BHUBANESWAR AH PAWH MIZO CHICK.

Tukin chu Office ka kal kawngah, helaia an Park lar ve tak mai, Airport hrula awm, Madhusudan Das park kawtah Mizo Chick ( Nu/ Nula/ Hmeichhia ti mai ang) , a mobile phone hmanga Mizo tawnga mi a be zat zat lai ka hmu a. A kut lehlam chuan a bula Mipa Vun Ngo ( kan naupan lai chu nise Sap kan ti leh ngawt ang..a vun a ngo miau va) upa tawh lam , chu Mizo hmeichhe pa rual niawm tawh tak kut hi a vuan ran bawk a. Mizo rawn awm thar ani ang a..tih thu ah a hminga Odisha Mizo Association President lo nih ve bawk si avangin ka han melh phei hram a. Chu nu chuan min hmuh ve leh a thianpa nen chuan Park chhung lamah chuan an lut ta vat si a. Ka va biak a hlau tlat nia ka hriat avang chuan… ka umzui duh ta bik lova. Kei ai mahin an bul hnai a vai ho khan kan nau-vi te thian dun kha hmuhnawm an lo tih hmel zawk bawk.

Mizo te hi kan vak zau ve tawh asin. India ram khawpui , Metro city ni lemlo, heng Bhubaneswar ang chi, India rama khawpui lar lemlo , Tier-2 city an tih ang bawrah pawh hian Mizo thalaite, a bikin Mizo Nula hna chi hrang hrang thawk an awm ve zel tawh asin. Mizoram chhunga tih tur mumal nei lova chhungte pocket money dil reng chunga inpenparhhle ringawt ai chuan… an HRAWK ringawt an lo tlan bo pui ve te pawh hi a tha phian e ..kan ti hrih mai aniang chu. Nakin lawkah chuan Non Resident Mizo (NRM ) ho te hian Mizoram lamah Indian Rupiya chu sawi loh, Dinar, Dollar, Pound tih vel an la rawn pump lut chum chum dawn turin ka lo hisap lawk nasa thin.

Kan ramah hna thawh tur a awm loh hrim hrim vang pawh ni chuang lovin kan chek mil zawng taka han tei hawi ve hrim hrim kan duh ve avangte pawhin kan nula leh tlangval hote’n Mizoram pawn India ram kil tin kil tangah hna thawkin emaw thawk lemlo, tei hawi, hirha leh tesi chhin vehrim hrim tur pawhin kan vak chhuak nasa ta hle niin a lang. Heng ka han sawi zingah hian mumal nei taka Centralservices a lut te, Company mumal taka thawkte leh Missionary te huam tir ta lo ila…. Unorganised sector kan tih mai tur ang chi… Beauty parlour, Spa, hotel leh eng tin tin emaw a inham tang ho..Appointment letter mumal nei lo, an hnathawh dan tur terms and conditions pawh hriat lawk lemloh ho kan thalaite, a bikin kan nula te dinhmun hi hriatthiam pui an ngai khawp asin.

Hetia vairampur hmun hrang hrang a kum 25 chuang fet ka han tei kual hnu hian … ka hmuh chhuah tak chu kan nula ho che chhia, sawisak hlawh leh thihna hial pawh tawk palh ta te hi han zir chian chuan….. anmahni ngei pawh an lo fimkhur tawk lovin chutiang harsatna tawh chuan zuamin an um zawk emaw chu aw tih theih an ni fo mai. ( VANDUAI ngawih ngawih an awm tih erawh ka chiang em em tho…).

Hnamdang mipa ten kan hmeichhiate hi an inchei dan emaw an hawiher avang ngawt hian an lo zuam lem bik hauh lova. A dik tak chuan hmeichhe puitling panngai chuan Mipa in hmeichhia a lem dan movement leh formula hrang hrang hman hi an man ve vat lo thei lova. Kan Mizo hmeichhiate pawhin rui lo hai lo an nih phawt chuan an a bik awzawng lo. Ramri kham thei lo khawpa an lo ruih ve deuh emaw an lo zat ve deuh zek tawh khan a pawi thui ta thin a ni. Mahse, heng sihhnip zual deuh ho kan han tih ang nulate pawh hi han zir chiang ila Mizoram an rawn chhuahsan hma atang tawh renga mipat hmeichhiatna lam lo tem vir ve laklawh tawh te bawk an ni duh khawp mai.

