BAWNGPA CHAL WORLD CUP BY – tete Remkima.

Chu mi kum a World Cup chu an khaw TV nei awm chhun leh an khaw VCP ni bawk Pu Thanga te in ah chuan chianglo ruai leh fiahlo takin chu khaw mipui te chuan an en ve țhup țhin a,an TV en na black and white a nih a vang erawh chuan țan lam te hriat hran a har hle reng a ni..Mahse football ngaisang khua tih taka chawfun nen meuh a patling pui pui in Pu Thanga in an pan kawi leh nguah nguah țhin chu an ngaihsan awm letling hial a ni.

TV pakhat en țheuh țheuh pawh an inhnial leh luai luai mai țhin a,țhenkhatin a goal ngei ni a an hriat laiin țhenkhat chuan la goal hauhlo ni in an hre bawk țhin si a,a buaithlak viau zel a ni.

.An TV en in zir miau heklo le,a chak zawk pawh hriat har tak a ni a,inkhel tawp ve leh an khaw pa rawn leh a TV nei tu ni bawk Pu Thanga chuan a chak zawk chu a rin dan leh ngaihdanin an sawi leh mai țhin a,Lungawi takin an pawm thlap mai zel a ni.

Hemi țum a World cup ah hian Pele chuan Brazil a champion pui a,Pu Thanga TV ah erawh England a ni champion daih ni,

Ni e,he mi te khua hi infiam ngaina tak leh khaw in lungrual tak an ni a,an khaw VCP Pu Thanga hi alo fel em kher bawk nen an khaw țhenawm te chak lakna ber pawh an ni thuai reng a,khaw taima leh intodelh tak khua an ni a,ei leh bar ah an hniang hnarin khawnuam tawk vek tak a ni phawt mai.

Pa thluak țha leh fing tih takah zan khat chu an VCP Pu Thanga chuan ngaihtuahna thar a nei ta, a mut hmunah chuan bengsik in a in ngaihtuah ngar ngar a,a khaw mipui huapa intih hlimna buaisaih chu a duh a,lawmman pawh țha tawk tak a buaisaih a tum a ni,an khua ah hian a ni tluka mi hausa an awm lo a,mi zawng zawngin an chung en tih a in hre chiang a,in vawrh lar leh zual nan an khua ngeiah chuan World cup buatsaih ve a tum ta mauh mai le,lawmman pawh a theuneu dawnlo kher mai, A Bawngpa chal til lakloh ngei mai chu champion lawmman atan a thehchhuah chu a tum ta rup mai bawk.

Chu a ngaihtuahna leh thil tum chu a tuk zingah chuan a puangzar nghal a,chu thu an khua in a an han hriat meuh chuan lawmawm an ti in an phur kher mai a.khawtlang ti ti chu luah nghal in awmkhawmna hlekah chuan an sawi luai luai mai zel a,Pu Thanga chu fing an ti in an ngaihsang tak zet zet a ni.

Chutia an khuain a world cup buaisaih ve an tum takah chuan an khawtlang hruai tu te chu Pu Thanga inah chuan thilpawimawh leh țul zual te sawi ho turin an inhmu khawm a,Pu Thanga’n he thil a buatsaih chhan leh țul zual te sawi in he World cup khelh chho dan tur te pawh an duang nghal a,engkim mai chu Pu Thanga hnuai ah chuan a dik thlup vek mai.

An rorel pawimawh zual chu he world cup ah hian veng tin ațangin Team khat țheuh chhuah tur a ni ang a.A hun a tan chumi kum Favang awllen chu an ruat nghal bawk a,an thurel te mipui hnen a an han puan zar leh meuh chuan an lawmin chu hun chu an nghakhlel tawh hle a ni.

A hun a hlat tawh loh avangin he World cup a tan hian veng tin te chu an in buatsaih nghal mup mup a,Bawngpa chal chu dawn ngei an tum țheuh a ni,Pu Thanga te veng pawn in buatsaihna kal chhoh pui nghal mawlh mawlhin A mah Pu Thanga pawh chu a phur vut vut kher mai,an veng Team coach a tan chuan chuh buai tu awmlo in a mah ngei chuan an veng Team te chu a Bawngpa Chal chu lakpui ngei a tum ruh hle.

Veng dang te pawh an phurin an inbuaisaih nasa hle hlawm a,tlangval leh pathlawi rualte pawh an veng aiawh ngei tumin exer an la suau sauh a,zingkar ah leh tlai lam ah chuan an khaw kawtthler ah chuan an intlan pel suau suau nitin mai a,Pu Thanga te veng team pawh a inbuatsaih nasa pawl leh team dang te huphurh rawn an ni chiang e.

Zantin mai chuan Pu Thanga inah chuan an veng team ai awh te chu inhmu khawmin an inkhelh dan tur te chu an sawi khawm laih laih țhin a,an phur tawhin champion ngei pawh an in ring takzet a ni.

Pu Thanga chuan a team te chu a fuih sauh sauh bawk a,a hmelah chuan a ti mai mailo tih a hriat hle bawk,a mah world cup buatsaih ngeiah chuan a team te chu champion pui a tum ruh hle,

A HUN A THLENG TA.

An nghahhlelh em em mai BAWNGPA CHAL WORLD CUP chu a hun a lo in her chhuak ta a,chu khaw mipui te chuan a hmun ngei a World cup en țheuh tumin chhungtin te chu an inbuatsaih a,a pui a nawi in tukțhuan eikham chuan an khaw khelmual lam chu an pan sung sung mai a,mual sir leh kotlang vel ah chuan țhuthmun remin an awm khat hmur tawh mai a,World cup chu hun reilo teah an khel țan tawh mai dawn avangin awmhmun an rem țha surh surh hlawm a.,a lo thlir tu tur mipui lam chu an in peih fel ta e.

Chutah an khaw VCP leh he BAWNGPA CHAL WORLD CUP buatsaih tu AMAH PU THANGA ngei mai chu lo ding chhuakin mipui chuan kut an lo beng hluah hluah a,thusawi na leh chu world cup hawnna te a neih zawh hnu chuan veng tin team aiawh (captain) țheuh te chu ko chhuakin thutiam na an neih tir leh thlap a.Mipui te chuan Pu Thanga chu an ngaisang takzet a ni.

Inkhelh chu țan a ni dawn ta a,team pali an nih avangin semi final a ni nghal dawn a ni,a chak zawk zawk ten a tukah final an khel nghal dawn bawk avangin chumi ni chuan team tin te chuan final luh țheuh an tum ruh hle.

Inkhel hmasa ber atan Veng thlang Pu Ruala team leh Mualveng Pu Tawna team te an ni dawn a,a vawi hnihna ah Pu Thanga te veng Team leh Veng chhak Pu Liana team te an ni dawn bawk a ni.

Mualveng leh veng thlang Team te chu an coach Pu Ruala leh Pu Tawna ho in mual ah chuan an lo chhuak țham țham a,mipui lam thawm pawh a țha kher mai le.

Engkim chu World cup a nih avangin an duh uluk hle a,he inkhel enkawl tu tur HAMRIK ham tu a tan a an ruat an veng pa faifuk thiam leh faifuk ring thei ber Pathlawi Pu Zokhuma pawh a sipai țan lai a a kekawr bul eng deuh tih tih a a tawnzau var bilh lut thlap chungin a in peih hle tawh a ni.

Team pahnih te pawh an coach te chuan fuih mawlh mawlhin mual chhungah an rawn tlan lut thauh thauh hlawm a,mipui te chuan an veng te chu awrawl tawp tawpin an lo au a,thawm a țha hem hem kher mai le.

Muallai takah chuan ball chu Pu Zokhuma chuan dahin a inpeih tawh hle a.Team pahnih te pawh an inring ta,

Chu tah ring tak maiin Hamrik a ri tuar a, BAWNGPA CHAL WORLD CUP chu an țan ta e.

Team pahnih te pawh țan phat ațangin an țang hle a,Mual khu rum rum khawpin tlangval rual te chu an tlan khu rum rum a,Thlir tu lam lah awm hle hle thei awm hek suh..

Enge maw chen an in nawr tawn zak zak hnu chuan Veng thlang lam thiam puipa chuan ball chu chak taka tlanpui in mawi takin Mualveng lam goal ah chuan a pet lut ta hlauh mai le..mipui lam thawm a țha kher mai,,an coach Pu Ruala pawh a lawm vur vur hle

Pu Tawna chuan a team te chu theihtawp in mual sir a țang chuan a lo fuih sauh sauh a..mahse hunin a daih ta tlatlo..Hamrik ham tu Pu Zokhuma chuan hun ti tawp in Pu Ruala Team te chuan Final an lut ta.

Vengthlang lam mipui te pawh an lawmin an veng team te chu an bawr luih luih mai bawk a,chutia enge maw chen an awm hnu chuan inkhel vawi 2 na khel turin Pu Thanga te veng team leh Pu Liana team te pawh mualah chuan lo chhuak khawmin mipui lam pawh mual lamah an mit a fu leh ta țhup mai le.

Inkhel pawh an țan chhunzawm nghal a,Pu Thanga pawh mual sir ah in la coach takin a tei thuak thuak reng a,an hmatawng tlangval Zamloa chu pet Goal ngei ngei turin a au sek mai bawk a,an inhneh tawkin a tu lam mah mah chuan an ti goal thei lawk lo a,

Hun a tawp țep tawh tihah chuan Pu Thanga team lam te chuan an ti goal ta,a ti goal tu chu tudang nilo in an veng pathlawi viak țha Khuma ngei a ni,Pu Thanga pawh a lawm ngang ni tur a ni muala tlan lutin khuma chu a kuah nawk nawk a,inkhel pawh a tawp zui nghal bawk.

Awle..tunah chuan Final khel tur a hriat ta,Pu Ruala team leh Pu Thanga Team te an ni.A tu zawk chu nge champion a nga Bawngpa chal chu dawng dawn tih in rin siak luih luih in mipui te pawh an țin zo ta a,a tuk a final chu an nghakhlel ngei e.

WORLD CUP FINAL.
PU THANGA TEAM VS PU RUALA TEAM.

A tuk ni chhuak eng mawi tak chuan chu khua pawh chu a rawn chhun eng leh uar tawh a,chu khawchhung a cheng mipui te rilru ah erawh thil pakhat chiah a awm thung,engdang nilo in vawin a World cup final khelh tur chu a ni.

Tuk țhuan eikham a ni a,a ngai te bawkin mipui te chuan țhutna țha chanloh hlauin khelmual lam chu an pan leh sung sung tawh a,an veng nula ho pawh a nalh thei ang ber a inchei in mual lam chu an pan a,an bialpa te inkhel en tur an ni bawk a an phur kher mai.

Champion lawmman tur pawh Pu Chala Leihkapui banah chuan an thlung ruau tawh mai bawk a,naupang ho chuan an kil bial laih laih mai bawk a.

