Justice hlui a inluahna pa pawn tunah hian dan lam mite berawn in hma a la reng bawk a ni.

Mizoram State Sport Council a thawktu te leh a bik takin an hotupa Pu Tlana leh MTTF te leh theihtawp a atan a hma latu mimal leh pawl hrang hrang te chungah a nu leh pa chuan lawmthu ansawi bawk a ni.

Vawiin khan Sport Minister hmu turin anu, kei, Rinpuia țhianpa Nunhlua leh Zico-a ten Sport Minister Sport Dept. lam a an hotute thurawn leh an lo hrilhlawk tawh angin hmuh kan va tum a, chhungkaw pawimawh awm thut ah kan Sport Minister alo chhuak hman a, kan in tawng fuh talo a, Minister PS nen thu haw lam kal lam inhrilh hria in CM leh Home Minister leh Sport Minister bakah DGP te hmu turin kan in thurawn a Prime Minister lokal tur vangin kan hmanhmawh ang erawh chuan thil tih rup rup a harsa viau mai.

Awle, Phailam ațangin phone call leh mithiam leh milian pui pui te hnen ațangin thurawn amah lainattu hrang hrang te hnen ațangin dawn reng ani a, Kohhran leh NGO hrang hrang ten a thlavang hauhna thuchhuah PR National News thlengphak kan vawrh darh chuai chuai a pawimawh in chu chuan kori a tuhle turah ngaih ani.

Mizoram Sawrkar, Mizo ramchhung leh rampawn a Mizo awmte, Mimal leh Mizoram chhung leh India ram hmun hrang hrang a pawl leh mimal tinte Rinpuia tan beitu te zawng zawng chungah Rinpuia nu leh pa chuan lawmthu ansawi takzet zet ani.

Mumbai khawpawn Mumbai LO in a sawidan in Mumbai khawpui hlat tak leh tlawhpawh buaithlak tak thingtlang khaw pakhat ah Rinpuia hi khawhar takin Police ten ankawl mek a ni.

Țawngțaina lamah atan theihtawp ilo chhuahsak ve dawn nia.

Aside | Posted on by | Tagged , , | Leave a comment

RANGKACHAK TLANG MAN A NI

Dec 11 khan rangkachak tlang (gold bar) kg 19 man a ni. He rangkachak hi cheng ₹ 6 vaibelchhe man hu vel niin, Saraighat Express, Guwahati Railway Station a chuang passenger 4 te kutah man a ni.
Mi 4 man te hi
1) Laltandika,
2) Lalhmingmawii,
3) Lalnghinglovi
4) Sailohmuni, te hi an ni.
Guwahati Police te’n an 4 hian an kawl a ni.

Aside | Posted on by | Tagged | Leave a comment

HLAWH PUN NGE PUN LOH THA ANG? by Vanlalruata, President, PRISM

• Mizoram mipui zat
• Sawrkar hnathawk zat
• Sawrkar hnathawkte budget eiral zat.

Krismas lawmna ruai kan theh leh teuh ta hle. Fatu ten sa ei zawh vek tum se kan thin a rim lo ang em ni?

Mizoram Budget (2017-18) hi cheng vbc 8,803.10 a ni a. He pawisa hi kan thawhkhawm, kan ta tur liau liau a ni a. Fatu hlui lamah 76.53 % lai a awm a. Ruai tur lamah 22.86 % chiaha awm a. Fatu ten an hlui lama dahbelh tumin hma an la leh hi thil awmdan mipuiin kan hriatfiah thiam a tul a. ‘Sorkar hnathawk te hlawh hi kan innghahna alawm’ ti te, ‘sorkar hnathawkin hlawh an lak loh chuan pawisa leng vel a awm tlat lo …’ ti tea mi thenkhatin an sawi thin hi thu dik letling a ni tih kan hriat ka duh a ni.

