Eiruk thup nân thiltih hmanga lungmuang an tam ta! by Lalremliana Pachuau

Mizote aia Pathian ram thilpêk pe nasa hnam hi an tam bik vakin a rinawm loh. A eiru nasa sate hian ţhahnem an ngai zual emaw tih mai tur zuk ni tlat a! Kohhran lah chuan lawm takin an thilpêk an la pawmsak zui a!

Jt Director niin concrete building chhawng tam tak a sa lûr thei a. A fate lah phaiah lehkha a zirtir fai vek thei bawk a. Chumi piahlamah missionary a la chawm zui a! Pathian mi hriat ka ţhiannu chuan an missionary chawm tur a va len luhpui ţuma an inchhûng boruak pìk a tihzia min hrilh lawi a!

A in sain sikul ram a nêk mai a ni lo, a pawt hek nasa mai a. Mahse, kohhranah tangka leh tha hmangin nasa takin ţan a la a. Rawngbawltu nihna leiin thilpêk kawngah a thawhhlawk hle bawk. Sikul lama thawkte erawh chuan eng lai mahin an Pathian mi hmuh thei ngai lo!

Mizoramah hian sual tih thupna hmun ţha êm êm mai pahnih an awm a. Chungte chu kohhran leh NGO hi an ni! Aizawl lama kan kohhran pakhat, sawrkar hnathawk lian lawi tamna chu thilpêkah an sâng rem rem hle a. Nimahsela, an kohhran hruaitu lû ber nupui chuan, “An tih angte hi chuan ti ve duh ni ila, keini pawhin kan ti ve thei ang chu!” a ti!

Eiruk chingte hian khawtlang leh kohhran tân insen an hreh lovin an thilphal hle a. A bik takin kohhranah hian thilpêk an pe ţha thei hlawm hle mai. Pathian ram zau nân tiin an bungruate lah ui reng an nei ngai bawk hek lo. Heng an thiltih avangin an chungah kohhrante kan lawm ţhin a, eirukna hi kohhran leh khawtlang hian kan vulh lian tial tial a lo ni!

Kan eirukna laka lan mawi nân missionary chawmin Pathian ram thilpêkah ţan kan la a. Chung kan thiltihte kaltlang chuan Pathian thinurna lak ata fihlim mai turah kan inngai ta hial niin a lang. Sawma pakhat mai pawh ni lovin a aia pe tam pawh an awm hial a. Tehtu dik tak chuan in thawhlawm avang hian hremna chu in tân a bikin a khêk tho tho dawn a. Lawm taka in thilpêk dawngtu kohhrante pawh a zilhhau hial ta ve ang!

An in leh lo ropui tak takte chu kohhran leh ţhalai tân hman uina reng an nei lova. An hman chhun chhunah lah eitur tuihnai tinreng nen an lo mikhual a. Khawtlang pawhin kawmiti nân hmangin an chungah lawmthu kan sawi ţhin. Hengte avang hian a ni, eiruk chingte hian zahna chang reng an hriat loh a, mahni inthiam lohna pawh an neih theih tak loh ni!

Tangka sum ngainat hi sual tinreng bul a ni si a

Advertisements
Aside | Posted on by | Tagged , , | Leave a comment

ISRAEL hi Khawvel ah engtinge Military Technology nei Advanced ber anih theih by Ricky L Colney-Part- 2.

           Nizan lama Post chhunzawm na siam leh tawh ang aw..ISRAEL ram chu ram tetak te ni in ram naupang tak la ni mahse Khawvel ah Ralthuam tha leh changkang ber ber siamchhuak a hralh chhuak tam ber zing ami ani a,Khawvel Ram ah mi siam Ralthuam lei tam ber tih ngam INDIA pawh hian RUSSIA siam tih lovah chuan ISRAEL siam ralthuam a lei nasa/tam ber mek a ni. Israel in hetiang dinhmun an luah theih chhan chu kan sawizo deuh chauh(post hmasa ah) a ni a, Khawvel ah a ber annihna Ralthuam te kan sawi leh tan mek a, i han sawi zawm leh teh ang.

        2) The Arrow anti-missile program : Kum 2000 daih tawh khan Israeli air force chuan hman theihin Arrow missile battery a dawng a, chumi awmzia chu Israel chu Khawvel ram zing ah Hmelma te Missile kapthla thei hmasa ber ani ta tihna ani. 1980’s kum laihawl ah khan Ronald Reagan a chuan Soviet Union Nuclear missile lak ata chhan him thei tur hmanrua/system siamchhuah puiah a thawhpui ram te a sawm a,heta tang hian he ARROW anti-missile hi an ngaihtuah chhuak ani. Arrow anti-Missile hi a bul tantu lek ani a, vawin ni ah chuan Israel hian The Arrow anti-missile chu United States in sum thenkhat a tumpuiin, long-range ballistic missiles lo kapthla thei tur a nei tawh a,medium-range rockets leh cruise missiles lo kapthla thei David’s Sling a nei bawk a, tin indona hmun a athat zia fiah a awm tawh Iron Dome ala nei cheu bawk ani. Israel hi Indo laia missile defense systems hmang awm chhun anni hrih a, Ram dang thenkhat te pawh missile defense siam kawngah che ve hle mahse Israel anga multi-tier architecture siamchhuak an awm lo a ni.

         3)Mini spy satellites : 1988 khan an vawikhat nan Israel chuan spy satellite chu Space ah a kap chhuak ve a, Khawvel ram independent satellite-launching capabilities 8 zingah an tel ve ta a ni. A tir atangin hetiang ti thei tur hian Israel hi rin an kai ngailo a, mahse chumi hunlai atanga kum 30 a ral leh meuh chuan Israel chu satellite superpower a ni leh der tawh mai.

