LALTHANHAWLA EIRUK THUBUAI NGAIHTUAH CHHUNZAWM ZEL

2013 inthlan dawna a rosum neih zep
thena Lal Thanhawla, Chief Minister hlui puhna case chu court-in a ngaihtuah chhunzawm zel. Hawla hi 2013 inthlan dawna affidavit hmanga a ro leh sum neih a puanah New Town, Kolkata-a a ram neih thup-ah puhin Pu Lalhriatrenga Chhangte-in 2013-a Hawla dinna bial Serchhip district court-ah a khing a, 2018 kumtir lam khan court hian a ngaihtuah tan.

August ni 13 khan court-ah hian Hawla ‘witness’ pahnih an inlan a, a khingtu lamin thu lo zawtfiahin ‘cross examination’ an nei a ni. Witness-te hi court-in inlan tura a tih hunah vawithum an lo inlan lo tawh a, a hnuhnung ber chu July ni 24 kha a ni.

Witness-te hi Mizoram sorkarin Advocate General atana a lo rawih tawh thin, Bisqajit Deb leh Calcutta High Court Advocate Sudip Kumar-te an ni. Hriata Chhangte ukil-ten witness pahnihte hi thu an zawhfiah hnuah court chuan October ni 3, 2019-a he case hi ngaihtuah leh turin a ti.

Naiasen pawh ka eiru lo titu Pu Hawla hian Mizoram mipui sum vaibelchhe sang tam tak a eiruk thubuai neiin Court chi hrang hrangah a inlan a la ngai reng a ni.

(Courtesy: HRUAITU ARSI
September, 2019

Aside | Posted on by | Leave a comment

CHIEF JUSTICE OF INDIA IN HIGH COURTS JUDGE ȚANGLAI EIRUK THU BUAI CHHUI A REM TI

Aizawl, August 23, 2019
Zirtawpni :

India rama a vawikhatna turin High Court Judge țang lai chu Central Bureau of Investigation (CBI) in eiruk thu buaiah an chhui dawn. Judge țang lai thu buai siam sak tur hian Chief Justice of India in phalna a pek hmasak zet a ngai.

Mr. Ranjan Gogoi, Chief Justice of India chuan CBI hnenah Allahabad High Court Judge țang lai Justice N. Shukla chu eirua puhna lian tak avangin chhui phalna a pe.

Hemi hma hian kum 2017 khan Judges of Panel ten a chungchang hi an lo chhui tawh bawk.

Central Bureau of Investigation chuan Chief Justice of India hnenah he High Court Judge țang lai hi chhui phalna an dil angin CJI hian a pe a ni.

BANG TURA THU RAWN PEK A NI TAWH :
Justice SN Shukla hi Ranjan Gogoi-a hmaa Chief Justice of India Depak Mishra khan, a hna ațanga ban kher nghak lo a, mahnia bang mai tur leh inthiar fihlim tur emaw voluntary pension a kal tur emawin thu rawn a lo pe tawh chung pawhin a bang duh chuang lo.

Hetiang anih avang hian Justice SN Shukla hi kum 2018 ațang tawh khan hna (judicial work) thawh tir a ni tawh lo.

BAN TURA THU RAWN PEK A NI :
Chief Justice of India, Ranjan Gogoi hian Prime Minister Narendra Modi hnenah Justice SN Shukla hi Parliament ah banna (impeachment motion) pulut turin June 2019 khan a thlen tawh.

ENG EIRUKNA NGE :
Kum 2017 tawh khan Medical College pakhat Medical Council of India in Medical College in a neih tur building leh thil chi hrang hrang an tehnaa tling zo lo chungchangah admission tih chhunzawm lo tura atih thu buai, Supreme Court Medical Council of India thu anga 2017 ațanga admission a khap sak tawh Supreme Court thu chhuak lo ti danglama, he Medical College admission tih chhunzawm Justice SN Shukla hian alo phalsak danah sum tam tham tak inpek ngei ni a hriat a ni. (Heta sum an pek zat hi tarlan a ni lo a, hei hi nakin zela Judiciary zahawmna hum himna atan țula ngaih a ni. Huna Ralte)

General Clinical Research Centre (GCRC) Institute of Medical Sciences, Lucknow, chu Supreme Court in kum 2017 ațanga MBBS admission tih tawp sak tura tih tawh, Allahabad High Court kal tlanga a hriattirna Order chu kut ziaka lo ti danglamin he Medical College hian admission an ti thar leh a.

Hei hi Medical Council of India chuan duh loin Supreme Court ah a zualko leh ta a.

PANEL OF JUDGES :
Justice SN Shukla thil tih dan chhui chiang tur hian “Panel of Judges” ruat a ni a. “Justice Shukla hi an puhnaah hian fihlim zo lo leh thil engemaw awm ngeia hriain, DAN lek kawhtute zahawmna ti hming hliau leh he eizawnna ngei pawh hmuhsitawma siama a awm hi a vanduaithlak tak zet a ni” an ti.

Panel of Judges chuan “thil anih loh dan tur anga a nihna hi a hna ațanga banna tling khawpin a nasa tawkah an ngai.

