HMACHHAWN NGAM NULA TESTIMONY by Dr. Hrekima

Ni 4.8.2017 zan khan hmeichhe pakhatin min rawn bia a. A titi hi a ropui tlat!

Ka pu, thil pakhat rawn hrilh ve che ka duh a. Nikum laihawlvel khan ka rai thu leh ka chhungte ka hrilh ngam loh thu ka rawn sawi kha. Ka raina pa pawh a cancer tih thu ka rawn hrilh che kha. Tichuan nikum (a ni chu ziah lansak lo mai ang) khan New Life Hospital-ah Pathian awmpuina avangintluang takin fapa duhawm tak ka nei ta a. Mahse kumin (a thla thupsak leh ang) khan ka naute pa chu vanduaithlak takin a boral ta a. Ka sawi tum ber chu pai tlang ngam lo khan ka lo titla ang tih ka hlau leh hnuhnawh hle. Kan hlimna ber a ni ta si a. I thurawn min pekte avang khan ka lawm tak zet a ni. Chuan lawmawm ve deuh chu a ruka naupai thenkhat hian ka hnena thurawn lak an rawn ching ve a. Huaisen taka mahni thil tihsual tawh hmachhawn tur a ni tih thute ka lo hrilh chhawng ve thei ta hi ka lawm a ni. Ka lawm e. God bless you,”

He nu hi tunge a nih ka hre lo. Kan inbiak pawh ka hre tawh hek lo. Mi ka hriat theih loh bakah min rawn betute ka hriat reng lohte hi an tan pawh a tha ve bawk!! He nu chanchin erawh hi chu hriat reng pawi ka tih loh zawng tak a nih avangin hriat reng ka han dil a. “I chanchin rawn sawi hi sawi chhawn, ziah chhawn i phal em? I hming leh veng pawh ka hre tawh lo bawk a,” tiin.

“Phal tehreng mai. Thil thleng leh a nih tawhna chu thup a ngaihna pawh ka hre hran lo. Ka nihna hi a danglam thei chuang dawn lo va, tu paw’n hria se a pawina pawh a awm lo ve,” a rawn ti ta lehzel a. He hmeichhia hi a huaisen zek mai!
“Kan vengah pawh thu i rawn sawi tawh a, mahse ka awm loh lai a nia. Hmanniah TV-ah an chhuah nawn leh a. ‘Tah khan naute pa pawh a zai ve nghe nghe asin!” a rawn ti a. Ka va khawngaih reuh e.

“I naupai chu titla suh ka lo ti che em ni?”
”“Aw, ti e. Dam chhunga i inchhirna tur engmah thil ti suh ang che tiin min hrilh bawk. Hlau lo tur leh hmachhawn ngam turin min hrilh bawk kha. Ka rilruah khan i rawn lang nasa em em a, Pathianin i awka kha a hmang ni berin ka hria, huaisenna ka neih phah ta kha a nia,”

“Rilru nat chang chu ka ngah thin khawp mai, ka hun tawn tawhah te. Nat chang pawh ka la nei zel dawnin ka ring. Mahse a harsa ber lai ka paltlang thei tawh a ni a, engkim hi Pathian zarah leh ka chhungte vangin ka paltlang vek thei zel dawn tih ka hria a. Ka nuna ka neih ngai loh huaisenna nasa tak ka neih phah ta hi ka lawm hle. I thurawnte hi keimah anga mi dangte paw’n hlawkpui nan an hman zel hi ka duh. Dam reng ang che,” a tih zawm ta zel a.

“Phone-in kan inbia nge, ka hnenah i lo kal?”
“Message-in ka rawn bia che. Hostel-a ka awm lai a nia. Tumah hrilh ngam ka nei lo va. Ka tawngtai ngam lo bawk a. Ka beidawng lutuk kha vawi tam intihhlum ka tum a. Tichuan zak em em chung chuan ka tawngtai ve ta tawp mai a, ka room-ah chuan. A hnuah ka rilruah ‘Dr Hrekima’ tih ringawt a rawn lang a. FB-ah ka zawng ta tawp che a. I wall ka en kual chuan mamawhte tana i number i lo ziah kha ka hmu fuh ta a. Ka rawn be ve ta tawp che nih kha.”
Chuti zawng chu!

