PLAYER THAR PAKHAT-PAHNIH VEL BAK KAN MAMAWH LO- WENGER

Arsene Wenger chuan Arsenal manager a nih zui dawn leh dawnloh sawi lo mahse season thar atan player quality tha pakhat emaw pahnih emaw bak an mamawh belh lo nia a hriat thu a sawi.

Wenger chuan tun season harsatna an tawh chu bang tura nawrna boruak vel vang ni a hriat thu a sawi a, chutih laiin player ten heng buaina, harsatna hrang hrang hmachhawn chungin huaisen takin an paltlang thei chu fakawm a tih thu a sawi. Thil tamtak an zir chhuak a, hei hian an la puih chhunzawm ngei ang tiin a sawi zui.

Wenger chuan season thar atan tuna ka player 90% te hi chelh thei ila.. player thar kan mamawh hnemlo, pakhat emaw pahnih emaw bak kan mamawh lo, top quality player erawh ni thei se a ti.

Author : Mafela Ralte   &nbsp

Advertisements
Aside | Posted on by | Tagged , | Leave a comment

HMANAH KAN DEGUAR

THUHMA
Thingtlang panlai nun ngaihawm ka nei ve nual a, ka lawm hle mai. Naupan laia kan thiltih leh kan tawn, a zahthlak avanga tun thlenga sawi ngam lova up bopui ta reng kan awm nual ka ring. Kei chu zahthlak deuh mahse ka sawi zel mai ang. Tunah pawh zahthlak lam tarlan ka tum a ni. Vanram kaina daltu mah ni hlei lo.

Ka pa hna avanga thingtlang hlira kan pem thin lai khan Zoram chhim lam hla vak lo, khaw te ve em em ah kan awm a. Keini chhung hi khawiah pawh pem ila veng tawp em em quarters ah kan awm ziah bawk. A khaw hming ka thupah ka naupan zual lai hun nuam ti takin ka hmang ve lauh lauh a ni. Pawl 3 ka nih lai a nia.

THING KUA KAN DEGUAR
Kan Boss chu sikul kal tawh lo, tlangval U Dara a ni. Kan ngei chang chuan a hriat loh laiin Dar-Diguar-a kan ti thin. Deguar tih chu a tawngkam hman rim ber pawl a nih vang a nia. U Dara chu a sual a, kan hlau a, kan ngai a, min tiduhdah a, a tel lovin kan khawsa thei hauh lo. Ram a riah te hian a lo haw hlan kan nghakhlel em em thin. Kei pawh Sairawkherhin vawi thum min perh tawh a, mahse ka ngai tho.

Nikhat chu U Dara chuan, “Min zui rawh u, thing-kua kan deguar dawn nia,” a ti a. Phur em emin kan zui a, thingkua kan deguar dan tur erawh hria kan awm lo.
.
Feh kawng thui vak lo kan zawh hnuin kawng thlangah kan peng a. Kawng atanga hnaite, biru deuh si ah hian Khiang kung, Gas bur tiat vel hi a lo awm a. Chu khiang chu hniam ang reng takah hian a kaw phat a. A bul vel chu a bel tel tul mai a, tin, a kua pawh a bel.

Chu thing kua chu dep tur lo ni rengin. Kan duh lo kher mai, a awmzia kan man chiah lo bawk si. Bakah sazu phawrh kher a la ngai zui!! U Dara chuan a tih dan tur min zirtir a, a man a han dep hmasa lauh lauh a. A englo chu a dum lian thel thul.

“Vawi 20 theuh aw. Kei chu ka len tawh avangin ka duh chen chen a ni mai,” a ti a.

Chutah Vanlala chu ti turin a ti hmasa ber a. Vanlala chuan a duh lo a. U Dara chuan, “I deguar dawn nge sairawkherh hian ka deguar dawn che. Vawi thum chiah ka chhiar ang,” a ti a.

A vawi thumnaah pawh chuan che lova a din reng avangin U Dara sairawkherh chu a ri thak a, Vanlala mawngtam chu a ri pawp mai. A tap par mai a. Tap par chung chuan dingdihlipin a deguar ta lauh lauh a. Hnial ngam kan awm tawh lova, vawi 20 theuh kan ti ta diat diat a. Kei chu 20 tih tlin vat ka duh avangin rang deuhin ka englo a. Ka zak ngei mai.

Chutah U Dara chuan a han deguar ve ta a. A thei rei ngei mai. Rei deuh hnu ah chuan rang deuhin a englo zawt zawt a, thingkung chu a kuah nghet tlat a, a lu te chu a khur deuh ngut ngut a. Mak ti takin kan lo en thap a.

Muana chuan, “Tinge khatia a awm le?” a ti sar sar a. Chd-a chuan, “A na a ti a ni hrim hrim ang,” a lo ti a. Na a ti ni turah kan ngai ta vek a. Tin, thingkung bul leh a kua a bel lutuk kha a chhan kan ngaihtuah lo.

Chu thingkua chu a khat tawkin kan deguar ta fo a, kan zak vak tawh lo. U Darah lah a tawpah na a ti ziah lehnghal a. Mahse chu Khiang kung chu thli tlehin a chhem tlu ta daih a, U Dara kid-te ho chu kan lawm hle.

BAWNGPUI KAN DEGUAR
Hemi kum vek hian thil a thleng leh a. A hma atang rengin kan unau, a zawn zata mipa pathum piang chu khaw chhungah kan thang chhe hle mai. Kan hming thanna zahthlak chu ran sawisak hratah a ni. Kei a napang ber lah a duai lo ber ka ni hial ang. Kan khuaah chuan Bawngpui nghal hmingthang a awm a, Pu Thangvunga bawngpui var a ni. Khaw chhungah khan haw lo an awm pawh ka hre lo. A tlat duhna ber chu mi in bul huan a ni.

Pal pin tha lai tawn tlang luiin vawi tam kan huanah pawh a lut tawh. Ka pa thinrimna chu kan unau chuan phuba laksak kan tum ta ran a. A rukin remchang kan melh ran reng mai. Remchang chu a lo thleng ta.

Inrinni vawikhat chu ka unau thum chuan inah kan awm a. Huan pal ri sawk ka hriat veleh tukverah ka dak vat a.

“Khu le.”

Tumah inhrilh buai kan ngai lo, mahni sava veh ipte theuh ka chuh sang sang a, huanah kan lut thla nghal a. Bawngpui chu kan din hual thep thawp a, kan sai rawn ta mial mial a. Bawng mangang chuan pal chu hmun hranah su chhiain a chhuak a, kan um zui zel a.

Bawng hian rei um an daih ngai lo tih lah kan hre chiang si. Reiloteah an kua a tha lova, tlan chungin an e khawh puat puat a. Um zel ila an hah lutuk hi a bawk tawp zel thin. Chu bawngpui pawh chu a bawk ta der mai. Ram hrui kan chhat a, a ke chu kan phuar ber ta tlat a.

Kan upa ber chuan, “Tih dan ka hria. Cowboy hovin an Ranch bawng an chhinchhiah dan angin ti ve ang u. Zonun, inah va haw la, a rukin nawalh leh tulthir lian kha va la rawh,” a ti a. Ka tlan nghal.

Mei kan chhem a, tulthir chu kan rawh ling vur a. Ka u te chuan ka hming lamtawi ZNA tih chhut an rawt a, kei lah ka lawm ve em em a. Bawng khel lehlam lehlamah ZNA tih ka chhu ta kulh mai a. A kang hmui rum rum mai.

Kan haw a, pal chhia kan siamthat laiin ka pa a lo haw a. Min rawn tihpui thuai a. Engmah kan sawi lo.

A tuk sunde sikulah chuan zawhna inang ka dawng hnem ngei mai.

“Bawng khelah i hming in chhu a mi?”

Kei lah zep ka tum der lo. “Aw,” ka ti hmiah hmiah zel a. Kha khaw tereuhteah khan ZNA tia han puh tur dang an awm der si lo. A chiang a ni. Ka ute pawh an thianten an lo zawt nasa a ni awm e. Khuaah kan thang chhe leh ta.

Sunde sikul ban chuan U Daran min rawn um vang vang a, hnung lam atangin min rawn kuah chawt a.

“Bawng khelah i hming in deguar a law?’

“Aw.”

Nga’te min sawm ve loh. In deguar naah ka tel ve chak a sin.”

“Insawmna hman a awm hleinem. Bakah a uten an phal lovang.’

“Heeee…ka tel ve chak a sin le. In tih leh dawnah min sawm tawh ngei ngei ang che. Min sawm ve loh vaih chuan Sairawkherhin ka deguar ang che.”

“Awle.”

Chawlhni tlai ka pa leng lo haw veleh chaw kan ei nghal a. Chaw ei lai chuan ka pa chuan Pu Thangvunga bawngpui khela ZNA tih inchhu chungchang chu min zawt a. Kan zep buai peih lo. Bawng kan um lai kha nu pakhat thingphurin min hmu khanglang bawk nen. Kan huana a luh thin phuba lakna angin kan sawi a. Ka pa chu a ngawi mai a, ka nu erawh chuan min hau nasa hle.

Chawei kham chuan ka pa chu ngawi rengin a chhuak a. A lo haw leh chuan pawisa a rawn la a, a kal leh a. A rawn haw leh chuan Pu Thangvunga bawngpui chu a rawn kai haw ruau mai. “Bawng hi kan ta a ni tawh. Ka lei.” a ti ringawt a. Engtinnge an va inbiak kan hre lo.

ZONUNA CHU BAWNGPUI
A hmaa kan ngei em em bawngpui kha kan ta a nih takah chuan ka han duat em em ta a ni. Mi pawi sawi kan hlaua kan thlah loh leh a chaw tur ka pu tang tang thin. Kan bawng a nih vang nge mi pawi a khawih tak loh vang, mi rengin rengin an ngaina ta daih a. Luang no an rawn hawnsak thul. Kan kawta kan thlun chu a kal pel reng rengin an ko ziah tal thin.

Mahse pawi ta chu kan chhungkua tih loh tupaw’n ZONUN tia an ko ta vek chu a ni. Ka zak em em thin. Bawngpui lah chuan a hming chu a hre em em lehnghal.

Tlai khat kan khaw zirtirtu khawi ilo kal haw chuan ka pa inchhung awm chu pawn atangin a rawn ko a.

“Hei, Zonuna hi a hur dawn a nih hi. A kakuk pawh a tawlh pur a lawm.”

“Nia, kha thlahtir a ngai a ni.”
.
Kan bawng hur chu miten “Zonuna a hur” an ti sup sup a. A lo rai a. “Zonuna a rai,” an ti leh sup sup a. No a nei a, “Zonunan no a nei,” an ti leh a.

