Republic day boycott tlang dawn.

Home Minister Pu Lalchamliana chuan vawiin khan NGO Co-ordination Commitee chu kokhawmin Citizenship Amendment Bill duh lohna avanga Republic Day Boycott an tum chu thulh turin a ngen a, a ngenna ti hlawhtling lovin NGO Coordination Committee chuan boycott kaltlang pui an tum tih an sawi a ni.

Meeting ah hian Home Minister chuan Citizenship Amendment Bill duh loh chungchangah Party-te leh NGO te an inlungrual thu a sawi a, hetih rual hian mipui nawlpuiin Republic Day boycott an tum hi thlawp mahse Governor te leh sorkar hnathawkte chu Constitution hnuaia dan zawm tur nei an nih avangin NGO Co-Ordination Commitee in Republic Day Boycott a tum chu ngaihtuah nawn leh turin a ngen a, mipui nawlpui tel lova Republic Day hman a ngaih dawn tho avangin ngaihtuah nawn turin a ti a ni.

He hunah hian Home Secretary Pu Lalnunmawia Chuaungo chuan Citizenship Amendment Bill chu Mizoram Legislative Assembly 2018 June a neihah Party leh MLA zawng zawng ten he bill duh loh thu hi a lo pass tawh thu leh mipuite’n an duh lohna Resolution pawh August ni 1 khan Central sawrkar ah thehluh anih tawh thu sawiin, Mizoram sawrkar chuan he bill kaltlangpui anih loh nan theihtawp an chhuah thu a sawi.

NGO Co-ordination Committee Chairman Pu Vanlalruata chuan Republic Day boycott an duh chhan sawiin, kum 2017-a he bill zirtu tura ruat JPC ah thlen a nih tawh thu leh tun hnaiah pawh Prime Minister leh Home Minister hnena an thlen tawh hnuah sut tumna a awm loh avangin Central Sorkar chuan Mizo te aw an ngaihthlak a an ha tih zat ngei thaa an hriat tawh avanga Boycott hi ruahman ta an nih thu a sawi a, Mizoram sorkar in he boycott hi sut leh tura an ngenna chu zahawm hle mahse NGO Co-ordination Committee chuan kal tlangpui a tum tih Pu Vanlalruata chuan kan corr a hrilh a ni.
He meeting Secretariat-a neihah hian NGO Co-Ordination Commitee bakah Home.addl Secretary Pu Lalbiakzama, DIG Lalbiakthanga Pachuau, Aizawl DC aiawh leh Official dangte an tel a ni.

Aside | Posted on by | Tagged , , | Leave a comment

Serchhip ah hnam chhan kawngzawh neih a ni dawn

Ni 23/01/2019 (Nilaini) zing dar 10:00 a țan turin Citizenship Amendment Bill, 2016 dodalna kawngzawh (Hnam chhan kawngzawh) neih ani dawn a, he hunah hian Serchhip mipui zawng zawng kan ram, kan hnam, kan sakhua humhalh a chhan turin kawngzawhna a tel tur hian kan in sawmin kan in ngen tak meuh meuh ani. Kawngzawh hi Serchhip AOC veng ațanga zing dar 10:00 a bul țanin Serchhip Bazar thleng zawh tur ani.

Sd/-
Laltlanmawia
Secretary
MZP Hqrs. Serchhip

Aside | Posted on by | Leave a comment

Hnamchhanna kawngzawh neih a ni dawn

HNAM CHHANNA KAWNG ZAWH

Ni 23. 01.2019 (Nilaini) Dar 11:00 Am hian CAB duhloh lantir nan Hnam chhanna kawngzawh neih tur a ni a.

KHATLA TO VANAPA HALL KAWNG ZAWH TUR TE

  1. Aizawl East High School Armed Veng
  2. Govt Bethlehem Vengthlang High School
  3. Central HS and Hss College Veng
  4. Govt Comprehensive model
  5. JL HS and HSS
  6. Govt Mamawii HS and HSS
  7. Mice HS and HSS
  8. Brighter HSS
  9. Goodwill Foundation HS
  10. St paul HS and Hss
  11. springfield HS and Hss
  12. New hope Academy
  13. Tiny Tots
  14. Oasis school
  15. Pine Mount HSS
  16. Rev Saiaithanga Momerial school
  17. Saviour School
  18. Boston HSS
  19. Hightlander HSS
  20. LR HSS
  21. Zabanga HSS
  22. Synod HS AND HSS
  23. PG HS
  24. ITI veng HS
  25. OIKOS HS and HSS

ZARKAWT TO VANAPA HALL KAWNG ZAWH TUR TE

  1. Aizawl East High School
  2. Govt Bawngkawn HS
  3. Govt Chaltlang HS and HSS
  4. Dinthlar HS
  5. Hrangchhuana HS
  6. Govt KM HS and Hss
  7. Govt KVM HS
  8. GOVT mizo Hs and Hss
  9. Govt Republic HS and HSS
  10. Govt Tinzagina HS
  11. Helenlory HS and HSS
  12. Modern HS
  13. Aizawl North Hs
  14. Ramhlun South Hs
  15. ramhlun Vengthar Hs
  16. Rosebud School
  17. St Joseph HS and HSS
  18. St memorial HS and HSS
  19. Zemabawk North HS
  20. Vaivakawn HS
  21. AR ELL school
  22. Blue Star Academy
  23. Centenary school
  24. Children Guidance school
  25. Greenland school HS and HSS
  26. little Kingdom
  27. Mount Carmel HS and Hss
  28. Govt Zemabawl HSS
  29. Fair Heven Hs and Hss
  30. KV multipurpose Hs and Hss
  31. Providence Hs and Hss
  32. JC English Academy