World Cup Final a ni bawk a,țan hma chuan programme hrang hrang te an nei a,an veng zaithiam Tv.Tawia’n ” Di Cham Bawihpui” tih hmang a mipui te a awih zawh hnu chuan an veng Band lar Tlangval Chhuma leh a țhian te an rawn che ve le a,mipui lam chuan an lawm in thawm a țha kher mai.Nula ho lah chu an rawl tawp tawpin an khek tuar tuar mai bawk a,Tv.Khuma te pawh an phur ngei e,lengi nuiri chuan tha tho na pe in “Kan tlang ram par vulna ” tih ațangin ” A di a țhen em ni ” tih vel an han hrut chho meuh chuan mipui thawm chu ropui hem hem tak a ni.

Chutia an veng zaithiam ten mipui an awih mup mup lai chuan Pu Thanga leh a team te chuan mual sir Pu Chala Leihkapui hnuaiah țhut hmun remin an țhu khawm a,a laiah chuan Pu Thanga chu dingin a team te chu a fuih mawlh mawlh a,champion ngei an tum ruh hle a,a team rem dan pawh a hma ni ngawt ai chuan a uluk hle..si ban nghakah an veng thing lawn thei tak Tv.Rotea an nei a,a hnudawlah Pathlawi Țhuama leh Tv Rodawla inkawp chu theuneu lo tak tur an ni bawk a,a ding lam leh vei lamah lah Tv Bawnga leh Tv Puia an la awm cheu bawk,tlar hnung lam chu ngaihtuah awm lo teu teu tak an ni phawt mai,

Mual lai a phusa kual vel tur in Tv Rorela a leh midang 3 an nei bawk a.hmatawng ah lah Tv Zamloa leh Pathlawi viak țha Khuma an nei cheu bawk.
.
A tu te emaw ber hi inhliam palh thil thu ah a thlak mai thei turin an veng tlangval Thing zai thiam Tv Lalmawia leh midang 5 lai mai an la nei bawk a ni..Pu Thanga pawn an champion ngei a ring hle.
.
Chutia Pu Chala Leihkapui hnuaia hun enge maw chen an awm hnu chuan mual a programme lam pawh zawh fel alo ni tawh a,Final khel turin team pahnih te chuan mual an pan ta.

Mipui te mit pawh an khaw inkhel thiam te chungah chuan a fu țhup tawh a,mual lai takah chuan Hamrik hamtu tur Pu Zokhuma pawh ball nen a ding kak teuh tawh a,coach pahnih Pu Thanga leh Pu Mawia te pawh in chibaiin an awmhmun tur ve ve an pan a,.team pahnih te pawh mual lai takah inhma chhawnin an ding țhap tawh a,chu khua chu World Cup final khel turin a in peih ta tak zet e..

HAMRIK ham tu Pu Zokhuma chuan a țan tir mai dawn emaw tih lai in World Cup final ve meuh ah chuan Players te chuan hnam hla sa lo a inkhel tir chu alo tum hauh lo…

Veng thlang lam Pu mawia team te chu hnam hla sa phawt turin an ti hmasa a,a tu a mah chuan India hnam hla “Jana Gana Mana” chu sa thiam an lo awm silo,an duh duh hla chu hnam hla a a pawmsak mai tur thu Pu zokhuma’n a sawi chuan Pu Mawia team te chuan uluk leh Ring takin “PI PU CHHUAH TLANG ” chu an sa ta a,mipui lam pawn an lo zawm dual dual a,ropui hep hep tak a ni.

An sak zawh hnu chuan Pu Thanga Team te lam zai hun a ni ve ta a,a sitail erawh a dang deuh,an team captain Tv.Zamloa chu lo pen chuak in a țhian te hmaah chuan a ding a, uluk tak mai a solfa vaiin “NANGMA THIL ROPUI TE AN SAWI,ZION KAN PATHIAN KHAWPUI” tih hla chu an sa thum ta hem hem mai,,Mualsir a nula ho chuan lo zawm in a part kim in mawi takin an sa ta thup thup a,Pu Chala Leihkapuia awm hlimsang Pi Roziki chuan Halleluiah pein a lo țul vei hman hmawh bawk a..an sak zawh chuan Final ropui chu țan a ni dawn ta e.

Inkhel chu an țan ta a,Tv Zamloa chuan ball chu khal nghal tar tarin a sir a Pathlawi viak țha khuma chu passi zeuhin khuma chuan mawi tak a leh lam pawl a mi chu thai bum zeuhin pet goal ngei tumin na takin ball chu pet a tum a,mahse a tum ang chuan thil a kal ta tlat lo mai,ball chu rap hrual in a mah chu a tlu khu luih a,Hamrik a ri nghal tuar bawk a, Pu Thanga pawn a ui ngei mai,Hamrit ham tu Pu Zokhuma chuan Khuma chu Yellow card an pe teh ngawt a, Pu Thanga team te chu an hrilh a ngai ngei mai,engvang a Yellow card pe ngawt nge a nihchu an zawt luai luai a,A ni lah chuan a tlu chiang em alawm a lo ti sam et mai si..a tih ngaihna tak pawh chu an hrelo a,inkhel pawh an țan leh ta ee..an țang bawk a,an in nawr tawn zak zak a,mual laia țv Rorela pawn Rorelin a tlan kual zak zak reng a,chutia an in nawr tawn zak zak lai chuan Pu Mawia team lam chuan an ti goal ta tlat mai le.An lawmin mipui thawm pawh a țha kher mai,chawlh lawkin a chhunzawm nghal a,an veng team te chu nula te chuan tuisik lo tulh mawlh mawlh in an lo phe buai ve viau mai bawk.

Pu Thanga team te chuan Goal 1 an phurh vang mai chuan an hnual hauh lo a,leh thal ngei tumin theihtawp an chhuah chhunzawm zel dawn a ni.

Hamrik hamtu Pu Zokhuma pawh mual sir ah a zung to to a,a zun zawh chuan Hamrik ham ri tuarin World cup final chu an chhunzawm leh ta,mipui pawh an ri hulh hulh a,khuang pui lo vaw ri dum dum tawk nen,final zet chu a boruak pawh a na takzet e.

An țan a țanga reilo te ah chuan Pu Thanga team captain Tv.Zamloa chuan ball chu chak lutuk tak mai a rawn tlanpui in Pu Mawia team tlarhnung te duhtawka a tih mangan zawh hnu chuan mawi takin a pet goal ve ta,,

1-1 a ni a,hun pawh a zo țep a,Pu.Thanga chuan Tv.Puia chu thlakin an khaw thingzai thiam Tv.Lalmawia ngei chu luh tirin Nula lam thawm pawh a țha kher mai,

Tv.Lalmawia pawh phur takin mualah chuan a tlan lut thauh thauh a,Tv.Rorela chuan ball chu rawn passi nghalin mawi tak a lo lak a tum tehreng nen a ma ke chu pal in a va tlu nghal tual ringawt a,Hamrik a ri leh nghal tuar mai le.

Pu Zokhuma pawh chuan Tv.Lalmawia chu yellow card a pe leh ta, Pu Thanga team te chuan hrilh hai takin an bial leh luih luih a,Pu Thanga pawh a lungawi hmel loh kher mai,Pu Zokhuma lah chuan a rawn luh tirh ațang khan yellow Card pek ka tum sa hrim hrim tawh an ti leh ngawt a, an sawisel zui ngam der lo.

Hun tawp nan minute tlem te chiah a awm ta a,chak zawk nih ngei tumin an in nuai ta tak tak ta,Tv Rorela chuan nalh tak ball chu vir kual pui in a sir a tlan pathlawi viak țha Khuma chu pe in a ni chuan rang takin Tv. Zamloa chu pe leh nghal in a ni chuan ball chu na tak mai in leh lam pawl lamah chuan a pet phei nawl nawl a,a lo pet na deuh nge ni goal chunglam a kal in mual ko a awm Pi Dengi lu ah tak mai chuan fuh in a ni lah chu Hahuk kah thlak ang derin mualah chuan a rawn tla tla a,A zal nghal der mai bawk a,pa țhen khat chuan mual bula Pu Chala in ah chuan zawn lut in inkhel pawhan țan chhunzawm leh nghal a,

Hun tawp nan hun tlem te leh a chanve vel chauh a awm tawh ang tih ah chuan Pu Thanga team te chuan ball chang leh in Tv.Lalmawia chuan chak takin a tlan pui par par a,leh lam pang tlar hnung te tlan pel zel in an si ban nghak Pu Bela nen chiah an in hma chhawn ta,Chutih lai a Pu Mawia hlau thawng lutuk leh Pu Thanga lo țang lutuk pawh chu tuman an hmulo,mipui te chuan Tv Lalmawia leh Lehlam siban nghak PU Bela chiah a ni an thlir ni.

Chutah Tv Lalmawia chuan Pu Bela man phak loh tawk chiah chiah turin a sir ah chuan a pet kawh phei zawt mai le..Pu Bela pawh alo awm mai mai bik hauhlo,ball lo kal phei chu dan ngei tumin nalh lutuk tak mai in alo dive a,a va han dive mawi kher em,mahse Tv.Lalmawia’n a ban phak loh tawk chiah chiah tur a a pet a ni bawk a, a ban phak lo tawk chiah chiah chu a ni e ,a pawi zo ta,A goal ta e.

Hun a tawp zui nghal a, an tum ang ngeiin Pu Thanga team chu World cup Champion an ni ta..

mipui thawm pawh a țha kher mai,Pu Thanga lawm lutuk pawh a țap deuh pur mai bawk a,Tv Lalmawia chu an zawn a,an vawr nulh nulh mai bawk a,nula ho la chuan an bawr luih luih bawk a,nuam a ti kher mai,Chutia an vawr kan a piang chuan Pu Chala Leikapuia Nuthlawi Khawmi țhu chu a han melh țhin a ,Thlawi khawmi lah lo duai lo Tv Lalmawian a lo melh a piang chuan a lo țhu lang lui deuh kher zel bawk..zan lamah an in ching fel ngei ang le.

WORLD CUP TROPHY A BO.

Champion team te chuan an lawmman tur Bawngpa chal chu an chul thuak thuak tawh a,mual laiah chuan kai phei in an haw haw luih luih mai bawk a,Tv Lalmawia nuam ti leh phur lutuk chuan a hma a ball chu a theih tawp in an pet pawp a,a hma a Bawngpa chal an kaih luih luih lai mawng ah tak chuan per zawtin Bawng na ti leh hlau lutuk chu a lim ta puat puat mai le,a kaihna hruih chu tuman chelh nghet hlawm heklo,hlauh leh thlabar takin meikawh in chu an world cup trophy chu ram lam panin a tlan liam ta vang vang mai.

Chutia an lawm man ber a tlan bo tak si ah chuan Pu Thanga team te chuan an um zui nghal thuai a.Tv Lalmawia chu han dem viau mahse an champion chhan a ni lawi si a,Pu Mawia leh a team te chuan Pu Thanga leh a team te chu an nuihzat ang reng hle a,Bawng bo pawh chu zawnpui an tum lo hle.