No a hrin atanga rei vak lovah Kan bawngpui chu a dam lo ta vak mai a, ka nu a mangang em em a. Kohhran tawngtai inkhawmah tawngtai thupui atan a lo han thawh pek a! Kohhran mite chu Pastor hovin Bawngpui Zonuna tan an tawngtai nasa mai a. Zonuna tih chu Biak inah a ri chuah chuah mai a ni awm e.

A dam leh hnu chuan a hnute kan sawr thin a. Thenawm hnai in hnih lek hian pava khat ve vein an Thekka a. Zinga bawnghnute la tura an rawn kalin, “Zonuna hnute in sawr tawh em?” an rawn ti ziah a.

Bawngpui khela ka hming kan lo deguar kher chu ka inchhir fo thin. “Zonun” tih thawmah kan bawngpui nen kan hawi rual zing mah mah a ni.

A hnu deuhah chuan kan bawngpui chu a hur leh a. “Zonuna a hur leh tawh,” an ti leh sup sup a. “Zonuna chu Pu Lianmanga bawngpain a pawl thin,” an ti leh a. Ka ngei hlawm a nia.

Mahse thu lawmawm a lo thleng ta a. Kan pem a tul leh ta a ni. Zununa leh a note chu Pu Thangvunga bawk chuan a lei let leh a. Sum seng miah lova kan enkawl a nih avangin a note man nen ka pa a hlawk fe zawk.

NB : Khawsak tluang pangngaihah chuan ka nu min hmangaihna kha nitin kan hmu thin. A mi duatna zawng zawng pawh hai rual a ni lo. Kan tana a hahna zawng zawng kha a ai hlu a awm thei lo hian ka hre thin. Ka pa erawh chuan min hmangaih tih a lantir khat khawp mai.

Mahse ka pa min hmangaihna kha kan tal buai leh kan tluk dawn tak takah khan a lo lang chhuak thin. Kan tluk nat dawn a ka nu’n tihngaihna a hriat loh veleh ka pa a che a, engkim huamin min veng ta thin a. A thlamuanthlak em em a ni. Ka pa khan min chhan nan ka nu ngam loh a ngam ngei ngei ang.

Tun thleng hian Nu hmangaihna nge Pa hmangaihna hlu zawk, a enge ril zawk tih hi ka la fiah thei lo.

Author : R Zonuna RL @ Kawrkam Cabin
(Vawksa Street)   &nbsp

Aside | Posted on by | Tagged , , , | Leave a comment

La Liga Champion Real Madrid

LA LIGA 2016 – 2017 (19th Aug. 2016 – 21st May, 2017)

Spanish league (La Liga) Season : 2016–17
Champions : Real Madrid (33rd title)

Division hniama tla : Sporting Gijón, Osasuna, Granada

Champions League khel theite : Real Madrid, Barcelona, Atlético Madrid, Sevilla

Europa League khel turte : Villarreal, Real Sociedad

Game Khelh zat : 370

Goals lut zawng² : 1,081 (2.92 per match)

Top scorer : Lionel Messi (37 goals)

Mahni home a chak chiang ber :Atlético Madrid 7–1 Granada (15 October 2016).
Barcelona 7–1 Osasuna(26 April 2017)

Away a goal thun tam ber : Alavés 0–6 Barcelona (11 February 2017)

Goal lut tam ber : Sevilla 6–4 Espanyol(20 August 2016)

Chak zawn rei ber : 6 matches- Barcelona, Real Madrid

Hnehloh neilo rei ber : 19 matches-Barcelona.

Hneh neilo rei ber : 21 matches-Osasuna.

Chaklo zawn reiber : 7 matches-Granada.

Entu tam ber : 98,485 Barcelona 1–1 Real Madrid (3 December 2016)

Entu tlem ber : 3,576 Eibar 1–0 Valencia(27 August 2016)

Entu zawng² : 10,016,155

Entu chawhrualin : 27,900/match

Aside | Posted on by | Tagged , | Leave a comment

Forensic Files: Wood-be-Killer

Tualthattu chuan a thilsual tihna atanga finfiahna awm thei ang ang te nawh reh a tihbo a tum a. Mahse, chutia nawhreh a tumna lamah chuan evidence thar diai a hnutchhiah ta thung a. Chu Evidence a hnutchhiah chu Scientist ten Criminal Case a tih dan hmang (Technique) la hman ngai lo hmang a an han enchhin hma chuan Investigator te pawh an beidawng hman hial a ni. Chutia Techniquethar an han hmanna lamah chuan Forensic History an siam ta hial zawk a.

Farmersville, Texas hi America khaw te pakhat a ni a. Thawk khat lai kha chuan Purunsen tharchhuahna ber khawpui a lo ni hial tawh thin. Tihdan hlui tam tak la chhawm nunna hmun a ni a.”Hei hi chu Farmersville a lawm, Kawngka kalh a ngai lo ve” ti thei khawp a nungchang mawi khua a ni.

Kum 20 a upa Rachelle Tolleson-i chu he khua ah pianga seilianin a fanu thla 6 a upa Avery-i chawi tlei nan he khua hi a thlang pawh a ni reng a. A pa Mark O’ Neil a sawi dan chuan Rachellei- chu mihlim thei tak a ni a. Tleirawl dang te ang thovin harsatna tawh chang te pawh a nei ve thin. Nu tha tak niin fa te tan a inpumpek mi a ni. Rachelle-i chuan makchhiat tawkin a fanu nen chauh vin khawchhung laili hnaih lamah an cheng a ni.

Kum 2004 nipui khawlum lai tuk khat zing 7: 30 vel hian Rachelle-i nu Pam O’Neil-i chuan a fanu Rachelle-i tlawh pah fawmin Rachelle-i te In ah chuan a peng kawi zawk a. Inchhung a han luh chuan khum a Avery-i amah chauh a lo awm leh nasa taka lo tap mek chu a va hmu a. A fanu Rachelle-i erawh a zawn ngial hnu pawhin a hmu ta hauh lo mai. A fanu chu a hminga lamin a koh lauh lauh a. Chhangtu erawh a awm lo. Pindan tepen ah te chuan a awm dah lawm maw tihin a han zawng a. Khum hnuai thlengin a zawng a ni. Mahse, a hmu si lo.Inchhungah chuan thil eng emaw a thleng ngei a ni tih rin theih turin hnuhma hmuh a ni a. Lehkha a tla darh nuaih a. Khum chu tih sawn a ni bawk. Khum lu lama thing phel (headboard) pawh hma lamah a tlu awn a. Eng ilo dahna chhuar (night stand) lah a inhunna bang atanga nem sawn a ni bawk. Mak tak maiin Rachelle-i pawisa dahna (Purse) leh a car te chu an awm a. Vanneithlak takin choka chhuatah chuan hnuchhuina tur hmarua ni thei ngei tur (clue) a awm hlauh mai. Chu chu Rachelle-i’n a pasal nena inthen a dilna lehkha a ni a. Chu lehkha chungah chuan tu emaw in a rap ngei a ni tih hriat nan pheikhawk hniak lian tak a awm a ni.

Chu pheikhawk hniak chuan Rachelle-i bo zan khan Rachelle-i ni lo midang tu emaw chu chu In ah chuan a awm ve ngei a ni tih a lantir a. Rachelle-i nu chuan a makpa hlui a la chang thuai mai tur AndrewTolleson-a chu thil thleng chungchang hrilh turin a ko ta thuai a. Andrew a lo thlen chuan an pahnihin Rachelle-i chu an zawng chhunzawm leh a. Mahse khawiah mah hmu tur a awm lo.

Police te chuan tualchhung mi te chu an theih ang ang a tam thu zawt fiahin leilet leh ran tlatna hmun zawng zawng a Rachelle-i zawngtu tur bik an ruahman bawk a. Mi tam tak lo kal khawmin hmun tin deuh thaw ah Rachelle-i chu an zawng a. ATV (All Terrain Vehicle) te, four wheelers, Sakawr chungchuang te leh ke a zawng pawl an awm a. An mibo zawnna ah chuan a mak a tam an thawkchhuak a ni. Chawl map lovin ni nga chhung an zawng a. Mahse Rachelle-i hnuhma erawh khawiah mah hmuh tur a awm lo. Mibo zawngtu tam zawk chuan Rachelle-i chu an hrechiang lo te pawh a ni mahna. Mahni duh thu a tlanbo te pawh a ang hial a. Mahse chutiangin han tlanbo dawn se Avery-i han kalsan ngawt theih lah a ni si lo. Rachelli nu chuan a fanu in Avery-i chu second khat pawh a kalsan lovang tih a chiang si. Rachelle-i chuan a fanu a hmangaih tih a hria a, a nunna ang hialin a ngaih a ni si a.

Chutiang hnu chuan Rachelle-i te chenna atanga mel 10 vel a hla a pa pakhat thingtlang ram a ke a zin vak (hiking) chuan hmeichhia la naupang tak ruang kang ut huam tawh hi a hmu ta tlat mai le. Dental Record atang chuan an mi ruang chhar chu Rachelle Tolleson-i ngei a ni tih finfiah a ni a. A ruang an hmuhna atanga feet 100 vel a hla ah chuan lei khuar hi a awm a. Hmu zawl fai lai a awm a ni. Chutah chuan thingtum eng emaw zah an hmu a. Thil eng emaw halna hnuhma ang tak an hmu tel bawk a ni.

Vikki Pickett, Investigator, Farmersville PD a mi chuan Rachelle-i nu bulah hun eng emaw chen a awm hnu chuan Rachelle-i ruang an hmuh thu chu a hrilh ta nghe nghe a. A ruang en a theih loh tur thu leh a ruang chu hriat theih lo khawp a a kan chhiat thu a hrilh tel bawk a. A ruang thlah nan han tawk/khawih pawh an awihsak lo a ni. Chu thu a han hriat chuan Rachelle-i nu tan chuan tawrhna nasa tak a ni ngei ang. “Ka lungphu a chawl hial a. Ka ring thei lo. Ka fanu ngei a ni tih finfiahna ka duh” tiin a sawi zawm thei lo hial a ni.

Police te tan hnu han chhui chu thil awl-ai a ni hauh dawn lo. Tualthattu in finfiahna (evidence) awm ang ang tichhiat a ni theih nan Rachelle-i ruang kha a hal a ni a. Mahse Police te chuan an hnuchhui hna chu khawi atanga tan tur nge tih an hre chiang; chu chu Rachelle-i then tak a pasal hlui Andrew Tolleson-a atangin a ni.

