Sudden Law of the Lariat (Mizo Version) 2

SUDDEN LAW O’THE LARIAT CHAPTER-2
Lazy M Ranch neitu, Phillip Masters chu Ranch bathlarah chuan a thu a, Hope panna kawng dung chu a thlir a thlir a. Amah chu pa tawi, sa tha tak hi a ni a, kum sawmnga vel a ni tawh bawk a. A sam te pawh chu a tuak var phauh phauh tawh a, ngaihtuah lungkham engemaw tak nei ni awm hian a lang tlat a, Pa hlim thei leh fiamthu duh tak lo ni thin mahse, tun hnai kum hnih vel atang kha chuan a hlim hmel hmuh tur a awm tawh mang lo. Chung lai ram velah chuan hausa bera an ngaih a nih avangin hlim lohna chhan han nei ve awm lo tak hi a ni a, mahse a hlim thei tlat si lo a ni.

Rei fe kawng dung lam chu a thlir hnuin ral khat la hla feah dum nel nel hi a va hmu ta a. Minute sawm leh panga hnuah chu thil dum chu sakawr chung chuang a ni tih a va hre thei ta a, sakawr bulah chuan engemaw tlan niawm tak hi a va hmu tel bawk a. “Amah ngei chu a nih dawn saw maw- Mahse enge a um saw- Sihal em maw ni dawn le?” a ti rilru neuh neuh a. Ranch in thlen dawn tepin kawng chu a kual chho deuh a, chutihlaia sakawr chung chuang kal lai chu Ranch nei tupa chuan a va hmu thei lova. Tichuan nghakhlel takin bathlarah chuan a lo vei a lo vei hman tawh a. Reilote hnuah sakawr chung chuang chu a lo lang leh a. Ranch in atanga hla fe ah chuan sakawr atangin a chhuk a, ranch neitu chu chibai buk nan kutin a rawn zap a. Ani chuan,”I dam em, Severn, lokal thuai thuai teh khai,” a lo ti luam a.
Ranch in chu a lo thlen veleh inchhungah a neitu chuan a hruai lut nghal a, inchhung chu a pawna en aiin a lo ropui hle mai a. Dawhkan leh thutthleng te chu uluk taka siam vek an ni hlawm a. Piono te pawh a awm bawk a. Chu lo pawh thildang hlu fe fe hmuh tur a tam a. Chung thilte chu an awmna Ranch a rawn la tur chuan thil harsa tak a ni.

An awmna atanga Rel Station hnai ber chu Mel sawmli zet a ni a. Lo thleng thar chuan inchhunga thil awmte chu a han en kual vel a, muangchangin mei a han tan kai a. Mastersa Ranch neitu chuan engmah dang pawh sawi hmasa set set lovin, ‘Tunhma kar hnihah tawh khan ka Foreman Stevensa chu min an lo kap hlum a, amah tel lovin a sakawr chauh inah a lo hawng a, ka hote zawng turin ka tir chhuak nghal thuai a, Pinacles an tih, hmun ruam laiah khan a ruang chu an va hmu a, a hnunglam atanga kah hlum a lo ni leh nghal a. Fel tak leh tawng tam lo zet a ni a, hmelma a neih pawh ka hre lo reng reng a, ka tan a rinawm em em bawk a, A aiawh tua han tan chu a hlim thlak vak lo maithei a ni. Thil awmdan chu i hre chiang ang chu maw? a han ti a.
Severna chuan Hre chiang e, ngaihsak mang awm lo tak hian a lo ti ve mai a. Mastera chuan thil tha lo tak engemaw vangin kum tam fe chhung chu mi pakhat thu hnuaiah ka lo kun tawh a. Ka neih tlin bak thlengin min dil apiangin pawisa pawh ka pe zel a, pawisa pek tur ka neih loh hnu pawhin ka rualte ka pe ta zel a, ka Ranch ngei pawh hi min neih sak a rilruk tih ka hre chiang bawk si a. Chuvangin amah chu hneh theih dan kawng khat chauh a awmin ka hria a, mahse chu kawng chu zawh tur chuan ka Ranch lo enkawltu tur mi rinawm tawk ka mamawh tlat si a. Chuvangin nang hi ka ko ta mai che ani. Enge i ngaihdan le? a han ti a.

Severna chuan chu pa chu tunge a nih? a lo ti thuai a, Mastersa chuan ‘Mesa tlang bula Bar B Ranch neitu, Bartholomew saw a ni’ a ti ta a. Severna chuan ” i duh ang chuan ka ti ang e” a ti ta a. Mastersa chu thawveng ta sawt niawm tak hian a han thaw huai a, pa tha tak a nih avangin Severna hnenah chuan “I thil tih tur hi harsa tak leh hlauhawm tak ani tih hi i hriat chian hle ka duh a, chuvangin i duh phawt chuan han inngaihtuah leh rih mah la, pawi ka ti hauh lo ania. Heng lai velah hi chuan Black Bart-a (Bartholomewa) hi thil ti thei lutuk a ni a, mite pawhin Pathian tluk thaw thangin an hlau bawk a. A duh loh zawnga awm tawh chu rei pawh an dam ngailo, kei pawh hi chhawrna min la neih vang chauha dam ka la ni” tiin Severna hna thawh tur hlauhawm zia te chu a han sawi fiah leh te te a.

Severna thung chuan, “Ka hrethiam vek a lawm Amaherawhchu, thil hriat tur pawimawh tak pakhat i la nei Judge Emblya khan i hnenah khan ka hming chu Jim Severna niawm takin a rawn sawi a, mahse mi tak tak chuan Sudden tiin min ko bawk thin a, Suddena hming chu i lo hre ve tawh thin emaw? a han ti a.
Mastersa chu a phu deuh zawk a, Severna chu makti tak mai chuan a han en a, Suddena hming chu la hre ngailo tunge awm ang? Severna hi a lo ni dawn maw-Outlaw hlauhawm lutuk a puakruk phawi ran leh kah thiam vanga misual tawng taw raw ber berte pawhin an lo hlauh thin chu? A hmel han en ngawt chuan hlim thei tak, nelawm zet niawm hian a lang si a. Mahse a mitmeng chu chik taka han en chuan mi naran mitmeng a ang hauh lo tih chu hai rual ani lova. Mastersa chuan rei pawh ngaihtuah zui duh lovin, “Ti rawh, chibai i han inbuk teh ang, Jim- Jim ti ngawt chuan ko che ila a tha zawk ang em/” a han ti leh rih a.

Severna chu a lu a lo thing nghat a. Masters bawk chuan “tunah chuan ka vannei ve tan dawn ta a ni ang. Kan ram zawng zawng hi zawng chhuak vek mah ila, nang tluka tha hi chu khawiah mah ka hmu dawn hauh lova taka YZ Ranch atanga lo kal i ni ang maw, engatinge he thilah hian i lo tel ve reng reng chu le?” a han ti a.

Severna chuan nui chung hian, “Lokal hi duhna chhan ka nei ve tho a, Judge Emblya hi ka thian hlui a ni bawk a. Tunah phei hi chuan chung lo pawh chu duhna chhan dang ka nei leh tawh bawk a. a han ti zet a. Tichuan Hope khaw kawtthlera Bartholomewa leh a hote nen an inhmuh thute chu a sawi zawm ta zel a. Mahse nula a hmuh thu kha erawh chu a sawi tel duh lem lova.

Mastersa chu za fe hian a han nui a, Severna hnenah chuan “Hope khua mi zawng zawng hmuh laiin Black Barta leh a hote chu nangmah hlauvin an tlanchhe ta a maw? Hmuh ve ka va han chak em! A chunga thil lo thlengah chuan chu chu tawrh hrehawm a tih ber a la ni hial ang. Chuvangin a theihnghilh mai hauh lovang. Martina pawh chu rul tur nei chi ang maia hlauhawm a ni a, chuvangin i tan fimkhur hle a tul ang” a han ti a.

Serverna chuan “Fimkhur chu ka tum a lawm. A nih leh i hote hi rin ngam tur an ni hlawm em? a han ti ve thung a. Mastersa chuan lu thin pahin, “Ka hre lo. chu chu nangmah ngeiin i zawn chhuah a ngai ang. Stevensa kha chuan a thente hi chu rinawm niin a ngai a. mahse a tu ate hi nge a sawi ta chuang si lova. Tam tak te hi chu Bartholomewa rawn tirh te an ni a, ka lo ruai lo thei si lova. Tunah chuan i duh duha i tih atan engkim i kutah ka dah dawn ani” a han ti a.

Severna chuan “Bartholomewa chuan i bawng a la thin tih thu kha i sawi a, a ruk sak thin che em ni?” tiin a han zawt leh a. Mastersa chuan “ru kher lovin bawng 50 emaw 100 emaw ka mamawh e a rawn ti ringawt a, ka lo pe lo ngam thin si lova. Ka sawi tawh ang khan hnial ngam lohna chhan tha tak ka nei tlat a ni, tunah rih chuan. Tunah i lo kal theih avang hian ka lawm takzet a ni. Kei leh Phili hi min pui thei ngei dawn nia rinna nghet tak ka nei tlat a ni” a han ti leh a. Severna chuan Phil maw? Fapa i nei tih ka lo hre hleinem a han tih chuan “Ka nei lo reng a ni. Fapa ka awt em em thin a, mahse fanu kan nei ta hlauh si a, chuvangin a hmingah Philipina tiin kan vuah ta ngawt mai a ni” Mastersa chuan a lo ti thuai a.

Chutih lai chuan pawn la tanga “Inchhungah tunge awm chu le?” tih ri chu an hre ta a. Mastersa chuan “chu chu Phil a nih chu”, a lo ti a. An pahnih chuan batthlarah an chhuak phei a, Phili chuan a pa chu a rawn kuah chuk chuk a, tah chuan Severna chu a han hmu chiang ve ta chauh a. Mastersa chuan “Phil hei hi Jim Severna Stevens a aiawhtu tur chu a nih hi” a fanu hnenah chuan a lo ti a.

Chibai pawh buk chuang lo leh aw nelawm teh chiam lo hian “Mister Severna nen hian kan inhmu tawh” a ti chauh a, Mastersa chuan mak a ti hle mai a. Mahse Severna chuan “Ui ka lei dawn lai hian Miss Phil nen hian kan inhmu a, ka hrilh tawh che ang khan Ui neitu nen chuan tlemin kan inhnial deuh nghe nghe a” tiin a lo hrilhfiah ta thuai a. Thu a han sawi lai vel chuan Severna chu thutak awm hlein a lang a, mahse nuihzat nei ni tlat hian a hriat bawk si a. Chu chu Philli’n a hmuh chuan a lawm lo leh zual a, amah chu a nuihzat ni deuh tlat hian a hria a.

