POLICE LAK TURAH A DIK LOVA TLING AN AWM CHUAN HRIAT RUALIN PAIH LEH NGHAL ZEL DAWN

“Police hnalak tura buaipui mekah a dik thei ang ber tih a ni a. A dik lova tling chho an awm chuan, kan hriat chhuah rual rualin paih leh nghal zel an ni ang” DGP Pu Thianghlima Pachuau, IPS chuan a ti.

Mizoram Police Constable (UB) mi 75 leh Constable (AB) mi 350 lak tur chungchangah nimin chawhma dar 11 khan  DGP Pu Thianghlima Pachuau IPS chuan a office PHQ, Khatlaah thuthar lakhawmtute a kawm a. Constable lak turah hian tun thlengin diklo taka thil ti mi 2 thubuai siamsak a man an awm tawh thu leh a, answer paper cancel leh disqualify nghal pakhat a awm tawh thu a sawi.

Pu Thianghlima Pachuau chuan Police hnalak turah hian Physical Efficiency test paltlang mipa 8812 leh hmeichhia 1811 an awm a, written examination constable (AB) diltu tan ni 3.11.2017-ah leh ni 4.11.2017-ah constable (UB) dil ten exam an bei ve leh bawk a. Written exam chhung hian hmunhma in a zawhloh deuh avang in duhthusamin candidate te thutna inhlat dan rem a harsa a, inentawn leh mobile phone hmanga entawn an awm tih report dawn a niin  chhui zui nghal zel a ni a, thu belhchian dawl lo an thehdarh mai a ni nih thu leh a vengtute kal hlat laia te ka a lo inhrilh manchhuah si loh te erawh thil awm thei a nih thu DGP chuan a sawi bawk.

DGP sawi danin ID Card No 12158 chu exam hall chungah answer paper chhanna puitu atan mobile phone a hmanglai hmuh a nih vangin a answer paper cancel leh disqualify nghal a ni a, Physical test neihna RG Stadium-ah 31.10.2017 khan F. Lalhmingliana Thingsai chu mi ai a tlansak a ni tih hriatchhuah a nih avangin Kulikawn PS ah FIR thehluh a ni a, amah hi man (arrest) niin thubuai siamsak a ni. 31.10.2017 a physical test neihnaah candidate pakhat Lalramhmachhuana, Khuangthing chu physical measurement ah amah aiah midang a din tir tih hmuhchhuah a ni a, Kulikawn PS ah report niin, Lalramhmachhuana hi man (arrest) a ni a, thubuai siamsak a ni bawk.

DGP chuan candidate te exam paper hi CODE hmanga chhinchhiah a nih thu leh, tu answer paper nge an endik tih an hre theilo niin a sawi a, exam paper te hi examiner, Dy. SP rank officer sawmpahnih ten 6.11.2017 atangin uluk takin an evaluate tan a, heng te hi scrutinizer mi 4, Addl SP rank officer ten an endik nawn leh vek niin a sawi. Constable (UB) exam mi 5400 (Mipa 3772 leh hmeichhia 1628) ten an bei a, constable (AB) exam mi 7131 an awmtu a sawi bawk.

Lungawi lohna nei te tan an mahni written test mark score RTI Act hmang a en tur a dil theih a ni dawn a ni.

Advertisements
Posted in Zoram History | Leave a comment

11ᵗʰAR LEH MOREH POLICE TE’N RALTHUAMA SUMDAWNGTU AN MAN:

Nov 23, 2017 zing dar 9am vel khan 11 Assam Rifle (AR) leh Moreh Police te tangrualin, Moreh, Chandel dist. Manipur hmunah ralthuam hmanga sumdawng thin mi 2 an man.
Police lam atanga thudawn dan chuan HK rifle 5.56 leh magazine pawh an man tel niin an sawi.

