EASTER EGG

By – Rev. Laltlankima Kawilam, Serampore._

Engemaw lai atang khan ‘easter egg,’ ‘easter bunny’ tih te kan lo hre ve a. Hengte hian Isua thawhlehna nen inzawmna eng nge an neih tih kan rilruah zawhna a piang mai thei. Sap hovin an uar riau a, TV leh lehkhabu emaw chanchinbu atang tein emaw kan lo hre ve a. Khawthlang lamin an uar ang chu tih dan tha a ngaiin kan lo uar ve mai em ni?

‘Easter’ tih thumal lo chhuah danah pawh hian ngaihdan a phir hle. Thenkhatin ringlo mite kutpui atanga intan a ni e an tih laiin thenkhat erawh chuan ringlo mite pumpek an phal bik lo. Chulam chu kan chhui thui lo ang.

‘Easter egg’ hi kum tam tak atanga inhlan chhawn thil a ni. Nipui a lo thawt dawn chuan thing hnah tilte an lo chawr thar leh a, thlai chite kan thlak a, a lo tiak a. Chumi hun chu hmakhawsang atang daih tawh khan ‘rebirth’ hunah ngaiin a lawm nan artui chei mawi inpek an lo ching daih tawh a. Persian hote, Egyptian hote, Greek hote, leh Roman hote chuan artui hi khawvel pum chhinchhiahnaah (symbol) an ngai a, Juda ho phei chuan an kalhlen Kut ruaiah (feast of the Passover) an telh thin. Hetiang chin dan hi Kristiante ni serh, Easter Sunday-ah hian Judate chin dan kan chhawm nge Jentail-te chindan kan seng lut zawk tih hi hriat chian ngam a har. Kristian sakhua bik kan thlir chuan artui hian Kristiannaah entir emaw pawimawhna hranpa emaw a nei lo.

Hnam thenkhat chuan mihring hmasa ber, kan thlahtu bulte chu artui atanga lo piang chhuakah an ngai. Burma rama Chin hnamte chuan nu pakhatin (ar) tui za a tui a, chuta tang chuan khawvel a hnam hrang hrangte hi kan lo awm tan niah an ngai (British Medical Journal, April 5, 1947). Hmanlai Greek thawnthuah chuan khawvel hi artui lian tak an phel atanga lo indin tanah an ngai a. A phel pahnih atang chuan Phobos leh Eros te an lo chhuak a, anni chuan thil nung dangte hi an siam niin an inhrilh chhawng thin. Nunna nei leh nunna nei lote inzawmnaah an ngai bawk. He ngaihdan hi Arabian-hote pawhin an tawmpui niin an sawi.

Mihring hmasate khan artui hi ‘magic’ nena chawhpawlhin damdawi atan an hmang thin. Egyptian-te pawhin chutiang chu an ching chhunzawm bawk. Mawngkaw pan enkawlna atan a that thu Papyrus Ebers (c.a. 1500)-ah a chuang ve tlat bawk (British Medical Journal, April 5, 1947). Vawiin thlengin kan nulaho pawhin an sam enkawl nan leh intih hmelthat nan an la hmang zui zel a nih hi.

‘Easter Sunday’ a artui kan leklam viau hi Kristiante chuan thlan atanga Isua thawhlehna entirna atan kan hmang a ni ber a.

Artui cheimawi hi kum zabi sawmpathumna vel atang khan an ching tan niin an sawi. An sawi zel dan chuan ‘Lenten Season’ (Isua’n thlalera ni sawmli chhung chaw a nghei hriat rengna tura ei lama insumna hun a ni a, ‘Ash Wednesday’ leh ‘Easter Sunday’ inkar chhung zawng hian an hmang thin) chhung hian artui leh bawnghnute atanga siam reng reng hi ei thianglo a ngaih a ni a. Chuvang chuan ‘Lenten Season’ a tawp tih entir nan artui an cheimawi a, ‘Easter Sunday’-ah an ei thin a ni. Don Gueranger chuan, “Chaw atana rinrawla an neih pawimawh berte zing a mi, an insum ngar ngar ngei mai chu an ei leh theih dawn tak avangin an hlim em em a. Ringtute chuan Easter Sunday tuka an dawhkana artui chhawp hmasak ber chu malsawm sak turin Kohhran an ngen hial thin a ni” a ti. Roman Catholic-ho phei chuan artui malsawmna chhampual pawh hi a hranpa liau liau an nei a ni awm e (L. Gougaud, “Easter Egg” The Irish Monthly, Vol. 53/622, 1925).

Adolf Franz, kohhran history zirna lama mi thiam tia sawi ngam, chuan kum zabi 10 AD hmalamah khan artui malsawm thu ziah lan a hmuh loh thu a sawi. Hun laihawl (Middle Age) vel atanga chin tan niah a ngai. April 1, 1303 a inremna an ziahah chuan Kingston-on-Thames puithiam chuan a rama in an sak hawh man (groud-rent) a tel zingah kumtin Easter Sunday-ah artui thahnem tak a dawng tel ang tih ziah lan a ni (Deedes (ed), Canterbury and York Society, part XXXVII, 1914, p. 150-151). ‘Document’ pakhat, kum 1270 a ziahah chuan Kristiante chu Palm Sunday, Good Friday leh Easter Sunday-ah te artui rawn thawh thin tur a beisei an nih thu a chuang.

