LUNGZARHTUM RAMSIAL HI – By Sangzuala Pachuau

Lungzarhtum ramsial hi tun hnaiah ramsial ni lo leh, ramhnuaia sial tla bo rei tawh a nih a rinawm thu PCCF thu sawi ni awm tak kan hre tawh a. Nov ni 5 chhuak Zalen chanchinbuah chuan, ‘Sele ni lovin ka sial thlahte’ tih thupui hmangin Darlawn khua Pu Tlangthankhuma’n a sial thlah kal zel a nih a rin thu a lo chhuak a. He thu khar nan hian, ”Chhimtuipui Wildlife Division hotute chuan he sial an hmuh dan hi sawiin Sele a ang lo an tih thu Zalen an hrilh a. India rama Sele dang nen a inan loh thu leh sial chi khat rama lo awm rei tawh a ang niin an sawi,’ tih a hmang a. Chhimtuipui Wildlife Division hi a awm reng em, a awm a nih chuan a chunga sawi ang hian Zalen an lo hrilh reng em tih hi hriat chian tum mek a ni.
image

Lungzarhtum ramsial hi ramsial nge sial tih i hriat chian duh chuan a hnuaia ramsial document hi lo chhiar chhuak hram la, i ngaihdan kan lo nghak reng e. (thlalak hi thiante thlalak ka hmansak a ni e.)
image

RAMSIAL
SANGZUALA PACHUAU·
MONDAY, 30 OCTOBER 2017

Ramsial: Mizoten sial kan vulh a, in lama kawl chang awm mah se an hun tam zawk chu ramhnuaiah an hmang hial ang a, mahse vulh an nih tlat avangin mihring vulh, ran an ni a, kan ranvulh zingah chuan a ropui ber leh pawimawh ber a ni bawk. Mihring vulh loh, khuarela ramhnuaia awm, sial ang thova a ruala khawsa an awm a, chu’ng chu hming hranpa pe lovin ‘ramsial’ kan ti a, rama cheng sial tihna a ni mai. Ramsa a ruala awm thinte ang bawkin a pa, a pui, a la leh a note te hi a huhovin an awm a, ramsial rual kan ti a, a pachal, kum lama upa, chak leh huai ber a awm chawk a, chu chuan chi thlahtu nih a hauh deuh ber a, chumi bak chu a rualah khan mawh a phur tak tak lo niin hriat a ni. A rual hotu tak chu a puichhur ber a ni thin zawk. Ramsa a ruala awmte nunphung ang thovin amah ngamtu an awma chi thlahtu pui ber nihna a chelh zawh loh chinah amaha tla fal ta an awm a, a rual atanga chhuak kher lo pawh an awm thei tho bawk. Tin, a nu hur dang um vanga a rual atanga chhuak pawh an awm thin. Hetiang kher lo pawh hian a rual zing atanga hnawh chhuah, a pachal ni kher lo pawh a awm ve thin tih hriat a ni bawk. Hei bakah hian ramsial pa hi chhan hrang hrang avangin a rual atangin an chhuak thei a, chu’ngho chuan a paruala (a pa hlang) khawsak chang an nei ve an ti. A nu erawh a mala tla fal a awm ve ngai lo tluk a ni.

A zir miten an chhinchhiah dan chuan, ramsial dam chen hi mihringin an khawi dam rei zawng an chhinchhiah chu kum 30 a ni a, chutiang chenah chuan ramsial pa chu a chalngeng hman hle ang tih a chiang. Hei ai hian ramhnuaia awm, khawi ni lo chu an dam rei thei zawk maithei bawk. Mi thiamte chhinchhiah danin kum 5 vel bawrah hian a pa chu a taksa a puitling thawkhat hman tawh a, a len tur ang pangngai a ni chho tan tawh tihna a ni a, a ki leh a taksa erawh chu an dam chhunga thang danglam ve reng a ni tih mi thiamten an sawi a ni.
A pianhmang: In lama kan se vulh nen hian inanna tam tak a neih laiin a danglamna langsar tak tak pawh a awm bawk. A hriat awlsam nan in lama kan se vulh nen hian khaikhin mai ila a chiang thei zawk awm e.

1. Ki (Horn):
– Se ki hi a mum (conical) a ni a, ramsial ki hi se ki aiin a phek (flat) zawk.
– Se ki chu a pumin a dum (black) a ni tlangpui a, a chang chuan sial zingah pawh hian a ki eng a awm ve thin a. Mahse, hei hi chu piansualna chi khat ‘partial albinism’ vang niin an  sawi. Hetianga sial ki eng ho hi chu an taksa rawngah pawh a tuipal lai chauh var lovin a  taksa, a bikin a lu lamah rawng varin a kap ve tho thin. Ramsial ki chu a tlangpuiin a hmawr  a dum a, a laihawl vel atanga a kiber thlengin a eng (yellow) thin a, a laihawl hi a eng nasa  zual thin.
Ramsial ki hi a kual deuh vek a, kual lo a lo awm palh a nih pawhin a vang viau ang. Se ki erawh chu chhung lamah a kual lut ve ngai lo va, a zâr zawngin a awm deuh vek a ni.

2. Chal (Forehead): Vulh chi sial chu a chal a phek/zawl (flat) laiin ramsial chal chu chhung lamah a khuar lut (concave) thin. A chal hi hma lam atanga enin chhip pawng thur angin a lang bawk.

3. Thlukvum (Back ridge): Sial aiin ramsial hian thlukvum a nei lian/sang zawk.

4. Ke (Limb): A taksa nena khaikhinin sial aiin ramsial hi an ruakhau zawk.

5. Len lam (Size): Dan naranin mihring vulh ai hian nasa takin a lianin a sa pawh a muk zawk niin a lang. Tuna Lungzarhtum ramsial hi a dar (wither) zawna tehin feet 6 leh inches 3-5 vel a ni a, sial zingah hetianga sang hi record a la awm lo. Kan se vulh lian ber pawla kan sawi pawh hi quintal 5 a tling mawh viau a, mahse ramsial erawh chu a nu puitling hi kg 700 vel a ni tlangpui a, a pa puitling rih zawng hi kg 800-1200 vel bawr a ni a, Mizorama awm ang chi ramsial pa thankin chu kg 1200 vel a ni deuh hawlh a, a lian zual erawh chu kg 1500 vel lai a ni thei niin mi thiamten an ziak a ni.

Tin, a rawng hi a dum a ni tlangpui a, a khup chung hret achin hnuai lam var a ni tlangpui bawk a, chu chu a tuipal var tia an sawi thin chhan hi a ni. A chal hi a var paw phuk thin bawk a, a chenna ramhmul, sik leh sa azirin a rawng hi chu danglam hret hret pawh a awm thei.

A hming hi:
Mizote tana sa pawimawh tak, thangchhuahna tur pawha kah tel ve ngaia an sawi chu tumpang a ni a, chu chu ramsial tihna a ni. Sa ropui tak leh kah pawh harsa tak a nih avangin an ngaisangin a lu tar thei nih pawh an chhuang thin hle bawk. Chutianga sa kah har leh ropui a nih avang chuan sawi dan hrang hrang pawh an nei a, tumpangsial tih te, fungtian tih te leh ramchalvawm tih te pawhin an sawi thin bawk. Kan hla hlui tak takah pawh an lo hmang thin a ni tih a chianna chu, ‘Tumpangsialin a vawr e Lalhmingliana,’ tih a awm a. Lalchhungi zaiah pawh a nutapa Hleithanga (Thenkhat chuan Ṭhahleia niin an sawi) ramsial kah a phuahna ah,

Fungtian lu nen Hleite tlangah au ve,
Kha zawng relthang khaw zo chhum ang,
A kiang kim rawh maw.’

tih kan hmu a, hla dangah pawh a awm nual mai. Hetiang a nih avang hian a hmingah ngawt pawh hian kan chiang lo hle a, tumpang, sele leh kawlfung bikah hian kan chiang lo zual niin a lang a, kan sawi ve thin zinga pakhat rauri hi erawh chu danglam deuhvin a lang. Hla hrang hrang bakah, thuziak leh thawnthu hrang hrang kan hmuh phakah chuan heng a chunga hming pathum kan sawi hi a lang hlawm a, mahse ‘ramsial’ tihah hian a leng vek nia a lan avangin, mihring vulh loh, ramhnuaia se rual lo awm, kan history leh kan thu leh hlaa lo lang bakah tun thlenga hmuh theiha la awm hi ‘RAMSIAL’ a ni tih chu a chiang ta phawt a ni.

Tumpang: Tumpang tih hi sawi zing viau mah ila, a nihna dik tak hre chiang han zawh chhuah mai tur an vang tawh bawk nen, ngun taka zir chung leh ngaihtuah chungin sawi fiah i han tum dawn teh ang. Tumpang kan sawi hian tumpangchal tih a ni deuh kher thin a, chu chuan thui tak a kawk nghal thei ang. James Dokhuma thawnthu ziah, Tumpangchal nge Saithangpuii tihah pawh khan tumpang ti satliah ngawt lovin tumpangchal tih a ni kher a. Chuta a sawi dan chuan, a ki berah (a ki ber tih hi a ki bul lama chuar awm nuk, a ki inkheh vanga a ki tuamtu tawlh tawm khawm zel hi a ni) bâk a lawi thei tih a nih bakah, a ki ber leh a ki hmawr inkar chu khawipui hnûn ang maia eng fîm kûk a nih thu a chuang bawk.

A chal pângah mi pathum an thu tlar thei a, a ki lehlam a khaikhupa dah kurkum chhungah raipuar an bawkvak lut han han thei tih a ni a. Pasaltha Sawibunga ramsial kah, hrâng nasa tak pawh kha tumpang tih a ni bawk. Tin, Mizorama sial lian hmingthang zinga sawi tel ve thin kha, Pawihbawiha tumpangsial tih a ni bawk a, a se rual ramtla zinga a nu hur, tumpangin a thlah a ni tih an sawi chiang hle.

Kha sial lenzia kha an chhinchhiah tha hle a, a chakzia pawh hahipa sawi a ni a, Saizahawla nena inbei kha a ni.

‌     Tichuan, tumpang chu ramsial a ni a, tumpang an sawi apiang hi a pachal a ni deuh zel tih a lang a, Pawihbawiha sial kha a tet lai atanga tumpangsial tih ni tho mah se, a thlahtu tumpangchal vanga chutianga sawi chu an nih zawk a rinawm. Chuti a lo nih si chuan tumpang hi a eng ber nge ni ta ang le, a hnu lama sawi chianah dah ta ila.

Sele: Ramsial a ni tih a chiang phawt a, Mizorama kan hriat lar ber pakhat, hlaah pawh an chawi vul, Darzo sih rawn tlantu kha ‘Darzo sele’ tih a ni. A pachal a ni a, a lianin a ki pawh a ropui tham hle a ni tih a chiang viau bawk a. Pu Lalhrima Sailo chuan sele hniak a hmuh pakhat chu a hunter boot No 8 hniak nen inthuah tawk deuhthaw khawpa lian a nih thu a sawi a, a hnua Hrangthanga’n sele chal a kah thu leh sial pangngaiin a khan lohzia pawh chiang takin a sawi a, ramsial pachal, sele tia sawi kan nei tho tih a chiang leh hle. Chutiang a nih chuan, sele chal lian tak tak, ropui tak tak kan nei tho tih a lo lang ve leh ta si a, tumpang leh sele chu a chi hran a ni em tih zawhna a lo awm leh thei ta a, hei pawh hi a khaikhawmna lama khaikhin atan dah tha ta rih ila.

Kawlfung: Ramsial chi tho a ni a, a hma lama Lalchhungi hlaa kan sawi kha ‘fungtian’ tih ni mah se, sele emaw tumpang emaw sawina ni thovin a lang tlat si a ni. Kawlfung hi chu a ropui leh a len avanga kap thin an ni pawhin a lang lo va, a ki vang liau liauva kap thin an nih hmel zawk. A ki hi hmanlai silai hlo bawm, tun thlengah hmuh tur tam tak la awm, ‘fungki’ hi a ni. Kawlfung ki atanga siam a ni tihna a nih ber chu. Mahse hetianga fungki atana an hman leh an sawi mai lo phei hi chu a pianhmang leh a taksa len lam, a nih phung, sele leh tumpang nen thuhmun a ni em tih hi chiang taka sawina hmuh tur a vang em em mai a, Mizoram State Museum-ah erawh a hranpa ngatin kawlfung lu chu an tar kalh mai thung. Hei pawh hi khaikhawmna lama sawi belhah khek leh ila.

Rauri: Ramsial zingah chuan sawi hlawh lo ber leh mi tam zawkin an hriat loh a ni a, amaherawhchu sawi a awm thin tho avangin awm lo tawp chu ni theiin a lang lo. Mahse rauri hi chuan danglam deuhna a nei ta thung a ni. Ramsial chi khat a ruala awm ve tho, a puitling pawh lian teh chiam lo a ni tih sawina a awm nual mai, kah pawh an tum ngai lo a nih hmel. James Dokhuma Khawhar In buah khan ‘ramsial rauri’ tih a ni a, kah tlakah an ruat meuh lo, a taksa a len loh bakah a ki a ropui tham lo bawk.

R.Kapzinga chuan a lehkhabu Khawhring leh Sai Ramah tih phek 204-naah chuan hetiang hian a ziak a. ‘Chuta tanga rei vak lovah chuan ramsial rual an lo kal leh a, an vai chuan pasarih an ni a. Ramsial te chi an ni a, a pachal ber pawh chu a dang ho ai chuan a lawk deuh naa ramsial lian chi zinga a pui naran tiat vel chu a ni ang tih tur chauh, buang deuh lek lek, a mawngtam lam chu sen deuh thâng hi a ni a. Upain sele an lo tih thin ang hi a ni maithei.’

‘Ka hriat ve dan ti ila ka hmuh ve dan a ni zawk ang chu, ramsialah hian a te chi leh a lian chi a hranin an awm a. A te chi zinga a pachal chu sele a ni a, a lian chi zinga a chal ki tha chu tumpang an ti leh mai a ni awm mang e aw ka ti a. Dik maw dik lo maw, ka hmuh ve tawh thin dan chu chutiang chu a ni ve miau va.’ tiin a sawi a. He a se rual hmuhna hmun hi Kahsalong forest chhung a ni a, Bangladesh ram chhung, Mizoram atang pawha hla lo a ni. Heta ramsial te chi a tih hi rauri ni ngeia a lan avangin kan pi leh puten rauri an lo sawi thin pawh hi Mizoram chhungah a lo awm ve tawh ngei a ni ang tih a tirinawm ta hle bawk, awm miah lo se chuan sawi ngawt chhan tur awmin a lang tlat lo a ni. Tin, sele leh tumpang chungchang a sawi pawh hi a hre fuh lo deuh niin a lang thei a. A tawpa khaikhinna lamah tihchian kan tum bawk dawn nia.

Khaikhinna: Ramsial tihah hi chuan thu dang awm theiin a lang lo va, kan chiang ta phawt a. Chi hrang hranga kan sawi thin khai khawmtu a ‘generic name’ a ni tih chu hnial ngai lovin a lang chiang a, hming hrang hrang kan vuah hi i han sawi chiang ve dawn thung teh ang.

