‘ZORAM THILSIAM TINRENG HIAN NGHAKHLEL TAKIN CONGRESS SORKAR TLAK HUN AN THLIR : PU RAMA

Pu Zorama thian leh thawhpuite.
Congress zungpui a puak keh.
Sonia in Isua phatsan?
2018 inthlanah mnf tling dawn?

Ni 06.05.2017 khan Hortoki Vengchhaka Pu James Hrangkima tual zawlah Hortoki MNF Group leh MNF Unit-I, II, III leh IV huaihawtin ‘Mi thar lawmluhna programme’ hun hman a ni a, hetah hian Pu Zoramthanga MNF President chuan Congress atangin voters 195, ZNP -10 leh Neutral- 13, Total= 218 chu membership fee pe thlapin MNF-ah a lawmlut.

Khuallian Pu Zoramthanga chuan
” kum 1947 India Independence atangin kum 50 chuang India ramah Congress-in ro an rel tawh a. India ram min awp danah hausa ngai hlir hausa thur thurin rethei an rethei tial tial a, kan retheihna hmanga Vote inleitlin leh ringawt chauh hi an tum ber a ni tih hriain India mipuiin an kham tawh hle a; an hnawl tawh a ni. Chubakah, Congress hotu nu ber Pi Sonia-i’n South India-a, Tirupathi Temple-ah, Hindu puithiam Lord Krishna hmaah a fapa Rahul-a tan malsawmna a dil a. Roman Catholic Kristian nu chuan Isua Krista a phatsan tawh a ni. Chuta tang chuan inthlan awm tawhna apiangah an tla ta zawih zawih a. Kum 2014 MP Inthlanah MP 543 awmah MP 44 chauh an nei ta a. State inthlan apiangah an tla zawih zawih a. Tun atanga kum hnih velah chuan India ram State 29 awmah Punjab State-ah chiah an sorkar ka ring.

Mi tam takin Congress chu tla mahse an lian leh mai thin an ti a, tunhmaa an tlak kha chuan MP 100 atanga 200te an la nei tho thin a. Tunah erawh chuan, a chi kuitiahna tur Nursery thlengin a baw vek tawh a, dinchhuah ngaihna a awm tawh lo a, Congress mawng khal a puak keh zo tawh a ni, a ti.

MNF President chuan, ” Mizoramah pawh an hotuten Chal hnawihsenin Vai Pathian ban sawm nei hmaah an puja a, Kohhran pawi sawiin zu an zuar lui a, Zu avangin Police leh mipui an thi ruih ruih a, development a chawl thuap a, Congress sorkarna hnuai Mizoramah hian thim thuah hnih a thleng a ni ringawt tawh a ni. ”
” Sorkar hnathawk, kohhran, zirlai, sumdawng thleng hian he sorkar hi an kham tawhin an thin a ur zo tawh a, Congress hian sorkar leh tumin hma pawh an la tawh lo. Zoram thilsiam tinreng hian nghakhlel takin Congress sorkar tlak hun an thlir mek tawh a ni ber mai. Pathian leh mipui zarah nakum inthlanah kan tling ngei dawn a ni, a ti.

Pu Rama chuan, lo sorkar ta ula engtinnge in kal pui dan tur tih min zawt thin a. Kan term hmasa kha Aitechhin nan a hmang min ti a, mihring chu dam chhunga in zir tur kan ni. A hma ai khan ka kum pawh a lo upa tawh ang bawkin, finna leh remhriatna thuk zawk Zoram kaihruai tur hian ka nei tawh e. Kan sorkar lai khan kan ep lam Congress Central-ah an sorkar tho nachung khan, khami hun chhung pawh khan sum tam tak kan hailut thei tho a ni. Tunah chuan Central-ah kan thian leh thawhpuite an sorkar tawh a, Zoram development hnathawhna tur hian sum min pek an chak lutuk tih kan hria a ni. Zoram tana malsawmna pe turin an thinlungah Lalpan hna a thawk bawk ang. Kan sorkar ang a, chawa intodelh leh sumchang thlai lamah nasa takin hma kan la dawn a, Link Road-in hmuntin kil- tin kan tlawh pawhtir ang a, kan ram leilung hausakna kan hai chhuah chuan kan ram let thum kan chawm thei. Chhungtinin kum khatah cheng nuai 5 atanga nuai 10 kan lakluh theih nan hma kan la dawn a, Mizoram hi Economic Independence-a hruai kan tum a ni, a ti bawk.

