LAWNG BO HMUHCHHUAH LEH TAK 10 TE: (GHOST SHIPS)

• ( Hei hi Whatsapp Group pakhata ka hmuh a nia. Buatsaihtu an tarlang miah lo mai a. A pawi ka ti hle. Miin hun tamtak senga an buatsaih a ni a, post tu hming paih daih hi a fel lo hle. Buatsaihtu kan hriat chuan comment lamah kan tarlang dawn nia. -Valpuia).

Khawvelah hian tui a tamin a awh chin pawh zau tak mai a ni a. Tuifinriata lawng zin tam tak chin hriat lohvin a lo bo tawh thin reng a ni. Tuipui thenkhat hian huai a nei nge ni ang, engemaw thil vangin an bo thin zawk? Chutianga Lawng bo an hmuhchhuah leh zinga 10 chanchin chu han chhiar leh dawn ta ila.

1) SS Ourang Medan –
Ourang Medan chanchin hi hria in awm tawh em aw! A hun laia sawi hlawh tak mah nise, tun laiah hi chuan kan hre ta vak lo niin a lang. Dutch cargo lawng ‘S.S. Ourang Medan’ chu Kum 1947 khan Indonesian tuipuiah chhiain a tangkhang ta niin an sawi a. Chhanchhuaktu tura lawnga va lutte chuan, crew zawng zawng lo thi khawng vek tawh an va hmu a, hliam engmah an taksaah a awm lo a ni. Thenkhatina a chanchin an ziah dan chuan, Dutch East Indies luipuiah eng thil emaw vangin a chhunga thawktute an thi vek a, chumi hnuah lawng chu a chhe ta a ni. Chutianga thu a sai sa deuh nuaih avang chuan, lawng chhia an va hmuh pawh chu, Orang Medan lawng a ni tak tak ang em tih pawh ngaihtuah tham tak a ni a. Tin, kha lawng kha UFO-in a zarbuai a, a bo phah ta nia sawi an awm bawk a ni.

Ourang Lawng accident thu hi Lehkhabu leh magazine hrang hrangah a inziak nasa hle a. A chanchin sawi lan tan dan tak chu, Dutch-Indonesian newspaper ‘De locomotief’-a article pathum: Samarangsch handels- en advertentie-blad (February 3, 1948, February 28, 1948 leh, March 13, 1948)-ahte khan a inziak a. Ourang Medan Lawng va hmutute chuanna Lawng hming chu a inziak lo a. Mahse, Marshall Islands atanga Chhimchhak lam 740 km velah hmuh a ni tih thu chu a inziak thung a ni. Tin, chung articles-ah chuan, Orang Medan Lawnga chuang Crew damchhuak pakhat chanchin a inziak a. Marshall islands-a chengte leh Missionary-te’n damchhuak awmchhun chu an chhar niin an sawi a. Chu an mi chhar chuan a thih hmain, missionary hnenah, “kan chuanna Lawng khan sulphuric acid a phur a. Acid dahna bur a keh a, a hu chhuak poisonous fumes kha an hip avangin midang zawng chu an thi vek” tih thu a hrilh niin articles-ah chuan a inziak a ni.

Tin, mi hrang hrang sawi zel dan chuan,missionary khan a thu hriat chu ziaktu pakhat, Trieste, Italy-a cheng Silvio Scherli hnenah a hrilh a ni awm e. Skittish Library atanga a lan danin, newspaper-a reports inziak pawh tam tak a awm a. Chungte chu British newspapers: The Daily Mirror leh The Yorkshire Evening Post atanga lakchhawn an ni. Thenkhat chuan an va hmuhna hmun chu Solomon Islands a ni e te an ti leh a. Chutiangin, SOS messages inziak pawh a inang vek leh chuang lo. Chuvangin, thil finfiah theih loh a ni hlen ta a ni.

2) The Carroll A. Deering –
Lawng pakhat Carroll A. Deering chu, kum 1921 khan, tui atangin North Carolina-ah a tlan lawn rup mai le! Mak tak chu, a chhunga chuang hmuh tur awm lovin an lo bo vek a ni. Chumi hma thla lawk chuan, lawng chu Lungalhthei phurin, Virginia atangin Rio de Janeiro, Brazil lam panin a chhuak a ni. Thil thlen dana an rin dan pakhat chu, lawng captain khan crew zinga pakhat chu a haw riau a. Crew pawh chuan captain chu a ep hle a, a vau bawk a. Chuvang chuan, chu crew chu jail-ah dah a ni. A hnuah bail chhuah a ni leh ta tho a. Lawng bo chhan nia investigator-tengaihdan chu, lungawi lohna thilah buaina a chhuak a, chu chu captain laka helna a ni. A hnu deuh, chumi Thla tho chuan, lightship keeper pakhatin Deering lawng chu a lo hmu a, radio a chhiat avangin, lightship keeper chuan a thil hmuh chu hmunpui lamah a report nghal mai thei lo a ni. Chu mai bakah chuan, chawlhkar hnih thum a vei hnuin, lawng chu hmuh a ni leh a. Rescuers-ho sawi danin, lehkha pawimawh, navigation equipment, lifeboats 2 leh thil dang dangte a bo a ni. Chutih hun lai chuan lawng bo a tam em avangin, sawrkar pawhin investigation nei tur a tirchhuak ngawrh hle a. Investigator tam zawkte rin dan chuan, “Deering lawng hi hurricane thlipuiin a nuai chiam ang a, Bermuda Triangle lamah a hrut phei a, a chhunga chuangte an bo phah ta vek a ni.”

Lawng bo chhan ni thei awma rin sawi tur a tam hle a. Pirates, liquor smugglers, Communists leh supernatural explanations te a awm a. Mahse, chutia lawng kal bo a, a chhunga chuangte bo vek hnu a, a ruaka lo kir leh ta mai chu a mak hle a, thu dik hriat theih a ni ta lo a ni.

3) The Mary Celeste –
Mary Celeste lawng hi kum 1872 khan Portugal bul tuipuiah hmuh a ni a. Chu chu a chawlhhmun port a chhuahsan atanga thla khatna chiah a ni. Lifeboat pakhat a kim lo a, crew-ho erawh hmuh tur pakhatmah an awm tawh lo. An thawmhnaw, Chaw leh tui lah chu thianghlim sarin a lo la awm vek a. Chutih rualin, Pirate leh hel sulhnu a awm hauh bawk si lo. Celeste chuan Alcohol 1,701 barrels lai a phur a, chungte lah chu khawih chet hauh lohvin an lo la him pial bawk si a ni. Mak tak maiin, Mary Celeste lawng hi vawi 17 lai hralh chhawn zel alo ni tawh a. Vanduaina a tawk ngun hle a, lawng hmuingil lo tak pawh a ni.

