Sadhu Sundar Singh testimony

BIBLE MEUH PAWH LO PAWTTHLER TAWH TU,
SADHU SUNDAR SINGH-A TESTIMONY

Vanlal Ruata

Sadhu Sundar hi 1889 khan Punjab a Patiala khuaah a lo piang a. A chhungte hi sakhaw mi tak niin Hindu sakhua ah a seilian a, temple ah pawh a kal ngun hle. Kum 7 a tlin meuh chuan Bhagvad Gita a thiam chhuak vek a, kum 16 a nih phei chuan Vedas leh Quran te chu hnehsawh tak a ni. A lo thang lian zel a, Sunder-a chu missionary te enkawl sikul ah te a lut a mahse Bible chu eng teh lua ah a ngai lo.

Kum 14 a nih laiin anu chu a boral thut mai a, a nu nen chuan an inhnaih hle a. A tuar hle a, a rinna chu tlem sawt hle a. Thlamuanna leh thudik a zawng thin a, a rilru chu a hah in a lungngai thei em em a ni. Mahni inthah hial pawh a tum thin a. Isua leh a zirtir thin chu dik lo hul hual a hria in Bible te a lo pawtthler tawh a. Thuhriltute chu lungten a lo vawm thin a ni.

Kha zan khan engkim a thlak a ni. December 1903 a ni a, zan vawt tak a ni. Rel lo kal chu inchil tir tumin Ludhiana Express rel kalna ah a awm a. Kha zan khan a tawngtai nasa hle a. ” Aw, Pathian, Pathian i awm tak tak a nihchuan zan inah hian ka hnenah rawn inlar ang che” tiin. Zingkarah chuan rel chu a rawn kal dawn tan a. Thawklehkhatah pindan chu eng tak mai hian a rawn khat a. Sundar a mak ti chuan room atang chuan a dak a vartian ala nilo deuh bawk si. Kawngka chu a khar leh a mahse a rawn eng telh telh bawk si a.

Eng a en reng lai chuan a hmaah tu emaw ding hi a hmu thut a, aw chuan ” Engtianga rei nge min hnuchhawn dawn? I tan ka thi a, ka nun hi i tan ka hlan a sin” a rawn ti a. A hmaa ding kut ah chuan perek hnuhma a hmu a. Sundar-a chuan mak a ti hle a, sakhaw dang a biak thin te a hmuh a rin laiin Isua a hmu daih si a. Sundar chuan Isua chu vawiin ni thleng hian ala dam tih a pawm ta a, thingthi in a hnenah a tawngtai ta a ni.

A thinlungah chuan a hmaa a neih ngai loh thlamuanna leh hlimna tam tak a nei a. A thil hmuh chu a bo a, mahse a thinglung a lawmna te chu ala awm reng a ni. Tunah chuan kumkhua atan a inthlak tawh a. 1905 a a pianchamah Shimla a English biak inah baptisma a chang a. Khatih hunlai khan, kristian Sadhu ni turin thutlukna a siam a, a nun chu Pathian tan hlan in ,a nun pum chu midang tan a hmang a ni.

India leh Ceylon hmun hrang hrang ah a zin kual nasa hle a. 1918-1919 inkar khan Malaysia, Japan leh China te a tlawh a. 1920-1922 khan Western Europe, Australia leh Israel te a tlawh bawk a ni. A thih dawn hnaiah chuan a zin nasat em avangin hrisel lohna a nei tam em em a. A hunlai khan lehkhabu tam tak a ziak bawk a, Urdu tawnga ziah niin tawng chi hrang hranga leh a ni bawk a ni.
At the masters feet(1922)
Reality and religion (1923)
Search after Reality(1924)
Spiritual Life(1925)
Spiritual World(1926)
Real Life(1927)
With and Withoit Christ(1928)
A tawpah chuan, Sadhu Sundar Singh-a chu Tibet ah mi thenkhat nen a zin a. Vur tlangah Badrinath pelin an kal a, Tibet kawng te chu a nal in kawng hrehawm tak a ni a. He kawngah hian awm in let leh a duh tawh lo a. A thiante chuan an zawnga mahse an hmu tawh lo a ni. A chunga thil thleng tak chu tuman an hrelo a ni.

Sundar-a hi Kristian monk a ni a, Krista chanchintha hril kawnga a hnathawh chu India leh South Asian ah a darh nasa hle a ni.http://thechinmirror.com/uncategorized/bible-meuh-pawh-lo-pawtthler-tawh-tu-sadhu-sundar-singh-testemony/

Aside | Posted on by | Leave a comment

Mihring Ek (shit/poop/stool) Zir Chianna

Mihring Ek (shit/poop/stool) Zir Chianna :Charlie Tlau

Hman deuh khan kan zun (urine) rawng atanga kan hrisel emaw hrisel loh chungchang ka rawn post tawh a.

Tun tum chu kan ek chungchang i sawi ho ang u aw.

Mihring ek hian kan hriselna hi a lo teh theih a. Engtia zing nge i inthiar thin emaw enge i ek rawng te? Mithiam te chuan kan digestive tract kan tih mai kan chaw-kawng hian kan taksa pumpui ain bacteria a nei/pai tam zawk an ti ani.

Chuvang in kan bowel te tha taka han thawh theih nan an tawngkai rual in natna hlauhawm laka min veng tur pawh in an tangkai hle a ni.

Kan inthiar dan emaw kan ek rawng a zir hian kan thil ei (diet) inthlak emaw kan taksa in natna kan taksa tana tha lo a do ve a ni tih a hriat theih an ti tlat a ni.

1. KAN EK RAWNG: A tlangpui in kan ek hi chu kan thil ei vang te a ni thei lutuk a, rawng buang lam deuh hi chu a normal a, mahse a eng emaw dum emaw hi chu ngaihthat loh tham a ni tlat.

Doctor te chuan kan ek hi a dum a nih chuan pumpui lawng/thi emaw kan intestine chiang lo a ni chawk an ti a. A dum chhan hi kan thil eiah iron lam a telh tam vang te pawh a nih chuan a dum thei a, mahse dum ve tawp kan thil ei vang pawh ni lo a nih chuan in entir hi a tha thin a ni.

Chutiang in ek-thi te pawh hi damdawi lam thiam rawn hi a tha e.

2. SHAPE: Puitling pangngai chuan kan ek (ek han tih tlawl mai chu nuam lo deuh ) shape hi a pangngai chu kan hre vek a.

Mahse ek te reuh te emaw pencil tiat lek a kan ek reng chuan kan colon (pumpuite zawk) hian problem a nei tihna ni thin a ni.

Hei hi a chhan chu kan ek chhuahna (bowel) kha tlem te in a block tihna pawh a ni thei a ni.

Tin, ek nem em em te, toilet ah emaw bet tlat thin han leih tlak emaw har tak te hi oil tam vang a ni thei a ni. A awmzia chu kan taksa khan thau (fat) kha a hipral (absorb) tawk loh vang a ni thin.

Tin, ek thenkhat tui a lang a nih chuan kan taksaah gas a tam tihna pawh a ni thei a, mahse hei hi chu problem lutuk a ni lem lo e.

3. A RIM (smell): Tumah ek rimtui in hriat bik ka ring lova, ka hre lo tlat mai kei chuan.

Mahse ek rimchhe lutuk te erawh hi chu ngaihthah tur a ni lo ani. A chhan chu ek rim tui lo deuh i nei a, a reh thei lo a nih chuan daktawr i rawn nia.

Ek hi heng ho siam hi a ni a – undigested food, bacteria, mucus leh dead cells te.

Tichuan ek rim hi chu bacteria leh parasite vang te pawh a ni thin a, mahse ek rim tui lo pawh hi kan colon-ah ek a tang vang pawh ni thei a ni.

Ni khatah vawi 2 inthiar thei lo nih chuan daktawr rawn a tha leh ang.

4. EK-KHAL (Constipation): Hei hi nausen lai hian mi thenkhat chuan an nei thin a, mi puitlingah pawh a awm thei tho a ni.

Ek khal hi chu common complaint a ni a, khawi ramah pawh hian.

A chhan hrang hrang te chu diet tha pangngai ei loh te, taksa sawizawi loh vang te emaw, damdawi thenkhat vang te leh taksaa tui tam loh vang te an ni thin a ni.

Ngaihthah a nih chuan mawng-thi te a thlen thei thin a, inven dan chu – tui ril emaw fibre ngah chi thlai em tam te, taksa sawizawi that te leh ek chhuah a va inthiar te hi a ni.

5. KAWTHALO (Diarrhea): Kawthalo chu kan hre vek turah ka ngai a, mahse mi tam tak chu kan phili buai nghal ringawt thin.

Mahse a nihna takah chuan kan taksa hian khuanu rel ang thlapa kan taksaa bacteria tha lo leh viral infection te a paih chhuah ve dan a ni tlat ani.

A tlangpuiin tui a parasite awm ten kan taka a digestive system-ah an luh vang te pawh a ni a ni.

A tlangpui in kawtha lo hi ni 3 velah dam tura ngaih a ni a, mahse a aia tam kar 2 te a nih chuan irritable bowel syndrome or Crohn’s disease vang te pawh a ni thei a ni.

Aside | Posted on by | Leave a comment

MANNY PACQUIAO A CHAK

MANNY PACQUIAO A CHAK. FLOYD MAYWEATHER A CHO LEH NGHAL Tetea Khiangte

Manny Pacquiao chuan Las Vegas-ah unanimous points hmanga Adrian Broner hnehin WBA world welterweight title a chang leh ta.

Mi 70 bei tawh Filipino hi kum 40 mi a nih hnuah a inbeih lehna hmasaber a ni a, four-weight world champion hlui hian a American khingpui hi kawng eng-kimah a hneh ti ila a sual awm love. Pacman hian amah aia kum 11-a naupang lakah hian hnek a ngah zawk a, hei vang hian Judges score-ah chak vekin, 117-111, 116-112, 116-112 hmangin unanimous decision-in hnehna a chang ta a ni.

