C.D. Vanlalfamkima (Dulte khua) a ramhuai hmuh thu.

• Dulte khuaa ramhuai hmuh chu.
• Ramhuaiin mi nunna an la thei em ni?

He ka ramhuai hmuh hi a tak tak a ni a, hemi vang hian ka piansual phah nghe nghe a ni.

Kum 1951 vel kum 5 mi vel ka ni tawh a,,, khawlai ah pawh duh duhin ka leng ve thei tawh a. Kan khua dulte veng chhak, Kawnzawla kan awm lai ani a. Kan veng chu a hrâng ang reng khawp a, zantin hi thawm kan hre thin.

Tlai khat chu, Pi Zachhingi tui chawi turin, Pa pakhat Palian pui, mikhual hi a tawk a, khawi a awm nge inih a, Khawnge i kal dawn?? A ti a…. Ani chuan, “Helai ah hian naupang damlo kan ka tum a, ka awmna chu khinglai Bevuak tlang pang vela awm khi ka ni a,” a ti a, an inkalsan mai a.. Chutih lai tak chuan kei ka pum alo na a, chhuatah ka tal ka tal a,zanah kan han mu chule, zanlai velah chuan ka lu ah min rawn khawih harh ta a. Ka te thawt a, Ka Nu leh Pa chu an harh nghal vat a,
Engti zia nge Mambawih?? Min ti a. Kei chuan ka Nu, ka Pa ka hlau emai! ka ti a. Enge ni i hlauh min ti a?? Kei chuan khum mawnglam ka kawk a. Chutih lai tak chuan ka Pa in mei a chhem eng hluah a, (heng hunlai chuan khawnvar te kan la nei silo va, chubakah keini chu kan la rethei em em a) Ramhuai ka hmu, kan khum mawnga hi a thu run mai ka ti a. An hmu ve thei silova, ka kutin ka hmai ka hup a, ka nu in puan kawp chhah tawk thlepin ka hmai a rawn hup ve leh a, chuti chung pawhin kung zung karah ka la hmu ta thova, ka Nu chu a tawngtai nasa hle.

Ramhuai awmdan chu Palian pui, khuma a thu chu liang a tawng a, puandum hi a âr chempai a, mi boxing tumin mi tin zuau zuau mai a. Chutih lai tak chuan Kawlkulh a ka Pa Lianthiauva silai kan kawl lai a ni a, “Ka Pa, Phuai e Phung ti rawh”?? Ka ti thin a, silai chu an la ve bawk thin a, mahse a hmu ve silova, kah ngaihna a hre silo.
Khawvar dawnin min tin san a.

Chutiang chuan zan thum min bei thin a. A zan thumna ah chuan, ka pa in khawi nge, ti reng reng mai tiin, Pi/Puten pawnchhe muhin len vel ila a zia awm ngai e an tih kha maw, tiin pawnchhia chu lian tawkin a mut a, a rin len vel a, a chhuak ta a. Kei naupang la tawng fiah lo ta chuan, a pa in a dep hlawk hlawk a, seh hlawk a ti a. Kan in a chhuah hnu in kan kawmchhak ah Sisu kung 2 a awm a, a zung hlir rapin leh a zung zawnah hlir a rap a, kan kawmchhakte naute, Upa Neihmuka te fa chu a la a, daipawn lamah a liampui a, ka hmu zel a. Ramhnuai an thlenin ka hmu ta lo chauh a ni. Tichuan Upa Neihmuka te fa chu a thi ta a ni.

Tin, hetih lai hian kan veng ar chu zan thum an khuanglo reng reng a, kan Arpa phei chu a chhuang a duk vek a, a thi tawp mai bawk a. Tichuan heta tang hian khawsikpuiin ka na ta char char a, ka thi mai dawn emaw min ti hial a. Mahse Pathian Khawngaihna zarah ka damchhuak leh hram a, ka piansual phah ta thung a, ka beng a chhet phah a ni, tun thlengin.

Tin, ka nu in a hmain a mumang ah a lo hmu lawk bawk a, a hmuh dan chuan “mi pakhat Pa Lianpui kan bangah a lo bet thlawp mai a. Ka lo hlau em em a, ka harh hlawl mai” a ti bawk a a ni.
—————————–
• Heta ramhuai hmuh hi hun kal tawh ami a ni a. A hmutu pawh hi a boral tawh niin an sawi. Hmanlai deuh kha chuan ramhuaite hian a rapthlak zawnga inlar leh mihring tihbuai hi an ching hle a. Thangthar zelah an sim tawh a, mizote hi sum leh pai, ruihhlo leh sex, nun thlahdah hmanga mi tihchhiat an tum ta thung a ni.

Advertisements
Aside | Posted on by | Tagged , , | Leave a comment

Dr. Lalsawivela rawngbawlnaah Pathian hnathawh a thleng nasa tulh tulh

Evan Dr Lalsawivela’n UPC Biak In, Bawngkawn-a rawngbawlna a neihah chuan damna mak taka chang an pung nasa tulh tulh.

Niminah khan naupang kum 8 mi thisen cancer avanga hmundanga beidawng tawh, Kevin Lalrintluanga, Ramhlun North chu an rawn pawm lut a, a mutna tura siam sakah mut a ni chungin a nat tawh em avangin sermon lai leh a hnuah pawh a tap char char a, a ke nate chu khawih sak ngam loh khawpin na a ti tawh a.
Evan Dr Lalsawivelan a khawih veleh he naupang tap hi a bang nghal hmiah a. Reiloteah amahin a kal nghal a, “Pathianin min tidam” a rawn ti chhuak reuh a, damlo pantu dang pawh an mittui a lo tla ve phung mai a ni.

