KAN DINHMUN HI A HIM MIAH LO.

KAN DINHMUN HI A HIM MIAH LO.
Lalrinliana Colney

Mipuiin kan hriatthiam nan, a mawl thei ang berin sawi ila. Citizenship (Amendment) bill 2016 hi tunah pass hrih lo mah se, BJP hian Hindu vote an duh avangin, Pakistan, Afghanistan leh Bangladesh atangin, Muslim ni lo chu India ramah kum 6 an awm tawh chuan, khua leh tuia pawm tur tiin, he bill hi pass dan kawng an zawng zel dawn. An la pass ngei pawh a rinawm.

AN PASS A NIH VAIH CHUAN: He bill hi pass a nih chuan, Mizoten kan inthlamuanna Innner Line Regulation Act kan lo inthlamuanna kha, he bill hian a rawn ṭhiat vek dawn, Peace Accord khan a huam tia inthlamuan chi a ni ngawt lo. A thuhrimah kan peace accord-ah khan, central in state sorkar a rawn loh chuan, tih chauh a ni, a rawn ang a, duh lo mah se a duh chu a ti tlang thei tho dawn. Thil lo tleng thei chu hengte hi a ni.

  1. Tuna dan lo anga kan rama awm mek, Vai leh Chakma leh Bru te hi, dan anga awm an ni nghal ang a, kan duh angin kan hnawt chhuak thei tawh lo ang.
  2. A bikin Bangladesh atangin Vai leh Chakma an rawn luh belh nghal dawn. A chhan chu Bangladesh ram khu a tawt lutuk tawh, khawvel a mihring tamnaah 7-na an ni tawh. Global warming avangin an ram khu tuipuiin a chim belh tial tial, he kan ram thawl taka hi an rawn hmu tai dawn khawp mai.

  3. Chakma mai ni lovin, Vai ho kan rama an tam tawh zia hi kan mitin kan hmu a, Muslim hunpuia, AR Lammuala lukhum var nena bungbu zozaite hi, hmuhnawm tham an awm tawh, heng mite hian Mizoram nawm zia an tem tawh a, phai khaw luma awm ai chuan, kan zoram nuam hi chen hlen nan an duh zawk.

KAN DARTHLALANG CHU: Kan thenawm State te khu kan darthlalang hmuh hmaih theih miah lohte an ni, i han thlir ang hmiang:

TRIPURA: Tunhma kum 20 kalta khan, rawngbawlna avangin Tripura-ah ka awm tawh, kan Kristiante min hrilh dan chuan, kum 10 hma lam kha chuan, Bengali-te hi kan duh duhin kan ankhum vel mai mai thin an ti, kan awm ve laite chuan Bengali-in an leilet zawng zawng a neihsak vek tawh a, kawng tinrengah Bengali hnuaiah an kun tawh. Ramhnuai mite insiam mah se, an kawng a ping vek tawh a ni ber. Hmun tha zawng zawng chu Bengali ta vek a ni tawh.

ASSAM: Assamese te pawh khu an harh tlai lutuk tawh, a ram neitu aiin Bangladesh atanga Bengali lo pem te khuan ram zau zawk an luah khat leh tawh a, thiltithei zawkah an tang tawh bawk. An ram luah a tawt tawh em avangin, Bangladesh atanga Bengali lo pemte ngei pawhin, bill hi pass loh an duh a, a ṭang nasa saah an ṭang ta a nih khu.

MEGHALAYA: Khasi ram tha lutuk khu Bengali-in sumdawnna lian zawng zawng khu an chang vek tawh, Shillong khawpuiah khuan Municipal intlan pawh an ngam lohna chhan chu, khawpuiah Bengali an tam tawh em avangin, Bengali-in thuneihna an chang dawn tih an hriat vang a ni.

MANIPUR: Imphal khawpuiah khian han kal la, Dawr lian zawng zawng chu Vai ta vek a ni tih i hmu ang, a ram neitu zawk khi Vaiin an dawrah an chhawr a, an tir kat dawr dawr tawh mai a ni. Tlai khawhnuah inner line regulation neih ve an nawr a, an tlai zo tawh.

Kan thenawm state-te hetiang hi an dinhmun a ni tawh, keini pawh hetiang dinhmun hi kan hlat lo tih i hria ang u.

ENGTINNGE NI TA ANG: Kan ram hruiatute hi ram ven him lamah hian an harh lo em em, heti chunga tun thlenga kan ṭhenawmte anga kan la awm lo hi, Pathian min venna pawh a ni ang. Tunah chuan harh a hun lehzual tawh. Party anga in demna hun a ni tawh lo.

Kan sorkar hrawn mek hian, Parliament session neih leh hma ngei hian, dan kan la lekkawh theih hi hmang vat rawh se. Hnam dang dap runpui nei vat rawh se, NGO pawh a duh chuan kutkeah a hmang thei. Insawi thlamuanna chi a ni tawh lo.

Hnam hnatlang pawh ko leh ang u, Officer pakhat huat vanga khati zat kan punkhawm theih chuan, hman himna tur zawk chu a aia uar zawkin i bei ang u.

Kan thenawm state te ṭan lak dan kan hmu a, keini ve chu kan ngawi duk ringawt mai.

Kohhran lam pawh hian tawngtai beihpui thlak a ngaihzia hi kan la hre pha lo a ni maithei. He hnam hian lungruala Pathian kan auh chuan, Pathian chhanna mak tak tak kan chang tawh thin. Tun ṭumah pawh hian engti kawng zawngin emaw kan hnam a him theih nan, Pathianin min ven dan a hria ang tih ringin, thawngtai beihpui i thlak ang u.

ZORAM HARH RAWH I TLAI ANG E

Aside | Posted on by | Leave a comment

REVD LEH MAFAA by Darrokima

REVD LEH MAFAA by Darrokima

Kum 2019 kan chuang kai a, Zoram mipuiin titi ințawm kan neih hmasak ber chu Revd. Chuauțhuama’n Mafaa Hauhnar chungchang a ziah hi niin a lang. Mafaa chhungte leh a țhianțhate tan chuan thu ngaihnawm huanga khung chi a nih lem loh turzia chu mi pangngai tan chuan hai tur a awm lo.
Pu Chuaua hian a thu ziah thupui hnuaiah bracket-in ‘Chawngkhum dan tlang huat loh,’ tih a dah a. He a thu dah hian awmzia a nei lem lo nge ni, Mafaa ngainatute huat rawn a hlawh phah a, Mafaa ngaina lem lotute pawhin a thu ziak hi a chaltlaiin pai dam harsa an ti hle niin a lang.

‘Chawngkhum dan tlang huat loh,’ tih awmzia hi Pu Chuaua hian a man fuh chiah lo em aw a tih theih. Mi chanchin nuihzatthlak emaw, a nuihzatthlak zawnga chet chhiatna emaw sawi chhuahsak dawnin he thu hi intlawh khalh nan hman țhin a ni a, he țawngkam hian fiamthu nen inzawmna thuk tak a nei. Mi diriamna leh deusawhna awmphaw atana hman chi a ni lo.

Mafaa leh Pu Chuaua hian Vanglaini chanchinbu-ah literary debate ngaihnawm tak tak an lo nei tawh țhin a. Writer puitling takin hetianga debate an neih hian a takah an inhaw zui ngaiin a lang lem lo va, an mi mal nun thlengin an indiriamin an indeusawh zui ngaiin a lang lem lo. Mahse, Pu Chuaua thu ziah duh dan kalhmang ațang hi chuan literary debate-a a hneh ngai meuh loh Mafaa hi a huatna a lo thuk hle a, a thih hnu-ah pawh a hming mawi lohna tur dap khawmin a la vawm zui awrh awrh zel mai a ni a tih loh theih loh. Mafaa khan tlin lohna leh fel lohna, chak lohna tam tak a nei ve tih chu tlang hriat a ni. Chuti chung chung chuan Zofate tana thu leh hlaa a sulhnu avangin ngaihhlut a hlawh a, a thihna-in mi thin a țhawng a, an lainat a, a nunhluite avangin tu mahin an demin an deu phal lo ang tih laiin, a chanchin tluangtlam pangngai taka pho chhuah theih reng kha Pu Chuaua hian a leila thei ang berin a’n thur chhuak nghauh nghauh a. Pastor-ho group-a an ui thu an sawina thu tam tak zinga a rawn thur chhuah duh ber kher ațang pawh hian Mafaa chunga a rilru put hmang chu a chiang viauin a lang.

Thu leh hlaa inpawlkhawmna hmuna Mafaa a hmuh thu a han sawi chhuah duh dan țawngkam te hi mihring dam lai, inngamtlak takte inkahna ni ta se, a nuih liampui theih mahna, lei daia zâl tawh hnu chhut zui nan chuan na ve ngaih ngaih tak a ni. Mafaa sunna mittui pawh a hul chian hmaa heti taka Pu Chuaua’n a han chhu zui duh mai hi eng rilru pu-a ti nge a nih ang tih hi ngaihtuah tham tak a ni a. Vawi li emaw chauh an inhmuh avangin an inngamtlak vang chu a ni lo phawt a, a chhungte hnem a duh vang a ni lo tih a chiang em em bawk a, Mizo mipuite hmuha Mafaa chawimawi a duh vang phei chu a ni lo leh zual tih a lang chiang em em bawk a. A dam laia a hnial hneh meuh țhin loh kha a lo thih takah chuan phuba lak nan a chilh zui ta chiam mai a ni thei mai ang em? Mitthi khin te chu tu tan pawh nuam tawh hek i!

‘Pu Chuaua hian Mafaa hi a duhsak leh a hmangaih vang zawk a ni,’ ti zawnga sawi te pawh an lo awm ve zeuh a ni awm e. A hmangaih leh duhsak vang a ni lem lo ang tih rinna chhan lian tak pakhat ka nei. MBSE-ah hian Mizo subject text book committee-ah Pu Chuaua te nen hian kan awmho țhin a. Member zingah khan ka naupang fal deuh a, zirlai bu-a dah luh thar tur vel kan buaipui changin a thu leh hla dah luh tur lo dap khawmtu berah ka țang țhin a. A țha awma ka rin kha ka keng a, kan en tlang a, kan pawm tlan chuan zirlai bu-ah kan dah lut mai țhin. Vawi khat chu hla eng emaw zat dah luh thar tur ka keng a, Mafaa hla phuah, Pathian fakna hla țha deuh mai pakhat hi ka keng tel a. Kan han en vang vang hlawm a, țha kan ti tlang viau a, mahse, Pu Chuaua khan nuih hak hak pahin, “Mafaa hla te zir lek loh tur a!” a ti a, chhiar pawh a chhiar ve duh lo. Ani berin khatia a tih takah chuan kan titlang ngam ta lo. Pu Chuaua thil thlir dan hi khawvel mipui thlir dan ni vek sela chuan Christopher Marlow te, William Shakespeare te kutchhuak meuh pawh hi tu mahin zir tlakah an ngai awm lo ve! Thu leh hla țha hi chu amahin a awm mai a, a pho chhuahna hmanrua atana Pathianin talent a pek a mihring lam kha kan zu teh uluk lutuk chuan zir tlak thu leh hla țha hi a tlem ngawt ta ve ang. Pu Chuaua te ngaihdanah chuan a thu leh hla aiin a mihringa kha a pawimawh zawk niin a lang a, Mafaa te hla phuah ve te chu zir tlak a ni kumkhua dawn lo a nih hmel.