Khatla lam aṭanga kawng zawh turte:

  1. Govt Johnson College,
  2. Govt Aizawl College,
  3. Pachhunga University College,
  4. Govt. T. Romana College
  5. MZU
  6. HSA MSO, TKSU, RSU

Zarkawt lam aṭanga kawngzawh turte:

  1. Govt.J.Thankima College
  2. Womens Polytechnic Aizawl
  3. Govt Aizawl North College
  4. Govt Hrangbana College
  5. Govt Aizawl West College,
  6. Mizoram Law College
    7.. Govt Zirtiri Residential Science College
  7. LSA, PZP SSPP, MBSA .

NOTE: He kawng zawhna a tel tur hian MZP chuan School zawng zawng a sawm vek a, School a sawmna lehkha hmu lo te pawh, he kawng zawh ah hian tel vek tur a beisei kan ni. School list kan siam a School hming langlo te pawh mahni remchan dan a, kawng zawh na pan mai tur in kan in hriattir a ni.

Tin, Hnam chhanna kawng zawh a tel tur hian MZP chuan Zo hnam hmangaih tu zawng zawng te kan hnam chhan nana mahni hna tul kalsan a lo pen chhuak vek turin a sawm che u ni.

Issue by:
MZP General Headquarters, Aizawl

Aside | Posted on by | Leave a comment

Colloseum chanchin

KRISTIAN TE SAWISAK NA HMUN HMINGTHANG CHANCHIN TAWI.

By HRIATA KHIANGTE.

ᅠ ᅠRome lal hunlai a hmun hmingthang leh lar em em Colosseum, Flavian Amphitheatre ti a an koh bawk tun thleng a zin vei vak mi te hip tu chan chin hi tun tum chu chhui chianna nei dawn teh ang.

Engtika sak nge? Tu sak nge?

AD 70-72 inkar vel khan Colosseum hi Vespasian a lalna leh thuneihna hnuai a sak tan a ni a. Hetih hun lai hi Jerusalem a Juda te temple an va suasam chiam hnu kha a ni. A thut hmun hi hmun hniam zawl zau lai Caelian, Esquilian leh Palatine Hills inkara awm a ni. Kum zabi 2 na, BC hun lai khan helai hmun hi ngaw pik tak leh chenna hmun atan a hman a ni a. AD 64 khan Nero chuan a chenna hmun atan hual in a mei nasa tak hmang a hal in a suasam chiam a nih kha. A film ah pawh khan kan hmu theuh awm e. Hleihluak takin Domous Aurea chu a dil siam chawp kam vel ah chuan a sa a, heng bakah hian Pavilion, huan leh bathlar te chu a siam tel bawk a ni.

Vespasian.

Vespasian hian AD 80 khan a rokhawm tu/a aiawhtu lal Titus nen an sa zova. AD 81-90 khan lal Domitian chuan siam that ngai la te siam tha in a thawm tha zel bawk a. Anni pathum inkawp lal hming hi Flavian Dynasty tih a ni. He ennawm chhuahna hmun hawngtu hi TItus niin a hawn atanga ni 100 chhung chu infiamna hrang hrang he lai hmun ah hian neih a ni.

Eng atan nge an hman thin?
Colosseum hi Rome lal hun lai a ennawm chhuahna hmun a ni a. He hmun ah hian Gladiator te chu an in beih tir thin a,sum tam tak lakluh nan an hmang a, tin an sal man te leh ramsa kawlh tak tak te an in beih tir thin bawk a. Drama chan nan te, leh thil tih pawimawh ah mipui pun khawmna atana an hman ber leh a hun lai chuan ennawm chhuahna hmun lian ber a ni. Gladiator te inbeihna ah hian sum leng vak vel a tam in an in thap nasa thin hle a ni.

He ennawm chhuahna ah hian Kristian tam tak te thisen a luang a,nunna tam tak lak a ni bawk thin a ni. Mi tam tak chuan he hmun hi Kristian te Martarna hmun ah an sawi thin bawk a ni. He lai hmun a Kristian martar hmasa ber chu Saint Ignatius a ni a. Ignatius hi Antiokei Bishop niin AD 107 na ah khan Rome lal Trajan chuan Kristanna hlip a Rome pathian Pagan chu be turin a ti a, a biak duh loh chuan a thih tur thu in Trajan hian vau mahse Ignatius hian hian thih a thlang zawk a. Trajan chuan he lai hmun a Kristian martar hmasa ber ni turin sakawlh chu a seh hlum tir ta a ni. A ruang hlawm tur awm lo khawp in sakawlh hian a taksa leh ruh te chu a ei zo hneh hle mai a , a ruk in a ruh them te chu Antiokei ah thawn a ni.