Tunah hian Israel chuan Khawvel pawn ah Sattellite chi hrang hrang 8 lai a Operate ani.Israel’s spy satellites tehi chi hnih a thliar anni a,a tlangpuiin advanced high-resolution cameras the Ofek-9 ang te a thuam anni hlawm a, 50 centimeters lek a lian tepawh Mile 100 chuang fe a hla atangin fiah takin a thla a la thei ani..Hetiang lo chi dang leh chu TecSar an ti a, chu chu synthetic aperture sensor hmang a ni. A Satellites changkang taktak avang hian ISRAEL hi hmelma te hmuh theihna kawng ah nasa takin a chungnung bik a, eng Weather condition ah pawh, camouflage nets te thlengin a hmu tlang vek thei a. Ruah pui sur lai te, chhum pui zim lai leh zan ah pawh Hmelma te awmna a zawng hmu in Information a pe reng thei tihna ani.

Insrael in Satellites siam kawngah khawvel a a tha ber ni thei hial a siam chhuah thin (state-of-the-art satellites) na chuan khawvel ram dang te beng a rawn verh ve nghal a, 2005 khan French chuan Israel chu Satellite siam chhuah pui ah thuthlung a siam pui a,Italy pawhin $182 million man reconnaissance satellite a Order ve bawk a, Singapore leh India te pawhin Israel Satellite te chu an lei ve ni a hriat a ni bawk.

         4).Drones : The Heron TP chu Israel Drone(unmanned aerial vehicle) lian ber ani a,A thla hlai/sei zawng chu Boeing 737 thla tiat lawih ani. Darkar 24 hours chawl lovin a thlawk thei a,1-ton payload/a phur thei ani.Israel hian a sawi tha duhlo na chungin The Heron TP hian air-to-surface missiles a phur/kap chhuak thei ni a hriat ani. Israel hi khawvel ah Indo na a Drones hmang hmasa ber ani a,1969 daih tang tawh khan an lo hmang tawh a,1982 khan Combat Drone -Scout tih chu Lebanon ah an hmang tan a, Syrian anti-aircraft missile systems te zawng hmu a tih chhiat sak turin Scout chu an hmang ani. Chu hmalak na chuan khawvel beng a rawn verh leh ta a,1986 ah chuan US Navy te chu a vawikhat nan Israel chuan the Pioneer Drone an pe ve ta a ni. Chumi hnu lawk ah chuan Gulf War laiin Pioneer Drone chu Iraq Sipai te chungah a thlawk a, Iraq sipai te chuan hlau in an kawrvar te chu vanlam hawiin an vei a, hei hi HISTORY ah a vawikhat nan SIPAI te(military unit), robot hma a an in surrender na hmasa ber ani ta nghe nghe a ni. Israel Drones te hian Khawvel indo dan a rawn thlak danglam hlawk a tih theih a, Mihring khalh chawp ngai Fighter te aiin a senso a tlem zawk fe a, an tangkai em em bawk si avang hian US leh Ram tam takin hman berah an nei tawh a ni.
       
5).The top-secret tank : Vawiin ni thleng hian Israel Merkava Tank hi Israel Project Top-Secret ber ani a,Khawvel a Tank ven that ber leh hlauhawm ber te zinga ngaih ani. UK pawhin Israel thiamna dilin Merkava Armour system ang hmang ve tur hian hma an la mek.

image

Hetiang TANK tha leh hlauhawm an siamchhuah theih na chhan hi an mamawh ngawih ngawih vang ani a, 1970’s ah khan UK leh Ram dang techuan Israel hnen ah hian TANK hralh an phal silo a, an ram venhim nan an mamawh bawk si avangin an mahni in midang tibuai talo chuan an siam chhuak ta ani. An Tank Model thar ber Merkava Mk-4 phei hichu a tha tak zet tawh a,40 mph speed a chakin a tlan thei a, Armor thar, modular armor kit a thuam ani.2012 khan Merkava Tank chuan nasa taka siam danglam a tawk a,System thar The Trophy tih chu an vuah a, active-protection system niin chu chu personal missile defense system ani.Hmelma te anti-tank missiles rawn kal kha miniature radar hmangin alo man zung zung a,tichuan cloud of countermeasures (Metal Pellets) alo phuh chhuak a,chu chuan Missiles kha alo tichhe ta thin ani.Radar hian Missile rawn kapchhuak tu te awmna pawh alo hre thei thin bawk a,chumi vang chuan Tank crew tekha rang takin hmelma/anmahni rawn beitu bei let turin an in siam rem thei ta thin ani.
       Awle sawi hmaih tha tak tak te pawh kan la nei nual ang,mahse a thui lutuk chuan ninawm lam ah a kal thei a, heti zat pawh hi kan chhiar anih chuan kan tangkai pui thei tawh ang..chu vangin duh tawk tawh mai ang aw.
                       Source- New York Post.

Aside | Posted on by | Tagged , , , , | Leave a comment

TUIRIAL HYDEL PROJECT – SAIPUM MIPUI TEN MIPUI HAMTHATNA TIHHLAWHTLIN LOH CHUAN PROJECT HAWN REM TI LO

Saipum khua all NGO, leh Gram Sabha mipui rorel te thu pass chuan Tuirial Hydro Electric Project 60 MW pe chhuak tur, hawn mai theih tura sorkar hma lakna hi lawm awm kan ti hle a. Chuti rualin, Project bul tan dawn hian public hearing nei lovin a khuaptu NEEPCO Ltd. te hian hma an la a. Bul an tan lai hian Saipum mipuite hian hmalam hun engmah kan thlir thiam loh avangin, min bum in public hearing hi neih ani lova. Tun ah hian Saipum mipuite eizawnna kawng hrang hrang ah harsatna min siam ta a. Saipum khua atanga KM 1 thlang lam zawng chu Tui chim chhiat in a lo awm ta a.