4) The SS Baychimo –
1,322-ton laia rit SS Baychimo lawng chu kum 1931 khan crew awm lovin hmuh a ni a, Arctic Ocean-a vurtlang karah a tang a ni. Pil lovin a lo la lang reng a, chu chu lawnga chuangte’n an lo chhuahsan ta nge ni, an bo vek a ni. Kum tam a vei hnuin, zin mite’n lawng chu an hmuh thu an report ta fo va. Lawng an hmuh thu report hnuhnung ber chu 1969 khan a ni.

Alaska sawrkarin hma lain investigation va nei tur kum 2006-ah a tir a, mahse, investigators-te chuan a hmun tak an va hre thei lo nge ni dawn a, a lo pil daih tawh zawk, an hmu ta hauh lo a ni.

5) The SS Valencia –
Kum 1906 khan, officers 9, crew members 56 leh, passengers 108 chu Valencia lawng 1,598-ton laia ritah chuangin, San Francisco atangin Seattle lam panin an chhuak a. Chutia an chhuah lai chuan Khua lah chu a thiang lo viau mai bawk a, Chhum a zing nasa in thli pawh a na hle a ni. Vancouver Island bula lung khawkrawk an sut hnuin, an chiai ta chiam a, lifeboat an chuh ta sung sung a. Mahse, a chhunga chuang zawng zawng, naupang chawpin an thi ta vek a ni.

Accident atanga kum 27 hnuah, Kha lawng Valencia-a lifeboats zinga pakhat chu a accident-na bul velah chhar a ni a, mak tak maiin a lo la him pial a ni. Tin, chhiatna thlen atang khan, chulai velah chuan thil mak tak tak an hmu nasa thin hle niin an sawi.

6) The Zebrina –
Zebrina lawng chu Saint-Brieuc, France lam pana zin a ni a, mahse, kum 1917 khan vaukamah an chhar ta daih thung a ni. Lungalhthei (Coal) phur a ni a, a thil phurh chu kim biaiin a lo la awm nachungin, a chhunga chuang crew 5-te an bo vek thung. Theory-ah chuan, German lawng U-Boat khan a lo lambun a nih an ring a. Tin, Germans lawngin Zebrina lawng chu a tihchhiat hmain, Royal Naval ships lo kalin an zavaiin a rawn bei leh ta vak niin an ngai a ni..

7) The Jenny –
Jenny Lawng hi “ship of ice” tiin Australian poet pakhat Rosemary Dobson chuan a sawi mai thin a. Jenny lawng chu English puanzar lawng niin tuipuia Vur khawn karah a tang a ni. Tin, “May 4, 1823. Ni 71 chhung chaw ka ei tawh lo. La dam awmchhun ka ni” tih captain-ina logbook-a a ziah chu hmuh a ni. Mahse, chulai hmun boruak chu vawt namen lo tak a nih avangin, ani pawh chuan tuarzo lovin a lo khawng vek tawh niin report-ah a inziak. Chutih rualin, crew dang zawng zawng pawh an lo thi vek bawk.

Lawng chu kum 1840-ah va hmuh a ni a, chumi atanga kum 22 hnuah, Kum 1862 magazine article-ah lawng chanchin chu ziah a ni ta chauh a. Mahse, kha lawng khan eng thil rapthlak nge a va tawn tih erawh hriatchhuah theih loh a ni ta a ni.

8) The MV Joyita –
Kum 1955 khan, South Pacific tuipuiah sumdawng lawng MV Jayita hmuh a ni a. A chhunga chuang erawh hmuh tur an awm si lo. Mi thenkhat rin dan chuan, lawng captain chu eng thil emaw vangin a thi thut a, captain ber a thih takah chuan, chiaiin mahni theihna lam lamah an tlan darh ta vek a ni. Thenkhatrin leh dan chuan, Tuifawn nasa tak karah lawng khawl a nun theih loh avangin an sa himna zawngin an tlan darh vek a. Chumi hnu chuan, an va thi bo leh ta nge ni dawn a, tumah Hmuh tur an awm ta miah lo a ni..

9) The Kaz II –
Kum 2007 khan, lawng pakhat, ‘The Kaz’ an tih mai chu Australia vaukam hrula kal an hmu a. Mahse, Crew-ho leh lawng neitu leh midang chuang ve ho chu an lo awm tawh hauh lo. Lawng chhunga dawhkanah te chuan eitur ei mai theiha buatsaih sa diam a inchhawp a. Chu mai bakah, Laptop pawh in ON rengin a lo la awm a ni. Lawng ‘The Kaz’ chhunga radio leh GPS te pawh a lo la tha vek a, life jackets te pawh tha takin a lo la awm hlawm a ni.
Investigation an neih hnuin, officials-te thutlukna chu, lawnga chuangte’n sangha an man laiin an zinga pakhat tuiah a tla a, tuifawn lah chu a nasa bawk si! chhanchhuah an tumna lamah an vai tlak hlum phah ta a ni. Mahse, chu erawh, ngaihruatna mai a ni a, thu dik hriat theih a ni ta lo a ni.

10) The Octavius –
Kum 1775 khan, Greenland vaukam hrulah Lawng pakhat Octavius lang kual vel hmuh a ni a. A hma daih tawh khan, chu lawng chu khawchhak lam tuipui atanga England lam pana haw tura kal a ni a. Chutia a kalna kawnga vur khang lo awm karah chuan a tang ta a. Lawnga chuang crew 28-te chu khaw vawtin a hmet hlum vek a, an lo khawng khir vek tawh a. A then chu blanket-a intuam chungin khumah an lo mu hlum a, an khawng urh mai bawk a ni. An sawi danin, Captain chu pen hum chungin leh, a dawhkana Lehkhabu inchhawp chungin a lo thi bawk a. Va hmutute chuan an rap hlawm hle a, Lehkhabu atanga a lan dan chuan, lehkhabua thuziak hnuhnung ber chu 1762 daih tawh kha a ni a. Chuti a nih avang chuan, Lawng chu Arctic tuipuiah hmutu nei lovin kum 13 a lang kual vel tawh tihna a ni.