Mastersa erawh chuan ui chu en reng chungin “Ui chanchin hi chu ka hre lo hle a, mahse i ui hi a hlutna bik teh chiam tur ka hmu lo hle a, ui naran ve mai bawk niin ka hria” a lo ti a, Severna chuan “Ni chiah e, Ui naran mai a nih vang chauhin ka duhna a zual ani. Ui tha chi te a nih a a chapo viau mai chuan a buaithlak dawn a, Cowboy naran mai mai ti niawm taka a hnar min len khum mai zawng in ka ngaithei lo hle mai dawn si a”, tih pahin a han nui a, Mastersa pawh chu a lo nui ve bawk a. mahse phili chu a ngawi tlat a, Severana chuan amah chu a sawisel pah nan a hmang ni deuh tlat hian a hria a, a lawm vak lova.

Chutia an inkawm lai chuan Ranch Cowboy ho sakawr thawm chu an hre ta a, Ranch kawt an lo thlen chuan Severna leh mastersa te chu pawnah an lo chhuak a. Cowboy ho hnenah chuan “Boys hei hi Jim Severna a ni a, Stevensa aiawhtu tur a nih hi, tun atang chuan engkim a thu thuin a ti tawh ang” Mastersa chuan a han ti a.

Cowboy thenkhat te chuan dan pangaiin “Howdy” an lo ti a, a thente chuan lu an bu nghat chauh a, thenkhatte erawh chuan Severna chu ngawi rengin an lo en ve thung a, Chung mite chuan Severna chu an lawm vek lo ni hian a lang a. Severna pawh chu a ngawi reng a.

Mastersa chuan “Jim, sawti laia a fal deuh bika sak saw i chenna tur ani a, kan lo siam fel vek tawh a, mamawh i neih chuan chaw chhum hnenah sawi zel ang che,” a han ti a. inchhungah a luh san ta a. Severna chuan sakawr chu huangah a va thlunga a zin leh a ma thawmhnaw dangte chu a chenna turah chuan a pu lut a, Inchhungah chuan a lut a, pindan pakhat chauh hi a lo ni a, pindan hnunglam leh hma lamah chuan tukverh pakhat ve ve a awm a. Severna chu a han inthlak fai te te a, tichuan chaw ei pindan lam panin a kal chhuak leh ta nghal a, Inchhung a va luh dawn tep chuan “Ui hi ka hlau bawk a, ka ngaina lo teh a sin aw,” an chaw chhum John chuan a lo tih lai Severna chuan a va hre hman a.

Severna chu a luh veleh inchhunga lo awmte chu an ngawi ta thap a, Severna chuan Negro chaw chhum Johna hnenah chuan ‘Tih dan ka hria, Ui hi sa tlem han pe ve la, tichuan dam chhungin i thian a lo ni mai ang. Ui hi zawng mihring an ang ve lo- i tih that phawt chuan engtikah mah an theihnghilh ve tawh ngai lova ni” a han ti a. Chu veleh Johna chu a tho thuai a, ui chu eitur a rawn pe ta a, Midangte pawh chuan chaw an ei tan ve ta a.
Severna chuan a bula thute chu ngawi rengin a han en kual vel a, an vai chuan sawm an ni a, kum inang lo tak tak te an ni hlawm a, an vai chuan hnathawk thei awm tak hmel an pu hlawm a, an zinga pakhat Bull Devinta an tih chu severna chuan a en fal ta bik deuh a.

Bull Devinta chu sang teh chiam lo, sa tha tak , kum sawmli vel niawm tak hi a ni a, Khabe hmul chu sei fe hian a zuah a, mitmeng zim tak leh lungawi awm lo taka nur deuh nang reng mai hi a ni a. Bull tih a hming bula an telhna chhan pawh chu “Bully” tihna ni ngeiin Severna chuan a ring a a hmel a tang pawh chuan a nih hmel reng bawk a. (Bully – sawisel tur zawng reng mai, ngam zawngte tiduhdah ching ngeih nei lo tihna ani ber ang)

Bull Devinta chuan a coffee in lai chu hmui ner deuh nung chung hian a han lek sang a, “Hei Mihang bawlhhlawh inhlawmkhawmpa, hei hi enge ni?” tiin an Negro chawchhum Johna chu a va zawt a. Severna chuan a coffee chu a han tem hlek a, tah chuan nui chung hian ‘Coffee tui tawk tak ni ve maiin ka hria,” a lo ti a.

Devinta chuan ‘Niin i hria maw?’ tih leh eng ang coffee nge i lo in thin kan hre ve lo va le ! Stevensa kha chu la awm na se zawng a duh hlek lovang mawle – thil tha a hria a, a fel bawk si a, amah tluka Foreman tha kha chu hmu leh lawk lawk tawhin ka ring lo” a han ti a.

A huatthu sawi a tum tih Severna chuan a hre reng a, mahse a chhan hmain Linley chuan “Steven kha chu pa tha tak zawng a ni ngei mai, mahse a tha tih i va han hre tlai lu deuh ve mawle? A ruang an rawn thlen lai pawh khan mittui i seng ve tih reng ka lo hre lova, ui awma i lan pawh ka lo hmu bawk lo che a”, a lo ti a. An inhnial thui zel a hlauh avangin Severna chuan “Masters khan Stevensa a thih dan chu mak viau awm khan a sawi a,” a lo ti daih a.

An zinga pa ria thel thawl, Bailey a an tih a chang chuan Bones tia an koh thin chuan ‘Thil mak engmah a awm lo, White Masks ho tih hlum a nih ngei ka ring,’ a lo ti thuai a, chu pa chu Bones tia an kohna chhan tak pawh ruh chauh lo chu thil dang neih a nei teh chiam loh vang a ni.

Bull Devinta chuan “chu thu chu i sawi fo zawngin a mah Stevensa ngei kha thil awm dan zawt thei tur dinhmunah i la ding ve thuai ang” a lo ti a, Severna chuan ‘White Masks’ ho chu tute nge an nih chu le? An hming pawh chu ka lo la hre ve ngai hauh lo a?” a han ti leh a, Devinta chuan “kan puin a lo hrilh lo che chu a mak hle mai”, awmze nei deuh tak hian a lo ti leh talh a. Mahse Bailey chuan “Rukru rual an ni a, ram tinah Pinnacles velah bihrukna hmun – The Caverna an tih chu nei ni awmin an sawi a. Hope khua a mi pakhat chuan an bihrukna hmun chu hria niawmin a insawi a, Sheriff hnenah ‘ka hruai ang che’ a ti a, Mahse Sheriff chuan a lo awih duh lova, ‘Lo va kal rih la, i harh chhuak leh mai ang’ a lo tih sak mai si a. Chupa chu a mu bo ta ngei a “Thlanmualah” a han ti a.

Severna chuan “A nih leh Steven a chu engtia boral nge nia in rin?” a han ti leh a, Bailey bawk chuan “Rukru ho tawmkhawmna bul hnai deuhah a lo va kal palh pawh a ni mai thei a, White Masks ho chu hlauhawm tak an ni a. Black Berta (Bartholomew) ngei pawh hian a hlau ve bawkin ka ring a ni” a lo ti a.
Bull Devinta thung chuan “Barta zawngin a hlau ve hauh lovang, Hun remchang a neih hunah a la man vek mai ang” a lo ti a. Pa upa lam deuh Rayton chuan “Manna tur hun chu ngah tawk hle tawhin ka hria, Hatchet Folly gang ho phin darhtu, Sudden-a an tih kha lo kal na se zawng White Masks ho hian an chak lo ve hle tur a” a lo ti ve a. Linlaya pawh chuan “Sudden-a chu a phawi rang hle niawmin an sawi a” a lo ti ve bawk a.
Rayton-a chuan “A rang e – i ti em ni. Kawlphe hi a rang e’ ti ngawt lovin sawi fiah dan dang i hre nange? a lo ti leh a. Bull Devinta thung chuan “A ran tehchiam ka ring ta lo, ka hriat dan a dik chuan nupui a nei tawh a ni awm e, nupui nei tawh tan puakruak a phawi hi a ran theih teh chiam loh a nia” a lo ti a. Pakhat ve leh chuan, “A enga pawh chu nise, kawng zim deuhah tawh palh dawn hlauh chuan kawng thlangah ka pen san vat mai ang” a lo ti ve leh a.

Severna chuan ama chanchin an sawi lai chu ngawi rengin a lo ngaithla a, nupui a neih vanga a phawi muan tak leh muan tak loh chu amah ngei pawh chuan a lo hre chiah bik lo. Mahse kan la hre thuai dawn e.

Chaw eikhamah Severna chu a pindan lam panin a kal chhuak ta a. Zan mut hnu rei fe thlengin chhuna thil lo awm zawng zawngte chu a ngaihtuah let nauh nauh a. Mastersa chuan puih a ngai tih chu a hre chiang thaw a, engvanga puih ngai nge a nih chu a la hre chiang thei rih lo, Judge Embly-a’n va pui tura amah a rawn sawm khan kal duhna chhan dang a lo nei ve sa reng a ni.

Advertisements
Aside | Posted on by | Tagged , | Leave a comment

Sudden Law of the Lariat (Mizo Version) 1

SUDDEN LAW O’THE LARIAT
CHAPTER-1
Hope an tih khua chu danglamna bik engmah a nei chuang lo. Khaw chhungah chuan kawtthler pakhat chauh a awm a, a sir tuakah chuan in chhe te te a intlar phei thluah a. Chung zingah chuan inchhawng pahnih chiah a awm a, pakhat zawk chu Hotel a ni a, a pakhat erawh chu ‘Come again’ Saloon a ni a, saloon hnunglam chu ‘Dance Hall’ ani nghal a. Chung pahnih baka la sawi tlak deuh leh te chu Bank in te, General Store pahnih te, thirdeng in tel leh saloon dang thenkhat la awm ve te chu an ni tawh mai a. Kawngdung sir tuakah chuan thingphel an phah phei a, chu chu kal veivah nan ber an hmang a. Kawtlai chu tin ruak leh bawlhhlawh chi hrang hrang in a khat a. Khaw hmawr leh lamah chuan lui te tak te a luang a, mahse khua atanga mel khat lekah chuan thlaler zau tak a awm a, lui chuan lui dang va fin tur pawh nei chuang lovin chung lai thlaler ram velah chuan a va thamral ta mai mai a.