Zangnadawmna (compensation) pawh min pe zo duh lova. Chuvangin most affected village kan nih avanga compensation leh Free Electric Back Feed leh hamthatna kawng awm thei hrang hrang te min tih hlawhtlin sak theih nan kan Chief Minister zahawm tak in a hmun ngei ah min hawn sak se kan duh a. Mipui hamthatna tura kan thil phut te hi tih hlawhtlin a nih phawt loh chuan he project hawng lo turin sorkar kan ngen tak meuh meuh a ni.

Tin,tuna NEEPCO TrHEP Head Of Project S.Chakraborty hnen ah khawtlang hruaitu ten kan harsatna leh tul leh pawimawh ama Office Chamber ah Dt.4.12.2017 khan kan thlen a, theih ang tawka hma lo la a Dt.11.12.2017 ah Office a in biak ho leh min tiama, mahse, inbiakna min neih pui duh tak loh avangin leh kan thu leh hla ngaithla duh lova min chhuahsan hi ramneitu mipuite hmuhsitna ah kan ngai a, a rang lam a sawnchhuak turin thuneitute kan ngen a, heng thil phut nan leh inbiakna neih a nih hma chuan Dt.12th December 2017 at 3:00 pm atangin Tuirial Hydel Project kawngpui ah Motor eng chi mah tlan kan rem ti lo.

Tin, heng bak ah a ram mipui ten an thawh theih hna hrang hrang Agreement a tel Worker(skill&unskill) leh construction work ah te a ram mipui aia hnam dang pawn lam mi an duhsak hi ram mipuite hmuhsitna ah kan ngai a ni.

Dated : Saipum
12th December 2017

                  Sd/-
  (R.LALCHAMLIANA)
             Chairman
All NGO Committee Saipum,
           Mizoram

Aside | Posted on by | Tagged , , | Leave a comment

IN TINAH CHENG NUAI 3 AIA TLEM LO PE VEK DAWN

MNF party president Pu Zoramthanga chuan nimin (13.12.2017)-a Kawnpui East Block-in ‘haw rûn pui’ Thingdawl Chhimveng YMA hall-a an buatsaihah thu sawiin, “Kum 2018 MLA inthlanah kan sorkar chuan chhungkaw tinin eizawnna tham bul an țan theih nan In tinah cheng nuai 3 aia tlêm lo kan pe vek dawn,” a ti.

Aside | Posted on by | Tagged , , | Leave a comment

DIHMUNZAWL-A IN RANGKACHAK, LEIVUNG TANGKARUA LEH CHINAI LUNGHLU KHA

“PHE building aia lian daih leh tha zawk Dinthar Presbyterian Kohhran Biak In ṭhiattuin ₹ 2,00,000-in a ṭhiat ngam,” -T. Sangkunga, MLA

Nikum lamah khan SIPMIU chuan Tlawng lui bula Dihmunzawl-a Water Treatment Plant ṭhiah nan cheng nuai 63.08 a seng a nih kha. Khatih laia Mizoram Assembly hnuaia Estimate Committee Chairman Pu Lalrinliana Sailo chuan, “Power sub-station dinna hmun tur tihzâwlna (earth work) atan a hranpain cheng nuai 35 hman a ni tho a. Min hmin lo a nia. Fimkhur rawh u,” a ti nghe nghe. Pu T. Sangkunga meuh pawhin, PHE building aia lian daih leh ṭha zawk Dinthar Presbyterian Kohhran Biak In ṭhiattuin ₹ 2,00,000-a a ṭhiah ngam thu a sawi tih chanchinbu lamah a lang.

THIL PAWIMAWH TE:
* He in ṭhiat tur zawnna (auction) hi an nei miah lo va, a ṭhiat turin SIPMIU-in contractor an pe tawp mai a ni.
* Water Treatment Plant hmunhma paih fai nan cheng nuai 6.42 an seng.
* Tlawng luia chinai paih nan cheng 69764.4 an seng.
* Leivung paih fai nan cheng nuai 42.94 an seng.

HETI ZAWNG HIAN
* He in ṭhiat tur zawnna (auction) neih a ni miah lo hi a fel tawh lo sa hrim hrim. Sawrkar department building ṭhiat tur chuan tender chhuaha auction neih a ni ṭhin a, SIPMIU-ah chuan neih a ni ve lo va, an contractor khan a duh zat zatin a ṭhiat mai dawn tih a chiang reng! He thilah hian SIPMIU Project Director Pu Valbuanga nge thiam lo, a phenah thiam takin midang an inrawlh zawk? A eng emaw zawk zawk a nih loh pawhin a ni ve ve ang.

  • Water Treatment Plant hmunhma paih fai nan cheng nuai 6.42 an seng a, bawlhhlawh paihna man to ber a ni hial ang. MLA Pu Rina sawi ang a nih chuan Power Sub-Station hmun tihzawlna atan a hranin cheng nuai 35 hman a ni tawh a, hetah a hranin cheng nuai 6.42 a lo awm leh a, thil mak tak a ni! He lai hmun khat hi ṭhuang hnihin an tifai ni tak maw!!! Eng pawh ni se, nuai 35 kha chu dahṭha phawt ila. Aizawl-a Mission Veng-ah hian bawlhhlawh pahna man hi thla tin cheng 50 an chawi ṭhin a, in 1000 vel lo awm ta se, thla khata Mission Veng-in bawlhhlawh paihna atana an senso chu cheng 50,000 tihna a ni a, Water Treatment Plant hmunhma paih fai nana an pawisa hman hian Mission Veng-a in tinte bawlhhlawh paih faina senso kum khat (thla 12) a phuhru thei zan a ni! Kum khat chhunga Mission Veng in tinte bawlhhlawh paihte hi hmun khatah dah khawm ila, Water Treatment Plant hmunhma an paih faite hmun khatah dah khawm bawk ila; BAWLHHLAWH HLU BIK chu a awm tih tu pawhin kan hmu thiam mai awm e!
  • A bul lawka lui awm, Tlawng luia chinai paih nan cheng 69764.4 lai an seng a, he tlawng luia chinai hi helicopter an paihtir a ni lo maw? Aizawl leh Kolasib hi kilometre 80 chuang hreta hla a ni a, Dihmunzawl leh Tlawng inkar aiin a let 30-50 vel laiin a hla zawk awm e. Helicopter chuanna rate hi ₹ 1300 a ni. Tlawng luia chinai an paihna man hian Kolasib-ah vawi 53 zet i zin thei. A tlangpuiin Pawan Hans-ah seat 10 a awm a; tlawng luia an chinai paihna man hian nang bakah i chhungte paruk bakah, SIPMIU hotupa Pu Valbuanga leh UD & PA Minister Pu Zodintluanga leh in ṭhiattu contractor te nen Kolasib-ah vawi 5 zet in kal thei tihna a ni. Dihmunzawl leh tlawng lui inkar tawi tea chinai paihna man hi a va tam em! A phurtu truck neitu/contractor chu tlawng luia nitina tui phur ṭhin Mizoram University tui phurte’n nihlawh an va ti dawn em!

