Mizoram University Convocation vawi 12-naah zirlai hlawhtling 6,970 hnenah Degree pe

Nimin Nov 21 Mizoram University (MZU) Convocation vawi 12-naahVice Chancellor Prof. KRS Sambasiva Rao-a’n zirlai hlawhtling 6,970 hnenah Degree a pe.

Zirlai hlawhtling zinga 1,614 te Convocation-ah hian an tel thei a. Degree nei thar zingah hian Gold Medal 88 leh Doctor of Philosophy 58 an tel a ni.

MZU Vice Chancellor thar Prof. KRS Sambasiva Rao-a hian kawng hrang hranga MZU hlawhtlinnate sawi langin chak zawka hma lak a nih tur thu leh MZU chuan zirna huang zingaa thlur deuh bik tur te a sawi a. Mizoram sawrkar leh MZU thawhhonna ṭha tak chu chhunzawm zel a ni ang a, Researchngaih pawimawh a ni ang a, company lian deuh te pawh thawhpui tum a ni ang a, MZU chu India hmarchhak bakah India ram chhunga zirna in ṭha ber zingah hlankai a nih theih nan ṭan lak a ni zel dawn, a ti.

MZU 12th Convocation-a khuallian Chief Minister Pu Lal Thanhawla pawhin thu sawiin, kum 17 chhung lekin Mizoram University chu University puitling, India ram zirna in ṭha fal zinga mi – Campus chhunga nizung chakna hmanga kawlphetha hman tur siam chhuah kawngah te, Laboratory changkang bik neih kawngah te leh Information & Communication Technology hmanga Classroom siam phuisui kawngah te phei chuan hmahruaitu zinga mi a ni, a ti a. Research huanga MZU hlawhtlinna tam tak zingah Physicshnuaia EPEN Nuclear Code leh Biotechnology hnuaia Cancer Research-a hlawhtlinna te chu inchhuanna tham a ni, a ti bawk.

Mizoram University hi kum 2000 khan Act of Parliament hmanga din a ni a; tunah hian National assessment and Accreditation Council (NAAC)-in Grade ‘A’-ah a dah mek a. Tunhnaiah khan National Institutional Ranking Framework (NIRF) chuan India rama zirna in 3,000 chuang a thlan chhuah zingah zirna in ṭha 94-naah MZU hi a dah a; kumina University 700-a thlan chhuah zingah 58-na a ni mek bawk a ni.

MZU Convocation vawi 12-na hi MZU Registrar Pu C. Zothankhuma’n a hawng a. Chief Minister Pu Lal Thanhawla’n Ph.D hmu tharte Certificate a hlan a, M. Phil Degree nei thar te hnenah Vice Chancellor Prof. KRS Sambasiva Rao-a’n Certificate a hlan a, Gold Medal dawngtute chu Prof. Lianzela’n Medal a sem a, Prof J.K. Patnaik-a’n Book Prize dawngtute hnenah lawmman a hlan a ni.

Advertisements
Posted in Zoram History | Tagged | Leave a comment

MISUAL TURU RICHARD KUKLINSKI-A ZINKAWNG CHU (THE ICE MAN) by Andy K Zarzoliana

Khawnge tun țum chu khawvel misual hmingthang leh tualthah thubuaia sulhnu ngah zet, a mihring thahte ruang chan sawma vur-bawma dahkhawm thintu, “The Ice Man” tia a hming an phuah tak, Richard Kuklinski-a hringnun zinkawng hi han chhui thuak thuak dawn teh ang.

Mi hlauhawm leh pawikhawihna lian thama inhnamhnawihte hmun ngainat zingah New Jersey khawpui hi a mikhual lo hle awm e. He khawpui hian mi ropui leh mi fel hmingthang tam tak a awp-keu rualin, misual turu leh ram khat mi hlauhawm pawh a hringchhuak ve tho mai. New Jersey-ah hian a ruka pawl indin (free-mason) leh mahni duh dana hna kalpui theihna (free hand) an tih ang chi hi a hluar hle mai a, hei hian misualte a tih ngampat phah bakah, tualchhung buaina leh inphek sualna (free fight) a thlentir fo țhin a. Vawiin thleng hian New Jersey khawpuiah misual pawl lian inzawmkhawm (Mafia) ho sulhnu pawr tam tak hmuh tur a awm a ni.

April 11, 1935 khan  Jersey City, New Jersey khawpuiah khawvel mihring piang tawh zinga mi nunrawng leh tualthah meuh pawh rannung tihhlum tluk leka ngaitu mi pakhat a lo piang a, a hming chu Richard Leonard Kuklinski a ni. Amah hi Polish leh Irish-American thisen kai niin, chhungkaw awm thei pangngai tak atanga rawn chawr chhuak a ni nghe nghe a. Mahse, naupang tê a nih lai atangin vanduaina chuan a chungah thla zarin, a pa zu ngawlvei leh pawisak nei lo chuan a tiduhdahin a sawp rethei thin hle mai a; zu ngawl vei-pa Punch bag a ni pawh ti ila kan sawi sual awm lo ve. A hringnun kaihruaitu tur ber a nu lah chuan a thlavang hauhsak tak aruangin țawngkam dengkhawng leh ânchhe tinreng lawhtu zawkah a țang ta hlauh zawk a, chu chuan Kuklinski-a hringnunah nasa takin nghawng țhalo a neih phah ta a ni.

Kuklinski hi naupang ngawichawi leh inkiltawih tak angin lang mah se, lang lo lama a nungchang erawh a ni telin a rawn danglam chho va, a rualpui naupang dangte ang lo takin rannung sawisak leh  tihhlum mai mai te a ching hle mai a. Parva a nungchunga meia han rawhhlum ngat te chu a hlimpuiin a nuam tih zawng tak a rawn ni chho va. Kum 10-mi a rawn nih meuh chuan, amah hrechiangtute chuan “A mitmengah thisena tuihalna a lang e” an ti hial a ni.

Chik mite sawi danin, khawvel hriat tham misual hmingthang kan tih te hi an rawn chawrchhuahna inchhungkhur chiangkuan loh vang a ni duh chawk mai a, misual hmingthang 75 % vel zet hi chu hetiang broken family atanga rawn chawrchhuak niin an sawi țhin a, a dik hmel fû mai!!!

Kuklinski pawh hi a rawn chawrchhuahna inchhungkhur a fuh lo hrim hrim mai bawk a, a pa lah rui reng mai, rui reng mai!!! a nu lah nu inthlahdah leh tal ho theitawp ang chi hi a ni ve a. Amah Kuklinski leh a u Florian te chuan a pa kutthlak an tuar nitin a. Florian-a phei chu 1940 kum tawp lam khan a pa kutthlakna chu tuarchhuak zo lovin a thih phah ta nghe nghe a; mahse, a nu leh pate chuan Florian-a thihchhan chu police hmaah an thup tlat mai a, thudik sawi a hnekin tihpalh thil thua in chung atanga tlahlum angin an sawi ta hmiah mai a ni.

Kuklinski-a chuan rawlthar nun a rawn zawh chho țan a, zirtirna tha dawng lova seilian ngang a nih angin a zawlpui tualchhung misual leh mi nung herh-ho chu a țhian tha ber an rawn ni nghal pang mai a. Pawi tenau atanga pawi lian tham rawn khawih chho zelin, kum 14 a nih meuh chuan, a sihhawn nan tual a that fel der tawh a ni.

Tual a thah lai hian a la tuai viau mai a, tin, ‘The project boys’ gang a zawm lai a ni a. The project boy’s gang hi gang lian tak ni lem lo mah se, tualchhungah erawh an che rawva hle thung a. An hotu Charley Lane chu serial killer un tak leh tawn-hriat ngah tawk tak a ni a, a kut a ram hle nghe nghe a ni. Mahse, Charley Lane chuan Kuklinski chu a hmusitin a tiduhdah thin hle a. Chu chu Kuklinski chuan a pai dam thei ngang lo va, a sumhmuhna leh a Boss mah ni se, thahna hun remchang a mitsir ru ran mai a ni.

A tum lawk ang ngeiin Kuklinski-a tan hun a rawn inher ve ta a. Charley Lane chu thah ngei tumin a lo lambun a, hnunglam atangin a inrinloh lai takin a vaw thlu tawp a, chutah a talhtum ken chuan Charley Lane-a tukkhum chu a han ruan nawn leh chawrh chawrh a, a thi chiang kher mai. Mite’n Charley-a ruang a ni tih an hriat theih loh nan a hâ zawng zawng a vuakthlawnsak a, a kutzungțang a sahthlaksak deuh vek bawk a. Zanlai mi mut-reh hnuah a mi thah ruang chu leilawn hnuaiah a vawk thi paih ta tawp mai a ni. Hei hi, 1949 kuma thil thleng niin, Kuklinski-a tual thah hmasak berna chu a ni.