Rachelle-i vuina hmun First Baptist Church-ah chuan Farmersville a cheng tam tak an kal khawm a. An tan chuan eng tin nge Rachelle-i kha a chenna atangin zanlai ah hruaichhuah a ni a eng tin nge tuman thawm riva tak ngial pawh an hriat loh tih chu hriatthiam har tak tur a ni reng a ni. Dik tak chuan Farmersville ah mikhual an awm lo va. Rachelle-i chenna chu Police Station atang leh khawpui hmun laili atang pawha hnaite a awm a ni. Police te chuan pawikhawihtu chu mikhual emaw hmelhriat loh emaw a ni thei lovang tih an ring a. Mitin mai chuan Rachelle-i khan amah hruaichhuaktu chu a hriatchian mi a nih ngei pawh an ring a ni. Dan naranin hetiang ang mi cheng tam vak lohna hmun ang ah hi chuan tualthattu chu Rachelle-i thian kawm te zing a tu emaw ber chu a ni thei ngei ang. Rachelle-i thian hnai tak a ni loh vek pawhin tu emaw Rachelle-i lo hretu chu a ni ngei ang.


Mitthi ruang endikna (autopsy) Report atanga a lan dan chuan Rachelle-i chu hmeichhiat mipatna hmanpui niin chemte a vih leh rehhlum a ni. Vikki Picket-i, Investigator, Farmersville PD a mi chuan, ” Ka rap a ni. Keipawh nu ka ni a pi ka ni tel bawk. Mihringin a mihringpui chungah hetiang hian a ti thei ang tih han hriat ringawt pawh hi a rap-awm a ni” tiin tualthahna thlen dan rap-awm tak chu a sawifiah a.
Gregory Davis, Assistant District Attorney chuan, ” Pawikhawina leh thil thlen dan hanenin a rapthlak tak zet a ni. Nu, la naupang tak, mi pawisawi lo tak mai a ni a. Zanlaiah mahni In atanga hruaichhuah a ni a. Rawng taka pawngsualinchemtea vih leh rehhlum a ni. Chu mai bakah a ruang chu hmun fianrial lamah lak sawn niin hnawmhnawk ang mai a thehthang a ni” tiin thil thlen dan vel chu a sawifiah ve bawk a ni.

Police te tan chuan Rachelle-i then tak a pasal hlui khan tualthah duhna tur chhan nei in an ring a. A chhan pawh kha Inthenna (Divorce) kha ama duhthu tel lova thleng a ni. An la inneih lai rengin Rachelle-i kha Andrew aiin a puitling zawk a. Chu chuan inngeih lohna siamin a thentir ta ni berin a lang. Rachelle-i khan an inneihna a hlawhtling dawn lo tih a hriain mahni a awmhran a duh te pawh a ni mahna.

Andrew chuan kha tualthahna thlen zan khan hmun dangah awm angin a insawi a. A sawi dan chuan khami zan khan party na ah a thian te nen an awm a ni. A hnuin a thian te zinga pakhatin motorin a thlah haw a. A tuk zing a hna thawk tura a chhuak ti loh chu In a chhuahsan leh tawh lo niin a insawi bawk. Police ten a thusawi an han finfiah chuan Andrew-a chu party na ah zu a rui hle a ni tih an hre thei ta a. Party zawh hnuin a ruih em vangin zankhuain Inah a awm a ni tih pawh Police-te chuan an finfiah bawk. Hmun danga awm ang a a insawina chu a dik niin a lang. Investigatorte chuan chu partyna-ah chuan Bonfire (meipui chheh) an nei tih an hre ta bawk a. Rachelle-i ruang kha lei khuarah hal a ni a chu Bonfire nen chuan thil thleng rual satliah a ni nge ni lo ngaihven a finfiah ngai a ni ta.

Lt. Larry Smarta chuan Bonfire leh pawikhawihna hmun te chuan inzawmna an nei leh nei loh hriat a duh a. Forensic Scientist te enfiah a tan tuahthing (log) te chu an lakhawm ta a. Lt. Larry Smart chuan Bonfire-na a thing sample an lak te leh Pawikhawihna hmun atanga thing an lak te chu Henri Grissino Mayer, PHD. Associate Professor, Geography, Univerisity of Tennesse hnenah enfiah atan a thawn ta a. Pu Henri Grissino chu a tirah chuan a thil buaipui turah chuan a phur fahran lo khawp mai. Mahse chutia tuahthing/thingtum te a han thlek ringawt pawh chuan Pawikhawihna a mi leh Bonfire-na a mi te chu Mesquite thing an ni tih a hre thei nghal mai a. Heng Mesquite thing te hi thlaler ang chi ramro ah hmuh tur a tam a chaw vel chhum nan te pawh an hmang fo thin. Zawi muang a alh chi meikhu tichhuak tam lo chi a ni. Mahse chung thing hmun hnih a mi te chu thingkung pakhat atang lak an ni tih finfiah theihna kawng erawh a awm hauh lo. Thingzaina hnuhma danglambik han khaikhin tur lah hmuh tur a awm si lo. Thing upat lam hriat theihna (thinga invalh thuah kual chhuak vek ang chi-Tree Ring) lah tangkaina nei lo tluk a ni a. He tiang thing chi hi chuan Ring tluanin thil tuihnang kalna kawng (vessel) sin te te a awm thluah a. Chu vang chuan Ring han chhinchhiah bik tur langsar luah a awm thei lo a ni.

Chung an sample thawn te chu zirchian hleih theih an ni lo ti a han hriat chuan Lt. Larry Smart a pawh a hnual rum rum mai. A ngaihdan chuan chung thing te chu evidence tha tak nihin a hre si a. Mahse, Dr. Grissino chuan eng emaw hriatchhuah a nei a: chu a thil hriat chhuah chu a lo chhiar tawh Test thar chungchang a ni. Chu Test chuan thing a Chemical Fingerprint awm kha a thliar hrang thei a. He Test thar : Laser-induced Breakdown Spectroscopy hi la thar lam tak tunhnai lawk a hman thar niin tunah chuan FBI ten an hmang tan tawh a. Counter terrorism lam bikah an hmang thin a ni. Chung chanchin vel zawng zawng chu Dr. Martin-i hnen atangin an hre ta a. Hmanraw mak dangdai tak a ni.


Dr. Grissino chuan chung thing te chu Oak Ridge, Tennessee a Dr. Madhavi Martin-i, Oak Ridge National Laboratory hnenah a thawn chhawng ve leh ta a. Pi Madhvi-i chuan thing te chu laser beam hnuaiah a han dah a. Chung sample (thing) ah chuan laser beam chu a han ti phe keuh keuh a. Thing a Elements awm ang ang-hydrogen, nitrogen, oxygen leh carbon ang chi te chu rei lo te chhungin a lo lang ta vek mai a ni.

Spark , Plasma Cloud tia sawi ni bawk ah chuan sample a Chemical Elements awm zawng zawng a awm vek a. Chung Elements te chu Spectrometer in a lo thliar hrang leh vek thin a ni. Chung sample a elements awm te chu dan pangai deuh vek an ni a. Mahse element pakhat erawh a danglam bik a. Chu element ah chuan Titanium a awm a ni. Thing ti tluanin a phanchhuak vek a. Dan pangai ah chuan Titanium hi thing ah a awm ve ngawt thei lo va. Chumi in a a kawh tak ber chu sumdawnna hmun a Titanium in lei chhung tui a ti bawlhhlawhna hmun hnaih lamah chung Mesquite thing an enfiah te chu an to a ni tih a entir a ni.

Laboratory ah chuan thing tum sawm leh pakhat enfiah (Test) a ni a. Chung zinga 8 te chu Pawikhawihna hmun a mi an ni a. A dang 3 te chu Bonfire na hmun atanga lak te an ni. Chung thing a Chemical awm zat leh tam lam te chu an inzat vek a. Titanium tam lam pawh an inang vek bawk. Tichuan Scientist ten za 99.9 a chiangin chung thingte chu kung khat atanga lak an ni loh vek pawhin thing kung hmun khat/hung khat awmkhawm atanga lak an ni tih an sawi ngam ta a ni.

Hei hi hetiang case bika a Forensic hmanna hmasak ber a ni a. Criminal Case bik ah thing hlawm hnih chemical fingerprint thuhmun nei hmuh a la ni ngai miah lo va. Chemical composition 99.9% zet a han inmil ta chu phut zawkna tham a ni hial reng a ni. Scientists te pawn mak an ti reng a ni. Lt. Larry chuan,” Scientist te kha kan hnenah lokalin thing te kha kung khat a mi emaw inhnaih tak a mi emaw an ni ang tiin za a 99.9% a an chian thu huai taka an sawi ngam avangin kan tan phurna nasa taka ni” tiin an thil hmuchhuahin beiseina thar a pek thu a sawi hial a ni.

Bonfire na a thing te leh Rachelle-i ruang hal nan a hman thing te chu kung khat a mi vek an ni ta si a; thil mak tak chu a ni reng a ni. A nih chuan Andrew Tollesona kha tualthattu a ni tihna a ni thei ang em?

Rachelle Tollesoni kha a chenna In atangin a mi hriat nia langin a hruaichhuak a; a taksa kang huam tawh chu State Park hmun finrial taka hmuh a ni. Rachelle-i pasal then tak Andrew-a chu Rachelle-i hruaibo a nih zan khan Bonfire Party-na ah a tel ngei a. Bonfire Party-na a thing te leh Rachelle-i halna hmun a thing an hmu te an inmil/inang chiah bawk. 99.9% a chiangin an inmil a ni. Chu evidence chu Andrew Tolleson leh a nupui thahna hmun thlunzawm theihna chu a ni ta phawt mai.

Gregory Davis chuan,”Mi tu emaw bo ta se, a bik takin nupa tang thenna kaihhnawih thil inrawlh bawk ta se, a pasal hlui chu tu pawh ni se rinhlelh a ni ngei ang”. Mahse chutianga thutlukna han siam nghal nan chuan a la hma deuh si a. Khami zana Party na a kal ve te chuan Andrew Tolleson leh Bonfire te khan inkungkaihna an nei lo tiin Police-te an hrilh a. A chhan chu Party-na a Mequite thing lo kengtu chu midang daih a nih vang a ni.

Police ten an han chhuichiang leh ta a. Thing lo kengtu chu kum 21 a upa Moises Mendoza a ni tih an hre ta. Hepa hi Air-condition repairman niin Andrew leh Rachelle-i te thian satliah ve pangngai a ni a. Tunhmain school an lo kalho tawh thin a ni. Rachelle-i nu in a fanu Elementary leh Middle School a kal lai thlalak a han phawrh a. Mak tak maiin Moises a pawh thlalak zingah chuan a lo tel ve zel a.