Retold by : Valpuia Leo Chawngthu

Advertisements
Aside | Posted on by | Tagged , | Leave a comment

DARLAK A RULCHUK ENKAWLTU KHAN PAWISA A PHUT EM?

Ka rilru-ah a awm reng mai, Vawikhat a sawi vek theih pawh hi Țawngkam thiamloh luatah A hran a sawi sawi a ngai a nih hi.

Mizo te leh Mizoram a cheng țhenkhat te hian Thilmak hmuh leh hriat hi kan chak a, Engemaw hlek awm se Kan hriatdan bakah rin dan nen kan chhui zawn a. A sawi mak leh a sawi ngaihnawm a piang kha kan awih deuh zel mai țhin ni in a lang.

Kum 2006 Khan Keipawh ka Ke Artui veilam ah hian Rul in min chuk tawh a,Min chuk tu rul kha a dum a ni a,Eng rul nge ka hrelo a. Zan thil a ni a, ka hmu reilo. A tleng bo lai pawh ka hmu a ni. Tun thlengin Rul hi ka hlauh phah hle hle nge a ni.

Hetia min chuk hnu hian Mangang rilru takin Ka chhungten min buaipui a. Darkar reilote hnu-ah A rawn vung a,a na ve hle a ni. Tengtere mu phel te kan bel a, Zu in a țha an ti a,Sprite bur 1 dawn lai mai hi min in tir a, Ka rui ta a. Na em em hreloin ka awm a, Ka ke erawh a vung nasa hle mai.

Kar hnih ai rei mah ka che hleithei lo a, Kohhran ho te leh Mimal min țawngțaipui na vang liau liau in ka țha chhuak leh ta a ni.

Hetia Rul in min chuk Țum hian Tu te emaw ruai ila, Vai ho emaw, Enkawl dam thei ang a insawi/Mi sawi emaw ruai ta ila, Engtin tin emaw min sawngbawl ngei ang a, Min sawngbawlloh pawha țha chhuak tur tho kha Min sawngbawl vang a țha chhuakah min ngai țhup mai angem? Nakin zelah Chumi pawh chu A enkawl a,a dam phah asin an tih te zingah ka lo tel ve reng lo maw???tih te Ka ngaihtuah ani.

Kan Doctor thiam tak tak ten zirchianna an neih hrang hrang an sawi te hi Pawm ngam ila,Kan chhung leh khat, Kan țhen leh rual leh Kan țhenawm khaw veng ten emaw, Keimahni ngei pawn Hetiang Vanduaina hi kan la tawk ve thei a,Kan rilru hi i siam țha ngam ang u.

Tin, Darlak a Ramdina Rawn enkawltu hi zawhna zawt ngun ber pawl ka nih ka ring a. Ka zawhna pakhat leh kan inchhanna hi lo chhiar ula.
•••’Ka Pu, Doctor ten thi tawh an tih hi Enkawl dam tawh i nei em?’ Ka ti a.
•• Pakhat chu ka nei,Bangladesh ami ania.’a ti a.

•••’Chu chu Doctor ten ‘A thi tawh an tih ani em?’Ka ti leh hram a.
••Ni lo e, Rul in a chuk a. A thi nghal a, chu chu ka enkawl dam’ a ti a.

•••Anih chuan Doctor in Thi tawh an tih chu enkawl dam i neilo a ni maw?’ Ka ti a,
••’Aw, Neilo’ tiin min chhang.

Thu tawite kan zep leh lawk anga,in rilru in in lo ngaihtuah chhunzawm ve chhin dawn nia. Nizan lama Ka thu Post ah khan Ramdina rawn enkawltupa hian A enkawl man a phut leh phut loh ka sawi tel lo a, Sawi tel țulah pawh ka ngailo. Mahse Mizo mipui te hian Thudik hi hria ila, i pawm ngam ang u.

Nimin lamah Ramdina lo ah YMA kan hnatlang a, hetah hian Ramdina chhungte pawh an lo tel ve a ni. An chhung zinga pakhat chuan A enkawl man Cheng sangli(4000) an pek thu a sawi ka hria a. Ka zawtchiang a, aphut zat a nihloh thu leh a Phut ai tlem an pe a ni tih a sawi tlat mai!!

Tichuan, nizan lamah Ka thu post comment lamah A enkawltu Fapa nia insawi hian A enkawl man a phut ngai loh leh A thlawn a Pathian ațanga dawn a ni, a thlawn bawk a pechhuak țhin angin a rawn sawi a. A Hrechiang tan chuan enliam mai mai a harsa a ni.

Comment ka hmuh hian Chhandama(Ramdina Putea,Rulchuk enkawltu thlenin, A tir ațanga Ramdina Buaipuitu)ka phone a. Kan inbiakna hi A la pawimawh takin ka Record nghe nghe a ni.
••• Cheng 4000 a phut ni khan ka hria a, a dik em ka ti a.
•• 5000 a phut a, mahse a ni em em lo deuh kan tia, 4000 kan pe a ti a.

•••Chu chu Nangmahni in kan pai ang che in ti nge aman a phut ka la ti hram a.
••A phut thu min hrilh a ni.

Ti hian Thil awmdan chu kan hrethiam tlang thei turah ngai ang u aw…Tupawh hian Vanduaina tawk thei kan ni a, Kan vanduaina tawh ah hian Harsatna kan tawh belh loh nan I fimkhur tlang ang u.

A bik takin Rulchuk Case ah hian Mi sawi nazawng hi i ring lo ang u. Kan Doctor thiam tak tak te hi ring ila,Taksa a chhiat mai loh chhan te, Marphu ni a kan hriat/khawih te pawh thil nih theih dan Doctor thiam takin a rawn sawi te kha Inhrilh darh hram hram ang u.

Ka Lawm e.

Mikael Lalremruata
Darlak
Ni 26.Sept 2017


Gospela Khiangte
Bawngva naupang rulin a chuk hlum țum pawh khan vai tidam thei kha an chah a, theihtawp chhuahin an bei a, an hlawhchham a nih kha. Khami trum khan vai ho hian an tihdam theih loh avangin pawisa engmah an phut lo an ti. Ngaihdan lo siam ve tawh mai ru….

