HOLOCAUST

500-1500AD chhung kha Middle Age an ti a, he’ng hunlai hian Isua thih chhana mawhphurhtir an nih angin Judate huatna a nasa hle a ni. Catholic kohhran siam ţhatna Reformation leh Lutheranism hunah pawh hei hi a hluar chho zel a, Judate chu mimal bakah a huhoa tihhlum an ni ta fo mai a. Hun a kal zel a, kum zabi 19 a lo nih chuan Volkisch Movement an tih mai, chi bing inngaih ropuina chu German leh Austria-Hungary-ah rawn irh chhuakin chu chuan Aryan (India, Iran leh Europe-a thlah chungnung bik nia inngai) thlah ziding nia inhriatna leh hnam dang, a bikin anmahni ela ertu ber nia an ngaih Judaho huatna chu namen lohin a nasa ta a ni.

Indopui Pakhatna khan Judaho huatna hi a chhem alh zual sauh a, mipui vantlang chuan kha indonaah khan German an chak lo tih kha an pawm thei lo a ni ber mai.

Indo a tawp hnu pawha ţangrual pawlte’n an dangchara an rep zui chhanahte khan politician-te, a bikin Juda sumdawng lian leh ram rorelnaa inrawlh phaho chu an puhmawh ber a, chu lungawi lohna chuan kum 1933 khan Volkisch Movement tuaithar leh turin Hitler-a Nazi a au chhuak ta nge nge a nih kha.

Hitler-a’n Aryan thisen firho ‘hak zauhna’tura a hmachhawp lian ber chu Joseph Hell-a ziah dan chuan, “Juda-ho ţingmit” a ni tawp mai a; chu chuan “Shoah” an tih bawk Holocaust, Europe-a Juda mi maktaduai ruk suatna chu a thlen ta a ni. Puitling chauh tihhlum an ni lo a, naupang rilru thianghlim maktaduai khat leh a chanve nunna lak a ni bawk.

Holocaust-ah hian Juda mi ni lo, Romani leh Aktion T4 patients an tih mai pianphunga rualbanlote leh thluak lam fel lote, Soviet sipai an mante, homosexual-te, Jehovah’s Witness-te, Slavs leh Poles etc. tam tak suat an ni bawk.

Hetiang hian kum 1941 leh 1945 inkar khan Nazi Schutzstaffel te hmalaknain Judaho suatna chu ţan a ni ta a, German-in a awp chin Europe ram hmun hrang hrangah, “Juda-te chinfelna” programme chu an kalpui ta mup mup mai a ni.Hitler-a hrohrang a na tual tual a, sawrkar chuan Juda-ho chu society pawnah hnawlin kum 1933 aţang chuan mitângte nghaisakna tur hmun, Concentration Camp an tih chu an buatsaih ţan ta a. 1939-ah indona a chhuak a, Einsatzgruppen an tih mai Specialized Paramilitary Unit-te chuan kum khat lek chhung chuan Juda maktaduai hnih an suat ta nghal mai a. A bulţanna chauh a ni tih lantir nan 1942 kum laihawl aţang chuan Europe hmun hrang hranga Juda mite chu khawmin Concentration Camp-a tihhlum tur chuan Relin an phur khawm ta ruih ruih mai a ni.

Judaho hian an bei let lo a ni loa, ralthuama an khan loh êm avangin an hneh ngang lo a ni mah zawk a. Kum 1943-a Warsaw Ghetto Uprising an tihah phei chuan Juda mi 20,000–30,000 velte chuan an hriam hmuh ang ang khawmin Waffen SS sipaite chu thla khat zet an dangchat a ni.

Nimahsela World War-I phuba lak tuma thi leh thau pawlha inpuahchah German sipai tha chakna chu hneh chi a ni lo a, pitar-putar, nunau leh piangsual chenin Juda mi tawh phawt chu Concentration Camp, ramsa khawsakna ni zawk awm taka hmun hreawm leh rimchhiaah chuan beng khawmin hnathawh nasat leh ei chhiat luat avanga thi hmasate ruang chu ruhro ni zawka mawi a la damate chuan hnuk khawmin an hal mup mup ţhin a; hawina lam apiangah ruang chu a intiang vum el ul ringawt mai a ni.

Hnathawk tlaka an ngaih loh tam tak chu ‘Ur Hlumna Pindan’ (Gas Chamber) panin, silai leh talhfiak nen naupang pawisawi lote chu an khalh khawm a, a tahtawla an thlan chhuah hnuah hrawka hnawh chi gas hak hlum turin nau hnute tui pe lai pawh an nawr lut a; chutiang chuan Juda maktaduai eng emaw zat chu an suat ta miah miah mai a ni.
.
a tlawm hnu khan “Mihringin a mihringpui vek laka a tih atan chuan a rapthlak tawpkhawk e” tih khawpa che rawva SS officer-te hi theih ang anga chhui chhuakin, rorelsak an nih hnuah an tihlum ta nghauh nghauh reng a; a album aţanga chu’ng mi rawng berte zinga a phusa ber pawl nia rin Hocker-a pawh chu a chanchin kimchang chhui ve niin kum 1939-a 9th SS Infantry Regiment a zawm thute, 1940-a Neuengamme Camp-a Commanding Officer a nih thu leh heta ţang hian 1943-a Majdanek leh 1944-a Auschwitz Concentration Camp-a an sawn leh hnuah Soviet Red Army leh Allies sipaite’n hnehna hla do chhama January 1945-a an rawn phin darh khan document lem siamin a put chhuak ta a ni.

Nimahsela he Album chhar a nih takah hian Concentration Camp-a SS officer pakhat, camera hnungchhawna tiang nena Gas Chamber-a lut tur a thliar lai thlalak chu hmuh a ni ta a. He officer thla hi hnung zawnga lak ni mahse a pianzia chuan Karl Hocker-a a an em avangin, indopui tawp hnua SS Officer-te rorelsakna Frankfurt-a neihah inhnamhnawihna a neih lohzia nasa takin sawi mahse Forensic thiamna hmanga chhui a ni ta a ni.

Thlalakah chuan Hocker-a nia hriat bula Nazi sipai ding chuan khatihlaia hman lar tak rifle Gewehr 41M an tih chu a keng a.

Angle hrang hrang aţanga zira, an hriat sa chu Rifle sei zawngte, a boot bun san zawng, tiang ken sei zawng leh thlalak aţanga Rel kawng inkar zau zawng ngaihtuaha a hnai zawka lo lang Officer kar zau zawngte nen lama an chhuidawn bakah hmalam hawia a thlalak nena an han din duntir ngial hnuahte chuan Hocker-a ni ngei chuan hria-in hremna lekkawh ngei pawh an tum khawp mai.

Nimahsela amah a ţan tlat avang leh finfiahna tak a awm theih si loh avangin kum 1965 khan Officer dangte a ţawiawm avang tala manin kum 5 chhung tantir a ni ta chauh a, 1970 khan chhuak lehin a pension thlengin Cashier hna a thawk zui ta a ni.

A tan chhung leh a chhuah leh tak hnu thleng pawh hian thuneitute ngaih chu a ţha thei chuang lo a, a chhuina hi kalpui zel tho niin kum 1943 leh 1944 inkar khan Hocker-a hian nunau ur hlumna tur Zyklon B poison gas, kg 3,610 lai mai chu Hamburg-a Tesch & Stabenow aţang a lei nia hriat a ni leh a, finfiahna chiah awm lo mahse kum 1989 khan German Bielefeld district court chuan kum 4 tang turin a hrem leh ta a ni.

Hocker-a hi kum 89 mi niin 2000 kum khan a thi a, a thih thleng hian Juda suatna rapthlak, a bikin gas-a nunau ur hlumnaah chuan inhnamhnawihna a neih loh thuin a ţang tluan a ni.

Concentration Camp dam khaw chhuak pakhat erawh chuan SS Officer zingah chuan “Hocker” tia koh ţhin an awm ngei thu a sawi thung.

Chuck Chuck Chuck

Aside | Posted on by | Leave a comment

NGO NANA NA…

NGO NANA NA…
27th April

A sakhmingah pawh Sorkar tellohna pawl, Non-Government Organisation a ni tawp mai. Mahse…

PAWL HMINGAH KAN DUH TAWK –
A hminga Non-Govvernment tih chin chiah hi kan duh tawk a, Direct in Sorkar tello mahse Sorkar mi leh sate in chhek arbawmna hmun a ni ta ber. A hming chu NGO ni uah mahse a mihringate chu Sorkar mi leh sa an ni fur thung.