  • Leivung paih nan cheng nuai 42.94 an seng leh tlat mai bawk a; leivung man tam a ni leh ta. A building/khawl etc. thiah nana cheng nuai 13 vel hmanga leivung paih nana cheng nuai 42.94 lai an hmang leh daih hi thil mak tak a ni. He leivung hi a pung thei em ni tih zawhna a awm thei. A thuhrimin, Dihmunzawl in ṭhiahna senso-ah sawrkarin cheng nuai 63.08 an seng, han tih hian sawrkarin an la na tlat a, a ṭhiahna man ngau ngau chu cheng nuai 13 vel chauh alawm an ti zel. A ṭhiat tura a hrana contractor la, bawlhhlawh paihtu tur pawh a hrana laa a hmuna thian faitu tur a hran theuhva contractor la an ni awm chuang si lo va, sawi hran phet an tum hi a mak riau.

Eng pawh ni se, khu lai inṭhiahna senso atana cheng nuai 63.08 lai sengtu contractor hi, mahni in saknaa leivung paih tur ilo fahrana han chhawr chakawm tak chu a nih hmel loh.

Aside | Posted on by | Tagged , , | Leave a comment

7th PAY REPORT HI by M. Lalmanzuala

7th Pay Report hman ve leh hman ve loh thu chu kan thukhel lian ber a ni ta mai a. Engtin nge kan kal zel dawn hriatthiam a harin a huphurhawm khawp mai.

Sawrkar hnathawkten an hmuh tur dik tak ni-a ngaia an nawr mup mup laiin kan Sawrkar hotute erawh chuan hman harsa an la ti rih niin a lang a. Mipui mimir ațang pawhin hman rih loh țha ti an tam fê zawk niin a lang.

He thil kan buaipuina chhan ber chu thil pawimawh danga kan buai fo ang bawkin Sawrkarin a tih tur a tih loh vang a ni.

State Sawrkar ve lêm chuan Pay Commission chu State dang tam takte tih ang bawka neih ve mai âwm a nih laiin neih țul ti lovin U.T. kan nih laia kalphung chhunzawmin Central Pay Commission-ah kan ingnghat a. Chuti a nih chuan Central Pay Commission recommendation apiang chu pawm ve zel tur kan ni mai a. Mahni Pay Commission nei si lova, behchhan ber zawm leh si loh chu tih dan mumal lo tak a ni. Hetah hian kan Sawrkar a thiam lo niin ka hria.

Pay Revision neih a țulna chhan ber chu hun inher zelah thil man a lo to tial tial a. Chuvang chuan sawrkar hnathawkte tan an hlawh chu chhungkaw châwm nana a tâwk tawh loh vang a ni țhin. Pay Commission chuan thil man to zel dan(Price Index) ngunthluk takin an zir a. Chuta țang chuan sawrkar hnathawkten chhungkaw chawmna tâwk an neih theihna niawmah an hlawh chu an bithliah ta țhin a ni.

Engkim tih theih deuh thawa kan ram pawn lam thila innghat kan nih avangin Mizoram pâwna thil man a to chuan kawng tam takah min han nghawng ve nghal lo thei lo va. Kan sawrkar hnathawkte hlawh pawh pung ve lo thei lo tluk a ni.

Sawrkar  hnathawk hlawh a pun chuan miretheite hi a tuartu ber tur an ni ang, tih hi mi tam tak ngaihdan a ni a. Mirethei tih hian a huam zau viau a. Lo/huan neitute hi a tam ber an ni ang a. Anni  hian an tawrh dan tur hriatthiam a har deuh. An thil thar man hi a khat tawkin a to chho reng tawh a. Hlawhfa hlawh pawh a khât tawkin a pung fo va. Tunhma kum 10 vela Rs 200 ni țhin kha Rs 350 a ni tawh. Chu pawh chu hmun hrang hrangah a inang lo fur bawk. Thil dang dangah pawh thil man chu a to chho fo a ni.

Hmun danga thil man a to avanga hlawh tihpun a nih țhin laiin kan ramah chuan ram dang ang bawka a khât tawka thil man a to chhoh fo va, hlawh a puna ram danga thil man a to ve nghal mai loh laiin kan ramah chuan hlawh pun veleh thil man a to nghal ziah țhin. Heti kawnga chhût  hi chuan sawrkar hnathawk hlawh pun hi miretheite tana a hlauhawmna tur hriat a  harsa deuh a ni.