Khaw chhungah chuan mihring hmuh tur an vang hle a, saloon pakhat kawt zawnah chuan mi pahnih chauh hi an ding a, pakhat chu saloon neitu, Benta an tih chu ani a. Benta chu pa tawi te, thau tak leh hlim thei tak hi a ni a. A bula ding erawh chu mikhual ani a. Benta chuan mikhual chu tunge a nih hriat a chak hle a, mahse chung lai ram velah chuan thil hriat chak lutuk chu a hrisel lo fo tih a hriat ve tlat avangin engmah chu a sawi chhuak duh bik chiah lova.

Mikhual zawk chu pa sang tak, dar pharh hlai tak mai, kawng fek tha zet hi a ni a, a hmel landan atang chuan kum 25 leh 30 inkar vel niawm takin a lang. Mit dumpawl ram mai, hrisel hmel hliah hliah hi a ni bawk a. A hmui hmai vel atang chuan fiamthu duh tak niawm hian a lang a. Cowboy inchei dan pangai maiin a inchei ve a, amaherawh chu a enkawl ngun hle thung a. Puakruk pahnih a pai bawk a, chungte pawh chu a thuamhnaw dangte ang bawk chuan a enkawl ngun hle a ni tih chu hai rual a ni lova. A puakruk te chu a then a then loh nan a bawm chu a malpuiah a tawn bet tlat bawk a, sakawr chu Benta saloon hnung lamah chuan a thlung na a, a sakawr atang ngawt chuan tunge a nih Benta chuan hriat ngaihna a nei chuang lo, sakawrah chuan chhinchhiahna engmah a inchhu tlat lova.

Benta chuan mikhual chu tu tak ni ang maw ti chungin a en reng a. An khua Hope ah chuan engvanga lokal nge a nih ang tihte a ngaihtuah neuh neuh a. Chutih lai chuan puakruk ri ang maia ri fiak thuai hi an hria a, ui beleuh ri an hre leh a, tah chuan mihring inhrosa ri an hre zui ta zel a.

Come Again saloon kawngkhar chu a rawn inhawng a, ui pakhat hi a lo leng chhuak lawp mai. A nghawngah chuan hrui a inthlung a, hrui hmawr lehlam chu vuan chungin cowboy pakhat hian ui chu a rawn zui chhuak a, a kut lehlamah hruihrual a rawn lek chhuak bawk a. Ui chu rang takin a lo tho thuai a, tlanchhiat a han tum a, mahse chu pa chuan hruia pawt chungin a um zui a, chuti chung chuan a vaw zui reng bawk a.
Ui chu hruihruala vuak pahin, “Min seh te i han tumna vei chu le! Vun ral raih turin ka han vaw law law teh ang che”. tih pahin a han hlap leh nghek mai a. Ui na tuar beleuh ri leh a sawisatupa nui ri chu a ring kher mai a. hruihruala in vuak chu Puakruak ri a an em avangin engtizia nge ni ta tia thil awmzia hriat chakin tukverh leh kawngkhar atang chuan thlirtu an lo tam sawt hle a.

Thenkhatte phei chu pawnah an lo chhuak ve a, mahse silaimu leng lak tawn palh hlauvin an fimkhur hle hlawm a, silaimu chuan tumah zah leh pawisak bik a nei tlat si lova. Thil awmdan chu an hmuh chian veleh thenkhatte chuan “Mad Martina a che leh ta pek a ni maw?” an tihsan thei mai a.

Lo entu zinga pakhat phei chuan “Vaw hlum la, hnuk hrep rawh,” a lo ti ve a. Ani chuan “hremhmun thleng zawkin ka hnuk law law dawn a ni,” a lo ti a. Ui chu a lam hawi zawngin a han pawt kir leh a, Benta saloon bulah chuan vuak leh mai tumin a hruihrual chu a han lek a. Mahse a vuak hmain, “I hruihrual kha dah rawh,” tih thupek chu a hre ta mai a.

Martina thu rawn petu, Benta saloon kawta mikhual lo ding chu a lo kal hnai a. Martina kiang hnaiah chuan a va ding a. Martina chuan mak ti awm deuh maiin mikhual chu a lo en reng a. A hnenah chuan, ”Hremhmunah kal ringawt rawh” a lo ti a. Mikhual chuan engmah dang vak pawh sawi leh chuang lovin, ”Paih thuai rawh, zawnga,” a han ti leh a. Hruihrual chu a paih thuai loh chuan insual a ngai ngei dawn tih Martina chuan a hria a, hruihrual chu paih thlak pahin a puakruk a chuh ta thut mai a.

Puakruk kawm atanga puakruk a phawi chhuah hma chuan mikhual chu chet pawh a che ve duh hauh lova, mahse Martina’n puakruk a phawi chhuah rual chiah chuan mikhual kawngbawr dinglam atang chuan a lo puak chhuak nghal thuai mai a, Martina chu a leng dawr a, ui nghawng a hlinna hrui leh a hruihrual ken lai chu a thlauh a, kawt laiah chuan a tlu ta a. Mikhual chuan “Ui kha nangma ta em ni?’ tiin Martina chu a han zawt a. Martina chuan, “Ni ang chu, engvanga lo inrawlh ve ngawt nge maw i nih reng reng chu le?” thinrim meng sen teuh chung hian a han ti a. Mikhual chuan, ”I ui kha lei sak che ka tum a, chu chu ka lo inrawlh ve na chhan chu a ni mai” a han ti a. A ipte atang chuan pawisa a phawrh a, Martina bula paih thlak pahin, ”Kha i ui man aiin a let nga a tam zawk, nangma man ai phei chuan a leh sawmnga a tam zawk tur a nih kha” hmusit deuh mai chuan a han ti zui a.

Martina chuan “Heti mai hian tawp ngawt turah chuan ngai suh ang che. Kan la intawng leh ang” a han ti a. Mikhual chuan “Kalbo thuai la, i tan a tha zawk hlein ka ring” a han ti leh a. Martina chu a lo tho chhuak a, a kut zungtang ding lama puakruk kahna pem chu hup chungin kawtthlerah chuan a kal phei ta a. Mikhual chuan rei vak lo a en zui hnuin a han faifuk a, ui lo dinna lam chu a pan phei ta a. Ui chu la naupang tak, ’Lak hran rual vel’ an tih ang lek hi a la ni a. Amah chhantu chu hre ve ni awm takin mikhual chu a rawn pan hnai ve ta mai a. Mikhual chuan a lu ah a lo chul sak a, ”Thiana, sawisak i tuar zing hle niin a lang a, i nakruk lo lan chian dan atang pawh khan chaw mumal taka i ei lohna rei hle tawh awmin a lang bawk a, i ei tur ngaihtuah a tul hmasa ber dawn a nih kha a lo ti a.

Chutih lai chuan “Dawihzep pa,” tih ri a han hre ta mai a. A rawn titu aw chu ngaihnobei thei tak tur hi chu a ni ngei mai a, mahse chumi tum chuan ngaihno a bei teh chiam lo. Mikhual chu a han hawi vel a, amah rawn betu chu hmeichhia a ni tih a hre sa tawh na a, mahse chuti taka hmeltha a ni ang tih ngaihna phei chu a hre chiah lem lo. Nula vantlang tak, pian mawi deuh mai, sakawr chuanna tura siam, pawnfen chhing tak feng hi a ni a. Pheikhawk rawng sang a bun a, a nghawngah chuan rawmawl a suih a, lukhum a khum bawk a, lukhum khuh phak lohva a sam lo lang chhuak chu a buang thang mai a, mikhual hnenah chuan “I kap hlum thelh a nih kha” a han ti leh a.

Mikhual chuan lukhum chu rang deuh maiin a han phawk thuai a, nui deuh sak chung hian,”I ti dik khawp mai, duh ila chuan kah pawh ka kap hlum thei ngei ang. Mahse ka kap thawi hlek chauh a nih kha, kar hnih khat hnu lekah ngai a awh leh mai ang. Ka pi, ui i ngaina vak lo a ni maw? a han ti ve a. Chu nu chuan, “I ring sual a nih chu. Ui chu ka duh ve em em a, mahse ui ai ngawt chuan mihring nunna chu ka ngaihlu zawk ani,” a han ti deuh hmak a. Chutih laia mikhualpa mitmeng chu hmuhnawm tak a ni. Nula hnenah chuan “I ti dik ngawt mai, ka pi. Ui leh mihring nunna chu a inang lo tawp a ni,” a han ti a.

Nula chuan, heh pet ran chungin,”Khapa kha puakruk phawi lo thei lovin i cho lui a, i phawi khalh thei dawn tih pawh i hre sa reng a,” a han ti leh a. Mikhual chuan “Amah kha ka hriat mi pawh a ni lova, eng anga rang nge a nih pawh ka hre bawk lova, chu lo rengah puakruk a phawi hmasa leh nghal” a han ti ve a. Nula chuan “”Chance” ka pe ve tih ve chu tualthaha eizawng thinte chhuanlam tha ber a ni lawm ni? Nang pawh hi tualthaha eizawng thin i nih hmel a. I mihring thah zat pakhata han tih pun leh chu i thil chak ber a nih hial pawh ka ring. puakruak i kah dawn pawh khan nui chungin a nih kha i hmeh puah a ni” a han ti leh a.

Mikhual chuan a puakruk pahnih chu rang deuh maiin a han phawi chhuak leh a, a ke bula ui note lo bawk reng chu a han entir a, a hnenah chuan, ”Han hmeh puah hi chu nuam ka ti khawp mai mawle. Mahse thil theihnghilh kan lo la nei a nih chu-puakruk kawm zairekna chang ka lo hre lo a ni,” nui chung hian a han ti a, (Cowboy sual, tualthah hmangte chuan an mi thah zat chhinchhiah nan an puakruk kawm chu mi an kah hlum a piangin an zai khuar hlek zel a, chutiang chu “Notch? an ti mai thin) Nula chuan, “I va han tenawm ber mai em! tih pahin dawr chhungah a luh san ta a. Mikhual chuan a lukhum chu a han khum leh te te a, ui beng chu zawite a han pawh pahin, “Thiana, kan tlatlum lo hle mai maw? Min ngaina lo hle na a, mit chu a ti hahdam teh e- Han nui leh lek phei se chu….” a han ti a. Mahse a sawi zawh hmain sakawr chungchuang pali hi kawtthlerah chuan chak deuh maiin an lo tlan phei a, saloon kawtah chuan an sakawr chu an han pawt ding a, an hotupa niawm, sam duh deuh, hnar kul run mai chu thinrim awm fe hian a lang a. “nang hi em ni, ka hote zinga pakhat lo kap hliamtu chu?” a rawn ti a.