Nimin vekah khan Lunglei Dist Chithar khuaa nu pakhat, fa 3 nei tawh, thin cancer vanga zangthal zawnga thla hnih chhung mu thei tawh lo, a zawna an zawn luh bawk pawh Lalpan a tidam a, amahin zang vahin damlo room a chhuahsan a, damna thu, tap zawih zawihin a puang a ni.

Evan Dr Lalsawivela rawngbawlnaah hian Pathian thiltihmak a thleng nasa hle a. A room chhung an luh chiah a dam nghal te an awm a. Bengngawng, a khuma an thut ruala beng var nghal nia insawi ringawt pawh mi 10 chuang an awm tawh.

Record atanga a lan danin, a sermon atanga an natna dam nghal nia insawi pawh mi 30 chuang an awm tawh a. Phai lam Doctor a beidawng tawh cancer leh natna dang dam ta nia insawi pawh an awm nual tawh.

Tun thleng hian chawplehchilha dam nghal nia insawi hi 80% chuang an la ni a. An dam nghal leh nghal loh hriat loh nausen leh fa nei theilo an tam em avangin dam percentage hi a sang thei lo zawk a ni.

Evan Dr Lalsawivelan ralkhat atanga mobile phone kaltlanga a tawngtai avanga dam nghal nia insawi leh damlo, a mut dawna a tawngtai sak avanga dam nia insawi pawh an thahnem tawh hle. A mut dawn hian damlo mi 20 chuang tawngtai sak tur list a nei zan tin thin. Zan tin dar 11 velah damlo a khawih zo thin a. Tunah hian ni 5/6 kal zawn te a khawih thei tan a ni.

Aside | Posted on by | Tagged , , | Leave a comment

MPSC CHAIRMAN ATAN REV. ZOSANGLIANA COLNEY RUAT

Department of Personnel & Administrative Reforms (General Service Wing) thuchhuah, dt.29.9.2017 chuan Mizoram Public Service Commission (MPSC) Member Rev. Zosangliana Colney chu MPSC Chairman mawhphurhna chelh turin October ni 2, 2017 atang khan ruat a ni tih a tarlang.

Mizoram Presbyterian Kohhrana minister thawk lai, Rev. Zosangliana Colney hi Mizoram sorkar chuan kum 2015 khan MPSC member turin a sawm a. Sawmna hi Rev. Zosangliana Colney pawhin pawmin, Synod-ah voluntary retirement a dil a, Synod Officers’ Meeting (OM)-in a phalsak tawh bawk.

Rev Zosangliana chuan Sorkar atanga sawmna a dawn hnuah Synod Officers Meeting-ah a thlen tih sawiin, Synod-a thawk chungin MPSC member nih a rem loh avangin, Synod hruaitute thurawn angin chawlh a dil a; April 1, 2015 atangin voluntary retirement-in a chhuak ta a ni.

Rev. Zosangliana Colney hian Synod Multipurpose Training Centre-ah programme director hna a chelh a, Synod executive secretary term hnih lo chelh tawh a ni. Thiamna lamah M.A (political science) leh master of theology a ni a; MPSC member-ah hian kum li chuang a awm thei dawn ni a sawi a ni.

MPSC member atana ruat a nih chungchangah hian hian Rev Zosangliana Colney chuan, Pathian rawngbawlna kalsan a MPSC member ni ta ah a in ngailo tih sawiin, “Synod hotute remtihpuina a thawk tur ka nih vangin rawngbawlna hmun ka sawn ni mai ah ka ngai,” a ti a, damchhung atana puithiam atana nemngheh a nih tawh avangin ‘Reverened’ tih pawh synod in nemngheh a nihna an sut leh a nih loh chuan a hmingbul ah dah chhunzawm zel a tum niin a sawi bawk.

March ni 31, 2015-a sorkar thuchhuah (notification)-a a lan danin, Rev. Zosangliana Colney hian hlawh thla khatah Rs.75, 000/- a la ang a, allownces hrang hrang a la thei bawk ang.

BIO DATA OF REV ZOSANGLIANA COLNEY

1 Name Zosangliana Colney
2 Fathers’s Name R. Lungruala
3 Date of Birth November 10, 1957
4 Present Address SMTC, Mission Vengthlang, PIN-796005
5 Edn Qualification M.A, (NEHU), BD (UTC), M. Theology (Hong Kong)
6 Name of spouse Lalrinpuii
7 Names of children Zorinkimi (25), Zorintluangi (22), Zorinmawia Colney (18)

MINISTERIAL EXPERIENCE:

A Lecturer, Aizawl,Theological College (1988)
B Pro Pastor, Lawngtlai Pastorate (1989-1991)
C Pastor, Zawlnuam Pastorate (1992 till June)
D College Chaplain, Union Christian College (1992-93)
E Pastor, Lunglei Chanmari Pastorate (1995-1997)
F Administrative Secretary, Barak Area Presbyterian Church (1998-2000)
G Secretary, Synod Mission Board (2001-2006)
H Executive Secretary, Mizoram Synod (2007-2009)
I Executive Secretary & Finance Officer, Mizoram Synod (2010-2012)
J Prog Director, SMTC (2013-March 2015)
K Secretary, Chhim Prebytery (1990-91)
L Moderator, Chhim Presbytery (1997)
M Moderator, Barak Presbytery (2000)
N Vice Chairman, Interserve (India) (2004-2005)
O Vice Chirman, India Mission Association (2006-2008)
P Council Member, CMC&H, Vellore (2007-2012)
Q Council Member, UBS Pune (2006-2009)
R Member, Ecumenical Church Relations, Senate of Serampore College
S Secretary, Assembly of the Presbyterian Church of India, (2012-2014)
T Vice President, North East India Christian Council (NEICC (2012-2014)
U President, NEICC (2014-2016)