Kan sawrkar hnathawkte hlawh hi India ram State dang tam taka mite aia sang zawk a ni a, kan State sum dinhmun nen a inmil lo tih hi thu dik hnialna tur awm lo a ni. An hlawh tam hrim  hrim hi sawisel ngawt tur ni lo  mahse, kan budget pawisa a ei hêk nasat êm avangin bih chian ngei chu a ngai a ni. Bih chiana siamțhat ngei chu a țul a, chutiang tih chu kan sawrkar tan thil awlai a ni si lo va, chu chu a kaikuang tak chu a ni zawk.

A siamțha theitu kan Sawrkar chu hemi kawnga engmah ti thei lo khawpin amah leh amah a inphuar a, chu chu a buaithlak lai ber chu a ni. Politician-te hi mahni hmasialna nei lova, ram leh hnam tana inpumpeka thawk tur an nih laiin an nihna chu mahni hamhai nan an hmang ta hlauh a. Hlawh an insiama hamțhatna tam tak an inpe a. Chu chu ram inrelbawl nana kalphung tur a nih loh laiin, tihtâwp emaw tihtlêm emaw aiin an titam tawlh tawlh a. An service kalphunga hlawh nei tura awm sa, sawrkar hnathawkte nena inkhaikhinin hlawh nei tur ve rêngah an inngai a. Kan Chief Minister pakhat phei chuan Chief Secretary-ina an hlawh aia tam a hlawh chu thil inhmeh lova a ngaih thu a sawi hial a ni. Hei vang hian hetiang thil pawimawhah kan sawrkar hotute hi thutlûkna dik, harsa sî(hard decision) siam thei dinhmunah an ding lo a ni.

Sawrkar hnathawk hlawh chungchangah phei hi chuan uchuak taka hlawh leh hamțhatna inpe ve tho an nih avangin sawrkar hnathawkten hlawh pun an phût hi  hnar ngawt hlei thei pawh an ni lo. Tun  hma-a Central Pay hlawh pun apianga  an lo pêk ve ziah țhin avangin tihdan thar leh dang an siam te a nih loh chuan pawm loh ngawt tur a ni lo vang. A thuphung(principle) chuan Sawrkar hian hlawh pung pek hi a bâ a ni.

Sawrkarin a pêk rih lohna chhana a sawi chu sum harsatna a ni a. Hei hi a dik khawp ang. Mahse, kan sawrkar hian sum harsat loh lai hi a nei ngai meuh lo va. Central Sawrkar pawisa kan dawn hi a hmanna tur dik takah chuan hmang ila, kan harsa lo mai tur a ni a. A hman lohna tur deuh veka kan hman avangin kan harsa lo thei lo țhin a ni.

Sum lama harsatna kan nei reng chungin, kan ziaawm ta deuh e, tih pawh awm chuang lovin eng emaw hunah chuan hlawh pung chu an pe nge nge țhin a. An pek hun chu eng dang a ni lo va, NEXT ELECTION-ORIENTED a ni deuh ber țhin.

Tun țumah pawh hian kan sawrkar hian 7th Pay hi pek ngei a tum a. A hun erawh chu nak kum election enzâwn a ni deuh ngawt ang. Inthlan huna an hlawkpui emaw an țangkaipui tur hun an thlir rih ni berin a lang.

Sawrkar hnathawk hlawh tam hian, a tam hrim hrim bâkah nghawng țha lo tam tak a  nei a, chu chu kan zir chiana kan siamțhat tur tak chu a ni. Hlawh tam hian TA/DA leh thil dang dangah pawh ‘entitlement’ sâng zawk a pe a, chutiang thila pawisa luang ral chu tam tak a  ni. Heng bâka hamțhatna dang ‘medical re-imbursement’ etc an dawn te hi a tam thei ang ber leh chin tâwk nei lo hi a ni deuh ngawt mai a ni.

Hetiang thil kal vel hian kan sawrkar kalphung hrim hrim  hi nasa takin a khawihbuai a. Hlawh tihpun huna, ‘fitment’ an tihna lamah thil tithei bîk leh duhsak bîk an awm țhin avangin ‘mahni hlawha lungawi, midang hlawha lungawi lo’ an awm phah ta țhin a. Inelrelna te, duhâm zêlna te a rawn awm belh zel a. Chu chuan sawrkar hnathawkte zingah “work culture” a tihchhiat zual phah a. Ram leh  hnam tana hnathawh aiah mahni tâna thawh kalphung a rawn hring a ni.

Sawrkar hnathawkte dinhmun hi a țhat êm avangin tu pawhin an ban phâk chin chinah sawrkar hnathawh hi an tum vek ta mai a. Hna dang tawh phawt chu hmuh hniam leh tuipui tlâk lohah kan ngai a ni ber a. An tam êm avang leh an hlawhte a tam êm bawk avangin leh  kan ramin thar chhuah leh siam chhuah alawi kan neih bawk loh avangin sawrkar hnathawkte hlawh  hi kan ‘economy’ innghahna ber leh kan GDP tehfung ber a ni ta deuh ngawt mai a. Chu chuan awmze neia ram ‘economy’ siamna kawng a ping ti tih dêr mai a ni.
Chu chu kan politicianten POLITICS KHELH nana an han hman deuh vek tâkah phei chuan kan ram kalphung DEMOCRACY a letlinga khâina-ah a lo chang ta bawk a ni. A va rapthlak êm! He sawrkar hnathawk hlawh tam tham tak siam dan leh kalpui zel dan leh an hnathawh dan kalphung hrim hrim pawh  a fel tâwk loh êm avangin kan hnam nunphung leh “moral” ber pawh nasa taka eichhetu tak pakhatah a chang ta a ni.

Siamțhat dan ni-a ka hriat tunhma pawha ka lo sawi tawh țhin chu hei hi a ni. Ngunthlûk taka zir chian hnu-ah kan phû tâwkin sawrkar hnathawk hlawh hi siamțha vek ila. Chu chu tuna mi aia hniam a ni ngei ang a. Chu hlawh thar chu sawrkar hnathawk lâk thar apiangten an  hman tur a ni ang a. Tuna a thawk laite pawhin promotion an hmuh apiangin hlawh hlui ring lovin hlawh thar an ring tawh ang a. Hlawh hlui neitu a pension rualin hlawh hlui pawh a tâwp nghal zel ang.