Inbeih zawhah Manny Pacquiao hian kum 2015-a a lo hneh tawh loh American Floyd Mayweather chu beih that leh a duh thu a sawi nghal a ni.

Pacquiao chuan, “Box-ah lo kir leh a duh a nih phawt chuan Floyd Mayweather hi beih leh ngei ka duh a ni. He thu hi a hnenah pawh ka sawi duh a, a lo kir leh duh a nih phawt chuan kan inbei leh ngei ang,” tiin, hneh loh la nei lova Boxing chawlhsan tawh Floyd Mayweather, a cho thu a sawi a ni.

Aside | Posted on by | Leave a comment

KUT KAN HMAN DAN THLAK

NEWS COMMENTARY: 19.01.2019

Ziaktu : HC.Vanlalruata Principal Correspondent, PTI

Kum 1994-a Chanchinţha thlen champha kum 100-na kan lawm ţum khan sapram aţang leh India ram hmun hrang hrang aţangin zosapte leh an chhungte bakah rawngbawltu engemawzat Mizoramah an lokal a. Anni bakah khan state pawn aţangin chanchinbumi engemawzat an lokal a, BBC hial pawhin an aiawh an rawn tir a ni. Pawn lam mite ngaihdanah chuan kan Gospel Centenary lawmna kha kũt ropui tak, kum 100 dan chauhva thleng a ni a, thil dang tam tak kaihhnawih a nei tur a ni. Mahse, lammual-a a lawmna inkhâwm zawhah kha chuan engmah a awm tawh lova, chawhnu her aţang kha chuan kan mikhualte kha an khawharin an hawihai tak zet a ni tih hriatpuitu ka ni. Hei hi eng kũt mai pawh kan la hman thiam lohzia tilangtu a ni.

Tuipuiral aţanga mingovin sakhua an rawn ken luh kan pawm tak avanga kan hnam nun a bet tlat, kan hnam kũtte hmang thei lova rahbeh a rei tak kan awm hnu-ah Chapchar Kũt chu kum engemawzat kal ta aţang khan kan han hmang chho leh a. Mahse, kohhran mitmei vêng reng reng leh kan sakhaw vawn thar pawisawi lo thei tur ang ber a lawm kan tum miau avangin a dalin a suak tawh hle mai. Mingo ho concert-ah khuan hnam hnufual ţhenkhat lâm telh zeuh zeuh sela chutiang ang vel chauh chu a ni tawh – kan hnam kũt (traditional festival) kan lawm dan hi a lungchhiatthlak takzet a ni.

Mizote’n kũtpui pathum – Chapchar Kũt, Mim Kũt leh Pawl Kũt te kan nei a, chi bil hrang hrangin an nei ve bawk a. He’ngte hi kan hlamchhiah nasa ta hle a, chawi nun leh tum a tha thawh an awm ve zel bawk erawh chu a lawmawm hle. Kan hnam kũt hmang hlei thei tawh lova kan awm chhan hi kan sakhaw vawn thar hruaitute mitmei kan ven piah lamah kan sorkar hotute’n a senso tur sum an hai chhuah theih loh vang a ni âwm asin! Kan ram a awm ngai reng reng lo Anthurium pangpar puala kũt huaihawtna tur sum haichhuak thei leh Țhalfavang Kũt, tun hnu a sapţawnga a hming pawh vuah thar a ‘Winter Festival’ kan tih tak atan a sum hai chhuak thei siin kan hnam kũt atan a sum an hai chhuak thei lo hi a fel lo ngawt mai.

Hnam kũt ni lem lo chawisan kawngah pawh Naga ho tak ngial pawh kan tluk lo hi a tlawmngaihthlak. Anni chuan an hnam kũt ni lo an phuah chawp ‘Hornbill Festival’ (Kăwlhâwk kũt?) chu ropui takin an dinchhuahpui a, December thla bula an lawm ţhin he kũtah hian ram pawn aţangin zin mi nuai 2 chuang an hip lut kumtin zu nia. Keini kũt ve hi chuan zin mite a hĩp lem lo tih chu kumtin a zin mi kan mikhual ve zât han en hian a chiang reng mai. Winter Festival hming a thlak tâk Anthurium Kũt emaw, Țhalfavang Kũt-ah emaw khan ram pâwn aţangin zin mi an lo kal ţeuh lem lovin a lang.

Chapchar Kũt bik hi han luh chilh ta ila. Hetia rual lo ang reng zeta sum beitham tè sorkarin a sem hmanga kan lawm ţhin hi kan duh khawp lo hle-in a lang a. Chubakah mipui nawlpui a tak a an tel (participate) ve lohna, khawthlang ho musical concert ang reng leh a kâr a Mizo hnam zai leh lăm nena chawm pawlh a, kan hnam rimawi chhepchher tel mang lova mingo rimawi hmanrua nen a kan chum pawlh chhung hi chuan hmasawn hi a beiseiawm lohva, kan kũt hman dan hmang hian kan hnam hi kan tidal telh telh zawk zel a ni. Hman kum lawkah phei kha chuan sum dah a nih loh avangin kan lawm lo ţep a, engtin tin emaw an pawtkhawm leh hram zawk a nih kha.
Sorkar insenso ngai lem lo leh hlimawm zawk si, mipui tam ber a tak a an tel ve theihna tur chuan Krismas leh Kumthar kan lawm dan ang deuh hian khawtin vengtinah kan kũt pawimawh ber hi lawm ta zawk ila, a sam khaiin a nuam zawk fe âwm asin. Hemi kawngah hian kan ţhianpa rawtna hi a ţha riau-in a lang – “Tuna kan kũt hman dan hian Mizo mipui min huap phak lo. District capital den den leh Aizawl lammual a pun khawm ringawt a ni a, ei leh in tur awm mumal awm lo, rilṭam dang châr a awm ṭhin te hi a khamawm tawh. Sap nial nualin hun hman dan tur kan han duang a, a lem lutuk.

“Hetiang ai chuan khaw tinah, kohhran bil sawi lovin, Village Council/Local Council kaihhruaiin, tlawmngai pawl hruaitu hrang hrang telna Chapchar kut committee dinin, tunhma a kan pipute’n an tih ang deuh khan rorelin han inrawt phùr sela. Mizo hnam zai leh lám hmangin inti hlim ila, tlaiah khawtlang huapin ruai te ṭheh ta zawk ila. Kût urlawk zanah kan hnam ze ţha inzirtirnate, thiam thil nei ţha ho phochhuahna hun te hmangin intihlim zawk ila, a nuam fu zawkin mipui min huap kim zawk ang tih hi ka beisei dan a ni,” a ti.

A ni tak a, kum tam lawm a nih tawh loh hnu a kohhran hruaitu duh firte’n, Kristian nih hma nundan a kir leh anga an hmuh loh theih dan tur ber leh Kristianna nen a inhmeh thei hnai ber a an hriat angin Mizo hnam kũt te hi hman a ni ta a. Rem leh rem lovin mingo tihdan nen a chawm pawlhin hun hman dan tur duan a ni a, pawisa ruahman aia tam hmang lo tur a tih a lo ngai nen, kan hun hman dan hi a ninawmin dawhsân a chanvo nei ve lo tan chuan a ho ta em em a ni.

Kan pi leh pute khan kũt an hmanin dawhsan a ţhu bik an siam chu sawi loh dawhsan an siam pawh a rinawm lohva. Chief Minister leh Art and Culture Minister nei ve ta lo chuan eng engemaw kũt laia chanvo neitu insiam chawp a ngai ve dawn lova. Thuchah sawi chiam chiam a hun hek leh ninawm a awm a rinawm lohva, mitin a taka an tel ve theihna a nih avangin a nuam hle ang. Kan ţhianpa rawt ang khian mahni khua leh veng ţheuhah hmang ta mai ila, chanvo kan nei ţheuh anga, a takin kan tel bawk ang a, a nuam kan tih zawk a rinawm hle.

Zin mi pawh kan hĩp zawk a rinawm a. Khawvel puma zin mite hrilh hriat chu Tourism department chan ni ta sela, thu thehdarhna chi hrang hrang hmanga ramdang mite leh India ram chhung hmun danga awmte hrilh hriat an nih chuan nileng leh zan thlenga hun hlimawm kan hman, chu pawh veng leh khawtin ami chu an rawn chhim ve chak ngeiin a rinawm. Eitur kan siamte pawh kan Mizo chawhmeh ngei ni sela, theih ni phei sela chuan kan sorkar hian Nagaland a tih angin tual siam zu hi khap lovin zin mite hipna atan hman ni sela, kan kũt te pawh a hlawhltingin zin mite hĩpna atan a ţangkai zual ngei ang.
Hemi kawngah hian YMA lam hian ngaihtuahna thar siam thei sela chuan kan kũt hman dan hi thlak dawrh a, ţangkai, hlimawm leh mitin telna ah kan siam thei ngei anga, kan hnam kũt humhalhna ţha a ni bawk ngei ang.

Aside | Posted on by | Leave a comment

MIZORAM thlirna 2018

MIZORAM 2018

  • Mizoram Journalist Association (MJA) leh Zonet ṭangkawpten an buatsaih Miss Mizoram 2018 thlanah North Khawbung nula C. Ramthanmawii (Thanthan-i) chu thlan a ni. Thanthan-i hi Miss Mizoram 2017 Rody H. Vanlalhriatpuii chuan chuan Crown a khum tir a ni.

Miss Mizoram hian lawmman pawisa fai Rs. 1,10,000/- leh Vespa Scooter a dawng. Hei bakah hian sponsor tute aṭangin Vivo Phone a dawng bawk a, Miss atan thlan a nih avang hian Dubai a la zin thei dawn cheu bawk.

Miss Mizoram 2018 crown khumtu Thanthani hian judge zinga mi Charlie Mathlena zawhna, “Kum khat chauh dam dawn ta la, Mizo ṭhalaite tana i tih ngei ngei tur thil pathum enge ni ang?” tih a zawh chu hetiang hian a chhang :

  1. “A hmasa bera ka tih tur chu- kan rama lui leh nungcha mawi tak takte hi an hlu em em a, humhalh turin theihtawp ka chhuah ang” (Thanthani hian project an neihah pawh lui tui humhalh a pawimawi zai zirtirtirna a siam.)
  2. “Mizo ṭhalai zingah ruihlo vanga nunna chan an tam em em a, hei hi a pawi tak zet a ni. Ka ṭhalaipui ruihhlo ngaite chhanchhuak tur hian theihtawpin ruih hlo do kawngah hma ka la ang”.

