SYRIA CRISIS: UN SECURITY COUNCIL-AH RUSSIA THU PUT LUH AN HNAWL: “RALTHUAMTE HMAN TURIN A INPEIH RENG E”-USA

Nimin April 14, 2018 a UN Security Council emergency meeting neiha Russia-in Syria beitu ram pathum US, France leh Britain demna thu resolution a siam chu hnawl sak a ni. US Ambassador to UN Nikki Haley chuan, “Syria-in chemical weapons a hman zui leh chuan kan ralthuamte chu hman theih mai tura peih saa chhawp/ dah (locked and loaded) a ni e” a ti.

Vote lakah ram 8 zetin a dodal zawngin vote an thlak a, Russia thlawptu hi Russia, China leh Bolivia chauh awmin, Ethiopia, Kazakhstan, , Peru, Equitorial Guinea in vote an thlak lo (abstained) a ni. Russia hian Syria chungchangah UN Security Council hi vawi 12 zet veto power hmangin a lo paih tawh a, tun tumah a chak zo ta bik lo a ni.

UN Security Council member ah a nghet US, UK, France, China leh Russia awmin, a nghetloa inchhawk chi angin ram 10 an awm mek a; a chunga ziak loh zingah Kuwait, Poland, Sweden, Cote d’Ivore, Peru leh Netherlands te an awm

President Donald Trump chuan Syria kaptu France leh UK chu fakin, “remhria leh fing” a ti a, “Mission Accomplished!” tiin Twitter ah a ziak. US, UK leh France ramten Syria’s che ucal weapons site- dahthatna, scientific research center leh command post te chu missiles 105 zetin kah sak a ni.

Lt. Gen. Kenneth McKenzie, Pentagon thupuangtu chuan hetianga Syria beih a nih hian mihring nunna chanlo leh tuarlo tur zawngin hmun thlan bik kah a nih thu leh, “Zing dar 3am (local time)ah kah tan an ni a, tam tak chuan heng chemcal weapons dahna hmun leh vengtute hi an tam a rinawm loh a ni” a ti.

Antonio Guterres, UN Secretary General chuan, “Cold War” vawi hnihna a intan chho niin a sawi. US, UK leh France thiltih hi Canada leh Israel sorkar bakah, NATO ram 27 ten an fak a ni.

Author: CT Lalrinawma

Advertisements
Aside | Posted on by | Leave a comment

Singapore a awmte leh mifel ten tanpui ngai tanpui

Vawiin chhun khan Kolasib Hmar veng naupang, Danny kum 5 mi puala Singapore-a Mizo hmeichhia hnathawka awmte pawisa thawhkhawm cheng singkhat leh, thianpa K Lalthanzama’n min thawn pawisa thahnem tak bakah PUMP hruaitu pahnih Pi Liansangluri leh Pu Ronald Sangtea te tanpuina pawisa chu Pathian hmingin, Falkawn Referral Hospital-ah kan va hlan leh a. Lawm avangin an biangah mittui a luang leh.

Danny hi a pian tirh atangin a tai/pile lamah nerve lam fel lo a awm avangin a mawng atangin a e thei lova. Ni 4 mi lek a nih laiin zaipui/major operation a tawk nghal a ni. A pumah a ek chhuahna tur pipe vuah sak a ni a, thla riat hnuah a mawng lama a ek chhuah theih nan surgery tih tura ruahman a ni. Vanduai thlak takin thla riat hmain a puma a ek chhuahna tur doctor ten an siam sak chu a ping ta tlat mai a. Nasa takin a pum a puar a, a ka lamah a ek te a chhuak hial thin. Operetion hautak tak hmachhawn lehin hmasawn deuh tura an beisei laiin, a ril lam fel lo avangin a digestion a buai a. A thil ei te chu a ngai ngaiin a ekah a chhuak thin. Kum 5 mi a ni a, zai pui vawi 7 a hmachhawn tawh a, a vawi 8na tur a hmabak mek a ni. Danny hi tlema a hriselna a kan deuh chang chuan naupang hlim thei tak a ni a. A dinhmunah a vui ngai lo.

