Forensic Files – Deadly Knowledge

• Nawhchizuarte chanchin zirtuin nawhchi a zuar
• Nawhchizuar lemchang chu

Kum 1995 a thil thleng a ni a. Fall Semester tan hlim khan hmeichhia leh mipa zirlai inzir pawlhna/luh kawp theihna (Co-ed) a lut kum 23 a upa Tina Biggar-i chu a bo tih puan a ni. A bo lai hian Research Project pakhat “Studying Health Risk of High Price Call Girls in Detroit” tih a buaipui mek a. Mahse, Nawhchizuarte hian an hnathawhnaah hriselna aia hlauhawm zawk hmachhawn tur an nei tih a hmuchhuak ta thuai a. Kutpalh tuar thei reng dinhmunah an ding a ni.
Tina Biggar-i chu kum 23 upa Psychology Major zirlai a ni a. Detroit khawpawn a awm Oakland University, Rochester, Michigan-a Senior Year zo tawh mai tur a ni. Sipai chhungkua atanga seilian a ni a. A thiante chuan mi harhvang leh mi thawk rim tak angin an hre thin. Fannie Weinstein-i, Journalist sawi dan phei chuan “All American Girl” an tih ang chi hi a ni a (Americal Girl: Hmeichhia a hringnun kawng engkima theih tawp chhuah tum tlat mi, bialnu emaw nupui emaw mahni bialpa emaw pasal te chhawmdawl thiam tak, sam buang theng mai, cute, sexy leh caring bawk si sawina mai a ni e). A pa hi Coast Guard-ah Commander niin a nu erawh Nurse a inziaklut ngat a ni bawk. Tina hrechiangtu leh a thian hnai te chuan Tina i chu fiam dawl tak leh zirna ngaihsak mi tak niin an sawi a. A thian leh zirlaipuite pawn an ngaina a. Chutiang bawkin a chhungte pawn an ngaina em em bawk a ni.
Tina-i hi Rochester Chop House ah Waitress-a thawk chungin school a kal a. An zirna In atanga hla vak lo veng chung lam Apartment-ah a bialpa Tom-a nen an cheng dun a ni. Tom Nurnberger-a hi University of Michigan a zirlai a ni ve thung. Hemi te pahnih hi inthen-inkawp ti ang vel chi hi an ni a. An thiante paw’n an inkawp tluan theih ang em tih an chiang chiah bik lo. Tina-i hian ze dang a nei ve tho va. Mi ringhlelhna ngah mi, mi thungrul hmang leh a chang chuan thin pawh ram ve thei tak hi a ni a. Chu nunchang chu mi tam zawk hriat loh leh la hmuh loh a ni thung.
Tina-i chuan an School a mi tur Research Project pakhat “A survey of sexual historty and health practices among women employed as escorts” tih a buaipui a. Call girls man to tak tak-te leh kawtthler vela KS inpho thinte hian sex hmanna atanga natna kai chhawn theih (STD) chungchang an hriat chin a inang em tih hriat a duh a ni. Amah ngeiin a thil hriat duh chu zirchiang turin thuthlukna a siam ta a. A ngaih dan chuan chutianga amah ngeiin a zirchian chuan School atangin tha takin a graduate thei dawn a. Chuvang chuan High Class Call Girls-te leh AIDS chungchang an hriatnate zirchiang turin a rilru a siam fel ta a ni. Chu ta tanga a thil zirchhuah leh kawtthler vela inpho thin KS te thil hriat chu a khaikhin leh dawn a ni.
Kum 1995, August ni 23 khan Tom-a chu hnathawk turin in atangin a chhuak a. A sawi dan chuan a chhuah laiin Tina-i chu a la muhil a. Chumi zan in a va haw chuan Tina-i chu a lo awm ta hlek lo mai a ni. A sawi dan chuan Tina-i chu mit fiah vak lo a ni a. A tarmit vuah lo va ina a hnutchhiah avang chuan a chungah thil tha lo eng emaw a thleng a nih a ring a ni. Tom-a chuan Police-te chu a phone ta nghal vat a. Ronald Shankin, Detective chuan, “Mibo chungchang bikah hi chuan ni hnih khat hnu velah hi chuan Case hi chhuizawh a ni deuh tlangpui a. Achang chuan dar kar tlemte chhung pawhin chhui zawh hman a ni thin. Phone hmangin mibo chu khawi ah nge a awm a khawiah nge a kal tih a hriat theih mai thin a ni” tiin mibo chhuichhuah dan thlangpui a sawi a. Mahse, he case bik hi chu a tirte atangin a danglam bik tlat mai a ni.
Tina-i car chu hmuh tur a awm lo va. Apartment chhunga Tina mimal bungrua erawh engmah bo thlau a awm lo. Tina-i thiante zingah lo hmu emaw Tinain a va biak tumah an awm lo va. An han chhui zel chuan Police-te chuan Tom-a tel lovin Tina chuan Apartment luah hran a tum tih an hrechhuak a. Chutianga mahni mai a apartment luah hran han tum tlat mai chu thil dik lo eng emaw a awm a ni lo maw tih ngaihdan an nei a ni. Chuvang chuan an hringnunah eng thil chiah nge thleng tih hre turin Tom-a chu an biak ngei a ngai ta a. Hmuh hmaih eng emaw an lo nei pawh a ni thei bawk a ni.
Tina-i chuan Tom-an nula dang a hmu fal thin tih finfiahna a hmuchhuak tih Police-te chuan an hrechhuak a. An han chhui ril deuh a. An beisei lo deuh maiin Police-te chuan Tina-i chuan nun thu ruk zep a lo nei reng a ni tih an hmuchhuak ta tlat mai le. Let leh lawk i la. Kum 23 a upa Psychology zirlai Tina Biggar-i chu Honour zirlai thawk rim tak mai a ni a. A thiante sawi dan chuan eizawnna kawngah pawh hmabak eng tak a nei a ni. Detroit khaw pawna awm Oakland University-a Fall Semester tan hma hretin chhui zui ngaihna awm lovin a bo a ( US University-te hian {Ka la kal lo} Admission lak dan chi hnih an nei a. Fall Semester leh Spring Semester in an then a ni. Fall Semester hi August-ah intanin December thla tawp emaw January thla tir-ah a tawp a. Chuan Spring Semester chu January-ah intanin May thla tir lamah a tawp ve thung a ni). A bialpa Tom Nurnberger-an a bo thu hrilh tura Police-te a va biak pawh chuan