Tukin khan 11AR leh Police te hian Supermarket area, Sunrise ground Ward No. 4. Moreh hi report an dawn angin an dap a ni.
Heng ralthuam hmanga sumdawng an mante hi:

  1. Liansuan Maung Ngaihte, S/O Girenthang Ngaihte, Age 22 yrs , Tualkhiang, Chikha, Distt Chikha, Chin State, Myanmar.
  2. Jamkheng Maung Ngaihte, S/O Dong Khanpao, Age 25 yrs, of Baungmaual, P/S Churachandpur, Distt Churachandpur, Manipur.
    An pahnih hian, Moreh Police custody ah an awm mek a ni.
Posted in National News | Tagged | Leave a comment

7TH PAY NGIATIN HNATHAWK LOVIN SORKAR HNATHAWK OFFICE AN KAI

22 November, 2017 Mizoram sorkar hnuaia hnathawk pawl hrang hrang intelkhawmna, Federation of Mizoram Government Employees & Workers (FMGEW) ruahmannain nimin khan sorkar hnathawkte chuan hna thawk loin Office an kai.

FMGEW hian sorkar laipuiin a hnuaia thawkte hlawh atana a ruahman, 7th Pay anga hlawh lak ve phut nan hetiang ruahmanna hi an siam a, hemi hma hian an thil phut kar nan hian tun thla ni 9 leh ni 10 khan Badge dum an lo bel tawh bawk a, niminah pawh Badge dum belin, hnathawk loin office an kai a, vawiinah pawh chhunzawm an tum a ni.

Chhût lâwk dan chuan Pay Commission pasarihna rawtna anga Mizoram sorkar hnathawkte hlawh pek a nih chuan kum khatah hlawh leh pension atan Cheng Vbch 800 deuhthaw sen belh a ngai dawn tih Finance Minister Pu lalsawta chuan amah kawmtu media te hnenah alo sawi tawh a ni.

Posted in Zoram History | Tagged , | Leave a comment

SORKAR HNATHAWK TE HNA THAWK TURIN PRISM PARTY IN AN NGEN

PRISM Party chuan hlawh pun ngiata hna thawk lo sorkar hnathawk zawng zawng hna thawk turin an ngen thu an thuchhuahah an tarlang.

PRISM Party sawi dan chuan, Mizoramah hian 2017-18 budget atanga chhutin sorkar hnathawk te hlawhah nitin cheng vaibelchhe 8.28 hman a ni a. Hei hi NLUP dawngtu mi 828 te dawn zat zet a ni, an ti a. Ni hnih chhung hna an thawh loh chuan an hlawh kan chawi thlawn ringawt pawh cheng vbc 16.56 a ni dawn a ni an ti bawk. Hna an thawh loh avanga mipuiin harsatna kan tawh leh sorkar hmalakna chawl avanga kan sum hloh tur phei chu a tam hle dawn a. Chuvang chuan tha taka hna thawk turin sorkar hnathawk te kan ngen a ni, an ti.

PRISM Party chuan, Mizoram economy hi a chhe hle a. Sorkar hian hmasawnna hnathawhna tur mai ni lovin inrelbawlna atana hman tur pawisa pawh kan indaih lo a ni a. 7th Pay hi sorkar hnathawk te pek an nih chuan kan sorkar hian a pawisa neih zawng zawng deuh thaw hlawh leh hnathawktu enkawlnan a hman a ngai tawh dawn a. Hlawh tam zawk nei turin duhsak hle mah ila, kan economy in a zawh loh avangin 7th Pay anga hlawh pun hi PRISM Party chuan tihchiah kan ngai lo a ni, tiin an thuchhuahah chuan an tarlang.

Mizoram sawrkar a Finance department chhut dan chuan 7th. Pay hman a niha sum sen belh ngai tur zat chu cheng vbc. 563.22 a ni a. Tunah hian sawrkar hnathawk tana hmanral Finance Department lam sawi dan chuan kan budget pumpui atangin 36-37% lai a ni phak bawk. Sawrkar laipui chuan 7% vel chauh an hmang a, Kuthnathawktu 70% vel lai kan ramah hian kan awm a, heng mipui tam zawk thawhchhuah zawng zawng ai hian tuna an (hlawh atanga) thawhchhuah hi a la tam zawk, ni a sawi thin a ni.

Finance Minister budget speech a alan dan chuan – Kan leiba hi 2013-14 ah 5608.38 crore (Actuals), <br />
2014-15 ah
6550.39 crore (Actuals)
2015-16 ah 6407.39 crore (Actuals)<br />
2016-17 ah
7290.17 crore (BE) te an ni a.
2017-18 ah chuan ` 7177.99 crore ni tura chhut a ni.