Danny hi a nuin pa tel lova a pawm a ni a. A pi hovin an hmeithai. Kolasib Hmar venga an inah eichawp dawr chhete an nei ve a, chu chu an innghahna a ni. Zaipui hmachhawn ngai reng mai enkawl nan an dawrte hian mamawh a phuhruk zo lo. Thenawm khawveng, tlawmngai pawl leh Kohhran ten theih ang angin tanpui ve thin mahse a mamawh a daih seng lo a ni.

Vawiin vek khan Lawngtlai District-a Vaseikai khaw mipa naupang kum 9 mi, April ni 6, 2018-a an sikul bula electric current in a man, Esauva, a ban tawn tawn tan bulh chu kan tlawh nghal bawk a. Esauva hi unau pathum zinga mi lai niin class 3 zirlai a ni. A nu leh pa te hi thingtlang lo neia eizawng an ni a, engmah neih neilo, mangan tawpa Falkawn damdawiina rawn tlutlut rawih an ni. MSR charity account atangin singkhat kan hlan a, thianpa K Lalthanzama tanpuina bakah PUMP lama kan hruaitu Pi Liansangluri leh Pu Ronald Sangtea te pawisa kan hlan bawk.

Author: Vanneihthanga Vanchhawngᅠ

Aside | Posted on by | Leave a comment

KOHHRANA THAWHLAWM THAWH ZAT TAR LAN HI

Mizoram kohhran hrang hrang te hian sawm a pakhat leh Pathian ram kan tih ang chi, thla tina kohhrana kan pêk zat ang chi hi record ah kan vawng a, mi zawng zawng hmuh theih turin a petu hming leh an thawh zât kan tarlang ṭhin a ni. Hei hi a va han ṭha lo teh reng em! Hmeithai rethei an zak viau thei a, eiru hausa an chapo phah viau thei tlat.

Tin, hetianga thawhlawm thawh zat târ chhuah hian eng nge a tum ber? Kohhran sum bawm tih khah tum luat avanga ṭan lâkna chi khat a ni thei ang em? Kohhrana sum chhûn luh tam te hi mi ṭhenkhat inel rûkna a ni thei mai ang em?.

Lal Isua hunlai pawh kan tlukin ka hre meuh lo. Mi hausa te thlâk zat dik tak leh hmeithai tangka thlâk zat pawh kha Isua khan a lo hria a ni mai a. A zât hriat tumah in an hriatpui loh vin báwm ah an thlâk tawp mai niin a lang. Kohhran hian bawm siam se la, miin a phal ang chu thlâk mai rawh se. Chuti chuan mihring ni lo, Pathian chauhin sawma pakhat pe leh pe lo chu a hria ang a. Mihring mit hmuh ni lo va Pathian hriatpuina chauh a sawm a pakhat petu chuan malsawmna pawh a chang nasa zawk ngei ang.

Aside | Posted on by | Tagged , , | Leave a comment

SAKHAW RAWNGBAWLTUTE HI K. Vanlaruati Vesper

Pathian thu chuan, “Kan buante hi tisâ leh thisen an ni si lo” a tih mek laiin Synod hnuaia Evangilist pakhat Pu David Hmar Thiek chuan BJP a buan thu kan hmu hnem ta malh malh hle mai. BJP member thenkhat, tisâ leh thisen nei, hming pawh nei a buan nasa mai. Ani chuan Kristiante humhimna tur atan a thawk a inti a, mahse hriatchian loh pakhat a nei. Chu chu ‘Political party pakhat a bei’ tih hi. Kan Synod hnuaia thawk rawngbawltu thenkhatin BJP an rui leh ta! Hmanah pawh Zu an ruih vak tawh kha!

Pastor leh Evan tam takin ram an vei a, a lawmawm em em. Anni hian hmangaih takin ram mipuite leh Sorkar thleng pawhin zilh an ngaihna ah pawh zilh in, an thlarau boral tur venpui chungin an tawngtaisak bawk tur a ni. Chu chu mipuiten kan sakhaw rawngbawltu te lak atanga kan beisei a ni. Sakhaw rawngbawltu chuan a beram te nun chawm turin, an thlarau chhandamna atan a hnathawk tur a kan beisei laiin Party pakhat a bei chiam chiam mai hi Synod lam atanga thu hmu a post anih te kan ringhlel rum rum mai dawn alawm le! Synod hnuaia thawk a ni si a!