  3. A tawp berah chuan, “Kum khat chauh dam dawn ila chuan Kristian ram kan nih ang ngeiin, ka ṭhalaipui leh midangte hnenah Pathian thu a tam thei ang ber ka hrilh ang” tiin a sawi. (A chhanna vang hian mipui lam thawm a ring hle a, a mah pawh a inring tawk tih a chiang hle.)

Body building and Fitness Association of Mizoram buatsaihin Mister Mizoram thlan a ni bawk a, Lalkrosmawia, Electrict Veng Gym Club chu thlan a ni. Lalkrosmawia hi kum 2015 leh 2016 te khan Mister Mizoram hi a lo ni tawh bawk.

  • Mizo Zirlai Pawl (MZP) te chuan Bairabi Zophai-a Mizoram Chief Minister hmasa ber, Pu CH. CHhunga ramah ‘Zofate chawlhbuk’ an sa a, mahse, an kalbo zawk hlanin Assam lam mi ni’a hriat ten an lo ṭhiat hmiah mai!

Hetia’ng hi thil awm dan a nih avang hian MZP te hi sak ṭhat leh tumin an che chhuak leh a, hemi ṭum hian Assam Police lam ten an lo dang. MZP lam an kal lui zel. Tiang te lekin tharum thawhna nasa takin a thleng zui a, silai hial hmetpuakin hmeichhia leh thuthar theh darhtu te tiamin zirlai tam takin hliam an tuar.

Hetia’nga boruak a sosan viau hnu pawh hian Mizoram sorkar lam hotute an chelo hle in a hriata, hemi demna leh Assam Police demna ni pahfawmin zirlai ten Aizawl leh hmun hrang hrangah lungawilohna lantir nan kawng an zawh hial a ni.

Buaina chhuahna hmun, Zophai-ah hian tunhma pawhin chawlhbuk hi sak a lo ni tawh ṭhin a, amaherawhchu, rei dingloin tu tih hriatloh ten an lo ṭhiat zel a ni! Hei hi a chhan ni’a lang chu helai hmun hi Inner Line Reserve Forest Area a nih vang a ni. Zirlaite hian he thil hi an hrelo a nilo. Rambuai lai hi khawih an duh biklo a, chuvanga kut pawh thlaklo anni. Mahse, Assam lamin kutthlak in police out post, school leh Tuikuk leh Chakma raltlante awm nan an rawn hmang si! Hei hi duhloin chet an la ve ta a ni.

Boruak a lum hle. Zirlai hruaitute an awm mai mailo. Chawlhbuk chu sak ngei an duh. Hetih lai hian Ministry of Home Affairs chuan Chief Secretary level a inbiak a rawn rawt ta. Zirlai ho lahin an thiltum kaltlang pui an tum nasa mai si. Bairabi-ah ṭhalai an tleh thla sung sung a, police lam lah chuti bawk. Hetih lai vêk hian hnamdang ho lahin buaina lian tak a chhuak dawn ni’a ngaiin Mizoram an chhuahsan chuah chuah ve bawk. Hei ringawt pawh hian boruak lum zia a hril awm e. Ram hruaitu hrang hrangin zirlaite hi an thiltum kaltlang pui lo turin an ngen mawlh mawlh hlawm. Zirlai hruaituten uluk taka zanlai pelh thlenga an ngaihtuah hnu-ah an thil tum chu a hun sawnin Chief Secretary te inbiak dan ngaihchan phawt an rel ta. Ṭhulh mai erawh an tumlo hle niin an awm danah a lang.

Chief Secretary te chu an inbe ta ngei a, inbiakna hi Union Home Secretary, Rajiv Gauba in a kaihruai a, Mizoram CS, Arvind Ray hi home department-a additional secretary, Lalbiakzama leh OSD, David H.Lalthangliana ten an ṭawiawm a ni.

Meeting chuan thu awm sa, state pahnih ten kutthlak loh ve ve tur (status quo) atan an puang thar a, a remchan anga state pahnih hruaitu te nena tlawh an rel.

Hun a kal zel a, ram pawh en a ni fo. Intih taurau chang awm bawk mah se, MZP te thiltih chuan an thiltum ber hlawhtling ta chiahlo mah se, ramri fello hmundang ami pawh an enfel nghal phah avangin a hlawhtlingah a ngaih theih awm e.

  • Governor Lt. Gen. Nirbhay Sharma chu a term a tâwp tâk avangin Governor thar atan Kummanam Rajasekharan chu Gauhati High Court chief justice Ajit Singh chuan Raj Bhavan Durbar Hall-ah rinawmna thu tiamtirin Mizoram Governor atan a la lut.

Kummanam Rajasekharan hi December 23, 1952-ah Kottayam district-a Kummanam-ah a piang a, CMS College Kottayam aṭangin B.Sc. (Botany) a zo a, a hnuah Post Graduate Diploma in Journalism a zo leh a ni. Chanchinbu khawvelah hun eng emaw chen a awm hnuah Food Corporation of India-ah a thawk a, a hna bânsanin politics-ah a lut a, Governor atan ruat a nih thleng khan Kerela BJP president a ni.

A chunga tarlan ang khian BJP President a nih ang hian RSS mi leh sa, VHP leh Hindu Aikya Vedi ah pawh a sulsutu zinga tang pha ani a, hei vang hian tlawmngai pawl hrang hrang te chuan politic-a inhmang lai a nih bakah Hindu lampang tana insawrbing a nih avang hian duhlohna lantirna a nasa hle. He thil hi a lo hre ve nge? Governor thar Kummanam Rajasekharan ‘Politics-ah ka inhnamhnawih dawn lo’ a ti. Kumtawp thlenga kan dinhmun aṭangin emmawnle? han tih tur pahnih khat chu awm bawk mah se, party tan a inhman awm a lang lemlo in a hriat.

  • ZONET Cable Network buatsaih Mizo Idol chu neih a ni leh ta. Kumi’n show hi a ṭum rukna a ni tawh a ni. Tunṭumah hian Zoram hmun hrang hrang aṭangin zaithiam 597 zet an fuankhawm a, heng ho hian district tinah audition an neih hnu-ah Aizawlah intihsiakna tak tak chu neih a ni leh ta a ni. Tichuan, Mizo Idol atan Chanmari tlangval Jery Lalrinawma chu thlan a ni. Mizo Idol hian pawisa fai Rs 1,50,000/-, scooter leh thilpek dang ṭhahnem tak a dawng a ni.

Jery-a chuan a title lak hi a pa, Pu Zoliana, kum 2011 a boral ta, Mizo Idol ngaisang em em tu hnena a hlan thu a sawi.

Jery-a hian tunṭum intihsiakna hi intihsiakna a hmachhawn ṭumhnihna a ni a, a hmachhawn hmasak ṭum chuan fair tawkloa a hriat avangin round sang zawk a thlen hnuah a bansan a ni. Tunṭumah pawh hian tel tumna a nei lemlo a, a chhung ten form an lo lak sak si avanga tel ve mai a nih thu a sawi. Form lak chhuah sak tute hnenah hian pawisa a lo la pe loa, pek ngei a tum thu a sawi nghe nghe!

Mizo Idol lo ni tawh te:
2007 – Lalawmpuia, Champhai
2009 – Lalchhanchhuaha, Sumsuih
2011 – Lalthuṭhaa, Siaha
2013 – Grace Lalchhanhimi, Kolasib leh
2015 – Rabecca Zorintluangi , Sairang te an ni.

Hetih lai hian LPS lam chuan Comedian Search naupang leh puitling tan a buatsaih ve leh bawk a, naupang lamah K. Vanlalmalsawma, Chaltlang chu pakhatna niin puitling lamah Lalchhuansanga, Lengpui chu pakhatna a ni ve bawk.

  • Mizo rawlthar Jeremy Lalrinnunga s/o Lalneihtluanga, Govt. Complex, Aizawl chuan 3rd. Youth Olympic Games 2018, Buenos Aires, Argentina-a neihah rit inchawisiak (weightlifting) kg. 62 category-ah gold medal a chawi chhuak.

Jeremy-a hian snatch-ah kg. 124 leh clean & jerk-ah kg. 150 chawiin, a chawi belhkhawm chu kg. 274 a ni a; Youth Olympic Games-a India tana gold medal dawng hmasa ber a ni.

Mizoram Weightlifting Association chuan kum 2011, October thla khan Govt. Complex-ah Weightlifting Academy State Sports Coaching Centre a din a. He hmunah hian Weightlifting coach Malsawma Khiangte (SYS) kaihhruaina hnuaiah Govt. Complex rawlthar Jeremy hian a zinkawng bul a ṭan.

State level intihsiakna a hmachhawn lo a, inelna puitling a hmachhawn hmasak ber chu Youth National Weightlifting Championship 2016 niin gold medal a dawng nghal.

Youth Olimpic Games khelhna Argentina rama neihah hian Mizo tleirawl Lalremsiami pawh hokey-ah tel ve in ani pawh hian a khel ṭha hle a, silver medal a vaw chhuak ve hial a ni. Mi ramah Mizo hming an ti ṭha hle.

  • Kum 22 lai Mizoram chhuahsan tawh, Tuukuk te Tripura Transit Camp a awm, Mizorama let tura vawi riat lai repatriation sorkarin a neih hnu pawha let duhlo te MLA inthlan dawn a vote thlak tir tum dan leh Electoral Roll Revision neih pui an nih dan chungchangah Chief Electoral Officer Mizoram, SB Shashank hmalak dan duhlo in NGO Co-Ordination Committee hmalakna in Mizoram chuahsan turin heng avang te hian ngen a ni : A hnathawh danah ECI-in ti tura an tih chhuanlama hmanga Tuikuk, Tripura Transit Camp-a awmte tan hma a la nasa hle a, Joint NGO te thil phut tih hlawhtlin tumloin hma a la zel a, hei mai niloin Mizoram sorkar hmalak dan te pawh ECI-ah a hek avang te hian.