Hmeichhe chesual, tlanchhiat tum, boral daih châk khawpa zak leh rilru na, huaisen taka khawvel hmachhawn ngam leh ta zawk a, lo hlim ta em em chanchin ngaihnawm chu! Mahni pal hnawk hmachhawn ngamte hi ‘Ngaidamtu Pathian’ hian a pui duh ngei a lo nih hi!-

Source–Zalen

Aside | Posted on by | Tagged , , | Leave a comment

CHAWNGTE AH MZP LEH CHAKMA INNAWR, MZP TREASURER IN HLIAM A TUAR

Vawiin khan Chakma a pawl hrang hrang huaihawtin Chawngte ah tun hnaia Chakma te MBBS leh BDS zir tur MZP in a dodal duhloh nan kawng an zawh.

Kawng an zawh tur thu hi hriain Aizawl leh Lunglei atangin MZP hruaitute chuan chawngte an pan a. Tukin khan meeting neihpuiin kawng an zawh tum chu thulh turin an ngen a. Mahse Chakma te hian kawng zawh an tum chu an kaltlangpui a. BDO hnenah memorandum thehluh an tum a ni.

He memorandum an thehluh tur hi hriain MZP hruaitute hian BDO office kawtah an lo dang a. Chakma lam hian lung a rawn tawng ta in, MZP treasurer in hliam a tuar a. memorandum an thehluh tum erawh hi chu MZP hian an chhuhsak thei ta thung a ni. Chuan Chakma te hi an insaseng ta a.

He thu ziah lai hian Chakma lam hi tam lehzual an inpunkhawm leh mek a. Engtin nge boruak a kal zel dawn hriat a ni lo.

Hmun hrang hranga an member te leh Mizo te a tul huna che chhuak thei turin MZP chuan an chahin, a ngen a ni.

Aside | Posted on by | Tagged , , , , | Leave a comment

Chakma ten midang tan a rukin UID siamsak ţhin

Kum 2016 atanga Lawngtlai district a buaipui tawh, Bio Metric Enrollment chu nimin thleng khan ngawrh taka kalpui chhoh mek zel a ni a.

Tun dinhmunah hian Lawngtlai distrcit chhunga mihring, mi nuai 1 sing 2 & 4,696 atangin mi sing 8 & 2585, za zela 66.22 in Aadhar enrolment an ti tawh.

Lawngtlai district ah hian kum 2016 atang khan Aadhar enrolment hi neih tan a ni a. Nikum lam khan ISS company in Aadhar enrolment hi an buaipui a, hemi hnu hian Dec ni 13 2016 atang khan GAD, Government of Mizoram hnuaiah DC Lawngtlai chu enrolment agency atan ruat anih ang in theihtawp chhuah in hma lak chhunzawm mek a ni.

Agency hmasa khan mi 43347 zaa 43.76 enrolment an la hman a, tunah hian Lawngtlai district chhunga target population mi 124,696 atangin mi 82585 zaa 66.22 in Aadhar enrolment hi an ti tawh a, agency te hian Lawngtlai district puma Aadhar enrolment tih vek tumin theihtawp chhuah in hma an lak mek a, tun dinhmunah hian aadhar enrolment titu te hi operator 19 an awm a, anni hi block tinah kalin action plan mumal tak nen aadhar enrolment hi an buaipui a ni.Aadhar enrolment tihna atana helaia data an lakkhawm te hi internet hmanga hmunpui lama thawn thlak thin a ni a, Lawngtlai-ah internet duhthusama a that loh avang leh khawl lam chian loh thin avang te in duh ang leh beisei ang in hna hi a chak thei lova, tin, kum hmasa lamah mipui tam tak in kan ngaihpawimawh tawk loh avangin tun dinhmunah mi kan inhnawh tawng deuh avangin hna hi a kal chak hleithei lo niin thawktute chuan an sawi. Hei bakah hian Lawngtlaia internet a that tawk loh avangin data tam tak chu a in thawn zo thei lo a, hei vang hian aadhar chhuak lo tih te hi a awm thin tih thawktute chuan an sawi bawk.

Hetihlai hian, India-a Chakma awmten, Bangladesh a an chhungte Aadhar card siam sak thin niin Tlabung Sub Hqr MZP te chuan thuchhuah siamin an sawi a.