Source :
NDTV
Hindustan Times
The Times of India

==================
Huna Kawlvawm

Aside | Posted on by | Leave a comment

Sawrkarin mau a buaipui dan a mak

OFFICE ZORAM PEOPLE’S MOVEMENT PARTY
THALAI GENERAL HEADQUARTERS
AIZAWL : MIZORAM

PRESS RELEASE NO. 27 OF 23.08.2019

Sawrkar flagship program pawimawh ber Rua chungchanga hmalak dan dangdai

Mizoram rorelna sang ber Assembly House-ah Chief Minister Pu Zoramthanga ngeiin kan ram khaichhuahna tura a ruahman, Raw chi tha chi lakluh anih tur thu leh, a chi rawn supply tu tur pawh mimal taka a hmelhriat niin, thla tin a tiak nuai khat an rawn thawn ziah theih thu pawh a sawi lang nghe nghe.
Hemi chungchangah hian RTI hmanga zawhna chu a changtu tura ngaih Horticulture Department lam chuan Raw chi a lo thlen thu an hre lova, supply turin tender pawh chhuah a ni lo tih an sawi.
Thil chiang zawk hriat tuma ZPM Secretary rual ten Lengte huana Raw tiak khawina ( Hardening plant farm) an tlawh tum chuan July thla khan mau/rua tiak hi 3000 a lo thleng a, August thlaah tiak 10000 a thlen belh bawk tih huan enkawltu te chuan an lo hrilhin, zing karah Chief Minister chuan a tlawh zeuh thin thu leh a fapa in a tlawh thin thu an lo hrilh a ni.
Mirethei te khaichhuahna tur leh Sawrkar Flagship Program pawimawh tak tur nia CM-in a sawi, a changtu tur ber leh engkim hre ber tura ngaih Horticulture Department lamin an hre miah lo hi thil diklo inthup awm ngeiin ZPM Thalai Gen. Hqrs chuan a ngai a, thudik tak hriat hi mipui te chanvo anih anga Zoram mipui hmaa insawifiah turin a changtu Minister hi kan phut tlat a, Mizoram State sum mi tlemte thiltithei kutah a luangral loh nan leh, kuthnathawktute hnen a thlen ngei theih nan ZPM Thalai Gen. Hqrs. chuan theihtawp a chhuah zel dawn a ni.

sd/-
(R. Lalrinsanga)
Secretary
Publicity Department
ZPMP Thalai Gen. Hqrs.
Aizawl, Mizoram

Aside | Posted on by | Leave a comment

LUNGLEI CIVIL HOSPITAL HI

Lunglei Hospital an mualpho leh ta.
Lunglei mipui hian an zahawmna an hṭm ngamlo zawk em ni

ka post lo ang Ka ti tawh takzet na in Civil Hospital Lunglei atang a lungawi lo leh rilru na tak a haw hi an tam ta em a…keipawn kan thil tawn ngei ka theihnghilh theih loh avangin kan post ve rere ang nge…Thu ziak thiam ka nilo a..kan tawn ang ang in ka rawn ziak tawp mai ang..Tun kum Feb ni 6 khan John William Hospital Lungleiah zai chhuahin nau ka nei a…a chamah kan chhuak a..kan naute hi a pum that loh avangin kan chhuah atangin kar1 na vel atangin damdawiin hi kan pan ta reng mai a..a chang leh kan awm thul..a tan tir chuan JW ah hlir kan kal a..emergency taktak hian kan kal zing khawp mai..eng a ang thei silo a…kan vengchhung thil hre deuh ten Civil doctor (a hming ka sawi lo mai ang nga) chu chu zu pan ve teh u an ti a…mahse JW a kan awmlai anih avangin kan kal thei lawk lo a..ahnu kan chhuah ni tuk leh zing ah chuan kan naute chu a tap ta vakvak mai a…Civil chu emergency chuan kan pan leh ta a.

Hming te kan zuk ziak chawp a..a ko tu nu bulah khan kan harsatna te sawi in min ko hma deuh turin kan ti a..koh pawh min ko hma ta reng bawk a..Doctor chuan an en a ..a men lai chuan ka en theilo va ti mu phawt rawh u min ti a..ti mu tur chuan kan chhuak ta a..kan naute hi mut a harsat em avang leh thawm ri a hriat em avangin a muhil thei silo a..kan hmanhmawh tawh nen..kan va kal leh a..kan chanchin te sawi in min ensak mai tur in kan va ngen a..ani pawh chuan min en sak ta a..engnge a sawi tak kha ka hre talo…chuchu iti ngai em?min ti a.. keichuan hrethiam lo zet hian ka en a..i hrelo Ami??khawi damdawiin ah nge i neih a te kha min ti a..ka sawi a..ahnu chuan min hrilhfiah ta tho a…ka tih thin thu in ka chhang a..chuan kan naute awmdan te min zawt a..in awm phawt a ngai min ti a..kan awm ta a..zanah chuan kan naute chu a rawn tap leh ta vakvak a..nurse bulah doctor hnen a min hrilh sak turin kan va hrilh a..min phone sak nghal a .nachhawkna jection leh ei chi hi a rawn chawh a..an jection a ..mahse minute 5 pawh chhawk lo..a rawn tap leh ta vak vak mai a..nurse chuan doctor chu a phone leh a..a ai a sang jection a rawn chawh leh a..a rawn jection veleh mai a..mahse a chhawk chuang lo…mahse nurse chuan darkar1 vel nghak phawt ang a tih avangin rilru nuam lo zet leh mangang zet chuan kan nghak ve leh ta mai a..mahse ala tap reng bawk si..nurse chuan a phone leh a…a khai chi (drip) nachhawkna a rawn chawh leh a..kan khai ta a..reilo te chu a reh veleh a..mahse a hnuah a ngai bawkin a rawn awm leh a..kan mangang tawh khawp mai…hemi zan hian a nu (keima nu) hian min riahpui a…nurse hnenah chuan doctor ko mai turin kan ti a..a phone a mahse phone atang bawk chuan nachhawkna puitling hman chi an ti a..a hming kha ka hre ta mai lo..a rawn chawh leh a..nurse in a rawn jection dawn khan a vein aluh ruali in a muhil nghal siai siai mai ang ati a..a jection ta a..a jection lai reng chuan a rawn zawi ta vek a ..muhil ta lo chuan a ban a vai reng a..a ke a leng reng bawk a..tah chhuak si tap thei silo hian zawi tete in a rawn te reng a…a meng theilo a..hnute kan pe dawn a..a hne thiam ta lo emaw tih tur hian a hne thei ta rengreng lo a…Nu tan chuan avan rilru nat thlak tak em…awm ngaihna hi ka hrelo…tlan chhuah a au vakvak mai te kha ka nap a…kan mangang chuan nurse hnenah kan va sawi a..an awmdan tur ve reng lawm…tiang a an chhungte an buai thin avang hian lawm tiang damdawi hian ka jection peih loh min lo tih khum ta hmuk a..avan hrehawm tak..kan naute Thla3 pawh la tling lo ka lainat zia kha…a hnuah nurse chuan kan mangang takzet tih a hria niang..doctor chu a phone leh a..ala hneh lo a nih chu jection leh rawh hi alo ti a…a rawn jection leh a..ti hi chuan zingah pawh a harh lo ang ati a..zing chu sawiloh darkar chanve hnuah a rawn harh a..a ngai te bawk chuan a awm leh ta a..mahse a tawp a tawp ah chuan zing chu kan thleng ve ta hram a..mahse zing nurse duty an rawn in thlak a..kan naute pawh rawn tap leh ta vakvak a …nurse duty thar nu bulah chuan kan sawi a..doctor min phone sak leh a..doctor chuan a nachhawkna chawh hnuhnung ber ang chi bawk chu alo chawh leh a..nurse in jection a rawn tum chu kan ngam tawh loh thu leh nizan a awmdan te kan hrilh a..chu nurse chuan a eng damdawi hian nge jection ila in duh a min ti a..keini chuan jection tawh lo mai rawh u..kan chhuak mai ang kan ti a…doctor ward rawn fang bulah chuan (ward rawn fang tu hi doctor dang ani) chhuah kan lo dil a..min chhuah a..JW ah bawk kan phei leh nghal a…min lo admit a..doctor damdawi min chawh te kan hmuh chuan…JW doctor chuan tiang hi kei chuan ka pe ngam velo alo tia…damdawi dang min chawh a..Aizawlah min refer ta a.