Tun hma atangin Abbey of Fleur-sur-Loire-ah chuan Easter Sunday leh a kar tluan (Easter Week) a hun hman dan tur duan lawk an nei a. Easter Sunday-ah chuan maichamah rimtui hal tur a ni a, sum vawngtuin mi rethei za hnenah tanpuina (silver penny) a pe ang. Naupang zingah Lalpa Zanriah Sacrament kil duh an awm chuan zingkarah kil tir tur a ni a, an kil zawhah an ‘breakfast’ atan in hnuai pindan a artui an dahthat chu pek theuh tur a ni. Mi nawlpui hnenah erawh chuan an zanriah chaw atan sem tur a ni thung (L. Gougaud, “Easter Egg,” p. 186).

Heng kan han sawi tak atang hian khawthlang rama ringtute chuan ‘Easter Egg’ hi hun rei tak atang tawh khan an lo buaipui tawh a, ngaihhlut pawh an ngaihlu viau tih a hriat. Vawiin a keini’n kan artui tak kan cheimawi emaw chocolate hmanga atui lem kan siam emaw te hi Middle Age hunlai a khawthlang kohhran te tih dan kan entawn ve zel tihna a nih chu.

Aside | Posted on by | Leave a comment

TUNLAI KOHHRAN THALAI ZIARANG

David sailo @ 20th April

A inngaihbel kan tam viau chuan lungawina chi a ni tawh lovang. A zawng zawng ka ti lo, ka vaihmer hek lo, enthuak a chhe thuak lai thlir teh ang.

KAN HO –
kan hoh zia chu Conference, Inkhawmpuia kan Drama/Skit chan duh danah hian a lang reng mai. A entute duhzawng kan zawn avangin a ho leh nuihzatthlak, lawmawm kan zawng ber a, hei hian kan Kohhran thalaite lawmna ber a pho chhuak ber mai. Inkhawm banah hlazir hma in Biak In kawt remchangah kan ding hawr tuau a, kan nui thum leh huk thin a, Chanchintha nen hian hoh viau hi a inmawi ber lo. Mi hlimna, mi tih tlangnelna kan ti a, mahse kan ho ral lek lek thin chu a nih hi. Thlarau bo a Support lo!!

NGAIHZAWNG
in hmu fo ta chu an in ngaizawng fir fer mai. Nupui/Pasal zawn nan Kohhran hi a tlak tlai ber maithei. Mahse thalai zawna rawngbawlna kawnga daltu lian leh mi mitmimna lian ber chu hruaitu ngaihzawng nei lungrun ho hi an ni!! An in remsiam emaw tih mai turin an in kawp fir fer a, hnatlang ah an kal dun a, an thu dun a, Sport ah n inzui leh a, zaikhawmna ah an thu dun a, vahchhuah nikhua in an inphur reng bawk a!! Aw a va nuam dawn em ve ka sawi thei lo… Heti ringawt hian rawng an bawl!!

Pawnlam mite aiin Chance an ngah a, an chhung ten ngaihtha takin an chhuah a, hlazir/Drama zir ban, hnatlang banah an han in phur haw leh a, khawikipah an insi rial rial reng a ni ngawt mai. Biak In kawtah pakhat hmuh chuan pakhat zawk hi a awm hla ngai lo!! An tenawm a, Chunglam hmel an hliah ngawih ngawih. Tuman an ei lo, hruaitu an ni laklawh mai chauh a ni.

Kohhran Upa pakhat ka hriatchian takin min hrilh a, a fapa chu Thalai hruaitu OB a ni. A OB pui nula nen an inngaizawng a, an in zui reng mai a, OB a nih vangin a fapa an duh pui reng reng lo. Kha hmeichhia kha Over an ti hle. An Wsp Message a mansak a ni awm e. Sex lam rawngkai nasa takin an lo inbe thin lo niin. Vawi engzat tak chesual tawh ang maw? A fapa chu na takin a zilh hial a ni.

Kohhran Thalaia inhmang, inzui ngawih ngawih reng maite hian Sex hi an lo pawisa lo viau a lo ni. Chunglam ngeng khi chu a chhun khawpin ka ring. Heng ho hian a lawm Member tuihal hnawt tiau thin chu. Zahawm takin lawmpui tlak tak keh thianghlim taka in ngai si hian tu ei mah an hlawh lo mai a ni lo. Thlarau bo hnawt tiau tute an ni.

In ngaihzawnna, innelna hi chu awmthei a ni teh meuh mai, mahse miin min hre lo palh ang e ti chin tawh, Upa te thlenga hriat leh hmuh dun rual rual ho hi chu ring hlek lo ila a fuh duh ber.

THATCHHIATNA LEH THINCHHIATNA –
Thlan lai taima an vang a, lumenna a tlaivar zak peih an tlem bawk. Inchhung khurah an thawhhlawk lo hle a, an mu rei a, kaihthawh ngam pawh an ni lo, an vin hlur mai a, an thatchhe hle a, an thinchhe hle bawk. Kohhran thalai hi hna berah an nei a, an nuih rinna ber pawh a ni. Thalai Programme ah chuan thu tha tak tak meng rulh rulh chungin an sawi thin. Changkang, chhelo, nalh, tunlai an hre hle ringawt. inchhung khurah an vin khur khur a, Thalai programme ah kawm an nuam hle lawi thin. Chhungkuaah chuan dil chhut taka zawhna zawh ngam pawh an ni lo.