Aside | Posted on by | Tagged , | Leave a comment

CITIZENSHIP BILL 2016 CHUNGCHANGAH MP RONALD SAPA’N PRIME MINISTER LEHKHA A THAWN

Rajya Sabha MP Pu Ronald Sapa Tlau chuan September ni 23 khan Prime Minister Pu Narendra Modi chu lehkha thawnin Citizenship Bill 2016 chungcghangah Mizorama pawl leh Kohhran hruaitute ngaihdan la ve turin a ngen.

Pu Ronald Sapa Tlau chuan a lehkhaah ‘Joint Parliamentary kuta awm mek, The Citizenship Amendment bill 2016 chu India Independent hnu-a ram chhung do rawn issue lian berte zing ami a ni tih sawiin an committee thutlukna chuan ram chhungah nghawng lian tak a neih tur thu a sawi a. Committee in he bill chungchanga thutlukna asiam hma leh Parliament rorelna ina pharh a nih hmain ngaihtuahna hun pawtsei a, a nghawng tur mipuite ngaihtuah chungin hmarchhak state, a bik takin Mizoram tlawh ngei turin leh YMA, MHIP, MUP te leh Kohhran hruaitute kawm turin a ngen a ni.

MP Pu Ronald Sapa chuan Hmarchhak bikah phei chuan he bill chungchang hi ngun leh zuala sawiho tul a tih thu Prime Minister hnenah hian sawiin, Committee in Assam chauh an tlawh chuan hmarchhak state dangten an ngaih thiam loh tur thu a lehkhaah chuan a tarlang bawk a ni.
• Ronald Sapa hian mipui beisei a phak lo hle niin social media lamah amah sawichhiatna a ri zing hle mai. A ngawi rei ve em bawk a ni. Chakma chungchang ah pawh a tawng chhuak ve ngamlo a nih hmel.

Aside | Posted on by | Tagged , | Leave a comment

MZU HI KAN HRECHIANG EM?

Kan chanchinbu darh zau ber ber leh rintlak ber bera ngaih te meuh pawhin Mizoram Governor hi “Mizoram University (MZU) Visitor” an la ti nulh nulh chu a ni a. Kan IAS Officer Pensioner (Chief Secretary hlui) te meuh pawhin President of India hi MZU Chancellor tiin an lo la sawi bawk. Higher Education lamah hian kan hriatna a la bil deuh em ni?

India ramah hian UGC Recognised University 800 (zariat) chuang a awm a, chungte chu Central University te, State University te, Private University leh Deemed University te an ni. University zirna kalphung (Academic)-ah te, University te Grant pek chungchangah te leh University te inrelbawlnaa an zawm tur Dan leh Hrai zam thlenga thuneitu chu University Grants Commission (UGC) a ni a, Govt. of India hnuaia Autonomous Body a ni.

University zariat chuang zingah hian “Central University” kan tih mai, Central Sorkar ta, Central Sorkar-in direct-a a enkawl bik hi 47 a awm a. University inrelbawlna tur leh hmasawnna tur sum leh pai zawng zawng Central Sorkar-in a tum vek a ni. Central Sorkar fachuam an nih tlat avangin Asst. Professor (tun hmaa Lecturer kan tih thin), Asso. Professor (tun hmaa Reader kan tih thin) leh Professor te pawh Central University-a thawk te chu University dang lakah chuan an induh deuh larh thin. Central University te hi Central Sorkar ta an nih avangin Ministry of Human Resource Development (MHRD)-in a enkawl a. Chutihrualin Central University tin te hi a hran theuha Parliament-a Dan pass thlapa din an nih hlawm avangin Autonomous Body an ni a, anmahni chhungkaw inrelbawlna-ah MHRD hi direct-in a inrawlh lem lo. Mizoram University (MZU) hi Central University 47 zinga pakhat a ni a, MZU tan liau liaua Parliament-in Dan a pass tak, The Mizoram University Act, 2000 (No. 8 of 2000) hmanga din a ni.

• Vice-chancellor leh Visitor awmzia.
Kan Media te leh Mizo pa challang, mithiam pui puia kan ngaih te leh kan Politician te meuh pawh hian University inrelbawl dan hi kan lo la man lo em mai a. MZU-ah hian tu nge Vice-Chancellor, tu nge Chancellor, tu nge Visitor tih hi kan la hriat pawlh nawk mai.
Central University-ah chuan President of India hi a hotu lu ber a ni a, “Visitor” ti-a koh a ni. MZU-ah pawh hian Vice-Chancellor Chair-na hnuaia thuneitu hrang hrang University Court te, Executive Council te, Academic Council te, Finance Committee leh Body hrang hrang pawimawh tak tak a awm a, chungah pawh chuan President of India aiawh, “Visitor’s Nominee” an tel ngei ngei a ngai a ni. Tin, Central University awmna State Governor apiang te hi kha University-ah khan “Chancellor” an ni nghal zel a ni. Amaherawhchu MZU bikah hian tihsualpalh an nei nge, The Mizoram University Act, 2000 an pass khan “Chancellor” post hi khawi lai Provision-ah mah khan a lo awm miah lo mai a. Chuvangin MZU hian a din tirh atangin Chancellor hi a la nei ve miah lo a ni.

Chutia Chancellor nei lova kan awm bik vang chu nge ni, Parliament-in Mizoram University (Amendment) Act, 2007 (No. 24 of 2007) chu 28th May 2007 khan a pass leh ta a. Chutah chuan Mizoram Governor chu “Chancellor” ti ta lo chuan “Chief Rector” tiin a dah ta daih a. Tun dinhmunah chuan Mizoram Governor, Lt. Gen. (Retd.) Nirbhay Sharma hi MZU Chief Rector a ni tihna a ni a, amaherawhchu MZU inrelbawlna-ah thuneihna engmah pek a ni lo.

“Chancellor” leh “Chief Rector” te hi a hming mai, “Nominal/Decorative Post” a ni. University inrelbawlna-a thuneitu tak tak chu “Vice-Chancellor (VC)” an ni. Central University inrelbawlna-ah state sorkar-in thuneihna a nei lova, a inrawlh a thiang hek lo.

• University Vice chancellor thlan dan.
Tuna kan buaina lian ber, Vice-Chancellor nghetlo neia rei tak kan awm hi a pawi hle mai a. Vice-Chancellor nghet an awm loh chuan hna sang chin lak te, hmasawnna hnathawh leh administration thlengin a tițhuanawp a ni.
Vice-Chancellor hi President of India kher kherin a appoint a ngai a. VC thlan dan leh ruat dan kalphung pawh hi kan hriat ve a tha-in ka hria.

