GUWAHATI AH LUNGLEI TLANGVAL PAHNIH RUANG CHHAR

Tukin zing khan Lunglei Electric Veng tlangval pahnih, Guwahati a lehkha zira awm mek, Lalhmangaihsanga s/o Chawnghranga leh Lalmalsawma s/o Chhawnsanga (L) te ruang chu rel kawng sirah chhar a ni a, Lalhmangaihsanga hi a ban leh a ke a tliak a, Lalmalsawma hi a beng atangin thi a chhuak bawk.

An pahnih hian Assam Downtown University a Technician zirlai an ni a, Lalhmangaihsanga hian Dialysis zirin, Lalmalsawma hian Physiotherapy a zir mek bawk. Nimin tlaia an lenchhuah hnuah heti hian an chanchin hriat a ni zui ta a ni.

An ruang hi khawihsawn theih lohin Police te’n an la dah rih a, tul angte an tih fel a nih hnuah Guwahati Mizo Welfare kaltlangin an chenna in lam rawn panpui a nih beisei a ni.

Gilbert Renthlei @ Lunglei Chanchinthar

Advertisements
Aside | Posted on by | Tagged , , | Leave a comment

LAWNGTLAI-AH MOTOR IN PI LALTLANZAMI SU HLUM

Zanin dar 7.30pm bawr vel khan Pi Siangtei w/o Rev H Lalsangliana, LIKBK, AOC Pastir Bialtu leh Pi. Laltlanzami w/o Pu. K. Taipianga te inkhawm bang chu Maruti van in a su a, vanduaithlak takin Pi. Laltlanzami zawk hi a hliam tuar lovin a sutna hmunah hian boral.

Pi Laltlanzami te thiandun hi zanin khan an inkhawm bang haw lam chu Lawngtlai North BCM Pastor quarter bulah Maruti van, rawn tlan hian a su a. A sutu hi ding mai lovin a tlan tlang a, a motor hi Lawngtlai Bazar veng leh Chanmari inrina bulah hnutchhiat in, amah hi a bibo zui a, he thu buatsaih lai thleng hian Lawngtlai police ten theihtawp chhuah in amah hi an zawng mek a ni.

Vanduaina thlenna hmunah hian Pi Laltlanzami hi a boral nghal a, a taksa lang theiah hliam hnuhma leh pem liantham a awm lova, a beng dinglam hnungah duk leh vung a awm a, Distric Hospital, Lawngtlaiah a ruang hi lak a nih hnu-in zanin hian AOC Venga an chenna inah tlaivarpui a ni ang a, naktukah hian AOC thlanmualah vuiliam a ni ang.

Pi Siangtei hi LCMC-ah kalpui nghal a ni a, x-ray te tih niin, x-ray result atanga a landanin a ngalruh (a kheimit bulah) a keh/keh a, a nakruh pakhat a tliah bakah a chalah hliam a tuar bawk a, LCMC doctor ten Durtlang damdawiinah an refer a, zanin vek hian Aizawl pan a kalpui nghal a ni ang.

Lirthei khalhtu hi kumtling lo, (juvenile) anih avangin tarlan a remchang lova, kan in hrethiam dawn nia)

Author : Kiddy Vanchhawng    

Aside | Posted on by | Tagged , , , | Leave a comment

Zu i zuar zel ang

He article hi nimin Aizawl Post-a chhuak a ni a. Tun hma hun, Zu khap a nih lai boruaka ziak a ni. Tunah pawh hian a la ‘tunlai’ zelin ka hria a, a ziaktu leh Aizawl Post remtihnain ka han post a ni e. Comment duh te kan awm chuan a ngaihdan hi dik kan tih leh dik lo kan tih thu-ah cheng ila, zu huatna thinlung, thluaksuk thiltih theihnaina a hneh khawvela chengte chuan rawn comment lo law law se, kan hlawkpui zawk a rinawm.

Entir nan, tunlaia zu vanga nunna chan tam berte hi tunhma kum 10/20 lo in tawh, zuin a lo tih chhiat thui viau tawh kal zel a ni tih hriat a tha a. Tin zu khap hi khawiah mah a hlawhtling ngai lo va, sualna nasa zawk a rawn hringchhuak thin tih hi hriat atan a tha bawk. Thil tha lo kan thlak dawn chuan kan thlakna kha a tha zawk a nih loh chuan awmzia a nei lo va, thlak loh kha a tha zawk tih rin ngam a dik ang.
Michael Lalmanzuala

ZU I ZUAR ZEL ANG
R.Thangkanglova
Laipuitlang, Aizawl – 9436142254

Zu bilh thlum dan leh inthlah chhawn dan hi chu mihringa thil bet tlat a ni a, Missionary te zirtir pawh ngai lovin tuma tlawh pawh loh thliar karah pawh hian an lo bilh thlum fir fer a, an lo inrai leh fir fer thin.

Adama leh Evi pawh kha, “ti hian ti ula, Kaina leh Abela an lo piang mai ang” tih tuman an hrilh kan hre lo. Zu (uain) Novan a ruih (Gen 9:21) pawh kha scotch whisky emaw van atanga lo tla a ni lo; Nova nupui bilh ngei kha a nih ka ring tlat.

Gen 19:34-35-a a fanuten Lota an hrai rui a, an mutpui a Moab leh Amon ho thlahtute an lo hring tate ngaihtuah chuan Zu tangkaina min hriattir a. Moab leh Amon ho thlahte khu Israel leh Middle East-ah khuan awm lo se mipui an tlem rawih bakah chuti taka ram ropui khu an ni hauh lo vang.

Zu Zoramin kan khap thu-ah hian kan lawm tlang. Kohhran an lawm, Ukil ho pawhin zu zuar an mante buaipui vang hian car an neih phah thei. Police leh Excise leh JAC leh YMA te pawh hian an zu chak chang apiangin zu an dap theiin man pe lova in tur an hmuh phah thei. Zu zuar pawisa an chawitir thei a, duh tawk zu fun tham chhuah pahin veng leh lamah ui an talh daih thei. Zu zuar ho lahin tun ai hian khap uar deuh se fun khat Rs.100/-a kan hralh hiRs.200/-in hralh thei ila an ti a, zu zawrh hi rangkachak khurah kan siam sak a ni hrim mai. Amaherawhchu, zu khap vanga kan lawm tlan nachhan tak hi chu dik lo taka mahni hlawkna siam nana kan hman thin vang a ni a, van lamin engtin ngai ang maw. Heti taka kan lawm tlan avang hian khap zel hi a tha chiah em tih Kohhran ho pawh hian beng sikin ngaihtuah se a tha. “Zu khap ka han sawi mawi vak ang a, miten mi thaah min ngai ang a, Kohhran, YMA leh VC-ah te dinhmun thaah mi mil chik loho hian min thlang ang” tih rilru pute hi an tam ta.