Amah tiduhdahtu a Boss chu that tawh mah se, a lawm a la kim thei chuang lo a ni chek ang chu, ‘The Project boy’s’ gang member zinga paruk, a Boss thupeka amah kutthlak țhintute chu nâ lua awm lovin a sawp leh ngheng bawk a, thi lova ruangin a hnuchhiah hlawm a ni ber mai. Kuklinski-a hian, “Giving is better than receiving” a ti mai thin a. A kailek emaw ni, “Kutthlak hmasatu zawk nih chu a lo dawngsawngtu nih aiin a ropui fê zawk,” tiin a chetdan rawva tak sawi mam nan he thu hi a hmang fo thin.

Tualchhung pawikhawihna leh thubuai tam takah a inhnamhnawih tawh avangin New Jersey-ah chuan a chhe zawngin hming a chher lar tawh hle a. Kum 1950 a lo herchhuah meuh chuan Kuklinski chu pawisak nei lo mi hlauhawm tiin a hming an hre lar vet vet tawh kher mai. Amah lah a pa lianin Ft 6 leh Inch 5 laia sang a lo ni vei bawk nen, a pa len tluk zeta thahrui ngah a nih avangin mi dawizep pangngai leh nunau awmnem tan phei chuan han hlauh loh chi ziazang pawh a ni lo ve.

Mahse, Kuklinski hi thingtlang ar phil hmang ang maia han che phawr phawr leh phur hluta mi khawih bawrh bawrh ang chi a lo tawp mai a. A chetdan a fimkhurin, Sapin gentleman an tih ang deuha pa nelawm leh che dam dup mai chi hi a ni a. A thilsual ti lai hmu fuh chat lo tan phei chuan han rinhlelh barh harsa khawpa mi hawihhawm a ni a. A duhnaah chuan a zaidamin a dawhthei viau bawk a, chu chu a hlauhawmna leh an zuam sual fona chu a ni a. Tin, a mize diktak phena a hmaikawr hian polis-te mit a tidel hneh hle bawk.

Kuklinski-a chet dan chuan misual pawl Crime family lian ho beng a thleng thuai a. A duhnaa mi viak țha leh che smart zeih thin a nih avangin Mafia Pawl țhenkhat chuan an hmelmate dahṭhatsaktu atan an it ru viau a. Nakinah chuan sum thahnem taka delhkilhin Decavalcante crime family ho chuan an hmelmate beitu atan an ruai ta nge nge a. Anni hnuaia a thawh atang hian Kuklinski hian sum tam tak a rut nghal a. A hnathawh ber chu Decavalcante-ho hmelma apiang chu ngawi renga dah that a ni. He mite hnuaiah hian hriamhrei chelek pawh a zir nasa hle a, Crime family ho zingah a kal mar leh a thawh hlawk ber pawl a rawn ni chho ta hial a ni.

Mafia pawl lian zawk ten Kuklinski-a chu an pawl tana thawk turin sum tam tak nen an rawn rim a, inremsiamna te nei chho zelin, rei lovah khawvela hna hautak ber mai “contract killer” an tih mai, tu emaw tana mi thah hna chu Kuklinski-a chuan tih tak meuhvin a thawk ta a, sum pawh a rut hnem ngiang mai le. Mi fimkhur thiam leh sulhnu chhui har tak a nih avangin tualthah lamah chuan a chem pawh a kal nangiang mai!!!

Hun leh ni a liam zel a, Kuklinski pawh chuan a chetna lamtual a zauh belh zel bawk a. Kum 1954s chho velah phei chuan New York khawpui chhunga tualthahna hmun apiangah Kuklinski-a hming chuan lam rik a hlawh zing malh malh ta ngei mai. Amah la hmu ngai lo pawhin a hming emaw, a chet duhdan buru tak emaw chu an hmelhriat deuh fur hlawm a. A nghâwng lenna ram, New York khawpui chhung, Manhattan bula Hell’s Kitchen kawtthler velah te chuan a mi thah tur zawng reng rengin a vawk lal len vel thin a, thawkkhat lai phei chuan, Hell’s Kitchen chu amah vangin kawtthler ralmuang lo berah a chang hman hial a ni.

Kuklinski-a hian, amah ruaitute thupek bawhzuiin zan-tairek tawh lama hmeichhe nikhualo tla fal deuh leh pawn lama inzuar (out doors service) țhenkhat a hmuh te chu dim baksak lova man-in, hmun fianrial lamah a hnuk liam chawn chawn thin a. Țhenkhat silaiin a kaphlum a, țhenkhat chu chemin a vihhlum bawk a, țhenkhat erawh talhtuma a vuakhlum bakah, a kutzâl ngeia a rehhlum tak pawh chhiar tham fê an awm a ni. Mi tam tak thatin, nâ tak taka chet chang pawh ngah hle mahse, sulhnu pawr chul mam lamah a fingin a viak a tha fû thung a, hei tak hi Police-tena an man hleih theihlohna pakhat a ni. Contract Killer țhenkhat angin a sum hmuh nan ringawt a che ve pur pur ngai lo va, chihne beram vun sin an sawi ang maia nunnem leh nelawm hmel tak pu siin lang lo lamah a che hraw em em ringawt mai a ni.

A chet dan hi engemaw kawng zawng tak chuan a fing viau mai a. Mi a thah reng rengin boruak awmdan a thlir hmasa zet țhin a. A mi thah ruang țhenkhat chu ualau takin a hnuchhiah mai țhin a, fimkhur taka han thuhruk hnihne a nei ve ngai meuh lo va. Hei vang tak hian hnuchhui-thiam ho chuan a pawi khawihna chhui kanin misual rual an hup phah fo bawk. A zia a thup thiam em avang hian Police lam chuan han rinhleh mai ngaihna an hre reng reng lo va, ama thah ngei mi ruang an chhar chang pawhin misual tute emaw pawisa duh vanga an thahah an ngai mai thin a, contract killer sulhnu ang zawngin an ngaihtuah pha ngai reng reng lo a ni.

Mahse Contract killer nafam chuan loh theih lova mi ruang kawl chang a nei lo thei lo va. A chang chuan a mi thah ruang tih riral nan Acid-a a chiah hnuah a rim thup bo nan bawlhhlawh leh tyre nen a hal ral mai thin a. Țhenkhat erawh savun khawrpum tuikuang lian tak chhungah sulphuric acid nen chiahzawpin an tisa a chiah riral tak mai mai pawh an awm nual a. Tin, an taksa a chan darh hnuah a phum bo leh ramhnuaia a paih bo tak pawh an awm nual mai.

Kuklinski hi Mafia pawl hmingthang tak Gambino Crime Family te chuan an tana thawk turin sumfai tam tham tak nen an hel a. Mahse hetih lai hian Kuklinski chuan DeMeo Crew Gang-ho pawisa bain a țhu chum hmuk a. DeMeo Gang hotu leh a meizang hlaptu ber Roy DeMeo chuan Kuklinski chu an pawisa pe thuai turin a rawn vau chhen mai bawk a. Roy DeMeo pawh hi mi tawrawt leh vawi tam tak tualthah-thubuaia lo inhnamhnawih tawh, kum 1973 atanga 1983 inkara FBI hovin mi 70 chuang zet tualthihna a an mi rinhleh a ni a, pawisak a nei lo fû mai.

Ani hian an pawl ho pawisa bâ țhinkual pahin Kuklinski chu zilhna rum deuh tak pek tumin a va tlawh a. Mahse Kuklinski-a hnen ava thlen chuan “nangniho angin dam hi ka thlahlel ve tehchiam lo” tia ui bauh tluk pawha lo ngai ikhaw lovin Kuklinski chuan a chalah pistol-in a lo chuktuah ta rap mai a, leiba chungchang reng an sawi nawn ta lo. Mahse, Kuklinski hian a leibâ a tlak hnuah suma inremsiamin Roy DeMeo leh Gambino Family tan mi rawk, tualthah leh an hmelmate dahthain an tan Contract killer hna a thawk leh ta a ni.

Kuklnski hian Gambino leh DeMeo Gang ho mit a tlung hle a, a chetdan rawng tak avang chuan DeMeo nen an inthian tha hle a ni. Kuklinski hian kum 30 chhungin kawng chi hrang hrangin mi a that a, chemin a vit a, a kap hlum bawk a. A rekhlum a, hriamhrei leh a kianga hmanrua a hmuh remchan apiang chelekin tual a that bawk a ni. Tin, tualthahna hmanrua atana a duan bik hmanraw chi hrang hrang pawh a kawl nual. Tualthahhmang serial killer dangte ang bawkin meia halhlum te, puakthei thil Bomb (explosive) te, thi lawk lova hrehawm taka siam te leh tûr (poison) hmanga hraihlum te a nei a. Tin, kut lawnga mi thah pawh a nei nual a ni.

Kum 1986 a lo herchhuak a. Contract killer Kuklinski hming chu thuneitute wanted list-ah a mikhual lo ta hle mai. A chetdan fimkhurin a hnu han rulchuk thiam eltiang mahse, hnuchhui thiam-ho tan chuan thil harsa lua a ni ta lo. Pasalthain a sa pel lai chik taka a veh reng ang hian Police leh FBI lam chuan an tinzawn reng a. December ni 17, 1986 a lo herchhuak a. Kuklinski chuan a tihdan pangngaiin a hna danglam tak thawh leh tumin a inbuatsaih leh mek a. Chutia mi that tura a inruahman leh mek lai chuan a rin aia rangin Police an rawn dawk a, misual buru Kuklunski chu mi that leh ngai tawh lo turin man a ni ta a ni.