HRUAITUTE VE THUNG CHU –
Ram pum, vengkhat leh veng then te zawka hruaitu chin zingah chuan Sorkar hnathawk an inphum teuh a, phusa sa an ni emaw tih mai tur a ni. A in la Raja Ja an ni a, a buaithlak khawp mai. Sorkar tellohna tih lai Non-Government tih hian engnge kan huam tir ber hriat a chakawm ngawt mai. Minister te tel phalloh tihna nge Politician thenkhat lah an tel tho lawi si, Sorkar in thu a neih theih lohna tih lam ringawt hi kan tinzawn pawh a ni maithei. Sorkar hnathawk ber te chuan thu an nei viau lawisi!!

KAN INDAIH LO EM NI?
Non-Government Organisation a nih ang hian Sorkar hnathawk te a hruaitu kawm ni lo tur hian mihring tha, Sorkar hnathawk lo kan awm thlawt lo tihna em ni ang. Rampum huap Rorel Agenda ah lah chuan “Sorkar khawih thil” tih thlengin NGO chuan Agenda kan nei thin lawi a!! NGO in Sorkar khawih thil an rel a, Sorkar hnathawk chu NGO ah a khaipa kan ni tlat bawk a, kan letling a, kan linglet bawk a nih ber hi.

SORKAR IN A TUARNA –
Rampum huap hruaitu an ni a, vengkhat hotu an ni bawk a, Sorkar hna tha tak an thawk bawk a, Office a an awm leh awmloh a in zat a, mithi ral, vengchhung chhiat tawh, chhiatni thatni ah Present thlap thlap a ngai bawk si. An thawhpui te tan hnawksak an ni a, Sorkar in Sorkar hnathawk an nihna zawnah an hlawkpui lova, a chân zawk hial ang chu. An eizawnna tura Chunglamin a pek aiin an tel theih loh tawpna tura ngaih pawlah tei chhuak zing zawk hek mawle. Rampum huapa lar leh langsar NGO hruaitu lu,Sorkar hnathawkte hi an thawhpuite fak tak, ei tak an vang duh khawp a nia. Sorkar hnathawk kaihhruaina dan bu a awm lo Leave hi an lo ngah khawp mai!!

A IN KALH THIN –
Sorkar kalh zawnga hmalak a ngaih chang a lo awm a, hruaitu Sorkar hnathawk bawkin kaihhruaiin Sorkar hnathawk nihna in a phuar reng siin Sorkar do zawngin NGO angin ke an pen daih lawi a, hei hian Politics hri tha lo a hring a, Sorkar a inthlakin in Transfer buaih buaih a thlen phah a, in duhsakna uchuak a hring thei bawk thin. Sorkar hnathawkin NGO angin Sorkar hmalakna ngei an do hreh leh tlat thin lo, thil inkalh tak a ni.

SORKAR NGAMLOH SORKAR HNATHAWK –
Officer an ni a, Political Party aia lian zawk pawlah hruaitu an ni luah a, Sorkar zawkin a hlau lek lek a, Candidate ah an sawm zawk thul. Engah nge an hna chu an Serious viau tawh ang ni? Hei vang hian kawng a eng a, nuam an ti a, an khêl ve ta a, inthlan boruak a hrisello chho a, inthlan boruak chhe zet zet a hring ta thin a ni. Nuam pang pang hek mawle. An chawm bawk a an hawp bawk. Duh tawkin an khuallian a, Stage ah hun tam tak an hman fe hnuah Politics an lut a, an Minister zui leh a…

NGO TE THURAWN –
Non-Government Organisation in nih ang hian Sorkar hnathawk nilo, hruaitu tur in hmu zo lo a nih ngawt loh chuan Sorkar hnathawk hruaitu hi Nomination atangin paih theihna dan in siam thei lawm ni? Tichuan kan Politics tuinu lutuk hi engngaw chen in siamtha nghal ngei anga, kan kal letlingin kan kal linglet tawh lo deuh ngei ang….

Aside | Posted on by | Leave a comment

LUSHAI SCOUTS CHANCHIN

Tun tum chu, Mizo Tlangval te’n Indopui Pahnihnaa an tel vena chanchin kan sawi dawn a ni. Assam Rifles-ah te tangin Indopui pahnih hmachhawn a, ral hma tawnga awm pawh an awm ve teuh a. Heta kan sawi tur ho chu, Lushai Scouts ho bik an ni ang.

Indopui Pahnihna a lo chhuah khan, Jack Longbottom chu, Sipaiah koh kir a ni a. Sargeant rank pek niin, Coldstream Guards zingah training petu a ni. Duynkirk hnuah chuan, Indona hmuna kal a duh ta zawk a. Sandhurst atangin Commissioned Officer a zawm a, West Yorkshire Regiment zingah a tel ve ta a ni.

Jack chu First Burma Campaign,1942 khan Brig PC Mandarin-a hynuaiah Adjutant a ni a, a ni khan a hnuah Lushai Brigade Commander a ni zuita a ni. Brig PC Madarin-a hnuaia aa wm lai hian Military Cross a dawng nghe nghe a ni.

March 1944 Jack-a chu rawlrala che tur sipai din a, train nghal tur a tirh a ni a, chung a mi kaihhruaite chu Lushai Scout tih zui an ni ta a ni. Mizorama kal vang vang a, sipai 400 zu la a, train nghal tur chuan, a hunlai khan tirh tur an tlem hle a ni. Khatih lai khan, Japan sipai te chuan, Chin Hills-a tiddim an thleng tawh a. Kohima leh Imphal bawrah an inbei ulh ulh tawh mai a ni. Lushai Scout te chu, guerrilla anga hman tur mah ni se, sipai pangai (regular troops) ang chiaha train tur an ni, tiin Brig PC Mandarin chuan thuchhuah a siam bur mai a ni. Ramhnuai Indona bik thiam em em tur an ni a, hman raw awm mang lo ache sawn zung zung thei tura train tur an ni bawk. Kawng danga sawi chuan, tunlaia ‘Special force’ kan tih ang hi an ni ber mai.

Jack-a chuan relin ni 10 a kal a, a hnuah ke tea kalin, Aizawl a thleng ta a. sabengtung a hruai bawk a. Tah chuan, Assam Rifles hoin training an lo pek mek sipai platoon khan a zu hmu a, a hnuah Sipai lakbelh turin Biate a pan zui ta a ni.

A tir lam chuan, chutianga sipai pawl thar han din chu, hotu lian lama remti lo an awm a. Mahse, an kaltlang pui ta tho a ni. Brig. Marindin phei chuan, Lushai Scouts chu “Slim’s Own” tiin a sawi thin.

Mizo tlangval te chu kum 18-20 inkar an ni a,. Indo tura han train te chu an phur em em mai. Ramhnuai a piang leh seilian an ni a. Ramhnuaia chettlat chu an pianpui ve reng a ni a, an awlsam hle. Tlangvalte chuan an pawl chu an chhuang em em a, Jack Longbottom-a chuan, an hotute-ah rinna nei turin a chher a, a pawimawh ber chu, anmahni inrin tawkna nei tura a chher kha a ni.

May 1944 chuan, Lushai Scout te chuan, Chin Hills-ah patrolling an nei tan der tawh a, indona an hmachhawnna hmun tura an train thei nghal chu an vannei em em mai bawk a ni. August 1944-ah Kaptel hmunah Company khat chu kal tur an ni a. Fur khawchhe karah mel 80 lai kea kal tur an ni. ‘Tui’ Lui an thlen chuan, an kal kai thei ta lo a. Lei indawh kai chu a lo chhe vek mai a. Thing an kit chawpin, mau an sat chawp a, lei an dawh chawp a, an thlen hun turah Kaptel chu an thleng thei a ni.

Suangpi khua-a Japan Bunker luhchhuah thu:

Company Sub.Ralkapa hovin Suangpi an bei ta. Platoon khat sipai 38 hruaiin an kal ta, khawvar hma dar 2-ah an insiam peih a, an tawmkhurah chuan kut bomb Sub.Ralkapa chuan a han vawm lut zauh a, Japan santiri kha thingpui a in a lo ni awm a, puakrang kha a rawn chuh a, mahse an lo la hman a, an in vaw rawk rawk hlawm a, santiri pa chu, a hreibatah an vit hlum ta. Japan chu an tawlh zel a, a thlangah chuan bunker tha tak tak hi an lo la nei a, bomb an vawm leh, an vawm fuh thei lo hle a, sipai Rfn. Sangkaikhama chuan, ‘Ka pu, loop hole-ah bomb ka zuk thun anga ka zuk luhchhuak tange’ a ti a.