Hun tiam chhunga Mizoram a chhuahsan loh avangin Zoram hmun hrang hrangah a pisa kai tur dang/duhlo in ‘Hnam hnatlang’ neih a ni a, Aizawlah chuan Secretariat Complex-ah neih a niin mipui singnga chuang zet mipui pungkhawm a ni.

Nikhat hnam hnatlang neih a nih hnu hian CEO hian Mizoram a chhuahsan loh avangin ruatbik hnatlang hmanga duhlohna hi neih chhunzawm zel a ni a, a chhuah hnu-ah hnatlang pawh tihtawp nghal a ni.

Aizawla hnatlang neih a nih tum hian tlawmngai pawl hruaitu hrang hrangin thu tha tak tak an sawi a, zaithiam zai ngaihthlak a nih bawk. Amah duhlohna thu uar taka au a nih bakah Mizo te kan zam dawnloh thu kan au pui piap piap mai chu a nuam danglam hle.

  • Lunglei South Assembly Constetuency bialtu MLA, Pu S. Laldingliana s/o Lalchungnunga, Lunglei Chanmari chu chaw dawt cancer avangin a thi a, a nupui Lily Pari bakah a fapa bakah a tu te pathum a kalsan.

Pu Dinga hi June ni 21, 1954-ah Theiriatah a piang a, Delhi University a MA a zawh hnuin kum 1982 aṭangin Lunglei Collage-ah lecturer hna a thawk. Lunglei Chanmari veng YMA hruaitu hlun a ni a, kum 2006 leh 2008-ah YMA Sub-Headquarter President a ni a, collage a a hna leh YMA-a a chanvo te kalsanin kum 2008-ah politics a zawm. Kum 2008 MLA election-ah Congress ticket in Lunglei South bial aṭangin thlan tlin a ni a, hemi ṭum hian parliamentary secretary a ni. Kum 2013-ah a bial ngai-ah hian thlan nawn a ni a, Lunglei High Power Committee Vice Charman a niin a thih ni thlengin he hna hi a chelh a ni.

Pu Dinga hi rorel thiam leh thudik ngaina mi a ni a, lemchan pawh thiam tak a ni.

  • Prime Minister, Narendra Modi chuan a ṭumhnih nan Mizoram a rawn tlawh. Hemi ṭum hian Lungleia vantlang inkhawmah thu a sawi a, Aizawlah (Aijal Club) NGO Co-Ordination Committee ho nen an inkawm bawk. Aijal Club-a inkawmnaah hian NGO te chuan Bru chungchang leh Pu Lalnunmawia Chuaungo chungchang te an lo thlen a ni.

PM lo zin hi MLA election chungchanga a party (BJP) campaign puia lo kal ni ber in a lang! PM chauhlo pawh Chief Minister leh sorkar hotu dang te hi ram hruaitu an ni a, party mi an nih chu hai thu a awmlo. Amaherawhchu, thlan tlin an nih hnu hi chuan party mal tan niloin mipui huap ni thei se a duhawm ngawt mai.

  • Social Media lamah mi pakhat, changkan ve hmel tak chu helicopter ṭum fel tawh, kawngkhar aṭanga leia a tla thla tawp lai chu a rawn lar hluai mai. Thlalaka a lan dan chuan Mizo ten ‘vai’ kan tih ang chi ni ngeiin a lang. Chakai khawrh kawr dum lam leh a hnuaia kawr var lam ha a ni a, kawngkhar aṭanga a chhuak tur, petek sualin a duh aiin lei a thleng hma niin a lang. Helicopter hi Pawan Hans Helicopter, Eurocopter AS 365N1 Dolphin 2 a ni a, rawng var leh serthlum rawng inpawlh a niin registration hming VT-ENX tih pawh a lang.

Helicopter aṭanga tla hi a tirin tunge a nih? vantlangin kan hre mailo a, ‘Prime Minister’ ti an awm laiin BJP President, Amit Shah ni’a ngai an awm bawk. Thlalak hi mobile phone camera a lak a nih avang leh a lakna a hlat tham deuh avangin tunge? tih hriat a har hle! Dulkiar ve tak a ni tih erawh a hriat theih.

Thil thlenna hmun hi Lunglei Kawmzawl ni’a sawi an awm a, Chawngte leh Damparengpui ni’a sawi an awm bawk. Lunglei-ah Amit Shah a kallo a, Damparengpui-ah Home Minister Rajnath Singh a kal thu sawi a awm thung. Prime Minister in Pawan Hans a hmang ngailo a, a ni chuan Indian Air Force hlir a hmang ṭhin a ni. Amit Shah ni tura ring an tam hle a, mahse, Amit Shah hian kamis leh kekawr a ha ngailo a, Mizorama a lokal ṭum pawh hian Kurta Pyjama a hak thu sawi a ni.

Thil chik mi ten ngunthluk taka an ngaihven hnu-ah Amit Shah ngei a nih thu hriat a ni ta a, a hmun pawh West Tuipui Constetuency-a Tlabung Helipad a lo ni.

India ram ril lamah chuan anni ang chin hi chu an che hlek hi news a tlin mai zel laiin Mizo tam zawk erawh chuan a lo zin tih pawh kan lo hre mang hauhlo thung a! Engpawhnise, a tla na lemlo niin a lang a, a lawmawm.

  • Mizoram State Legislative Assembly pasarihna a lo tawp tak avangin Assembly pariatna atana general election chu tluang taka neih a ni a, inthlana vote tla te hi state dang inthlang ve te rualin ni 13 hnu-ah district khawpui tinah chhiar a ni a, MNF in seat 26 la in hnehna an changa, rorel lai Congress chuan seat 5 chiah an la thung. Zoram People’s Movement (ZPM) in seat 8 la in BJP in seat 1 an la ve bawk.

Chief Minister ni lai, Pu Lal Thanhawla chu Serchhip leh Champhai South-ah te dingin a chaklo ve ve a, a bial Serchhipah hian ZPM candidate, Pu Lalduhoma a hnehlo a, Champhai South-ah hian MNF candidate, Pu TJ Lalnuntluanga a hnehlo bawk. Hetia’ng a nih tak avang hian Pu Hawla chuan Governor, Kumanam Rajashekharan hnenah a kaihhruai Congress party an tlin zawhloh avang leh amah pawh a tlin zawhloh avangin banna a thehlut nghal. Sorkar hi result puan tuk aṭangin Governor chuan a ṭhiat nghal a! Ni reilo te chu MLA (sorkar) neiloin Mizoram kan awm a ni!

ZPM Chief Ministerial candidate, Lalduhoma chu Aizawl West-I leh Serchhip bial-ah te dingin a tling kawp a, bial hniha ding mi 10 zinga tlingkawp awmchhun niin midang hian seat lak an neilo vek thung.

MNF President, Zoramthanga chu Aizawl East-I ah a chak.

Result puan aṭanga ni li hnu-ah Raj Bhavan-ah Pu Zoramthanga kaihhruai MNF chu Governor in a lalut. Chief Minister, Zoramthanga chuan Finance, GAD, SAD, PWD, Political & Cabinet, Horticulture leh Planning & Programme Implementation te chang tura tih a ni a, Pu Tawnluia chu Deputy Chief Minister niin R. Lalthangliana, Lalchamliana, R. Lalzirliana leh C. Lalrinsanga te Cabinet Minister anni anga, K. Lalrinliana, Lalchhandama Ralte, Lalruatkima, K. Beichhua, TJ Lalnuntluanga leh Robert Romawia Royte te Minister of State an ni thung ang.Tin, Lalrinliana Sailo chu Assembly Speaker niin Lalrinawma chu Deputy Speaker a ni bawk ang.

Chhinchhiah tlak zual:
1. BJP in seat khat an la ve. BJP hian Mizoramah MLA an la nei ngailo.
2. Hmeichhe candidate hi 18 an awma, tumah tling an awmlo.
3. Tuikuk candidate an siam dawn ni’a hriat a nih avanga Hachhek biala common candidate J. Lalsailova chu Tuikuk candidate an awm leh siloh avanga inhnuhdawh tum chu a dilna pawmsak a nihloh avangin a ding tlang a, (tunhma angin bawm khar a theih silo a) vote 91 lai a hmu!
4. MNF-in Chakma candidate an nei na a, a tlinglo pawla a ṭan avangin Chakma minister kan neilo.
5. Mizoram aṭanga,Bru tlanchhia, Tripura Camp-a awm mek te tan Kanhmunah special polling station 15 siam a ni.
6. Inhnehna sang ber chu Aizawl West-III constetuency-a MNF candidate, Lalruatkima chuan amah hnaihbertu, Congress candidate, Lalmalsawma chu vote 2720 in a hneh a, inhnehna tlem ber chu Tuivawl constituency a MNF candidate, Lalchhandama Ralte chuan amah hnaih bertu, Congress candidate, RL Pianmawia chu vote 3 in a hneh thung. A pumpuia vote hmu hnem ber chu Saiha biala MNF candidate, K. Beichhua niin 49.8% a hmu a, 0.2% chauh hmu hi 7 an awm bawk.
7. MLA la ni ngailo 20 an awma, MLA ni lai 9 leh MLA lo ni tawh ṭhin 11 an awm bawk. (Election hma in MLA bang an awm nual a, tuna kan tarlanah hi an ban hma statistic a ni.)
8. MLA thar zinga naupang ber chu, Champhai South a MNF ticket a thlan tlin, TJ Lalnuntluanga chu kum 39 mi a ni a, kum 40 hnuailam awmchhun a ni nghe nghe. A upa ber chu, Tuichang biala MNF ticket a thlan tlin, Tawnluia niin kum 75 mi a ni. Amah tiamin kum 70 chung lam hi pahnih an awm a ni.
9. Thlan tlin te kum chawhrual chu kum 54 leh thla 5 a ni.

Aside | Posted on by | Leave a comment

Joy-a a che khir em ni?