Pu Chuaua article lamah bawk khan han let leh ta ila, mi paurau leh chaltlai tak pawhin mitthi tawh chanchin an ziahnaa an hman duh lem loh tur, tihelna țawngkam a rawlh luih hram țhin dan mawlh kha mak ka ti a. Rem lo chung chung pawhin a na laiah a khei lui ngat ngat zel ni khan a lang a, sakhaw puithiam tih atan chuan a mak em a, Mafaa țhiante leh a chhungte tan chuan ‘a mak a na’ tih ngawt mai loh chu sawi tur a vang hle-in a rinawm. Pu Chuaua hian Mafaa hi a lo haw viau a nih pawhin, a mihringpui a nihna avang chauh pawhin zah derna chhe tê tal chu han lantir ve se, tun aia tlem tala mawihnai deuh zawkin an inhmuh dan chanchin te hi han sawi sela, Mafaa hi mipui leh a chhungte hian kan sun nawn leh awn awn kher lo tur.

Mafaa kha pa inngaitlawm tak, hriatna țha danglam bik, chak lohna leh fel lohna erawh tam tak nei ve, Zofate thu leh hlaa arsi eng mawi danglam bik a ni a. Pu Chuaua hian a dam laia a lo inhnialpui țhin kha lo duh tawk tawh sela, lei daia a zâl tawh hnu hi chu diriama deusawh zui lovin, a thlarau muanga a chawlh theih nan lo ruihpui zui lo hram tawh teh se.

Aside | Posted on by | Leave a comment

Zu chungchanga lehkhathawn

A hman dan an thiam avangin kan pi leh pute khan zu an buaipui ngai lo va, an nun tiphuisuitu-ah an hmang zawk thin. Kohhranin suala a chantir atanga zu hi buaipui ta kan ni. He thudik hi kan Kohhrante leh kan political party thenkhatte hian haiderin politics khelh nan an hmang a ni a. Chiang lehzuala sawi a ngai miau si a, Open Letter te hial kan thawn ta nih hi.

OPEN LETTER TO
1. PU ZORAMTHANGA, CHIEF MINISTER, MIZORAM
2. REV. R. LALHMINGTHANGA, CHAIRMAN, MIZORAM KOHHRAN HRUAITU COMMITTEE

Ka pu,
ᅠInthlan campaign thupuia in hman ang ngeiin Zu Khapbur Dan neih in tum thu chu in puangzarin, in ngaih pawimawhzia lantirin dan siam hma pawhin zu khuahkhirhna in nei ṭan nghal a ni a. Hetiang thil pawimawh tih dawna nghawng a neih theih lo dawnsawn dan tur te ruahmanna siam miah lova kut in han thlâk nghal mawlh mawlh mai hi a mak viau a ni.
Kum 1993-a Zu Khapbur Dan kan hman aṭang khan zu hi khap rệm theih a nih loh thu te, a hman dan inzirtir hi kan tih theih ṭha ber a nih thu te leh zu-ina ṭhat lohna a thlen aia pawi zawk sualna leh sual dan chi hrang hrang khapnain a hrin chhuah ṭhin thu te ka sawiin ka ziak ṭhin a. Hemi chungchangah hian lehkhabu pawh ka chhuah tawh a ni.

America-a Prohibition an neih lai khan Al Capone leh a Mafia-ten an zu zawrh rûk thup nan thuneitu sang Governor leh a dangte pawisa suma an tham/lei ṭhin chu tuna khawvelina a buaipui ber, a tih reh theih si loh, CORRUPTION lo irhchhuahna a ni. Election Campaign laia an chệt nasat zual avangin thlan tlinte chu tu pawh ni se, an kâ an lo hup hman vek tawh ṭhin a ni.

Zu Khapbur Dan in siam hmaa ngaihtuahna fîm zawk in hman theih nan ka ngaihdan chu chipchiar takin ka han hrilh che u a. Hemi chungchanga R. Zuala thuziak ka rawn lachhawng dawn bawk a ni.
Zu hi khawvel ram tin hnam tinin an neih vek, mihring nuna bet ve tlat a ni a. Amah hrim hrimah hian ṭhat lohna hranpa a awm lo va. A sak dan dik taka sak chuan taksa tana ṭhat lohna thlen thei a ni lo. A tâwk tệ-a in phei chuan TONIC ṭha tak a ni. In tam lutuk erawh chuan ei leh in thil dang pawhin tih luata ṭhat lohna an nei ang thoin taksa tan ṭhat lohna a thlen thei a. A hman dan thiam loh phei chuan mimal nun a tichhe thei a, khawtlang nun hial pawh a tibuai thei a ni.
Kan pi leh pute khan zu hman dik loh chuan mimal nun a tichhe thei a, khawtlang nun a tibuai thei tih hriain DAIKHALH NACHANG an hria a. Zu kha chhan nei zelin thil ṭha tih nan vek an hmang a. Chutianga hun eng emaw chhunga an tih hnu chuan an nunah zu khan THIL ṰHA nihna a rawn chang ta a. Chuta ṭang chuan tu tan mah zu kha a hman lohna tura hman thiang a ni lo va, hman sual thiang a ni hek lo. Zu hmang dik lo chu tlâng ngaihah mi dik lo an ni tawp mai a ni. Tun huna biak ina inkhawm thil ṭha-a kan ngai a, inkhawm taima chu mi ṭha, inkhawm ngai lo chu mi suala kan ngai ang hi a ni. A danglamna chu zu, a hman dan dik taka hman chuan an nun a tiphuisui a, biak ina inkhawm chu min ti-FARISAI-tu mai a ni ta hi a ni.
Kristianna luh hma chuan Mizote hian zû an leklam nasa mai pawh a ni lo va, an hmannate chu a pawimawh hlawm êm avângin an nunphungah pawh zu hi pawimawh tak leh ṭangkai tak nia ngaihna a nghet hle a. Zû lo chuan sakhua an hmang thei lo va, an ran talh tur chu zû-a phuh zet tûr a ni bawk si a. Zû lo chuan sial an chhun thei hek lo. Sial chu zu-a phuh zet tûr a ni bawk si. Khuangchawi te, Chawngchen te leh Kût ni vângthlâah te pawh zû lo chuan engmah an ti thei lo. Lal leh Upa-in belpui nên ro an rêl a, râl an rêl bawk a. Nau piang thar se, ‘nau zû’ an zû a. Sa lu lâm nan pawh zû bawk. Nupui neih dawnin nula be dawn se, dawvân kaina zû a ṭul phawt a. Mi tlawmngai leh pasalthate chawimawina sâng ber chu ‘huai no’ a ni leh bawk a. Lusûn awm se, zû-in an râl a, sâwn man chenin ‘sâwn bêl’ lo chuan tlâk theih a ni lo. An hmannate hi pawimawh tak tak vek a ni a, a nêp ber pawl chu ‘hah zû’ te, ‘khualtha zû’ an zûk te hi a ni ang.

Zû an hmanna kawng hrang hrang kan han sawi aṭang hian hun bîk nei tak lo chuan zû an in lo va, kawng ro nei lo chuan zû an in hek lo tih kan hre thei ang. Tin, an hmanna te hi thil pawimawh tak tak a nih avangin zû chu ‘in mai mai’ an nei ngai lo bawk a, a duh apiangin an in mai thei ngawt hek lo. Rorelnaah te, râl relnaah te chuan tel tûr chin an awm tlat a, sakhaw hmannaah chuti bawk. Nau zû zû se, tel tûr chin an awm a, khual ṭha zû an zûk pawhin a duh apiang an tel mai thei lo.

Awmze nei tak leh a chhan pawimawh tak neiin zû an in ṭhin a. Zû chu an nunah chuan thil pawimawh tak leh ṭangkai tak a nih avang chuan an nunphung chu a hneh lo thei lo va, zû chu duh hun huna, a chhan pawh awm mumal lova, in mai mai chi ni lova hriatna chu an nunphungah a nghet tlat a. Hemi hriatna hian an nungchang leh awmdân a siam a ni.

Heti hi a nih avângin zu ruih phei chu thil dik lo takah an dah lo thei lo va. An nunphungah chuan zû chu a hun takah, a in tûrte chauhin an in chi niin an ngai tlat bawk.

Heti ang thil engemaw tihdân bik hi hnam pumin an neih a, chu chu nghet taka vawn hian hnam nunphung (culture) a lo awm thin. Zû chuan Mizo hnam nunphungah hmun pawimawh a luah tlat ṭhin a, an nunphung leh zû chu nghet tak leh fel takin, kawnghmang nei takin a lo inzawm ta tlat a ni.
Râl an rêlnaah zû rui sela, an rêl fel hauh lo vang a. Sakhaw hmannaah rui sela, an tibawrhbângin an pawlawh zo vek bawk ang. Chuti ang chu a nih avangin zû chu an tan thil ṭha lo a ni thei hauh lo.
Heti ang hi a nih avangin zû an rui ngai lo. Ṱhalaite chu sawi loh upate pawhin zû an rui ngai lo tluk a ni. Pa tar, tu han ngaimawh phâk pawh ni tawh lote chu an rui ve zeuh zeuh chauh thin.
Zu rui chu an hmusit viau a, biak tlâkah pawh an ruat lo hial a ni. Zu rui an hmuhsitzia chu an thu kam khat lek, lâr tak atangin a hriat theih. “Zu ruite zawng khin tlâk an ni lo va, zu rui an khing ngai lo ve,” an tih hi. Tlangvâl zu rui phei chu nulate pawhin an be tha duh ngai lo.