Kum 30 chhung zet kawng chi hrang hranga tualthah-hna (contract killer) a thawhnaah hian, a hna thawh a hun chuan chhun leh zan a thliar hrang ve lem lo va, khawlum leh khawvawtin a tibuai ngai hek lo va, a hun a thlen chuan a tihtur chu fimkhur takin a thawk miah miah mai thin a ni. Kuklinski hian misual lar țhenkhatte ang bawkin a vannei reiin mi a that hnem hman ngiang mai a, amah ngei pawhin a mi thah zat chiah hi a hre chiang thei bik lova, a lo berah mi 200 chuang thata ngaih a ni.

Man a nih hnu hian dan dinglai tlawhchhanin mi panga thahna thubuai, hmanraw phalloh paruk, mi suam, attempted murder leh attempted robbery case-a tan tir a ni a. Khawvel pawikhawihtu lian thamte ang bawkin a tan hun chhung pawh a rei ngat ngat kher mai. Damchhung vawihnih lungin tang tura tih a ni țiap mai a, kum 110 a tlin hma loh chhuah lai lawk (parole) phalsak a ni lo bawk. Tin, 1980 kuma NYPD detective Peter Calabro-a thihna-ah, 2003 kum khan thiamloh chantir a ni leh bawk a, he thil avang hian a tan hun kum 30 an belh leh bawk a ni.

Heti khawpa mihring that hnem si hi engvanga hrechhuak mai lo nge an nih tih hi mite mak tih a tling a, sorkar lam pawn dem a hlawh viau a ni. An sawidan chuan, Kuklinski hian a zia a thup thiam em vangin a tualthah thu leh contract killer a nih thu hi a fanute pahnih leh a nupui ngei pawhin an hre ngai reng reng lo va, han rinhlelh chu sawi loh, sumdawnna lama pa hlawhtling takah an ngai mawl ve tawp mai a ni.

Hetianga misual hmingthangte hi an pawikhawih langsar lai hmer telin hming lem phuahsak an ni chawk thin a. Kuklinski pawh hi “The Ice Man” killer tia hriat lar a ni a. Hetiang hming cool raih mai a lo put takna chhan nia an sawi chu, ami thah ruang țhenkhat ti-riral mai lova vur bawm leh Freezer-a a dah that thin vang a ni ber a. Sawi tawh angin he contract killer tawrawt zet hian, a mi thah ruang țhenkhat chu Freezer-ah rei tak chhung a dah thin a ni. Hei vang tak hian mi tam tak chuan a hming dik tak pawh hre lem lovin ‘Ice-man’ tiin an hriat lar phah ta zek a ni.

Man a nih hnua a tualthah dan vel a inpuanna (confession) ngat phei chu a rapthlak hial zawk a, a ngaithlatute chu awmhmunah an lo chek tlawk tlawk ringawt mai a ni. Hetia a mi thahte ruang chansawma vur-bawm vela dah that chakna rilru a lo neihna  chhan bul ber chu, amah ang bawka tualthah-hmang (contract killer)  Robert Pronge-a thil tihdan a zir chhawn niin a insawi ani.

He killer Kuklinski-a huatawmna em em pakhat chu, a thil tih reng rengah inchhirna nei hmel a pu ngai lo va; inchhir a hnekin intihtheih nan tak a hmang emaw tih mai tur a ni a, chu tak chu mite rilru tinâzualtu pawh a ni. Amaherawhchu, a mi thahte zinga mi pakhat chetdan chuan amahah inthiamlohna a neihtir ve hle niin a sawi a. Amah, Kuklinski ngei chuan tihian a sawi a, “Mi pakhat chuan kut ka thlak hmain a damkhawchhuahna’n țhingțhiin ngaihdam min dil chiam a, a țap hawm hawm bawk a, a pathian hnenah a tawngtai bawk a. Keipawh chuan a thi tawh dawn thova tiin darkar chanve zet chu, a Pathian hnenah tawngtaia ngaihdam dil turin hun ka pe ve a, a chhan chu a biak a Pathian khan rawn chhan chhuak se ka tih vang a ni a. Mahse Pathian chu a reh vung vung mai si a, a rawn inlan hek lo va. A harsatna atangin a rawn chhanchhuak chuang bawk si lo va, chuvang chuan ka tihlum ta mai a; mahse, ka inthlahrung hnuhnawh ngawt mai. Kha thil kha, ti lo tawp tur ka nia sin,” tiin a sawi ve mauh mai.

Kuklinski-a hi khawvel misual tawrawt zingah chuan a rawva ber pawl a ni awm e. A chanchin hi, “The Ice-man” tiin Film-a siam a ni nghe nghe a,  Michael Shannon (actor) chu Kuklinski a lemah a chang a, a hmuhnawm phian mai thei a ni.

Amah, contract killer Kuklinski erawh 2006, March 5, zing dar 1:15 ah he khawvel hi a lo chhuahsan ta a ni.

Posted in Thu Ngaihnawm, True Story | Tagged , | Leave a comment

RANGKACHAK TAWLH RUK THUBUAI MIZORAM POLICE-IN CHHUI ZO

Zampuimanga thlan­lung bula rangkachak rukbo thubuai chhui tura din Special Investigation Team (SIT) te chuan hnu chhui hna an zo tawh.

Ni 14.12.2015 khan Zam­puimanga thlanlung bulah hian rangkachak tlawn 52 leh Rs. 75,000 rukbo a ni a, FIR thehluh a nih angin, hemi chhui zui tur hian Mizoram sorkar chuan SITa din a ni. SIT hian hian hun engemawchen hnu chhui hna an thawh hnuin an zo tawh a ni.

SIT hian report hmasa ber chu ni 23.5.2016 khan sorkarah anthehlut a, tunah chuan hnu chhui hna hi zo tawhin, Ministry of Defence aṭangin prosecution sanction an nghak mek a ni.

He thubuaiah hian SIT chuan Assam Rifles mi leh sa 10 leh civil mi pali an man a, an vai hian bail-a chhuah vek an ni.

Hetihlai Mizoram sorkar chuan he thubuai chhui hna hi Central Bureau of Investigation (CBI) kutah a hlan a, he thuziah lai thleng hian CBI hian an chhui leh chhui loh hriat a ni lo.

Chief Minister chuan, CBI kuta thubuai an hlan avangin Mizoram Police-te an ring tâwk lo tihna a ni lo tih a sawi a, “Mizoram Police-te’n tih theih loh chin tam tak an nei a, hmanrua lamah pawh buaina an nei thei a ni,” a ti a; Mizoram Police-te chuan state pawnah chêt theih lohna chinte an neih thu a sawi.

IGP Zorammawia chuan, rangkachak tawlhrûk thubuai chu CBI kuta hlan ni mah se, Mizoram Police-te’n an hnu chhui hna an chawlhsan dawn tihna a ni lo tih Vanglaini a lo hrilh tawh a, “Thubuai chungchang hi chhui chhuah ngei kan duh avangin CBI chhuitir turin Mizoram sorkarah rawtna kan thlen,” a ti.

Hetihlai hian SIT-te hian an thubuai chhuina report (chargesheet) Court-ah an la thehlut lo a, Mi­nistry of Defence aṭanga prosecution an hmuh hunah an mi duhzawngte thuzawhfiah atan an manin, thu an zawtfiah ang a, chumi hnuchuan chargesheet hi an thehlut thei dawn nia thudawn a ni.

Source : Vanglaini

Posted in Zoram Crimes and Accidents, Zoram History | Tagged , | Leave a comment

TAWNGTAINA CHHANNA- KRISMAS THIL PEK

             Kum 1881 urlawk zan a ni a, kum 15 mi ka ni ve tawh a, ka awh em em mai, Krismas nia neih ka duh ngawih ngawih rifle (silai) ka nei thei lo tur chuan ka rilru a kapin ka tuarah vanpui a chim hi a ni ngawt e. Ka pa chuan chumi zana hun awl kan neiha Bible chhiarna hun thawl tha kan neih theih a duh avangin chumi tlai chuan ni dang zawng aiin in chhung sekrek leh pawipang ilo kan khawih hmain kan awl hma niin ka hria.