Pu Thanga chuan a Bawng chu an ko lauh lauh țhin a,a reh vang vang mai, reife an vahkual hnu pawh chuan an hnuzolo a, beidawngin an kir a, alo haw ve leh mai an beisei bawk a,

Kar khat zet hnuah chuan an World Cup Champion trophy pawh a rawn haw ve leh hlawl mai a. Pu Thanga leh a team te chu in au khawmin Bawngpa chal an champion lawmman ngei mai chu an talh ta hlim takin An champion chu an lawm thei ta e…Tawp tawh mai rawh se..

(Keipawn ka awi bik miahlo a nia aw hihi)

Ka lawm e…

Advertisements
Aside | Posted on by | Tagged , | Leave a comment

Mizo Keyboard- Mizo ṬBoard v2.0b download rawh le.

Mizo ṬBoard ( ℳizo Ṭℬoard v2.0b) chu peih fel a ni leh ta.
Hetah hian a hmaa awmsa te tihdanglam nual a ni a. Hman a nawm zawk nan default setting pawh thlak a ni.

image

Google Drive aṭangin DOWNLOAD RAWH LE

image

  1. Option ṭhenkhat – word sugestion leh prediction off sa. I phone ah a in on chuan setting- Text prediction ah lut la, back leh nghal la, a bo mai ang.
  2. Prediction on a i key hmeh a, \\ lang ṭhin paih a ni.
  3. Q key ah popup dinglam ber kha blank space a ni a. Whatsapp, fb, etc blank comment or status atan a hman theih.
    A awmzia chu “sawi tur ka nei lo, ka tuai-thi-hul ṭhak” tihna a ni e. 👅
  4. Code ka upgrade hret
  5. Smiley erawh ka dah belh dik thei lova, a crash tlat.
  6. Dictionary awmsa ka paih vek a. Suggestion leh prediction pawh off sa a ni. On buai duh suh, a Crash mai mai. English Dictionary download na lo lang ang a, i mamawh viau loh chuan Aih hmeh tur.
    Next update ah mizo dictionary telh tum a ni e.
  7. Popup key ṭhenkhat hi android 6 hnuailamin a millo nual.
  8. Default theme hi ka siam a ni a, a danga i thlak chuan a ngaiah a awmtir theih tawh loh mai thei.
  9. 123 key kha long press in setting ah a lut.
  10. Line thar siamna kha long press la, smiley a lo lang ṭeuh ang.
  11. India rupees sign D key ah a awm.
  12. T key ah pop-up turin dah tho a ni a. Hei hi a chhan chu ṭhenkhat hian language hrang 3/4 an thlan ṭhin vang a ni. Ṭawng 2 thlan chuan awmna ah language select key a awm ṭhin.
  13. Facebook group- Mizo Internet Bazar ah a file hi kan upload bawk.
  14. A file hi a te a, 2.5mb lek a ni e.

MIZO ṬBOARD DOWNLOAD RAWH LE (Google Drive)

• Request leh suggestion nei tan 8414893666 ah min lo contact dawn nia.

Mizo ṬBoard hman nuam ule.

Posted in Technology, Zoram History | Tagged , | 3 Comments

KHAWVEL HEROIN (NO.4) ZAWRHNA MARKET THUNUN FAI DEUH VEKTU HEROIN LALPA KHUN SA

Heroin hi enge ni? Kâni (opium) chu kan hriat țheuh a rinawm. Kâni kung hi French anțam dâwng tak, paw phuk nên hian a inang êm êm a, Mizopa tam tak chuan an bai châwk reng a. A hnah hi chu a ruih theih loha, chawhmeh a tâna tui angreng tak a ni.

A chi hi chhawhchhi nen a inang deuh roh a, hâng tui tak a ni. A rah chu kâwlthei rah ang lek lek, tuibûr lû ang ve tak a ni a, a rah sîr hi blade-in an rîn a, chu an rînna hmuamhma a țang chuan a hnâi a rawn chhuak țiam țiam a, chu a hnâi chu Kâni hring (No. 1) an ti mai țhin. Chu Kâni (No.1) chu chhâwng 4-in an siam fîr ta a, chutia a fîr hlang, a phuta lo chang ta chu Heroin an tih, keinin No.4 kan tih hi a ni ta a ni.

A tîrin Asia khawmualpuiah hian Kâni kung reng reng a awm lo. Sâpho khan an rawn la lut a, kan leilung ngeiah an chîng ta a. China phei chu Kâni ngaiah an chhuah zo hman țhelh a. China Sawrkar lungawi lo chuan Sâp (British) ho nen indo an puang ta hial a. Anglo-Chinese War an tih mai Opium war a lo chhuah phah ta hial a nih kha. Chu Kâni a țanga siam heroin chu khawvêl țhalaite ei chhetu a ni ta mêk a ni. Kan thupuiah lut ta zawk ila.

Khawvêl Cocaine Lalpa an tih mai Pablo Escobar dawtah chuan Myanmar mi Heroin Lalpa Khun Sa hian hûvâng a ngah ber hial awm e.

Thawkkhat lai khan khawvel market-a heroin 80% zet chu Myanmar, Thailand leh Laos ram thum inrîna Golden Triangle a țanga siam chhuah leh thawn chhuah a ni a, he Golden Triangle hi Khun Sa-a awpna hnuaia awm a ni.
An heroin siam chhuah reng reng hi 90%-a fîr (pure) a nih a vangin khawvelah a țha bera ngaih a ni. Khun Sa-a heroin thawn chhuahte hian New York te pawh a thleng hial a, America Sawrkar pawhin $ maktaduaih 2 laiin a lu an zuar (wanted) hial a nih kha. He Heroin Lalpa Khun Sa-a Chinese hming chu Chang Chi-Fu a ni.

US Ambassador to Thailand His Excellency William Brown phei chuan Khûn Sa-a hi “Sual Tirhkoh, Khawvêl Hmêlma Lian Ber” a tih hial thu Bangkok Post leh The New Light of Myanmar-ten an ziah chuai chuai kha. Shan Military Dictator tia koh pawh a hlawh a, sipai bil 15000 chuang țêțâw a nei a, Golden Triangle Lalpa tia koh a hlawh bawk. Amah hi Shan-Chinese thlah pawlh a ni a,
February 17, 1934 khân Chinese pa Khun Ai (Zhang Bingyao) leh Shan nu Nang Sheng Zoom-i te nupa karah a lo piang a, a tlangval lai chuan Kuomintang kan tih China a țanga hnungtawlha Taiwan ram dintute sipaiah hian a țang a, khatia Koumintang-ho an hnungtawlh khân sipai za tên nên mahnia Army dinin kawhmawh bawlin a châmbâng ta a.
A sipaite chu 1963 kum khan Burma Sawrkar hnuaia Loimaw Defence group angin a dinpui ta a. Burma Sawrkar țanpuina dawngin Shan State Army-te a bei țhin a, a lo chak deuh deuh hnu chuan Burma Sawrkar nen an inlaichinna chhu chatin Shan leh Wa ram vêlah Heroin a siam chhuak țan ta a ni.

Khun Sa-a ropui vanglai kha chuan USA, Indiana State-a leiletpa ni bawk, CIA agent ni bawk Edgar Buell-a te meuh pawhin Shan ram Kâni hmuna rawn kalin thlai chin dan a rawn zirtir hial a, mahse, Kâni chînnaah chuan a inhnamhnawih lo nia hriat a ni.

Khatih laia Khun Sa-a el ber chu Chinese Nationalist Narcotics Trader General Lee Wun Huang kha a ni. Kha pa khan huvang a ngah khawp a, USA, Virginia State, Langlay-a CIA Head Quarters thlengin a ban pha a nih hial kha.

1974 a țanga 1988 chhung khan Ruihhlo nuai bo nan tiin USA chuan $mtd 81 zetin Burma Sawrkar a țanpui hial a. Mahse, a tirah Burma leilung a țanga ruihhlo metric ton 600 siam chhuak țhin khan a bin tawpin an siam chhuah belh deuh deuh a, metric ton 1200 lai an siam chhuak ta mai a nih kha.

1992 khan metric ton 2300, 1994 khan metric ton 2600 an siam chhuak ta deuh deuh a. Chuvangin, ruihhlo siam chhuah tam lamah Burma chu Afghanistan dawta “Ber” a kai ta a ni.

1969 khan Khun Sa-a hi Burma-in an man a. Khun Sa-a major Charlie Win-a’n Burma Sawrkarin Taungyi Sad-san-htun hospital-a an chhawr mek Russian doctor 2 a lo man ve ta si a, mi man leh mi man an inpawih fei thleng ta a, 1973 kumah Khun Sa-a chu a zalen leh ta a ni. Heroin siam hna an chhunzawm leh ta a, 1976 kha chuan Thailand hmar lamah an inbun nghet hman fe a ni.

Khun Sa-a chu a lo chak deuh deuh a, kum 33 mi a nih meuh chuan CIA rinrãwl leh Heroin Market thunun tlattu Kuomintang General Lee Wun Huang-a a cho ta rap mai. Lee hi USA-ah a zual ko a, USA ruihhlo do pawl DEA, CIA leh Thailand sipai țangrualin Khun Sa-a te chu an phîn nghek mai a.

Thi leh hliam tam lutuk lo mahse inkahna pui tham tak chu a ni. Khun Sa-a chuan kawng dang a dap a, Chiangmai-a General Lee Wun Huang-a chênna, chamber 40 zet nei, ral ven buk ang maia sak chu TNT ton 2 vêl phur truck-in a bomb hmiah mai a ni. Hei lo pawh hi ruihhlo chungchanga Khun Sa-a leh Lou Sit Han-a inkar thu sawi tham fe a awm a, chu lam chu sawi lo mai ila a țha ang e.

Heroin siam chhuah hna a rawn hlawhtlin tak tak hnuah chuan Khun Sa-a’n a sipaite chu Shan United Army tiin an hming a thlak danglam a, Shan hnam lama țangin Burma Sawrkar a do ta a ni.

1985 kumah chuan Sad Kun Sing @ Moe Hein Oo-a Shan Revolutionary Council nên insuihkhawmin Shan State (a bik takin) chhak lam zâr, Kayah State ramrî thlengin an kutah an dah thei ta a. An sipai infinkhawmte chu Mong Tai Army tih hming an vuah leh a, Golden Triangle Area-ah heroin an han siam chhuak tak tak ta mai a, Heroin Lalpa Khun Sa-a tih hming a chher ta a, khawvelah hre lo a ram an awm ta lo hial a ni.

Sipai 15000 vel chauh nei mahse Khun Sa-a hian a sipaite chu ralthuam țha ber berin a thuam a, an heroin siam chhuah lah (kan sawi tawh angin) 90%-a fïr a ni a, khawvelah a țha lawr lak a, World Heroin Market 80% zet chu an thunun thei ta a ni.