Mikhual chu a han ding mar a, amah rawn betu chu en reng chungin a hnenah chuan, “Min bia elaw?” a han ti phawt a, tah chuan “Nichin lawk khan rannung hman tlak loh lutuk, ke pahnih nei chi chu ka lo kap hliam ngei mai a, kha kha i hote zinga mi a lo nih ve phawt zawngin mi tha i thlang thiam lo hle a ni ang,:” a han ti a. Hnarkula chuan, “A neitu chuan a ui chu a duh duhin a sawisa ang chu- lo inrawlh ve turin eng thuneihna nge maw i lo neih ve hrep chu le?” a han ti leh a. Mikhual chuan, “Thuneihna chu ding lam leh vei lama hi ka pai reng alawm,” tih pahin a puakruk bulah a kut khinghnih chu a han thlak thla nghal a.

Hnarkula chuan deusawh awm deuh maiin “E heu! Huaisen chi bawk maw? Heng laiah hian tih tur enge i neih? a han ti leh a. Mikhual chuan, “Ka tih tur maw?” muangchang hian a han ti phawt a, tah chuan, “Sheriff nge maw i nih a, eng hna thawk chiah nge i nih chu le?” a han ti let ve a. a thu han sawi dan atang ngawt pawhin a lungawi lo hle a ni tih a lang tawh a, Hnarkula chuan “Sheriff chu ka ni lova, mahse…..” a han ti hman chauh a, mikhual chuan “I thu thuin i kaihruai thei tho a ni maw?” chu zawng sheriff i ni ve ngawt a nih chu a han ti zet a. Tah chuan aw danglam deuh maiin “i hnunga mi khan a kut kha a dah fimkhur deuh loh chuan ho pakhatin i neih tlem phah ngei ang” a han ti ta a.

Hnarkula chuan “Penton, lo inrawlh ve suh,” tiin a hnung lama mi chu a han hau zet a. Mikhual hnenah thung chuan “Eng ti tura lokal nge i nih ka zawt a che a, i thil tih dan hi ka ning tan tawh hle ani” tiin a han vau ta a. “chuti a ni maw? tih pahin mikhual chuan rang lutukin a puakruk pahnih chu a phawi chhuak nghal a. Hnarkul leh a hote chu tin reng chungin,”Second khat chhung lekin in pali khan ka kap hlum thei vek che u tih hria la, meikhupin tlanchhe nghal ula a ni mai- keipawh i thil tih dan hi ka ning ve tawh hle a ni” a ti ve ta a.

Mikhual pa hmel chu danglam ta vek hian a hriat a, a mitmeng te pawh chu a danglam vek tawh a, a la nui deuh reng na a, lungawi vanga nui erawh chu a ni tawh lo, ui thinrim, ngho langa han then hi lungawi vanga nui a ni e te kan ti zel dawn a nih nghal loh chuan, a thusawi chu a ti tak tak a ni tih an hriat tak avang leh an tan kawng dang a awm tawh loh avangin Hnarkula leh a hote chuan sakawr chu an pawt her a, kawtthler leh lamah chuan an kal ta nghal a. Hnarkula chu a kal hnuhnung ber a, a liam dawn tep chuan a lo lehhawi a, mikhual hnenah chuan “tunah hi chuan chan th i chang a, mahse hun dang a la awm ang,” a han ti a, Mikhual chuan “chu chu alawm ka duhthusam” a lo tihsan mai a.
Hnarkula leh a hote chu Come Again saloon ah chuan an lut ta dial a. An luh hnu chuan a bula lo ding Bent a chu mikhual chuan a han en a, a hnenah chuan “Engtizia nge, rilru hreawmna enge maw tak i nei em ni? tiin a han zawt a. Benta chuan “I buai thui hle dawn a nih kha. Tuna mi kha tunge a nih i hria em? Black Barta a nih kha. A thu hnial ngam pakhat mah he khuaah hian an awm hleinem,” a han ti a.

Mikhual chuan “Chuti a lo ni maw? mak pawh min tih viau dawn chu,” a han ti zet a, tah chuan nui chungin, ”Lawm hmel zawng a put vak loh tak kha mawle,” a han ti zui leh a. Bent chuan “Nuihzata lak chi a ni lo. A hote nena an lo thawh leh vaih chuan an rawn kap hlum ngei ang che mawle,” a han ti leh a. Mikhual chuan, ”Chuti te a nih dawn chuan thlanmual lian tawk leh Damdawiin tha tawk he khuaah hian a awm em ang chu maw, kan mamawh ve ve dawn tlat a,” a han ti a.
Benta chuan ”Engemaw zat chu lo kap hlum ve ta pawh nila, an kah hlum ve tho si che chuan i tan thatna enge awm chuang? Sawmhnih rual chu nangmah chauh chuan i kap hlum vek thei awm chuang si lova. Barta hi ka ngainat vang ni hauh lovin ka salooon ah hi chuan in bei lo hram ula ka ti ngawt mai” a han ti leh a.

Mikhual chuan,”I thil min hrilh chu ka lawm ngawt mai. Tunah hi chuan ka kalbo rih dawn a,” a han ti a. Saloon hnung lama a sakawr thlun chu a va kai chhuak a, a chetla chu enthla tu an awm reng tih hriain muangchangin a insiam a, khua atang chuan a chhuak leh ta a. Ui note, Quirt tia hming a vuah tak chu a hmaah chuan a tlan zel a, a khat tawkin a rawn lehhawi a a hlim ve hle hian a lang a. A pu chuan “Lawm nachang hre ve pawh i an viau hi mawle. Mahse lo lawm lutuk mai teh suh khai, buai kan tan dawn chauh ni te pawhin a lan hi” tiin a nui chu a han be luam a.

An liam tur chu Saloon neitu, Bent-a chuan a thlir zui reng a, tah chuan, inchhungah a lut leh a, inchhunga lo awmte hnenah chuan, ”Gentlement, lo ngawi lawk teh u khai, keimah ngeiin thu ka han sawi teh ang. vawinah he khuaah hian mipa a lo zin a ni,” a han ti a.

Aside | Posted on by | Tagged , | Leave a comment

BILLY THE KID chanchin tlangpui

Billy the kid hi William Henry McCarty, Jr. tih hming puin November 23, 1859 khan a lo piang a. Billy The Kid tia khawvelinin a hmelhriat tur tih hria se a nu hmeithai, Catherine McCarty hian a hring duh malek ang le. Ziaktu tamtaka hmingah ringawt an inhnial. Patrick McCarty, Michael McCarty, William McCarty, or Edward McCarty .. a dik ber pawha hriat ta lo a nih hi. Ka sawi khi ka pawmdan ve mai chauh a nia. Mahse amah ngeiin a hnu lawkah a hming hi William H. Bonney tiin a thlak ta daih. Engpawh chu ni se khawvelin Teenage Outlaw tia an hriat lar Billy-a chu kan mangphan ta ruau ruau tho a nih hi.

Ziaktu lar Michael Wallis leh Robert M. Utley te chuan Billy The Kid hi American Civil War lo thlen hma ni chiah a New York a piang niin an sawi a. Hriatchian theih ni tawh lo mahse 1868 khan Catherine McCarty hi a fa naupang te pahnih Henry leh Joseph te nen Indianapolis, Indiana-ah pemin, amah aia kum 12 a naupang William Antrim nen an innei tih erawh a chiang. Thenkhat sawi dan chuan a pasal hian fahrawn pahnih chu a enkawl peih lo niin an sawi. TB vangin September 16, 1874, khan Billy-a nu hi a boral a, Memory Lane thlanmual, Silver City-ah phum a ni tih pawh a la chiang zel e.

Chutiang harsatna in a tlakbuak karah chuan Billy The Kid tia khawvelin a hmelhriat tura chu an thenawm Hotel neitupa chuan a enkawl ta a. A duh sak ngang mai. A nungchang that em avang leh School-ah leh in lamah thil ruk a chin ve loh avangin naupang enthlak bika ni ta pang mai. Thil ruk ching lo e ti lovin a thiante thilruk zarah man a tawk ta hlauh. Tichuan Jail tang tur a nih tak avangin a Pami a, Clifton, Arizona ami chu a pan ta ngawt mai a. Ani lah chuan a lo awmpui duh awzawng lo. Cheese siamna Factory-ah an inhlawh leh ren rawn a, Mahse a thian chhar thar (Mihring hming zawng zawng hi chu sawi tawh lo mai ang, Type a buaithlak), mahni a Ranch nei ngei te chu belin an bulah hna tul ang ang, vawk chaw pek thlenga thawk turin Coe-Saunders ranch. chu a bel ta a ni.

Chutiang a hringnun tluang taka hmang tura a lan lai chuan zangkhua a bungbu ta tlat. McCarty ngei pawh chuan awmna hmun dang a dap a ngai ta. Thlalera te an rawl bo thul. Thian duk dak lo tak tak John Mackie ti ang reng te nen an inchhar ta zel. Camp Grant, Arizona-ah mi challang tak Frank “Windy” Cahill leh a thiante nen an inhmuthiam lo ta tlat. Phawirang zawk chuan a muangzawk Cahill-a chu a kahhlum mai a tul ta. Billy hian Puakruk chelek a lo zir ru fe ni tur a ni. Cahill-a thiante kuta a ralthih mai hlauin a tlanchhiat a ngai a. Outlaw a lo nih tak avangin Arizona ngei pawh chu a tan a himlo, New Mexico lamah a raltlan ta ringawt mai a ni. Dan leh dun awm mumal lohna, Puakruk phawirang leh kapthiam te Lalna hmunah chuan maltlat ngawt a chi lo tih a hria. Chuvang chuan Jesse Evans-a Gang, ‘The Boys’ an tih mai chu a zawm ve ta nge nge a.

Chutih lai chuan mihring iner em em mai pahnih LG Murphy leh John Tunstall te Lincoln-ah chuan an rawn lang hlawl mai. LG Murhy hi Cancer natna vei a nih avangin a thachhangdawltu James Dolan chuan an sumdawnna(Mafia) a kengkawh ber a. John Tunstall a chu chulai hmun atanga nekchhuah an tum a ni. Governor Sam Axtell leh Judge Bristol te chu an lamtang an nih miau avangin Tunstall-a umchhuah chu thil harsa niin a lang lo. Mahse Tunstall-a chu pa sehhel zet mai a ni ve a. Dan kengkawhtuten awn lam an neih tak tlat avang chuan Ngen mu hmanga an buaina chu chinfel mai a thlang ve ta.

Dolana hian The Boys ho chu ruaiin a theih ang angin Tunstall a chu a tibuai a, a ranrual te ruk sakin indona hmingthang Lincoln County War chu a lo chhuak ta a ni. Vanduaithlak takin Billy the Kid chu hemi tum hian man a ni ta hlauh. A ruaitu zawk Dolan-a te hian an ngaihsak zui tak loh avangin Tunstall-a lawmah a tla a, anin khulh chhuakin a ruai zui ta theuh mai a ni.