Tumpang leh Sele hi a danglam em:
Mizote hian tumpang leh sele hi a hming ang hian se chi dang niin kan sawi thin tih a lang a, chu chu zir chianna leh chik taka ngaihtuah lovin kan pawm deuh burh ringawt niin a lang. Thu leh hla bakah mi hrang hrang sawi han lak khawmin chi dang niin a lang thei lo tlat. Tumpang leh sele kan sawi apiangin a pachal, a ki kheh chin, a taksa pawh puitling tawh a ni tih a lang a. Nimahsela engati nge hming pahnih kan lo pek tlat tih hi ngaihtuah tham tak a ni. Ramsial chanchin sawi tham reng reng kan hriat phakah chuan a pa puitling, a chalngeng chin tawh vek a kawh avangin tumpang emaw, sele emaw chu a pachal tia chhal tham a ni zel tih a chiang ta phawt a.
Ramsial lu ropui chin, tun thlenga miin an tar kan hmuh phak zawng zawng kan han enin, sele lu a ni e an tih leh tumpang lu a ni e an tih zawng zawng pawh han khaikhin ila, a chi hrang a ni thei lo. Sazuk hi chi khat rau rauvah pawh a ki pianhmang a inang lo nasa em em tih kan hriat ang hian, se chi khat, hming hran kan pek mai mai a ni tih a lo chiang ta a ni. A lu leh a ki hi se chi dang a ni tih fiah nan a hman tlak lo va, sele lu an tih leh tumpang lu an tih tam tak pawh hi a inang reng a, tumpang lu theuh theuh pawh a ki pianhmang te a inang lo tho va, sele pawh chutiang tho chu a ni ve a, a kual deuh te, a zar deuh te, a kual nasa deuh te pawh a awm thei vek a ni. Chuvangin sa thuhmun a ni tih a lang reng a, sawi tawh angin a lu leh a ki pianhmang ringawt hi chu a danglam vek theih avangin sa chi dang ni lovin sa thuhmun, sawi dan hrang ni maiin a lang bawk.

A hre awm mi leh upa thil hre tura ngaih tam tak kan zawh kual hnuah kan chiang thei ta a ni. Pu Ngunkama kum 70 mi, Sangau II, Vengthara awm, tawngah pawh Lai tawng ngat la hmang chuan, “Sele tih a nih chuan, a rual zinga awm lo, mahnia ramhnuaia rawl tihna a ni a, lawi kan sawi chuan chutianga awm chu ‘nale’ kan ti a, tun hnua bawng kan vulh ve chinah pawh, chutianga awm bawng chu ‘chawle’ tiin kan sawi leh mai,” a ti a. Hetianga tun hma atanga an lo hman tawh zulzui hian, ramsial pa, amaha tla fal sawi nan pawh kan hmang zui ta a lo nih hmel e. Kan tawng tam tak, thangtharten a tobul kan hriat mang loh hi Lai tawng a ni deuh vek mai a. Hei hian a rawn nemnghet taah kan ngai a ni.

A chunga kan sawi ang hi a nih si chuan, ‘sele’ tih chuan a rual zinga awm lo, mahnia tal hrang a kawk ta ran mai a. Ramsial pa, mahnia tla hrang chin kha sele a lo ni ta a, a rual zingah awm leh pawh ni se chu a hming chu a chhawm zel tho a nih hmel ta a ni.

Chutiang letling chiah chuan, ramsial pa chalngeng chin reng reng kha tumpangchal tiin kan sawi vek a, a rual zing atanga amaha tla hrang pawh ni se tumpangchal a nihna kha a chhawm zel lo thei bik lo a ni.

Tumpangchal kan sawi reng reng chu a kiber nasa tak, a ki hmawr dum fim ral, a ki hmawr leh a kiber inkar erawh khawipui hnûn ang maia eng fim kûk tih a ni tlangpui a. Ramsial pachal kan tih hi kum 10 vel a nihin a ki hi a inkheh nasa zual tan a, a kiber pawh a nasa tawhin a ki laita pawh zaa sawmriat (80%) vel a lo eng tawh a ni. A ki pawh hrawl tham tak tak tawh, a kiber chuar lai pawh nasa tak, a hmawr zum nena a inkar pawh eng fim kuk tawh chin hi tumpangchal kan tih chu a ni ngei ang tih a rin theih ta bawk a, chutiang chu miin sele a lo ti emaw, tumpang a ni an ti emaw pawh ni se a dik thei ta vek tihna a nih chu. Khawi maw laiah lo sawi pawlh ta nawk nawk tawk pawh an awm ang tih hi rinhlelh rual niin a lang lo va, sele a ni e kan tih pawh hi tumpang an ti thei tho va, tumpang pawh hi sele an lo ti thei tho tih erawh a chiang ta a ni. A khaikhawmna ber tur erawh chu, ramsial pachal hi tumpang tih leh sele tiin kan sawi ve ve a, sa chi dang ni lovin sa thuhmun a ni tih hi a ni ta ni.

Kawlfung: Lai tawngah chuan ‘fung’ tih hi sial lam chi hrim hrim sawina a ni tih kan hria a, Pu Ngunkama vek hian, “Lai tawngah chuan ‘fung’ tih hi ramhnuaia awm tihna hrim hrim a ni e,” tiin a sawi belh bawk a. Chuti a nih chuan ramsial a kawk nghal chat bawkin a lang. A tir lama kan sawi, Lalchhungi hlaa ‘fungtian’ a tih pawh kha, kawlfung sawina ni bik kher lovin, ramsial hrim hrim sawin a ni thei tih a chiang ta a ni. Hetiang hian lo sawiin, ramhnuaia awm sial tihna a ni e ti mah ila, kawlfung hi sawi hran bik riau dan kan nei a, tumpang emaw, sele emaw ti ve lova kawlfung kan ti kher hian chhan a neiin a lang. Eng pawh ni sela, tun thlenga kawlfung lu kan hmuh phak chinah pawh, a ki kual tawi, eng fim nalh tak leh lian lo tak a la ni vek a. Hei mai bakah hian tun hma atanga Mizoten silai hlo paina atana an lo hman thin, ‘fungki’ kan hmuh phak zawng zawng pawh hi se ki lian lo tak, kual mawi tak a ni vek mai bawk a. Mizoram State Museum-a kawlfung lu tia an tar ngei pawh hetiang tho hi a ni. Tun thlenga India ram hmun hrang hranga ramsial (Indian gaur) nu kan hmuh theih zawng zawng hi a ki kual a tawiin a eng fim nalh thei hle a, Chuvangin kawlfung kan tih hi ramsial nu a ni ngei ang tih hi rinhlelh rual niin a lang lo. Hmanruaa an hman duhna bakah chuan a sa ropuina leh a lu tar tur pawh chhuan thama an ngaih loh avangin ramsial nu hi kawlfung chu a ni tih hi phat tur a awm lo.

Rauri: Rauri kan sawi thin dan chu a tir lamah khan kan sawi nual tawh a. Mizoten kan lo sawi ve thin tlat avangin a awm ve ngei a ni ang tih chu a rinawm hle a ni, awm lo tawp sawi thu a awm si lo va. Mahse eng sa ber nge ni ang tih hi sawi chiang fak thei an awm mai si loh avang leh, ramsial hming a put tel tlat si avangin ngaihtuahna a tibuai thei viau mai a. Chuvangin sial pianhmang pu ve si, ramsial aia fek leh a ki pawh ropui tham lo a ni tihna a lo ni ta a, chuti a nih si chuan chutiang sa awm chhun chu ‘Banteng’ hi a ni ta a ni. A nihna takah chuan banteng hi kan rama awm lo anga ngaih a nih si avangin ngaihdan neih thiam a har hle mai a. Mahse tuna kan rama awm tawh lo, tun hmaa kan rama lo awm tawh ni thei zingah chhiar a fuh mai ang em tih hi ngaihtuah a ngai ta a ni. Samak hi tunah chuan kan ramah a awm tawh hauh lo va, mahse tun hmain samak kap tawh te pawh sawi tur kan lo neih ve tlat si avangin, kan ramah hian a lo awm ve tawh thin a ni tih a lang a. Chutiang chiah chuan Banteng pawh hi engtik hun lai emaw chuan kan ramah lo awm ve tawhin kan pi leh puten ‘ramsial rauri’ an lo ti a ni ang e tih hi ngaihdan rinawm tak a ni thei ta a ni.

A lu ro tak ngial pawh hmuh tur a awm loh hian thil pahnih a entir thei a. Hun rei tawh taka lo awm ve, tun hnua awm ta lo a nih avang leh ramsial hming puttir ngai ve si, ropui tham si lo, kah tlaka an lo ruat meuh loh a ni ang tih hi a ni a, lo kap an awm a nih pawhin a lu hi a ropui tham ve lem loh avangin vawn that tlakah an ngai lo a ni thei ang tih hi a ni ta a ni. Tun thlenga an chenna hmun chu Myanmar, Thailand leh Java vel khi a nih avangin thil awm thei lo tawp chu ni bikin a lang lo va. Chuvangin Rauri hi kan lo nei ve ngei a nih si chuan, banteng lo hi chu puh tur dang a awmin a lang lo a ni.

Khaikhawmna:
Mumtaz Baig leh a thawhpuiten a DNA an zir chianna atangin sial (Bos frontalis) hi chi hnih (Gayal leh Mithun) awmin an sawi a, Mizoten sial kan tih pangngai leh sebawng kan tih hi a ni maithei. India rama ramsial (Bos gaurus) hi erawh chu chi khat chauh a awm avangin, Mizoten tumpang, sele leh kawlfung kan tih hi ramsa chi dang ni lovin, ramsa chi khat a ni. Rauri hi erawh chu a chunga kan sawi ang hian, research beih leh hnua tihchian theih a nih loh pawhin rin danah chauh a innghat a ni.
***********************

Advertisements
Posted in Fifth Column, Hriatzauna, Zoram History | Tagged , , , | Leave a comment

GREEK MYTHOLOGY : Creation Of Gods & Goddess.. by Chester Ralte

Greek- ho hi hnam changkâng leh ropui hmasa pâwl an ni a, Hmânlai thawnthu pawh ngah tak an ni a, lâr pawh a lâr hlawm hle. Chuvangin a hmasa ber atân an thawnthu a khawvêl leh Pathiante lo awmțan dan hi kan sawi ang a, a remchân dan angin hnam fing hmasa dang, Egypt te, Indian, Chinese, Mayan leh Scandinavian(Vikings) ho te kan la chhawpchhuak leh zêl turah ngai ila..

COSMOS : THE CREATION..

A tirin lei leh vân hi ala awmlova, thil ruak zau tak mai ringawt hi a awm a chu chu Chaos ani. Tichuan hun engemaw chen alo kal zêl a, tichuan chu ruak zau tak Chaos chu lo sakhat in thil thitheilo – Gaea(Gaia, Lei Pathiannu) Tartarus( Lei piahlam ram hremhmun) leh Hmangaihna Pathian Eros- te, Thim Pathian Erebus te, Zan Pathiannu Nyx te anlo chhuak a. Tichuan Erebus leh Nyx chu mudûn in an mahni ațang chuan Chhun Pathian Aether leh Êng Pathiannu Hemera alo chhuak bawk a. Tichuan Gaea- chuan mipa tellovin fa a paia, mipa a hring a, chu chu Uranus( vân Pathian ) ani. Gaea chuan chu a fa lo piang chu Pasalah a nei zui a, Uranus- lo pawh fa dang, Ourea(Tlâng Pathian) leh Pontis(Tuipui Pathian) te pawh anei bawk a.

Lei Pathiannu Gaea- leh Vân Pathian Uranus- te chuan fa râpthlâk tak tak paruk, Milian Mit pakhat nei pathum Cyclops – an tih, Arges, Brontes leh Steropes- te leh Lu sawmnga leh bân zâ țheuh nei milian pathum Hecatoncheires- an nei a, Greek țawnga, ἑκατόν (hekaton, “hundred”) ,χείρ (cheir, “hand”), Hundred hand, unau Briareus / Aegaeon, Cottus leh Gyges te chu. Mahse Uranus chuan chûng an fâ milian leh maksak tak te, ” Heng ramsa râpthlâk te hi ka pawm theilo, Pathian kan ni a, Pathiante chu țha famkim kan ni, chuvangin hêng thilsiam râpthlâk tak te hi Vânram ah an awm ve thei lovang, kan paihchhuak tûr a ni.” tiin lei piahlam khawvel hremhmun hrehawm Tartarus- ah an vâi hian a paihlût ta vek a..

THE FIRST TWELVE TITANS :

Chumi hnu chuan Lei Pathiannu Gaea leh Uranus te chuan fa dang sâwmleh pahnih, milian an nei leh a, chungte chu ‘Milian Sâwmpahnih (Twelve Titans)’ – an tih, Crius, Cronus, Coeus, Hyperion, Iaetus, Mnemosyne, Phoebe, Rhea, Tethys, Theia, Themis leh Oceanus te. Pathian te nû, Gaea- chu a pasal Uranus-nunrâwnna avang chuan a lâwmlo hle a, a fa hmasa te chunga a thiltih avang chuan a thinur reh theilova, A pasal ina Ni êng hmu tawh ngailo tûra Tartarus-a a paihluh afâ te chu lâk kîr leh a a pasal laka phuba lâk theihna hun tûr remchâng a melh rân a, a fa Titans- te zînga a tê ber Hun Pathian Cronus- chu apa ang bawka nunrâwng leh huaisen ani a, chuvangin an unau zînga apa Uranus- hmachhawn tûra a nu Gaea-i thlâwp ngam awmchhun a ni. Lei Pathiannu Gaea chuan apa beihna tûr râlthuam ah Cronus- chu favah hriam tak mai hi a pe a, Cronus- hian a pa Uranus ina Tartarus-a a unau paruk thitheilo te a tân tîr thute erawh a hre velo, A pa aiawh a Pathiante Lal leh Pathian chungnung ber nih theihna kawng țha ber ni a a hriat avangin anu Gaia- chu a thurualpui ve tawp a, anu Gaia erawh chuan tum dang daih alo nei si a. Zankhat chu, mî reh țhap tawh hnu ah Uranus- chu tuipui kam ah tuitakin a muhil a, a mutna kiang lawk thingbuk phêna rei tak lo bîrû tawh Cronus chuan thâwm dîm takin a va pan phei țhem țhem a, a fava hriam tak chuan a pa serh chu a hleh sak ta hlawk mai a. A serh hleh thlâk chu tuipuiah chuan a paih a, a pa serh ațang chuan Tisa châkna, Mawina leh Hmangaihna Pathiannu hmelțha tak mai Aphrodite-i alo piang a, A pa thisen ațang chuan Milian(Giant) leh Ash Tree Nymph/ Erinyes te anlo pian ve leh a. A pa hnenah chuan a thuneihna a tâwp tâk thu leh amah chu Lei leh Vâna thuneihna changtu anih tawh thu hrilh in a pa chu a man ta a.. Tichuan Hun Pathian Titan Cronus- chu Pathiante zawng zawng zînga Lalber alo ni ta a, a unaunu Rhea- chu nupuiah neiin an unau ‘Titans’ chuan khawvelah ro an rêl a, he an rorel hun chhûng hi ‘Golden Age’- an ti. Apa serh ațanga lo piang Aphrodite-i hi a hnu ah Zeus-a fapa Indona Pathian Ares-a nen inneiin fapa Eros- an nei a, (Eros hi Roman ho chuan Cupid an ti a, Valentine Day vela lâr deuh, naute thla nei, hmangaihna thal keng țhin lem hi ani.. CR) Eros- hi Spartan Lal Menelaus-a nupui Helen-ina Trojan Lal fapa Paris-a a hmangaih theih nan a Hmangaihna thal a kâp tu kha ani.