Krismas a lo thleng leh tep tawh a. Kohhran Committee in fatu te pawh an ruat leh ta mek a. Ruai theh tur hi kohhran mipui ta tur liau liau a ruahman a ni a, tlangval lenglam leh mi pahnih khat erawh chuan thawhlawm thawh ve lovin an rawn kil ve leh turah ngai ila. Ruai buatsaih thei lo khawpa tlem fatu ruat an awm emaw; indipdala hna pawh thawk sawt lo khawp leh a kawchhung sa tui tha ei zo vek khawpa tam fatu ruat an awm a nih chuan a ruattu Committee mawh a ni ang.

Mizoramah hian kum 2011 chhiarpui khan mihring 10,97,206 kan awm a. Heta tanga an chhut hian mithiam te chuan kum 2017-ah hian mihring nuai 15 vel awm turah an ngai a. Sorkar hnathawk mi sing ruk leh sang hnih vel kan nei a. Sorkar hnathawk pakhatin mi 24 vel zel enkawl thei ang a ni a. Mi za zela 4 aia tam hret sorkar hnathawk an awm tihna a ni a. Fatu kan ngah lutuk nia ngai kan awm thei ang.

Krismas ruai thehna tur kan thawhkhawm ang bawkin kan ram ruaipui thehna tur budget, cheng vbc 8803.10 hi kan thawhkhawm a ni tih mipuiin kan hriatthiam a tul a. Kan budget zing ami cheng vbc 694.64 (7.88%) hi kan chhiah hrang hrang (leiman, zoram chhiah adt.) leh bill hrang hrang (electric bill, tui bill adt.) kan pekkhawm hi a ni a. Cheng vbc 3,107.26 (35.29%) hi thil kan lei apianga chhiah kan chawi atanga Central-a pawisa tlingkhawm atanga min sem ve niin kan pekkhawm tho a ni a. Cheng vbc 4,371.40 (49.65%) hi kan ram leh mipui hmasawnna atana hman tur, kan ruaipui tur atana Central sorkarin tanpuina min pek a ni a. Cheng vbc629.79 (7.15%) hi kan mamawh tur kan neih daih ngang loh avanga hmun hrang hrang atanga kan puk a ni.

He kalphung hi kan inhrilhfiah that loh avangin mi thenkhat chuan kan budget hi kan hrethiam thin lo a. Sorkar hian khawi ami emaw pawisa a nei mai nia ngaiin kan thawhkhawm a ni tih leh kan ta a nihna hi kan hre lo thin a. Kan budget hi kan ta tur, kan ruaipui thehna tur, kan thawhkhawm, keimahni tana kan thawhkhawm a ni tih hi kan hriatchian tlan a tul tak meuh a ni.Kan ruai theh tur atan sa bel 100 lai an chhum vut vut avangin ruai theh tur pawhin phur takin kal ta ila. Mahse fatu ten bel 76 chu an chan atan tiin lo dah tha daih se. Ruai atan bel 22 chauh lo dah ta se thinrim lo kan awm lovin a rinawm a. Bel 22 ami chu la rawn eiru se emaw, bel ṭhenkhat la rawn chuh leh se chu fatu kutthlak ngam lo kan tlem viauin a rinawm.

Kan budget sum kan hmanna hi enchian chuan mipui chan a tlem hle. Kumina kan budget zinga 76.53 % hi sorkar hnathawk hlawh leh inrelbawlna senso hrang hrang a ni a. Sa bel za zinga bel 76.53 hi fatu ten an chang vek tihna a ni a. Hmasawnna hnathawhna tur atan 22.86% dah nia sawi niin sa bel 100 zinga bel 22.86 chu ruai ṭhehnan an rawn thehchhuak ve tihna a ni a. Sum peipun (loans and advances)atan 0.61% dah niin sa bel 100 zinga bel khat pawh tling lo, bel 0.61 chu peipun turin dah a ni a. He peipun tura dah puktu te hi sorkar hnathawk deuh vek an ni zui a. Fatu hlui chu a buk tha leih leih hle.