John Tunstall-a chu rawng taka thah a nih hnuah a naute chu an tlawm mai lo. A thachhangdawltu Alex McSween a chuan Billy the Kid-a leh a thiante chu ho khawm zelin ‘The Regulators’ an in vuah a. Roreltu lam zawng zawng mai chu Dolan-a lamtang an nih avangin hmalak a buaithlak hle. Thisen pawh a luang hnem. Amah duhsaktu John Tunstall-a thihna Billy The Kid a hringnun a thlak hneh hle. Phuba leh thisen chhuah bak a ngaihtuah meuh tawh lo. A mitah chuan Murphy a ni emaw, Dolan a ni emaw, Dan leh thupek kengkawhtute an ni emaw, danglamna a awm lo. Tangtlang vek an ni a, misual vek an ni. A theih theih phil hmiah hmiah mai chu a tum ber a ni. An pu thar Alex McSween-a man tuma lo kal Sheriff leh a deputy 4 zet chu an lo tingmit leh ta dial. Chutianga thil a thlen takah chuan The Regulators ho chu misual tawpkhawk a chhuahin, manna thupek an chhuah ta zel a.

Sheriff thar George Peppin leh a hote bakah ama Gunmen ngeite pawh chu ring zo lovin Dolana chuan Fort Stanton a sipai ho chu an Colonel Dudley-a hovin a chah chhuak ta rup mai. A hunlaia silai rapthlak zet, herpuah pawp pawp chi Howitzer and Gatling gun an tih mai chu an rawn keng rup mai bawk a. Tichuan The Regulators awmna in chu an hual ta mup mup mai. An zam ve tak zet. Mahse hetihlai tak hian kum 17 mi lek William H.Booney tia hmingthlak hlim chuan Leadership hna chu a rawn kengkawh chho ta. Harsatna leh buaina hmunah chuan mi huaisen zui mai hi a lo awl a niang. Khawvelin heta tang hian hre reng tawh dawn. He inbeihnaah hian Alex McSween leh a naute pathum an thi a. Billy the Kid leh a thiante erawh thim zingah an putchhuak thei ta hram.

A thawhpui thin, a Kid- ni ta te nen chuan rawva takin an han nung chho ta a. Governor thar Lew Wallace a lu an tihai ngei mai. Mahse Billy The Kid chuan Outlaw nih a, tlanchhe reng renga hun hman chu a ning ve ta a niang. Governor thar hnenah chuan, ngaihdamna famkim pek a nih dawn phawt chuan a Gunmente nen an inpek tur thu a thawn ta a. Governor pawh a thaw huai mai. Mahse Dolan-a te chuan lamtang an ngah em avangin Governor chuan a ngaidam pumhlum hleithei ta lo. Chuvang chuan a Gunmen te nen Billy The Kid chu an rawl bo leh ta. Ran rual ruk leh pawisa khelh bak thawhtur an nei lo. A Gang te aia rawva tak tak Gang pawl hrang hrang tam hle mahse thilsual thleng apiang chu chanchin bu lam chuan Billy The Kid leh a Gang te tiha an puh tak zel avangin a lar vet vet hle. Billy The Kid tih pawh hi chanchinbu mi te vuah sak a ni. A mi thah te leh a chet dan zawng zawng sawi kim sen a ni lovang. Phawirang hmingthang Joe Grant a thah dan erawh zep tel lawk ang.

Joe Grant a Saloon lo luh chiah hian a hriatna kil khat atangin amah thah tum tih a lo hre nalh mai a. Ngaisang awm taka a Puakruk chu en dilin, Joe Grant pawh chuan a lo pe ve mai a. Mahse Billy The Kid hian a mu a phawrh sak vek a, a pe let leh nghal.

Buaina chhuah hnua Grant an a puakruk an hmehper chuan, puak tur awzawng a lo awm lo. Muang fan reih rawih leh nui hak hak chungin Billy hian a kaphlum ta a ni. Puakruk phawirang ber pawl a sawi pawh muang fan reih rawih a phawiin a kaphlum thei ta tho mai.

Hetih lai hian Billy a te nena ranrual lo ru ho thin, nun sim ta Pat Garrett chu Sheriff atan a thlan a ni a. Billy the Kid hrechiang em em tu a nih avangin amah man turin US Marshal-ah an siam ta zel. Pat Garret leh a hote chuan Cabin te takte-ah hual betin, December 23, 1880 khan Billy leh a hote 3 chu an a inpe ta a ni. Mesiila a a chungthu ngaihtuah a nih lai te chuan a nui hek hek reng mai a, hlauh a nei tehchiam lo niin a lang. Sheriff Brady a thah avangin khaihlum turin Lincoln-ah an thawn ta a ni. Deputy James Bell leh Bob Olinger te ven lai chuan April 28, 1881 khan a tlanchhuak leh a. A vengtute pahnih hi mitthi khaw lamah a thawnliam hram. Bob Olinger phei hi chu a Jail tan laia ti retheitu a ni ve reng reng bawk.

Tichuan Fort Sumner velah khawsain a nun erawh tlemin a danglam deuh. Pawisawi lo leh mi nunna la lo zawngin hun a hmang hram hram a. Mahse chhum lo chat lova amah chhuitu Pat Garrett leh a Deputy pahnihte chuan a khawsakna chu an rawn hrechhuak ta tlat.

Pat Garrett chu Dawr neitu Pete Maxwell’s -a hnuaiah pawh lo thawk tawh a nih avangin tlangnel takin Maxwell’a dawrah chuan a thu a. A Deputy pahnihte erawh chu pawnah an awm thung. Unau hmelhai hunlai vel a ni. Billy the Kid chu bawngsa lei tumin dawrah chuan a lo lut a. Chu dawr chu a luh fona anih avangin dawr neitupa chu auvin, “Pete, tutenge pawna ding saw?” a rawn ti lut a. Mahse chhanna a hmu lo. Billy the Kid hian ralthuam dang keng lovin chemte chauh hetih lai hian a pai nghe nghe. Chhanna a hmuh tak loh avangin Spanish tawngin, “Tunge awm?” a han ti leh a. Chu aw chu Billy The Kid-a aw ngei a ni tih hriain Pat Garett-a chuan thim zingah a silai chu a hmetpuak ta thuai mai. Chu ngen mu chuan a lung tak deng fuhin Billy The Kid a chu chhuatah a tlu nghal thlawrh a. Ka pawh chhawn hman lovin July 14, 1881 khan he Cowboy rorum hian fam dairial a chang ta a ni.

A tukah a thian rinawm pahnih Tom O’Folliard leh Charlie Bowdre te chuan Fort Sumner thlanmualah an vui liam ta a ni. Hetiang hian a chanchin an sawi kher thin,

‘He was killed not for who he “really” was, but for what people “thought” he was’.

A nihna ni hauh loah puh chmingchhiatin a awm a. A tih lo ti anga puh niin rorelna dik lo tak chuan a damchhungin a um a ni. Loh theih lohnain a nan loh chuan mi nunna lak ngawt chu a duh ngai lo, pawisawilo nunna lek phei chu.
Mi 21 lai that anga sawi a ni a. Mahse a thianten a mi thah te hi 9(pakua) aia tam theiin an hre lo. Sap paah chuan Palian lo tak, feet 5 leh inches 8 chauh a sang he Outlaw naupang te hian ngaihsan a la hlawh zual zel a nih hi.

Aside | Posted on by | Tagged , , | Leave a comment

CHAKMATE SUPREME COURT-AH ZUALKO DAWN

Oct 19, 2017, Ningani khan Committee for Citizenship Rights of the Chakmas and Hajongs of Arunachal Pradesh (CCRCHAP) leh Arunachal Pradesh Chakma Students’ Union (APCSU) te chuan Arunachal Pradesh state sorkar-in tunkar vek Nilaini a House a Chakma leh Hajong te citizenship hnawlna resolution a siam (adopt) chu lungawilovin Supreme Court-ah zualko an tum.

CCRCHAP president, Subimal Bikash Chakma chuan he thil hi an pawl chuan Supreme Court thuchhuah angin Supreme Court lamah thlen an tum thu a sawi a, “Anihna diktakah chuan kum 2015 a SC in Arunachal Pradesh a Chakma leh Hajong te India khua leh tui nihna pe tura thupek a chhuah hi AP state sorkar hian hnawlin dan (resolution) a siam a ni. Heti ang hi thil awmdan anih avangin CCRCHAP chuan he state sorkar Rorelna sangin hriattirna alo chhuah tawh a remchan dan ang a tithar leh tura zuakko mai loh chu duhthlan tur a neilo a ni,” a ti.

“He thil hi SC thutlukna leh kalphung zahlohna leh dodalna, kum 53 liam ta a muanna, communal harmony leh inter-community relationship tihchhiatna leh Chakma leh Hajong te nekchep duhna bak engmah a ni theilo.” a ti bawk.

CCRCHAP chuan Chakma leh Hajong 47,471 (as per 2011 census) lek te hian AP mihring 1.4 million te dinhmun hi engti kawng mahin a tiderthawng theilo an ti a, “Sorkar hian state chhunga tribal te dikna humhalhnan tiin resolution diklo tak a siam a ni. Chakma leh Hajong te hi tribals, Tibeto-Mongloid thlah leh state chhung hnam tam tak te ang thova Buddhists ni ve tho an ni a, Sadiya leh Balipara Frontier Tracts te Bengal Eastern Frontier Regulation (BERF), 1983 a lakluh an nih hma a BERF hnuaia lo awm tawh, Chittagong Hill Tracts atanga rawn kal an ni. Arunachal Pradesh-a a ram mi tribal te hi dinhmun hlauhawma an awm anih chuan non-tribal, kum 1961 a mi 36,614 atanga kum 2011 a mi 3,84,435 zet a rawn pung chho te vang zawk hi a ni ang.” an ti.

“kum 2000 hnu lama Pakistan atanga Rajasthan a Hindu refugee rawn lut te pawh citizenship pek an ni a. Chakmas leh Hajongs te hi India khua leh tui an ni reng a, mahse racial discrimination avangin thenkhatin an hnawl mai a ni,” an ti bawk.

Aside | Posted on by | Tagged , , | Leave a comment

TAWNGTAI THILTIH THEIHNA ( True Story ).

• Missionary tana ṭawngṭaina chu
• Missionary vengtu chu
• Pathianin i tawngtaina a hria.

Michican Missionary chawlh hmang mekin a lawina kohhranah hetiang hian thu a sawi a.
“Africa rama rawngbawlna hmun lian lo tak mai a, damdawi inah hna ka thawh laiin, kar hnih dan zelah khawpui kan hnaih ber ah Thirsakawr hmangin ramngaw pilril tak paltlanga chhakkhai lam tura kal ziah a ngai a. Kalkawngah hian nihnih thang a ngaih avangin kawng lakah zan hun hmanga riah ngei ngei a ngai a.