An thiante sawi dan chuan Rachelle leh Andrew te an inthen khan Moisesa chuan Rachelle-i date a chak thu a lo sawi tawh thin a. Rachelle beisei aiin a ngampa mah mah pawh a ni thei. Amaherawhchu hemi te pahnih hi an in date ngei a ni tih fiahna a awm lo va. Thian satliah ang erawh chuan party-na leh punkhawm nikhua ah te chuan an inhmu ve thin a ni. Chung thil te chu police ten Mendoza nunhlui an chhui thlen hma chuan pawisawina angin an ngai em em hran lo va. An han chhui chiang leh zuala Moses Mendoza chuan Pawikhawhna lian tak tak ah a lo inhnamhnawih tawh a ni tih an hmuchhuak a. Dallas a nula la naupang tak rukbo a tumna lamah vawi hnih lai mi a suam a; mahse a hlawhchham ve ve a ni. Rachelle-i bo lai vel khan Mendoza chu chung pawikhawihna atanga bail a a chhuah lai tak a ni bawk. Police te chuan Mendoza In chu an han dap ta a. Pheikhawk rawngsang (boots) kawp khat inting/belmang lo kai nuaih leh khawnvartui rim nam chek mai an hmuchhuak a. Rachelle-i In a pheikhawk hniak an hmuh leh Mendoza Boot te chu an inmil em tih hre turin Investigator te chuan Forensic Analyst Michael Villareal-a hnenah an thawn ta a.

Michael Villareal chuan chu pheikhawk hnuai thla chu a han nemkai a, tichuan Rachelle-i In atanga pheikhawk hniak them an hmuh nen khan mitlawngin a han khaikhin ta a. A len lam, hmelhmang leh zia ah te inanna an neih tih a hmuh hnu chuan eng emaw vanga zia leh nihna danglam bik (specific accidental characteristic)a awm em tihin boot chu a han en chik leh ta a. Chu zia leh nihna ang chu Rachellei In-a pheikhawk hniak an hmuh ah khan a awm ve em tihin a han khaikhin leh ta a ni. Specific Accidental Characteristic kan tih chu kan pheikhawk bun dan atanga lo insiam a ni a. Chutiang chu pheikhawk khing tinah hian a danglam bik takin a awm vek a ni.

He case bikah hian Inthenna Lehkha phek a pheikhawk hniak lo awm chu fiah kelh kawlh takin a lang a. Hniak dang nen han khaikhin atan a duhthusam a ni. Chu pheikhawk hniak chu lang kim vek loh mahse hai rual lovin Pheikhawk ke-artui lama thler/kak (cut mark) awmin a siam a ni. Michael Villareal chuan Police te’n pheikhawk an rawn thawn ngei khan Rachelle-i Ina Pheikhawk hniak them an hmuh kha a siam a ni tih a finfiah thei ta a. A thil hmuhchhuak tak chu-duhthusamin an inmil a ni tih hi.

Police te pawh chuan Mendoza In atanga an lak Jeans kekawr meikhu urna ung kai nuaih chu an Test bawk a. Chu inting/belmang (soot) hnuaiah chuan thisen them sin te an hmu a. Chu thisen DNA profile chuan Rachelle-i thisen a inmil ta chiah bawk. Chung Forensic Evidence hmangin Police te chuan Mendoza chu an hmachhawn ta. Mahse chutiang te mai mai chu Mendoza chuan a ngai pawimawh lem lo nihin a lang. Inla ngeng chi a lo ni bawk nen. Mahse a tawp ah chuan a inpuang ta. Mendoza chuan, ” A tak ni theiin a lang lo: Pawikhawihna thlen tukah ka harh chhuak chauh a. Mumang ang mai a ni. Mahse ka hlauthawng ve tho mai. In hnung lam atangin ka chhuak a, ka thil hmuh kha a dik si. Keima tih ngei a ni e” tiin a inpuang ta.

Gregory David-a sawi dan chuan mi thenkhat ah hian tharum thawhna, sual zun-zam, anmahni khuahlhirh tlat-tu a awm a ni tih ka chiang a. Chu chuan anmahni chu a thunun thin a ni. Chutiang zunzam chu Mendoza ah pawh khan a awm ve a ni. Kha pawikhawihna thlen zan pawh khan thil eng emaw chu hlenchhuah a duh ngei niin a lang a. A thil duh hlen chhuah a tumna kawngah indantir a rem ti lo a ni.

Prosecutor te sawi dan chuan Kha tualthahna thlen zan khan Mendoza chuan tuah atan Mesquite thing kengin party na hmun ah a kal a. Mit a hmutute sawi dan chuan Mendoza chuan zu a in a, a thin a rim em em bawk a ni. Party-na hmunah chuan mi eng emaw zah nen an in bakkaih a. Party-na a tel ve hmeichhe pahnih nen inhnial buaiin chung hmeichhia te chu thah ah a vau bawk. An lu tan saka vauin kawng hrang hrang in a vau a ni.

Mendoza-an party na hmun a Andrew mahni chauh a awm a hmuh chuan Rachelle-i chu mahniin In-ah a awm ang tih a hria a. Zing dar 2 velah Party-na hmun chu a chhuahsan a. Evidence atanga a landan chuan Rachelle-i chenna lamah a inkhalh ngei a ni. Inchhunga lut turin eng thu chiah nge a sawi tih erawh a chiang chiah bik lo va. Mahse, evidence atang chuan Rachelle-i In-ah chuan inchaina a thleng ngei a ni tih a lang a. Chutia an inchaina lamah chuan Rachellei’n a pasal nen a Inthen a dilna lehkha chu chhuatah a tla ta a. Chu lehkha ngei chu Mendoza khan a ke vei lamin a rap ta a ni. Chu In-ah chuan a awm ngei a ni tih finfiahna chiang tak a lo ni ta.

Chung thil thlen hnu chuan Rachelle-i chu khawi ah nge a hruai tih erawh hriat mai theih a ni lo va. Mahse Forensic Evidence atang chuan a pawngsual a, chemte a vitin a rekhlum a ni tih a chiang. DNA Testing atangin Rachelle thisen chu Mendoza Jeans kekawr ah hmuh a ni bawk. Chumi hnu chuan State Park hmun finrial laiah tualthahna hailang theitu tur evidence zawng zawng hal ral vek tumin Mesquite thing hmangin mei a chhem ta a. Evidence thenkhat chu a nuaibo theih pawh a ni thei e, mahse a hriat hauh lovin Evidence dang a hnutchhiah belh ta zawk a. Chung Evidence te chuan tihsual awm hauh lovin Mendoza leh Crime Scene kha a thlunzawm ta zawk a ni.

Forensic hmangin tuah-thing te chu thingkung thuhmun atanga lak an ni tih finfiah a ni a. Thing hung khat atang emaw thing chi inang satliah emaw ni lovin thing kung pakhat ami vek an ni tih a finfiah a ni. Scientist te chuan chutiang finfiahna chu DNA ah chauh hmuh an inbeisei a ni ngai a; thingkung atang emaw thlaihnah ilo vel atang ni lovin.

Rachelle-i thah a nih atanga thla thumna-ah chuan Moises Mendoza thubuai chu ngaituah niin First Degree Murder a thiam loh chantir a ni a. Thi tura hremna pek a ni ta.

Let leh lawk i la.
Khami zan a Rachelle-i te In a va kal a, Rachelle-i hruai chhuak a Rachelle-i emaw naute emaw a chhungte emaw zahpah nei hauh lova Rachelle-i nunna laksak tura thutlukna a siam khan thi tura hremna kha a ma duhthlanna ngeiin a insiam a ni. Rachelle-i pa chuan, “Hetianga sawi hi a dik lo tih ka hria. Mahse, ka thu chu ni se hei aia hremna nasa zawk hi a hmu ngei ang. Hremna nasa zawk ka tih hian innghaisakna lam ka sawina a ni. A chhan chu ka ngaihdan chuan thi tura hremna kha atan chuan a nuam lutuk zawk mah a ni”.

Rachelle-i thih hnu chuan Rachelle-i nu leh pa te chuan an tunu Avery-i chu an pawm tlei a ngai ta. Detectives kawlhrawng leh diau lo tak tak te’n a awm a ni tih pawh an hriat loh scientific solution an han zawng lui ngat te, Scientists te paw’n “Engmah tih theih a awm tawh lo ve” ti mai lo va finfiah ngei tuma an beihna te vangin an chungah an lawm em em bawk.

Scientist te thil hmuhchhuah chuan Forensic Science ah bungthar a siam ta bawk.Tunlai khawl thil titheihna te leh Forensic Testing te hi rin phak bak thil a ni a. “A ni thei lovang e ” tih mai tur hi a ni. Mahse, hetiang khawp hian thil mak a ti thei a ni tih han hriat ringawt pawh hian mi tam tak ngaihtuahna te chu a chhawk dam sawng sawng ta ve ang. Science thil tihtheihna hi a mak em em mai a. Lt Harry chuan, “Detective la naupang lam deuh te hi Scientist te leh technology thar ber ber te nena inngheng fo turin ka fuih thin a. A chhan chu hmalam hunah dan kenkawhna kawngah he thiamna hi an la pawimawh em em zel dawn a. Chumi kawngah chuan duh tawk a awm thei lo a ni” tiin naute a fuih hial a ni.

Author : Bruce Kibby   &nbsp

Aside | Posted on by | Tagged , , , | Leave a comment

GANG HLAUHAWM YAKUZA-TE KHAWVEL

Kum tina Rogue’ gallery hmun luah zau ber țhintu chu misual rual intel khawm, ‘Mafia’ tia an koh mai țhinte hi an ni awm e. An chanchin hi ka ât ka phak tawkin post ka siam ve nual tawh a, tlan paha ziak nafam chuan duhthusamin a kimchang lo hle țhin a. Mahse, Request a awm leh takah chuan ka rawn tarlang leh a ni. Tin, tun țumah hi chuan Khawchhak lama Organised Crime lian ber leh thil tithei ber Yakuza gang-te khawvel zinkawng bik thlurbing kan tum dawn a ni.

Khawvela misual rual intelkhawm, Mafia an tihte chanchin kan sawi dawn chuan, khawchhak lam pawikhawihna lian thama inrawlh zing ber leh chanchin ngah ber, Japanese gang lian “Yakuza” ho chanchin hi sawi hmaih phal chi a ni hauh lo mai. Anni ho hi khawchhak lama black market leh crime kaihhnawih thil reng rengah a hnar kaitu leh a mei-zang-hlaptu ber an ni a, Politic lamah pawh an ring an rawlh thuk viau a ni. An sulhnu tam tak chuan an chetna ram Japan hmel chu khawvel hmaah a tichhe thei viau dawn tih Japan sawrkar chuan a hai bik hauh lo va, chuvang chuan lang lo lamah a vengthawng reng a, an thil tih sual tam tak chu a haidersak fo reng a ni.