Zanin (18 jan, 2019) LPS 1 a Zu zawrh leh zawrhloh chungchang an sawihona khi ka lo nghakhlelin ngaih pawh ka lo ngaithla ngun khawp mai. Mahse ka beisei a phalo deub tlat tun dinhmun ah khi chuan.

A chhan chu an Moderator Joy-a khi boruak tichhetu ber ani tlat ani. Moderator khian a Moderate lo reng reng a…Panel a thute khi ngaihdan leh duhdan,hmuh dan hrang hrang nei an ni a. In Debate a ngai anih pawn in Debate mai tur a inruahman sa an nia. Mahse an mahni nilovin a Moderator ber khian Panel lama thu te khi alo Debate pui zel mai lai khi a buaithlak anih khi. Hre ber leh zuk hre fuh ber anga lan alo tum ve phet leh..Panel lama thu tuemaw zawhna a zawt a,an nin anlo chhangin an sawifiah a. Mahse a pawm dan leh ngaihdan alo siam tawh sa kha an rawn kalh nia a hriat avangin zawhna an chhan fel hmain alo zawh belhin alo pawhchah sak zel a. A zawhna pakhat zawk pawh an sawifiah hma hmain alo hnialin alo tlazep zel a…alo inhnialpui nghal zel lai khi a buaithlak. A zawhna chhangtu in ‘ngawi rawh min sawi zawh tir lawk la khalai kha..kan sawi zo lawk ange’ a tih chung pawn a Moderator ber khan lo tlazepin alo hnial a..zawh awh a tum avangin zawhna dang alo zawh belh zel mai anih khi. A lan dan ah chuan Moderator Joy-a khian khitiang hunpui leh mithiam leh miril te kawm tur leh lo Moderate tur chuan a Qualified chiahlo anih khi. A thil sawi zawng zawng..a tam zawkah khian Zu Zawrh lam kha sir tlukpui phet a tum tlat leh MNF sorkar in Zu chungchang a hma a lakna hi dodal a tum ngar ngar niin a lang tlat. Moderator berin thu lai la miahlo va Bias deuh mai a Moderator hna alo keng kawh khi a duhlo let tawp ani mai. A mah khian Panel a thu te khi alo hnial phet tur ani lo va..a ngaihdan khi lo zeh ve phet a tum tur ani lo. Panel a thute ho ngaihdan hrang hrang neite khi an ngaihdan leh duhdan a sawi chhuahtir anga..tin an ngaihdan in anlohna ah chuan a tul anih chuan a in Debate tir mai tur zawk ani.

Tuna a lan danah khi chuan leh…a thik sawi chhuah tam zawkah khi chuan Moderator ber khian a zuar lam khi a tanin zawrh khi a duh zawk niin a lang a. Zu zawrh vanga Tax leh hlawkna lo lut fak mawi a..zawrh lam a tan zia a tilang lutuk khi a zahthlak mah mah ani. A nihna leh Moderator in a thil tum a hrethiam miahlo niin a lang. Tin ngawih hun leh inrawlh hun lah a hre heklo. Tawng tam ber leh sawi tam ber nih alo tum zel lai khi a nihna a hrelo lutuk khi a zahthlak mah mah. Congress Hmalakna leh an diklohna an rawn sawi rikin Khati lam zawnga inbeihna ang kha chu sawiloh nise tiin alo inrawlh buaiin alo pawh chah sak zel bawk si. Amah berin Pu Zira hming rawn lamin mimal takin a rawn bei ani a..Chumi sawifiahna midangin an rawn sawiin khati zawnga inbeihna chu sawiloh tur a ti leh bawk si. Sawi tur a a sawm te an sawifiah leh an sawi zawh hmain tihtawp alo tum phet a..Panel a thu te nen a Moderator ber a kha an inhnial phah zel anih khi. LPS Vision khian khitiang ang hun pawimawh ah hi chuan tlem a mi vengva leh mithiam..mihring mihrinna a mi puitling leh tawngkam thleng a zahawm leh puitling deub hmang ve tawh se..anih loh pawn Journalist phanchang leh puitling deuh hmang ve tawh thin se a tha khawp ang. Tiang khi chuan an hun hman a pawimawh tehreng nen holam takin Modderator vangin a chhuak mai dawn alawm. Bul an tan tirh atangin Moderator berin a la sawi tam ber a. Midangin thil an sawi laiin alo hnial buaitu awmchhun ala ni zar zar ani..tun thleng khian. Panel a thu te ngaihdan inanglo te zawk kha inhnial a sawiho tur emaw an nih kan tihlaiin Miderator berin Panel a thute alo hnialin Zu zawrh tha a tihna lam thu sir tlukpui alo tum tlat ani tih khi a lan dan ani. Khitiang ang ze puitlinglo lutuk khi chu LPS hian hmang tawhlo se a tha ngawt mai.

Joy-a hi thil dangah a mimal nun leh zia ah chuan mitha tak leh fel tak niin ka ring. MAhse khitiang anga mithiam rualte kawm a Moderate tur chuan a tlin ve hlawllo anih khi.

Tesena Sailo

Aside | Posted on by | Leave a comment

RUH NATNA TLANGLAWN

RUH NATNA TLANGLAWN by Dr. H.Lalnghakliana

Khawvel history thui tak han chhuikir a, mihring te’n natna chi hrang hrang kan vei thin te leh indona a hliam nasa tak tak an tuar thin te han ngaihtuah chang hian engtin tak lo in enkawl thin maw? Lo in enkawl thei ta pawh ni sela tunlai thiamna nasa tawh tak la awm loh hun lai te a ni vei nen, mihring te kan la damchhuak zel a thilsiam zinga chungnung ber kan la ni ta zel mai pawh hian ngaihtuahna a ti thui ve thei khawp mai.

Khawvel (Earth) lo indin tanna pawh hi mithiam te chuan rei tawh tak ni in an sawi a, evolution ring ho phei chuan chhut thui veng veng tak an ni. Tunlai damdawi thiamna modern medicine kan tih mai hi kum 150 atanga 200 vel chauh a upa a la ni nghe nghe a, industrial revolution khan a rawn nghawng chho ve a ni. Heng revolution te a lo chhuah hma pawh khan eng eng revolution emaw chu a awm ve tawh fo, mahse thiamna a lo sang chho ta thut mai hi thilmak tak a tling reng a ni. Mizote phei hi chu kan lo chawr chhuahna bulbalah kan chiang lo hle nghe nghe a. Tun hun atanga kum 500 vel kha chiang takin hre leh thei ila chuan a ngaihnawm thei ngawtin ka ring. Hnam naupang te kan ni chung hian thiamna lamah ke kan pen ve mek zel a, khawvel hmasawnna kan um ve lawp lawp chu a nih hi.

Kan thupui ah lut ila. Ruh natna hrang hrang hi kan hmelhriat ve fur tawhin ka ring a, mahse hnam naupang tih takah medical term mumal kan neih loh avangin sap hovin prolapsed disc an tih pawh hi saitika , caitica, ruh chawr, ruhno chawr etc etc tiin kan sawi duah a, a mumal lo thei hle. He natna hi a tam ve viau mai a, Hnungzang ruh lungrem ang mai a in chherchhuan thla karah hian thil dup/nem tak shock absorber a awm ve a, chu chu a hrisel lohva a tawlh chuan spinal cord a nek na ta thin a ni. Chu shock absorber chhia chu zai a paih a ngai thin a ni. Thenkhat chuan a dam thei tawh lo niin an ngai thina , a dam thei a, a hlawhtling thei hle a ni tih hriat a tha. A case a zirin a har deuh te , a dam har deuh te, zai kher ngai lo chi te pawh a awm thei a. Zai ngai lo tak zai a nih te hian a nih tur ang a ni lo thin a ni. Tin kan hriatna thazam ropui ber spinal cord khawih tel angaih thin avangin tihsual zauh palh pawh thil awm thei tho a ni a, fimkhur taka zai chuan hei hi a pumpelh theih a ni.

Mizote’n ruh natna kan hriat tlanglawn deuh pakhat chu Ngalnget (osteomyelitis) hi a ni . 1831 khan Nathan Smith a chuan he natna hi nasa takin a zir chiang a , lehkha pawimawh te a ziak a, a enkawl danah hma kan sawn phah ta hle a ni. Tin Indopui pahnihna atang khan hliam tam tak tak enkawlna atang te in ruh tliak , infection leh a beh bawm enkawl danah revolution a thleng a ni ber mai . Hemi hmalam kum sang tam tak ral tawhah khan engtin tak lo tuar thin maw? An lo va khawngihthlak thin awm em !.Amaherawhchu thil reng reng hi a hun lai chuan vanglai nei theuh a ni a. Mesopotamian civilization te, Greek civilization te kan hriat rual rualin Tualte vanglai pawh ka lo nei ve tho tih hriat a tha. A hunlai chuan engkim mai hi a theih ve vek zel chu a nih hmel. Ruhnget (ngalnget) kan tih mai hi natna hrikin ruh chhungah bu a khuar vang a ni a, ruh kha a ei chhia a, hnai te siamin ruh kha a lo thi a, a uih vut vut a, a lo tliak a, enkawl har takin a siam ta thin a ni. Thisen a natna hrik pawisawi manglo ni a hriat te chu kan taksa a chak loh deuh avangin ruh hmun thenkhatah bu an khuar thei thin a ni. Tunlai hi chuan kan ei te a lo tha a, hrisello lutuk kan tlem tak avangin he natna hi a vang ve ta deuh niin a lang. Amaherawhchu ruhtliak leh pem atangin a insiam ve thei tho a, tun thleng hian he natna hi buaipui tham chuan a la awm ve reng a ni.

Ruh natna chi hrang hrang hi khawvel hmun hranghrangah hian kan hnam zia leh Genetic hrang ang zelin a in ang lo ve diah thei. Alkaptonuria tih natna te hi South India lamah chuan a awm ve nial a, Mizo zingah chuan kan tlem hle awm e. Tin skeletal fluorosis te pawh hi Mizoramah hi chuan kan la nei ve lova-Andhra Pradesh velah khu chuan Malaria ang maiin a tam a ni.