             Zanriah ei khamah chuan ka pheikhawk bun lai chu phelhin meilum ai tur chuan thuk lam chu ka pan a, ka pa-in Bible chhiar tur a lo ken hun chu ka nghak ran a, mahni inkhawngaihna ringawt chuan ka khat a; a dik a dik chuan Bible chhiar chu ka phur hlawl lo a ni. Ka pa chuan Bible chhiar tur chu a lo keng hauh lo mai; inthuam lumin pawnah a va chhuak ta daih mai a. Kan tih tur zawng zawng kan ti zo tawh si a, pawna a va chhuah chhan chu ka hrethiam lo a ni. Mahni inkhawngaihna ringawta ka khah avang chuan eng hehu-ah ka ngai hran lo a. Ka pa chu a lo let leh thuai a, pawn boruak chu a vawt tawh tak zet a ni tih hriat zet hian a khabe hmulah chuan vur a kai deuh luai a. Ka pa chuan, “Matt, ti teh, inthuam lum la, pawnah i va chhuak dun teh ang,” a ti a. Ka lungawi lo kher mai, ka silai awh em em ka nei thei lo chu thuhran, pawn khaw vawt hnuaia a chhan leh vang awm lova va chhuah ngawt mai chu! Kan tih tur zawng zawng kan ti felin kan ti zo tawh a, zanin ang khaw vawt hnuaiah ngat phei hi chuan pawnah tih tur a awmin ka hre tawh lo a ni. Mahse, ka pa chu a tih tawhah chuan hnial mi a ni lo tih ka hria a, a dawhthei lo bawk nen phur lo zet chuan ka pheikhawk chu ka bun a, kawr lum hain lukhum khumin ka kutkawr lum chu ka bun a, pawna chhuak tura kawngkapui ka hawn dawn lai tak chuan ka nu lah chuan min lo nuih sak lehnghal a.

             Pawna ka va chhuah chuan kan tih tur chu sawi lawk ngai lovin hna awlsam leh hun rei lo te chhunga tih zawh nghal mai chi a ni lo tih ka hre nghal a. Sakawr leh a hnuh tawlh chi tawlailir kan hman tawh hi chuan hna awl-ai tak kan thawk ngai lo tlat a ni. Ka pa chu a thutnaah chuan a lo thu fel diam tawh a, a bulah chuan ka han thu ve nghal a. Khawvawt lah chuan min hmet ngawt ngawt mai si a, ka lungawi lo tak zet a ni. Ka pa chuan tawlailir chu thingtuah tur kan hakna chhek in bulah chuan a tiding a, thingfak kan dahna chhek inah chuan lutin thingfak hi a rawn pawm teuh mai a. Eng thil nge a tih tak? Nipui laia tlanga mi thing ka kih, ka tan leh ka eh phela ka hak sa diam kha a ni si a. “Pa, eng thil nge maw i tih hi le?” tiin ka zawt ta hial reng a. Ani chuan, “Nu Jensen-i te hi i tlawh ve tawh em?” tiin min zawt let a. Nu Jensen-i te chu kan awmna atanga mel 2 vela hlaah an awm a, a pasalin a thihsan tawh avangin a fa naupang te te 3 a hmeithaipui a, a fa upa ber pawh kum 8 mi vel chauh hi a ni a. “Aw, tlawh tawh e; mahse, engati nge?” ka han ti he haw a.

            Ka pa chuan, “Vawiina kawnga ka tlan laiin a fapa Jakey-a kha thingtuah tur zawnga ramhnuaia a kal lai ka hmu a. Matt, thingtuah tur an nei tawh lo a ni,” tia min chhang chungin kan chhek in lam pan chuan a kal leh ta a, kei pawh chuan ka zui nghal a. Sakawr pawhin a hnuk zo dawn emaw ni le tih tur hiala tamin tawlailirah chuan thing chu kan chhek vum a. Chumi hnuah chuan ka pa chu kan sa rep dahna inah chuan kalin sa rep thahnem tak hi a rawn la chhuak a, sakawr tawlailira dah tura min tirh pahin chuta lo nghak nghal tur chuan min ti a. A lo kir leh chuan ip lian deuh hi a rawn pu a, a kut vei lam chuan ip a khai bawk a. “I ip khai chhungah khan eng nge i dah a?” ka lo ti a, ani chuan, “Pheikhawk a nih hi. Tukina thing fawm tura Jakey-a a kal khan buaraa a ke a tuam ka hmu a, pheikhawk bun tur an nei tawh lo a ni. An unau tan chuan chithlum mum ka kensak bawk a,” a ti a.

           Chuti chuan ngawi rengin Nu Jensen-i te awmna lam pan chuan kan kal ta a, ka pa thil tih hi eng nge a tulna tiin ka ngaihtuah a. Kan thing hak sa zawng zawng kan phur chhuak a, thing chu la ngah viau mah ila tan leh eh chawp ngai vek a ni tawh si a, sa leh ei tur chu kan ngah a, lo pe then ta pawh ni ila a pawi lo a. Pawisa erawh chu kan nei bik lo a, engati nge pheikhawk leh chithlum mum a lei tel kher le? Nu Jensen-i chuan keini aia thenawm hnai a ngah a, keiniina kan lo ngaihtuah viau tur a ni emaw ni le, tiin ka inngaihtuah a.

          Nu Jensen-i te in bul kan thlen chuan thawm dim thei ang berin kan thingfak ken chu kan hlang thla vek a, an kawngka bulah chuan kan thil ken- sa, ei tur leh pheikhawk te chu kan dah a. Kawngka kan kik chuan aw lawi lam leh zam hmel deuh hian, “Tu nge ni?” tiin min lo chhawn a, ka pa chuan, “Lucas Miles leh a fapa Matt te kan ni e, kan lo lut thei ang em?” a ti a.

         Nu Jensen-i chuan kawngka lo hawngin kan lut ta a, puan lum hi a lo bat hlun a. A fate pawh chuan puan lum batin mei-alh chaurau tak mai, lum pawh lum pha mang lo tur hi an lo kil bial taih a. Nu Jensen-i chuan nawhalh nawt alhin khawnvar chu a han tieng a.

           Ka pa chuan, “Eng eng emaw kan lo kensak che u asin,” tiin chhangphut kan dahna ip chu chhuatah a han nghat a. Ka pa chuan pheikhawk a dahna ip chu Nu Jensen-i chu a han pe a, ani chuan a hawng nghal thuai a, pheikhawk inkhing te tea dah chu a han la chhuak a, ama bun tur bun 2 leh a fate bun tur bun 2 theuh hi a lo awm a. Pheikhawk tlo hmel tak, a tha ber ber chi, kum rei tak daih tur chi hi a ni a. A hmel chu chik takin ka lo en kar a, insum tih hriat zet maiin a heh a pet fan fan a, a mittui chu a tling pam a, a insum zo lo chu a biangah chuan a luang thla ta ngiai ngiai a. Sawi duh neih hmel zet maiin ka pa chu a han en a; mahse, a kha a chih a, a ka atang chuan aw reng a chhuak thei lo.

           “Tak a, thingtuah tur thingfak pawh kan lo keng nual tak asin,” tiin ka pa chuan ka lam lo hawi pahin, “Matt, thingfak tam tawk va la la, mei hi chhawm thain in chhung hi tilum deuh teh ang u,” a ti a. Thingfak la tura pawna ka chhuah chuan ka danglam ta vek maiin ka inhria a, ka pawm emaw, pawm lo emaw ka mittui a parawl kuang a, ka hnuk a ulh a ni. Ka mitthlaah chuan naupang te tak te te pathum, mei lum biala an lo thu kual raih mai leh an nu, lawm avanga tawng pawh tawng thei lova a bianga mittui luang ngiai ngiai chu an cham reng a.

              Ka tawt up up a, hlimna nasa tak mai ka la hriat ngai reng reng loh chuan min hual vel ni berin ka hria. Krismas hi ka lo hmang ve fo tawh nain tun anga ka nun thlak danglamtu hi ka la tawng ngai lo. An tan chuan eng emaw ti zawng talin malsawmna kan ni tih chu hai rual a ni lo.

              Mei chu ka han chhem alh leh zual a, naupangho chu ka pain chithlum mum a han pek chuan an hlimin an nui sen sen hlawm a, Nu Jensen-i pawh chu a hlim hle tih a hriat a, kan lam hawi chuan, “Pathianin malsawm mawlh che u rawh se, Pathian mi tirh in nih ngei hi ka ring a ni. Kei leh ka fate hian Pathian hnenah a vantirhkoh 1 tal kan tana rawntir tura kan lo tawngtai mek laiin in lo thleng a,” a ti a.

              Ka hnuk chu a ulh leh teuh mai a, ka mittui chu a parawl leh ta kuang mai. Chutiang zawng chuan a hmain ka pa hi ka lo ngaihtuah ngai lo reng reng a; mahse, Nu Jensen-i thu sawi chuan ka rilru a hnehin ka nu leh ka tana a thil tih tawh te leh midang tana a tih tawh te ka han chhui kir neuh neuh a, ka pa aia pa tha hi ka tan chuan he khawvelah hian an awm leh hi ka ring tawh lo.

              Ka pa-in an pheikhawk thar chu an bun tawk leh tawk loh bun theuh tura a han tih chuan mak tak maiin an lo bun tawk vek mai a, ka pa chu an tana Pathianin a vantirhkoh a tirh ni awm renga mawi a ni.

            Haw tura kan intintuah takah chuan Nu Jensen-i biangah chuan muttui a lo luang leh a, ka pa chuan naupangte chu lungchim takin a pawm vawng vawng hlawm a, anni pawh chuan la thlahlel tih hriat takin kan kal phal lo ni awm takin an kuah vawng vawng bawk a. An hmel atang chuan an pa thi tawh kha an ngai hle tih a hriat theih a, dampuitu pa ka la nei hi ka vanneihzia ka inhriat nawn phah hial a ni.