Changkang leh zahawm taka Call girl/ prostitute anga hnamdang mipa ho kha dawr law law hreh ve ting lawi , tlin leh lawi si lo hian hnamdang mipa ho, engvang maha anmahni lo khawngaih tur chuanglo tih hriat ngawih ngawih ho kha mawl mang lutukin an lo chei Boy friend emaw mate/ partner ta vel thin kha a nih chu. Kha pa khan nupui emaw kum khua atana life partner a neih duh tur khawpin an inla fek fawn leh peih chuang si lo emaw chulam hawi chuan mipa te kha an kawp leh chuang si law.. A dik tak chuan mipa tan te chuan a bawnghnute ber duh hun huna a sawr theih tawh te kha chu han chul heuh heuh peih reng thu awm bik hek lo le. Chung kan nula lungmawl ho, no ve puak atanga bawl chhe ve tak tak te thleng khan hnamdang mipate pawh hian an Zo-chhang kham leh nge nge thin zu nia. Chutiang tak a fimkhurna a tel thin loh avangin chhiat rupna hran hran kan Mizo hmeichhiate chungah a thleng ta thin ani. Chutiang dinhmun a han din tawh meuh chuan midang emaw thil dang dem tur a vang duh tawh khawp mai.

Dik tak chuan Mizoram lama an chhungte hnenah erawh hna mumal tak thawk angin an in report ve tho. Chhungte ngaih that nan leh intih rinawm nan a khat mawi tawkin sum tlem azawng te chu an han thawn haw ve leh pawm zel bawk a. Mahse maw… I fanu, i farnu vairam a hnathawk anga insawi kha emergency thila contact tur a thawhna emaw a thiante contact number neih ngei han tum chhin teh. A hnathawhna hming leh postal address neih ngei tum bawk la. Chutianga fel leh dik thlap a a rawn hrilh theih che chuan a ziaawm turah ngai la. Chutiang address leh contact number i mamawhte ang chu a rawn hrilh mumal theih loh che emaw Excuse chi hran hran siama “nakin ah” a tih reng chuan …. Sum a rawn thawn che avang ngawtin e-aw mai mai suh. Tahna leh ha thialna-in a rawn den dawp hun che a awm thuai thei.

He khawvela kan hring nun hi han bih chiang neuh neuh ila…. Kan chunga thil thleng reng rengte pawh hi tawng awm tak kan lo ni zel a nia.

Author : Hriata Chhangte
Jan. 31, 2017

Aside | Posted on by | Tagged , | Leave a comment

Yoga leh Taina enkawl dan

Hei hi Vajrasan pose a ni a. Hetianga i thuta mawngtam leh ke artui a insik thlap hian kawng hnuai lamah thisen a kal thei lo va. Chu chuan thisen a chho zawngin a kaltir a. Tai na(piles) i neih chuan a hnuai bera awm a nih avanga thisen tlingkhawmina a tihnat a ni a. Thisen a chho zawnga a kal chuan taia thisen infawkkhawm chu zawi zawiin a tireh a, taina chu a dam mai a ni. Heti khawpa mawl a ni chung hian rinna nei miah lo pawhin hetianga thut dan dika i thut chuan a dam lo thei lo a ni.

Tun kum 20 chhung vel hian ka zirtir a, dam phah tam tak an awm tawh a. Mahse, Yoga damna tih a nih avangin kan Kohhrante mitmei an veng nge ni, tumah hian an sawi chhuak zen zenlo va, hriat a hlawh lo mai pawh a ni. A nei hlim chuan ni khatah an dam phah thei a, nei rei deuh tawh chuan chawlhkar khat vel an ti tlangpui.

Author : Michael Lalmanzuala

Hei hi Yoga a nih avangin hlau ngawt duh suh. Hetiang chiah hian thu la tawngtai hmak mai la, Isua nen in inkawm bakah, “Exercise i la” a ni ang a, damna a ni bawk ang a, i hlawk ngawt ang.

Aside | Posted on by | Tagged , | Leave a comment

Bawngek Hmang tangkai, Gas aiah hman a ni.

Bawngek, mihring ek leh hnim tawih hmanga gas alh thei (biogas) chu Mizoram hmun hrang hrangah hman tangkai mek a ni.

Tualchhung chanchinbu The Zozam Times in a tarlan danin Kum 2012-13 chhung khan biogas siam nan Mizoram sorkar chuan Ministry of new and renewable energy atangin NBMMP (national biogas and manure management programme) hnuaiah Rs nuai 83.50 a hmu a.
Kum 2014-15 chhungin Rs nuai 45 hmuh a ni bawk.