Zu hi chu rannung zawng zawng, savawm, zawng, rulngan,chepa, tho chim leh mihring tena kan duh tlan em em thil leh kross ler thlenga kan leklam a ni a, khap zawng a harsa a ni ang e, America rama an khap tum pawh khan khawpui meiin a kang per duai duai a, sipaiin ralthuam famkim nena an do pawhin an hneh lo va, tunah chuan America chu zu tam berna ram a ni ta tho mai.

Zu khap tuartu ber chu mipui leh sorkar hi kan ni. Zu chhiah kumtin cheng vaibelchhe telin kan hloh a. Central-in Rs. 1,00,00,000/- min peka za zela Rs.20/- lo tum rawh u an tih kan tum theih loh vanga mipui pawisa tur kan chan/hloh tak te hi chhut a ngai.

Zu lei nan thla tina mipui pawisa phai lam leh Burma ram lama lut leh zu tha lo enfiah hman lova kan lei a kan in sawksawk thin vanga kan thalaite tawrhna leh thih phah dan te hi ngaihtuah a ngai. Zu khap hma kum 5 aiin khap hnu kum 5-ah zu chhe in vanga thin ro (cirrhosis) natna hi a let nga aia tamin a pung. Hmeichhia leh mipa zu chhe in vanga thi Civil Hospital report leh Excise report Newslink chanchinbu in a report August ni 20, 2012 te hi en la, a va rapthlak em!

Pathian biaa inkhawm tam ber, a thuawi lo ber hnam sual kan ni, hlawhfaah vai kan duh zawk a, office hnaah vai an tha zawk, Missionary tur pawh hian hlawh kan pek that chuan an tha zawk lo’ng maw?

YMA leh eng pawlin emaw zu an man a an leihbua (tichhia)te hi dan bawhchhia an ni tih an inhre lo a, chu ai chuan sorkarah pe lut se, sorkarin sum tam hai luh nan hmang se a tha. Hetia ram rohlu (valuable state property) an tichhe ngawt thin te hi ram hmangaih loh vang a ni, duh leh sorkarin tichhia ang hmiang. An zu mante tihchhiat ngawt ai chuan phai lama hralh lehna dante siam tal ila a va tha dawn em! Mizo Christian Pharisai ho zu khap hi i hlip vat ang u.

Sap thufingin, “Thei khap chu a thlum bik” an lo tih ang hian zu khap hian in hram duhna a siam a. Tunah hian Kulikawnah chauh thingpui zawrhna awm se kan thlen phei chang chuan no 2/3 kan in duh ang. MNF hovin hriam nena an khap lai pawh khan zu in thei chu an inchhuang a nuam an ti ting mai. Congress sorkarin zu an khap loh chhung kum 2/1 lekah pawh zu in kan thiam hman kha i hria ang u.

Hawh u, Pharisai vervek rilru i paih ang u. State changkang zawkte tih dan leh America leh England mifing zawkte tihdan hian i ti ve ang u. Chhura Chengkek lo thei lo ang lek nih hi a ninawmin a zahthlak ta e.

Zu-ah hian a hranpain sualna awm lo va. Mi a-in zu a an in a, mi fingin zu fing an in mai a ni. Mi pakhat thinlung atangazu-in thil sual a phawrh chuan, kha mi pakhat thinlunga sual inthukru kha a rawn chiah puam tihna a ni. Tha awm taka awm tha si lo nun kha zu khan a rawn tilang tihna a ni mai. Lemchang nun kha a rawn lepse tihna a nih chu.

R.Zuala (RIP) ADC a nih lai khan Thangkanglo, lo kal teh” a ti a, “Enge ni ka u?” ka ti a. Ani chuan, “Thenphunga te ho hi an â ta emaw ni zu khapte an rel reng reng le, Mizo mipa ten thil sipel tawp a “U” awm hi kan thlahlel ngawih ngawih a ni tih te hi an hre lo em maw ni le?” a ti a, kan nui dun nasakher mai. Hei hian zu khap harzia a tichiang. Kei chuan, “Chuti em ni? Chukchu pawh kan ngaina chiam nem,” ka ti a, sipel tawp ‘u’ awm kan zawng ta a, 25 lai chu kan hmu a.

Kan Bible-ah hian zu in lo tura ruat bik tlem zawlnei etc te an awm a, zu in bung bungna hmuna rei tak awm a duh lova, ruk ruk a duh lo eltiang a, mahse, Vairengte atanga Tawngkawlawng thlengin rukruin kan khat hmur a, khawi khuaah mah thlai huan a him lo. Zaipawl uar turin min hrilh lova, hla zir nan leh sak na leh uniform-ah tha leh sum kan seng hle thung. Bible-in zu khap turin min ti lo va, kan khap a, ruk ru lo turin min ti a, kan ru chiam chiam.

Bible-in zu thu hi vawi 96 vel a sawi a, heng a sawina te hi chik takin en ila. Zu khap thu hi a tel hauh lo. A thim lam thlir mi (pessimist) ho chuan zu zawrh kan khap loh chuan hmeichhia leh naupang an leng chhuak ngam lovang an ti. Mahse, zu zawrh phal lai khan an leng ngam khawp. Mi tam tak phei chuan “zu in lo chu hmeichhe duh tawk an tling lo,” an ti zawk.

Mizo hi mi tihdan zir thei tak kan ni, phai ram zu tamnaa kan kalin midangin an in danin kan in ve mai.Hmeichhia leh naupangte zana khawlai leng leng turin Kristian hian kan duh em? Hnamdangin an len tir nasa em?

Kohhran Upa leh Pastor-te hi mahni hna hneh lo ber an ni em? An mite thinlung an hneh loh vanga Sorkar/Police chaknaa mipuite zu in lo tura tih luih (by force) tum ta an ni em?A tha hrui neih lohna lamah Pathian hi rawih kan tum thin emaw ni, a ruala kan dil ngial pawh hian zu zawrh hi kan khap hlei thei lo a ang hle.

Mi thenkhat hi chu hremhmun kawngkhar pawh va kik se, an hawn phal lovang. A sual em mai rawn hruai lut suh u, min tihrehawm vek ang, a awmna tur pindan dang Setana’nsiam rawh se an tih turte pawh kan awm.

Nova khan zu rui lo se a fanu-ah te khan chi a thlah ka ring lo. A ruih laia a thlahte ropuizia hi Mosia, Davida, Solomona etc. Juda mi Isaac Newtona khan lei hipna (Law of Gravitation) hmu chhuak lo se khawvel hi kan chau rawih ang a, Albert Einstein-a khan Atom bomb Hiroshima leh Nagasaki-a an thlak kha hmu chhuak lo se, Indopui II-na khan khawvel hi a tihrehawmin mihring kan retheiin kan tlem phah rawih ang a, tuna Juda pa USA Secretary of State, Henry Kissinger khu awm lo se, khawvel hi a ralti zual ngei ang. Heng hian zu rui chung pawhin thil ropui tak tak mihring hian kan ti thei tih a tichiang.