MZP Sub- Hqrs Tlabung chuan tun hnaiah India sorkar in ration card nei tawh phawt chuan Aadhar card neih tur a tih angin, Tlabung leh a chhehvelah pawh Aadhar card chu siam mek zel a ni a. India khua leh tui dik takte tana siam tur a nih laiin, Chakma thenkhat ten, Bangladesh a awm an Ration card hmanga lo siam sak ve thin an awm an ti a. Hetianga Chakma te an mahni leh mahni an induh sak fo a nih chuan MZP Sub-Headquarters Tlabung chuan India chakma leh Bangladesh Chakma chu an mahni leh mahni inthliar hranna an neih a nih dawn loh chuan MZP Sub-Hqrs. Tlabung chuan Chakma Foreigner ang vekin a en dawn an ti.

Tlabung chu International boundary a awm a nih vangin Chakma te a bikin India citizenship neih tumin an bei nasa hle a, a then phei chu luihnar lamah kal chho deuhin mi rin hlelh kai nilo awm taka awm in voter ID card an neih ve leh khawchhung velah in bengbel an tum mai thin an ti a.

He thil hi en uluk leh zual turin thuneitute MZP Sub-Hqrs Tlabung chuan an ngen tih an sawi a, Foreigner ten India a an chhung te, Aadhar card siam sak tum thin chu India dan bawhchhiatna a nih avangin hei ai hian Aadhar card siam na kawngah fimkhur leh zual turin India khua leh tui dik tak chauh in an neih theih nan thuneitute MZP Sub-Hqrs Tlabung chuan a ngen a ni.

Aside | Posted on by | Tagged , , | Leave a comment

ENGVANGINNGE AN LAM LE..(Hmaa Hlondo)

Zanin chu Inkhawm ban Kohhran Zaikhawmna lamah ka tel ve a, (Mission vengthlang Kohhran) Zaikhawm 100-150 zet kan ni, kan Kohhran hi kan vannei em em a, 2014 November thla vel atang khan Pathianni zanah kan la Zaikhawm thei zela, zanin boruak pawh a la tha hle mai.

Zanina ka mit la deuh mai chu kum lama la naupang ve tak hmeithai 2, thla tam tak pawh a la liam lo an pasal te an sunna kha.

Mahse lam tualah an theih ang tawkin Lalpa an faka, an lam reng thei mai kha mak ka ti a ni. Engtinnge an lam an lam theih zawk le ? An pasal thi ta te kha an ngai vaklo tihna emiang le ?A teuhlo mai, an pasal te kha engkimah an innghahna a ni ve tak meuh meuh tih ka hriat mai bakah tun hnaivaiah pawh ka tlawh ve ve a, an lungleng lutuk kha an mittui a hul hleitheilo tih pawh a hretu ka ni lawi si.

Hei hi anlo hria niin ka ring ta ber mai..
Vuivai reng mai hi Setana thurualpui dan hnaivai leh awlsam ber a ni a, an awmdan apianga Lalpaa lawm tum lui tlat zel mi te hi Setana hian tih vak ngaihna a hre derlo ani tih hi.

Harsatna hi chuan Khawvela kan la awm ve si chuan tumah hi min kiansan ngai dawn reng reng lova, a chhanna kan lungawina khawp kan hmuhchhuah theih ngai reng reng loh tur thil te pawh hi a lo thleng fo dawn.

A chhanna kan hmuhchhuah theih siloh leh pumpelh theih tawh bawk siloh thila engatinge hetiang kher kher hi ka chungah alo thlen bik ? Chutiang khatiang chuan lo ti ila chuan hetiang dinhmunah hian kan ding biklo tur.

Hetiang nun hahthlak in bawhbeh tir reng hian an nunah eng rah tha mah a chhuah ngai dawnloh avangin an thil duhloh an ta ni ve tura an chunga lo thleng laklawh tawh si chu duhlo chung pawha pawm thiam mai an tum tlat a ni ngei mai.

A en tur dik an en a, Mahni Inkhawngaihna in an nunah eng rah tha mah a chhuah dawn chuanglo tih an hriat avangin na chung pawhin Lalpa an fak lui zel zawk alo ni. Lalpa duhzawnga engkim dawnsawn an tum tlatna rah hi an seng ngei dawn a.