Heng sorkar kum hnih chhung hian Aizawl district-ah NBMMP (biogas) beneficiary 150 an awm a. Saiha district-ah 5, Lunglei district-ah 40 awmin, Mamit district-ah 5, Kolasib district-ah 6, Lawngtlai district-ah 5, Serchhip district-ah 25 leh Champhai disrtict-ah 14 an awm a ni.

AH & vety deptt hotute sawi danin biogas siamna atan hian chhungkaw khatah hmanrua Rs 16700 man hu pek chhuah thin a ni a. Sum faia pek chhuak lo – holder, gas stove, pipe, barrel, cement leh balu te pek thin an ni.Biogas siamna hmanrua an pek te hi KVIC a nih avangin kum nga aia rei a daih loh avangin chhungkaw thenkhat hmang tangkaite chu kum nga ral hnuah hmaraw thar pek nawn an ni leh thin.

Bawngek gas ti pawha an sawi hi a siamna hmanrua chu AH & vety deptt atangin loneitute hnenah pek chhuah thin ani a. Kumtin mi 50 hnenah biogas siamna hmarua pek chhuah thin nia thudawn a ni.

Kum 1982 atanga Mizorama hman tan biogas hi hmang tangkaina an tam hle niin an sawi a. Eirawngbawlna gas a van avanga chhungkaw tam tak an buai laiin bawngek gas hmanga buai lo an awm a. Thenkhat phei chuan an thenawm hnai thlengin an pe chhawng thei a ni.

Bawngek gas hi hmang tangkai viau an awm rualin a nihna tur dik taka hmang lo thanhnem tak an awm a. Vety deptt atanga hmanrua an dawn barrelte chu tui dahkhawlna atana hmang ta mai an awm a, thenkhat chuan an gas stove dawnte pawh an hralh thin niin thudawnna chuan a sawi.

Vanneihthanga Vanchhawng
31st Jan. 2017

Aside | Posted on by | Tagged , , | Leave a comment

LGBT TE DIKNA CHANVO HUMHALH SAK ZEL AN NI ANG: Donald Trump

Nimin Jan. 31 khan President Donald Trump chuan president Barack Obama’n kum 2014-a executive order a lo ziak tawh hnuaia sorkar tana hnathawk, lesbian, gay, bisexual leh transgender te dikna chanvo chu humhalh chhunzawm sak zel a tiam.

White House thuchhuah chuan, “The President is proud to have been the first ever GOP (Republican) nominee to mention the LGBTQ community in his nomination acceptance speech, pledging then to protect the community from violence and oppression,” tiin a tarlang.

Kiddy Vanchhawng
1st Jan. 2017
(Source : Reuters)

Aside | Posted on by | Tagged , | Leave a comment

BANLADESHI NAUPANG KHAWNGAIH THLAK CHU…

Jan. 31, Thawhlehni khan Dhaka’s Medical College hospital-ah hmeichhe naupang kum 10 mi chu a taksaa thing zung ang chi natna a neih vangin, dah luh a ni a; a dinhmun chiang tak hriat a la ni lo. He naupang hi Sahana Khatun niin, kum 6 mi a nihin a nu in a boral san a ni. A pa chuan “Mirethei chhungkua kan ni a, a taksaa hetiang natna awm dan hi ka hrethiam lo hle a ni” a ti. Bangladesh hmar lamah an cheng.

Sahana Khatun-i beng, hnar leh khabeah thing zung ang chi, taksa chawr a lo awm mek a ni. A khawngaih thlak reuh hle mai.

Hetiang taksaa thing zung ang natna, “epidermodysplavia verruciformis” syndrome ang chi, thenkhatin “Tree Man” natna an tih mai hi khawvelah hmeichhe kai awm chhun niin an hria.

American Billionaire nupa, Bill & Melinda Gates Foundation chuan he naupang natna chhui chiang turin an tanpui dawn a ni.<

C.T.Lalrinawma
1st Feb. 2017

Aside | Posted on by | Tagged , , | Leave a comment

IRAN LEH US AN INNGUR CHHO TAN TA : US AN VAU, US-IN A CHHANG LET RUM HLE

Iran chuan US-in President Donald Trump a neih hnuah tunkar Thawhtanni khan missile a test ngawt pek a, US-Israel chuan hrethiam lovin an sawisel na hle. Israeli Ambassador to UN Danny Dalon chuan Iran hian 2015 kuma Viena a inremna leh UN Security Council Resolution a bawhchhia a ni, a ti.