Aside | Posted on by | Tagged , | Leave a comment

Khuanglian’pa ramhuaiin an tibuai

Tahan awm tantirha an buaina.
Ramhuaiin an hmun an hauh tlat.
Tunhma, Tahan khua an sah hlim lai vel chuan Tahan leh a chheh velah thilmak leh ramhuai hnathawh mak deuh deuh sawi tur hi a tam khawp a. Tlang ram atanga Kawlphai ni sensatna hmun zuan an ni a, an luh tirh chuan lo an han vat a, tu ma la vah ngai loh ram un zet zet an vat a, khaw lum kenna chang hre lovin thing lian pui pui an kit a, an hah lutuk khaw lum bawk si chu an thawmhnaw nen tuiah an inchiah dai a, chu chu an taksain a haw hle mai a, an dam lo chuah chuah mai a ni. Thosilen an nei si lo, sikserh an vei a, kum tam an dam loh phah a. Kum thum li velah chuan hmeithai an awm thluah mai a ni. Chu nak alaiin 1918- ah hripuiin Zoram a fan chhuak a, hripui hlauvin mi tam tak Kawlphaiah an lut a, hripuiin a umzui zel a, dam renga inkawmte pawh zan an mut hlanin an lo thi mai a. Nat lawk an nei lo. Sainguauvate chhung pawh zan an mut hlanin an chhungin an lo thi reng mai a, fapa pahnih an nei na a, chi thlah sawi tur awm lovin an lo chhung thih vek a ni.

Chutiang dinhmun chuan Kawlphaia Mizote a tuam lai chuan, Khuangliana pa chuan tu ma la tukdarh loh ram ngaw a vat a. A lo vahna hmunah chuan thing-lubul a vat chhuak a. Upain thing-lubul țhutna lova neih chu an serh hle si a. Nimahse, Khuanglianpa chu pa sehhel leh ngawltawt tak a nih avangin a ngai pawimawh duh lo va, thing-lubul tlawhchhan chuan thlam a sa lui ngat a.

Zan khat chu thlama a riah laiin naupang pahnih, samkir bim bem hian a hnarkua an hawlh tlaivarsak a. Nakinah chuan ramhuai-ho chu an huangtau zel a, a chaw chhum hminsa ah te țiau leh hnahthelte an thlaksak thin a. Khuanglianpa chuan, “Tha tetein awm rawh u, Sapchhawna ka ko mai tur a nia,” a ti țhin a. Chung lai chuan Tahan khaw sattu Sapchhawna chu an chheh vela kawl-ho pawhin an fakin an nel hle a, Kristian țha tak a nih avangin, “Sapchhawna Pathian chu thil a tithei lutuk, Pathian huaisen tak a ni bawk,” an ti țhin a.

Zan khat chu Khuanglianpa muthilh laiin ramhuai pakhat chuan a lukham chu meilingin a lo muhsak a; ani thinrim chuan thingthunung chuhin chu ramhuai chu a vaw ta zawt mai a ni. Nimahse, chumi zan ațang chuan Khuanglianpa chu a damlo a, tuisik lem theilo hial khawpin a nâ ta a. A thlawhlai pawh thleng thei lovin thla ruk zet chu thi lek lekin a awm a. Nimahse, tual upaten an țawngsak a, a rawn damchhuak leh ta a ni.

Author : Andy K Zarzoliana   &nbsp

Aside | Posted on by | Tagged , , | Leave a comment

Zanlai Pitar dangdai

Zun in ching pitar chu.

Pu Aichhunga’ khan he a thiltawn mak chanchin hi a sawi fo țhin.

Chikha khuaa an awm laiin Halkha pa-ho nen Phawngpui ram velah an ramchhuak țhin a. Țumkhat chu an hlawhchham avangin an khua Chikha lamah haw rih lovin a țhiante khua Halkha ramah a chambang a.

Chumi khuaah chuan pitar damlo thi lek lek tawh hi a awm a, a thaw chauh an en a ni tawh a. Zan khat chu a thlen-in te chuan damlo kan an tum avangin amah chauhin in an nghah tir a. Zan rei viau hnuah pawh a thlennate chu an la rawn hawng thei lo va. Mutsan mai tumin a insiam a, pawn leihka ler thim chinah chuan a ding a, a zung thla tau tau a. A zun chu leiah a inkhawh ri har har a; mahse, a zun a tawp dawn hnaih lamah chuan a zun inkhawh ri chu a reh ta ta hmak mai a. A la zung reng chung si a chutia a zun inkhawh ri a tawp hmiah mai chu mak a ti viau mai a.

A ngaih țha lo chuan a dinna leihkapui hnuai thimtham lam chu a hmehenin a han chhun chu le!!! lapaw var ang maia pitar dawldang hian a kut khinghnih dawh meuhin a zun khawh thla chu a lo dawh heu mai hi a lo ni a! Chu a thil hmuh danglam tak vang chuan patling țhankin zet tawh chu mak tih luat avangin a țe țhawt hial a ni.

Ama sawi danin,” zing var ruala kan khua Chikha pan mai tur leh Nghalbuala tukțhuan fak hman tum ka nih avangin mut hma ka ngai a, leihkapui lera ka han zung chu pitar pakhat hian ka zun a lo dawh mauh mai a ni. Țhihna a awrh sen tuar lehnghal a. Khatia ka țe tak vak hnu khan, veng mawng lam ațangin lusun țap thawm a rawn chhuak ve nghal zat mai a, engvang chek nge ni, ka hmulthi a rawn tho va, ka mur sung sung thei a ni,” a ti.

Ka nu hian a sawi ve fo mai.
An naupan laia Luangmuala an awm laiin, an kawmchhaka pitar pakhat, Pi Dari an tih chu mak tak maiin mi zun in tur zawngin zan laiah a kalchhuak țhin a, a rawn hawn chuan a fenhnuai thlengin a hing rum rum țhin a, a kam chhe lutuk hi tuibur a dap ruai țhin a ni awm e. A chhungte chuan an manganpuiin an dang țhin a; mahse, a hun a rawn thlen tawh chuan mawlhtu a nei tlat a, a chhuak leh nge nge thin.

Rei tak chhung khum betin a damlo a, chumi hnu atang chuan a reh hlen ve ta chauh a ni.

Author :   &nbsp

Aside | Posted on by | Tagged , | Leave a comment

Ramhuai Antam vanga In hrang

Lungler khuaa antam zung maksak chu.
Ramhuai sual vangin In luah ngam lo.
Ramhuai phun Antam chu.
Lungler khua hi, Țiau chhak maia awm a ni a, khaw lian lo tak a nih rualin khaw hlun tak zawng a ni ngei mai.