Yakuza hi kawtthlera misual rual awm khawm mai mai an ni lo va, Transnational Criminal Gang an tih ang deuha khawvel ram hrang hranga inzarpharh leh awmze nei taka intelkhawm an nih avangin sawrkar meuh pawhin beihpui thlakin a buaipui a. An mamawh a phuhruk sak mai bakah lang lo lamah puibawmin an thil mamawh a rawlruk fo bawk a ni. Nimahse, Yakuza chuan ram dan ngai pawimawh lovin pawikhawihna lian tham a siam zel a, sawrkar hming a tihmualpho nasat vang leh ram a tih ralțit avangin Japan sawrkar chuan, 1992 March 1 khan official takin dan chhung atangin a hnawt chhuak ta nge nge a; mahse, kum tam tak lo ding tawh leh kawng engkima an lo inrawlh thuk tawh em avangin sawrkar chuan an chungah action an la thei tak tak chuang lo va. Vawiin ni thleng hian, ‘Japanese Mafia, the tattooed protectors of Yakuza’ tiin khawvel hriatah an lulak-ngunhnam chu an la tat hriam sauh sauh reng a ni.

KHAWVEL GANG LIAN DANGTE

Khawvel ram hrang hrangah hian hetianga misual pawl lian intelkhawm pawl Mafia te chanchin hi sawi tur a awm deuh fur mai a. Pawl țhenkhat chemkal vak lo an awm rualin, pawl țhenkhat erawh chuan an chettlatna sawrkar meuh pawh duap kai zawkah an siam thei hial a, sawrkar kã meuh pawh thu sawi tam lo turin an hupsak ngam hial a ni.

Khawvel gang tawrawt tam tak zingah Mara Salvatrucha gang pawh hi a turu pawl tak chu a ni awm e. Member pawh 70,000 teuh meuh a nei a, California, USA a din a nih ațang khan tualthah, drugs tawlh, ralthuam tawlh ruk leh mihring hmangasumdawnna (Human Trafficking) thlengin an inhnamhnawih a, gang hausa tak an nih avangin thil an tithei em em bawk.

Tin, Latin King gang pawh hi an theuneu lo ngiang mai. Kum 1940 khan Chicago, USA ah din a ni a, Mexican leader-ah an hmang deuh ber bawk. Black market leh sawrkar khap thil hmanga Pawisa siam thin an nih avangin an hausa em em a, gang tawrhhlelhawm tak an ni bawk.

Khawvel gang turu zinga sawi hmaih miah loh tur chu, Aryan Brotherhood (The brand) hi a ni ngei ang.
Anni hi US-a pawikhawihna lian tham hmun li ațhen hmun khata inrawlh ziah țhin an ni a. Member 20,000 vel an nei a, an huaisenna chu an larpui hle a ni. (An chanchin hi post hranpain tarlan kan tum leh dawn nia – AKZ)

Khawvel hriat Gang lian ho zinga Mexican Gang an an tih mai thin, Los Zetas gang pawh hi a theuneu lokher mai. Ruihhlo (drugs) tawlh ruk lama pawl lian ber a nih angin Mexico-a ruihhlo reng reng khu an kut hmawra an tawkloh a awm lo zu han tia mawle!!!

An seh hel mai bakah zaidamna leh dawhtheihna an tlachham fu mai a, awm mai mai aiin tualthah hi nuam an ti deuh zawk emaw tih mai tur an ni a, mihring nunna leh fanghmir nunna hi an dah level vel viau a ni.

Heng Gang turu tak takte bakah hian, Chinese Gang turu zet mai, Wah Ching an tih te, Triads te, 1960 kuma Los Angeles-a din Crips gang te, 18-th Street Gang (M18) te mai bakah Khawvel gang turu leh puitak tak sawi tur an la tam kher mai. Los Angeles khawpui ațanga rawn chawrchhuak gang -ho chanchin ringawt pawh sawi tham a awm a. America khawmualpui leh Asia khawmualpuia Mafia awm zat ringawt pawh tlem lo tak an ni.

YAKUZA CHU
Khawvel ramdangte ang bawkin Japanese (anni chuan Nippon an inti deuh kher) ho pawh khian awmze nei taka misual rual intelkhawm, Mafia chu kum tam tak liam ta ațang khan an lo hrawn tawh a. Chu chu “Yakuza” tia koh an ni a, khawvel pumah member 102,000 vel neia sawi an ni. Khawvel gang lianho zingah chuan a mikhual lo hle a, sumdawnna thil chitin renga an inrawlh ruk bakah khawvel gang lian ho zingah chuan thil tithei leh hlauhawm bera chhal a ni țhin.

Kum zabi 17-th ațang daih tawh khan an indin tawh a, pawl hlun tak an nih mai bakah an inkhuahkhirh dan chu a țhat em avangin an member-a lut tawhte chuan an pawl an phatsan ve mai mai ngai lova, thihthlengin an rinawm rum rut ringawt mai a ni. An huaisenna leh an rinawmna chuan a tihmingthang hle a, an hnathawh chu dan pawna chet lak leh sumdawnna buaipui a ni deuh ber a, mimal țanpui ngaite pawh an țanpui fo bawk. Mi hausa leh thil tithei deuhte chuan misual pawl dangte Kidnap-na lak ata an ruai fo bawk.

Yakuza chu an ram Pulis-te chuan “Boryokudan” tiin an ko mai țhin a, a awmzia chu” Tharum thawh pawl” tihna a ni mai awm e. Mahse, an mahni erawh chuan,”pasaltha” tiin an inko ve tlat thung. Khawvel gang hlauhawm tam tak zingah chuan gang un leh upa pawl tak a ni bawk. Japan ram chu kum zabi 17-na lai vel khan ram buai leh ram hrisel lo tak a ni a. Tualchher hriamhrei an chelek nasat avangin suamhmangte tuallenna ah a chang zo va. Misualten ram dan leh hrai an rah beh avangin suamhmang pawl hrang hrang a rawn chhuak a. Suamhmangte inlulingna ram ni ta fam chuan a huai huai leh a chak chakin lal hrawtin an vawk lal len a. Chu chuan tualchhung indona a hring a.

Tualchhung indona avangin mi tam tak chuan thingtlang leh ramhnuai lamah an sahimna zawngin an tlan a, hmun tin mai chu a ralkhelh avangin Japan ram chu khawvela ram ralmuang lo berah a chang hman țhelh a ni. Chutiang dinhmuna an awm lai chuan, Shoguns sipai intelkhawm chuan ram rorelna fawng chu an rawn vuan ta thut mai a. Ram inrelbawldan singsa tur leh suamhmangte tichimit turin ralthuam leh hriamhrei chelek thiam bik Samurai Warriors pawl a din nghal a. Thingtlang leh ramhnuai khuaah te chuan thisen a luang hnem kher mai.

Samurai Warriors leh Shoguns-sipai țangrual pawl hmalakna avangin Japan ram chu zawi zawiin a rawn inher danglam chho va. Nimahse, ram dinhmun a rawn inher danglam rualin Samurai Warriors țhenkhat kutthak zual deuhte chuan an hnathawh țhat inchhuangin helna an chawk chhuak ta a, Samurai Warriors chu pawl hnihah a keh ta a ni.

Samurai hel pawlte chuan thingtlang khawtê leh ramhnuai khua te chu an suam a, an buh leh bal, an thil neih rosum mai bakah an ran rualte nen lam an chhuhsak a, khaw tam tak an hal chhe bawk a. Chuvang chuan ramhnuai khua leh thingtlang khaw tê lama mite chu khawpui lamah an insuan lut chuah chuah hlawm a. Chutih laia Japan ram dinhmun chu a thawpik thlak hle a, ram te taktê ni siin communicate lama Japan ram chhiat ber lai a tling hial a ni. Samurai-suamhmang pawlte tukdai tur leh suam tawkte venghim turin Shoguns sipai leh Samurai ralhrat-ho chuan pawl thar an din a, chu pawlah chuan tualchhung mi thahnemngai pawh tam tak an senglut nghe nghe a. An hmalakna avangin suamhnmang tam tak chu sahhlum an ni a, mitthi țawih rimchhia avangin ramhnuai khaw țhenkhat chu an rauhsan nual a ni.

Hun a lo kal zel a, mipui venghimtute pawh chu an rawn inthlah dul tual tual a. A lo rei deuh tak hnu phei chuan Communist an vawrh lar a, tihluihnaa pawisa khawn an chin mai bakah, sawrkar phalloh thil smuggling leh gamling te an vawrh lar chho zel a. A tawpah chuan vantlang venghimtu dawhsan atanga zuangthlain gambling dawhkan an kil ta zawk a, vantlang hmun pawimawh tam tak chu gambler-te tuallennaah a lo chang ta a ni.

Gambling hmuna an card game inkhelhna lar tak pakhat chu, ‘hanafuda’ an ti a, he card inkhelhna a number chhe bera an ngaih chu 8(ya), 9(ku) leh 3 (za) inkawp hi a ni a. Heng card neite chu YAKUZA tiin an sawi mai thin. Tin, card play chi khat oicho-kabu card chu an khel lar hle bawk a. He ‘YAKUZA’ hi chawi larin misual pawl koh nan an rawn hmang chho ta zel a, vawiin ni thleng hian Japan rama misual pawl lian ber leh thil tithei ber koh nan Yakuza chu an hmang ta a ni.

Hun a lo kal zel a, Yakuza chu pawl lar leh hlauhawm tak a rawn ni chho zel a, mi tam takin ‘Yakuza gang-ho pawisawi chu thihna a ni’ tiin an sawi hial reng a, an hmelmate tan chuan tawrhhlelhawm tak an ni. Kum zabi 18-na a lo herchhuah meuh chuan, khawchhak lamah Yakuza gang-ho hre lo an awm tawh meuh lo va. Shoguns-ho nen inthlunzawmin crime thil tam takah an inrawlh a, mihring hmanga sumdawn, smuggling lehblack market thlengin an inrawlh a. Pawikhawihna lian tham reng rengah chuan a hnar kaitu leh a meizang hlaptu ber an nih avangin an sum chelek pawh a tlem lo hle a, khawchhak Organized Crime Field-ah chuan pawl lian bera ngaih an ni ta hial reng a ni.

Japan sawrkar chuan hun rei tak chhung vantlang venghimtuah a ngai a, hei tak hi Yakuza leh Shoguns pawlte chet fuhna a ni a, he thil vang bawk hian politic lamah pawh an luh ril phah thei a, kum zabi 20-na hnu lam thleng pawh khan Yakuza mi lehsate nena inhnamhnawih sawrkar milian tam tak an awm phah reng a ni.

Yakuza chu pawl lian leh hausa tak a nih avangin smuggling tê ber ațanga a lian ber thlengin an khawih a, khawvel ram tinah an inzarpharh a. Vawiin ni thleng hian Yakuza member-te hi nuai chuang fê an la awm a ni. Nimahse, Kum 1992-a Japan sawrkarin anti-ganglaw a pass ațang khan anpawl chu sawihnghinin a awm a, hemi kal zel leh a nghawng chuan Yakuza chu a tikeh vek țhelh a. Yakuza ațang pawl pahnih a keh chhuak a. Japan Mafia group lian ber hmun hniha an in phel phawk takah chuan tualthahna pawh a hluar hle a ni.