Sub.Ralkapa chuan bomb a han paih a, a puah veleh Sangkaikhama chuan an tawm khurah chuan bomb a thun a, Japan ho chu an rak ta chul mai a, an tlan chhuak a, chungte chu an kap zawt zawt a, Rifleman Lalbela (Kepran khua) a awm bawk a, a ni pawh hi a huai em em a, a che tha em em bawk a ni.

Japan sipai chu an tawlh hret hret a, chu veleh Sub.Ralkapa chuan, ring tak maiin, “Mizo tlangval advance Japan hmaah kan zam ngailo” a han ti tuar tuar a, haw haw in an beiin an nawr zui a bomb in an vawm a, silaiin an tlir zawih zawih a, an thi mang ta deuh thaw a, tlem te chu tlan chhuak awmin an hria, an bunker an lak fel hnu chuan an han inen vel a, mi 4 chu hliam an awm ve a, tumah thi an awm lo. Hliam te chu– Hav. Thangkhawzama, Hualrokhuma, Thangruaia leh Hrangdawla te an ni, a mak hle mai Lalpa venhimna an dawn a ni.

Japan thi chu an en vel a, mi 14 chu an hmu thei a ni. Hliam an awm nual bawkin an hria a chungte chu an insaseng thei a ni.

An Sub.Ralkapa chuan huaisen zual leh che tha zual Sangkaikhama leh Lalfela te chu a recommend angin huaisen chawimawina tangkapui M.M. (military medal) an hmu ve ve a ni. Kan Mizo sipai te hian theuneu lo teh a sin, hmelma bunker tehan luh chhuah riap mai zawng Mizo tlangval Lushai Scout (Biate sipai) te hian huaisen zia te hi kan theihnghilh phal dawn em ni.

LT.Lalhmingliana, mi huaisen:

Brigadier Sap chuan, “Hmalamah Japan an tam mai a, tunge kal ang, enthla turin,” a han tih chuan thih huamin Lt. Lalhmingliana chuan kal a tum ta a, sipai 2 hruaia civil mi angin an inthuam a, huai takin mel 50 thlengin an vak an vak a. Khawpakhat atangin Japan sipaite chuan intawlhchhuak a, an en thlithlai reng a, kawng sir atangin.

Japan kal liam hnu chuan sai an thawmhnaw phurtu 12 lai mai chu sai pute nen an lokal duah duah a, sai pu hnungah Japan sipai an awm an ring a, mahse an awm lo hlauh a, an din tir a, an pute nen chuan, an kir tir leh ta a. Hetianga an bungruate nen an han man rup thei te hi a ropui a, Brigade H.Q ah an thlen a, Headquarter pawh an lawm hle a, chawimawina ropui tak dawng tur a ni a, Lt.Hminga chu. Mahse an C.O hian Pu Hminga chu a recommend duh tlat lo a, Lushai ho, C.O hian a dem naah Lt.Hminga hian an thlavang a hauh nasa an inhnial viau a chuvang chuan C.O chuan a recommend duh lova, engmah a hmu ta lova, sipai ho pawhin an khawngaihin an vuipui em em a ni. Tin, Brigadier pawh hian a bodyguard atan pawh Lushai Scout section khat a rawn dil nghe nghe a ni. An huaisen zia hi sipai hotu lian tepawh hian an hrechiang em em a ni. Lushai Scout ngat, amah vengtuah a thleng a ni, an huaisen avangin.

Lungshe inkahna:

Japan ho pawh advance in an kal ve fo a, intawh chang te an nei thut thut thin a. Japan sipai advance a lokal leh Lushai Scout te chu an intawk ta thut mai a, Bren-gun Pu L.Nk Chhawnlova leh Japan sipai sa tha nel nawl chu Chawnlova nen chuanan insual ta chiang chiang mai a, Chhawnlova chuan a samah a han kek dawn thin a, a sam a tawi a, aman nghet thei lova, LMG No.1 pu te hian inven nan puakruk silai an pai thin a, Chhawnlova puakruk chu Japan sipai hian laksak tumin a bei a ni a, chutia an inkhuainuai lai tak chuan Japan sipai dangin Chhawnlova kheimitah a kap a, a che thei ta lova Mahse a kianga tang an section commander Naik Pachhunga chuan Chhawnlova sual lai Japan sipai chu chuktuahin a kap hlum a, Chhawnlova chu anchhanchhuak ta a, hmun muang lamah an kalpui ta a, Indo laia Japan nena kut ngat a insual kan hriat theih chu, Chhawnlova chauh hi a ni awm e, chawimawina tangkapui military medal a hmu ta nghe nghe a ni.

Ka nu-in hnungtawlh turin min hring lo:

He an inkahna-ah hian Jem Sawithanga hovin an bei a, Tursing bul behchhanin an kap char char a,hmelma silaimu a tam em em a, reife an inkapa Japan silaimu lah chuan an ke bul te chu a verh siah siah mai si, an bul te chu a thawi thiak thiam mai si, chutiang karah chuan him takin an chhuak leh tlat thin a, a mak hle mai.
Hemi tum hian, Rifleman Zotawna maite khua chu a thi a. Rfn. Zotawna hi Bren-gun pu (LMG) pu a ni a, Japan ho awmna runpui chu a puak rang hian a tlir reng a, han hmuh mai theihah pawh tam tak a kap hlum a, a tirah chuan bawkkhupin a kap a, mahse bawkkhup a kah chu duhtawk lovin a thingthi ta a, Japan ho chuan puakrang awmna chu an ngaimawh ber a, huam tum niawm takin a sir thlanglam atang tepawh chuan an rawn kap ta a. An thian ten, “Kan awmna a ralmuang ta lo, tanhmun zawngin i tawlhkir deuh ang aw,” tiin a kianga tang te chu an tawlh kir deuh a, mihuaisen Zotawna chuan, “KA TAWLH DAWN LO, KA NU IN HNUNGTAWLH TURIN MIN HRING LO,” a ti tlat a. A magazine a kah ruahin a no 2 in magazine dang a pe zel a, chung chu a kah ruah leh hmain a awmah tak an rawn kap fuh ta a, ka pawh chhawn lohvin a hmunah chuan a thi zui nghal a ni.

September thla tirah chuan Lushai Scouts te chu, Manipur lui ral leh lamah an awm tawh a. Mi 120 zet niin, chin puak phur 50 an awm bawk. Tiddim kawng bula inkulh Japanese sipai rual chu vawi tam tak hlawhtling takin an va run (raid) a ni. Septemner, 7-8 1944, khan Scouts zinga mi thenkhat chuan, Mel 15 zet kea kalin, tlang chunga inkulh Japanese artillery company leh Platoon Outpost inkarah an va in zep a. Khawvar dawnah Japanese ho cfhu an bei thut a, thi leh hliam pakhat mah awm loin an kalna ngaiah an kir leh a ni.

Japanese ho chuan, chutianga rawlralla beihna an tawh fo mai chu, an awm a ti nuam lo hle a. Sipai Platoon tha ber mai Saizang khuaah an dah ta a. Lushai Scout zinga chin tawng thiam pahnih chu, chin mi anga incheiin chawhmeh zuarin Saizang khuaah chuan an va kal a. Japanese ho awmdan kim chang chu chipchiar takin an va hria a. An awmna hmun leh an ralveng indah dan zawng zawng chu an va hre kilh kelh a. A hnuah chuan, an va bei ta a. Lushai Scout zinga mi pali chauh chuan hliam an tuar a ni. Chumi inbeihna vang chuan an phur phah em em mai.

Tiddim leh Kennedy Peak inkarah chuan, Kum Vum tlang lianpui mai a awm a. Indona mit a thlir chuan, hmun pawimawh tak a ni. Japanese hoin an luah hma chuan, Gurkha hoin an luah thin a, kulh pawimawh takah an lo chei hman a. Lushai Brigade Commander chuan, Jack-a leh a naute chu, chumi tlang ata chu Japanese ho umchhuak tur chuan a tir a, Tiddim an luhchhuah theih phei chuan, Kum vum chu hmun pawimawh tak a ni thei dawn a ni.