Iran erawh chuan US leh Israel chu ” lo ngawi mai mai teh u, Nuclear program kan kal pui lova, missile test mai maiin UN Security Council resolution a bawhchhe hek lo,” tiin a rawn sawisel let bawk.

US Ambassdor to UN Nikki R. Haley chuan Iran chungchangah tawng rum tak (tough word) chhak chhuakin, Thawhlehni khan, “US hi a nuihzathlak loh ve. Ding mai mai turin kan lo kal lova. Kan ti ang tih chu ti turin kan lo kal mek a ni. Nangni pawhin kan thiltih ang chu in hmu ngei ang” tiin, Iran hi a vau let a ni.

Iranian Foreign Minster Mohammed Javed Zarif leh FrenchForeign Minister Jean-Marc Ayurault te chuan news conference nei dunin, Zarif chuan US chu Iran missile test ah lo buai a, ar mit tet khuan mai mai lo turin a hrilh a ni. Nikki Haley chuan, “Iran thiltih hi pawmpui theih chi a ni lo hul hual” a ti.

Mahse, Trump Admin ten engtin nge an chhan let dawn erawh a sawi lang lo.Nikki Haley chu a tawng khauh teh tawh hle a, engtiang takin nge Iran missile test chhanletna an kal pui tur a sawifiah lo na in, “He Admin hian thil lo thleng te chu hmuloangin a thlir liam mai mai dawn lova, mitdel thil thlir angin athlir dawn hek lo. Kan ti ngei ang. Chak takin kan awm ang.

American mipuite leh khawvel hmun hrang hranga mipuite chu venhim kan tum tlat a ni” a ti.

Iran hian Trump Admin thiltih Muslim ram Iraq, Syria, Sudan, Somalia, Yemen leh Iran ram atanga refugee lut turte Visa thla 4 kharsak rih chu sawiselin, “thil zahthlak taka ni” a tihsak a ni.

C.T.Lalrinawma
Feb 1, 2017

Aside | Posted on by | Tagged , , , | Leave a comment

CHAMPHAI POLICE TEN HEROIN NO 4 HAWNG 10 AN MAN

Nimin 30 jan, chawhnu dar 12:45 khan Champhai Police te chuan Heroin No. 4 Hawng 10 an man.

Champhai Police te chuan nimin chawhnu dar 12:45 khan Khankawn Police Check Gate ah Wagon R Mz -01-B- 2934 atangin Heroin No. 4 hawng 10 (Gra, 139) leh a neitu nia rin Jakir Hosen s/o Fatirun Nechhakum 25 leh kum tlinglo pakhat, Damachera Tripura mi ve ve te chu an man. Heng Heroin No 4 an man te hi tualchhung rate-in cheng Nuai 5 man hu vel a ni a, A neitu mi pahnih te hi NDPS Act hnuaiah thubuai siamsak nghal an ni.

Nimin vek khan CHamphai Police te chuan Khankawn Police Check Gate ah hian Foreign Cigarete Case 3 an man a. Farstar case 2 leh Valiant Case 1 te hi Cheng Sing 2 Sangkhat man hu vel a ni.

Vanneihthanga Vanchhawng
31 Jan. 2017

Aside | Posted on by | Tagged , , | Leave a comment

CHAMPHAI POLICE TEN HEROIN NO 4 HAWNG 10 AN MAN

Nimin 30 jan, chawhnu dar 12:45 khan Champhai Police te chuan Heroin No. 4 Hawng 10 an man.

Champhai Police te chuan nimin chawhnu dar 12:45 khan Khankawn Police Check Gate ah Wagon R Mz -01-B- 2934 atangin Heroin No. 4 hawng 10 (Gra, 139) leh a neitu nia rin Jakir Hosen s/o Fatirun Nechhakum 25 leh kum tlinglo pakhat, Damachera Tripura mi ve ve te chu an man. Heng Heroin No 4 an man te hi tualchhung rate-in cheng Nuai 5 man hu vel a ni a, A neitu mi pahnih te hi NDPS Act hnuaiah thubuai siamsak nghal an ni.

Nimin vek khan CHamphai Police te chuan Khankawn Police Check Gate ah hian Foreign Cigarete Case 3 an man a. Farstar case 2 leh Valiant Case 1 te hi Cheng Sing 2 Sangkhat man hu vel a ni.