Uranus-a thisen ațanga lo piang Ash Tree Nymph, Lasi pathum Erinyes an tih, Alecto, Megaera leh Tisiphone-i te hi a hnu fe a Crete thliarkar a Zeus-a enkawltu te kha anni bawk a, Chuan Uranus-a thisen ațanga lo piang ve tho Milian(Giant) an awm bawk a, mahse hêng milian te hi Zeus-a leh a unaute hian an ngeih lova, an tihlum nual a, a țhen chatuana hrem turin anti bawk a. Giant- zînga pakhat Encelatus- chu Athena- in a that a, Eurytus-a chu Dionysus-an a that a, Hippolytus-a chu Hermes-an a that bawk anih kha, chûnglo milian dang Eurymedon te, Porphyrion leh Alcyoneus-a bakah milian ho zawng zawng chu an chatuan in hrehawm tak hrem anni bawk.

Khawvêl a Titans- hovina ro an rêl chhûng hi khawvel ropui lai ber tiin an sawi țhin a, Titans- unau te chuan fel takin rorelna an in sem a. Titans unau zînga naupang ber Cronus- a chu a hotu ber ani a, Hun Pathian ani bawk, a unaunu Rhea nupui ah anei a. Rhea chu thianghlimna Pathiannu ani a, Hmeichhia zawng zawngte enkawltu ani bawk. Oceanus-a chu Khawvel tui zawng zawng chunga thuneitu ani a, A unau Lui Pathiannu Tethys-i nupuiah neiin Tui lasi leh lui Pathian te thlahtu anni. Hyperion-a chu êng Pathian ani a, nupuiah a unaunu Theia-i, lei chung boruak zawng zawng enkawltu chu neiin Ni Pathian Helios-a te, Thla Pathiannu Selene-i te, Vârțian Pathiannu Eos-i te hi an fa te anni. Coeus-a chu Thiamna,mihring themthiamna zawng zawng pe tu ani a, A unaunu Finna Pathiannu Phoebe-chu nupuiah neiin fanu pahnih Leto-i leh Asteria-i te an nei a, Leto-i hi Zeus-a nen inneiin thal kah leh rimawi Pathian Apollo leh ramsa enkawltu Pathiannu Artemis-i annei anih kha. Mnemosyne-i chu hriatrengna, finna Pathiannu a ni a.

Tin, Themis-i chu hrilhlawktu Pathiannu ani bawk, Zawlnei hrang hrang leh Delphi- zawlnei te hnena hrilhlawkna petu a ni.

Crius-a chu vân chung arsi zawng zawng enkawltu ani a, Aries arsi bâwrkhâwm hi a chhinchhiahna a ni. Iapetus-a chu mihring hun kal leh thinlung enkawl tu a ni a, a unaupa Oceanus-a fanu Asia chu nupuiah neiin milian ropui tak phîr unau Prometheus leh Epimetheus- te chu an fa te a ni. heng phîr an fâ te hi mihring siamtu an ni a, Prometheus-a hi a thilsiam mihringte hmangaih tak mai a ni a, Mihringte hnena Mei(fire) a pêk avangin Zeus-a chuan chatuan in hremna a pe anih kha..

Tin, Chiron-a a awm bawk a, Titan Cronus-a leh Lasi Philyra-i te fâ ani. Chiron-a hi Centaur hmasa ber a ni a, A kâwng achin hnuailam sakawr, a chunglam mihring a ni. A fanu pakhat Endeis-i chu Zeus-a fapa Aeacus-a nen inneiin fapa pahnih Telemona leh Peleus-a an nei a, Telemona- hian fapa Ajax-a, Troy kulh beihna a tel kha anei a, Tin, Peleus-a hian fapa Achilles ropuia anei bawk anih kha.

Chiron-a hi chatuan mî, thi theilo a ni a, Greek ram Pasalțha tamtak chu hriamhrei hman dan a zirtir a, Achilles-a pawh a têt tê ațanga hriamhrei hmandan zirtir tu ani a, Tin Greek Pasalțha ropui leh lâr tak tak Asclepius-a te, Ajax-a te, mihring alu bawng rapthlak tak that tu Theseus-a te, Argonauts rammutna a an hotu Jason-a te, Zeus-a fapa Medusa thattu mihuaisen Perseus-a leh Phoenix-a te hi a zirtir chhuah te an ni.

Lei Pathiannu Gaea fa dang a pa Uranus-ina Tartarus-a a tântîr Hecatoncheires- leh Cyclops- te chu Titan Cronus- chuan a chhuah tîr duhta chuanglo a, a chhan chu a pa a beih dâwn lai khan anu hian a thiltum rûk leh a unau dangte hi a hrilh duhloh vâng a ni. Gaea-ina a thil tum a tupa Cronus-an a tih duhloh avang chuan a thinur hle a, tichuan Hrilhlâwkna thu a puang ta a, chu chu, ‘Titan Cronus hian fâ aneih hun ah a pa atih ang bawk hian a fâ ten a Lalna anla rawn chhuhsak dawn ani’ tih thu chu’..

TITANOMACHY : WAR OF THE TITANS :

Titan Cronus-a chuan a nupui, a farnu ni bawk Rhea-i chu a hmangaih hle nâ in Tartarus-a a unaute la kîr leh tûra a nu Gaea- ngenna a hnial avanga a nu thinurin apa ang khan a lalțhutthleng chu a fapate zînga pakhatin a chhuhsak dawn ti a anchhia a lawh kha hre rengin an fa piang hmasa ber Hades-a chu a dawlh ta daih a, an fa dang Demeter, Hera, Poseidon leh Hestia te pawh chu a dawlh leh ta vek a, an fâ apiang a dawlh zel avang chuan a nupui Rhea-i chu a lungchhia in a thinur hle a, tichuan a nu Gaea-i hnenah kal in tih dan tur a va zâwt ta ngawt a. Gaea-i chuan tuna Rhea-ina a pâi mek naute hian Cronus- chu ala hneh dawn thu alo hrilh a. Tichuan Rhea- i chuan Crete thliarkar a Mount Dicte tlâng a pûk ah fa chu a hring a, a hming ah Zeus- sâ in, Lasî, Erinyes an tih, Alecto, Megaera leh Tisiphone-i te chuan enkawl in kêl hnute in an châwm a. a naupan zual chhûng chu Zeus-a chuan Crete thliarkar ah chuan a nun a hmang chho ta a. Rhea-i chuan a nû thurâwn chu zâwmin Cronus-a hnena a kîr leh chuan an fa sên thawmhnaw chuan lungtum a fûn a, Cronus-a hnena hlan pahin a tâna a hrinsak fapa a nih thu a hrilh a. Cronus- chuan eng khaw sawi set set lovin chu lungtum chu lâ in a dawlh ta pawp a, bumin a awm tih réng a hre lo. Cronus- chuan a fapate zînga pakhat chu a dawlh lovin Crete- thliarkara lasî ten an enkawl tih tih a hre hauhlo, hre ngat se chuan a thinrim viau ngei ang.

A lo tlangval hnu in Zeus-a chu a nu Rhea-i chuan Olympus-a Pathiante chênna ah ala kîr leh a, a pa Cronus-a no hlântu ah a awm ta a. Chutianga hun engemaw chen an awm hnu chuan Rhea-i leh Zeus-a chuan a pa bum dân tur an rel a, Titanness Metis-i( damdawi leh ngaihtuahna siamtu Pathiannu) Rhea-i unaunu chuan damdawi siamin Cronus-a wine intûr ah chuan a telh a, chu wine chu Zeus-a chuan a pa chu pe in Cronus-an a in zawh chuan a pum ana ta vak a, a luak ta nghek nghek a, a hmasa berah lungtum a dawlh kha luakchhuakin, a fâte ho, a dawlh te zawng zawng kha puitling vekin a luakchhuak leh ta vek a.

Titan Cronus- hi milian ani kan tih tawh kha, a fâ a dawlh te pawh hi Pathian vek annih avangin an pa pum chhûngah a nung chungin an awm vek a ni. Rhea-i chuan Zeus-a chu a fapa anih thu leh a fa te chuan an paihthlâk dawn thu Cronus-a chu a hrilh a, Cronus pawh a thinrim kher mai, chûng a fâte Pathian naupangtê tê te chu nuaibo tum in Indo turin a unau milian ho te chu a sawmkhawm a, Mahse Prometheus, Epimetheus leh Oceanus-a te chu an telve duhlo a, Indona ah chuan Milian Atlas-a chu an hruaitu a ni a. Pathian naupangtê tê unau te chuan milian(titan) ho chu hneh rual niin an hrelo a, heng milian te hi a mal tê tê pawh a hneh rualloh leh thiltithei tak tak an ni si a.

Mahse A pi Lei Pathiannu Gaea-i chuan Zeus-a chu thurâwn pe in Tartarus-tânin a a pa Cronus-an a tân tîr a unau te chhuah tûrin leh an țanpuina dîl tûrin a ti a. Tichuan Zeus-a te unau chu mitthi khua Tartarus ah chuan kalin a pa unau a pa ina a hrem, Milian mit pakhat nei Cyclops unau te, Kut zâ leh lu sawmnga nei Hectoncheites te chu an chhuah zalên ta a. Cyclops- te chuan Zeus-a chu țêk leh khawpuirî (lightning & thunder) chunga thuneihna an pe a, Hades- a pawh intibo theihna lukhum (invisible Helmet) pe in Poseidon pawh Tiang thiltithei ( Trident) an pe bawk a.

Chûng a pa unau te chuan Zeus-a te chu țanpui an tiam bawk a. Titans ho te chuan Mount Othrys ah țanhmun an siam a, Zeus-a te unau chuan Mount Olympus-ah țanhmun siam ve in Olympus an inti a, tichuan Pathian te indona rapthlak tak Titanomachy chu an țan ta a.

Remruatna fel tak nen Olympus te chuan beiin Titans ho lambun tûra an dah Hundred handed Hecatoncheires- unau te chuan lungpui lian tak tak an chawi fur mai a. A hun tak ah Zeus-a te chu an hnungtawlh a, Titans- ho te chu Hecatoncheires- ho te lambunna huangah chuan thlêm lûtin Hecatoncheires- te chuan Titans- ho chu lungpui za tam takin anlo vawm rawn a, Titans ho te chu tlângin a chim hnan emaw tiin an tlân chhe darh chum chum a, tichuan Olympians- te chuan ûmzuiin nasa takin an in bei a, an indo thâwm avang chuan tlângte chu an khûr hlawk hlawk a, khawvel hi tuilian leh țek in a khat a ni ber mai.

A tâwp ah Cronus-a beidawng chuan a unau sakawlh râpthlak Typhoon chu a ko chhuak ta a, Typhoons- hi a hlauhawm êm avang leh a râpthlak êm avangin Pathian tam berte chu hlauvin an tlânchhia a, Mahse Zeus-a chuan chu sakawlh chu beiin kâwlphê leh țêk hmangin a that a, Sicily a Mount Etna hnuaiah an phûm ta a. Typhoons hi tlângkâng angin Mount Etna- ah hian ala thawk fo țhin an ti a, tun thleng hian he tlâng hi tlangkang irhchhuah țhinna hmun a la ni.

Kum sâwm lai an indo hnu chuan Olympians- te chuan hnehna changin Titans ho zawng zawng deuhthaw chu hremin Tartarus-ah an tântîr hlawm a. Milian Atlas-a chu a sâng thei ang ber a a koki a vân khi do tlat tûrin an hrem bawk a.

THE FIRST OLYMPIAN GODS & GODDESS..

Titans ho zîngah Atlas, Oceanus, Theia leh Themis-i te chauh chu Tartarus a paihthlak loh awmchhun an ni, Titan Iapetus leh Clymene-i te fapa Prometheus leh Epimetheus- te erawh chu Olympians-te lamah an țan avangin hrem an ni velo thung.

Tichuan Titans te Lalna chu paihthla in Zeus-a leh a unau te chuan khawvelah ro relin Olympians Pathiante an tih hun chu alo in țan ta a, Zeus-a chu naupang ber nimahse Pathiante zîngah chuan hotu leh hruaitu a ni a, an unau chuan ram leh thuneihna an insem vek a.

ZEUS: Dikna a roreltu ani a, Lei leh vân a roreltu ber a ni, nupuiah a unaunu Hera-i a nei a, mahse a lerh em avangin mihring leh Pathiannu dangte lak fâ tam tak a nei bawk.

HADES : Olympians unau zînga a upa ber a ni a, Khawvel piah lam zawng zawng, Mitthi khua a roreltu a ni.

POSEIDON : Khawvel a tui zawng zawng Pathian a ni a, Lîrnghîn tîrtu Pathian a ni bawk, Tuipui Lasî, Nereid Amphitrite-i chu nupui ah neiin fapa Triton- an nei a, Triton a hian fanu Pallas-i a nei leh bawk, mahse Pallas- i hi Athena-i nen an infiam laiin Zeus-an Țêk in a dêng hlum a, Athena-i hian Pallas-i hriatreng nan a lim Palladium a siam a, he Palladium hi Trojan khaw hnehtheihlohna thurûk kha a ni bawk.

Poseidon hian sakawr thi theilo pahnih Xanthus leh Balias- kha Achilles-a pa Peleus-a leh Thetis-i te inneih khan a pe bawk anih kha, khami sakawr pahnih kha Achilles-an Troy beih nan a a hman te kha an ni.

Tin, Gorgon Medusa nen fâ pahnih sakawr thlâwk thei Pegasus leh Mi chak huaisen Chrysaor te an nei bawk. Poseidon hian Pathiannu te leh mihring te lakah fâ tamtak a nei bawk.

HERA : Zeus-a nupui a ni a, Pathiannu te zînga Lal ber a ni bawk, Olympians- unau te zînga a naupang ber a ni a, inneihna leh chhungkaw enkawltu bâkah hmeichhia te enkawltu Pathiannu a ni bawk.

Thîkthu chhe tak mai a ni a, a pasal Zeus-an a mihring lak fâ a neih te chungah nasa takin phubâ a la țhin a, Zeus-a fapa Hercules pawh kha a nausên laiin thah tumin rûl chukna mî a tîr a, Hercules-a hna hahthlâk sawmlehpahnih pawh kha ama remruat vek a ni bawk.

DEMETER : Khawvel Sik leh sâ enkawltu leh thlai chi țhatna Pathiannu a ni a, a fanû Persephone-i Hades- an a rûk lai khan a fanu zawngin khawvel hmuntin ah akal a, sik leh sâ pawh a enkawl hman loh avangin khawvel sik leh sâ a buai a, mihring tam tak an boral a nih kha.

HESTIA : Olympians unau te zînga pasal neilo awmchhun a ni a, mihring thinlung vêngtu leh chhungkaw enkawltu Pathiannu a ni.

THE SECOND OLYMPIANS GODS & GODDESS :

ARTEMIS : Artemis- i hi Zeus leh Leto-i te fâ a ni a, Ramsa leh Pasalțha te véngtu Pathiannu a ni. Troy indo lai khan Trojan ho lam țanpuiin Greek ho riahbûkah Colchis ram ațanga a lâk sakeibaknei lu pahnih nei a chhuah a, mahse Achilles-an alu alo sâhbun sak avangin Achilles-a kha a hlau hial anih kha..