Chu Tlang awmdan chuan, a zir em avangin, Japan ho hmuh loh a kal ngaihna a awm lo a. Lushai Scout te erawh chuan, an lo patrol tawhna thin avangin chu tlang awm dan chu an hria a. An inring lo laio va beih erawh thil theih loh tluk a ni tih an hria. A va beih hun lai tak kha a pawimawh ber lai chu a ni ta a. Japanese ho chuan, an dinhmun kha an lo sawhnghet ve sauh sauh dawn bawk tih kha a chiang reng a. Tlem te te a insem darh a, va beih thut a, insaseng leh zel turin ruahmanna an siam ta a.

The Free Chin Resistance Movement te chu, anmahni pui turin an sawm a. Kum Vum chu khawthlang lam atanga pan turin Chin ho chu an hrilh a, Scouts sipai tam zawkin hmar lam atangin minute 15 hnuah an zawm ve leh dawn a ni. Scout ten tlang chip an lawn chhoh chuan, grenade puak nual tih bak hmuh tur an nei ta mang hauh lo a. 2 Inch Mortar chu scout te chuan an kap ve bawk a. Chin ho chuan, silai an kap ri tlem ta tial tial a. A tawp a tawpah chuan, Chin sipai Platoon khat chuam Japanese ho lam pan chuan an tlan ta chiam mai a. An hma zawna awm te chu, an chil hlum ta nawk a. Japanese la dam te chuan, an duhtawk an ngah ta a ni ang, an tanhmun chu an tlan san ta a ni. Lushai Scout ten an awmna hmun atanga remchang an hmuh veleh a, silai an han kah ve dawn chuan, Japanese ho chu an lo tlan chhe der tawh a ni. Japanese tlan hnuhnung ber chu, Chin hoin kut ruaka phur tak maia ram hnuai lama an um chu an hmu hman tawk a ni!

5th Indian Division Tiddim lama an thlen hnu chuan, Lushai Scouts te chu Falamah an tir phei a, Indonaah an tangkai zui hle.

1945 kum tir lam khan, American sipai rual te chu, an awmna hmun atanga mel 150 a hla Mount Victoria a hruai turin Lushai Scouts te chu an tir a, an kal kawng chu ramhnuai pik leh Japanese inkulhna kaltlang ngai a ni. Lushai Scouts Platoon khat an tir a. Platoon Commander chu, Subedar pakhat, saptawng hmang thei sawih sawih a ni. An hmelma sipai pawl 11 zet chu an kalkawngah chuan an hmu a ni em. Subedar chuan, an kal kawng chu, Nuam leh hlimawm tak niin a hnu lamah a sawi leh!

A Hnu thlahnihah, South East Asia-a American Commander hnen atangin, Mount Victoria an hreuaina kawnga Lushai Scouts te huaisenna fakna chu an dawng a ni.

Indopui pahnihna a han tawp chhoh dawn meuh chuan, Lushai Scouts chuan, Chin mi puak phur ringawt pawh, Mi 600 zet an nei tawh a, sai 27 leh tlangram sakawr te chi 100 zet an nei bawk.

Indopui a han tawp khan, Lushai Scouts te chu Shillong-ah an kir leh a. An sipai pawl chu, tih tawp a ni zui ta a. Inbeihna vawi 51 ah an tel hman a. Ramhnuai indo an thiam em avangin, Briitish Officer pakhat leh rank dang pahnih neitu an thi a, mi 23 an hliam bawk.

Lushai scouts hotute kha, Mizo officer fel tak tak, Rk Hranga, Lalhmingliana leh JS Halliday te an ni a. Bawrhsap te niin, India sawrkarah hna pawimawh tak an chelh zui a. Lalhmingliana phei chu,IAS niin, Himachal Pradesh Chief Secretary te pawh a ni a, UPSC member tura ruat a ni a. Thawk hman loin a thi ta hlauh a ni.

Chuck chuck chuck

Aside | Posted on by | Leave a comment

LUNGSEN GROUP ATANGIN GROUP THAR A PIANG DAWN TA

Lunglei district huamchhung, khawthlang lama dân loa khaw din ni ngeia hriatte țhiah a nih theihna turin, Lungsen group YMA-ten chak zawka hmalak an tum.

Nizan ațanga țan Lungsen Group YMA conference neih mekah, vawiin khan khaw hrang hranga branch YMA hruaitu kalkhawmten rorelin, thu ngaihtuah tura lût chi hrang hrang an sawiho a; Lungsen group YMA huamchhungah dân loa din ni ngeia hriat khaw 7 vel a awm nia sawiin, chung khuate țhiah a nih theihna tura hmalak an rel bakah, a țul anga Sorkar nawr zui zel an rel a ni.
Hei bakah hian Lunglei leh Tlabung inkalpawhna kawngpui national highway 302 siam mek chu chak leh țha zawka thawh a nih theih nan, rorel palaite chuan a țûl anga hmalak an rel a; kawng siam hna thawktu - GP Projects ltd. leh Vinco Construction-te hnathawh a țûl anga vil zui zel an rel bawk.
Vawiina rorel inkhawmah vek hian, Lungsen group YMA țhena Tlabung group YMA siam chungchang pawh ngaihtuahho a ni a; hemi chungchang zau taka sawiho a nih hnu-ah, rorel palai kalkhawmten bán pharin vote an thlak a ni. Rorel palai tam zawk duhdan angin, Lungsen group YMA chu group pahnihah siam a ni dawn.
`
Lungsen Group YMA conference hi Central YMA president Pu Vanlalruata’n hmanpuiin, vawiina thu a sawinaah ram leh hnam humhalh turin tun aia Mizote an tam a țûl niin a sawi a, hnam dangten kawng hrang hranga Mizote an chîm nasat tial tial thu sawiin, chumi laka himna turin tun aia tama inthlahpun a țûl niin a sawi.

Naktuka țiak tur Lungsen group YMA conference hi Lungsen community hall-ah nghah niin, vawiina rorel inkhawmah hian hmun hrang hrang ațangin palai 79 an kalkhawm a ni.
`
Tun dinhmunah Lungsen group YMA hnuaiah hian YMA branch 15 a awm mek a ni.

Tlabung Post

Aside | Posted on by | Leave a comment

Zokhumi (83) thattu nia puh Lalrempuia chhuah zalen

Aizawl, April 23, 2019:
Minister ṭhin leh politician J Lalsangzuala(L) nupui, Mizo zinga mi hriathlawh, Kristian Ṭhalai Pawl (KṬP) dintute zinga mi Zokhumi (83) tualthatnaa a thattu nia puh Lalrempuia chu puh a nihna hrang hrangte finfiahna lak dan phung a dik lo tiin court-in a chhuah zalen.

Kum li lai liam ta December ni 18, 2014 tukṭhuan eikham khan Mizoram home minister leh finance minister te lo ni ṭhin politician lar tak J Lalsangzuala (L) nupui Zokhumi, Mission Veng Aizawl chu a khuma mi kut tuar tih hriat takin thi a hmuh a ni a, Lalrempuia s/o Zothantluanga, Kulikawn, Aizawl chu thattua puh a ni.

Tual thahna hmun Zokhumi room aṭanga bathlar chhuahna kawngkhar (balcony door) ah Lalrempuia kutzungthla (fingerprint) hmuh a niin a inpuanna dangte hi finfiahna hmuh zui a ni tlangpui bawk.

Lalrempuia’n a sawi dan chuan Zokhumi hi chemtein a vit a, chumi hnuah balcony door hawngin chemte chu a vawm bo zui niin a sawi. Chutiang a nih chuan kawngkharah hian a fingerprint hi awm tak pawh a ni.

Lalrempuia hi November ni 21, 2011-a Zokhumi birthday lawmnaa a kal hnuah hian Zokhumi te inah a kal leh hriat a ni lo va, chuti chung chuan a fingerprint tharlam tak hmuh a ni hian tualthattu ni ngeia rinna a ti lian hle. Mahse, chu fingerprint chu thiam loh chantir turin thutling a ni thei lo; a chhan chu danin a sawi ang thlapa lak a ni lo, court-in a ti.