Tukkhat ka zin chhuak chu ka inruahman dan chuan, khawpuika thlen velleh, Bank atangin pawisa ka la chhuak ang a, chakkhai ka lam khawm veleh ni hnih thang tura haw leh nghal vang vang turin rilru ka siam a.

Khaw chhung ka luh tan lai chuan mipahnih insual hi ka hmu a, pakhat zawk chuan an insualna avang chuan hliam na tak a tuar a. Ka theih ang ang chuan a hliam te chu ka enkawl pahin , Pathian thu, thahnemngai takin ka hrilh pah bawk a.Tichuan ka tum anga thil ka tihfel hnu chuan ka thawhna hmun lam panin, ni hnih hnuah damtakin ka thawhna hmun chu ka thleng ve leh ta mai a.

Kar hnih hnu chuan a ngaite bawkin khawpui lam panin ka chhuak leh a. Khawpui ka thlen chuan, a hmaa ka hliam enkawlsak pa khan min rawn pan thuai a, heti hian min hrilh ta a

“Thian țhenkhat te nen pawisa leh Damdawi engemawzat kengin zanah ramhnuaiah i riak dawn tih kan hria a, zuiruk che a; i mutthilh laia tih hlum che a, i pawisa leh damdawite laksak tur che kan inruahman a. Mahse, ramhnuaia i riahna hmun kan rawn thlen chuan mi 26 ngawt, ralthuam kengin an lo veng che tih kan hmu ta a.”
Chu thu a sawilai chuan ka lo nui a, Tumah kalpui ka neih loh thu te, kha mi zan khan keimah chauhin ka riah thu te ka sawi var a.

Mahse, chu tlangval chuan a thin dawm meuhin tihian a sawi leh ta a”
“Ni lo. Ka pu, keimah chauh hi chung thil thleng chu hmutu ka ni hlei nem , ka thiante mi panga pawhin an hmu ve a.
Tin, nangmah vengtu te avang chauh khan kutthlak lo che a, haw leh pawh kan ni reng asin.” a ti ta mai a.

He thu Biakina ka sawi lai chuan , inkhawm zinga mi pakhat chu rawn dingin, chu thil thlen lai , hun leh ni te chu Missionary chu a rawn zawt a. Missionary chuan a thlen hun leh ni te in khawm te a hrilh hnu chuan, Zawhna siamtu chuanti hian a sawi a

“Kha Africa a zan hnih lai nangmah chauh a, ramhnuaia hun hmanga i mut lai khan hetah chuan zing a ni tawh a. Golf khelh tumin ka inruahman a, Ball dahna hmawlhte ka phun dawn lai tak chuan, i tan a Tawngtaina hunhmang tura nawr tet tet tu ka thinlungah hian a awm tlat mai a..

“Min nawrtu Pathian nawrna chu a nasat em avangin kan Kohhran member ka hmuh hmuh chu Tawngtai turin ka sawma, i tan kan Tawngtai ho ta a ni.” tih a sawi rual chuan,
“Khawngaih takin khami ni a Tawngtaina hun min hmanpui tute kha kan ding chhuak thei em aw?” a’n ti nghal a.

Tawngtaina hmanpui tute chu an lo ding chhuak thliah thliah hlawm a, Missionary chuan mak tiin a lo en reng hlawm a, tute nge an nih a ngaihtuah hman lo, a rawn ding chhuak a, a zat chhiarin a lo buai hle mai a. Mipa 26 chiah chiah an lo ding chhuak nia !

Hei hi pathian hnathawh tih loh rual a ni lo. Lalpan a mite tawngțaina a chhang a, a mite misual leh thil țha lo lakah a humhim țhin a ni.

Aside | Posted on by | Tagged , , | Leave a comment

CHAKMA ISSUE Mizote tana helhkam chu.

Ni 101 FB break ka neih hlan a Mizoram leh Hnam tana Issue pawimawh ka tih zual ka han thlir let ve zuai teh ang.

1. CHAKMA ISSUE : Chakma ho hi Bangaldesh lam chhuak niin, hun hrang hrangah, chhan hrang hrang avangin Mizoram an rawn lut ve a. Inti original deuh leh India danpui-in a phal anga Indian Citizenship nei tawh ho hi chu Mizoram Chakma ka ti mai a.

Arunachali ho, hnam mawl zawka kan lo ngaih reng thin hruaitute erawh chuan mi panngai ang taka treat duh lovin an lo la refugee chei reng bik mai hi a lo ni a. Keini ram leh hnam hruaitute ( inti politician/ public leader ho) , Sunday a inchei un khuk ringawt, Monday to Saturday a mahni hmasial a, a rem leh remlo, a mawi leh mawilo pawh thlu lova ei a in bik puk puk thupui reng mai, chu pawh Mipui chanai ( vice Public Fund) la ni ber zui ang chi hotute chuan heng Chakma ( Takam) Vote hi an ei hmuhna kawng ah an lo hmu tai tlat zel thin sia. Chakma ho hi an lo vulh lianin an lo thau ta lua ani ber mai. A dik tak chuan kan Labour Class tur te khan tunah chuan min lim ve arh arh tawh mai chu anih hi.

Chakma ho lah chuan Central sawrkar ah BJP ( Hindutva thupui) ho an lal hrih si a, chuvangin Mizo Kristiante chu an tawngpawng tan dawn bik lo tih an hrethiam ve kar mai sia. A hminga Mizoram a Minority Tribe an nih chu hre khiauvin, Delhi tlangah an vui ta zat zat mai thin si a. Central sawrkar tan lah Indian citizen theuh theuh, a Minority tribe zawk lehnghal thu hla chu an lo awih sak ( a tak tak emaw a der der tal pawhin) mawi hnai ve kha a tul deuh roh bawk si. Keini lam lahin thiam taka the 23rd State of Indian Uniona a Indian Citizen by birth kan nihna ( Indegenious tribes) leh MIZORAM chu Chakma Land ani ngailo hrim hrim tih zawnga kan zualko ve tlat loh avangin, Chakam ho an zualkona chu sawi fiah turin kan NGO te’n Supreme Court of India theng thleng an inlan a ngai theuh zawk si. Delhi tlanga Lal Modi-a sawrkar khuan Mizoram hi Chakam Land ani ngailo tih an hre ve vek. Thil anihna tak kan zuk sawi fiah ve te pawh hi an lo nghah ruk reng ka ring tlat ani. Nakum kum tir lamah ka buaipui nghal chat ang.

Ka inngaihtuah lungpuam chang phei hi chuan tlawm leh zah dawn lek lovin .. khaw nge ni tak tak, Mizo Kristian takin kan ram leh hnam , kan sakhua veng hima chhan tlat turin mi piangthar tha zual leh hnam a chiang zualte hi chuan Missionary rilru pu-in kan BJP sak ve zawk a lo tul reng anih hi a….. ka ti thin.

2. KAWNGPUI CHHIA : Mizoram hi ram naupang ( Geologically ) ani a, tlangram chhengchhe tak a lo ni bawk a. Chutah khawvela lirnghing duh berna ram ( Seismically Most Active Zone 5 ) kan la ni zui. Kan hriat tham lohvah hian lir te tham ang chi Minor quakes hi an nghing det det reng bawk si hian kan leilung ( Sub surface geo-formation) hi a ti khiin, a ti thawl nasa hle tih kan hriat hmasak a pawimawh a. Chutah ruahsur duh em em na ram a la ni zui. Hetiang dinhmun a kan wm hi tunhnai a kan hriat chhuah chauh a la ni lo zui. Chuvangin kan State sawrkar-in kan harsatna bik ( Typical of Mizoram) te hrereng chungin State / ram dang tlangram kawngte aia laih uluk zawk awm tak thin tur si hi, Central sawrkar atanga kawng laihna tur sum rawn kal te lah hi a tam thei ang ber lo hijack a, 10-20% of earmarked / alloted fund vel awrh a lo siam zawh kha kan aim in life a ni trut bawk si. Fiamthu ti taka an sawi thin angin mite chuan sumin kawng an siam a, keini erawh chuan kawngin SUM KAWNGBO a tam thei ang ber kan siam thin hi a kaikuang ta ber chu ani.

Kan kawngpui te ( kawng dang peng neuh neuh chu sawi lovin kan National / State Highway hote bik ngaihtuahin) hi a chhiat em em na chhan chu tha tawk turin kan lai/ siam lo hrim hrim ani ber mai. Kawng laihna tur sum chu sawi loh , kawng laih zawh hnua a enkawlna tur sum ( maintenance fund) te lah hi inti bright takin, Bible zakzeh trawtin lo divert hram hram kha kan lo tum pan a. Minister hote lah chuan kan lung a no lutuk avangte an han ti ve ngawt zel a. Kan Mizoram ang kawng ( trafiic theu neu ) atan te hi chuan kan Quarry LUNG hote hi an tha tawk reng. Lung no tak pawh hi a delh a delh keh ( failure due to compression) chu a har ve khawp asin. Kan phahna (setting of plane ) hi kan chil mam tha tawk thin lova, chuvangin Compression vang nilovin Bending ( a inelh zawngin) a chhe ta zung zung thin niin a lang. Chu mai bakah ruahtui tamna rama awm leh zel zelin kawng hnuai a tui put lut daltu tur , alkatra/ bitumen kha chhah deuh zuala phah tur awm tak anih lai khan chhah lo deuh zual ( arpui thai khawk theih emaw hnim to thei tur tawk velin) kan han phah leh tawk bawk thin si a. Kan kawng chhiat chhan ah hian mawh tur dang hranpa, awihawm tak kan neilo ani ber mai.

3. POLITICAL PLATFORM/ PARTY THAR PIANG NOH NOH HI… Mizoram mipui in tun a mi political party ho neknawk ang nilo, mi rinawm ve deuh, ramhuai rau rau ah chuan a zia ve deuh hi a tih tur te an rawn chhuak thei law maw.. tia an tuihalna ti langtu ani ber mai. Mipui muthlu nguai tawh kai tho thei tur kan zawng mek ani ber mai. Mipui min kai tho thei tur mai bakah min cho chhuak a, min feh chhuah pui tu tur tur ( Motivator) kan nghak thrup ani tih a lang. Kan pute lo hrawn tawh ho lah hian Keipui ni tur ngei ngei kha zawhte-dum ah min chhuah tek zel mai sia. Political movement gear thlak turin, speed sang zawk leh level sang deuh zawka ram leh hnam min tlanpui thei tu tur kan zawng mek ani ber mai.