Vanneihthanga Vanchhawng
31 Jan. 2017

Aside | Posted on by | Tagged , , | Leave a comment

DAN LOA IN SATE MUALPHO TAKA THIAH SAK RUM RUM AIIN DAWHTHEI TAKIN AN DIK LOHNA HRILH THIN- Dr. H. Lalthlangliana

Aizawl Municipal Corporation (AMC)-in sorkar kum kal mekah Property Tax Cheng Nuai 189 chuang an hmu tawh.

Nimin jan 30 khan AMC Commissioner Dr. H. Lalthlangliana chuan chanchin thar lakhawmtute a office-ah thingpui a inpui a, Dr. H. Lalthlangliana chuan kum 2016-17 chhung hian property tax Cheng vbch. 2 hmuh an tumah tun thlenghian Cheng Nuai 189 Sang 6 & 625 an hmu tawh thu a sawi. Veng pahnih local council-te atangin pawisa an la dawng lo tih sawiin, mipuiin property tax an ngaih pawimawh thu sawi a, tax khawn hmaihte AMC office-ah an in-report thin thu a sawi bawk. Mipuiin chhiah pek an ngai pawimawh chu lawmawm a tih thu Dr. H. Lalthlangliana chuan sawiin chhiah khawn hmaih in-report state dangah an awm a rin loh thu AMC Commissioner chuan a sawi a ni.

Dan loa in sate chu mualpho taka in thiahsak rum rum ai chuan dawhthei takin an dik loh zia an hrilh thin thu leh building regulations bawhchhia, an insak thiat tura an tih, thiat duh lo an la tawn loh thu AMC Commissioner hian a sawi a. Dan loa in sa luite chuan Cheng Nuai 1 thleng pawisa an chawih theih thu sawiin, mipuite chu thuneitute dan siam ngai pawimawh zual tura a duh thu a sawi bawk.

AMC Commissioner chuan AMC hnathawk, dan loa mi pawisa dil thin an awm chuan AMC office-ah report vat thin turin mipui a ngen a, sum la thin an hriat chu a rang thei ang berin an chungah action lak a nih tur thu a sawi.

Vanneihthanga Vanchhawng
31 Jan. 2017

Aside | Posted on by | Tagged , , | Leave a comment

DAN LOA IN SATE MUALPHO TAKA THIAH SAK RUM RUM AIIN DAWHTHEI TAKIN AN DIK LOHNA HRILH THIN- Dr. H. Lalthlangliana

Aizawl Municipal Corporation (AMC)-in sorkar kum kal mekah Property Tax Cheng Nuai 189 chuang an hmu tawh.

Nimin jan 30 khan AMC Commissioner Dr. H. Lalthlangliana chuan chanchin thar lakhawmtute a office-ah thingpui a inpui a, Dr. H. Lalthlangliana chuan kum 2016-17 chhung hian property tax Cheng vbch. 2 hmuh an tumah tun thlenghian Cheng Nuai 189 Sang 6 & 625 an hmu tawh thu a sawi. Veng pahnih local council-te atangin pawisa an la dawng lo tih sawiin, mipuiin property tax an ngaih pawimawh thu sawi a, tax khawn hmaihte AMC office-ah an in-report thin thu a sawi bawk. Mipuiin chhiah pek an ngai pawimawh chu lawmawm a tih thu Dr. H. Lalthlangliana chuan sawiin chhiah khawn hmaih in-report state dangah an awm a rin loh thu AMC Commissioner chuan a sawi a ni.

Dan loa in sate chu mualpho taka in thiahsak rum rum ai chuan dawhthei takin an dik loh zia an hrilh thin thu leh building regulations bawhchhia, an insak thiat tura an tih, thiat duh lo an la tawn loh thu AMC Commissioner hian a sawi a. Dan loa in sa luite chuan Cheng Nuai 1 thleng pawisa an chawih theih thu sawiin, mipuite chu thuneitute dan siam ngai pawimawh zual tura a duh thu a sawi bawk.

AMC Commissioner chuan AMC hnathawk, dan loa mi pawisa dil thin an awm chuan AMC office-ah report vat thin turin mipui a ngen a, sum la thin an hriat chu a rang thei ang berin an chungah action lak a nih tur thu a sawi.

Vanneihthanga Vanchhawng
31 Jan. 2017

Aside | Posted on by | Tagged , , | Leave a comment