Tawnphunga’ te nu-pa chu Thingsai ațangin Lunglerah an pem a, Lungler leh Thingsai hi khaw inhnaih tê an ni nghe nghe.

Hemi kum hian Tawnphunga nupui Zachhingi chu a raipuara nau a hring țep tawh nghe nghe a. Tawnphungate chhung chuan nul siamin vaimim leh anțam te an ching țeuh mai a. Tuk khat chu Zachhingi huan thlo chuan an huan kil lama anțam țawih duah hluah mai chu a chekthlu palh hlauh mai a. Mak tak maiin chu anțam ațang chuan thisen ang deuh hi a rawn hnam țuam țuam a, chu thil chu Zachhingi chuan a hlau ta hle mai a.

Chumi zan vek chuan Zachhingi chuan nau a hring ta a; mahse, a nau chu hlamzuihin a thi mai a. Zachhingi mumangah chuan naupang pakhat mitmeng pawl rem hian “i anțam chawhthluk tak kha keima chin a ni a, i phun nung leh ngei tur a ni,” a rawn ti țhin a. An ngaih a țha thei ngang lo va, nakinah chuan nauhring hlim Zachhingi chuan anțam chu a hmun ngaiah a ching leh a; nimahse, chumi zan ațang chuan an in chu ramhuaiin an luah ta a ni.

Zana an muthilh laite hian an chhuat laiah sakawr kepen thawm an hre thin a. An chawbel te hi thingrem chhungah a lo awm leh mai țhin a. Tin, zanlamah an in chhungah naupang tu tihhriatloh an hmu fo thin a. Tawnphunga mangang lutuk chuan an khaw chhak Dawn khuaa ramhuai hnawtchhuak thei a han ko a, nimahse chu ramhuai chu a chhuak duh reng reng lo va.

Ni khat chu Tawnphunga te se kaih hlanin a nupui Zachhingi chu chhuat laiah a lo muhil a. An inchhungah chuan palian pui mai hi a rawn lut a, Zachhingi mutui lai chu a awmah a nemsak ta chiam mai a ni. Zachhingi hlau thlabar chu pawnah a tlanchhuak a, an inah chuan kir ngam tawh lovin an țhenawmte inah a riak a. Tawnphunga lo thlen hnu chuan thil awmdan an hrilh ta vek a.

A tukah chuan an huana a nupui anțam chin țhang duah hluah mai chu a zung chawpin an lai ta a, mak deuh maiin anțam zung chu mihring pianzia ang hian a lo awm vek a. Hmeichhe pianzia ang a ni a, hnutê a neih bakah a serhhmul thlengin a lo țo iar mai a ni. Chu thil chu mak tiin an en huai huai mai a.

Dawn khua ațanga putar pakhat chuan lai chhunzawm zel tura a tih avangin an lai ta zel a, patling awm thleng an laih hnu chuan ruhkawl lian pui pui an laichhuak ta zel mai a, an ruhkawl laihchhuah chu bawmrangah an dahkhawm a, ruhkawl an laihchhuah zawng zawng chu 13 lai a tling a ni. Tin, mak deuh mai chu, heng ruhkawlte hi mihring khelruh ang deuh vek a ni bawk.

Chung ruhkawl an laihchhuahte chu an hlauh avangin daipawn ah an paih vek a, Tawnphunga te nupa chuan an in chu țhiatin Dawn khaw lamah an pem chhohsan ta a ni.

Author : Andy K Zarzoliana   &nbsp

Aside | Posted on by | Tagged , , , | 1 Comment

Damlai thla vak

1) Kan venga nu pakhat Siaha lama pasal zuk nei chu, a pasal Ramliana nen vawk leh ar vulhin ramah an riak a. Ramliana chu pa sehhel ve tak leh sa kap thei tak hi a ni nghe nghe a. Ni khat chu Ramliana’pa chu a damlo a, a nâ angreng hle mai a, zun-ek pawh a thiar thei lo va. Anni nupa chu khuaah hawngin a pa eitur sakhi sa-te an hawn a. Mahse an damlo chu pum lam fel lo a nih avangin doctor-in thil sak leh rum lam ei an phal lo va, Ramliana pa damlo lah chuan a eichak ngang mai si a, sakhi sa-rep chu ngen tak têin a ngen tlut tlut mai a. Chumi zan chuan an sakhi sa rapchunga an rep zawng zawng chu a tul chawpin a bo vek ringawt mai a ni.

An ran vulhte an ngaihtuah avangin an riaklut leh a. Ramliana chuan an vaua sakhi rahtlan chan tumin zanriah chhum hun velah a nupui chu a chhuahsan a. Khua a rawn tlai deuh deuh a, a thutna hnuaiah sakhi thawm ang tak a hre ta a. A han en chiang a sakhi pachal niin a hria a, a mei a hem tarh tarh pawh chiang takin a hmu thei a. Mahse chu sakhi a rawn lan chian hnu chuan, mak tak maiin a lû chu sakhi lû ni lovin, a pa lû a lo ni reng mai a ni. A hmel hmai mai bakah a samțuak var thlengin chiang takina hmu thei nghe nghe a; kah mi nia a hriat loh avangin rilru nuam lo tak chungin a hawnsan ta a ni.

Chumi tlai vek chuan, a nupui chu hlau thlabarin thlamah a lo awm a. Ramliana chuan thilawm dan a han zawh chuan a nupui chuan, “Nichin mai khan ka pa a lo kal a, mahse, thlam a rawn thleng theng thei reng reng lo va, ka bia a, min chhang thei miah lo a ni, in-ah damlo chau takin a awm kha a ni si a” a ti a.

Zanah chuan thlam hnuai kalkhang leh thlam bang vel chu hmawlha rin ang par par hian a thawm reng a. Ramliana chuan, “Ka pa, zah ngai ve deuh la maw le,” a ti a, chu veleh a reh ta vawng vawng mai a ni. Chumi zan chuan, zualko kâ ațangin in lama an pa damlo chu a thi tih an hria a, mak an ti kher mai.

Mihringte hian ngaihbel theih tura thil hmuhsual palh awm ve thin mahse, ngaihbel loh theih loh tur thilmak leh dangdai hi a thleng ve châwk reng a ni.

2) Luangmuala ka pute thenawm putar pakhat chu a damlo a, doctor’te chuan in lamah hawnpuia a ei theih zawngte ei tir mai mai tawh turin thurawn an pe a. In an thlenpui chuan a nâ zual sauh va, zun-ek thiarsak ngaiin a awm ta mai a. Chutia mahni pawh a inbengkang hleithei tawh lo a nih lai mek chuan veng dangah leh an thenawm hnaivaiah an chhungkhat lainate chuan an hmu ta zauh zauh mai a. An tupa mi ang pha zan lo phei chuan chiang lutuk mai hian an kawmchar behlawi zamna hnuaiah a hmu a, a sawi duh kher mai.