            Kawngka bul kan thlen chuan ka pa chu a han hawi kir a, Nu Jensen-i hnenah chuan, “Ka nupuiin naktuk krismas tlaia zanriah kan hnena lo kil ve turin in chhungin sawm che u a duh a, sai-ar (turkey) lian zet mai ei tur kan nei a, keini chhungkua mi 3 lek tan chuan a lian lu deuh a, kan zingah naupang an awm lohna a rei tawh nen, naupang bula hun hman leh te pawh a chakawm alawm le! Matt-a lah hi naupang tia sawi tur a ni tawh si lova, naktuk chhun dar 11 velah kan lo lam dawn che u nia,” tiin zanriah ei tur chuan a sawm nghal a. Kan unau zingah a naupang ber ka ni a, ka ute mipa 2 leh hmeichhia 2 chu nupui pasal neiin hmun dangah an awm vek tawh si a.

              Nu Jensen-i chuan lu buk nghat pahin, “Kan lawm tak zet e, Miles, sawi theih eng mah kan nei lo. Mahse, Pathianin a let tam takin malsawm che u rawh se, mal a sawm ngei ang che u tih pawh hi ka ring tlat a ni,” tiin min thlah liam ta a.

              Chu khawvawt tak hnuaiah chuan vawt pawh ka hre chang tawh lo reng reng a, kan haw kawngah chuan ka pa chuan min rawn melh pahin, “Matt, eng emaw ni hrilh che ka duh a ni. Silai I awhzia I nu nen hian kan hria a, leisak ngei che tumin pawisa pawh kan lo khawl tang tang a, kan tlin zo ngang si lo a. Mahse, nimin khan vanneihthlak tak maiin hmana kan leibatu pakhat hian a leibat a rawn tlak hlauh mai a, I nu nen chuan rifle leisak theih ngei che inbeiseiin kan hlim em em a. Tukin khan rifle leisak ngei che tumin khaw chhungah ka va kal a, ka kal lam chuan Jakey-a thingtuah fawm tur pheikhawk bun tur pawh nei lova buaraa a ke tuam kha ka hmu ta si a, chu vang chuan rifle man tura ka tih pawisa khan pheikhawk leh naupang lawm chithlum mum te kha ka lei ta ringawt a ni. Matt, I hriatthiam hram ka duh a ni,” a ti a.

            Ka biangah chuan mittui a luang thla ngiai ngiai a, ka hrethiam a ni. Ka hrethiam tak zet. Ka pa thiltih chuan min tilawm ngei mai. Ka nunah hian rifle chu a pawimawh nep ta hle mai a, ka pa hian thil tam tak min tihsakin min pe tawh a, Nu Jensen-i hmel leh a fa naupang te te 3 te hlim hmel ka hmuh khan ka pa thiltih chu ka pawmpui tak zet a ni.

            Nu Jensen-i te chhungkuaa tu emaw ber ka hmuh chang leh thingtuah tur ka eh chang hian khami zana ka pa nena Nu Jensen-i te chhung kan tlawh haw lama ka hlimzia kha ka hriat nawn phah thin a, ka pa chuan kha mi zan khan rifle aia hlu zawk, ka krismas hman tawh zawng zawng zinga krismas hlu ber min lo hmantir reng a lo ni.

             Ziaktu- Rian B. Anderson
             Letlingtu- Terema Chhakchhuak

Posted in Literature, Thu leh Hla, Thu Ngaihnawm | Tagged , | Leave a comment

BIKE 1 A MI 58 CHUANG, WORLD RECORD SIAM by Saihmingliana Sailo

20th Nov∙  khan Army Service Corps-a Tornadoes team chuan bike 1 a mi chuang tam ber record an siam ta.

An chuanna bike hi 500cc Royal Enfield bike a ni a, a chuanna tur frame siam belhin nimin khan Indian Air Force station, Yalahanka, Bengaluru ah meter 1200 a thui an chuang a ni.

ASC Tornadoes team hi kum 35 kalta aṭang khan din a lo ni tawh a, 9th Asian Games, New Delhi a kum 1982 pawh khan show ropui tak an lo nei tawh a, khawvel huap leh ram chhungah vawi 100 chuang an inlan tawh bawk. Tunah hian international records 19 an nei (hold) mek a, a vawi 20 na tur record siam an tum leh mek a ni.

Nimina bike khalhtu hi kum 20 a upa, Subedar Rampal Yadav a ni a, Major Bunny Sharma-an an team hi a kaihhruai a ni. Kum 2010 khan bike 1 a mi 56 chuangin record an siam a, tunah khumin mi 58 an chuang ta a, Guiness World Records ah ziahluh a ni ang.

Hetia record siam an tum vanga intihzan nan hian tui 100ml leh biscuit 1 ṭheuh bak an ei lo va, an tum dan hmasa chuan mi 60 chuan an tum nghe nghe a ni.

Posted in Fun and Fact, General Knowledge, National News | Tagged , | Leave a comment

I DAWN NGAI EM? by Ricky L Colney

Tun tum chu Subject thlak dawrh chhin teh ang..Silai leh Bomb kan sawi ngun lutuk a..chutiang chunga Rorel tu te leh khawvel thil thlir dan thenkhat hi hetiang zawng hian kan lo ngaihtuah ve ngai em tih i han in chhin teh ang u.

    HITLER a leh Muslim Zawlnei Muhammed te in anna :
1) JUDA/Jews an haw ve ve.
2) Pathian mi tirh,Pathian tan thil tha ti ah an in ngai ve ve.
3) An ngaihdan leh thlir dan Lehkhabu ah an ziak ve ve.
4) Mi chunga Rorel dan(Oppressive System) rawng tak an hmang ve ve.
5) Sawi buai eih lo a hnung zui tu (Blind followers) an ngah ve ve.
6)Hitler a chuan Nupui Pakhat chiah aneih leiin Muhammed a chuan Nupui tamtak, kum tlinglo naupang thlengin a nei ani.
Hitler a leh Muhammed a te in an na lai han en chuan Muhhamed aiin Hitler a khi a sual lo zawk emaw tih tur mah ani..tichung chuan khawvel in HITLER a chu Misual Rapthlak ber ah an chhuah/ngai a, chutih laiin Muhhamed a chu Tun thlengin Mi ropui leh mitha, Pathian zawlnei anga pawm a ni.

    Donald Trump a leh Hussein Obama te inan loh na :
1) OBAMA chu eng sakhua nge a vawn tih tun thlenga sawi hleihtheih ani lo a, Donald Trump a chuan Chhuang takin Presbyterian Kohhran a nih thu a sawi cham chi ani.

2) OBAMA chu thlah tu MUSLIM niin mi hausa sa anni lo, DONALD TRUMP erawh Christian chhungkua atanga chhuak niin Mi hausa chhungkua atanga chhuak ani.

3) Obama chuan Muslim thlavang a hauh nasa em em a, The Audacity of Hope(page 261) ah chuan Politics thil boruak duhawm lo tak a thleng/chhuak anih chuan kei chu MUSLIM lamah ka tang dawn ani tiin a ziak a, tin UN General Assembly 2012 a, a thusawi na ah ” Zawlnei Muhammed a sawichhe / ti bawrhbang tu tan khawvel ah hmun a awm tur anilo” alo ti tawh bawk a..US Ram din chhuak tu te chu Muslim a ti bawk..DONALD TRUMP a erawh chuan MUSLIM a ngai nalo hle a,US Dintu te chu Christian anni a, BIBLE rawn chunga US hi din, US constitution pawh Bible zul zuia siam ani ati. Eng lehkhabu nge i duh ber ti a an zawhna pawh “The BIBLE” tiin a chhang ani.

4) Donald trump a chuan a thusawi na ah vawi tamtak BIBLE chang leh Pathian thu a sawi chhuak thin a, Khawvel ram hrang hrang a CHRISTIAN tihduh dah na chu nasa takin a sawi sel thin a, chutih laiin OBAMA chuan vawi khatmah Christian te thlavang a hauh ve ngailo. OBAMA chuan ISIS te a pui thin a, DONALD TRUMP chuan ISIS A BOMB thung.
5) Hussein Obama chuan Thusawi na tur an sawm na ah te MAN TO taktakin thu a sawi man a inchhiar thin a, US President anih na pawh sum tamtakin a hlawkpui/hausakpui zui a, Donald Trump a chuan US President anih chhungin HLAWH cheng khat bak a la ngailo..chupoh US Constitution Article 2, Section 1, Clause 7, in US President te hlawh lak loh a phalloh vang chauh a la ani..a Hlawh tur zawng zawng te chu Sorkar department thenkhat leh tul dang ah a Donate thin..Tin US State in harsatna an tawh lai pawhin ama pawisa fai One Millions a donate zawk ani.

6) DONALD trump a hnuai ah chuan KOHHRAN in hma an sawn nasa em em a, Kohhran te chhan/veng tu tur DAN te a siam a, OBAMA hnuai ah erawh chuan Christian ten ngaisak/endawng  an hlawh nasa em em a ni.

