MANIPUR-AH RANGKACHAK VBCH 15 MAN HU MAN

Manipur police-te chuan rangkachak cheng vaibelchhe 15 man hu zet an man a, a kawltu mi pahnih an man tel bawk.

Police-te chuan rangkachakte hi Manipur leh Assam inrina bul Jiribam-ah man a ni thu sawiin, a phurhna lirthei pawh an hreng tih thuchhuah an siam. Heng rangkachakte hi Southeast Asia aṭanga lakluh a nih an rin thu sawiin, Myanmar aṭangin Moreh kaltlanga Manipur-ah lakluh a ni, an ti.

Tun hnai khan Assam Rifle-te pawhin Myanmar aṭanga rangkachak tawlhruk an lo man tawh thu an sawi. Police-te chuan an mi mante hi thu an sawhfiah thu sawiin, an lo inhnamhnawih fo tawh vangin an hnen aṭang hian thil tam tak hriat theih an inbeisei tih an sawi. An hming leh nihna erawh an puangzar lo thung.

Advertisements
Aside | Posted on by | Tagged , | Leave a comment

INDIA IN AIZAWL KHAWPUI – BOMB HMANGA A BEIH DAN TLANGPUI

(A ngaihnawm emaw ka hre lo, inthlahrung deuhin kan ti ve chhin)

image

image

Pic. Aizawl khawpui Bomb tu Jet Fighter Pahnih Hunter Fighter/Bomber/Ground Attack/reconnaissance leh France Siam Dassault Ouragan (Toofani) Fighter Bomber

image

Aizawl khawpui bomb a nih hnu

Mizo te thinlung a reh tawh hauh lo tur, khawvel a Mizo ten ziaka document kan neih ve hnu a, hnuhma lian leh thawm lian ber chu March Ni 1, 1969 ah Mizo National Front ten India laka tanga Mizo ten mahni a ro inrel hranna nei tura an suala Independence an puan atang khan a lo piang ta a ni a.
MNF ten India lak atanga independence an puan chiah khan Sawrkar laipui chuan Mizo, Independent suala rammute tudai turin Eastern Command Hqrs. Lt. Gen. Sam Manekshaw a khaihruaina hnuaiah, 101 Communication Zone, Maj. General Sagat a hruaina in Silchar ah 311(Independent) Infantry Brigate) leh a hote dah nghal an ni a. Heng bakah hian Agartala lamah 61 Mountain Brigade(under Brig. R Z Kabraji) te dah an nih bak a Zoram buai lo en thlithlai turin Silchar bul, Masimpur-ah HQ 57 Mountain Division te hi a hnu deuh ah dah leh an ni.

Heng baka pawimawh ta ber chu Mizoram chhung helna tudai tura hmala ber tura luttate chu 61 Mountain Brigade, the 8th Battalion, Sikh Regiment (8 SIKH) Ni 3. March 1966 ah Mizoram an rawn lut a, kawng lakah MNF lam ten harsatna nasa tak lo siamin blockade te siamin an lo tibuai a, heti chuan hian Ni 6. March ah Aizawl an lo thleng thei a ni. Ni 8. March ah On 8 March, the 2nd Battalion 11 Gorkha Rifles te chuan Champhai lam an pan a. Tin, 3rd Battalion Bihar Regiment (3 BIHAR) ten Lunglei lam an pan veta thung a ni. Ni 15. March 1966 a lo nih meuh chuan 16 Brigade hnuaia Batallion pali te chuan Mizoram pum hi an luah khat hman vek a ni.

Hetiang dinhmunah hian Zoram chu a lo tluk luh tak a vangin (A tawi zawngin) MNA ten Zoram chhunga hmunpuimawh tam zawk ah te thuneihna an lak tawh bawk si a vangin Prime Minister Indira Gandhi chuan Ni. 5 March 1966 Dar11:30 a.m. ah Mizoram chu Jet Fighter hmanga Bomb turin Kumbhigram- a mi 29 Squadron Toofani Fighter leh 17 Squadron Jorhat atangin Hunter ( A hun laia Fighter tha France leh British siam, Heng Fighter te hi Aviation lam sawi dan chuan First Gen. Fighter an ni), te chu a rawn tir chhuak ta a ni. Heng Fighter pahnih te hi mi sawi dan chuan Rajesh Pilot leh Suresh Kalmadi te khalh a ni nghe nghe.
He thil thleng hian Indian Democracy lungphum pawh a sawinghing hle nghe nghe niin sawi a ni a. In tamtak bomb chhiat a ni a. Mi engemaw zat hliam leh nunna chan an awm a. Mi tamtak in leh lonei lovin an vak vai a ni. Ni thum chhung zet chu Aizawl khawpui chu Bomb hmanga a beih niin, India sawrkar ropui chuan Aizawl khawpui chu senmei a chan tir ta a ni. Mit a hmutu, Pu Zosangliana chuan tiang hian a sawi. “Hetiang hi kan chenna khawpui chu a nih tak avangin, Aizawl atanga Km 5 a hla, khaw thenawmah ka pa nuphal te hnenah kan tlan chhia a, Aizawl Bomb a nih atanga ni hnih chhung chu kan chunga Jet Fighter thlawk kual kan hmu a, thil puak ri ulh ulh kan hriat bakah kan in awmna thin a tanga van lama mei khu chho ngut ngut chu kan hmu a ni” a ti.

Tin, Pu C. Lalzama MNA a mi chuan Aizawl bomb chungchang tihian a ziak bawk.
“Jet fighter a lo thlawk a, .. bomb an rawn thlak ta mai a. machine gun-in an rawn kap bawk a. . Kei chu kupu te in bul a theihai buk hnuaiah ka biru a.Thlawhna thlawkri leh an bomb puak ri te chu ka tan chuan a rapthlak takzet a ni. A thawm raptlak tak ti reh turin ka kutin ka beng ka hup a. Jet fighter te an thlawh kian hnu chuan ka theih tawp a chakin kan in lam panin ka tlan a. Kan ina ka luh chuan tumah an lo awm lo va, ram hnuai lam panin, ram hnuai lam kawng zawhin ka tlan leh nghal a. Ka tlan pah te pawh chuan thlawhna tanga Bomb an thlakna khur te pawh ka hmu bawk a. Ram hnuai lam panin ka tlan thla zel a. Chutichuan ka nu in ka farnu/nau Lalruattluangi a lo pua chu ka zuk hmu a, A hnung atang leh a ban a tang chuan thisen a chhuak nasa hle a, Midang te an lo thlenga ka nu hnen atang chuan ka nau chu laksakin ka nu chu an chhawk a, Ka nau hliam atang chuan thisen a chhuak nasa hle mai a. A hmai dang var lep mai atang chuan a hliam chu a na hle tih a hriat khawp mai. Ka nu chuan a biangah duat takina chul a.
Kei chuan ka nau hnenah chuan, “Maruat a na em?” Tiin ka zawt a. mitmeng chau tak chung leh harsa tak chunga ka lam lo hawiin, ‘ka taksa lehlam hi a na lutuk, thawk a harsa, a na lutuk, enge an chungah khan tihsual kan neih a, engvanga min bomb nge an nih” tiin min chhanga. A biangah chuan mittui a rawn luang ngiai ngiai a…