Nikhat chu ka pu thianpa a rawn leng lut a. “Pu Thang, hei i thenawmpa hi a kâng ve ta deuh a ni maw? Nimin tlai khan rawn len chhoh tum niawmin kan in lamah a rawn inhawl chho va, chaw kan lo ei mek bawk nen, tukverh atangin “khah, rawn leng lut rawh, kan kham țep e, i lo va tlangval tawh ve le!” tiin ka lo be luam a. kaițenah a rawn lawn chho va, a tiang hawl pawh kan kawngka biang pawn lamah a sawh ri tlat tlat a, khua a thim deuh tawh avangin inchhung lut tura kawng ka va hawn chu hmuhtur reng reng a lo awm tawh lo va, kan hmelchhiat lai a nan avangin a kir leh ni hmiang kan ti ngawt a,” a ti roh a. Ka pu chuan,” A..a bet viau a, nizan pawh hei kan nau ten an men deuh tituai a sin, a va mak awmve,” a ti ve a, mahse ka pu thianpa chuan a hmuhchian nasat zia leh a kawrlum rawng țial dan chenin midang an nih loh zia a sawi ve tlat mai a. Chumi tlai a chu putar damlo an va kan pawh chuan a kawrlum țial ngei mai kha a lo ha a, a mitmeng a tang chuan han vakchhuaka han che vel tur hmel a pu tlat lo. Tin a chhungten khum atanga a chhuk lohna chawlhkar ruk zet a nih tawh thu an lo sawi ve mauh mai.

A boral dawn zanah a nupui a inthiar a, a inthiar zo chu kawmchara vawkchaw pekna bucket a seng hawi lehtur, an lehhawi chiah chu, a pasal damlo chu a hmaah diar khimin a lo ding reng mai a. A nupui chuan, “Tei pa i lo tho harh thei a ni maw? tiin a pasal lu a khawih chu, a diarkhim chu a khawih tla tawp a, mahse a pasal chu a boral daih mai a ni. A nupui chu a țim sawng sawng a, a diar chu kengin khumlam a va pan a, a pasal damlo chu khumah a ngai ang chiahin a lo la mu reng a, mahse a diar khim kha a lu-ah hmuh tur a lo awm tawh hauh lo a ni. A nupui chuan a hlau hle a, pawna a fanute chu a ko lut a, chumi zan dar 11 velah a chu putar damlo chu a thi ta a ni. A boral hnuah erawh chuan a thla tih angreng hmuh leh sawi tur engmah a awm lem lo. Mahse hun enge maw chen chu a nupui chuan a hlau tlat mai a, mak a ti ve ngang nitur a ni, hemi chanchin hi a sawi chhuak ve fo mai.

3) Tum khat chu, Tlauhmun pitar pakhat Ngunțiali hi thinvungin a dam lo va, chakai leh sangha a rawp hle mai a. Chuvang chuan, an kawmchhakpa Kapthanga leh a fapa Hriatthanga, kum sawm mi vel chu sangha man turin maulawn ramah an kal a. Maulawn lui ah chuan sangha a lo tam khawp mai a. Tlai lam a lo ni a, Kapthanga chuan a fapa chu bukah chaw chhum turin a hrilh a. Kapthanga chuan pitar damlo tan chakai leh tumbu khawrhin lui hnar lam panin a inak chho zel a. Ni tlak fê hnuah pawh Kapthanga chuan rawn kir tih reng a nei thei lo va.

A pa nghaka ngawi renga lo țhu Hriatthanga chu lui mawng lam atangin mi tuin emaw an rawn au a. “Buangte, he lamah rawn chhuk rawh, kan hawng dawn e,” tiin an rawn au țhin a. Buangte tia a pa’n a koh thin avangin a pa emaw a tiin lui mawng lam chu a pan thla ta a. A hma lawkah aw chuan a ko thla ta a; mahse, a pa hmel reng reng hmuh tur a awm lo. Khua chu a thim fel a ni der tawh a. Hriatthanga chu a sir tawn tawn a tangin, “Buangte, Buangte, Buangte,” tiin an ko ta noh noh mai a. A hlau lutuk chuan țah pawh a țap ngam lo va. A aw hriat chu an țhenawm pitar damlo aw ngei kha a ni tlat mai a ni.

Chu aw bawk chuan, Kapthanga hnenah, “Ka pa, i fapa Lurh tlangah kan hruai dawn, țlak rawh, țlak rawh,” a rawn ti ve leh a. Kapthanga chu a chi-ai ta hle mai a, lui mawng lam chu hmanhmawh takin a zawhthla ve ta a. A khat tawkin a fapa chu a ko zel a.

Thui fê a zawh hnuah lungpui phena a fapa lo țhu khur hlak hlak chu a zuk chharchhuak ta hlawl mai ani. Khua an luh chuan an kawmthlang pitar Ngunțiali chu a lo thi fel tawh a, Kapthanga chuan chumi țuma an thiltawn chu mak a ti hle a ni.

Andy K Zarzoliana

Aside | Posted on by | Tagged , , , | 2 Comments

Damlai thla vak

1) Kan venga nu pakhat Siaha lama pasal zuk nei chu, a pasal Ramliana nen vawk leh ar vulhin ramah an riak a. Ramliana chu pa sehhel ve tak leh sa kap thei tak hi a ni nghe nghe a. Ni khat chu Ramliana’pa chu a damlo a, a nâ angreng hle mai a, zun-ek pawh a thiar thei lo va. Anni nupa chu khuaah hawngin a pa eitur sakhi sa-te an hawn a. Mahse an damlo chu pum lam fel lo a nih avangin doctor-in thil sak leh rum lam ei an phal lo va, Ramliana pa damlo lah chuan a eichak ngang mai si a, sakhi sa-rep chu ngen tak têin a ngen tlut tlut mai a. Chumi zan chuan an sakhi sa rapchunga an rep zawng zawng chu a tul chawpin a bo vek ringawt mai a ni.

An ran vulhte an ngaihtuah avangin an riaklut leh a. Ramliana chuan an vaua sakhi rahtlan chan tumin zanriah chhum hun velah a nupui chu a chhuahsan a. Khua a rawn tlai deuh deuh a, a thutna hnuaiah sakhi thawm ang tak a hre ta a. A han en chiang a sakhi pachal niin a hria a, a mei a hem tarh tarh pawh chiang takin a hmu thei a. Mahse chu sakhi a rawn lan chian hnu chuan, mak tak maiin a lû chu sakhi lû ni lovin, a pa lû a lo ni reng mai a ni. A hmel hmai mai bakah a samțuak var thlengin chiang takina hmu thei nghe nghe a; kah mi nia a hriat loh avangin rilru nuam lo tak chungin a hawnsan ta a ni.