Zu ruih chu thil dik lo tak nia vantlângina an ruat avângin, zu rui pawhin mahni inthiam lohna an nei a, “E khai! Kan lalte zârah ka lo rui deuh a nih hi, min hrethiam hram teh u aw?” tiin thupha an chawi hmawk hmawk ṭhin. Pa tar rui te pawhin, “E, ka rui êm mai, biak tlâk ka nih loh hi, mi huatthu te hi ka sawi palh hlawm ang e,” an ti a, an inthiarfihlîm mai ṭhin.

An hnam nunphungah zû chu a sual lo mai ni lovin, thil pawimawh leh ṭangkai tak a ni tlat a, an tân huatthlala leh manganpuiawm lah a ni thei hek lo va; ruih chi lah a ni der hek lo. Thil rêng rêng hian hnam khawsaknaah pawimawhna leh ṭangkaina nasa tak a neih phawt chuan, chu hnam nunphungah chuan hmun pawimawh tak luahin an zia-ah a lang chhuak ṭhin a ni.

Mizo zingah pawh khuang hian hmun pawimawh tak a lo awh ṭhin avangin, a ri hian mawina nei lêm lo mah se, nasa takin ngaihsân a hlawh a nih hi. Tûn thlengin khuang chu a lâr tial tial a, a hman dân lah an uluk deuh deuh bawk. Thil rêng rêng hi, amaha ṭhatna nei hranpa lo pawh, a hmangtu leh a hman dân azirin a chhiain a ṭha thei a. A hmangtu leh a hman danina a zir chuan thil ṭha leh thil ṭangkai takah a chang thei zel a ni. Hnam nunphungah kori tu thei khawpa hman a nih loh chuan, thil ṭha a awm thei tak tak lo a ang hle. Sakhua meuh pawh hi nunphunga kori tu tham khawpa kan neih loh chuan min ‘tifarisaitu’ lek a ni mai. A tak thei ngai lo.

Chuti ang bawkin, Kristianna lo luh hmaa Mizo nunphung leh zû inkungkaihna chu kawngro fel tak nei leh ṭangkaina nei a nih tlat avangin, zû-in an nunphung a tichhe lo va, a tiphuisui zawk a ni. Zû a ṭhat hrim hrim vâng ni lovin, a hmangtute hman dân avâng zâwka heti ang ni thei hi a nih chu.

British leh “Colonizer” dangte khan ram an hneh apiangte kha a rei thei ang ber awpbeh an tumna lamah an hnam nun tihchhiatsak kha a ṭangkai ber tih an hria a. Chuta tan chuan Missionary-te kha hmanrua-ah an hmang ṭhin tih hi hriat dan tlangpui a ni.

Kan ramah pawh kum 10 ệm pawh an la awm hma, kum 1910-a Kohhranina a thil khap zinga (a) Zû, (b) Chawlhnia hnathawh leh infiam, (c) Nula rîm, (d) Khawvêl zai sak, (e) Sa thisen ei, (f) Khuang te an tel ve khan hetiang ngaihdan hi a nemnghet a ni.
Khang hun lai leh tun thlengin an ramah chuan vệng tinah zu dawr a awm thliah thluah a, a duh duhin zu an in a. Khuang te pawh a hun leh hmunah chuan an vua a. Hnam thil te phei chu a hlutsak thiam ber ber an ni a. Chuti chunga, an rama Kristiante tana tih thiang, Mizo Kristiante tana ‘thiang lo’-a an chantir chhan kha eng dang vang ni lovin kan hnamzia tihchhiat an duh vang ngei kha a ni tih loh theih a ni lo.

Kristian hmasate zinga a tam ber kha ‘thatchhiat vanga rethei’ an tihte kha an ni a. An retheih avang khan kût ni vangthla-ah te lo chuan zu an in pha lo tluk a ni. Anmahni hnuaichhiaha hmusittu rilru chhungril tak aṭanga an hua ang khan an intihhlimna ber zu pawh kha huat enin an en tel a ni. Chuvang chuan Missionary-ten zu thil ṭha lova an rawn sawi kha an rilrem zawng tak a ni.

Pi leh pute huna an ngaih pawimawh ber pakhat chu TAIHMAKNA kha a ni a. Taihmak vanga khawsathei MIṰHA an tihte kha ngaihsan an ni a; thatchhiat vanga retheite kha an hmusit thung a ni. Kristian hmasa miretheite khan Kristian an nih hnu-a an taihmak chuan loh avang khan an retheih pangngaiin an rethei reng a. Chuvang chuan an nunah ngaihsan leh entawn tur an hmuh loh avang khan miṭhate kha Kristianah an inlet mai lo. Tunlai kan bulhnaia hnam dangten kan nuna entawntlak an hmuh loh vanga Kristian an rawn ni duh lo ang hi a ni ang.

Hremhmun awm thu an hriat aṭang khan Kristian hmasate khan miṭhate inlehtir nana hmanraw remchang takah an neih ta a. Misual chu hremhmunah an kal ang tih zirtirna changchawi khan, “Zu chu thilsual a ni a, zu in chu hremhmunah an kal ang” tih zirtirna nghet an lo neih phah ta hial a ni. Kohhranina zu chu thil sual a ni tih zirtirna ngheta a neih aṭang chuan ringtu mipuite chuan zu chu thil sualah an pawm lo thei ta lo a ni.

Tih ṭhaihna hmanga hremhmun awm thu remchanga hmanga zirtirna dik lo neih phah hiala Kristian hmasaten miṭhate an inlehtir chhan kha chhandam an nih ve theih nana duhsakna lam ni lovin an thuhnuaia dah an duh vang kha ni ngeiin a lang a. An duh ang ngeiin Kristiana rawn inlet miṭhate chu biak in tlar hnungah an ṭhu a, pulpit aṭangin an chungtlâk thei ta a ni.

Zu chu thil sual a nih tâk aṭang chuan zu ṭha leh zu chhia a awm thei tawh chuang lo va, ‘ṭha lo’ an ni ta vek a. Zu chhe zuar leh zu ṭha zuar, dân mitah danglamna a awm tawh loh avangin a zuar apiang chuan a hlâwk thei ang berin zu chhia an zuar ta a. Zu in apiang chu zu chhe in an nih avangin an taksain rang takin a chhiat phah ta ṭhin a ni.
Hun rei vak lovah zû leh chawlhnia hnathawh tih loh chu a khapna dan sût lehna awm lêm lovin, an zûzî ral ta mai mai a ni ber a.

Zû erawh chu Kohhran chuan a khap ta tlat a. Kohhran mite ngaihdân chuan zû in mite chu ‘khawvêl mi’ an ni ta a. Chuti ang ngaihdân chuan zû chu ‘sualah’ a siam nghet lehzual a. Zû in chu thil tisual nihna mai ni lovin, thilsual tihna a lo ni ta a; spiritual sin a lo tling ta hial a. Kohhran mi tam berte chuan bêl chhunga zû awm hle hle pawh hi an hmu sual ta vek mai a. Juda-ho leh Muslim-hovina vawksa chu ‘thiang lo’ an tih ang bawkin, Mizo Kohhranah chuan zû chu ‘thiang lo’ a lo ni ta a.

Kohhran mi an lo pung deuh deuh a, an pawm dan leh an ngaihdân chu, Mizoramah chuan ‘vantlâng ngaih dan’ (public opinion) a lo tling ta si a, zu in chu vantlâng ngaihah pawh ‘spiritual sin’ a lo ni ta a; zu in mite ngei pawhin,an thinlung rîl takah chuan he ngaihdân hi an nei ve tho lo thei lo.

Zu khapna chuan hnam nunphung kal tluang pangngai chu a rêk chhum a, nunphung a thara ṭan a lo ṭul ta a. Sechhun khuangchawi leh kût ni vângthlâ an hman ṭhin zawng zawng chu bân vek mah se, a thlâkna tûr erawh chu pakhatmah a awm si lo. Hei vâng hi a ni ang, zaikhâwm te, lâm te, Centenary, Jubili leh thil dang danga Pathian chawimawia ran talh te a lo lâr tâk hle hi! Mihring nunphung pângngai ruak ta kha a luahkhattu awm lovin a awm thei lo rêng a ni.

Heti anga kum 50 dawn lai hnam nunphung kaltluang a lo chah meuh hi chuan, ṭhangtharte chuan a rim a râ pawh an hre pha ta lo va, hnam nunphung phuartu tûr an nei ta lo. Lehlamah lah Kristianna nunphung neih phâk chu mi tam an awm thei si lo va, mi tam ber chu hnam nunphung phuar si loh, Kristianna-ina a phuar bawk si loh an lo ni ta a. Chhia leh ṭha hriatna hmang thiam tak leh mahni inthunun thei mite tan lo chuan ‘sa pa tâl’ an tih anga khawsak mai awl êm êm hun a rawn inher chhuak ta a ni.

Kohhran mite zingah pawh zû leh thlarau lam inzawmna hre lo an lo pung deuh deuh a; khawtlângah pawh mi lian, lal leh mi hausate an lo pung tia tial a; kum 50 lai a lo ral hnu chuan ‘zû in loh tur’ tih chu a lo chak thei ta lo.

Zu in mi an lo pung ṭan leh a, mahse Kristianna luh hmaa Mizo hnam nunphung leh zû a inkungkaih dân hre rêng rêng lovin an in ta a. Pi leh pute hunah awmze nei lovin zû an in ngai lo va; Kristianna lo luh hnu-ah erawh hi chuan awmze neia zu in a awm si lo. An in duhna chu an in chhan a ni ta ringawt mai a ni. Zû chang lo pawh, a chhan awm lo va thiltih rêng rêng hi a ṭha tak tak ngai si lo va, zu in pawh chu a ṭha thei ta hauh lo mai a ni.

Zû chu châkna avânga in a lo ni ta a. Châkna avânga thiltih rêng rêng chu a hleihluak a thleng sam êm êm a; zaikhâwm leh lâm te chen hian châkna avânga tih chu a lutuk thuai ṭhin. Zu in a lo punlun deuh deuh a, hna hrâm thawk lova awlsam taka eizawnna a nih avangin zû zuar an pung tial tial zel a. Tichuan châkna avanga zû in an nih miau avangin, a in chu an rui deuh ngei zêl bawk a. Chutih lai chuan ‘zu rui an khing ngai lo ve’ tih kha, an tih chhan hre si lovin, zu in ve lote chuan an la kengkawh tlat a, zu rui mite hmuhsitna, hnam nunphunga awm tlata kha, zu khap avânga hnam nunphung bo zingah a tel ve si a, zu ruite hmusit a, endawng nachâng hria an awm tawh si lo.