Fingerprint hi court chuan Identification of Prisoners Act 1920 anga lak tur niin a sawi a; chu dan ang chuan magistrate thu lo chuan fingerprint hi lak theih a ni lo va, thil sual tia puh emaw rinhlelh hi man a nih phawt loh chuan fingerprint hi lak tur a ni lo (section 4&5). He Lalrempuia tualthattua puh a nihnaah hi chuan Lalrempuia hi rinhlelh a nih khan police station-ah koh niin a fingerprint hi lak a ni a; rinhlelh a nih khan man niin magistrate thupekin a fingerprint hi lak lo ni se chuan i-he lovin thiam loh a chang dawn pawh a ni mahna.

Lalrempuia hi, a insawi dan chuan, Zokhumi room bula room dang awm (spare room)-ah tual a thah hnu khan a insilfai kha a ni a.

Police te pawhin a inpuan hma pawh khan a insil nia a sawina hmun leh room-ah thisen an lo hmuin forensic science laboratory-ah an lo enfiah a, Zokhumi thisen nen a group pawh a inang nghe nghe a ni. Chumi awmzia chu Zokhumi thattu hi tu pawh lo ni se a thah hnuah Lalrempuia’n a insil nia a sawina room-ah kalin, Zokhumi thisen chu chutah chuan a tikai ni ngeiin a lang a ni. Mahse, court chuan kha thisen kha tualthattua puh aṭanga an thuhriat bawhzuia an va hmuh leh lak a ni lo a, a hmaa an lo hmuh leh lak tawh a nih avangin Indian Evidence Act 1872-a section 27-na angin thutling a ni lo, a ti hlauh.

Chutih laiin Lalrempuia hian Zokhumi a thah laiin jumper pawl, a hmaa ‘Valley Strong’ tih inziak a ha niin police-te hmaa a inpuannaah a sawi a, chu a thusawi bawhzuiin police- te chuan Lalrempuia te in chu an dap a, jumper pawl pawh an hmu chhuak ngei bawk a ni. Mahse, court chuan magistrate hmaa inpuanna a nih loh chuan thutling a ni lo a, tualthattua puhte inah hian va hmu engang pawh ni se thutling a ni lo, a ti thung.

Inthahna hmuna an thil hmuhte chu tualthattua puh inpuanna bawhzui a an hmuh a nih loh avangin thutling a ni lo va, a inpuanna a dik ngei a ni tia finfiahna an hmuhchhuah zuite pawh magistrate hmaa inpuanna finfiahna a nih loh avangin thutling a ni chuang lo tihna a nih chu.

Court chuan Zokhumi hi a post mortem examination (PME) titu chuan December ni 17, 2014 zan dar 9-11 velah a thi nia a ngaih thu a hrilh tih a sawi a; hemi zan hian Lalrempuia chu an ṭhenawm Joseph VL Chungnunga te in, Kulikawnah zan dar 9:20 vel aṭangin a awm a, chuvangin minute 20 vel chhung lekin thilsual: Mission Venga mi va that a, insil fai a, Kulikawna an ina haw a intifai ṭha leh, etc., turin hun a nei lo, a ti bawk. Hetih lai hian Zokhumi tunuin sorkar ukil pui tura a rawih ukil chuan PME report aṭang chuan Zokhumi hi zan dar 8-9 vela thia ngaih theih a ni a, tlai dar 6 aṭanga zan dar 9 vel thleng hian Lalrempuia awmna hi hriat a ni lo va, ani lahin a sawi duh bawk lo, a ti thung.

Court thutluknaa a lan dan chuan Lalrempuia hi December 17, 2014 zan dar 7:30 vel khan Joseph VL Chungnunga te inah hian a kal zawk a, rei awm lovin a chhuak leh a, zan 9:20 vel khan a va kal leh a, haw lehnghal mai tuma a chhuak tawh chu a lenna te chuan an phone let leh a, zing lam dar 1:30 thlengin a awm ta a ni.

Police te chuan Zokhumi hi Lalrempuia tan chuan a pi, a pu nau nupui a ni a, chuti chungin December ni 19, 2014-a a vuinaah Lalrempuia chu a kal loh avangin an ringhlel a, police station-ah pawh an ko niin court an hrilh a. Hetih lai hian Lalrempuia chuan December ni 18, 2014 zan hian a muhil lo va, a pi vuinaah a kal dawn lai takin police-in an ko niin court-ah a sawi thung.

Court chuan police/ sorkar lam/Lalrempuia hrem a nih theih nana thuhretua ṭangtute (prosecution witness) hian police-in Lalrempuia an koh hun an sawi lo tih chhuanlamah hmangin koh chu ni lo se a pi vuinaah chuan a kal ve tho mai thei, a ti hlauh.

Finfiahna hrang hrangte hi danin tih dan tur a tih ang a tih a nih loh avanga Lalrempuia thiam loh chantir nana hman theih loh nia court-in a sawi bakah Zokhumi hi a ruang hmuh a nih khan a kawng hnuai lamah engmah ha lovin a lo awm a, pawngsual a nih leh nih loh hriat theih nan a serh hi mipa chi a kai leh kailoh enfiah turin hruk a, chu a hrukna chu forensic science laboratotry-ah enfiah a ni. Aizawla enfiahnaah chuan mipa chi awm nia hriat a ni a; a chi neitu hriat theih nana Kolkata-a forensic science laboratory pakhatah a serh an hrukna chu an zuk thawn leh a, mahse, mipa chi an hmuh loh thua chhan a ni thung. Aizawla enfiahna kha a dik lo nge a serh an hruknaa mipa chi kha a lo chhe hman tih chu hriat a ni tawh lo. Lo chhe hman pawh ni se Kolkata laboratory chuan a chhia tal an hmu lo nge Lalrempuia himna tur thil inrawlh a awm tih pawh zeldin theih tak a ni.

The ZoZAm TImes in thu a dawn danin, Lalrempuia hi kum tlinglo a nihlaia mi lo vithlum tawh, Kulikawn Presbyterian Biak In pawh lo suasam tawh, dan bawhchhiatna dangah pawh lo inhnamhnawih tawh ṭhin niin a sawi a, a pu nau Rotluanga kuta rokhawmtu nihna dah tura an beisei laiin, J. Lalsangzuala hian a nupui Zokhumi kutah ro zawng zawng a dah a, Zokhumi hian a khawm ta vek reng a nih thu thudawnna chuan sawiin, “Hemi avang hian Rotluanga tu leh fate hi Zokhumi lakah hian lawm lo viau thei tura ngaih a ni bawk,” tiin The Zozam TImes a hrilh bawk.

Thudawnna chuan,
“Tunah hian Lalrempuia hi zalen takin a leng mek a. Eng pawh ni se, he thubuai hi sorkar hian a appeal duh a nih chuan ni 90 hun a nei a, hrem a nih theihna tur kawng awm ang zawng zawng hi chu a ping chat chat a. Pastor lar tak thihna ang khan he thu hi a zuihral mai dawn nge, sorkar hian a appeal dawn tih chu thuneitute kut a ni ta,” tiin a sawi leh bawk a ni.

Source : The Zozam times

Aside | Posted on by | Leave a comment

SORKAR PHALNA ORDER – TAX CHAWIA ZU IMPORTS – HIGH COURT THUPEK ANGA SORKARIN A TIHRAL NGAI ZAT TUR

Sapzu (A senchi) Bottles 2,19,030, ( Um nuai hnih, singkhat, sangkua leh sawmthum)

Beer ( Hmeichhe Zu) Cane 1,89,788, ( Cane bur nuai khat sing riat, sangkua zasarih leh sawm riat pariat

A vaiin Rs 1617.99 lakh man an ni e.

15th Dec 2019 – MNF sorkar apiang, 26th Febuary thleng khan rampawn atanga lakluh phalna Order Permit pek chihuah an ni.

Author: Lalrozara

Aside | Posted on by | Leave a comment

BUAIPUI TUR ZAWK BUAIPUI A HUN

Author: Maṭana Pachuau

Feb 22 khan Gauhati High Court in MZP te hmalakna avanga Mizoram sorkarin technical course zir tur te thlan dan a siam chu India ram danpui Constitution kalh a nih thu a rel a. Mizo te leh Chakma te quota chungchanga kan innekna hi in lo ngaihtuah chiang ve ngai nge ka hre lova, awmze neilovin a chhuak zel a. Hemi chungchanga kumtin kan buai avang hian buaipui tur dik tak leh pawimawh zawk – foreigner mana thawn haw – min buaipui tir thei lo lehnghal a. Awmze neia hmalak hi a tul takzet.