He lai hmun a Martar zinga lar leh chu Saint Telemachus a ni a. Egypt ram a puithiam niin, Rome ah hian a zin a. Telemachus hi Gladiator hmang ennawm chhuah na leh Colesseum chhunga thil tenawm leh rapthlak tak tak an chhuah thin te ti tawp tura mi pawimawh tak pakhat a ni a. Gladiator te inbeihna hmanga ennawm an chhuah mek lai chuan Colesseum ah hian lut in ti tawp turin ring takin a au a. Mahse lung a denhlum turin amah chu an man phah ta zawk a ni.
Chutianga an denhlum tak hnu chuan lal Honorius chuan Gladiator hmang a ennawm chhuah leh inbeihna tih tawp a nih thu chu a chhuah zui ve ta nghal a ni.

Hetianga Christian te tihduhdah a,nghaisak hi lal Nero chin chhuah a ni a. Helai hmun hi Kristian te tih duhdah na hmun leh suatna hmun ni mahse Kristiante nen inzawmna thuk tak nei a ni a. Helai hmunah hian Kristian te chu khenbeh te, lunga den hlum te, sakawlh seh tir te avangin tam tak an thi a, ramsa ang mai a mipui tam tak hma a chei bawl an lo ni tawh thin.Tunah phei chuan helai hmun ah hian Kristian martar te hriatrengna turin Kraws an phun tawh nghe nghe a. An Kraws phunna lai chu an lal ten thut nan a an lo hman na thin ah a ni.

Engtiang chiah a lian nge? Enge an hman?

Tunlai Football club lar leh lian tak tak te zingah hian an stadium a mipui singriat(80000) len lohna hi tam tak a awm a. Chung ho ai chuan Colesseum hi ala lian zawk fe a. Mipui Singnga atanga singriat thleng in an leng thei a.
Lung ringawt pawh Cubic meter 10000(Cubic feet 3,531,467) an hmang a, char lovin an kilh khawm a,an kilhna perek ringawt pawh hi ton 300 lai a ni. A thut hmun zau zawng hi 24,000 Square meters(6 Acres) a ni a, a pawn bang lam san zawng hi meter 48(Ft 157) a ni bawk. A mual zawl lai tak zau zawng hi meter 87 a thui, meter 55 a zau a ni a,bang mater 5 a sang te a awm thluah bawk a ni. A luhna ringawt pawh chhuat zawl chin ah hian 80 lai a awm a chung zinga 76 te chu a entu mipui te tan a dah a ni.Lirnghing in a sawichhiat tum khan heng an luhna leh chhuahna kawngka te chu a chhe nual tawh a. Colosseum chhim tawp leh hmar tawp ah hian mi bik te thutna tur an dah bawk a. Enna tur atana hmun tha leh rem ber leh mipui te chim phak loh a awmna a nih avangin helai hmun a thu pha chin te chu mi bik tak an ni tlangpui.

A sak nan enge an hman a, engzat chiah nge thawk?
A bang atan brick an hmang a. A thutphah atan leh bang atan Tiles an hmanga, Cement hi a cheimawi nan an hmanga, a sakna lung ber hi Travertine Limestone a ni a, he lung an lakna hi Tivoli khua a Quarry ami Rome atanga mel 20 lai a hla a ni. Tin, he lung hi mi lim siam nan, a bang pawn lam siam nan leh chhuatzawl a awm a chhawng hnuai ho siam nan an hmang a. Marble an hmang bawk a,marble hi Colosseum chhunga milim cheimawi nan leh ban tenau zawk siam nan te, tui hna in tura an lakluh dahna khur cheimawi nan leh a bang pawn lam chei nan an hmang bawk a ni. Lead leh Terra cotta hi tui lak nan leh sewer system atan an hmang bawk. He ennawmna hi Rome a sal an lei luh mi nuai chuang zet ten an sak a ni a.Heng sal te hi Juda te indona a chhuah hnu a sal a hralh tura an man khawm te an ni. A then in Quarry ah an thawk a, a then chu bungraw thiar in an chhawr a, a then chu a chhunga thawktu an ni bawk a. Heng sal te hi chin tawk awm lovin lal Vespasian hian a chhawr hmiah hmiah mai a. A design leh engkim mai hi Roman architech, arts leh engineer ten an thiamna sang tak hmanga an sak a ni. An sakna a an senso zawng zawng hi chhut ngaihna a awm tawh lo niin mithiam te chuan an sawi a. Chutih rual chuan Titus in Jerusalem ava run tum khan Jerusalem a thil hlu awm zawng zawng te chu la in, Colosseum sak nan hian a hmang niin an sawi bawk.

Rome, Italy a kal te chuan he lai hmun hi an tlawh ngei ngei ti ila kan sawi sual awm love, Rome tihmingthangtu leh khualzin te hip ber tu a nih avangin he hmun hlui hmingthang tak vang hian Rome hian khualzin te hnen atangin sum leh pai a la lut hem hem mai a ni.

Colosseum hi Rome, Italy khawpui laili taka awm niin, a awmna lai hmun hi Regio IV Templum Pacis (Temple of Paece) bula awm a ni. Tin, Rome hi hmanlai thil hlui awm tamna a nih avangin thil hlui zirmi leh chhui mi te chuan Rome hi an ngaihlu hle a, Rome leiliung khawi lai hmun mai pawh hi hi laih thuk deuh chuan thil hlui engemaw tal an lai chhuak thin niin an sawi bawk. Heng avang hian Rome a thil hlui te hi an humhalh tha in khawpui cheimawitu an la nih zel avangin Rome khawpui hi hmasang atang tawh in khawpui ropui leh chuai theilo an ti hial a ni.