ka sawi duh ber chu khatiang a..nurse in doctor a phone zing chung pawh khan vawi khat mah alo lang lo leh kan naute dinhmun a rawn check lo kha mak ka ti khawp Mai…Doctor te hi chu Pathian tih lohah chuan damlohna chungchang a kan in nghahna ve ber in ni sin..Miten in nui hmel ringawt pawh kha hahdam nan an hmang thei asin…Pathian rawngbawl in nih zia hi in hre mawlh teh u….

Kimkimi Chongthu

Aside | Posted on by | Leave a comment

ENG ANG CIVIL DOCTOR NGE A NIH LE KHA NU KHA.

Vawin (date 23.8.19. 12:30pm) khan kan hnathawh na ah ka thaw ahah leh awmbawr na thut maia,Civil Hospital Lunglei kan hnaih em avang in kan pan nghal a,Registration ah hming ziak in, ka thawhah thu ka nu in ahrilh a anni chuan Room no.8 ah va kal vat ru tiin min hrilh a,chu room bulah chuan mi anlo tam mai si in thlahrung takin kan luta nurse nu 1 hian ngatinge tiin minlo zawta kanu bawk chuan ka thaw hah thut thu leh ka awmbawr nat thut thu chu hrilhin lo thu lawk ru tiin min chhanga a,Abul lawkah Dr.Rinmuani antih chu athu reng doctor chuan nu pakhat hi alo en meka,chu lai pawh chuan chair a thu in thawk har kati em2 a,a en zawh ah kan hming ziahna lehkha en in ngatinge hetah inlo kal emergency ah kal ta che u ati a(ngaihno beilo zet in)kanu chuan Cilvil ah hian kanla in entir ngai siloa kankal khat sia kanla hre chiang loa hming kan ziahna ah heta kal nghal tur hian minti a atia,Doctor nu bawk chuan helai chu OPD ania duh2 a koh loh chu rawn luh theih ani hleinem miin an nghak thupa tiin min chhang a,kanu bawk chuan nia hmingziak tute khan heta kal tur hian minti a emergency ani sia ati a,tichuan Doctor nu chuan lo thu rawh ati a,emergency ah va kal ula hei hian va in jectionla ila zia loh chuan anlo buaipui angche atia(ka bp takngail pawh enlo leh ka damdoi ngeihloh zawng min zawtloa jection tura minti kha ka hrethiam lo bawk)tichuan keini nufa la kal ngailo na3 kha chuan emergency ward pawh hrelo in kan zawt leh a a awm na Dictor nu chuan min nuih sawh tak chung in Lunglei khua hi inni nange tiin min zawt a,(kanu pawh alungawi ta chiahlo) nia kan kal ngai hleinem ati ve ta bauha,chuan emergency ward chu kanva hmu a a chhungah chuan Nurse 1 leh doctor ni awm tak hi anlo awma,Kanva luta nurse nu chuan enge alo tia ,thingpui alo siama emergency ward e tilo chuan damlo ai chuan athingpui kha angaipawimawh aniang chu an ri vat2 lo tlat, kanu chuan va jection ru antia ati a,khawnge damdoi atia keini kal ngailo kan bangbo si, nurse nu chuan damdoi te rawn lei hmasa ve thin tache u alo ti leh zek a, kanu ava kal vat chuan kei kalo awma, khami ward a kan awm chhung khan abula doctor nive awm tak khan min melh chhin miah lo bawk, ka ngaihdan ani lo tan nurse nu lah a thingpui ala buaipui bawk ka thinrim ka tlan pheia kanu damdoi lei tum pack sa vek pawisa pe tur chu lei angailo kan nih2 kanni ang ka ti a, ka pawt chhuaka chuan ka nu in John Williams Hospital ah min kal pui leha Doctor a lo haw hman chiah bawk si,nurse khan ka bp te lo en nghal in ka damdoi ngeihloh neih leh neihloh min zawt nghala chuan ka kut zungpir hmawra arawn chehbeh kha ka hrelo,chuan khumah min mut tira fan min on sak nghala,doctor haw ta pawh chu call nghal in doctor chu a gas la rawn tlang nghal in a awmhmun thawmhnaw in bel ang2 in arawn tlan phei nghala a fakawm takzet ani.