He hun hi Pu Vanlalthanga, Group President MNF Hortoki chuan a kaihruai a, Pu Zoramthanga hi MNF General Headquarters atangin hruaitu engemaw zatin an tawiawm a ni.

Author : Slchhunga Gooner

Advertisements
Aside | Posted on by | Tagged , , , | Leave a comment

Mara Autonomous Dist Council inthlanpuiah rorellai Congress Party chuan MDC Seat 25 ah Seat 17 lain hneh takin an tling

Mara Autonomous Dist Council inthlanpuiah rorellai Congress Party chuan MDC Seat 25 ah Seat 17 lain hneh takin an tling a, Nimim chawhma dar 10:00 atang khan MADC inthlanna a vote tla te chhiar tan a ni a, Dawhkan 8 ah chhiar a ni a. Rorellai Congress chuan MDC bial 25 ah bial 17 lain hneh takin sawrkarna an siam leh ta a ni.

MNF & MDF co-ordination chuan bial 7 lain, MNF hian bial 5 lain MDF in bial 2 an la a. Independent Candidate KL.Bana chuan Tokalo bialah hnehna a chang ve bawk.

Tun tum MADC 11-na inthlannaah hian Tlinglo langsar zual zingah CEM nilai Pu RT. Zachono, Chairman nilai Pu LC. Chakhai, EM nilai leh CEM hlui IP. Junior, MDF President leh CEM hlui Pu M. Laikaw, MNF district President ni lai leh CEM hlui ni bawk Pu N. Viakhu te an tel a ni.

Tun tum Inthlanna vote tla te hi boruak muanawm leh hahdam taka chhiar theih a ni tih kan corr chuan a sawi a ni.

Congress Party atanga thlantlin MDC te hian nimin tlai khan Minister pahnih Pu Zodintluanga, Pu PC. Lalthanliana leh MDCC President Pu S. Hiato te hovin Sawrkar thar din dan tur leh CEM thar tur an ruahman fel nghal a, Congress Legislature party CEM atan N. Zakhai leh Chairman atan Pu H Sohlo te an thlang a ni.

Tun tum Inthlanna a in Hnehna tlem ber chu Siaha North-II bialah niin Congress Candidate Pu V. Vanhupa chuan Coordination Candidate leh Bialtu MDC nilai C. Lawbei chu vote 10 in a hneh a,

Inhnehna sang ber chu Siaha East-II bial niin Pu HC. Biakcheuva Coordination Candidate chuan Vote 505 in Chairman nilai Congress Candidate Pu LC. Chakhai a hneh a ni.

MADC inthlan result hriat kim a nih hnu hian he inthlan chuhtu Congress, MNF leh BJP te chuan tluang taka inthlan vote chhiar zawh a ni ta chu lawmawm an tih thu AIR an hrilh a.

MPCC Vice President, Home Minister Pu R. Lalzirliana chuan an party chu a kal ngaia kal zelin, hma a sawn zel niin a sawi.

MNF Party President Pu Zoramthanga chuan MADC inthlan result-ah an lawm kim lo mah se an phu tawk result an nei nia a hriat thu te, MADC sorkar din tirh ata tawh Congress rorelna hmun, rorel lai leh sum leh pai pawh nei tam zawk an nih vangin Congress chuan hnehna an chang niin a sawi.

BJP Mizoram Pradesh President Dr. JV Hluna pawhin thlantlin tak Congress MDC te a lawmpui thu sawiin, sorkar tha tak an din a duhsak thu a sawi a, an party chu inthlanna hmunah chuan nausen ang chauha tharlam an la nih vangin campaign lai pawhin tlin an inrin vak loh thu a sawi a ni.

Aside | Posted on by | Tagged , , , | Leave a comment

Ranchaw leina thubuai ah Laloo bawk

Ranchaw leina tur sum cheng vaibelchhe tam tak tihchingpen thubuaia Jharkhand High Court-in thiam a chan tir hnuah Supreme Court chuan Bihar Chief Minister hlui, RJD President ni bawk, Lalu Prasad Yadav-a chu thubuai chi hrang 4-ah, a hranpa theuha a chungchang ngaihtuah turin vawiin khan thupek a siam a, heng thubuai hrang hrangte hi thla 9 chhunga ngaihtuah fel turin thupek a chhuah bawk.