Tin, kan rawngbawltu thu post kan hmuh atanga lang chiang tak pakhat chu kum 2014 atangin BJP kaihhruai sorkar kan nei tawh a, kum 4 dawn a sorkar ta. Hemi kum chhung zawng hian BJP hlauhawmzia hre reng chung siin engvangin nge Inthlan kan hmachhawn dawn ah kher kher hetia a rawn chet chiam? Muangleiin kum 4 a thu tawh a, khang hun zawng zawngah khan mipuite a hlauhawmzia min zirtir thei lovem ni? A beram te pawh thihna kotlanga an dah hunah chauh em ni chanchintha hrilh a tum?

Kristian ram kan ni a, rawngbawltu sang chuang fe kan nei. Politics group a party pakhat bei a rak rak hi amah lo midang an awm kan hre tawh em? Mipui siamthatu tur zawk a kan ngaih hian engatinge a hlauhawmzia min hrilh reng? Hremhmun hlauhawmzia min hrilh chamchi a vanram kawng min kawhhmuh duh si lo nen danglamna a awm lo.

Tin, kan pu hian Politics leh Sakhuana a hre hrang lo hrim hrim. POLITICS A KAN ZAWN BER CHU SAKHUANA NI LOVIN MIPUI HAMTHATNA LEH HMASAWNNA A NI. Chu chu political party tin inzawrhna pawh a ni. Hmasawnna zuar theuh theuh, a thenin Congress, MNF, BJP an zawm a ni mai a, a tha ber tur a an hriat BJP ah pawh an awm.a ni mai a, lo huat vak kha a tul em ni? He kan huatna hi Secularism palzamna a ni zawk em? Eng political party ah pawh awmin, eng pawlah pawh awm ila ka sakhuana chu sawi loh, ka kohhran awmna hi ka sawn ka ring lo. MNF a i awm avang khan Presbyterian i nihna kha Baptist kohhran ah i inleh phah dawn em ni? Teuh lo mai.

Tin, ‘BIBLE tihbo an tum’ tih thu te phei hi chu thil awihawm loh a ni. BIBLE hi khawvel huap a lehkhabu ropui ber a ni a, USA phei chuan Bible chung a kut nghatin an President thar ten thu an tiam thin. India in khawvel ram hrang hrang thian a siam tumin Pu Modi pawh a teikual reng a, Bible hi tibo ta se Kristian ramin an haw dawn a ni tih hre lo tur khawpin kan PM hi a â love.

Eng sakhaw puithiam emaw, rawngbawltu in emaw political party a beih hi bansan sela, an beram thlarau boral tur hi hneh takin veng sela, chawimawina lallukhum dawng turin thawk sauh sauh zawk teh se.

Pu David Hmar pawh a rawngbawl lehzelna turah duhsakna ka hlan e.

Aside | Posted on by | Leave a comment

Tleirawlin mi vithlum

April 13th, 2018 zan dar 11:20PM vel bawr Khan Aizawl Electric Veng church street ah Rodinsanga Chhinga veng chu vih a ni a, Hospital panpui a nih hnuin a boral.

Thudawn danin Rodinsanga kum 36 mi hi Zion street a nepnawi zuar thin, tunhnaiah Aizawl New Market velah furniture lam leh a tul tul thawka inhlawh thin niin an nu Chhungi pawh chawhmeh zuar a ni a, nizan dar 11PM vel khan Electric vengah hian tleirawl pakhat (Lalruatpuia nia hriat) in putar chemtea a lo tin chu hmuin ‘Hetiang tur a ni lo e’ tiin a khap chu, tleirawl chuan Rodinsanga zawk chu kuai kunin a vit ta pawp pawp a, a awm velah hmun thum li velah a vit a, a vittu hi a tlanbo nghal a, Rodinsanga chu Civil Hospital panpui a ni a, hospital thlenpui anih hian awmzia a awm tawh lo a ni. Police te chuan a vittu a rinhlelh Lalruatpuia hi an man tawh a ni.