Khun Sa-a lar zia chu Holly Wood film hlawhtling lutuk “American Gangster” te kha amah beh chhan deuha an chan a ni a. “American Gangster” film kha USA-a ruihhlo theh darh pawl, Mafia gang ang deuh a chêt la ho hruaitu chungchang thu dik behchhana chan a ni. Film star hmingthang “Denzel Washiton” leh “Ressell Crowe” te hial pawh an tel a, kha film kha a hit vet vet hle a nih kh.
. Ruihhlo theh darhtu gang hruaitu “Frank Lucas”-a’n heroin lei tura Khun Sa-a a han dawr lai angte a tel kha. Kha film-ah khan Khun Sa-a tia ko lovin “Chinese General” an ti a nih kha. Wikipeida-a i en chuan Khun Sa-a lemah “Ric Young”-a a chang tih i hmu ngei ang.

Khun Sa-a chu a lo upat ve deuh tak a vangin 1996 kum khan Burma Sawrkar hnenah ralthuam leh remna thleng turin a inpuahchah țan ta a. Khatih hun laia he lam thila mawhphurhna latu chu Lieutenant General Khin Nyunt a nih kha. Thailand, Chiangmai-a inbiak an rel thlu hmasa na chu Chiangmai boruak a buarchuar lu deuh a vangin Burma ram, Ta-chi-leik ah an inbe ta zawk a ni. Khun Sa-a Camp awmna kha Thailand ramri a ni a, Burma-in a do duh pawhin Infantry chauh a beih theih a ni a, chuvangin, an nuai bo thei ta lo niin a lang. Laipuia an kah lah chuan Laipui mu Thailand-ah a tla a, Thlawhnaa an bomb pawhin chuti tho a nih vang niin a lang.

Khun Sa-a hi USA-in a lu $mtd 2 meuha an zawrh a ni a, a han in surrender chiah chu USA-in Burma Sawrkar hnenah Khun Sa-a chu an kuta hlan turin an dil ta nghal chat a. Ram pahnih thuthlung ziah fel thil a nih loh a vangin an hlan ta lo a ni.

Ralthuam leh remna a thleng hnu chuan Khun Sa-a chuan Yangon khawpuiah awmhmun a bêngbel ta a. Yangon, Mandalay, Taungyi-ah te sumdawnna hmunpui a nei ta țeuh mai a. A tawpah zawng sum eng zat pawh nei se “Mihring tan vawi khat thih ruat” chu pumpelh thei bik lovin Yangon khawpuiah chatuan ram a pan ve ta a. A thih hian kum 73 mi a ni a, North Okkalapa, Yay-way thlanmualah phûm a ni ve ta a. A hausakna eng zat chiah nge a nih hriat chhuah phak rual a ni lo.

Posted in Hriatzauna, Thu Ngaihnawm | Tagged , , | Leave a comment

A HMUN LOVA BAWLHHLAWH SAWNGBAWL THINTE HMUNHMA AMC IN AN THIAH SAK – by Vanneihthanga Vanchhawng

Aizawl Municipal Corporation chuan 1 Nov chhun khan Zemabawk leh Tuirial inkar kawngpui sira dan lova sum chang thei bawlhhlawh hralhna hmun an thiah sak. 

AMC chuan khawpui sira heng sumchang thei bawlhhlawh zawrhna dan lova siam te hi nikum 2016 July thla atang khan hriattirna pein ti tawp turin hriattirna an lo pe tawh a. Kumin March thla khan bawlhhlawh paihna (dumping ground) bulah a hralhna bik siamin hemi baka hmun danga hralh khap a nih thu kumin April thla khan hroattirna a lo chhuah tawh a ni.

Dan lova thil zuar te hian khapna thupek hi an zawm loh avang leh hemi avanga kawngpui dunga bawlhhlawh tam tak awm thin chu ngaimawhin, AMC chuan dan lova kawng sira sum chang thei bawlhhlawh zuartute hi kumin October ni 16 khan lehkha an pe nawn leh a, ni 15 hun pein heimi chhunga dan pawisalote chu an hnathawhna hmun thiah vek a nih tur thu leh thupek zawm lo te chu an chungah ‘The Mizoram Municipalities Act, 2007 Sec 153 A’ anga action lak a nih tur thu an hriattir leh bawk a ni. He hriattirna an pek hnua thupek pawisa lote chu vawiin khan AMC staff te chuan an hmunhma an thiah sak ta a ni.

AMC hotute chuan The Mizoram Municipalities Act 2007 in a sawi anga, a paihna tur hmun bik ruat ni lova bawlhhlawh paih leh hetianga sawngbawl hi khap tlat a nih thu an sawi a, dan pawisa lova ti luite chu dang anga hremna pek zel an nih tur thu an sawi.

Source : LPS News

Posted in Zoram History | Tagged , | Leave a comment

YMA CONFERENCE NEIH ZAWH TAKAH PALAI RIAK LUT MI 3309 AN AWM – by Vanneihthanga Vanchhawng

1st November, 2017 Vawiin chawhnu dar 2 khan Central YMA hnuaia Central Executive Committee (CEC) meeting chu Central YMA Committee room Tuikhuahtlangah neih a ni.

CEC meeting hi Central YMA President Pu Vanlalruatan a kaihruai a, Gen. Secy. Tv Lalhmachhuana hnen atangin report ngaihthlak a ni. Meetingah hian YMA GEneral Conference vawi 71 October ni 17 atanga ni 19in kar chhunga Champhai, Zotlanga hman zawh tak thlirletna neih a ni.

Meetingah hian kum 2 chhung atana Central YMA CEC member atan a ruat thar mi 20 te bakah CEC tho kumkhat term a tana ruat Sub Commtt. hrang hrang puipa te an tel tha hle.

General Conf. Review Meeting-a tarlan danin YMA General Conf. neih zawh takah khan chhinchhiah theih chinah palai riak lut mi 3309 an awm a, lehlang leh kal leh in report lo tamtham tak an awm bawk niin hriat a ni.

Conf. chhung khan malzai mi 69, zaipawl 27, lemchan vawi 6, Group leh Live band vawi 8, Hnam lam vawi 6, thusawi vawi 15 a awm. Lawm man chi hrang hrang tum riat sem chhuah a ni.

Mawhphurhna hrang hrang nei turin Central YMA in Direct-a a awp branch branch 32 te,  Sub. Hqrs. 5 leh Group 16 atang te-a ruat an ni.

Central YMA CEC meeting chuan YMA Gen. Conf. vawi 71 hneh taka thlengtu Zotlang Branch YMA leh conference palai te chungah lawmthu an sawi a ni.

Posted in Zoram History | Tagged , , | Leave a comment

Champhai ah Heroin Hawng thum (3) man a ni

Champhai Police duty-te chuan vawiin khan Champhai Ruantlang daiah Heroin Hawng thum (3) an man bakah nizan khan Champhai Khankawn

Police Check Gate-ah Heroin Cane thum (3) an man bawk.

Champhai Police hotute hnen atanga thu dawn danin Myanmar atanga lakluh vawiin a man tak Heroin Hawng hi Zokhawthar atanga Champhai

Service Maxicab a chuangte ta niin,  Rodingliani kum 47 , Lianvula Khawmawi (Myanmar) nupui ni a insawi kut atangin Heroin Hawng hnih man a ni

a.  Heroin Hawng khat hi Malsawmsanga kum 19 Lalhlimpuia Thenzawl bul Zote khua fapa ,  tuna Aizawl Chanmari West a cheng mek ni a insawi hnen atanga man a ni thung.

Nizan khan Champhai Khankawn Police Check Gate a duty-te chuan Thangtinkhuma kum 31 , J. Lalhluna Vanzau khua fapa,  tuna Aizawl Chanmari a cheng mek ni a insawi hnen atangin Heroin Cane 3 an man bawk a.  Police hotute sawi danin,  Thangtinkhuma hian Police te hnenah a fanu ICU-ah a awm mek vanga rang taka Aizawl thlen thlakna tur motor ngaihtuah sak turin a ngen a.  Thu an zawh chian zelna-ah dawt a sawi tih hmuhchhuah anih bakah amah hi ruihhlo ngai niin, a kut atang hian Heroin Cane 3 hi an man ta zawk a ni.

Ruihhlo neitu a puh mi pathum te hi Champhai Police Statation-ah ND & PS Act tlawh chhana thubuai siamsak an ni a.  Vawiin khan District Court a hruai annih hnu-ah Champhai District Jail-ah dahluh nghal an ni.  Ruihhlo man hllut zawng hi tualchhung hralhna a chhutin Cheng Nuai khat/singnga/sangli) man a ni.

Posted in Zoram Crimes and Accidents | Tagged , | Leave a comment

THLARAU PHUBA CHU!

“Manun… manun, awii amak emai ka duh theilo” ti a ka țhiannu țap râwih rawih bulah chuan ngawireng in ka ding a, țah hla chham tur ka hre ve lo a ka hah ani. Ka thinlung chhungril ber ah chuan inthiam lohna te, lainatna leh hmangaihna dawihzep tak te chuan min tuam hlup hlup a, ka mittui erawh a hul hlauh thung.

KUM HNIH LIAM TA KHAN..

Ani hi ka hmangaih ber ani ţhin, mipa zaidam leh cool zet, fapa mal duat sual hleihtheih loh ani a nula te star rawn ani. Mahse kan inkawp lai khan ka hlim ngailo, a chhungten min duh miau lo a! A farnu te mitmeng râng vel leh anu țawngkam dengkhâwng zet zet te chuan kei mi luhlul leh ngawltawt thinlung chu an ti hel ta nge nge a, Manuna’n “min țhen lo hram rawh, nghak ila an la hrethiam ve mai ang” atih pawh chu bengkhawn duhlo in ka kal lui ta kha ani a.. Nie, kei hi ka pa fanu ka nih chhung chuan min duhlo a min haw em em tu te inchhung ah hian lawi luh ka tum tlat lo ani!

Amah mai nilo an chhungkua chuan ka elhsên ta ani ber a, ngaihzawng neiin a langsar thei ang ber in ka khawsak khum a, Manuna chu nitin ka hliam a a chhungte erawh an hlawhtling viau. Ka bialpa lah chu naupang chhia ani tawh silo a, hna nghet nei hi ani roh lehnghal a inneih a sawi fo pawh a demawm hran lo. Mi hmuh a kut inkai kher a kal te hi a nuam tih zâwng ani a, Manuna kha chuan midang hma a in ‘chu ê kha’ vel viau kha a duh ngailo. Kum khat a liam a, ka bialpa nen chuan innei tur kanni ta dêr a, ka thinlung chu a inpeih em ka hrelo a ka chhungte leh midang thu chu ka awih mai a, duhsaktu lah ka ngah narawh! Mahse.. Manuna kha, hmana Manuna kha ala ni reng a, ka țhiannu min hrilh dan ah a rilru ana takzet a class pawh akal duh tawh lo tih ka hria. Chu chuan min ti hnual rawih a kir leh erawh ka tumlo bur.