dan pangai angin amah chu an lo ringhlel nghal a. Sawi tawh ang khan hemite pahnih hi inthen-inkawp inkawp-inthen tih ang chi hi an ni a. A bo hma thla tlem liamta khan Tina-i chuan hmeichhe dangin Tom-a hnena a lo thawn ‘Greeting Card’ a hmuchhuak a. Chuta tang chuan Tom-a chu a rinawn lo tih a hre chhuak ta a ni. Mi thenkhatin an insual lai an hmu fo va. Tom-a chu Tina-i tan inpumpek viau angin lang mahse a chang chuan an inlaichinna chu alh chhuak mai thei dinhmunah a ding thin a ni. Midang zawng aiin Tina-i bulah hun a hmang tam a. Midang zawng ai pawhin Tina-i chu a hrechiang zawk bawk. Chuvang chuan dan pangai angin rinhlelh a kai lo thei lo va. Chutianga mizia inperhsan tak an nei chung chuan Tom-a chuan Tina-i bo thu-hlaah inhnamhnawihna a nei lo tiin tan a khawh ve tlat a ni.
Tina-i hi Rochester Chop House ah Waitress-in a thawk a. Tom-a chuan Tinai chu hna thawkin restaurant ah a kal leh kal loh hre turin a thawhna restaurant chu a va bia a. Restaurant lam chuan Tinain a hma thla li liam tawhah khan a hna a bansan tawh tih an lo hrilh a. Tina-i chuan Tom-a bulah a hna bansan chungchang engmah sawi a nei lo va. Thil thleng danglam awm lo ang maiin a Waitress thawmhnaw suin a nawt mar thin a ni. Tom-a chuan Tina-i kalna chin hriat theihna tur eng emaw a hmuh beiseiin apartment chu a han dap ta a. A hma zawnga a la hmuh ngai miah loh bag mum pilh pelh te hi a hmuchhuak nawlh mai a. A chhung a han hawn chuan condoms thahnem tak, mal thleng a sei mawza, hmeichhe kawrhnuai, sexual lubricant (a saptawngin dah mai ang), credit card leh LA Escort Service-te hnena thawn tur lehkhathawn te a lo awm a. Lehkhathawn chung vei lam kil sirah chuan ‘Crystal’ tih a inziak bawk. Tichuan Tom-a chuan LA Escort Service-te chu Tina Biggar-i chanchin zawtin a va be ta a. LA Escort Service lam chuan Tina Biggar tih hmingpu tumah hriat an neih loh thuin an lo chhang a. Mahse Crystal tih erawh an Escort neihte zingah chuan a lar ber te zinga mi a nih thu an lo hrilh ta a ni.
Khawpui lian tam zawkah hi chuan Escort Service hi a awm deuh vek a. Dar kar khat ah $ 150 atanga $ 300 chawiin mipate kawppui atan an nulate an theh chhuak thin a ni. An hnathawh ber chu sex a ni ber. Tom-a chuan Tina-i chu a rukin man to taka rawih theih call girl angin a lo khawsa niin a ringhlel tan ta a ni.
Tina-i khan high class call girl-te chanchin leh AIDS chungchang an hriat dan zirchian a tum kha a ni a. Police-te chuan an han chhui zui ta zel a. Tina-i chuan a thil zir chianna tur a tan Escort Service lam bepawpin an hmeichhiate a kawm thei ang em tiin a dil tih an chhui chhuak a. Chutianga a han kawm chuan an hnathawh chuan amah zawk chu uaithluin tih ve duhna a neih tir ta zawk a. Chutianga tih ve a duhna chhan chu pawisa vang niin a lang. Tina-i khan pawisa a tlachham a. Credit Card a hmanna rulh a ngai a, car thar a mamawh bawk a, a zirna senso pek a ngai bawk nen Escort hmeichhia te pawisa thawh chhuah chu Steak House atanga a thawh chhuah aiin a tam fe zawk a. Escort tura tum khat a va chhuahin dar kar khatah $ 250/- lai a hlawh pha a ni. Hmeichhiate hian neih phak loh ita suangtuahna (fantasy) an nei deuh vek a. Tinai pawh khan chutiang chu a nei ve te pawh a ni thei a ni. Miin amah chu bengkhawn se tih a duh a. Call girl han nih khan a mamawh a hmu a. Ngaihsak leh bengkhawn a hlawh a ni.
A tir lamah han tang viau mahse a tawpah chuan Escort Service-te chuan Tom-a lo rinhlelhna chu a dik a ni tih an pawm ta a. Tina Biggar-i chu ‘Crystal’ tih hming puin Escort in a lo thawk reng a ni. An hnuaia a thawh mai bakah Escort Service dang hmun hnih hnuaiah thawk telin dawrtu pawh tam tham zet a nei tih an sawi bawk. Chumi awmzia chu Tina-i thihna chungchangah rinhlelh thei tur mi an tam dawn hle tihna a ni.
Tina Biggar-i bo chungchanga investigation chuan thuruk tuihnai lo zet mai a rawn hailang ta a. A hma kum liamta atang tawhin Tina-i chu man to zeta ruai theih call girl-ah a lo tang tawh a ni. Tina-i tan chuan chu a nun thuruk leh thil thleng vel chu a bialpa lak atangin a zep a ngai a. A chhan chu a bialpa bulah cheng a ni a. A bialpa chuan a nunphung tam tak a hriat sak a. Escort Service te nen inkungkaihna an nei tih hriain call girl a ni tih hrechhuak ta se buaina lian zawk a thleng thei a, a nunna pawhin a tawrh phah thei a. An pahnih nunna tan ngei pawh dinhmun derthawngah a awm thei a ni. Tom-an Tina-i nihna dik tak a han hriat chhuah chuan lungngai leh beidawng takin a awm a. Tum khat phei chu a silai kawl lai hmanga inthah hial a rilruk a. Mahse, a thiante biaiin anni chuan an lo titi pui a. A tawpah chuan Tinai chungah chuan eng thil chiah nge thleng tih hre turin a tul leh tih ngai apiang tia a tawp thleng turin rilru a siam fek ta zawk a.
Escort Service-te record an han enfiah a. ‘Ken Tranchida’ tih hmingpu hnen atangin rawngbawlsak tura Tinai ngenna tam tham zet an hmu a. A vawi khat nan Tinai leh Kentranchida te chu Blue Bird Motel ah an inhmu a. Chu chu Tina-i bo hma ni 12 hmalam khan a ni. Apartment-a Tina-i bungrua an hmuh zingah chuan Ken-an Tina-i hnena a thawn love letter a tel a. Ti hian a lo inziak a,