Hmasawnna hnathawhna tur 22.86 awm hi Finance Minister Pu Lalsawta’n budget speech-a a sawi dan chuan “ram hmasawnna ruhrel pawimawh siamna tur te, loan rulhna tur te, buhfai leina tur te, sorkar hnathawk hnena loan pekchhuah tur” te a la ni zui a. Mi nawlpuiin kan hman tangkai aia nasain sorkar hnathawk ten an la hmang tangkai zual dawn a nih hi.

• Ram hmasawnna hna thawh nan budget aṭanga 22% chauh hman a ni

  Kan krismas ruai tur bel 100 zinga bel 22 leh tlem chauh ruai atan dah a ni a. Chu chu fatu te pawhin an rawn ei ve vek dawn a. Bel 78 deuhthaw chu fatu te tan dah hran a nih chu. Fatu hlui lamah hian kan la pek belh phal em?

Sorkar hnathawk ten hlawh pun an ngen a. Sorkar chhutna mipui hmuh ve theih chinah an hlawh pun a nih chuan cheng vbc 563.22 emaw cheng vbc 800 chuang emaw sen belh a ngai dawn niin a lang a. Chuti a nih chuan a tlem zawk cheng vbc 563.22 hi ngaih belh pawh ni se fatu hluiah cheng vbc 6,949.43 dah ngai dawnin chu chu sa bel 100-a bel 78.94 a ni dawn a. Cheng vbc 800 chuang sen belh a ngaih dawn phei chuan fatu hluiah cheng vbc 7,186.21 dah ngai dawnin chu chu sa bel 100-a bel 81.63 a ni dawn a ni. Engtin nge kan awm tak ang?

Chhiah kan pe hnem tial tial a. Kan budget kum tin a pung a. Kawng enkawl zo lovin hnatlanga siam zel a ngai a. Sorkar building kan enkawl zo lo tial tial a. Police in uniform leh hmanrua an dawng tlem tial tial a. Zirna sikul building enkawlna kan dawn khat bakah zirna hmanrua kan dawng tlem tial tial a. Damdawiin atangin a thlawna damdawi dawn tur a awm ta mang lo a. Sorkarin mipui rawng a bawl thinna- khaw hrang hranga ar chiu te, damdawi sem te a tlem tial tial a. Heng hi fatu hlui buk tial tial vang a ni. Sorkar hnathawk te ngei pawhin an GP Fund dahkhawl pawh an la chhuak hlei thei lo a. An zin bill te, damdawi inenkawlna bill te an la hlei thei lo a. An quarter pawh … Heng hi fatu hlui buk lutuk vang a ni.

Fatu hlui hi kan la tihbuk belhchhah dawn nge kan insiamtha dawn?

Aside | Posted on by | Tagged , , | Leave a comment

MIZORAM TABLE TENNIS (TT) CHAMPION, MUMBAI AIRPORT AH RUIHHLO KG 3.9kg NEN MAN A NI:

Mizoram Table Tennis Champion kum 19 mi lek chu, Mumbai international airport terminal ah ruihhlo methaqualone kg 3.9 zet nen man a ni. An thil man hi cheng ₹ 60 lakhs man hu lai niin an sawi.

Narcotics control bureau (NCB) te chuan, he tlangval Lalrinpuia s/o Lalchhuankima chu nimin (Thursday) khan an man a, December 28, 2017, thleng an custody ah an kawl rih dawn thu an sawi.Puia hi Aizawl a awm niin, ‘Youth Boys Junior title’ leh ‘Youth National Table Tennis Championships, “Dharmasala ah, 2015 khan lo ni tawh a, Mizoram table tennis fraternity star,’ hi thalai tamtak ngaihsan a ni, tiin an sawi bawk.