Ka pasal neihna tur chu ni hnih chiah in a dang ta, mu tura ka pindan lam ka pan mêk lai chuan ka țhiani (Angaihi) lo leng haw tawh chu hmanhmawh takin a rawn tlan kir leh a, phâwk zet a min en in a thaw hlawp hlawp a, kei chuan thil awmzia ka lo zawt sawk sawk a.. Ka chhungte pawh chuan a chhânna nghâkin an en țhap bawk a. Min en kual he haw hnu chuan “Ih.. Manuna kha a inawkhlum an ti, tun deuh lawk khan” ati ta mai a! Chu thu hriat chu ka beisei lo a ami den dan ava dang êm.. heihi Manuna’n kei leh khawvel a chhuahsan dan chu ani.

Mithi in ațanga kan haw chu ka pindan ah ngawireng in ka țhu a, reilotê ah ka pasal tur inpe zo tak chu a rawn lut a, ka hmel leh mitmeng ah chuan thil tamtak a chhiar thiam a nuam ati chiah lo tih ka hria, nui lui in thildang min sawipui a, keipawh in ka landan chu tih danglam hram ka tum bawk a, mahse lemchang ve ve a inkawm chu nuam mawlh heklo le min hawsan ta thuai a!

Manuna khan eng lehkha mah a hnutchhiah lo a, mahse kar hmasa mai a ka bula a thusawi kha atawk em em ani. Ka nau nen a kan bazar haw chu min biak lawk a duh thu sawiin kawngsir ah min lo nghak a, ka dâr lehlam lehlam ah vuan in a heh a pet fan fan a, “Ka hmangaihna che avang tal pawh hian i rawn kir leh hi ka ring țhin a.. mahse, tunah chuan pasal inei dawn tiraw.. i rawn kir tawh dawnlo” hriat harsa khawpin a phun sep sep a, a ngawih vang vang hnu ah “keipawh ka kalbo hlen tawh ang, ka nghak tawhlo che anga ka na tawh heklo ang” ati anih kha maw..
Kha thu a sawi lai khan khawvel a mipa huaisen leh mipa diktak ni a ka ngaih Manuna mit ațang chuan mittui a rawn tla a, mihring țap a zawng a hmuh hreawm ber ani!

Sawitur chu ka nei ve a, ka hnêm ve duh. Mahse țawng chhuak turin chakna ka neilo a, ka mittui tling khat vek chu a hmuh loh nan hnuailam ka bih tlat zawk ani. Ka hnung ah chuan a bêng thek thek a “țha takin aw..” tiin min kalsan ta a nihkha..

Ka thinlung tawt leh pik lutuk chu a puakkeh ta niber in ka hria, ka lukham ah chuan ka hmai ka phûm a chhuak em em in ka țap ta hawm hawm a.. ani kha ka hmangaih loh mihring pawh ani bik hleinem, a chhungte ka hrem emaw tiin amah kha nitin ka nghaisa a, ka hlimna duh in a ngawireng a, a tlin loh tâwp ah kumkhua atan min kalsan ani.. min tibuai tawh ngailo turin min kalsan a, ka va hlim phah chuang silo em!

Ka muhil lai chu ka harh hlawl a, zinglam dar2:22 ani. Ka mutna bula kal thlarh thlarh chu ka nau anih ring in “mam..” ka han ti a, kal ri chu a reh daih a min chhanglo bawk. Light ka off vek țhin avangin engmah mumal in a hmuh theih loh a, hlauhna êm em pawh ka neilo. Muthilh leh tum chuan ka inlukhup a, mahse ka thosilen chhung ah chuan awm ve an awm tih ka hre tlat a, hlauhna mak tak chuan mi țhíng nghal bawk. Ka phone chu ka dap rawk rawk a, ti êng in ka khum vel chu ka ên a engmah ka hmulo.

Ka mutchhuak lutuk chu ka muhil zui leh mai a, ka mumang ah chuan…

Hnimhnawk leh pik zet hmunah chuan ka lo ding a, a ngaihna hrelo zet a ka hawikual ruai lai chuan ka bula hnimpik chu a rawn che dut dut a, ka en reng lai chuan muhring taksa a rawn lang a, a rawn lang zel a Manuna ngei kha ani. Thawmhnaw a inbello a, a taksa chu a chêr in a dawldâng hle a, a mitkhur thúk tak ațang chuan min rawn melh a ahmui duk chur chu a phun pui nuah nuah bawk a, ka țê tuarh a ahmel landan chu a ngainatawm hlawllo ani. Chutianga phun sup sup chung chuan reifê min melh a, a sawi ka hrethei lo a tlanchhiat ka tum a ka che thei heklo. Țap țuau chung chuan a awmdan chu ka en reng a, a kut chu a ti che țual țual a ka lam a rawn phar in ring leh vin takin ka hming pum chuan min au tuarh a, ka harh ta.. ka khum ah chuan thaw hlawp hlawp in ka țhu chhuak hlawl a, khua alo var uar tawh avang chuan ka thaw huai thung.

Manuna thihna avang chuan kan inneih ni pawh kan sawn hla a, thaw khat chu a veng e. Mahse ka nun chu a nuam ta hauhlo, ka kalna apiang ah chuan min zui a min thlir reng tu awm tlat a hriatna ka nei a, midang ka bula an awmloh lai phei chuan min hnaih hle țhin! Tumah ka hrilh duh silo a ka tuar ngawt ngawt a, zantin chuan mumang rapthlak pui puiin min kaiharh a, ka harh pawhin ka room chu awm ve an awm tih hriat takin thâwm danglam tak tak ka hre zui țhin. Ka chaw ei atui lo a ka mu tlem hle a, ka hmel pawh a mawilo in ka chhungte leh ka pasal tur ngaih pawh a țhalo hial a, mahse engmah ka sawi duh chuang lo.

Tukverh bulah chuan țhu in parda chu ka keu a, thla êng no nghulh chu tukverh darthlalang ațang chuan ka thlir a.. Ka nunkawng mak tak leh ka hun tawn mek te chu ka ngaihtuah neuh neuh a, chutih lai chuan tukverh kalhna chu arawn ri rawk a, ka hmuh lai reng chuan zawimuang in a inhawng riai riai a, thlifim vawt tak a rawn tleh lut seng seng bawk a.. hlau ru tak chungin tukverh chu ka kalh nghal sawk sawk a, mahse ka pindan chhung ah chuan keimah chauhin ka awm leh ta lo! Ka phone chu a rawn ri a ka phuzawk nghe nghe, ka nau chuan “U.. ka au che a min chhang bawk silo, hei Puii te inah a note hawh turin ka kal lawk ania” a rawn ti a, Lalmami mai mai chu a awm ve reng emaw ka ti a ka nu te damlo kan in an chhuak daih bawk si.. hlauhna chuan mi rawn man țan a!

Sitting room lam a Tv en tuma ka room ka chhuahsan dawn laitak chuan ka hnung lamah chuan zawi tak leh fiah em em si hian ka hming in min rawn ko a, ka ding chawt a ka tukhum chu a za nghal chuai chuai a, ka lehhawi thut a tumah ka hmulo. Inti paukhauh in ka khum ah chuan ka țhu a, “Manun.. nangmah tiraw? min be duh anih chuan țha takin rawn inlan rawh, min hmangaih ani lawm ni engah nge hreawm leh thlabar taka min siam reng?” ka ti ve ta a, a rawn inlan tak tak ang tih erawh ka hlau ru hle! Reilote a reh dak hnu chuan ka khum ka țhutna bul chiah chu a ri țhek a, a khuar dawk a, ka room kiltin ațang chuan ka hming lam hlir chuan an phun ta nuah nuah mai a! Kei chu ka khawng vek ni maiin ka hria, ka nghawng hnunglam ah chuan kut vawt em em hian mi rawn khawih a, ka ťê tuarh a engmah ka hre zuilo.

Ka harh leh chuan ka chhungte leh ka pasal tur (Biaka) te chuan min lo bial laih a, ka thawmhnaw leh ka sam a huh phung danah tui min leih tih ka hre mai. Ka nu chuan chiang takin min en a, “Mate tunlai i awmdan hi enge maw a awmzia le? I harsatna min hrilh duh bawk silo, hei Biaktea te pawh iti mangang a keini pawh ipa nen kan rilru iti hah takzet ani. I hlim lo hmel hmuh reng hi hreawm kan ti ani” ati charh charh a, an vai chuan zawhna nei mutmeng in min melh hlawm a, kei chuan “Nu.. engmah chutiang a awmlo, mumang hlauhawm deuh ka lo nei a chuvang chu niang.. thisen ka nei tlem te pawh ani maithei” ti a zangkhai taka ka chhân tâkah chuan an ngaih pawh a țha leh deuhin ka hria. A tuk ah chuan Biaka nen Doctor hmu turin kan kal nghal a, mahse engkim a țha vek.

Haw lam chuan chhunchaw kan ei dun a, Biaka chuan ka mit ah tak min en in “Zualte.. hetianga i awm nachhan hi Manuna vang kha tiraw? Engmah zêp suh ka thinrim miahlo ang” ngilnei takin ati a, chu veleh ka thinlung ah chuan ka room a phun sup sup ri bawk chu a rawn ri a, ka hming, Manuna hming leh Biaka hming chu lam chhawkin a phun bul bul a, midang chu ka melh kual a tumah hre âwm in an awmlo. Ka tan erawh a ring em em si a.. ka beng chu hupin ka mit ka chhing a, Biaka chuan mi rawn pan vat in “engatinge.. i lu ahai em ni? Haw mai ang aw..” tiin min kuah chhuak a, motor ah chuan min țhuttir in min phur haw ta nghal a.

Ka awmdan chu khawtlang in an la hre thuai anga, mi â a min chhuah loh vêk chuan ‘Manuna thlahrang in an tibuai’ an ti ngei ngei dawn. A thlarau chu ka lainat a, chutianga tlangthan tir chu ka duhlo, chuvangin keimah ngeiin ka tih reh a ngai ani.

Mami chu an exam dawn avang in hostel ah a lut a, Biaka haw hnu chuan ka nu leh pa te chuan ka muthilh nghakin min awmpui a, tui taka mu ang in ka muhil der tlat a an room lamah min kalsan ta a. Khum ah chuan ka țhu a, han tih ngaihna tak pawh chu a vâng angreng hle.. Manuna thlarau chu ka ko tawp mai dawn em ni? ti a ka in ngaihtuah lai chuan ka khum hnuaiah chuan thil ri deuh țâwp țâwp ri chu ka hria a, ka phone chhi êng in ka zu bih thuai a.. ka va phu chiang kher em! Manuna ngei mai kha, a nghâwng a hrui in thlung chungin ka khumhnuai ah chuan alo mu zar a, a thi tur hmel chalchâng vel pawh chiang takin ka zuk hmu ani. Ka khum ah chuan ka țhu khur zawih zawih a, nasa taka tâl leh inleng vel thâwm chu ngaithla duhlo in ka beng ka hup a.. mahse ka thinlung ah bawk chuan chiang em em hian “Ka thi ta..” tiin a rawn phun leh sup a! Ka huaisenna zawng zawng sawmkhawm in ka țawngchhuak ve ta, “Manun.. ka chungah phuba ila duh anih pawhin a tawk tawh viau lawm ni? Min hmangaih a ka hlimna duh in min kalsan ani lawm ni? Engatinge hetiang thil hi ka chungah i tih? Khawngaihin min kalsan tawh rawh…” ka aw chu a khur dawt dawt a, ka sawi zawh rual chuan ka room kil tin ah chuan lungngaia rûm thâwm a ri leh nuah nuah a, ka mangang leh thawpik lutuk chu ka beng hupin ka au tuarh tuarh a, Ka nu leh pa an rawn tlan lut nghal bawk.