“Dearest Tina,
My hearts is yours for you to keep. Your love will lift me off my feet. You came to me your love so willing. I know its worth all our waiting.
Love
Ken”.
Police-te chuan Ken Tranchida chu an han chhui zui ta a. A chenna apartment an han luh chuan Refrigerator kawngkhar a “Crystal” tih cheimawia ziak lo intar chu an hmu a. Tinai dama an hmuh hnuhnun ber chu August ni 23 kha a ni a. Chunglai hnai vela Car Dealer pakhat chuan Tinai leh Ken Tranchida te chu a hmuh dun thu a sawi a. Car vel an enlawr lai a lo hmu a. Ken-a chuan Tinai kha car leina tur pawisa puk tir a lo tiam a ni.
Ken Tranchida chu kum 42 a upa pawikhawihna vanga thiamloh chantir tawh a ni a. A nunhlui an han chhui zui ta a. Bad check (Bank Accounta pawisa awm aia tam check hmanga lachhuak) ching, forgery, fraud, embezzelment leh ruk ruk ching thang a ni tih an hrechhuak a. Tinai bula sumdawng hausa tawntaw anga a lo insawi ang ngawt kha chu a lo ni bik lo a ni. Mi vak rawlai, awmhmun nghet pawh nei lo, maltlat mi leh thil tenau ruk ching a ni a. Rei vak lo chu thiamthil ngai lo ang chi hna hnuaihnung lam deuh a lo thawk ve tawh thin a ni. He pa nihna tak hi han sawifiah a har. Aw sin ret rut, mi khawngaihthlak hmel hliah hliah a ni ber. Chutiang mi chuan Tinai chu a bialnu ang rengin a lo chei bawl chu a ni a.
Police-te chuan thu an han zawt fiah ta a. Ken-a chuan Crystal-i tia a hriat Tinai chu Escort Service-te kal tlangin a vawi khat nan an inhmuh ngei thu a sawi a. Chumi hnu chuan Agency te hriatpui lovin an inhmu leh thu a sawi bawk. Thian an han nih chho hnu chuan sex an hman pawhin Tina-i chuan a man a thing tawh lo va. Police-te a hrilh dan chuan kar khat liamta mai khan Ohio lama thlawk turin Tinai chu Airport ah a va tlah a. Lo dawrtu rawng va bawl sak turin kal a tum a ni. Thlawhna veivah leh a chuangte chhinchhiahna Flight Log an han enfiah ta a. Ohio lama thlawk thlawhna pakhatah mah Tina-i hming a lo chuang tlat lo. Ken-a chuan Tina-i a thangbo hlana a him zawk beiseiin Tinai chuan a car a kawl tir a ni tiin police-te chu a hrilh a. Police-te chuan Tinai car chu enfiah an han dil ta a, Ken-a pawh chuan a lo remti ve mai bawk a. A chhungah chuan lehkha a Escort Service-te lo dawrtu hming leh address tam tham zet leh an In zawn hmuh theihna tur inkawhhmuhna inziak an hmu a. Chuta tanga an hriat chhuah tak chu Tina-i chuan ram pawn lam atanga lo bepawptu leh dawrtu pawh a lo neih reng a ni. Chuvang chuan ram pawn lamah thlawk chhuakin hmun dangah pawh a kal ve thei a ni. Tina-i car hnung lam bawm an han enfiah chuan hnawmhnawk hian a lo khat hi a ni thawthang a. Mahse tualthahna a thleng ngei a ni tih finfiahna tur hnuhma erawh engmah hmuh an nei lo.
Research atanga a lan dan chuan tual thattu tam zawk hi chuan an vawi khat tualthahnaah an mi thaha te chu an hriat bel em em hmunah an theh thang thin a. Chuvang chuan Police-te chuan Ken-a chenna In leh a bul velah hnuhma enfiah turin ruang zawng thiam uifing (cadaver dog) an hmang ta a ni.
Michigan Trooper (sakawr chungchuang sipai) Richard Heathrew leh Kai (ui) a nena lo inzui hrep tawh an ni a. Kai hi Cadaver Dog tawnhriat ngah zet mai ruang zawng chhuak tur liau liau a zirtir a ni. Chutiang ui zirtir tur chuan Trooper-te chuan Trainingna thinghmun-ah chuan mihring tisa them emaw mihring taksa atanga lak thil tuiril lam ang chi te chu an han thukru a. Ui chuan an thil thuhruk chu a han zawng kual vat vat a. Ran ruang a haichhuak a ni chuan lawman an pe lova. Mahse mihring ruang a haichhuak a nih chuan lawman an pe ta thin a ni. Chuvang chuan lei an hai nasain lawman hlawh turin an thawkrim ve hle thin. Richarda leh Kai te chuan Kena inluah bualhnaia awm ngaw leh a hnathawhna thin Monastry (puithiamte awm khawmna) bul vel te chu Tina-i ruang a awm em tiin an han zawng tan ta a. Acre za chuang a zau an han zawn ngial hnu pawhin engmah hmuh an nei lo. Police-te chuan han hlinna mai tur finfiahna an neih loh avang chuan Ken Tranchida chu an khuahkhirhna atangin an chhuah zalen ta rih a. Chu chu Policete inchhirna tur an tihsual a la ni thuai dawn a ni.
Police-ten Tinai bo chungchanga Ken Tranchida thu an zawh fiah hnu chuan finfiahna tlakchham vangin an sezawl chhuah ta ringawt a. A sawi baka tamin Tinai awmna chin chu a hria ang tih erawh an ring a ni. Kena leh Tinai te inlaichinna chu sawmdawnna ngawr ngawr lo deuh a ni tih erawh a chiang a. Sawi tawh ang khan Kena love letter kha Tinai bungrua zingah hmuh a ni a. Chumai bakah Kena khan car thar leina turin Tinai kha pawisa puktir a lo tiam a ni kha. Tanpui a tiam a. A hnen atanga a kal san loh nan thu a lo tiam pawh a ni thei. Tinai pawh khan a duhzawng a neih theih nan thian tha angin a lang der te pawh a ni thei ve bawk a ni.
Hnu han chhuizuina mai tur a awm loh avang chuan Policete chuan Tinai car chu a vawi hnih nan ennawn leh an rel ta a. Tinai car chu ngunthluk lehzualin an han enfiah ta a. An enfiah hmasak tuma thingpui no pang a thil kai an hmuh coffee sehna emaw an ti kha an han enfiah chuan thisen ngei niin an hre ta. Car hnunglam bawm a carpet chu an han hik a, ding lam pangah chuan thi khar tam tham zet an hmu a. DNA an han tih chuan Tinai thisen ngei a ni tih an finfiah ta. Thisen tam dan atang chuan tualthahna a thleng ngei a ni tih a chiang a. Tina-i bo atangin a car chu Ken Tranchida kutah a awm avangin Kena chu rinhlelh pui ber a ni lo thei lo va. Mahse, chutianga finfiahna an han neih meuh chuan Ken Tranchida chu chin hriat lovin a lo relh bo ta deih mai a ni.