PRISM chuan Kristianna hi a ṭha bik a ni tih lantir a, kan Pathian chawimawi tur te; kan chhehvel hnam te aia ropui zawk kan nih lantir tur te; Zohnahthlak te inpumkhatna atana kan unau te hipkhawm tur tein, Mizoram hi ram ralmuang, dik leh fel taka ro inrel, hna neilo awm lohna, mi hrisel leh hlim chenna, ram hausa, hnam dang ten tlawh an chak ram dinpui atan mitin kan sawm che u a ni.

Posted in Zoram History | Tagged , | Leave a comment

Saipum khuaa thawm mak kha

Mizoram hmarthlang a khaw pakhat a thilthleng pakhat a tak ngei a tawng inti in min hrilh a ni a, a sawi hunlai leh tun hun chu a in ang tawh lo viau a, chuvangchuan tun dinhmun nen chuan khaikhin chi a ni tawh lo.
Kolasib District a Saipum khua ah khuan 2 nd Bn MAP te an awm thin a, HPC in Hmar hnam tana theihtawp a hamthatna an sual lai vel kha a ni. 1992 chho vel khan HPC leh Mizoram Sawrkarte chu an inkap thin a, Hmar nunau chhan a thlamuan tur in Police ho hi Saipum ah hian an awm thin a ni.

Tunah hian 1st IR BN an awm tawh a, chung hun lai chuan 2nd bn MAP an awm thin a ni.
Saipuma Police ho awmna hi tlang ah a ni a, han luhchhoh dawn chuan thasen fe a ngai ve a ni. HPC lam te pawh hian an kap ve zeuh zeuh thin a, mipui tun anga an la tam loh vangin an kahna hmun hi tunah chuan khawchhung a ni tawh a ni.

Police Camp atang hian khawchhung lam hawi i la, Lungpuitlang thlir phei i la, tlem a khawpawn deuh lam han en i la Bung lian tak hi tunahpawh hian a la awm a, chumi ah chuan a ni ka thilziah pawh hi a thlen ni.
Ka thilziah sawitu Pu Vanmuana hi 1991 a training chhuak a ni a, tunah hian Havilder a ni tawh a, Saipum a kan awm ho lai a a sawi a ni.

Pu Vana chuan,” Kan awmthlak tirh hian Saipum khua hi a la lian lo va, mipui pawh hmarveng kan tih lam ah khuan an awm ber thin. Kan camp hi tuna Kudam awmna atangte khuan min rawn kap thin a, kan chhan let ve hi chuan an reh rang thei viau a ni. Zan mut dawn ah hian Camp hnung leh hma ah duty kan insiam a, mahse mutthilh chu a har thin khawp mai, ramhuai ho in lo an vat hi kan hriat thin avang in a ni. Saw ti lai bung hnuai velah sawn mihringin lo kan vah a mau leh thing kan sahthluk ang hian, thing leh mau an kit ri ruah ruah a, an thingkih an namthluk theih loh a huhova an nam thawm te hi a hriat theih vek thin. An inko a an tang ve thei hlawm lutuk mahse zingah chuan engmah hi a lo ni ngai miah lo thung a mak kan ti thei viau na in, Ramhuai lovat hi a lo awm ve tih an sawi avangin kan hlau lem lo na in, hel ho an nih thut a hlauhawm avangin kan muhil ngam lo thin a ni,” ti in a sawi a ni.

Posted in Thu Ngaihnawm, True Story | Tagged , | 1 Comment

Miss World 2017 MANUSHI CHHILLAR

Kum 17 hnua India-in Miss World a neih leh hmasak ber MBBS  zirlai, kum 20 a upa Manushi Chhillar chu India ramah chuan a lar ta vet vet hle mai. November 18, 2017-a Sanya, China a Miss World  a tana thlan a nih hnu atang khan amah fakna leh lawmpuina thu a la chawl lo a ni ber. PM Modi-a meuh pawhin lawmpuina  thu a tweet ve nasat kha!
image

Miss World 2017 Manushi Chhillar hian Bhagat Phool Singh Government Medical College for Women, Sonepat, Haryana-ah MBBS third year a zir mek a. Lehkha thiam thawkhat tak chu a lo ni ve reng reng a ni awm e; Class XII-ah khan English subject bikah CBSE Topper a lo ni ve tawh ngat niin tarlan a ni.
image