Tin, kum 2015 khan Yamaguchi-gumi atangin pawl thar a rawn piang a, chu chu “Kobe-Yamaguchi-Gumi gang” tih a ni a, an pawl hi an che tawrawt hlea ni. Tin, Sumiyoshi-kai gang pawh hi Yamaguchi-Gumi ang thova pawl lian leh thil tithei a nih avanginkhawchhak gang-ho zingah chuan a lar hle a ni. Yamaguchi-Gumi hian member 55000 lai neiin, United State leh South Africa lamah an chetla ber a, German thlengin an inzarpharh a ni. Tin, Sumiyoshi hian member 20000 chuang lai an nei ve bawk a, anni hi khawchhak ram lian deuh leh an chawrchhuahna Tokyo khawpuiah an chetla ber a. China, Thailand, Laos leh Taiwan velah pawh an inzarpharh nasa hle a ni. Khawchhak lama Kidnap liantham deuhah chuan anni pawl hian lam rik a hlawh zing kher mai.

Tin, pawl pakhat Inagawa-kai chu Sumiyoshi-kai hnuaiah a ding leh a, hei hi Sumiyoshi pawl kaihza-vengtu tia sawi a ni țhin. He pawlah hian member 15000 vel an awm a, anni hian Samurai ralthuam tawlh ru țhinte chu an dawr nasa hle thin. Tokyo leh Yokohoma velah inzarpharhin lal an hrawt nasa hle a, Korea lamah pawh bu an khuar nghet hle bawk a, sawrkar pawhin a buaipui viau reng a ni. Heng pawlte hi a hrangin indin hlawm mahse, pawl un leh ralrel thiam, Yakuza thlazar hnuaia mite vek an ni.

Japan ram mai bakah Brazil rama mihring tawlh rukthu-hlaah pawh Yakuza hi a inrawlh thuk hle a, blackmarket chi hrang hrang leh sumdawnna hmun tam tak chu Yakuza te venhimna hnuaia awm vek an ni ti ila kan sawi sual tam awm lo ve. Sumdawng milian tam takin Yakuza venhimna hnuaia awm an duh avangin chhiah an pe a, an chhiah tlingkhawm hi Yakuza chuan black market expand atan vawrh chhuak lo nise, heng chhiah an pek tlingkhawm ringawt hian Japan mipui hmun thuma then hmun khat chu hnathawk miah lovin a chawm thei var var awm e.

Yakuza pawl hi politic lamah pawh a inrawlh thuk hle a, sawrkar nen pawh tawk fang chu inremsiamna an nei nghe nghe a. Chutih rualin Yakuza mi leh sa, sawrkar lama inrawlh an hriat erawh chuan ban an nih mai piah lamah na taka hrem theih a ni bawk. Japan minister țhenkhat, Yakuza pawl nen inlaichinna an neih vanga an ban tak pawh sawi tur an awm nual mai.

Yakuza pawl zawmtu tam ber chu Sikul naupang leh khawlaia nun hmang țhin (street boys ) te an ni hlawm a, tin, ram leh hnama mi beidawng leh, Jail bang zut thin (Jail-bird) misual Convict te an ni hlawm a; mahse, Yakuza pawl an zawm tawh chuan khuahkhirhna hnuaiah fel fai taka invawngin an intuaihriam a, a țha ber nih tumin thiam thil chikim an zirbelh sauh sauh thin a, an Boss tan an rinawm rum rut a, inbeihna muala thih chu pasaltha dik tak thihdanah an ngai a, natna vang ni lova, inbeihna muala pasaltha thiha thih chu an ngaisang hliah hliah mai a ni.

Yakuza pawla an hotu lû ber chu Oyabun a ni a. Ani hi thluak vawrhtu leh roreltu lian ber a nih mai bakah, pa ber chan changa thu tawp siamtu ber a ni.

A mi leh sate chu Kobun tia koh an ni ve thung a. Kobun-ho chuan membera an luh dawnin mahni thisen ngei hmanga hming ziakin an temple ropui Shinto temple-ah an pawl tan rinawmna vawng him tura intiamkamna an nei a. Chumi hnuah an pawl chhinchhiahna bik dragon lem tattoo chu an hnungzangah an chhu chauh țhin.

Yakuza member reng reng chuan an taksaah awmze nei takin tatoo an chhu rang ruan țhin a, nimahse, an tatoo chu midang hmuh theih turin an tilang ve mai mai ngai lova, a pawl mi leh sate bak hmuh tir an duh ngai meuh lo a ni. Chutih rualin, an ngaihsan leh an thil chin țhin, Card play oicho-kabu card an khelh lai erawh chuan an thawmhnaw an hlim thin avangin an tatoo chu chiang takin a hmuh theih thung.

Dan leh hrai, serh leh sang an ngah hle a, nawhchizuar mutpui leh mimal harsatna phuhrukna tura mi rawk mai mai chu dan kalh tlat a ni a, chung an dante chu zawm ngei an tum tlat thin a. Rinawmna an dahsang hle a, an pawl tana rinawmna thutiam an chham tawh hnua phatsantu nih ai chuan, pasalthate khawvel zinkawng tawp nia an ngaih rinawmna vawnhim duh vanga mahni nunna lak chu an thlang zawk fo a ni.

Yakuza mi leh sa, Kobun chuan an dan leh hrai pela thil sual a tihin emaw, dan leh hrai ramrikham pela kal fawr bik chu an zilh nã țhin hle a. Pawi an khawih a nih chuan, sual thupha chawinan anmah ngeiin an chem ngei hmangin an kutzungtê chu an tan chhum a. An kutzungtê chu Oyabun hmaah hlanin zahngaihna an dil thin. Hetianga khunkhan taka sual thupha chawina hun an hman lai hian thil sualtitu chu thih leh dam inkara awm a nih avangin a dakchhuak thiang lova, a sual ngaihdam a nih hma loh chuan a member-puite pawh a be tur a ni lo, tih a ni țhin. Hei vang hian, Yakuza member kutzungte bung lo an awm mang lo a ni.

Author : Andy K Zarzoliana   &nbsp

Aside | Posted on by | Tagged , , | Leave a comment

PATHIAN CHAUHIN A HRIA

Naupang retheite tawngtaina
Zu vanga chhungkaw kehchhia chu

Hnathawk a kan chhuahna tur hmun chu kan la kal ngai lohna a nih avangin a phurawm letling phian a. A kawng chhiat thu sawi nasa viau mahse ka thianpa, puia nen chuan kan hlim ru phian mai. Hnathawkin hmun hrâng hrâng ah kan lo kal ve tawhthin a, tuna kan kalna tur hmun/khua ang erawh hi chu kan vawikhat kalna tur a ni.

Hma tak ah office atangin kan chhuak a. Kan driver pu sawma chuan kan kalna tur chu a hrechiang thawkhat viau a niang’ chu;kawng tha laiah chuan tlan chak vet vet tak a ni. Tluang taka tlanin tlailam a kan chaweina tur, Hotel pakhat chu kan thleng ta der a.Hotel a kan inhnawhpuar hnu ah kan zinkawng lam pan chuan kan chhuak leh ta a. Tluang takin kal ta ila zan dar 12 hma vela ban hman anih thu pu sawma chuan a sawi a, chu chu kan duhthusam ani vek a, mahse duhdanin thil a thleng lo tlat mai. Khaw pakhat kan tlan lut fel deuh chiah tih chuan kan motor (gypsy) chu a nuar ta tlat mai a, sana ka’n bih a zan dar 9:30 chiah a ni. Reife siamthat tuma kan beih fåt fât pawhin engruai kan ang thei lo. Sawi tawh angin kan kalna kawng hi a chhe êm êm vek hlawm a, khaw lian sawi tur lah awm hek lo. Tuna kan motor chhiatna khua pawh hi In za(100) pawh an tling lo tawp ang.

An veng hruaitu te an fel hlawm a, a tuk lama siam zawm mai tur leh zanriak mai turin min sawm a, kanchau deuh bawk nen; an mi sawmna lawmawm tak chu pawmin chu zan chu kan riak ta a ni.

A tuk khawen hnu chuan kan vanneih a siamin kan motor chu kan siam tha thei hlauh mai a. Muangchang lovin kan kalna tur lamah chuan kan tlan khu leh tan nghal a, a huphurhawm duh khawp mai, a tira kan phur ang kha chu ani ta lo tawp.

Kan kalna tur khua chu kan hnaih ve sawt ta hle a, kawng chu tha se, bawngkawn atanga kulikawn tlan ang vel lek a ni tawh ngei ang. Kan tlan zel a khaw pakhat; ka tawng tu huatthu suh ah, thingtlang khua ah pawh thingtlang lutuk tak mai kan tlan thleng leh ta a. Chutah chuan thingpui dawr an lo nei hlauh mai a, kan riltam tawh hlawm bawk a, inhnawh puar turin kan chhuk leh ta sap sâp hlawm a.

Thingpuite kan inzawh chuan ‘kan kalna tur kan thleng trep ta bawk a,’ tiin khawchhung fangin ka teikual a. A khaw tet ngaihtuah an tual vel a faiin an In sak dan a felfai phian mai. Chutia ka veikual na lamah chuan naupang pakhat, kum 3 vel bawr vel hian a thiante infiam chu tel ve chak niawm takin alo thlir dauh dauh mai a. Kawr a ha lo a, a sam a bukin a bal hle mai bawk. A bulah chuan ka va thu a,a hmingte zawtin an In awmna te ka zawt a, fiah vaklo zah hmel takin ka zawhna te chu tha takin min chhang ve mai bawk.

An In awmna min kawh hmuh chuan mak ka ti deuh a. Chu mipa naupang te reuh chuan, “a pu, kan In ah chuan a u te an awm asin. .u-mami chu a damlo a, u-mama’n a awm pui a,” a rawn tichhuak hlawl mai a. Chu thu chuan min thawng kher mai! Naupang bulah chuan,”mama, in In ah chuan ka lo kal ve thei a ngem?,” tiin ka’n zawt leh a.
“Aww, a pu lo leng rawh. .”

Thingpui dawr ah eitur an neih ang ang leiin chu naupang nen chuan an In lam ah chuan kan kal ta a.
“A pu, sawtah sawn a nia, kan thleng tep. Chuan a pu, a u te’n i eitur min leisak ho hi an hmuh hun ah an lawm dawn sia, tlan thuai thuai ang,” tih leh ka bana min kaih a rual nghal a. Kan hma lawk a In ding awnleuh, thlitleh natakin vawikhat pawh nuai se a sawm hneh hle dawn tih hriat reng² lamah chuan chu naupang (ka zinkawnga ka chhar ti mai ang) nen chuan kan pen phei dun hlawk² a.