Hetiang damdawi methaqualone hi a kengtu leh phurtu chu Narcotic Drugs and Psychotropic Substances Act hnuaia man theih niin, Methaqualone dip hi mandrax siamna leh damdawi (drugs) chi hrang hrang siam chhuah nan an hmang a ni.

Tunlai hian Africa ram ah a kal nasa hle niin investigating officials te chuan an sawi.

Tunah hian Puia hi sumdawng/phurtu (cartel) emaw a ti tu ani em tih zawhfiah mek a ni,” tiin Narcotic officials te’n an sawi.

Kan thulaknain a sawidan chuan, NCB officials te hian chiang taka hrilhtu (specific information) awmin, Puia airport atangaa thlawk chhuak tur hi an enthla reng a. Amah an hmuh hian NCB officials te hian chawlh tirin, a thawmhnaw (baggage) an check na ah an dap chhuak ta a ni.

He damdawi dip var hi fing takin trolley bag hnuaia thuhruk niin an sawi bawk a ni. Kan check hian, drugs engmah a kenloh thu a sawi a, Mahse test kit kan hman takah chuan kan man ta a ni,” tiin official te chuan an sawi a. “Drugs kg 3.9 lai hi khawi atanga a neih/ kawl nge tih hi chhui mek a ni,” tiin an sawi bawk a ni.

Aside | Posted on by | Tagged , | Leave a comment

MAMSOL hmangin Mizoram sawhthing KG 1 Cheng 15 in an lei dawn

Apex Bank Chairman Pi T.Lalmuanpuii chuan MAMSOL hmangin Mizoram thar chhuah sawhthing KG 1 Cheng 15 in an lei dawn tih sawiin, Bangladesh lam nen inremna an ziah vek tawh thu leh a sawngbawlna hmun, Bairabi-a an siam mek thu nimin Dec 14 khan Mizoram Cooperative Apex Bank Ltd. Mizoram Youth Summit, 2017 neih-ah a sawi.

Pi T. Lalmuanpuii chuan ram leh hnam hmasawn nana Apex Bank hnathawh hrang hrangte sawiin, Apex bank loan pek hmangin chhungkaw tamtakin eizawnna nghet an neih phah a ti a. Apex Bank hnathawktu zawng zawng Mizo an nih vek bakah, Bank a mipuite pawisa deposit atanga 100-a 70 chu mipuite hmasawn nan loan hmanga an pekchhuah thin thu a sawi bawk.

Thingtlang mite tana awlsam zawka loan pekchhuah a nih theih nan ruahmanna hrang hrang an siam tih sawiin, PACS hmangin mi tamtakin awlsam zawkin loan an la thei tih a sawi bawk. Apex Bank-in Church loan an pekchhuah thin hmangin Mizoramah Biak In 2000 chuang sak a nih tawh thu a sawi bawk.

Aside | Posted on by | Tagged , , | Leave a comment

ZNP in Zoram Peoples Movement (ZPM) nena inchhunfin an remti.

Dec 14 -a ZNP National Council an President Lalduhoma hova thukhawm chuan Zoram Peoples Movement (ZPM) Steering Committee atanga lehkha lut, ZPM-a tel zawngte pawl pakhata inchhunfin chungchanga ZNP ngaihdan sawi tura an tih chu nguntaka ngaihtuah a nih hnu in, pawl pakhata inchhunfin chu National Council Meeting hian a remti a ni.

Hemi hnu hian kum 2017-2020 chhunga ZNP General Headquarters hruaitu tur ZNP Office-ah thlan a ni a, President-ah Pu Lalduhoma chu chuhtu awm lovin thlan nawn leh a ni. Vice President atan mi pathum, Pu C.Laitanga, Dr. Kenneth Chawngliana leh Prof. Thangchungnunga chu chuhtu awm lovin thlan tlin an nih bakah Treasurer atan Julie Lallianzuali chu thlantlin a ni bawk.

Aside | Posted on by | Tagged , | Leave a comment

Mizo ṬBoard (Mizo Tboard) v4.0

MIZO ṬBOARD V4.0 kan phochhuak leh ta niap niap mai.