Pathian khawngaihna zarah tihian eng em kani talo a,kan haw let leh chu Kan doctor nu chu mi pawn anlo sawisel ve sap2 mai hlawma.Mahse ka sawi ve duh leh ka lungawi lohna em2 chu Mi harsa ten chungkaw harsat na avang liau2 a Damdawi in tha panna tur neilo tamtak kan awm laia,nghah reng ngai te tawngkam vin tak2 min hman khum te hi awm tawh lose Civil Hospital mipui tana sawrkar siam anih na ang in damlo harsa tak2 in enkawl na tha pawh neilo te khu duat takin enkawl in bawihsawm tha se kava han duh tehlul em.Chuan hetiang Doctor leh Nurse amo tu pawh Hospital staff hrim2 hetiang tih ching hi chu kan thuneitu lam beng hi thleng se an chungah Action khauh tak a lak nise atha ka ti.

KEIMA TAWN NGEI ANI E KA HMING CHU C. LALRUATKIMA A NI E.

Doctor nu pawh khan minlo hriat sak se Nangmah i in hmangaih ang bawkin i vengte hmangaih rawh.

Ruata Chhakchhuak

Aside | Posted on by | Leave a comment

ZIRLAI HRUAITU TEN SELESIH VETERINARY COLLEGE-A RAGGING AWM THIN AN NGAIMAWH

22nd August, 2019

Nimin 21st August 2019 khan MZP leh NESO hruaitute chuan an thu dawn bawhzuiin College of Veterinary Sciences And Animal Husbandry, Selesih chhunga Zirlaite zinga Junior leh Senior inthliar hranna (Ragging) awm chungchangah College thuneitute thil awm dan an sawipui.

MZP leh NESO hruaitute hi Prof. Dr. Lalnuntluangi Hmar, Dean, College of Veterinary Sciences And Animal Husbandry leh thuneitu dang ten an lo dawngsawng a ni.

MZP leh NESO hruaitute chuan Mizoram zirna In-ah Junior leh Senior inthliar hranna (Ragging) awm thin chu an duh loh thute, tun hnuah thleng nawn tawh lo se an duh thu an hrilh a. Mizoramah hetiang a thlen ngaih loh thu leh inthliar hranna awmtirtu chu tu pawh ni se MZP Hruaitute hian an chungah eng pawh thleng se mawh an phurh loh tur thu an thlen bawk a ni.

Prof. Dr. Lalnuntluangi Hmar, Dean leh College thuneitute chuan hetiang thil thleng hi pawi an tih thu leh tun hnuah a thlen tawh loh nan a hmalak an tum thu zirlai hruaitute hi a lo hrilh.

MZP leh NESO chuan zirlaite zinga Senior leh Junior zinga inthliar hranna (Ragging) lo awm leh ṭhin chu pawi an tih thu an thuchhuahah an tarlang a. “Zirlaiten Mizoram chhungah zalen tak leh lungmuang takin lehkha zir se tih hi kan duh dan a ni a, Zirlaite zinga Junior leh Senior inthliar hranna (Ragging) hi Mizoram chhungah thleng nawn tawh lo se kan duh hle a, a thleng nawn leh a nih chuan a ṭul angin MZP leh NESO chuan hma a la nghal zel dawn a ni” tiin an tarlang.

RAGGING TUARTU CHHUNGKUA KAN NI E – Vanneihthanga Vanchhawng

August ni 12, 2019 chhun khan ka nau, ka Nu u fapa (ka 1st cousin) chuan rilru na takin min rawn bia a, a fapa chu zirlai senior ten an rag nasat lutuk avangin college atanga a tlan chhuah thu min rawn hrilh a ni.

Kan fapa tlangval hi chhungkaw harsa tak atanga inzir chho a ni a, mi ambitious em em mai a ni. Kan nau mah nise ka chhuangin a lakah hian beiseina kan nei sang ve em em thin. Naupang thuawih thei leh thawh hreh nei miah lo a ni. An senior ten an rag nasat lutuk avangin college atangin a thiante inah a tlan chhuak tih a pa in min han hrilh chuan thil dang reng reng ka ngaihtuah thei lo. “Min rawn hruaichhuak mai rawh u, ka lut ngam tawh lo” tiin a pa a rawn ngen a ni.

Sawi tawh angin chhungkaw harsa tak an ni a, mi pawisa puk chawpin an in admit ve hram hram a ni a, chutia han in lakchhuah leh ngawt mai chu a pa chuan thil ni theiin a hre si lo. An rilru a nain a hrehawm khawp mai. “Zirlai hruaitu chak leh fel tak tak kan nei a, lo lungngai suh u hma kan han la ange” tiin ka tawng thlamuan a. Kan beisei ang ngei a MZP leh NESO ten hma an la hi kan lawm takzet a ni.

Kan nau hi August ni 9 Friday tlai khan a lut tan a. Hostel chhak zawk-ah an awm tir a. An luh tan zan hian Mizo zirlai senior te chu zu rui chungin an room-ah an lenglut a, zan dar 10 leh 11 inkarah an hawn san. Hemi zan hi chuan inrikrapna leh inhremna a awm hran lo. A zan hnihnaah Mizo zirlai senior te bawk chuan zan dar 12 pelh tawhah zu rui chung bawkin kan naute chu an kaitho a, “thingpui lumna tur zawng rawh u” an ti a, zan rei tawhah no leh lighter te an zawn tir a, thingpui an lum tir a, zing dar 2:30 thleng an men. A zan thumnaah hnamdang senior students ho an che ve leh ta thung a. Room pakhatah lut thar ho an ko khawm a, kut hnungsuihin an din tir a, an hmel en phal lovin leilam en turin an ti a, zawhna hrang hrang zawtin an vinin tawng chhe tinrengin an an khum a. Chutiang chuan zan dar 2:30 thleng an din tir a ni.