Kristianna luh hnu-ah chuan zû chuan zu rui tan ‘zalênna’ zau lutuk a hawng ta a. Chuti ang chu a lo nih tâk si avang chuan, Kristianna luh hnu-ah chuan miina zû an in chhan ber te chu thil ṭha leh ṭangkai rêng rêng a awm ta lo. Zak lo taka pâwngpawrh theih nân te, nula rîm huai nân te, mi dangte khin ve phâk loh nih nân te – a tawi zawngin sawi mai ila – ‘intih cowboy nân’ a ni ber ang chu. Chuti ang tûr chuan zû in mai a tawk lo va, ruih ngei a chawh tlat a ni.

Ruih vanga pâwngpawrhna hi kan huat ber pawh a ni a; mahse hnam nunphung leh zû inkûngkaihna thar chuan a vulh lian lo thei si lo. Mi tam tak phei chuan thil kal dik lohna lai pawh hre hawt si lovin, hleihluak takin zû hrim hrim hi kan deu chhe chiam chiam a; mahse, ngaihtuahna nei zau zawkte nên an inthurual thei si lo. Alcoholism hi thil ṭha lo tak a ni a; mahse, alcohol chu thil ṭha tak a ni si. Alcohol hi awm lo se damdawi ṭha tam tak hi kan nei lo vang. Damdawi siamna atân an hman chuan alcohol (zû) chu thil ṭha leh thil ṭangkai tak a ni nameuh mai, mahse, in a, ruih nân an hman chuan thil ṭha lo tak a ni si.

Heti ang a nih miau avâng hian zu do dân hi thiam a harsa viau mai. Zu chungchângah chang ni lovin, mihring inenkawlna leh inzirtirna leh inkaihhruaina kawngahte hlei hlei hian fimkhur a ṭul. Tûn laia heti ang lama mi thiamte an lungrualna pakhat chu, ‘ti suh’ tih lam hi inzirtirna ṭha a ni lo tih hi a ni. Kristiante tan phei chuan pawm a awlsam bîk tûrah kan ruat thei ang. Thuthlung Hluiah chuan ‘ti suh’ tih lam deuh hlir a ni a, Thuthlung Thar erawh chuan ‘ti rawh’ tih lam a uar ta thung tih kan hre ṭheuh a ni.

Inkhuahkhirhna nasatna leh thupêk khauh ngawt pawh hian nun a siam ṭha chuang lo. Kristianna hi nunphung thununtu a nih si loh chuan, Kristiante nungchang pawh a danglam thei chuang lo. Sakhua emaw, hnam nunphung emaw hian mihring nun dân a phuarin a khuahkhirh thei ber a; amaherawhchu tûnlai hi chuan a enga mah mahina a khuahkhirh loh hi engzat nge awm ang tih hisap ngam pawh a harsa lek lek ta a ni!
Hêng thil bâkah hian, mahni chhia leh ṭha hriatna hmanga, mahni inthunun awm bawk mahse, hetiang hmang thei chin hi an tam vak si lo a ni ang, Kohhranah leh hnam pum nunah a lang tham lo hle. Tûnah zet chuan, Kohhran mai bâkah, sawrkar leh khawtlâng pawhin zu an manganpui ta tak meuh a nih hi.
Kohhranina a khapna a chak laiin zû kan buaipui lo va, khapna a chak zawh loh veleh kan buaipui ta mai a nih rêng hi. Sikul tam tak kohhran ta a nih laiin zirtirtuten zû an in lo va; sawrkarina sikul a lâk veleh zirtirtu tam takin zû an in ta mai kha, zu sual vâng chu a ni hauh lo le!

Dem tûr, puhmawh leh mawhchhiat tûr hi kan hre fuh lo vang tih pawh hlauhawm deuh a ni. Zû awmna apiangah an manganpui kher lo tih hi chhinchhiah tlâk a ni a. Zû a tam pawhin mi tam tak chuan an in chuang lo. A in apiang pawh an rui buai kher lo tih te hi chhinchhiah ila, kan dem tûr leh kan mawhchhiat tûr ber chu zû hi a ni lêm lo tih pawh a chiang a ni. Khap ringawt hi inenkawlna dan tha a ni lo tih pawh keimahni Mizo nunah ngei hian a lang chiang tawk a, nunphungina a zir chuan zû te meuh pawh hi min tibuaitu a tling thei lo tih pawh Kristianna luh hmaa Mizo hnam nunah khân a lang chiang bawk a ni.

Chuvângin keini ṭhangthar, pi leh pute aia zirna nei tha zawk leh zir tam zawk, chinchâng hre zau zawk êm êm leh thil ṭha ber Kristianna chîma seilian te hian, kohhran din tirha kan pi leh pute ngaihtuahna aia zau zâwk kan neih a hun hle mai. Dik tak phei chuan Kristianna luh hmain mi mâwl tê tê-te’n zû chu an buai phah lo va; an aia fing, hre zau leh changkâng zawk inti-tena zû kan buaipui a, a ram nghîna kan nghîn phah te han ngaihtuah chuan, a zahthlâk tih mai loh chu sawi tûr a vâng hle.

Kan rilru hi a la changkâng ngang lo a ni ber mai. Vawksa eiin mi a tibawlhhlawh tak tak lo ang bawkin, zû hian tu mah a tisual hranpa lo. Insûm peihna a tibo va, thinlunga sual awm sa kha a inlâr chhuak mai a ni. Thinlunga awm sa kha ‘ṭha’ ni se, insûm theih lohna chuan ‘a ṭha’ hlir a inlâr chhuahtir dâwn si a.

Heti chunga zu suala ngaia kan la khapa Setana ai pawha do bera kan la neih reng chhan hi eng dang ni lovin a chunga kan sawi khi a ni. Thisena thlahtu hruaitu hmasate thil tih tih danglam hi, kan Kohhran hruaitute thisen hian a ngam rih lo a ni.
Zu, thil suala chantirtu chu kan Kohhrante an ni a, zu-ina buaina leh mihring nunna hial a lâk ṭhinna-ah hian a mawhphurtute an ni.
Kan Kohhranten inkaihhruaina dan an siam tam berte hi Pathian thu tak nena inzawmna nei lo an ni fur a. Heng an dan siamte hi zawm turin ringtute chu tihṭhaihna nen an zirtir a. Kohhran belh chu Pathian belh aia pawimawh zawka an chantir thiam avangin ringtute chuan Kohhran sawi leh tih apiangte chu Pathian tih anga ngaiin an zawm ṭhin a. Zu chungchanga an zirtirna dik lo pawh hi chutianga an zawm tlat chu a ni.
Chutianga Kohhran phuarbeha awm ringtute chu Kohhran ruihchilh kan tihte hi an niin Kohhranin zu chu thil sual a ni a tih chuan Pathian thu-in sual ti lovin khawvel ram danga kan Kristianpuite zingah pawh sual ti awm ve miah lo mah se, Mizo Kristiante chuan zu chu thil sualah kan pawm tlat mai a ni.

Chutianga Kohhran sawi leh tih apiang pawmtute chu an la tam em avangin kan Kohhran hruaitute hian ZU POLITICS khelhna remchangah an hmang ta a ni.

Kan Political Party ṭhenkhatte pawhin ZU POLITICS bawk chu an khệl a. Ram leh hnam rawngbawlna dik tak aiin TLIN ringawt politics atan chuan an lo hlawhtlinpui ta a ni.

Politics khelh nana zu hmangtute zawng zawngina zu an sawichhiatna, zu hmun chu intihbuaina, Mizoten zu in kan thiam lo, tih angreng velte hi kan Kohhranten zu hi thil suala an chantir hnu-a thil thleng vek a ni. Kan sawi tak ang khian Kristian kan nih hma zawng khan Mizo hnam hi khawvel pumpui pawha zu hman dan thiam ber kan ni a. Zu-in mimal nun a a tichhe ngai lo va, khawtlang nun a tibuai ngai hek lo. A tiphuisui ṭhin zawk a ni.

Zu zawrh a nih chhung hian miin in dan an thiam tawh viau a, zu avanga khawtlang buaina lian tham hriat tur a awm tawh lo tluk a ni. Zu in vanga thite hi zu khuahkhirh a nih laia zu chhe inin an taksa a lo tihchhiatsak tawh, zu an in tam zual tak vanga thih hma phah te an ni tih hi ngaih dan tlangpui a ni. Hetiang mite hi chu zu in an sim loh chuan an dam rei thei chuang lo a ni.

Zu khap hian engti kawng mahin zu-ina kan nun a tihbuai hi a ti reh dawn lo va, mihring nun leh khawtlang nun a tichhiain a tibuai zual zawk ang. A rûka thil tih sualnain a rawn pun phah ang a. A RỦKA THILTIH SUALNAIN MIHRING NUN A TIHCHHIAT CHU, A THLAWNA THILPEKINA A TIHCHHIAT AIIN A NASA ZAWKIN A HLAUHAWM ZAWK ANG. LEMCHAN NUN LEH DAWTSAWI PAWISAK LOHNAIN A ZUALKAI PHAH BAWK ANG.

Kan Kohhranten “Zu hi thilsual a ni a, zu in chu hremhmunah an kal ang” tih zirtirna dik lo an neih hi an ṭhiat hma chuan zu hi kan buaipui tawlh tawlh ang a, kan chhiatphah tawlh bawk ang.

Zu khap rệm tum zingah ram pum huapa hlawhtling an la awm ngai lo. Sakhaw thil avanga zu khapna Muslim-te ramah pawh a rệm chuang lo a. Muslim ram ṭhenkhatte phei chuan an khua leh tui, Muslim ni lote tan zu an khap lo a ni. Khawvela sawrkar ropui ber America meuh pawhina a tih theih loh, India rama State pachhe berina ti thei tura kan inngai tluka mahni leh mahni inbumna nasa a awm chuang lo vang.

Mizorama zu khapburna-in sualna chi hrang hrang a hrin chhuah tur zingah, Bagha bazaar te, Sipai canteen kawt te-a kan nula/hmeichhiaten Mizo nun timualpho-a an intlar leh pât pât tur te, Rangvamual leh hmun dang danga zu chhe zawrhna lo awm leh ṭuam ṭuam tur te, Silchar leh Myanmar aṭang te-a zu a lo lût ru leh zut zut tur te, Zu man a lệt thum vel zeta a pung tur te, Damdawi chi hrang hrang a rawn inlan leh vak tur te hi huai taka sawilâwk ngam a ni.
Nitish Kumar-a khan October 2, 2016-a Zu Khapbur Dan a siam tur thu a puang lâwk a. A hma thla thum chhung khan hetiang inbuatsaih lâwkna hi a siam a ni.