Kawngka kan lut chiah chu;mihring chenna nge ran In tih pawh hriathran har khawpin a uihthâng huam a. Chu In riang taka ka hmuh chhun chu; kilkhata naupang pahnih chaw inbarh leh a ding kil lama tuibel, puanchhe tel, ipte, bungbel tlem leh chapal hlui zet tawh te an ni.

Mizoram chhung a thilthleng a tan chuan hmuh a va hrehawm em! Mak tih hmel takin a u mipa(anih ka ring ringawt a. .) chuan min khap lêk lovin reife chu min en a. A nau (thil ka leisak) chuan a u te pahnih hnen ah chuan eitur kan lei ho chu eipahin hlim takin ka thil leisak chanchin te chu a sawi liam liam a. Chutih lai chuan chechang lo in ka dinna ngai ah dingin an unaunu, taksa chaklo tih hriat reng rêng, eng natna innge a tlak buak ka hriat si loh chu ka thlir ngawih ngawih mai a. Tawng chhuah mai nachang pawh ka hre mai lo, ka thil hmuh chuan min shock-êm atin ni. . .Chutia ka ding ngawi reng lai chu an te ber, kum thum(?)mi vel lek chuan a ute bulah chuan nui ver² chungin min kai phei a. . .
“Mama, khawnge i nu leh pa te hi an awm a,” tih pahin an unaunu chal chu ka va khawih nghal a. A pang a sa in a khawsik a sang khêr mai! Damdawi pek vat a enkawl zui vat a ngai tih chu, kei, doctor ni lêm lo pawh chuan ka man thiam khawp mai. Ka backpack-a tui bottle chu phawrhin ka romol chu ka tihuh vat a, a pang chu ka dehkual sak nghal zung zung a, rilru a hah duh tak zet a ni.

Mipa naupang upa zawk chuan, “Ka pu, a nu chu chawhmeh zawngin ram ah a kal thin a, tlai ah a lo haw ang. Ka pu, u mami hi a dam leh ang tiraw? A tan kan tawngtai thin a. ‘Pathian chuan naupang tawngtaina pawh a ngaithlain a chhan sak thin’ tiin a nu chuan zan mut dawn apiangin min hrilh thin sia, a dam leh ang tiraw. .? ,” a ti ta reuh a. Lung ava chhe duh kher em! Kei, tawngtai leh inkhawm khât ve tak, engmah nilo hi ka zak chem chêm a ni, ka zep lo.
“Ni e, mami, mama i nu chuan a sawi dik a lawm. .in tawngtaina zawng zawng pawh kha a hre vek a, van atangin a thlir reng che’u a, i u pawh hi a dam leh em em ang,” ka ti chhuak thei ta hram a.

Mipa upa zawk chuan, “thil pakhat chiah ka zawt leh thei che a ngem’ ? A pa khan zu a rui thin a, kan unau hi min vaw vak vak thin a, a nu’n min chhan a tum thin a, a samah kekin pawn ah sawn’ hruiin a thlugbet thin asin. .chawei tur kan nei ngai lo a, mite’n a rukin min pe khawm thin a. .an fel lutuk..mahse, a pa’n a hrechhuak a, inchhungah min kalhhnan thin. .tah a phal ngai lo a, u mami damlo hi chu a thih hma deuh kha chuan a vaw duh tawh lo. .a khawngaih ve tawh a niang. .a pa chu a sual thei lutuk. .mahse a thi tawh a, min vaw tu an awm ngai tawh lo asin. .ka pu, A PA KHA ‘VANRAM’ A KAL A NGEM?’

Chu naupangte in-a a thil min zawh leh min hrilh chuan min thawng kher mai! Hetiang a rethei leh chhungkaw harsa; chuta kara pa ber zurui, rui satliah pawh nilo mi nunrawng mahni fate ngei pawh sawisa a rikrap duh mihring an lo awm thei a ni maw. .? Thawnthu velah chuan ka chhiar fo, mahse tunah a takin ka tawng chu a ni si. .awih a va har em!

An bula awm reng thei ka ni silo a, ka pawisa pai chu pein hreh tak chungin ka kalsan ta a ni. An chûnnu lo nghah thlenpui chu ka duhthusam a ni ngei mai! Mahse, kan kal a hun tawh si a ni.

A tawi zawngin sawi ta mai ila. Kan hna kan thawhzawh hnu ah, an dinhmun ka hriat chian duh vangin an In ah chuan ka thianpa, puia nen kan va kal leh a, a lo inkalh thap kan hmuh chuan hrilh a hai duh khawp mai. An khaw mite an chanchin kan zawh hnu chuan engkim a chiang ta kuar(h) mai. Damlo mami kha a damlo a na zual a, damdawiin hnai ber ah an lo kalpui hi a lo nia. Damdawiin hnai ber district hospital ah chuan kan la kal ta zel a. Aizawl lamah referred a lo ni zel a, a beidawn thlak khawp mai.

Kha mite chhungkua kha ka hmu leh ang em??

PATHIAN CHAUHIN A HRIA. .

Author : Duhzuala Da Wizie Grag’g   &nbsp

Aside | Posted on by | Tagged , , | Leave a comment

US LAWNG LIAN DANGIN PYONGYANG LAM PAN LEH TA RUAI RUAI

: US Navy chuan a vawihnih nan Pyongyang lam a pan leh ta ruai ruai mai!

NKorea missile enchhin leh vanga an aircraft carrier, USS Ronald Reagan an tirhluh leh hian Yokosuka, Japan ah sea trial nei zovin Korean Peninsula lam a pan a, USS Carl Vinson nen drill an nei dawn niin defence official lam chuan an sawi.

Rear Admiral Charles Williams chuan siam fel ngaite kan siam fel a kan inpeih hnuah hmalam pan zel turin kan insang mar mek zel a ni a ti.


USS Ronald hi ft 1,092 a sei niin thawktu (crew) 4,539 a phur tel a, aircraft 60 zet nena thuam a ni. Kum 2003 khan commission niin $8.5 billion senga sak a ni. A thurualpui tur USS Carl Vinson hian Korean Peninsula hi April chawhnu lam khan a lo thleng tawh a nih kha.

Author : Saihmingliana Sailo   &nbsp

Aside | Posted on by | Tagged , , | Leave a comment

Indian-American te an hausa

America ram mipuite zingah India mi nihna lo nei tawh, tuna US-a awm nghet ta te chu a khawsa thei leh dinhmun ziaawm ber ber nia ngaih an ni a, hnamhlawm khatah chuan lehkha pawh an thiam ber ni hiala sawi a ni. Tam lamah pawh Asia ram atanga pem lutte hian Latino ho an khum tawh a, an thang chak ber bawk nia sawi a ni.

Pew Research Centre report, nimina tihchhuaha a lan danin, America ramah hian India mi mtd. 3 chuang an awm a, pem lutte zinga a tam ber chu China atanga lut, mi mtd 4 vel leh Philippines atanga lut, mi mtd. 3 leh nuai 4 an ni.

India ram atanga pem lut, mi naran hian kum khatah dollar 88,000 an la lut phak a, Asia ram dang atanga lutte chuan dollar 66,000 vel an la lut deuh ber a, US mi nawlpui phei chuan dollar 49,800 vel an la lut tlangpui a ni.

Aside | Posted on by | Tagged , | Leave a comment

MAFIA…MISUAL RUAL CHANCHIN (LA COSA NOSTRA) CHAPTER 2

‘Tun tum chu Mobster (Wiseguy/Mafia) te ho zinga mipui tepawhin an hriat lar em em leh thenkhat ten an sitar rawn luai luai pakhat hi ziak chhin teh ang.

BENJAMIN “BUGSY” SIEGEL :
Thenkhat chuan “Baby blue eyes” emaw…”Bedroomeyes” ti ten an ko hial thin naa, Bugsy hian Mafia lamtluang a zawhnaah hian a hmel hi chu ‘a ve’ mai chauh a ni tih han sawi hmasa ila. He zinkawng zawhtutena an lo hmachhuan fo…nunrawnna, tualthahna etc etc te hi a hmanraw tangkai ber a ni ve tho a ni tih pawh han sawi hmasa zuai ang.

TUNGE BUGSY CHU:
A pian leh murna tih vel hi chu sawi duah lo mai ila, zirlai tana zirtur kan ziak pawh a ni hlei law. Bugsy hian Mafia khawvela a hming a chherna ber pakhat chu tuna Las Vegas (Sin City) kan tih mai…khawvela nuamtawlna hmun lar ber mai khu a din chhuak tute zinga ami a ni ve tlat mai. Kum 1940 tir lamah khan New York lama Mafia hotute chuan Bugsy hi Los Angeles lamah an huang zauh turin an tir lut a. Chutah chuan a hmel thatna leh a duhawmna (ti mai ang) hmangin Hollywood lama mi challang tak tak te bakah, Hollywood star tam tak te chu thianah a siam thuai a. A zuna uai star lar tam tak pawh number pe thliah thliah-a sawi tur an awm hial mahna le. Hetah hian alawm hmeichhe kawlhrawng ve tak, hmeltha si…mob khawvela inhnim phum ve nasa tak Virginia Hill nen an intawn tak ni. He an inngaihzawnna chanchin vel hi Mafia chanchin an sawi chhung chuan Mafia khawvela “Romance/Affair” lar ber a ni reng tawh hial ang. Enge hmeltha leh hmeltha an ni miau a. A hunlai chuan tunlai Celeb lar ber te ai hian an nep bik hauh lo a nia.

Bugsy hi a tetlai atang rengin mi kawlhrawng a ni a. School a kal ve lai pawn classroom-a awm ai chuan pawnlama a thiante nena huai kawm bawl nuam lo ti thin tu a ni. Mahse suahsual rawng hi a bawl nghal bik em em lo. A tleirawl chhuah tirhah chuan rinawm taka hna thawkin a inhlawh ve bauh bauh thin tho mai. Mahse khawlai vela mobster ho inchei nalh tak tak, engmah thawk silo…nula hmeltha ber ber te nena an leng vel a hmuh thin khan a rilruah thu a sawi thui viau a ni mahna. Rinawm taka hna thawh chuan hlawhtlinna leh sum hailuh vel kha a kailawn a thui riau in a hre ta tlat a. A tawi zawng leh awlsam/hahdam zawng nia a hriat ngei ah chuan kal a tumruh ve ta bur mai a ni.

Kum 19 a tlin meuh chuan an awmna kawtthler leh an thenawm velah chuan Ben Siegal aka Bugsy chu hre lo an awm bar tawh lo. Mahse a tha zawng chuan a ni lo ngei ang. Hetah hian Juda tlangval pakhat Meyer Lansky chuan Bugsy chanchin hi lo hriain thianah an insiam ta a. Ti ti thangvel ah chuan Bugsy hi “Khumfa (Bed bug) ang maia tawrh hlelhawm a ni” an ti ta fo a…chuta tang chuan a hming “Bugsy” tih hi a lo piang ta a ni. Mahse he hming hi a duhloh em avangin tuman a hmai hmaah emaw a hriat phakah pawh an sawi ri ngam ngailo.