Rodinsanga hian a nupui chhungi leh fa mipa 2 a kalsan a ni. Rodinsanga vittu hian midang pakhat pawh a malpui leh kutphahah a vit nia sawi a ni bawk.

Aside | Posted on by | Leave a comment

Bairabi Zophai ah dan loa insak a tam

Zophai report :-Raphael Lalrinmawia

Nimin ni 12-13 / 4 / 2018 a inner-line reserve forest area chhunga danlo a insak etc… (Illegal structure) endik mek a danlo a din 108 lai Zophai chheh vel mai ah pawh hmuhchhuah tawh a ni a, hei hi Bairabi lam a ni a, Baibun leh a chhehvel pawh hmabak ala thui khawp mai.

Tunah hian Mizoram team leh Assam team te endikna ah hian MZP leh JAC on inner-line reserve forest demand hruaituten an tawiawm a, group li ah A,B,C,D a inṭhen in an thawk mek a ni a, khua a lum hle ni a report a ni.

Heng illegal structure zawng zawng hi Assam lam Siam leh tih vek ani a, kar leh lam hian Vairengte lam bagha leh a chhehvel endikna neih tur a rin a ni.

Party leh pawl mal hamthat nan a tuman hman loh nise, tin, ngaihdan hran hran hi lo Siam loh ni bawk se a lawmawm ngawt ang.

Zophai mai ah pawh heti a nih chuan square miles 509 huam chhungah phei chuan engzat tak hmuchhuak ang maw?

Kan RAM leh hnam tan hian rilru hmunkhat Pu ila, party atchilhna bansan ila, central lamah kan RAM a nih thu ah tangrual ila, kan sawrkar pawn forest department kan nei that tawh avang in kan lo enkawl ve tawh ang e tih mai hi kan sawrkar tih tur a ni.

Aside | Posted on by | Leave a comment

AIZAWLAH GARRAGE NEI 49,213 AN AWM, NEILO 657 HREM TAWH

Aizawl khawpuiah Local Council ten Vehicle Census/Garage an neih atanga an chhinchhiah danin, Garage nei 49,213 an awm a, tun thlengin Garage neilo man 657 hrem an awm tawh.

Transport department chhinchhiah danin, Local Council ten Vehicle Census/Garage an neih atanga a lan danin, tun thlengin Garage la neilo 3,228 an la awm a, Garage neilo leh zan lama kawngpui kama lirthei dah endik hna chu Traffic Police te leh Local Council ten ngawrh takin an thawk mek a, kawngpui kama zan lama lirthei riah, Garage neilo man te hi dan anga hremna pek thin an ni.

Transport department tarlan danin, Aizawl khawpuia lirthei pung zelin khawpui a tihtawt vanga chet vel harsatna tih ziaawm nan sorkarin ‘Aizawl Traffic Jam Free’ policy a kalpui mek a, kum 2010 atang khan traffic jam zual zel tur ven lawk nan Transport department chuan Mizoram MV Rules 1996 siam danglamin, ‘Lirthei register tur chuan a lirthei dahna tur garage an nei ngei ngei tur a ni’ tiin thuchhuah an siam a; 2013 October atang khan dan hi hman tan a ni.

Aside | Posted on by | Leave a comment

SSA sum a lapse em

PU LALSAWTA LEH Dr. LALTHANGLIANA TE CHUNGCHANGA ENQUIRY COMMITTEE THUTLUKNA KHA

By Sanghnuna Hlawndo

Social Media hrang hrangah he thu hi a khat tawka sawilan a la nih reng avangin ngun takin Enquiry Report kha ka han zir chiang ve a.

He thu lo intanna chu ni 21 leh 23 March 2012 ah Assembly-ah Dr.Thangtean kum 2010-2011 atana School Uniform Grant Rs 743.16 lakhs chu a lapse a ni tih thu a sawi a, a finfiahna document a thehluh vang a ni a. Chu chu Pu Sawtan a lapse lo, document pawh hi a lem (fabricated) a ni, a ti thung a. Inhnialna sosang zel karah a daw zawk zawk chu MLA atanga banah an incho tawn ta a nih kha.