An nunah Lalpa hian Fahrahte, retheite, Hmeithaite Lal, Pa leh Pathian a nih zia a lantir zel hian ka ring tlat a ni.

Author :
Dingdi

Aside | Posted on by | Tagged , , , | Leave a comment

CHAWNGTE-AH KAWNG AN ZAWH DAWN

Medical course zir tura National Eligibility Entrance Test (NEET) paltlangtu Chakma zirlaiten an zirna an țan vat theihna tura hma la tura Mizoram Sorkar nawr nan, naktuk hian Chawngte-ah kawng zawh an tum.

Chakma Autonomous District Council (CADC) huamchhunga Chakma pawl hrang hrangte chuan, Mizo Zirlai Pawlte hmalakna avanga counselling nei tur Chakma zirlaite dan tum an nih hnu-ah, NEET kaltlanga medical course zir thei tur ten an zirna an la țan lo niin an sawi a, MBBS leh BDS zir tura inziak tling Chakma zirlaite chu an luhna tur medical college theuh an zawm thuai theihna turahma la turin Mizoram Chief Minister pawh an lo ngen tawh a ni.

July thla tawp lama țhukhawm CADC-a Chakma pawl hrang hrang hruaitute chuan, Chakma zirlaiten an luhna tur medical college-a an zirna an țan vat theihna tura an ngennain awmzia a neih loh avangin na zawka Mizoram Sorkar nawr an rel a, Mizoram Sorkar hotute kar nan, naktuk hian Chawngte-ah kawng an zawh dawn a ni.

DDK-AIZAWL 6/8/2017

Aside | Posted on by | Tagged , , , | Leave a comment

Biate khua a vawkpulhri lengah vawk 35 aia tlemlo a thi

Biate khua a vawkpulhri lengah vawk 35 aia tlemlo a thi tawh a, vawkpulhri leng hian zia-awm lam a pan tawh nia thudawn a ni.

Animal Husbandry and Veterinary department hotute chuan vawk damlote taksa leh thisen la a endik a nih hnu-ah July thla bul atanga Biate khua-a vawkpulhri leng hi vawk hri leng tlanglawn, classical swine fever a ni tih hmuh chhuah a nih thu an sawi a. Tunhnaia Champhai khawpui-avawkpulhri leng nen a in ang niin an sawi.

Biate branch YMA president Pu Remkunga chuan an khua a vawk natna leng hi a thawk rang hle niin a sawi a. Nikuma PRRS len lai kha chuan vawk kha rei deuh tak enkawl hnu-ah a thi thin a, tunah chuan rei damlo hman lovin a thi thut zel niin a sawi. Vawk thite hi a phumna hmun ruahman-ah phum nghal zel a nih thu a sawi bawk.

Hmanni a Champhai khawchhunga classical swine fever lengah khan vawk 170 chuang a thi niin Champhai District Vawkvulh Association hruaitute chuan an sawi a. A hloh hnem ber chuan vawk 15 a hloh a ni

Aside | Posted on by | Tagged , | Leave a comment

Union Minister hlui M Venkaiah Naidu chu India Vice President thar atan thlan a ni.

Union Minister hlui M Venkaiah Naidu chu India Vice President thar a ni dawn ta a. Mohammad Hamid Ansari a thlak dawn a ni.

Nimina Vice President inthlannaah M Venkaiah Naidu hian a khiangpui Gopal Krishna Gandhi chu vote 272-in a hneh a. India Vice President 13-na thlannah hian vote thlak thei zinga za-a 98.21-in vote an thlak a ni.

Vice President thlanaah hian NDA candidate M Venkaiah Naidu leh Eptu candidate Gopal Krishna Gandhi-te an inkhing a. New Delhi-a thuthar thehdarhtute hnenah Returning Officer Shemsher K Sharif chuan Naidu-a hian vote 516 a hmuh thu leh a khingpui Gopal Krishna Gandhi chuan vote 244 a hmuh thu a sawi a ni.

Venkaiah Naidu.

Inthlannah hian vote 785 zinga vote 771 a tla a. MP 14-ten vote an thlak lo a ni.Vice President atana thlan thar tak M Venkaiah Naidu hi August ni 11, zirtawp ni khian rinawmna thu tiamtira lakluh a ni ang. Naidu-a hi tun sawrkar kal meka Housing and Urban Affairs and Information and Broadcasting Minister a ni.