Thawm chu a reh nghal țhuap a, ka pa chuan țawngțaina te neiin an pahnih chuan min mutpui nghal a, ka thla a muang ta deuh bawk a ka muhil ve ta siai siai a..

Ka mumang ah chuan amah bawk chu ka hmu leh a, hlauhawm hmel apu tawhlo a hlim hmel pawh apu chuanglo. A damlai a kan inhmuhna hmunah ngei khan ani. Ka kut chu a chelh a “Min ngaidam rawh aw.. Khang zawng zawng kha tawrh i phû ve rêng ani tiin i lakah phuba lâk nan ka hmang a, mahse i hlimlo hmel hi ka hmu thei tawhlo ani. Hlim takin pasal chu nei la, kei chu ka damchhung leh ka thih hnu thlenga hreawm a siamtu che misual ka nih hi, pialral ah pawh min rawn zawng suh aw.. ka kalbo hlen tawh ange” tiin ka kut vawnna chu a thlah a, “ngawirawh manun…” ka ti hman chiah a aral ta riai riai a!

Țap hlawp hlawp in ka harh a ka nu chuan min kuah hle hle a, ka nu âwm a ka hmai phûm tlat chung chuan “Nu…pasal ka nei duhlo” ka ti ta thlâwt a, ka rilru hrethiam takin ka sam ah chuan a chûl heuh heuh a!

Hmangaihna hi pakhat tan chauh ani.. Ka hmangaihna neih ve kha, amah Manuna tan chauh khan ani tih ka hria a, thih thlenga min hmangaih a ka tan a tuar ral țhak tu kha kei hian hlim takin pasal ka neihsan theilo ani.

Chumi ni ațang chuan eng thâwm mah awm zui tawhlo in engkim mai chu a reh zui tlawk tlawk a, ka khua te chu a har letling a, pangpar tharlâm leh mawi tak tak keng in a thlân chu ka tlawh ta fo zâwk a..

THUBELH; Eng anga mi chak leh huaisen pawh nise, tu thinlung mah hi infiam nân a hmantlak tak tak a awmlo. Hmangaihtu che chu zah la, a hmangaihna che chu hmusit ngai suh. Chuti lo zawng, na takin ala vawlêt ve palh ang che! 😊❤

Author :

Posted in Fiction, Thu Ngaihnawm | Tagged | Leave a comment

MIZO CARBON VERSUS CBI ( Central Bureau of Investigation )

A. BACKGROUND : Nimin ah Gauhati High Court , Aizawl Bench ah Pi Vanramchhuangi PIL ( Public Interest Litigation) chu ngaihtuahin a dilna ( Prayer) angin Mizo Carbon Private Limited in Sawrkar sum tam tak diklo taka a lak ruk nia hriat chu Mizoram Anti Corruption Branch ni mai lo deuh Central sawrkar ui-sathiam , CBI ( Central Bureau of Investigation) in chhuichhuak tura Order pe turin a ngen kha ani a. Pi Vanramchhuangi hian Ukil C. Lalramzauva , Senior Advocate chu a hmang a, Mizoram Sawrkar aiawhin Mizoram Advocate General a ding thung niawm tak ani.

Court proceedings ah chuan …..PIL file-tu hian CBI koh luh a ngen a, chutih lai chuan Mizoram AG hian PIL in a dil ang chiah thova CBI koh luh chu Mizoram Sawrkar-in a lo tum ve reng tho ani tih Court a hrilh hnuah chuan High Court ( Single Judge ) chuan Mizoram sawrkarin hemi thubuai chingfel tura CBI koh luh a lo tum ve mek siah chuan tun atan hrih chuan Mizoram sawrkar hian CBI ko lut turah ngai phawt mai ang u aw.. tiin thutlukna a siam ta hrih ani. Engtik chhung a koh luh tur nge tih erawh sawi chianna a awmlo niin a lang.

B. CBI ( Central Bureau of Investigation) chu tu te nge, engtia koh luh tur nge ???

CBI hi the Delhi Special Police Establishment Act 1946 hnuai a din niin Central sawrkar hnuaia Ministry of Personnel, Pension & Public Grievances a Department of Personnel ( DoP) an tih hnuai a Investigating Agency ani. CBI hian Inter State leh International khawih thil sual ( Crime) a chhui ber a. Wing ( Areas of Operations ) 3 neiin heng (1)  Anti-Corruption cases, (2) Economic Crimes leh (3) Special Crimes te hi an khawih ber thin.

Central sawrkar hian eng case ah emaw CBI hman tangkai a duh chuan chumi case awmna State sawrkar phalna chu a lak hmasak kher a ngai thin a. Marawh chu eng case ah emaw hriatthiam theih loh khawpa State sawrkar-in CBI ho chu a koh luh duh loh emaw NOC a pek duh loh luih tlat chuan High Court te, Supreme Court te hmangin State sawrkar chu ko luh tir ngei ngei tho thin.  Hetiang a High Court in State sawrkar chu CBI ko lut tur a tih tawh thinna case a tam tawh khawp mai. Hei tak hi niin a lang a, tun tum a Pi Vanramchhuangi pawhin CBI ko lut tura High Court a case a file na chhan hi.

C. CBI INRAWLHNA TUR NGAWIH NGAWIH LEH INRAWLHNA THIN TE :      
  ( English in dah ve mai ang, Mizo tawnga leh buarchuar a awm palh takin..) : 

1) Cases which are essentially against Central Govt. employees or concerning affairs of the Central Govt.
2) Cases in which the financial interests of the Central Government are involved.
3) Cases relating to the breaches of Central Laws with the enforcement of which the Government of India is mainly concerned.
4) Big cases of fraud, cheating, embezzlement and the like relating to companies in which large funds are involved and similar other cases when committed by organised gangs or professional criminals having ramifications in several States.
5) Cases having interstate and international ramifications and involving several official agencies where, from all angles, it is considered necessary that a single investigating agency should be incharge of the investigation.

NGAIHTUAH CHIANG ILA – Heng a chunga point/ areas hrang hrang te khi kan bihchian chuan points 2 ( Central sum ngawih ngawih CTS, CCIS tih chingpen case ) , 4 & 5 te avang ringawt pawh hian tu’n emaw  Central Sawrkar a concerned department hnenah in SUM / PAI mipuite tana in rawn hman tum kha Mizoram sawrkar-in a lo hmang sual ( diverted/ abused ) tiin complaint zuk theih thla zeuh tawh thin se…. Central sawrkar zawkin an SUM/ PAI tih chingpen dan chhuichhuak turin CBI hi an rawn tir zung zung tawh mai awm amng e…inti ve lo maw ??? Mizo Carbon case pawh hi Economic Offence lian turu buru lutuk anih hmel tlat mai. Mizoram a sawrkar hmalakna reng reng hi State sawrkar sum a awm mang tawh si lova, Central sawrkar sum hlir ani zawk sia…. Duh hun hun ah CBI chu rawn lawr thei reng an ni zawk lo maw… ??? tih te hi lo ngaihtuah chhunzawm ve teh mah…

D. Mizoram Sawrkarin CBI hi ko lut duh ta lo tlat se : Hetia High Court hma ah meuh Mizoram sawrkarin a Advocate General kal tlanga State sawrkar-in he case ah hian CBI koh luh a tum lai mek ani e a tih tawh hnu ah pawh an la koh luh that duh loh  emaw an muanchan luih ( beyond reasonable period of time) tlat chuan Pi Vanramchuangi bawk hian High Court hnenah …. Ka pu, Mizoram Sawrkar khan an intiam angin  CBI chu an ko lut tha duh ta tlat lo mai, tunah chuan Mizoram sawrkar hi ka ring ngam ngang tawh lo ani, a rang thei ang ber a ko lut ngei ngei turin ka dil a che a ti ve leh heu mai dawn ani. Chutah meuh chuan HC pawhin a lo la na hle tawh anga ( Breach of trust of the Honourable HC emaw Contempt of Court ang te pawhin ), Mizoram sawrkar chuan insawi fel dan tur a nei tawh dawn lo ani. tun a lan dan ah chuan he Mizo Carbon Pvt Ltd case ah hi chuan CBI hi naktuk ah emaw tuk tuk leh ah emaw chuan koh luh hrim hrim tur ani tih a chiang.  Hemi avang tak hian Pi Vanramchuangi Advocate pawh hian Court hnen ah khan koh luh hun chhung tur kha dil ngai hranpa lovah a dah mai anih hmel.

E. MIZO CARBON PRIVATE LIMITED VE THUNG HI LE… 

Keini chuan he company chungchang ah chuan Media atangin Rs.341,65,086/-  (Cheng nuaih 341 chuang) Mizoram sawrkar sum nilovin CENTRAL SAWRKAR SUM zawk kal sual tirtu nia mite hriat ani. Chung zinga sum kawngbo zat a nih dan  chu Central Transport Subsidy(CTS) Rs.247, 74,725/- (Cheque no.263203) leh Central Capital Invesment Subsidy (CCIS) Rs.939,03,61/- (cheque no.263053), a vaiin Rs.341,65,086/- (Cheng nuai zathum sawmli pakhat, sing ruk sangnga sawm riat paruk) tih Media a rawn lang thin. NGO hrang hrang te’n an buaipui fet tawh , buaina case la chin fel loh hi ani  awm e ti ngawt mai ang. He Zo Carbon Pvt Limited company hi Pu Ravi Gulgulia leh Dr.Margaret M.Varte hminga registered a ni awm e. M/S Mizo Carbon Pvt.Ltd. hi Luangmuala Industrial Growth Centre- ah din/bun anga tarlan a ni. Tin, Meghalaya Khliehriat, km 300 a hla atangin Truck pakhatin nikhatah trip hnih atanga trip rukte lehlanga phur hman anga tarlan ani bawk. He company bonra tak hian Lungalhthei metric tone 3690 (36900000kgs) phur thleng tawh a insawiin Lungalhthei manah ringawt pawh Rs.116,84,250/- sengso angin an insawi ani awm e.

Ropui leh dangdai em em chu he kan Company hian Carbon Coke 321.26 MT an lo siam chhuak tawh bawk anih awm chu maw. Sawi tam lo ila, rilru a na lo deuh mahna…..