7) OBAMA chuan White House ah MUSLIM tawngtai na tur hmun hrang hrang ah a siam a, MUSLIM ho tawngtai hun ah zahna lantir nan minute engemaw chen nitin ngawi rengin a awm tir thin..Donald TRUMP a chuan White house a Muslim thil zawng zawng a dah bo tir nghal vek a, CROSS a awm chuan a tawk tiin a sawi a ni.

8) OBAMA cabinet ah Christian tha sawitur an awmlo a, Mawngkaw hur an tan em em vek bawk a,CROSS leh ISUA lam reng reng sawi rik an duh lo,chutih laiin Donald Trump a CABINET techu CHRISTIAN tha tak tak vek niin KAR TIN pastor hnuai ah BIBLE STUDY an nei ho ziah a ni.

OBAMA chu CHRISTIAN thlavang hauh ngailo, CROSS leh PATHIAN THU tih bo vek duhtu anih laiin DONALD TRUMP a chuan CHRISTIAN thlavang a hauh na hle a, heti chung hian kan MIZO CHRISTIAN te zingah ngei pawh hian DONALD TRUMP a aia OBAMA tan tlat hi kan la awm ve zel asin..a bik takin inti changkang ve deuh hmeichhia te zing ah an tam hle.
(A thui lutuk tawh duhtawk hrih ang..kan la sawi zel dawn nia)

Posted in Thu Ngaihnawm | Tagged , , , | Leave a comment

MIPUI LAMIN SAWI-NA HUN TLEM CHAUH KAN NEI TA by Hriata Chhangte

AI-178, Pu Hawla insak chungchang court a theh luh hma ( Sub Judice anih hma ) in mahni ngaihdan i sawi khawm leh lut lut ang u le. Tuna kan case buaipui hi chu CHUNGLAM ( Dikna Box) leh HNUAILAM ( Dawt Box) indo-na a ni ta ber mai. Lei thar leh Van thar chungchang Presbyterian Puitling Sunday School ah kan zir dawn kha. Lei thar ( Mizo Kristiante tan bik chuan) chu Pu Hawla Kolkata insak kan hmuhchhuah hnu, Lei hlui chu kan lo la hmuhchhuah hma kha .. tiin kan sawi  zel tawh mai dawn em ni..??

Vawiin chu he CM ram record-na office ah ka va kal leh a. An Officer Incharge hnen chuan….Sir, hei kan Chief Minister ram , AI-178 hi sale deeed neih hnuah Registration hi engti tih a an dil ni la la hian complete sak nghal mai nge in nih , hei record aṭang a lan dan chuan …registration application date leh completion date hi thuhmun, ni  30 August 2013 a ni si a ka tih chuan….
Ni e, kha amah ngei kha a rawn kal duk duk sia, min rawn dil tak ngawih ngawih ah chuan  chutia State  khat CM ve meuh chu tiin ka lo khawngaih a , ka lo hmanhmawh sak ve a nih kha…min han ti phawt a.

A nih leh hetia Sale deed an tih fel tawh hnu a, i Office a Registration an tih fel leh tawh bawk hnu ah,  ni 68 hnu ah daih Serchhip MLA constituency a in candidate dawn ( 8 November 2013 khan Affidavit ( Assets declare na )  khunkhan ( solemnly) tak a submit ah khan a lo la dah zak / inti neitu thlahrung ta tlat mai kha .. eng nge a awmzia ni ta ang ka tih leh chuan. Nui vur vurin …… Amah chu zawt ula a hre ber ang. Hetiang khawpa documents a neih fel tawh hnuah chuan eng vang mahin KA TA, KA RAM a tih ngam lohna tur a awm tawh hlei nem.. a ti leh ta hmiah bawk sia. Tu te’n emaw chumi ram ah chuan kut thlak dawn se… a inti ta tu hle lovang maw…. min tih hnu chuan kan Pu Hawla chu phakar thei ang ber pawhin , Lawyer senior tawh lutuk avanga thaw-trep trep chin tawh pawhin an sawi mam sak thei dawn lo tih ka chiang ta a. Marawh chu he case ( False Affidavit case) hi Court / ECI lamin engtin nge an tih zel ang tih lam erawh chu he case ka buaipui chhan a ni bik hauh lova… 

A nih leh a kid te hovin hetia sale deed a  siam (executed) hnu a,  West Bengal sawrkar a a inziah luh ( registered fel leh thlap) hnu a MUTATION an la tih fel mai loh avang hian helai AI-178 hi ka ram a la nilo, Affidavit ah ka la tilang thianglo an tihsak te hi eng awm zia..ka tih leh hram hnu chuan. Gentleman, Mutation te chu ram neitu nihna a ni hlei nem, chulai inhmun an neih tawh sa ( Sale deed leh Registration tih fel thlap hnu ah) a insak emaw  hmalak an tum tak tak khan an local authority , helai case ah chuan NKDA Office hriatpuina leh sak phalna an lakna mai mai kha lawm.. min tih san bawk si.  Insak hna an tan thuai duh leh duh loh a zirin an mamawh hunah Mutation te chu an ti ve mai mai tawh chauh alawm. A ṭhen chuan a tukah Local Authority an pan nghal a, a ṭhen te chuan kum 5 hnu ah daih pawh an ti tawh mai alawm. Khami kha an ram dik tak a nih tawh tlat avangin tudang mahin an tibuai thei tawh lo hrim hrim….a  lo ni zawk.

Engtin zel nge ni ta ang..??? He False Affidavit case chin fel zawh hian kan Cheng Khat Mah Eiru Lo CM hian heti khawpa in leh lo ropui khawvel khawpui lian leh bon ber pawl , Kolkata Metro City ah ngei mai  hian engti tihin nge a lo neih theih bik dan kan chhui zawm leh zel duh ang em….???  Kei chuan Mizoram People’s Court hi ka playground ve chu a ni mai.  Nge ni Mizo Kristian takin  JEHOVA JIRE  kan tihsan tawh zawk mai ang ???

Posted in Zoram Politics | Tagged , | Leave a comment

JANUARY – OCTOBER, 2017 SYNOD MISSION FIELD RINGTHAR NEIH DAN​

Kumin 2017 January atanga October thlenga Mission Field hrang hranga ringthar an neih dan chu hetiang hi a ni :

  1. Arunachal East : 159
  2. Arunachal North : 220
  3. Arunachal West : 128
  4. Assam : 65
  5. Barak : 181
  6. Delhi : 98
  7. Jharkhand : 492 8. Karbi Anglong : 120
  8. Home Mission North : 119
  9. Home Mission South : 160
  10. Kolkata : 664 12. Lucknow : 338
  11. Nepal : 138
  12. Odisha : 1
  13. Patna : 185
  14. Siliguri : 149
  15. Tripura : 1585
  16. Masihi Sangati : 1574

TOTAL : 6376

Posted in kohhran | Tagged , | Leave a comment

BUH THAR LAWMMAN PEK AN NI DAWN

(Buh thartu zawng zawng te tin khat zelah lawmman cheng za (Rs 100/-) zel kan pe angVanlalruata President PRISM)
Ni 17th November, 2017 khan PRISM (People’s Representation for Identity and Status of Mizoram) Party chuan ei leh bara intodelh (Agriculture Policy) zirhona PRISM Conference Hall-ah kan nei a. Heta thusawitu Pu Vanlalruata President PRISM chuan, “PRISM Party chuan ei leh bara intodelh hi ram tana tul hmasaah kan ngai a. Kan sorkar hunah chuan kan chawpui buh leh thlai thlan bik a kan intodelh theihnan a thartu te hnenah lawmman kan pe dawn a. Buh thartu zawng zawng te tin khat zelah lawmman cheng za (Rs 100/-) zel kan pe dawn a ni,” a ti.

Mizoten chaw atana kan rinpui ber chu buh a ni a. Kan chaw rinpui berah pawh tun thleng maia kan la intodelh lo leh, ram pawn atanga lakluh nana sum tam tak kan hmanral a la ngai reng hi tihtawp dan zawn thuai a tul thu sawiin, “Buh thartu zawng zawng te tin khat zelah lawmman cheng za (Rs 100/-)zel kan pe dawn a. Buh thar hnem apiangin lawmman an dawng hnem mai dawn a. Kum 2018 inthlanpuia sorkarna kan siam chuan, kum 2018-a buh thar te lawmman kan pe nghal dawn a. Chuvang chuan, kum thar atana buh hmun buatsaih tur te buh thar tam thei tura thlawhhma lazau turin kan chah a ni,” a ti a. Buh mai bakah hian sumchang thlai te khawl lian nena buaipui thama thar tura PRISM a inbuatsaih thu sawiin, “Mithiam ten kan ram leilung mil, thar hlawk leh man tam chi an thlang ang a. Chung thlan chhuah thlai-ah chuan kan insawrbing ang a, Buh thartu lawmman kan pe ang thovin thlai thlan bik thartu hnenah lawmman kan pe ang a. Thlai leh a lawmman tur chu mithiam te la thlan leh bituk tur a ni,” a ti bawk.