COUNTRIES VISITED

1 USA
2 England
3 Wales
4 Australia
5 Jamaica
6 South Africa
7 Qatar
8 Jordan
9 China
10 Singapore
11 Hong Kong
12 Thailand
13 Macau
14 Indonesia
15 Malaysia
16 Nepal
17 Myanmar
18 Cambodia

Aside | Posted on by | Tagged , | Leave a comment

INDIA FLAG LEH HNAMDANG PATHIAN LIM HAL TU LALRINAWMA ROPUI TAKA HMUAH A NI

India hnam puanzar leh hnamdang Pathian lim hal tute zing ami Lalrinawma(Awmtea) chu Vawiin tlai hian an khua Samlukhai ah an haw a. Sawiseltu leh hawtu tam tak karah an lo hmuak hluai.
Hlado nen, Khuallam nen lo hmuakin, an kalna turah Hnam puan lo phah bawk in ropui taka lo hmuah ani.

Aside | Posted on by | Tagged , , | Leave a comment

AR SA ZUAR FAPA CHAUH KAN THAWH VE by Thangkhuma T-a

FIFA UNDER 17 WORLD CUP @ India
October 6-28

Vaivakawn sa dawra ar sa zuar fapa, a nun pum football tana hlantu Lalengmawia’n Mizoram ai a awh a, ani bak kan nei zo lo.

Kan hotuten FIFA ropuizia leh UNO ai pawha member ngah a nih thu an sawi thin. A len em avang leh a hausak em avangin sum leh pai thlemnaah FIFA hotute meuh pawh an tawlhtlu fo va, hmingchhiatna nasa takin a tihminghliau chamchi.

Mahse, football mawina leh hlutna erawh tute emaw mi pamham leh hmasialte avanga chuai mai chi a ni lo.

FIFA tournament ropui ber World Cup bakah Under 20 World Cup leh Under 17 World Cup a awm (hmeichhia sawi tel lovin).

India-in kuminah Under 17 World Cup a thleng a, a thlengtu a nih avangin a tel ve thei. Football hnuaia World Cup hming pu hrim hrima India a tel hmasak ber a ni.

Tunhnaiah football ngaihhlutna Mizoramin football-ah hma a sawn a, hruaituten tha leh zung, rilru leh ngaihtuahna an seng nasa. Tun kum nga chhungin Mizo football-in India ramah hming a chher a, inelna kawng engkimah hlawhtlinna a chang a ni ber.

Kum kal ta maiah India rama kum bithliah inelnaah Mizoram a che tha em em bawk a, heng zingah hian Under 16 tournament pawh a tel.

Tunah India-in a vawi khat nan FIFA World Cup a khel dawn a, Under 17 inelna tur niin India aiawh tura thlan mi 21 zingah Mizo pakhat a tel.

He mi hi Mizo football tana mellung phuntu ropui zinga chhiar chi niin ka hria. Football hniamna India-in Under 17 FIFA World Cup khel tur player a thlan dan atangin Mizo rawltharte dinhmun dik tak eng emaw chen a lang thei.

India aiawhtute hi state pariat atanga koh an ni a, Sikkim leh Kerala ang bawkin Mizoramin pakhat a thawh ve a, Engmawia (Apuia) chauh Mizo zingah a tel phak.

Football ram zau leh hriat tur tam lutukah hian eng hi nge hlu a, eng hi nge ropui tih huai taka sawi ngam erawh a harsa.

Professional leh international inkar ringawt pawh thliar thiam har tak a ni ang. Sorkar tan erawh international aia hlu a awm thei lo va, football-ah chuan World Cup aia international tournament ropui a awm thei lo.

Aside | Posted on by | Tagged , | Leave a comment

CHAWNGTE HSS ZIRLAI SPORT LAI CHAKAM THALAITE NENA INTIHBUAI THU KAL ZELAH MSU HRUAITUTE THUBUAI SIAMSAK AN NI

Chawngte Higher Secondhary School Zirlai Sport lai Chakma thalai thenkhatte nena a intihbuaina kalzelah nimin 5, october, 2017 khan MSU Gen. Hqrs. hruaitute chu Vaivakawn Police Station-ah koh an ni a, thubuai awrhtir an ni.

MSU Gen. Hqrs. hruaitu Vaivakawn Police Station-a in report-te hi President Pu RB Lalmalsawma’n a hova, Aizawl City College Joint Students Union hruaitu ten an tawiawm bawk a, MSU hruaitute hi Station Officer Incharge Pu PB Singh leh a thawhpui ten an lo dawngsawng a. MSU hruaitu Office bearer 6 te chu IPC Section 448/342/427 leh IPC Section 506 thubuai awrh tir an ni.