Mar 12 khan Health Minister leh H&TE Minister ni bawk Dr. R.Lalthangliana hnenah he lehkha hmang hian ngenna thehluh a ni a. A “stakeholder” MZP te pawhin an Federal Council meeting-a uluk taka an lo ngaihtuah atan an General Secretary Pu Lalnunmawia Pautu kaltlangin he lekha hi a copy pek an ni a. Buaina chinfel kawnga awmze neia hma la tura ngen an ni. Law Minister Pu TJ Lalnuntluanga pawhin a tul anga a lo enzui atan pek bawk a ni a. H&TE Secretary Pu Biaktluanga hnenah he lehkha hi a tul anga a lo bawhzui atan pek a ni.

Mizoramah hian Chakma zirlaiten technical course zirna-a an lo inziahtlin ve avang hian Mizoten buaina kan tawk lova, kan tu leh fate thlenga buaina tur zawk Bangladesh atanga rawn pem ngeia kan hriatte vawiin thlenga dan hmanga kan la address lo hi a ni. MZP hruaitute hmalakna te hi mipui awareness siamna kawngah an tangkai thin hle a, amaherawhchu rah awmze nei hmu tura hma an lak a ngai. Sorkar pawhin dik taka ro a rel a ngai, MZP emaw pawl thenkhat hlauva action la lo emaw action diklo la nilovin. Minister te phei chuan dan tlawhchhana dik taka ro rel turin thu an tiam nghe nghe a ni.

Buaipui tur zawk hi buaipui lovin kum hei leh chen kan kual tawh a. Ngaihtuahna thar nen, buaipui tur lian zawk kan buaipui theihnan quota chungchangah hian kan rilru leh policy kan thlak a ngai.
============================================

To,

Dr.R.Lalthangliana
Hon’ble Minister,
Higher & Technical Education,
Government of Mizoram.

Subject: State Technical Entrance Examination chungchanga ngaihtuahna thar leh policy thar hmang tura ngenna.

Chibai ka pu,

Feb 22-a Gauhati High Court-in Mizoram state quota-a higher technical course/degree zir thei tur thlan dan kan lo siam, India ram danpui (constitution) tlawhchhana a remtih loh thu tichianga thutlukna a siam kha khawvel pum hriat theih turin social media leh internet kaltlangin tarlan nghal a ni a, Chakma zirlai leh Chakma pawl dang hruaitute chuan hnehna ropui taka ngaiin a hrilhfiahna nen youtube ah te an puang nghal a ni. Mizo te tan hian a tlawmthlak a tih loh theih loh a, amaherawhchu uluk deuhva dan kan en chuan dinna dika kan din loh avangin min khingtute hian min khing hneh zel dawnin a lang. Mizoram sorkar leh Mizote sawichhiata kan awm reng tawhlohna tur leh he quota buaina vanga buaipui tur pawimawh zawk – Mizorama Chakma foreigner awm te – buaipui tha hlei theilova kan awm tawhlohna turin Mizoram sorkar hian ngaihtuahna thar hmanga hma la turin ka rawn ngen a ni.

High Court thutlukna (judgement & order) kha uluk takin ka chhiar chhuak a, Higher & Technical Education department Secretary Pu Biaktluanga’n Mizoram sorkar-in Supreme Court-a a zualko tur thu The Frontier Despatch chanchinbu a hrilh ka lo chhiar bawk a. Mizoram sorkar hian H&TE Secretary sawi anga Supreme Court-a a kalpui chuan Chakma laka Mizote kan tlawmna tur hi a zahthlak dawn hlein ka lo hria. Law Minister Pu TJ Lalnuntluanga’n, “Sawrkar sum hloh zawnga Court case a chaklo lama tang tawh lovin a chak zawk lama tan a pawimawh tawh tak zet” a tih te, “Sawrkar ukilte inthlahdah vanga sorkarin sum tam tak a hloh ṭhin hi tihbo a ṭul” a tih te ngaihtuah phei chuan he thilah hian Mizoram sorkar hian ngaihtuahna fim tak a hman a tul takzet a ni.

  1. Mizo mipui tam zawkin kan hriat miahloh chu 1950-ah khan India ramah hian Mizote hi leilung piantirh ata kan la nih ngailoh, eng sawrkar mahin min la pek ngailoh chanvo bik pek kan ni a. Chu chu Scheduled Tribe nihna hi a ni. Hei hi India ram zalenna sualtute leh a bikin dan lam hria, hmathlir thui India ram hruaituten hnam hnufual leh tenau zawkte chimrala kan awm mai lohna tur leh hnam lian leh upa zawkte nena rualkhai zawka kan khawsak theihna tura an lo duan a ni a. Kan tangkaipuiin kan nihlawh hle a ni. Myanmar-a kan unau te chuan hetiang chanvo hi an sorkar laipui atangin an dawng ve lova, Bangladesh-a kan unau te pawh khuan an dawng kher awm love.
  2. Amaherawhchu, hemi rual chiah chiah hian kan zinga cheng ve Chakma te pawh Scheduled Tribe nihna pek an ni ve a. Tribal hnam hnufual an nih ve tlat avangin. Scheduled Tribe a min puangtu The Constitution (Scheduled Tribes) Order, 1950 hian Chakma te hi, Mizoram leilungfate nilo eng ang mah se dan mitah chuan, Mizo te nen intluk chiah chiahin a dah a ni. Mawl takin sawi ta ila, Mizo leh Chakma hi dan hmaah chuan “Ek Saman” kan ni a nih chu!

  3. Chumi hriatna leh ngaihtuahna tello chuan Mizo rilru takin 1990 chho khan zirlai pawlte nawrna avangin sorkarin higher technical course zirtur te thlanna dan (Rules) a siam niin a lang a. “Ram leilung fa” tih kha rilru-a a len vang ni tur a ni, saptawnga “indigenous” tih te kha kan dan (Rules) siamah a lo lang a. Mahse, he thumal hi legal term a nih loh avang leh hrilhfiahna felfai tak a awm theih loh avangin dan lama buaina min siamtu ah a tang ta zawk niin a lang.

  4. Chakma zirlaiten state quota hi an rawn beisei ve ang tih pawh kan ngaihtuah hma daih 2000 kum khan Silchar-a awm Bhanu Choudhury hmingin Bharatiya Mazdoor Sangh (BMS) chuan an trade union-a tel, Mizoram-a hnathawka chhungkuaa awm te aiawhin Gauhati High Court ah Mizoten he state quota kan keipui sahauh hi a diklo tiin min khing a. Min khin chhan chu BMS member fate Mizorama lehkhazir, MBBS emaw engineering lam zir tum kan state rules in a category tawp berah seat tlem te a pek ve chauh vang a ni a. Kan Rules ah an tan chance awm ve mang lova ngaiin state sorkarin dan a siam kha hleih nei a ni tiin court ah an zualko a ni.

  5. India ram danpui leh court judgement hrang hrangte en niin uluk taka ngaihtuah a nih hnuah “Bhanu Choudhury vs State Of Mizoram And Ors. on 26 September, 2000” case ah khan category siama duhsak zawk leh duhsakloh zawk neih theihna dan kha state sorkar siam theih a nilo, tiin Gauhati High Court in ro a rel a. Hei hi India ram danpui Article 14-na tlawhchhan a ni a, India rama kan awm chhung chuan kan innghahna tur niin a lang.

  6. India ram khua leh tui dik tak an nih khan India ram danpuiin khua leh tui te dikna chanvo a humhalh sak avangin, an inziak tling a nih phawt chuan, seat kha pekloh ngawt a remlo tih kha Court ngaihdan niin a lang a. Chumi avanga kan rules lo siam pawh danpui kalh a ni tia paihthlak a ni.

  7. Vairam atanga rawn kal, Scheduled Tribe pawh nilo, Mizoram-a inbengbel pawh nilo, reilote hnathawka rawn awm fate kha state quota an chanve a thiang tih Court in India ram danpui hmanga a nemngheh khan chiang deuh chu India khua leh tui an nih phawt chuan Mizoram state sorkar hian a tlinga-te hi seat a lo pelo ngawt theilo va, an pian leh murna vang emaw chi leh kuang thil vang a ni emaw Mizoram state sorkar in Mizo zirlaite aia a lo duhsakloh bik chuan court ah thiamloh kan chang zel dawn tihna a ni.