Ruh natna ah chauh ni lo, accident vanga tha na, ruh tliak etc. tih lovah chuan kawng leh hnungzang ruh na hi a tam pawl ber a ni awm e. Mizote pawh hian kan nei nasa ber. Khawi ilovah free clinic te’n kan han zin chhuak ve a, kawngna hi a tam ber chu a ni ang. Kawngna hi ruh pian dan fuh lo hrim hrim avangin a awm thei a, rit kan chawi nasat lutuk vang in a awm thei a, rit lak dan diklo avangte, thut dan diklo avangte, mut dan diklo vangte, kun chunga hna thawh nasat avang te in a awm ve hrim hrim thei. A tam ber hi chu in dim leh nunphung in adjust chuan a dam ve mai thei a, thenkhat chu dam har tak tak, benvawn tlat pawh a awm ve thin.

Natna tlanglawn tak pakhat leh chu dar/koki bul na kan tih hi a ni. Mi thenkhat phei chuan natna hrileng emaw te an ti hial thin. He natna hi a awm thut hran lova-Hnathawhna te, infiamna ah te a na zek zek thin a- a lo rei hnuah a zual zel a, dam leh mai tura beisei laiin a zual ta zel a, banphar a lo har a, delh zawng te in a na em em ta thin a ni. He natna hi ‘impingement syndrome’ kan ti a, a lo nat zual zel hian ‘adhesive capsutitis’ emaw ‘frozen shoulder’ emaw kan ti ta thin a ni. A dam har a, physiotherapy hmangin a enkawl theih a anih loh chuan local steroid injection (Triamcinole acetate/hydrocortisone acitate) hmangin a enkawl theih a ni. Zunthlum nei te tan fimkhur a ngai deuh a, a awm nawn duh bik bawk.

Gout chungchang hi sawi tel a tha. Thisen ah hian chemical chi hrang hrang a awm ve a, glucose[sugar] a pangai aia a tam chuan diabetes kan ti a. Uric acid a awm zat tur aia a tam hian Gout kan ti ve mai a ni. Uric acid hi thisena a tam viau chuan ruhchuktuah ah a tang khawm a, a sen vung na em em thin a ni. Gout na hi chu na tak a ni. Ruhchuktuah na lo hi chu tihrawl lamah na a siam hran lo. A chang chuan kal [kidney] ah lungte (uric acid stone) a siam ve thei a ni.Tui [water] in tam a pawimawh. Tin, nachhawkna ei a ngai a, eng nachhawkna pawh a tha. BP sang neilo tan Eterocoxib 120 mg hi a tha khawp mai, fimkhur erawh a ngai. Tin, uric acid ti hniam thei damdawi chi hrang hrang a awm ve a . Allopurinol te, Febuxostat te an tha. Sa chi hrang hrang a hua a, ei loh a him ber. Protein sang apiang a hua a , chuvangin sangha te pawh hi a ngeih hran lo. Zikhlum (Cabbage) ah hian uric acid te a sang a, tin bekang ei a him lo bawk.

Ruh chuktuah, a bikin khup ruh na hi natna lar tak a ni a. Osteoarthritis kan ti a, taksa a lo upat hian ruh chuktuah tuam tu ruhno (cartilage) a lo chak lo ve a, a in nawt ral ve thin a ni. Ruhno ber a ral tawh chuan a ruh tak kha a lo langa, a na ta em em a. Kan kal zawngin a in nawt na ta thin a ni. Ruh chuktuah a lo nat tak avang hian ‘inflammatory response’ a lo awma, a tuam tu synovium chuan ruh chuktuah chhung ah tui tam tak a siam chhuak a, chu chu a chhekkhawl a, a lo tling mar/vung ta thin a ni. Hei hi taksa in ven na hmanrua pakhat a ni ve a. Ruh chuktuah kha a lo chet tlem phah thin a ni. Osteoarthritis a tan hian damdawi hrang hrang chondroitin sulphate te, glucosamine te, MSM te, Hyaluronic acid te a awm a, hengte hi a ngeih tan chuan a tha ve fu thin a. A then chu ngeih lem lo an awm bawk. Tin, nachhawkna chi hrang hrang a awm bawk a. Severe osteoarthritis (a nasa lutuk tawh) ah chuan total joint replacement (ruh chuktuah thlak tawp) mai a ngai thin. A hautak duh a, tin hmanrua tha bik a ngai bawk. Total joint replacement hi operation theatre thianghlim em em ngai chi a nih avangin a tih ve ngawt chi lem loh. A bika enkawl OT-ah chauh tih tur a ni.

Lirthei te a lo tam ta hle a , accident te a pung nasa hle a ni. Mizoramah hian statistic mumal tak kan nei lova, ruh tliak enkawlna a kan in senso zawng zawng hi kum khatah nuai 50 atanga nuai 100 inkar vel chu a nih a rinawm (record a awm lo, ngaihdan ani). Hei pawh hi traffic rules khauh tak a awm avangin a tlem zawk a ni. Ruh tliak zawng zawng hi a inzawm vek thin kher lova, zu in mi te, mei zu mi teah hian ruh a inzawm muang bik a, insum turin kan hrilh mawlh mawlh thina, tam tak chuan an zawm ve a, thenkhat zawm tum lem lo an awm bawk. Ruh tliak kan zai hian a technique te, a zawmna atana thir kan hman te, a ngheh dan te, ruh tliah dan hrim hrim te, ruh keh them paih ngai tam lutuk, han paih hnu a a kar awl zau ta lutuk te hian ruh inzawm hun a hril nasa thei hle. Tin, a septic leh septic loh hian a hril thui hle bawk. Ruh tliak a lo septic hian kan sawi tak ruh nget a siam a, a buaithlak thei hle. Natna hrik a bikin Staphylococcus hi hmanlai atanga min tibuai tu a la ni reng fan a, surgeon thiam ber ber te ti tlawm tu pawh a ni thin zawng a nih hi.

Spinal cord injury chungchang hi hriat ngai pawimawh tak pakhat ni in ka hria. Spinal cord hi kan hnungzang ruh kawrawng chhungah hian a awm a, luruh chhung a thluak atangin a rawn chhuk a, kan hnungzang ruh ah a chhuk a, kawng ruh laihawl velah a tawp a, ngum ruh thlengin a peng te chu a chhuk thla ta a ni. Hnungzang ruh a lo tliah (tliak / fracture) hian a nasat dan ang zelin a chhunga spinal cord chu a nek sawr per kual vel ta thin a, kan hriatna leh chetna line pui ber chutia hliam a lo nih tak avang chuan na hriatna te, khawih hriatna te leh kan chet theihna te kan lo hloh ta thin a ni. A tlangpuiin spinal cord injury a awm hian a tir darkar 12 atanga 24 chhung a dam leh tura tangkai test hrang hrang a hlawhchham chuan 100% a dam leh tura beiseina a tlahniam hle thin. Zai (operation) tih hian dam leh theihna hi a hril nasa lo hle, a pawimawh zawk chu spinal cord chhiat nasat leh nasat lovah a innghat ber a ni. Operation tih a ruh kilh ngeh hian damlo enkawl a awlsam phah a, bed sore te a veng a, damlo kha a thuttir hma theih a, wheelchair te pawhin a nawrkual theih hma a ni. Spinal cord recovery lampang chu a hril thui ber lo. Tunlaiin stem cell research te, neurotransmitter injecton te an ti tan a, a hlawhtlinna hi 100% a ni rih lova, beiseina sang tak leh man to tak tak a kalpui mek a ni. Chuvangin complete spinal cord injury (spinal cord chhe tawh) zai dam ngawt theih a ni lo tih hriat a tha. Beiseina beidawng tak siam tu a ni thei a ni. Spinal cord zai dam kan tih tam tak te hi chu zai loh pawh a dam tur tho a ni a, zai hian a tanpui chauh a ni zawk. Amaherawhchu ruh tliakin nasa taka spinal cord a nek tih x ray atangin emaw MRI atangin emaw a hmuh a nih chuan a hma lama a nektu tih bo, laksawn a pawimawh ve tho, ziaawm phah tam tak an awm ve a ni, zai ngei ngei tur tihna lam a ni lo. Physiotherapy hi a pawimawh hle a, physiotherapist thiam tak leh inpe zo tak hnuaiah chuan harsatna tam tak a ziaawm phah thei a ni.

Ruh leh tha natna chi hi a tam em em mai a, vawikhatah ziah sen chi a nilo. Mihringte hi hmel leh mizia in ang lo tak tak kan nih ang hian kan taksa pian hmang hi a in ang lo em em a, thana nei awlsam bik te, kawngna nei hma bik te kan awm a, kan ruh rel leh ruh chuktuah pianhmang te pawh hi in ang lo tak tak a ni. Kan pian hmang ang zel hian in adjust a ngai thin a. Mi in in adjust (siamrem) thiam te hi mi vanneih an ni. Natna thuhmun leh in ang rau rau ah doctor rawn zing deuh leh rawn zing lo deuh te pawh an awm thei khawp ang.
HEALTH AND FAMILY WELFARE

Aside | Posted on by | Leave a comment

KOREAN YOUTH CULTURE VRS TRANSGENDER SEXUAL ORIENTATION & PSYCHOLOGICAL SOLUTION

KOREAN YOUTH CULTURE VRS TRANSGENDER SEXUAL ORIENTATION & PSYCHOLOGICAL SOLUTION (Mizoram VRS Global)

  1. Korean ho chu an ram economic development a sâng a, upa țawngkam takin anni nena intehkhin chuan an ram khawlai leh in chhungte chu vanram tlafual ang mai a ni! Ram changkanglo leh intodelhlo tak Mizoram țhalaite an eizawnna tur leh development lamah korean hoten diplomacy kaltlanga Mizo țhalaite an dawmkâng thei anih loh chuan thil țullo leh zahthlak tawp a ni.
  2. Tunlaiah globalism atanga enin pop culture leh generation tharin a ken emaw tih hial tura ngaih theih, ram changkang hovah chuan engahmaha an ngaihtawhloh, chutih ruala, kristian/ringtu țha inti tan chuan sual lian taka an ngaih, tuipuiral khawthlang ram lamah chuan LGBT community an tih mai, kawngzawh tham khawpa tam, Christian Denomination thenkhatte pawhin buaina an tawh phah hialna, mahni anpui inkawp chungchangah te, mahni mipat, hmeichhiatna theihnghilh/haia, mipa /hmeichhia(sexual orientation) nihna(status) dinhmuna chianglo, Mizovin, Tuai, Patil kan tihte, a mingo țawngkam taka, homosexual, bisexual, gay, lesbian, transsexual an tih țhinte entawn tumna hian mizo țhalaite pawh a chîm buai ve ta hial mai!