Vaivakawn Police Station-a an inpek chungchangah MSU Gen. Hqrs chuan thuchhuah an siam a. Chawngte Higher Secondhary School Zirlai Sport lai Chakma thalai thenkhat ten an tih buaina chungchang kal zelah Chakma House LO an hmuhnaah bungraw thenkhat chhia a awm avang te niin thu dawn a ni.

MSU hruaitu te thubuai awrh hi bail a, chhuah theihna chi a nih angin nimin tlai vek khan buaina awm lovin bail a chhuah tir leh nghal vek an ni.

Aside | Posted on by | Tagged , , | Leave a comment

FLAG HAL CHUNGCHANGA KAN HRIAT LOH THILTE by Marina Boiha

Tun hnaiah kan mizo thalai thenkhatin flag an hal leh hindu idol an tihduhdah chungchangah Social Media tam taka Posts kan comment te thlirin, kan hriat loh avanga kan comment/thusawi, inhnialna tam takte a mawlmang hle niin a lang a. Hengte hi hriat belh i han tum teh ang.

India National Flag hian beiseina leh tumna (hopes & aspirations/ambition) a entir a, National Flag leh India Constitution hi a inzawm tlat a, țhenhran chi a ni lova. Kan hnam puanzar kan tihduhdah hian kan Constitution kan zah lova, dán chu kan diriam tihna a ni. Kan Constitution chuan sakhaw tin a zah a, flag hal/tihduhdah hian eng sakhua (kan Kristian sakhua ngei) pawh a zah lo tihna a ni daih a. The Prevention of Insult to National Honour Act, 1971 hmanga hrem tur an ni. (shall be punished with imprisonment for a term which may extend to three years, or with fine, or with both). Constitution chuan kan hnam puanzar midang mithmuh (public places) a, tum vang reng emaw thildang vang pawh nise, a hal, a hleh/zai thler, a tih hmelhem, a tih bawlhhlawh, a rap, hrual chhiat, a tih chhiat chuan hrem ngéi tur a ni. An hrem/tán (imprison) hun chhung hi kum 3 thleng pawhsei theih a ni a, pawisa chawitir emaw a pahnih hian hrem kawp theih a ni. Algeria ah chuan kum 5-10 hremna, Argentina kum 1-4 hremna leh jail tantir te an ni bawk. India flag tih hian puanzar, lehkha a print, puana inziak, lehkha them, thlalak/photograph, picture/milem, painting/paint chawp, hmuh theih a India Flag a nih hrim hrim chuan a huam vek. Flag zar dan tur, a size tur te, school leh govt building etc. a tar thei chinte, motor a tar thei chin te, tihduhdahna anga lang hrem dan turte ziah sa vek a ni a. National Flag mai bakah National Anthem etc. Ashoka Chakra, National song etc. hman dan engkim hi Constitution ah dah leh humhalh vek a ni. Hei hi Hindu tan bik a ni lova, eng sakhua, eng hnam, eng chi, India khua leh tui tan chuan kan zawm ngei ngei tur a ni.

Tin , hetianga tih hi Mizoram State tan a mualphothlakzia mi pangngai chin chuan kan hrethiam vek awm e. Tin, sakhaw dang ngaihdan turah Kristian sakhua rawvazia leh midang a thliar hran (discriminate) bikzia anga lantirna a ni daih. Kristiante tan a pawi em em bawk a ni. Hetiangte chuan sakhaw dang Kristianah kan hruai lut lo deuh deuh dawn a ni. Indian History ah pawh hetiang thil thleng hi chu a tam lem lo hle a. Hman deuh khan Nagaland mi hetianga national flag hal ni áwma sawi an awm a, mahse Nagaland chuan an pha nasa hle, a zahthlakzia an ram mipuiin an hria a, kha nula, a haltu Nagaland mi anga inchhal kha an haw hle zawk a ni. (Hetah hian i chhiar duh chuan: http://www.newindianexpress.com/nation/2017/aug/24/girl-burns-tricolour-in-video-seeking-pakistans-help-for-naga-sovereignty-1647774.html).

Tin, Tamil Nadu, Chennai tlangval/ thalai hetiang case-a lâr hi a awm tawh bawk. ( https://www.thequint.com/news/hot-news/he-burnt-the-indian-flag-to-make-a-statement-tn-youths-lawyer OR http://www.ibtimes.co.uk/indian-police-hunt-chennai-youth-who-burnt-national-flag-posted-picture-facebook-1541194 )

A tawp bera ka sawi lan tel duh chu, Sakhuana leh politics approach dan dik lo hian mi a ti mawl thei hle a. A bikin Mizo hrim hrim, țhalai social media hmang nasate hian inchhiar zau, zir belh, dân hriat, thil kal tawh (history/experience awm tawh) hriat tam kan mamawh. Kristianna hi darh zau zel kan duh chuan midang bulah kan nelawm (friendly) tur a ni, intih mûk, intih mitak te hi ROPUINA EMAW kan ti daih zawk a. Rawngbawlna leh midangte rawng kan bawlsak kawngah pawh hian inzir belh tur Kohhran, NGO ang zawng pawhin kan ngah hle mai. Tin, a bikin thlarau lam thilah pawh THLARAU BOTE kan hmangaih a nih pawhin KOHHRAN HRUL/HUANG A RAWNGBAWL hi a him ber.