Hetiang thutlûkna pawimawh siam tur hian kan CM/Minister/MLA-te hi hlawh leh hamthatna dawng lo tura an insiam êm loh pawhin an inpawhhniam hlê a ngai ang. Chuti lo chuan engmah an ti thei lo vang. Ngaihdan han sawi ve rawh u le.

Aside | Posted on by | Tagged , , | Leave a comment

ZONUN MAWI by Lal Chungnunga, Ex. CYMA President.

Bus-ah i chuang a, i bula ding, seat chang ve lo kha engatinge i seat-ah i țhut tir? bus fare a tumsak che em ni? tumsak lo, nang aia a upat avangin i zah a, i seat i kian mai a ni.

Ruaițhehnaah chaw dawh turin i intlar a, i ril pawh a țâm ve tawh. Mahse i hnunga putar chu i kian a, i dawh hmasaktir țhin. Hei pawh eng dang vang mah a ni lo, i Zonun ze mâwi lo lanchhuah vang a ni. Zinnaah mi motor chhia a lo ding a, motor chhe siam thiam miah lo chunga “engtizia nge”? ti-a i din chilhna chhan pawh zonun ze mâwi hawihhawmna nangmaha nung reng kha a lo chhuah vâng mai a ni. Zing dar 2 a ni tawh a, mitthi dar ri val val chuan i muhil tui lai a tiharh che a, YMA tlangau-in tunge thi, engvanga thi nge tih a rawn puanga, vanneihthlak takin i chhungte an ni lo hlauh mai. Mahse i muhil zui thei ta lova, chutiang ang hunah chuan țanpui ngaite țanpui turin ruahsur hnuai-ah pawh kê i pên țhin. I exam hun a hnai, a nih loh leh a Shillong-a lehkha zir kan intih hmuh tan tirh lam khan Khasi ho chuan “Mizote chuan mitthi an lawm a, tui tak leh hlim takin ruang an zaipui tlaivar a, a tûkah phûr takin thlan an lai leh țhin” min ti. Mitthi lumena hlim viau thu a awm lova, thlan laih phûr viau thu a awm hek lo, kan mizia an hre lo a ni. Kumin kumtir lam khan Tlungvel tlangval pakhat a bova, nasa takin khawtlangin an zawng a, mibo zawng tlangval tlawmngai hnatlangte zanah an lo hawng a, dawrkawn ah nulaten thingpui nên an lo hmuak a, pa pakhat chu lo ding chhuak in “Mizo kan ni kan hmel a țha” tih hla thu hi a sawi a, mibo zawng tlangval tlawmngaite hmel kha țha a ti hle a ni. Rîkrum thil a lo thlena kan fuankhawm thuai țhinte, damlo mangangte hnena a thlawna thisen kan pe țhinte, hmeithai In kan sak sak țhinte leh țanpui ngai YMA ten kan țanpui țhin hi chu a ropuiin a hlu êm rêng a ni. Ngaihtuah ngun ngai ta chu a chunga kan sawite khi tuna kan dinhmun, tuna kan mizia hi a la ni em? tih hi a ni.

Vawi khat chu YMA programme hmangin thingtlang khua, Aizawl ațanga km 170 vela hla ah ka zina. “Aizawl zaithiam rawn hruai hram ang che” an tih avangin mipa pakhat leh hmeichhe pakhat ka hruai a. Kan haw lamah chuan pitar kum 70 mi ka phur tel a. Chu pitar chuan “motor hi ka rui leh țhin, tukverh bulah ka lo țhu ang e” a ti a. Ka zaithiam hruaite chuan motor an rui lo, mahse an kian duh lo. Aizawl city bus-ah hian a awm nêm zawk hmeichhia hrim hrim chu sawi loh, aia upa tar chak lo seat kian thei lo, ken tur a ni tih pawh hre lo, High School naupang chu sawi loh, College zirlai leh țhalaite zingah an va tam tehlul em! Mizo zia hre lo țhalai duh aiin kan pung chak ta hi a pawi a ni. Anmahni thiam loh a ni vek lovang, a zirtirtu tur nu leh pa thiam loh a ni tel ngei ang.

Ei leh in-ah hian tunlai hian Mizozia hawihhawmna a lang ta lo bawk. Fatu-ah ka țang fova, țhalaite zingah hawihhawmna hmuh tur a vang ta hle a ni. Ṭum khat chu mo lawmna ruai țhehnaah chawei tur an intlar țhup a, tlangval pakhat chuan a hma chiah a ding putar pakhat chu ” ka pu, ka hmanhmawh deuhva….” tiin a hmakhalh a, zahna chang hre hauh lovin zu bâr tûn tûn ngam a! Kawng laka motor chhia, ûksak miah lova tlan pêl țhin driver an tam sawt hle mai. Hawihhawmna hi kan mawipui a ni tih hria a kan zir thar a țûl takzet a ni.

Doctor, super specialist pawhin en se “nula, tlangval, nang zawng i hrisel e” an tih ngei ngei tur khawpa hrisel si, eng mitthi dar mah ina a kaih harh zawh loh mutui țhalaite zîngah an pung zel hi punna țha a ni lo bawk. A thuhrimah, eng mitthi dar mah in kan thin a țhawng ta miah lo mai hi a MAK ta a ni. Tunhma chuan thih dan rapthlak deuhva thi an awm chuan Zoram a dêng chhuak țhin a nih kha. Mizo nih tinuamtute leh kristian zirtirna lan chhuahtirtu kan nunze mawi, mi zawng zawng tana entawn tlak kan neihte hi khawvel hriata kan hming ti thangmawitu a nih zêl theih nan uar leh zualin i chawi nung zel ang u khai.