  1. District tina D.C. leh Chief Medical Officer te hmangin ruahman lâwkna an siam a. Zu in loh thut vanga chirî turte enkawl nan Hospital room hnih an tiruak a. Enkawl ngai enkawl turin thiamna bîk nei doctor leh nurse an ruahman sa thlap a ni.
  2. Zu zawrha ei zawng ṭhinte tan ei zawnna dang an neih theih nan Bank Loan Cheng Nuaih li(4) pung awm lova kum thum(3) chhunga rulh tura an lâk theih dan an ruahman sak a. Guanrantor-ah Sawrkar a ṭang a ni.

  3. Zu zawrha ei zawng ṭhin fate tan an tuina leh thiam zawng thila training an neihna tur an ruahmansak bawk a ni.

Hetiang thil pawimawha ruahmanna siam hmasa lova kan Sawrkarin Zu Khapbur Dan an han kengkawh titih nghal mai hi a mak hle a ni. Thil tih tak tak aia Zu huatna lantir nghalna ni berin a lang.

Mizo zû sak dan dik taka sak in hian mihring taksa a tichhe thei lo va. Hetiang zû hi zuar ila, zu chhe zuar apiang chu an tih leh ngai tawh lohna tur khawpa hremna nasa pe ila, chu chu zû vanga kan buaina tihreh theih dan ṭha ber a ni ang.

Kan thuziak te khi ngun taka min chhiarsaka Sawrkar hian Zu Khapbur Dan an siam hma hian ngaihtuahna fîm hmang rih se kan ti a ni.

Hei hi Sawrkar thiltih tum sawichhiatna a ni lo va, kan ram leh hnam hnuk khawih thei thil pawimawha kan ngaihdan chiang taka sawina a ni zawk. Kan thusawi chiang tâwk tak hi in hrethiam lo a nih chuan Mizo mipuiten thil awmdan an hriat chian theih nan TV-a sawihona neih te pawh a ṭhain ka ring a, ka han rawt nghal bawk a ni e.

In rintlak,

09.01. 2019 M. Lalmanzuala
Chaltlang, Aizawl.

Aside | Posted on by | Leave a comment

Citizenship Amendment Bill’ Ka ngaih ve dân

‘Citizenship Amendment Bill’ Ka ngaih ve dân – Clement Liankunga (IAS Rtrd.)

Kum 2016 khan he Bill hi Parliament-ah putluh a ni a. Dan hmanlai mek tih danglamna tura rawtna a ni. Zirchiang turin Dr. Satyapa Singh, MP kaihhruaina hnuiah JPC din a ni. A ni hi IPS, DGP post atanga retired a ni a, hetiang lama experience a neih vangin an ruat a ni mahna.

He Bill hi kum 1955 dan dinglai amendment-na tura buatsaih a ni. Pakistan leh Bangladesh atanga foreigner kum 6 chhung India rama lo awm/raltlante India citizenship pek theihna tura duan a ni. Mahse he Bill hian Hindu, Parsi, Sikh, Budhist leh Kristiante chauh a huama, Muslimte a huam ve lo.

He Bill hi India independent hmaa saphovin Muslim leh Hindu-te thliarhranna, divide an rule policy ai mah khan National integrity a suasam dawn a ni.

India hi Hindu ramah siam an tum:
Hindu kulmuk, RSS leh Bajrang Dal-te duh leh tum angin India hi Hindu Lal ram dinna turin fing taka an ngaihtuah chhuah a ni. Kan hriat theuh angin, Hindu kulmukte hian Muslim-te hi huat sa lohvin an hua a, an pathian, Lord Rama-te hunlaia an sakhaw hmunte kha Muslim invader ten chungchu thiatin an sakhaw hmun pawimawh an din ta niin an ringnghet bur.

Ayodhya hmun inchuh :
Central Indian state-a awm leh hnathawkte chuan Hindu leh Muslim inhalzia kan hre theuh awm e. Âr insual takngial pawh chung Âr te chu Hindu leh Muslim Âr an nih chuan mahni sakhuaah lalutin an inep nghal fo thin. He thu ziaktu pawh hian Bihar district-a DC a nih ve lai, kum 1992-94, 1999-2000 leh Hindu leh Muslim Âr insual avanga intibuai vawi 4 lai a thelh ve tawh. Chutiang bawkin Divissional Commissioner a nih ve lai, kum 2015-2017 June khan naupang insual pawh vawi 3 lai communal a nih nghal avangin thelhtu a ni ve țhin.

Hmun tamtakah Ui leh Kel thlunpawlh ang an nih vangin a tlemzawk Muslim-te chu a hohovin khaw daifem leh hmun hran deuhvah an awmho deuh ber. Sakhaw chungchanga intihbuai nikhuaa inven leh țanho a remchan vangin. Hindutva doctrin âtchilhtute chuan, Keinin fa neih tlem kan inzirtir laiin anni chuan nupui 4 (an chawmtheih chuan) an nei thei a, chung an nupui pakhat zel atang chuan fa 4 or 5 (chu aia tam neite pawh an awm teuh) an nei thin. Chuvangin “kum 20 a lo liam leh meuh chuan India ramah majority an ni thuak ang a, keini chu minority kan ni tawh ang” tih hi an inzirtirna thuruk a ni. UP state chhungah phei chuan Muslim rimnam deuh khua leh hmun hming, tawpa “BAD”tih zawng zawng hming dangin an thlak vek. Ahllahabad pawh Pryagraj tiin. Hindustan without Muslim hi tam takte dream a ni tlat.

North Eastern State tan abik takin zoram tan inchimralna kawng hawngtu tur a ni, Chakma leh Bru te an punghluai ang:

Kan hriat theuh angin kan zoram hi chhim lam leh thlang lamah Chakma leh Bru ten min hualvel a. Kum 2011 census-a a lan danin Zoramah Chakma 90,000+ an awm tawh. (2018 thlengin engzat takin pung tawh ang maw?) Zoram population lah nuai 11 vel chauh kan ni rih si. Kan population total atanga chhutin, Chakmate hi 9% zet an ni tawh!! Chu chu mihring inthlahchhawn dan pangngai aiin 30% dawnin an pung tihna a ni.

Khawvelah hnam tenau chimrala an awm thinna chhan ber chu, politic, economic leh population-a chimral hi a ni. Chimrala awm an dingchhuak leh tawh ngai lo. He CAB hi RS-ah pass-in dan a lo nih vaih chuan kum 10 hnuah chuan a lêt tamin an lo pung hluai hluai ngei ang le.

Politic-ah Chakma ten min chimral ang:
Zoram chhim lam District 2 velah chuan Chakmate an inkhuar nghet tawh em em a, MLA pawh Zofate tan tlin a har ta. MP pawh tling turin political party ten an inrimsiak reng ta a nih hi. An thlêkna lam lam an tling zel tih tlang hriat a ni. He CAB hi dân a lo nih phei chuan chhim lam district zawng zawngah phungvelh ang maiin an lo pung hluai hluai anga, MLA leh MP election-ah pawh Zofate tan beisei bo a ni tawh ang. Chhim lam district changlo, Zoram lailiah pawh an rawn inzar pharh ngei bawk ang. Chuvangin Chakma CM kan la nei ruau lovang tih a sawi theih loh. Hman atang tawhin kan political party-te lahin an intlawnsiak reng mai a nih hi.

Bru pawh an huangtau sawt ang:
Aizawl, Mamit, Lunglei leh Lawngtlai district-ah te Bru voter-te sing chuang lai an awm tawh (Tripura state-a raltlante). Heng ho bakah hian an hnampui, u leh nauten “Zoram mi ka ni” tiin citizenship nihna an rawm phut anga, sawrkar phalrai zawng tak (vote duh vangin) a nih dawn avangin politician ten ihe lovin an lo pawm hmiah hmiah ang. An ni pawh hi phung velh ang maiin an lo pung thur thur dawn a ni. MLA hran nei khawp hialin an tam thuai bawk ang. Chutiang bawkin MP pawh an țan lam apiang an tling zel tawh dawn a ni. A reng reng thuah an ni hian Zofate min thata, min rukbo leh min sawisak hi tamtakte tan chuan an chawtui ber a ni.

Population leh economic-ah min chimral ang:
A chunga sawilan ang khian Chakma te hi Budhist sakhaw zuitute an ni a. Kei ni Kristiante angin fa neih tlem an inzirtir ve meuh lo. Tunah Zoramah hian nuai 1 deuhthaw an awm tawh a. Tunhma atanga kum 6 dân loa lo awm tawhte citizen an ni vek bawk ang. Chu chang a la ni ta lo cheu; Hengho hian an chipuite Zoramah an hruailut ru anga, Zoram hmun hrang hranga ram la awl deiduaiahte an inbengbel bawk ang. Kan ram awl thlawhhma kan neih duhna lai, kan nitin eizawnna ram pawh min rawn țawmpui anga, kan Keipui sahauh thei dawn silo. Chutiang bawkin zirna school, college leh university thlengin admission velah min chuhpui ngei bawk ang. Chakmate hi mi tumruh, ram leilung nghet nei lova raltlan thin an nih vangin eizawnna leh zirna lamah Zofaten kan tluk lohna a tam khawp. Civil service-ah lutin nihna pawimawh an rawn chelh bawk anga, an hnuaiah kan tu leh fa tamtak an la kûn ngei dawn. Chuvangin Zofate hian thim thuah hnih ni lovin thim thuah tam kan hmabak mêk a ni.

Zofa kristiante nêpchêp kan ni ang:
Budhist sakhaw zuitute hi Hindu unaute ai mahin an sakhuaah an nghet hle. A tam zawkte hi keini kristian intite angin hmui leh ka (mouth) chauha an sakhua vuantute an ni ve hauh lo. Gaya, Bihar-ah kumhnih dawn sawrkar hnathawkin ka awm ve a. Both Gaya khu an pathian, Lord Budha piantharna hmun a nih avangin an tan chuan Bethlehem leh Karvary tlang aia hmun thianghlim leh pawimawh ber a ni. An scholar te bakah an sakhaw hotu ber Dalailama pawh vawi 2 a rawn kal a. Kei pek chuan kan Kristian thurin leh Lal Isua chungchang ka sawipui ve khanglanga. A ni chuan, “Kristiante chu keini angin in sakhua in la urhsun lo. Khawvel ram hrang hranga Kristiante nun pawh ka hmu ve, in thlarau chhandamna tura invawnthianghlim aiin a tam zawkte chuan khawvel nawmsakna, changkanna, nun pawnlang leh hausakna chauh in ngaihtuah. Chuvangin hei tuna i hmuh angin America leh Europe ram hrang hranga Kristianten kan sakhua an rawn zawm tawh a nih hi. ‘Rawn zawm rawh u’ kan ti lo. Tha an ti a an rawn zawm mai a ni” tiin min hrilh hrep mai a ni. Kan hawivel chuan Budhist conclave chhim tura mipui sing 2 lai zingah sap an lo tam em lah tak a.