Tin, Agamemnon-a, Helen-i pasal Menelaus-a unaupa in Artemis-i ramsa humhalhna hmuna Sazuk- a kâp a, Artemis-i aiin ka ramvachal zâwk ti a a uan zui avângin Greek sipai te Troy kulh bei tûra an chhuah dawn laiin Thlî a thâwt tîr duhlo a, an lâwng pawh a kal theilo a nih kha.

APOLLO : Zeus-a leh Leto-i te fâ tho a ni a, Thalkah leh rimawi Pathian a ni. Zeus-ana mihring hmeichhia a ngaihzawn avangin a nupui Hera- bâkah Pathian dang te nen Zeus-a an phiarru a, chuvang chuan Zeus chuan Apollo- hi hremin Troy kulh a sak luih tîr a nih kha. Trojan ho ina an Pathian Biak ber a ni a, chuvang chuan Achilles-a ke artui a Trojan Lal fapa Paris-a kah tîrtu kha a ni a, Paris-a thal mu tih ngîl sak in Achilles- a kâp hlum a nih kha..

HEPHAESTUS : Zeus leh Hera- i te fâ a ni a, Mei Pathian ani bawk, a kê a bâi avang hian a nu Hera- i hian duhlovin a paih a, mahse Achilles-a nu Thetis-i leh a unau te’n lo chharin an lo bawihsawm a, chuvangin Achilles-a pawh a duat hle a, Achilles-a hmanrua zawng zawng te pawh a aia țha awm tawhlo tûr khawp a țha in a siamsak a, Lui Pathian Xanthus leh Lui Pathian dang têna Achilles-a an beih rawn laiin Achilles-a alo chhan bawk a nih kha.

HEBE : Zeus leh Hera- i te fanu a ni a, Țhat lai leh Vânglai Pathiannu a ni.

DIONYSUS : Zeus leh Thebes Lal fanu Semele- i te fapa a ni a, Zû leh Lei țhatna thlentu Pathian a ni. Semele-i hi Zeus-a nupui Hera- in a huat a vangin tihhlum a tum a, Nikhat chu Semele-enkawltu anga in siam danglamin Hera-i chu a va inlan a.

Hera-i chuan Semele-i chu bumin , Engtik ni ah emaw a fa paina Zeus- chu a Lal thuam a inthuam a ațêk thiltihtheihna nena a hma a inlan tûr a ti tûrin a chah a, Chu Thu chuan Semele-i chu a ti lâwm hle a,

Tichuan Zeus- an a rawn tlawh leh hmasak berah chuan alo sawi ta ngei a, Zeus pawh chuan ngaihtuah chianglo in a lo tiam ve mai bawk a, a hriatchhuah leh meuh chuan Pathian meuh ina a thil tiam tawh chu sût leh theih a ni tawh silo. Zeus chuan thi thei mihring Semele chuan a țêk sa lutuk chu a dâwl zo dâwn lova, a hma a a inlan vaih chuan meivâp ah a chang nghal dâwn a ni tih a hre sa a, mahse a thutiam bawhpelh theih a ni silo.

A ngaihzâwng hma a a ropuina thuam famkim a inthuama a inlâr chuan a hlauh ang ngeiin meialh chuan Semele chu meivâp ah a chantîr nghal a, mahse Zeus chuan a naupai lai chu chhanchhuah sakin a enkawl seilian a, a hmingah Dionysus-a vuah ta a ni.

HERMES : Zeus leh Maia te fâpa a ni a, zaipawl leh zin mî te vêngtu Pathian a ni, a ke ah thlâ a nei a, chu chuan chak tak tak in a thlâwk kual țhin.

PERSEPHONE : Zeus leh Demeter-i te fanu a ni a, Mitthi khaw Lalnu a ni, Mitthi khaw roreltu Pathian Hades-an rû in nupuiah a nei a nih kha.

ARES : Indona Pathian a ni a, Zeus leh Hera-i te fapa a ni, Pathiante zînga țuanrang ber a ni a, Mei Pathian Hephaestus-a nupui Aphrodite-i chhuhsakin fapa Eros-a an nei a, Eros-a hi Helen-in Paris a a hmangaih theih nana Heleni thinlung hmangaihna thal a kâptu kha a ni bawk. Amazon Lalnu Otrera nen fanu pali Hippolyta, Antiope, Melanippe leh Penthesilea an nei a, Penthesilea-i hi Trojan Indona ah Troy Lal Priam-a țanpui tûrin a kal a, mahse Achilles-an alo tihlum a nih kha.

Tin, Hippolyta-i hi sawidan pakhat ah chuan fanu Diana neiin an sawi bawk.(Diana-i chi DC Comics a Wonder Woman kha a ni a, a movie pawh in an siam bawk kha).

ATHENA : Zeus leh Metis-i te fanu a ni a, Indona leh finna Pathiannu ani bawk a, Athens- khaw dintu hi a ni bawk. Pathiannu Pasal neilo a ni a, Amah biakna temple chu Athens khua a temple ropui Parthenon khu a ni..

Hengte hi Greek ho Pathian, Olympians an tih te ber chu an ni a, henglo pawh hi Pathian tenau tam tak anla nei bawk..

END OF DEMIGODS & HEROES.

Héng Pathian naupang zâwk te bâkah Pasalțha tam tak hi Zeus-a fâ leh an thlahte an ni a. Zeus-a hi a lerh êm avangin Pathiannu te mai nilo, Mihring te lakah pawh fâ tam tak a nei a, a hmeichhe hmêlțha tih chi a hlah ngailo. Hêng mihring lak a a fâ neih te, Milian leh thiltithei tak tak(Heroes & Demigods) bâk ah Pathian dang te’n a mihring lak a an fa neih te chu an tam êm êm a, chûng an fa te chuan fâ an nei leh a, tichuan Pathian thlah michak leh thiltithei tamtak anlo piang ta sup sup a, chûng Pathian thlah thiltithei tam tak te chu an in têlkhâwm ang a, nakin ah phei chuan Pathian te anla do duh mai dâwn a a hriat a vângin Pathian dangte hriat loh in a rûkin Zeus-a chuan chûng Pathian thlahte tihboral nan chuan Troy indona kha a a hmâ daih ațang tawh in alo ruahman tawh a. He Troy indona a Pathian thlahte that chimit tûrin Achilles-a kha a lo ruat lâwk tawh a, a tum ang rêngin Achilles- a chuan Mi chak leh Pasalțha, Pathian thlahte chu a tihlum hnem na ngîang mai.

Achilles-a kha a lo huaisen êm avang leh a thinlung a sak êm avangin Zeus-a khan a duh ang ang pawh in a hrual leh thei silo a, Troy indo lai a Greek ho hruaitu ber Agamemnon-a nena Achilles-a an inhmuh thiamloh khan Achilles-a khan indona ah tel a tum tawhlova, Greek rama haw daih a tum a, Greek rama Achilles-a a haw daih chuan Zeus-a thiltum chu a hlawhtling dâwn silo, mahse Achilles-a thinlung sak lutuk chu Zeus-an a tih nêm theih ngangloh avangin Patroclus-a, Achilles-a tha chang dâwltu chu Hector-a a tihlum tîr a, chuvang chuan Achilles-a chu haw leh lovin Zeus-a thiltum ang chuan a awm ta anih kha.

A ruahman ang ngeiin Achilles-a chuan Pathian thlah mi chak tam tak chu a that a, Mahse alo ropui zual zêl a, Mihring te mai nilo, Pathiante pawh in an hlau a, a chhan chu a thinlung sak leh luhlul lutuk chu tumahin an dâl zo lo, mihring te mai nilo Pathiante a hlaulo a, kut a thlâk zêl avang chuan Pathian tamtak te chuan a lakah kut an lek ngamlo hial a, Troy indona a Trojan lam țanpuitu Pathian ropui tak tak, Artemis-i leh a unaupa Apollo te, Aphrodite-i, Enyo-i leh Indona Pathian Ares-a te pawhin an hlau a, an hmachhawn ngamloh avangin Trojan Lal fapa Hector-a thinlungah thinrimna leh huaisenna an dah a, Achilles-a bei tûrin an bum chhuak a tih theih hial âwm e.

Trojan sipai te chuan Achilles-a hmêl an hmuh ringawt pawhin bîkbo na an zawng a, Troy khuaah phei chuan naupang țap thlêm nan a hming an hmang țhin an ti. He a ropuina leh hmingthanna avang hian Zeus-a chu a rûkin a mangang êm êm a, a chhan chu Achilles-a nu tuipui Lasî Thetis-i chu Pathiante zah khawp a ropui a ni a, Achilles-a pa Peleus-a pawh Greek ram zawng zawng a hmingthang khawp a Pasalțha lâr leh huaisen, Greek mi zawng zawng ina an zah khawp a ropui ani a, Chumai bâkah Pathiante anga thi theilo tûr a Pathiante malsâwmna leh duhsakna dâwng pha ngat a ni a, an nupa ropui zia chu an inneihna ruai pawh kha Pathiante chênna Olympus tlângah ngat nei an nih kha.

Chuvang chuanin Zeus chuan Achilles-a a tih khawngaihthlak emaw, a lo ropui zual zêl chuan a nu Thetis-in Pathian dangte sâwmkhâwm in an hel anga, Achilles-a tan Zeus-a leh a unaute chu paihthla in, a Lalna an chuh ang tih a hlau bawk si a, engkim a remruat nimahsela a rûk tak chuan a rilru a buai kher mai.

Dik tak chuan Achilles-an Troy a kal hma khan Hector-a leh Ajax-a kha anlo in mal beih a, Ajax-an a tihlum țêp a, mahse Zeus-an Achilles-a thah atan alo ruat lâwk avang leh Achilles-a chan a chhiat chuan a nu Thetis-i a lungawilo anga, alak ah an hel ang tih a hlauh avangin Zeus-an an in bei lai a ti tâwp a nih kha.( Troy movie a Hector an a tihhlum Pa lianpui kha Ajax-a chu a ni a, Achilles-a cousin a ni bawk.)

Mahse Achilles-a chu alo ropui zual zel a, chuvang chuan Pathian ten an huat nan leh an țanpui duhloh nan Achilles-a thinlungah chuan thinrimna nasa tak a dah a, Hector-a a tihhlum khan a ke artui vit tlangin hrui a thil tlang a, Sakawr tawlailir a hnûk in Troy kulh a fankual pui hnu ah Greek mi te riahbûk thleng a hnûk a nih kha. Lal fapa ve meuh khati khawp a mualpho leh hmuh hrehawma a nghaisâ kha Pathian te pawhin râpthlâk anti a, a hma a khawngaihtu te pawh in an huat phah ta rêng bawk a, chu tak chu Zeus-a thiltum a ni. Tichuan Pathian thlah mi chak pui pui, mihring pangngai ina an hneh rualloh khawp a chak leh Greek sipai te ho ina an hnehloh tûr ang chi mi chak bîk te a tihhlum zawh in Zeus-a thupêk in Achilles-a chu tihhlum a ni ve ta a ni.

CREATION OF HUMAN :

Titan Iapetus leh Clymene-i te fapa Prometheus leh Epimetheus te chu Zeus-a chuan mihring siam tûrin a ti a. Prometheus-a chuan lei (clay) ațangin Mihring ruangâm a siam a, Pathiannu Athena-in nunna thâw pê in minung anlo ni ta a, Epimetheus-a chuan ramsa te siam hna a thawk ve bawk a. Prometheus leh Epimetheus- te hi Titans ho leh Olympian te indo lai khan Zeus-a te unau lamah an țang a, chuvang chuan hremna an hmu velo a ni.

mahsela Prometheus-a chuan chûng a mihring siamte chu Pathiante chauhvin an neih theih Meialh(fire) chu pêk mai a tum ta a, A tûk zîng a vân chung sânga Ni Pathian Helios an a mei sakawr tawlailir a Nî alo hnuhchhuah lai chuan a Meialh țhenkhat chu lâ in mihringte hnenah a pe a. Mei enkawl dân leh hman dânte a zirtîr hnu in a kalsan ta a. (Greek ho te chuan Nî khi Zîngkâr ah Ni Pathian Helios an Mei sakawr tawlailir a rawn hnûk chhuak a, tlailam a khawthlang lama hnúk liam leh țhin ah an ngai. CR)

Mahsela Zeus-a’n Prometheus-a thiltih a hriatchhuah chuan a thinrim kher mai. Chuvang chuan Prometheus-a chu tlâng pangah khâidîat in a phuar bet a, chatuan thleng a a thinlung chuk chhuak tûrin Mulukawlh thu a pe a.

Nilêngin chûng mulukawlh te chuan a thin chu an kher ta țhin a ni..
Chumi hnu chuan Zeus leh Hephaestus a chuan mihring an siam leh a, Hermes-a chuan țawng theihna leh thinlung ngaihtuahna te pe in, Pathian dangte pawh chuan thilpêk tam tak leh hriselna te an pe hlawm bawk a. Tichuan chu mihring chu lo nung in hmeichhe hmasa ber chu anlo siam ta a, a hmingah Pandora-an vuah a, Pandora- tih chu ‘Thilthlâwn pêk’ tihna a ni ber mai. Tichuan Pandora chu Epimetheus a nen in neiin hun rei tak chu hlim takin an khawsa a. Pandora chu Pathian te chuan thilpêk an pe țheuh a, Zeus-a pawh chuan dîlchhûtna pe in, bâwmtê (box, pandora box) a pe tel bawk a, chu bâwm ah chuan thilsual leh țhalo tam tak khungkhâwm a nih avangin Zeus-a chuan hawng hauhlo tûrin a ti a. mahse Pandora chuan hawn châkna a a khah tlat avângin a hlim a kim theilo. Pathian leh Pathiannu ten thil ropui tak tak an pêk hlawm țheuh avangin Zeus-a thilpêk chu a danglam bîk hle in a ring tlat a, Țumkhat chu a pasal Epimetheus a awmloh hlânin thingremtê chu a hawng ru ta a.

Chu thingrem a han hawn rual chuan tunlaia khawvel hri țhalo hrang hrang, Natna, îtsîkna, duhâmna, chapona leh thil țhalo chi hrang hrang te chu anlo thlâwk chhuak ta sup sup mai a. Pandora-i mangang aû thâwm a hriatin Epimetheus-a chu hmanhmawh takin a lo haw a, thingrem chhîn chu rang mangkhêngin a han khâr a, mahse thil țhalo zawng zawng te chu anlo thlâwk chhuak zo hman vek tawh a.

Hemi zân hian thingrem chhûng ațanga aw lo chhuak an hria a. Chu âw chuan, “Min chhuah tîr rawh. Beiseina ka ni e,” a rawn ti a. Pandora leh Epimetheus-te chuan an chhuah a, mihringte hnêna beiseina pe tûrin khawvelah a thlâwk chhuak ta a ni.

DEUCALION’s FLOOD : ZEUS DELUGE :

Pandora ina Thil țha lo bâwm a hawn ațang a sualna lo chhuak te chuan mihring te chungah hna an thawk țan ta a. a ni têlin sualna alo pung a, Natna râpthlak tak tak te alo thleng reng ta bawk a. Mihring in an mihring pui te sâ an ei a, hmun tinrêng chu sualna in a khat tlat hlawm a, chuvang chuan Zeus-a chuan khawvel a mihring te chu tihhlum vek tumin Tui a len tîr ta a.