Mizote hi inkawm khawm nuam ti tak, inkawm ngeih tak tak erawh thiam silo kan ni. Kristian Pathian pakhat bia, Bible pakhat hmang, tawng pakhat hmang thei vek si mi nuaih 10 awrh hian Kohhran ( Mizo Kristian Tribal vek) 100 dawn kan han nei ngawt mai atang ngawt pawh hian kan biak Pathian leh a duhdan ah kan chianglo tlangpui tih chu a chiang khawp mai. Chutiang bawk chuan ram leh hnam pakhat vei theuh theuh thawk khawm hova kaw zawt tur tih chiang reng mai si kha mahni style leh duhdan te te dah lal larh vekin kan han thawk ho theilo leh pek a. A dik tak chuan mi kan hmangaih tak tak chuan kan duhdan hi kan dah lal viau ngailo asin maw le, kan hmangaih-a emaw hmangaih-i duhdan kha kan ngai pawimawh ber thin. Mizoram mamawh hre lo inti ram leh hnam vei kan awm dawn silo. Hmangaihtu dik tak chu a inngaitlawm ngei thin zawk anih si maw le. Chapo thungin tumah a rim thluk theih loh. Mi a Pathian biakah a chian chuan Kohhran ( mihring ngaihdan hran avanga din hran ) ah a buai tak tak ngai lova. Chutiang bawkin min ram leh hnam hmangaih awmzia dik tak a hriat chuan Political party kha a la thu tak lutuk thei lo tur anih laiin, keini ve chu ram leh hnam hmangaih inti ho chu direction hrang hrangin kan inpel ta suau suau mai thin ani. A MAK mang e ti hrih phawt ang.

Chunglam hian Mizo-Kristian-Tribal (MKT ti zel tawh ila) te hi min theihnghilh lo, kan hmalam hun atan programme min neih len pui hian ka hre tlat pek a. Chuvangin Pathian nung chu a laiah dah sauh sauh ila, tih takin a duh dan chu thupui ber zelin Mizoram leh hnam kan vei-na koki i han thlak hret hlawm teh ang u hmiang maw le…

Aside | Posted on by | Tagged , , | Leave a comment

ENG VANGIN NGE SNAKE ANTIVENOM A VÂN ÊM ÊM?

Rul tûr thahna (antivenom) hi Mizorama damdawiin hrang hrangah duhkhawp hmuh tur a awm lo a, mipui mangang in “Antivenom hi țhahnem tak awm rawh se” an ti ve chhên bawk nen, a chhan hi sawi a ngaiin ka hria.
.
Rul tûr hi chi hrang hrang a awm a, khawvel pumah hian rul zinga poison pai hi chi hnih khat bâk an awm lo a, a dang zawng hi tûr nei an nih pawhin an tûr hi venom vek a ni. Venom chu poison ang a ni lo a, taksa pema a luh loh phawt chuan a hlauhawm ve loh a ni.
.
Antivenom siam dân hi post dangah ka sawifiah tawh a, sawi zui lo mai ila. Antivenom chu thisen sipai, hmelma do tura insiam danglam (antibodies) an ni mai a, hei vang hian Blood Bank-a thisen kan dahțhat rei theih zâwng (thla thum) bâk dahțhat ngaihna a awm lo. Dahțhat rei theih a nih loh avang tak hian thingtlang damdawiin tina supply tur chuan senso a turu ngawt ang.
.
India rama rul hlauhawm pali, kum tina mi chuk hlum hnemtu ‘Big Four’ an tih mai – Spectacled Cobra, Common Krait, Russells Viper leh Sawscaled Viper te hi an tûr hmangin antivenom ințâwm theih siam a ni a, rul pakhat aia tam tana antivenom inhman țâwm theih hi Polyvalent Antivenom an ti. Monovalent Antivenom (rul chi khat tûr thahna) angin effective êm êm lo mah se, Polyvalent hi a hmantlak tho a ni. Tin, he polyvalent bik hi Mizoram rul hlauhawm Monocled Cobra te, Banded Krait, King Cobra leh Black Krait chuk enkawl nan pawh hman țhin a ni.
.
Antivenom hi siam chhuah a hautak avangin a man a to hle mai a, sawrkar tan thingtlang damdawiin tina supply par par chu thil harsa tak a ni ang. Thingtlang chu sawi loh, khawpuiah pawh hnianghnar taka hman tur hi supply a huphurhawm a ni. Tin, rul hi an tûr a inan loh avangin Antivenom hi chi hrang hrang a ngai ve a, polyvalent hman theih lohna engemaw zat a awm avangin sawrkar tan supply a hautak lehzual a ni.
.
Tin, rul țhenkhat, a bikin coralsnake te hi antivenom an siam duh vak lo a. Mizorama MacClelland’s Coralsnake te hi an zaidam avang leh an chuk pawha tûr an pek chhuah tlêm țhin avangin antivenom mamawhna a sâng lo hle mai a, hei vang hian a siam chhuaktu company tan pawh siam a hlawk vak lo a ni. Kum 2012 khan USA ah coralsnake chuk case a tlem êm avangin antivenom siam an titawp ringawt mai a, coralsnake in mi a chuk pawhin enkawlna a awm dawn lo tihna a nih chu. Hetiang a nih nuaih avang hian Mizoramah pawh antivenom chi hrang hrang kan nei thei ta lo a nih hi.

Aside | Posted on by | Tagged , | Leave a comment

KUM 2017 — 2019 CHHUNGA CENTRAL YMA HRUAITU TURA THLAN THARTE

PRESIDENT : Pu VanlalruataTuikual south.
Vote hmuh zat : 2262/1288, (56. 94%)

VICE PRESIDENT : Pu . R. Lalngheta, Hlimen.
Vote hmuh zat : 2198/1218, (55.41%)

GEN. SECY : Tv. Lalhmachhuana, Chaltlang Lily Veng
Vote hmuh zat : 1979/1781, (89.99%)

ASST. SECY : Peter Chhakchhuak, Maubawk.
Vote hmuh zat :1951/801, (41.05%)

TREASURER : Lalrochuanga Pachuau, Zarkawt
Vote hmuh zat : 1825/1421, (77.90%)

FIN. SECY : Fabian Lalfakawma, Chawlhhmun
Vote hmuh zat : 1764/312, (17.68%)

Aside | Posted on by | Tagged , , , | Leave a comment

WILD BILL HICKOK chanchin tlem.

WILD BILL HICKOK
James Butler Hickok tih hming puin May 27, 1837 khan Troy Grove, Illinois, US-ah a lo piang a. Tleirawl te a nih lai atanga Pistol ngaina zet a nih vang a ni ngei ang, Phawirang a sawi tur ni lo mahse a Pistol kah thiam zia hi sawi hat a ni reng a ni. Kum 18 a nihin Charles Hudson nen an insual chiam mai a. Tui lakna kawrah tla lut ve vein amah phei chuan a that ta ngeiah a inngai hmiah. Chuvang chuan tlan boin General Jim Lane-a sipai “Free State Army” (Jayhawker te pawh an ti bawk) chu a zawm ta daih a ni. Hetah hian thian pakhat, kum 12 mi lek William Cody (a hnu a “Buffalo Bill” tia lar ta hi) nen an intawng ta nghe nghe a ni. Hepa nen hian an inkawmngeih ta phian lehnghal.
America tualchhung indo a lo chhuak a, Union sipai scout-ah te an trang leh ren rawn thul. Indo a lo tawp chuan thawh tur tehchian nei ta hek lo. Pawisa khelh chu a eizawnna a ni ta ber. Thiam pawh a thiam hle reng a ni. Pawisa khela Springfield, Missouri a hun a hman lai hian General George A.Custer-a sipai, 7th Cavalry-ah te apawh an tel veleh zauh bawk a. A mi thah hmasak ber chu David McCanles niin 1861 December khan Parda phen atanga kaphlum a sawi a ni a. Mahse thubuai sawinaah chuan mahni sahimnan a tual that tiin thiam a chang ta hlauh.

Gunfighter tia hriat a lo hlawh chhohna chhan ber hi chu 21st July, 1865 a David Tutt-a a kahhlum atangin a ni ber. Card khelhnaah inhnialin, an inhnialna chu tun thlenga Mizo te pawhin indraw tia kan sawi tak hmang ngei hian an chingfel a ni. Inhnungchhawnin, Yard 75 awm vel zet an inkalsan vang vang hnuah lehhawi thutin an Puakruk an chuh a. David Tutt-a hian hmetpuak hmasa zawkin a tum a hlah ta hlauh. Hickock-a erawhin a hlah ve lo. Lung(heart) taka kah hian hnuk a chhat rang ber tia a lo sawi fo angin yard 75 atanga mihring lung han kapfuh nalh thei Hickok-a kha lar zui lo chi pawh a ni lo. He thubuai Judge Sempronius H. Boyd-te hoin an han ngaihtuah zet chu buaithlak an ti ve hle. An la hriat ngai miah lo tualthahna a nih mai bakah ziak loh dan hman a ngai ta tlat mai. Fair Fight tia rem ngawt loh chu kawng dang an hre ta lo. Hei hi thawnthu ni lo, a tak tak a in draw(quick-draw duel) chhinchhiah a nih hmasak ber a ni ta nghe nghe a ni.

1867 kuma chanchinbu mi ten an kawm chuan mi 100 vel zet that tawhin a insawi a. Mahse pakhatte pawh chhan tha tawk awm lovin a that lo tih a sawi thung. Thenkhat chuan hei hi amah a intihlar nan a uar mah mah niin an ngai. Chu a chanchin chuan vawrh lar ta tho thoin 1968-ah Kansas a Hays City Sheriff a ni ta luah mai a ni. Kum khat emaw chawuh a sheriff hman tihin Bill Mulvey nen inphawiran siak a ngai leh ta tlat. A rang zawkah tang lehin a hnu lawkah Saloon a buaina siamtu Samuel Strawhun-a a kahhlum leh tak avangin a khaw mipui te chuan rawih zui zel ngam chiah an ngai ta lo a ni ber. Hickock-a ngaihdan chuan rorelna chu Puakruk hmanga chinfel hmiah hmiah kha a felfai ber miau si a. Chutah Saloon buainaah sipai pahnih Jeremiah Lonergan leh John Kyle ten an beihrawn ngawt mai a. Jeremiah-an a paihthluk hnuah Kyle-a hian Hickock a benga Puakruk chuktuah meuhin an hmet a, mak tak maiin a puakruk a tlawlh hlauh. An thih phah veleh ta nge nge.

Chutiang rep rep a che reng mai a nih avang chuan inthlan a lo ni a, a Deputy ngei Peter Lanihan-a hneh lovin Sheriff hna pawh chu a chawlhsan ta a ni.