INCHEINA –
Incheina chhuakthar a piang an zawm ve thei zel a, thlarau bo tan pan thut chi an ni lo, an nalh lutuk. An kekawr tight lutukte chuan mi chhe chhuat char a Support lova, an thingthit chuan a tet hawk mai ang!! An puan leh kawr in Match buaipui kumtluan chuan tute emaw a hnar a, nalh inelna a hring a, an inkhawm chhan, an rawngbawl chhan ti thlawntu a ni tih an man pha si lo.

ZAIPAWL
Hla an zir reng mai a, mahni Biak Inah an rem ngai hlei lova, zaipawl zaia tang tak mai, inthen zei takte chu Biak In inkhawm zaiah an zai tang tha leh peih der lova, an hla zir chuan a satute ngei nun chu a chawm hlek lova, a ngaithlatu te nun phei chu a chawm lo leh zual. Kan zai tha, kan zai chhia tih vel chu kan buk lung a ni mai. Sound Track man, hla zir hun khawhral chhut chuan kan vawikhat zai hian a thawk nep leuh leuh mah mah a ni.

TI TAK TAKTE –
Mi tlemte an awm ve a, thusawi tur an khatliam a, rawngbawlna ah an chiang a, thlarau bo an vei thin. Heng mite hi mi BORING an ni thung. An thing a, an hmanlai deuh tlat a, ngaihtheih an hlawh lova, a pawimawh kawm tak tak an chelh pha ngai lo. Mi pawnlawi zingah dinhmun tha chelh chi ni hek lo…

Duh tawk phawt ang…

Aside | Posted on by | Leave a comment

LOK SABHA INTHLAN THLIRLETNA 3

By – Matana Pachuau

Vanglaini chanchinbu in MNF chhinchhiahna diklo a chhut kha a tihdikloh pakhat a ni a. A dawt leha an tih dikloh chu Pi Thlamuani chhinchhiahna. An tih dikloh dang leh chu Vanlalruata Royte article an chhuah kha a ni.

Vanglaini editor thuphachawina hmasa kha MNF chhinchhiahna chungchang a ni a. A tukah Pi Thlamuani chhinchhiahna chungchang telh a ni a. Nimina PRISM hruaitu pakhatin a sawi dan chuan an party policy “sawihnawmna” chhanlet hmanloh article chhuah chungchangah khan Vanglaini hian thuchhuah emaw thuphachawina a la awm lo. Pu K.Sapdanga’n tihsual palh a nih thu a sawi kha thudik pawh nise a awihawmloh a, thudik a nih chuan Vanglaini hi an professionalism a sanglo hle tihna a ni ang.

Pu Sapa hian Vanglaini editor ni chunga ZPM hruaitu a ni hi conflict of interest a nei a, tunah phei chuan legal liability neih theihna thil a nei a ni. Vanglaini hi party chanchinbu a nih loh avangin editor hran an mamawh a. Party hruaitu hi editor a nih chhung chu Vanglaini hian objectivity a hloh zel dawn tihna a ni ang. Tun boruak hi zo se, ZPM pawh kum 5 tal chu eptu pawimawh tak an la nih zel dawn avangin editor leh party hruaitu nihna hi party leh chanchinbu tan chinfel a pawimawh ang.

“Mipui candidate” pawh hi a in candidate dawn khan Vanglaini joint editor nihna lo bangfel ni sela FIR ah hian a hming a lang kher lovang. Zir tur tha tak kan nei tlangah ngai ila a tha awm e.

MNF president thinrimna kha a âwm a. Mahse, a ti nasa leh lutuk kha chuan mi khawngaih a hlawhloh phah zawkin a lang. Kha chhinchhiahna chhut dikloh avanga Pu C.Lalrosanga vote loh phah emaw midang vote phah an awm chuan Vanglaini hian engemaw legal penalty chu a hmuh ngei a rinawm a, thil awmlo pawh a ni lovang. Amaherawhchu, MNF lam hian he politic-a bawhchhiatna hi dan hmangin a na thei ang bera beih an tum niin a lang a. An nawr nasat leh lutuk chuan anmahni lama bawhchhiatna tam tak hailansak an ni thei a, tuman Pu Rosanga an lo vote loh phahloh phei chuan an pu berin Pu Sapa leh Pu Tetea te “an sual vang” a tih ang khan MNF zawk hi an sual vanga Vanglaini editor/ZPM hruaitu leh Vanglaini Jt editor/MP candidate bei ta vakah miin an hmu thei a ni. Vanglaini tihdikloh sawimamna emaw sawi nepna nilovin hetiang politic thila bawhchhiatna hi politic hmang veka chinfel a nih loh chuan kan politician te hian case an awrh thei deuh vekin a rinawm. Police in crime liantham buaipui lovin “political crime” buaipui reng rengin hun an hmang thei a ni.