Lalu Prasad-a chungchanga CBI-in Jharkhand High Court thu tlukna siam khin letna, Supreme Court-a thehluh chu pawmin Justice Arun Mishra kaihhruai Bench chuan nimin may 8 khan thupek hi a siam a ni.

Lalu Prasad-a Chief Minister nih laia ran chaw leina tur chhuanlama Bihar Dist hrang hranga Animal Husbandry Dept atanga cheng vbch 900, diklo taka la chhuaka tihchingpen thubuaiah hian CBI chuan Lalu Prasad-a leh mithenkhat dang lakah thubuai engemawzat a ziak lut a, kum 2014 khan Jharkhand High Court chuan thubuai chi hrang hrangah thuhretute leh finfiahna inang hmangin mipakhat chungthu a ngaihtuah theih loh tih behchhanin he thubuaia inhnamhnawiha puhte thubuai hrang hrang chu a ti tawp a ni.

Aside | Posted on by | Tagged , , | Leave a comment

Champhai pitar sawisa

May 8 chawhnu dar khat vel khan misual tu a nih la hriat loh chuan Champhai Kanan Venga hmeithai Pi Vanlalneihmawii, kum 62 chu a in chhungah sawisain a pawisa Cheng Sing 3 vel a laksak.

Pi Vanlalneihmawii hi a u, Pu Sangbiakvela te In hnuaiah khawsain Vaihlo zuara eizawng a ni a. A in hnuaia vaihlo a chhut laiin a ina misual thawm hriain a lut chho a. He misual hian dawhkanah pawisa lo chhiarin Pi Vanneihmawii chu vau betin kut a thlak a, a lu-a hliam tam tak a tawrh vangin Champhai Dist.Hospital-ah dah luh a ni.Police hotute hnen a\anga thu dawn danin he hmeithai kut thlaktu hi man tuma zawn mek a ni a, Pi Vanlalneihmawii pawh hian amah kut thlaktu pian hmang leh thawmhnaw inbel te a sawi thei a ni

Aside | Posted on by | Tagged , , | Leave a comment

FRANCE PRESIDENT ATAN “EMMANUEL MACRON” HNEH TAKA THLAN TLIN A NI

Nimin May 7, dar 8am-8pm inkara French Presidential election-ah hneh takin centrist-socialist”En Marche (I kal zel ang)” tih pawl candidate Emmanuel Macron (39) chuan, amah khingtu far-right National Front party candidate leh an hotunu Marine Le Pen (48)chu 66.1% (20,703,694) hmuin a hneh ta, Marine Le Pen hian vote 33.9% (10,637,120) a hmu a ni.

Macron hi Napoleon a hnu lama French mipuiten President atan an thlan naupang ber a ni. Hetih rualin kum 60 kaltaa vote tlakchhiat ber tum niin, 9% zet voter te chuan Le Pen leh Macron hi vote chaklo ve ve in, vote thlakna turah engmah an chhu lo tih a ni. National Front party hian kum 2002 President inthlanah 18% chauh vote an hmuh laiin, tunah 33% chuang an hmuh vangin hma an sawn hlea ngaih a ni. Kum 2002 khan Le Pen-i pa National Front party dintu Jean Le Pen chuan Jacquez Chiraq nen inkhingin, vote maktaduai 11 a lo hmu tawh a, Chiraq a hnehlo a ni.

France inthlan result hi ram dang anglo takin, poll survey a awlsam em em a, polling station 200 thlan bika vote thlaktute an vote thlakna lam kha sawi nghalin, chumi mil chuan ram pum huapa tling zawk tur a hriat ruak thin a ni. Heng thlan bik polling station te hi thingtlang, khawpui leh area bikah ruat thin a ni.