Chutihlai chuan fighter a rawn ri leh a. ‘chu an lo kal leh ta tiin hlauh avangin a mai mitchhinga, a thisen chu a hliam tangin a la chhuak reng bawk a. Mi tlawmngai ten tui an rawn la a, no khat chu a in zo nghal vek a, a ban rawn dah chhuakin, ka ka kutah a vuan a, “Ka lawm lutuk, thlawhna te thalo I ti ve takzet em?’ a ti a, Kumkhua a meng leh tawh ngai lo turin a maimichhing ta a. Awm zawng zawng te chu kan tap a. thlawhna te chu anchhia kan lawh a”

March 1966 atanga 1967 kum tir lam thleng khan. IAF te hian Mizoram hmun sawm laiah Bomb an thlak niin hriat a ni a. Khawzawl, Pukpui, Mualthuam, Tlabung, Hnahlan Sangau, Bunghmun leh hmuntlangah te.
Aizawl bomb a nih hian Republic Veng, Hmeichhe Veng, Dawrpui leh hmun engemaw zat chu a chhe hneh hle a ni.

(Zaninah ka rilruah a awm thut a, documment kah hmuh theih ang ang te kan en thuak thuak a, ka ziak ve mai mai.Mizo tawngin chhiar tur ka hmu lova, English atanga ka lehlin leh chhawn a ni a sawitute tawng kam diktak ang a ni loh pawhin min hrethiam dawn nia.)

Author : Chuanga Chhakchhuak Kf

Aside | Posted on by | Tagged , , | Leave a comment

ISRAEL ARMY TEN PALESTINIAN HEL 7 AN THAT : ISLAMIC JIHAD TEN PHUBA LAK AN TUM

Nimin October 30, 2017  ah Israel Army te chuan Gaza Strip lam atanga Israel ram chhung luh rukna tura leiverh (tunnel) chu bomb hmangin an tichhia a, a chhunga Sazu ang maia lo tawm ru Palestinian hel, Islamic Jihad hotu-Central Gaza a Armed Wing hotu ber Arafat Abu Marshould leh Hamas hotu 2 an thi tel a, an vaiin 7 an thi. Chubakah, heng tunnel a awm chhanchhuah tum dang Palestinian 9 an hliam bawk.

image

Islamic Jihad leh Hamas hote chuan a tul anga che thut thei turin leh phuba la tura inpeih turin an sipaite an hriattir a ni. Israeli PM Benjamin Netanyahu chuan, “Min tihnat tumtu leh tihhlum duhtute chu kan bei let ve a ni. Zawldawh takin inkuangkuah san kan tum bik lo ve” a ti. Hetianga Islamic Jihad ten tunnel an siamna hmun hi Khan Younis chhim lamah niin, Israeli chenna Kissufim khua atanga mel 2 lekah a ni.

Kum 2014 a Israeli leh Palestinian hote inbeih vak tum pawhin heng tunnel hi an hmang tangkai hle niin an rung. Heng lei hnuai puk, kawng atangin Israel ramah lutin pawi an va khawih zeuhva, Sihal kaw nei tha ang maiin Palestinian hote hi an tawmbo leh daih mai thin a ni.

Israeli Army Lt Col. Jonathan Conrius chuan, he tunnel hi kum 2014 ah pawh Hamas leh Islamic Jihad hoten an hman tangkai hle a rinawm a;  tun hnai atangin uluk takin en thlak a ni, a ti. Hetianga an va tichhia/ tichim thut hi Israel hian a chhungah mihring an awm an ring ngei anga; engvanga warning pe lawklo nge tih erawh hriat a ni lo.

Gaza awptu Hamas leh Palestinian Authority inremna angin Hamas hote hian Dec 1 khian an thuneihna chu Palestinian Authority kutah, President Mahmoud Abbas hruai turin an hlan dawn a, Israel erawh chuan Hamas hoten silai tung a, armed wing an din an thiat a nih loh chuan pawmpui an tum lo a ni

Author : C.T.Lalrinawma

Aside | Posted on by | Tagged , , | Leave a comment

SPAIN-IN CATALAN SORKAR A THIAT TA RUP : CATALAN HRUAITUTE AN TLANBO

October 31, 2017  Spain sorkar chuan Catalan/ Catalonian independence puangtu sorkar President Carles Puigdemont a hruai sorkar chu Constitution Article 155 bawhchhia tiin, Sunday khan a thiat ta rup mai. He thupuan anih hian pro-independence hruaitute leh mipuite chu lungchhiain an mittui a far hial a ni.

Nimin Thawhtanni khan Spanish Attorney General/ Prosecutor Jose Manuel Maza chuan, Catalan hruaitute chu helna chawk chhuaktu leh thiltisualtuah puhin, man an nih tur thu a puang a; chumi hnu lawkah President Carles Puidgemont leh a Cabinet 5 te chu Marseilles a lutin, Belgium ramah political asylum-venhimna dil turin an tlanbo ta a ni. Mahse, Belgium hian political asylum angin an lo la dawng sawng rih lo. Man an nih chuan kum 30 jail bang zut theihna tur a ni.

image

Spain PM Mariano Rojoy sorkar chuan Catalan region a sorkar hnathawk 200,000 te chu tha taka hnathawh chhunzawm tura hrilhin, Spain Sorkar chuan, Catalonian Police Chief pawh a dinhmun ngaiah dah lehin, police 17,000 te pawhin tha taka hna an thawh a beisei thu a puang.

Catalan-hote independence puang hi tunlai khawvel news luahtu ber a ni mek a; khawvelin a ngaihven hle. Spain PM Rojoy chuan Cataln sorkar thiah thu a puan rualin, Dec 21 ah inthlan a ko nghal a ni.  Inthlan that neih ni ta se El Mundo Opinion Poll chuan pro-independence 43.4% leh anti-independence 42.5% angin mipui vote a inthen phawk ang, a ti.