CEO in ECI rawna RO hnena FIR thehlut tura a lo ti a nih chuan kan Election lam hian fair lovin thil an ti nilovin fair takin thil an tilo tihna a ni ang. Kan police te pawh hian ngam bik leh ngamloh bik an nei tih a tilang zel a, a pawi khawp mai.

Pu Tetea hi a puitlin deuhna chu personal attack a chhanglet duhlo leh amah tantute pawh chhanglet lo tura a fuih/khap kha a ni a. Duh nise chuan MNF lamah hian jail tang tur an awm nual mai thei a ni. Pu Rosanga’n he thila a campaign agent FIR thehluh a danglo kha mi tamtak mak tih a tling awm e, editor chauh nilo jt editor hmer tel phei kha chu a case a chaklo viauin a rinawm. A lan dan chuan Pu Rosanga hian Pu Tetea pawh hi jail a tang tlakah a ngai tihna a ni.

Mak ta ber zawk chu kan Chief Minister berin Vanglaini tihsual avanga politic boruak thalo insiam, a chingfel zawng nilo a chingpawr zawnga a party a kaihruai hi a ni. Inthlan tuka amah an kawmna kha a puitling lova, a uchuak a, a mawilo bawk awm e. Dawt nge thudik tih a hriat miahloh te kha thudik angin a sawi tel lehnghal a.

Hetiang hi kan Zoram politic thlen chin a ni a. Harh kan tumloh phei chuan kan hmalam hi a englo takzet a ni. Candidate zinga awmze nei leh inpeih ber Pu Tbc Lalvenchhunga hi a lo tlin hlauh chuan Zoram hian bungthar tak tak kan kai anga, candidate zinga mipui tihlim ber Pu Hriata Chhangte hi a lo tlin chuan Mizoram kan happening khawp ang. Candidate zinga lar ber Pu Tetea hi a lo tling a nih erawh chuan MNF hian kum 5 chhung chu EVM an sawi aia nasa in Vanglaini “sual vanga tihsual luih” hi an sawi ngei ang.

Tukchhuah nuam vek ule.

Aside | Posted on by | Leave a comment

MHIP BUAINA

By David Sailo

MHIP General Assembly 22-na inthlan theih loh chungchang hi thlir ve teh ang.

BUAINA TO BUL –
Secret Ballot hmanga Nomination siamah a ruka tih danglam tam tak a awm tih leh Branch hminga lehkha semchhuah ah Envelope kawma ziak leh a chhunga lehkha a in millo nasa hle tih hi chanchinbu thenkhata kan hmuh dan a ni.

MSU vs MHIP –
Tlawmngaiawl anga ngaih ve ve an ni. MHIP lam hian inthlanpui turin an sawm hmin vek tawh a, an thu sut lehin MUP lam an sawm leh thung. He thilah ringawt pawh hian thil fello a awm tih a hriat theih a, inthlanpui tura sawm an remchan loh vang ni hauh lova midang sawm thuah leh awmchhun a la ni awm e. MSU lam chuan MHIP hruaitu ni mekte hian dik lo takin thil an ti a, inthlanpui tur an nihna angin Fair takin an Nomination siam pawh an siamthat sak leh a ni. Hei hi MHIP hruaitu lam atangin hrethiam lo an awm niin an sawi. MHIP lam ve thung erawh chuan inthlanpui tura an ruat hmasak MSU chuan dik lo takin an ti niin an puh ve thung.

He pawl lian tak pahnih hi tuna hruaituten an hruai chhung chuan an in mil hleithei tawh dawn lo tih a hriat a, a pawi ngawt mai. Pawnlam (Inthlan puitute) atanga Fair loh ngawt hi rin a harsa zawk mah a, a chhung lam atanga fel tawh lo a nih zawk hmel.

HRUAITU NIH A HLAWK EM?
Hruaitu nih hi a hlawk viau ni tur a ni Court a in rawlh rap rap ngai khawpa inthlan boruak kan nei chho ta mai hi. Mizo ang pawhin thil zahthlak tak a ni. MHIP hruaitu ah hian MLA/Minister nupui englai deuhthaw mai pawh hian an in zep tel a, tunah ngei pawh hian a hruaitu zingah pawh a pawimawh ber pawlte zingah an awm. Zep tum mahse hei hian Politics inhruipawhna pawh a thlen chiang a ni.

Hruaitu an nih chuan eng Department a hnathawk pawh ni raw sek sek, ram pum huap an ni a, Block, Sub-Headquarters, Branch Programme ah Khuallian an nih loh leh sawm phar ve reng an ni a, hnuchham enkawlna eng eng emaw an dinah an lal ber a. An Minister chet a, an thu a, Ministry thlengin an inrawlh a, Duh hun hunah Leave an la a, Sorkar mi pawimawh an hmu in an Meeting pui ve sek bawk a, mimal taka hamthatna kawng pawh a kaw deuh ngei ang chu!! Hemi hmu pha ran chin ho vang hian a ni, mawi leh mawilo pawh thlu lova Court hial kan thlen tak ni. A lo châkawm em tak a ni.