Police-te chuan Tina-i bo atanga thla khat a ral hnuin an thil chhui laiah chuan hlawhtlinna an tawng ta a. Ken Tranchida awmna chin ngaihvenin an han zawng kual a. A unaupa chuan an nute-i In thin an rauhsan tak chu ngaihven turin Police-te chu thurawn a lo pe a. Chu In chu Tinai chenna atanga mel 10 leka hla a awm hi a ni a. In leh a vel te chu an han dap ta a. In hnung lam thing hmunah chuan hmeichhe la valai tak ruang chhe tawh tak mai hi an hmuchhuak ta a ni. A ruang awmnaah chuan thisen hmuh tur a awm lo va. Forensic Scientist-te chuan tualthahna chu hmun dangah a thleng tih an hre thei a ni. Dental record atangin ruang chu Tinai ngei a ni tih an finfiah ta bawk. A nghawng atangin ruang chu a tawih tan avangin Coroner chuan Tinai chu rehhlum ngei niin a ring a. Hei hi a chhan chu thihna thlen laia ruang atanga thisen chhuahna atangin tawih hi a intan thin tlangpui a ni.
Tinai thihna chu thih dan pangai lo (natna vang emaw dam lohna vang emaw ni lo) a ni tih a chiang a. A chhan chu a lu velah chuan ruh keh emaw khi emaw a awm lo va. A nghawng a hliam chu a thihpui ber niin a lang. Mahse a ruang a chhiat tawh avangin a nghawng chu zai nge rehhlum tih erawh finfiah a har a. A nghawnga hliam chu a thihpui a ni tih chu an thuthlukna a ni ta.
Ram pum huapin Ken Tranchida zawn hna chu tan a ni ta. A tawpah chuan Detroit khaw chuan hnuai lamah Ken Tranchida chu hmuh a ni a. Police-te chuan Ken-a lo bihrukna In chu an hual ta. Kena chuan man tumin Police-ten an hual tih a hriat chuan Police kuta a inpek hmain bathroom ah a banrek a thisen zam a lo va pir thler a. Police kutah chuan a inpe ta a. Policete chuan an man ta. Dar kar eng emaw zah an han dawp a. A tawpah chuan Ken-a chuan pawisa chungchangah Tinai nen inhnial buaiin an inchai thu a sawi a. Chutia an inchaina lamah chuan Tinai chu a tlu a. A lu a tauh a, a thi zui ta mai niin a sawi a ni. Mahse exray hmanga Tinai luruh an han enfiah chuan Kena thusawi nen chuan an inmil thei tlat lo. Tinai luruhah chuan khi emaw ruh keh emaw a awm lo va. A luruh chhungah thi put lo awm ta pawh ni se a luruh chhungah chuan thisen an hmu tur a ni a. Chutiang thisen chu luruh chhung lamah hmuh tur a awm hauh lo a ni. Tinai car hnunglam bawma finfiahna an neih atanga chhutin Tinai khan a luah hliam lo tuar ta pawh ni se chu hliam chu thihpuina tham a tling lo tih an chiang a. Chung finfiahna hmang chuan Kena chu an han hmachhawn leh ta. A thu sawi chuan Policete chu a barakhaih chiang hle. Kena sawi dan chuan Tinai khan pawisa harsatna vangin a phunnawi reng a. A nguiin a hlim lo tak zet a. Chu a lungngaihna chu tih tawp saka lungai tawh lova siam turin thuthlukna a siam ta a. Tichuan, Tina-i chu lungngaia a awm tawh loh nan a that ta a ni. Policeten chu thu an han hriat chuan mak tiin an ka ho mai a ni.
Ken Tranchida chuan a thiam lohna a pawm phawt chuan hremna nep zawk an pe ang tia an dawrna chu a pawmin Second degree murder a an puhna chu a pawm ta a ni. Tinai chhungte chuan Tinain ze hnih neihin a nung a ni tih thu chu puan zar an hreh hle a. Mahse chu inremsiamna chu an pawm ve ta bawk a.
Prosecutor-te chuan Tinai khan Kenan car leina tur nei anga a insawi kha dawt hul hual a ni tih a hrechhuak a nih an ring a. Tichuan an insual buai ta a. Chutia an inchaina lamah chuan Tinai chuan a lu a tauh a. A hnuin reh hlum emaw thawthei lova siamin Kena chuan a tihlum taah an ngai a ni. Kena chuan Tinai ruang chu car hnunglam bawmah chuan a khung ta a. Tichuan a nutei In bula thinghmunah chuan a ruang chu a va thehthang ta a ni. Chutiang chuan thawnthu lungchhiatthlak tak chu runthlak takin a lo tawp ta a ni.
Ken Tranchita chu dam chhung lungin tang tura hremna pek a ni ta a. Thil mak ve deuh mai chu Tinain hringnun inthup hmanga midang buma a hringnun a hman lai khan amah ngei pawh pawisa tam tham tak puktir tiamin Ken Tranchita khan a lo bum ve reng mai a ni.
Tinai khan hringnun kha a thlir sual emaw ni aw tih theih a ni. Hringnun chu “Pretty Woman” (Riachard Gere leh Julia Roberts te channa a ni em kha?)film ang turah a ngai te pawh a ni mahna. Richard Gere-a lo kalin a lo chhanchhuak ang a. Gift rawn ken sakin nuam takin a khawsa dawn ang tein a ngai a ni mahna. Mahse chutiang chu Call Girl-te khawvel nihna dik tak chu a ni si lo. An khawvelah chuan mi maksak pui pui leh mi beidawng tak tak te pawh an cheng ve a. He case bikah hi chuan a va tawn mipa hi Richard Gere ni lovin Ken Tranchida a ni tlat a. Tinai tawpna chu ram palailengah a arte thih mai a ni. A chunga thil thleng hi Pretty Woman film ang ni lovin thil nihna dik tak zawk chu a ni. Sgt. Michael Cischke, Homicide Investigator chuan, ” Tinai khan ramri kham pelh rawk thlenga kal turin thuthlukna a siam a. A tawpah chuan chu a thuthlukna man chu amah ngeiin a tel ta a ni. Hetiang hi nu leh pa zawng zawngin kan fa te chunga thleng a tan kan thil hlauh ber leh kan ven ber a ni” tiin fa te humsual dai tur lak atanga ven pawimawhna a sawi a ni. Cheryl Chodun, Reporter, WXYZ-TV pawhin, ” Tina Biggar-i chanchin kan sawi hian hmeichhe dang hetiang lama thawkte leh tleirawl hetiang sumdawnna lama luh tum mekte hnenah thuchah kan sawi ah kan inngai. Buaina an thunun zawh loh tur an hmabak a nih tih thuchah a sawiah ka ngai a. An tawpna tur chu thihna chauh a ni” tiin a ngaihdan a sawi ve bawk a ni.