Aside | Posted on by | Leave a comment

Bosman Ruling hi enge ni

Football tuipui tak i nih chuan Bosman Ruling hi i hriat ngei a tul ang!

BOSMAN RULING BIHCHIANNA
“Free transfer-in a zawm” tih hi football khawvelin a sawi dan tlanglawn leh hriat dan lar ber a ni. He ‘free transfer dan’ kan tih mai, ‘Bosman ruling’ hi football mai ni lo, European Union(EU) hnuaia hnathawktu(labour) zawng zawngte te tan zalenna dar a ni. A chipchiarin kan sawi vek hman lo ang a, amaherawhchu he Bosman Rule chanchin tlangpui leh a nghawng thenkhatte in thlasik mau puah phawng phawng teh ang.

TUNGE JEAN – MARC BOSMAN ?
He dan chungchang sawi hma hian footballer pakhat, a hming Jean- Marc Bosman-a chanchin hi sawi hmasak phawt a ngai. Footballer ropui a ni lo a, nomawi tam tak a chawi kan hre hek lo. Mahse Bosman hian football khawvel tan hna ropui a thawk a, kum 20 zet a liam hnuah pawh he a hnathawh ropui tak hi footballer ten a rah an la tel zel a, thangthar lo la awm zel tur te pawhin a rah an la seng zel ang.

Jean- Marc Bosman hi kum 1964 October ni 30 khan a lo piang a, kum 25 a nihin professional football a luhchilh a. Football a khelh chhung hian midfielder niin Standard de Liege (1983-1988), R.F.C de Liege (1988-1990), Olympique Saint-Quentin (1990-1991) leh CS Saint-Denis tan a khel. Kum 1990 khan R.F.C Liege-a a contract neih chu zo in French team Dunkerque zawm a duh a, Liege lam hian contract nei tawh lo an player Bosman chu a hlawh ‘cut’ sakin a man an chhiar zat chu Dunkerque lamin an pek duh si loh avangin pa tumruh Bosman a lungawi lo a, court-ah a zualko ta.

BOSMAN RULING CHU HEI LE :-
Kum 1993 October ni 6 khan he thubuai hi Luxembourg-a European Court of Justice-ah thehluh a ni a, Bosman-a ukil te hi Jean-Louis Dupont leh Luc Misson-te an ni. He case-ah hian pawl pathum leh footballer pakhat inrawlh an awm a, chungte chu- Belgian Football Association, Bosman a khelh mekna R.F.C de Liege, Europe rama football thuneitu sang ber UEFA leh he case-a mi pawimawh ber tih ngam Jean-Marc Bosman te an ni. He thubuaia thutlukna siam tu judge hi Italian Federico Mancini a ni a, kum 1995 December ni 15 khan court thutlukna hi puan a ni a, Bosman-a zalen ta!!!

Court thutlukna ang chuan European Union(EU) hnuaia footballer reng reng chu an khelh mekna club-a an contract a zawhin man nei lo in an duhna ber club an zawm thei ang, tih a ni ta a, an player tha ber pawh nise a contract a zawh miau chuan club lamin thuneihna an nei tawh lo. Hei hian EU pawn lam erawh a huam lo thung. Hei bakah hian player te hian an thla 6 chauh emaw a aia tlem contract an nei a nih chuan club dang nen ‘pre-contract agreement’ ziah phal sak an ni ta bawk.

Hei mai hi a la ni lo, EU leh UEFA hnuaia football club te chu an tualchhung league-a ‘foreign quota’awm thinte chu a thiahsak a (tunhnaiah erawh foreign player rules hi ram hrang hrangah siam that mek a ni), UEFA hnuaia inelna hrang hrang Champions League, UEFA Cup (Europa League ni ta) leh Cup Winners’ Cup -a foreign player pathum aia tam hman awih loh tih dan awm sa chu a thiat a, EU hnuaia footballer ni lo te chauh khuah khirh a phalsak ta bawk.

ENGE A NGHAWNG ?
Players ten an hlawk pui a, club lamin an that pui bawk. Player fing deuh chuan he dan tlawh chhan hian an contract neih lai a tlem tawh emaw, a zo dawn hnai a nih chuan club lamah hlawh tam zawk ngiatin contract thar an ziak duh lawk lo a. Club lamin a thlawn a chhuahtir ngawt an ngai ngam si lo, hlawh tam zawkin an chhawr leh nge nge thin. He dan hi awm lo se chu British player chhawr lo a inkhel fo Chelsea lehArsenal te hian talbuai viau thei a, Manchester United pawh kha kum 1999 Champions League-ah khan an champion lo maithei bawk, kha zana inlan United player 13 zinga 5 chiah kha khawtual mi (English) an ni.

Club leh player te chauhin an hlawk pui lo a, player agent te thlengin an hlawk pui nia!! Agent tha, player thlem thiam deuhte chuan player contract zo tawh emaw zo hnai te chu thlemin an club duhna lamah an seng lut a, heng agent-te hian club atangin sum tamtak an lalut ve ta thin a ni.