  8. Mizo lalte rorel hunlai chu la chu nise Mizote’n kan duhdan ang thlapin kan rama cheng ve hnam dangte hi kan khawsak tirin kan duhloh chuan kan chhuahtir thei anga, “human rights” tih te leh “constitutional rights” tih te hian min ti buai lovang, lal thu kha dan a nih dawn avangin. Amaherawhchu, hun inherah India ramin danpui tha tak a neih hi Mizoramah pawh hman a lo ni ta a. Chumi kalha sawrkarin dan a siam apiangin min khingtute chuan min khing hneh zel dawn tihna a ni.

  9. Mizoram sawrkar aiawha ding Pu JC Lalnunsanga hian Mizo takin a ngaihtuah a, a theihtawp a chhuah a. Fak a phu hle. Amaherawhchu ukil a nihna zawna a tanhmun hi dan mit atanga en chuan argument awmze neilo a ni a. Amah nilo ukil dang tu pawhin hetiang hian tan chhanah hmang se court-a thubuai ngaihtuahnaah chuan awmze neilovin a chhuak zel ang. High Court judgement hi uluk deuhva zir phei chuan vai judge ten Mizo te min hmuhsitna tur hi a thuahhnih ka lo ti a. A thinrimthlak ka tih rualin tan hmun dika kan tan si loh chuan chak ngaihna a awm si lo a ni. Tu pawh ruaiin Mizoram sawrkin sum pawh seng ila, Law Minister hlauhthawn ang chiah khi kan ni zel dawnin a lang hemi chungchangah hi chuan.

  10. MZP hruaitute hian Mizo takin an ngaihtuah a. An demawm loh. Sawrkarin MZP duhdan a lo ngaipawimawh thin pawh hi thui tak chu a hriatthiamawm, a chhan chu engemawchenah zirlai pawl hruaitute hi hmathlir thui neia ke pen te an lo ni thin a. Hemi chungchangah pawh hian Mizo hnam interest humhalh duhnaa theihtawp chhuah an ni tih ka hria. Amaherawhchu, kan hriat angin 1990’s atanga vawiin thleng hian he thu hi kan la chai dik lova, chu chu sawrkarin Mizo tanlo zawnga lan theihna awm thei ang reng reng pumpelh a tum thin avangin zirlai pawl ten an beihdan diklo pawh hrilh lovin kawng dik kawhhmuh lovin a diklo leh awmze neilo zawngin kum 30 dawn a lo kalpui ta a. Hetianga sawrkarin constitution tlawhchhan nilo, zirlai pawlte duhdan anga dan (Rules) a siam thin avang hian Chakma U.T. dil te tana dilna chhan tur hi a tha telh telh a ni. MZP ten an nawr nasat poh leh Mizoram sawrkarin an nawrna ang chuan a tilo ngam dawn lova, chu chuan a hrin tur chu Chakma pawl hruaituten “Mizoramah chuan Scheduled Tribe ve tho, India khua leh tui ve tho Chakma te lakah hleihneiin sawrkarin ro a rel” tia an tlangau kha a ni a. Chu chu an tlangau dan a ni tawh reng a ni. Hei hian kan state thendarh tur zawnga hmalakna a ti chak a, Mizo te leh Mizorama an pi leh pu te atanga lo awm tawh Chakma te inkarah nasa takin boruak thalo a siam belh thei a ni. Chu chu tu tan mah a hlawk lova, ram hmasawnna a thlen dawn loh avangin a tangkailo hle dawn a ni.

  11. Gauhati High Court thutlukna hi Mizo mipuiin pawm harsa kan ti ngei anga, amaherawhchu 1950 atanga vawiin thleng Mizoram state-a Scheduled Tribe lo ni tawh leh ni mek Chakma te nen hian a innghirngho zawng nilo a inchhawr tawn zawnga khawsak dan kan zir loh chuan kan hmaah hian hmasawnna aiin hmasawnna tithuanawp tur boruak thalovin min hmuak a. Chu chu NGO ten an thlir lo a nih pawhin rorelna chelhtu sawrkar chuan a thlirin, puitling takin ke a pen tur a ni ang.

  12. Mizoram chhung leh pawna Chakma hruaitute’n Mizoram sawrkar an sawisel rengna pakhat chu an chenna area-a doctor awm thalo hi a ni a. Ngaihtuahna thar hmangin Chakma zirlai lehkhathiam thei doctor zir tura inziaktling an awm chuan an khawtlang leh sawrkar (CADC) hruaitute hnenah “unofficial”-a ngenin an zir zawha anmahni mi leh sa te zingah kum engemawzat an thawk tur a ni tiin an khawtlang leh sawrkar hruaituten phut ta se, an tan leh kan tan pawh a hlawkin a rinawm.

A tawpnana ka han sawi duh chu Mizoram sawrkar hian tun hmaa a lo tihsual tawh thin anga tisual nawn leh lo turin mawhphurhna a nei a, he quota chungchanga hun leh tha leh sum tam tak senga kan chakloh reng hian Mizo hnam tan hmasawnna a thlen loh avangin High Court thutlukna ang hian kan Rules hi siamtha ila, Mizo hnam tana hlauhawm leh pawi thei zawk te hi buaipui turin mipui leh sawrkar I harh ang u tih hi a ni.

Hemi chungchangah hian a hnuaia ka email address leh phone number ah khuan englai pawhin biakpawh theih reng ka ni e.

I rintlak,

(LALTANPUIA PACHUAU)
Sydney, Australia
laltanpuiapachuau@gmail.com
+61xxx xxx xxx

Aside | Posted on by | Leave a comment

TIDAMTU MAK; EDGAR CAYCE “The Sleeping Prophet”

Mizote hian tawngtai damthei te, tihdam theihna nei te hi kan ngaisang in kan pan nasa thin hle mai a. Dam pui a mual mual tawk lah kan tam bawk. Chutih lai erawh chuan dam hlen pui hmak erawh sawi tur kan tam lem lo. Mithiam te chuan mihring hi kan hriselna hi kan ngaihtuahna hian 75% vel chu a thunun a. Mi in damlo na dawn tlat a a inhriat chuan an na mai a, tin an natna atanga dam dawn tlata an inngaih tlat chuan an dam ve hmak thei ani an ti. Tawngtai damthei/ tihdam theihna nei chungchangah pawh hian mi in dam pui dawna a inngaihna hian awmzia thui tak anei ani an ti bawk. Chutih lai vek chuan Pathian hnathawh a taka a rawn lanchhuahna tamtak a awm ve tho bawk tih pawh kan hriat tel a that rual in, kan pathian hian kan taksa natna ata min tihdam ngawr ngawr hi a tum ber ani lo tih pawh hi kan hriat tel a tha a, taksa damna lam aiin thlarau lam damna hi a tum ber ani zawk a, kan thlarau damna tur anih chuan kan taksa a nat hi chu a phal ani tih pawh kan hriat tel a tha awm e. tin setana pawh hian tihdamtheihna thiltihtheihna a nei ve tho bawk ani tih pawh kan hriat tel a tha viau bawk ang, hetiang ang boruak karah hian ani khawvel in a mi tihdam theihna nei a lo hmuh tawh zawng zawng a la hlawhtling ber mai pawl a sawi, ‘The Sleeping Prophet’ an tih mai Edgar Cayce chu a lo pian chhuah tak chu…

Edgar Cayce hi 1887 khan Hopkinsvile, Kentucky, USA ah a lo piang a. Naupangte anih lai atang in a danglam ver hrim hrim mai a. Mi dang te ‘Aura’ an tih mai hi a hmu thei tlat mai ani. Aura an tih hi a mi nazawng in an hmuh theih loh, mihring taksa atanga eng rawn in kap chhuak ang deuh ani. Mi hrisel deuh ah a eng a fiah fai tha a, mi hrisel lo deuh ah a eng a thim deuh ni a sawi ani a, ‘Krilian photography’ an tih mai Russian ho hmuh chhuah hmangin hetiang ‘Aura’ hi a thla alak thei a ni. Chutiang ‘aura’ chu naupangte anih lai hian Edgar cayce hian a mit lawnngin a lo hmu thei tawh thin ani. Naupangte anih lai hian inlarna angrengin mi pakhat eng tak mai hi a lo hmu a, chu a mi hmuh chuan enge a duh ber tih a lo zawt a, Cayce chuan dalo te tihdam theihna neih a duh thu in a lo chhang a, tichuan a duhthusam chu hun reivaklo hnuah tih puitlin in a lo awm dawn ta a ni.