M Venkaiah Naidu hi July ni 1, 1949 khan Andhra Pradesh Nellore district-a thingtlang khaw pakhat Chavatapalem-ah a lo piang a. College a kal lai atanga mipui vantlangte hamthatna lam ngaihven mi a ni a, loneimite leh mi hnuaihnungte ngaihven zual mi a ni. Hetiang mi a nih avang hian thlalai tak a la nih lai atangin vantlang thil leh politics-ahte a lo inrawlh chho tawh a ni.

Aside | Posted on by | Tagged , , | Leave a comment

MIZORAM GAZETTE by Dr. H.T.C. Lalrinchhana

• NECS Chhiah awldan a lo diklo?
• Gazetted awmzia.
• Gazetted notification chhuah dan.

OFFICIAL GAZETTE CHI HNIH TE:
Tunhnaia thu inchuh thenkhat avangin Mizoram Gazette nihphung ţhenkhat hi kan hriat tlan atana tarlan atul awm e, Official Gazette hi Sawrkar chanchinbu/tlangau ti a sawi theih pawh ani awm e. chumi a nih avang chuan hun bi neia chhuak chanchinbu a ni miau a, Mizoram Gazette hi kan lo chik ngai a nih chuan a hnuai ami ang hian chihnih (2) in an chhuah thin:-

1. Mizoram Gazette, Published by the Authority tih tawp → Hei hi a hunbi pangngai a chhuak a ni a, sawrkar hnathawk transfer, posting, appointment adt. an chhuah tlangpui.

2. Mizoram Gazette, Extra Ordinary → Hei hi chu a hming ang hian Mizoram Gazette a hunbi a chhuak a tarlan sen loh chu emaw, hunbi cha nghak hman lova chhuah a ni leh a. A bikin Act te, Rules adt. an chhuah leh tlangpui.

OFFICIAL GAZETTE LEH RAM CHHUNG DAN:
India Constitution leh chu Constitution in thuneihna a pek leh a tuk ang dungzuia dan siam te chu Act ani emaw, Ordinance ani emaw, Regulation a ni emaw, Rules a ni emaw, Notification ani emaw Order a ni emaw Office Memorandum adt. a ni emaw dan (law) kan tih hi an lo ni ta a. Dan ‘Act/Regulation/Rules’ kan tih te hi Parliament emaw Statelegislature (keini ah chuan Legislative Assembly) emaw District Council te hi ram danpuiin a siam theitu atana a ruat an ni a, chu chu saptawng chuan “Legislation” an ti a, chuti ang Act emaw Regulation a ni emaw in thuneihna a pek (Power to make Rules/regulations) ang huang atanga inkaihhruaina/rules chuti ang Act leh Regulations te ti puitling tu tur emaw kalpuina tur chu Parliament emaw Legislative Assembly nilo in sawrkar in a lo siam leh thei thin a, chu chu ‘Delegated Legislation’ an ti leh bawk.
A tlangpuiin heti ang Rules ilo te hi Parliament emaw Legislative Assembly thutkhawmna hmasa ber ah pharh (lay) thin a ni chauh thung.

Sawrkar Department emaw thuneitu ten thupek(order/notification adt.) an siam chamchi ţhin hi Parliament emaw Legislative Assembly emaw District Council te emaw adt. dan siam theitu tlingte dan siam bung leh chang tan chhan nei chauhin heti ang thupek (order/notification adt.) hi an siam thin tur a ni a, a sapţawng takin ‘Sanction of law’ telin heti ang thupek hi siam tur a ni. Chuti ang nilo a, dan bung leh chang tlawhchhan lem nei silo a, thupek (order/notification adt.) chhuah ngawt hi dan (law) a tlinglo tih a ni bawk. Heti ang a lo nih hian rorelna court lamah hnawl tura put luh a ni ţhin.

Dan ‘Act/Regulation/Rules’ te hi section 1 emaw Rule 1 na ah a dan hming, a huam chin leh hman tanni tur (Short title, extent and commencement) tarlan a ni ţhin. Chuti ang dan kan sawi te hman tanni tur chu chi hrang hrang in an tuk ţhin a, chungte chu:-

1. This Act/Rules shall take immediate effect (Heti ang a siam a nih chuan Official Gazette a chhuah a nih hma pawhin hman tan nghal a ni a, Gazette a chhuah hma leh tlaiin awmzia a nei lem lo)

2. It/They shall come into force on its publication in the Official Gazette (Heti ang dan siam ah chuan Official Gazette a chhuah hunah chauh hman tan tur a nih avangin in Official Gazette a chhuah tlai leh hma in awmzia a nei hle).