Kum 1979 a Dictator Gen. Francisco Franco thuneihna paihthlak a lo nih khan, Catalan hote hi mahni ro inrelna (self gov’t) pek an ni leh a; chuvangin tun hnuah Spain atanga indenpendence an lo duh ta a ni.

Catalan ah hian Denmark leh Morocco ram te chuan Embassy an lo din tituai hman a, chung embassy chuan Catalan Independence tura Referendum buatsaih anih laia Spanish Police chet rawva dan chhui an tum a ni.

Spanish Interior Minister Ignacio Zaido chuan Catalan Police Chief ah an ban tak, Msos d’ Esquedra a la lut a; police te pawh neutral zui turin a beisei bawk.

image

Catalan Vice President Oriel Junqueres chuan, mipuite thlan kan ni, tiin office luah zel atum a; Catalan mipuite chu lungawilohna lantir (civil disobedience) lan tir mup mup turin a fuih. Carles Puigdemont te hian raltlan sorkar din an tum tih an puang.

Author : C.T.Lalrinawma

Aside | Posted on by | Tagged , , | Leave a comment

THLAHRÂNG AWM I RING VE EM?- BANGALORE AIRPORT HRÂNG

Zoram tan a ṭangkai dan tur ka hrethiam chiah lo a, ngaihtuah tithuitu atan lo ni se.

Bangalore khawpui lian tak maiah chuan zin veivak an tam tulh tulh a, thlawhna thlawk lut pawh a tam belh a, airport-ah pawh thlawhna ṭum tur a leng ta lo va, a te deuh ta tih vangin HAL airport aṭang chuan khaw pâwn: Devanahalli–ah insawn a ngai ta a, khawchhung aṭang chuan km 40 vel lai a ni. Keini (aircraft maintenance engineers/technicians)-ho pawh chu hreh chung chungin july 2008 chuan kan insawn phei ve a. Chutia kan thawh ṭan vel lai chuan thu lêngvàk vel a awm a, chu chu thlahrang chanchin a ni.

Airport-ah chuan hmeichhe pakhat sari vâr kaih, sam sei tak, sam thlah hnuang mai hi hmuh ṭhin a ni tih thawm a awm. A inlar hun hi zan dar 12 aṭanga zing dar 1 inkar vel a ni tlangpui. A inlarna hmun hi thlawhna thlawhna tum hmun (Runway) tawp leh cargo (bungraw thawnna) area-ah a ni deuh vek bawk. He airport hmun hi tunhma chuan loneimite chènna ṭhin a ni a, ramhnuai zau tak a ni bawk a, chutah chuan hmeichhe pakhat hi an pawngsuala an that a ni, tiin sawi a awm, chhui mite’n an chhui dan chuan. Amaherawhchu chu nu ngei chu a ni e tih pawh finfiahna a awm chuang lo.

CHANCHINBU LAMAH:
  Media lam chuan thu lêng vel (rumors) hi an hriat duhzawng tak mai a ni si a, chanchinbu tam takah a chhuak nghal a, Bangalore mirror (September 24, 2008 at 01:02:26 AM issue)- ah chuan September 22 zinga pilot pakhatin a thlawhna rawn tum tum chu hmeichhe pakhat runway-a lo thu ringawt an hmuh vanga landing a tihkhaihlak (delay) thu chu a tar lang kuau mai. Pilot-in Air traffic controller hnena a report hnuah airport sipai [Central Industrial Security Force (CISF)] te chuan motor-in an va phur a, mi â nia ngaiin ngawi rengin an chuan phei pui a, terminal building an thlen chuan a bo daih mai motor hnung aṭang chuan. A phurtute hian a hmel pawh chiang takin an sawi thei niin an inchhal.

Hei bakah hian July thla vela airport lift amaha a chhuk chho vel, zana thawktute’n an hmuh thu tarlan a ni bawk. Tumah chuang si lovin a kal vel ṭhin a, electricity kalsual vang nge tih erawh a finfiah theih loh. A hnuah pawh cargo hmun vela hmeichhe pakhat an hmuh ṭhin thu chu chanchinbu ṭhenkhatah tarlan leh a ni. A. N. Vishwanath, general manager, ATC (Air Traffic Control), chuan airport authorities te chuan engmah kan hre ve lo a, thu belhchian dawl lo mai a ni, tiin chanchinbu mite a hrilh a, he thu lengkual hi tihtawp vat an tum thu a sawi bawk Bangalore Mid–day paper ( 2008-09-26 issue)-ah.

KAN HRIAT VE DAN:
Heti zawng hi pawnlam mite hriat tura phochhuah chu a ni a, keini a chhunga thawk te hriat ve han tarlang ila. Pilot-in runway-a hmeichhia a hmu an tih zan hian ka duty lo va, a tukah min lo hrilh a, Domestic ni lova international airlines ni ngeiin min hrilh bawk. Pilot hian a hel kual hnua a vawi hnih ṭum tumna-ah pawh a lo la awm si a, thlawhna chu a pawt chho leh a, vawikhat a kual leh a ni vanah, report pek pahin. A vawithumna-ah chuan sipai-in an lo hruai tak vangin a ṭum thei ta hram a ni awm e. Heti ang chiah hian pilot dang pakhat pawhin a lo hmu ve a, ani chu base hla vak a ni lo bawk a, a rawn thlawh ṭanna-ah a let leh hial niin sawi a awm bawk. Airport thar a ni bawk sia risk a la ngam lo va, mi an la vak kual mai mai angah a ngaih vangin. Ka hriat sual loh chuan Hubli atanga lo thlawk a ni. He thil hi a thleng ngei tih kan chiang a, hmeichhia an hmuha an va hruai thu erawh kan hmuh ve loh avangin kan sawi thei lo.