‘TOTAL PROHIBITION:’
US sorkar chuan kum 1920 bawr vel khan Zu Khapna dan a chhuah rup mai a. Mahse he thil hian Mafia te chu sum hailuhna a siam sak belh hlauh thung. Heng bootleggers (A ruka zu siam leh hralh hi bootlegging an ti a, a hralh tute chu leggers an ni mai) zinga lar tak pakhat Arnold Rothstein an tih chuan Bugsy te thian dun hi a ruai nalh mai reng a. Heta tang hian Bugsy hian hnunglam a hawi let leh tawh lo. Hetia hma an sawn zel lai hian thian thar pakhat hlu zet mai an chhar chhuak leh a, chu chu a hmaa kan ziah Charles “Lucky” Luciano kha a ni. Luciano an Massaria leh Marengzano (MAfia Boss pahnih) a thahnaah khan a that tute zinga a mei zang hlaptu ber chu Bugsy hi a ni.

‘MURDER INCORPORATE :’
Dan hnuaiah pawh dan lekkawh tute kan mamawh ang chiahin dan pawnah pawh dan lek kawhtute an lo mamawh ve leh zel ni tur a ni. Commission chuan Mafia khawvela an dan leh dun lek kawh turin pawl din thain an hria a. Chumi atan chuan Bugsy hi ti tura tih a ni a, a member lak te pawh an hraw hreih hrawih hlawmin, Mafia khawvelah chuan awmzia an nei chiang nasa mai. (He Murder Inc. an tih hi remchang dangah kan ziak dawn nia.) Amaherawhchu ka han sawi tel duh chu he pawl hi a chet tawhnaah chuan mi ruang a let pheng phung zel a. Sorkar lam chu sawiloh Mafia chhungkuaah takngial pawh tute nge an nih hi shriat chian a awm thei silo a. An hlau nasa teh a sin.

‘JAIL RUNTHIM LAMAH :’
Mak tak mai chu Bugsy hi a thil tih vanga thiamloh a chan te hian jail bang hi a zut rei ngailo reng reng a. A chang phei chuan a tang nghet ve ngei dawna a lan lai te hian thiam a chang leh nulh thin. Hei hi chu witness te leh prosecutor ho thamna leh tih thaihna vang a ni tih a chiang tho naa, a nachang erawh a hre hle a ni. Mahse hetih lai hian Prosecutor rinawm leh dik zet mai Thomas Deewey chuan lalthutthleng a rawn luah a. A hmachhawp pawh a hrawl nghal kher mai. Mob khawvela mi tawrawt ber pawl ‘Harry Big Greeny Greenburg’ (Ani hi Murder Inc zinga mi niin an sawi) chu a rawn bitum nghal chat mai a. He thu Bugsy te hoin an hriat rual rualin, Mafia chhungkaw tana thil pawi a sawi an hlauh avangin; an man hmaa dahthat an tum ta a. Mafia khawvelah chuan “THIAN” emaw “UNAU” emaw hian kawngro a su thui over thin lo a. Engkim hi”BUSINESS” vek a ni an ti mai thin. Big Green pawh hi Bugsy thian hnai tak a ni a, mahse chunglamin Bugsy chu a dahtha turin an ti miau si a. Business a nih ang ngeiin a tih hlawhtlin mai a ngai dawn a ni. Big Green pawh hian a chunga thil thleng thei hi a hre thawi ni ngei tur a ni, a theih ang tawkin a fimkhur ve naa, tlai khat a motora a thu lai chu a hnung lam atang an kap ta thawr tho mai a ni. Mahse Dewey chuan a duhtawk a la ngah teuh lo. Tunah chuan Bugsy lam a hawi ve ta run mai. Case siamna tur tranchhan lah chu a han nei tha em em lehnghal a. Hemi tum hian Bugsy hi tualthah thubuaiah man tum a ni a. Thuhretu pathum lai an awm avangin a tan ngei pawh rin a ni. Bugsy te tana thil buaithlak deuh mai chu hemi tuma thuhretute hi Police lam hian an thukru/sawichhuak duh hlek lo mai a. An hming atan x, y leh z tih zawngin press hmaah pawh an sawi nghe nghe a. Mahse sum hian thil hi a lo tithei khawp a niang chu, engtin tin emaw heng mite hi an hre chhuak leh ta tlat mai a. An zinga pakhat chu Bugsy-a makpa a lo ni reng pek a. Ani hi Y an tih pa chu a ni. A makpa takngial pawh hi a dahtha rang kher mai. A unaunu lah chuan a pasal that tu hi a U Bugsy a ni ang tih ngaihna reng reng a hrelo a ni awm e.

Tunah chuan X leh Z hriat an la hmabak. X leh Z te hi New York lamah Police venhimna hnuaiah an awm tih a ni a. Mahse an zing a X zawk hi a tawmna hotel tukverh atang mak tak maiin a tla sual leh mauh mai a. Tunah chuan witness pakhat chiah an neih tak avangin thuneitu lam te chuan case siamna tlakah an ngai ta lo a. Bugsy chu a free leh ta heu mai.’

BUGSY HUN HNUHNUNG :
A chunglama kan sawi zuai hmeichhe hmeltha si, tawrawt ru phian bawk si…Virginia Hill nena an inkar pawh a la ling tha hlar hlar hle mai a. Hetih chhung zawng hian Bugsy hian a nupui fanaute a thlauhthla chuang hauhlo nia sawi a ni. Anni pahnih inkawp hi a hunlai chuan Hollywood titi a ni a. Celeb an ni ringawt. Mahse hmeichhia lah tawrawt, mipa lah tawrawt tafam chu an inhau nasa in an inbengberek nasa viau thin a ni awm e. Mahse an zia hi a dang ve khawp a, an inhauh chiam a…bungbel thlawk fua fua-a an inchapchar te pawh hian a tawpah chuan khumlaizawlah an sawifel leh mai thin niin an sawi. Common lo ve viau.

Engle khawle, Bugsy hi hotu lam ten Las Vegas hmun tharah chuan Casino ropui tak sa turin an ti ta rup mai a. Bugsy pawn theihtawp a chhuah. A hmingah Flamingo a ti nghe nghe a. Mahse mob khawvela a chet zei angin real estate lamah a lo zei fahran lo a niang e. Sum a seng hnem ta hle mai a. An bituk sak let fe a hman hnu pawn a chanve pawh a la sa zo silo. Hotu lamin thu an rawn neih lahin, ani lo chapo ve bawk si chuan a lo bengkhawn duhlo nasa mai a ni awm e. Hei hi a chungchang leh a thawnthu in a chapter tawp ber a zawh tanna niin an sawi thin. Hemi tuma a tih thinrim te hi Mob khawvela mi challang ber ber pahnih Lucky Luciano leh a thian hnai ber Meyer Lansky niin an sawi bawk.

‘THIS IS KHAWVEL…EVERYTHING IS CARTOON :’
A heading hi chu ngai pawimawh su. A tawi zawngin kan ti tawh ang. Bugsy chuan chunglam ho a tih lungawiloh miau tawh avangin a hun leh nite a thamral mek tih a hai biklo. Mahse mi ngawhngawl leh luhlul ta hrim chuan enga tan mah a ngai duh lem lo a. Tum khat chu Virginia Hill zinchhuah laiin a inah Bugsy hi a riak lut a. Thuthlenga chanchinbu a chhiar lai chu pawnlam atangin machine gun hmangin an phuh hrep mai a. Bugsy pawh a thi chiang ngei mai. Silai mu hian a hmai vel bakah a taksa a hreuh chik hrup a. A mitmu veilam phei chu a pawk chhuak nawlh hial a ni awm e.

Thenkhat sawidan chuan hemi tum hian Virginia Hill hian Bugsy hi an bei dawn tih a hriat avangin a zinchhuak niin an sawi a. Hmangaihna chu KAHA. A thih thu pawh hi thlawhna a chuan laiin a hria tih te pawh a awm nawk. Mahse heng hi chu fact a ni lem lo.

A khar nana ka sawi duh chu, Mafia khawvel kha a lo rapthlak em em mai a. Mahse anmahni pawh khan an hrechiang a, an pawm thiam viau thin. An unau emaw an thiante tak meuh meuh pawh chhan ho tak taka an thih/thah pawn…”He nunkawng hi kan thlang a, a sawhkhawk pawh kan tuar tur a lawm” an ti mai thin.

Author : Rawna Fanai   &nbsp

Aside | Posted on by | Tagged , | Leave a comment

NORTH KOREA LEH RUSSIA INZAWMNGHET MEK: RANJIN-VLADIVOSTOK FERRY SERVICE AN HAWNG THAR

Khawvel ram hrang hrangin UN hremna anga an kawm serh mek North Korea leh Russia chuan insumdawntawnna kawngah thawhhona thar siamin, niminah Rasin seaport (North Korea) leh Vladivostok seaport (russia) inkarah Lawng mihring phur chi (Ferry Service) an hawng thar.

Rasin leh Vladivostok inkarah hian Ferry lawng service-in chuan man US$ 85-101 inkar a ni. He ram pahnih insumdawn tawnna tur Trade & Tourism hi ram 2 te chuan an chhawr tangkai an ring hle. He hawnnah hian North Korea’s Ferry lawng mi 200 phur, ton 1500 a rit (pic a hnuai a mi hi) chuan Vladivostok seaport a lo thleng ruau mai a ni.

Tun hnaiah North Korea chuan missile a test luih leh vangin, UN chuan hremna thar siam a tum mek a, South Korea President thlan thar Moon Jae-in pawhin na takin North Korea thiltih a sawisel a ni. Japan chuan kum 2006 atangin North Korea Ferry lawng ten Japan seaport an hman ve a khap tawh a ni.

Russia President Putin chuan Beijing-ah “Silk Road Initiative” summit a tel tumin, North Korea chu hremzui zel aiin, tha taka a nuclear program titawp tura inbiakna neih pui tur a ni, a ti.

Nikky Haley, US Ambassador to UN chuan, engti zawng mahin North Korea-in missile test leh nuclear program a tihtawp phawt loh chuan inbiakna neih pui US-in a tumlo tih a puang thung. North Korea chuan tun Sunday zinga a missile test chu nuclear warhead phur thei, US military base kap pha an ni, a ti. US Pacific Command Hqrs Guam leh Japan leh Korea rama US military base te chu duh hun hunah nuclear warhead hmangin a kap thei vek tawh a ni.

Author : Ct Lalrinawma

Aside | Posted on by | Tagged , , | Leave a comment