Mahse khawvelah chuan Pathiante rawngbawl țhin leh mifel chhungkua pakhat a hmu a, chu mite chu Deucalion-a te chhungkua an ni. Deucalion-a chu Prometheus leh Tuipui Lasî Clymene-i te fapa a ni a, nupuiah a pa unaupa Epimetheus leh Pandora-i te fanu Pyrrha-i neiin fapa leh fanu te an nei hlawm a. Zeus-a chuan mihringte tihboral nan khawvelah tui a lêt tîr dawn tih sawiin an chhungkaw in chhanhimna tûr Lawng tuk tûrin a ti a. Tichuan tuilêt chhûng zawng Lawngah chuan an chhûngkua a awmin tuilêt a kâm hnu chuan an lawng chu Mount Parnassos-ah a ding ta a. Tichuan Pathiante hnenah lawmthu sawi nan inthawina te an nei a.

Khawvel mihring ah an mahni chhungkua chiah an awm ta a, Tichuan a fâ te chuan Pathian chi hnuaihnung deuh Tuipui Lasî te, Ngaw hnuaia chêng țhin Lasî te nupuiah neiin mihring chhuan thar anlo indin leh ta a.

An fapa Hellen chuan Lasî Orseïs-i neiin fapa leh fanu te an nei a, heng an fa te hi hnam hrang hrang dintu anlo ni ta zêl a ni.

Heng hi Hellen leh Orseïs-i te thlah kal zelte chu an ni. An fapa Aeolos-a thlah te chu : Aeolos a chuan nupuiah ah Tlângram Lasî Enarete-i neiin fapa Sisyphus-an nei a, a ni hi Corinth khaw dintu a ni bawk.

Tin, Aeolos-a fapa pakhat Iocus a chu Cretheus hnam dintu a ni bawk a. Magnes-a chu Macedonia lalram dintu a ni a, a thlahte chu Macedonian an ti.

Perieres-a chu Messene hnam dintu a ni bawk.

Tin, Ion-a chu Ionian hnam dintu a ni.

Hellen fapa pakhat Dorus-a thlah te : Dorus-a fapa Aegimius a chu Dorian hnam dintu a ni a, Dymus-a cgu Pamphylus- hnam dintu a ni. Dymames-a chu Pamphylian hnam dintu a ni.

Hellen leh Orseïs-i te fapa Acheus-a thlah te chu Acheian hnam dintu a ni. Tichuan an hnam ang zêlin hmun tinah anlo darh ta zél a,  Greek hnam huaisen leh ram ropui tak tak te khu anlo din ta a ni.

Posted in Thu Ngaihnawm | Tagged , , | Leave a comment

INBUMNA A TAM THLA 7 KALTA CHHUNGIN CHENG NUAI 40 CHUANG MIZORAM MIPUIIN AN CHAN HMAN

Tunlai hian online hmanga inbumna a hluar hle a, thla 7 kalta chhung khan online hmanga inbumna avangin cheng nuai 40 chuang Mizo mipui ten an chan hman niin thu dawn a ni.

Mizoram Police chhinchhiah danin March atanga September, 2017 inkar chhung khan misualte chuan online hmanga inbumna avangin Mizo mipuite sum Rs. 40,05,000 chuang an laksak hman niin tarlan a ni a, hei hi an hnena kala in-report chauh an ni a, hei aia tam daih hi misual ten an laksak rin a ni.

Mi bumtute hian mi hnenah hna hmuhsak thei anga insawi te, ATM card leh pin an zawh hmangte leh thil thawn tur nia insawi hmang tein an bum thin. Heng mi bum hmangte hi mihang (Negro)-ho leh Bihari/Jharkhand lam mi an ni tlangpui a, Negro-ho hian internet kaltlangin mi an bum ber a, Bihari/Jharkhand te hian phone hmangin hma an la deuh ber.

Mizoram Police te chuan misual thenkhat chuan phone hmanga mi ATM card number zawtin card number an hriat hnuah internet-a thil lei nan an hman bakah an pawisa chu Account dangah an transfer leh thin niin an sawi.

Heng mite hi a tlangpuiin Nigerian leh vai mi sual thenkhat inkawp an ni tlangpui tih an sawi. Hei bakah hian ram danga hna hmuhsak thei nia insawiin appointment letter lem an pe a, an insurance, visa leh tuldang buaipuina tur nia sawiin sum tam tak an laksak hnuah an bibo leh ta thin a ni. Hei bakah rangkachak leh thil hlu dang thawn tur anga insawiin a khulnatur sum an dil a; sum an hmuh veleh thawn leh si lovin an bibo ta thin niin an sawi bawk.

Police te chuan hetiang a mi sualin sum an laksak hi hmuhlet leh a harsa hle niin an sawi a, mi bum hmangte hian Account dangah rang takin an lo transfer thuai thin niin an sawi. Misualte hian phone number hrang hrang an hman thin avangin hmuhchhuah/man an har hle tih an sawi bawk.

A tlangpuiin mi sualte Account hman hi chhuichian a nihin Mizo Account a ni tlangpui thin a, Mizo zingah bank account hralh ching an awm thu an sawi a, hei hi thil pawi tak leh dan phal loh a ni. Mi Account chu mi sualte hian leichhawngin thilsual tih nan an hmang ta thin niin an sawi.

(Source: ZALEN)

Author : Vanneihthanga Vanchhawng

Posted in Technology, Zoram Crimes and Accidents, Zoram History | Tagged , , | Leave a comment

Pawisa tih-thih atangin Company lem nuai 3 dawn khar a ni.

Prime Minister Narendra Modi-a chuan pawisa tih-thih atang khan Company heng, a tak awm lo nuaih 3 dawn khar a nih tawh thu a sawi.

Prime Minister chuan pawisa tih-thih chu vawi duai lo sawiho thin a nih tawh thu a sawi a. “Indira Gandhi-i Prime Minister lai pawh khan committee khan cheng 100 note tih-thih a lo rawt tawh a. Khatih hun laia Minister Yashwant Rao Chavan khan pi Indira Gandhi hnenah khan rawtna a thlen a, mahse, a pawmsak ta lo a ni,” Narendra Modi-a chuan a ti a. A party ni lovin ram hmasawnna ngaipawimawh chu nise khatih hun laia pawisa tih-thih pawh kha thil tha zawk tur a ni, a ti.

Nimin khan Kullu-a vantlang inkhawmah Prime Minister chuan Congress party leh corruption hi thenhran theih a ni ngai dawn lo, a ti a. Ram chhunga kum 70 lai Congress-in ro a rel lai khan an hruaitute chuan corruption, dawtsawi, hnam leh chi leh kuang inthliar leh hna inpek chungchanga induhsak biknaahte chauh ring an rawlh a ni, a ti.

Pawisa tih-thih a nih hnu khan company lem nuaih 3 dawn leh bank account thahnem tham tak tihtawp a nih tawh thu a sawi a. Cheng Vbch sang 4 zeta thubuai nei company sing 5 lai chhui zui an nih thu a sawi bawk.

Posted in National News | Tagged , , | Leave a comment

GST hmanga chhiah lak a nih hnu-ah Mizoram sum hmuh nasa tlahniam

Ram puma Goods and Services Tax (GST) hmanga chhiah lak a nih hnu-ah Mizoram sum hmuh ṭhin chu nasa takin a tlem niin Taxation Minister Pu Lalsawta’n a sawi.

Pu Lalsawta’n a sawi dan chuan GST hmanga chhiah lak a nihhnu hian tunhma a Mizoramin chhiah chi hrang hrang aṭanga sum a hmuh ṭhin zahve pawh a hmuh pha ta lova. Hemi avang hian vawiin hian Taxation Minister ho hian department hotu liante chu GST hmanga chhiah lak a nih dan thlir let turinan ṭhukhawm dawn a. A ṭul a nih chuan Chief Minister hova la bawhzui a nih tur thu dawn a ni.

GST hmanga chhiah lak a nih hnu hian state tam ber sum lakluh hi a hma a lak dan aṭanga chhutin za zela 33 vel chauha tling pha niin sorkar laipui chuan a sawi a. Sorkar laipui phei chuan hei ai hian a hmu tlem zawk niin an sawi bawk. Hetianga a nih tur anga GST kalpui a nih lohna chhan hi internet connection ṭhat tawk loh chu a bul ber zing a mi a nih thu Pu Lalsawta chuan a sawi a ni.

Author : AIR

Posted in Zoram History | Tagged , , | Leave a comment

MIZORAM A HMANLAI HMUN HLUI ZAWN CHHUAH HNA NAKUM 2018 JANUARY ATANGIN THAWK CHHUNZAWM DAWN

Archaeological Survey of India chuan hmanlai hmun hlui zawn chhuah belh hna hi January 2018 thla tir atangin Mizoramah an chhunzawm leh dawn.

Dr. Sujeet Nayan, Vangchhia, Champhai District a, Pipute hmun hlui te Archaeological excavation hmanga lo zir chiang tawhtu chuan, 2nd November, 2017 khan Aizawl Circle, Archaeological Survey of India Office-ah Superintending Archaeologist charge a rawn la ta.

He office hian Mizoram, Manipur leh Tripura State te a huam ang, He circle hawn theih nan hian INTACH, Mizoram Chapter chuan, hun rei tak tawh atang khan hma a lo la tawh a ni. Inrinni khan Pu Nayan chuan INTACH Convener a hmu a, inkawmna thatak an nei. Convener P Rohmingthanga chuan Mizoram lo hre tawh leh Mizoten thiana an ngaih in Circle a enkawl tur chu lawmawm a tih thu a lo hrilh.

Pu Nayan hian, kum 2016 kum tir khan helai Vangchhe khaw daiah hmanlai inphumna/thlan hmun ropui tak a hmuchhuak niin a sawi a. He hmun hlui laih chhuah a nih theih na chhan chu kum 2015 khan Dr. Rakesh Tiwari, Director General, Archeological Survey of India, chu Pu P Rohmingthanga (IAS Retd) Convener leh Pu Rin Sanga (IAS Rtd) Co- Convener, INTACH Mizoram Chapter ten Champhai tlangdung a kan pipute lungphun hlui leh hmun hlun-te uluk taka an fanpuina rah chhuah niin, helai Vangchhe khawdai laih nan hian excavation license pek chhuah a ni ta a ni.

He hmanlai hmun hlui zawn chhuah belh hna hi January 2018thla tir atang hian chhunzawm leh turin phalna zau zawk excavation license pawh pek chhuah a ni leh tawh a, hemi hma December thla laihawl vel atangin Champhai leh a chhehvelah exploration neih tum bawk a ni. Sujeet Nayan a hi Excavation Director niin, Co-Director ah Asst. Archaeologist Pi Lalrinchhani, Aizawl Circle Office ani ang. INTACH pawl chuan hmun dang Dungtlang, Ngur, etc ah te pawh excavation tan theih a nih nan Aizawl Circle chuan hma an lakan beisei.

Farkawn, Dungtlang, Lianpui leh Lungphunlian khaw bula pipute hmun hlui te National Importance a puan tura hun rei tak atanga INTACH in a lo nawr tawh leh September thla a Union Minister for Culture, Dr. Mahesh Kumar hnena lo thlen pawhin hma chak zawka a sawn beisei a ni.

Author : Vanneihthanga Vanchhawng

Posted in Zoram History | Tagged , | Leave a comment

EVAN DR LALSAWIVELA RAWNGBAWLNA KARLEH THAWHTANNI (13.11.2017) THLENG PAWT SEI

Evan Dr Lalsawivela rawngbawlnaah mitdel 11 mit a var a, HIV+ mi 2 an dam tawh bawk niin sawi a ni.

Evan Dr Lalsawivela’n UPC Biak In, Bawngkawn-a rawngbawlna a neih mekah damlo mi 1931 in damna an chang tawh niin sawi a ni a. An zingah hian HIV+ vei pahnih an tel bakah mitdel 11 lai mit a var phah tawh niin thu dawn a ni. Nizan Pathianni zan khan mitdel pi Ramthliri Bawngkawn mit a var ve leh ta.

HIV+ Aizawl Tlangnuam venga mi chu Oct 28 khan Evan Sawivela hian a khawih hnuah Nov 2 khan a thisen a test a, HIV+ hi an hmu tawh lo niin sawi a ni.

A bikin tun Inrinniah khan damlo na zual, mahni a thu thei lo thiau mi 6 ten damna an chang a. An zingah hian oxygen tel lova minute 5 pawh awm thei lo, a dam avanga oxygen mamawh zui tawh lo a awm bawk.

Pu Sawivela rawngbawlnaah hian phai lama pum cancer an zai, a lo chhiat tawh avanga an chhin leh ringawt, a khawih hnua dam ta te, phai atanga beidawnga lo haw, rawn dam ta te pawh an awm niin sawi a ni.

Evan Dr Lalsawivela rawngbawlna hi vawiin Thawhtanni hian tihtawp tum a nih laiin mamawhtu an la tam em avangin karleh Thawhtanni thleng pawhsei leh a ni a. Damlo pantute hian zing dar 10:00 hmaa a hmun thlen hman ngei turin an ngen.

November ni 4 Inrinni zan thlenga Evan Dr Lalsawivela rawngbawlna report hetiang hi a ni -Damlo khawih zat – 2449
Dam zat – 1931
Dam beisei zat – 432
Dam zo lo zat – 86
Bengngawng dam zat – 604
Tawngthei lo dam zat – 134
Spinal cord chhia dam zat – 24
Nerve ṭha lo dam zat – 174
Cancer dam zat – 80
Stroke dam zat – 29
Mitdel dam zat – 11
Sermon – a dam zat – 40
HIV+ dam – 2

Author : Vanneihthanga Vanchhawng

Posted in Pathian Thu, Zoram History | Tagged , , | Leave a comment

AIZAWL KHAWPUIAH CCTV CAMERA 185 VUAH A NI TAWH

Aizawl khawpuiah Home department hmalaknain Closed Circuit Television (CCTV) Camera 185 vuah tawh a ni a, heng CCTV te hi Police te chuan thubuai chhuina atan tangkai takin an hmang ni a thudawn a ni.

Home dept-in Aizawla CCTV an vuahah, a thawh khatna atan kum 2015 khan hmun 10-ah Camera 59 dah a ni a. A thawh hnihna leh thawh thumnaah camera 126 dah belh leh a ni a, project pumpui atan khawpui chhung hmun hrang hrangah CCTV Camera 202 vuah tuma ni. CCTV vuah hnathawktu KSJ Dynamic Security-te chuan traffic control room te, Aizawl PS, Bawngkawn PS, Vaivakawn PS leh Kulikawn PS-ahte CCTV hi an vuah fel tawh ni a thudawn a ni bawk.

Aizawla CCTV vuahte hi a vuahtu KSJ Dynamic Security-te’n kum li chhung an enkawl zui dawn a, chumi chhung chuan Mizoram police-te a enkawl dan an zirtir ang a, kum li hnuah chuan Mizoram police-te’n an enkawl tawh dawn a ni. SP Aizawl Office building ah Main Control Room dah niin Police Station hrang hrangah Sub-Control Room dah a ni a. CCTV hi Police ten tangkai taka hmangin CCTV atnag hian case engemawzat chhui chhuah tawh a ni. Sorkar chawlh leh Inrinni leh Pathianni-ah pawh chawl loin mipa paruk leh hmeichhia pangain an enkawl mek a ni.