Chumi tlai vek chuan, a nupui chu hlau thlabarin thlamah a lo awm a. Ramliana chuan thilawm dan a han zawh chuan a nupui chuan, “Nichin mai khan ka pa a lo kal a, mahse, thlam a rawn thleng theng thei reng reng lo va, ka bia a, min chhang thei miah lo a ni, in-ah damlo chau takin a awm kha a ni si a” a ti a.

Zanah chuan thlam hnuai kalkhang leh thlam bang vel chu hmawlha rin ang par par hian a thawm reng a. Ramliana chuan, “Ka pa, zah ngai ve deuh la maw le,” a ti a, chu veleh a reh ta vawng vawng mai a ni. Chumi zan chuan, zualko kâ ațangin in lama an pa damlo chu a thi tih an hria a, mak an ti kher mai.

Mihringte hian ngaihbel theih tura thil hmuhsual palh awm ve thin mahse, ngaihbel loh theih loh tur thilmak leh dangdai hi a thleng ve châwk reng a ni.

2) Luangmuala ka pute thenawm putar pakhat chu a damlo a, doctor’te chuan in lamah hawnpuia a ei theih zawngte ei tir mai mai tawh turin thurawn an pe a. In an thlenpui chuan a nâ zual sauh va, zun-ek thiarsak ngaiin a awm ta mai a. Chutia mahni pawh a inbengkang hleithei tawh lo a nih lai mek chuan veng dangah leh an thenawm hnaivaiah an chhungkhat lainate chuan an hmu ta zauh zauh mai a. An tupa mi ang pha zan lo phei chuan chiang lutuk mai hian an kawmchar behlawi zamna hnuaiah a hmu a, a sawi duh kher mai.

Nikhat chu ka pu thianpa a rawn leng lut a. “Pu Thang, hei i thenawmpa hi a kâng ve ta deuh a ni maw? Nimin tlai khan rawn len chhoh tum niawmin kan in lamah a rawn inhawl chho va, chaw kan lo ei mek bawk nen, tukverh atangin “khah, rawn leng lut rawh, kan kham țep e, i lo va tlangval tawh ve le!” tiin ka lo be luam a. kaițenah a rawn lawn chho va, a tiang hawl pawh kan kawngka biang pawn lamah a sawh ri tlat tlat a, khua a thim deuh tawh avangin inchhung lut tura kawng ka va hawn chu hmuhtur reng reng a lo awm tawh lo va, kan hmelchhiat lai a nan avangin a kir leh ni hmiang kan ti ngawt a,” a ti roh a. Ka pu chuan,” A..a bet viau a, nizan pawh hei kan nau ten an men deuh tituai a sin, a va mak awmve,” a ti ve a, mahse ka pu thianpa chuan a hmuhchian nasat zia leh a kawrlum rawng țial dan chenin midang an nih loh zia a sawi ve tlat mai a. Chumi tlai a chu putar damlo an va kan pawh chuan a kawrlum țial ngei mai kha a lo ha a, a mitmeng a tang chuan han vakchhuaka han che vel tur hmel a pu tlat lo. Tin a chhungten khum atanga a chhuk lohna chawlhkar ruk zet a nih tawh thu an lo sawi ve mauh mai.

A boral dawn zanah a nupui a inthiar a, a inthiar zo chu kawmchara vawkchaw pekna bucket a seng hawi lehtur, an lehhawi chiah chu, a pasal damlo chu a hmaah diar khimin a lo ding reng mai a. A nupui chuan, “Tei pa i lo tho harh thei a ni maw? tiin a pasal lu a khawih chu, a diarkhim chu a khawih tla tawp a, mahse a pasal chu a boral daih mai a ni. A nupui chu a țim sawng sawng a, a diar chu kengin khumlam a va pan a, a pasal damlo chu khumah a ngai ang chiahin a lo la mu reng a, mahse a diar khim kha a lu-ah hmuh tur a lo awm tawh hauh lo a ni. A nupui chuan a hlau hle a, pawna a fanute chu a ko lut a, chumi zan dar 11 velah a chu putar damlo chu a thi ta a ni. A boral hnuah erawh chuan a thla tih angreng hmuh leh sawi tur engmah a awm lem lo. Mahse hun enge maw chen chu a nupui chuan a hlau tlat mai a, mak a ti ve ngang nitur a ni, hemi chanchin hi a sawi chhuak ve fo mai.

3) Tum khat chu, Tlauhmun pitar pakhat Ngunțiali hi thinvungin a dam lo va, chakai leh sangha a rawp hle mai a. Chuvang chuan, an kawmchhakpa Kapthanga leh a fapa Hriatthanga, kum sawm mi vel chu sangha man turin maulawn ramah an kal a. Maulawn lui ah chuan sangha a lo tam khawp mai a. Tlai lam a lo ni a, Kapthanga chuan a fapa chu bukah chaw chhum turin a hrilh a. Kapthanga chuan pitar damlo tan chakai leh tumbu khawrhin lui hnar lam panin a inak chho zel a. Ni tlak fê hnuah pawh Kapthanga chuan rawn kir tih reng a nei thei lo va.

A pa nghaka ngawi renga lo țhu Hriatthanga chu lui mawng lam atangin mi tuin emaw an rawn au a. “Buangte, he lamah rawn chhuk rawh, kan hawng dawn e,” tiin an rawn au țhin a. Buangte tia a pa’n a koh thin avangin a pa emaw a tiin lui mawng lam chu a pan thla ta a. A hma lawkah aw chuan a ko thla ta a; mahse, a pa hmel reng reng hmuh tur a awm lo. Khua chu a thim fel a ni der tawh a. Hriatthanga chu a sir tawn tawn a tangin, “Buangte, Buangte, Buangte,” tiin an ko ta noh noh mai a. A hlau lutuk chuan țah pawh a țap ngam lo va. A aw hriat chu an țhenawm pitar damlo aw ngei kha a ni tlat mai a ni.

Chu aw bawk chuan, Kapthanga hnenah, “Ka pa, i fapa Lurh tlangah kan hruai dawn, țlak rawh, țlak rawh,” a rawn ti ve leh a. Kapthanga chu a chi-ai ta hle mai a, lui mawng lam chu hmanhmawh takin a zawhthla ve ta a. A khat tawkin a fapa chu a ko zel a.

Thui fê a zawh hnuah lungpui phena a fapa lo țhu khur hlak hlak chu a zuk chharchhuak ta hlawl mai ani. Khua an luh chuan an kawmthlang pitar Ngunțiali chu a lo thi fel tawh a, Kapthanga chuan chumi țuma an thiltawn chu mak a ti hle a ni.

Andy K Zarzoliana

Aside | Posted on by | Tagged , , , | Leave a comment

Rulpui Ai leh Pu Țhianzamunga

He chanchin hi, Methodhist Kohhran thlakip chhuak chanchinbu “Hriatna Robawm” chuan kum 2009 khan a lo chhuah tawh nghe nghe a ni.