Pawl/Kohhranah pawh a dik lo ho hi an chhuak tau a, a hrana thil tihkháwm an huaihawt a, hruaitu an sawisel mai țhin. Kohhran approved loh rawngbawlna péng huaihawt, ho hran neih ching (a bikin sakhuanaah, kan mizoram kristianaah)hetiang hrát ching reng reng hi an kal sual tlangpui țhin. Chuvangin Kohhran chhuahsan reng reng ti fuh an awm ngai lo.

Chhiar zau duh tan: https://en.wikipedia.org/wiki/Prevention_of_Insults_to_National_Honour_Act,_1971
https://www.vakilno1.com/bareacts/laws/prevention-of-insults-to-national-honour-amendment-act-2005.html

https://en.wikisource.org/wiki/Flag_Code_of_India

Aside | Posted on by | Tagged , | Leave a comment

CHAWNSELA By Duata Chhakchhuak

(Kan Mizo thawnthu a ngaihawm ka tih berte zing a mi Chawnsela thawnthu hi i han sawi ve leh teh ang.)

Hmanlaiin pasaltha huaisen leh phawk tak mai, Chawnsela hi a awm a, Chhakchhuak hualngo hnam a ni a( ka hnam pui ani tihna nih chu. Hehe) Seipui khuaa an awm lai atanga lo lar tan a ni a, mi danglam tak leh mi tih loh anga thil tih châk tlat mi a ni.

Upa ten thil tha lo leh thiang lo nia an ngaihte hi a tih châk zawng tak niin a duhzawngah chuan zah pawh hre lovin pawisak nei mang lova ti mai thin a ni.
Thingnawi fawm rual vel a nihin vawikhat chu a hritlang a, a nu-in a awm a, a pa erawh chu lovah a feh a. A dam lo chu a thi der ta a. A thi tak tak emaw an ti a, a nu chu lungchhe takin a trap a trap a, a pa feh pawh chu zualko in an kova, hmanhmawh takin a lo hawng a, an in kawt atrangin,”Chawnsel, ka neih chhun, ka fapa” tiin tah hla a rawn chham lut a. Chawnsela ruang(der) bulah chuan thru in,”Ka fapa, ka fapa neihchhun, ka au ruai ruai che a sin. Aw, ka auh che hi i rawn hre thei tawh lo maw. . .?” tiin a trap zel a. Chu veleh Chawnsela thi der chuan,”Hre thei viai viai e” tiin a pa trap chu a lo chhang a. A thi der tih an hriat chuan a then an nuih a za a, a then an thin a ur a, mi lo pungkhawmte pawh chu an haw darh zo ta a.
A lo tlangval a, amah ang tak thian Chawipohva a nei a. An pahnih chuan an inkawp rawt a, an nung duhdah hle mai thin a. An khuate chuan Chawnsela leh Chawipohva ninhlei leh chimawm zia chu an sawi huai huai reng mai a.

Vawikhat chu an thiandun chuan hmeithai pakhat inah an leng dun a, ninhlei miah lo leh mi aia danglam chuang miah lovin an leng trum tla a. A tuk zanah pawh chuan pangngai takin an leng tlingtla leh a, an lenna hmeithai nu pawhin,”Mite’n an sawi ang hi an lo nih loh hi!” tiin a fak hial a. Nimahsela, a zan thum zan chuan rei fahran mai an leng a, hmeithai nu chu a mut a lo chhuak a, tui takin a muthilh san ta a. An thian dun chuan a muhil chu a khum dâp nen an trawn bet a, khum phakrak chu an paih then a, khumah chuan dâp hnuai lamah trawn bet chungin an muttir a, an hawsan ta a. An haw hnu chuan hmeithai nu chu a rawn harh a, a awmdan chu a hrethiam lova, a mangang ta hle mai a,”Thenawmte u, khawiah nge ka awm?” tiin a au a au mai a, a thenawmte’n an hre si lova, a au tlaivar ta der a.
Chawnsela chuan,”Chhuah ka kham thei ang” a ti thin a, mite chuan,” I thi emaw a nih ngawt loh chuan a pâwng apui chuan i kham thei lovang” an ti a, chhuah kham tralh chu a tum ta a. Tuk khat chu khawvar rualin feh turin a chhuak a, feh kawngah chuan sakei hnu a siam a, a hnâr a chum thî a, kawngah chuan a thi chu a far tir teuh va. A kawr hak lai a pawt thler a, a them thenkhat chu kawngah chuan a dah a. Kawng thlangah chuan sa-in a thil seh a hnuhna niawm tak hian a siam a. Thlawhbawk piahah chuan a kal zel a, kham pûk pakhatah a tawm ta a.