Hei mai bak, media lam hriat ve loh erawh chu hei hi a ni: Cargo hmun, Bangalore mite chuan an hre fur anga, mitthi kuang thawnna ṭhin building-a office pakhatah hian zan khat chu kawngkhar, a chhung aṭangin kalh a nih hnuin duty pakhat chuan ṭhutthlenga a ṭhut laiin hmeichhe pakhat sari var kaih hi a rawn vei a rawn vei a hmu ta a, a hlau lutuk chu a â lo chauh a, a tukah damdawi inah admit a ni hial. Authorities lam chuan a mitvai emaw damlohna emaw nei a nih vangah ngai-in an ngai pawimawh lo va, kar hnih khat hnuah chuti ang bawk chuan mi pakhat, zana duty thovin a tawng ve leh a, admit a nih ve leh chuan chu office te reuhte chu khar zui a ni ta ni, tuma luah loh turin. Tunah engtin nge an tih tak zel chu ka hre lo. He thu hi ka ṭhianpa, a tawngtu ngei hmu-a betu, Sudevan-a’n min hrilh a ni a. Dawt mai a ni lo va, sawi chhiat tum an awm a nih chuan finfiahna chance pek pawh inhuamin chabi an pe phal a ni tih an sawi bawk office enkawltute’n. Kei lah pek chuan ka lo kal ang lo hrilh rawh ka ti a, kar hnih chhung chu thiante nen kan tum ve a; mahse, dar 12am-1am hi kan buai lai ber a ni ṭhin si a, thlawhna engine oil thlak leh ke thlak vel hunlai tak. Ka hman ta ngang lo a ni. A hnua thawm a reh chuan kan lo theihnghilh ve chho va. Ka hlau lo pawh a ni bik lo, mahse thlahrang hi biak chakna riau ka nei a, thihhnu awmdan hi zawh ka chak a ni (thlahrang hi a lo awm ngei a nih chuan). Sap/Hindi/Mizo/Bengali/ Urdu ṭawng a thiam lo anga kan inbe ṭha thei lo ang tih erawh ka hlau hle .

Tin, cargo thawnna hmunah hian hmeichhe pakhat zan lama kawr var vek ha, lo vei ve ṭhin an hmu ṭhin a, hmun tifaitu vel niin an ngai a,  hna erawh a hawk mgai si lo; mahse an chhui chian chuan chuti ang chu tumah ruat an lo awm si lo chuti ang hun atan chuan. Airport taxi driver ho zingah pawh sawi thawm a lo awm ve leh, zanlai vela hmeichhe pakhat taxi hmang tura chuang chu rei fe an tlanpui hnua an han en chuan thlarau langtlang thei vek anga lo awm daih leh bo daih thu vel an zingah sawi a awm. Mi pakhat phei chuan a hlau a, a taxi a tlansan hial niin an sawi, kawng lakah.

Bangalore International Airport hi a thar a ni a, khua aṭanga a hlat em vangin sawisel a tawk nasa em em a, heti anga thu leng vel lo awm lehzel hian a ti hmingchhe lehzual dawn lutuka a ngaiin enkawltute chuan thup turin min ngen a, dawt mai mai angah sawi darh turin a tawngtu (ni-a in chhâl) leh hretute pawh an chah a. Anmahni ngei pawhin thu lawilo belhchian dawl lo angin an thawn chhuak char char.

Engpawh chu lo ni se, lo inlar ṭhin lo pawh chu ni se, office pakhat chu khar a ni a, thlawhna pakhat landing delay a nih bakah air traffic tihbuai a ni a, lift, tuma chuan lohna mahnia chhuk chho vel hmuh ngei a ni. Cargo hmuna hmeichhe pakhat an hmuh ve ṭhin sawi awm leh taxi driver te tawn erawh hi chu ka awih chiah lo deuh; mahse a hrang tih thawm sawi hma daiha thil theng a ni ve si. Airport-a thawk zawng zawng pawhin an hre chuang lo he thil thleng hi.

HMUN DANG PAWH A HRANG VE!
  Thlalaka ka rawn tarlan hi Sacramento California airport hrang tia sawi lar em em mai-a thlarau (spirit /paranormal being) nia rin thlalaka lo lang ta nia sawi a ni. A latu hi Kevin Sullivan a ni. He airport hian chawlh hun reng nei lovin thlawhna thlawk lut leh chhuak a tam a, paranormal expert lam chuan mitthi te pawh minung te rualin an thlawk kual vel fo niin an chhut. Thlawhna-a tlahluma thite, airport ngai ve hrim hrim leh an chhungte zawnga airport vela la cham te an nih hmel. Chuti ang zingah chuan Mr.Tibble-a October ni 5, 1982-a airport chheh vela lungphu chawla thi thlarau hi sawi lar pawl a ni. Ani hi he airport a cheng hrim hrim hi a ni a, a thih hnu hian a ruang hi a chhungte hnena thawn a ni, a thlarau erawh Airport-ah a awmzui ta niin an ngai a, hmuh zui zeuh zeuh te pawh a ni awm e. A la thlahlel ngang ni tur a ni. (source: haunted America tours web).

ENG NGE THLA A HRÀN CHHAN?
Thlahrang tam tak inlar chhan hi chu an thihdana an lungawi loh vang leh thil thlahlel tak an la neih vang a ni tlangpui e an ti a, tin, thil sawi an duh vang a ni te an ti bawk. Chuvang chuan thlahrang hi chu biak vat mai hi a tihtawp dan ṭha ber a ni e an ti ṭhin. An thih chhan te leh thuruk an neih te an sawi duh a ni ṭhin, an ti zirmite chuan.

Kristian inzirtirna tam takah chuan Vanram emaw hremhmun emaw kal nghal turah ngaih a ni a kan thlarau hi, a nih si chuan engati nge ṭhenkhat hi an la cham bik? Inzirtirna dang lehah chuan kan thlarau hi a muhila, Isua lo kal leh hma chu a tho dawn lo a ni tih a ni, tah pawh chuan ngati nge an mutthilh ve loh? Engpawh ni se, ka sawi tum zawk chu Pathian mite kan nih chuan thlarau sual hian min khawih mawh khawp mai (thlarau mite sawi danin) tih hi a ni a, thlahrang sawi vel te pawh hi tawngpawng hlauh ngawt chi a ni lo, mi an tina ngai meuh lo, an ti. Thil dangdai deuh hi chu hlauh loh theih erawh a ni lem lo a, Zofate hi kan tawngpawng dawih lutuk ang tih ka hlau ṭhin, thim te hi tawngpawng hlauh lo ila, a bikin nula hmelṭha pian nalh tak tak te hi.

Aw le duhtawk phawt ila, thlahrang awm hi i ring ve rêng em le?? An awm a nih chuan i be ve chak lo maw?

Aside | Posted on by | Tagged , , | Leave a comment

HINDU NATIONALIST HOTEN “TAJ MAHAL” NUAIBO AN DUH !

Khawvela mihringte inkara hmangaihna ropuizia tilangtu hmingthang ber zinga mi “Taj Mahal” chu Hindu nationalist-hote chuan tunlaiin tihchhiat emaw, nuaibo mai an duh a; sorkar chuan Hindutva atchilhtu (fanatic) hoten an lo bomb chhiat palh hlauh vangin, uluk zawkin venhimna a kal pui mek.