3. It shall come into force on such date as the government may by notification in the official gazette appoint (Sawrkar in notification hran chhuahin a hman ţanni tur a la ruat ang a, chu notification chu official gazette ah chhuah ngei ngei bawk tur a ni) Adt.

OFFICIAL GAZETTE HLUTNA:
Sawi tawh angin sawrkar thu pawimawh chhuahna a ni miau a, Official Gazette a chhuah chu a sapţawng takin “Authentic” a ngaih a ni. Official Gazette a chhhuah zawng zawng erawh dan (law) a ni vek chuanglo ang, entirna’n, Mizoram Hnam Dan, 2005 kan tih mai chu mipui vantlang hriat atan (for general information) Mizoram Gazette ah chhuah ani a, mahse, a hman ţanni tur te ruat a ni lo in, dan siam theitu tling te kaltlanga siamchhuah a nih loh vangte emaw rorelna ‘Court’ ah chuan dan anga hman ngawt theih a ni lo e, tih a ni chawk.

A awmzia berah chuan dan siam theitu tlingte dan siam emaw, sawrkar thuchhuah siam theitu tlingte ngeiin an thuchhuah in official gazette ah chhuah a nih ngei a ţul an ti a nih loh chuan official gazette a thuchhuah te hi sawrkar hriattirna puanchhuahna (general information) ang mai a ni te pawh ti ila dan (law) mitah chuan a dik mai awm e.

NECS CHHIAH AWL CHUNGCHANG LEH OFFICIAL GAZETTE:

NECS te chhiah an awlna dan bung leh chang Mizoram Value Added Tax, 2005 hnuaia section 47 (1) hi a nih ang ang hian en ila:-
“47. Exemption of certain sales and purchase
(1) Subject to such conditions as it may impose, theGovernment may, if it is necessary so to do in the public interest, by notification in the Official Gazette, exempt anysales or purchases made to or by a class of dealers or persons specified in the said notification from payment of the whole or any part of any tax payable under the provisions of this Act and such exemption shall take effect from the date of the publication of the notification in the Official Gazette or such other earlier or later date not earlier than the 1st April, 2005 as may be mentioned therein.”

Sawrkar in chhan leh vang ţha tawk, mipui vantlang ţhat tlanna tur a nih chuan bi leh cha fel taka tuksakin inlei leh hralh thu ah emaw, sumdawng pawl bik tute emaw tan emaw leh hriattirna a tute emaw tan bik an chhiah pek tur pumpui emaw a ţhen azar chauh emaw hriattirna (Notification) Official Gazette ah chhuah ngeiin chhiah a awl thei a, Official Gazette a chhuah hma pawh in chu Notification a tarlan a nih angin a taka chantirna (effective date) chu Notification chhuah hma daih atanga chhut leh/hman theihin (retrospective effect) siam theih a ni ang, chu erawh chu Dt. 1st April, 2005 aia hmalam daih aţanga ‘effective’ chuan a siam theih loh tih ang vel a lo ni.

NECS chhiah awlna hi Notification No. J. 19012/2/09- TAX/Pt- I, 11th July, 2017 anga siam a ni a, rang takin Dt. 14.7.2017 ah Mizoram Gazette, Ext. Ordinary, Vol. XLVI IssueNo. 347 chhuah nghal a ni nghe nghe.
He notification ah hian Notification a chhuah hma in chhiah awlna hi a taka lo chantirna tur tarlan a nih loh avangin Dt. 11th July,2017 hma emaw Dt. 14.7.2017 hmalam ah a taka lo chantir hi dan ang chuan a rem dawnlo a ni.
A chunga dan tarlan ah khian “by notification in the official gazette” tih a nih miau avangin, dan ang chuan chhiah in awlna (exemption) khi dt. 14/7/2017(Gazette a chhuah ni) aţang chauhin a taka hman ţan theih a lo ni ang.