Pu Țhianzamunga te chhungkua hi tunhma chuan Chin Hill ram, Chawhte khuaa awm thin an ni a, kum 2008 nipui lai khan an chhungkaw chungah mite mak tih thil mak tak a rawn thleng ta a ni.

Ni khat chu Pu Țhianzamunga leh a fapa chu saphu leh sakuh kaw lai turin an ramchhuak a. Ram pilril chin an thlen chuan puallawi chinah ințhenin an kalhrang ta a. Kawr ruam kiangah chuan sakhi patuai lo ding khur ngawr ngawr lai chu Pu Țhianzamunga chuan a hmu ta thut mai a. A chempui a phawrh nghal a, sakhi sahhlum tum chuan a va kal hnaih deuh a; nimahse, chu sakhi kiangah chuan saphai lian zet mai hi a lo inham nasa mai a.

Pu Țhianzamunga chuan tihbuai mi nia a hriatloh avangin kiansan thain a hria a, kiansan tuma a intihtuah lai chuan mak tak maiin chu saphai chuan a rawn bei ta mai a. Kawr chhungah chuan rualrem lo zetin saphai nen chuan an lum thla ta a ni. Pu Țhianzamunga chuan saphai luah chuan a chempui chuan a sat vak vak a, saphai chu a chalchang ta a.

A fapa chuan an thawmvang hriain an lam a rawn pa thuai a, saphai chu an hnukchhuak a, tawng 15 laia sei a lo ni a. Puah tura lui lama an hnuhthlak lai chuan a lû a rawn din ta ur ur mai a, a fapa chuan lung lian takin saphai lû chu phek vek khawpin a chhu chiam a, a thi felah an ngai a.

Pu Țhianzamunga chuan chemin saphai lu a han tan mai chu, mak tak maiin thlipui a rawn thawk ta chiam mai a. An kianga thingkung hrawl pui puite chu rawn tlu tur ang maiin an ri tuar tuar a. Chutih lai chuan an saphai chu lubung chung chuan a rawn che tha leh a, dung pil pilin a ding a, an kianga fahkung chawnpuar tia tiate chu a hem thlu țhuai țhuai mai a. Rawbulchhah an sat a, an vuakrawn chiam mai a, an vawhlum ta a ni.

Lui kamah an han puah a, thlipui chu chawl lovin a thaw vuk vuk reng a. A fapa phei chu a thauvah a man a, a che hleithei meuh lo va. Amah Pu Țhianzamunga chuan, “Mipui tam takin min thlir țhup ang mai hian kan inhria a, ka hmulthi a tho sung sung mai a, Ka fapa phei chu a hlauhthawng vang nge a chesual khut khut reng a, sawi kher lo mahse a hmelah a hlauthawngin a thlabar hle a ni,” a ti.

A fapa chuan in lama hawn thuai thuai a duh a; nimahse, Pu Țhianzamunga chuan a sa hawn ngei ngei a duh si a. Saphai pum an han keu a, mak tak maiin artui tia vel lunghlu var pahnih mum pal mai hi an haichhuak a, an kianga lung chungah chuan insi rialin an dah a, hlauh nen lawm nen an fawmkem a. An hnuah rangkachak tlawn ruk, kezungpui tia vela lian, inchi ruk laia sei an hai chhuak leh a, chu chu a hmaa lunghlu nena fun khawm an han tum a; nimahse, mak deuh maiin chu lunghlu, lungpui chunga an dah chu a lo bo daih ringawt mai a ni. Midang tumah lo kal an awm si lo va, mak an ti kher mai.

Khua a tlai tawh hle a, saphai sa chu hrang lian pui puiin an chan a, damdawiah a thau, a mít leh a siak an la a, chhawlin an fun a, thangțung hruiin an țawn a. Pu Țhianzamunga chuan a hnuaa sawi leh dan chuan, “Kan pa-fa khan hlauthawnna kan nei ru tlat mai a, kan inbiak pawh khan mumal nei lo takin an inbe khur hlawk hlawk a ni ber mai,” a ti țhin.

Saphao sa chu an hawn theih zaha tam an la a, hmanhawh takin an hawng hlawk hlawk a. Mahse hnunglam ațanga rawn umtu nei niin an inhria a, a khattawkin hnung lam an hawi zawk zawk reng a, a fapa phei chu puitling a ni uaih tawh nachungin a țap lek lek hial a ni. Thui tawk an thlen hnuah țhawngaleivir hian a fapa chu a rawn deng dawt mai a, a’n inbawihsawm nghal a, an rangkachak chu an han zawng ngial a, an hmuzo tawh reng reng lo va, a funna chhawl ringawt chu a lo awm tlawng a. A fapa chuan an saphai sa chu paih vek a duh a, mahse Pu Țhianzamunga chuan a phal lo va. Chutiang chuan khawchhung an lut a.

In an thlen chuan an vengho chuan hlauh an nei tih an hrethiam nghal a. A hre hmasa apiang an lenglut a. Pu Țhianzamunga chuan thil awmdan a sawi mawlh mawlh a, mak an ti kher mai. Chumi zan chuan Saphai mít chu chingal dahna saidawium-ah tha takin an khung a, phui takin an chhin bawk a. A siak chu sipai tuithawl-ah an dah a.

Chumi zan chuan Pu Țhianzamunga chuan mumang mak tak mai hi a mang a. A mangah chuan a fapa nen ramhnuaiah an lo awm a, khawchhungah chuan aurinna hian mi pakhat a au lauh lauh a. Chupa chuan, “Țhianzamungate pafa man tur a ni” a lo ti a. Tichuan an hnung lamah sipai pahnih an lo kal a, “Kan lalnu in thah avangin man in ni” an ti a, an hruai ta a. Lung-inah an khung dawn a, an țang nasa mai a, an sipai pakhat chu a nghawng an chhawkbunsak a. Sipai hotu chuan a sawisa hrep a, lung-ina thla li tang turin an lo ti a.

Chumi zana a mumang chu Pu Țhianzamunga chuan mak a ti kher mai a, zingah an saphai mít chu a lo awm tawh lo va, a siak pawh an dahna bur chhin inhawng miah lovin a lo bo daih ringawt mai a ni.

Saphai an thah ațanga ni hnih hnuah chuan Pu Țhianzamunga te pafa chi an khua a sik a, khum betin an nâ nghal char char mai a. Zawlsei khuaa țawngțai dam thei an kova, an tha thei chuang lo va. An sakawrte tiralin kawlphai damdawi an pan a, an țhachhuak thei reng reng lo va. Kawlpui khuaa dawi sut thiam Phung Tin-a an pan a, an țhatpui chuang lo va. Laitui khuaa an sakawr leitu Pu Khan Za Khupa chuan “Ramhuai lung-inah in tang a ni, in dekral duh tawh suh u, in thihpui miah lovang,” a ti a.
Mak deuh maiin an nat ațanga thla li- a ralah chiah chuan damdawi enkawlna pawh la lovin an rawn dam ta phawng mai a ni.