A chhui turin Speaker-in Enquiry Committee hetiangin a din ta a:-

  1. Lalduhoma ZNP – Chairman
    2.Lalthlengliana MNF – Member
  2. P.P Thawla MDF – Member
  3. Lalthansanga MPC – Member
  4. R. Lalrinawma MPCC – Member

Enquiry Committee in a chhui tur chu (1) Uniform Grant a lapse leh lapse loh leh (2) Dr. Thangtea document chu a lem a nih leh nih loh fiah a ni.

  1. LAPSE LEH LAPSE LOH CHUNGCHANG:

(a) SSA sumte hi Manual on Financial Management and Procurement hnuaiah a hman dan tur ruahman a ni. Grant hi chi hnih a awm a, Non-recurrent Grant leh Recurrent Grant an ni. Non-recurrent Grant hman bang chu “Spill Over” tih a ni a. Recurrent Grant hman bang chu “Outlay Saved” tih a ni. Uniform Grant hi Recurrent Grant a nih avangin an hman bang chu “Spill Over” ni lovin “Outlay Saved” a nih chu.

(b) Manual Para 47-na chuan Non-recurrent Grant hman bang chu a kum leh a hman atan rin nghal tur a ni tih a tarlang a. Manual Para 91.1 chuan Recurrent Grant hman bang chu GOI ah refund a ngaih loh thu leh a kum leh atana rin (carried over) tur a ni tih chiang takin a tarlang bawk.

(c) Manual atang hian SSA Grant- te hi an lapse ve ngai lo tih a chiang tawk viau va. Kohhran sum ang hian kum tawpa an hman bang chu a kum leh Opening Balance-ah a lut nghal zel a ni. Enquiry Committee hian kum engemawzat chhunga SSA Budget te hi an en a, an sum hman ban chu a kum lehah an ring zui zel tih leh a lapse ve ngailo tih chu an finfiah a ni. Kum 2010-2011 chhung pawh hian SSA hian sum hman bang Rs 2232.53 lakh lai an nei nghe nghe a, chu chu a kum leh 2011-2012-a an Budget-ah Opening Balance-ah a lut vek tih pawh finfiah a ni.

(d) Uniform Grant hi 2010-2011 atanga pek tan a nih avangin hemi kum hian State sawm (10) chauhin an hmang hman a ni. Mizoram SSA phei chuan hemi kum hian an dawng hman lo hrim hrim a, a kum leh 2011-2012 Financial Year-ah, ni 2-4-2011 ah an dawng chauh a ni. Lapse tur sum kha a la awm lo hrim hrim a nih chu.

  1. DOCUMENT LEM A NIH LEH NIH LOH CHUNGCHANG

Dr Thangtea khan a lapse ngei tih fiahna document a nei a, chu document-ah chuan “Lapse” tih column pawh awmin, Uniform Grant Rs 743.16 lakh chu lapse column ah tarlan a ni.

Enquiry Committee chuan chu document ang chu Mizoram leh Central lamah an hmu zo lo va. Amah Dr Thangtea ngei chu khawi atanga a neih nge tih an zawt a. Dr Thangtea chuan Committee hmaah, chu document chu official document a nih loh thu leh a thusawi tifiahtu atana aman a siam chawp a nih thu a sawi a ni.

  1. COMMITTEE THUTLUKNA HI:

Uniform Grant a lapse lo tih leh document pawh a lem a ni tih a chian tehreng nen, “Dr Thangtea hi a thiamlo a ni” tih mai awm tak a nih laiin Committee hian a pehhel dan an dap ta zawk tih a chiang hle.

Committee chuan Uniform Grant chu a lapse lo ti chungin, khami kum khan Uniform hi lei hman a nih tak loh avangin, naupangin an dawng hman miau lova, a lapse ti duh tan chuan a lapse tih ve theih tho a ni a, thudiklo hulhual a ni bik lo tiin a tlang an kawm ta a ni.