Author : Bruce Kibby

Advertisements
Aside | Posted on by | Tagged , , | Leave a comment

KUM 31 CHHUNG RUAHTUI TLAK TAM BER KUM-AH 2017 A NI MAI THEI

Kumin 2017, January atanga September (Thla 9) chhung khan Aizawl khawpui chhungah ruahtui mm 2312.01 a tla a, thla 3 la awm (October – December) chhunga ruahtui tlak dan a zirin kumin hi kum 31 chhunga ruahtui tlak tam ber kum ni thei tura ngaih a ni.

State Meteorological Centre, Directorate of Science & Technology-in Aizawl khawpui chhung bika ruahtui tlak dan an chhinchhiah danin, kumin January atanga September thlenga ruahtui tla zat hi kum dang aiin a tam hle a, nikum January thla khan mm 1.0 tla in, kuminah ruahtui tla a awmlo a, nikum February ah mm 11.8 a tlak laiin kumin ah mm 18.7, nikum March ah mm 80.06 tla in, kumin ah mm 95.9, nikum April ah mm 124.3 a tla a, kumin ah mm 145, nikum May thla ah mm 351.7 a tlak laiin kumin ah mm 216 a tla a, nikum June ah ruahtui mm 396.03 a tlak laiin, kumin June thla ah erawh mm 743.5 zet a tla thung.
Nikum July ah mm 290.05 a tlak laiin, kumin ah mm 374.5, nikum August ah mm 328.04 tla in, kumin ah mm 479.0, nikum September ah mm 234.16 a tlak laiin, kumin ah mm 239.0 a tla a, nikum January atanga September thlenga ruahtui tla zat hi mm 1818.76 a nih laiin, kumin January – September chhunga ruahtui tla zat chu mm 2312.01 a tling.
Kumin June thla a ruahtui tla kha tunhnai kum 10 (2007-2017) chhunga ruahtui tlak tam ber thla ala ni a, June thla chhunga ruahtui tla zawng zawng kha mm 743.5 zet a tling. June 13 a ruahtui tla mm 180 kha tunhnai kum 10 chhung vek a ruahtui tlak tam ber Ni a ni bawk a, September 15, 2015 khan ruahtui mm 121 alo tla tawh a, hei hi tunhnai kum 10 chhunga ruahtui tlak tam ber Ni a ni thin a, June 13 a ruahtui tla khan rawn khumin, September 15, 2015 aia kumin June 13 a ruahtui tla tam na chu mm 59 a tling.
State Meteorological Centre in ruahtui tlak dan a chhinchhiah tan kum 1986 atangin Aizawl khawpuia ruahtui tlak tamber kum chu 2003 kha niin, hemi kum a ruahtui tla zat chu mm 3081.06 a tling a, hemi hunchhung vek a ruahtui tlak tlem ber kum chu 2014 kha niin, hemi kum hian ruahtui mm 1891.07 a tla. State Meteorological Centre in kum 31 (1986-2017) chhunga ruahtui tlak dan a chhinchhiah a alan danin, hemi hun, thla 1 chhunga ruahtui tlak tam ber thla June 2003 ah mm 760.06 zet ruahtui alo tla tawh bawk.
Ruahtui tlak tam ber kum 2003 a mm 3081.06 tla hi kumin 2017 chhung a thla 3 (October -December) la awm chhung a ruahtui tlak dan a zirin kumin hi kum 31 chhunga ruahtui tlak tam ber kum a ni thei dawn a, hemi hun thla 3 chhung hian ruahtui mm 769.05 aia tam a tlak chuan kumin hi kum 31 chhunga ruahtui tlak tam ber kum a ni thei dawn a ni. Hetihlai hian tunhnai thla 4 (June – September) chhunga ruahtui tla khan mm 1836 zet a tling.
Kum 2011 atanga kumtin Ruahtui tlak dan chu :
2011 – 2,527.10
2012 – 2,287.60
2013 – 2,422.46
2014 – 1,891.07
2015 – 2,179.80
2016 – 2060.09
2017 – 2312.01
(upto September)

Aside | Posted on by | Tagged | Leave a comment

DELHI MIZO ZIRLAI PAWL TEN HMARCHHAK A DAN LOVA PEMLUT DUHLOHNA LANTIR DAWN

Tun thla, October 28, 2017 hian Delhi Mizo Zirlai Pawl (DMZP) huaihawtin Jantar Mantar, Cannaught Place, Delhi-ah India hmarchhak a dan lova pemlut tam lutuk duhlohna (demonstration) huaihawt a ni dawn.

Tun dinhmunah hian dan lova India ram rawn lut tam tak an awm a, heng dan lova rawn lut te hian ram neia lo awm tawh sa te dinhmun thleng pawhin a tiderthawng thei mai dawn niin a lang a, Chakma foreigner leh Bangladesh atanga Mizoram, Arunchal Preadesh leh hmarchhak state dang te a mak tak mai a an pung thur thur mai titawp a, dang tur hian kan tanrual angai takzet a ni.