Tukthuan eikhamah chuan khaw-mite chu feh turin an lo kal hlawm a. Feh kal hmasate chuan sakei hnû te leh thi far leh kawr them te chu an va hmu a, chulai hmunah chuan feh an innghak khawm hi a ni ta ngawt mai a. Sakeiin mihring a seh ni ngeiin an ring a, an haw leh vek a. Tlang an auva, kim lo an inzawng a, Chawnsela chu a lo awm ta lova. Zinga a fehtur kal chu sakeiin a lo seh ni ngeiin an ring a, a khuain a hnu chhui tur chuan an chhuak ta a.
Mi tin mai chuan thal leh feipui leh an hmanraw neih ang ang te an keng theuh va, mipui hnung lamah chuan Chawnsela ní chu trap chungin a lo kal ve a. Chawnsela chuan a nî trap ri leh mi dang trawng ri te chu a hre pha vek a, a hnu chhuitu hmahruaite chuan a tawmna kham puk chu an thleng tran a. Chutih lai chuan Chawnsela chuan a lu(head) chu pûk chhungah a rawlh a, a ke chu a leng bat bat a. A chhuitute chuan a ke che chu an hmu a, an zinga Pawih pakhat chuan kah mai a tum a. Chawnsela chuan chu Pawih pa chuan a kap tak tak ang tih a hlau a,”Pawiha, min rawn kap tak reu reu ang e” a ti a, a lo ding chhuak ta a.
A thiltih awm lo tak avang chuan an hau luai luai mai a, mahse Chawnsela chuan,”Kha maw, chhuah ka kham thei ang ka ti a, in awih lo vei a” a tih san ta mai a. Chhuah chu a kham ta reng a, an vai chuan an haw leh ta a. Chawnsela chuan a hnu an chhui lai khan a nî trap kha a lo hre khiau mai si a, haw kawngah chuan,”Ka nî hian min lo lainat ber a ni” a ti a, chhum lo chat lovin,”Ka nî, ka nî” a ti a ti ta reng mai a. A nî chuan,”Chawnsela tak hi chu aw, mi mitmei venna chang pawh hi i hre hek lo” a ti a, “Ka nî, a nih leh i mitmei ka veng ang e” a ti a, a kutin a nî mit chu a zap leh ta chhen mai a, a ninawm zual ta mah zawk a.

Vawikhat cuh Chawnsela chuan,”Nauteah ka chang anga, nau awmdan pangngaia nilenga min awm thei chu ka sepui ka pe ang” a ti a. Pawih thian dun hian sepui chu an awt em em a, Chawnsela chu nau awm anga awm chu an tum ta a. Chawnsela chu nauteah a chang der ta a, zinglamah chuan a tlei viau a’ a tla mual mual mai a. Chhuatlaiah chuan eng emaw khalin a bawkvak a, a chang leh a mawngtawlh a, pawih thian dun chuan an thut chilh khar mai a, awm nuam dawn hlein an hria a.
Ni a lo tlangsang zel a, a mut a lo chhuak ta a, an inpuak chhawk zar zar a, a muthilh chian hnu chuan khumah an muttir a, an veng ta a. A mut a tui viau va,a awm tute chu an lawm hle a. A l6 harh chuan a lo chhun lai ta bawk a, chaw leh artui chhum an eitir a, a chawei puar chu a tlei leh ta viau a, pawih thiandun chuan,”Ni lai a chawhnu lam viau tawh a, a sepui chu kan hlawh zo ngei dawn e” an ti a, hlim takin an titi zui san zel a.
An ngaihsak mang loh lai chuan Chawnsela chu a lo e ta treuh mai a, a ek chu a lo sawisa a. A taksa pum thaw chuan a lo intat berh vek mai a, a kaahte chuan a inbarh a, a zun nen a chawhfin a, a bêng thlawrh2 a. A awm tuten an han thianfai tur chu Chawnsela chuan pakhat zawk chu a bânah a vuan a,a taksa rem chang lai laiah chuan a tat pherh a, ani ten chuan uak thuai thuai pahin, a thianpa hnenah,”Thriana, i duh leh oangmahin hru fai la, a sepui chu pumbilh mai rawh” a ti a, a hawsan ta a.
A thrianpa chuan Chawnsela khawsak dan chu ten hle mahsela, mahni chauhva sepui neih chu a duh si a, nî(sun) chu a tla teuh tawh si a, han beih leh hram a, hlawh chhuah zawh mai a inring a. Chawnsela hmai leh kutte chu hmawlhin a ziat fai a, hmawlh dang a lak hlanin a tenawm thei ang berin ek chu a lo sawisa zui a, aawmtupain rawn thenfai a tum te chu a lo ban a, a remchang lai laiah a lo tat bawk a. Atawpah zawng a chil a chiak pharh pharh a, a tlansan ve ta a. Sepui chu an hlawh zo ta lova

Chawnsela chuan pi leh pu chena puithu taka thil an lo serh chi te hi a pawi tak tak emaw tih finfiaha tihluih chhin zel a duh a. Serh leh sang tam lutuk te chu hnawk a ti a, apáwng apuia eng emaw hlek an serh thin te chu a duh lova, tihreh a duh a.
Bûng zara hauhuk lema chan a, ban kual vel te hi pi leh pute chuan an duh lova,’a titu chungah thil tha lo tak a thleng duh e’ an ti a, fiah a duh ta a. Vawi khat chu an khaw kawtchhuaha bûng zarah hian a lawn a, hauhuk lemah te a chang a, a hualreu a, a sawt kual a. Mite chuan a chungah thil tha lo tak a thlen an hlauhpui hle a, ngaihbel tur engmah phei chu a thleng hlei lova.
Vawikhat leh chu,”Van ek khum ka tum e” a ti a, a ê ta tak tak a, a fimkhur tawk lo bawk nen, a ek te chu a ei ti tihin, a inzun khum ta pheng phung a. Ek leh zun nen a inchiah ta pur mai a,”E khai, van ek khum tum chu a tha love an tih chu chawplehchilhin a thleng mai a lawm” a tih phah hial a.