Document pawh a lem a ni ngei an tih rualin, he document-ah hian column pakhat te chauh hi a a lem lai chu a ni a, a dang zawng hi chu a dik vek avangin, a pumpuia document lem chu a ni bik lo an ti leh ta bawk a.

A khaikhawm nan “Paradoxical truth” a ni e an ti a ni. A eng zawng zawng pawha dikna lai nei ve ve an ti a ni.

Enquiry Committe rilru ni awm hi a rin theih viau. A dik lo zawk zawk MLA atanga bana incho an nih avang khan, banna tham em nia an hriat si loh avangin Dr Thangtea humhim dan an dap a ang ta ber mai.

He Committee member zinga 4 hi Opposition Member an ni bawk si a. MNF leh MDF te phei chu Legislature Party pakhat hnuaia awm an ni lehnghal a. Ruling MLA awmchhun pawh hian mahni member puite ban theihna tur a nih avangin zah a ngai ve pawh a ni thei. Lo oppose ta pawh ni se awmzia a nei chuang lo vang, Assembly Committee reng rengte thutlukna chu a tam ber ngaihdana siam tur a nih avangin. An Chairman ber Pu Duha mimal taka puh chhiat tum pawh hi politics-a inbeihna mai mai a ni bawk. Chairman in veto power a nei lo.
50:50 tih tawngkam lar tak hi he Report-ah hian a lang miah lo va. chanchinbu mite chherchhuah ni zawkin a lang bawk.

Committee hian action lak theihna an nei lo va. An report bawhzui chu sorkar tih tur a ni. Sorkar pawhin bawhzui tul a ti ta lo a ni ang e.

Aside | Posted on by | Leave a comment

MNF SENIOR VICE PRESIDENT PU TAWNLUIAN CONGRESS SORKAR CADC SUM TAMTAK KHAWIH CHINGPENAH A PUH

MNF Gen. Hqrs. Sr. Vice President Pu Tawnluia chuan April, 11, chawhnu dar 2:30 khan Hnam run ah Press mite kawmin Congress sorkar chu CADC sum thahnem tak khawih chingpenah a puh.

Press mite a kawmnaah Pu Tawna chuan Chakma Autonomous District Council-a sum thahnem tak chin hriat lova, CADC, Congress sorkar-in, a chheprelh nia rin chungchangah vawiin chawhnu dar 1 khan Mizo National Front chuan Mizoram Governor Pu Nirbhay Sharma an hmuh thu a sawi a. Mizoram Governor hnenah hian Governor Rule-a CADC dah a nih hma lawka Congress sorkar-in CADC sum, nuai sangkhat leh sawmhnih point paruk bial a hmuh atanga za zela sawm ruk, cheng Nuai za ruk sawm pahnih, point pathum, paruk, chin hriat loha, a chheprelh chu ni thum chhung ngeia Accountant General chhuichhuah tir tura ngenna a thehluh thu a sawi a. Larsap pawhin a ngai thutak hle niin a sawi.

He sum bo chhungchang hi hriat a nih veleh Mizoram Governor hnenah hian 28.3.2018 khan Kamalanagar MNF District hminga lehkha thehlutin chhuichhuak turin ngen a lo ni tawh a. Hei bakah hian Dt. 9.4.2018 khan MNF General Hqrs hmingin Governor hnenah vek hian he sum bo chungchang hi chhuichiang tura ngenna thehluh a lo ni tawh bawk a ni.

Pu Tawna chuan “he sum an chheprelh hi Congress sorkar hian Chakma Autonomous Dictrict inthlan April ni 20 a neih tura in lei tlin nan hman an tum niin MNF chuan kan hria a, hei hi tha lo kan tiin kan theihtawpin dan kan tum a ni. Kan ngenna ti hlawhtling tur hian na takin hma kan la dawn a ni” a ti.