  3. Visual media leh internet kaltlanga kan hmuh leh thlir theih reng, korean ațanga sâp minngo țhalai, an hmeichhia ațanga an mipa incheidan danglam tak tak te an ve chakna ah mizo thalai(teenage) te a hruailut nasa ve viau pawh a ni thei.

  4. Mahni nihnaa lungawiloh rau rau chuan mahni sexual orientation thlâk duh tak tak pawh țhalaiah an awm fo țhin! a bikin țhalai tawngkam taka ‘pherh’ ‘patil/tomboy’ kan tih mai țhinte pawh hi an rilru(mental/psychology) lamah hmeichhia leh mipa dinhmunah an tlahawlh(trapped) der tawh a ni. heihi kan sakhuana leh community in a ngaihniam thil anih avangin phai/vairam leh foreign(S.E Asia) vela thalai hnathawka awm thenkhatte zingah transsexual an awm ve nual phah ta a ni! hetiang ang chi hi Thailand ah phei chuan an tam khawpa, Bangkok phei chu khawvela damdawi lam thiamna(Technology) hmanga mihring sex thlak theihna (Hormone Tgerapy/Sexual Reassignment Surgery) lama dinhmun hauh sâng ber a ni bawk.
    Hetiang tukverha Mizo thalai(teenage) te an va dah chhuah ve palh hian ru in kan hriat loh kârin a rukin an rilru sukthlek(psychological emotion) a tidanglam nasa thei hle a ni.

  5. Hemi chungchangah hian chi thumin țhen dawn ta ila, :
    a) Mahni duh vang reng nilova Pianphung(genetic/hormone) dik tawkloh avanga Tuai leh Patil te.
    b) Generation inthlakdanglam dan a zirin mipat hmeichhiatna diklo zawnga hmansualna( Sexual immorality/Hypersexuality) avanga Homosexual, Bisexual, gay, lesbian, Transgender lo awm thin te, Culture lifestyle, trendings, fashion etc. danglamin a hrinchhuah, Fashion inchawhpawlh, Mipa incheina hmeichhia in a inbel țhin te, mipa in hmeichhe incheina rawngkaia hmanga a incheina atanga kai chawp palh theih a ni bawk.

Bruce Jenner to Caitlyn Jenner (MTF Transgender)

c) Film leh Entertainment atana Drag Queen, Cross dressing te hian thui takin kawngro a su tel bawk a ni.

  1. Korean atanga Hollywood celebrities, pop stars, actors mai bakah, lehkhathiamna leh khawvela miropui chawinawina(Award) ropui tak tak dawng pha hial, Musician, Politician, Scientist atanga Sakhaw rawngbawltu (Minister) thlengin sawi tur a tam hle mai a, tin mi lâr ni lemlo (individual) zingah pawh mahni sex dinhmuna lunngawi theihloh avang leh an chhungte emaw an țhianten an hriatthiam loh avanga mental depression ațanga, mahni nunna la(suicide) phah hial te pawh an awm fo tawh țhin. chumi piahlamah, sex change avanga inchhir leh avanga mahni hmalam hun(future career) tichhe ta vek pawh an awm fo tawh țhin a ni.

Buck Angel (FTM Transgender)

  1. Mihringa Mipa leh hmeichhiaa min thliar theitu hi ennge ni ti ta ila, tam tak chuan mihring zahmawh/serh ringgawt emaw kan ti maithei! a chhanna diktak chu hormones vang zawk a ni! chumi avang chuan mihring piangchhuak țhenkhatah chuan, mahni duhvang reng nilova, genetic atanga hormone in balance tawk loh avangin Mizoten kan sawi dana pianphunga, tuai, patil te pawh lo awm phah ve țhin an ni. mihring thluaka hnathawktu hormone chi hrang hrang zinga mipa, hmeichhia nihna dinhmuna kan awm theihna atana siamtu(creator) in a dah, Estrogen, Progestrogen, Prolactin(Hmeichhiatna siamtu hormones) bakah Testosterone(Mipatna siamtheitu, hmuihmul, taksa hmul thlenga siam chhuaktu hormone) te awmin chu chu a awmdan tur diktak, balance chiahin a awm tur a ni a, henghi a in balance lih chuan Thyroid function pawh a tidanglamin, mental illness thenkhat, depression mai bakah taksa lam hnathawh diklo, lung lam diklo, BP leh Hb lamah te harsatna a siam ve thei a ni.

Benefits of Testosterone for Male

Conclusion:- Hetianga manganna leh harsatna nei tan chuan Hormone Treatment/Therapy hmanga Psychiatrist, Psychologist leh Medical Doctor expert te rawn mai tur a ni. zah tur a ni lo ve.

Korean drag pop star

Author: Jca Pachuau

Aside | Posted on by | Leave a comment

CHUAUTHUAMA LEH THUSAWI ZALENNA (FREE SPEECH)

CHUAUTHUAMA LEH THUSAWI ZALENNA (FREE SPEECH) by Matana Pachuau

Pu Chuauthuama’n Pu Mafaa boral hnua a chanchin a ziahdan khan mi tam zawk chu a thrawng a. An sel luai luai hnua pawi tihna lam emaw thuphachawina lam a rawn siamlo kha mak ti pawh tam tak an awm awm e, rilru na nen. A tlangpui thuin public figure (Pu Mafaa te ang) te chanchin hi a tha lam vek nilo a chhe lama pawh sawi tel a nih dawn chuan an thih hlimchhawnah nilo an thih hnu lam deuh hleka khek a ni thin a. Mahse, Pu Chuauthuama chuan rei pawh nghak lem lovin a rawn sawr ta bawrh bawrh a, kha khan sawisel a hlawh lehzual niin a lang.

Pu Mafaa chanchin ngaihnawm tak tak te, a thuziak ngaihtuahzui tlak tak tak te kha a hluin Mizo te tan a tangkai em em a. Thangthar ten a zira kan la zir tur te a nih ngei pawh a rinawm.

Pu Chuauthuama chanchin pawh hi zir tham a awm ve a. A lehkhathiamna te phei hi chu entawntlak takzet a ni. Amaherawhchu, heti khawpa lehkhathiam leh sakhuanaa inphumthuk siin finna a tlachham hi thil mak a tih loh theihloh a. A huat em em zu hi fak hluai tur a ni lova, kan la ui em em Pu Mafaa nunna, zu vanga pawhtawia a awm te kha a pawi kan ti vekin a rinawm, amaherawhchu zirsanna leh zirthiamna hian finna min pe kher lo tih Pu Chuauthuama thuziak khan a rawn tichiang hle.

Chumi lam chu lo dahtha ta ila, kha thuziak atanga ngaihtuah ngai pahnih vawiin chu I lo ngaihtuah dawn teh ang.

Pakhatnaah chuan thusawi zalenna (freedom of speech). John Milton-a chuan – “Give me the liberty to know, to utter, and to argue freely according to conscience, above all liberties” tiin zalenna zawng zawng chunga thusawi zalenna a duh thu a lo sawi a. Hei hi a bikin khawthlang ram democracy ah te chuan an society innghahna bulah an ngai a ni. Miin Pathianin a pek zalenna hi a duh ang taka ngaihtuahna hmanga, chu a ngaihtuahna chu ziak emaw thusawi hmanga a puanchhuah theih tluka zalenna hlu hi awm lovin an ngai a. Chumi rapbet zawng reng reng chuan khawtlangin emaw sorkarin emaw dan an zam tur a nilo tih hi an pawm bur a. USA dintute phei kha chuan an constitution ah chiang bel bawlin an ram danpui siamthat hmasak berah “Congress shall make no law…abridging the freedom of speech…” tiin sorkar pian hmaa mihringin thusawi zalenna a neihsa chu rapbet tur zawng reng rengin dan an siam tur a nilo tih dan an siam bur a ni.

Hemi rilru hi India ram danpui siamtute khan an puk a. India constitution Article 19(1)(a) naah “All citizens shall have the right…to freedom of speech and expression” tiin an dah a ni. Amaherawhchu, India ram hi USA te ang a nihlohna a awm a. He Article ah hian delhkilhna siam a ni a, kan pawm emaw pawmlo emaw dan a nih miau avangin India ramah hian USA lama kan mihringpuiten thusawi zalenna an neih anga zau khu kan nei ve lo a ni.

Chulam chu lo dahtha ta ila, Pu Chuaua thuziak hrim hrim kha kan en chuan Pu Mafaa chungchanga a ziahah khan a thudiklo a ziak lemlovin a lang. Mihring ziaa pawimawh em em thuhnuairawlhna leh inngaihtlawmna chhete pawh neilo ang maia mahni infakna nena mitthi tawh chungtlak kha a ropui lo hle nain kan reverend khan Article 19 delhkilhna te hi hlip vekin USA lama thusawi zalenna an dah chungnun ang khuan kan ramah pawh hian dah chungnung ve ila dan bawhchhiat pakhatmah a nei kher lo mai thei a ni. A chhan chu miin a chhia leh tha hriatna hmanga a duh ang taka thu a sawi/ziah hi a zalenna a ni tlat a ni.

Thusawi zalenna champion tu-a ngaih pakhat Evelyn Beatrice Hall (28 September 1868 – 13 April 1956) khan French thuziakmi Voltaire-a chanchin ziahna “The Friends of Voltaire” ah heti hian mi thusawi zalenna a dah hlutzia a ziak a ni – “I disapprove of what you say, but I will defend to the death your right to say it.”