TLAWMNGAI PAWL A NI TAWH MEUH EM?
Inthlanna a Line-up tih ri fo te, inthlan kuma buaina tenau an nei ta zeuh zeuh te, Political Party zawnga ngaih theiha Line-Up awm ta fo maite hian Tlawmngai pawl nihphung, ‘Kei chu min thlang suh u’ ‘A ni hi a tha zawk’ ‘Nomination ah min telh tawh suh u’ ti a Mizo tlawmngaihna tawngkam mawi kan chhuah thinte kha an ti dal zawk maha, an zahpuiawm ngawt mai. TLAWMNGAI pawl ni lovin TLAWMNGAIHNA TI DAL pawl tiha mawi a ni ta zawk e.

MAHNI AIAH PAWL –
Pawl hmangaihna, a thatna tur, a hmasawnna tur ngaihtuah tak taka Pawl hruaitu a in barh lut te reng reng chuan thil fello a awmin anmahni vangah ngaiin pawl zahawmna a bo ai chuan tiin Moral Responsibilities an la a, an bang ngam thin. Anmahnin an phur a, pawl erawh a zahawm zui reng thin. MHIP zawng zawng hi fello an ni lo, mi tlemte vang hian hun rei tak chhung pawl hming a hliau thei a, hei hi hmu ve thiam tak maw? Heti chunga tlin zui hram hram dan an la ngaihtuah zui zel a nih chuan an pawl pumpui hi mipuiin a chhe zawngin an hmer tel thin a nih pawhin an mawh a ni tawh ang chu.

HRUAITU BEIH THIAM –
Zoram pum huap tlawmngai pawl emaw Association ah emaw hian hruaitu tanglai beih thiam tak hi an awm fir fer vek a, tam tak chuan hruaitu an nih ve theih nan a tanglaite tlin lohna an tlangzarh thiam ve hle bawk thin. Pawl hmangaihna, pawl tana a ngaihna hriat vang lam ai mahin hruaitu ni mekte beihna hmanga in teilen tuma hmala pawl,Rotekawla sepa ang deuh, dawt leh thutak pawh thlu lova mi fuihpawrh thiam tak tak an ni thin. Heng ho hi hruaitu ah pawh an rawn chhuak ve fo a, engteh ruai an ni ngai lo a, an beiha te ne pawh an ek thin lo. Hruaitu tanglai beih bak Principle nei hek lo!!

TLIPNA –
MHIP hmang hian in en let teh ang u. Pawl hruaitu kan in FIR pup pup thinte, hruaitu tlemte ten dik lo tak inthlan kan kalpui thin avanga pawl pumpui hmingchhiat thinna te, Party ang maia pawl zia a chhuak zo ta te, nihna kan duh em em mai langchhuak thinte hi hruaituten pawl an kalpui dan fello vang a ni fo. AMC Office kal tur YMA berin kan han dang rup mai te, MP inthlan dawna ngaihtuah chiang lo sût leh ngaia Total Bandh huaihawt kan han tum ringawt mai te kha a kawnghmang lo thin. Sorkar khalh ngil turin mawhphurhna chen kan nei a nih pawhin Pressure Group ni lovin Tlawmngai Pawl kan nihna hi hriat reng a tha ngawt mai.

Aside | Posted on by | Leave a comment

CHAMPHAI LEH ZOKHAWTHAR HI SUMDÀWNPUI TLÂK AN NI LO

(Burma Mizo tan)

Ram ri-ah chuan Zokhawthar (Mizoram lam) bâka kawng khar zing hi khawvelah a awm ngai ka ring lo. Mipui tana ṭangkaina nei mang hlei lo pâwl (department) sakhming tam luat avanga inîtsîk tawnna vang hian Mizoram mi ni ve lo, Burma ram mi thlengin ni tin ei zawnna kawngah a tam zawkin kan tawrh phah a ni.

Politic e, tik lo e, ka hre ve lo! Tute emaw intih thu neih duh luat avanga tute pâwl (department) emaw-in, insumdawn tawnna tur kawng an han khar phui tawp zel mai hi chu, ni tin ei chawp dap tan chuan khaw ram chhimbuk ang maia hawi hil bâk hmachhuan kan nei lo.

Hruaitute zingah mahni sahmim tih puarna bâk ngaihtuah lo hi an kat nuk a, ni tin ei chawp dap chhungkaw khawsak zia erawh an hre thiam pha lawi si lo a ni.

Tin, Sumdawng tan paw’n hetianga tih khaihlak an nih reng si chuan, an tan phur rit a nih mai bâkah, hun a inkhawh ral a, a theihna kawng chu dapin an hêl hram hram a, an hêlna lamah khuahkhirhna danin daidan an ni leh lawi si a ni.

A nihna takah chuan Sumdâwng hi awm lo se Champhai leh Zokhawthar hi eng mah an ni lo’ng! Kei Burma mi sakechek hian ka sawi ngam sak a ni. Sumdâwng rinchhana khawsa ho kan ni a, keini Burma lam tan a pawina viau a awm lo a; mahse, a Mizoram lam zawk hian an tuar nasa zâwk dawn tih chu lei ben ṭhelh lova chiang a ni. A chhan chu ram pâwn aṭanga thil lo lût reng reng hi khàr lo ni vek ta se, Champhai leh Zokhawthar khua chu khaw ram chhimbuk tual lènna mai a ni ang.