An chhungkua hrim hrim hi  chhungkaw zahpuiawm loh tak an ni ve  reng reng. A pa Dr Mitra Basu Chhillar hi India ram ralthuam siamna hmunpui, Defence Research and Development
Organisation (DRDO) a Scientist ve ngat a ni a, a nu Dr Neelam Chhillar pawh Institute of Human Behaviour and Allied Sciences, Delhi-ah Associate Professor a ni a. Neurochemistry department head ni pha ngat a ni bawk.
image

Tun tum hi India-in Miss World a neih vawi 6-na a ni ve ta a. Reita Faria kha a hmasa ber niin kum 1966-ah daih tawh khan a lo tling zan tawh a. A hnuah tun thlenga la lar em em Aishwariya Rai khan 1994-ah a Miss World lukhum a rawn khum leh a, kum 1997-ah Diana Haydon rawn ni lehin, 1999-ah Yukta Mookhey a rawn lang leh a, a kum leh 2000-ah Priyanka Chopra-in chhunzawm nghal zatin kan awl ta vang vang a, kum 17 hnuah he Haryana nula, MBBS zirlai  Manushi Chhillar hi a rawn lang ve leh ta a ni.

MANUSHI CHHILLAR BIOGRAPHY
Name – Manushi Chhillar
Nickname – Manushi
Sun sign – Taurus
Birth Place – Delhi, India
Date Of Birth – 14 May 1997
Age – 20 Years
Height – 5’8″
Weight – 55 Kg
Body Measurement : 33-27-34
Bra Size – 33B
Waist Size – 27 Inches
Hip Size – 34 Inches
Shoe Size – 8 Inches
Dress Size – 12 Inches
Hair Color – Black
Profession – Model, Medical Student
School – St. Thomas’ School
College – Bhagat Phool Singh Government Medical College for Women, Sonepat
Hobbies – Dancing, travelling, painting, singing, poetry
Favorite Politician – Narendra Modi
Favorite Actress – Priyanka Chopra
Favorite Quote – “The sky is the limit. We are limitless and so are our dreams, we must never doubt ourselves.”
Religion – Hinduism
Caste – Jat
Nationality – Indian
Marital Status – Unmarried
Fathers Name – Mitra Basu Chhillar (Scientist)
Mothers Name – Neeta Chhillar (Doctor)
No of Brother – 1
No of Sister – 1
Boyfriend – Unknown

image

Posted in National News | Tagged , | Leave a comment

JAPAN RAMA KULH ROPUI TAK TON 400 A RIT CHAWISAWN

Hmanlai kulh in ropui tak ding nghahchhan chu lo awngrawp dawn tan ta se, engtin nge a building chhe lova a nghahchhan, a in dinna chu i siamthat ( repair)theih ang?? Chu zawhna chu Hirosaki Castle a lungbang siam hna an thawh laia Japan ho inzawhna a ni.
La kang la, khawiah emaw dah hmasa rawh.

He castle hi Japan rama Hirosaki khawpuia huam chhunga awm niin Aomori danawpna hnuaia awm a ni a, kum 1611 a sak zawh a ni a, a in nghahna lung hi kum 1983 a lirnghing khan a awn tih hmuh chhuah a ni.

A nghahchhan siam that- bakah lirnghingin a tihchhiat reng reng siam that- siam chhung rei tak a ni ang, bakah castle chu a chunga a awm loh a ngai a ni. Chuvangin dahsawn an rel ta a ni.

Hydraulic jacks hmangin ft. hnih a sangin an chawi kang a, In chu a awmna hmun atanga a lo awm lai lawkna tur ft. 230 a hlaah sawn tum a ni a, dolly system an tih hmangin an lum phei bek bek a ni. August thla a tihchet ţan niin October thla khan tihzawh a ni a, thlathum chhung a tihsawn nan hun an hmang a ni. Hetiang ang “La kang la, khawiah emaw dah hmasa rawh” tih ngaihtuahna hi ruhrel dingah chuan ngaihtuahna thar a ni lo, In nena in kungkaih a ni tlangpui bawk.