Kum zabi 17 hun laia sak Taj Mahal chu hmangaihna lan tir nana sak a ni tih khawvelin a pawm pui a, hmuhnawm ti taka kum tin mihring maktaduai 10 chuangin an tlawh hut hut thin khuan, a lang lo lam (behind the scene) ah hnuhma thalo a siam ve a tihtheih. History ziaktu thenkhat chuan a satu Mughal Lal ropui leh thiltithei Shah Jehan chuan, a nupui Mumtaj hriatrengna thlan leh building dang nalh lutuk chu mistiri leh hnathawktuten a dang an sak leh a hlauh vangin, an kut a tan bulh sak vek a ni te an ti a; chu chuan nunrawnna rapthlak tak a entir a, a lungchhiat thlak a ni, ti pawl an lo awm ta a ni.

Agra khawpuia TAJ MAHAL chu Uttar Pradesh Chief Minister, Hindu puithiam thin Yogi Aditianath chuan Ningani khan a tlawh a, tun hmaa he Taj Mahal ngai theilotu zinga sawi thin ni mahse, “ Taj Mahal chu lunghlu danglam (unique gem)” tiin, vawnhim tlat a ni ang, a ti. A thusawi vangin Taj Mahal dinhmun derthawng pawh a zia chhoh rin a ni.

CM Yogi Adiyanath chuan, “Engvanga sak nge, engtikah nge, engtia sak nge tih a pawimawh lo, India ram tana thil hlu a ni” a ti. Hindu nationalists zingah Taj Mahal chu “Sal tanna” (slavery) a ngai deuh tlat, Mughal lalte thuhnuai Hindute chhawr luihna angah an puh deuh tlat a ni. Yogi Adityanath khu Hindu Te ple pakhata Guru pakhat niin, Bollywood star Shah Rukh Khan pawh “Terrorist” tiin a lo ko tawh niin an sawi a, kum 2007 khan ni 11 lai sakhaw thila a duh rum leh firfiak deuh vangin jail bang a lo zut tawh a ni.

Uttar Pradesh sorkar chuan Tourism Brochure/ booklets ah te pawh Taj Mahal dah lang lovin, Eastern Uttar Pradesh hmuna Hindu Temple pakhat, CM Adityanath a lo lLber (guru) na hmun Temple an chuan a ni, an ti.

BJP member pakhT Sangeet Som chuan, Taj Mahal chu “Phatsantute” (traitors) sak a ni. Indian culture history ah hmun a chang lo. He building hi a lungchhiat thlak a ni, a ti.

Tun hnaiah Hindu fanatic deuh, zirlai thenkhat chuan Taj Mahal bulah “Shiva pathian” an lo va be vel a ni! P.N Oak, Hindu historian pakhat chuan tun hnaiah inhnialna ti tam tak thusawi neiin, “Tunhmaa Hindu Lalram (empire) kha a ropuiin a zau em em a, English pawh Sankrit tawng peng pakhat niin,  Westminster Abbey pawh Shiva hriat reng a tura sak a ni” a ti a, chubakah Taj Mahal tobul pawh Shiva tana Maharaja Jaipur a miin a din a, a hming pawh “Tejo Mahalaya” a ni, a ti bawk.

BJP note pakhat Rashtryia Swasvevak Sangh (RSS) chuan, tun hnaiah Taj Mahal-ah Muslim tawngtai neih an duhloh thu leh khap hmiah an duh tih an puang.

Hun hnuhnungah chuan Lal Isuan, “Ram leh ram, hnam leh hnam te an indo anga…” a lo tih angin, India ram chhungah pawh sakhaw thila inngeihlohna chu a khi zau sawt hle a ni.

Author : C.T.Lalrinawma

Aside | Posted on by | Tagged , | Leave a comment

Kohhran Upa term neih a va hun ta êm!

Vua leh vang ngah vang maia dam chhûnga kohhran upa ni mai tur, kohhran chawm kawnga tisa thila thei ve tak, thlarau chaw erawh amah lam lam fah ngai ka hmuh changte hian Pathian vangin ka thin a ur ţhin.

Officer lian tak, thawhlawm thawh tam kawnga ţhahnem tak, upa nihna lei tling, a kamchhuak erawh inhnangfakna tur reng reng awm si lo ka hmuh changte hian, anmahni la hremtu tur Pathian vangin upa ţhenkhat hi chu ka khawngaih lawk ţhin!

Zahthlak taka a upa nihna hlih ngai hial khawpa hmeichhiat mipatna kawnga insum thei lo upa, miin an hriat tak leh tuma’n an la hriat si loh kohhran upa ka hriatte avang hian UPA nihna hian term a neih a va hun ta em ka ti a ni!

Kohhran tam tak hi chu an Upa ţhenkhat vang hian nuih loh an har zo ta! Ofis lama a nihna kan hriatchian, mi dik pangngaiin kan thinhrik ngawih ngawih, a lawina kohhrana upa lo ni site avang hian kohhran lian ţhenkhat hi chu ngaihhlut an har ta a nih hi!

Upa nihna, Paula sawi ni pha hlawl lo tam ta lutuk avanga kohhran rorel dik lote hi kan hmu ta nual awm e! Hawh u, i harh teh ang u. Kohhran enkawltu hnaisailo, bang ngam rawh. Mi pangngai angin hun tiamah Pathianin a hrem ve ngawt lovang che.

“Mi tin an thiltih ang zela hremtu tur” i la hmachhawn ngei dawn tih hre reng ang che! Bang ngam loho banna hun kan siam a ngai ta e. Tling ngang lo kan thlak pawh a hun ta. Kohhran zahawmna kulhpui ni mekte chet dan ţhenkhat ka thinhrik phawt chuan Pathian pawi an sawi ngei tih ka chiang e.

Author : Lalremliana Pachuau

Aside | Posted on by | Tagged , , | Leave a comment

UNFINISHED BUSINESS OF SIX-DAY WAR by Fredy Lalrinmawia Renthlei

       Kum 1948 khan Britist kaihruaina leh UN rorelna chuan Palestine ram chu state pahnihin a thenhrang a, state pakhatah chuan Hitler-a hun laia Juda mi maktaduai 6-te an awm a, a dang state-ah chuan Palestine Arab mite an awm bawk a ni. Arab ram tam zawkte chuan UN rorel dan chu an duh lova, Israel-in zalenna a puan tum pawh khan Israel leh Arab tangrual sipaite chu nasa takin an indo va, chu indona chu The War of Independence tia koh a ni a, Arabic tawng erawh chuan AL Naqba tia koh a ni thung. Israel-in independence a puan tum khan Israel leh Arab-te chu nasa takin an indo a, Arab-ho an tlawm tak avangin mi tam tak chu chhak leh thlang chhim leh hmarah an tlanchhia a, an In leh Lo te pawh ui em em chungin an tlansan vek a ni. Indonaa Arab-ho an tlawm ta chu zahthlak an tiin an thin a na hle a.