A pawi ber chu thil rit (heavy) mim fang tia pawh chawi kang ve lo khan sum a khawn tlat ṭhin hi a ni. Chutiang hlâwkna têltute chu mi dangin an lo hmuh ṭhelh bik dèr si lo a, chutiang inîtsîk tawnna vanga hetiang dinhmuna ding chu kan ni ta a ni.

A bulpui ber chu duhàmna vang a ni. “Duhàm chu malte ngahna/nâk,” an tih kha!

Aside | Posted on by | Leave a comment

YMA General Conference Vawi 72-na North Vanlaiphai-ah

YMA General conference neih hun

YMA General Conference Vawi 72-na chu nakumah North Vanlaiphai-ah October ni 15 atanga ni 17 chhung nghah a ni dawn.

Central YMA hnuaia thuneitu sang Central Co-ordination Committee nilainia thutkhawm kaihruaitu CYMA President Pu Vanlalruata chuan ram leh hnam tana tha tur thil pawimawhah chuan YMA chu intel ruhion,an tangrual tha hle tur a ni a ti a. Tun hnaiah Mizoram leh hnam tan a thil pawimawh hmachhawn a awm zeuh zeuh tih sawiin, heng thil hrang hrang a hmachhawnna-ah YMA member te inpekna leh hruaitute thawhrimna chu chhuan tlak a ni, a ti a. Thawhhona a that avangin an thil do leh tum chu tihhlawhtlin a ni thin a, YMA membner te chu an theihna zawn theuhah ram leh hnam tana theihtawp chhuan chhunzawm zel turin a sawm a ni.

He hunah hian Central YMA General Secretary in report a pek-ah. October ni 19-a YMA rorel inkhawm vawi2-na rorel bawhzuiin YMA chuan Mizorama kohhran hrang hrangte nen ram leh hnam humhalh kawnga thawh hona leh impumkhatna tha zawk a awm theih nan Mizoram Kohhran Hruaitute Committee chu hmalakpui dan tur sawi ho turin an remchan hun nghah mek a nih thu sawi a ni a, thingtlang lama zirna a lo that zawk theih nan CYMA-in hmala rawh se tih chu Education Sub-Committee-in a bawhzui mek a, hemi atan hian Education Department nen thawh hona thuthlung siam rawtna chu Education Minister hnenah thlen a ni tawh sawi lan a ni bawk. Mizo tawng humhalh tura hmalak rawtna chungchangah pawh Language Board din tura Mizoram Sorkar-ah thlen tura hmalak mek niin, zu leh ruihhlo do kawnga chak zawka hmala turin Branch tin hnenah lehkha thawn tura ruahmanna siam a ni a. Mipuite’n Ration buhfai leh Gas buktling an hmuh theih nan hmalak rawtna pawh Supply Minister sawipui a ni tawh a. Branch tinte chu an huam chhung theuha sorkar hmalakna dik taka kalpui a nih theih nan lo enfiah a, a tul anga hma lo la tura beisei an ni tih tarlan a ni.

Central Co-ordination Committee thukhawmnaah hian Central YMA Office Bearer leh CEC member-te bakah Sub-Headquarters aiawh mi 6, Group YMA aiawh mi 2 leh Aizawl khawpui chhung Branch atangin aiawh pakhat theuh an tel a ni.

Aside | Posted on by | Leave a comment

Pu Zorama ṭawng hi a serious em

VANGLAINI CHHUT DIKLOH AIA “SERIOUS” ZAWK A AWM EM?

“Hei aia, inthlan dan bawhchhiatah hian, serious hi a awm chuang em ni? kan ti”- Zoramthanga, MNF President. April 11, 2019

“2008 inthlanna ami tur kha (EVM) an zuk order a. Chumi order-na siamna company ah chuan khawih chingpen theih turin an rawn program sa a. Chumi kan hman atang chiah chuan kan buai ta vek a ni” – Zoramthanga, MNF President. April 2014

Zawhna: Vanglaini in MNF chhinchhiahna a chhut diklo ai khan EVM “khawih chingpen theih tura an rawn program sa” kha a serious zawk angem?

Aside | Posted on by | Leave a comment

Good Friday Drama avangin Pathian an hmu

Kum 89 kal daih tawh khan Chawngtlaiah Good Friday Drama chan avangin ringloten Pathian an hmu.

Kum 89 kal liam ta, kum 1930 Good Friday khan Chawngtlaia Presbyterian Kohhran Upa Dara pa, Thangchhuaka’n sechal a talh a, “Lal Isua an man dan te, an sawisak dan te, rorelna hmaa an hruai dan te, Kros an puttir dan te thuin in sawi țhin a, upa lam tan leh ziak leh chhiar thiam ve lo tan a chiang lo a, chuvangin a lemin chang ula ka hrethiam ang,” a ti a.

Tichuan, Isua tuarna chu a lema chang turin an inbuatsaih ta a. Bible-a Isua chanchin te an en a. Tlangval Sakhuaia chuan, “Ka nu leh pain Pathian thu an awih theihna anih dawn phawt chuan engpawh ka huam a, Isua lema chan a, eng ang pawha sawisak ka huam e”, a ti a.