DMZP chuan Hmarchhak hi pem vakvai leh dan lova lut te hnawhkhawmna hmun a ni lo tiin, he hunah hian khua leh tui tha, helam ngaimawh te thlawpna an ngen a ni.

Author : Kiddy Vanchhawng

Aside | Posted on by | Tagged , , | Leave a comment

Gorkhali pa thiin chhar

Oct.3,2017 chawhma dar 10 vel khan Bualpuia cheng Gorkhali Prem-a tia hriat, kum 77 mi chu ramhnuaiah thi a hmuh a ni a, a thih danah ngaihthatlohna tur a awm loh vangin a chhungten postmortem loh an dil chu phalsak an nih angin tlaiah khan vuiliam nghal a ni.

Aside | Posted on by | Tagged , | Leave a comment

Siaha SBI Office Dang

State Bank of India , Siaha Branch indaihlohna avangin Siaha khawchhung ah Branch dang hawng tura phutin M.CH.P Sub-Hqrs, Siaha chuan Oct.3, 2017 atanga tiamchin awm lovin hnathawktu pisa kai tur an dang.

Siaha SBI ah hian Branch pakhat chauh a awm avangin mipuiin harsatna an tawk nasa hle a, Branch hawn belh thuai tura SBI phut nan vawiin khan thawktute pisa kai tur an dang a. Pi N. Chaki , President , M.CH.P chuan thu sawiin , Siaha mipui ten Bank indaihloh avangin Branch Manager leh a thawhpuite pawh Branch hawnbelh tura hmalakpui turin an lo ngen tawh thu leh Memorandum pawh an thehluh tawh thu an sawi a, tun thlenga hmalakna hmuhtur a la awmloh avangin Siaha nu pawl ho chuan hetiang hian hma an lak tak thu a sawi.

Siaha M.CH.P te chuan , Siaha SBI chu Siaha leh a chhehvel khaw 50 chuanga mipuiin an hman a nih thu leh chawhrualin nitin mi 200 atanga 300 velin an dawr ziah thu an sawi a . Hlawh la turte leh pawisa thawn duhte pawh nilenga in tlar angaih thin thu an sawi a ni.

Aside | Posted on by | Tagged , | Leave a comment

HRISEL TAKA KA AWM LEH THEIH NAN KA SUM NEIH ZAWNG ZAWNG PAWH HI HMAN RAL KA HREH LO – MARCO REUS :

Kum 28-mi, May thlaa Borussia Dortmund in Eintracht Frankfurt 2-1-a an hneh tuma inhliam Marco Reus chuan damna a neih leh theihna tur anih phawt chuan a sum zawng zawng sen ral vek pawh a huam thu a sawi.

Reus hi a khup ruh inzawmna lai tha hliam avangin nakkum kumtir lam thleng chawlh a ngaih rin a ni a, “Top player zinga mi nih chuan sum tam tham tak kan thawhchhuah rualin sumtam tak hi kan thithat loh avangin ka thehchhuah a ngai ve leh tho. Ka hna pangngai ka thawh leh theihna tur anih dawn phawt chuan ka sum neih zawng zawng pawh hi ka sengral vek hreh lo. Ka hmangaih football khelh leh theih hi ka duh a ni”, tiin a sawi.

“International club zingah pali panga vel min duhtu an awm a, 31st. May 2019 ah chuan kum 30-ka ni ve tawh dawn a ni. Chu chu ka contract tawpna tur niin thil thar dang hmachhawn tura ka hun tha neih tur a ni. Tlang tak leh dik takin khawi hmun hi nge ka tawpna tur ka hre lo. Tunah hi chuan Dortmund ah hian ka hlim a, 2019 hnu lama thil thleng tur chu ka la ngaihtuah lo. Mahse, chu hun chu a lo la thleng ang a, chutah chuan thu chungin ngunthluk takin thutlukna chu ka la siam ang”, tiin a sawi chhunzawm bawk.

Author : Francis Da Gunner

Aside | Posted on by | Tagged , | Leave a comment

ARGENTINA IN AN TUI IN TURA DRUGS AN PAWLH HLAUH LEH AVANGIN PERU TEAM IN ANMAHNI TUI NGEI KENG DAWN.

Peru team doctor Jorge Alva chuan World cup qualifying pawimawh taka Argentina nen Benos Aires a an intum hun turah an fimkhur tur hle sawiin Argentina ram tui in lovin an ram tui ngei an ken tur thu a puang.

1990 World Cup quarter-final a Argentina leh Brazil intum tum, khatih hunlai a Argentina manager Carlos Bilardo hminga ‘Bilardo’s flask’ an tih mai match ah khan Brazil left-back, free kick specialist Branco chu break laiin Argentina technical staff ten tui a damdawi rohypnol pawlh alo pe a, Branco hi ruih phain a khel hlei theilo zui nia sawi a ni.

A tifiahtu atan hemi tuma khel ve Maradona pawhin Branco tui in tura drugs pawlh a nih thu hi thudik a nih thu a sawi. Argentina hi hemi tum hian 1-0 in an chak nghe nghe a ni.

Author : Mafela Ralte

Aside | Posted on by | Tagged , | Leave a comment

EVAN Dr. SAWIVELA RAWNGBAWLNAAH DAMNA CHANG 1190

(Zonet Zing Daifim & Lenlaini – 04.10.2017)

Evan Dr Lalsawivela’n UPC Biak In, Bawngkawn-a rawngbawlna a neihah chuan damna mak taka chang an pung zel a. Niminah ringawt khan Bengngawng tawngtheilo mi 6 an dam a, nizan thleng khan damna chang nghal in report chu mi 1190 an tling tawh.

Upa R. Lalhmangaihzuala, Bawngkawn in kan palai a hrilh danin, Nimin piah October ni 2 khan naupang kum 8 mi thisen cancer avanga hmundanga beidawng tawh, Kevin Lalrintluanga, Ramhlun North chu an pawm lut a, a mutna tura siam sakah mut a ni chungin a nat tawh em avangin sermon lai leh a hnuah pawh a \ap char char a, a ke nate chu khawih sak ngam loh khawpin na a ti tawh a. Evan Dr Lalsawivelan a khawih veleh he naupang \ap hi a bang nghal hmiah a. Reiloteah amahin a kal nghal a, “Pathianin min tidam” a rawn ti chhuak reuh a, damlo pantu dang pawh an mittui a lo tla ve phung mai a ni.