Version 4.0 danglamna te:
🖌 Icon ka thlâk.
🖌 Full Width, Superscript, Diacritics a type theihna ka dah.
🖌 Diacritic H̲e̲t̲i̲a̲n̲g̲   h̲i̲ type dawnin Q key kha diacritics a ni a. Hmeh karthlâk zeuh mai tur. Kutzungpui veilamin ka hmet zeuh zeuh mai. Engah pawh- telegram, whatsapp, facebook, blog etc. ah a font hi a hman theih
🖌 Character ka remṭha nual mai.
Emoji dahbelhin a buai a, ka dahbelh lo.

            DOWNLOAD RAWH LE
image

A chhuanawm hranlo naa, mizo awmna hmasa ber a nia. Buaithlak ta ber chu Milem edit ka thiamlo lutuk a, a icon hi ka siam mawi thiam der lo a. Ka duhthusamin ka chhuah theilo.

Aside | Posted on by | Tagged , , | Leave a comment

KUM 2020 AH ELECTRIC HMANG CAR ZAWRH HMAN TUM

India sawrkarin kum 2030 ah chuan oil hmang ho car te electric hmang (electric vehicle@EV) a thlak hman vek a tum thu a puang tawh a, hemi denchhen hian
Japanese car makers Toyota kum 2020 ah EV pho chhuah hman an tum thu an puang. Maruti-Suzuki, Indian subsidiary of Suzuki Corporation pawhin nasa takin tan an la a, luxury car makers  Audi, Mercedes, BMW, JLR te pawn EV hi Indian market a zawrh hman tumin kum 2020 khi an tinzawn thup bawk.

Mumbai-a headquarter nei, Sajjan Jindal’s JSW Energy chuan kum 3 lo kal leh tur chhunga EV siam nan crore 3500-4000 an ruahman fel tawh bawk a, 2020 ah an siam chhuah hmasak ber zawrh hman an tum bawk.

image

Nissan, Japanese company pawhin hei hi an tum dan a ni a, anni phei chuan ‘e-power technology’ an tih, petrol car te chu awlsam taka EV car battery charge nana hman theih tura siam an tum a, hei hian charging station (petrol pump a ni tawh dawn lo va) pan buai ngai tur a pumpelh tir thei dawn a ni an ti.

Aside | Posted on by | Tagged , | Leave a comment

MIZORAM NGO HRANG HRANG HRUAITUTEN MAMAWH THLENNA TUR HUN PAWH NEI LOVA PRIME MINISTER IN MIZORAM A RAWN TLAWH TUR HI HNAM INHMUHSITNAAH AN NGAI TIH AN SAWI

Vawiin tlai dar 2:30 khan tlawmngai pawl hrang hrang CYMA, MHIP, MUP, MZP, MSU, NGO Co-Ordination Committee chu Central YMA OB room ah thukhawmin Prime Minister in, Mizoram atlawh tur chungchang an ngaihtuah.

NGO Co-ordination Comtt. meeting thuchhuak chuan ‘Prime Minister zahawm tak Pu Narendra Modi-a’n, 16.12.2017-a Mizoram a rawn tlawh tur chu lawmawm an tih thu an tarlang a. Amaherawhchu, darkar khat pawh chawl lova, Mizo mipuite aiawh a thu thlenna hun pawh awm lova min chhun pelh tur chu pawi an tih thu leh hriatthiam har an tih thu an sawi.

NGO hruaitute chuan hei hi, Mizo mipui hmusitnaah an ngai tih an sawi a. Heti taka Mizo mipuite tana hun neilo chu Prime Minister programme Lammual a neih turah pawh Mizo mipui zawng zawng kal lo turin an in ngen tih tarlangin hun tam zawk, min pek theih hunah tha taka lo lawm zawk nise an ti a ni.

Aside | Posted on by | Tagged , , , | Leave a comment