Bang siam that hna hi kum 10chhung a rei thawk tura hisap a ni a. Bakah castle awmna hmun ngaia dah theih leh tura ruat chu kum 5 hnuah niin kum 2021 favang a zawh tura ruahman a ni.

Aside | Posted on by | Tagged , | Leave a comment

MEDICAL COUNCIL OF INDIA (MCI)-in MIMER, FALKAWN A ENDIK THUT.

“Medical college neih beiseina a tham ral dawn emni le..!

Hillsgate, Nov. 22, 2017 : Mizoram sorkarin Falkawna Medical College, Mizoram Institute of Medical Education and Research (MIMER) din tuma hma a lak mekna chu December thla velah Medical Council of India (MCI) atanga endiktu lo kal beisei a nih laiin nimin (Nov. 21, 2017) khan endik a ni a. MCI lam hian an tih fo thin dan angin engmah sawi lawk lovin an endik niin hriat a ni a, Mizoram sorkar thuneitute lamin engmah an hre lawk lo niin hriat a ni.

MIMER endiktu MCI Oficial-te hian zing dar 9:10 velah Falkawn hi an thleng a. Official lam an la thlen kim loh avanga kawhhmuhtu mumal an awm loh bakah MCI norms la phak lohna a tam em avangin beisei a sang lo hle niin Hillsgate chuan thu a dawng.

Indian Medical Council Executive Committee-in January, 2017-a report a pek danin MIMER-ah hian Dean, Medical Superintendent leh faculty dang tumah an la awm loh thute, khum awm tur zat a la awm kim loh thute, Nursing staff 175 mamawh a nih laia 89 chauh an awm thute, OPD a inentir nitin 400 tal an tling tur a nih laia 177 chauh an awm thute, damlo, khum luahtu 28.4% chauh an awm thute, an visit laia major operation awm loh thute, Casualty-ah khum 10 awmna tura khum 6 chauh a awm thute, Blood bank a la awm loh thute leh MIMER-in MCI norms a la phak lohna chi hrang hrang point 30 dawn lai an tarlang a.

Hetiang a nih avang hian Medical College, 2017-2018 session atanga tan tura tih chu a rem loh thute an tarlang a ni.

Aside | Posted on by | Tagged , | Leave a comment

NORTH KOREA-IN NUCLEAR HMANGA A BEIH TUM TOP LIST-AH “WHITE HOUSE, PENTAGON, MANHATTAN” A DAH: CHINA HMAIAH A BENG SAWK!

Nimin 22, Nov, ah Europe Council on Foreign Relations chuan, North Korea ramin nuclear bomb leh missile hmanga a kah/ beih tum hmun bik (top target) a siam chu puang chhuakin, chung zingah US President chennaWhite House, US ralvenbuk hmun pui Pentagon leh sumdawnna hmun pui Manhattan-New York City te a ni, an ti.

North Korea thil tum dan hi Intelligent te ruk chhuah niin, khing a chung a mi te bakah tihian nuclear hit target bik an lo duang chhuak diam a: US ram leilung hrim hrim leh khawpui lian zual kah alh dur dur. Asia-Pacific bikah US military base hrang hrang, Guam, Hawaii, US nuclear aircraft carriers, South Korea’s Operations Centers.South Korea ram chhung bikah Osan, Gunsan, Busan, Pyengtaek, Jungwon, Degu, Gyengrydae, Seoul, SKorea President chenna In-Blue House, SKorea’s Reactionary Gov’t Centers.Japan ramah Yokosuke, Miswa, Okinawa, Tokyo, Osaka, Yokohoma, Nagaya, Kyoto te an ni.

North Korea chuan US chu khawvela terrorist hote tanpuitu nasa ber (biggest state supporter of terrorism) tiin, a puh let ve bawk. US State Dept tun hnaiah North Korea hi firfiaka chetna thlawptu tiin, Iran, Syria leh Sudan nen rank khatah a dah a ni.

Tun hnaia China ramin North Korea’s Dictator Kim Jong-Un be tura Sr official an tirh, International Relations Comtt & Ruling Communist Party hotu Mr Song Tao chu Kimpuia hian a lo hmu duh miah lova, hei hi Political Analyst te chuan, “North Korea-in China biangah a beng sawk tluk a ni” an ti. Kum 2015 hnua China ramin High Level Official a tirhluh lehna hmasa ber a ni. Kimpuia kawhmawh bawl, luhlul chhuah, tau nget ngut thin hi thlem dam a harsa fu dawn niin a lang.