Lunglei District Chithar khuaa nu pakhat, fa 3 nei tawh, thin cancer vanga zangthal zawnga thla hnih chhung mu thei tawh lo, a zawna an zawn luh pawh Lalpan a tidam a, amahin zang vahin damlo room a chhuahsan a, damna thu, \ap zawih zawihin a puang a ni.

Evan Dr Lalsawivela rawngbawlnaah hian Pathian thiltihmak a thleng nasa hle a. A room chhung an luh chiah a dam nghal te an awm a. Bengngawng, a khuma an \hut ruala beng var nghal nia insawi ringawt pawh mi 10 chuang an awm tawh.

Record atanga a lan danin, a sermon atanga an natna dam nghal nia insawi pawh mi 30 chuang an awm tawh a. Phai lam Doctor a beidawng tawh cancer leh natna dang dam ta nia insawi pawh an awm nual tawh. Tun thleng hian chawplehchilha dam nghal nia insawi hi zaa 80 chuang an la ni a. An dam nghal leh nghal loh hriat loh nausen leh fa nei theilo an tam em avangin dam percentage hi a sang thei lo zawk a ni.
Nizan thlenga thlenga record dinhmun –
Damlo khawih zat – 1502
Damna chang nghal zat – 1190
Dam zui inbeisei – 249
Dam zinga natna langsar zual te :
Bengngawng – 358
Tawngthei lo bengngawng kawp – 87
Spinal Cord thalo – 19, Nerve thalo – 139, Cancer – 41, Stroke – 20, Mitdel – 4
Sermon atanga dam – 30

Evan Dr Lalsawivelan ralkhat atanga mobile phone kaltlanga a tawngtai avanga dam nghal nia insawi leh damlo, a mut dawna an hminglama a tawngtai sak avanga dam nia insawi pawh an thahnem tawh hle a. A mut dawn hian damlo mi 20 chuang tawngtai sak tur list a nei zan tin a, nizanah phei kha chuan mut dawna tawngtaisak tur hi mi 157 an awm a, heng mi 157 te hming hi a chhiar chhuak vek a ni. Dan tlangpuiin chhun atanga damlo a khawih chu zan dar 11 velah a khawih zo thin a. Tunah hian ni 5 ni 6 kal zawn tawh, khawih hun la chang thei si lo te a khawih thei tan a. Zingkarah Stroke vanga che thei lote an in lamah tlawhin a khawih thin bawk a ni.

Dr Sawivela lo be duh Kan awm chuan
+919862355410

Aside | Posted on by | Tagged , , | Leave a comment

CHAKMA AUTONOMOUS DISTRICT COUNCIL CHUNGCHANGA PU C.LALRINCHHUNGA THUHLA

Chakma District Council hi mi thenkhat chuan dan lova din, a ramneitu Mizote rawn lova din kan ti thin a. A dik ngei ang tih pawh ka ring. Regional Council pahnih District Council a hlankai a nih leh Mizoram-in UT kan neih chiah khan a hmaa Regional Council pawh awm hmasa chuang lo khan a lo piang ve tawp kha a ni a. Mahse, District Council din chungchangah 6th Schedule ah hian hetiang hian Governor thuneihna kan hmu:

Para 1(3) The Governor may, by public notification,—
(a) include any area in 3[any of the Parts] of the said table,
(b) exclude any area from 3[any of the Parts] of the said table,
(c) create a new autonomous district,
(d) increase the area of any autonomous district,
(e) diminish the area of any autonomous district,
(f) unite two or more autonomous districts or parts thereof so as to form one autonomous district,
5[(ff) alter the name of any autonomous district,]
(g) define the boundaries of any autonomous district:

Provided that no order shall be made by the Governor under clauses (c), (d), (e) and (f) of this sub-paragraph except after consideration of the report of a Commission appointed under sub-paragraph (1) of paragraph 14 of this Schedule:

Helai atang hian Governor thuneihna chu kan hrethiam mai awm e. 3(a) to 3(e) ah khian Governor-in Sixth Schedule, para 14 hnuaiah Commission a din hmasa tur a ni a, chu Commission rawtna ang chuan kalpui tur a ni. Chakma District Council din dawn khan Commission hi Assam Governor khan a din lem lo ni awm a ni. Amaherawhchu District Council/Regional Council thar siam dawnin a hmaa District Council lo awm tawh sa biak rawn chungchang engmah a awm lova, Commission ngaihdan anga kalpui tur a ni thung. Mizoram UT kan nih dawn pawh khan District Council siam belh leh Regional Council lo awm tawh District Council a hlan kai chu Governor thu a nih rualin Commission ngaihdan la hmasa lo chuan thutlukna a siam thei bik lo a ni. A pawi ta ber chu Commission din a nih si loh chuan khatih laia Mizoram sawrkar khan eng vang nge kan lo ngawihpui mai mai tih hi a ni!

Chutiang chu a lo nih si chuan Chakma District Council lo pian danah pawh hian khatih laia thuneihna pumhlum neitu chu Assam Governor a ni a, mahse Commission report ang lo chuan thutlukna a siam thei lova. Commission din nisela chuan Mizo-te duh dan lak a nih ve pawh a rinawm a ni. Chuvangin CYMA Agenda-ah khan “Chakma District Council dan lova din a ni a, thiah dan ngaihtuah ni rawh se” tih chu chhawpchhuah tur niin ka lo hria a, thil pawimawh tak chu a ni. Kan hriat tur erawh chu kum 45 liam tawh ami tuna han challenge leh chu awmzia kan nei lovang tih a hlauhawm hle a, mahse “thlen loh ai chuan thlen tlai a tha” an tih ang deuh khan ngawihbopui ngawt ai chuan tlai khawhnua challenge thar leh pawh hi a thatna a awm tho turah ngai ang.

Court lamah lo hlawhchham ta hlauh pawh ni ila kan enliam mai mai tur a ni tihna erawh a ni lo. A chunga Sixth Schedule Para 1(3) khi chhiar ila Mizoram sawrkar hian enge kan tih theih kan hria a, Chakma District Council huam chhungah hian Regional Council, kan siam belh thei a, a area kan tizim thei a, a hming kan thlak thei bawk a ni tih hi kan hriat reng a pawimawh hle mai. A hnam hming anga District Council dah hian harsatna a siam thei reng a, chuvangin District Council zawng zawng hi khua/hmun hmingin emaw thlak (rename) ila state khata cheng kan nihna ang pawhin kan inlungrual theih zawk pawh a rinawm hle a ni. A hnam bila intihthuna a tibo thei ang a, a huam chhunga hnam dang cheng vete enhranna lian tak awm thin leh tuten emaw neitu riauva an inhriatna hi a bo thei bawk dawn a ni. Hei bakah hian Constitution leh dan mit atanga thlir pawhin thiam kan chang bawk dawn a ni. A thui lutuk dawn tlat duh tawk phawt teh ang.