Pu Țhianzamunga hi Lalpa khawngaihna zarah a la dam hrisel hle a, a ramkal changa saphai a hmuh leh pawhin thah tinah a tih duh tawh reng reng lo a ni.

Author : Andy K Zarzoliana   &nbsp

Aside | Posted on by | Tagged , , | Leave a comment

MAWNGKAWHUR (GAY) NUPA AN VUAK LAI ENTU AN TAM HLE : KAN FATE TAN ZIRTIRNA THA DEUH A NI AN TI

Banda Aceh province, Indonesia ramamawngkawhur (gay) mipa pahnih, kum 20 leh kum 23 mi Court-in mipui hmaa vawi 85 zet vuak/hlap tura a hrem te chu tunkar Thawhlehni , may 23 khan, Muslim thlaserh Ramadan thlen hmain vuak an ni ta. Mipui entu 1,000 chuang awmin, chung zingah University kal lai an tam ber (Hemi chungchang hi MSR-ah post tawh a ni).

May 23-a mipui hmaa hemi te nupa-mawngkawhur an vuakna hmun hi Synhada Mosque Plaza, Banda Aceh province ah a ni a, mipui lo kalkhawm te chuan mit tla dawnin, en nawm mak tak hmuhin an thlir huang mai a ni! An vuak tan hmain Quran bua thuchang awmte chhamin, zai te pawh a awm a, Quran bu thu leh hla angin an hla sak chu, “Pathianin mipa leh hmeichhia nupa turin a siam a…” tihte a ni. Syiah University a zirlai engemaw zatin an vaw laichu a hmunah an thlir a ni.

Murleili, kum 65 a upa chuan, “Sharia dan anga an hrem lai hi ka hmu duh a, enge a hremna chiah chu ka hre duh. Kan fate tan zirtirna tha tak a ni dawn a ni” a ti. Hetia mipui hmaa vuak an nih hian a vawtute hian dan ang thlapin, police endik puiin an kut lek dan thlengin an en dik a, 90% vela zak kau hakin an vaw tur a ni. Kum 23 a upa zawk chu khabe hmul a nei a, na tilutuk hmel a pu lova; kum 20 mi zawk erawh chu a tap deuh pur niin an sawi, na a tih hmelin an vuak vawi 83 na tlin hmain, a laklawhah a tuihal chu plastic novin tuite pawh an intir a, chutih lai pawhin a maimichhing tlat, an ti. Entu mipui tam takte a hmu ngamlo te pawh a ni ta ve ang, a zahthlak awm si a.

Banda Aceh hmunah hian nikumah hmeichhe 4 te chu an inchei sexy lutuk bawk nen, Uire a puhin vuak an lo ni tawh bawk. “Uire denhlum” ai chuan, vantlang hmaa han invuak thrak thrak chu a la zia zawk awm e. Human Rights group lam chuan hetianga thiltih hi Indonesia-moderate Muslim ram chu Islamic fundamentalism-ah a tluk luh tanna niin an ngai a, thenkhat chuan “sakhua leh politic inchawhpawlhna”(toxic of mix religion and politics) hrichhiain Indonesia boruak thiang chu tibawlhhlawh mekah an puh thung.

Jakarta khawpuia Kristian Mayor awm chhun Basuki-Ahok chu inthlanah a chak loh veleh, Quran sawichhia (blasphemy) a puhin kum 2 atan tan tir nghal a lo ni tawh a, tun hnaiah Jakarta hmar lama Gay-ho “sauna meeting” an tiha tel mi 141 zet man khawm an lo ni tawh bawk. Indonesian thenkhat chuan “Gay ho chu Muslim an ni thei lo (gay people, no Muslim)” tih ngaihdan an nei a ni.

Kum 1998-a Dictator Gen. Suharto paih a nih hnuah media zalenna lo awm tanin, fundamentalist/conservatist-holeh sakhaw mite aw a lo ri ring chho tan a ni. Kum 2004 ah pheichuan Islamic Defenders Front (IDF) lo ding chhovin, chungho chu Tsunami-in an ram nuai chiam khan ruang tam tak tuipui atanga la chhuakin an buaipui a, an hmingtha hle a ni. Mipuite chuan IFD chu “pasaltha” hmuhin an hmu a, an ngaisangin, mirethei zingah pawh an tla na hle a, chung mite chuan Jakarta Mayor “Ahok” chu,”A chhang eitute doral an chang zo ta” tih ang mai khan, Quran sawichhiaa puh kawngah chuan lunga den hlum hial an duh leh ta si a ni. Mayor Ahok kha Muslim zingah pawh a hnathawh that leh eiruk a duh loh vangin a lar hle.

Bandah Aceh province hi “Mecca Varanda” tiin an lo ko hial thin reng a, Indonesia Central sorkar chuan mahni rorel inreltheihna (autonomy) sang tak pe in, 2001 atang khan Muslim dan khirh “Sharia Law” hman an titlu a ni. He Sharia Dan ang chuan Zirtawpni a Muslim Prayer a tel lo mipa te, playing cards/carrom board pen a tawngtai tura kal lo te, Zu in leh Mezial zu leh Uire, Gay etc. te chu mipui vantlang hmaah vuak tur an ni! Mizoramah hmang ve ila chuan ni tin vuak tur, en luih luih tham tur hi kan awm mial mai thei e?

IDF te chu police ni lo, mahse, Indonesian “Rilru Police” (unofficial morally police) angin an che chhova, anni hovin tling lova an hmuh chu hrem tur an ni tawp mai! Banda Aceh-ah chuan miten gay /lesbian an nih leh nih loh sawi kher kha tul lova, “Don’t ask, Don’t tell” policy kal puiin, Banda Aceh hmuna gay-hote chu an mangangin an chiai ru chho hle a ni.

Hatoya, Gay Rights activitist ve thung chuan May 23 a an vuak takte nupa enkawl zui nan tanpuina a khawn zui a, mahse, Banda Aceh a misual (thugs) rual ten an beih a hlauh vangin, “Theih tawpin tanpuina kan thawk zel ang a, underground-in kan bei ang. Bandah Aceh hi kan chhuahsan lo vang” a ti.

Mizote zingah pawh danglam mek khawvelah kan chen miau si avangin, human rights base-in “Gay Rights activist” te an lo la chhuak ang. Supreme Court pawhin “Gay-homosexuality” chungchangah thutlukna te a la siam mai thei (tunah pawh ennawn (review) tur anga sawina a awm).

Hetiang hunah hian Mizo society leh kohhran-ten engtinnge kan lo thlir ve ang? Ngaihtuah tham tak a tling.

Author : Ct Lalrinawma   &nbsp

Aside | Posted on by | Tagged , , , | Leave a comment