Pi leh puten an zah em em leh a hming pawha an koh ngam loh,bengtawia/hniakliana/sapui ti te a an sawi mai thin(Hnam thenkhat phei chuan sakei hi an thlahtu/siamtu ang ah an ngai hial)sakei hian dik lo taka sawisatu chu a chhuah lovin an hria a.a ek ro vaibelah benga zuk pawh amah tihnawmnah naah leh chonaah an ngai a,sakei cho chu a seh duh an tih avangin thiang lovah an ngai a ni.
Chawnsela chuan sakei ek ro vaibelah benga zuk chu pawiin a hre lova,fiah a tum ta a. Sakei ek ro ala a, vaibelah bengin a zu a, a hnu deuhvai a farnu sakeiin a seh ta a. A pawizia a hre zui ta a ni.
Lasi lu lem siam chawp a, làm hi pipute chuan an duh lova. Lasi hi ramhuai chikhat an ni a, mihring tana trangkai tak niin, pipute chuan a biak pawh an be hial thin a. Lasi zawlte pawh an awm bawk thin.

Lasi chu tihlungawi an tum a, ti lungni lo zawnga khawsak an hreh em em a. Chutih lai chuan, Chawnsela chuan upa te thil serh chu pal zam a duh a. Vawikhat chu lasi lu lem a siam a, a làm ta chiam mai a. Chumi hnu deuhah chuao a fapa a thi a, lasi lu lem siama a làm vangah an ngai a ni.
Upa thilserh thenkhat a fiah hnu chuan a pawina a hre zel a. Upa thilserh finfiah a tum zel chu a fa te hnenah,”Van ek khum a pawi rang ber a,ka kâah ek chu a lo tla lut nghal a, ek ei kan ni mai. Lasi lu lem siama làm pawh a pawi rang hle,zan thum naah ka fapa a thi nghal a. Sakei ek ro vaibela zuk pawh thil tha lo tak a ni, thla khat ral hmain ka farnu sakeiin a seh bawk a ni. Thrangthar tumahin rawn ching ve tawh suh se” tiin thuro a chhiah nghe nghe a ni.

Aside | Posted on by | Tagged , | Leave a comment

HRANGHLUI ZAITHIAM LALLIANMAWIA PACHUAU PIANTHAR DAN LEH PIANTHAR HNUA A FAKNA HLA PHUAHTE

Lallianmawia Pachuau kha tet te atanga nu leh pa, Pathian tih tlattu thlazar hnuaiah Pathian thua chawm len niin, a nu leh pa-ten Bible-a mi ropuite chanchin an hrilh thin a. Chung vangte pawh chu a ni mahna, khatia Zoram khawvel dung leh vanga nasa taka a lar em em lai pawh khan Pathian lama tuihal rukna kha a nei reng thin a ni.

ITC, Hnahthial-a a training laiin; zan khat chu a mumangah a nu âw ngei nia a hriat chuan, “Mawite, i thianpa Laltana dam lai khan ‘Pathian thu ka awih ve tawh ang,’ kha i ti si a. Mahse, i la awih duh chuang si lo va, thil tha hi ti phawt mai rawh,” a rawn ti niin a hria a. Hemi hnu atang phei hi chuan a thiam ang angin Pathian thu chu a ngaihtuah nasa lehzual ta a, hahchawlhna tak tak a hmu thei si lo. “Leilung pian hmain Pathianin engtin nge ro a rel” tih thu hian a rilru a tibuai hle mai thin a. A tawpah a mangang chuan a pa chu a buaina chu a zuk hrilh ta ringawt mai a. A pa chuan a hrilhfiahna chu tum hnih ngawt a thawn nghe nghe a ni. Hemi hnu hian piantharna tak tak chu a chang chho ta a, a Pathian lehkhabu thianghlim leh Kristian hlabu-ah chuan hetiang hian a ziak a, “Isua nena intawh ni Nov. 23, 1986 (7:15pm) tiin. Chutia piantharna a lo chan takah chuan chutih laia Pastor, Pu Khawpuimawia (Thingsai khua), Pro. Pastor Pu Biaksanga (Hnahthial) leh Pu Lalhmuaka, Headmaster, Hnahthial High School-te chu a lawmpui nasa ber bertute an ni.

Love Song phuah leh sa-in hun lo hmang nasa hle tawh mah se, a pianthar atanga a boral thleng khan mipui hmaa love song a sak leh hriat a ni lo va. Tin, a pianthar hnu hian Pathian hla cassette siam a rilruk nghal a. Chutianga Pathian hla cassette siam tura ruahmanna a neih lai mek chuan kum 1987, May ni 18 chuan kum 24 mi chauh niin mual min lo liamsan ta a ni.

Eddy Zosangliana Colney-in “Lallianmawia Pachuau” tih lehkhabu a ziah atanga a Pathian hla phuah kan hmuh theihte chu –

1. AMAN ENGKIMAH MIN HRIA
“Aman engkimah min hria” tih hi kum 1986 November ni 23-a a phuah a ni a. Radio-ah a boral hma ni thum lian ta, May ni 15 khan a khung a. He hla hi a Pathian hla phuah hmasak ber pawl ami a ni. Tin, a piangthar tih an hriat khan Peniel Kohhran, Hnahthial chuan testimony sawi tur leh zai turin an sawm nghal a. He hla “Aman engkimah min hria” tih hi a sa a, hei hi he hla, mipui hmaa a sak chhuahna hmasa ber a ni.

Pathianin kan awm dan zawng zawng min hriat chianzia te, hnung lam leh hma lama min hual thinziate a hmu chiang em em a. A hnen ata kal bo theih a nih lohziate leh van leh khawvela thil awm zawng zawngte hi ama kutchhuak leh ama siam vek a nih avangin Pathian tan ramri khamin awmzi a neih ve lohzia a sawina a ni a. Kan ngaihtuahna tha lo leh rilru tha lo kan neih zawng zawngte kan tihpuitlin loh nan Pathian chu auvin, “Nangman engkimah min hria e,” a ti a ni.