Louvre hmuna chak lawmnaah Emmanuel Macron chu a nupui Brigitte (64) leh a faten tawiawmin, Macron chuan amah thlawptute chu, “In hnehna a ni. Chawimawina ropui leh mawhphurhna lian tak ka kovah innghat a a, French mipui venghim turin theihtawp chhuah ka tum ang. Naktuk atangin hna kan thawk nghal anga; kan chakna te kan siam thar ang. Hlauhna tan hmun kan pe lo anga, kan inthen darh lovang. Thil awlsam erawh a ni dawn lo. Hna thawh chu a hautak hle ang. In huaisenna chuan hma lam min pan tir anga, kan ram leh mipuite chu ka inpumkhat tir ang. Inngaitlawm tak chungin in rawng ka bawl anga. Zalenna (liberty), intluktlanna (equality) leh inpumkhatna (fraternity) thlen tir a ni ang. Hmangaihna nen in tan ka thawk dawn a ni…Vive La Republique, vive la France” tiin, mipuiin kut beng hluah hluahin, Frane flag an vai phe suau suau mai a ni.

Marine Le Pen-i te pawl pawhin Chalet du Lac-Bois de Vincennes ah inhmukhawmin, France hnam hla “La Merseillaise” tih sa in, an ri luih luih bawk a. Le Pen chuan tun tumah chaklo zawk ni mahse, hmalam pan zel turin leh amah thlawptute chu French politic ah Eptu party lian ber ni a an thu leh hla te au chhuah pui theihna hun remchang a inherchhuak mek a ni, tiin June 11-18 a MP thlan tin zawn ranin mipuite a fuih ve bawk.

Macron hi anti-establishment atanga rawn invawrh chho niin, Donald Trump rawn tlin dan nen pawh an inang hle a ni. Khawvel ram hruaitu hrang hrangin lawmpuina an thawn tawh a, Russia President Vladimir Putin erawh a tel ve lo! Donald Trump chuan thlawp zawk lo mahse lawmpuina a thawn nghal a, British PM Theresa May chuan, “President thar nen chuan kan thawkho ang a, France leh Britain chu inthian tha tak a ni reng ang” a ti. Australian PM Macolm Turnbull leh ex-PM Kevin Rudd te pawh lawmpuina an thawn a, German Chancellor Angela Merkel pawhin, “Europe ram chak zawk leh Franco-Germanthawhona tha zawk leh chak zawk a awm ang” tiin, lawmpuina thu thawnin EU Commission President Jean Claude Juncker chuan, “French mipuiten Europe future tur an siam ta, Europe chu a chak zual ang” tiin, EU Council President Donald Tusk pawhin, “Liberty, Equality, Fraternity…” tiin, lawmpuina a hlan bawk.

May 15 ah President nihna chelh tanin, May 14 ah President Francois Hollande chuan thuneihna a kutah a hlan ang a, June 11-18 ah MP inthlang lehin Macron hian Parliament (National Assembly) ah a mi duhzawng French PM tur a ruat ang. Ama pawl din En Marche chuan MP pawh an la nei lo, mi 15 candidate tur hming erawh an puang tawh! Le Pen i pawl National Front erawhin MP 2 chiah an la nei bawk. Heti chunga an invawrh sang thei hi an ngaihsanawm dun hle a ni.

Hetia Macron a chak ve leh hian Euro pawisa hlutna chu thla 6 chhunga a san ber a thlengchho dawrh a ni

Aside | Posted on by | Tagged , , , | Leave a comment

Sex video i siam khan

VANNEIHTLUANGA
🙏🏻🙏🏻🙏🏻✝🙏🏻🙏🏻🙏🏻
I chunga thil thleng ni sela, i beih leta i khin nasat zawh poh leh i ‘channa film’ a lar ang. A lar zawh poh leh i mualpho bawk ang.
Court-a thiam i channa khan mipui computer files a nawhrehtir thei chuang lo. Nawtreh zo vek thei pawh ni la, i kapkar kha ‘public property’ a ni ta tlat a, ‘mipui mitthla’ i nawhrehsak thei tawh chuang lo.

Tin, digital khawvelah kan awm a, digital video clip copy khat a awm hian copy sangkhat a darh nghal angah ngai rawh. I nawtreh zo vek emaw i tih kha a rawn inlar leh thin ang. I zawn nasat zawh poh leh an roh dawn. I hming a thata mi hriat i hlawh rei zawh poh leh ‘i channa film’ chu a dam rei ang.

I piangthar a nih pawhin, testimony i sawi zan inkhawm banah i film testimonial zawk kha an release thar leh thin ang. I kalna apiangah i dam chhungin ‘he chhinchhiahna’ hian a zui tawh dawn che.