Ram changkang tawh te reng reng industry a innghat an nih zel thu sawiin, “Ram changkang tawh te chanchin kan zir chuan an rama industrial revolution a thlen atangin hma an sawn zel a. Chuvang chuan kan ramah hian industrial revolution kan thlen tir dawn a. Kan Election Manifesto No. 9B-a kan ziah angin Mizoram hi crop zone-ah then vekin chumi mil chuan thlai leh thei sawngbawlna industry kan din dawn a. Industry te hian contract farming in loneitute thlai anchintir dawn a. An thlai hralhna atanga hlawkna an dawn mai bakah thlai an thar avangin lawmman pawisa an dawng dawn a ni,” a ti bawk.

Pawisa sem a indawmkan tum chungchang sawiin, “Thlai chinah tan lain sorkarin heng atan hian pawisa pawh a semin a seng nasa tawh a. Kan ramin hma kan sawn pui lohzia kan hmu chiang tawh chungin pawisa sem tuma insawi an awm leh tawh hi a pawi kan ti. Keini chuan thlai chin leh ranvulh bultanna tur pawisa kan sem dawn lo a. Israel ram leh ram hmasawn chak hovin an tih angin ram tha laiah thlai chinna hmun tur leh ran vulhna hmun tur chu – kawngpui, electricity, tui leh chenna tur in tha nen thlap, thlai chin emaw ran vulh bultan theiha peihsa thlapin kan siam ang a. Hengah hian, hnathawh theih sa thlapin, hna thawk tur te chu kan dah lut dawn a. Heng hmalakna te reng reng hi a process na tur industry nen kan thlunzawm thlap zel dawn a ni. Chuvangin mi taima, hausak duh chuan PRISM Party hi min vote se, hun reilo te chhungin an hausa mai dawn a. Dinhmun ngaia awmzel duh chuan party dang vote mai rawh se,” a ti bawk.

PRISM chuan Kristianna hi a tha bik a ni tih lantir a, kan Pathian chawimawi tur te; kan chhehvel hnam te aia ropui zawk kan nih lantir tur te; Zohnahthlak te inpumkhatna atana kan unau te hipkhawm tur tein, Mizoram hi ram ralmuang, dikleh fel taka ro inrel, hna neilo awm lohna, mi hrisel leh hlim chenna, ram hausa, hnam dang ten tlawh an chak ram dinpui atan mitin kan sawm che u a ni.
Tun hi duhthlanna hun a ni e.

Posted in Zoram Politics | Tagged , | Leave a comment

BILLY AND THE KID

Kum 11 chauh a ni a. Sipai uniform hlui lian tak zo leh zo lova hàin sipaiho zíngah a tül tül tiin a tawlh ve hrat hrat thìn. Kum 1951, Korean War vanglai kha a ni a (Korean War an tihah hian North Korea leh South Korea an indo va. Communist sorkar lo zâwk, South Korea chu US-in a tanpui a nih kha). He naupang kan sawi pawh hi he indona rapthlâk takin a hrin chhuah fahrah khawngaihthlâk tam takte zínga pakhat a ni.
Chu naupang, Baik Sung Hak-a chu Seoul khawpui atanga hmarchhak lam, km.100 vêla hláa US sipaiho inkulhna hmunah a awm ve a. Korea sipaite’n amah ang bawka fahrah tam takte nen America sipai inkulhna hmunah hian a tül tül thawk tùra an lâk a ni. Hlawh pawh an nei hran chuang lo va, sipaihovin ei tùr an dawn atanga an phal ang tâwk an pêk ve chu an inhnawhpuarna leh an hlawh awmchhun a ni.

He camp-ah hian alawm, Baik-a chuan a dam chhûnga a theihnghilh tawh loh tùr, sipai nun ze danglam tak Billy-a chu a tawn tâk ni. Billy-a chu America sipai la naupang tak, kum 20 emaw vêl chauh hi a ni a. Ngawichawi tak leh zakzum, ze zawi êm êm leh mi pawi sawi hläu tak a ni a. A tawng chhuah ve chhun pawhin thinrim aw ki sáng a nei ngai lo. Billy-a hi Baik-a ang bawka fahrah ve tho a ni a. Unaunu pakhat neiin America-ah a chëng a. Chu a farnu chanchin pawh chu tu hnênah mah a sawi chhuak ngai lo. Chutiang mi chu ni mah se, Baik-a chuan Billy-a chu a mi tawn tawh zawng zawnga mi duhawm ber leh ngainatawm ber niin a hre tlat si.
Baik-a chuan unau pianpui ang maiin Billy-a chu a en a. Billy pawhin chutiang bawk chuan a en lêt thìn. A theih ang tâwk tâwkah Billy-a chuan Baik chu a tanpui reng a. Sipai dangte tih ngai hauh loh, a khum bulah te hian mutna tùr a dawhsak a. A damloh cháng lahin a mangang thei êm êm a. An sipai damdawi ngaihtuahsakin tlaivarpui a ngaih leh a bulah a thu tlaivar mai thìn.

Billy chu 105mm Howitzer laipui mu thuntu a ni a. Hmélma nen an inkah tak tak phei chuan àwl awm hauh lovin darkar 24 chhûng laipui mu load rëng rëngin a buai thìn. Camp lamah Baik-a lahin Billy-a rawn haw hmá zawng chuan a lo nghâk fan fan a, thiin emaw, hliam tuarin emaw a rawn haw ang tih hläu reng rengin a muhìl thei ngai lo. Him taka a lo haw a’n hmuh chuan a darah a lo kuah chung chung a, a thih mai a hlauh thu te a lo hrilh malh malh a. Billy-a pawhin duat takin a chul a, indona chuan tàwp hun a la neih ngei tùr thu hrilhin a thlamuan thìn a ni.

Billy-a chuan a hun äwl apiangah a theih ang angin Baik-a chu sâptawng a zirtir a. Thumal thenkhat erawh a lam fuh thei meuh lo, machine gun han tih tùrah te hian sheen gun a ti ta tlat thìn a, an hlim dùn thei angreng hlë.

Ni khat chu hmélmaho awmna enthla tùrin Baik-a chu hotu lian zâwkte’n an tir thut mai a. Billy-a a mangang hlë. Silaimu kára Baik-a, naupang të a han che chhuak tùr chu a ngaituah tak zet a, tih theih a nei si lo.
Baik-a chu tawp deuhin a inthuam a, hmélma awmna lam pan chuan a chhuak ta a. Hmun ralti takah chuan a kal zël a. Hmélmaho awmna a va thlen chuan North Korea sipai pakhatin a lo hmu hlauh mai. Eng nge a tih dáwn a lo zâwt a. Baik-a chuan khur ru der der chung hian chu lai vêla chëng chu a nih thü a’n sawi ve ngawt a. Chutah, hmélma sipai pawh chuan tha takin a vai liam ve ta mai a. Baik-a chu a lawm ngei mai. Chung lai vêla silai lian an dahna hmun te, sipaiho inkulhna leh leihlawn awmna te chu a thiam ang anga chhinchhiahin a ziak a. A theih ang tâwka enthlâk hna a thawh hnû chuan a thil hmuhte report tùrin a kir leh ta a.

Tuma hmuh loh tùra biru kual zël chungin, a theih ang tawka hmanhmawh chuan camp lam a rawn pan leh a. Nakinah chuan America sipaiho inkhuarna pakhat a rawn hmu fuh ta. Mahse, pan tuma a’n kal hnaih nâk chuan hmélma sipai nen an lo inkâp nasa mai. Va pawh chi ziazang a lo ni lo. A hla thei ang bera hêlin a kalsan leh ta a.
Eng emaw chen a kal leh hnû chuan American sipaiho camp dang a hmu leh ta. Pawh tumin a va pan leh a. Mahse, a’n kal hnaih chuan chu mite pawh chu a hma aia nasa zâwk mahin an lo inkâp leh pek. A lu chung lawk lawkah silaimu a rawn thlâwk ta fur fur a. A’n hawi vêl a, a bul lawkah te chuan hmélma sipai a hmu ta. A mangang lutuk chu a vâk kual ruai a, khuarkhurum pakhatah a zuang lût ta ringawt a. Che sawn ngam tawh hek lo, ni hnih zet chutah chuan engmah ei lovin a tawm ta a ni. Ni hnih hnûah zawng hmélma sipaite pawh an tawlh kiang ve ta a. Chumi hnuah Baik-a chu a tawmna atang chuan a lo chhuak a, an camp lam a pan leh ta ngat ngat a.
Him takin an camp a rawn thleng a, a thil tawn leh a thil hmuh zawng zawngte chu a’n sawi chhäwng a. America sipaiho pawh an lo lawm ve hlë.