Lut tharte hi thawmhnaw phelha mut an phal sak lova, kekawr tluan leh kawr bantlawn ha chungin, in bilh lut thlapin an mut an phal sak.

Thudawn danin zirlai senior te hian zan reiah RV-ah zu lei turin junior te hi an tir thin niin an sawi. Hriat theih chinah, zirlai lut thar zing ami Ramthar veng tlangval pakhat pawh hmanni deuh khan a tuar thei thlawt lova, college a lo chhuahsan tawh a, Mizo hmeichhe pakhat pawh hmanni deuhah a chhuak bawk tih hriat a ni a, hmeichhe lamah pawh hian ragging hi a nasa ve hle a nih a rinawm.

Supreme Court chuan ragging chungchang thuah kum 2009 khan notification a lo chhuah tawh a; F.No.37-3/Legal/AICTE/2009 (All india Council for Technical Education Regulation 2009) chu a lo ti chhuak tawh a ni. Central lam hian hei hi an zawm tha hle a, Institution hrang hrangah an-ti ragging committee te dinin ragging lam kaihhnawih hriat an neih chuan action an la vat thin. Mizoramah Institution hrang hrang leh MZU-ah ngei pawh he dan hi an zawm tha hle a, ragging hriat tur a awm tawh lo tih theih a ni. Hetih laia he college-a hetiang thil thalo an lo la ching hi a zahthlakin a pawi hle a ni.

Selesih Veterinary college hi India rama ragging tih nasatna ber niin an sawi hial mai. He thil tha lo tak hi tih tawp vat a ngai a ni.

Harsa taka lehkha zirin beiseina sang tak nen pukchawpin an in admit a, mi thalo te avangin kan fapa chuan college a chhuahsan lo thei ta lo a ni.

COMMENT By Vanneihthanga Vanchhawng
Ka post-a ka sawi lan, Ramthar veng tlangval khi a Pa-in tun maiah min rawn be hlauh mai. Kan nau luh hmaa lo in admit an ni a. Lehkha zir taima em em thian pawh kawm tam lo ve tho a ni. Entrance-ah pawh topper niin phur takin adminssion an ti a, friday-ah lutin Monday-ah an in la chhuak leh a ni. Senior ten an thawmhnaw bal zawng zawng an vawmkhawm a, an suk tir vek. Zan rehah an kaitho ziah a, englai pawhin kaihthawh theihin an awm tur a ni a, eng hunahpawh khawi hmunah pawh tirh theihin an awm reng tur a ni. Mutnaah leh chaw einaah smart dress hak vek tur a ni..etc..a tuar zo dawnin a hre lova, a chhungte hnenah la chhuak turin a ngen a, an la chhuak leh ta a ni. A rapthlak hle mai.

Sherlock Hd Ralte
He thil hi kan tawn ngei a ni a. Tawrh chhuah zawh loh hial ai mahin he thil hi a țha lova, tihreh a țha. Ka fapa hi entrance examah khan topper a ni a, phur takin kan in-admit a, hetiang teh hrepa zir ai chuan thil dang zir mai țhain kan hria a ka la chhuak ta a ni. Fb group lamah lamah ka post a,Comment tam tak zingah khan lo practised fo tawhtu pahnih khat chuan țawngkam chhe tak takin min chhu zui bawk. Ragging practise miah lo hian officer țha tak tak, ram leh khawtlang tana mi hlu an chhuak țeuh tawh. Hetiang practiced kher ngai nia hria te hi ragging tel lovin lo zi chhuak ta se, an nikhua lo dawn viau tihna a ni angem. Chhungkaw pangaia seilian tan chuan pute hnuaia nun chu an thiam em em tho a ni. He thil hi an zirtirtu ten discipline atana an ruahman ni se chu kan nau te hi chhel tura fuih tur a ni. Zirlai țheuh² senior nih vanga junior te tham lo taka lo en kher hi inhmuhsitna mi mawlte nunah chauh awm a ni. An lo practiced rei tawh avang hian dan ang hialah ngaiin thil țha emaw an ti ni mai awm a ni. Thil țha ni se, Supreme Court hian a khap hauh lovang. Junior laiin hrehawm an ti a, senior an lo ni a, tih ve loh awm tak an practice ve leh tho si a. Mo nih hreawm ti hle si, mahni mo te dinhmun hrethiam chuang lo ang lek an ni.

Aside | Posted on by | Leave a comment

DAN LO A BUNGRAW PHURH LUH DAHKHAWM NAN SAWRKAR KUDAM PATHUM HMAN A NI

Vairengte leh Bilkhawthlir inkar a dan loa sak kudam te chu nimin khan Zoengsanga, District Magistrate, Kolasib thupekin khar fel vek a ni a, Dan loa bungraw dahkhawm nan hian Supply kudam pathum a tel a, hei nen hian kudam 18 a awm a ni. Heng supply kudam te hi chu mimal-in an hman hawh a ni.

Vairengte leh Bilkhawthlir inkar a a dan loa sak kudam leh dan loa bungraw phurhluh dah nana hman te chu Zoengsanga, District Magistrate thupekin nimin khan khar fel vek a ni. Vairengte leh Bilkhawthlir inkar a kudam te hi ni 20.-7.2019 ( thawhlehni) khan District Magistrate hian a hmunah tlawhin a enfiah a, kudam sak phalna nei pakhatmah an awm loh avang leh dan loa phurhluh bungraw chhekkhawm nan hman a nih avangin a khar tir ta vek a ni.