I kawppui chuan a iai chuang lo che a, in innei a, fa in nei ta. Ngai teh, a awmzia a hriat thiam hma atangin i fa chu an chhaih dawn. I fa chuan i film siam chu a la en dawn…

A reh tawh emaw i tih hnuah, i fanu pasal neihna Sawmna Card in han sem ang a, “A nu chu maw… hmana zahmawh film lar deuha mi kha…” an la ti dawn chauh.

I sex video minute khat emaw lek hmang hian, nangmah mai ni lovin, i tu leh fate engthawlna tur thlengin i rehhlumsak thei. Inawhhlum pawh a sawt chuang lo.

I thlarauvin vanram a kai pawhin i video chuan rinawm takin lei lamah sual rawng a bawl chhunzawm zel ang. Heti khawpa ruh langa kan inhrilh hnu pawha i siam duh talh a nih chuan.. i thu a ni e.

Aside | Posted on by | Tagged , | Leave a comment

TUIKUAL SOUTH TLANGVAL TUIAH TLAHLUM

May 8 sunday chawhnu lam khan Reiek kai, Tlawng luiah Tuikual south tleirawl mi 2 tui an tlahlum.

F. Lalchhandama (18) s/o F Lalmalsawma leh C. Lalremkima (16) s/o C. Lalngaihawma sec-4 ve ve te an ni.
C. Lalngaihawma (Mapuia) hi tui ah tla in a thianpa F. Lalchhandama hian chhan a tumna lamah a tla ve ta nghal niin thulakna hian a tarlang a ni.

Tuitla te hi an tlakna ațanga 200mtrs velah an ruang hi hmuh a ni.

Aside | Posted on by | Tagged , , | Leave a comment

MIZO SEX VIDEO&PIC CHUNGCHANG. (Marlon Tetea Chhakchhuak)

Mizo sex video&Pic hi hmuh tur a awm ta nual mai le.. Heng Video&Pic rawn thehdarh fo tu te hi Mizo Mipa te kanni tlangpui thin… Fin a hun a, Harh avan hun em..
.
Kan Mizo nula te hi tumah famkim an awmlo a, Zu duh tak leh Hur herh tak pawh an awm nual ta ve ang chu… Bible pawn “Anmahni ah chuan: hurna an ching a” a tih kha… Tungchho a kal mihring hi Hur lo tak tak kan awm hleinem… Hmeichhia te hi hur ve ta miah lo se a mangang tur chu mipa te hi kanni awm e… Ngaihtuah zawm zel teh le…
.
Hmeichhia te mi awmnem leh chaklo zawk anni a, Mipa te ring ngam in an sex video emaw Picture emaw pawh min thawn ani thei e, Engvangin nge kan lo thehdarh leh fo thin le? Hmeichhia hi Chhia annih na lai ah pawh a mualpho sa hi annia, a aia nasa a tih mualpho duh tu Mipa chu MIHRING a chhiar tlak ani lo ve…
.
Hmeichhia te hian engvangpawh nise, Tisa chakna hi annei ve vek a, chu antisa chakna phuhruk sak thei tu chu mipa anni… An harsatna leh an mamawh Phuhruk tu leh an nihna ang tak a pawm thiam an mamawh ve fo asin…. Engatinge Mihring tlinglo tur khawp a mualpho a kan siam fo thin ni….
.
Mizo mipa ten hei hre thar teh ang u… Kan mizo nula ten hnam dang Vai/Negro an lo kawp anih chuan an tisual chhiava der a… Mahse engatinge an mualpho ti zual tur a, kan thehdarh chiam mai zel ni….. A tihsual man chu aman ala tel khawp ang… Kan hnam rohlu kan hnam darthlalang Kan nula te ah hian mifel hlir hmuh inring lo ila, Mi hur herh pakhat kan hmuh avang a, mizo hmeichhe pumpui Mualpho hi enge a ngaihna? Engvanginnge thehdarh chak a kan zat et et zel mai mi?
.
Tumah famkim kan awm lo tih kan hria e… Famkim lo in Famkimlo bawk tih famkim loh belhchhah hi sim ahun ta e…. engang pawn lo rui sela, lo che over sela… A duhtawk in lo hur sela, a thu alawm… A siamtu in a chunga a rorel sak hun nghak ila, A damchhung kumkhaw chawrlohna tur lo siam sak fo hi sim tawh teh ang u.