Chuvangin Chakmate hi Zorama an population nuai 3-5 vel a lo nih chuan Kristiante kan chêp hle ang.

Economic lamah chu chuti susû-in min chimral hmanhmawh lo mahse, kum 20 vel chhungin an hnawksak hman viau ang.

A sei ltk dawn tlat. Mahse, lastly but not least.
Zawlnei ni ve lo mah ila, CAB hi dân a lo nih chuan Zofate dinhmun tur hlimthlâ hmuhnawm loh tak ka mithla ve thiam tlat.

Chuvangin tun hi Zoram atanga illegal migrant te chhiarpui neia, dân lova awmte hnawhchhuahna hun remchang (golden chance) a ni.

Politician te u, nangmahni hmathatna, lalna leh thu neihna aiin nakin zêla Zoram leh a chhunga chengte humhimna turin hma la nghal vat teh u. He CAB hi Parliament thutkhawm, February ni 22-23 velah an sawiho leh dawn. NDA hian RS-ah majority nei lo mahse by hook or by crook-in pass an tum ngei dawn. Joint Parliament sitting pawh koh an hnialin ka ringlo.

Chuvangin Zoram illegal migrant-te hi detect vat ula, hnawtchhuak nghal teh u khai. CAB hi dân a nih hlauh chuan engmah in ti thei tawh lovanga, țhangthar lo la awmzêl turten an ngaidam thei lo ang che u. Hun tam in nei tawh lo. MZP hmahruaina hi a ropuiin an zahawm khawp. Amaherawh chu YMA hian conference-ahte hnam humhimna lam resolution an pass țhin avangin hmahruaitu tur ni awm tak an ni. Kan țhenawm state danga chengten mahni nunna hlu tak pawh ui lova CAB an dodal ang hian, Zofa zawng zawngte țangrual ila, hmâ i la tlâng vat ang u khai.

Aside | Posted on by | Leave a comment

CITIZENSHIP BILL ” LAPSE ” TIR THEIH A NI EM !? ( 12 1.2019 )

Kum 2008 atanga Global Economic Crisis intan khan vawin ( 2019) thlengin khawvel ram zawng zawng harsatna a la siam nasa hle. Economics harsatna karah tu Nations mahin Citizen pangai bak Foreigners, Illegal Migrants, Refugees te an Welcome hum hum thei tawhlo vek, Citizenship pek kawngah inkharkhipna uluk zawk kawng an dap vek lai a ni.

India Nation chhunga mirethei enkawl ngai kan tam tehlul nen, Citizenship lama Pakistan, Bangladesh leh Afghanistan a chengte tana ” Inhawn huau Citizenship ” kawngkharpui hawn sak tumna hi, chhungril takah chuan Vote Bank siam duh vang liau liau a nih hmel. Political Party tinin Vote ngah leh Sorkar kan duh vek si a. Ngatinge- Sri Lanka, Nepal, Bhutan, Tibet leh Myanmar an tel loh !? India Union chhunga Mizote tan chuan khawchhak lam hi kan Mizo Hnam leh Culture intanna a ni, Rihdil leh Khampat Bung, Thantlang, Tiau kama awmlai etc. Kawngpui lama kawngkapui in kalh sak a, In hnunglama kawngkhar in sah kuak sak tumnate pawh a ang hial a lawm le !

National Citizenship Act 1955 hi khawih danglam ni ta se, rangtakin W.Bengal State a Citizenship neilo mihring 100 lakh leh Assam State a 50 lakh bawrte Vote neihna kawng a in hawng nghal ang..NE States dangten Un-Identified Illegal Migrants kan kawl teuh hlawmte pawh Electoral Roll a kan thun a ngai vek dawn niin a lang, reilote chhunga India Citizen an nih theih zel tawh miau chuan..

Barak Valley- (Assam ) lama Mizoram Inner Line Forest Reserve ( MILFR) 509 Miles chhunga Illegal Migrants cheng zawng zawngte khu Citizenship pek an ni ang. An lokalna lam Social & Religious Documents neilo pawhin, thih hlauin ka rawn tlanchhe lut a, eng document mah ka neilo an ti zel thei ang, a humhim vek zel tawh ang. Mizo thangtharte tan MILFR chhung sawifel a harsa tawh viau thei ang. Mizoram khawthlang lamah Chakma, Bru te pawh an pung sawt dawnin a lang. Huat chikima Chakma & Bru te lo huat nghal ngawt lam chu thuhran. Mizote hi ” Haw Haw ” hmanga thu laimu bo thaka, a sir khel vak leh huat tur zawnga buai ching kan nia, a Bill zawk hi Mizote leh NE unaute tan thil tullo leh huatthlala tak a ni tih hriat a pawimawh ber ang.

Accords & Memorundum of Settlement hi- Naga, Punjab, Kashmir, Assam, Tripura leh Mizoram ten kan Signed hlawm a, kan lungawilo phun vek a nih hi..Article 371 G hi Mizoram State sawina a ni, “G” hmalam 371 A- B- C leh G hnungah State dangin Special Provision an nei ve duah hlawm tho a, Union Subject/ Union List chhunga Citizenships bawr hi a tello hlawm. Helai bawr chhampual vak vak hian awmzia a neih thui loh hmel..

Dan thar emaw Dan awmsa siam tha tur chuan Parliament inhnih, Rajya Sabha ( Upper House, The Council of State ) leh Lok Sabha ( Lower House, House of People Representative ) ten an Pass dun a ngai. Pass dun hnuah President of India in a pawmpuia Bill ni tawh lovin Act a lo ni thin. Sorkar lam Union Minister, Treasury Bench MP emaw Opposition MP pawhin Private Bill & Resolution an pulut thei..

Sorkarin Dan thar hlak emaw Constitution Amend ti danglam tura Bill a putluh dawnin a tlang theihna tur RS or LS ah an pulut hmasa deuh chawk. Sorkar lamin House chhunga Bill a putluh Vote hmanga a tlang leh siloh chuan No- Confidence anga Sorkar rinlohna phar tlak tluka ngaih a ni. Parliament leh Assembly ah pawh nise, Sorkar Bill putluh dawnin Opposition lam rilru thlir hmasak a tul..

Citizenship Act 1955 pawh Amend tumin BJP chuan mojority a neihna Lok Sabha ah pulutin, Bill a Pass ta phawt a. Rajya Sabha lamah chuan Opposition Party te mitmei enin a pulut ta lo phawt a. A chhan chu RS member 250 awm theiah tunah 239 an awm a, BJP 73 – NDA angin member 90 bawr chauh a neia, Session ah member te kal tha ta se, Pass tur chuan member 120 bawr thlawptu a neih a ngai. NE State ten kan duh lova Bill ti Lapse tur chuan RS chhunga pulut lo tur emaw, putluh a nih pawha House chhunga Opposition Party ten min Vote tlak sak a tul. Vote bank khel tlanga, a sakhua zawnga an thlir hlawm erawh chuan Bill dang ang bawkin a tlang thei tho..

Tun tum Rajya Sabha Session liamta khan Constitution Amend a nei nual a. Reservation Quota Bill pawh kha Opposition Party thenkhatin pawnlamah an dodal hlawm viau a, mahse, Bill kha Member 165 daihin an Yes Vote leh si a. Amendment Bill panga (5) erawh an pulut ta lo a, chung zingah Triple Taqlag leh Citizenship Bill hi a tel dun a ni.

Last Budget Session tun 31st January a tan turah hian Triple Taqlag Bill hi thlaruk atana President Ordinance Bill a nih angin a Lapse dawn a, putluh ngei ngai ang.

Citizenship Bill hi Sorkar laiin RS leh LS ah a thehlut a, Sorkar lai term chhungin RS chhungah Bill pulut leh si lo se, Lok Sabha Bill pass tur thehluh tawh term chhunga Bill putluh leh si loh a Lapse ang hian, RS lamah hian a Lapse ve thei em aw ? Kum 2010, Women Reservation Bill, RS in a pass kha, LS ah putluh lovin term tawp 2014 LS thar a pian khan a Lapse nghal, kha Bill kha Parliament ah a pian hmain a hlamzuih tihna a nih chu. Tuna Lok Sabha pass tawh Citizenship Amend tur Bill hi RS a pass turin a Valid zui zel thei ang em ? Helai bawr hi zirchian a va tha em aw..

May thlaah Lok Sabha thar a piang dawn a, sorkarna chelhtu chu tupawh nise, hemi hnua State Assembly Election kal chho turte, Rajya Sabha member-te term tawp hnawhkhah chhoh a, Party te Member neih danah India Politics a inher danglam chho viau ang em, kum 2024 hma chu BJP hian RS chhungah Majority neih theih dan a nei dawn lovin a lang.

Engpawhnise, Last Budget Session turah hian pulut lo phawt se a thaber phawt a. Chumi atan chuan RS chhunga Congress Party MP 50 nei leh Opposition Party dangte hian huaisen taka an dodal leh dodal tlang a tul ang. Chu chi kan innghahna tur an nih hmel..

State khat mai nilo, NE State 8 ten kan pawm theilo a ni a, chuvang chuan ” Citizenship Bill hi kan pawm theilo, kal tlangpui anih dawn chuan, NE State mipuite hian India nihna lairil kan hnaih/ tawmpui thei lovang ” tia a huhoa nawra lungrual tlan a ngai dawnin a lang..

Lalrozara Rz

Aside | Posted on by | Leave a comment

Kilogram tehna tidanglam dawn

KUM 130 LAI MAI HMANGA KILOGRAM TEHFUNG CHU KUM MAY 30 HIAN TEHNA THAR HMANGA THLAK A NI DAWN TA
(Science &Technology thlirzauna)
Er. Chhungpuia Renthlei

_Kilogram han tih hrim hrim hi chu kan hre fur awm e. Mahse, enge anih chiah tih leh eng hmanga an chhut chhuah nge tih erawh kan hre thuk viau lo maithei.A hmasain Gram leh Kilogram an teh dan han sawi phawt ila a tha awm e.