CADC inthlanna neih tur chungchangah Pu Tawna chuan “Autonomous District Council inthlanna tur 18 Fultuli biala MNF Candidate Pu Sunir Tongchongya dan tlawhchhan sawi tur leh ziah tur hre si lova hnawl (disqualified) a nih chungchang chu Gauhati High Court-ah thlen a nih thu a sawi a. Dan lo anga hleih nei taka Returning Officer-in he biala Congress candidate tlinga puanga Certificate of Election hial a lo issue tawh chu High Court chuan vawiin hian stay order a ti chhuak ta a. He bialah hian inthlanna felfai tak a awm ngei MNF chuan beiseina sang tak a nei a ni” a ti bawk.

Press mite zawhna chhangin Pu Tawnluia tawiawmtu MNF Legal Board Chairman Pu J.Lalremruata Hmar chuan MNF Candidate Pu Sunir Tongchongya, disqualify a nih theihna tura Congress party hmalak duh dan chu Dan tlawhchhan mumal lo leh dan bawhchhiatna a nih thu sawiin hetianga thil a kal takah chuan helai bialah hian bye election neih ngei a la tul tur thu a sawi.

Pu Tawnluia hi Pu J.Lalremruata bakah MNF Media and Publicity Secy. Pu Lalthanzuala Hnamte leh party worker thenkhat ten an tawiawm a ni.

Aside | Posted on by | Leave a comment

VAWK NATNA HRILENG AVANGIN MIZORAM CHHUNGAH KUMINAH VAWK 1146 THI TAWH

ᅠAnimal Husbandary and Veterinary Deptt. in a chhinchhiah danin kumin chhunga Vawk natna hri hrang hrang leng mek avanga Mizoram puma Vawk thi tawh zat chu 1146 a ni.

AH&Vety Department hnuaia Disease Investigation hotute hnen atanga thu dawn danin tun hnaia vawkna natna hri leng mek Porcine Reproductive & Respiratory Syndrome (PRRS) leh Swine Fever vei chhinchhiah chu Mizoram chhungah Aizawl District, Champhai District leh Serchhip District-ah te a tam a. Kolasib Lunglei leh Mamit lamah a ziaawm viau a, Saiha leh Lawngtlai District lam chu hriatchian a ni lo.

Disease Investigation hotute atanga thu kan dawn danin Vawkna nat PRRS vei leh vei lo endik hna hi ngawrh taka thawh mek a ni a. Kumin chhungin vawk 1161 chu PRRS an vei ngei a ni tih hmuhchhuah a ni tawh a. Vawiin chhun pawh khan Kawlkulh, Saitual Lunglei leh Aizawl atanga sample lak a nih atangin vawk 10 chuan PRRS an vei tih hmuhchhuah a ni.

Vawk natna hri leng mek PRRS chu India ramah a damdawi a awm loh thu leh a enkawl theih dan ber chu a hrileng laka inven a nih thu AH&Vety hotute chuan an sawi a, PRRS vei Vawk chu natna dangin an man buai lutuk loh nan taksa tihchakna vitamin lam pek thin an nih thu an sawi a. Hri dang leng ve mek Swine Fever erawh ran vulh Vawkin a thihpui ngai meuh loh thu leh a in danna Vaccine pawh Vawk sing nga 50,000 daih tur an leikhawl tawh thu an sawi bawk.

Vawk hrileng mek PRRS, Mizoramin a hmel hriat tanna chu kum 2013 March thla laihawl vel kha a ni a, kum 2014 leh 2015 ah te PRRS vei Vawk an awm hriat a ni lova, a hnu kum 2016-ah he Viral Disease PRRS hi a rawn lang chhuak leha kum 2017 khan a reh leha kuminah hian a lo lang chhuak leh ta niin AH&Vety hotute chuan an sawi a, PRRS lan chhuah kumahte hian a tlang puiin March, April leh May thlaahte a ni tlangpui a ni.

Disease Investigation hotute chuan vawk vulhtute chu hri danna lak ngaipawimawh tur leh Vawk In leh a vel vawngvai tur te, PRRS vanga Vawk thi mihring ei tura hralh lo turtein an chah a. Ram pawn atanga Vawk lakluh pawh sorkarin a khap avangin dan bawhchhe lo turin an chah bawk.

Author: Vanneihthanga Vanchhawngᅠ

Aside | Posted on by | Leave a comment