Hetih lai hian club naran tan chuan an player tha ten contract thar ziak
naran tan chuan an player tha ten contract thar ziak duh lo in hlawh sang zawk an phut fo a, club lian leh hausa zawk ten man nei lo in an chuhsak leh nge nge thin.

TUTE NGE A THLAWNIN PEM ?
Bosman Ruling hman a nih tak hnu hian footballer langsar tak tak ten a thlawnin an club khelhna an chhuhsan zut zut reng a, heng zinga thenkhat hi lo tarlang leh ila-

1) EDGAR DAVIDS: He Dutch midfielder lar tak hi ‘Bosman ruling’ hmanga footballer langsar pem hmasa ber a ni awm e. Kum 1996 khan a hming chherna Ajax chhuahsanin AC Milan a pan a ni.

2) STEVE McMANAMAN: He English midfieder tha hian kum 1999 khan Liverpool chhuahsanin ‘free transfer’ in Real Madrid a zawm. Santiago Bernabeu-ah hian a khel tha thei vet vet hle a, UEFA Champions League pahnih chawiin La Liga pahnih, European Super Cup leh World Club Cup te a chawi pui bawk.

3) SOL CAMPBELL: Vawiin thlengin football khawvela transfer sawi hlawh ber pawl a la tling. Tottenham Hotspur captain, an defender tha leh innghahna Sol Campbell chuan kum 2001 khanTottenham chhuahsanin an hmelma lian ber Arsenal a zawm san daih!! Man nei lo a chhuak a ni bawk nen, Spurs fans te tan chuan ‘Judas’ tih loh rual a ni lo.

4) ESTEBAN CAMBIASSO: Real Madrid tana khel pha mang lo, Argentine midfielder Esteban Cambiasso hian kum 2004 khan ‘free transfer’ in Inter Milan a pan a, a tisual lo hle. Internazionale player pawimawh ber pawl ni chho in kum 2010 treble champion an nih theihna tur a player thawh hlawk ber pawl a ni zui bawk.

5) HENRIK LARSSON: He Swedish striker lu hmang thiam tak hi kum 2004 khan Barcelona chuan’free transfer’ in Celtic atangin an lalut a. Barca tan kum hnih a khelh chhungin Champions League, La Liga pahnih leh Spanish Super Cup te a chawi hman a ni.

6) MICHAEL BALLACK: Germany captain hlui hi kum 2006-a a contract a zawh khan a duhna ber pan turin a zalen a. Real Madrid leh Manchester United ten awt em em mahse Chelsea pan a thlang ta zawk a nih kha.

7) ANDREA PIRLO: Andrea Pirlo pawh hi he dan hmang tangkaitu zinga mi a ni. Kum 2011 khan AC Milan chhuahsanin Juventus a pan a, Turin-ah hian beisei phak bakin a hlawhtling a, Serie A chawipuiin Champions League final a la hruai thleng thei hial a ni.

A chunga kan tarlante bakah hian footballer langsar leh lar tak tak, he dan chhawr hi an lo awm tawh a, an awm mek zel bawk. Chung zingah chuan Italian legend Roberto Baggio (AC Milan to Bologna,1997), Brad Friedel (Liverpool to Blackburn, 2000), Markus Babbel (Bayern Munich to Liverpool, 2000) , Miroslav Klose ( Bayern Munich to Lazio,2011) , Fernando Llorente (Athletic Bilbao to Juventus, 2013) , Robert Lewandowski (Borussia Dortmund to Bayern Munich, 2014) , James Milner (Man City to Liverpool, 2015) te an tel.

BOSMAN – ENGTIN ZEL ?
Heng transfer langsar tak tak thlen theihna chhan ber Jean-Marc Bosman hi khawnge a awm tak zel le? Khawvelin a hre reng em?

June thla mai a interview-a neihah fapa pahnih leh fanu pakhat nei Bosman chuan a retheihzia sawiin,” Thla khat a hman tur euro 570 chiah ka nei thin. Ka chhungten min tanpui a, FIFPro in min pui bawk. Kum 51 a upa ka ni tawh a, hnathawh tur hi a vang takzet a ni,” tiin footballer hausa tak takte tana zalenna dar vawtu chuan a sawi.

“ Tunlai footballer te hi ka hmu zen zen lo a, inkhel en turin stadium-ah sawm ka ni ngai hek lo. Tum khat chu Mark Van Bommel nen kan inhmu a, ka dinhmun chhiat thu min hrilh a. Milan-ah Gennaro Gattuso leh Clarence Seedorf-te ka hmu tawh bawk a, Seedorf hi Milan captain a nihlai a ni nghe nghe. Anni pahnih hian ka hnathawhte an thlirin ka dinhmun harsa ta chu min khawngaih thu an sawi a, lawmthu pawh min hrilh ve nghe nghe.

“ Milan hi Arsenal nen inkhel tur an ni a, press mite dressing room-ah an awm vek tawh a. Seedorf chuan Marc Bosman ka nih thu leh press mite chu an duh duh zawhna min zawt turin a ti a. Chutah le, min en thup ringawt a, tumah in zawhna min zawh an tum si lo a, Seedorf hi a thinrim hle nghe nghe,” tiin football khawvela a dinhmun chhiat tawhzia a sawi bawk.