Isua an man ațangin an chang țan a, an ti tak tak viau a ni ang. Isua lema chang Sakhuaia pawh a zam hle ni tur a ni, a bula ding Pu Chalhranga hnenah chuan, “Mi vuan rawh” a ti chul mai a.
Rom sipai lema țangte chuan fei an hawh khawm a, belphuar kawr hlai pui puia hikin lukhumah an hmang a. Chungho chuan Isua lema chang chu an han beng a, an sawisa a, a hmaiah te chil an chhak a. Chutia Isua lem an sawisak lai chuan Isua lema chang Sakhuaia pi a lo kal a, a tupa an sawisa chu a hrethiam lo a, “Engah nge hetianga in tih?” a ti a. Lemchang an nih thu an sawi chuan a hrethiam ve ta a. Midang ennawm thlira thlir tumte pawh an mittui a tla zawk hial a. Tichuan Kros an puttir a, an chhawm a,a tlukpui hnawk hnawk a. Mipuiin khuang nena zaiin, “Enteh Chhandamtu chu an hruai ta” tih hla an sa a, sa thei a ram pawh an awm lo, an țap țuau hlawm a. An titak bawk a, an chan zawh chuan se talhtu Pu Thangchhuaka chuan, “E, tunah chuan ka hrefiah ta. Thu maia insawi ai chuan a fiah zawk e” a ti a.

Tin, Isua lema chang Sakhuaia pawh a duhna tihhlawhtlin niin a nu leh pate chuan Pathian thu an awih ve ta a ni.
( He thu hi chawngtlai Kohhran Chanchin, Pu Chalhranga(L) ziah a mi lak tawi a ni.)

He drama-a Isua lema chang Sakhuaia hi a chanchin an sawi zui dan chuan Isua lem a chan ațang khan a kulcho chho ta a, hna a thawk hlei thei ta lo a, naupangte niin 1936 khan a thi ta a ni. A thlan lungah chuan,

“Sakhuaia kum 26, Chawngtlai Kohhran 110 zinga kan mi țangkai leh kan chhuan ber chuan march 5, 1936-ah Lalpa hnenah min kalsan ta”
tih a in ziak. Tunah hian Chawngtlai thlanmual hlui, Pasaltha Hranghleia thlan bul lawkah a thlan pawh hmuh theihin a awm.

1930-ah Chawngtlai Kohhranin Drama hmangin Chanchințha an lo puang daih tawh a.Isua lema chang Tlangval Sakhuaia pawhin Lal Isua chanchin chu a thihpui a ni ber a. Isua tan martar-ah kan chhiar thei lo anih pawhin Lalpa tan a thawhhlawk reng reng e. Lalpan a ramah a chawimawi ngei ang.

  • Dennis C.L.T.Mawia
Aside | Posted on by | Leave a comment

PU LALNGHINGLOVA HMAR AGENT IN CEO-AH COMPLAINT THEHLUT

Ni 18.4.2019 (Ningani) hian ZPM leh MPCC thlawp Independent MP (LS) Candidate Pu Lalnghinglova Hmar Agent Pu Lalhnehzauva chuan tun Lok Sabha inthlana thil fello chungchangah Complaint siamin CEO Office-ah a thehlut a, CEO hi a zin avangin Joint CEO, Pu H. Lianzela’n a lo dawng a; Pu Lalhnehzauva hi ZPM leh MPCC hruaitute’n an tawiawm a ni.
.
Pu Lalhnehzauva chuan a lehkhaah MP (LS) te hming awmna Sl. No. 4 leh Sl. No. 5 tihsual chungchanga FIR leh Complaint thehluh tawh leh Pu Lalnghinglova Hmar hnena Show Cause Notice pek chungchanga lungawi lohna ziakin inthlan ni, 11.4.2019 a Complaint thehluh copy leh 16.4.2019-a Jt.CEO in a chhanna lehkha copy te pawh a thil tel a ni. CEO a Complaint-na hi General Observer te’n an lo hriattur leh a tul anga an bawhzui turin copy pek vek an ni bawk.
.
Pu Lalnghinglova Hmar Agent chuan Jt. CEO leh DEO (Lunglei District) te chuan Thorang biala Rangte leh Dengsur-a Presiding Officer in candidate te Sl. No. a tihsual leh Polling Station hrang hranga an tar chhuah chu an pawm thu sawiin District Election Officer hnenah Complaint siam nghal niin, tun thlenga Chief Electoral Officer (CEO) atanga hmalakna la awmlo hi lungawi thlakloh a ti tak zet a. Inthlanni hun tawp thlenga Polling Station thenkhatah Candidate te Serial Number dik lo a tarlan hmuh tur ala awm thu sawiin, mipui vote thlak tur, ziak leh chhiar thiamlo tam takin serial number hmanga vote an thlak avanga an chhiatpui theih thu a sawi bawk a ni.
.
Tin, Returning Officer Pu Vanlalngaihsaka’n Vanglaini Chanchinbuin Party pakhat symbol a tihsual palh avanga Independent Candidate Pu Lalnghinglova Hmar insawifiah tura show cause notice a pek hun tiam chhung ral hma a, First Information Report (FIR) ni 11.4.2019 tlai dar 3:15 pm-a Aizawl Police Station a thehluh a nih thu leh Pu Lalnghinglova Hmar in tlai dar 2:15 pm-a Show Cause Notice envelope inchar thlapa a dawn hma daih a social media a a darh thu a tarlang bawk a ni. Hemi chungchangah hian Joint CEO Pu H Lianzela chuan, Returning Officer hnenah Vote thlak zawh hma chu Show Cause Notice emaw, eng thil pawh Pu Lalnghinglova Hmar chungchangah hmalakna lo nei hrih lo tur a an hriattir ngei thu Pu Lalnghinglova Hmar Election Agent Pu Lalhnehzauva bakah, ZPM leh MPCC hruaitute leh a hmun a awm Journalist te awm lai ngeiin a sawi a ni.
.
MPCC & ZPM hruaitute chuan CEO Office leh Returning Officer te chu an hmalak danah ngaihpawimawh bik an nei nia an ngaih thu Jt. CEO hnenah sawiin, an complaint-na te chu chak taka bawhzui turin an ngen a. Jt. CEO chuan a rang thei ang bera complaint lut chu lo en a bawhzui an tum thu MPCC & ZPM hruaitute chu a lo hrilh a ni.
.
Issued by : MPCC & ZPM Publicity Committee