Kudam te hi dan phal loh a Myanmar lam atang phurh luh Kuhva leh State dang atanga phalna nei loa lei chi (Urea) chhekkhawmna a ni a, Kuhva leh lei chi dah nan hian Supply kudam hman ni ve chu hmalak dan tur ngaihtuah leh a ni ang.
Kolasib District a Police hotute hnen atanga thu kan dawn danin thawhlehni khan kudam 6 khar a ni a, nimin khan kudam pakua chu khar leh a ni bawk. Kudam khar a nih avang hian Vairengte leh Bilkhawthlir inkar a lirthei lian ding te chu nimin khan an bo nghal duak a, District magistrate in a tlawh ni hian lirthei 260 a ding a, nimin khan lirthei lian 30 chiah a ding tawh a ni.Thudawn zel danin lirthei lian ding an tam avang hian Vairengte leh Bilkhawthlir inkarah hian traffic a jam nasa thei hle a, hunrei tak traffic jam avang hian lirthei atang khawm thin a ni. Kudam khar a nih avang hian nimin khan lirthei tangkhawm pawh an awm tawh loa, lirthei tangkhawm a awm tawh loh nan Vanlalfaka Ralte, SP Kolasib chuan Vairengte a Police Officer te hmalak zui zel dan tur a sawipui nghal a, hmalak dan tur an duang nghal bawk a ni.Supply kudam Kuhva leh lei chi phalna nei loa phurh luh dahkhawm nana hman a nih avang hian Supply Department chuan hma an lak dawn thu K. Zorammuana, Under Secretary, Department of Food, Civil Supplies & Consumer Affairs (FCS&CA) chuan kan palai a hrilh a, Kudam luahtute hian agreement nei thlap a luah an nih avangin sawrkar phal loh thil dahkhawm nan a hman chu a remchan loh thu a hrilh bawk a ni.

Aside | Posted on by | Leave a comment

ENG VANGIN NGE INDIA STOCK MARKET A TLAK HNIAM

Aizawl, August 17, 2019

Stock Market hi Mizote hian kan ngaihven leh ngaihsak zawng a ni lo hle a, TV news channel hrang hrangin an puang reng chung pawh hian mi tam zawk hian beng a rawngah kan khung lova, direct leh indirect emawa kan khawsak phung nasa taka nghawngtu anih loh vanga ûksàk lo kan ni awm e. A chhan pawh kan nitin ei leh bar leh sum chevel hi Sorkara innghat deuh tawp kan ni a, thil siam chhuahna lian tham, agriculture leh a kaih hnawih thilah India ram market thleng phak engmah kan neih loh vang a ni thui khawp ang. Hengte avang hian stock market hi hre viau lo pawh ni ila a awm lo chuang lo.

Amaherawhchu, lehkhathiam tam tak zingah pawh hriat thiam tumna nei lo leh ram pum sum leh pai dinhmuna nghawng a neih len theihzia te tal hrethiam tur tawk vel leh a țul dan anga stock market-a investment hlawk leh hlawk lo te hrethiam thei tur tawk vel tala inchhiar zau hi kan mamawh hle mai. Mutual Fund high risk, low risk hriat thiam te hi kan mamawh hlawm khawp mai.

INDIA STOCK MARKET A CRASH :
Nirmala Sitharaman-i, Union Finance Minister in Union budget 2019 – 20 July 5, 2019 Zirtawpni – a Parliament a a pharh ațang khan Stock Market benchmark Sensex leh Nifty a tla hniam nghal rawih rawih anih kha. Budget pharh atang khan Stock market hian hniam lam a pan zel a, July 9, 2019 budget pharh ațanga ni 4 chhung lek khan Equity investor te hausakna chu Rs. 5 lakh crore in a tla hniam hman niin Stock market analyst te chuan an ngai. Vawiin thlenga a tlak hniamna ni crore nuai engzat tak ni tawh ang maw?

Hei hi eng nge a chhan tih te, engtia tuam dam tur nge ni ang tih tihte hi Indian economy thlir phak chuan mut mawh hnar mawhah an nei ta. Tunlai hi kum nga kal ta chhunga economics țhanna hniam ber lai a ni.

ENG NGE A CHHAN NI TA ANG :
Union Budget 2019-20 hian Investor te tana țha tur lam aiin investment lam harsatna lam a pai pawn vang a ni. A chhan tawi thei ang bera sawi dawn chuan hetiang hi a ni :

  1. Public minimum share holding Sorkarin 20% ațanga 35% a tihpun vang a ni.
  2. Foreign Portfolio Investors (FPI) te hnena surcharge on income tax rate tihsan vang a ni.

  3. Punjab National Bank loan fraud in a nghawng.

  4. Fur ruah tui tlak har avangin Kharif crop thlai thar a tla hniam nasa a, farmer-ten consumer product tam tak an mamawhna a tlak hniam avangin Production company tam tak thil siam chhuah a nghawng.
    Maruti Car Company leh auto maker company zawng zawng small, medium, SUV siam chhuah a thla telin a hniam a, hnathawk tam tak an hna ațangin ban an ni.

  5. Budget thar hian consumption & economic related activities a țha lama nghawng thei tur provision a awm țha tawk lo.

” Investor tana țhatna tur Union Budget ah hian a tlem hle a, Long term capital gain tax (LTCG), Foreign Portfolio Investors (FPI) tana tax leh surcharge tih pun hian stocks market ah nghawng neiin a hniam nghal rawih rawih a nih hi. Buy back tax, public share holding kum rei vak lo ațanga tihsan chhoh zel hian chhe takin stock market chhe takin a nghawng “, AK Prabhakar, Head of Research, IDBI Capital Market chuan a sawi.