Aizawla CCTV vuah hna hi Aizawl City Surveilance Project atangin thawh a ni a, sum ruahman cheng nuai 1,265 chu Ministry of Home Affairs-in March 30, 2013-ah a rawn pe tla tawh a. Modernisation of State Police Force Scheme (MPF Scheme) hnuaiah Union Home Minister Discretionary Fund atanga dawn a ni a, he project-ah hian state sorkarin sum tum ve tur a nei lo a, MHA-in a rawn tum vek a ni.

Aizawl khawpuia hmun thenkhata CCTV dahte hi thubuai chhuina kawngah an tangkapui hle tih police-te chuan an sawi a. Zan lam a Police Patrolling kalte leh CCTV control room-a awmte ‘n thawhhona tha tak neiin, Control room atanga enzui ngai ni a lang te chu patrolling-te’nenzui hna an thawk thin.CCTV hmangin thubuai eng emaw zat chinfel a ni tawh a, thubuai chinfelna atan chauh ni lo, thubuai chhui chhuahna atan pawh CCTV hi Police ten an hmang tangkai hle. CCTV atanga pawikhawihtu an manchhuah zingah – 8.11.2016 zana GAD Civil Aviation Wing Office, Secretariat Annex Building (NLUP Office bul) rawk a ni a, Police leh Forensic Team in a hmun ah kal chilh nghal in, uluk tak a chhui a nih hnuah Office rawktu Zohlimpuia (35) s/o Ralthangliana chu ni 10.11.2016 zanlai vel khan chhui chhuakin, a pawisa ruksa zing ami Rs. 5,00,500 /- an inbula a phum ruk pawh hmuh let leh a ni.

CCTV control room-ah hian police-te pawh an duh hun hunah an lut thei lo a, SP atanga phalna lak a ngai. Thubuai atana tangkai tur nia an hriat an lak chhuah duh pawhin, a hranpaa dilna an siam a ngai a ni.

(Source: ZAWLBUK)

Posted in Zoram History | Tagged , , | Leave a comment

GREEK MYTHOLOGY : Fall Of Troy by Chester Ralte

Greek mîte indona zawng zawng zînga lâr leh hmingthang ber mai Troy indona an tih lo chhuah chhan hi a ngaihnawm ve riau a, hriatna ti zâu tu ah hmang leh mai ang aw. Zeus-a leh a unau ten milian ‘Titans’- ho Lalna an chhuhsak hnu khan an unau a rorelin Thuneihna an insem hlawm a, tichuan Vân leh khawvelah ro an rel ta hlawm a. Mahse Zeus-a hian a unaunu Hera-i nupuia nei reng chungin Pathiannu dangte bâkah mihring nula hmelțha a tih deuhte chu mutpuiin fâ tam tak a nei a, Pathiannu dangte laka a fa te chu Pathian ve bawk anni hlawm a, Rimawi pathian Apollo te, Ramsa enkawltu Artemis-i te, Khualzin vêngtu Hermes te, Indona Pathian Ares te, Thla Pathiannu Selene- te bâk ah Pathian tamtak fâ a nei a. mihring hmeichhe laka a fâ te chu leia mi chak leh huaisen, Perseus leh Hercules bâk ah milian leh thiltithei tak tak te an ni hlawm a, chûng afa te chuan fa an nei leh a, Amah mai nilo, Pathian dangte pawh in mihring lakah fâ neiin anlo in thlah pung a, leiah chuan mi chak leh huaisen, thiltithei leh milian tam tak anlo awm ta țeuh a. (Genesis 6:1-4) Chûng amah leh Pathian dangte thlah milian leh thiltithei pui pui te chuan hun alo rei hun ah intêlkhâwm in an thiltihtheihna te nen țangrualin an mahni Pathian(zeus-a leh a unaute) te chu do vin, anla paihthla mai ang tih a hlau êm êm a, tichuan Pathian dangte hriat lohvin rem a ruat ta a.. Zeus-a hi a lerh êm avangin a nupui Hera leh Pathian dangten an phiarru a, chumi a hriat chuan Zeus-a chu a thinrim êm êm a, fing taka remruat in Apollo-a chu Troy kulh sa tûrin a hrem ta a, He kulh hi Pathian sak a nih avangin tuman an hneh thei ngailo a, an ti chim thei hek lo.

Trojan Lal Priam-a fapa Paris-a hi alo pian dawnin a nu Hecuba-in mumangah chhiatna râpthlak tak a hmu a, chu chu zâwlnei ten hrilhfiah in, He a fâ lo piang tur avang hian Troy kulh hi ala chhe dawn a ni tiin. Tichuan alo pian veleh Priam-a chuan ran vulhtu Agelaus-a hnenah kalpuiin tiboral tûrin a ti a. Agelaus-a chuan nausên tihhlum chu a hreh hle a, mahse Lal thupêk a ni si a, Ida- tlângah chhoh puiin a ngûnhnâm chuan sah a han tum a,
Mahse chutia nausên sualna neilo chunga kutthlâk chu a thei ngang lova, Ramhnuaiah ramhnuaiah chuan a thih tho tho ringin a dah a, rilru nuamlo takin a hâwsan ta a, mahse a kal hnu lawk chuan Savawmnû alo chhuak a, nausên chu a hnute tuiin a châwm ta a. Ni kaw hnuah Agelaus-a chuan nausên chu a va en leh a, Dam leh hrisel taka a hmuh avang chuan mak ati hle a, Pathian ten an vêng ni ngeia a ruat avangin inah a hruai haw a, a hmingah Paris- tih sâ in a enkawl ta a. Tichuan ran vulhtu te hnenah chuan khawsa in alo tlangvâl chuan infiam na thei tak mai leh hmelțha tak mai a ni a. Vawikhat chu Troy khawpuiah kût a awm a, chutah chuan Paris-a chu kal ve in infiamna chi hrang hrangah a ti țha ber a ni a, chu infiamna chu Lalpa Priam-a chuan a en ve a, Paris-a chu thiam a tiin a ngaisang em em a, chutih laia alam alo hawi chuan Paris-a mitmeng chu a nupui Hecuba-i mitmeng chiah chiah ani tih a hmu a, chutah chuan thil engkim ngaihtuahin Indona Pathian Ares-an a fapa ani tih a hrilh ta a, chuta țang chuan Paris-a chu Lal inah chêngin Lalfapa anihna chu a nei lêt leh ta a. Ranvulh tute hnena Paris-a a awmlai leh a tleirâwl laiin Tuipui Lasî Thetis-i leh Myrmidon Lal Peleus-a te chu anlo innei vê mêk a. An inneihna ruai chu Olympus- tlângah an țheh a. He inneihna ah hian Pathian leh Pathiannu zawng zawng Indona Pathiannu Eris-i tihloh chu an kal kim vek a. Indona Pathian Ares-a unaunu Eris-i hi buaina siam chîng tak mai anih avangin an sâwm ve duh lova.

Mo lawmna a an sâwm ve duhloh avanga thinrim Eris-i chuan an ruai țheh chu tihbuai atum ruh hle a, Rangkachak Apple-ah hian ‘ Kallisti’ tih thu a ziak a, chu chu, ‘Mawi lehzualna,’ tihna a ni a; tukverhah chuan a theh lût ta zauh va. A tum ang ngei chuan Eris-i chuan buaina chu a chawkchhuak ta. Hmelțhatna Pathiannu Aphrodite-i, Finna Pathiannu Athena-i leh Zeus-a nupui Hera-i te chuan an inchuh a. Apple inchuhna lamah chuan an inhnial nasa hle mai a, a tâwpah an thubuai rem turin Zeus-a hnenah ankal ta ringawt a. Mahse Zeus-a pawhin rem ngaihna a hre lova, “Paris-a hnenah kal ula, ani’n inthû a rem thei ang, Naupang mah nisela a fing hle a, kei aiin thubuai rem a thiam zâwk.” tiin alo hnar a. Paris a hi hetih lai hian naupang chauh ala ni a, ranvulhtu te hnenah ala khawsa mek bawk. Naupang fel tak mai a ni a, dikna ngaina mi a ni a, ama tana țhahnem ngai bik lo, thil dik tak a ti mi anih vangin Zeus-a pawh hian a hnenah Pathiannu te hi a tîr rêng bawk a. Pathiannu Hera-i chuan Paris-a hnenah, ” Lalnu ka ni a, Pathiannu zawng zawng te zînga Lal ber ka ni, angkachak Apple hi min pêk phawt chuan Lal ropui takah ka siam ang che a, i dam chhûngin hausakna chhiar senloh vin ka vûr ang che.” a ti a. Athena-i chuan, ” Finna leh Indona Pathiannu ka ni a, Apple hi min pêk phawt chuan Finna chungchuang ka pe ang che a, Pasalțha huaisen takah ka siam bawk ang che.” a ti a. Aphrodite-i pawh chuan, “Kei chu Hmelțhatna Pathiannu ka ni a, Apple hi min pêk phawt chuan tlangval hmelțha takah ka siam ang che a, khawvelah nula hmelțha ber nupuiah ka neihtîr bawk ang che.” a ti a.

Tichuan Paris-a chuan ngun taka Pathiannu Pathumte thû angaihthlak hnu chuan Rangkachak Apple chu Aphrodite-i a pe ta a. Chumi hnu ah Sparta Lal Tyndareus-a boral hnu in Helen-i pasal Menelaus-a chu Sparta Lal alo ni a, a hma hmasa ah chuan engtik lai pawh a an do reng mai Troy khua chu inremna saui a tanpui a, He inremna lawm na ah chuan Troy Lalfapa Hector leh Paris te pawh ankal ve a. Paris-a’n Sparta Lalnu Helen-i a hmuh meuh chuan khawdang reng reng a hawi thei ta lova, Tichuan Pathiannu Aphrodite-i hnenah inthawina hlânin, ” Nang Pathiannu, mihringte tân pawh a hmangaihna Pathiannu i ni a. Ka naupanlaiin thu min tiam a, Khawvela nula hmelțha ber ka pe ang che iti anih kha, Pathian ini a, Pathiante chuan thutiam an sût ngailo, Helen-i hi ka duh a, chuvangin rangkachak apple ka pêk vâng che a ka hnena i thutiam chu ti puitling tawh rawh le ” a ti a. Aphrodite-i chuan a fapa Eros- hnenah Helen-i’n Paris-a a hmangaih ve theih nan Helen-i thinlung chu hmangaihna thal a kâp turin a ti a. (Eros hi hmangaihna Pathian a ni a, Roman ho chuan Cupid-anti a, Valentine day vela lâr deuh, Card a naupangte thla nei, hmangaihna thal keng lem hi a ni. CR) Nimahsela Pathian dangte chuan Aphrodite-i thiltum chu țha anti lova, “Paris-a hnena Helen-i i pêk phawt chuan Greek leh Trojan inkârah indona a chhuak anga, mi tamtak an thi dâwn a ni. Mihringte inrem taka an awm chuan Pathiante rawng an bâwl țha zawk.” an ti a. Nimahsela Eris-i chuan buaina siam atum tlat a, thil phiarrûk thiam tak a ni si a. Hera-i hnenah akal a, ” Paris-a hian hmanah khan rangkachak apple kha a pe duhlo che a, Nang Pathiannu zînga ropui ber chuan i theihnghilh hauh lovang. Tin, Trojan ho chuan nang leh i pasal(zeus) aiin Apollo chu an hmangaih zâwk a a hnena inthâwina tûr temple pawh ropui takin an sâ a, Tunah chuan Peleus-a fapa Achilles-a hi tuma hneh rual lohva chak alo ni ta a. Tin, Aphrodite-i pawh hian thu alo tiam tawh rêng a, Paris-a’n Heleni nupuia a neih phawt chuan Trojan leh Greek an indo anga, Apollo-an a chhuan êm êm Trojan kulh bang hi Achilles-an a chhu chhe vek dawn a ni.” a ti a. Tichuan Hera-i chu Zeus-a bulah akal a, ” Aphrodite-i hian thu alo tiam tawh ang ngeiin Heleni chi Paris-a nupui tur a ni.” tiin a dîl pui a. Tichuan Eros-a chuan Helen-i thinlung chu hmangaihna thal in a kâp ta a, Pawhțhen rual lohvin an lo in hmangaih a, Paris-a chuan a rûkin Helen-i chu a Troy ah a hâw pui ta a. Hemi avang hian Troy leh Greek chu anlo indo ta a nih kha. Tin, Hetih hunlai hian Greek chu ram țhen hrang ang te te in an la awm vek a.Tuna Greek rampum ang hian an la awmlo. Menelaus-a leh Agamemnon-a hian an unaupa an thah avangin Sparta Lal hnenah an tlanbova, Sparta Lalfanu Helen-i hi a hmelțhat êm avangin Greek Lal fapa zawng zawngin nupuia neih tumin an rîm vek a. Ithaca Lal fapa Odysseus-a pawh in a hêl ve a, Mahse Odysseus-a hian Helen-i a chan theih dawn chuanloh a a hriat avangin Helen-i pa chu remruat puiin Helen-i cousin Penelope-i chu apa hnena palai sak turin a ngên a. Greek lal fapa te hian Helen-i hi neih vek an tum avangin a tu emaw ber pawh nei sela, midang ho in phuba la in buaina an siam anga, Sparta chu an rûn duh mai ang tih Lal Tyndareus-a chuan a hriat ve avangin a rilru a hah hle a, Odysseus-a remruatna angin thu an rel ta a. Lal fapa zawng zawng Helen-i rîmtu ho hnenah chuan, “Tupawh Helen-i hian pasal ah a thlang ang a, a tibuaitu an awm emaw nakinah rûkbo tum hial pawh anla awm thei a chûng lakah chuan ințanpui vek ang.” tiin thu a tiam tir vek a, Greek Lalfapa te chuan an remti tlâng ta vek a, an chhechham ngheh zia lantir nan Tyndareus-a chuan Sakawr a pe țheuh bawk a. Thu an tiam zawh chian Helen-i chuan Menelaus-a chu pasalah a thlang ta a.

Tyndareus-a boral hnu in Menelaus-a chu Sparta Lal alo ni a. Trojan leh Greek ho inremna neih laiin Paris-an Helen-i a rubo a. Tichuan a hmâ daih a Helen-i pa hnena Thutiam ho zawng zawng Lalfapa te kha Lal anlo ni ta vek tawh bawk a. Tichuan an thutiam ang ngeiin Helen-i la lêt leh tur chuan Greek ram zawng zawng an thawk chhuak ta a nih kha.