VC thar tur atana a tling awm deuh melh kualtu tur Member pathum awmna Search Committee din tur a ni a. Chung zinga pakhat chu President of India aiawh, “Visitor’s Nominee” a ni ang a, he Committee-ah hian Chairman a ni nghal ang. Member dang pahnih chu MZU Executive Council-in an nominate ang. Heng Member pathumte hi MZU hnuaia thawk emaw, MZU nena inkaihhnawih reng renga telna nei an ni tur a ni lo. Tunhma kha chuan Search Committee hian MZU tlawhin Zirtirtu, Zirlai, Alumni, Zirlai nu leh pa, Local NGO, etc. te Interaction neihpuiin VC atana an mi duhzawng, eng ang mi nge an duha an mamawh tih te an sawipui thin a, hming hmerha tu emaw recommend erawh an phal ngai lo. Chumi atang chuan MZU-a thawk lai emaw, University dang daiha thawk emaw, University-a thawk kher lo pawh Emminent Scholar, Vision nei tha, Administrative Experience nei tha ni-a an hriat mi pathum aia tlem lo VC atan an chhawpchhuak thin a. Chung an mi chhawpchhuah atangte chuan President of India-in a duh ber a lo thlang a, VC atan a appoint ta thin a ni.

Search Committee te nena Interaction hi vawihnih (VC Appointment vawihnih) lai chu kei pawh hian ka lo hmachhawn ve tawh a ni. A chunga kan sawi bak khi VC atan pawh Qualification dang a awm tehchiam lo. Tin, VC post hi a dila dil chi pawh a ni hek lo. Chuvangin tun hma kha chuan Central University dangah pawh Reader (Asso. Professor) te, Sipai Brigadier te, Service danga mi pawh VC atan an ruat nawlh nawlh mai a ni.

• Vice Chancellor qualification te
Amaherawhchu UGC-in kalphung a thlak a. UGC Regulation 2010-in VC ni tura Qualification ngai chu hetiang hian a sawi, _
“Persons of the highest level of competence, integrity, morals and institutional commitment are to be appointed as Vice-Chancellors. The Vice-Chancellor to be appointed should be a distinguished academician with minimum of ten years of experience as professor in a university system or ten years of experience in an equivalent position in a reputed research and/or academic administrative organisation.”_

Chuvangin tunah chuan VC ni thei tur chuan kum 10 tal Professor an nih a ngai tawh a nih chu. Tin, VC Selection pawh kalphung a danglam leh hret a. Tunah chuan a dila dil theihin an hawng ta a. Search Committee pawhin University tlawha Local Body hrang hrang te kawm kual tawh lovin New Delhi-ah VC post diltute a interview ta zawk a ni. Chuta tang chuan mi pathum aia tlem lo thlang chhuakin chung an thlanchhuah zinga tang chuan President of India-in VC tur chu a lo thlang ve leh ang a, Appointment a pe ang.
President of India hian Search Committee-in an chhawpchhuah zingah duh pakhat mah a nei lo a nih chuan VC tur zawng tha leh turin a ti thei bawk. File engkim khawihtu hi MHRD an nih avangin tuna kan harsatna lian ber pawh hi MHRD lam inthlahdah vang emaw, Politics inrawlh vang emaw a ni thei. Centre-ah BJP an sorkar a, Mizoram-ah Congress an sorkar bawk si. Kan Lok Sabha MP lahin kan Mizo Professor pakhat hming hmerh meuhin a lo recommend thul. MZU hi Central University mah ni se a neitu leh a chhawrtu tak tak chu Mizoram a ni miau a, chuvangin a chhiat a thatah kan State Sorkar leh Mizo mipuite pawh kan ralbang ngawt thei bik chuang lo. Chuvangin VC tha tak, chak tak, Vision nei thui tak, huaisen tak, discipline tha tak kan neih thuai theih nan Politics thila duhsak zawng neih emaw, hamthatna lak emaw tum lovin Mizo mipuite theihtawpa kan tan tlan a ngai a ni.

Kan sawi ta duah a, MZU Visitor, Chief Rector leh Vice-Chancellor te chu kan hre hrang tawh ang chu maw?

University te hi zirna in an nih piah lamah zirbingna hmunpui (Research Centre) an ni tur a ni a. Chumi atanga Research Finding te chu sorkar tan a chhenfakawm em em thin a, University mithiam te chu sorkar inrelbawlna leh hmasawnna atana ruahmanna siam chungchangah pawh an tangkai em em thin a ni. Chuvangin a chhungril inrelbawlna-ah a inrawlh tur a ni lo kan ti nachungin State Sorkar pawhin MZU hi thawhpui thiam sela, ram tana hmasawnna tluantling duanchhuah kawngah pawh nasa takin a chhawr tangkai ngeiin a rinawm.

Author : James Ramdinmawia

Aside | Posted on by | Tagged , | Leave a comment

CHAKMA PAWN CHHUAH KHAP CHUNGCHANGA MSU REGIONAL HEADQUARTERS, LUNGLEI PRESIDENT THUSAWI

• Lunglei ah chakma pawnchhuah khap a ni.

Dt.29.9.2017 hian Lunglei khawpui chhungah Chakma pawn chhuah khap a ni a, tukin zing dar 5:30 ațanga duty țan niin, MSU Regional Headquarters, Lunglei Office-ah tlai dar 6:00 ah tawpna siam a ni.

MSU Regional Headquarters, Lunglei President Biaksiamtluanga chuan thusawiin, “Lunglei khawpui chhunga Chakma pawn chhuah khap hman a nih chhan ber chu Chawngte a kan zirlaipuiten mikhual huangtau Chakma te kut an tawrh vang a ni” a ti. MSU chuan mipuite thlawpnaah lawmthu a sawi rualin, hei hi bul țanna chauh a nih thu sawiin, țanho zel a ngaih thu a sawi.

MSU President chuan Lungleia Chakma, Mizo In luah zawng zawngte chu Ram leh Hnam humhalh nan In neitu Mizo ten an In luah tir loh theih nise a duh thu sawiin, In neitute pawhin hnam hmangaihna vanga In luah tir lo ngam tura a beisei thu a sawi. Vawiina hun hman a nih vang hian Mizo Unity chu a zual sauh sauh a rin thu a sawi bawk a ni.