“Ka nunah hian thil ropui tak hlawhchhuakin ka inhre
hre ve thin a, mahse mi ropui tak erawh ka ni lo. Hetiang thil ropui tak ti tu hi chuan hriat reng a phu ve niin ka hre thin,” titu Bosman hi a hnathawh ropui tak avang hian football khawvelin hre reng mawlh teh se.

THULAKNA:
1) BBC
2) Sky Sports
3) Bein Sports
4) Wikipedia

Zofooty

Aside | Posted on by | Leave a comment

Dan lova thun Bru 200 te paih dawn

Mizoram pawna awm Bru te, Mizoram chhung Assembly bial hrang hrang pathum: Lunglei South, Thorang leh West Tuipui Constituency huam chhunga Electoral Roll Revision hnuhnung bera mi 200 chuang thunte paih turin Lunglei Sub Hqr YMA chuan hma an la dawn.

Hei hi ‘Hnam hnatlang’ lo neih tawhna bawhzuina a nih thu sawiin Group 6-ah inthenin Group hnih (2) in Thorang bial endik turin an tuam ang a, Group thum (3) in West Tuipui Constituency lam tuam lehin Group khat (1) erawh chuan Lunglei South Constituency huam chhunga mi Zehtet leh Buknuam te an tlawh thung ang.

YMA Sub-Hqrs. Lunglei hruaitute hian a theih ang angin Group YMA, Branch YMA leh NGO pawl hrang hrang te, a remchan dan angin an thawhpui dawn tih an sawi a, Electoral Roll a hming chuang, anmahni awm lo Bru te paih an nih theih nan theihtawp an chhuah dawn tih an sawi a ni.

Heta mawhphurtu ber hi Vai DC kan neih te an ni.

Aside | Posted on by | Leave a comment

Mizoram chhungah dan lova khaw din 21 a awm

Mizo Zirlai Pawl MZP chuan Mizoram chhungah dan lova khaw din 21 a awm thu LAD Minister Pu K. Lalrinliana hnenah vawiin khan an thlen.

MZP hian Mizoram chhunga danlo a khawdin leh Mizoram leh Assam State inrina ramri chungchang Minister hi a office ah an sawipui a, dan lova khaw din 21 te hi a tam ber chu Lunglei, District ah awmin, khaw 19 dan lova din a ni an ti a, Mamit District chhungah khaw 2 a awm niin an sawi bawk.

Heng khuate hi Chakma leh Bru te din a nih thu sawiin, Sorkar chu rang taka endika thiat nghal turin an ngen a. Minister chuan, a rang thei ang bera thiah a nih theih nan hmalak a ni ang tih MZP hruaitute chu a chhang niin MZP thuchhuah chuan a sawi a ni.

MZP hruaitute chuan, Kolasib, bialtu Pu K. Lalrinliana, chu Bairabi Zophai leh a chhehvel bialtu a nih angin, ramri chungchang an sawipui bawk a. Bairabi Zophai hmunah hian ZOFATE CHAWLHBUK a din ngei a ngaih thu leh sak a nih hma chu tawp san an tumloh thu an thlen nghal a. Minister chuan, Bairabi Zophai hmunah Zofate Chawlhbuk a din ngei theihna turin, bialtu MLA a nih ang pawha hmalak a tum thu leh a hmunah ngei MZP hruaitute nen enho a nih tur thu’’ MZP hruaitute chu a hrilh a ni.

Aside | Posted on by | Leave a comment

CITIZENSHIP AMENDMENT BILL 2016 DODAL KAWNGAH KAN IN LUNGRUAL

Citizenship Amendment Bill-2016 Lok Sabha in 8.1.2019 a a pass tak hi kan duh lo theuh. Kan phak tawkin kan dodal a, Mizoram in kan dodalna kan lantir tawh dan atang hian han thlir ila.

  1. SORKAR HMALAKNA :
    Ni 10.1.2019 ah Mizoram Sorkar Council of Minister chuan an duh loh zia thu an pass ve nghal a.

Ni 14.1.2019 ah Mizoram Chief Minister Pu Zoramthanga chu Delhi ah kalin Prime Minister leh Home Minister hnenah Mizoram in he bill kan duh loh zia a hrilh bawk.

KAN MP TE
Congress Party hian Mizorama sorkarna an chan lai khan Memorandum an lo thehlut tawh niin an insawi a. An thehluhna hmun leh hun a dik em tih erawh chu thuhran, an duh loh zia tilang hmasa ber an ni. Lok Sabha a an rel lai khan Opposition ho an chhuak tau a, hemi zingah hian kan MP pawh a tel ve.

  1. PRISM HMALAKNA
    An ni hi he bill lo zirchiang hmasa an ni a. Mimala nawr harsa chi a ni tih an hria. 2016 September 30 he Bill chungchang a rawtna hun Joint Parliamentary Committee-in a khar hma atang khan sorkar an lo nawr tawh a. Tun tumah pawh hian Chief Minister hnenah All Party meeting ko va, Citizenship Amendment Bill-2016 dodal zel dan tur rel ho rawtna lehkha sorkarah a pe lut.

ZIRLAI PAWL HMALAKNA
NESO bultumin MZP chuan Lok Sabha a an rel ni 8.1.2019 khan Bandh a huaihawt.