TLANGKAWMNA:
Kimchangin a ţul zawng zawng kan tarlang senglo ang, Official Gazette nihphung leh chhuah dan phung tlangpui zawr zawr chauh kan tarlang hman ta rih a, mipui ţhat tlan berna tura dan siam a, chuti ang dan hmang in-sawrkarna ‘Rule of law’ kan tih te, Ramchhung dan chu a ţha emaw ţhalo emaw, tunhma a chi inthliarna dan ‘Apartheid’ ang te mihring dikna chanvo kalh chung chunga dan anih vanga khawng taka kenkawh ngawtna ‘Rule by law’ te, thuneihna dan in min pek ni hauh silo huangah thupek kan lo siam ve chamchi na ‘Rule by man’ te pawh kan la sawi zui leh ang chu.
Dam sei hauh zel ila.

Aside | Posted on by | Tagged , , , | Leave a comment

Mizoram Health Care-ah Damlo enkawl nan vbc 26 pe chhuak

• Hralth care hmang ţangkaitu zat.
• Health care sum sen zat.
• Health care hmantu zat.
• Health care bill zat leh bill hnawl zat.

Mizoram sawrkarin State Health Care Scheme a ruahman chhawr tangkaitu damlo zingah Hepatitis C leh Cancer an tam ber a, scheme hmang tangkaitu hi chhungkaw 4000 vel nia ngaih a ni. Kum kalta 2016-2017) chhung khan MSHC hnuaiah vbc 16 leh RSBY ah vbc 10 pekchhuah a ni.

Mizoram State Health Care Society thawktute hnen atanga thudawn danin nikum chhung khan health care hnuaiah hian chhungkua 115221 ziahluh a ni a, hengte hi APL chhungkua 20566 leh BPL chhungkua 20566 te an niin bill 7028 (Rs. 220,786,069) an dawn zinga bill 6603 te chu pawm an ni a, an pawisa pekchhuah hi Rs. 169,878,390 a ni.

Nikum chhung hian MSHC hnuaiah hian bill hnawl 425 a awm bawk. Nikum chhung vek khan RSBY hnuaiah dilna (claim) 21235 lutin 785 hnawl a nih hnuah mi 20251 te dilna chu pawm a niin Rs. 108,050,862 chu pekchhuah a ni a. Tunah hian buaipui mek 195 awmin hei hi a pawisa chuan Rs. 1,275,100 a tling a ni. MSHCS thawktute chuan Mizoram sawrkarin health care a siam ang chu an hriat chinah India rama tha ber niin an sawi a, Rs. nuai 3 thleng bill theihna chu khawi state ah mah a awm an hriat loh thu an sawi.

Zalen zawhna chhangin Mizoram State Health Care Society thawktute chuan a tlangpuiin bill hnawl te hi sawrkarin bill theih tura a tarlan zinga tel lo (critical illness pawn) te an ni tlangpui a. Hei bakah hian an policy lak aia tam rawn bill te an ni tih an sawi. Mizoram State Health Care Society thawktute chuan state health care chu sawrkar hnathawk ve lo chhungkuate tan chauh a ni tiin hetih lai hian mi thenkhat an nupui/pasal sawrkar hnathawk leh damloh nikhua pawha sawrkara MR bill tho si, mahse Health Care Society a bill nawn ching an awm niin an sawi a. Heng mite hi an tan finfiah/zawn chhuah an har nia sawiin sawrkar hnathawk lo chhungkuate tan a nih ang ngeia ti tawh lo turin an ngen tih an sawi bawk.

Mizoram State Health Care Society thawktute chuan damdawi in lam atanga bill an dawnte chu a tlangpuiin thla khat chhung velin an peih hman niin an sawi a. Kumin kumthar atang chuan e-payment hmangin Account-ah thun zel a nih tawh dawn avangin chak zawka hna an thawh theih an beisei tih an sawi a. Khawi Bank-ah pawh an thun theih rualin Mizoram Rural Bank-ah chuan thun a awlsamin MRB-ah hian Account nei thei se an duh ber tih Zalen an hrilh bawk.

RSBY hi sawrkar laipui scheme niin BPL leh job card neite chu smart card an siamna Rs. 30 chawiin Rs. 30,000 thleng a thlawnin inenkawlna an dawng thei a, a bak an dawng dawn a nih chuan MSHCS-ah an inziahluh ve a ngai a, inziahluhna man hi BPL-ah chuan a free a ni.