A sawi zelnaah Political Party ten kan induat rawn siak fo Chakma huangtau tak tak te enkawl kawngah Political Party ten ngaihtuahna thar kan neih a țul thu te, tharum aia thiamna hmanga hneh an țul thu a sawi a. Zirlaite thlavang hauha tharum pawh thawh hreh lo mi tam tak an awm laia, Social Media a țhahnemngai taka hnam chhanna tura thawktute deuhsawh leh diriam zawnga țawng thlahdah tak te chu Chakma nen angkhat renga a ngaih thu a sawi a. Lungleia Mizo zirlai zawng zawngte chu an zirna kawnga nasa lehzuala țan la a, hnamchawm mai mai Chakma ho hnuaia awm lo tura a duh thu sawiin, Chakma ho hi tiatpui cheibawl an ngaih loh thu a sawi.

MSU Regional Headquarters, Lunglei President Biaksiamtluanga chuan Pathianin Mizote hi kan ral a phal lova, Chakma ho chimral mai mai tur kan nih loh zia a sawi a. Hre lo te hnena Pathian thu hrilh chu kan bat a nih rualin, thiamna pek kher hi kan bat a nih loh thu a sawi bawk a ni.
MSU Regional Headquarters, Lunglei Secretary Lalrinngheta Sailo chuan țawngțaiin hun tawp a khar a ni.

Sd/-
Laldinmawia
Asst. Secretary
MSU Regional Headquarters, Lunglei

Aside | Posted on by | Tagged , , , | Leave a comment

ZIRLAI LUNGAWI LO TEN HUNTHAR VENGA CHAKMA HOUSE OFFICE COMPUTER TICHHE NUAL

Vawiin 29th September, 2017 Mizo Students Union General Headquarters Aizawl chuan nimin Chawhnu dar 2 khan Extended Office Bearer Meeting, MSU Pisapuiah an nei a.

Chakma thalai ten Chawngte Govt. Higher Secondary School Sport lai an tih buai chungchang an ngaihtuah a ni.MSU meeting chuan September ni 26 a, Chawngte Govt. Higher Secondary School, Sport lai Chakma thalaiten ti buai a, Chawngte MSU hruaitu ten thil awmzia hriat tuma, boruak tha a awmtheih nana hma an laknaah Chakma thalai 200 rualin Chawngte MSU hruaitute, dimna tel miahlova kut an lo thlak chu an dem tak zet tih an sawi.

MSU Extended Office Bearer Meeting chuan kan ram ngeiah a ram neitu Mizo zawkin kut kan tuar hi MSU chuan a hrethiam lo a. Mizo kutthlaktute chu a rang thei ang bera zawng chhuak a, hremna pe tur leh Chakma kut tuar, Mizo thalaite hnenah Zangnadawmna Chakma Autonomous District Council in pe ngei turin MSU General Headquarters chuan a phut a ni, an ti.

MSU Gen. Hqrs. Hruaitute hian an lungawilohna lantirin nimin tlai dar 3 bawrvel khan Chakma House Hunthar veng an pan a. Chakma House Office chhunga Computer thenkhat te chu an tichhia niin thu kan dawng.MSU Gen Hrs. President Pu RB Lalmalsawma chuan tharum hmanga Chakma ten Mizote an nek fo chu tha an tih loh thu a sawi a ni.

Author : Vanneihthanga Vanchhawng

Aside | Posted on by | Tagged , , , | Leave a comment

MUMBAI REL STATION-A INCHILBUAINA-AH MI 22 AN THI

Vawiin Sep 29, 2017, chawhma lam, mipui pungkhawm tam vanglaia Mumbai-a Elphinestone RailwayStation leh Parel sub-urban railway station inkalpawhna, lei (overbridge) a mipui talbuai inchilbuaina-ahmi 22 in nunna an chan.

He chhiatna thleng hi ruah sur nasa lutuk thawm leh mipuk tam vanglai bengchheng, ri ring lutuk vanga thleng niin police te chuan an sawi.

He chhiatna hi vawiin chawhma lam dar 10:40 bawr vel, ruahpuivanawn sur vanglai taka thleng a ni a, mipui veivak lun vanglai tak a ni a, he Lei hi a tawt em em a, hetiai hian lei bula electric current kalsual (short-circuit)chuan ri ring tak mai a siam a, hei hian a bulhnaia awm te han phili buai tlanchhia avang hian inchilbuaina hi a thleng ta a ni.

Railways thuneitute, police leh fire brigade lam ten a hmun hi an thleng nghal a, theihtawp chhuahin chhanchhuah leh tanpuk hna an thawk nghal a, iam tuar te chu a bulhnai damdawiin remchangah te dahluh nghal an ni.

BMC disaster management squad te chuan hriattheih chinah he chhiatna thlengah hian thi 22, (mipa 14, hmeichhia 8) leh hliam 33 (mipa 24, hmeichhia 9) an vaiin thi leh hliam 55 an awm niin an tarlang.

PM Modi chuan Elphinestone Railways Station a chhiatna thlenga vanduaite chu thinlung taka a tawrhpui thu a sawi a, Maharastra CM, Fadnavis pawhin thi te leh an chhungte a tawrhpui thu sawiin Maharastra sorkar leh railways ministry ten he chhiatna thlen chhan hi an chhui tur thu leh a tul ang a na taka action lak a ni ang a ti.

He chhiatna thlenga thi chhungte hnenah hian Maharastra sorkar chuan Rs 5 lakh theuh a pe ang a, hliam tuar te enkawlna zawng zawng pawb state sorkar in a tum sak ang tih Vinod Tawde, Maharashtran minister chuan a puang bawk.

Author :

Aside | Posted on by | Tagged , , | Leave a comment

CHAKMA MI 200-300 RUAL AN PUNGKHAWM, MSU HRUAITUTE KUT AN THLAK by Maena Halamadrid Kristian

Post dang chu a awm tawh tho a. Chiang leh tawifel zawkin ka han sawi ange. Vanlalropuia (MSU Sub Hqrts, Chawngte) hnen aţanga ka thu dawn danin.