Edgar Cayce hian tihdam theihna anei tih a inhriat tan na chu kum 21 mi anih in a ni a. Amah chu a natna, hrawk lam thalo avanga a aw chhuak theilo avangin indawimut thian(Hypnotist) pakhat Al Layne-a chu a pan a. Chupa chuan lo dawimu in amah leh amah chu anatna atan chuan damdawi inchaw turin a lo hrilh a. tichuan Cayce chuan damdai chu a in chawh ta a, hetatang hian a lo tawng ri leh thei ta a.Hemi hnu hian amah chuan mi tihdamtheihna chu a nei zui ve ta nghal a. Laynea’n a rawn angin 1901 atang khan midan te tihdam hna chu a thawk ve tan ta a ni. Edgar Cayce hi tawngtai damthei han tih tur chi ani ve hauh lo mai a. A mi tihdam dan pawh hi a style a dangdai khawp mai a. A damlo tihdam tur te hi an mahni a takah a hmu duhlo hrim hrim a, lehkhabuah an hming leh address a chhinchhiah mai thin a, tichuan amah chu zel(Trance) angin a awm a, muhil ang chiah ina awm a, tichuan chutianganga a muthilh lai chuan a damlo te natna leh an damdawi tur te chu a sawi chhuak ta thin a ni.

Mak deuh mai chu amah hian damdawi lam chinchang engmah zirna leh hriatna anei hauh lo a, tin hetianga a damdawi chawh te hi an natna nena inhmeh lo tak tak te an ni nawk hlawm mai a, mahse damlo te hian an lo dam pui ve tho thin a ni. Damdawi hmanlai tak tak leh awmanglo deuh deuh hi a chawh a an dampui tho thin. Tin amah hian mihring taksa bung harng hrang chungchang (anatomy) lam entgmah hriat aneilo chungin an natna lai vel chu a sawi dik hle thin bawk a ni. Hetiang a nih avang hian khawvel pumah mi hriat lar a lo hlawh ta thuai a, damlo tam takin an hming an rawn pe lut a, ni khatah mi 6 vel tan hun hmangin kum khatah mi 1385 vel a buaipui hman thin a ni.

1911 vel atang khan hetianga zel angang a muthilh lai hian Hindu hoin piannawnlehna lampanga an thurin pakhat ‘Karma’ an tih ang chi chungchang hi a sawi chuuak ta fo mai a. A sawi dan chuan mihring hi kan nun hmasa a kan nun dan hian tuna mihring tho a kan lo piannnawn leh a kan taksa hrisel leh hrisel loh ah hian awmze thui tak anei ani a ti. Amah pawh hi hmanlai hunah khan lo piang tawh niin a in ngai a. Hmanlai khawpui pil bo ta ni a sawi Atlantis ah te leh Lemuria ah te pawh lo awm tawh in a piannawn lehna ah phei chuan Egyptian puithian pakhat Ra-Ta a lo ni tawh niin a in sawi bawk a ni.

A hming a lo thag chho tial tail a, mi ten an natna atana puina an rawn dil nasa tial tial a, thawh pawh a thawk rim hle mai a. ASma chanchi ziahna chu 1944 khan an tichhuak a. Hemi hnu chho atang hian amah chu a thawh rim tak em avangin a taksa chuan a zo ta lo a, 1944 august thla khan a taksa chau tawngkhawng chu a tlu ta a. hemi hi thachhuak leh lo in, 1945 January khan a thi ve ta ani. Tun thleng hian a damdawi chawh te hi engtinge an thawh thei mai dan hi khawvel mithiam te hian an la chhui reng a ni.

*Source: Almamac Of the Uncanny
**Image: Google Image- Amah Edgar Cayce chu anih hi..

Aside | Posted on by | Tagged , | Leave a comment

SAIRANG VCP IN BAWNGKAWN PS-AH FIR THEHLUT

21.04.2019: Sairang balu kaia tuiltla Tv Lalbiaktluanga kum 23, Aizawl Electric veng, Sairang khawtlangin an buaipui mek laiin Zirtawpni (19.04.2019) tlailam khan Sairang tlangval 3 te chu, Aizawl lam mi nia hriat, luia inbualte’n na takin an sawi sa a. A sawisa tute hi mi 12 vel an ni a, an zinga mi 4 te chu man tawh an ni a. Aizawl police station ah dah an ni tawh.

Hemi chungchangah hian Sairang leh Sihhmui Joint VC te leh Sairang All NGO te chuan nimin khan Aizawl Press Club-ah chanchinbumite kawmin, pawi khawihtute chu man chhuaha an chunga hremna na tak pe turin theneitute an phut thu leh tuna mi pali an man bak midang 8 te pawh a rang lama man chhuah saka an phu tawk hremna an hmuh ngei theih nan thuneitu an phut thu an sawi.

Sairang VCP Pu R. Vanrammawia chuan Pawi khawih tute hi Armed Veng South leh Salem veng mi niin a sawi a, heng mi te hian Sairang naupang inbual tibuaiin an mangangin Sairang tlangval pathum an pun te chu an lawng atanga chhuak hman loin thingfak, lungtum leh an hmanraw neih ang ang te thawhin kut an thlak niin a sawi a. Hetih laia an bul hnaia lo awm ve Aizawl Venglai mi te chuan an va chhan niin a sawi. Sairang tlangval hliam tuar 3 te hi an ruh a tliah bakah an hnar leh beng atangin thi a chhuak nasa hle a, an zinga a mi Vanlalhriatpuia hi Damdawin-ah admit niin a thluak a che nia hriat a ni bawk.

Pu R. Vanrammawia chuan Bawngkawn PS ah FIR thehluh a nih tawh thu leh pawikhawihtu dang te pawh man ngei turin an nawr dawn tih a sawi a. Kut tuar te enkawlna man senso bakah an khawtlang eizawnna hnar ber Balu lakna lawng leh lawng khawl an suasam na man pawikhawihtute’n an tum ngei an phut tih Sairang All NGOs leh Joint VC te chuan an sawi a ni.

Sairang Tlawng luia intihlim tura kal te lakah tun chinah khauh zawkin hmalak an tum tih Sairang VCP Pu R. Vanrammawia chuan a sawi bawk a, mikhual leng lut te chu fimkhur tura chahin mawilo taka che thinte, luidung a nul a huan te, balu lakna lawng leh hmanrua tihchhiatsak te leh ruihhlo keng lut te lakah action lak an tum tih an sawi bawk ni.

Bawngkawn PS in an man tak te hi- F. Lalruatsanga Armed Veng South, Lalrintluanga Armed Veng South, Ramdingliana Armed Veng South leh Nicky Lalnunmawia Salem Veng nia in chhal te an ni.

(AirNews)

Aside | Posted on by | Leave a comment

Sri Lanka bomb blast

EASTER SUNDAY-AH SRI LANKA-AH MI 138 SUICIDE BOMBERS HMANGA THAH AN NI

April 21, 2019 (MSR) : Vawiinah khawvel hmun hrang hranga Kristian ten Isua Krista thihna hneha a thawhlehna ni “Easter Sunday” hlim taka an hman laiin, Sri Lanka ah erawh suicide bombers te ni ngeia rin ten Biak In pathum leh foreign tourist tamna Hotel pahnih beiin, mi 129 zet an thi niin Sri Lanka chanchinbu Daily News chuan a ziak.

Associated Press erawhin Senior official te hnen atanga thu a dawnah mi 138 thiin, hliam 500 dawn an awm, a ti thung. Colombo khawpuia hliamte hi National Hospital ah enkawl an ni. Hospital thupuangtu Somidi Somalakoon chuan, hliam zinga thenkhat chu an na viau niin a sawi. Thih belh awm tura ngaih a ni.

Thi zingah foreigners 35 telin US, UK, Australian an tel, tih a ni.

Colombo khawpuia Biak In beih hmasak ber hi St. Anthony Shrine a ni a, tin, Colombo hmar lam Negombo hmuna Biak In pahnih beih ni bawkin, Batticola chhak lama St. Sabastians Biak In beih a ni bawk a, heng lai hmun hi Catholic kohhran tamna a ni, an ti.

Sri Lanka population maktaduai 22ah Kristian chu sakhaw lian 4na niin, Muslim 3na an ni a, 70% erawh Buddhists an ni thung. Ni 10 kaltaah khan Intelligents report ah Sri Lanka Islamic pawl pakhat National Thowheeth Jamaath (NTJ) te chuan foreigner tamna Hotel or kristian beih tumna an lo tichhuak tawh niin an sawi.

Aside | Posted on by | Leave a comment