2. HMANGAIHNA KA SAWI THIAM LO
He hla pawh hi kum 1986, November ni 23-a a pianthar hnua a phuah a ni a. Radio-ah a record.

A sual tam tak ngaidamtu Pathian chuan a sil fai thu leh a tihthianghlim tak thu a’n hriat chuan a lawm em em a. Pathianin min tlanna thukzia leh hlutziate a ngaihtuah a, “Lawm lo thei reng ka ni lo, tlanna hlu ka ngaihtuahin,” a ti thlawt mai a ni. Kan boral phal lova thi khawp hiala min tlanna te, chu min tlanna avanga kan thu thua awm thei kan nih tawh lohziate a hria a. Tin, zahpui lova A Chanchin Tha a puan tawh dawn thu a phuahna a ni a. Hla tha tak leh thluk mawi em em mai a ni.

3. I KAL ZEL ANG
Hei pawh hi a pianthar hnua a phuah a ni a. radio-ah a record.
Khawvela kan awm chhungin ringtute chu inthlahdaha chawl mai mai hman kan nih loh thu min hrilh a. Eng anga buaina leh harsatna nasa pawh tawk mah ila, zam mai lova ropuia ngamtu, kan Lal Isua lam chu en tlat tur kan nih thu min hrilh a. Tin, khawngaihna kawng hawn a nih laia inbuatsaih a, Pathian lam hawi tura min fuihna hla a ni a. Heng kan buaina leh harsatna zawng zawngte hi nakinah chuan van lam hawiin kan la lênsan veng veng mai dawn a ni.

4. I TAN KA INPUMPEK
A pianthar hnuchuan a tunhma nunte a chhui kir fo thin a. Pathian tana a lo inpek tawk lohziate hriain Pathian hnenah thupha chawi nan leh khawvel thilte chu kalsan a, A tana a inpek thu a puan chhuahnan he hla hi a phuah ta a ni. Radio-ah a record nghe nghe.

5. KEIMAHAH LALPAN A NGAM TA
He hla hi a pianthar tirh lam kum 1987, January ni 3-a a phuah a ni a. Khatiang khawpa mi lar, mite ngaihsan leh duh rawn kha a’n pianthar takah chuan thlemna chi hrang hrang tawkin a nun hlui lama kir leh turin sual chuan nasa takin a bei thin a. Do hneh pawh har a ti hle thin a, mahse Lalpa chakna chuan chung a harsatnate chu a hnehsak zel thu a au chhuahpuina hla a ni.
“Aman engkimah min hria,” “Hmangaihna ka sawi thiam lo,” “I kal zel ang” tih leh “I tan ka inpumpek e” tihte hi a boral hma ni thum, May ni 15 kum 1987 khan Radio-ah a record a. A boral hnu, May ni 25 kum 1987, zing dar 7:05 khan heng a hla pali record-te hi tihchhuah a ni a. Amah chuan a ngaithla ve hman ta lo.

“Aman engkimah min hria” tih leh “I kal zel ang” tihte hi vawiin thlenga kan la sak lar em emte a ni a. “I kal zel ang” tih phei chu tunlai harhna boruak thlengah hian kohhranin kan sak nasat pawl a ni awm e. Keini kohhranah pawh kan sa nasa a, thalai an lam hut hut a. He hla hi Pathianin a hmang em em a, Lallianmawia Pachuau-in Pathian hla tha tak tak min hnutchhiah hi kan vannei hle a ni.

Aryan Ngurte.”MZN”
(Mizo Zaithiamte News)
Source-Mami Hnamte

Aside | Posted on by | Tagged , | Leave a comment

TRIPURA-AH ‘TRIPURA MIZO SUMMIT’ AN NEI by VL Lawma Hnamte

Nimin (5.10.2017) khan Vanghmun YMA Hall, Jampui Tripura-ah Mizo Convention (MC) leh Young Mizo Association (Tripura Group) huaihawtin a vawi khatna atan ‘Tripura Mizo Summit’ neih a ni. He hunah hian hmun hrang hranga Tripura Mizo-te an pungkhawm a, tlai lamah ruai an theh nghal a ni.

He hunah hian Robert Romawia Royte leh Sailiana Sailo IAS (Rtd) chuan keynote address an pe a, Lalfaktlinga Hrangchal, Tripura Civil Service chuan Career Guidance chungchang a sawi a. Hun then hnihnaah Dr. Zairemthiama Pachuau, Hillcrest Medical Center, Behliangchhip, Jampui neitu, Chikankata Hospital (Zambia) leh Howard Hospital (Zimbabwe)-a Chief Medical Officer lo ni tawh chuan Drug Addiction & HIV/AIDS tih thu a sawi a. Richard L. Zongte, TCS-in Economics chungchang sawiin Dustin Lalkulhpuia, MZU Scholar chuan Khawtlang nun siamthat chungchang a sawi bawk.
Vanghmun khuaa neih Tripura Mizo Summit-ah hian Kuki, Halam, Lushai, Hmar, Molsom, Ranglong, Darlong leh Tripura-a Zohnahthlak hrang hrang an pungkhawm a ni.

Aside | Posted on by | Tagged , | Leave a comment