Chawngte Higher Secondary School chuan annual sports an nei mek a. An sports neihna hmun hi Chawngte a playground kan neih ţhat na ber Chawngte ‘C’ ah a ni. Chu an sports chu a tawp lam nimin (26. 09. 2017) khan neih leh niin football khelh tur a ni a. Hetia football khel tura he playground hman an tum mek lai hian chakma football players ţhenkhat (Kamalanagar Football Club an tiin ka hria) te chuan students’ tena sports an neih mek a football khelh an tum chu phal lovin mual an rawn chuhpui a. Zirtirtuten tlawmngai tur leh chu an sports chu ban lam a nih thu an hrilh pawh chu engahmah ngai lovin chakma ho chuan khelmual ah chuan practice na kaltlang pui an tum a ni. Chutianga thil a kal sual tak nuai hnu chuan sports an neih mek pawh chu ngeiawm taka tihtawp a ngaih phah a ni. He thil avang hian Mizo students’ sports na a tel mekte an lungawi thei lova. MSU, MZP hnenah thil awmzia thlen an tum ta a ni.

He thil thleng hi MSU, Sub- Headquarter Chawngte chuan a rang thei ang berin a bawhzui a. MSU chawngte chu a lungawilo hle a ni.

Hemi avang hian Chawngte a zirna in chu dt 28. Sept. 2017 (vawiin) khan khar a tum a. Zirna in ţhenkhat chuan an lo support ţha viau a. Mahse, Kamalanagar College (MSU Chawngte chuan Chawngte College ti a thlak a tum mek) chakma students’ ho chuan kan buaina a ni ve lo tiin an hnialkalh a. Mizo Students’ Union hruaitute chuan thu awmzia ţha tak leh zaidam takin an hrilh a. He thil hi hnam thil (communal feeling) a ni lova. Gov’t Higher Students te thlavang hauhna thil mai a ni. Chuvangin hrethiam a, thlawp mai turin an ngen a.

Hetia MSU hruaituten hma an lak mek lai hian chakma students ni lo college campus pawn lam aţangin mi engemaw zat an lo pungkhawm a. An vaiin mi 200- 300 vel an tlin a rinawm. MSU Chawngte lam pawh hemi lai mek hian college gate ah duty mekin banphar meuhin chakma pungkhawmte hnenah buaina an duh ber a nih loh thu leh buaina siamlo turin an ngen ve bawk a. Vanlalropuia, President MSU, Sub- Headquarters Chawngte chuan he thil thlen mek lai hian College Asst. Professor Dr. Joytirmoy Chakma (ani hi CYCA president a ni. Hmani lawk khan chakma hnam chhuibingna bikah doctorate degree a hmu thar a ni awm e.) chu thil awmzia sawipui turin office ah an lut a. Hetia office a an luh hma hian Dr. Joytirmoy Chakma hian chakma ţawngin chakma pungkhawmho hriattur lekin thu engemaw a sawi zeuh a. A thusawi hi enge a sawi hriat a nilova. Dangpuithu heh hnam kan ni a ti nge, MSU ho hi kutthlak rawh u a ti nge, Bangladesh product kan ni? a ti nge engmah hriat a ni lo. Chutia thusawi a neih hnu chuan Chakma pungkhawmho chu an pawr bengchheng ta hle mai a. Mahse, office a inbiakna chu kalpui zel a ni. He an inbiakna ah hian Jotirmoy Chakma hian MSU president hnenah, communal feeling anga la lo turin a ti a. Communal feeling anga an lak loh thu leh buaina an duh ber anih loh thuin MSU president hian a chhang. Tin, he inbiakna ah hian Chakma students’ Union hruaitu pakhat pawh an zinga tel ve tur a sawm an tum mek laiin pawn lamah thawm a ri ring hle a. Chumi avang chuan inbiakna chu titawpin pawn lamah an chhuak a. Gate pawn lama chakma pungkhawmho chuan MSU hruaitu ţhenkhatho chu an rawn tawn/nawr phei a. Vanlalzuia, Secretary MSU, Sub-Headquarters Chawngte leh midang chu kutthlak nghalin an rawn bawr luai luai a ni. Chakma hian MSU president pawh college office aţanga a rawn chhuak chiah chu kut an lo thlak nghal a. Khawih let ve a tum mek laiin college a thawk chakma pakhatin Vanlalropuia chu a hnung lam aţangin a rawn pawm bet tlat a. Na lutuk ni lo mahse, a darah a seh sak bawk a ni. Hetia an buai lai hian MIZO hi mi sawm pawh an tling lova. A bak mi 300 dawn lai chu chakma kan tih, a awlsam zawngin takam ho vek an ni. Mahse, Mizo awm ho hi inches khat te pawh a tlanchhiat an tum lova. Chumi a hnekin an theih ang tawpin an beizui ve zawk a ni. (Chakma hma ah chawngte Mizo kan tlanchhe ngailo)

He thil thleng hi hria in police lam an rawn inrawlh vat a. MSU chuan police inrawlh ngai khawp a thil a thleng hi an duh lo hle a. Tin, CRPF ho pawh tear gas nen a rawn thawk phei nghal in buaina an hmet mit a ni. He thil thlen lai hian Mizo mi sawmnga bawr vel tal chu awm se, hei aia nasa zetin buaina a chhuak hial ta ve ang. Chakmaho hian Mizote hi a inbeirawn ang zawng lo chuan mi an ngam lova. A fal a Mizo mi pahnih khat lek chakma sawm velin an beirawn tih loh ah chuan chhun khaw en lai hian Mizo mi sawm bawr vel khing turin chakma mi za rual vel an punkhawm a ngai. Hei hi ziak loh va dan an neih ve ni awm tak a ni an punkhawm chak dan ah hian.