Author : Hriata Chhangte 

Aside | Posted on by | Tagged , | Leave a comment

Governor in sakhaw hmun te a tlawh leh kan kristianna hi by Lalmanzuala.

Nimin kha ni danglam tak a niin ka hria. Kan Governor chuan Aizawla Kohhran hrang hrang tlawh kualin an hotute thu a sawipui a. A thusawi pui ber chu, “Kristian kan nih angin kan rinnaah kan chian a ngai a, chutih rualin, sakhaw dangte kan hriat chian a, inzirtirna țha an neihte entawn kan hreh loh a ngai. Kan hriat chian loh vangin sakhaw dang vuantute nen kan inkarah inngeih lohna leh tharum thawhna a thlen phah thin a ni,” a ti a.

Kan Chief Minister thung chuan, “Hlauh tur dik tak Hindu kulmûk BJP leh Bajrang Dal-te an ni tih Congress mite’n hria ila, Kohhran leh kohhran hruaitute pawhin hlau se ka duh khawp mai,” a ti a ni.

Governor thusawi khian belh chian a dawl hle a. Sakhua a ni emaw, hnam thil a ni emaw leh kan thiltih apiangah kan nihna-a chian a ngai a. Kan nihna-a kan chian chuan buaina tam tak kan pumpelh thei nghal a ni. Hnam dang leh rinna dang neite nihna kan hriat chian pawh a pawimawh a. Chu chuan buai lohna tura kan buai țhinna ațangin min vêng thei a ni.

Kan rinna-a kan chian lohzia chu, Lal Isua zirtirna laimu, Hmangaihna, Retheite phur rit phurhpui, Thilpek/Thilphal, Tuarchhel/Dawhtheih leh “Nature” nena inrem taka awm tihte nunpui alawi nei lova, a behbâwma kan inhmang ral deuh ngawt mai țhin hian a tilang chiang a.

Hindu puithiam te, Yoga Swami tam berte hi Lal Isua ngaisang em emtu an nih te  hi hriat a hun tawh khawp mai. Sri Sri Ravi Shankar phei chuan, “If you say Jesus, you need not say Love and if you say Love, you need not say Jesus. Jesus is the embodiment of Love,” a ti tawp mai a ni. Lal Isua zirtirna laimu zawm țhat lamah phei chu kan tluk loh deuh vekte an ni e.

Mizoten Hindu/Vai-te  kan hmelhriatna kum 100 chuang zet hnu pawha Hindu/Vai-a inlet sawi tur kan la awm lo chunga Hindu hlau tura inzirtir hi a mak a. Kan Bible-in hlauh tura a sawi, dawtsawi, duham te  hlauh ahneka eizawn nan taka kan hmang hi a mak lehzual a ni e.

Mipui tana thawk tur kan Politician-ten anmahni tân zâwka duhâm taka an thawk mawlh mawlh mai hian Democracy Sawrkar kalphunga an chian lohzia a tilang chiang bawk a ni. Chu chuan hnam leh kan thiltih dangte pawha kan chian lohzia a lantir bawk.

Kan CM thusawi ve thung hi chu an tihdan pangngai tê tê bawk, tiin han ‘comment’ phawt ila, a inhmeh ang. A remchanna hun leh hmun apianga dâwt sawi mai a, a remchanna hun leh hmun dang apianga an dâwtsawi letling sawi leh mai țhin an nihzia leh dâwtsawiina a daih loh huna dâwt bawka sawi mâm leh mai țhin an nihzia a tilang a ni.

BJP(NDA) an rawn sawrkar  hlim khan an beisei aia NLUP pawisa te an rawn pêk țhat vang te pawh a ni ang a, UPA(Congress) Sawrkar aia hrawn nuam zâwk a tih thu kha a sawi mai a. Engvanga tuna Sawrkar hrawn nuam zâwk  chu “hlauh tur dik tak” ti leh ta daih nge a nih chu, amah ngei lo chuan “sawimam” theih a ni lo vang. Coconut sawhkeh te, chal hnawihsen te hlauh tur a nih loh chuan hlauh tur leh hlauh loh tur chiang taka an Manifesto-a sawi chian a ngai ang. Hindu/BJP-te hi Congress mite  leh Kohhran leh kohhran hruaitute chauh hlauh tur nge mi dangte pawhina hlauh tur, tih te pawh sawi chian law law a țha ang.

Khawvel ram tin hmun tina Chanchin Țha hrilh tura thupek dawngtute  hian hlauh nei rûn chungin engtin nge chu Chanchin Țha chu kan hrilh ang? India ram hmun hrang hranga kan Missionary-te phei chu kan ko lêt vek mai dawn em ni ang?

Kawng hrang hranga kan nihnain belh chian a dawl lohzia leh chuvanga HLAUHNA  hlira kan khat hi a pawizia, insiamthat kan mamawhzia chu Savun Kawrfual bawk hian a sawifiah ber mai a. Ka  hriat tlan viau tawh chu a ni nain hlauhna rûama min hruailûttu kan HRUAITUTE  hian an lo hriat ve atan ka han post tel leh a ni e.

  1. Hlauhna thlarauvin min man: Pathian thu chuan, “Pa-thianin hlauhna thlarau min pe lo va, thiltihtheihna leh hmangaihna leh rilru fel tak neihna thlarau min pe zâwk si a,” a ti a (II Tim. 1:7). Mizote erawh chuan, Kristian inti si hian, hlauhna thlarau hi kan chang tlat mai a, rilru fel tak nei hlei thei lo khawpin hlauhna leh chiaina hian min nang a. Kan hawina lam apiangah hian hlauhawm hian min hual khat tlat a ni.
    Mithiamten lîrnghîng kawngpuiah kan awm tih min hrilh ṭhîn a. Engtikah nge a nghîn dâwn tih sawi lâwk thei erawh chu an awm hauh lo. Englai pawha lîrnghîng na tak thleng thut thei reng a ni. Hei hi thil thar pawh a ni lo va, hetiang dinhmunah hian kan leilung hi kum maktaduai tam tak a lo awm tawh âwm e. Nimahsela, nasa takin kan insawiṭhaih thar chiam a. Lîrnghîng râpthlâk lo thlen hun tûrte pawh kan hrilhlâwk deuh thaw ta mai ṭhîn a.
    Kan ram leilung a ngheh loh êm avâng leh, a awih êm avâng hian lei min, lei tla hniam leh lei tawlh râpthlâk tak tak thleng thut thei reng a ni bawk a. Hei phei hi chu thleng thut thei mai pawh ni lovin, thleng chamchî a ni zâwk nghê nghê a.
    Mihring thilah, hnam inchîmralna kan hlau va. ILP-te hi min ṭhiahsak sela chuan, mi khawpuia vêng khat mihring zât lek kan ni si a, vai leh hnam dang lo lût hum hum sê, kan ral chu a ni nghâl mai dâwn si a, kan ti a. Sumdâwnnaah lah chuan, keini aia sum nei zâwk leh company liante an lo luh chuan kâr lovah min luah lân mai dâwn bawk si a. Mihring min chîm ral mai loh pawhin sumdâwnnaah min chîm ral chuan kan chhe tho tho dâwn si a.
    BJP kan hlau va, Hindu firfiak lam pâwl hrang hrangte kan hlau bawk a. Kan Kristianna a chêp telh telh dâwnin kan hria a. Kan zirna sikulahte Hindu lam zirtîrna a tam tulh tulh ang a, kan fate hruai bovin an awm thuai ang tih kan hlau bawk a.
    Ṭhenawm hnamte kan hlau bawk a. Mimal intihbuaina avâng mai mai pawhin buaina lian zâwk lo kâng kai ta sê, a nih loh leh kan state ramri min rawn nêk ṭhînte hi han dodâl ve deuh ta ila, Silchar vaite nên intibuai ta ila, kan châk lâkna kawng a ping ang a, rei lo têah chaw kan nghei mai dâwnin kan hria a. Kan ramri pawh kan humhalh ṭha ngam lo titih a.
    Chakma leh Bru kan hlau bawk a. Anni ram pâwn aṭanga dân lova lo lût zâwk hian min hêkin min khei reng a. Central sorkârin a ṭan zâwk zêlin kan hre bawk si a. Kan tlûk luhna ve ber tûr kan sorkâr laipui lah chu kan hlau êm êm reng mai a. Thu insual a awm chânga state dang sorkârin Central sorkâr na tak taka an beih hrâwk hrâwk lai pawhin, keini chuan, Central kan tilâwm lo palh ang a, kut kan zuk dawh leh hunah sum min pe ṭha duh lovang tih kan hlau nge ni, ṭîk pawh kan ti ngam ve ngai lo va.
    He’ngte hi mihring thil taka kan hlauh êm êmte an ni a, he’ng lo pawh hi a awm nual âwm e. Awmze nei leh chin tâwk neia hlauh dân te, awmze neia lo hmachhawn dân tûrte, a theih chin china him zâwka khawsa thei tûra inher remna lamte chu ngaihsak lutuk si lovin, hlauh lamah kan ram ṭang a. A ṭûl leh awmze nei bâk bâkin kan chiaiin kan insawiṭhaih a.
    Thlarau lamah hlei hlei hlauh kan ngah a. Ṭhenkhat chuan UID (aadhaar enrolment) te kan hlau êm êm a, tûn thlenga la inziak lût ngam lo pawh kan awm ṭeuh. Ration card hlaute pawh kan awm a. Inchhiarna hrim hrim leh number nei rêng rêng hlauh tak têa hlau pawh kan ṭhahnem khawp mai. Number chu sawi loh, ṭhenkhat chuan hming ziah rêng rêng pawh kan hlau va, fate sikul kaltîr ngam lo khawp hiala hming ziah hlaute pawh kan awm ṭhin kha.
    Khaw chhak aṭanga lung lum tûr hlau pâwl pawh kan awm a. Bible Society-te pawh ṭhenkhat chuan kan hlau va. Kohhrante pawh kan hlau êm êm. Hlau satliah mai pawh ni lova, nupa ṭâng ṭhen hial ngam khawpa kohhran hlaute pawh kan awm a ni. Sakawlh kan hlau êm êm a, thil thar engemaw hlek lo awm sê, sakawlh ni tûrah kan ngai tlat zêl mai bawk a. China râl lian tûr hlau pâwl pawh kan awm.
    Mikhual tute emaw lo kalin, eng thu pawh rawn sawi sê, hlauh tûr lam hawi a nih phawt chuan phûr takin kan awih peih zêl a. Insiam ṭhatna tûr lam a nih erawh chuan barah kan khawn êm êm pawh chu a ni hlei lâw.
    Hlauh kan ngahzia hi kan la sawi kim lo fê ang. Hlauh tûr hi kan hre thei a ni. Tuten emaw ‘chi a vâng dâwn’ an tih zeuh ringawt pawhin kan phîlî chhe nghâl mai a ni. Hlauh nei tam takin sahimna kan han zawn vêna lah chu a hnaivai thei ang reng riau leh nghâl a. Khawchhak lung lum tûr hlaute kha Champhai lamahte an la pêm chho ta deuh deuh va. Lunglêng khuaa va inkulh avânga him ta mai tûra inngai tâwk lah bo lo.
    He’ng zawng zawng hi a bul tâkah chuan, kan chhûng rilah hian fel lo, dik lo lian tak a awm tihna a ni. Hmangaihna-ah chuan huaisenna a awm ṭhîn a. Sualah chuan hlauhna a awm ṭhîn. Adama leh Evite khân, suala an han tlûk chiah khân, a hmâ zawng zawnga an hlauh ngai rêng rêng loh kha an hlau ta a, Pathian lakah hlauvin an biru ta kha a ni a. Anmahniah thil fel lo a awm avânga hlauhna bawiha tâng an ni.
    Chutiang bawkin Mizote pawh, hlauhnaa kan khat tlat mai hi, hnam dangte aia hlauhawmin min hual bîk vâng ni lovin, keimahni chhûng rilah hian hlauhnain bu a khuar vâng a ni ber. Hlauhna ûm botu chanchin ṭha hi kan la dawngsawng kim lovin, kan la chang kim lo a ni ber mai. Savun Kawrfual chanchin ṭha kha a puma ha lovin, kan pawt them a, a ṭhen a zâr kan inbel a. Kan hlauhna khuh bo zo lovin kan hâ a nih hi.