Greek ram zawng zawng chuan Trojan chu an beih rawn a, Trojan pawh ram tam tak in an țanpui ve a, Phoenician te, Phyrgian te, Thracian te, Cilician te, Dardarian te, Lycian te, Paeonian Lal ram ten Troy hi an pui a, hêng Lalram ah te hian Pathian thlah mi chak leh milian ho an awm vek a, chu chu Zeus-a duhdan leh remruat ang chiah a ni. Myrmidon Lal fapa Achilles-a kha chûng Pathian thlah ho tihhlum nan chuan Zeus- an alo hual lâwk sa tawh a. a tum ang ngeiin ram khat pasalțha bîk, Greek pasalțha bîk te pawh ina an hneh loh tur ang apiang chu Achilles-an a tihlum zel a, a chekhnawk  ho pawh mi chak leh milian ho, Pathian thlah te pawh tam tak an boral anih kha. Mahse Achilles-a kha a huaisen in rin aiin alo chak daih mai si a, Zeus-a leh Pathian dangte țanpuina ni miahlo in, ama rilru hrim hrim kha a lo huaisen êm avang in Troy puitu Lalram bâk ah Troy sipai te leh Greek sipai te pawh in an hlau a, Troy țanpuitu Pathian, Indona pathian Ares-a te, Rimawi leh thalkah pathian Apollo te, Ramsa pathiannu Artemis-i te leh Hmelțhatna Pathiannu Aphrodite-i te pawh in an hlau hial a, Achilles-a an hmachhawn ngamlo a, an in nghahna Hector-a rilru ah huaisenna dahin Achilles-a an beih tîr tawp a, mahse Achilles-an alo tihlum leh ta mai a nih kha. Troy Pasalțha leh a puitu Lalram ho innghahna Pasalțha bîk te pawh Achilles-an a tihlum zel avangin Pathian ho chuan an hlau in an beidawng hle mai a, Pathian Apollo-a chuan Achilles-a ten Pathian thlah ho Troy innghahna ber ber an thah mang tâk avangin Zâwlnei te lo puan lâwk tawh, “Thetis-in fapa a hring anga, a fapa chu Greek pasalțha zawng zawng zînga ropui ber leh hmingthang ber a ni ang a, khawvêlah amah khing phâ rêng rêng an awmlo vang , ani chuan Khawpui ropui Troy meuh pawh a kulh bang zâwng zâwng, a leiseh chin lamin ala kar phawk vek dâwn a ni”. an lo tih tawh chu a thleng dik dâwn ngeiin a hria a. Troy kulh hi Apollo-a sak hi a ni a, chuvangin Achilles-an a tichhe dâwn tih a hriat avang hian a lungngai a, a beidawng êm êm a, Achilles-a thinrim na hi Pathiante pawh in an dang zo ngailo a, Pathian te leh mihring te zawng zawngin an hlauh avangin Troy mipui ho chu an lungngai êm êm a.

Tichuan Achilles-a ten an innghahna Pasalțha zawng zawng an tihhlum sak tawh hnû, awlsam tak a a kulh bang chhutchhiat tum a an lo kal chu Apollo-a chuan Zeus-a hriatloh in Paris-a chu a țanpui a, Achilles-a thurûk leh thih theihna lai hrilh in, Zeus-a remruat dan nilovin Apollo -a chuan Paris a chu a thalmû a ti ngîl a, Achilles-a a lo kâp hlum ta a nih kha. Achilles-a thih avangin Greek ho te chuan Troy kulh chu an la leh thei ta lova, Zeus-an a Apollo-an a remruat dan lo anga thil ati chu a haw hle a. Troy kulh ti chhe thei tu chu khawvelah Achilles-a chauh a nih avangin Pathiante an buai hle a. Mahse chumi lai chuan arûk a Zeus-a remruat in Zawlneiin Troy kulh hneh nan chuan thil pathum a ngaih thu an rawn puang leh ta. chung te chu, Hercules-a thal te, Troy kulh a Pallladium lak leh Achilles-a fapa indona ah chuan a tel in tih a ni. Hercules-a thal hi Philoctetes-an a kawl daih a, amah hi thal kah thiam tak a ni a, Greek Pasalțha hmingthang tak Hercules-a a thih dâwn khân a hâlna tûr thing a fawmkhâwm a, chuvang chuan Hercules-a chuan a thal leh sairawkherh a pe a ni. Philoctetes-a hi a tîr a Troy bei tûr a Greek sipai te an kal khan a tel ve a, mahse Lemnos- thliarkar a an chawlh laiin rûlin a chuk a, chuvang chuan a țhiante chuan thliarkarah chuan an hnutchhiah a, an indo mup mup lai zawng zawng khan amah in alo awm char char a, Argos Lal Diomedes leh Odysseus-a ten thliarkar ațang chuan an va hruaichhuak a, Hercules a thal hmang chuan Mi ropui leh michak tam tak kâp hlumin a țawp ah inmal beih ah thalkah thiam Paris-a a cho va, thal mû a tûr tah in Paris-a chu a kâp hlum a nih kha. Tin, Achilles-a fapa Neoptolemus-a pawh chu naupang tak ni mahse Skyros thliarkar a a awm chu Odysseus-an a va hruai vang vang bawk a, a pa râlthuam te pawh a pe let leh vek a. Tin Palladium pawh Helen-i puihna in Odysseus-a ten an la ta bawk a. Palladium hi Pathiannu Athena-ina asiam a ni a, Poseidon-a fapa Triton-a fanu Pallas-i lim a ni. Tichuan Zeus-a remruat ang chiah in Troy kulh ropui tak mai chu chhutchhiat a lo ni ta a, Lei a mi chak leh huaisen, Pathian thlah milian ropui tak tak leh Pathian te tân a hnawk tham a thiltithei te chu an lo thi ta bawk a. Zeus-a leh Pathian te chuan khairual takin Mihring te chungah ro an rel thei ta a ni.

Posted in Fiction, Thu Ngaihnawm | 3 Comments

FORENSIC FILES (38): QUITE A SPECTACLE by Bruce Kibby

           Tun tuma kan case sawi tur hi Canadian History ah chuan case mak leh dangdai ber te zinga pakhat a ni hial awm e. Tomato rah leh thlalak a reflection awm te chu Evidence awm chhun a ni. Heng Evidence beitham lo zet te hi tualthattu chimawm tak chhui chhuah nan a tawk ang em?

              Kum 1989, June Ni 19 khan Collingwood, Ontario ah chuan khawpui ruah a sur buan buan a. Chumi zana ruah sur chuan kum 33 a upa, Deborah Lee “Debbie” McArthur Timlock-i pawn chhuak tur a dal zo lo. Debbie hi nu hmeltha leh harh vang tha tak a ni a.  Vur tleng nuam a tiin lawnga inkar te pawh nuam a ti a, thian a ngaina em em bawk. Pasal nei lovin fanu pakhat a nei a. A chhuah dawn avangin hemi zan hian kum 6 a upa, a fanu Lacey chu a nu leh pa te bulah hnutchhiahin a kalsan a ni.

              Debbie leh a thian thenkhat te chu restaurant ah hlim taka inkawmin hun an hmangho a. Chutianga hun te an hman zawh hnu chuan Parking Lot ah an inmangtha liam liam a; an tin darh ta hlawm a ni. A thian te sawi dan chuan Debbie chu amah chauhin a haw a; in lama haw tlang nghal mai turah an ngai a ni. Mahse, Debbie chuan zinglam dar 3:25 ah Policete phone-in bei a tawh thu a hrilh a. Pawngsual a nih thu a sawi tel bawk. A lan dan chuan a chunga thil thleng chu a hre thiam vek lo pawh a ni thei. Chu mai bakah thidang lo turin a bei tang tang niin a lang. Mahse, Policeten a chenna in an va thlen meuh chuan an tlai hman tawh a ni.

               Oak Street a a chenna apartment ah chuan an han lut a, pawi khawihna rapawm zet mai a thleng tih a hriat theih a. Sofa bul lawk chhuata thawmhnaw inbel lova hmeichhia lo thal reng chu an hmu nghal a. A ban veilam chu telephone handset ban tum niawm takin a phar chhuak a. Chhuata thisen tam dan atang chuan thisen a hloh hnem hle ang tih a hriat a ni.

               Collingwood ang khawte ah hian tualthahna thleng ve bawk thin mahse hetiang khawp a rapthlak a tualthahna hi chu a la thleng ngaih meuh lo. “Eng tin nge a thlen theih zawk?” tih chu zawhna a ni. Investigatorte chuan pindan hrang hrang inkalpawhna (hallway) a thisen far chu an han chhui zel a. Pindan inkalpawhna ah chuan tarmit, a frame thir chi leh hmeichhe pheikhawk, khing khat thisen lo kai nuaih an hmu a. Debbie mut pindan an va luh chuan mattress a chhunga tui thun ang chi (waterbed) leh thawmhnaw eng emaw zat a thisen kai an hmuh belh a. Chhuat leh khumkhuhna te, intuam lumna puan leh khum khuhna puan ah te pawh thisen a lo kai nuaih a ni. Khum lu lam khum tlângah chuan thisen per (Blood spatter) leh thisen kâi a awm bawk a. Investigatorte chuan choka lamah pawh mihring chetna hnuhma an hmu belh ta bawk. Choka chu a lo hnawk nuaih a, chu laia tukverh chu misual rawn luhna ngei niin a lang. Lei ringa chhuat siam ang chi In a nih vangin tukverh chu lawn liam mai thei a ni a. Thlengsilna a thleng vel te pawh mumal lo takin an awm hlawm a ni.

               Choka tukverh zawn, pawn lam chu hnimbukin a hliah then a. Tukverh hnuai zawn leiah chuan tomato rah a lo tla a. Debbie Timlock khan tihhmin tumin tukverh tlangah Tomato a lo dah a. Misualin tukverh a hawn zawngin tomato chu pawn lama a tla chhuak a ni ngei ang. Chu tomato tla chu rah pherh a ni a. Tomato rah pherh ah chuan pheikhawk hniak chiang takin a lang a ni. Tomato a phei khawk hniak lanna chu a thla an la a, hmel hem lova vawn that a nih theih nan Debbie refrigeratorah an dah ta a.

               Policete chuan apartment chhungah chuan pawn lam mi fingerprint hmuh an nei lo va, thil hlu bo thlau a awm lo bawk. Chuvangin Investigator te chuan ” Debbie thi tura lo duhtu chu tu nge ni ta ang? tih zawhna an siam a ngai ta. Chu zawhna chuan chhanna khirh zet mai a rawn hring chhuak ta a ni.

            Debbie Timlock Autopsy atangin Medical Examiner chuan Debbie chu pawngsual ngei a ni tih a sawi a. Vih hlum ngei a ni bawk. A lung zawnah vih a ni a, a hnunga vihna thung chuan a spinal cord a tawn tlang hial a ni. Pathologist chuan Debbie i khan police te biak tuma telephone awmna lam pana a bawkvak tang tang lai khan a kawng chin hnuai lam chu a zeng ngei ang tih a ring a. Police lamin Debbie hnenah, “Ambulance kan rawn tir nghal a, a lo thleng thuai ang” tia tanpuitu tur te a lam pana an kal mek thu an hrilh khan “Ka lawm e” tiin a lo chhanglet a. A chhan zawh rualin a thi nghal niin an ring a ni.

             Debbie thattu chu an chhui țan ta. Rinhlelh ni thei tur han chhui zui tur pawh an nei nghal pang a. Kum 4 hmalam khan Debbie chu mipa pakhat, Ron Osborn bula a khawsa  tawh thin a. Ron Osborna hi Drugs tawlhrukna ah pawh a lo inhnamhnawih ve tawh thin a ni. Thuneihtu te chuan Ron Osbornan lawng hmangin Jamaica atangin Florida-ah damdawi hman phal loh a phur lut ngei a ni tih finfiahna an nei a. Osborna thubuai ngaihtuahna ah chuan Debbie chuan hreh tak chungin Osborn thil sual tih chu a puang a. A sawi dan chuan Osborna ngeiin lawng hmangin thla hnih chhung a thangbo thu a lo hrilh a. A hnuin chu lawng chhung a bungraw dah khawmna ah ngei chuan damdawi thahnem tak an man a ni.

           Debbie thah a nih laiin Osborna chu lung ina a tan lai tak a ni a. Chuvangin Detective te chuan Osborna thurualpui tu emaw berin Debbie chu a that a ni thei mai ang em tih pawh ngun takin an chhui tel nghal a. Drugs tawlhrukna Case inziahna Transcript te chu ngun takin an ennawn a. Drugs tawlhruknaa inhnamhnawihte awmna chin an hriat theih nan leh Investigation in eng e a hmuh chhuah tih hriat tumin Investigating Officer te pawh uluk takin an kawm bawk a ni. Chutia uluk taka an han chhui chuan Osborn a case leh Debbie tualthihna chuan inzawmna a nei lo tih an nemnghet ta a. Drugs tawlhruk thubuai lian tham tak ah Debbie Timlock te ang pawimawhna nei nep tak chu thah a nih an ring lova. A chhan chu Debbie khan tangkaina a nei nep lutuk tlat a ni.

              Tih dan phung pangaiin Police te chuan Debbie pasal hlui pawh thu an zawtfiah a. Hemi te hi kum li liam ta khan lo inthen tawhin an fanu kum 6 mi Lacey-i chu inkawl chhawk phalsak an ni. A pasal hlui hi pa tha tak a ni a. Chhan eng emaw vangin an inhmuthiam lo mai chauh niin a lang. Tichuan inpawh tak chunga inthathenin hringnun lam tluang hran ve ve zawhin mahni tuanna mual mual ah an hman hlelh ve ve a ni. Debbie pasal hlui chuan Debbie thah a nih zan chuan inah a awm thu a sawi a. A dik ngei bawk. Chutianga rinhlelh tur an tlak chham hnu chuan Investigatorte chuan pawi khawihna hmuna Evidence an hmuh te; tarmit leh tomato a pheikhawk hniak awmah chuan an insawr bing leh ta a ni.

              Tomato ah chuan pheikhawk hniak ziarang fiah takin a lang kulh a. Chu ziarang chu thumbawh ang deuha (herringbone pattern) zia nei hi a ni a. Tomato thlalak chu an han sil (develop) a, ngun taka an han zir chuan camera flash phe chuan thlalakah chuan hlim (shadows) danglam bik tak a rawn siam a. Chu herringbone pattern ah chuan pattern dang a lo lang tel a. A tira an hmuh aia kimchang zawkin ‘S’ pianzia ang tak hi herringbone pattern chhanah chuan a lo lang a ni.

           Tichuan, tarmit chu chik takin an han enfiah leh ta a. Tarmit ah chuan Debbie thisen a kai a. Chu chuan fiah takin thil thlen dan a sawi a. Tarmit fawng pahnih te chu inthlepin a awm a. An rin dan chuan tu emaw ipte atangin a tla chhuak a ni ngei ang. Debbiei khan thei leh theih lovin a pindan atangin telephone awmna lam panin a bawk vak a, pindan inkalpawhna chhuat a lo awm tarmit chungah a bawk vak phei zel tihna a ni. Debbie khan tarmit a vuah ve loh avangin chu tarmit chu tualthattu tarmit ngei niin an ring a. Tarmit chu man to tak ni lem lo, darthlalang (lens) pawh frame a invuah rem tha thum lo hi a ni a. Chuvang chuan frame leh lens inkarah chuan hmunawl a awm nghe nghe a, tarmit chu hun eng emaw chhung vuah tawh a ni tih pawh a chiang. Chumai bakah darthlalang pahnih te chu an intiat chiah lova, an pianghmang an inan theih nan darthlalang pakhat zawk chu nawh tet ni ngeiin a lang. Chutiang chu tih dan phung pangngai piah lam deuh a ni.