He thilthleng hi a pawi hle mai a. Chakma hovin Mizo kutthlak an sim thei lo hi a thinrim thlak hle. He thil thlen ni tak hian MZP, Sub-Headquarter Chawngte chuan zirlaite pualin quiz competition a buatsaih lai a ni a. He buaina ah hian an inrawlh ve hman lo a ni. Hemi chungchangah hian Mizo kutthlaktu chakma mi ţhenkhatte kha kan buaina a nilo. Anni chu kan hmuh remchan hunah a ţul angin hma kan la mai ang. Rilru dam theilo Mizo tlangval an awm tlat. Kan duhloh ber zawk chu kan hnung a thil thleng chungchangah chakma hovin memorandum submit an tum chu MZP leh MSU ten an dan ţum a chakma mi zali zanga rual zet hui kiang theitu leh buaina dal theitu Dr. Jotirmoy Chakma khan college kawt a Mizo mi tlemte, buaina siam tum pawh nilovin a chakma kut an tuar mawlh mawlh lai a ţawngkam khat te pawh a nei duh lo kha MSU rilru a dam thei lo. Buaina chhuah hma a ţawng thei hle si, buaina chhuah hnu veleh a a dangawk tlat mai khan Mizo chung a a rilru chhiat zia a ti lang a ni. Hepa chanchin hi a ţul anih phawt chuan kan la ziak leh ang. Tin, buaina chhuah lai a Mizo ni ve si, Mizo nek zawng a ţawngkam nei, sorkar hnathawktu pawh in awm. Tun ţum atan chuan thereng hmeh mih angin kan la ngawi ang. Mahse, in chanchin sawi hi a ţul anih phawt chuan Zoram mipui hian an la hre mawlh ang. Kan Mizopui in nihna vang chauhin kan la ngawi ang. Chakma ho hian min zuam a, min hlaulo sawt riau. Hemi karah hian Chawngte hmunah hian a tlem zawk Mizote hi kan ţanrual angai. MZP thu hlu ‘ŢANRUAL HI CHAKNA’ tih kha kan vawng reng tur a ni. Thu kal lam leh haw lam kan la inhriattir zel ang. He buaina hi chakmaho hian rehtir vat an duh ngei ang. Mahse, a bul ţanna chauh a nih a rinawm.

Aside | Posted on by | Tagged , , | Leave a comment

Chakma te india khua leh tui an ni – Pu Hawla

Ni 29 September, 2019 (Zirtawpni) hian Congress Party chuan kartina an lo tih thin dan angin Congress Bhavan Golden Hall-ah Friday Political Session hun an hmang. He hunah hian Pu Lal Thanhawla, Chief Minister, Pi Vanlalawmpuii Chawngthu leh Pu M. Zohmingthangi, Chairperson, Mizoram Women Commission ten thu an sawi.

Mizoram Chief Minister, Pu Lal Thanhawla chuan Chakma chungchang sawiin kan ramah Chakma chungchang kan sawi nasa in Politics khelh nan te kan hmang, politics a nih avangin engkim hi a thiang vek lo tih kan hriat a ngai a, ringtu kan nihna hi kan hriat hmasak zel a pawimawh a, vawiin ah hian Chakma Foreigner tiin dan lo a lo lut ti se dan ang chuan a dik thlap bawk. Chakma te hi India Danpuiin khua leh tui a a pawm thlap tawh te an ni a, keini hian India Constitution hi kan thaichhe thei lova, kan tidanglam thei lo, parliament chauhin a tidanglam thei a ni a ti.

Pi Vanlalawmpuii Chawngthu, Minister pawhin thusawiin ka phu loh chawimawina leh mawhphurhna min petu Pathian chungah leh kan Chief Minister Pu Lal Thanhawla hnenah lawmthu ka sawi a. Congress Party ten Thalaite tan khawvel thar kan din ang tia Manisfesto ah an lo intiam tawh chu a taka tihhalwhtling zelin Congress Thalai atang MLA Candidate 3 (Pathum) lai mai min dah avang leh Minister hialah te min hlangkai ta hi ka lawm em em a, Hrangturzo Bial mipui, min lawmpuitu zawng zawngte chungah lawm thu ka sawi bawk a ni. Congress Party hi Thalaite tan belhtlak a niin Political Party a lut turte tan Congress ah hmun a awm a ni a ti bawk.

Mizoram Women Commission-a Chairperson thar Pi M. Zohmingthangi pawhin thusawiin he dinhmun duhawm taka min hlangkaitu Pathian leh Pu Lal Thanhawla hnenah lawmthu ka sawi a. Mithenkhat ten AMC Counsellor ni chunga, Women Commission Chairman nih hi Office of Profit a awm thei angem an tih chu India Constitution Art 191 hi MLA te tana a sawi hi AMC Counsellor te tan a valid ve lo tih ka sawi duh a. Hmeichhia te Danin a humhalhna zawng zawng mithiam te rawnin kan endik ang a, kan hotuten min rin ang ngeiin theihtawp chhuahin he hna hi ka thawk dawn a ni a ti bawk.

He inkhawm hi Dr. LH Chhuanawma, General Secretary, MPCC chuan kaihruaiin Pu LalhruaitluangaKawlni, MPCC Media Department leh Pu Albert Lalthlamuana, Chairman, MPCC Election Department te chuan Report an pe a. He hunah hian Party President Pu Lal Thanhawla chuan Phunchawng venga MNF leh Party dang atangin mithar duhawm tak tak mi 65 lai a lawmlut a, he inkhawm chhimtu hi an tam hle.

Aside | Posted on by | Tagged , , | Leave a comment

Minister chanpual siksawi

Tunhnaia Minister of state 2 lakluh thar Pu KS Thanga leh Pi Vanlalawmpuii te chu an hna chanpual tur Chief MinisterLal Thanhawla chuan a sem a, hemi rual hian cabinet minister dangte hna chanpual pawh siksawi nghal a ni.

Tun thla ni 20-a lakluh Pu K S Thanga hi dept 3- Agriculture,Irrigation and Water Resources Dept, bakah Land Resources, Soil and Water Conservation te pek a ni a, Pi Vanlalawmpuii Chawngthu, hmeichhe minister awmchhun chu dept 3 bawk pek a ni a, a dept enkawl tur te chu Cooperation, Sericulture leh Fisheries a ni.

Hetihlai hian, Chief Minister Pu Lal Thanhawla chuan a dept chan thin Public Works department chu a nau, Health Minister Pu Lal Lal Thanzara a pe a, Power and Electricity chu Home Minister R Lalzirliana a pe thung a ni. Pu Lalzirliana enkawl Agriculture dept chu laksakin Pu KS Thanga pek a ni.

Pu Lal Thanzara enkawl thin Information and Communication Technology chu Urban Development Minister Pu Zodintluanga pek belh a ni a, School Education Minister H Rohluna pawh Chief Minister enkawl thin Labour, Employment, Skill Development and Entrepreneurship department pek belh a ni bawk.

Kum 2013-a Pu Lal Thanhawla kaihhruai Congress a sorkarhnua council of minister te hna chanpuak siksawi vawi 2 na a ni.

Nimin vek khan Pi Vanlalawmpuii Chawngthu chuan New Secretariat-a a office a luah lut tan a ni.

Aside | Posted on by | Tagged , | Leave a comment