Arabs ramte chuan nikhat khata Israel chunga phuba lak chu an tum lian ber a ni. Chu rilru avang chuan Arab hruaitute leh lalte pawh an awm hle hle thei lova, eng anga phuba lak tur nge ni ang tih chu an thupui ber a lo ni ta a ni. Heng dinhmun atang hian politic lama inlungrualna leh tanho dante ngaihtuahin a hnuah chuan Palestine Liberation Organization (PLO) tih chu Aigupta President Gamal Abdel Nasser-a kaltlangin a lo piang ta a, Ahmad Shukeirei-a chu an hruaitu atan an thlang nghal bawk a ni.

Aigupta President Nasser-a chuan Soviet hruaitute nena inlaichinna tha zawk siamin Soviet atanga tanpuina sum tam tak a dawng a, ral thuam pawh Soviet-in tam tak a pe bawk a ni. Hetianga hmathatna a neih avang hian Arab hruaitute pawh chawkphurin kum 1948-a an hmingchhiatna chu thai bo va, Israel chunga phuba lak chu tumin kum 1967 tantirh khan indona an buatsaih tan ta a.

Nasser-a chuan Soviet chauh rinchhan lovin Syria President Hafez al-Assad-a leh Jordan lal Hussain-a te pawh lamtang atana sawmin Israel ram ri chu a bei tan ta a. Indo tura Arab lam an chhet hmasat avangin Israel pawh a awm hle hle thei ta bik lova, Israel pa ber David Ben Gurion-a aiawihtu Labour Party-a Prime Minister Levi Eshkol-a pawhin 1967 May thla atang khan indo a nih tur thu chu Israel mipuite hnenah radio atangin a puang ta a. Israel sipaite an zam mai lohna turin Moshe Dayan-a chu Defence Minister atan rang takin a ruat nghal bawk a, indo tur chuan an inbuatsaih mup mup ta a ni.

Aigupta President Nasser-a pawh chuan indo chu pumpelh theih a ni tawh lo tih a hriatchian avangin May 16 khan Britist-France-Israeli ten kum 1956-a an lak Suez Canal-a UN sipai awmte pawh inthiarfihlim vek turin UN hruaitute a ngen a. May 22 khan Israel ten an lawngpui kalkawng atana an hman hmunpui ber Strait of Tiran leh Tuipuisen (The Red Sea) chhak lamte pawh a khar vek nghal a, chu hmunah chuan a sipai nuaikhat, indona motor 1000 leh indona tanks 1000 a chhawp bawk a, May thla tawp chiah khan, “ Arab ramten indo kan hman ta e,” tiin a puang ta a ni. 1967 June 5 khan indo chu tan a ni ta a.

Zing lam dar 7 chiah khan Isarel chu a chhe hmasa ta a ni. Israel-in a hmasa bera a tih chu Aigupta thlawhnakirawn (Egypt airfield) boom chhiat vek a ni a, a dawtah chuan an lawng chawlhhmun pawimawh zawng zawng tihchhiah vek a ni. Chhak lam atanga Aigupta tanpui tura lo kal Jordan siapite leh Golan Heights hmuna Syriaan sipaite pawh chawp leh chilhin Israel chuan a lo bei a, Ni rei lo te ah chuan Palestine rama Gaza Strip leh West Bank te a la a, Syria ram ri a Golan Heights te, East Jerusalem te leh Sinai Peninsula te pawh a la bawk a, an airfield-te leh lawngchawlh hmunte a chhiat vek tak avangin June 10 khan Arab-ho chu an tlawm ta der a ni.

Israel-in Ni rei lo te a Arab tangrualte a hneh ta chu khawvelin mak a ti a, mi tam tak chuan Israel CIA-te hnathawh dan leh an indo dante (strategy) te chu an chakna ber niin an sawi a ni. Israel-in Sinai Peninsula a lak chu Israel leh Aigupta-ten kum 1979-a remna thuthlung (Israel-Egypt Peace Treaty) an siam tak avangin Israel chuan Aigupta a pekir leh ta a, West Bank erawh chu Israel sipaite kuthnuaiah a awm thung a ni.

Indo a zawh fel hnu chuan kum 19 meuh thenhrana lo awm tawh Judaho hmun thianghlim ber Jerusalem khawipui chu Israelte kutah a awm ta a, an hnam histawria hmun pawimawh em em West Bank pawh tunah chuan Israel-te kuthnuaiah a awm fai ta vek a. Israel chuan Mipui Inawp Dan (Civilian Law) khauh takin a siam nghal a, Golan Heights leh East Jeruslem-a cheng Arab-ten Israel khua leh tui nihna (citizenship) an dil chuan Israel paw’n phal taka pe turin kawng zau takin a hawng nghal bawk a ni.

Hetianga Israel-in chawplehchilha mipui inawp dan a siam avang hian UN Security Council chuan Israel a dem nasa hle a. UN Security Council chuan Golan Heights leh East Jerusalem-te chu tuma luahtheih loh ram (“null” and “void”) tiin a dah a, hemi hmuna cheng reng rengte chu dan lo anga ram luahtu (occupied) tiin a puk bawk a ni. Israel leh Arabs te inkara remna a awm beiseiin UN Security Council chuan Danpui 242-ah, “Land for Peace” tiin dan a siam a, Israel ten dan lo anga an luah ramte pawh chhuahsan turin UN Security Council chuan Israel hnenah thu a pe a, mahse vawin thleng hian Israel chuan UN Dan siam chu a zawh duh chuang lo a ni. Indonaa an lak West Bank-a hmun khuar turin Labour Party sawrkar chuan rang takin thutlukna a siam ta a.