Aside | Posted on by | Tagged , | Leave a comment

KHEHPUAM VANGIN IAS (RETD) ROBERT HRANGDAWLA CENTRAL JAIL-AH

Mizote’n “khehpuam” kan tih mai, ruihhlo hlauhawm siamchhuahna pseudoephedrine tawlhruk thubuai ngaihtuah mek ah vawiin (October 4) khan Aizawla Special Drugs and Cosmetics Act Court chuan Mizoram Chief Information Commissioner hlui Robert Hrangdawla (IAS retd) chu man turin police thu a pe a, Central Jail-ah a khung nghal. Thubuai erawh hi chu ngaihtuah chhunzawm leh tur a la ni a, bail an dilna pawh October 11-a ngaihtuah turin a ti a, anticipatory bail an dil pawh a hnawl nghal.

Thubuai hi a tirah chuan Judicial Magistrate First Class T Lalhmachhuana’n a ngaihtuah a. Mahse, Drugs and Cosmetics Act hnuaia thubuai a nih angin Special Drugs and Cosmetics Act Court Judge Vanlalenmawia’n a ngaihtuah chhunzawm ta a. Vawiin khan thubuai hi ngaihtuah chhunzawm leh niin, Robert Hrangdawla hian court hmaah hian thubuai awm chhan bulpui, khehpuam man chungchangah dan ni lova thil thleng a awm a ti a. Robert Hrangdawla chuan a man tu ber chu Drug Inspector a ni lo va, a thil man te hi man theitu a ni lo a ti a. Tin, seizure memo chu Lengpui Airport ah siam niin in ziak mahsela, chu chu seizing officer thu phuahchawp a ni a ti bawk a. Hetih lai hian, Special Public Prosecutor C Lalremruati chuan dan pela chetna awm lova, dan pawh a khauh hle niin a sawi thung a.

Lehlam lehlam thu thlen a ngaihtuah hnu ah Special Judge Vanlalenmawia chuan Robert Hrangdawla leh Lalchhanmawia lakah hian thubuai chu a awm thei ngei a ni tih a lang chiang a ti a. Tin, anni pahnih hi “non-bailable” leh “cognisable offence” thubuai siamsak an nih angin, man ngei tur an ni a ti bawk a, police te chu man tir in Central Jail-ah khung turin thu a pe nghal bawk a ni. An thubuai hi October 18-ah ngaihtuah chhunzawm leh turin thutlukna a siam.

Aizawl District Court building-a *TFD*-in a kawmnaah Robert Hrangdawla chuan, “Damdawi kan lak hi license kan nei a. A hralhna receipt I kawl lo min ti a, mahse ka nei ngei a. Judge rilru ah chuan damdawi kha khehpuam a ni,” a ti a. Dan dik lo in case an siamsak a, dan pelin an man niin a sawi bawk a, court sang zawkah a zualko tur thu a sawi bawk.

*TFD*-in a lo tarlan tawh angin, kumin March thla khan Health Department hnuaia Food and Drugs Administration (FDA) chuan Robert Hrangdawla leh a mi chhawr Lalchhanmawia, Zonuam, lakah pseudoephedrine lei leh hralh chungchangah criminal complaint court-ah a thehlut a. Taxation department thawktu te’n Lengpui airport ah khehpuam tia hriat lar pseudoephedrine parcel panga (5), a vaiin mum nuai sawm (10) emaw vel chu rinhlelh thil thu ah an man a. Lehkha pawimawh te an enfiah hnu ah thil felhlel awm a an hriat avangin FDA hnenah hian an hlanchhawng ta a. FDA chuan thil awmdan a zirchian hnu ah Robert Hrangdawla hian pseudoephedrine lei leh hralh theihna hian license chu a nei ngei a, mahse, a tihral dan record a lo dah that loh avangin a lakah hian complaint an thehlut ta mai niin *TFD* chuan thu a dawng a ni.

A tlangpui thu in khehpuam hi Excise & Narcotics Department hnathawk te’n emaw Police te’n emaw ruihhlo beihna dan Narcotic Drugs and Psychotropic Substances Act hnuaiah an man thin a. Excise & Narcotics-a hnuchhuitute chuan kum 2015 October thla khan Robert Hrangdawla hi khehpuam tawlhrua an rinhlelh avangin man an lo tum tawh nghe nghe a, nimahsela, license a neih miau avangin case an siamsak thei lo niin *TFD* chuan thu a dawng bawk a ni.


Thu a hriatchian theih nan Frontier Despatch in he thubuai lo awm tan dan a post tawh hi lo dah tel ila.

CIC hlui lakah criminal complaint (March 25, 2017)

Health department hnuaia Food and Drugs Administration (FDA) chuan tunhnai khan Mizoram Chief Information Commissioner (CIC) hlui Robert Hrangdawla IAS (Rtd.) chu pseudoephedrine lei leh hralh chungchangah criminal complaint court-ah a thehlut a, court chuan Robert Hrangdawla hi April 7,2017 ah inlan turin thu a pe nia thudawn a ni.

Tualchhung chanchinbu ‘The Frontier Despatch’ in a tarlan danin Taxation hnathawk te chuan tunhnai khan Lengpui airport ah khehpuam tia hriat lar pseudoephedrine parcel 5, a vaiin mum nuai 10 emaw vel chu rinhlelh thil thu ah an man a. Lehkha pawimawh te an enfiah hnu ah thil felhlel awm a an hriat avangin FDA hnenah hian an hlanchhawng leh a ni. Joint Director FDA, Lalsawma sawi danin Robert Hrangdawla hian license hmangin thla tin airport-a taxation hnathawk te’n an man zat ang hi thlawhna hmangin vawi thum atanga vawi nga vel a chah lut thin niin a sawi a, pseudoephedrine hi a lo thlen zin em avangin taxation hnathawkte chuan ringhlelin an lo endik ta niin a sawi bawk.


Aside | Posted on by | Tagged , | Leave a comment