A ziaktu hi Central YMA President lo ni tawh Pu Lalchungnunga, Ramhlun North, Aizawl a ni a. Dt.11.12.2017 zan Dar 9:30  vel khan a boral. Amah hi Kal (Kidney) ṭha lo a ni a. Hun rei tak lo inenkawl tawh a ni.

A thuziak hi a ṭhat em avangin Amah hriatrengnan kan dah e

Aside | Posted on by | Tagged , | Leave a comment

IMANUELA THI ZAMA’N by Kima jongte

William Cowper (Cooper) chu November ni 26, 1731-ah Great Berkhampstead khua, England-ah a lo piang a. Kum 6 mi lek a nihin a nu in a thihsan a. Nu duattu pawh nei mumal lova seilianin, naupang khawngaihthlâk tak a ni țhîn. Harsatna tamtak kara seilianin, a nunah chuan hlawhchhamna leh beidawnna tamtak  paltlang tur a awm a. Chutichuan, kum 1763 chho vêl atang phei chuan depression nasa tak a lo nei ta nghe nghe a ni. St. Alban’s Hospitalah te enkawl a lo ngai ta hial a ni, tiin a chanchin ziahnaah chuan chhinchhiah a ni nghe nghe a.
  
Hetih hunlai vêl hian “Amazing Grace, How sweet the sound” (Khawngaihna mak mawi leh duhawm) tih hla phuahtu, John Newton nên intawngin, an in kâwmngeih ta êm êm mai a. Newton-a kaihhruaina nên chuan zawi zawiin a depression pawh chu a lo ziawm ve ta viau zêl a. Depression a neih lai, kum 1771 vêl kha niin a chanchin ziahnaah chuan tarlan a ni a;  he hla chuai theilo, There is a fountain filled with bood, Drawn from Immanuel’s veins (Imanuela thi zamah, Thisen lui a luangchhuak) tih hla hi a phuah ta a ni.
  
He hla thlûk mawi leh lung kuâi tak mai, a thu hmanga mi tamtakten piantharna an lo chan tawhna leh an chan mêkna hi William Cowper chuan Zachhariah 13:1 “Chumi niah chuan sual leh bawlhhlawh tlen fai nân, Davida chhûngte leh Jerusalem luahtute hnênah tuikhur (Lal Isua thisen sawina) hawnin a awm ang…” tih Bible chang nghahchhana a phuah a ni.
    “There is a fountain filled with
      blood
      Drawn from Immanuel’s veins.
      And sinners plunged beneath
      that  flood,
      Lose all their guilty stains.”
  
Thinlung chhungril taka khawharna thûk tak, harsatna namênlo leh beidawn rum rumna dinhmun leh tuarna nasa tak ațanga lo piangchhuak a ni a; he hla thu țha êm êm leh a thlûk mawi bawk si hi mite hnênah Lal Isua thisen thiltihtheihna avanga beiseina thar petu a lo ni ta a ni!
  
Eng anga sual bawlhhlawh tawh leh nung tlâklo nia inhriate tan pawh thisen zarah ngaihdamna a awm a ni, tih min hriattîr, “Min la ngaidam duh e!” Amen! Helai chang phei hi chu hnuk ulh lova sak a harsa ka ti țhîn:
   “Mi sual thi tûr an khenbeh khan,
    Faina lui chu a hmu;
    Amah angin sual mah ila,
    Min la ngaidam duh e.”
Chu Thisen lui chuan, a zawng hmutu apiangte chu englai pawhin a lo welcome êm êm reng a; Pathian khawngaihnain a khat a, misual fâina lui a ni a. Chu Thisen lui  chu chatuan pawhin a kang dâwn lo a ni! A va ropui tehlul êm!
  
Bianga mittui luang zung zung chunga sak a nuam țhîn-
  “Thisen lui chu ka lo hmuhin,
    Khawngaihnain a khat;”
    Chatuan pawhin a kang lovang,
    Mi sual faina lui chu!”

Aside | Posted on by | Tagged , , | Leave a comment

THE BATTLE OF STALINGRAD (Khawvel in a theihnghilh tawh lo tur Indo na rapthlak chu) by Fredy Lalrinmawia

Kum 1939 ah Nazi Germany chuan Khawvel Indopui 2 na bul intanna turin a thenawm ram te a run a , ‘Blitzkrieg’ tactic hmangin reilo te ah France, Poland, Belgium leh a dang te chu a la thla ta hmiah hmiah maia, France pui tura British sipai rawn thawkthla te pawh hlau thlabarin an ram lamah an tlanchhe chho leh a nih kha. Germany chu hneh theih loh ngam rual loh angin khawvel chuan a hmu ta.

Europe khaw thlang lam pang te duh tawka an lak thlak hnuah chuan German ho chuan Europe khawchhak lam pachal USSR run turin a in buatsaih leh ta rum rum mai le, June ni 22 kum 1941 ah Operation Barbarossa a launch ta piap mai le , ( chu chu german hoin USSR an beih tanna operation hming ani) , Soviet ho chuan theihtawp chhuahin lo dan tum mahse German palchal chu ngam ngang loin a ni telin a retreat ta hum hum mai ani. Kum 1942 a rawn in her chhuaka German sipai te chuan USSR khawpui Moscow leh a khawpui lian leh pawimawh ber ber – Leningrad ( tuna St Petersburg) leh Stalingrad ( Volgograd ) te kawtchhuah an rawn thleng ta.