West Bank hi kum 1948 khan Jordan kut hnuaiah a awm a, mahse chu chu Britain chauhvin a pawmpui avangin PLO kutah a hlan leh vat a. West Bank-a awmte chu Arab, Palestine mite leh kum 1948 Arab-Israel indo tuma refugee-te an ni deuh ber. Kum 1967 Niruk Indona hnuah erawh chuan West Bank chu Israel sipaiten an awp ta a, kum 1993 thleng khan Israel sipaite enkawlna hnuaiah a awm a ni. Israel ten PLO atanga ngenna lehkha an lo pawmpui hnu erawh chuan Palestine mipui tamna khuate erawh chu Israel-in Palestine Authority (PA) te kutah thuneihna leh rorelna a hlan ta a, Israel sipaite chuan hmun tlem chuah an awp ta a ni. Palestine helhoten Israel an beih thin avangin Israel pawhin a sipai tam tak a dah belh zel bawk a, tunah hian Israel leh West Bank inthenna kulh bang sang tak an siam mek a ni.

Gaza Strip erawh chu Aigupta nena ram ri a ni thung a, kum 1948 atanga 1967 thleng khan Aigupta kut hnuaiah a awm a, kum 1967 atanga 2005 thleng khan Israel sipaite kut hnuaiah a awm bawk a. Kum 2005 khan Israel chuan Israel’s Unilateral Disengagement Plan dan a siam a, chu dan avang chuan Israel-in Gaza hmuna mipuite leh a sipai zawng zawngte a sawn vek a, mahse Gaza airspace leh lawng luh/chhuahna tuipuite erawh Israel kut hnuaiah a awm vek tho a ni. Gaza ram ri chungchangah Israel, European Unions (EU), Palestine Authority (PA), te leh Aigupta ten inremna thuthlung an siam a, EU chuan englai pawhin a enthla reng a ni.

Kum 2006 June thla khan Hamas Movement ten hnenna an rawn chan tak avangin ram ri chungchangah buaina nasa tak a chhuah leh a, Israel leh EU ten Hamas Movement an pawmpui loh avangin EU ten Israel kaltlanga kumtin tanpuina sum an pek thinte pawh Israel-in a chelhbet hmiah a, khawnvartui, gas leh electric a pek thinte pawh Israel-in a titawp hmiah bawk a, ram ri kaltlangna te lama a khar vek avangin Palestine refugee-te pawh nitin an pung zel a ni. Arab-ho thinrim chuan Khartoum-a Arab hruaitute rorelnaah Israel nena inremna thuthlung siam lo turin thu pawhchatna an siam ve nghal ta a.

Khartoum rorela an dan siam pawimawh em em te chu:-

1) Israel ram din a nih thu pawmpui loh

2) Israel nena inremna thuthlung siam loh

3) Israel nena inbiak loh te an ni.

Israel-in Arab leilunga a ram a din avangin heng leilungte hi Arab-te hnena a pekkkir leh hma chuan Israel-in buaina rapthlak tak a hmachhawn zel dawn a ni tih chu Israel pa ber David Ben Gurion-a pawh khan a lo hmu lawk sa vek a, a hnua Prime Minister hna rawn chelh leh tur Ariel Sharon-a te, Ehud Barak-a te leh Ehud Olmert-a te paw’n heng buaina hi an pumpelh dawn lo tih pawh a lo hmutlang sa vek a ni.

Israel-in a chakna hmanga a ram dinin hnehna la mah se la, thlirtu tam takte thinlunga zawhna lian tak chu, “Israel-te hnehna hian Israel leh Arab-ho inkarah remna a thlen tak tak thei ang em?” tih hi a ni. Israel-in Arab leilung chunga a ram a din avangin vawiin thleng hian Israel leh Arab-te inkarah remna tak tak a la awm thei chuang lova, Israel-ten an ram an din avanga lawmna mittui nen hnehna hla mawi an rem laiin an ram chhuhsak Palestine mipuite erawh lungngaihna mittui nen an kun tlawk tlawk thung a ni. Israel-in hetianga Palestine mipuite mittui tlakna a siam avang hian Israel ngei pawhin vawin thleng hian buaina leh harsatna a tawk mek zel a, kum 1987-ah indona a thleng a, kum 1990s-ah Israel hmun hrang hrangah boom a puak bawk a, kum 2000-a Camp David rorelna pawh khan kum 2008-a buiana tihtawp an tum target chu an thleng thei ta chuang lo a ni.

Israel leh Palestian-te inkara buaina chu vawiin thlenga khawvel hruaitute tiluhaitu ber a la ni a, inremna tura thusawihote pawh vawi tam tak an hmang tawh a, mahse vawiin thleng hian inremna chu an la nei thei chuang lo a ni. Israel leh Palestine-te buaina bul ber chu engnge ni ta a, enganga thulai rem tur nge ni ta ang tih pawh UN hruaitute leh histawrian mithiamten vawi duai lo an ngaihtuah tawh a.

Middle East chanchin chhuitute leh thlirtu tam takte chuan Israel leh Palestine-te inkara buaina bul ber nia an hmuh chu kum 40 chuang liam ta a an buaina bawk kha a ni a, he thubuai chinfel a nih hma chu vawiina Middle East buaina pawh hi chinfel theih a ni dawn lo tih chu an thutlukna a ni. Noble Peace Prize dawngtu (Israel mi) Elie Wiesel-a pawh khan, “Israel leh Palestian-ten kan ram kan din ve ve a, lungrual taka kan khawsak theih phawt chuan chu chu kan inkara buaina sukiangtu tur a ni dawn tih chu Israel leh Palestine-te hian kan hrechiang ve ve a ni, tiin a hriatrengna lehkhabu ah a ziak a ni.

(Ka lekhabu chhiar lai ami a nia , a ngaihnawm khawp mai..ka lo share ve tawp phone atanga type a nia hawrawp kim lo/diklo a awm chuan min ngaidam dawn nia–) FrEdy Lalrinmawia Renthlei.

Aside | Posted on by | Tagged , | Leave a comment

NEHRU LEH EDWINA

India a zalen dawn lai 1947-a British lal aiawha India awptu Viceroy hnuhnung ber kha Lord Louis “Dickie” Mountbatten-a niin, a nupui chu Edwina Mountbatten-i a ni a. He’ng hunlai hian an fatlum Pamela Mountbatten-i chu tleirawl fel tak kum 18 mi lai ni tawhin tun thlenga ti titam tak, a nu Edwina-i leh India a zalena prime minister hmasa ber ni zui ta pathlawi Nehru-ate inkar kha a hre chiang bertute zinga mi a ni.