Chumi hnu lawkah chuan Army hmunpui lam atangin thupêk a lo thleng a. Korean naupang kum 15 tling lo, America sipai puitu atána an hman zawng zawng chu Seoul khawpuia hnuchham chawmnaah sawn vek tùr, tih a ni. Baik-a pawh a kal ve a ngai dáwn ta. Naupang tam tak tán chanchin lawmawm a nih tehlul nen, chu thu Baik-a leh Billy-a’n an han hriat chuan an lungngai ta êm êm a. Baik-a lah chuan Billy-a kalsan chu thih hreh takin a hreh bawk si. Mahse, Billy-a ngei pawh chuan Baik-a tána tha tùr zâwk a ni tih a hai si lo. Baik-a pawh chu hreh tak chungin a kal ve ta nge nge a. Bet lo takin hnuchham chawmnaah chuan a va awm ve ta a.
Mahse, a rilru a ngam thei ngang lo va. Rei pawh a la awm lo tihin a rawn tlan chhuak leh a. Billy-a awmnaah bawk a kal leh ta. Billy-a bul a va thleng a. Billy-a nen an han inhmu leh chu an inkuah vawng vawng a. Naupang chhia ang maiin an tap dùn bawk. Tu zâwk zâwk pawh chuan inkalsan harsa an ti a ni ber mai.

Kum 1952 Krismas a lo thlen dáwn meuh chuan Billy-a pawh corporal a kái ve ta. Ni khat chu a hnathawhna atangin Baik-a present tùr thil fun lian pui a rawn hawn a. Baik-a’n a’n hawn chuan a hâk tâwk hlir, jacket, pheikhawk leh thawmhnaw chi hrang hrang a lo awm teuh mai. Billy-a chuan America-a a farnu hnênah Baik-a pianphung leh awmdàn lo zuk hrilhin, ani chuan krismas present atán a rawn thawn a lo ni. Chutiang thawmhnaw mawi leh tha chu Baik-a’n a la hmu pha ngai lo.
Kum 1953 June thla a lo thleng a. Ni khat chu an petrol dah khâwmnaah hmélma bomb a rawn tla fuh hlauh a. Vanduaithlâk takin chu lai hmuna hnathawka lo awm Baik-a chu petrol kang chuan a phuh ta chiam mai. Lui kam lawk a nih avàngin Baik-a chu tuiah a zuang thla nghâl a. Billy-a’n pawnpui huhin a rawn khuh bawk. Mahse, Baik-a chu a hliam na hman hlë tho. Nikhaw hre lova awmin Hwachon Damdawi In lamah helicopter-in an phur ta hial a. A taksa hma lam zawng zawng tih theih a kan vek avangin darkar 18 chhûng teh meuh engmah hre lovin a awm zui ta a ni.

A tûk zíngah chuan chiang lo ruaiin a lo harh a, a thil hmuh hmasak ber chu Billy-a hmel ngui tak, a khum bula lo thu ngawi reng chu a ni. Indo hun lai lehnghala an sipai dàn pawh pawisa hlei thei lova Billy-a’n a lo thutpui reng chuan a lung a tichhe hlë. A hriat tham lek tùr hian, “Baik, doctor leh nurse hovin tha takin an enkawl che a. I dam leh thuai ang,” a rawn ti a.

Kum 1953 July ni 27 chuan indona chu a tàwp ve ta nge nge a. Billy-a chuan Baik-a chu Damdawi Inah chuan a rawn tlawh leh a. A rilruah vei eng emaw nei hian a lang; mahse, engmah a sawi chhuak lo. Thu tam sawi lovin Baik-a chu a chhuahsan leh ta a.
Chu lai Damdawi Ina eng emaw chen a awm hnû chuan Baik-a chu American sipai Damdawi In lamah an sawn leh ta a. Billy-a nen pawh an inhmu zui ta lo! Chu Damdawi Inah chuan Korean naupang damlo, Billy-a te unit-a thawk ve thìn pakhat nen an inhmu a. Billy-a te unit chanchin a’n zawh chuan indo a tàwp tawh avànga America lama an haw vek tawh thü a hrilh ta mai a. Chu thü a’n hriat chuan Baik-a chu a hamhaih hlë. A rilruah Billy-a hmu tawh ngai lo tùra a’n indah phei chuan a mittui a rawn sur zung zung a. A rawn tlawh hnuhnung bera eng emaw sawi tùr nei ni àwm tak, engmah sawi ta si lova a kal leh ta mai te kha a ngaihtuah chhuak a, a rilru tihhrehawm a hlauh vàngin Billy-a kha a lo ngawi tlang em ni? Ka hmu leh thei ang em? Khawi lam nge a pan tâk ang? Chu’ng thilte chu a rilruah a ri ta tlut tlut mai a ni.

Thla 19 zet Damdawi Inah chuan a awm a. Kum 14 a nih champhaphâk chiah, February 1955 chuan Damdawi In a chhuahsan ve thei ta.
Hmabâk ko tak chungin Seoul a pan a. A hrawk chàwmna tùr ngaihtuahin inhlawhna a hmuh apiangah a inhlawh a. Thawh theih apiang a thawk zo a ni ber. Eng emaw chen hna mumal nei lova hna chi hrang hrang a thawh kual hnû chuan sikul naupang lukhum siamna hmun pakhatah hian hmun phiattuah a tang ta a. Chutah chuan ni tin darkar 18 thawkin kum khatah ni hnih chawlh a nei thìn. Baik chu mi hlim thei tak a ni a, rim taka a thawk chung pawhin a vui ngai lo. A hmáa thawh tùr awm apiang tha taka a hlen chhuah zël avàngin rei lo tëah a hnathawhna neitu chuan an bungraw hralh chhuahna leh an thil siamna hmun pakhat enkawl kawp tùrin a ruat ta hial a. Chu chu kum 18 a nih kum chiah a ni.

A theih ang angin a inkhâwl zël a. Kum 19 a tlin chuan ama pualin dawr të pakhat a luah ve thei ta reng mai. Tläi, a hnathawh banah lukhum siamna tùr hmanrua a lei a, lukhum siam pahin a dawr të chu zanlai thlengin a nghâk thìn. Chutianga kum chanve a vei meuh chuan thawktu dang pakhat a ruai thei leh ta reng mai. A sumdawnna chu tluang takin a kal zël a, thla ruk dang a vei leh chuan thawktu dang pakhat a rawih belh leh thei ta!

Tunah zet chuan Baik Sung Hak-a sumdawnna chu South Korea-a sumdawnna langsar ber páwl a ni pha ta hial a. Thawktu 2,800 lai ruaiin thil siamna hmun 12 lai a nei tawh. Kum 1985 chhûng mai pawh khán dollar maktaduai 32 lai lei chhuakin lukhum maktaduai 36 zet a siam chhuak a, khawvêla lukhum siam chhuak hnem ber a ni ta hial a ni.
Baik-a chuan Billy-a kha a theihnghilh thei ngai lo va. Engtin nge a khawsak ve tâk ang tih a ngaihtuah fo thìn. A chanchin te leh a hlawhtlinnate hi han hre ve se, ani tluka lawmpuitu tùr an awm hauh lo vang maw le.

Tunah chuan kum 46 lai a lo ni ve ta. September ni 1, 1983 khán Korean Air Lines, Flight 007 chu Russia-in a kâp thla a. A chuang mi 269 zet an thi vek a. A hmá ni hnih lawkah kha thlawhnaah khán Baik-a pawh a chuang ve nghe nghe a. Khami tum kha lo ni zâwk hlauh se chuan ani pawh a thi ve ngei ang le. Chu’ng thilte avàng chuan mihring nuna thlâkhlelh tùr awm lohzia Baik-a chuan a ngaihtuah chhuak thar a. Eng emaw kawng tala mi dangte tána thil tha tih nei lova thih a hläu ta hlë. Hongcho khuaah ram hectare 20 zeta zau a lei ta chuk chuk a. Pawisa tam tak séngin naupang retheiho enkawlna tùr a siam ta a. Mi tam tak ruaiin naupang rethei vâk mai mai chu an vai khâwm a. Naupang 600 lai enkawlin, an puitlin hnua an eizawnna tùr thiam thil eng emaw an zirtir ta a ni.

Baik-a chu hausa tak ni tawh mah se, ni tin darkar 14 atanga 18 chhûng hna a la thawk chhunzawm reng a. An ram chhûng mai bâkah ram páwn, Costa Rica lam thlengin a sumdawnna a zauh zël a. Chutah chuan lukhum siamna dinin mi 170 lai a ruai a. Chumi hnûah Winslow, Arizona-ah a dang a hawng leh a. Mi 400 lai ruaiin hmun danga hawn belh zái a la rél zël bawk.

A rilrua riak reng thìn, Billy-a chu hmuh leh châkin zawn chhuah a tum rilru reng thìn a. A hming pum kha a lo hre mang si lo va. A hriat chhun lah Billy-a te unit khân chhinchiahna atán cowboy lem an hmang tih chauh a ni si. Hriat chhuah tuma nasa taka a beih hnûah Billy-a te unit chu 300th armoured field artillery battalion an ni tih an hre thei a. Mahse, chu battalion-ah chuan Billy tih hming pu ringawt pawh mi 800 lai an lo awm bawk si. Kum 30 lai a zawn hnuah pawh Billy-a chu a la zawng chhuak thei ta chuang lo.

(Billy and the Kid by David Reed).

Posted in Thu Ngaihnawm | Tagged , | Leave a comment