*Gram leh Kilogram

Bawm kil li nei, a chhunglam sanzawng, hlai zawng leh chhah zawng centimetre 1 vek (cubic Centimetre) chhungah tui(water) thun ta ila, atmospheric pressure pangngaiah tuiril anga a awm that theihna ber _melting point of ice (4 Celcius)ah dah ta bawk ila.Heta tui(water) inhlawmkhawm tam lam (mass) hi 1 gram tiin an vuah. Hei hi Kum 1795 kuma scientist te ruahman ang a ni.Tichuan, 1 kilogram chuan tui (water) 1,000 cubic cm inhlawmkhawm tam lam (mass) sawina atana hman a ni ta a ni.

*1 kilogram tlukpui tehna: Le Grand K

Amaherawh chu hetianga tui(water) hmanga standard measurement siam hi a buaithlak em avangin Kum zabi 18 na atang khan 1 kilogram tlukpui tehna atan Platinum thir tlawm mum an hmang leh ta a. Hei hi Le Grand K tiin an sawi bawk.

Tichuan, kum 1889 atangin standard kilogram atan International System of Measurement (SI) units ah an hmang ta a ni.He standard kilogram tlukpui tehna hi International Bureau of Weights and Measures laboratory, Sèvres, France khawpuiah uluk taka vawn that a ni bawk. Tichuan, vawiin thlenga khawvel hmun hrang hranga buk lung te hi hemi mil tura siam vek an ni.

Le Grand K leh tui(water)hmanga standard measurement siam hi a inmil leh mil loh kum 40 dan zelah an en that zel a ni thin.

*Engvangin nge tehfung thlak a ngaih tak?

Kum 1989 khan 1kg tehna hmun hrang hrang a mite aiin 50 micrograms laiin he Platinum thir tlawm mum hi a zang zawk tih hmuhchhuah a ni. chhan ni ber a an sawi chu he Le Grand K hi an environmental factors hrang hrang ( sik leh sa) avangin atoms a hlauh then theih vang niin National Physical Laboratory (NPL)chuan an sawi. Kan innghahna ber a dik loh takah chuan khawvel ram tina kan buk lung hman te hi a dik lo tihna a ni ber mai. Nitina kan hmanna naran angah chuan eng tham nilo mahse, thil rit tak tak ah Ton za telah phei chuan a diklohna hi a tam tham khawp ang. Tin, Thil zang lutuk tak angah leh scientific & medical research angah erawh chuan thil pawi tak a ni thei .

Tehfung thar tur Planck’s constant chu

Tichuan, He harsatna sukiang tur hian Kum 2011 a General Conference on Weights and Measures (CGPM) chuan fundamental physical constant pawimawh tak, Planck’s constant hmanga tehna standard siam an rawt chhuak a. Planck constant hi kan hriat theih dan awlsam ber chuan, tehna pathum, meter, kilogram leh second hmanga thil sakhat thil mur te thei ber atom chetvel dan leh khawsazia sawina a ni. Hemi hmang hian Speed of light tluk zet a chaka meter leh second teh theih anih avangin kilogram nih phung pawh a rintlak zawkin a dik zawk em em tura ngaih a ni. Planck’s constant hi physics mithiam, Bryan Kibble a siam chhuah Kibble balance instrument hmanga teh a ni.

Engtikah nge tehfung thar hman anih dawn?

Nikum 2018 khan International Bureau of Weights and Measures ten an buatsaih, ram hrang hrang 60 palai kal khawmna CGPM 2018 chuan lungrual takin an pawm ta. Tichuan, kumin World Metrology Day May 20, 2019 atang hian Kilogram tehna atan khawvel pumpuiah International System of Measurement (SI) units thar, Planck’s constant hi kan hmang dawn ta a ni.Keini mizoram a kan hman ang chi buk lung te hi chu a ngaiin kan la hmang tho anga, Rihzawng uluk leh dik taka teh ngaihna Measurement khawl leh buklung hrang hrang te erawh siam rem a ni ang.

Tehfung leh mizo te
Tehna han sawi takah chuan ka han belh hram duh chu Kan rinawm loh vang leh rilru that loh vang a Kan nitin sumdawnna leh bazara thil hralh leh leina ah ringawt pawh bukna dik loh vang nilova, hrereng chunga kan buk dik loh luih te han ngaihtuah chuan Scientist ten tehfung dik leh hman tlak ber duhin hetiang hian nasa takin hma la mahse keini kristian rama cheng Pathian nung ringtu inti te ah chuan bukna dik neih chu ala harsa dawn hle mai.

Planck’s constant hmanga Le Grand K tehfung thlak ai mah hian Pathian rinna thinlung dik tak nena kan rilru dik lo leh pamham kan thlak a, moral reformation kan neih hi a pawimawh hle mai.

Aside | Posted on by | Leave a comment

THISEN MAN LAK CABINET-IN TITAWP

Vawiin khan Chief Minister Pu Zoramthanga hovin Council of Minister chuan Chief Secretary’s Conference Hall-ah sawrkar department hrang hrang atanga rawtna pawimawh ngaihtuah a ruahmanna leh thutlukna siam turin an thukhawm.

He Cabinet Meeting hian Mizoram chhunga recognized blood bank a thisen dah khawl te chu a mamawhtu damlo te hnenah a thlawn veka pekchhuah turin a rel a, heihi hman nghal tur a ni. Sawrkarin a sawngbawlna man chawi ngai awm te chu a tum dawn a ni.

Meeting-ah hian kan hma lawka Republic Day leh Chapchar Kut lo awm turah mipui ten thlamuang leh hlim tlang taka hun an hman theih nan January ni 15 atanga March ni 10 thleng Dry Day chu hman zui turin rel bawk a ni.

Vawiin Council of Ministers thukhawm chuan Lok Sabha in Citizenship Amendment Bill 2018 a pass chu pawi an ti a, he Bill hi Rajya Sabha ah paih tlak a nih ngei nan Mizoram sawrkar chuan a theih ang angin hma la se tiin a rel.

Kaplian-pachuau

Aside | Posted on by | Leave a comment

Zawnchhuah Zoram makzia hi !

Zawnchhuah Zoram makzia hi !

  • Lalremliana Pachuau

Kum zabi 18-na hunah khan India ram chu a chiri nuaih a. Mughal lalram chu kil tin aţangin lalram tenau zawkte’n an tihbuai chamchi bakah ram leilung inchuhna avangin an indo mup mup reng a.

Tin, kum 1757 aţanga khan East India Company thuhnuaiah awm ţanin India map-ah Mizoram a la lang pha lo. Kan ram chhak lama Burma pawh kum 1752-1885 chhûng Konbaung Dynasty hnuaiah a awm a. kum 1886 khan Rangoon khawpuia hmangin India Province pakhatah a siam chauh a.

Ngun takin han mitthla ta la, India ram a buai mup mup bakah Burma ram changtlung tak inkârah tuma hriat loh leh tlawhpawh hauh lovin ram nuam tak, Mizoram hi a lo awm ve ringawt mai a. Kan pipute khan kum zabi 16 vel khan Kabaw Valley aţangin Khampat an rawn kai a.

Tichuan, kum zabi 16-na laihawl velah Mizoram hi an rawn luah ta niin History chuan a ziak a ni. Sawi tak ang khan hetih hun lai hian kan ţhenawmah Reng Lalram ropui tak a lo ding tawh a. Engtin nge ram nuam tak mai hi tuma’n luah tumna chhe tê mah an neih tlat loh ni?

Ex 11:10 In va luah tur ram chu, in lo chhuahna Aigupta ram, thlai huana chî in tuh a, in kea tui in leih ţhinna ang a ni lo va: in va luah tur ram chu, tlâng te leh ruam leh van ruahtui dawng ram a ni zawk a. In ram ruahtui chu a hun rakah, ruahtui tla hmasa leh ruahtui tla hnuhnung chu ka pe ang che u, a tih hi Israel ram khu angin i hria em? Ruah hmasa leh hnuhnung nei ram dang an awm em ni?

Mak ta chu hei hi a ni; Tharum thawh ngai hauh lo, thlantui pawh luang hek lovin leh dotu pawh pakhatmah hmachhawn lohin he ram kan luahzia hi i ngaihtuah tawh ngai em? Pathian thuin, Lalpa in Pathian zawn chhuah ram a ni; a lo tih ang ngeiin he ram hi kan hnam tâna Lalpa’n min pêk, a zawlnei hmasate kaltlanga kan hnena rawn inpuang ta a nih hi.

Chakma, Tuikukte chuan he khawvelah hian ka ram tihtur pakhatmah an nei lo tih kan hria. Chutih laiin keini erawh chuan tlang leh ruam, ramngaw hung chhuah ram, sik leh sa duhthusam kan lo neih ringawt dan hi chhut chian chuan a mak tih loh rual a ni lo.

Pathian thuin, ‘Ram tam takah ka tidarhna a, rei lote chhûngin an lo thlenna ramah chuan an tân hmun thianghlim ka ni ang,’ a tih hi pawm lo thei kan ni lo. He ram hi kan ta, pi leh pute’n thisen hmanga an lo humhim ţhin a ni a. Chuvangin Pathian thu vekin Thufingte 22:28 kaltlanga, ‘In pi leh pute’n hmakhawsânga ramri lo kham chu sawn suh u’ min lo tih ang takin he ram hi kan humhalh tlat tur a ni reng a ni.

Mi tam tak chuan Pathianin a bik taka min zawnchhuah kan nih hi an ring lem lo. Ngaihtuah chian erawh chuan kan ţhenawm ramte hi chhut teh khai. Tripura chu Bengali hovin an luhchhuah tawh a, Meghalaya pawh Nepali hoin an ţawmpui tak khu. Manipur lah chu hnam hrang hrang awptu nei niin Nagaland leh Arunachal pawh an bang bik chuang lo.

Kan ram erawh chu chutiang a la nih si lohzia ngaihtuah chang hian Lalpaah lawmthu sawi tur reng kan lo ni. |awng hmun khat, vai rim nâm hlek lo, a thlûk pawh hrang nalh, nunphung lah danglam hlak kan la nihzia leh a khât mawi tawka harhna chang reng mai leh zawlnei kaltlanga vaukhanna thu dawng ţhin awmchhun chu Israelte leh keini chauh lo chu hnam dang reng reng an awm ngai lo a nih hi!

Aside | Posted on by | Leave a comment

Kohhran Kalsualna – I

Kohhran Kalsualna – I

(Thil tihsual thup nâna thilpêk thianghlim lo Pathianin a pawm lo !)

Lalremliana Pachuau

Kohhrana thawhlawm a kum telin a pung tial tial a, kohhran mi leh sa, pachhiate erawh dawmkanin an awm si lo. Kohhran a lian tual tual a, a ro tulh tulh thung a. Zaipawl video a changkangin a hmuhnawm tial tial a, Thlarau lam nun erawh a chawm thau lem hlei lo a. Inkhawmpui hautak pui pui hmangin ro kan rel kan ti a, mihring nun erawh siam ţhatin a awm si lo. Tun dinhmunah phei chuan kohhran tam zawk hian Thlarau thianghlim ai chuan sum leh paiah rinna kan nghat lian ta zawk mek a nih hi!