BANKING STOCK :
Banking stock pawhin tuarin Nifty Bank index pawh 2.5% laia tla hniamin kum khata a chhiat ber lai a ni a, Stock Market pumpui tlak hniamna chhan zingah hian Punjab National Bank loan fraud hmuh chhuah thar anih hian a chhe zawngin nghawng a nei.

BSE Bankex 2.5%-a a hniam anih lai hian a hniam zual Bank te chu SBI 4.14% leh Bank of Baroda 4.49% te niin, a tuar nasa te an ni.

PUNJAB NATIONAL LOAN FRAUD :
Bushan Power & Steel ten Rs. 3,800 crore fraud loan an lo lak thu Public sector lenders ten July 8, 2019-a an hmu chhuak a,( hei hi Nirav Modi & Mehul Choski ten fraud loan Rs. Rs 11,356.84 crore kum 2018 bul lama an lo lak hnua mi a ni.) He thu hi RBI ah an report a ni.

Punjab National Bank chuan Bushan Power & Steel Limited (BPSL) te hian Bank sum ziakna books of Account ti ching pen leh khawih danglamin chuta țanga an sum hmuh chu consortium leader te Bank dang ațanga sum lak luhna atan an hmang niin an sawi.

STEEL COMPANY :
Khawvela steel siamtu lian ber AccellorMittal in Essar Steel India lei a tumna thu buai July 2019 chhunga Bankruptcy Appeal Court in a hnawl sak chuan steel siam chhuah kawngah nasa takin a tițhuanawp bawk.

The National Company Law Appalate Tribunal thu tih tlukna hi Banking Stock in sum puk rulhna lamah thui tak a tawrh phah thei bawk.

AUTO SECTOR :
Motor car siamna auto sector lamah motor siam chhuahin stock market tla hniam hi nasa takin a tuar a, hemi bakah Budget tharah Electric vehicle ațanga GST 12% lak țhin kha 5% a tih hniam a ni ta hian auto sector a nghawng bawk.

Motor parts chi hrang hranga GST rate tihsan hian auto sale a nghawng bawk.

RBI REPORT :
Reserve Bank of India April – June 2019 Industrial Outlook Survey a report danin Manufacturing Company 1,231 zinga 31.6% te chauhin an thil siam chhuah a pun thu an sawi a, hei hi kum 10 chhunga a hniam ber lai a ni.

A MU ȚHUP MAI :
Project bul țan thar a awm lova, hmalak mek pawh thawh chhunzawm lohin a mu țhup a, Public Private Partnership mode a project kal lai 65 Ministry of Statistics & Programme Implementation a endik zinga 37 te chu tih muan leh tih khawtlai a ni tih May 1, 2019 khan report ah tar lan a ni.

June 2019 Quarter hi India rama Project thar tlak hniam ber lai a ni. Rs. 71,300 crore chauh project thar a nih laiin nikum 2018-19 chhung khan Quarter tin Rs. 2.7 crore ațanga chhut chuan tla hniam tak a ni.

New capacity expansion project atan pawh budget hi a tla hniam hle a, kum 2014-15 ah khan Rs. 21 lakh crore anih laiin 2018-19 budget ah khan Rs. 10.7 lakh crore chauh dah a ni tih CMIE CapEx data base chuan a tar lang.

Factory output țhanna pawh June thla tawp khan 2% chauh a ni a, nikum 2018 June thla khan 7% a ni thung.
RBI Industrial Outlook Survey in a tar lan danin July – September 2019 Quarter ah pawh 57.3% Manufacturing Unit ten an thil siam chhuah a țhan an beisei lo a, hei hi 2000 – 01 hnua a chhiat ber țum a ni.

Electrical goods siamtu Havells pawhin an thil siam țhanna a muan thu sawiin, hei hi Construction sector lam țhan muanin a nghawng niin Anil Rai Gupta, CMD Havells India chuan a sawi.

PRIME MINISTER LEH FINANCE MINISTER IN SAWI DUN :
August 15, 2019 Independence Day thu chah a sawi hnu khan Prime Minister Narendra Modi leh Finance Minister Nirmala Sitharaman leh Finance Ministry a mi pawimawh ten India economics dinhmun khun khan takin an thlir hovin tuna economics hnung tawlh zawnga tla hniam ( down turn) hi eng tianga hma chhawn tur nge, engtin nge hma lam zawnga chak zawka țhang turin țan lak ngai ang tih te an sawiho.

Hemi hma hian Finance Minister hian Banking, FMCG, auto, Real Estate, Steel sector lam hotute nen thil an lo sawiho tawh bawk.

$ 5 TRILLION ECONOMY :
Prime Minister Narendra Modi chuan kum 2024 ah India Economy hi $ 5 trillion a tum ruh hle a, hei hi tunlaia a hnung tawlh zawnga kir hi a rem chang lo.

Engpawhnise, Finance Ministry leh Reseve Bank of India hian economic slow down hi a hmu chiang em em a, hemi veng tur hian țan a lain RBI chuan lending rate pawh a tihniam a. Hemi ni ngawt lo, damdawi dang Finance Ministry leh RBI hian a hmuh chhuah ngei pawh India ram mipuite hian an beisei.

GST LAM VE THUNG :
Tun thla kal ta July chhunga GST ațanga sum hmuh dan hetiang hi a ni.

GST Rs. 1,02,083 crore
CGST 17,912 crore
SGST 25,008 crore
IGST 50,612 crore (including Rs. 24,612 crore import)
cess 8,551 crore (Rs 798 crore import)

( pib.gov.in)

KHÂUPUI CHAH BUK THEI :
India Sorkarin GST ațanga sum a khawn khawm hi a nghet tawk lo hle a, crore nuai khat kai loh țum a awm fova, GST nilo lam ațanga revenue a hmuh chhuahna lamah tun dinhmunah hnung tawlh zawnga a kir tlat avangin thawk leh khata chhe deuh rup thei, Mizo upain khãupui hnam chat an sawi ang maia chah buk hi a hlat lo thei.