Pamela-i hi India ramah kum hnih dawn awmin India zalen tur boruak inmung vel leh a hnua thil thleng tam tak mit ngeia hmu zuitute zinga mi a ni a. Naupang te mah ni se a pa zarah India ram mi ropui ber ber Mahatma Gandhi, Vallabhai Patel, C. Rajgopalachari leh midang tam takte hmaichhanah a kawmin chhawnchhaih pawh a hlawh hle țhin a, kum 90 dawn ni tawh mahse kum 70 liam taa thil thleng tam tak kha a la hre chiang em em a; “India Remembered” bu ziak tura mi duhawm berte zinga mi pawh a ni reng a ni.

“Panditji” tia a koh ngam hmaa, “Mamu” ti ngata a koh pu Nehru-a leh a nu inkar hi Pamela-i hian, “Mipat-hmeichhiatna tel lo inhmangaihna” tiin mi tam takin a bak awm anga an sawi fo ţhin pawh, “Mipat-hmeichhiatna tel lo inhmangaih tawnna thuk leh dik tak a awm thei tih hi mi tam takin an awih thei lo a, ka nu leh Panditji-a kha chuan chutiang chu an nei niin ka hria.” a ti.

A sawi chhunzawm zel a, “An pahnih khan mi khawhar (thei) tak ve ve an niin ka hria. Panditji-a khan nupui a sun a, a farnu lah chu foreign ramah a awm bo si a. A fanu lah a pasal (Nehru-a makpa) rawng a bawlsak a ngaih tawh bakah kha’ng hunlaia hmeichhe pawl hmalaknaahte khan a tel tam em em a, kha vang khan mal takin a nun a hmang ţhin. Chutihlaiin ka nu lah mize danglam tak nei a lo ni a, hun rei lote chhung chuan namen lohin an inkawmngeih ta a ni.

Brief Encounter film-a mi pahnih inngaina em em, inpumkhat tura a ngaihna awm si lo ang deuh kha an ni a. India ram kan chhuahsan hnu khan kum khatah vawi khat emaw vawi hnih emaw an la inhmu zui fo a, an inkar boruak pawh a sang zui hle zel a ni.” a ti.

August ni 15, 1947-a India a zalen hnu khan Pamela-i leh a nu hian India ram chu an la rawn tlawh fo a, Teen Murti, New Delhi-a Prime Minister chennaah sawrkar khualţha angin an thleng ziah ţhin a; a chang phei chuan prime minister zinvahnaahte chuan an zui ve bawk ţhin. Chutiang bawkin pu Nehru-a pawh hi UK a zin tawh phawt chuan Broadlands, Hampshire-a Mountbatten chhungkaw chennaah a thleng ziah ţhin.

Pamela-i chuan hetiang hian a sawi chhunzawm zel a, “A vanglai takin ka tawng niin ka hria a, vannei ka inti takzet a ni. Naupang tawh phawt chu a ngaina êm em a, a bula awm a khamawm ngai loh a, tumah a tilunghnur ngai hek lo. Thil engkim a hre vek emaw tih tur khawpa mi hre zau a nih avangin a ngainatawm em em a ni. A dam lai ni lo, a (a nu Edwina) thih hnu khan ka pa chuan Panditji nena an inkawmna, an lehkha inthawn tawnte chhiar turin min ti a. Dikk tak chuan eng emaw “tlêm te tak tak” chu a awm. An pahnih khan an inmamawh tawn a, amaherawhchu a (a pa) tana nuam lo tih lutukna tur erawh a ni lo.

image

Amah (pu Nehru-a) kha mi zahawm tak a ni a, ka pa ina ka nu chetsualpui tura ngaihtuah chu a tiha thil mawi lo tawpkhawk a ni ang. Ka pa thikthu chhe lo lutuk kha kan chhungkaw keh darh loh chhan pakhat a ni.” tiin Japan-ah khan Atom Bomb thlak lo pawh ni se a kaihhruainain an va tlawm tho ang tih tur khawpa pa ralrel thiam leh hrat khawkheng, hleitling, pianthiam leh hmelţha a pa Louis Mountbatten-a chu a fak hle nghe nghe a ni.

A fanu hming pawha India Hicks phuah ngat Pamela-i hian a nu nen khan India thlavang hi an hauh na hle a ni ang; Pakistan hnam pa Mohammed Ali Jinnah-a pawh kha ţawngkam dengkhawng tak takin an bei fo a, khawthlang incheina (coat suit) nen rawn lang fo ţhin mahse, “Mihring ngainat theih loh.” a ti thlawt a ni.

Author: Kima Sailo
*********::::::::::::::::::::::::::

Aside | Posted on by | Tagged , | Leave a comment

OLA Aizawlah Lo Lut Ta

Phai lamah chiah kan lo hriat thin OLA chuan Aizawl a lo lut ve ta a mipui tan a tangkai dawn khawp a hriatna ka nei . OLA chu phone atanga internet hmanga taxi kan book zung zung theihna tura duan (a tawi zawgin) ani mai.

 Phai lama zirlai awm te leh sumdawng etc ten an lo hmelhriat tawh angin a tangkai an ti hle a Mizoramah awm ve tawh se anlo tih thin chu official a Launch a ni tep a mahse taxi neitute leh driver lam te hian kan la hmelhriat vakloh thil anih vang nge OLA hnuaia in register hi kan ngam mailo deuh niin alang.

OLA ah chuan lo in register ve ta ila :
1. Eng hlawkna nge ka neih ang?
= Ola application kha I on hrim hrim chuan OLA tan I service tihna ania kar khatah darkar 50 I on tlin chuan cheng 4000 chuang I hlawh tawp thei, customer nei miahlo mahla company tana service I ni tlata I hlawh tho tho dawn tihna anih chu.

2. Keimahni thu in kan service thei tawh dawn lo em ni.
= service thei teh reng e, I thu thu ani mai, mahse mahni tulna a service lai chuan OLA app kha on loh a fuh achhan chu call I dawnga I kal hman siloh khan incentive (hlawh) lo lut tur kha a kiam ve thei.

3. An daih rei tak tak dawn emaw nile.
=Daih rei ang, phai ram khawpui 100 chuang fe ah an service renga Aizawl ah pawh service tha tak neih kha company duhthusam a ni , chuti maia tawp leh mai an phallo zawk.

Tichuan phai lam atangin mikhual te kan ngah ve tial tial a zoramah , OLA chu tlangnel taka an hman ngam tur alo nita a , local mite tan lah mahni thut hmun atanga book maitheih te alo nihnaah remchanna thar kan nei ve zel dawn ta e kan ram ngei ah.

Registration ti tura ngaite (taxi neitu tan):
1.document kimchang (felfai)
2. Bank passbook(phek hma lam Xerox)
3.PAN card

Aside | Posted on by | Tagged , , | Leave a comment