Amosa hun lai hi BC 8-na hun laihawl, Judate lal Uzziah leh Israelte lal Jeroboam-a hun lai niin kum 15 chhûng ro an rel a. Chumi chhûngah chuan mipuite chu tun ang mai hian inkhawmpui buatsaihin inthawina pawh an la uar hle a. Ram pawhin hma a sawnin ei leh bara mahni intodelh turin theihtawp an chhuah bawk a. Mahse, mi rethei leh pachhia, fahrah leh hmeithaite erawh ngaihthahin an awm si a. Chutia thil ţha tia an inngaih lai tak chuan an hnenah Pathianin Zawlnei pawh inti ngam lo Amosa chu an hnenah vaukhanna thu sawi turin a tir ta mauh si a ni.

Mahse, Amosa lah mi tê ber, ranrual vengtu mai a nih piah lamah he tih hun laia an puithiam Amazia-a lah chuan Jeremia chuan lal hnenah a lo la hek zui a! Amosa lah chuan tim eih lovin Israel ram chhûnga mi awmthei, ţhenawmte hmangaihna nei si lo, midangte chunga hleilenna kalpui ţhin, mahni ţanghma chiah haitute hnenah Pathian thuchah a va sawi ta a. Mahni nawmsakna an ngaihtuah luat avangin midangte tân aw tih nun chu an bosal tial tial a. Pawn lama an lan dan maiah chu mipuite chu an la hmuingil phian bawk a, mahse an sual an sim duh hauh si lova ni.

Tin, heng mite hian tangkaruain mi felte an hralh a, pheikhawk bun khat lekin tlachham an hralh duh hial a. Mi retheite chunga vaivut takngial pawh an it miau avangin Pathian meuh pawh a mang a ang ta a ni. Amosa kaltlangin a lungawi lohna a puang ta a. ‘In kûtte ka huain ka hmusit a, in inkhawmpui urhsûnahte chuan ka lawm hek lovang. A ni, in hâlral thilhlan leh in buh min hlan mah ula, ka ngaihsak hek lovang’a ti ta hmiah mai a! Sam ziakah chu chu tihian a lungawih lohna chu a rawn nemnghet ta a ni. Sam 40:6 Inthawina leh thilhlan chungah hain lawmna reng i nei lo va’ tiin.

Lal Uzziah-a, Hezekia leh Ahaza lal lai pawhin Israel fate sualna chu hetiang bawk hi a nih avangin Pathianin a zawlnei kaltlangin a lo vaukhan tawh bawk a. Isaia 1:11-ah chuan, ‘Lalpa chuan, “In inthawina zozai hi ka tân eng nge a ţangkaina awm? Thilpêk mai maite chu rawn keng tawh suh u; englo rimtui chu ka tân thil tenawm tak a ni. Ka ngai thei tawp lo mai, inkhawm ropui tak pawh hi! Ka tân hnawksak tak a ni, tuar ka ning tawh e!’a ti thlawt mai a ni. Hei hi tuna Zoram dinhmun dik tak chu a ni reng a ni. Thil ţha ti emaw kan intih reng lai hian Pathian chuan min lo ning ngawih ngawih a lo ni reng si a!

Kan dinhmun dik tak a nih chianzia kan hai palh a hlauh êm avangin Isaia 1:23 kaltlangin, ‘In mi liante chu hel hmang, rûkrute ţhian an ni a; mi tinin tham an duh a, lawmman an um ţhin. Pa nei lote ro an relsak ţhin lo a, hmeithaite thu lah an hnen a thleng ngai hek lo’ tiin a sawi a. Mi lian a tihte zingah hian kohhran mi zuk tam ber a! Heng mite zingah hian thilpêk kaltlanga Pathian lawmzawng sawi tum phei chu thler tinah an awm tak hi! Chung mite pawh chu Malakia kaltlangin a rawn khak zui ta khauh mai a. Malakia 1:8 – ‘Inthawi nân (ran) mitdel in hlanin sualna a awm lovang maw? A kebai leh silawngin hlanin sualna a awm hek lo maw? in chungah lawmna reng ka nei lo a, in kut ata thil hlan chu ka pawm hek lovang!’ a ti hmiah mai a nih hi!

Eirûk sum, khehpuam pawisa, dan lova sumdawnna rah, ruihtheihthil hralhna man Lapa’n a pawm lohzia mai chu rapthlak tak a ni! Mal 1:13 ‘Tin, ngai teh u, a va ninawm êm! In ti bawk a, hneh chhuha in thil lâkte, a kebai te, a silawng te in rawn la a; chutiangin thilhlan chu in rawn la a: Chûng chu in kut ata ka pawm dawn em ni? LALPA chuan a ti’ tiin eirûk pawisaa missionary lo chhawr ve ngawt te, mite hmuha thianghlima lan tumna te, vantlang bum nâna sumpai ui lote chu kan Lalpa tân hian an ninawm ngawih ngawih a ni zawk! Kohhrana neih bak bak thawh ngawtah Lalpa a lawm lo!

Kan ramah eirûkna, khehpuam, zu zuar, ruihtheihthil zuar, dan lova sumdawng hausate hlei hlei hi kohhranah an thusa ta tih mai tur a ni zo tawh a! Mi fel leh dik, sumpai lama neinung si lo tân kohhran upa nih mai maite chu a khirhkhan zo ta! Heng mite hian khawtlang leh kohhran tân an sumpai leh ro neih an ui lovin an thilphal êm êm a. Sawma pakhat tam tak thehlutin kohhranah dinhmun pawimawh tak takah sum hmangin an inlei tling mek a nih hi! Kohhran lah chuan, ‘Pathian hnena thilpêk an duh miau chuan keini lo thlauhthlak a rem lo’ tiin lawm takin kut tling lova sum lakluh lawm lawmah kan ţang ta hial mai!

Lalpa thinûrna chu mei alh ang maiin a nâ ta a nih hi! Jer 6:20 ‘In hâlral inthawinate lawm tlâk a ni lo va, in inthawinate chuan mi tilawm hek lo.’ a ti ta fak mai a. La duhtawk mai lovin Mal 1:10 kaltlangin, ‘In chungah lawmna rêng ka nei lova, in kut ata thil hlan chu ka pawm hek lovang; Sipaihote Lalpa’n a ti’ a la ti ta deuh deuh a! Mahse, Zoram kohhran, pawnlama ţhat ngawlvei, chhûngril kawrawng si leh sum ngainatna bawiha tang mekte erawh chuan kan biak Pathian lungten zawng tak hi hnawl ahnekin kan chawimawi ţhin zawk a lo nih hi!

Lalpa erawh chuan hei hi a ni a duh! Is 48:18 ‘Aw nangni hian ka thupêkte chu lo ngaithla ta ula chu aw! I chunga remna chu lui ang maia awmin, in felna chu tuifinriat fawnte ang maiin a awm tûr’ tiin. Sum thianghlim lo hmangin Pathian tihlungawi theih a ni bur lo!

Aside | Posted on by | Leave a comment

Mafaa leh Chuauthuama te hi

TUNLAI THIL AWMZIA
-Johana, Farkawn

Kan tunlai Zoram khawvel titi tam ber (issue) lian ber ber chu citizenship amendment bill 2019 leh Revd. Chuauthuama Vrs Mafaa (L) te chungchang hi an ni a. Engpawh nise heng thil pahnihte hi kan duh emaw duh lo emaw khawhawi zau deuhte tan chuan hriat loh der chu thil zahthlak ang lek lekin a lang thei. Chutia social media zawng zawng deuh thaw a luah takah chuan Revd… Vrs Mafaa chu ngaihdan tlem sawi ve teh ang a hun lai a ni bawk a.

Revd. Chuaua hian Mafaa thlah nan thu chu a ziah zawng a ziak ngei mai. Mahse amah thlah nana ziaka lang siin literature khawvela Mafaa a lo buan hneh loh thinna chu mipuite hnenah amah thiam inchantir nan an thu in chuh thin eg. Doxology chungchang leh thil tam tak te inphen nana hmangin Mafaa chu a mimal nun chak lohna a rawn hlim ta vak mai a. A rin loh lamah a fans tam tak te a chan phah ta a ni.

Engpawh nise, Mafaa leh Pu Chuaua literature khawvela an in danglam hleihna leh an insan hleihna chu Thomas de Quincey: ‘the literature of knowledge and the literature of power’ atang hian sawi intum teh ang. Pu Chuaua hi a thuziak reng reng a bikin a lehkhabu leh a article te kan en chuan hriatna tizau thei chi thu ziak (literature of knowledge) lampang deuh vek a ni awm e.
Chutih laiin Mafaa ve thung chu a thu ziak reng rengte hi hriatna tizau thei lam ni lovin hringnuna mitin rengten harsatna kan intawm lunglenna, hmangaihna leh hringnun chingchivet chin darhna lam pang (literature of power) vek hi a ni thin. De Quincey a sawi dan chuan Literature of power hi a chungnung zawk.

Mafaa, De Quincey a sawi dana a chungnun zawkna chhan chu. Literature of knowledge (Pu Chuaua literature) lampang ziak reng reng hi chu hun a in her danglam dan a zirin a in thlak lo thei lo a ni. Entirnan Pu modi-a hi Prime minister a ni reng dawn lova. A nih loh hnu chuan a chanchin hi ngaihven a ni reng dawn lo a ni. Prime minister thar chanchin zawkin ngaihven a hlawh leh mai dawn a ni. Chutih laiin Mafaa leh a kutchhuakte erawh chu hringnun chingchivet thiam taka phochhuahna a nih thin avangin mihring kan awm chhung chuan tupawhin kan hrethiam anga. Kan hlut tial tial ang.

Khai le Pu Chuaua leh Mafaa hi an khawvel a hrang ve ve a. Pu Chuaua hian Mafaa a thlahna chal delh deuh rana a ziah hi ti chhuak lo se chuan literature khawvel-a an in epna thin zawng zawngah chungnung zawk chu Mafaa zawk hi a nih zia hi heti tak hian mipui thin lungah a thar lovang a. Pu-a hian a chungnung zawkzia lan tir a tumna lamah a hniam zawk zia chiang leh zualin a rawn lan tir ta zawk a ni.

Literature khawvel atanga ka thlirna ve mai mai a ni e

Aside | Posted on by | Leave a comment