Pu Lalmanzuala hian thupui a vuah lova, a remchang awm ang kan vuah ta mai.

Aside | Posted on by | Tagged , , , | Leave a comment

Sudden Plays a Hand – 23

SUDDEN PLAYS A HAND 23 (LAST CHAPTER)
A na ti lutuk leh hlau bawk si, awmngaihna hrelo chu a pai ta țawng țawng mai a. Han din ngil leh ngial a tum chung pawh chuan a thei ta hlek lo mai a. Kham koah chuan a pai liam ta nge nge a, a țe tuarh a, chumi hnu chuan a reh ta vang vang mai a.

Sudden a chuan a lukhum chu a han pawt dak awrh a, a hmai a thlan te chu a kut chuan a han nuai thuak thuak a. Țawng ri a hre ta. Yorky, Pilch a leh midang paruk lai hi an lo awm reng tawh mai a.

“I na lo maw, Jim? I rang kher mai!” Yorky a chuan a han ti a.

“Ran a ngai em a ni. A teuh pawh min teuh ther ther kher mai!” tiin Cullin an bum a tum dan zawng zawng te chu a sawi ta vek a.

“A… hruizen a tibawlhhlawh lo a, a țha e. A khaihlum nan chuan hruizen thawh pawh ka huam teh na a,” Pilch a chuan a lo ti a.

Chutah, Mary te chu hmai dang lip lep chung chuan a rawn harh țan ve ta a, a hriat chak ber mai a pasal chanchin chu hlailuthawng deuh tak chung si hian a rawn zawt ta a.
“A na bawk viau a ni. Tunah chuan, Merker a dawrah an dah a. Midway ah doctor an awm loh avangin Rideout a mi koh an tum a ni,” tiin Yorky a chuan a lo hrilh thuai thuai a.

Doctor Bolus a intih teh poh ale… chu, pa valai tak leh cher lam deuh ngil.neih hmel tak hi a ni a. A thiamin mi pawhin an ngaina hle a ni. Chulai hmun kilkhawr a engvanga lo awm teh tlat nge a nih erawh chu tuman an hre lem lo. Hriat lah an tum bawk hek lo a ni.

Merker a dawrah mipui chu an lo pung khawm hlawm a. Drait a dinhmun hriat an chak hle vek a ni. Inchhung ațanga lo chhuak, hmel hlim lo deuh an hmuh chuan an ngai a țhalo hle hlawm mai a.

“A na hle mai. Mahse, vanneih chuan dam chhuak leh thei tur chu a ni ang le. Han lak sawn chi lah a ni si lo a, i khum chu i chang rih dawn lo a ni mai, Merker.”

An han ngawih deuh țhap hnu chuan Merker a chuan, “I thiamna ka ringhlel e tihna ni hlek loin, Doc, i tihdam chuan dollar sawmhnih ka pe ang che a, i tihdam theih loh erawh chuan nangin dollar khat min pe thung ta che,” a han ti a.

Doctor Bolis a chu a inngaihtuah nasa kher mai. Mahse, chumi hnu lawkah chuan a remti ve thei ta a. Chuveleh midang te pawh chuan an rawn thap ve ta sup sup mai a.
Merker a chuan a lo chhinchhiah vel a, a buai nasa mai a.

“Eng chen nge i thap ve ngam dawn le, Doc? Hei, an rawn ti sup sup hlawm mai si a?” a ti a.

Nui chung hian Doctor Bolus a chuan, “Van khi ka tiam chin chu a ni mai. Tin, chung pawisa la tur chuan Midway ah hian ka cham reng dawn,”tiin a lo chhang a.

Tichuan, chawlhkar hnih teh meuh mai chutiang a pawisa inthap pah chuan Drait a dinhmun thlirin Midway khaw mipui te chu an awm ta a. Merker a dawra lo kal apiang chuan Drait a dinhmun tarchhuah țhin chu an rawn enziah țhin a.

Doctor Bolus a lah chuan, “Ka theih tawp ka chhuah zel e. Ka hriat tawh zawng zawngah chuan Nurse hi a la inpe zo ber hial awm e, ka titi pui hial loh phei chuan ” a lo ti a.

Doctor Bolusa cuuan a titi pui ta ngei a. Mahse, a ni lah chuan kiansan a lo tum awzawng lo mai si a. Mahse, “A nih leh, i hriselna hian lo zo ta lo se, engtinnge i tih dawn?” Doctor in a han tih takah chuan insiamrem a, a aia doctor chu a awm duh chuan chhuah a remti thei ta țawk a.

Pawna ava chhuah chuan miten a pasal an lo ngaihven zia te chu Mary chuan a han hria a. A lawm em em mai a. Mahse, mi pakhat hian, “Ka pi, i tihdam ngei a ngai a nia.. a nunna ah sawn tangka tam tak a bet tawh a ni,” a rawn ti ta a.

Chu thu a han hriat chuan Mary chu a thin a rim tak zet a ni. Doctor hnenah chuan ava kal ta nghal a.

Mi tenawm ho, ka pasal nunna ah te pawisa lo han thap hlawm a mawle… a han ti tan tan a.

Bolus a chuan a lo hrilhfiah a, “I hrethiam lo mai mai anih chu. Ka theihtawp ka chhuah ngei nana min fuihna ve a ni a, tukin pawh khan, a țhat deuh thu ka han sawi veleh an thap belh ta sup sup mai zawk zuk nia. An pawisa thap hi hloh an chak zawk asin,” tiin a sawi ta a.

“Khawthlang ho hi ka hrethiam thei dawn hlawm lo a nih hi!” Mary chuan a ti ta hial a.

Chumi tuk tukleh ah chuan Sudden a nen an inhmu a. Mary chuan thil pakhat a lo zawt ta chawt mai a.

“Jim, kan innei tih kha engtin nge i hriat ?”

“Ka hre hleinem. Ka rin tih a nih kha.”

“Chu chu em ni, an hriat loh hriat pawh ka nei mai thei i tih kha?”

“Ni e. Mahse, nangma sawi chhuah ah ka khek a nih kha,” tih pah chuan Sudden a chu a han kiai sak a.

“Engtikah nge maw Nick a pawh chu min hmuh tir ve dawn le?” Sudden a chuan a han ti zui a.

“I hmu thei thuai ang.”

Mahse, chawlhkar khat a ral hnu chauh ah chuan Sudden a chuan a hmu thei ta țawk a. A rin loh takin lukham kam kanah hian a lo mu a, a lo cher em em mai a. Mahse, Drait a chu a lo nui sang mai a.

“Ekhai Jim, kan inhmu chu avan lawmawm ve le. Kei chu ka țha e. Chanchin min han hrilh ve teh le,” a lo ti thuai a.

“Sawi tur teh vak a awm lem lo. Quilt a te nen SP chu kan lo enkawl a. Sturm a leh a hote chu an bo vang vang tawh a ni…”

“Seale a pawhin zin khawthawn a chak a ni ta ve ang, Camort a lah chu judge khan kum sawm tang turin a ti a. Mahse, a nghawng chhanchhuah nan kan chhuah ruk tir a, Cullin a erawh zawng khamah a tla ta.”

“Mary pawhin chutiang deuh bawk chuan min hrilh a. Mahse, chu ai chuan a sawi sei deuh zawk a ni. Ngawiteh, Jim, i laka ka bat hi han chhut chhuah ngial ka tum țhin a..” a han ti dek dek a.

Sudden a chu chhuah tum hian a tho ta uaih mai a, “Anih leh misual pa, ka sawi lo mai ange… Tluma ai chu tunge awh ta?” Drait a chuan a ti ta zawk a.

“Ele… Bardoe an mawle. A danglam tawh viau asin. A țha in ka ring tlat. Dan kengkawhtu nih hi thil harsa tak chu ni. Mahse a hlauhawm dan lah tlang hriat a nih avangin a țha ang.”

Drait a chuan a thil hriat duh țhen țhen te chu a zawt zel a. Cullin a thiam loh an chantir dan te leh amah Sudden a haw hun tur te chu a zawt ta a. Sudden a chuan a dam hunah chauh a hawnsan tur thu chu a hrilh a.

“Ka khua a har dawn teh e,” Drait a chuan a tichhuak ta hial mai a.

Sudden a chhuah hnu a Mary rawn lut leh chuan a pasal chu chau zual ta niawm tak hian a va hmu ta mai a.

Chutah a khum bulah chuan ava țhingțhi a, a pasal chu a hmingin a han ko a. Chumi hnuah chuan Drait a chu zawi zawiin a lo harh a.

“Engnge ni ta?” a rawn ti chhuak ta a.

“Engdang ni… tawh lo e..I thi.. emaw ka ti a.”
“Lo thi ta pawh ni ila chuti emin pawi i ti dawn em ni?”

“Ka thi ve nghal ringawt ang.”

Drait a chu a han hawi deuh vang vang a, chutah, “Tun ang reng rengin ka la hlim ngai lo e ti ila min nuihzat ang em? Ngawi teh Mary, a tir ațang khan ka hmangaih che niin ka hria a, ka hrilh ngam si lo che a. Min lo hmamgaih ve lo pawh ni la, khatiang hnu ah te kha chuan ka dem lo ang che.”

Mary kut zum silsel chuan a ka chu a rawn hup ta a, “Aw… ka chunga i țhat tehlul nen, keimah zawk hi ka inhua asin,” tih pah chuan Drait a koki chu a va nawr ne ne a.

A sam kara a hmui dah chung chuan, “Tunhma chu theihnghilh vekin kan hma lam hi kan pahnih chauhin i han su dun teh ang aw…” a pasal chuan a lo ti ta a.

A TAWP TA

Aside | Posted on by | Tagged , | Leave a comment