Mizoram State Health Care Society ah hian Rs. 500, Rs. 750 leh Rs. 1000 hmangtein enrollment tih theih a ni a, enrollment fee azirin Rs. 100,000, Rs. 200,000 leh Rs. 300,000 te bill theih a ni. Mizoram damdawi in zingah Aizawl Hospital leh Care-ah te chuan health care scheme hi a hman ve theih loh a ni.

Aside | Posted on by | Tagged , , , , | Leave a comment

RUIHHLO NENA INDO PUAN AN REL, CM IN RUIHLO CASE-AH DAN HREMI TEN HNAM RILRU PU TURIN A NGEN*

4th August, 2017 chawhnu khan NLUP Conference Hall-ah Central YMA buatsaih in ruihlo vanga Mizoram in harsatna lian tak atawh mek te engtia hmachhawn zel tur nge tih inrawnkhawmna an nei a, he hun ah hian ruihhlo nena indo puan an rel a. Chief Minister Lal Thanhawla chuan ruihhlo case bik ah ukil te hnam rilru pu turin a ngen bawk.

Ruihlo chungchanga inrawnkhawmna hi CYMA President Pu Lalbiakzuala’n kaihruaiin CYMA General Secretary Pu Lalhmachuana’n inrawnkhawmna neih an duh chhan te a sawifiah hnuah CYMA Vice President Pu Vanlaruata’n Mizorama ruihlo ngaite enkawl dan leh ruihlo tawlh/zuartute hremna chungchang a tarlang hmasa a ni.

Chief Minister Pu Lal Thanhawla chuan “Ruihlo chu YMA chauh ni lovin sawrkar, kohhran, khawtlang leh chhungtinte thukhat vuaa do chhunzawm pawimawh a tih thu leh dan zawh famkima do theih pawh a nih loh avangin ruihlo zuartute pawh rei hrem an ni hleithei lova a rilru nat thlak tak zet” a ti a. “Ruihhlo tawlh tute leh zuartute danbeh an nih a, hremna na zawk hmachhawn tir an nih theih nan dan hremi te leh ukil te pawhin hnam rilru puin ruihlo case bikah chuan eizawnna thil pawh nise kut sil ngam tawh turin Zoram mipui te’n kan ngen tak meuh a ni” a ti.

Ruihlo vanga Mizoram harsatna chu sorkarin a ngai thutak hle a ni tih sawiin Chief minister Pu Lal thanhawla chuan ngaihtuahna thar a siam mek tih a sawi a. “Ruihlo do puan chu thil sawt zawkah ngaih a nih chuan hmalak chhunzawm zel dan turah CYMA leh Kohhran thawhpui an ni ang” a ti.

Ruihlo kaihhnawih a CYMA in inrawnkhawmna a buatsaihah hian Minister, MLA, Official te, kohhran hruaitute leh YMA hotu te’n an ngaihdan sawiin rawtna an thawh hlawm a ni.

He inrawn khawmnaah hian Kan ram leh hnam tichhe mektu ruihhlo nen indo puan a, Mizoram pumah ruihhlo do beihpui thlak ţha an ti a, hemi atana ruahmanna siam tur Core Committee Central YMA in lo dinin Action Plan lo siam se tiin thu an dah a ni.

CYMA statistics lakkhawmin a tarlan dan chuan – kum 1984 aţanga kumin August thla tir thleng khan ruihlo vanga thi Mizoramah mi 1,456 an awm tawh a, heng zinga mi 156 te chu hmeichhia an ni. Tun dinhmunah Mizoram chhunga Home, Centre leh Jail-ah te ruihlo vanga talbuai mi 2080 lai an awm a. CYMA hnuaia SRS hmalakna chuan Aizawl khawpuiah ruihlo zuartu, man nawn hlawh deuh mi 10 vel an awm tih tarlangin an tan rei loh thin zia te a tarlang a. kum 2005 aţanga 2017 thlenga YMA in Heroin an man tawh zat chu hawng 752, (kg 12 hu) a ni tih tarlan a ni bawk.

Author : Vanneihthanga Vanchhawng    

Aside | Posted on by | Tagged , , , , , | Leave a comment