NESO bultum bawkin MZP hian ni 12.1.2019 ah Black Day a hmang.

NESO bultumin MZP hian Kawngzawh pui 23.1.2019 ah huaihawt an tum bawk. Mizoram mipui zawng zawng kal turin an beisei.

OPPOSITION MLA HMALAKNA
Pu Lalduhawma (ZNP) chuan Trinamool Congress huaihawt opposition party 22 chuang kalkhawm “United India Rally” Kolkata a buatsaih ah ni 19.1.2019 khan thusawiin, BJP kaihhruai Sorkar chu na takin a bei a. He bill hi India laka NE State-te min thliar tu a nih thu sawiin NE State te tanrual puiah a sawm. Mizoram atanga lokal a nih thu sawi mahse NE aiawh anga thu sawiin PM Warning a pe hial a ni. Bangladeshi tanpuina tling ni a an sawi, Mamata Banerjee hmaah ngei mai hetiang a sawi siah siah mai hi a huaisenin a PA riap riap khawp mai.

MEDIA LAM
Facebooker ten mipui kaihharh tumin tan an la nasa, WhatsApp lamah thahnem ngai takin an pu darh bawk. Party advantage lak tum pawl tlem a zawng an awm avangin mipui an chiai hman tep a, thudik zawk hrilh hre turin an thawkrim hle. CAB-2016 hian Social media chu a luah hneh thawkhat viau.

Cable TV-in mi chinchang hria te kawmna a tichhuak a. NE state dangten an dodal dan te News lam atangin kan hre thei zel.

KOHHRAN LAM
Mizoram Kohhran Hruaitu Committee chuan inhmuhkhawm an buatsaih ah Rajya Sabha MP Pu Ronald Sapa Tlau thusawi turin an sawm.

Setana bill an tih mai anti-conversion bill an ti a an sawi bawk (Freedom of Religion Bill) kum 1978 a an chai lai khan Kohhran hian Pathian au vin an rum a, dodalna thusawi chhuak nasa berah an lo tang tawh a, tun Citizenship Amendment Bill-ah pawh hian an ngawi reng bik hauh lovang.

MIPUI NAWLPUI
He bill dodalna kawngah hian a tawp thlenga tan kan inhuam a, intlansiak turin hamrik ham hun nghak a, an kun deuh chal hi kan ang viau awm mang e.

He bill hi NE state-te tan lo chuan a hnawk lo mai ni lovin support hliah hliah awm a ni a. Chuvangin NE State hi Exempt mai nise kan fel duak ang emaw…

Aside | Posted on by | Leave a comment

Pu Duhoman Modi a vau

Melvyn Vanlalhlimpuia

PU LALDUHOMA, MLA
UNITY MEGA RALLY, KOLKATA-A A THUSAWI MIZO TAWNGA LEHLIN

(English-a a thusawi Mizo tawnga lehlin hi dik tawk lo leh fuh zan lo deuhte pawh a awm mai thei. Chhiartute hriathiamna ka ngen nghal e. Mahse Mizo tawngin chhiar theihin awm se, English thiam lo tan a tangkai tak.mialin tiin ka han letling ve rawih a nih hi. Melvyn Vanlalhlimpuia)

Vawiinah he hun pawimawh tak, hriat reng tawh tur hi chhan mumal tak nei chungin leh hriatpui turin Mizoram atangin kan rawn kal a ni.

Ka sawi nawn leh teh ang: Tum mumal tak leh pawimawh tak neia rawn kal kan ni.

Inhriat theuh angin, hmanni lawka India ram rorelna sang Lok Sabha-a an phar tluk tak Citizenship Amendment Bill avangin India hmarchhak ram pumpui chu indonaa kangmei chhuak ang maiin tunah hian a alh hluah hluah mek chu a ni ber a.

Chuvangin he bill avang hian India hmarchhaka cheng mipuite chu inla hrangin kan lo inpumkhat ta a ni. He ram neitu nihna dik tak rilru pu mek hmarchhak mipuite rilru chu a nguai zo ta.

India ram Prime Minister hi hrilh duh ka nei a, he rally kaltlang hian Warning pek ka duh tel bawk, chu chu hei hi a ni: he bill hi a kalpui lui zel a, a titawp dawn lo a nih chuan keini tan India rama beh ve reng hi a remchang tawh dawn lo tih hi.

Chuvangin keini chu he hmunah hian chhan mumal tak neia lokal kan ni ka tih kha, hmuh kan duh chu kan sorkar laipui hi sakhaw tih bik nei lo sorkar nise tih hi a ni. He bill an put luh tawh hi an sut emaw, India hmarchhak bika hman ve loh tura tih emaw a nih loh chuan sakhaw zuitu tlem zawkte, hnam tlem zawk te hi BJP, RSS leh Bajrang Dal te tihluihna lak ata kan him dawn lo a ni. Anni chuan he ram history hi an duh dan leh ngaihdan milin an ziak thaleh mek a. Kan mimal nunah an rawn inrawlh a, kan ei tur leh ei loh turte min hrilh a, sakhaw zalenna kan neih mekah an inrawlh mek bawk a ni. Chuvangin hun reilote chhunga West Bengal state thlak danglam theitu hian he ram (Nation) pawh hi a khawih danglam theih ka ring tlat a ni. Keini chuan sakhaw tih bik nei lo sorkar hi sorkar laipuiah piang ngei se tiin nghakhlel takin kan thlir mek a. Tichuan keini India hmarchhak mite chu kan him tlang thei chauh dawn a ni.