MIZORAM A NGHAWNG THEI EM? :
He zawhna hi a pawimawh khawp mai. A chhanna chu nghawng thei e, a nghawng nat ber tur kan ni. A chhan chu :

Kan state Budget pumpui deuh thaw hi Central sum anih vang a ni. Central ațangin Quarterly Grant kan dawng țhin a, chumi dawng tur pawh chuan RBI lam hi an teh fetin nitin state sum dinhmun en thei reng an nih bawk si avang hian an ti mai mai lo. Kan state buhzem hi kual lian hle mah ila, chu buhzemah chuan keimahni lam hian chhun luh ve tur kan chhun țhat si loh chuan Central lam chhun luh zur zur tur hi a ni ringawt lo.

Quarterly grants Central Sorkarin an rawn chhun luh inkarah hian kan pumpui a ruak hman zel a, kan kulcho hman titih ziah a ni lo maw?

GST hman anih ațang hian India ram State Sorkar zawng zawngin chhiah lak theihna a nei tlem vek. Mizoram Budget 2019-20 kan en chuan State own revenue nasa taka tihpun a ni a, mahse heng hi khawi ațanga hmuh tum nge a nih tih lan (provision) a ni lo thung. Buh phur za thar tumin paiper hmun chauh thlawhhma nei nen hian a danglam thui awm lo e. Kan State revenue hnar țha ber pawl ZU chhiah lah a hnar kan khuap chat a, dai tamah chhiah lak lohin a liam zur zur tho si.

State Sorkarin nghet taka chhiah a lak theihna lam kawng buatsaih lam lah hi kan hawi hlei thei lova, Bingtaii policy a Central ațanga a chi tura kan dawn thlama kãn zawh zel lam bak hi kan la hawi hlei thei lova, kan budget hian ruai țheh type budget, sem ral lam hawi lova, infrastructure lam hawi se tih hi mi thil chik leh țhangthar lehkhathiamte chuan an nghak hlel hle a ni.

Source :

The Economics Times
The Times of India
Indian Express
pib.gov.in


Huna Kawlvawm

Aside | Posted on by | Leave a comment

Mirethei khualbuk sa

Pu C. Liankunga, Kolasib Sub. Hqrs YMA President & Family ten Electric veng an inbul a Damdawi in a awm thlenna neilote tan a Khualbuk an sak hlim thla thenkhat..Pu C Liankunga te hian chawlhbuk man loa thlenna tur hi anmahni sum seng liau liau a an sak a ni.Khum pali a awm.Fridge a awm.Eirawngbawlhna a awm.Inthiarna a awm.Thut hahchawlhna tur a awm bawk.Buhfai dah a ni a.Tui herh haw theih a ni bawk.-Copy paste

Aside | Posted on by | Leave a comment

LEM ZIAK MAN TO BER salvador mundi

~Atea Thihlum

Lem ziak pakhat ‘Salvator Mundi’ chu, Italian Renaissance artist ‘Leonardo da Vincy’ an kum 1490-1500 inkara a ziah a ni a, khawvela lem ziak to ber a ni. He lem ziah ‘Original’ chu hun rei tak chin hriatloh a bo tawh ni a rin chu, London a ‘National Gallery’ ah kum 2011-12 khan ‘Major Leonardo Exhibition’ ah hmuh chhuah leh dah ṭhat a ni.

He lem ziak hi mithiam tam takin, Leonardo a kutchhuak diktak niin an ngai a, mahse he ngaihdan hi thiamna bik nei (specialist) ṭhenkhat chuan, an hnial kalh ve thung. Heng ho ngaihdan chuan, he lem ziak bul ṭan na ṭhenkhat ah chiah hian Leonardo a hi a tel ve niin an ngai. Salvator Mundi hi thiamna leh finna kawnga mihring hnam harhchhuah leh hun (renaissance) hunlai thawmhnaw inbel chunga ‘ISUA’ lem ziah a ni.

Tah hian a kut dinglam in ‘cross’ chhinchhiahna a siam a, veilam in lungfím langtlang thei êng chhun kawi theilo a keng bawk. Hei hian Vanram lam thil a entir a ni. Salvator Mundi hi Leonardo a kutchhuak hriat lar 20 ai a tlem zinga ṭangin, mimal thil lakkhawm zinga tel awmchhun a ni nghe nghe.15Nov.2017 khan New York a thil lilâm na hmun ‘Christie’s chuan, Prince Badr bin Abdullah hnenah he lem ziak hi $450.3million teh meuhin a hralh a.

Hei hian vantlang lilâm na hmuna, lem ziak hralh tawha zawnga to ber (Most expensive painting ever sold at public auction) record a siam !! He lem ziak leitu Prince Badr hi Abu Dhabi a ‘Department of Culture and Tourism’ tan a lei angin lang mahse, a lamṭang hnai tak Saudi Arabian Crown Prince ‘Mohammed bin Salman’ tana lilâm chhang hi a nih hmel zawk. Kum 2017 tawp lam khan report na in a tarlan danin, he lem ziak hi ‘Louvre Abu Dhabi’ ah tarchhuah a dah a ni a,

Mahse Sept.2018 ah chuan, a chhan sawifiah hleih theih lovin helai a milem tar chu sût leh daih a ni. mak angreng takin he lem ziak awmna pawh hi hriat a nih loh thu dawn a ni bawk. Mahse June.2019 khan report na in a sawi danin, he lem ziak hi Mohammed bin Salman a nawmsip bawlna lawng (luxury yacht) ah, ‘Al-Ula governorate’ a Cultural Centre peihfel a nih hma chu kawl ṭhat a ni ang.

Aside | Posted on by | Leave a comment