Aside | Posted on by | Leave a comment

MHIP-in inkhawmpui an hmang mek Court-in hruaitu thlan a remti lo

Mizo Hmeichhe Insuihkhawm Pawl (MHIP) chuan nimin khan Vanapa Hall-ah General Conference an hmang. Conference hi vawiinah chhunzawm tura tih a ni a, kum 2019-2021 chhunga office bearers thlan tur a nih laiin, thil dik lo a awm a puh a nih vangin Court-in inthlang lo turin a hriattir.

MHIP General Conference hi vawiinah chhunzawm tur a ni a, ruahman dan chuan Mizoram Upa Pawl (MUP) kaihhruaina hnuaiah kum 2019-2021 chhunga MHIP Gen.Hqrs. office bearer turte thlan tur a ni. Mahse, inthlan tur chungchangah hian Court-ah thubuai thehluh a awm avangin, Aizawl District Court chuan inthlang lo turin MHIP chu nimin khan a hriattir.

Aizawl District Court-a thubuai thehluttute ukil K Remruatfela chuan, MHIP Gen.Hqrs. office bearer tur thlan turah MHIP Gen.Hqrs. hruaitute

aṭanga thil dik tâwk lo tih a awm thu hriat a nih avangin Court-ah khin a nih thu a tarlang a, “Court chuan ngun taka a ngaihtuah hnuah, thil fel lo leh ballot paper tihchingpen a awm ngei nia a hriat avangin April 17, 2019-a MHIP Gen.Hqrs. hruaitu thlanna neih tur chu kaltlangpui lo turin April 16, 2019 khan order a chhuah a ni,” a ti.

MHIP General Conference hi MHIP Gen.Hqrs. vice president Lalthlamuani’n a kaihruai a; khuallian, Horticulture director Dr Elizabeth Saipari chuan, hmeichhiate’n ram siamṭha turin tih theih tam tak an neih thu sawiin, “Ram rorelna sanga tel thei turin theihtawp i chhuah ang u. Tun dinhmunah ram rorelna sang berah tel lo mah ila, a hniam zawkah hmasawnna hna thawk turin hmeichhiate kan awm ṭeuh a ni,” a ti.

Dr Elizabeth Saipari chuan, Mizo hmeichhiaten puanbih an uar lehzual chu lawmawm a tih thu sawiin, “Sorkar pawhin puanbih hi a ngai pawimawh a, kar khata a bih hun tur an bituk a ni. Nu berte’n puanbih kan uar tlat chuan kan tu leh fate’n an uar zel ang,” a ti a; Mizo hnam incheinate chu hnam dangin an chawisansak dawn loh avangin, mahni ngeiin chawisan a pawimawh thu a sawi.

MHIP president Saipuii chuan, Mizoram, khawtlang leh chhungkua a him theihna atan MHIP member zawng zawngte’n tih tur tam tak an neih thu a sawi a, “Hmasawnna rahbi thar chuangkai turin kan thiamna te, kan finna te, kan chaknate mi dangte’n malsawmna an dawn theihna atan i hlan nawn leh ang u,” a ti.

Saipuii chuan, MHIP din chhan leh thil tum ‘Mite ṭanpui’ tih chu chawi nung zelin, khawtlang tan pawh MHIP lam rîk a nih apiangin mi dangte ṭanpuitu ni tura zirtir zel turin MHIP member-te a chah a, “Kan in chhungah kan tu leh fate hnenah mi dangte ṭanpuitu ni tura zirtir zelin theihtawp i chhuah ang u,” a ti. Khawtlanga chhawmdawl ngaite tan MHIP chu nu a nih zel theih nan theihtawp chhuah a pawimawh thu a sawi bawk.

MHIP general secretary T Lalthangpuii tarlan danin, MHIP-ah hian sub-headquarters pasarih, block 26, joint 24 leh branch 729 an awmin, member 2,89,300 a awm mek a ni.

Vanglaini

Aside | Posted on by | Leave a comment