             Policete chuan bawhzui tur hnu pawimawh zet mai hriat an nei ta. Kum 23 a upa James Douglas Browna a chu tun hmain Debbie thenawm mai ah a lo cheng tawh thin tih an hria a. He pa hi thawk khat lai kha chuan Olympic ah pawh tel ve phak tura beisei a ni. Browna hian wrestling ah hlawhtlinna a lo nei nual tawh a. Japan ramah pawh lo inbuan ve zak zak tawh, Olympic a tel te pawh a lo inbeisei ve tawh thin a. Debbie khan a dam laiin a thiante bulah Brownan amah chu kawmngeih a tum tih a hrilh hlawm a. Browna nun hlui an han chhui a, pawi khawihna eng emaw zah ah a lo inhnamhnawih tawh thin tih an hmu chhuak a. Mi ina luh ruk, mi sawisak leh rukruk thubuaiah vawi tam thiam loh chan tir tawh a ni. Mahse, thla thum aia tam a tang ngai mang meuh lo.

            James Browna chu thu an han zawt fiah ta. Mahse, “Debbie tualthihna chungchangah ah inhnamhnawihna ka nei lo” tiin a pha a. A sawi dan chuan tualthahna thlen zan khan ani chu khuaah a awm lo va. Hotel ah a thlen thu leh chutah chuan a hmel hriat lo tu emaw in a sawisa a. Chuvang chuan a tlu a, a harh leh chuan mel eng emaw zaha hla kawngpui sirah a lo awm a ni. Browna hmaiah chuan pilh khem ni niai a awm a, achhan an han zawh chuan sawisak a tawhna vanga khem niin a sawi. Mahse, a pumraw hrawl dan ngaihtuahin Detectives te chuan a thil sawi chu an ringhlel a ni. Browna hi feet 6 leh inchee 3 a sang,  pumrua pawh hrawl tha tawk tak leh pound 350 lai a rit a ni a. Dar hlai hlep hlawp, kuttum hrawl tak nei a ni a. Detective te chuan thil dang hmuh chhuah belh an nei a.  A hmaa man a nih tuma lu leh dar chauh lanna thlalak (mug shot) ah chuan Browna chuan tarmit a vuah a ni.

             Debbie Timlocki tualthihna a an mi rinhlelh ber chu Debbie thenawm chiah a lo cheng tawh, pawi khawih vanga convict tawh, James Douglas Brown a ni. Thu an zawh fiah tum chuan tarmit a vuah lova, mahse, lehkhachhiar nan tarmit a nei ngei thu a sawi. Mahse chu tarmit chu a ti bo tawh niin a sawi a. Chu a thu sawi chuan Detective te chu pawi khawihna hmuna Tarmit an chhar leh Jim Browna an thlun zawm theih ngei nan hun tha a lo siamsak ta. Tarmit a Debbie thisen kai chu an han hrufai a. Tichuan, hmeichhe Officer pakhat chu Nurse lema changin tarmit chu Browna hnenah chuan a han hlan a, a ta a nih leh nih loh a zawt pah bawk a. Brown chuan thil dik lo a awm a ni tih a hrethiam thuai a. Tichuan tarmit chu a han thlek a, a ta a ni loh thuin a chhang ta a ni. Mahse, Detective te chuan Brownan a phat vang maiin tarmit chu Browna ta a ni lo tihna pawh a ni chuang lo tih an hrechiang. Tarmit leh Browna te inkungkaihna tak an la hre rih lo tihna mai chauh zawk a ni.

             Police te chuan Browna chenna leh a car chu an han dap a. Car hma lam, ding lam passenger thutna chhuatah chuan tlan nana hman chi puan pheikhawk rawng pawl, kawp khat hi an hmu a. Chu pheikhawk chu Szechoslovakia ram siam niin a lang. An han chhui zel a. Chu pheikhawk chu Ontario sawrkarin a lei leh Provincial Systema jail a tangte hnena a pek thin a ni.

              Debbiei choka tukverh zawn pawn lam leia tomato rah pherha pheikhawk hniak awm ang chiah kha Browna pheikhawk hnuaia ah pawh chuan ze danglam bik tak a lo awm ve a. Chu pheikhawk hniaka ze danglam bik tak chu S emaw 7 emaw shape ang deuh hi a ni. Makse, Jerry Web, Forensic expert chuan harsatna a nei ta tlat mai. Pound 350 a rit tu emawin tomato chu rap ta se, lehkha emaw lehkha puan langtlang chi a pheikhawk hniak nemkai ang ni lo, tomato ah chuan hniak dang daih a siam thei reng em tih a hriat a ngai ta a ni. Webb-a chuan enchhinna a ruahman ta a. A nau te zinga pakhat chu bomb sutna a hak chi kawr hak tirin Browna rihna hen turin chu thawmhnaw ah chuan thir a dah belh bawk a. Kha tualthana thlen zana ruah sur ang thei ber turin tomato ah chuan tui a han phuh ser ser a. Tichuan, pound 350 a rita inthuam chuan an mi rinhlelhpa pheikhawk bunin tomato chu a rap ta a. Tomato a pheikhawk hniak thlalak chungah chuan lehkha puan langtlang thei a pheikhawk hniak an nem kai leh Tomato enchhinna a pheikhawk hniak, lehkha puan langtlang thei a nem kai leh chhawn te chu a han dah thuah a. Uluk takin a han khaikhin a. Webba chuan pawi khawihna hmuna tomato a pheikhawk hniak thlalak, Browna pheikhawk atanga hniak thla an lak leh enchhinna a pheikhawk hniak  te chu an inang vek a ni tih a hre thei ta a ni. Brown phei khawk number leh a pheikhawk hnuai zia tial dan leh pawikhawihna hmuna pheikhawk hniak an hmuh te chu an inang ngei mai. Mahse, pawi khawihna hmuna pheikhawk ngei kha a ni e tia sawi mai theih a ni tlat lo. Tomato a pheikhawk hniak kha Browna pheikhawk vei lam hniak ni ngeiin a lang a, a nih loh pawhin pheikhawk dang vei lam, size leh design thuhmun neiin chu hniak chu a siam a ni thei bawk a ni. Pheikhawk chu lung in tang te hnena pek thin a ni a, dangdai viau angin lang mahse danglam bik tak chu a ni hran lo.

              Detective te chuan Debbie thihna a mawhphurtu an convict theih nan evidence tam zawk mamawh in an inhria a. Chuvang chuan  pawi khawihna hmuna tarmit an chhar ah chuan an insawr bing leh ta a. Pawi khawihna hmuna tarmit an chhar leh kum eng emaw zah liam ta a Police ten Browna mug shot a tarmit vuah a thla an lak te chu thuhmun an ni em tih finfiah turin Dr. Graham Strong, Waterloo University a Optometry Professor hna chelh lai mek chu an pun ta a. Chu mug shot thlalak a harsatna awm ta chu; thlalak chu hma lam atanga ngil taka lak a ni lova. Tlem he deuh hlek a lak a ni. Chu harsatna sut kian nan Styrofoam (file dangah sawifiah tawh a ni e) hmanga mihring lu lim an siamah chuan tarmit chu an han vuah tir a. Mug shot a hawilam angle mil thei tur berin milim lu hawi zawng pawh a han dah rem a. Mahse, duh thusamin a la khaikhin thei ta chuang lo. Tichuan, Dr Strong chuan Mug Shot thlalak chu a han tilian a, ngun taka a han en chuan thil eng emaw pawimawh deuh mai hmuh a nei ta;  chu chu thla latu camera flash in Browna mit rang (cornea) a va chhun a, engin a lo kah let, var sin te, mit a eng de va va awm chu a ni. Tarmit han khaikhin dawnin Mit a reflection awm chu tehkhawng fumfe tak a tan a hman thei a. Chu chu mit pahnih te inkar hlat lam a ni. Tichuan, mit dinglam a reflection leh vei lam reflection hlat lam a han teh a. Mit naute inkar hlat lam chu a lo chhuak ta a. Medical Record atangin Dr. Stronga chuan Browna mit naute (pupil) pahnih inkar hlat lam chu 72 mm a ni tih a hre thei a. Tichuan pawi khawihna hmuna tarmit khaikhin turin tarmit frame leh darthlalang len lam dik tak hriat theina turin teh khawng fumfe tak a nei ta a ni.

Chutianga a han tih chuan tarmit chungchang bik a tehfung leh tehna lai tur bik hmun 20 lai a nei thei a. Chu thil a han chhut chhuak chu lawm avangin a au thelh a ni. A tawi zawngin, pawi khawihna a Tarmit chu an mi rinhlelh tarmit ngei a ni tih finfiah a ni ta. Chu mai bakah an tarmit enfiah chu Mug shot a a tarmit vuah ngei kha a ni bawk. Detective te chuan Debbie apartment a an hmuh tarmit kha Browna tarmit ngei a ni tih an hria. Chu an thil hriat chu lo dik ta se, eng vangin nge mug shot a tarmit kha rangkachak rawng a ni a, Expert ten an enfiah tarmit frame kha a sen uk a nih?…..

                Police te leh Forensic Expert ten dar kar sang tam tak an chhui hnuin Prosecutor te chuan thah a nih zan khan Debbie Apartment ah eng thil chiah nge thleng tih chu an hre thei ta. Khami zan boruak kha a lum hle a. Evidence atanga a lan dan chuan thiante nen an inkawm hnua in lama a haw hnu khan Debbiei chuan inchhung boruak tih daih nan choka tukverh chu a hawng a. Tichuan, khum lam panin a muhil ta a ni. Sawi tawh ang khan Debbie apartment luah hi ground floor a awm a ni a, choka tukverh chu hniam te a ni. Achhan a chiang hauh lo nangin Evidence atanga a lan dan chuan Jim Browna chu Debbie apartment ah lutin choka tukverh bianga tomato lo awm chu nawk thlain a rap pherh a, chutah chuan Tan Ina a dawn pheikhawk hniak chu a hnutchhiah ta a ni. Tichuan Debbie room lam pan in khuma tui taka lo muhil Debbie chu a bei ta nghal a. Pawngsualin vawi hnih lai chemtein a vit a, thi turin a kal san ta a. A chhuah lamin a tarmit chu pindan inkal pawhnaah chuan a thlauh ta a ni. Chemte vihna vanga kawng chin hnuai lam zeng Debbie chuan Police te biak tumin telephone awmna lam pan chuan thei leh thei lovin a bawk vak tawk tawk a, tarmit chungah bawk vak phei zelin 911 a call ta a. A chunga thil thleng chu a hrilh a. Amah lo beitu a sawi chhuah hmain a thi ta a ni.  Mahse, a sawi kher ngai lovin Browna tarmit a a thisen kai chuan amah thattu chu a sawi chhuah sak ta zawk a ni. David Crane, Detective Inspector chuan Debbiei khan a tih tur a hlen tawh tih hriain phone a biak lai rengin a hnuk a chat a nih a ring hial a ni.

                 Carman Mc Cann, Forensic Identification Officer chuan, ” Kan Office a Dr. Strong lo len luh ni kha nimin ang maiin ka la hria a ni. Investigation kal pui a nih atanga thla khat hnu vel a ni a. Evidence pakhat mai mah ni se chhui chhuahin a awm dawn tih hriat kha a hlimawm tak zet a ni. A chhan chu Debbie Timlocki tan kan tawng chhuak thei tawh dawn a ni.” tiin tarmit hmanga misual chhui chhuah a nih tuma a hlim dan a sawi a.

            Prosecutor te hnuchhuina kawnga harsatna hnuhnung ber chu, “Eng vangin nge Browna mug shot thlalak a tarmit kha rangkachak rawng ni siin Jury te hmaa tarmit pho lan kha a sen duk a nih theih?” tih sawifiah a ni. Investigatorte khan Tan in a Jim Browna a awm laiin tarmit kha ama ta a ni leh nih loh fiah nan a tarmit kha pe chhin turin thuthlukna an siam a. An fiah hma chuan tarmit a thisen kai te kha tihfai hmasak an duh a ni. Tichuan, studio ah tarmit thla chu an la hmasa zet a, tarmit a thisen kai te chu an tihfai ta a. Chutia an tihfaina lamah chuan tarmit frame tuamtu laminate chu a khawk ta a ni.

            Debbie Timlock thah a nih atanga kum 2 leh a chanve ral hnu, Kum 1992 January thla khan James Browna thubuai chu ngaihtuah a ni a. Thubuai ngaihtuahna chuan kar hnih leh a chanve a awh a. Jury te chuan dar kar 6 teh meuh mai thubuai chu an ngaihtuah a. Tomato a pheikhawk hniak, thlalak a reflection awm te leh chhiarkawp hmanga chhutna te behchhanin Jim Brown a chu Jan ni 27 khan First Degree Murder hremna pek a ni. Canada ah chuan First Degree murder chu chawp leh chilh a dam chhung lung in tanna leh kum 25 tan tlin phawt loh chuan parole pawh hmang thei lo tura hremna a ni nghal a ni.

             A thubuai ngaihtuah a nih laiin Browna chuan pawi khawih a an puhna chu a pha a. Mahse, kum 2010 khan “Faint Hope Cluase” (Section 745.6 of Canadian Criminal Code a ni a. Statutory provision niin damchhung lung in tang tur te kum 15 aia rei an tan hnu chauha Parole hmang thei tur ten kum 15 an tan tlin tawh chuan an parole theih hun aia hma a Porole a an chhuah lailawk theihna a ni ber) hnuai ah Parole a dil hlawh chham a. Hemi tum hian “Judicial Review” laiin Browna chuan Debbiei chu a thah ngei a ni tih a pawm ta a ni. Parole Board document atanga a lan dan chuan tualthahna thlen zan khan zu a rui hle a. A sawi zel dan chuan in pakhat ah a lut a, mi tihnat chakin a za a ni. A nghawng ah rekin a hmer vak a, a chhu bawk a, thawm bengcheng tak a awm a, a mi rek lai chu a theh per lawp a, tham thoin a hnek a, chuan thil ri thawt a hre leh a ni. Parole Board te hnenah chuan a mi sawisak chu hmeichhia a ni tih a hriat thu pawh a sawi tel bawk a ni. Kawng sir a a car chhungah lu vung burin a harh chhuak a. Eng thil chiah nge a tih pawh a hre tawh meuh lo.

             Tunah chuan Jim Brown a pawh kum 25 chuang a tang ta a, Porole a chhuah lailawk a dil ve thei tawh ang chu maw.

            He case hi Forensic History bikah chuan case danglam ber te zingah chhiar tel a ni a.  Carman Mc Cann, Forensic Identification Officer chuan, ” A danglam bik tak zet a ni. Kum 28 chhung Forensic kaihhnawih hna ka lo thawk ve tawh a, vawiin thleng hian Tomato a hniak nem kai ang hi ka la tawng lo va, ka tawn leh tawh pawh ka ring lo ve.” a ti hial a ni. Dr. Strongan mug shot quality tha em em pawh ni lo hmanga tarmit a danglamna hmuh har tak te a sawi fiah thei te, Chhiarkawp hmanga tarmit nihna a sawi fiah thei te kha a mak tak zet a ni. Carman Mc Cann, Forensic Identification Officer bawk hian,” Forensic field a ka luh hlim hian Toranto ah Coroner Court ka va chhim ve a. Bangah chuan lehkha tar hi a lo awm a. Tihian a lo inziak a, “Keini chuan mitthi te aiawhin kan tawng thin.” Pawi khawihna hmun (crime scene) hi mitthi te aiawh a thusawitu a ni tih hriain chu thu ziak chu kum 20 kal ta atang tawh khan min kaihhruaitu a tan ka lo hmang tawh a ni.” tiin Forensic tangkaina a sawi a ni.
                   ××××××××××××

Posted in Thu Ngaihnawm, True Story | Tagged , , | Leave a comment