Nuclear Expert te chuan, North Korea hian nuclear bomb 25-30 chu nei tawh ngeiin an ring a, uranium enrichment nen nuclear hman mai theih tur 60 chu a puan hnuai tha khiau tawhin, a thul khung tha kar tawhin an ring a ni.

Author : C.T Lalrinawma

Aside | Posted on by | Tagged , | Leave a comment

CONGRESS PARTY HI CHHUNGKAW SORKAR SIAM CHING LEH PARTY CORRUPT TAK AN NI – Dr.Kenneth Chawngliana

Dt 20.11.2017 (Monday) khan ZNP Party chhung inkhawmah Dr. Kenneth Chawngliana Vice President chuan thusawiin, “Tun hma deuh khan Congress hian India ramah rorelna an chang deuh vek thin a. An hruaitute an corrupt avangin hmasawnna a kal hlei thei lo va, tunah chuan India mipui an lo thangharh ta a, hneh takin Congress chu paih thlak a lo ni ta zel a ni. Khawvela Independent ram 129/130 vel zinga party corrupt ber thlannaah Indian national congress hi 4-na a ni. Hemi chungchang an comment-naah chuan ‘tuna India rama party lian ber pawla sawi theih Indian National Congress party chu corruption thubuai nei mek Rahul Gandhi-an a hruai mek’ tiin an ziak kher bawk. Hma kan sawn tak tak theih lohna chhan chu Indian National Congress in Central ah kum 60 chuang roan rel avang leh hemi chhung hian State tam zawkah ro an relvang a ni. Central lama Congress inawpna, family dynasty kan tih leh kan duh loh em em chhawm nungtu chu Mizoram Congress party hi an ni tiin “Congress Party hi chhungkaw sorkar siam ching leh Party Corrupt tak an ni” a ti bawk.

Dr.Kenneth-a chuan, “1972 Re-Organisationkhan Congress party chuan nasa takin Union Territory (UT) sorkar din a nih theih nan hma an la a, he UT in a ken tel dan leh hrai engmah an zir chian loh avangin Chakma District Council kha a lo piang ta nawlh mai a, he thil hian tun leh nakin thlenga Mizo hnam pawi lianpui a khawih a ni. Brig. Thenphunga kaihhruai sorkar a lo pian khan he Chakma District Council hi thiah tuma hma a lak mek laiin MNF ram mute khan he hmalakna lo chawlhsan tura hriattir a nih avangin a chhunzawm thei ta lo a ni. India sorkar nen inremna an siam dawn khan India sorkar a inhawng zau em em chungin MNF hotute khawthlir a tawi em avangin Chakma District Council dinhmun hi a lo nghet ta tulh tulh a ni. Vision neilo ram hruaitu ten min hnut chhiah hi kan vawiin retheihna leh hnam ang pawha kan dinhmun him lohna chhan pawh a ni” a ti bawk.

He hunah hian ZPM Programme khawchhak lam hmun hranghrang zin report Pu R.Lalthansanga,Chief Organiser hnen atangin ngaihthlak a ni a. An tlawh khaw hrang hrang mipuiten kut hnathawka eizawng an nih thu leh sorkar hotutelakah dinchhuahna tur leh intodelhna tur an hmuh loh thu an lo sawi hlawm a ni. Kut hnathawktute dinchhuahna Policy kengtute hi kan innghahna leh beisei awmchhun an ni tiin MNF leh Congress Party Member te ngei pawhin thu an lo chah a ni.

Chhung inkhawm hi Pu RD Lalrammawia, Gen.Secretary chuan kaihruaiin Pu Liankhuma Hrahsel Gen.Secretary chuanhunserh a hmang a, Party Vice President Pu C.Laitanga chuan Ronald Zothantluanga zaithiam leh Pu Zakhuma Electric Veng te chhungkua Voters 10 lawmluhna hun a hmang bawk a ni.

•  Slchhunga Gooner

Posted in Zoram Politics | Tagged , | Leave a comment