Stalingrad bik hi Russia chhim lama khawpui lian tak, Volga lui kam (West lam) a awm ani a , Russia chhim lam oil hosakna german hoin a duh tak mai lak nan a dangtu awmchhun a ni a, Stalingrad hi thla 2 chhung vela la hman turin German ho chuan an inngai ani. July ni 17 , 1942 ah chuan Stalingrad khawpui chung chu German Bombers te an hliah thim ta khup mai le , kar loah an bomb sur chuan Stalingrad khawpui building zawng zawng deuh thaw chu a deng sawp nghal ani. Tichuan lei lam sipai , tank leh infantry ten chet an la chhun zawm leh nghal.

Nimahsela German ho chuan an rin ang ngawtin Stalingrad lak chu a awlsam dawnlo tih an in hre ta a a chhan chu building chim leh khawpui sawprawp ah an tank te an che tha theiloa an sipai te pawh duh angin an che theilo , Russian ho lah chuan chuti mai mai a Stalingrad laktir chu an tum bau lo bawk. Khawpui chhunga inbeih naah chuan nasa takin thisen a chhuaka leh lam leh lam ta chet a harsa a ni. Stalingrad hi a german hoin an lak chuan russia chhimlam oil hausakna zawng zawng chu an sipai te nasa taka tihchak nan an hmang thei dawn tih khawvelin a hai lo, khawvel mit chu Stalingrad ah a fu ta thup mai le. Stalingrad a sipai leh supply rawn chawklut tur hian Volga lui kan a lawnga rawn kai angaia , chung lawng te chu german fighter hoin chawlh awm hauh loin an bei char char reng bawka chuti chung chuan Russian sipai te chu an beidawng duhlo, German ho rin ai daihin Russian sipai te chu anlo tough ani.

Khawpui chhunga inbeina a kal zela , german hoin Russian ho chu Volga lui lamah an nawr tawm telh telh a , Stalingrad khawpui 95% chu german hoin an la tawh a ni. (Hetih lai hian British Newspaper pakhai chuan ti hian a ziak : Germany chuan ni 35 chhungin Poland a la thei a , Stalingrad ah chuan ni 35 chhungin Building 1 an la thei trawk a , France kha ni 46 chhungin an hneh a , Stalingrad ah chuan ni 46 chhungin kawng 1 an cross thei trawk ani ). 1942 kum tawp lam an rawn hnaia, German ho chuan Stalingrad chu 95% awp tawh mahse an la la tak tak thei chuanglo , chutah le Russian thlasik rapthlak a rawn thleng ta , hmun thenkhatah pheichuan -55 Degree C a vawt te ani.

German hoin an tawrh nasat ang bawkin Russian hoin an tuar nasa amaherawhchu a ram mi ni ta vang vang chuan anlo hmang zawk . Khawvawt hnuaia Stalingrad khawpui chhunga an inbeih reng lai chuan Russian lam chuan Operation Uranus an rawn launch ta thut mai le .. He operation hian a tum chu hmun hnin Stalingrad chhim leh hmar lam atanga German line tihchhiat a Stalingrad a german sipai te hualbeh ani. An tum ang ngei chuan an hlawhtling ta , German Army in an chhuan vawr em em an 6th army , Stalingrad la thei tur saa an ngaih te chu hualbehin an awm ta riap mai le.

February 1943 a lo inherchhuah chuan German 6th army , Stalingrad chhung a awm te chu an in surrender ta. Khawvelin hneh theihloh ngam rual loh a ngaih German Ral-lian chu a vawi 1 nan khawchhak pachal Russia lakah a tlawm ta, Russia chuan Nazi Germany chu hneh theih anni tih khawvel mit hmuhah a tar lang ta ani. He battle ah hian German sipai nuai 7 chuang leh Russian Sipai leh Civilian Maktaduai 1 aia tam an thi a ni.

Aside | Posted on by | Tagged , , , | Leave a comment

Mermaid naute a piang?

Dec, 6 nilaini khan Muskura Bibi, 23, chuan Chittaranjan Deva Sadan Hospital, Kolkata ah naute neiin vanduaithlâk takin a naute hi a piangsual hlauh mai a. Darkar 4 hnuah a boral leh ta.

He naute hi vanduaithlak takin mermaid syndrome a lo nei hlauh mai a. Naute duhawm tak hring tura an inngaih laiin mermaid ang tak naute an nei ta hlauh mai a ni.

He naute nu leh pa te hi rethei leh hnathawk nasa tak niin a pai lai hian inentirna tur leh damdawiin ṭha panna tur an nei lova. Naute dinhmun hi a pai chhung zawng hre miah lovin a awm ngar ngar a. Naute a lo pian hian a naupai chu a piangsual tih a hre ve chauh a ni.

Dr Sudip Saha, child specialist chuan “A nu leh pa te hian sum harsatna avangin inenkawlna ṭha an ngaihtuah thei lova. Nutrition tlakchhamna leh thisen dawn ṭhat tawklohna avangin hetiang piansualna hi a thleng thei a ni” a ti.

• Sirenomelia an tih, mermaid syndrome an tih bawk hi natna vang tak a ni a. Ke pahnih inbelhbawm emaw a ṭhen lai inzawmin emaw an awm ṭhin. Naute 60,000 – 100,000 vel naute piang ah pakhat te chu hetiang natna nei hi an awm zauh ṭhin chauh a. Ril ṭhang puitlinglo leh kal ṭhang puitlinglo an nei duh a. An pian hlimah chuap leh lung fello vangin an boral duh hle.

Source: National Organization for Rare Disorders

Kum 2016, Uttar Pradesh state a nu pakhatin a nei tawh bawk a, chu naute chu minute 10 chauh a dam.

DAILY MAIL CHANCHINBU A ṬAWNG FIMKHUR LO.
He thu hi Daily Mail chanchinbu chuan facebook page ah post in “It died just four hours later” tiin a caption a ziak a. Naute sawi nan, mihring nilo sawina “It” a hman avang hian comment ah an sawichhe nasa hle nghe nghe a ni.

image

Aside | Posted on by | Tagged , | Leave a comment