Tharum thawh tura mi auchhuak te an nih loh chuan miin thu maksak pui pui an sawi pawh hi an zalenna-a ngaihsak a tha a. An thusawi kha kan duhlo a nih chuan thu vek hmangin kan cho let thei a ni.

Amaherawhchu, Pu Chuauthuama te ang Pathian Thu zir thuk te hian he zalenna hi an hmang thiamlo hle a tih loh theih loh a. Thusawi zalenna ka nei pawh ti se Bible zirtirnaa innghat chuan 1 Kor 10:23 te hi an bih chuan duh duh sawi thei an nilo tih chiang takin an inhria ang.

Pu Mafaa chungchang hrim hrima Pu Chuaua thuziakah khan Article 19 delhkilhna pakhat “defamation or incitement to an offence” tih hi ukil thu kher peih deuhvin hmang duh se court ah kan reverend hi a talbuai thei mai thei a ni.

Aside | Posted on by | Leave a comment

CITIZENSHIP AMENDMENT BILL 2016 lakah engtin nge kan him theih ang

CITIZENSHIP AMENDMENT BILL 2016
lakah engtin nge kan him theih ang?

A hmasa berah chuan Citizenship Amendment Bill 2016 hi Foreigner lakah chauh hman tur a ni tih i hre hmasa phawt ila a tha ang, India mi, State dang atanga Mizorama lo lutte lakah hian he dan hi hman theih a ni lo. Mizoram khawpui leh thingtlang lama Mizo nula nupui a nei inbengbel te, sumdawng khawsa zui ta te leh Hnathawka lo lut-ho lakah hian hman theih a ni lova, hengho laka hman tur a duan a ni lo tih hi hriat hmasak tur a ni.
CAB 2016 ah hian para tawp lamah Statement of Objects and reasons tih kan hmu a, a awmzia chu he dan siamthat hian a tum leh siamthat a nihna chhan sawifiahna ti ila a dik mai awm e. Dan hi a nihna ang taka kan hman dawn chuan he lai chang hi mangnghilh miah loh tur a ni a, hei hi dan hman sualna laka min vengtu tur a ni. Dan(Statue) reng reng preamble, Statement of Objects and reasons tarlante kalh a kalpui/hman hi dan a thiang lo a ni.

He dan siamthat Statement of Objects and reasons a kan hmuh dan chuan India thendarh(Independent) a nih hma a, India rama awm, an awmna State, Afganistan, Bangladesh leh Pakistan a chengte, tlem zawk(Minority) an nih avanga an tihretheih te India rama an lo luh a, kum 5 an awm chuan India khua leh tui nihna an dil thei a ni. Article 5 Constitution hnuaiah Citizenship(By Birth/decent) an dilin Indian an nih finfiah a harsat tawh thin a, chuvang chuan India khua leh tui nihna (Citizenship by Naturalization) Article 6 hnuaiah loh theih lova an dil a ngai thin a ni. Citizenship by Naturalization dil tur hian heng thiamna hrang hrang i.e. Science, philosophy, art, literature, world peace or human progress a hmingtha chungchuang an nih si loh chuan Third Schedule, Citizenship Act 1955 hnuaia dil thei an ni chauh a, chuvangin Citizenship By Naturalization hian dil mai mai mi pawh a ni lo a ni. Hetiang harsatna laka a chunga kan sawi sakhaw zuitu, sakhuana avanga tihduhdah tuar rawn tlanchhiate tan hamthatna siam sak hi he CAB 2016 hian a tum a ni.
Kan hriat tur chu he dan siamthat chhawr tangkai tur chuan heng condition-te hi a ngai.

Indian Origin an ni ngei tur a ni. Kan sawi tak thenawm ram atanga rawn raltlan ni ngawt mahse Indian origin an nih loh chuan he dan hi an hlawkpui ve ngawt tur a ni lo.

India rama rawn raltlan chu Afganistan, Bangladesh leh Pakistan a cheng Hindus, Sikhs, Buddists, Jains, Parsis leh Kristian zuitu an ni ngei tur a ni.

A chunga condition pahnih khi lo nei teh reng pawh nise, Sakhua tlem zawk an nihna avanga tihduhdah tawrh vanga raltlan an ni tur a ni.

Hetiang mi hi an nih chuan Passport/Visa nei lo mahse Illegal migrant(Dan lova rawn pemlut) ang a ngaih theih an ni lova, The Foreigners Act, 1948 leh the Passport Act, 1920 hnuaiah man emaw thawnlet emaw an ni tur a ni lo tih a ni. He dan siamthar tura buaipui mek laka kan ram leh hnam kan humhalh theih nan hetiang hian ngaihtuahna hmang ta ila;-

Supreme Court rulling pakhat Sarbananda Sonowal vs Union of India 2005 (5) SCC 665 a kan hmuh angin Foreigner chungchangah chuan “Burden of Proof is lay upon the Accused” tih a ni a, a awmzia chu Foreigner or Passport thubuai neitu(Accused) khan a chunga kan tarlan pathum a mi khi a ni ngei a ni tih a finfiah tur a ni, tihna a ni. Criminal Case dangah chuan Sawrkar lam(Prosecution) khan thilsualtitu a puh(Accused) khan a tisual ngei a ni tih an finfiah a ngai a, an finfiah zawh loh chuan thiamloh chantir theih a ni lo a ni. Chuvangin Foreigners chungchangah chuan Accused tan kha insawifiah kha thil harsa tak a ni a, ama insawifiahna ringawt khan awmzia a nei lova, finfiahna document emaw thuhretu a neih a ngai a ni. Thuhretu kha Sawrkar witness angin kohna senso kha an mahni, a kohtu khan a chawivek a ngai bawk a, Accused te tan thuhretu koh hi thil buai thlak tak, mi naran tan tih mai theih loh a ni. Kan hriat leh tur chu Foreigner thubuai hi Judicial Magistrate First Class Court-ah ngaihtuah tur a ni. Tichuan Foreigner tia kan Police ten an man khan Indian Origin a ni thu-te, Hindu, Sikh, Jain, Parsis emaw Christian anih thute a finfiah a ngai a, chumi piah lamah chuan a rawn tlanchhiat san ramah khan heng sakhua zuitu an nih avanga tihretheih an ni tih kha a finfiah a ngai bawk dawn tihna a ni.

Chutiang chu thil awm dan a nih avangin khatiang Foreigner Bangladesh atanga rawn lutte kha kan man hmiah hmiah ang a, thubuai siam sakin Court-ah an thubuai ngaihtuah a ni ang a, an insawifiah zawh loh chuan Jail tan bakah kan thawn hawng mai dawn a ni. Khatianga CAB 2016 a awm avanga Bangladesh atanga rawn raltlan man theih loh tawp a ngaih kha a dik lo tawp a, “man loh tur etc…” tihah khan “an insawifiah theih chuan” tih hi dan thuziakah awm lo mahse tel ve a ngaih tur a nih hmel hle mai. He danin a sawi ang mi hi anni tih finfiahna a awm hma chuan lo man kha kan tihmakmawh leh kan ram, kan hnam himna tur zawk a ni.

CAB 2016 ah hian khatiang dinhmuna an din avanga an awmna ram rawn tlanchhiatsan te kha Foreigner Act 1948 leh Passport Act, 1920 hnuaiah man loh tur a ti kha a ni a, Mizoram-ah erawh chuan khan dan bakah khan Bengal Eastern Frontier Regulation hnuaiah Inner Line Pass(ILP) an neih a ngai a, chutianga ILP kan pek phal bawkl si loh chuan rawn lut mahse kan man ang a Jail a tantir bakah an awmna ramah kan thawn hawng zel emaw ILP ngaihlohna Assam lamah kan chhuktir hmiah hmiah thei a ni. Khatiang Bangladesh atanga rawn lutte kha dan hrim hrim kan duh anih chuan ILP bakah IPC leh dan dang hnuaiah thubuai kan siam thei tho tihte pawh kan hriat tel a tha a ni.

Border Fencing hi hmanhmawh taka chhun zawm tur leh zo vat tura central nawr tura hma kan lak a ngai a ni. Border Police(BSF) lakah hian kan thikthu a chhiat hle pawh a ngai a, rinhlelhna kan neih phawt chuan Home Ministry lam kan hriattir zung zung a pawimawh khawp ang. BSF bakah hian ILP Check Gate te pawh kan siam a, kan Police ten khauh taka dan an kengkawh a tha khawp ang.

Heng bakah hian Tlabung hi District pek a, Chawngte nen a District Administration hi chak taka kan kaltir a ngai a ni, Deputy Commissioner bakah hian a chunga thubuai kan sawite ngaihtuah tur hian Court pawh Judicial Magistrate First Class chin tal dah ni bawk sela, chutiangin Indian Reserved Battalion pakhat tal dah ni bawk sela, tichuan CAB 2016 avanga kan harsatna kan tawh theih tam tak chu kan sukiang thei dawn a ni.

A tawp berah chuan NGO-te hian tha kan thlah loh a ngai a ni. IAS Officer Pu Lalnunmawia thlavang hauh nana hnam hnatlang kan koh ang kha tunahte hian koh a hun hle in alang a ni. Sawrkar-in ramri a ven dan-ahte, ILP Sawrkar-in a kalpui dan-ah te leh thil tam takah kan ram leh hnam himna tur nia kan ngaihah chuan kan thikthu a chhiat a, rang taka kan chet zung zung hi a pawimawh hle mai. NESO Total Band neih-te kha kan duh tawk mai emaw ni aw(?) tih theih in NGO hian tun hnaia CAB Pass chungchangah hian thawm kan nei nep a, mipui-te beiseina kan pha lo nasa hle a ni. A bik takin Mizo zawng zawng min khaikhawmtu YMA hi a pawimawh a, mipui-ten kan beisei aiin tun tumah pawh hian a thawm a zawi a ni. Theih tawpin kan ram leh hnam humhalh nan tan i han la sauh sauh teh ang u khai….

Aside | Posted on by | Leave a comment