A tawpna atan ka sawi duh chu, India hmarchhaka regional party hrang hrangten BJP nen kan inzawmna hi titawp vek ila, BJP nen inzawmna kan neih zawng zawng hi chhu chat vek ngam ila, tichuan he movement ropui tak hi zawm vek ila, inpumkhatin he communalism hi i bei let ang u tiin ka sawm a che u. KA LAWM E.

Aside | Posted on by | Leave a comment

Ramngaw leh Nhngchate Humhalh

Hruaitea Hauhnar

Ramngaw leh Nhngchate Humhalh

NUNGCHA LEH RAMNGAW HUMHALH…! (One Planet, Many Species, One Future) Mihringte hian ramngaw leh nungchate hi nasa takin kan ti chereu zo a. Zawi zawiin an rem tial tial a, engmah ngaihtuah chiang lova kan pawi khawih hi nasa tak a ni. Khawvel pianken a pawimawh em em chu, thilnungte leh avela thil awm inbuktawkna (Ecological Balance) hi a ni. Khawvela thilnung zawng zawngte hi in eitawn, inkungkaih a, inchawm tawn vek kan ni. Rannung chikhat lek pawh a mang hian thilnung dang inrintawnna a tibuai vek thei hial a ni. Mihringte hi chuan ei theih a nih tawh phawt chuan, Sa leh Thlai hrang hrangte hi kan eipawlh mai thin a. Mahse, nungchate khawvelah chuan chutiang ni ve hlek lo; chaw atana rin leh ei bik an nei theuh a ni.

Kum tinin Mizoram let eng emaw zah ramngaw tihchereu a nih zel avang hian nungcha boral zat chu tam tak a ni ngei ang. Tunah pawh hian rannung chi (Species) mang ral lek lek tawh, a hranpa a venhim an awm nual tawh a; chung zingah chuan Sakei leh Mulukawlh pawh an tel nghe nghe.

Nungcha mang burh hun hnuhnung ber nia Scientist ten a an sawi chu Kum Maktaduai 65 kal ta a mi, Cretaceous kumpui an tih hunlai ami kha a ni a. He hun hian Dinasaur te pawh an mang tel ve nghe nghe. Kha thilthleng kha Scientist te chuan Simeikhu/Meteor in lei a sut avanga, Sik leh Sa inthlak danglam thut vang niin an ngai. Harvard University a Ecologist Edward O. Wilson-a chuan,”Tunah hian Mammals nungcha 25% te chu mang mai hlauhawmah an awm mek a, chutiang bawkin Sava zinga 13%, Laiking chi zinga 22% leh Amphibian zinga 41% te chu mang mai hlauhawmin an awm mek a ni,” a ti.

Kum tluklehdingawm chanve liam ta atang khan Màngpui hun (Great Episodes of Extinction) hi tum 5 lai a thleng tawh a. A hmasa ber chu Kum Maktaduai 448 liam ta, Ordovican hun kha a nia. Tin, a vawi 2 na chu Kum Maktaduai 365 liamta, Devonian hun te, a vawi 3 na chu kum Maktaduai 268 liam ta, Permian hun, a vawi 4 na chu Kum Maktaduai 210 liam ta, Triassic hun leh a tum nga na chu Kum Maktaduai 66 liam ta, Cretaceous hun te kha an ni. Tunah pawh hian thilnung tam tak nasa taka an mang lehna hun kan hmang mek a, chu erawh chu Mihringte thiltih vang a ni. An chenna tihchhiat sak avangte, sum dawnna atana thah leh lak an nih avangte leh thildang tam tak avangtein thlai chi hrang 60,000 leh nungcha chi 2,000 vel chu mang maithei dinhmunah an ding mek a ni.

A chhut chiangte leh Zirmite chuan thlai leh nungcha mang zel hi mutmawh hnarmawhah an nei ta. Tin, a nawlpuite kan harhchhuah hunah chuan kan vei vang ni lovin, kan tawrh nasat tawh vang a ni ngei ang. A harh hmasa leh a pawi thui theihzia hrechiangtu apiang an au lawm lawm ta. Thing phun ngai pawimawh ho te lah hian Sum tam tak sengin an phun teuh teuh a, a enkawl zui lam erawh an ngai pawimawh leh tawh mang si lo! Vawiina kan eiruk hi nakin lawkah Artificial Tree lei nante kan la hmang mahna le!! Mi pangngai chin an harhchhuah tan lai hian mi thenkhat chuan Silai leh Sairawkherh te, Generator, tûr leh Bomb,adt hmangte a Nungcha la veh duk duk an la tam. Tunlaiah Camera nena an veh duk duk tawh laia hetiang hmanraw hmanga veh duk duk hi chu a thing lutuk tawh. Sim hmak chi.

A tawp ber atan chuan, Thilnung chi hrang hrangte hian chen nan Planet pakhat kan intawm a, Kan Future pawh a thuhmun a. Tin, Kan in mamawh tawn vek avang hian kan theih tawpa humhalh an ngai hle a ni…

Aside | Posted on by | Leave a comment