Hei hi ram leh hnam humhalhna kawng khat chu ani e.

Aside | Posted on by | Tagged , | 1 Comment

I duh i chiang em

*Hmeichhe Simple deuh ka duh kan ti a – In chei nalh ver vawr chu hmuhnawm kan ti leh hle si*

*Kut hnathawh ka ngaisang kan ti a – Makpa atan chuan kut hnathawklo nge nge chu kan duh leh si a*

*Cement Mistiri hna hi Mizo ten thawk ang u a tha ti tu khan – A fate Cement mistiri nih tumin a train ngai miah lo*

*Hausa ka ngaisanglo kan ti a – Hausak nge nge chu kan chak a, hausak tumin kan phe suau suau a*

*Hmel chu a ni ber lo kan ti a – Hmeltha nge nge erawh kan thlek ngunin, kan thin lai deuh*

*Khawvel lama san kher a ni lo kan ti a – Khawvel thila sanglo erawh kan ngaisang mawh khawp*

*Kan ngaihsan leh kan duh hi kan lo hre tak tak lo nge, a lem hian kan nung mai mai le……*

Aside | Posted on by | Tagged , | Leave a comment

FRANCE PRESIDENT THLANIN EU A TIPHEL ANG EM? EMMANUEL MACRON EMAIL HACK SAK A NI

Naktuk Sunday zing 8am-8pm inkarah French mipuite maktaduai 47 voter te chuan an ram President tur an thlang dawn ta. EU leh Globalization dotu far-right National Front leader Marine Le Pen (48) leh EU tantu, left-centrist En Marche (On the Move) hotu Emmanuel Macron (39) te chu second round vote/finale ah inkhing tur an ni.

Macron a email hi “hack” sak niin tarlan a ni a, Interior Ministry lam chuan an chhui zui leh zui loh an puang zar lo. Russia President Vladimir Putin chuan French Presidential election ah an inrawlh loh tur thu a lo sawi tawh a, he Macron-a email hack tute hi tute nge hriat a ni lo. WikiLeakslam chuan heng email hack atangin thlalak leh message andawng teuh tih an sawi a, heta hack-na hmanrua hi EMLEAKS tih niin an sawi a ni.

Marine Le Pen chuan a final campaign thlalak chu kum 800zet a upa, Middle Ages hun laia France Lal zawng zawngte-mi 25 lai Lallukhum an lo khumtirna hmun Reims Cathedral hmun atangin a thlalak a rawn tarlang a, he lai hi France hmar lama awm ni.

Macron thung chuan kum Zabi-16na hun laia sak Rodez Cathedral atanga a selfie thla a lo tarlang a, he lai hi France chhim thlang lam a ni.

He mite pahnih atangin tling zawk tur hriat an harsa hle a, Barack Obama chuan Macron hi a thlawp tih a puang a, Donald Trump chuan Le Pen hi “French mipui aiawh dik tak” tiin comment a lo pe tawh bawk.

An tling a nih chuan Le Pen chuan tlin lawmna inkhawm chu Chalet du Luc hmuna Napolean III chennah lawm a tum a, Paris chhak lam Bois de Vinnes ah a ni ang. Macron erawh chuan Esplanade du Louvre, central Paris ah lawmna neih a tum thung. Le Pen chuan Macron-a thlawptute’n tharum hmangin an bei a, an tibuai thin tih a sawi a; Macron hian amah thlawptute chu “Le Pen chu aukhum (boo) satliah suh u, bei (fight) rawh u” tiin a lo fuih tawh a ni.

France inthlan hian Mizo thenkhatten “Sakawlh” ang hiala an sawi, European Union (EU) kal zel dan tur bakah, khawvel a nghawng dawn vangin ngaihven a hlawh em em a, “Mizo Special Report” member nuai 1 leh sing 9.3 vel pawhin in hriat ve in phu em a hriat a nih vangin, report kan han ziak hram hram thin a ni e. Obamacare, an lo sawi Sakawlh, erawh chu Trump Admin-ten a vuakhlumna turin House ah 217-213 in an lo paihsak tawh bawk si!

Poll hnuhnung berah chuan Le Pen-61.5%, Macron-62% angin an chhut sak. An boruak hi a inbuk tawk (neck to neck) hle a ni

Author : Ct Lalrinawma

Aside | Posted on by | Tagged , , , | Leave a comment