Mahse a ngaihdan chuan buainain a chenchilh chawt mai Abelene khawpui roreltute a hip ni fahmiang. April 1971 atang khan Abelene Marshal hna chu thlatin $ 150 hlawh leh fine awm apianga a chan nei ve zel turin a thawk leh ta a ni. Hei mai bakah hian phalna nei lova Ui vulh a kahhlum sak apiang cents 50 a hlawh zel bawk. Mahse mi rin angin a Duty chu a ngaipawimawh teh chiam lo, pawisa khelh chu a tuina ber a la ni reng tho. He khaw Marshal hna a thawh lai hian Outlaw rorum Wes Hardin-a nen khan an intawng ta nghe nghe a ni kha(John Wesley Hardin-a chanchin ka ziahah ka tarlang tawh). Mahse anni pahnih kher kher hi chuan an inkar buaina hi Puakruka chinfel an chak lo dun ngang aniang, an inpehhel zel zawng a nih kha. Abelene khawpuia Puakruk pai khap a nih hnuah pawh Wes Hardin-a kha chuan a la vawrh vir pep pep reng mai si. Chu chuan City Council lam beng a tihthlep tawh tehreng nen October 1871 khan Hickok-a chuan Abelene Saloon lian neitu Phil Coe leh a thian officer, Mike Williams-a chu a kap hlum ve ve leh ta tlat. Chu chuan khaw mipui leh City Council ti lunghnurin a hna a chan phah leh ta a ni.

Mahse Wild Bill Hickok-a te ang Puakruk kap thiam lutuk tan chuan hrawk chawmna tur hmuh zawh loh a awm tak tak lo. Sipai lamin Scout atan an lo mamawh reng bawk a, Zin mi te lahin Gunfighter rothap lutuk venhimna hnuaia zin chu an lo chak sakhai mai bawk nen. Amah lah hi Red Indian hlauhna thinlung pu ve eih lo a lo ni lehzel si. Chutih rual erawh chuan vun nem lam laka sihhnip zet kha a lo ni vei roh a. A aia upa zet, Circus show lam buaipuitu Agnes Thatcher Lake-i chu March 5, 1876 khan nupuiah a nei ta nghe nghe a ni. He nu bulah hian a thianpa Buffalo Bill Cody-a nen tap ve chawtin a Show-ah te pawh an inlan ve zar zar a ni. Mahse an inneihna hian rei a daih lo.

Hmeichhe Cowboy rorum Calamity Jane a lo lang ve tlat mai a. He nu nen hian tlang hriatah innei chiah lo mahse Angel dai ngam loh ram kha an dai dun ve zauh zauh ni ngei tur a ni. Jane-i phei hi chuan a chanchin a ziaknaah a pasal angin a sawi hmiah nghe nghe a ni. Mahse Nu tling thankin Agnes-i aia luck lo zawk nih a hreh vang nge, Hickok-a nena an inkar boruak chu Agnes-i nen an intawn hma niin a sawi thung.

August 2, 1876 a lo thleng a. A tih thin fo angin Hickok-a chuan Deadwood khua a Nuttal & Mann’s Saloon-ah chuan pawisa a khel leh a. Mahse a thut hmun duh ber, bang hnungchhawn thei a thut chu hemi tum hian a chang ta lo hlauh. A seat duh lai a thu Charles Rich-a chu tum hnih ngawt thutna inthleng puiah an sawm ngial a, a vanduaina tur ai nge Rich-a hian a lo duh lo ve tumhrang. Chutia Pawisa khela an rik laih laih lai chuan Buffalo hunter, Jack McCall(“Broken Nose Jack” tia an sawi thin) chu tu khawkha hriat loha rawn tei lutin, Hickok-a hnung ah chuan a rawn ding a. A Puakruk chu Hickok-a tukkhum a chuktuahin an hmetpuak thawr mai a. Ka pawh chhawn lovin Gunfighter rorum ber pawl a sawi ziah tawh tur Hickok-a chu a chatthla ta nghal a ni. Puakruk mu chuan Hikcok-a hmai dinglam su tlangin a pawisa khelh pui Captain Massie-a dar veilah a lut a ni. A thih lai hian Hickok-a hian Aces pa hnih leh za riat pahnih, a dum vek a lo la hum nghe nghe a ni.

A ruang hi a thianpa Charlie Utter-a’n a tul anga buaipuiin, August 3, 1876, tlai dar 3-ah vui a ni a. Khaw mipui zawng zawng an tel ta vek emaw tihtur khawp a tam mipui an pungkhawm a ni. Ingelside Cemetery, Deadwood-ah phum niin a thlan lungah chuan ti hian a in ziak:

“Wild Bill, J. B. Hickock [sic] killed by the assassin Jack McCall in Deadwood, Black Hills, August 2, 1876. Pard, we will meet again in the happy hunting ground to part no more. Good bye, Colorado Charlie, C. H. Utter.”
Hickok-a hian Colt 1851 .36 Navy Model puakruk pahnih a pai trat reng a. Gunfighter dang te anglo takin Puakruk paina(holsters) a hmang ngai meuh lo. A puakruk chu a kawngah zepin a kawkalhin a phawi kher thin.

Aside | Posted on by | Tagged , , | Leave a comment

Thil hlawk leh tlo kan duh lo.

Hei hi (a thlalak hi a lo bo hman hlauh mai, remchang hmasa-ah ka la rawn post ang e) tunhma-a TARPAULINE kan tih țhin kha a ni a. Chhe thei lo tih theih deuh thaw-a tlo a nih avangin Punjab-a kan awm lai khan kan hmang țangkai thei hle țhin a. Kum 1987 khan Agriculture Dept hman atan 20 kan chah chhuak a, an hmang țangkai nghal a.

Hetiang thil hi kum tin bi-a lâk țhin a nih angin a kum leh khan lâk chhuah leh kan tum a. Dept lam chuan an duh ta awzâwng lo mai a. A chhan chu a la chhiat loh vang a ni daih thung. Kan Minister te, kan Director te hi chuan kum khat chhunga chhe nghal mai, kum tin a thlâkna lak theih chi hi an duh a. Chumi chhan leh chhawng chu engkim maiah hian hlâwkna an têl ve zel vang a ni.

He tarpauline ang hi chuan a daih rei khawp a. Hei hi a company-in sample-a min rawn thawn ka hman țangkai ve a ni. Balû, Cement etc dah/khuh nan te, buh vuak nan te kan hmang a. A hlui deuh tawh nain tun, kum 30 hnu-ah pawh hian a la chhe lo a ni. Kum 30 dan emaw vel chauha a hlâwkna têl theih chu a khât lutuka kan pute duhdan a ni lo a ni tawp mai.Silpauline kum tin bi-a lak ziah mai hi an duh dan chu a ni e. Hlâwkna an lo dawn țhin bakah duhsak zawngte pêk tur quota an neih theih zel bawk avangin a țangkai a ni.

Chutiang zelin kan sawrkar kalphung dangte pawh hlâwkna an hmuh theihnaa innghat an ni deuh vek.Kan ram chhunga intodelhna khawp kan thar chhuak lova, kan siam chhuak lo pawh hi chuvang chu a ni.

Ei leh bara intodelh hi tu tan pawha thil pawimawh hmasa ber a ni chunga kan kham khawp buh kan thar thei miah lo te pawh hi chuvang chu a ni. Kan kham khawp thar theihna leilet ram kan nei a. Kan buh thar chu a thartuina a hlawkpui tham kg 1-ah Rs 30 te emaw ti ila, tun ami aiin Rs 10 emaw vel pawhin tam se la. Vai buh Rs 20-a kan leina kha vai ramah vaipa kutah a lût vek a. Rs 30-a kan thar chhuah kan lei chuan, a man chu a vaiin kan ramah kan Mizopa kutah a lût a, chu chu a hlu zawk hrim hrim a ni.

Vai buh kan lei hian FCI leh kan pute an indawr ațanga ințanin, Tanhril kudam, Zuangtui kudam, Retailer a thlen thlengin a kalkawnga chanvo nei tawh phawt chuan CHANVO an insiam vek a. Chu chu hlâwk an titlâng em em a. Chutiang tihphung chu keini mi naranina kan tih tawp theih a ni lo va, ANNI chauhina an tih tawp theih a ni a. A chhan kan sawi avang khian an titawp duh si lo va. Anni’n a hlâwkna an têl azarah keinin vai buh kan ei khumkhua mai a ni e.

India ram hmun tam bera chhawhchhi ațanga têl her chhuah(oil recovery) percentage chu 30% vel a nih laiin kan ramah chuan 55% – 60% a ni daih thung a. Kum 1987 khan Ludhiana ațanga ‘oil expeller’ leiin hei hi ka finfiah tawh a. A kum lehah chuan Secretary i/c ka nih tâk loh avangin an chhunzawm ta lo a ni. Kan ramah chhawhchhi a țha duh em em a. Awlsam tê-a kan ei khawp chu thar/siam chhuak thei kan ni. Mahse, chutianga tih chu thuneitute tan a hlâwk lo va an ti duh lo mai a ni. Têl(edible oil) man kum tin Cheng Vaibelchhe tam teh meuh Mizoram pawna kan pek chhuah țhin hi, kan ram chhunga kan Mizopaten an dawn theih a ni chungin, chutiang tih chu a hlâwk miau loh avangin ‘Vai Têl’ kan ei kumkhua mai a ni e.

Mizoram la(cotton) hi khawvela la fei ber pâwla hriat a ni a. Chîng uar ila, kan ram ‘economy’ tihchakna țha tak a ni ang tih chu a chiang sa a. Kan tih duh loh chhan chu, kan hriat loh vang ni lovin, thuneitute tana a hlâwk loh vang bawk a ni.

Chutiang zelin a siam nana Cheng vaibelchhe tam kan dawn tawh hnu pawha POWER MW 10 êm pawh kan la nei thei lo hi, a chunga a chhan kan sawi ang tho khi a ni.
Chutiang bawkin kawng țha kan neih theih miah lohna chhan pawh a siamna tur pawisain KAWNG a thlen mumal theih loh vang a ni.

Tichuan, a khaikhawmna chu, kan ram chhunga thil TLO neih chu kan pute tan a hlâwk lo va, kan ram pawn ațanga lâk erawh chu a hlâwk em em a, hlâwkpui pawh an tam tham a, chuvang chuan kan ram chhungah chuan engmah neih kan tum lo a ni ber mai.

Ka thiam lo hle nain vai țawng ka’n hmang ve mial ang a, “Malum Thiam” ?

Michael Lalmanzuala

Aside | Posted on by | Tagged , , | Leave a comment